੧੪. ਮਹਾਰਥਵਿਮਾਨਵਣ੍ਣਨਾ

ਸਹਸ੍ਸਯੁਤ੍ਤਂ ਹਯਵਾਹਨਂ ਸੁਭਨ੍ਤਿ ਮਹਾਰਥਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਚ ਸਮਯੇਨ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨ ਦੇਵਚਾਰਿਕਂ ਚਰਨ੍ਤੋ ਤਾਵਤਿਂਸਭਵਨੇ ਗੋਪਾਲਸ੍ਸ ਨਾਮ ਦੇਵਪੁਤ੍ਤਸ੍ਸ ਅਤ੍ਤਨੋ ਵਿਮਾਨਤੋ ਨਿਕ੍ਖਮਿਤ੍ਵਾ ਸਹਸ੍ਸਯੁਤ੍ਤਂ ਮਹਨ੍ਤਂ ਦਿਬ੍ਬਰਥਂ ਅਭਿਰੁਯ੍ਹ ਮਹਨ੍ਤੇਨ ਪਰਿਵਾਰੇਨ ਮਹਤਿਯਾ ਦੇਵਿਦ੍ਧਿਯਾ ਉਯ੍ਯਾਨਕੀਲ਼ਨਤ੍ਥਂ ਗਚ੍ਛਨ੍ਤਸ੍ਸ ਅਵਿਦੂਰੇ ਪਾਤੁਰਹੋਸਿ. ਤਂ ਦਿਸ੍ਵਾ ਦੇਵਪੁਤ੍ਤੋ ਸਞ੍ਜਾਤਗਾਰਵਬਹੁਮਾਨੋ ਸਹਸਾ ਰਥਤੋ ਓਰੁਯ੍ਹ ਉਪਸਙ੍ਕਮਿਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਅਞ੍ਜਲਿਂ ਸਿਰਸਿ ਪਗ੍ਗਯ੍ਹ ਅਟ੍ਠਾਸਿ.

ਤਸ੍ਸਿਦਂ ਪੁਬ੍ਬਕਮ੍ਮਂ – ਸੋ ਕਿਰ ਵਿਪਸ੍ਸਿਂ ਭਗਵਨ੍ਤਂ ਸੁਵਣ੍ਣਮਾਲਾਯ ਪੂਜੇਤ੍ਵਾ ‘‘ਇਮਸ੍ਸ ਪੁਞ੍ਞਸ੍ਸ ਆਨੁਭਾਵੇਨ ਮਯ੍ਹਂ ਭਵੇ ਭਵੇ ਸੋਵਣ੍ਣਮਯਾ ਉਰਚ੍ਛਦਮਾਲਾ ਨਿਬ੍ਬਤ੍ਤਤੂ’’ਤਿ ਕਤਪਣਿਧਾਨਾਯ ਅਨੇਕਕਪ੍ਪੇਸੁ ਸੁਗਤੀਸੁਯੇਵ ਸਂਸਰਨ੍ਤਿਯਾ ਕਸ੍ਸਪਸ੍ਸ ਭਗਵਤੋ ਕਾਲੇ ਕਿਕਿਸ੍ਸ ਕਾਸਿਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਾਯ ਯਥਾਪਣਿਧਾਨਂ ਸੁਵਣ੍ਣਮਾਲਾਲਾਭੇਨ ‘‘ਉਰਚ੍ਛਦਮਾਲਾ’’ਤਿ ਲਦ੍ਧਨਾਮਾਯ ਦੇਵਕਞ੍ਞਾਸਦਿਸਾਯ ਰਾਜਧੀਤਾਯ ਆਚਰਿਯੋ ਗੋਪਾਲੋ ਨਾਮ ਬ੍ਰਾਹ੍ਮਣੋ ਹੁਤ੍ਵਾ ਸਸਾਵਕਸਙ੍ਘਸ੍ਸ ਕਸ੍ਸਪਸ੍ਸ ਭਗਵਤੋ ਅਸਦਿਸਦਾਨਾਦੀਨਿ ਮਹਾਦਾਨਾਨਿ ਪਵਤ੍ਤੇਤ੍ਵਾ ਇਨ੍ਦ੍ਰਿਯਾਨਂ ਅਪਰਿਪਕ੍ਕਭਾਵੇਨ ਅਤ੍ਤਾਨਂ ਰਾਜਧੀਤਰਞ੍ਚ ਉਦ੍ਦਿਸ੍ਸ ਸਤ੍ਥਾਰਾ ਦੇਸਿਤਂ ਧਮ੍ਮਂ ਸੁਤ੍ਵਾਪਿ ਵਿਸੇਸਂ ਨਿਬ੍ਬਤ੍ਤੇਤੁਂ ਅਸਕ੍ਕੋਨ੍ਤੋ ਪੁਥੁਜ੍ਜਨਕਾਲਕਿਰਿਯਮੇਵ ਕਤ੍ਵਾ ਯਥੂਪਚਿਤਪੁਞ੍ਞਾਨੁਭਾਵੇਨ ਤਾਵਤਿਂਸੇਸੁ ਯੋਜਨਸਤਿਕੇ ਕਨਕਵਿਮਾਨੇ ਨਿਬ੍ਬਤ੍ਤਿ, ਅਨੇਕਕੋਟਿਅਚ੍ਛਰਾਪਰਿਵਾਰੋ ਅਹੋਸਿ, ਸਤ੍ਤਰਤਨਮਯੋ ਚਸ੍ਸ ਸਹਸ੍ਸਯੁਤ੍ਤੋ ਸੁਵਿਭਤ੍ਤਭਿਤ੍ਤਿਵਿਚਿਤ੍ਤੋ ਸਿਨਿਦ੍ਧਮਧੁਰਨਿਗ੍ਘੋਸੋ ਅਤ੍ਤਨੋ ਪਭਾਸਮੁਦਯੇਨ ਅਵਹਸਨ੍ਤੋ ਵਿਯ ਦਿਵਙ੍ਕਰਮਣ੍ਡਲਂ ਦਿਬ੍ਬੋ ਆਜਞ੍ਞਰਥੋ ਨਿਬ੍ਬਤ੍ਤਿ.

ਸੋ ਤਤ੍ਥ ਯਾਵਤਾਯੁਕਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਅਪਰਾਪਰਂ ਦੇਵੇਸੁਯੇਵ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨ ਯਥਾਵੁਤ੍ਤਸਮ੍ਪਤ੍ਤਿਵਿਭਵੋ ਗੋਪਾਲੋ ਏਵ ਨਾਮ ਦੇਵਪੁਤ੍ਤੋ ਹੁਤ੍ਵਾ ਤਾਵਤਿਂਸੇਸੁਯੇਵ ਨਿਬ੍ਬਤ੍ਤਿ. ਤਂ ਸਨ੍ਧਾਯ ਵੁਤ੍ਤਂ ‘‘ਤੇਨ ਚ ਸਮਯੇਨ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ…ਪੇ… ਅਞ੍ਜਲਿਂ ਸਿਰਸਿ ਪਗ੍ਗਯ੍ਹ ਅਟ੍ਠਾਸੀ’’ਤਿ.

ਏਵਂ ਪਨ ਉਪਸਙ੍ਕਮਿਤ੍ਵਾ ਠਿਤਂ ਤਂ ਦੇਵਪੁਤ੍ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਇਮਾਹਿ ਗਾਥਾਹਿ ਪੁਚ੍ਛਿ –

੧੦੧੫. ‘‘ਸਹਸ੍ਸਯੁਤ੍ਤਂ ਹਯਵਾਹਨਂ ਸੁਭਂ, ਆਰੁਯ੍ਹਿਮਂ ਸਨ੍ਦਨਂ ਨੇਕਚਿਤ੍ਤਂ;

ਉਯ੍ਯਾਨਭੂਮਿਂ ਅਭਿਤੋ ਅਨੁਕ੍ਕਮਂ, ਪੁਰਿਨ੍ਦਦੋ ਭੂਤਪਤੀਵ ਵਾਸਵੋ.

੧੦੧੬. ‘‘ਸੋਵਣ੍ਣਮਯਾ ਤੇ ਰਥਕੁਬ੍ਬਰਾ ਉਭੋ, ਫਲੇਹਿ ਅਂਸੇਹਿ ਅਤੀਵ ਸਙ੍ਗਤਾ;

ਸੁਜਾਤਗੁਮ੍ਬਾ ਨਰਵੀਰਨਿਟ੍ਠਿਤਾ, ਵਿਰੋਚਤਿ ਪਨ੍ਨਰਸੇਵ ਚਨ੍ਦੋ.

੧੦੧੭. ‘‘ਸੁਵਣ੍ਣਜਾਲਾਵਤਤੋ ਰਥੋ ਅਯਂ, ਬਹੂਹਿ ਨਾਨਾਰਤਨੇਹਿ ਚਿਤ੍ਤਿਤੋ;

ਸੁਨਨ੍ਦਿਘੋਸੋ ਚ ਸੁਭਸ੍ਸਰੋ ਚ, ਵਿਰੋਚਤੀ ਚਾਮਰਹਤ੍ਥਬਾਹੁਭਿ.

੧੦੧੮. ‘‘ਇਮਾ ਚ ਨਾਭ੍ਯੋ ਮਨਸਾਭਿਨਿਮ੍ਮਿਤਾ, ਰਥਸ੍ਸ ਪਾਦਨ੍ਤਰਮਜ੍ਝਭੂਸਿਤਾ;

ਇਮਾ ਚ ਨਾਭ੍ਯੋ ਸਤਰਾਜਿਚਿਤ੍ਤਿਤਾ, ਸਤੇਰਤਾ ਵਿਜ੍ਜੁਰਿਵਪ੍ਪਭਾਸਰੇ.

੧੦੧੯. ‘‘ਅਨੇਕਚਿਤ੍ਤਾਵਤਤੋ ਰਥੋ ਅਯਂ, ਪੁਥੂ ਚ ਨੇਮੀ ਚ ਸਹਸ੍ਸਰਂਸਿਕੋ;

ਤੇਸਂ ਸਰੋ ਸੁਯ੍ਯਤਿ ਵਗ੍ਗੁਰੂਪੋ, ਪਞ੍ਚਙ੍ਗਿਕਂ ਤੂਰਿਯਮਿਵਪ੍ਪਵਾਦਿਤਂ.

੧੦੨੦. ‘‘ਸਿਰਸ੍ਮਿਂ ਚਿਤ੍ਤਂ ਮਣਿਚਨ੍ਦਕਪ੍ਪਿਤਂ, ਸਦਾ ਵਿਸੁਦ੍ਧਂ ਰੁਚਿਰਂ ਪਭਸ੍ਸਰਂ;

ਸੁਵਣ੍ਣਰਾਜੀਹਿ ਅਤੀਵ ਸਙ੍ਗਤਂ, ਵੇਲ਼ੁਰਿਯਰਾਜੀਵ ਅਤੀਵ ਸੋਭਤਿ.

੧੦੨੧. ‘‘ਇਮੇ ਚ ਵਾਲ਼ੀ ਮਣਿਚਨ੍ਦਕਪ੍ਪਿਤਾ, ਆਰੋਹਕਮ੍ਬੂ ਸੁਜਵਾ ਬ੍ਰਹੂਪਮਾ;

ਬ੍ਰਹਾ ਮਹਨ੍ਤਾ ਬਲਿਨੋ ਮਹਾਜਵਾ, ਮਨੋ ਤਵਞ੍ਞਾਯ ਤਥੇਵ ਸਿਂਸਰੇ.

