੮. ਪਠਮਸੂਚਿਵਿਮਾਨਵਣ੍ਣਨਾ

ਉਚ੍ਚਮਿਦਂ ਮਣਿਥੂਣਂ ਵਿਮਾਨਨ੍ਤਿ ਸੂਚਿਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਚੀਵਰਕਮ੍ਮਂ ਕਾਤਬ੍ਬਂ ਹੋਤਿ, ਅਤ੍ਥੋ ਚ ਹੋਤਿ ਸੂਚਿਯਾ. ਸੋ ਰਾਜਗਹੇ ਪਿਣ੍ਡਾਯ ਚਰਨ੍ਤੋ ਕਮ੍ਮਾਰਸ੍ਸ ਗੇਹਦ੍ਵਾਰੇ ਅਟ੍ਠਾਸਿ. ਤਂ ਦਿਸ੍ਵਾ ਕਮ੍ਮਾਰੋ ਆਹ ‘‘ਕੇਨ, ਭਨ੍ਤੇ, ਅਤ੍ਥੋ’’ਤਿ? ‘‘ਚੀਵਰਕਮ੍ਮਂ ਕਾਤਬ੍ਬਂ ਅਤ੍ਥਿ, ਸੂਚਿਯਾ ਅਤ੍ਥੋ’’ਤਿ. ਕਮ੍ਮਾਰੋ ਪਸਨ੍ਨਮਾਨਸੋ ਕਤਪਰਿਯੋਸਿਤਾ ਦ੍ਵੇ ਸੂਚਿਯੋ ਦਤ੍ਵਾ ‘‘ਪੁਨਪਿ, ਭਨ੍ਤੇ, ਸੂਚਿਯਾ ਅਤ੍ਥੇ ਸਤਿ ਮਮ ਆਚਿਕ੍ਖੇਯ੍ਯਾਥਾ’’ਤਿ ਵਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿ. ਥੇਰੋ ਤਸ੍ਸ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸੋ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਉਪ੍ਪਜ੍ਜਿ. ਅਥ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋ ਤਂ ਦੇਵਪੁਤ੍ਤਂ ਇਮਾਹਿ ਗਾਥਾਹਿ ਪੁਚ੍ਛਿ –

੯੪੪. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੪੮. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੯੪੯. ‘‘ਯਂ ਦਦਾਤਿ ਨ ਤਂ ਹੋਤਿ, ਯਞ੍ਚੇਵ ਦਜ੍ਜਾ ਤਞ੍ਚੇਵ ਸੇਯ੍ਯੋ;

ਸੂਚਿ ਦਿਨ੍ਨਾ ਸੂਚਿਮੇਵ ਸੇਯ੍ਯੋ.

੯੫੦. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੪੯. ਤਤ੍ਥ ਯਂ ਦਦਾਤੀਤਿ ਯਾਦਿਸਂ ਦੇਯ੍ਯਧਮ੍ਮਂ ਦਦਾਤਿ. ਨ ਤਂ ਹੋਤੀਤਿ ਤਸ੍ਸ ਤਾਦਿਸਮੇਵ ਫਲਂ ਨ ਹੋਤਿ. ਅਥ ਖੋ ਖੇਤ੍ਤਸਮ੍ਪਤ੍ਤਿਯਾ ਚ ਚਿਤ੍ਤਸਮ੍ਪਤ੍ਤਿਯਾ ਚ ਤਤੋ ਵਿਪੁਲਤਰਂ ਉਲ਼ਾਰਤਰਮੇਵ ਫਲਂ ਹੋਤਿ. ਤਸ੍ਮਾ ਯਞ੍ਚੇਵ ਦਜ੍ਜਾ ਤਞ੍ਚੇਵ ਸੇਯ੍ਯੋਤਿ ਯਂਕਿਞ੍ਚਿਦੇਵ ਵਿਜ੍ਜਮਾਨਂ ਦਜ੍ਜਾ ਦਦੇਯ੍ਯ, ਤਞ੍ਚੇਵ ਤਦੇਵ ਸੇਯ੍ਯੋ, ਯਸ੍ਸ ਕਸ੍ਸਚਿ ਅਨਵਜ੍ਜਸ੍ਸ ਦੇਯ੍ਯਧਮ੍ਮਸ੍ਸ ਦਾਨਮੇਵ ਸੇਯ੍ਯੋ, ਕਸ੍ਮਾ? ਮਯਾ ਹਿ ਸੂਚਿ ਦਿਨ੍ਨਾ ਸੂਚਿਮੇਵ ਸੇਯ੍ਯੋ, ਸੂਚਿਦਾਨਮੇਵ ਮਯ੍ਹਂ ਸੇਯ੍ਯਂ ਜਾਤਂ, ਯਤੋ ਅਯਮੀਦਿਸੀ ਸਮ੍ਪਤ੍ਤਿ ਲਦ੍ਧਾਤਿ ਅਧਿਪ੍ਪਾਯੋ.

ਸੂਚਿਵਿਮਾਨਵਣ੍ਣਨਾ ਨਿਟ੍ਠਿਤਾ.