੫. ਦ੍ਵਾਰਪਾਲਕਵਿਮਾਨਵਣ੍ਣਨਾ

ਉਚ੍ਚਮਿਦਂ ਮਣਿਥੂਣਨ੍ਤਿ ਦ੍ਵਾਰਪਾਲਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਚ ਸਮਯੇਨ ਰਾਜਗਹੇ ਅਞ੍ਞਤਰੋ ਉਪਾਸਕੋ ਚਤ੍ਤਾਰਿ ਨਿਚ੍ਚਭਤ੍ਤਾਨਿ ਸਙ੍ਘਸ੍ਸ ਦੇਤਿ. ਤਸ੍ਸ ਪਨ ਗੇਹਂ ਪਰਿਯਨ੍ਤੇ ਠਿਤਂ ਚੋਰਭਯੇਨ ਯੇਭੁਯ੍ਯੇਨ ਪਿਹਿਤਦ੍ਵਾਰਮੇਵ ਹੋਤਿ. ਭਿਕ੍ਖੂ ਗਨ੍ਤ੍ਵਾ ਕਦਾਚਿ ਦ੍ਵਾਰਸ੍ਸ ਪਿਹਿਤਤ੍ਤਾ ਭਤ੍ਤਂ ਅਲਦ੍ਧਾਵ ਪਟਿਗਚ੍ਛਨ੍ਤਿ. ਉਪਾਸਕੋ ਭਰਿਯਂ ਆਹ ‘‘ਕਿਂ, ਭਦ੍ਦੇ, ਅਯ੍ਯਾਨਂ ਸਕ੍ਕਚ੍ਚਂ ਭਿਕ੍ਖਾ ਦੀਯਤੀ’’ਤਿ? ਸਾ ਆਹ ‘‘ਏਕੇਸੁ ਦਿਵਸੇਸੁ ਅਯ੍ਯਾ ਨਾਗਮਿਂਸੂ’’ਤਿ. ‘‘ਕਿਂ ਕਾਰਣ’’ਨ੍ਤਿ? ‘‘ਦ੍ਵਾਰਸ੍ਸ ਪਿਹਿਤਤ੍ਤਾ ਮਞ੍ਞੇ’’ਤਿ. ਤਂ ਸੁਤ੍ਵਾ ਉਪਾਸਕੋ ਸਂਵੇਗਪ੍ਪਤ੍ਤੋ ਹੁਤ੍ਵਾ ਏਕਂ ਪੁਰਿਸਂ ਦ੍ਵਾਰਪਾਲਂ ਕਤ੍ਵਾ ਠਪੇਸਿ ‘‘ਤ੍ਵਂ ਅਜ੍ਜਤੋ ਪਟ੍ਠਾਯ ਦ੍ਵਾਰਂ ਰਕ੍ਖਨ੍ਤੋ ਨਿਸੀਦ, ਯਦਾ ਚ ਅਯ੍ਯਾ ਆਗਮਿਸ੍ਸਨ੍ਤਿ, ਤਦਾ ਤੇ ਪਵੇਸੇਤ੍ਵਾ ਪਵਿਟ੍ਠਾਨਂ ਨੇਸਂ ਪਤ੍ਤਪਟਿਗ੍ਗਹਣਆਸਨਪਞ੍ਞਾਪਨਾਦਿ ਸਬ੍ਬਂ ਯੁਤ੍ਤਪਯੁਤ੍ਤਂ ਜਾਨਾਹੀ’’ਤਿ. ਸੋ ‘‘ਸਾਧੂ’’ਤਿ ਤਥਾ ਕਰੋਨ੍ਤੋ ਭਿਕ੍ਖੂਨਂ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਉਪ੍ਪਨ੍ਨਸਦ੍ਧੋ ਕਮ੍ਮਫਲਂ ਸਦ੍ਦਹਿਤ੍ਵਾ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਹਿ, ਸਕ੍ਕਚ੍ਚਂ ਭਿਕ੍ਖੂ ਉਪਟ੍ਠਹਿ.