੧੦੨੨. ‘‘ਇਮੇ ਚ ਸਬ੍ਬੇ ਸਹਿਤਾ ਚਤੁਕ੍ਕਮਾ, ਮਨੋ ਤਵਞ੍ਞਾਯ ਤਥੇਵ ਸਿਂਸਰੇ;

ਸਮਂ ਵਹਨ੍ਤੀ ਮੁਦੁਕਾ ਅਨੁਦ੍ਧਤਾ, ਆਮੋਦਮਾਨਾ ਤੁਰਗਾਨਮੁਤ੍ਤਮਾ.

੧੦੨੩. ‘‘ਧੁਨਨ੍ਤਿ ਵਗ੍ਗਨ੍ਤਿ ਪਤਨ੍ਤਿ ਚਮ੍ਬਰੇ, ਅਬ੍ਭੁਦ੍ਧੁਨਨ੍ਤਾ ਸੁਕਤੇ ਪਿਲ਼ਨ੍ਧਨੇ;

ਤੇਸਂ ਸਰੋ ਸੁਯ੍ਯਤਿ ਵਗ੍ਗੁਰੂਪੋ, ਪਞ੍ਚਙ੍ਗਿਕਂ ਤੂਰਿਯਮਿਵਪ੍ਪਵਾਦਿਤਂ.

੧੦੨੪. ‘‘ਰਥਸ੍ਸ ਘੋਸੋ ਅਪਿਲ਼ਨ੍ਧਨਾਨ ਚ, ਖੁਰਸ੍ਸ ਨਾਦੋ ਅਭਿਹਿਂਸਨਾਯ ਚ;

ਘੋਸੋ ਸੁਵਗ੍ਗੂ ਸਮਿਤਸ੍ਸ ਸੁਯ੍ਯਤਿ, ਗਨ੍ਧਬ੍ਬਤੂਰਿਯਾਨਿ ਵਿਚਿਤ੍ਰਸਂਵਨੇ.

੧੦੨੫. ‘‘ਰਥੇ ਠਿਤਾਤਾ ਮਿਗਮਨ੍ਦਲੋਚਨਾ, ਆਲ਼ਾਰਪਮ੍ਹਾ ਹਸਿਤਾ ਪਿਯਂਵਦਾ;

ਵੇਲ਼ੁਰਿਯਜਾਲਾਵਤਤਾ ਤਨੁਚ੍ਛਵਾ, ਸਦੇਵ ਗਨ੍ਧਬ੍ਬਸੂਰਗ੍ਗਪੂਜਿਤਾ.

੧੦੨੬. ‘‘ਤਾ ਰਤ੍ਤਰਤ੍ਤਮ੍ਬਰਪੀਤਵਾਸਸਾ, ਵਿਸਾਲਨੇਤ੍ਤਾ ਅਭਿਰਤ੍ਤਲੋਚਨਾ;

ਕੁਲੇ ਸੁਜਾਤਾ ਸੁਤਨੂ ਸੁਚਿਮ੍ਹਿਤਾ, ਰਥੇ ਠਿਤਾ ਪਞ੍ਜਲਿਕਾ ਉਪਟ੍ਠਿਤਾ.

੧੦੨੭. ‘‘ਤਾ ਕਮ੍ਬੁਕੇਯੂਰਧਰਾ ਸੁਵਾਸਸਾ, ਸੁਮਜ੍ਝਿਮਾ ਊਰੁਥਨੂਪਪਨ੍ਨਾ;

ਵਟ੍ਟਙ੍ਗੁਲਿਯੋ ਸੁਮੁਖਾ ਸੁਦਸ੍ਸਨਾ, ਰਥੇ ਠਿਤਾ ਪਞ੍ਜਲਿਕਾ ਉਪਟ੍ਠਿਤਾ.

੧੦੨੮. ‘‘ਅਞ੍ਞਾ ਸੁਵੇਣੀ ਸੁਸੁ ਮਿਸ੍ਸਕੇਸਿਯੋ, ਸਮਂ ਵਿਭਤ੍ਤਾਹਿ ਪਭਸ੍ਸਰਾਹਿ ਚ;

ਅਨੁਬ੍ਬਤਾ ਤਾ ਤਵ ਮਾਨਸੇ ਰਤਾ, ਰਥੇ ਠਿਤਾ ਪਞ੍ਜਲਿਕਾ ਉਪਟ੍ਠਿਤਾ.

੧੦੨੯. ‘‘ਆਵੇਲ਼ਿਨਿਯੋ ਪਦੁਮੁਪ੍ਪਲਚ੍ਛਦਾ, ਅਲਙ੍ਕਤਾ ਚਨ੍ਦਨਸਾਰਵਾਸਿਤਾ;

ਅਨੁਬ੍ਬਤਾ ਤਾ ਤਵ ਮਾਨਸੇ ਰਤਾ, ਰਥੇ ਠਿਤਾ ਪਞ੍ਜਲਿਕਾ ਉਪਟ੍ਠਿਤਾ.

੧੦੩੦. ‘‘ਤਾ ਮਾਲਿਨਿਯੋ ਪਦੁਮੁਪ੍ਪਲਚ੍ਛਦਾ, ਅਲਙ੍ਕਤਾ ਚਨ੍ਦਨਸਾਰਵਾਸਿਤਾ;

ਅਨੁਬ੍ਬਤਾ ਤਾ ਤਵ ਮਾਨਸੇ ਰਤਾ, ਰਥੇ ਠਿਤਾ ਪਞ੍ਜਲਿਕਾ ਉਪਟ੍ਠਿਤਾ.

੧੦੩੧. ‘‘ਕਣ੍ਠੇਸੁ ਤੇ ਯਾਨਿ ਪਿਲ਼ਨ੍ਧਨਾਨਿ, ਹਤ੍ਥੇਸੁ ਪਾਦੇਸੁ ਤਥੇਵ ਸੀਸੇ;

ਓਭਾਸਯਨ੍ਤੀ ਦਸ ਸਬ੍ਬਸੋ ਦਿਸਾ, ਅਬ੍ਭੁਦ੍ਦਯਂ ਸਾਰਦਿਕੋਵ ਭਾਣੁਮਾ.

੧੦੩੨. ‘‘ਵਾਤਸ੍ਸ ਵੇਗੇਨ ਚ ਸਮ੍ਪਕਮ੍ਪਿਤਾ, ਭੁਜੇਸੁ ਮਾਲਾ ਅਪਿਲ਼ਨ੍ਧਨਾਨਿ ਚ;

ਮੁਞ੍ਚਨ੍ਤਿ ਘੋਸਂ ਰੁਚਿਰਂ ਸੁਚਿਂ ਸੁਭਂ, ਸਬ੍ਬੇਹਿ ਵਿਞ੍ਞੂਹਿ ਸੁਤਬ੍ਬਰੂਪਂ.

੧੦੩੩. ‘‘ਉਯ੍ਯਾਨਭੂਮ੍ਯਾ ਚ ਦੁਵਦ੍ਧਤੋ ਠਿਤਾ, ਰਥਾ ਚ ਨਾਗਾ ਤੂਰਿਯਾਨਿ ਚ ਸਰੋ;

ਤਮੇਵ ਦੇਵਿਨ੍ਦ ਪਮੋਦਯਨ੍ਤਿ, ਵੀਣਾ ਯਥਾ ਪੋਕ੍ਖਰਪਤ੍ਤਬਾਹੁਭਿ.

੧੦੩੪. ‘‘ਇਮਾਸੁ ਵੀਣਾਸੁ ਬਹੂਸੁ ਵਗ੍ਗੂਸੁ, ਮਨੁਞ੍ਞਰੂਪਾਸੁ ਹਦਯੇਰਿਤਂ ਪੀਤਿਂ;

ਪਵਜ੍ਜਮਾਨਾਸੁ ਅਤੀਵ ਅਚ੍ਛਰਾ, ਭਮਨ੍ਤਿ ਕਞ੍ਞਾ ਪਦੁਮੇਸੁ ਸਿਕ੍ਖਿਤਾ.

੧੦੩੫. ‘‘ਯਦਾ ਚ ਗੀਤਾਨਿ ਚ ਵਾਦਿਤਾਨਿ ਚ, ਨਚ੍ਚਾਨਿ ਚਿਮਾਨਿ ਸਮੇਨ੍ਤਿ ਏਕਤੋ;

ਅਥੇਤ੍ਥ ਨਚ੍ਚਨ੍ਤਿ ਅਥੇਤ੍ਥ ਅਚ੍ਛਰਾ, ਓਭਾਸਯਨ੍ਤੀ ਉਭਤੋ ਵਰਿਤ੍ਥਿਯੋ.

੧੦੩੬. ‘‘ਸੋ ਮੋਦਸਿ ਤੂਰਿਯਗਣਪ੍ਪਬੋਧਨੋ, ਮਹੀਯਮਾਨੋ ਵਜਿਰਾਵੁਧੋਰਿਵ;

ਇਮਾਸੁ ਵੀਣਾਸੁ ਬਹੂਸੁ ਵਗ੍ਗੂਸੁ, ਮਨੁਞ੍ਞਰੂਪਾਸੁ ਹਦਯੇਰਿਤਂ ਪੀਤਿਂ.

੧੦੩੭. ‘‘ਕਿਂ ਤ੍ਵਂ ਪੁਰੇ ਕਮ੍ਮਮਕਾਸਿ ਅਤ੍ਤਨਾ, ਮਨੁਸ੍ਸਭੂਤੋ ਪੁਰਿਮਾਯ ਜਾਤਿਯਾ;

ਉਪੋਸਥਂ ਕਂ ਵਾ ਤੁਵਂ ਉਪਾਵਸਿ, ਕਂ ਧਮ੍ਮਚਰਿਯਂ ਵਤਮਾਭਿਰੋਚਯਿ.

੧੦੩੮. ‘‘ਨਯੀਦਮਪ੍ਪਸ੍ਸ ਕਤਸ੍ਸ ਕਮ੍ਮੁਨੋ, ਪੁਬ੍ਬੇ ਸੁਚਿਣ੍ਣਸ੍ਸ ਉਪੋਸਥਸ੍ਸ ਵਾ;

ਇਦ੍ਧਾਨੁਭਾਵੋ ਵਿਪੁਲੋ ਅਯਂ ਤਵ, ਯਂ ਦੇਵਸਙ੍ਘਂ ਅਭਿਰੋਚਸੇ ਭੁਸਂ.

੧੦੩੯. ‘‘ਦਾਨਸ੍ਸ ਤੇ ਇਦਂ ਫਲਂ, ਅਥੋ ਸੀਲਸ੍ਸ ਵਾ ਪਨ;

ਅਥੋ ਅਞ੍ਜਲਿਕਮ੍ਮਸ੍ਸ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ.

