੧੦. (ਉਤ੍ਤਰ) ਪਾਯਾਸਿਵਿਮਾਨਵਣ੍ਣਨਾ
ਯਾ ਦੇਵਰਾਜਸ੍ਸ ਸਭਾ ਸੁਧਮ੍ਮਾਤਿ ਉਤ੍ਤਰਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਪਰਿਨਿਬ੍ਬੁਤੇ ਧਾਤੁਵਿਭਾਗੇ ਚ ਕਤੇ ਤਤ੍ਥ ਤਤ੍ਥ ਥੂਪੇਸੁ ਪਤਿਟ੍ਠਾਪਿਯਮਾਨੇਸੁ ਧਮ੍ਮਵਿਨਯਂ ਸਙ੍ਗਾਯਿਤੁਂ ਉਚ੍ਚਿਨਿਤ੍ਵਾ ਗਹਿਤੇਸੁ ਮਹਾਕਸ੍ਸਪਪ੍ਪਮੁਖੇਸੁ ਮਹਾਥੇਰੇਸੁ ਯਾਵ ਵਸ੍ਸੂਪਗਮਨਾ ਅਞ੍ਞੇਸੁ ਚ ਥੇਰੇਸੁ ਅਤ੍ਤਨੋ ਅਤ੍ਤਨੋ ਪਰਿਸਾਯ ਸਦ੍ਧਿਂ ਤਤ੍ਥ ਤਤ੍ਥ ਵਸਨ੍ਤੇਸੁ ਆਯਸ੍ਮਾ ਕੁਮਾਰਕਸ੍ਸਪੋ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਸੇਤਬ੍ਯਨਗਰਂ ਗਨ੍ਤ੍ਵਾ ਸਿਂਸਪਾਵਨੇ ਵਸਿ. ਅਥ ਪਾਯਾਸਿ ਰਾਜਞ੍ਞੋ ਥੇਰਸ੍ਸ ਤਤ੍ਥ ਵਸਨਭਾਵਂ ਸੁਤ੍ਵਾ ਮਹਤਾ ਜਨਕਾਯੇਨ ਪਰਿਵੁਤੋ ਤਂ ਉਪਸਙ੍ਕਮਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਨਿਸਿਨ੍ਨੋ ਅਤ੍ਤਨੋ ਦਿਟ੍ਠਿਗਤਂ ਪਵੇਦੇਸਿ. ਅਥ ਨਂ ਥੇਰੋ ਚਨ੍ਦਿਮਸੂਰਿਯੂਦਾਹਰਣਾਦੀਹਿ ਪਰਲੋਕਸ੍ਸ ਅਤ੍ਥਿਭਾਵਂ ਪਕਾਸੇਨ੍ਤੋ ਅਨੇਕਵਿਹਿਤਹੇਤੂਪਮਾਲਙ੍ਕਤਂ ਦਿਟ੍ਠਿਗਣ੍ਠਿਵਿਨਿਵੇਠਨਂ ਨਾਨਾਨਯਵਿਚਿਤ੍ਤਂ ਪਾਯਾਸਿਸੁਤ੍ਤਂ (ਦੀ. ਨਿ. ੨.੪੦੬ ਆਦਯੋ) ਦੇਸੇਤ੍ਵਾ ਤਂ ਦਿਟ੍ਠਿਸਮ੍ਪਦਾਯਂ ਪਤਿਟ੍ਠਾਪੇਸਿ.
ਸੋ ਵਿਸੁਦ੍ਧਦਿਟ੍ਠਿਕੋ ਹੁਤ੍ਵਾ ਸਮਣਬ੍ਰਾਹ੍ਮਣਕਪਣਦ੍ਧਿਕਾਦੀਨਂ ਦਾਨਂ ਦੇਨ੍ਤੋ ਅਨੁਲ਼ਾਰਜ੍ਝਾਸਯਤਾਯ ਲੂਖਂ ਅਦਾਸਿ ਘਾਸਚ੍ਛਾਦਨਮਤ੍ਤਂ ਕਣਾਜਕਂ ਬਿਲਙ੍ਗਦੁਤਿਯਂ ਸਾਣਾਨਿ ਚ ਵਤ੍ਥਾਨਿ. ਏਵਂ ਪਨ ਅਸਕ੍ਕਚ੍ਚਦਾਨਂ ਦਤ੍ਵਾ ਕਾਯਸ੍ਸ ਭੇਦਾ ਹੀਨਕਾਯਂ ਉਪਪਜ੍ਜਿ ਚਾਤੁਮਹਾਰਾਜਿਕਾਨਂ ਸਹਬ੍ਯਤਂ. ਤਸ੍ਸ ਪਨ ਕਿਚ੍ਚਾਕਿਚ੍ਚੇਸੁ ਯੁਤ੍ਤਪ੍ਪਯੁਤ੍ਤੋ ਉਤ੍ਤਰੋ ਨਾਮ ਮਾਣਵੋ ਅਹੋਸਿ ਦਾਨੇ ਬ੍ਯਾਵਟੋ. ਸੋ ਸਕ੍ਕਚ੍ਚਦਾਨਂ ਦਤ੍ਵਾ ਤਾਵਤਿਂਸਕਾਯਂ ਉਪਪਨ੍ਨੋ, ਤਸ੍ਸ ਦ੍ਵਾਦਸਯੋਜਨਿਕਂ ਵਿਮਾਨਂ ਨਿਬ੍ਬਤ੍ਤਿ. ਸੋ ਕਤਞ੍ਞੁਤਂ ਵਿਭਾਵੇਨ੍ਤੋ ਸਹ ਵਿਮਾਨੇਨ ਕੁਮਾਰਕਸ੍ਸਪਤ੍ਥੇਰਂ ਉਪਸਙ੍ਕਮਿਤ੍ਵਾ ਵਿਮਾਨਤੋ ਓਰੁਯ੍ਹ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਤਂ ਥੇਰੋ –
੧੧੦੮. ‘‘ਯਾ ਦੇਵਰਾਜਸ੍ਸ ਸਭਾ ਸੁਧਮ੍ਮਾ, ਯਤ੍ਥਚ੍ਛਤਿ ਦੇਵਸਙ੍ਘੋ ਸਮਗ੍ਗੋ;
ਤਥੂਪਮਂ ਤੁਯ੍ਹਮਿਦਂ ਵਿਮਾਨਂ, ਓਭਾਸਯਂ ਤਿਟ੍ਠਤਿ ਅਨ੍ਤਲਿਕ੍ਖੇ.