ਅਪਰਭਾਗੇ ਨਿਚ੍ਚਭਤ੍ਤਦਾਯਕੋ ਉਪਾਸਕੋ ਕਾਲਂ ਕਤ੍ਵਾ ਯਾਮੇਸੁ ਨਿਬ੍ਬਤ੍ਤਿ. ਦ੍ਵਾਰਪਾਲੋ ਪਨ ਸਕ੍ਕਚ੍ਚਂ ਭਿਕ੍ਖੂਨਂ ਉਪਟ੍ਠਹਿਤ੍ਵਾ ਪਰਸ੍ਸ ਪਰਿਚ੍ਚਾਗੇ ਵੇਯ੍ਯਾਵਚ੍ਚਕਰਣੇਨ ਅਨੁਮੋਦਨੇਨ ਚ ਤਾਵਤਿਂਸੇਸੁ ਉਪ੍ਪਜ੍ਜਿ. ਤਸ੍ਸ ਦ੍ਵਾਦਸਯੋਜਨਿਕਂ ਕਨਕਵਿਮਾਨਨ੍ਤਿਆਦਿ ਸਬ੍ਬਂ ਕਕ੍ਕਟਕਵਿਮਾਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਪੁਚ੍ਛਾਵਿਸ੍ਸਜ੍ਜਨਗਾਥਾ ਏਵਮਾਗਤਾ –

੯੧੮. ‘‘ਉਚ੍ਚਮਿਦਂ ਮਣਿਥੂਣਂ ਵਿਮਾਨਂ, ਸਮਨ੍ਤਤੋ ਦ੍ਵਾਦਸ ਯੋਜਨਾਨਿ;

ਕੂਟਾਗਾਰਾ ਸਤ੍ਤਸਤਾ ਉਲ਼ਾਰਾ, ਵੇਲ਼ੁਰਿਯਥਮ੍ਭਾ ਰੁਚਕਤ੍ਥਤਾ ਸੁਭਾ.

੯੧੯. ‘‘ਤਤ੍ਥਚ੍ਛਸਿ ਪਿਵਸਿ ਖਾਦਸਿ ਚ, ਦਿਬ੍ਬਾ ਚ ਵੀਣਾ ਪਵਦਨ੍ਤਿ ਵਗ੍ਗੁਂ;

ਦਿਬ੍ਬਾ ਰਸਾ ਕਾਮਗੁਣੇਤ੍ਥ ਪਞ੍ਚ, ਨਾਰਿਯੋ ਚ ਨਚ੍ਚਨ੍ਤਿ ਸੁਵਣ੍ਣਛਨ੍ਨਾ.

੯੨੦. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੨੨. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੯੨੩. ‘‘ਦਿਬ੍ਬਂ ਮਮਂ ਵਸ੍ਸਸਹਸ੍ਸਮਾਯੁ, ਵਾਚਾਭਿਗੀਤਂ ਮਨਸਾ ਪਵਤ੍ਤਿਤਂ;

ਏਤ੍ਤਾਵਤਾ ਠਸ੍ਸਤਿ ਪੁਞ੍ਞਕਮ੍ਮੋ, ਦਿਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤੋ.

