੧. ਚਿਤ੍ਤਲਤਾਵਿਮਾਨਵਣ੍ਣਨਾ

ਯਥਾ ਵਨਂ ਚਿਤ੍ਤਲਤਂ ਪਭਾਸਤੀਤਿ ਚਿਤ੍ਤਲਤਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਸਾਵਤ੍ਥਿਯਂ ਅਞ੍ਞਤਰੋ ਉਪਾਸਕੋ ਦਲਿਦ੍ਦੋ ਅਪ੍ਪਭੋਗੋ ਪਰੇਸਂ ਕਮ੍ਮਂ ਕਤ੍ਵਾ ਜੀਵਤਿ. ਸੋ ਸਦ੍ਧੋ ਪਸਨ੍ਨੋ ਜਿਣ੍ਣੇ ਵੁਡ੍ਢੇ ਮਾਤਾਪਿਤਰੋ ਪੋਸੇਨ੍ਤੋ ‘‘ਇਤ੍ਥਿਯੋ ਨਾਮ ਪਤਿਕੁਲੇ ਠਿਤਾ ਇਸ੍ਸਰਿਯਂ ਕਰੋਨ੍ਤਿ, ਸਸ੍ਸੁਸਸੁਰਾਨਂ ਮਨਾਪਚਾਰਿਨਿਯੋ ਦੁਲ੍ਲਭਾ’’ਤਿ ਮਾਤਾਪਿਤੂਨਂ ਚਿਤ੍ਤਦੁਕ੍ਖਂ ਪਰਿਹਰਨ੍ਤੋ ਦਾਰਪਰਿਗ੍ਗਹਂ ਅਕਤ੍ਵਾ ਸਯਮੇਵ ਨੇ ਉਪਟ੍ਠਹਤਿ, ਸੀਲਾਨਿ ਰਕ੍ਖਤਿ, ਉਪੋਸਥਂ ਉਪਵਸਤਿ, ਯਥਾਵਿਭਵਂ ਦਾਨਾਨਿ ਦੇਤਿ. ਸੋ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਦ੍ਵਾਦਸਯੋਜਨਿਕੇ ਵਿਮਾਨੇ ਨਿਬ੍ਬਤ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨ ਗਨ੍ਤ੍ਵਾ ਕਤਕਮ੍ਮਂ ਇਮਾਹਿ ਗਾਥਾਹਿ ਪਟਿਪੁਚ੍ਛਿ –

੧੧੧੪. ‘‘ਯਥਾ ਵਨਂ ਚਿਤ੍ਤਲਤਂ ਪਭਾਸਤਿ, ਉਯ੍ਯਾਨਸੇਟ੍ਠਂ ਤਿਦਸਾਨਮੁਤ੍ਤਮਂ;

ਤਥੂਪਮਂ ਤੁਯ੍ਹਮਿਦਂ ਵਿਮਾਨਂ, ਓਭਾਸਯਂ ਤਿਟ੍ਠਤਿ ਅਨ੍ਤਲਿਕ੍ਖੇ.

੧੧੧੫. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੧੧੬. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੧੧੭. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਦਲਿਦ੍ਦੋ ਅਤਾਣੋ ਕਪਣੋ ਕਮ੍ਮਕਰੋ ਅਹੋਸਿਂ;

ਜਿਣ੍ਣੇ ਚ ਮਾਤਾਪਿਤਰੋ ਅਭਾਰਿਂ, ਪਿਯਾ ਚ ਮੇ ਸੀਲਵਨ੍ਤੋ ਅਹੇਸੁਂ;

ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤੋ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.

੧੧੧੮. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਸੋਪਿ ਤਸ੍ਸ ਬ੍ਯਾਕਾਸਿ. ਸੇਸਂ ਵੁਤ੍ਤਨਯਮੇਵ.

ਚਿਤ੍ਤਲਤਾਵਿਮਾਨਵਣ੍ਣਨਾ ਨਿਟ੍ਠਿਤਾ.