੧੩. ਚੂਲ਼ਰਥਵਿਮਾਨਵਣ੍ਣਨਾ

ਦਲ਼੍ਹਧਮ੍ਮਾ ਨਿਸਾਰਸ੍ਸਾਤਿ ਚੂਲ਼ਰਥਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਪਰਿਨਿਬ੍ਬੁਤੇ ਧਾਤੁਵਿਭਾਗਂ ਕਤ੍ਵਾ ਤਤ੍ਥ ਤਤ੍ਥ ਸਤ੍ਥੁ ਥੂਪੇਸੁ ਪਤਿਟ੍ਠਾਪਿਯਮਾਨੇਸੁ ਮਹਾਕਸ੍ਸਪਤ੍ਥੇਰਪ੍ਪਮੁਖੇਸੁ ਧਮ੍ਮਂ ਸਙ੍ਗਾਯਿਤੁਂ ਉਚ੍ਚਿਨਿਤ੍ਵਾ ਗਹਿਤੇਸੁ ਸਾਵਕੇਸੁ ਯਾਵ ਵਸ੍ਸੂਪਗਮਨਾ ਵੇਨੇਯ੍ਯਾਪੇਕ੍ਖਾਯ ਅਤ੍ਤਨੋ ਅਤ੍ਤਨੋ ਪਰਿਸਾਯ ਸਦ੍ਧਿਂ ਤਤ੍ਥ ਤਤ੍ਥ ਵਸਨ੍ਤੇਸੁ ਆਯਸ੍ਮਾ ਮਹਾਕਚ੍ਚਾਯਨੋ ਪਚ੍ਚਨ੍ਤਦੇਸੇ ਅਞ੍ਞਤਰਸ੍ਮਿਂ ਅਰਞ੍ਞਾਯਤਨੇ ਵਿਹਰਤਿ. ਤੇਨ ਸਮਯੇਨ ਅਸ੍ਸਕਰਟ੍ਠੇ ਪੋਤਲਿਨਗਰੇ ਅਸ੍ਸਕਰਾਜਾ ਰਜ੍ਜਂ ਕਾਰੇਤਿ, ਤਸ੍ਸ ਜੇਟ੍ਠਾਯ ਦੇਵਿਯਾ ਪੁਤ੍ਤੋ ਸੁਜਾਤੋ ਨਾਮ ਕੁਮਾਰੋ ਸੋਲ਼ਸਵਸ੍ਸੁਦ੍ਦੇਸਿਕੋ ਕਨਿਟ੍ਠਾਯ ਦੇਵਿਯਾ ਨਿਬਨ੍ਧਨੇਨ ਪਿਤਰਾ ਰਟ੍ਠਤੋ ਪਬ੍ਬਾਜਿਤੋ ਅਰਞ੍ਞਂ ਪਵਿਸਿਤ੍ਵਾ ਵਨਚਰਕੇ ਨਿਸ੍ਸਾਯ ਅਰਞ੍ਞੇ ਵਸਤਿ. ਸੋ ਕਿਰ ਕਸ੍ਸਪਸ੍ਸ ਭਗਵਤੋ ਸਾਸਨੇ ਪਬ੍ਬਜਿਤ੍ਵਾ ਸੀਲਮਤ੍ਤੇ ਪਤਿਟ੍ਠਿਤੋ ਪੁਥੁਜ੍ਜਨਕਾਲਕਿਰਿਯਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿਤ੍ਵਾ ਤਤ੍ਥ ਯਾਵਤਾਯੁਕਂ ਠਤ੍ਵਾ ਅਪਰਾਪਰਂ ਸੁਗਤਿਯਂਯੇਵ ਪਰਿਬ੍ਭਮਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਭਗਵਤੋ ਅਭਿਸਮ੍ਬੋਧਿਤੋ ਤਿਂਸਵਸ੍ਸੇ ਅਸ੍ਸਕਰਟ੍ਠੇ ਅਸ੍ਸਕਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤਿ, ‘‘ਸੁਜਾਤੋ’’ਤਿਸ੍ਸ ਨਾਮਂ ਅਹੋਸਿ. ਸੋ ਮਹਨ੍ਤੇਨ ਪਰਿਵਾਰੇਨ ਵਡ੍ਢਤਿ.

