੪. ਕਕ੍ਕਟਕਰਸਦਾਯਕਵਿਮਾਨਵਣ੍ਣਨਾ

ਉਚ੍ਚਮਿਦਂ ਮਣਿਥੂਣਂ ਵਿਮਾਨਨ੍ਤਿ ਕਕ੍ਕਟਕਰਸਦਾਯਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਆਰਦ੍ਧਵਿਪਸ੍ਸਕੋ ਕਣ੍ਣਸੂਲੇਨ ਪੀਲ਼ਿਤੋ ਅਕਲ੍ਲਸਰੀਰਤਾਯ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤੁਂ ਨਾਸਕ੍ਖਿ, ਵੇਜ੍ਜੇਹਿ ਵੁਤ੍ਤਵਿਧਿਨਾ ਭੇਸਜ੍ਜੇ ਕਤੇਪਿ ਰੋਗੋ ਨ ਵੂਪਸਮਿ. ਸੋ ਭਗਵਤੋ ਏਤਮਤ੍ਥਂ ਆਰੋਚੇਸਿ. ਅਥਸ੍ਸ ਭਗਵਾ ‘‘ਕਕ੍ਕਟਕਰਸਭੋਜਨਂ ਸਪ੍ਪਾਯ’’ਨ੍ਤਿ ਞਤ੍ਵਾ ਆਹ ‘‘ਗਚ੍ਛ ਤ੍ਵਂ ਭਿਕ੍ਖੁ ਮਗਧਖੇਤ੍ਤੇ ਪਿਣ੍ਡਾਯ ਚਰਾਹੀ’’ਤਿ.

ਸੋ ਭਿਕ੍ਖੁ ‘‘ਦੀਘਦਸ੍ਸਿਨਾ ਅਦ੍ਧਾ ਕਿਞ੍ਚਿ ਦਿਟ੍ਠਂ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ‘‘ਸਾਧੁ ਭਨ੍ਤੇ’’ਤਿ ਭਗਵਤੋ ਪਟਿਸ੍ਸੁਣਿਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਪਤ੍ਤਚੀਵਰਮਾਦਾਯ ਮਗਧਖੇਤ੍ਤਂ ਗਨ੍ਤ੍ਵਾ ਅਞ੍ਞਤਰਸ੍ਸ ਖੇਤ੍ਤਪਾਲਸ੍ਸ ਕੁਟਿਯਾ ਦ੍ਵਾਰੇ ਪਿਣ੍ਡਾਯ ਅਟ੍ਠਾਸਿ. ਸੋ ਚ ਖੇਤ੍ਤਪਾਲੋ ਕਕ੍ਕਟਕਰਸਂ ਸਮ੍ਪਾਦੇਤ੍ਵਾ ਭਤ੍ਤਞ੍ਚ ਪਚਿਤ੍ਵਾ ‘‘ਥੋਕਂ ਵਿਸ੍ਸਮਿਤ੍ਵਾ ਭੁਞ੍ਜਿਸ੍ਸਾਮੀ’’ਤਿ ਨਿਸਿਨ੍ਨੋ ਥੇਰਂ ਦਿਸ੍ਵਾ ਪਤ੍ਤਂ ਗਹੇਤ੍ਵਾ ਕੁਟਿਕਾਯਂ ਨਿਸੀਦਾਪੇਤ੍ਵਾ ਕਕ੍ਕਟਕਰਸਭਤ੍ਤਂ ਅਦਾਸਿ. ਥੇਰਸ੍ਸ ਤਂ ਭਤ੍ਤਂ ਥੋਕਂ ਭੁਤ੍ਤਸ੍ਸਯੇਵ ਕਣ੍ਣਸੂਲਂ ਪਟਿਪ੍ਪਸ੍ਸਮ੍ਭਿ, ਘਟਸਤੇਨ ਨ੍ਹਾਤੋ ਵਿਯ ਅਹੋਸਿ. ਸੋ ਸਪ੍ਪਾਯਾਹਾਰਵਸੇਨ ਚਿਤ੍ਤਫਾਸੁਕਂ ਲਭਿਤ੍ਵਾ ਵਿਪਸ੍ਸਨਾਵਸੇਨ ਚਿਤ੍ਤਂ ਅਭਿਨਿਨ੍ਨਾਮੇਨ੍ਤੋ ਅਪਰਿਯੋਸਿਤੇਯੇਵ ਭੋਜਨੇ ਅਨਵਸੇਸਤੋ ਆਸਵੇ ਖੇਪੇਤ੍ਵਾ ਅਰਹਤ੍ਤੇ ਪਤਿਟ੍ਠਾਯ ਖੇਤ੍ਤਪਾਲਂ ਆਹ ‘‘ਉਪਾਸਕ, ਤਵ ਪਿਣ੍ਡਪਾਤਭੋਜਨੇਨ ਮਯ੍ਹਂ ਰੋਗੋ ਵੂਪਸਨ੍ਤੋ, ਕਾਯਚਿਤ੍ਤਂ ਕਲ੍ਲਂ ਜਾਤਂ, ਤ੍ਵਮ੍ਪਿ ਇਮਸ੍ਸ ਪੁਞ੍ਞਸ੍ਸ ਫਲੇਨ ਵਿਗਤਕਾਯਚਿਤ੍ਤਦੁਕ੍ਖੋ ਭਵਿਸ੍ਸਸੀ’’ਤਿ ਵਤ੍ਵਾ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ.