੧੦੧੫. ਤਤ੍ਥ ਸਹਸ੍ਸਯੁਤ੍ਤਨ੍ਤਿ ਸਹਸ੍ਸੇਨ ਯੁਤ੍ਤਂ, ਸਹਸ੍ਸਂ ਵਾ ਯੁਤ੍ਤਂ ਯੋਜਿਤਂ ਏਤਸ੍ਮਿਨ੍ਤਿ ਸਹਸ੍ਸਯੁਤ੍ਤਂ. ਕਸ੍ਸ ਪਨੇਤਂ ਸਹਸ੍ਸਨ੍ਤਿ? ‘‘ਹਯਵਾਹਨ’’ਨ੍ਤਿ ਅਨਨ੍ਤਰਂ ਵੁਚ੍ਚਮਾਨਤ੍ਤਾ ਹਯਾਨਨ੍ਤਿ ਅਯਮਤ੍ਥੋ ਵਿਞ੍ਞਾਯਤੇਵ. ਹਯਾ ਵਾਹਨਂ ਏਤਸ੍ਸਾਤਿ ਹਯਵਾਹਨਂ. ਕੇਚਿ ਪਨ ‘‘ਸਹਸ੍ਸਯੁਤ੍ਤਹਯਵਾਹਨ’’ਨ੍ਤਿ ਅਨੁਨਾਸਿਕਲੋਪਂ ਏਕਮੇਵ ਸਮਾਸਪਦਂ ਕਤ੍ਵਾ ਵਣ੍ਣੇਨ੍ਤਿ, ਏਤਸ੍ਮਿਂ ਪਕ੍ਖੇ ਹਯਵਾਹਨਂ ਵਿਯ ਵਾਹਨਨ੍ਤਿ ਅਤ੍ਥੋ ਯੁਜ੍ਜਤਿ. ਹਯਵਾਹਨਸਹਸ੍ਸਯੁਤ੍ਤਂ ਯੁਤ੍ਤਹਯਵਾਹਨਸਹਸ੍ਸਨ੍ਤਿ ਹਿ ਅਤ੍ਥੋ. ਅਪਰੇ ਪਨ ‘‘ਸਹਸ੍ਸਯੁਤ੍ਤਨ੍ਤਿ ਸਹਸ੍ਸਦਿਬ੍ਬਾਜਞ੍ਞਯੁਤ੍ਤ’’ਨ੍ਤਿ ਵਦਨ੍ਤਿ. ਸਨ੍ਦਨਨ੍ਤਿ ਰਥਂ. ਨੇਕਚਿਤ੍ਤਨ੍ਤਿ ਅਨੇਕਚਿਤ੍ਤਂ ਨਾਨਾਵਿਧਵਿਚਿਤ੍ਤਵਨ੍ਤਂ. ਉਯ੍ਯਾਨਭੂਮਿਂ ਅਭਿਤੋਤਿ ਉਯ੍ਯਾਨਭੂਮਿਯਾ ਸਮੀਪੇ. ‘‘ਅਭਿਤੋ’’ਤਿ ਹਿ ਪਦਂ ਅਪੇਕ੍ਖਿਤ੍ਵਾ ਸਾਮਿਅਤ੍ਥੇ ਏਤਂ ਉਪਯੋਗਵਚਨਂ. ਕੇਚਿ ਪਨ ‘‘ਉਯ੍ਯਾਨਭੂਮ੍ਯਾ’’ਤਿਪਿ ਪਠਨ੍ਤਿ, ਤੇ ਸਦ੍ਦਨਯਮ੍ਪਿ ਅਨੁਪਧਾਰੇਨ੍ਤਾ ਪਠਨ੍ਤਿ. ਅਨੁਕ੍ਕਮਨ੍ਤਿ ਗਚ੍ਛਨ੍ਤੋ ਪੁਰਿਨ੍ਦਦੋ ਭੂਤਪਤੀਵ ਵਾਸਵੋ ਵਿਰੋਚਸੀਤਿ ਸਮ੍ਬਨ੍ਧੋ.

੧੦੧੬. ਸੋਵਣ੍ਣਮਯਾਤਿ ਸੁਵਣ੍ਣਮਯਾ. ਤੇਤਿ ਤਵ. ਰਥਕੁਬ੍ਬਰਾ ਉਭੋਤਿ ਰਥਸ੍ਸ ਉਭੋਸੁ ਪਸ੍ਸੇਸੁ ਵੇਦਿਕਾ. ਯੋ ਹਿ ਰਥਸ੍ਸ ਸੋਭਨਤ੍ਥਞ੍ਚੇਵ ਉਪਰਿ ਠਿਤਾਨਂ ਗੁਤ੍ਤਤ੍ਥਞ੍ਚ ਉਭੋਸੁ ਪਸ੍ਸੇਸੁ ਵੇਦਿਕਾਕਾਰੇਨ ਪਰਿਕ੍ਖੇਪੋ ਕਰੀਯਤਿ, ਤਸ੍ਸ ਪੁਰਿਮਭਾਗੇ ਉਭੋਸੁ ਪਸ੍ਸੇਸੁ ਯਾਵ ਰਥੀਸਾ, ਤਾਵ ਹਤ੍ਥੇਹਿ ਗਹਣਯੋਗ੍ਗੋ ਰਥਸ੍ਸ ਅਵਯਵਵਿਸੇਸੋ, ਇਧ ਸੋ ਏਵ ਕੁਬ੍ਬਰੋਤਿ ਅਧਿਪ੍ਪੇਤੋ. ਤੇਨੇਵਾਹ ‘‘ਉਭੋ’’ਤਿ. ਅਞ੍ਞਤ੍ਥ ਪਨ ਰਥੀਸਾ ਕੁਬ੍ਬਰੋਤਿ ਵੁਚ੍ਚਤਿ. ਫਲੇਹੀਤਿ ਰਥੂਪਤ੍ਥਮ੍ਭਸ੍ਸ ਦਕ੍ਖਿਣਵਾਮਭੇਦੇਹਿ ਦ੍ਵੀਹਿ ਫਲੇਹਿ, ਪਰਿਯਨ੍ਤਾਵੇਤ੍ਥ ਫਲਾਤਿ ਵੁਤ੍ਤਾ. ਅਂਸੇਹੀਤਿ ਕੁਬ੍ਬਰਫਲੇ ਪਤਿਟ੍ਠਿਤੇਹਿ ਹੇਟ੍ਠਿਮਅਂਸੇਹਿ. ਅਤੀਵ ਸਙ੍ਗਤਾਤਿ ਅਤਿਵਿਯ ਸੁਟ੍ਠੁ ਸਙ੍ਗਤਾ ਸੁਫਸ੍ਸਿਤਾ ਨਿਬ੍ਬਿਵਰਾ. ਇਦਞ੍ਚ ਸਿਪ੍ਪਿਵਿਰਚਿਤੇ ਕਿਤ੍ਤਿਮਰਥੇ ਲਬ੍ਭਮਾਨਵਿਸੇਸਂ ਤਤ੍ਥ ਆਰੋਪੇਤ੍ਵਾ ਵੁਤ੍ਤਂ. ਸੋ ਪਨ ਅਪੋਰਿਸਤਾਯ ਅਕਿਤ੍ਤਿਮੋ ਸਯਂਜਾਤੋ ਕੇਨਚਿ ਅਘਟਿਤੋਯੇਵ. ਸੁਜਾਤਗੁਮ੍ਬਾਤਿ ਸੁਸਣ੍ਠਿਤਥਮ੍ਭਕਸਮੁਦਾਯਾ. ਯੇ ਹਿ ਵੇਦਿਕਾਯ ਨਿਰਨ੍ਤਰਂ ਠਿਤਾ ਸੁਸਣ੍ਠਿਤਘਟਕਾਦਿਅਵਯਵਵਿਸੇਸਵਨ੍ਤੋ ਥਮ੍ਭਕਸਮੁਦਾਯਾ, ਤੇਸਂ ਵਸੇਨੇਵਂ ਵੁਤ੍ਤਂ ‘‘ਸੁਜਾਤਗੁਮ੍ਬਾ’’ਤਿ. ਨਰਵੀਰਨਿਟ੍ਠਿਤਾਤਿ ਸਿਪ੍ਪਾਚਰਿਯੇਹਿ ਨਿਟ੍ਠਾਪਿਤਸਦਿਸਾ. ਸਿਪ੍ਪਾਚਰਿਯਾ ਹਿ ਅਤ੍ਤਨੋ ਸਰੀਰਖੇਦਂ ਅਚਿਨ੍ਤੇਤ੍ਵਾ ਵੀਰਿਯਬਲੇਨ ਸਿਪ੍ਪਸ੍ਸ ਸੁਟ੍ਠੁ ਵਿਚਾਰਣਤੋ ਨਰੇਸੁ ਵੀਰਿਯਵਨ੍ਤੋਤਿ ਇਧ ‘‘ਨਰਵੀਰਾ’’ਤਿ ਵੁਤ੍ਤਾ. ਨਰਵੀਰਾਤਿ ਵਾ ਦੇਵਪੁਤ੍ਤਸ੍ਸ ਆਲਪਨਂ. ਨਿਟ੍ਠਿਤਾਤਿ ਪਰਿਯੋਸਿਤਾ ਪਰਿਪੁਣ੍ਣਸੋਭਾਤਿਸਯਾ. ‘‘ਨਰਵੀਰਨਿਮ੍ਮਿਤਾ’’ਤਿ ਵਾ ਪਾਠੋ, ਨਰੇਸੁ ਧਿਤਿਸਮ੍ਪਨ੍ਨੇਹਿ ਨਿਮ੍ਮਿਤਸਦਿਸਾਤਿ ਅਤ੍ਥੋ. ਏਵਂਵਿਧਕੁਬ੍ਬਰਤਾਯ ਅਯਂ ਤਵ ਰਥੋ ਵਿਰੋਚਤਿ. ਕਿਂ ਵਿਯ? ਪਨ੍ਨਰਸੇਵ ਚਨ੍ਦੋ, ਸੁਕ੍ਕਪਕ੍ਖੇ ਪਨ੍ਨਰਸਿਯਂ ਪਰਿਪੁਣ੍ਣਕਾਲੇ ਚਨ੍ਦਿਮਾ ਵਿਯ.

੧੦੧੭. ਸੁਵਣ੍ਣਜਾਲਾਵਤਤੋਤਿ ਸੁਵਣ੍ਣਜਾਲਕੇਹਿ ਅਵਤਤੋ ਛਾਦਿਤੋ. ‘‘ਸੁਵਣ੍ਣਜਾਲਾਵਿਤਤੋ’’ਤਿਪਿ ਪਾਠੋ, ਗਵਚ੍ਛਿਤੋਤਿ ਅਤ੍ਥੋ. ਬਹੂਹੀਤਿ ਅਨੇਕੇਹਿ. ਨਾਨਾਰਤਨੇਹੀਤਿ ਪਦੁਮਰਾਗਫੁਸ੍ਸਰਾਗਾਦਿਨਾਨਾਵਿਧਰਤਨੇਹਿ. ਸੁਨਨ੍ਦਿਘੋਸੋਤਿ ਸੁਟ੍ਠੁ ਨਨ੍ਦਿਤਬ੍ਬਘੋਸੋ, ਸਵਨੀਯਮਧੁਰਨਿਨ੍ਨਾਦੋਤਿ ਅਤ੍ਥੋ. ਸੁਨਨ੍ਦਿਘੋਸੋਤਿ ਵਾ ਸੁਟ੍ਠੁ ਕਤਨਨ੍ਦਿਘੋਸੋ, ਨਚ੍ਚਨਾਦੀਨਂ ਦਸ੍ਸਨਾਦੀਸੁ ਪਵਤ੍ਤਿਤਸਾਧੁਕਾਰਸਦ੍ਦਾਦਿਵਸੇਨ ਕਤਪਮੋਦਨਿਨ੍ਨਾਦੋਤਿ ਅਤ੍ਥੋ, ‘‘ਕਾਲੇਨ ਕਾਲਂ ਆਸੀਵਾਦਨਵਸੇਨ ਸੁਟ੍ਠੁ ਪਯੁਤ੍ਤਨਨ੍ਦਿਘੋਸੋ’’ਤਿ ਚ ਵਦਨ੍ਤਿ. ਸੁਭਸ੍ਸਰੋਤਿ ਸੁਟ੍ਠੁ ਅਤਿਵਿਯ ਓਭਾਸਨਸਭਾਵੋ, ਤਤ੍ਥ ਵਾ ਪਵਤ੍ਤਮਾਨਾਨਂ ਦੇਵਤਾਨਂ ਸੋਭਨੇਨ ਗੀਤਵਾਦਿਤਸ੍ਸਰੇਨ ਸੁਭਸ੍ਸਰੋ. ਚਾਮਰਹਤ੍ਥਬਾਹੁਭੀਤਿ ਚਾਮਰਹਤ੍ਥਯੁਤ੍ਤਬਾਹੂਹਿ ਇਤੋ ਚਿਤੋ ਚ ਬੀਜਯਮਾਨ ਚਾਮਰਕਲਾਪੇਹਿ ਦੇਵਤਾਨਂ ਭੁਜੇਹਿ, ਤਥਾਭੂਤਾਹਿ ਦੇਵਤਾਹਿ ਵਾ ਵਿਰੋਚਤਿ.