੧੧੦੯. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ…ਪੇ…
ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਗਾਥਾਹਿ ਪਟਿਪੁਚ੍ਛਿ;
੧੧੧੦. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.
੧੧੧੧. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਰਞ੍ਞੋ ਪਾਯਾਸਿਸ੍ਸ ਅਹੋਸਿਂ ਮਾਣਵੋ;
ਲਦ੍ਧਾ ਧਨਂ ਸਂਵਿਭਾਗਂ ਅਕਾਸਿਂ, ਪਿਯਾ ਚ ਮੇ ਸੀਲਵਨ੍ਤੋ ਅਹੇਸੁਂ;
ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤੋ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.
੧੧੧੨. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…
ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –
ਸੋ ਦੇਵਪੁਤ੍ਤੋ ਤਸ੍ਸ ਇਮਾਹਿ ਗਾਥਾਹਿ ਬ੍ਯਾਕਾਸਿ.
੧੧੦੮. ਤਤ੍ਥ ਦੇਵਰਾਜਸ੍ਸਾਤਿ ਸਕ੍ਕਸ੍ਸ. ਸਭਾ ਸੁਧਮ੍ਮਾਤਿ ਏਵਂਨਾਮਕਂ ਸਨ੍ਥਾਗਾਰਂ. ਯਤ੍ਥਾਤਿ ਯਸ੍ਸਂ ਸਭਾਯਂ. ਅਚ੍ਛਤੀਤਿ ਨਿਸੀਦਤਿ. ਦੇਵਸਙ੍ਘੋਤਿ ਤਾਵਤਿਂਸਦੇਵਕਾਯੋ. ਸਮਗ੍ਗੋਤਿ ਸਹਿਤੋ ਸਨ੍ਨਿਪਤਿਤੋ.
੧੧੧੧. ਪਾਯਾਸਿਸ੍ਸ ਅਹੋਸਿਂ ਮਾਣਵੋਤਿ ਪਾਯਾਸਿਰਾਜਞ੍ਞਸ੍ਸ ਕਿਚ੍ਚਾਕਿਚ੍ਚਕਰੋ ਦਹਰਤਾਯ ਮਾਣਵੋ, ਨਾਮੇਨ ਪਨ ਉਤ੍ਤਰੋ ਨਾਮ ਅਹੋਸਿਂ. ਸਂਵਿਭਾਗਂ ਅਕਾਸਿਨ੍ਤਿ ਅਹਮੇਵ ਅਭੁਞ੍ਜਿਤ੍ਵਾ ਯਥਾਲਦ੍ਧਂ ਧਨਂ ਦਾਨਮੁਖੇ ਪਰਿਚ੍ਚਜਨਵਸੇਨ ਸਂਵਿਭਜਨਂ ਅਕਾਸਿਂ. ਅਨ੍ਨਞ੍ਚ ਪਾਨਞ੍ਚ ਪਰਿਚ੍ਚਜਨ੍ਤੋਤਿ ਵਚਨਸੇਸੋ. ਅਥ ਵਾ ਦਾਨਂ ਵਿਪੁਲਂ ਅਦਾਸਿਂ. ਕਥਂ? ਸਕ੍ਕਚ੍ਚਂ. ਕੀਦਿਸਂ? ਅਨ੍ਨਞ੍ਚ ਪਾਨਞ੍ਚਾਤਿ ਯੋਜੇਤਬ੍ਬਂ.
(ਉਤ੍ਤਰ) ਪਾਯਾਸਿਵਿਮਾਨਵਣ੍ਣਨਾ ਨਿਟ੍ਠਿਤਾ.
ਇਤਿ ਪਰਮਤ੍ਥਦੀਪਨਿਯਾ ਖੁਦ੍ਦਕ-ਅਟ੍ਠਕਥਾਯ ਵਿਮਾਨਵਤ੍ਥੁਸ੍ਮਿਂ
ਦਸਵਤ੍ਥੁਪਟਿਮਣ੍ਡਿਤਸ੍ਸ ਛਟ੍ਠਸ੍ਸ ਪਾਯਾਸਿਵਗ੍ਗਸ੍ਸ
ਅਤ੍ਥਵਣ੍ਣਨਾ ਨਿਟ੍ਠਿਤਾ.