ਖੇਤ੍ਤਪਾਲੋ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਦ੍ਵਾਦਸਯੋਜਨਿਕੇ ਮਣਿਥਮ੍ਭੇ ਕਨਕਵਿਮਾਨੇ ਸਤ੍ਤਸਤਕੂਟਾਗਾਰਪਟਿਮਣ੍ਡਿਤੇ ਵੇਲ਼ੁਰਿਯਮਯਗਬ੍ਭੇ ਨਿਬ੍ਬਤ੍ਤਿ, ਦ੍ਵਾਰੇ ਚਸ੍ਸ ਯਥੂਪਚਿਤਕਮ੍ਮਸਂਸੂਚਕੋ ਮੁਤ੍ਤਾਸਿਕ੍ਕਾਗਤੋ ਸੁਵਣ੍ਣਕਕ੍ਕਟਕੋ ਓਲਮ੍ਬਮਾਨੋ ਅਟ੍ਠਾਸਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਪੁਬ੍ਬੇ ਵੁਤ੍ਤਨਯੇਨ ਤਤ੍ਥ ਗਤੋ ਤਂ ਦਿਸ੍ਵਾ ਇਮਾਹਿ ਗਾਥਾਹਿ ਪੁਚ੍ਛਿ –

੯੧੦. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸ ਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.

੯੧੧. ‘‘ਤਤ੍ਥਚ੍ਛਸਿ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;

ਦਿਬ੍ਬਾ ਰਸਾ ਕਾਮਗੁਣੇਤ੍ਥ ਪਞ੍ਚ, ਨਾਰਿਯੋ ਚ ਨਚ੍ਚਨ੍ਤਿ ਸੁਵਣ੍ਣਛਨ੍ਨਾ.

੯੧੨. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੯੧੩. ‘‘ਪੁਚ੍ਛਾਮਿ ਤਂ ਦੇਵ ਮਹਾਨੁਭਾਵ, ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

ਸੋਪਿਸ੍ਸ ਬ੍ਯਾਕਾਸਿ, ਤਂ ਦਸ੍ਸੇਤੁਂ –

੯੧੪. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ, ਮੋਗ੍ਗਲ੍ਲਾਨੇਨ ਪੁਚ੍ਛਿਤੋ;

ਪਞ੍ਹਂ ਪੁਟ੍ਠੋ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. – ਵੁਤ੍ਤਂ;

੯੧੫. ‘‘ਸਤਿਸਮੁਪ੍ਪਾਦਕਰੋ, ਦ੍ਵਾਰੇ ਕਕ੍ਕਟਕੋ ਠਿਤੋ;

ਨਿਟ੍ਠਿਤੋ ਜਾਤਰੂਪਸ੍ਸ, ਸੋਭਤਿ ਦਸਪਾਦਕੋ.