ਤਸ੍ਸ ਪਨ ਮਾਤਰਿ ਕਾਲਕਤਾਯ ਰਾਜਾ ਅਞ੍ਞਂ ਰਾਜਧੀਤਰਂ ਅਗ੍ਗਮਹੇਸਿਟ੍ਠਾਨੇ ਠਪੇਸਿ. ਸਾਪਿ ਅਪਰੇਨ ਸਮਯੇਨ ਪੁਤ੍ਤਂ ਵਿਜਾਯਿ. ਤਸ੍ਸਾ ਰਾਜਾ ਪੁਤ੍ਤਂ ਦਿਸ੍ਵਾ ਪਸਨ੍ਨੋ ‘‘ਭਦ੍ਦੇ, ਤਯਾ ਇਚ੍ਛਿਤਂ ਵਰਂ ਗਣ੍ਹਾਹੀ’’ਤਿ ਵਰਂ ਅਦਾਸਿ. ਸਾ ਗਹਿਤਕਂ ਕਤ੍ਵਾ ਠਪੇਤ੍ਵਾ ਯਦਾ ਸੁਜਾਤਕੁਮਾਰੋ ਸੋਲ਼ਸਵਸ੍ਸੁਦ੍ਦੇਸਿਕੋ ਜਾਤੋ, ਤਦਾ ਰਾਜਾਨਂ ਆਹ ‘‘ਦੇਵ, ਤੁਮ੍ਹੇਹਿ ਮਮ ਪੁਤ੍ਤਂ ਦਿਸ੍ਵਾ ਤੁਟ੍ਠਚਿਤ੍ਤੇਹਿ ਵਰੋ ਦਿਨ੍ਨੋ, ਤਂ ਇਦਾਨਿ ਦੇਥਾ’’ਤਿ. ‘‘ਗਣ੍ਹ, ਦੇਵੀ’’ਤਿ. ‘‘ਮਯ੍ਹਂ ਪੁਤ੍ਤਸ੍ਸ ਰਜ੍ਜਂ ਦੇਥਾ’’ਤਿ. ‘‘ਨਸ੍ਸ, ਵਸਲਿ, ਮਮ ਜੇਟ੍ਠਪੁਤ੍ਤੇ ਦੇਵਕੁਮਾਰਸਦਿਸੇ ਸੁਜਾਤਕੁਮਾਰੇ ਠਿਤੇ ਕਸ੍ਮਾ ਏਵਂ ਵਦਸੀ’’ਤਿ ਪਟਿਕ੍ਖਿਪਿ. ਦੇਵੀ ਪੁਨਪ੍ਪੁਨਂ ਨਿਬਨ੍ਧਨਂ ਕਰੋਨ੍ਤੀ ਮਨਂ ਅਲਭਿਤ੍ਵਾ ਏਕਦਿਵਸਂ ਆਹ ‘‘ਦੇਵ, ਯਦਿ ਸਚ੍ਚੇ ਤਿਟ੍ਠਸਿ, ਦੇਹਿ ਏਵਾ’’ਤਿ. ਰਾਜਾ ‘‘ਅਨੁਪਧਾਰੇਤ੍ਵਾ ਮਯਾ ਇਮਿਸ੍ਸਾ ਵਰੋ ਦਿਨ੍ਨੋ, ਅਯਞ੍ਚ ਏਵਂ ਵਦਤੀ’’ਤਿ ਵਿਪ੍ਪਟਿਸਾਰੀ ਹੁਤ੍ਵਾ ਸੁਜਾਤਕੁਮਾਰਂ ਪਕ੍ਕੋਸਿਤ੍ਵਾ ਤਮਤ੍ਥਂ ਆਰੋਚੇਤ੍ਵਾ ਅਸ੍ਸੂਨਿ ਪਵਤ੍ਤੇਸਿ. ਕੁਮਾਰੋ ਪਿਤਰਂ ਸੋਚਮਾਨਂ ਦਿਸ੍ਵਾ ਦੋਮਨਸ੍ਸਪ੍ਪਤ੍ਤੋ ਅਸ੍ਸੂਨਿ ਪਵਤ੍ਤੇਤ੍ਵਾ ‘‘ਅਨੁਜਾਨਾਹਿ, ਦੇਵ, ਅਹਂ ਅਞ੍ਞਤ੍ਥ ਗਮਿਸ੍ਸਾਮੀ’’ਤਿ ਆਹ. ਤਂ ਸੁਤ੍ਵਾ ਰਞ੍ਞਾ ‘‘ਅਞ੍ਞਂ ਤੇ ਨਗਰਂ ਮਾਪੇਸ੍ਸਾਮਿ, ਤਤ੍ਥ ਵਸੇਯ੍ਯਾਸੀ’’ਤਿ ਵੁਤ੍ਤੇ ਕੁਮਾਰੋ ਨ ਇਚ੍ਛਿ. ‘‘ਮਮ ਸਹਾਯਾਨਂ ਰਾਜੂਨਂ ਸਨ੍ਤਿਕੇ ਪੇਸੇਸ੍ਸਾਮੀ’’ਤਿ ਚ ਵੁਤ੍ਤੇ ਤਮ੍ਪਿ ਨਾਨੁਜਾਨਿ. ਕੇਵਲਂ ‘‘ਦੇਵ, ਅਰਞ੍ਞਂ ਗਮਿਸ੍ਸਾਮੀ’’ਤਿ ਆਹ. ਰਾਜਾ ਪੁਤ੍ਤਂ ਆਲਿਙ੍ਗਿਤ੍ਵਾ ਸੀਸੇ ਚੁਮ੍ਬਿਤ੍ਵਾ ‘‘ਮਮਚ੍ਚਯੇਨ ਇਧਾਗਨ੍ਤ੍ਵਾ ਰਜ੍ਜੇ ਪਤਿਟ੍ਠਹਾ’’ਤਿ ਵਤ੍ਵਾ ਵਿਸ੍ਸਜ੍ਜੇਸਿ.

ਸੋ ਅਰਞ੍ਞਂ ਪਵਿਸਿਤ੍ਵਾ ਵਨਚਰਕੇ ਨਿਸ੍ਸਾਯ ਵਸਨ੍ਤੋ ਏਕਦਿਵਸਂ ਮਿਗਵਂ ਗਤੋ. ਤਸ੍ਸ ਸਮਣਕਾਲੇ ਸਹਾਯਵਰੋ ਏਕੋ ਦੇਵਪੁਤ੍ਤੋ ਹਿਤੇਸਿਤਾਯ ਮਿਗਰੂਪੇਨ ਤਂ ਪਲੋਭੇਨ੍ਤੋ ਧਾਵਿਤ੍ਵਾ ਆਯਸ੍ਮਤੋ ਮਹਾਕਚ੍ਚਾਯਨਸ੍ਸ ਵਸਨਟ੍ਠਾਨਸਮੀਪਂ ਪਤ੍ਵਾ ਅਨ੍ਤਰਧਾਯਿ. ਸੋ ‘‘ਇਮਂ ਮਿਗਂ ਇਦਾਨਿ ਗਣ੍ਹਿਸ੍ਸਾਮੀ’’ਤਿ ਉਪਧਾਵਨ੍ਤੋ ਥੇਰਸ੍ਸ ਵਸਨਟ੍ਠਾਨਂ ਪਤ੍ਵਾ ਤਂ ਅਪਸ੍ਸਨ੍ਤੋ ਬਹਿ ਪਣ੍ਣਸਾਲਾਯ ਥੇਰਂ ਨਿਸਿਨ੍ਨਂ ਦਿਸ੍ਵਾ ਤਸ੍ਸ ਸਮੀਪੇ ਚਾਪਕੋਟਿਂ ਓਲੁਬ੍ਭ ਅਟ੍ਠਾਸਿ. ਥੇਰੋ ਤਂ ਓਲੋਕੇਤ੍ਵਾ ਆਦਿਤੋ ਪਟ੍ਠਾਯ ਸਬ੍ਬਂ ਤਸ੍ਸ ਪਵਤ੍ਤਿਂ ਞਤ੍ਵਾ ਅਨੁਗ੍ਗਣ੍ਹਨ੍ਤੋ ਅਜਾਨਨ੍ਤੋ ਵਿਯ ਸਙ੍ਗਹਂ ਕਰੋਨ੍ਤੋ –

੯੮੧. ‘‘ਦਲ਼੍ਹਧਮ੍ਮਾ ਨਿਸਾਰਸ੍ਸ, ਧਨੁਂ ਓਲੁਬ੍ਭ ਤਿਟ੍ਠਸਿ;

ਖਤ੍ਤਿਯੋ ਨੁਸਿ ਰਾਜਞ੍ਞੋ, ਅਦੁ ਲੁਦ੍ਦੋ ਵਨੇਚਰੋ’’ਤਿ. –

ਪੁਚ੍ਛਿ. ਤਤ੍ਥ ਦਲ਼੍ਹਧਮ੍ਮਾਤਿ ਦਲ਼੍ਹਧਨੁ. ਦਲ਼੍ਹਧਨੁ ਨਾਮ ਦ੍ਵਿਸਹਸ੍ਸਥਾਮਂ ਵੁਚ੍ਚਤਿ. ਦ੍ਵਿਸਹਸ੍ਸਥਾਮਨ੍ਤਿ ਚ ਯਸ੍ਸ ਆਰੋਪਿਤਸ੍ਸ ਜਿਯਾਯ ਬਦ੍ਧੋ ਲੋਹਸੀਸਾਦੀਨਂ ਭਾਰੋ ਦਣ੍ਡੇ ਗਹੇਤ੍ਵਾ ਯਾਵ ਕਣ੍ਡਪ੍ਪਮਾਣਾ ਉਕ੍ਖਿਤ੍ਤਸ੍ਸ ਪਥਵਿਤੋ ਮੁਚ੍ਚਤਿ. ਨਿਸਾਰਸ੍ਸਾਤਿ ਨਿਰਤਿਸਯਸਾਰਸ੍ਸ ਵਿਸਿਟ੍ਠਸਾਰਸ੍ਸ ਰੁਕ੍ਖਸ੍ਸ ਧਨੁਂ, ਸਾਰਤਰਰੁਕ੍ਖਮਯਂ ਧਨੁਨ੍ਤਿ ਅਤ੍ਥੋ. ਓਲੁਬ੍ਭਾਤਿ ਸਨ੍ਨਿਰੁਮ੍ਭਿਤ੍ਵਾ. ਰਾਜਞ੍ਞੋਤਿ ਰਾਜਕੁਮਾਰੋ. ਵਨੇਚਰੋਤਿ ਵਨਚਰੋ.