੧੦੧੮. ਨਾਭ੍ਯੋਤਿ ਰਥਚਕ੍ਕਾਨਂ ਨਾਭਿਯੋ. ਮਨਸਾਭਿਨਿਮ੍ਮਿਤਾਤਿ ‘‘ਇਮੇ ਈਦਿਸਾ ਹੋਨ੍ਤੂ’’ਤਿ ਚਿਤ੍ਤੇਨ ਨਿਮ੍ਮਿਤਸਦਿਸਾ. ਰਥਸ੍ਸ ਪਾਦਨ੍ਤਰਮਜ੍ਝਭੂਸਿਤਾਤਿ ਰਥਸ੍ਸ ਪਾਦਾਨਂ ਰਥਚਕ੍ਕਾਨਂ ਅਨ੍ਤੇਨ ਨੇਮਿਨਾ ਨਾਨਾਰਤਨਸਮੁਜ੍ਜਲੇਨ ਅਰਾਨਂ ਵੇਮਜ੍ਝੇਨ ਚ ਮਣ੍ਡਿਤਾ. ਸਤਰਾਜਿਚਿਤ੍ਤਿਤਾਤਿ ਅਨੇਕਵਣ੍ਣਾਹਿ ਅਨੇਕਸਤਾਹਿ ਰਾਜੀਹਿ ਲੇਖਾਹਿ ਚਿਤ੍ਤਿਤਾ ਵਿਚਿਤ੍ਤਭਾਵਂ ਗਤਾ. ਸਤੇਰਤਾ ਵਿਜ੍ਜੁਰਿਵਾਤਿ ਸਤੇਰਤਸਙ੍ਖਾਤਵਿਜ੍ਜੁਲਤਾ ਵਿਯ ਪਭਾਸਰੇ ਵਿਜ੍ਜੋਤਨ੍ਤਿ.

੧੦੧੯. ਅਨੇਕਚਿਤ੍ਤਾਵਤਤੋਤਿ ਅਨੇਕੇਹਿ ਮਾਲਾਕਮ੍ਮਾਦਿਚਿਤ੍ਤੇਹਿ ਅਵਤਤੋ ਸਮੋਕਿਣ੍ਣੋ. ‘‘ਅਨੇਕਚਿਤ੍ਤਾਵਿਤਤੋ’’ਤਿਪਿ ਪਠਨ੍ਤਿ, ਸੋਯੇਵ ਅਤ੍ਥੋ, ਗਾਥਾਸੁਖਤ੍ਥਂ ਪਨ ਦੀਘਕਰਣਂ. ਪੁਥੂ ਚ ਨੇਮੀ ਚਾਤਿ ਪੁਥੁਲਨੇਮਿ ਚ, ਏਕੋ ਚ-ਕਾਰੋ ਨਿਪਾਤਮਤ੍ਤਂ. ਸਹਸ੍ਸਰਂਸਿਕੋਤਿ ਅਨੇਕਸਹਸ੍ਸਰਂਸਿਕੋ. ‘‘ਸਹਸ੍ਸਰਂਸਿਯੋ’’ਤਿਪਿ ਪਾਲ਼ਿ. ਅਪਰੇ ਪਨ ‘‘ਨਤਾ ਰਂਸਿਯੋ’’ਤਿ ਚ ਪਠਨ੍ਤਿ, ਤਤ੍ਥ ਨਤਾਤਿ ਅਜਿਯਧਨੁਦਣ੍ਡਕੋ ਵਿਯ ਓਣਤਾ ਨੇਮਿਪ੍ਪਦੇਸਾ. ਸਹਸ੍ਸਰਂਸਿਯੋਤਿ ਸੂਰਿਯਮਣ੍ਡਲਂ ਵਿਯ ਵਿਪ੍ਫੁਰਨ੍ਤਕਿਰਣਜਾਲਾ. ਤੇਸਨ੍ਤਿ ਓਲਮ੍ਬਮਾਨਕਿਙ੍ਕਿਣਿਕਜਾਲਾਨਂ ਨੇਮਿਪ੍ਪਦੇਸਾਨਂ.

੧੦੨੦. ਸਿਰਸ੍ਮਿਨ੍ਤਿ ਸੀਸੇ, ਰਥਸ੍ਸ ਸੀਸੇਤਿ ਅਤ੍ਥੋ. ਸਿਰੋ ਵਾ ਅਸ੍ਮਿਂ ਰਥੇ. ਚਿਤ੍ਤਨ੍ਤਿ ਵਿਚਿਤ੍ਤਂ. ਮਣਿਚਨ੍ਦਕਪ੍ਪਿਤਨ੍ਤਿ ਮਣਿਮਯਮਣ੍ਡਲਾਨੁਵਿਦ੍ਧਂ ਚਨ੍ਦਮਣ੍ਡਲਸਦਿਸੇਨ ਮਣਿਨਾ ਅਨੁਵਿਦ੍ਧਂ. ਰੁਚਿਰਂ ਪਭਸ੍ਸਰਨ੍ਤਿ ਇਮਿਨਾ ਤਸ੍ਸ ਚਨ੍ਦਮਣ੍ਡਲਸਦਿਸਤਂਯੇਵ ਵਿਭਾਵੇਤਿ, ਸਦਾ ਵਿਸੁਦ੍ਧਨ੍ਤਿ ਇਮਿਨਾ ਪਨਸ੍ਸ ਚਨ੍ਦਮਣ੍ਡਲਤੋਪਿ ਵਿਸੇਸਂ ਦਸ੍ਸੇਤਿ. ਸੁਵਣ੍ਣਰਾਜੀਹੀਤਿ ਅਨ੍ਤਰਨ੍ਤਰਾ ਵਟ੍ਟਾਕਾਰੇਨ ਸਣ੍ਠਿਤਾਹਿ ਸੁਵਣ੍ਣਲੇਖਾਹਿ. ਸਙ੍ਗਤਨ੍ਤਿ ਸਹਿਤਂ. ਵੇਲ਼ੁਰਿਯਰਾਜੀਵਾਤਿ ਅਨ੍ਤਰਨ੍ਤਰਾ ਸੁਵਣ੍ਣਰਾਜੀਹਿ ਖਚਿਤਮਣਿਮਣ੍ਡਲਤ੍ਤਾ ਵੇਲ਼ੁਰਿਯਰਾਜੀਹਿ ਵਿਯ ਸੋਭਤਿ. ‘‘ਵੇਲ਼ੁਰਿਯਰਾਜੀਹੀ’’ਤਿ ਚ ਪਠਨ੍ਤਿ.

੧੦੨੧. ਵਾਲ਼ੀਤਿ ਵਾਲ਼ਵਨ੍ਤੋ ਸਮ੍ਪਨ੍ਨਵਾਲ਼ਧਿਨੋ, ਅਸ੍ਸੇ ਸਨ੍ਧਾਯ ਵਦਤਿ. ‘‘ਵਾਜੀ’’ਤਿ ਵਾ ਪਾਠੋ. ਮਣਿਚਨ੍ਦਕਪ੍ਪਿਤਾਤਿ ਚਾਮਰੋਲਮ੍ਬਨਟ੍ਠਾਨੇਸੁ ਮਣਿਮਯਚਨ੍ਦਕਾਨੁਵਿਦ੍ਧਾ. ਆਰੋਹਕਮ੍ਬੂਤਿ ਉਚ੍ਚਾ ਚੇਵ ਤਦਨੁਰੂਪਪਰਿਣਾਹਾ ਚ, ਆਰੋਹਪਰਿਣਾਹਸਮ੍ਪਨ੍ਨਾਤਿ ਅਤ੍ਥੋ. ਸੁਜਵਾਤਿ ਸੁਨ੍ਦਰਜਵਾ ਜਵਵਨ੍ਤੋ ਮਹਾਜਵਾ, ਸੋਭਨਗਤਿਕਾਤਿ ਅਤ੍ਥੋ. ਬ੍ਰਹੂਪਮਾਤਿ ਬ੍ਰਹਾ ਵਿਯ ਪਮਿਨਿਤਬ੍ਬਾ, ਅਤ੍ਤਨੋ ਪਮਾਣਤੋ ਅਧਿਕਾ ਵਿਯ ਪਞ੍ਞਾਯਨ੍ਤਾਤਿ ਅਤ੍ਥੋ. ਬ੍ਰਹਾਤਿ ਵੁਡ੍ਢਾ ਪਵਡ੍ਢਸਬ੍ਬਙ੍ਗਪਚ੍ਚਙ੍ਗਾ. ਮਹਨ੍ਤਾਤਿ ਮਹਾਨੁਭਾਵਾ ਮਹਿਦ੍ਧਿਕਾ. ਬਲਿਨੋਤਿ ਸਰੀਰਬਲੇਨ ਚ ਉਸ੍ਸਾਹਬਲੇਨ ਚ ਬਲਵਨ੍ਤੋ. ਮਹਾਜਵਾਤਿ ਸੀਘਵੇਗਾ. ਮਨੋ ਤਵਞ੍ਞਾਯਾਤਿ ਤਵ ਚਿਤ੍ਤਂ ਞਤ੍ਵਾ. ਤਥੇਵਾਤਿ ਚਿਤ੍ਤਾਨੁਰੂਪਮੇਵ. ਸਿਂਸਰੇਤਿ ਸਂਸਪ੍ਪਰੇ, ਪਵਤ੍ਤਰੇਤਿ ਅਤ੍ਥੋ.

੧੦੨੨. ਇਮੇਤਿ ਯਥਾਵੁਤ੍ਤਅਸ੍ਸੇ ਸਨ੍ਧਾਯਾਹ. ਸਬ੍ਬੇਤਿ ਸਹਸ੍ਸਮਤ੍ਤਾਪਿ. ਸਹਿਤਾਤਿ ਸਮਾਨਜਵਤਾਯ ਸਮਾਨਗਮਨਤਾਯ ਚ ਗਤਿਯਂ ਸਹਿਤਾ, ਅਞ੍ਞਮਞ੍ਞਂ ਅਨੂਨਾਧਿਕਗਮਨਾਤਿ ਅਤ੍ਥੋ. ਚਤੂਹਿ ਪਾਦੇਹਿ ਕਮਨ੍ਤਿ ਗਚ੍ਛਨ੍ਤੀਤਿ ਚਤੁਕ੍ਕਮਾ. ਸਮਂ ਵਹਨ੍ਤੀਤਿ ‘‘ਸਹਿਤਾ’’ਤਿ ਪਦੇਨ ਵੁਤ੍ਤਮੇਵਤ੍ਥਂ ਪਾਕਟਤਰਂ ਕਰੋਤਿ. ਮੁਦੁਕਾਤਿ ਮੁਦੁਸਭਾਵਾ, ਭਦ੍ਰਾ ਆਜਾਨੀਯਾਤਿ ਅਤ੍ਥੋ. ਤੇਨਾਹ ‘‘ਅਨੁਦ੍ਧਤਾ’’ਤਿ, ਉਦ੍ਧਤਰਹਿਤਾ ਖੋਭਂ ਅਕਰੋਨ੍ਤਾਤਿ ਅਤ੍ਥੋ. ਆਮੋਦਮਾਨਾਤਿ ਪਮੋਦਮਾਨਾ, ਅਖਲ਼ੁਙ੍ਕਤਾਯ ਅਞ੍ਞਮਞ੍ਞਂ ਰਥਿਕਾਦੀਨਞ੍ਚ ਤੁਟ੍ਠਿਂ ਪਵੇਦਯਨ੍ਤਾਤਿ ਅਤ੍ਥੋ.