੯੧੬. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੯੧੭. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤੋ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੧੦. ਤਤ੍ਥ ਉਚ੍ਚਨ੍ਤਿ ਅਚ੍ਚੁਗ੍ਗਤਂ. ਮਣਿਥੂਣਨ੍ਤਿ ਪਦੁਮਰਾਗਾਦਿਮਣਿਮਯਥਮ੍ਭਂ. ਸਮਨ੍ਤਤੋਤਿ ਚਤੂਸੁਪਿ ਪਸ੍ਸੇਸੁ. ਰੁਚਕਤ੍ਥਤਾਤਿ ਤਸ੍ਸਂ ਤਸ੍ਸਂ ਭੂਮਿਯਂ ਸੁਵਣ੍ਣਫਲਕੇਹਿ ਅਤ੍ਥਤਾ.

੯੧੧. ਪਿਵਸਿ ਖਾਦਸਿ ਚਾਤਿ ਕਾਲੇਨ ਕਾਲਂ ਉਪਯੁਜ੍ਜਮਾਨਂ ਗਨ੍ਧਪਾਨਂ ਸੁਧਾਭੋਜਨਞ੍ਚ ਸਨ੍ਧਾਯ ਵਦਤਿ. ਪਵਦਨ੍ਤੀਤਿ ਪਵਜ੍ਜਨ੍ਤਿ. ਦਿਬ੍ਬਾ ਰਸਾ ਕਾਮਗੁਣੇਤ੍ਥ ਪਞ੍ਚਾਤਿ ਦਿਬ੍ਬਾ ਰਸਾ ਅਨਪ੍ਪਕਾ ਪਞ੍ਚ ਕਾਮਗੁਣਾ ਏਤ੍ਥ ਏਤਸ੍ਮਿਂ ਤਵ ਵਿਮਾਨੇ ਸਂਵਿਜ੍ਜਨ੍ਤੀਤਿ ਅਤ੍ਥੋ. ਸੁਵਣ੍ਣਛਨ੍ਨਾਤਿ ਹੇਮਾਭਰਣਵਿਭੂਸਿਤਾ.

੯੧੫. ਸਤਿਸਮੁਪ੍ਪਾਦਕਰੋਤਿ ਸਤੁਪ੍ਪਾਦਕਰੋ, ਯੇਨ ਪੁਞ੍ਞਕਮ੍ਮੇਨ ਅਯਂ ਦਿਬ੍ਬਸਮ੍ਪਤ੍ਤਿ ਮਯਾ ਲਦ੍ਧਾ, ਤਤ੍ਥ ਸਤੁਪ੍ਪਾਦਸ੍ਸ ਕਾਰਕੋ, ‘‘ਕਕ੍ਕਟਕਰਸਦਾਨੇਨ ਅਯਂ ਤਯਾ ਸਮ੍ਪਤ੍ਤਿ ਲਦ੍ਧਾ’’ਤਿ ਏਵਂ ਸਤੁਪ੍ਪਾਦਂ ਕਰੋਨ੍ਤੋਤਿ ਅਤ੍ਥੋ. ਨਿਟ੍ਠਿਤੋ ਜਾਤਰੂਪਸ੍ਸਾਤਿ ਜਾਤਰੂਪੇਨ ਸਿਦ੍ਧੋ ਜਾਤਰੂਪਮਯੋ. ਏਕਮੇਕਸ੍ਮਿਂ ਪਸ੍ਸੇ ਪਞ੍ਚ ਪਞ੍ਚ ਕਤ੍ਵਾ ਦਸ ਪਾਦਾ ਏਤਸ੍ਸਾਤਿ ਦਸਪਾਦਕੋ ਦ੍ਵਾਰੇ ਕਕ੍ਕਟਕੋ ਠਿਤੋ ਸੋਭਤਿ. ਸੋ ਏਵ ਮਮ ਪੁਞ੍ਞਕਮ੍ਮਂ ਤਾਦਿਸਾਨਂ ਮਹੇਸੀਨਂ ਵਿਭਾਵੇਤਿ, ਨ ਏਤ੍ਥ ਮਯਾ ਵਤ੍ਤਬ੍ਬਂ ਅਤ੍ਥੀਤਿ ਅਧਿਪ੍ਪਾਯੋ. ਤੇਨਾਹ ‘‘ਤੇਨ ਮੇਤਾਦਿਸੋ ਵਣ੍ਣੋ’’ਤਿਆਦਿ. ਸੇਸਂ ਵੁਤ੍ਤਨਯਮੇਵ.

ਕਕ੍ਕਟਕਰਸਦਾਯਕਵਿਮਾਨਵਣ੍ਣਨਾ ਨਿਟ੍ਠਿਤਾ.