ਅਥ ਸੋ ਅਤ੍ਤਾਨਂ ਆਵਿਕਰੋਨ੍ਤੋ –

੯੮੨. ‘‘ਅਸ੍ਸਕਾਧਿਪਤਿਸ੍ਸਾਹਂ, ਭਨ੍ਤੇ ਪੁਤ੍ਤੋ ਵਨੇਚਰੋ;

ਨਾਮਂ ਮੇ ਭਿਕ੍ਖੁ ਤੇ ਬ੍ਰੂਮਿ, ਸੁਜਾਤੋ ਇਤਿ ਮਂ ਵਿਦੂ.

੯੮੩. ‘‘ਮਿਗੇ ਗਵੇਸਮਾਨੋਹਂ, ਓਗਾਹਨ੍ਤੋ ਬ੍ਰਹਾਵਨਂ;

ਮਿਗਂ ਤਞ੍ਚੇਵ ਨਾਦ੍ਦਕ੍ਖਿਂ, ਤਞ੍ਚ ਦਿਸ੍ਵਾ ਠਿਤੋ ਅਹ’’ਨ੍ਤਿ. –

ਆਹ. ਤਤ੍ਥ ਅਸ੍ਸਕਾਧਿਪਤਿਸ੍ਸਾਤਿ ਅਸ੍ਸਕਰਟ੍ਠਾਧਿਪਤਿਨੋ ਅਸ੍ਸਕਰਾਜਸ੍ਸ. ਭਿਕ੍ਖੂਤਿ ਥੇਰਂ ਆਲਪਤਿ. ਮਿਗੇ ਗਵੇਸਮਾਨੋਤਿ ਮਿਗਸੂਕਰਾਦਿਕੇ ਗਵੇਸਨ੍ਤੋ, ਮਿਗਵਂ ਚਰਨ੍ਤੋਤਿ ਅਤ੍ਥੋ.

ਤਂ ਸੁਤ੍ਵਾ ਥੇਰੋ ਤੇਨ ਸਦ੍ਧਿਂ ਪਟਿਸਨ੍ਥਾਰਂ ਕਰੋਨ੍ਤੋ –

੯੮੪. ‘‘ਸ੍ਵਾਗਤਂ ਤੇ ਮਹਾਪੁਞ੍ਞ, ਅਥੋ ਤੇ ਅਦੁਰਾਗਤਂ;

ਏਤ੍ਤੋ ਉਦਕਮਾਦਾਯ, ਪਾਦੇ ਪਕ੍ਖਾਲਯਸ੍ਸੁ ਤੇ.

੯੮੫. ‘‘ਇਦਮ੍ਪਿ ਪਾਨੀਯਂ ਸੀਤਂ, ਆਭਤਂ ਗਿਰਿਗਬ੍ਭਰਾ;

ਰਾਜਪੁਤ੍ਤ ਤਤੋ ਪਿਤ੍ਵਾ, ਸਨ੍ਥਤਸ੍ਮਿਂ ਉਪਾਵਿਸਾ’’ਤਿ. – ਆਹ;

੯੮੪. ਤਤ੍ਥ ਅਦੁਰਾਗਤਨ੍ਤਿ ਦੁਰਾਗਮਨਵਜ੍ਜਿਤਂ, ਮਹਾਪੁਞ੍ਞ, ਤੇ ਇਧਾਗਮਨਂ ਸ੍ਵਾਗਤਂ, ਨ ਤੇ ਅਪ੍ਪਕਮ੍ਪਿ ਦੁਰਾਗਮਨਂ ਅਤ੍ਥਿ ਤੁਯ੍ਹਞ੍ਚ ਮਯ੍ਹਞ੍ਚ ਪੀਤਿਸੋਮਨਸ੍ਸਜਨਨਤੋਤਿ ਅਧਿਪ੍ਪਾਯੋ. ‘‘ਅਧੁਨਾਗਤ’’ਨ੍ਤਿਪਿ ਪਾਠੋ, ਇਦਾਨਿ ਆਗਮਨਨ੍ਤਿ ਅਤ੍ਥੋ.

੯੮੫. ਸਨ੍ਥਤਸ੍ਮਿਂ ਉਪਾਵਿਸਾਤਿ ਅਨਨ੍ਤਰਹਿਤਾਯ ਭੂਮਿਯਾ ਅਨਿਸੀਦਿਤ੍ਵਾ ਅਮੁਕਸ੍ਮਿਂ ਤਿਣਸਨ੍ਥਾਰਕੇ ਨਿਸੀਦਾਤਿ.

ਤਤੋ ਰਾਜਕੁਮਾਰੋ ਥੇਰਸ੍ਸ ਪਟਿਸਨ੍ਥਾਰਂ ਸਮ੍ਪਟਿਚ੍ਛਨ੍ਤੋ ਆਹ –

੯੮੬. ‘‘ਕਲ੍ਯਾਣੀ ਵਤ ਤੇ ਵਾਚਾ, ਸਵਨੀਯਾ ਮਹਾਮੁਨਿ;

ਨੇਲਾ ਅਤ੍ਥਵਤੀ ਵਗ੍ਗੁ, ਮਨ੍ਤ੍ਵਾ ਅਤ੍ਥਞ੍ਚ ਭਾਸਸਿ.

੯੮੭. ‘‘ਕਾ ਤੇ ਰਤਿ ਵਨੇ ਵਿਹਰਤੋ, ਇਸਿਨਿਸਭ ਵਦੇਹਿ ਪੁਟ੍ਠੋ;

ਤਵ ਵਚਨਪਥਂ ਨਿਸਾਮਯਿਤ੍ਵਾ, ਅਤ੍ਥਧਮ੍ਮਪਦਂ ਸਮਾਚਰੇਮਸੇ’’ਤਿ.

੯੮੬. ਤਤ੍ਥ ਕਲ੍ਯਾਣੀਤਿ ਸੁਨ੍ਦਰਾ ਸੋਭਨਾ. ਸਵਨੀਯਾਤਿ ਸੋਤੁਂ ਯੁਤ੍ਤਾ. ਨੇਲਾਤਿ ਨਿਦ੍ਦੋਸਾ. ਅਤ੍ਥਵਤੀਤਿ ਅਤ੍ਥਯੁਤ੍ਤਾ ਦਿਟ੍ਠਧਮ੍ਮਿਕਾਦਿਨਾ ਹਿਤੇਨ ਉਪੇਤਾ. ਵਗ੍ਗੂਤਿ ਮਧੁਰਾ. ਮਨ੍ਤ੍ਵਾਤਿ ਜਾਨਿਤ੍ਵਾ ਪਞ੍ਞਾਯ ਪਰਿਚ੍ਛਿਨ੍ਦਿਤ੍ਵਾ. ਅਤ੍ਥਨ੍ਤਿ ਅਤ੍ਥਤੋ ਅਨਪੇਤਂ ਏਕਨ੍ਤਹਿਤਾਵਹਂ.