੧੦੨੩. ਧੁਨਨ੍ਤੀਤਿ ਚਾਮਰਭਾਰਂ ਕੇਸਰਭਾਰਂ ਵਾਲਧਿਞ੍ਚ ਵਿਧੁਨਨ੍ਤਿ. ਵਗ੍ਗਨ੍ਤੀਤਿ ਕਦਾਚਿ ਪਦੇ ਪਦਂ ਨਿਕ੍ਖਿਪਨ੍ਤਾ ਵਗ੍ਗਨੇਨ ਗਮਨੇਨ ਗਚ੍ਛਨ੍ਤਿ. ਪਤਨ੍ਤੀਤਿ ਕਦਾਚਿ ਪਵਤ੍ਤਨ੍ਤਿ, ਲਙ੍ਘਨ੍ਤੀਤਿ ਅਤ੍ਥੋ. ‘‘ਪ੍ਲਵਨ੍ਤੀ’’ਤਿ ਚ ਕੇਚਿ ਪਠਨ੍ਤਿ, ਸੋਯੇਵਤ੍ਥੋ. ਅਬ੍ਭੁਦ੍ਧੁਨਨ੍ਤਾਤਿ ਕਮ੍ਮਸਿਪ੍ਪਿਨਾ ਸੁਕਤੇ ਸੁਟ੍ਠੁ ਨਿਮ੍ਮਿਤੇ ਖੁਦ੍ਦਕਘਣ੍ਟਾਦਿਅਸ੍ਸਾਲਙ੍ਕਾਰੇ ਅਭਿਉਦ੍ਧੁਨਨ੍ਤਾ ਅਧਿਕਂ ਉਦ੍ਧੁਨਨ੍ਤਾ. ਤੇਸਨ੍ਤਿ ਤੇਸਂ ਪਿਲ਼ਨ੍ਧਨਾਨਂ.

੧੦੨੪. ਰਥਸ੍ਸ ਘੋਸੋਤਿ ਯਥਾਵੁਤ੍ਤੋ ਰਥਨਿਗ੍ਘੋਸੋ. ਅਪਿਲ਼ਨ੍ਧਨਾਨ ਚਾਤਿ ਅ-ਕਾਰੋ ਨਿਪਾਤਮਤ੍ਤਂ. ਪਿਲ਼ਨ੍ਧਨਾਨਂ ਆਭਰਣਾਨਂ. ਅਪਿਲ਼ਨ੍ਧਨਨ੍ਤਿ ਚ ਆਭਰਣਪਰਿਯਾਯੋਤਿ ਵਾ ਵਦਨ੍ਤਿ, ਰਥਸ੍ਸਾਨਂ ਆਭਰਣਾਨਞ੍ਚਘੋਸੋਤਿ ਅਤ੍ਥੋ. ਖੁਰਸ੍ਸਨਾਦੋਤਿ ਤੁਰਙ੍ਗਾਨਂ ਖੁਰਨਿਪਾਤਸਦ੍ਦੋ. ਕਿਞ੍ਚਾਪਿ ਅਸ੍ਸਾ ਆਕਾਸੇਨ ਗਚ੍ਛਨ੍ਤਿ, ਮਧੁਰਸ੍ਸ ਪਨ ਖੁਰਨਿਪਾਤਸਦ੍ਦਸ੍ਸ ਉਪਲਦ੍ਧਿਹੇਤੁਭੂਤੇਨ ਕਮ੍ਮੁਨਾ ਤੇਸਂ ਖੁਰਨਿਕ੍ਖੇਪੇ ਖੁਰਨਿਕ੍ਖੇਪੇ ਪਟਿਘਾਤੋ ਲਬ੍ਭਤੀਤਿ ਵਦਨ੍ਤਿ. ਅਭਿਹਿਂਸਨਾਯ ਚਾਤਿ ਅਸ੍ਸਾਨਂ ਅਧਿਕਹਿਂਸਨੇਨ ਚ, ਅਨ੍ਤਰਨ੍ਤਰਾ ਅਸ੍ਸੇਹਿ ਪਵਤ੍ਤਿਤਹੇਸਨੇਨ ਚਾਤਿ ਅਤ੍ਥੋ. ‘‘ਅਭਿਹੇਸਨਾਯ ਚਾ’’ਤਿ ਕੇਚਿ ਪਠਨ੍ਤਿ. ਸਮਿਤਸ੍ਸਾਤਿ ਸਮੁਦਿਤਸ੍ਸ ਦਿਬ੍ਬਜਨਸ੍ਸ ਘੋਸੋ ਚ ਸੁਵਗ੍ਗੁ ਸੁਮਧੁਰਂ ਸੁਯ੍ਯਤਿ. ਕਿਂ ਵਿਯਾਤਿ ਆਹ ‘‘ਗਨ੍ਧਬ੍ਬਤੂਰਿਯਾਨਿ ਵਿਚਿਤ੍ਰਸਂਵਨੇ’’ਤਿ, ਚਿਤ੍ਰਲਤਾਵਨੇ ਗਨ੍ਧਬ੍ਬਦੇਵਪੁਤ੍ਤਾਨਂ ਪਞ੍ਚਙ੍ਗਿਕਤੂਰਿਯਾਨਿ ਵਿਯ. ਤੂਰਿਯਸਨ੍ਨਿਸ੍ਸਿਤੋ ਹਿ ਸਦ੍ਦੋ ‘‘ਤੂਰਿਯਾਨੀ’’ਤਿ ਵੁਤ੍ਤੋ ਨਿਸ੍ਸਯਵੋਹਾਰੇਨ. ‘‘ਗਨ੍ਧਬ੍ਬਤੂਰਿਯਾਨ ਚ ਵਿਚਿਤ੍ਰਸਂਵਨੇ’’ਤਿ ਚ ਪਾਠੋ, ‘‘ਤੂਰਿਯਾਨਞ੍ਚ’’ਇਤਿ ਅਨੁਨਾਸਿਕਂ ਆਨੇਤ੍ਵਾ ਯੋਜੇਤਬ੍ਬਂ. ਅਪਰੇ ‘‘ਗਨ੍ਧਬ੍ਬਤੂਰਿਯਾਨਿ ਵਿਚਿਤ੍ਰਪਵਨੇ’’ਤਿ ਪਠਨ੍ਤਿ.

੧੦੨੫. ਰਥੇ ਠਿਤਾਤਾਤਿ ਰਥੇ ਠਿਤਾ ਏਤਾ. ਮਿਗਮਨ੍ਦਲੋਚਨਾਤਿ ਮਿਗਚ੍ਛਾਪਿਕਾਨਂ ਵਿਯ ਮੁਦੁਸਿਨਿਦ੍ਧਦਿਟ੍ਠਿਨਿਪਾਤਾ. ਆਲ਼ਾਰਪਮ੍ਹਾਤਿ ਬਹਲਸਙ੍ਗਤਪਖੁਮਾ, ਗੋਪਖੁਮਾਤਿ ਅਤ੍ਥੋ. ਹਸਿਤਾਤਿ ਪਹਸਿਤਾ, ਪਹਂਸਿਤਮੁਖਾਤਿ ਅਤ੍ਥੋ. ਪਿਯਂਵਦਾਤਿ ਪਿਯਵਾਦਿਨਿਯੋ. ਵੇਲ਼ੁਰਿਯਜਾਲਾਵਤਤਾਤਿ ਵੇਲ਼ੁਰਿਯਮਣਿਮਯੇਨ ਜਾਲੇਨ ਛਾਦਿਤਸਰੀਰਾ. ਤਨੁਚ੍ਛਵਾਤਿ ਸੁਖੁਮਚ੍ਛਵਿਯੋ. ਸਦੇਵਾਤਿ ਸਦਾ ਏਵ ਸਬ੍ਬਕਾਲਮੇਵ. ਗਨ੍ਧਬ੍ਬਸੂਰਗ੍ਗਪੂਜਿਤਾਤਿ ਗਨ੍ਧਬ੍ਬਦੇਵਤਾਹਿ ਚੇਵ ਅਪਰਾਹਿ ਚ ਅਗ੍ਗਦੇਵਤਾਹਿ ਲਦ੍ਧਪੂਜਾ.

੧੦੨੬. ਤਾ ਰਤ੍ਤਰਤ੍ਤਮ੍ਬਰਪੀਤਵਾਸਸਾਤਿ ਰਜਨੀਯਰੂਪਾ ਚ ਰਤ੍ਤਪੀਤਵਤ੍ਥਾ ਚ. ਅਭਿਰਤ੍ਤਲੋਚਨਾਤਿ ਵਿਸੇਸਤੋ ਰਤ੍ਤਰਾਜੀਹਿ ਉਪਸੋਭਿਤਨਯਨਾ. ਕੁਲੇ ਸੁਜਾਤਾਤਿ ਸਿਨ੍ਧਵਕੁਲੇ ਸੁਜਾਤਾ ਵਿਸਿਟ੍ਠਦੇਵਨਿਕਾਯੇ ਸਮ੍ਭਵਾ. ਸੁਤਨੂਤਿ ਸੁਨ੍ਦਰਸਰੀਰਾ. ਸੁਚਿਮ੍ਹਿਤਾਤਿ ਸੁਦ੍ਧਸਿਤਕਰਣਾ.

੧੦੨੭. ਤਾ ਕਮ੍ਬੁਕੇਯੂਰਧਰਾਤਿ ਸੁਵਣ੍ਣਮਯਕੇਯੂਰਧਰਾ. ਸੁਮਜ੍ਝਿਮਾਤਿ ਵਿਲਗ੍ਗਮਜ੍ਝਾ. ਊਰੁਥਨੂਪਪਨ੍ਨਾਤਿ ਸਮ੍ਪਨ੍ਨਊਰੁਥਨਾ, ਕਦਲਿਕ੍ਖਨ੍ਧਸਦਿਸਊਰੁ ਚੇਵ ਸਮੁਗ੍ਗਸਦਿਸਥਨਾ ਚ. ਵਟ੍ਟਙ੍ਗੁਲਿਯੋਤਿ ਅਨੁਪੁਬ੍ਬਤੋ ਵਟ੍ਟਙ੍ਗੁਲਿਯੋ. ਸੁਮੁਖਾਤਿ ਸੁਨ੍ਦਰਮੁਖਾ, ਪਮੁਦਿਤਮੁਖਾ ਵਾ. ਸੁਦਸ੍ਸਨਾਤਿ ਦਸ੍ਸਨੀਯਾ.

੧੦੨੮. ਅਞ੍ਞਾਤਿ ਏਕਚ੍ਚਾ. ਸੁਵੇਣੀਤਿ ਸੁਨ੍ਦਰਕੇਸਵੇਣਿਯੋ. ਸੁਸੂਤਿ ਦਹਰਾ. ਮਿਸ੍ਸਕੇਸਿਯੋਤਿ ਰਤ੍ਤਮਾਲਾਦੀਹਿ ਮਿਸ੍ਸਿਤਕੇਸਵਟ੍ਟਿਯੋ. ਕਥਂ? ਸਮਂ ਵਿਭਤ੍ਤਾਹਿ ਪਭਸ੍ਸਰਾਹਿ ਚਾਤਿ, ਸਮਂ ਅਞ੍ਞਮਞ੍ਞਸਦਿਸਂ ਨਾਨਾਵਿਭਤ੍ਤਿਵਸੇਨ ਵਿਭਤ੍ਤਾਹਿ ਸੁਵਣ੍ਣਚੀਰਾਦਿਖਚਿਤਾਹਿ ਇਨ੍ਦਨੀਲਮਣਿਆਦਯੋ ਵਿਯ ਪਭਸ੍ਸਰਾਹਿ ਕੇਸਵਟ੍ਟੀਹਿ ਮਿਸ੍ਸਿਤਕੇਸਿਯੋਤਿ ਯੋਜਨਾ. ਅਨੁਬ੍ਬਤਾਤਿ ਅਨੁਕੂਲਕਿਰਿਯਾ. ਤਾਤਿ ਅਚ੍ਛਰਾਯੋ.