੯੨੪. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੨੩. ਤਤ੍ਥ ਦਿਬ੍ਬਂ ਮਮਂ ਵਸ੍ਸਸਹਸ੍ਸਮਾਯੂਤਿ ਯਸ੍ਮਿਂ ਦੇਵਨਿਕਾਯੇ ਸਯਂ ਉਪ੍ਪਨ੍ਨੋ, ਤੇਸਂ ਤਾਵਤਿਂਸਦੇਵਾਨਂ ਆਯੁਪ੍ਪਮਾਣਮੇਵ ਵਦਤਿ. ਤੇਸਞ੍ਹਿ ਮਨੁਸ੍ਸਾਨਂ ਗਣਨਾਯ ਵਸ੍ਸਸਤਂ ਏਕੋ ਰਤ੍ਤਿਦਿਵੋ, ਤਾਯ ਰਤ੍ਤਿਯਾ ਤਿਂਸਰਤ੍ਤਿਕੋ ਮਾਸੋ, ਤੇਨ ਮਾਸੇਨ ਦ੍ਵਾਦਸਮਾਸਿਕੋ ਸਂਵਚ੍ਛਰੋ, ਤੇਨ ਸਂਵਚ੍ਛਰੇਨ ਸਹਸ੍ਸਸਂਵਚ੍ਛਰਾਨਿ ਆਯੁ, ਤਂ ਮਨੁਸ੍ਸਾਨਂ ਗਣਨਾਯ ਤਿਸ੍ਸੋ ਵਸ੍ਸਕੋਟਿਯੋ ਸਟ੍ਠਿ ਚ ਵਸ੍ਸਸਤਸਹਸ੍ਸਾਨਿ ਹੋਨ੍ਤਿ. ਵਾਚਾਭਿਗੀਤਨ੍ਤਿ ਵਾਚਾਯ ਅਭਿਗੀਤਂ, ‘‘ਆਗਚ੍ਛਨ੍ਤੁ ਅਯ੍ਯਾ, ਇਦਂ ਆਸਨਂ ਪਞ੍ਞਤ੍ਤਂ, ਇਧ ਨਿਸੀਦਥਾ’’ਤਿਆਦਿਨਾ, ‘‘ਕਿਂ ਅਯ੍ਯਾਨਂ ਸਰੀਰਸ੍ਸ ਆਰੋਗ੍ਯਂ, ਕਿਂ ਵਸਨਟ੍ਠਾਨਂ ਫਾਸੁਕ’’ਨ੍ਤਿਆਦਿਨਾ ਪਟਿਸਨ੍ਥਾਰਵਸੇਨ ਚ ਵਾਚਾਯ ਕਥਿਤਮਤ੍ਤਂ. ਮਨਸਾ ਪਵਤ੍ਤਿਤਨ੍ਤਿ ‘‘ਇਮੇ ਅਯ੍ਯਾ ਪੇਸਲਾ ਬ੍ਰਹ੍ਮਚਾਰਿਨੋ ਧਮ੍ਮਚਾਰਿਨੋ’’ਤਿਆਦਿਨਾ ਚਿਤ੍ਤੇਨ ਪਵਤ੍ਤਿਤਂ ਪਸਾਦਮਤ੍ਤਂ, ਨ ਪਨ ਮਮ ਸਨ੍ਤਕਂ ਕਿਞ੍ਚਿ ਪਰਿਚ੍ਚਤ੍ਤਂ ਅਤ੍ਥੀਤਿ ਦਸ੍ਸੇਤਿ. ਏਤ੍ਤਾਵਤਾਤਿ ਏਤ੍ਤਕੇਨ ਏਵਂ ਕਥਨਮਤ੍ਤੇਨ ਪਸਾਦਮਤ੍ਤੇਨਪਿ. ਠਸ੍ਸਤਿ ਪੁਞ੍ਞਕਮ੍ਮੋਤਿ ਕਤਪੁਞ੍ਞੋ ਨਾਮ ਹੁਤ੍ਵਾ ਦੇਵਲੋਕੇ ਠਸ੍ਸਤਿ ਚਿਰਂ ਪਵਤ੍ਤਿਸ੍ਸਤਿ, ਤਿਟ੍ਠਨ੍ਤੋ ਚ ਦਿਬ੍ਬੇਹਿ ਕਾਮੇਹਿ ਸਮਙ੍ਗੀਭੂਤੋ ਤਸ੍ਮਿਂ ਦੇਵਨਿਕਾਯੇ ਦੇਵਾਨਂ ਵਲਞ੍ਜਨਿਯਾਮੇਨੇਵ ਦਿਬ੍ਬੇਹਿ ਪਞ੍ਚਹਿ ਕਾਮਗੁਣੇਹਿ ਸਮਙ੍ਗੀਭੂਤੋ ਸਮਨ੍ਨਾਗਤੋ ਹੁਤ੍ਵਾ ਇਨ੍ਦ੍ਰਿਯਾਨਿ ਪਰਿਚਾਰੇਨ੍ਤੋ ਵਿਹਰਤੀਤਿ ਅਤ੍ਥੋ. ਸੇਸਂ ਵੁਤ੍ਤਨਯਮੇਵ.

ਦ੍ਵਾਰਪਾਲਕਵਿਮਾਨਵਣ੍ਣਨਾ ਨਿਟ੍ਠਿਤਾ.