੯੮੭. ਇਸਿਨਿਸਭਾਤਿ ਇਸੀਸੁ ਨਿਸਭ ਆਜਾਨੀਯਸਦਿਸ. ਵਚਨਪਥਨ੍ਤਿ ਵਚਨਂ. ਵਚਨਮੇਵ ਹਿ ਅਤ੍ਥਾਧਿਗਮਸ੍ਸ ਉਪਾਯਭਾਵਤੋ ‘‘ਵਚਨਪਥ’’ਨ੍ਤਿ ਵੁਤ੍ਤਂ. ਅਤ੍ਥਧਮ੍ਮਪਦਂ ਸਮਾਚਰੇਮਸੇਤਿ ਇਧ ਚੇਵ ਸਮ੍ਪਰਾਯੇ ਚ ਅਤ੍ਥਾਵਹਂ ਸੀਲਾਦਿਧਮ੍ਮਕੋਟ੍ਠਾਸਂ ਪਟਿਪਜ੍ਜਾਮਸੇ.

ਇਦਾਨਿ ਥੇਰੋ ਅਤ੍ਤਨੋ ਸਮ੍ਮਾਪਟਿਪਤ੍ਤਿਂ ਤਸ੍ਸ ਅਨੁਚ੍ਛਵਿਕਂ ਵਦਨ੍ਤੋ –

੯੮੮. ‘‘ਅਹਿਂਸਾ ਸਬ੍ਬਪਾਣੀਨਂ, ਕੁਮਾਰਮ੍ਹਾਕ ਰੁਚ੍ਚਤਿ;

ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਤਿ.

੯੮੯. ‘‘ਆਰਤਿ ਸਮਚਰਿਯਾ ਚ, ਬਾਹੁਸਚ੍ਚਂ ਕਤਞ੍ਞੁਤਾ;

ਦਿਟ੍ਠੇਵ ਧਮ੍ਮੇ ਪਾਸਂਸਾ, ਧਮ੍ਮਾ ਏਤੇ ਪਸਂਸਿਯਾ’’ਤਿ. – ਆਹ;

੯੮੯. ਤਤ੍ਥ ਆਰਤਿ ਸਮਚਰਿਯਾ ਚਾਤਿ ਯਥਾਵੁਤ੍ਤਾ ਚ ਪਾਪਧਮ੍ਮਤੋ ਆਰਤਿ, ਪਟਿਵਿਰਤਿ ਕਾਯਸਮਤਾਦਿਸਮਚਰਿਯਾ ਚ. ਬਾਹੁਸਚ੍ਚਨ੍ਤਿ ਪਰਿਯਤ੍ਤਿਬਾਹੁਸਚ੍ਚਂ. ਕਤਞ੍ਞੁਤਾਤਿ ਪਰੇਹਿ ਅਤ੍ਤਨੋ ਕਤਸ੍ਸ ਉਪਕਾਰਸ੍ਸ ਜਾਨਨਾ. ਪਾਸਂਸਾਤਿ ਅਤ੍ਥਕਾਮੇਹਿ ਕੁਲਪੁਤ੍ਤੇਹਿ ਪਕਾਰਤੋ ਆਸਂਸਿਤਬ੍ਬਾ. ਧਮ੍ਮਾ ਏਤੇਤਿ ਏਤੇ ਯਥਾਵੁਤ੍ਤਾ ਅਹਿਂਸਾਦਿਧਮ੍ਮਾ. ਪਸਂਸਿਯਾਤਿ ਵਿਞ੍ਞੂਹਿ ਪਸਂਸਿਤਬ੍ਬਾ.

ਏਵਂ ਥੇਰੋ ਤਸ੍ਸ ਅਨੁਚ੍ਛਵਿਕਂ ਸਮ੍ਮਾਪਟਿਪਤ੍ਤਿਂ ਵਤ੍ਵਾ ਅਨਾਗਤਂਸਞਾਣੇਨ ਆਯੁਸਙ੍ਖਾਰੇ ਓਲੋਕੇਨ੍ਤੋ ‘‘ਪਞ੍ਚਮਾਸਮਤ੍ਤਮੇਵਾ’’ਤਿ ਦਿਸ੍ਵਾ ਤਂ ਸਂਵੇਜੇਤ੍ਵਾ ਦਲ਼੍ਹਂ ਤਤ੍ਥ ਸਮ੍ਮਾਪਟਿਪਤ੍ਤਿਯਂ ਪਤਿਟ੍ਠਾਪੇਤੁਂ ਇਮਂ ਗਾਥਮਾਹ –

੯੯੦. ‘‘ਸਨ੍ਤਿਕੇ ਮਰਣਂ ਤੁਯ੍ਹਂ, ਓਰਂ ਮਾਸੇਹਿ ਪਞ੍ਚਹਿ;

ਰਾਜਪੁਤ੍ਤ ਵਿਜਾਨਾਹਿ, ਅਤ੍ਤਾਨਂ ਪਰਿਮੋਚਯਾ’’ਤਿ.

ਤਤ੍ਥ ਅਤ੍ਤਾਨਂ ਪਰਿਮੋਚਯਾਤਿ ਅਤ੍ਤਾਨਂ ਅਪਾਯਦੁਕ੍ਖਤੋ ਮੋਚੇਹਿ.

ਤਤੋ ਕੁਮਾਰੋ ਅਤ੍ਤਨੋ ਮੁਤ੍ਤਿਯਾ ਉਪਾਯਂ ਪੁਚ੍ਛਨ੍ਤੋ ਆਹ –

੯੯੧. ‘‘ਕਤਮਂ ਸ੍ਵਾਹਂ ਜਨਪਦਂ ਗਨ੍ਤ੍ਵਾ, ਕਿਂ ਕਮ੍ਮਂ ਕਿਞ੍ਚ ਪੋਰਿਸਂ;

ਕਾਯ ਵਾ ਪਨ ਵਿਜ੍ਜਾਯ, ਭਵੇਯ੍ਯਂ ਅਜਰਾਮਰੋ’’ਤਿ.

ਤਤ੍ਥ ਕਤਮਂ ਸ੍ਵਾਹਨ੍ਤਿ ਕਤਮਂ ਸੁ ਅਹਂ, ਕਤਮਂ ਨੂਤਿ ਅਤ੍ਥੋ. ਕਿਂ ਕਮ੍ਮਂ ਕਿਞ੍ਚ ਪੋਰਿਸਨ੍ਤਿ ਕਤ੍ਵਾਤਿ ਵਚਨਸੇਸੋ. ਪੋਰਿਸਨ੍ਤਿ ਪੁਰਿਸਕਿਚ੍ਚਂ.