੧੦੨੯. ਚਨ੍ਦਨਸਾਰਵੋਸਿਤਾਤਿ ਸਾਰਭੂਤੇਨ ਦਿਬ੍ਬਚਨ੍ਦਨੇਨ ਉਲ੍ਲਿਤ੍ਤਾ ਵਿਚ੍ਛੁਰਿਤਾ.

੧੦੩੧. ਕਣ੍ਠੇਸੂਤਿਆਦਿਨਾ ਗੀਵੂਪਗਹਤ੍ਥੂਪਗਪਾਦੂਪਗਸੀਸੂਪਗਾਦਿਆਭਰਣਾਨਿ ਦਸ੍ਸੇਤਿ. ਓਭਾਸਯਨ੍ਤੀਤਿ ਕਣ੍ਠੇਸੁ ਯਾਨਿ ਪਿਲ਼ਨ੍ਧਨਾਨਿ, ਤੇਹਿ ਓਭਾਸਯਨ੍ਤੀਤਿ ਯੋਜਨਾ. ਏਵਂ ਸੇਸੇਸੁਪਿ. ਅਬ੍ਭੁਦ੍ਦਯਨ੍ਤਿ ਅਭਿਉਗ੍ਗਚ੍ਛਨ੍ਤੋ, ‘‘ਅਬ੍ਭੁਦ੍ਦਸ’’ਨ੍ਤਿਪਿ ਪਾਠੋ, ਸੋਯੇਵਤ੍ਥੋ. ਸਾਰਦਿਕੋਤਿ ਸਰਦਕਾਲਿਕੋ. ਭਾਣੁਮਾਤਿ ਸੂਰਿਯੋ. ਸੋ ਹਿ ਅਬ੍ਭਾਦਿਦੋਸਵਿਰਹੇਨ ਦਸਪਿ ਦਿਸਾ ਸੁਟ੍ਠੁ ਓਭਾਸੇਤਿ.

੧੦੩੨. ਵਾਤਸ੍ਸ ਵੇਗੇਨ ਚਾਤਿ ਮਨੁਞ੍ਞਗਨ੍ਧੂਪਹਾਰਂ ਸਦ੍ਦੂਪਹਾਰਞ੍ਚ ਕਰੋਨ੍ਤੇਨ ਉਪਹਰਨ੍ਤੇਨ ਵਿਯ ਵਾਯਨ੍ਤੇਨ ਵਾਤਸ੍ਸ ਵੇਗੇਨ ਰਥਤੁਰਙ੍ਗਵੇਗੇਨ ਚ. ਮੁਞ੍ਚਨ੍ਤੀਤਿ ਵਿਸ੍ਸਜ੍ਜੇਨ੍ਤਿ. ਰੁਚਿਰਨ੍ਤਿ ਪਞ੍ਚਙ੍ਗਿਕਤੂਰਿਯਾਨਿ ਵਿਯ ਉਪਰੂਪਰਿ ਰੁਚਿਦਾਯਕਂ. ਸੁਚਿਨ੍ਤਿ ਸੁਦ੍ਧਂ ਅਸਂਸਟ੍ਠਂ. ਸੁਭਨ੍ਤਿ ਮਨੁਞ੍ਞਂ. ਸਬ੍ਬੇਹਿ ਵਿਞ੍ਞੂਹਿ ਸੁਤਬ੍ਬਰੂਪਨ੍ਤਿ ਸਬ੍ਬੇਹਿਪਿ ਵਿਞ੍ਞੁਜਾਤਿਕੇਹਿ ਗਨ੍ਧਬ੍ਬਸਮਯਞ੍ਞੂਹਿ ਸੋਤਬ੍ਬਂ ਸਵਨੀਯਂ ਉਤ੍ਤਮਸਭਾਵਂ ਘੋਸਂ ਮੁਞ੍ਚਨ੍ਤੀਤਿ ਯੋਜਨਾ.

੧੦੩੩. ਉਯ੍ਯਾਨਭੂਮ੍ਯਾਤਿ ਉਯ੍ਯਾਨਭੂਮਿਯਂ. ਦੁਵਦ੍ਧਤੋਤਿ ਦ੍ਵੀਹਿ ਅਦ੍ਧਪਸ੍ਸੇਹਿ. ‘‘ਦੁਭਤੋ ਚ ਠਿਤਾ’’ਤਿਪਿ ਪਠਨ੍ਤਿ, ਸੋਯੇਵਤ੍ਥੋ. ਰਥਾਤਿ ਰਥੇ. ਨਾਗਾਤਿ ਨਾਗੇ. ਉਪਯੋਗਤ੍ਥੇ ਹਿ ਏਤਂ ਪਚ੍ਚਤ੍ਤਵਚਨਂ. ਸਰੋਤਿ ਰਥਨਾਗਤੂਰਿਯਾਨਿ ਪਟਿਚ੍ਚ ਨਿਬ੍ਬਤ੍ਤੋ ਸਰੋ. ਦੇਵਿਨ੍ਦਾਤਿ ਦੇਵਪੁਤ੍ਤਂ ਆਲਪਤਿ. ਵੀਣਾ ਯਥਾ ਪੋਕ੍ਖਰਪਤ੍ਤਬਾਹੁਭੀਤਿ ਯਥਾ ਵੀਣਾ ਸਮ੍ਮਦੇਵ ਯੋਜਿਤੇਹਿ ਦੋਣਿਪਤ੍ਤਬਾਹੁਦਣ੍ਡੇਹਿ ਤਂਤਂਮੁਚ੍ਛਨਾਨੁਰੂਪਂ ਅਵਟ੍ਠਿਤੇਹਿ ਵਾਦਿਯਮਾਨਾ ਸੁਣਨ੍ਤਂ ਜਨਂ ਪਮੋਦੇਤਿ, ਏਵਂ ਤਂ ਰਥਾਦਯੋ ਅਤ੍ਤਨੋ ਸਰੇਨ ਪਮੋਦਯਨ੍ਤਿ. ਸੁਸਿਕ੍ਖਿਤਭਾਵੇਨ ਪੋਕ੍ਖਰਭਾਵਂ ਸੁਨ੍ਦਰਭਾਵਂ ਪਤ੍ਤੇਹਿ ਵੀਣਾਵਾਦਕਸ੍ਸ ਹਤ੍ਥੇਹਿ ਪਵਾਦਿਤਾ ਵੀਣਾ ਯਥਾ ਮਹਾਜਨਂ ਪਮੋਦੇਤਿ, ਏਵਂ ਤਂ ਰਥਾਦਯੋ ਅਤ੍ਤਨੋ ਸਰੇਨ ਪਮੋਦਯਨ੍ਤੀਤਿ.

੧੦੩੪. ਇਮਾਸੁ ਵੀਣਾਸੂਤਿ ਗਾਥਾਯ ਅਯਂ ਸਙ੍ਖੇਪਤ੍ਥੋ – ਇਮਾਸੁ ਉਜੁਕੋਟਿਵਙ੍ਕਬ੍ਰਹਤੀਨਨ੍ਦਿਨੀਤਿਸਰਆਦਿਭੇਦਾਸੁ ਬਹੂਸੁ ਵੀਣਾਸੁ ਸਿਨਿਦ੍ਧਮਧੁਰਸ੍ਸਰਤਾਯ ਵਗ੍ਗੂਸੁ ਤਤੋ ਏਵ ਮਨੁਞ੍ਞਰੂਪਾਸੁ ਹਦਯੇਰਿਤਂ ਹਦਯਙ੍ਗਮਂ ਹਦਯਹਾਰਿਨਿਂ ਪੀਤਿਂ ਪੀਤਿਨਿਮਿਤ੍ਤਂ ਪਵਜ੍ਜਮਾਨਾਸੁ ਪਵਾਦਿਯਮਾਨਾਸੁ ਅਚ੍ਛਰਾ ਦੇਵਕਞ੍ਞਾ ਪੀਤਿਵੇਗੁਕ੍ਖਿਤ੍ਤਤਾਯ ਅਤ੍ਤਨੋ ਸੁਸਿਕ੍ਖਿਤਤਾਯ ਚ ਦਿਬ੍ਬਪਦੁਮੇਸੁ ਭਮਨ੍ਤਿ ਨਚ੍ਚਂ ਦਸ੍ਸੇਨ੍ਤਿਯੋ ਸਞ੍ਚਰਨ੍ਤਿ.

੧੦੩੫. ਇਮਾਨੀਤਿ ਇਦਂ ਪਚ੍ਚੇਕਂ ਯੋਜੇਤਬ੍ਬਂ ‘‘ਇਮਾਨਿ ਗੀਤਾਨਿ, ਇਮਾਨਿ ਵਾਦਿਤਾਨਿ, ਇਮਾਨਿ ਨਚ੍ਚਾਨਿ ਚਾ’’ਤਿ. ਸਮੇਨ੍ਤਿ ਏਕਤੋਤਿ ਏਕਜ੍ਝਂ ਸਮਰਸਾਨਿ ਹੋਨ੍ਤਿ. ਅਥ ਵਾ ਸਮੇਨ੍ਤਿ ਏਕਤੋਤਿ ਏਕਤੋ ਏਕਜ੍ਝਂ ਸਮਾਨਿ ਸਮਰਸਾਨਿ ਕਰੋਨ੍ਤਿ, ਤਨ੍ਤਿਸ੍ਸਰਂ ਗੀਤਸ੍ਸਰੇਨ, ਗੀਤਸ੍ਸਰਞ੍ਚ ਤਨ੍ਤਿਸ੍ਸਰੇਨ ਸਂਸਨ੍ਦਨ੍ਤਿਯੋ ਨਚ੍ਚਨੇਨ ਯਥਾਧਿਗਤੇ ਹਸ੍ਸਾਦਿਰਸੇ ਅਪਰਿਹਾਪੇਨ੍ਤਿਯੋ ਸਮੇਨ੍ਤਿ ਸਮਾਨੇਨ੍ਤੀਤਿ ਅਤ੍ਥੋ. ਅਤ੍ਥੇਤ੍ਥ ਨਚ੍ਚਨ੍ਤਿ ਅਥੇਤ੍ਥ ਅਚ੍ਛਰਾ ਓਭਾਸਯਨ੍ਤੀਤਿ ਏਵਂ ਗੀਤਾਦੀਨਿ ਸਮਰਸੇ ਕਰੋਨ੍ਤਿਯੋ ਅਥ ਅਞ੍ਞਾ ਏਕਚ੍ਚਾ ਅਚ੍ਛਰਾ ਏਤ੍ਥ ਏਤਸ੍ਮਿਂ ਤਵ ਰਥੇ ਨਚ੍ਚਨ੍ਤਿ, ਅਥ ਅਞ੍ਞਾ ਵਰਿਤ੍ਥਿਯੋ ਉਤ੍ਤਮਿਤ੍ਥਿਯੋ ਨਚ੍ਚਂ ਪਸ੍ਸਨ੍ਤਿਯੋ ਅਤ੍ਤਨੋ ਸਰੀਰੋਭਾਸੇਨ ਚੇਵ ਵਤ੍ਥਾਭਰਣਓਭਾਸੇਨ ਚ ਏਤ੍ਥ ਏਤਸ੍ਮਿਂ ਪਦੇਸੇ ਉਭਤੋ ਦ੍ਵੀਸੁ ਪਸ੍ਸੇਸੁ ਦਸਪਿ ਦਿਸਾ ਕੇਵਲਂ ਓਭਾਸਯਨ੍ਤਿ ਵਿਜ੍ਜੋਤਯਨ੍ਤੀਤਿ ਅਤ੍ਥੋ.