ਤਤੋ ਥੇਰੋ ਤਸ੍ਸ ਧਮ੍ਮਂ ਦੇਸੇਤੁਂ ਇਮਾ ਗਾਥਾਯੋ ਅਵੋਚ –

੯੯੨. ‘‘ਨ ਵਿਜ੍ਜਤੇ ਸੋ ਪਦੇਸੋ, ਕਮ੍ਮਂ ਵਿਜ੍ਜਾ ਚ ਪੋਰਿਸਂ;

ਯਤ੍ਥ ਗਨ੍ਤ੍ਵਾ ਭਵੇ ਮਚ੍ਚੋ, ਰਾਜਪੁਤ੍ਤਾਜਰਾਮਰੋ.

੯੯੩. ‘‘ਮਹਦ੍ਧਨਾ ਮਹਾਭੋਗਾ, ਰਟ੍ਠਵਨ੍ਤੋਪਿ ਖਤ੍ਤਿਯਾ;

ਪਹੂਤਧਨਧਞ੍ਞਾਸੇ, ਤੇਪਿ ਨੋ ਅਜਰਾਮਰਾ.

੯੯੪. ‘‘ਯਦਿ ਤੇ ਸੁਤਾ ਅਨ੍ਧਕਵੇਣ੍ਡੁਪੁਤ੍ਤਾ, ਸੂਰਾ ਵੀਰਾ ਵਿਕ੍ਕਨ੍ਤਪ੍ਪਹਾਰਿਨੋ;

ਤੇਪਿ ਆਯੁਕ੍ਖਯਂ ਪਤ੍ਤਾ, ਵਿਦ੍ਧਸ੍ਤਾ ਸਸ੍ਸਤੀਸਮਾ.

੯੯੫. ‘‘ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸਾ;

ਏਤੇ ਚਞ੍ਞੇ ਚ ਜਾਤਿਯਾ, ਤੇਪਿ ਨੋ ਅਜਰਾਮਰਾ.

੯੯੬. ‘‘ਯੇ ਮਨ੍ਤਂ ਪਰਿਵਤ੍ਤੇਨ੍ਤਿ, ਛਲ਼ਙ੍ਗਂ ਬ੍ਰਹ੍ਮਚਿਨ੍ਤਿਤਂ;

ਏਤੇ ਚਞ੍ਞੇ ਚ ਵਿਜ੍ਜਾਯ, ਤੇਪਿ ਨੋ ਅਜਰਾਮਰਾ.

੯੯੭. ‘‘ਇਸਯੋ ਚਾਪਿ ਯੇ ਸਨ੍ਤਾ, ਸਞ੍ਞਤਤ੍ਤਾ ਤਪਸ੍ਸਿਨੋ;

ਸਰੀਰਂ ਤੇਪਿ ਕਾਲੇਨ, ਵਿਜਹਨ੍ਤਿ ਤਪਸ੍ਸਿਨੋ.

੯੯੮. ‘‘ਭਾਵਿਤਤ੍ਤਾਪਿ ਅਰਹਨ੍ਤੋ, ਕਤਕਿਚ੍ਚਾ ਅਨਾਸਵਾ;

ਨਿਕ੍ਖਿਪਨ੍ਤਿ ਇਮਂ ਦੇਹਂ, ਪੁਞ੍ਞਪਾਪਪਰਿਕ੍ਖਯਾ’’ਤਿ.

੯੯੨. ਤਤ੍ਥ ਯਤ੍ਥ ਗਨ੍ਤ੍ਵਾਤਿ ਯਂ ਪਦੇਸਂ ਗਨ੍ਤ੍ਵਾ ਕਮ੍ਮਂ ਵਿਜ੍ਜਂ ਪੋਰਿਸਞ੍ਚ ਕਾਯਪਯੋਗੇਨ ਇਤਰਪਯੋਗੇਨ ਚ ਉਪਗਨ੍ਤ੍ਵਾ ਪਾਪੁਣਿਤ੍ਵਾ ਭਵੇਯ੍ਯ ਅਜਰਾਮਰੋਤਿ ਅਤ੍ਥੋ.

੯੯੩. ਹੇਟ੍ਠਿਮਕੋਟਿਯਾ ਕੋਟਿਸਤਾਦਿਪਰਿਮਾਣਂ ਸਂਹਰਿਤ੍ਵਾ ਠਪਿਤਂ ਮਹਨ੍ਤਂ ਧਨਂ ਏਤੇਸਨ੍ਤਿ ਮਹਦ੍ਧਨਾ. ਕੁਮ੍ਭਤ੍ਤਯਾਦਿਕਹਾਪਣਪਰਿਬ੍ਬਯੋ ਮਹਨ੍ਤੋ ਭੋਗੋ ਏਤੇਸਨ੍ਤਿ ਮਹਾਭੋਗਾ. ਰਟ੍ਠਵਨ੍ਤੋਤਿ ਰਟ੍ਠਸਾਮਿਕਾ, ਅਨੇਕਯੋਜਨਪਰਿਮਾਣਂ ਰਟ੍ਠਂ ਪਸਾਸਨ੍ਤਾਤਿ ਅਧਿਪ੍ਪਾਯੋ. ਖਤ੍ਤਿਯਾਤਿ ਖਤ੍ਤਿਯਜਾਤਿਕਾ. ਪਹੂਤਧਨਧਞ੍ਞਾਸੇਤਿ ਮਹਾਧਨਧਞ੍ਞਸਨ੍ਨਿਚਯਾ, ਅਤ੍ਤਨੋ ਪਰਿਸਾਯ ਚ ਸਤ੍ਤਟ੍ਠਸਂਵਚ੍ਛਰਪਹੋਨਕਧਨਧਞ੍ਞਸਨ੍ਨਿਚਯਾ. ਤੇਪਿ ਨੋ ਅਜਰਾਮਰਾਤਿ ਜਰਾਮਰਣਧਮ੍ਮਾ ਏਵ, ਮਹਦ੍ਧਨਤਾਦੀਨਿਪਿ ਤੇਸਂ ਉਪਰਿ ਨਿਪਤਨ੍ਤਂ ਜਰਾਮਰਣਂ ਨਿਵਤ੍ਤੇਤੁਂ ਨ ਸਕ੍ਕੋਨ੍ਤੀਤਿ ਅਤ੍ਥੋ.

੯੯੪. ਅਨ੍ਧਕਵੇਣ੍ਡੁਪੁਤ੍ਤਾਤਿ ਅਨ੍ਧਕਵੇਣ੍ਡੁਸ੍ਸ ਪੁਤ੍ਤਾਤਿ ਪਞ੍ਞਾਤਾ. ਸੂਰਾਤਿ ਸਤ੍ਤਿਮਨ੍ਤੋ. ਵੀਰਾਤਿ ਵੀਰਿਯਵਨ੍ਤੋ. ਵਿਕ੍ਕਨ੍ਤਪ੍ਪਹਾਰਿਨੋਤਿ ਸੂਰਵੀਰਭਾਵੇਨੇਵ ਪਟਿਸਤ੍ਤੁਬਲਂ ਵਿਕ੍ਕਮ੍ਮ ਪਸਯ੍ਹ ਪਹਰਣਸੀਲਾ. ਵਿਦ੍ਧਸ੍ਤਾਤਿ ਵਿਨਟ੍ਠਾ. ਸਸ੍ਸਤੀਸਮਾਤਿ ਕੁਲਪਰਮ੍ਪਰਾਯ ਸਸ੍ਸਤੀਹਿ ਚਨ੍ਦਸੂਰਿਯਾਦੀਹਿ ਸਮਾਨਾ, ਤੇਪਿ ਅਚਿਰਕਾਲਪਵਤ੍ਤਕੁਲਨ੍ਵਯਾਤਿ ਅਤ੍ਥੋ.

੯੯੫. ਜਾਤਿਯਾਤਿ ਅਤ੍ਤਨੋ ਜਾਤਿਯਾ, ਵਿਸਿਟ੍ਠਤਰਾ ਪਨ ਜਾਤਿਪਿ ਨੇਸਂ ਜਰਾਮਰਣਂ ਨਿਵਤ੍ਤੇਤੁਂ ਨ ਸਕ੍ਕੋਤੀਤਿ ਅਤ੍ਥੋ.

੯੯੬. ਮਨ੍ਤਨ੍ਤਿ ਵੇਦਂ. ਛਲ਼ਙ੍ਗਨ੍ਤਿ ਕਪ੍ਪਬ੍ਯਾਕਰਣਨਿਰੁਤ੍ਤਿਸਿਕ੍ਖਾਛਨ੍ਦੋਵਿਚਿਤਿਜੋਤਿਸਤ੍ਥਸਙ੍ਖਾਤੇਹਿ ਛਹਿ ਅਙ੍ਗੇਹਿ ਛਲ਼ਙ੍ਗਂ. ਬ੍ਰਹ੍ਮਚਿਨ੍ਤਿਤਨ੍ਤਿ ਬ੍ਰਹ੍ਮੇਹਿ ਅਟ੍ਠਕਾਦੀਹਿ ਚਿਨ੍ਤਿਤਂ ਪਞ੍ਞਾਚਕ੍ਖੁਨਾ ਦਿਟ੍ਠਂ.

੯੯੭. ਸਨ੍ਤਾਤਿ ਉਪਸਨ੍ਤਕਾਯਵਚੀਕਮ੍ਮਨ੍ਤਾ. ਸਞ੍ਞਤਤ੍ਤਾਤਿ ਸਞ੍ਞਤਚਿਤ੍ਤਾ. ਤਪਸ੍ਸਿਨੋਤਿ ਤਪਨਿਸ੍ਸਿਤਾ.

ਇਦਾਨਿ ਕੁਮਾਰੋ ਅਤ੍ਤਨਾ ਕਤ੍ਤਬ੍ਬਂ ਵਦਨ੍ਤੋ –

੯੯੯. ‘‘ਸੁਭਾਸਿਤਾ ਅਤ੍ਥਵਤੀ, ਗਾਥਾਯੋ ਤੇ ਮਹਾਮੁਨਿ;

ਨਿਜ੍ਝਤ੍ਤੋਮ੍ਹਿ ਸੁਭਟ੍ਠੇਨ, ਤ੍ਵਞ੍ਚ ਮੇ ਸਰਣਂ ਭਵਾ’’ਤਿ. –

ਆਹ. ਤਤ੍ਥ ਨਿਜ੍ਝਤ੍ਤੋਮ੍ਹੀਤਿ ਨਿਜ੍ਝਾਪਿਤੋ ਧਮ੍ਮੋਜਸਞ੍ਞਾਯ ਸਞ੍ਞਤ੍ਤਿਗਤੋ ਅਮ੍ਹਿ. ਸੁਭਟ੍ਠੇਨਾਤਿ ਸੁਟ੍ਠੁ ਭਾਸਿਤੇਨ.

ਤਤੋ ਥੇਰੋ ਤਂ ਅਨੁਸਾਸਨ੍ਤੋ ਇਮਂ ਗਾਥਂ ਅਭਾਸਿ –

੧੦੦੦. ‘‘ਮਾ ਮਂ ਤ੍ਵਂ ਸਰਣਂ ਗਚ੍ਛ, ਤਮੇਵ ਸਰਣਂ ਵਜ;

ਸਕ੍ਯਪੁਤ੍ਤਂ ਮਹਾਵੀਰਂ, ਯਮਹਂ ਸਰਣਂ ਗਤੋ’’ਤਿ.

ਤਤੋ ਰਾਜਕੁਮਾਰੋ ਆਹ –

੧੦੦੧. ‘‘ਕਤਰਸ੍ਮਿਂ ਸੋ ਜਨਪਦੇ, ਸਤ੍ਥਾ ਤੁਮ੍ਹਾਕ ਮਾਰਿਸ;

ਅਹਮ੍ਪਿ ਦਟ੍ਠੁਂ ਗਚ੍ਛਿਸ੍ਸਂ, ਜਿਨਂ ਅਪ੍ਪਟਿਪੁਗ੍ਗਲ’’ਨ੍ਤਿ.

ਪੁਨ ਥੇਰੋ ਆਹ –

੧੦੦੨. ‘‘ਪੁਰਤ੍ਥਿਮਸ੍ਮਿਂ ਜਨਪਦੇ, ਓਕ੍ਕਾਕਕੁਲਸਮ੍ਭਵੋ;

ਤਤ੍ਥਾਸਿ ਪੁਰਿਸਾਜਞ੍ਞੋ, ਸੋ ਚ ਖੋ ਪਰਿਨਿਬ੍ਬੁਤੋ’’ਤਿ.

ਤਤ੍ਥ ਥੇਰੇਨ ਨਿਸਿਨ੍ਨਪਦੇਸਤੋ ਮਜ੍ਝਿਮਦੇਸਸ੍ਸ ਪਾਚੀਨਦਿਸਾਭਾਗਤ੍ਤਾ ਵੁਤ੍ਤਂ ‘‘ਪੁਰਤ੍ਥਿਮਸ੍ਮਿਂ ਜਨਪਦੇ’’ਤਿ.

ਏਵਂ ਸੋ ਰਾਜਪੁਤ੍ਤੋ ਥੇਰਸ੍ਸ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਹਿ. ਤੇਨ ਵੁਤ੍ਤਂ –

੧੦੦੩. ‘‘ਸਚੇ ਹਿ ਬੁਦ੍ਧੋ ਤਿਟ੍ਠੇਯ੍ਯ, ਸਤ੍ਥਾ ਤੁਮ੍ਹਾਕ ਮਾਰਿਸ;

ਯੋਜਨਾਨਿ ਸਹਸ੍ਸਾਨਿ, ਗਚ੍ਛੇਯ੍ਯਂ ਪਯਿਰੁਪਾਸਿਤੁਂ.

੧੦੦੪. ‘‘ਯਤੋ ਚ ਖੋ ਪਰਿਨਿਬ੍ਬੁਤੋ, ਸਤ੍ਥਾ ਤੁਮ੍ਹਾਕ ਮਾਰਿਸ;

ਨਿਬ੍ਬੁਤਮ੍ਪਿ ਮਹਾਵੀਰਂ, ਗਚ੍ਛਾਮਿ ਸਰਣਂ ਅਹਂ.

੧੦੦੫. ‘‘ਉਪੇਮਿ ਸਰਣਂ ਬੁਦ੍ਧਂ, ਧਮ੍ਮਞ੍ਚਾਪਿ ਅਨੁਤ੍ਤਰਂ;

ਸਙ੍ਘਞ੍ਚ ਨਰਦੇਵਸ੍ਸ, ਗਚ੍ਛਾਮਿ ਸਰਣਂ ਅਹਂ.