੧੦੩੬. ਸੋਤਿ ਸੋ ਤ੍ਵਂ ਏਵਂਭੂਤੋ. ਤੂਰਿਯਗਣਪ੍ਪਬੋਧਨੋਤਿ ਦਿਬ੍ਬਤੂਰਿਯਸਮੂਹੇਨ ਕਤਪੀਤਿਪਬੋਧਨੋ. ਮਹੀਯਮਾਨੋਤਿ ਪੂਜੀਯਮਾਨੋ. ਵਜਿਰਾਵੁਧੋਰਿਵਾਤਿ ਇਨ੍ਦੋ ਵਿਯ.

੧੦੩੭. ਉਪੋਸਥਂ ਕਂ ਵਾ ਤੁਵਂ ਉਪਾਵਸੀਤਿ ਅਞ੍ਞੇਹਿਪਿ ਉਪੋਸਥੋ ਉਪਵਸੀਯਤਿ, ਤ੍ਵਂ ਕਂ ਵਾ ਕੀਦਿਸਂ ਨਾਮ ਉਪੋਸਥਂ ਉਪਵਸੀਤਿ ਪੁਚ੍ਛਤਿ. ਧਮ੍ਮਚਰਿਯਨ੍ਤਿ ਦਾਨਾਦਿਪੁਞ੍ਞਪਟਿਪਤ੍ਤਿਂ. ਵਤਨ੍ਤਿ ਵਤਸਮਾਦਾਨਂ. ਅਭਿਰੋਚਯੀਤਿ ਅਭਿਰੋਚੇਸਿ, ਰੁਚ੍ਚਿਤ੍ਵਾ ਪੂਰੇਸੀਤਿ ਅਤ੍ਥੋ. ‘‘ਅਭਿਰਾਧਯੀ’’ਤਿਪਿ ਪਾਠੋ, ਸਾਧੇਸਿ ਨਿਪ੍ਫਾਦੇਸੀਤਿ ਅਤ੍ਥੋ.

੧੦੩੮. ਇਦਨ੍ਤਿ ਨਿਪਾਤਮਤ੍ਤਂ, ਇਦਂ ਵਾ ਫਲਨ੍ਤਿ ਅਧਿਪ੍ਪਾਯੋ. ਅਭਿਰੋਚਸੇਤਿ ਅਭਿਭਵਿਤ੍ਵਾ ਵਿਜ੍ਜੋਤਸਿ.

ਏਵਂ ਮਹਾਥੇਰੇਨ ਪੁਟ੍ਠੋ ਦੇਵਪੁਤ੍ਤੋ ਤਮਤ੍ਥਂ ਆਚਿਕ੍ਖਿ. ਤੇਨ ਵੁਤ੍ਤਂ –

੧੦੪੦. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ, ਮੋਗ੍ਗਲ੍ਲਾਨੇਨ ਪੁਚ੍ਛਿਤੋ;

ਪਞ੍ਹਂ ਪੁਟ੍ਠੋ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੧੦੪੧. ‘‘ਜਿਤਿਨ੍ਦ੍ਰਿਯਂ ਬੁਦ੍ਧਮਨੋਮਨਿਕ੍ਕਮਂ, ਨਰੁਤ੍ਤਮਂ ਕਸ੍ਸਪਮਗ੍ਗਪੁਗ੍ਗਲਂ;

ਅਵਾਪੁਰਨ੍ਤਂ ਅਮਤਸ੍ਸ ਦ੍ਵਾਰਂ, ਦੇਵਾਤਿਦੇਵਂ ਸਤਪੁਞ੍ਞਲਕ੍ਖਣਂ.

੧੦੪੨. ‘‘ਤਮਦ੍ਦਸਂ ਕੁਞ੍ਜਰਮੋਘਤਿਣ੍ਣਂ, ਸੁਵਣ੍ਣਸਿਙ੍ਗੀਨਦਬਿਮ੍ਬਸਾਦਿਸਂ;

ਦਿਸ੍ਵਾਨ ਤਂ ਖਿਪ੍ਪਮਹੁਂ ਸੁਚੀਮਨੋ, ਤਮੇਵ ਦਿਸ੍ਵਾਨ ਸੁਭਾਸਿਤਦ੍ਧਜਂ.

੧੦੪੩. ‘‘ਤਮਨ੍ਨਪਾਨਂ ਅਥਵਾਪਿ ਚੀਵਰਂ, ਸੁਚਿਂ ਪਣੀਤਂ ਰਸਸਾ ਉਪੇਤਂ;

ਪੁਪ੍ਫਾਭਿਕਿਣ੍ਣਮ੍ਹਿ ਸਕੇ ਨਿਵੇਸਨੇ, ਪਤਿਟ੍ਠਪੇਸਿਂ ਸ ਅਸਙ੍ਗਮਾਨਸੋ.

੧੦੪੪. ‘‘ਤਮਨ੍ਨਪਾਨੇਨ ਚ ਚੀਵਰੇਨ ਚ, ਖਜ੍ਜੇਨ ਭੋਜ੍ਜੇਨ ਚ ਸਾਯਨੇਨ ਚ;

ਸਨ੍ਤਪ੍ਪਯਿਤ੍ਵਾ ਦ੍ਵਿਪਦਾਨਮੁਤ੍ਤਮਂ, ਸੋ ਸਗ੍ਗਸੋ ਦੇਵਪੁਰੇ ਰਮਾਮਹਂ.

੧੦੪੫. ‘‘ਏਤੇਨੁਪਾਯੇਨ ਇਮਂ ਨਿਰਗ੍ਗਲ਼ਂ, ਯਞ੍ਞਂ ਯਜਿਤ੍ਵਾ ਤਿਵਿਧਂ ਵਿਸੁਦ੍ਧਂ;

ਪਹਾਯਹਂ ਮਾਨੁਸਕਂ ਸਮੁਸ੍ਸਯਂ, ਇਨ੍ਦੂਪਮੋ ਦੇਵਪੁਰੇ ਰਮਾਮਹਂ.

੧੦੪੬. ‘‘ਆਯੁਞ੍ਚ ਵਣ੍ਣਞ੍ਚ ਸੁਖਂ ਬਲਞ੍ਚ, ਪਣੀਤਰੂਪਂ ਅਤਿਕਙ੍ਖਤਾ ਮੁਨਿ;

ਅਨ੍ਨਞ੍ਚ ਪਾਨਞ੍ਚ ਬਹੁਂ ਸੁਸਙ੍ਖਤਂ, ਪਤਿਟ੍ਠਪੇਤਬ੍ਬਮਸਙ੍ਗਮਾਨਸੇ.

੧੦੪੭. ‘‘ਨਯਿਮਸ੍ਮਿਂ ਲੋਕੇ ਪਰਸ੍ਮਿਂ ਵਾ ਪਨ, ਬੁਦ੍ਧੇਨ ਸੇਟ੍ਠੋ ਵ ਸਮੋ ਵ ਵਿਜ੍ਜਤਿ;

ਆਹੁਨੇਯ੍ਯਾਨਂ ਪਰਮਾਹੁਤਿਂ ਗਤੋ, ਪੁਞ੍ਞਤ੍ਥਿਕਾਨਂ ਵਿਪੁਲਪ੍ਫਲੇਸਿਨ’’ਨ੍ਤਿ.

੧੦੪੧. ਤਤ੍ਥ ਜਿਤਿਨ੍ਦ੍ਰਿਯਨ੍ਤਿ ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਬੋਧਿਮੂਲੇਯੇਵ ਅਗ੍ਗਮਗ੍ਗੇਨ ਜਿਤਤ੍ਤਾ ਨਿਬ੍ਬਿਸੇਵਨਭਾਵਸ੍ਸ ਕਤਤ੍ਤਾ ਜਿਤਿਨ੍ਦ੍ਰਿਯਂ. ਅਭਿਞ੍ਞੇਯ੍ਯਾਦੀਨਂ ਅਭਿਞ੍ਞੇਯ੍ਯਾਦਿਭਾਵਤੋ ਅਨਵਸੇਸਤੋ ਅਭਿਸਮ੍ਬੁਦ੍ਧਤ੍ਤਾ ਬੁਦ੍ਧਂ. ਪੁਰਿਪੁਣ੍ਣਵੀਰਿਯਤਾਯ ਅਨੋਮਨਿਕ੍ਕਮਂ ਚਤੁਰਙ੍ਗਸਮਨ੍ਨਾਗਤਸ੍ਸ ਵੀਰਿਯਸ੍ਸ ਚਤੁਬ੍ਬਿਧਸਮ੍ਮਪ੍ਪਧਾਨਸ੍ਸ ਚ ਪਾਰਿਪੂਰਿਯਾਤਿ ਅਤ੍ਥੋ. ਨਰੁਤ੍ਤਮਨ੍ਤਿ ਨਰਾਨਂ ਉਤ੍ਤਮਂ ਦ੍ਵਿਪਦੁਤ੍ਤਮਂ. ਕਸ੍ਸਪਨ੍ਤਿ ਭਗਵਨ੍ਤਂ ਗੋਤ੍ਤੇਨ ਵਦਤਿ. ਅਵਾਪੁਰਨ੍ਤਂ ਅਮਤਸ੍ਸ ਦ੍ਵਾਰਨ੍ਤਿ ਕੋਣਾਗਮਨਸ੍ਸ ਭਗਵਤੋ ਸਾਸਨਨ੍ਤਰਧਾਨਤੋ ਪਭੁਤਿ ਪਿਹਿਤਂ ਨਿਬ੍ਬਾਨਮਹਾਨਗਰਸ੍ਸ ਦ੍ਵਾਰਂ ਅਰਿਯਮਗ੍ਗਂ ਵਿਵਰਨ੍ਤਂ. ਦੇਵਾਤਿਦੇਵਨ੍ਤਿ ਸਬ੍ਬੇਸਮ੍ਪਿ ਦੇਵਾਨਂ ਅਤਿਦੇਵਂ. ਸਤਪੁਞ੍ਞਲਕ੍ਖਣਨ੍ਤਿ ਅਨੇਕਸਤਪੁਞ੍ਞਵਸੇਨ ਨਿਬ੍ਬਤ੍ਤਮਹਾਪੁਰਿਸਲਕ੍ਖਣਂ.

੧੦੪੨. ਕੁਞ੍ਜਰਨ੍ਤਿ ਕਿਲੇਸਪਟਿਸਤ੍ਤੁਨਿਮ੍ਮਦ੍ਦਨੇਨ ਕੁਞ੍ਜਰਸਦਿਸਂ, ਮਹਾਨਾਗਨ੍ਤਿ ਅਤ੍ਥੋ. ਚਤੁਨ੍ਨਂ ਓਘਾਨਂ ਸਂਸਾਰਮਹੋਘਸ੍ਸ ਤਰਿਤਤ੍ਤਾ ਓਘਤਿਣ੍ਣਂ. ਸੁਵਣ੍ਣਸਿਙ੍ਗੀਨਦਬਿਮ੍ਬਸਾਦਿਸਨ੍ਤਿ ਸਿਙ੍ਗੀਸੁਵਣ੍ਣਜਮ੍ਬੁਨਦਸੁਵਣ੍ਣਰੂਪਸਦਿਸਂ, ਕਞ੍ਚਨਸਨ੍ਨਿਭਤ੍ਤਚਨ੍ਤਿ ਅਤ੍ਥੋ. ਦਿਸ੍ਵਾਨ ਤਂ ਖਿਪ੍ਪਮਹੁਂ ਸੁਚੀਮਨੋਤਿ ਤਂ ਕਸ੍ਸਪਸਮ੍ਮਾਸਮ੍ਬੁਦ੍ਧਂ ਦਿਸ੍ਵਾ ਖਿਪ੍ਪਂ ਤਾਵਦੇਵ ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ’’ਤਿ ਪਸਾਦਵਸੇਨ ਕਿਲੇਸਮਲਾਪਗਮਨੇਨ ਸੁਚਿਮਨੋ ਵਿਸੁਦ੍ਧਮਨੋ ਅਹੋਸਿਂ, ਤਞ੍ਚ ਖੋ ਤਮੇਵ ਦਿਸ੍ਵਾਨ ਤਂ ਦਿਸ੍ਵਾ ਏਵ. ਸੁਭਾਸਿਤਦ੍ਧਜਨ੍ਤਿ ਧਮ੍ਮਦ੍ਧਜਂ.