੧੦੦੬. ‘‘ਪਾਣਾਤਿਪਾਤਾ ਵਿਰਮਾਮਿ ਖਿਪ੍ਪਂ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਾਮਿ;

ਅਮਜ੍ਜਪੋ ਨੋ ਚ ਮੁਸਾ ਭਣਾਮਿ, ਸਕੇਨ ਦਾਰੇਨ ਚ ਹੋਮਿ ਤੁਟ੍ਠੋ’’ਤਿ.

ਏਵਂ ਪਨ ਤਂ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਿਤਂ ਥੇਰੋ ਏਵਮਾਹ ‘‘ਰਾਜਕੁਮਾਰ, ਤੁਯ੍ਹਂ ਇਧ ਅਰਞ੍ਞਵਾਸੇਨ ਅਤ੍ਥੋ ਨਤ੍ਥਿ, ਨ ਚਿਰਂ ਤਵ ਜੀਵਿਤਂ, ਪਞ੍ਚਮਾਸਬ੍ਭਨ੍ਤਰੇ ਏਵ ਕਾਲਂ ਕਰਿਸ੍ਸਸਿ, ਤਸ੍ਮਾ ਤਵ ਪਿਤੁ ਸਨ੍ਤਿਕਮੇਵ ਗਨ੍ਤ੍ਵਾ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ਸਗ੍ਗਪਰਾਯਣੋ ਭਵੇਯ੍ਯਾਸੀ’’ਤਿ ਵਤ੍ਵਾ ਅਤ੍ਤਨੋ ਸਨ੍ਤਿਕੇ ਧਾਤੁਯੋ ਦਤ੍ਵਾ ਵਿਸ੍ਸਜ੍ਜੇਸਿ. ਸੋ ਗਚ੍ਛਨ੍ਤੋ ‘‘ਅਹਂ, ਭਨ੍ਤੇ, ਤੁਮ੍ਹਾਕਂ ਵਚਨੇਨ ਇਤੋ ਗਮਿਸ੍ਸਾਮਿ, ਤੁਮ੍ਹੇਹਿਪਿ ਮਯ੍ਹਂ ਅਨੁਕਮ੍ਪਾਯ ਤਤ੍ਥ ਆਗਨ੍ਤਬ੍ਬ’’ਨ੍ਤਿ ਵਤ੍ਵਾ ਥੇਰਸ੍ਸ ਅਧਿਵਾਸਨਂ ਵਿਦਿਤ੍ਵਾ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਪਿਤੁ ਨਗਰਂ ਗਨ੍ਤ੍ਵਾ ਉਯ੍ਯਾਨਂ ਪਵਿਸਿਤ੍ਵਾ ਅਤ੍ਤਨੋ ਆਗਤਭਾਵਂ ਰਞ੍ਞੋ ਨਿਵੇਦੇਸਿ.

ਤਂ ਸੁਤ੍ਵਾ ਰਾਜਾ ਸਪਰਿਵਾਰੋ ਉਯ੍ਯਾਨਂ ਗਨ੍ਤ੍ਵਾ ਕੁਮਾਰਂ ਆਲਿਙ੍ਗਿਤ੍ਵਾ ਅਨ੍ਤੇਪੁਰਂ ਨੇਤ੍ਵਾ ਅਭਿਸਿਞ੍ਚਿਤੁਕਾਮੋ ਅਹੋਸਿ. ਕੁਮਾਰੋ ‘‘ਦੇਵ, ਮਯ੍ਹਂ ਅਪ੍ਪਕਂ ਆਯੁ, ਇਤੋ ਚਤੁਨ੍ਨਂ ਮਾਸਾਨਂ ਅਚ੍ਚਯੇਨ ਮਰਣਂ ਭਵਿਸ੍ਸਤਿ, ਕਿਂ ਮੇ ਰਜ੍ਜੇਨ, ਤੁਮ੍ਹੇ ਨਿਸ੍ਸਾਯ ਪੁਞ੍ਞਮੇਵ ਕਰਿਸ੍ਸਾਮੀ’’ਤਿ ਵਤ੍ਵਾ ਥੇਰਸ੍ਸ ਗੁਣਂ ਰਤਨਤ੍ਤਯਸ੍ਸ ਚ ਆਨੁਭਾਵਂ ਪਵੇਦੇਸਿ. ਤਂ ਸੁਤ੍ਵਾ ਰਾਜਾ ਸਂਵੇਗਪ੍ਪਤ੍ਤੋ ਰਤਨਤ੍ਤਯੇ ਚ ਥੇਰੇ ਚ ਪਸਨ੍ਨਮਾਨਸੋ ਮਹਨ੍ਤਂ ਵਿਹਾਰਂ ਕਾਰੇਤ੍ਵਾ ਮਹਾਕਚ੍ਚਾਯਨਤ੍ਥੇਰਸ੍ਸ ਸਨ੍ਤਿਕੇ ਦੂਤਂ ਪਾਹੇਸਿ. ਥੇਰੋਪਿ ਰਾਜਾਨਂ ਮਹਾਜਨਞ੍ਚ ਅਨੁਗ੍ਗਣ੍ਹਨ੍ਤੋ ਆਗਚ੍ਛਿ. ਰਾਜਾ ਚ ਸਪਰਿਵਾਰੋ ਦੂਰਤੋਵ ਪਚ੍ਚੁਗ੍ਗਮਨਂ ਕਤ੍ਵਾ ਥੇਰਂ ਵਿਹਾਰਂ ਪਵੇਸੇਤ੍ਵਾ ਚਤੂਹਿ ਪਚ੍ਚਯੇਹਿ ਸਕ੍ਕਚ੍ਚਂ ਉਪਟ੍ਠਹਨ੍ਤੋ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਹਿ. ਕੁਮਾਰੋ ਚ ਸੀਲਾਨਿ ਸਮਾਦਿਯਿਤ੍ਵਾ ਥੇਰਂ ਭਿਕ੍ਖੂ ਚੇਵ ਸਕ੍ਕਚ੍ਚਂ ਉਪਟ੍ਠਹਨ੍ਤੋ ਦਾਨਾਨਿ ਦਦਨ੍ਤੋ ਧਮ੍ਮਂ ਸੁਣਨ੍ਤੋ ਚਤੁਨ੍ਨਂ ਮਾਸਾਨਂ ਅਚ੍ਚਯੇਨ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ. ਤਸ੍ਸ ਪੁਞ੍ਞਾਨੁਭਾਵੇਨ ਸਤ੍ਤਰਤਨਪਟਿਮਣ੍ਡਿਤੋ ਸਤ੍ਤਯੋਜਨਪ੍ਪਮਾਣੋ ਰਥੋ ਉਪ੍ਪਜ੍ਜਿ, ਅਨੇਕਾਨਿ ਚਸ੍ਸ ਅਚ੍ਛਰਾਸਹਸ੍ਸਾਨਿ ਪਰਿਵਾਰੋ ਅਹੋਸਿ.