੧੦੪੩. ਤਮਨ੍ਨਪਾਨਨ੍ਤਿ ਤਮ੍ਹਿ ਭਗਵਤਿ ਅਨ੍ਨਞ੍ਚ ਪਾਨਞ੍ਚ. ਅਥਵਾਪਿ ਚੀਵਰਨ੍ਤਿ ਅਥ ਚੀਵਰਮ੍ਪਿ. ਰਸਸਾ ਉਪੇਤਨ੍ਤਿ ਰਸੇਨ ਉਪੇਤਂ ਸਾਦੁਰਸਂ, ਉਲ਼ਾਰਨ੍ਤਿ ਅਤ੍ਥੋ. ਪੁਪ੍ਫਾਭਿਕਿਣ੍ਣਮ੍ਹੀਤਿ ਗਨ੍ਥਿਤੇਹਿ ਚ ਅਗਨ੍ਥਿਕੇਹਿ ਚ ਪੁਪ੍ਫੇਹਿ ਓਲਮ੍ਬਨਵਸੇਨ ਸਨ੍ਥਰਣਵਸੇਨ ਚ ਅਭਿਕਿਣ੍ਣੇ. ਪਤਿਟ੍ਠਪੇਸਿਨ੍ਤਿ ਪਟਿਪਾਦੇਸਿਂ ਅਦਾਸਿਂ. ਅਸਙ੍ਗਮਾਨਸੋਤਿ ਕਤ੍ਥਚਿ ਅਲਗ੍ਗਚਿਤ੍ਤੋ ਸੋ ਅਹਨ੍ਤਿ ਯੋਜਨਾ.

੧੦੪੪. ਸਗ੍ਗਸੋਤਿ ਅਪਰਾਪਰੂਪਪਤ੍ਤਿਵਸੇਨ ਸਗ੍ਗੇ ਸਗ੍ਗੇ, ਤਤ੍ਥਾਪਿ ਚ ਦੇਵਪੁਰੇ ਸੁਦਸ੍ਸਨਮਹਾਨਗਰੇ. ਰਮਾਮੀਤਿ ਕੀਲ਼ਾਮਿ ਮੋਦਾਮਿ.

੧੦੪੫. ਏਤੇਨੁਪਾਯੇਨਾਤਿ ਗੋਪਾਲਬ੍ਰਾਹ੍ਮਣਕਾਲੇ ਸਸਾਵਕਸਙ੍ਘਸ੍ਸ ਕਸ੍ਸਪਭਗਵਤੋ ਯਥਾ ਅਸਦਿਸਦਾਨਂ ਅਦਾਸਿਂ, ਏਤੇਨ ਉਪਾਯੇਨ. ਇਮਂ ਨਿਰਗ੍ਗਲ਼ਂ ਯਞ੍ਞਂ ਯਜਿਤ੍ਵਾ ਤਿਵਿਧਂ ਵਿਸੁਦ੍ਧਨ੍ਤਿ ਅਨਾਵਟਦ੍ਵਾਰਤਾਯ ਮੁਤ੍ਤਚਾਗਤਾਯ ਚ ਨਿਰਗ੍ਗਲ਼ਂ, ਤੀਸੁਪਿ ਕਾਲੇਸੁ ਤੀਹਿ ਦ੍ਵਾਰੇਹਿ ਕਰਣਕਾਰਾਪਨਾਨੁਸ੍ਸਰਣਵਿਧੀਹਿ ਸਮ੍ਪਨ੍ਨਤਾਯ ਤਿਵਿਧਂ, ਤਤ੍ਥ ਸਂਕਿਲੇਸਾਭਾਵੇਨ ਵਿਸੁਦ੍ਧਂ ਅਪਰਿਮਿਤਧਨਪਰਿਚ੍ਚਾਗਭਾਵੇਨ ਮਹਾਚਾਗਤਾਯ ਯਞ੍ਞਂ ਯਜਿਤ੍ਵਾ, ਮਹਾਦਾਨਂ ਦਤ੍ਵਾਤਿ ਅਤ੍ਥੋ. ਤਂ ਪਨ ਦਾਨਂ ਚਿਰਕਤਮ੍ਪਿ ਖੇਤ੍ਤਵਤ੍ਥੁਚਿਤ੍ਤਾਨਂ ਉਲ਼ਾਰਤਾਯ ਅਨ੍ਤਰਨ੍ਤਰਾ ਅਨੁਸ੍ਸਰਣੇਨ ਅਤ੍ਤਨੋ ਪਾਕਟਂ ਆਸਨ੍ਨਂ ਪਚ੍ਚਕ੍ਖਂ ਵਿਯ ਉਪਟ੍ਠਿਤਂ ਗਹੇਤ੍ਵਾ ਆਹ ‘‘ਇਮ’’ਨ੍ਤਿ.

੧੦੪੬. ਏਵਂ ਦੇਵਪੁਤ੍ਤੋ ਅਤ੍ਤਨਾ ਕਤਕਮ੍ਮਂ ਥੇਰਸ੍ਸ ਕਥੇਤ੍ਵਾ ਇਦਾਨਿ ਤਾਦਿਸਾਯ ਸਮ੍ਪਤ੍ਤਿਯਾ ਪਰੇਪਿ ਪਤਿਟ੍ਠਾਪੇਤੁਕਾਮਤਂ ਤਥਾਗਤੇ ਚ ਉਤ੍ਤਮਂ ਅਤ੍ਤਨੋ ਪਸਾਦਬਹੁਮਾਨਂ ਪਵੇਦੇਨ੍ਤੋ ‘‘ਆਯੁਞ੍ਚ ਵਣ੍ਣਞ੍ਚਾ’’ਤਿਆਦਿਨਾ ਗਾਥਾਦ੍ਵਯਮਾਹ. ਤਤ੍ਥ ਅਭਿਕਙ੍ਖਤਾਤਿ ਇਚ੍ਛਨ੍ਤੇਨ. ਮੁਨੀਤਿ ਥੇਰਂ ਆਲਪਤਿ.

੧੦੪੭. ਨਯਿਮਸ੍ਮਿਂ ਲੋਕੇਤਿ ਦੇਵਪੁਤ੍ਤੋ ਅਤ੍ਤਨੋ ਪਚ੍ਚਕ੍ਖਭੂਤਂ ਲੋਕਂ ਵਦਤਿ. ਪਰਸ੍ਮਿਨ੍ਤਿ ਤਤੋ ਅਞ੍ਞਸ੍ਮਿਂ. ਏਤੇਨ ਸਬ੍ਬੇਪਿ ਸਦੇਵਕੇ ਲੋਕੇ ਦਸ੍ਸੇਤਿ. ਸਮੋ ਚ ਵਿਜ੍ਜਤੀਤਿ ਸੇਟ੍ਠੋ ਤਾਵ ਤਿਟ੍ਠਤੁ, ਸਮੋ ਏਵ ਨ ਵਿਜ੍ਜਤੀਤਿ ਅਤ੍ਥੋ. ਆਹੁਨੇਯ੍ਯਾਨਂ ਪਰਮਾਹੁਤਿਂ ਗਤੋਤਿ ਇਮਸ੍ਮਿਂ ਲੋਕੇ ਯਤ੍ਤਕਾ ਆਹੁਨੇਯ੍ਯਾ ਨਾਮ, ਤੇਸੁ ਸਬ੍ਬੇਸੁ ਪਰਮਾਹੁਤਿਂ ਪਰਮਂ ਆਹੁਨੇਯ੍ਯਭਾਵਂ ਗਤੋ. ‘‘ਦਕ੍ਖਿਣੇਯ੍ਯਾਨਂ ਪਰਮਗ੍ਗਤਂ ਗਤੋ’’ਤਿ ਵਾ ਪਾਠੋ, ਤਤ੍ਥ ਪਰਮਗ੍ਗਤਨ੍ਤਿ ਪਰਮਂ ਅਗ੍ਗਭਾਵਂ, ਅਗ੍ਗਦਕ੍ਖਿਣੇਯ੍ਯਭਾਵਨ੍ਤਿ ਅਤ੍ਥੋ. ਕੇਸਨ੍ਤਿ ਆਹ ‘‘ਪੁਞ੍ਞਤ੍ਥਿਕਾਨਂ ਵਿਪੁਲਪ੍ਫਲੇਸਿਨ’’ਨ੍ਤਿ, ਪੁਞ੍ਞੇਨ ਅਤ੍ਥਿਕਾਨਂ ਵਿਪੁਲਂ ਮਹਨ੍ਤਂ ਪੁਞ੍ਞਫਲਂ ਇਚ੍ਛਨ੍ਤਾਨਂ, ਤਥਾਗਤੋ ਏਵ ਲੋਕਸ੍ਸ ਪੁਞ੍ਞਕ੍ਖੇਤ੍ਤਨ੍ਤਿ ਦਸ੍ਸੇਤਿ. ਕੇਚਿ ਪਨ ‘‘ਆਹੁਨੇਯ੍ਯਾਨਂ ਪਰਮਗ੍ਗਤਂ ਗਤੋ’’ਤਿ ਪਠਨ੍ਤਿ, ਸੋਯੇਵਤ੍ਥੋ.

ਏਵਂ ਕਥੇਨ੍ਤਮੇਵ ਤਂ ਥੇਰੋ ਕਲ੍ਲਚਿਤ੍ਤਂ ਮੁਦੁਚਿਤ੍ਤਂ ਵਿਨੀਵਰਣਚਿਤ੍ਤਂ ਉਦਗ੍ਗਚਿਤ੍ਤਂ ਪਸਨ੍ਨਚਿਤ੍ਤਞ੍ਚ ਞਤ੍ਵਾ ਸਚ੍ਚਾਨਿ ਪਕਾਸੇਸਿ. ਸੋ ਸਚ੍ਚਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਅਥ ਥੇਰੋ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਤਮਤ੍ਥਂ ਅਤ੍ਤਨਾ ਚ ਦੇਵਪੁਤ੍ਤੇਨ ਚ ਕਥਿਤਨਿਯਾਮੇਨੇਵ ਆਰੋਚੇਸਿ. ਸਤ੍ਥਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਯਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਮਹਾਰਥਵਿਮਾਨਵਣ੍ਣਨਾ ਨਿਟ੍ਠਿਤਾ.

ਇਤਿ ਪਰਮਤ੍ਥਦੀਪਨਿਯਾ ਖੁਦ੍ਦਕਟ੍ਠਕਥਾਯ ਵਿਮਾਨਵਤ੍ਥੁਸ੍ਮਿਂ

ਚੁਦ੍ਦਸਵਤ੍ਥੁਪਟਿਮਣ੍ਡਿਤਸ੍ਸ ਪਞ੍ਚਮਸ੍ਸ ਮਹਾਰਥਵਗ੍ਗਸ੍ਸ

ਅਤ੍ਥਵਣ੍ਣਨਾ ਨਿਟ੍ਠਿਤਾ.