ਰਾਜਾ ਕੁਮਾਰਸ੍ਸ ਸਰੀਰਸਕ੍ਕਾਰਂ ਕਤ੍ਵਾ ਭਿਕ੍ਖੁਸਙ੍ਘਸ੍ਸ ਚ ਮਹਾਦਾਨਂ ਪਵਤ੍ਤੇਤ੍ਵਾ ਚੇਤਿਯਸ੍ਸ ਪੂਜਂ ਅਕਾਸਿ, ਤਤ੍ਥ ਮਹਾਜਨੋ ਸਨ੍ਨਿਪਤਿ, ਥੇਰੋਪਿ ਸਪਰਿਵਾਰੋ ਤਂ ਪਦੇਸਂ ਉਪਗਞ੍ਛਿ. ਅਥ ਦੇਵਪੁਤ੍ਤੋ ਅਤ੍ਤਨਾ ਕਤਕੁਸਲਕਮ੍ਮਂ ਓਲੋਕੇਤ੍ਵਾ ਕਤਞ੍ਞੁਤਾਯ ‘‘ਗਨ੍ਤ੍ਵਾ ਥੇਰਂ ਵਨ੍ਦਿਸ੍ਸਾਮਿ, ਸਾਸਨਗੁਣੇ ਚ ਪਾਕਟੇ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦਿਬ੍ਬਰਥਂ ਆਰੁਯ੍ਹ ਮਹਤਾ ਪਰਿਵਾਰੇਨ ਦਿਸ੍ਸਮਾਨਰੂਪੋ ਆਗਨ੍ਤ੍ਵਾ ਰਥਾ ਓਰੁਯ੍ਹ ਥੇਰਸ੍ਸ ਪਾਦੇ ਵਨ੍ਦਿਤ੍ਵਾ ਪਿਤਰਾ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ਥੇਰਂ ਪਯਿਰੁਪਾਸਮਾਨੋ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਤਂ ਥੇਰੋ ਇਮਾਹਿ ਗਾਥਾਹਿ ਪੁਚ੍ਛਿ –

੧੦੦੭. ‘‘ਸਹਸ੍ਸਰਂਸੀਵ ਯਥਾਮਹਪ੍ਪਭੋ, ਦਿਸਂ ਯਥਾ ਭਾਤਿ ਨਭੇ ਅਨੁਕ੍ਕਮਂ;

ਤਥਾਪਕਾਰੋ ਤਵਾਯਂ ਮਹਾਰਥੋ, ਸਮਨ੍ਤਤੋ ਯੋਜਨਸਤ੍ਤਮਾਯਤੋ.

੧੦੦੮. ‘‘ਸੁਵਣ੍ਣਪਟ੍ਟੇਹਿ ਸਮਨ੍ਤਮੋਤ੍ਥਟੋ, ਉਰਸ੍ਸ ਮੁਤ੍ਤਾਹਿ ਮਣੀਹਿ ਚਿਤ੍ਤਿਤੋ;

ਲੇਖਾ ਸੁਵਣ੍ਣਸ੍ਸ ਚ ਰੂਪਿਯਸ੍ਸ ਚ, ਸੋਭੇਨ੍ਤਿ ਵੇਲ਼ੁਰਿਯਮਯਾ ਸੁਨਿਮ੍ਮਿਤਾ.

੧੦੦੯. ‘‘ਸੀਸਞ੍ਚਿਦਂ ਵੇਲ਼ੁਰਿਯਸ੍ਸ ਨਿਮ੍ਮਿਤਂ, ਯੁਗਞ੍ਚਿਦਂ ਲੋਹਿਤਕਾਯ ਚਿਤ੍ਤਿਤਂ;

ਯੁਤ੍ਤਾ ਸੁਵਣ੍ਣਸ੍ਸ ਚ ਰੂਪਿਯਸ੍ਸ ਚ, ਸੋਭਨ੍ਤਿ ਅਸ੍ਸਾ ਚ ਇਮੇ ਮਨੋਜਵਾ.

੧੦੧੦. ‘‘ਸੋ ਤਿਟ੍ਠਸਿ ਹੇਮਰਥੇ ਅਧਿਟ੍ਠਿਤੋ, ਦੇਵਾਨਮਿਨ੍ਦੋਵ ਸਹਸ੍ਸਵਾਹਨੋ;

ਪੁਚ੍ਛਾਮਿ ਤਾਹਂ ਯਸਵਨ੍ਤ ਕੋਵਿਦਂ, ਕਥਂ ਤਯਾ ਲਦ੍ਧੋ ਅਯਂ ਉਲ਼ਾਰੋ’’ਤਿ.

੧੦੦੭. ਤਤ੍ਥ ਸਹਸ੍ਸਰਂਸੀਤਿ ਸੂਰਿਯੋ. ਸੋ ਹਿ ਅਨੇਕਸਹਸ੍ਸਰਂਸਿਮਨ੍ਤਤਾਯ ‘‘ਸਹਸ੍ਸਰਂਸੀ’’ਤਿ ਵੁਚ੍ਚਤਿ. ਯਥਾਮਹਪ੍ਪਭੋਤਿ ਅਤ੍ਤਨੋ ਮਹਤ੍ਤਸ੍ਸ ਅਨੁਰੂਪਪ੍ਪਭੋ. ਯਥਾ ਹਿ ਮਹਤ੍ਤੇਨ ਸੂਰਿਯਮਣ੍ਡਲੇਨ ਸਦਿਸਂ ਜੋਤਿਮਣ੍ਡਲਂ ਨਤ੍ਥਿ, ਏਵਂ ਪਭਾਯਪਿ. ਤਥਾ ਹਿ ਤਂ ਏਕਸ੍ਮਿਂ ਖਣੇ ਤੀਸੁ ਮਹਾਦੀਪੇਸੁ ਆਲੋਕਂ ਫਰਨ੍ਤਂ ਤਿਟ੍ਠਤਿ. ਦਿਸਂ ਯਥਾ ਭਾਤਿ ਨਭੇ ਅਨੁਕ੍ਕਮਨ੍ਤਿ ਨਭੇ ਆਕਾਸੇ ਯਥੇਵ ਦਿਸਂ ਅਨੁਕ੍ਕਮਨ੍ਤੋ ਗਚ੍ਛਨ੍ਤੋ ਯਥਾ ਯੇਨ ਪਕਾਰੇਨ ਭਾਤਿ ਦਿਬ੍ਬਤਿ ਜੋਤਤਿ. ਤਥਾਪਕਾਰੋਤਿ ਤਾਦਿਸਾਕਾਰੋ. ਤਵਾਯਨ੍ਤਿ ਤਵ ਅਯਂ.

੧੦੦੮. ਸੁਵਣ੍ਣਪਟ੍ਟੇਹੀਤਿ ਸੁਵਣ੍ਣਮਯੇਹਿ ਪਟ੍ਟੇਹਿ. ਸਮਨ੍ਤਮੋਤ੍ਥਟੋ ਸਮਨ੍ਤਤੋ ਛਾਦਿਤੋ. ਉਰਸ੍ਸਾਤਿ ਉਰੋ ਅਸ੍ਸ, ਰਥਸ੍ਸ ਉਰੋਤਿ ਚ ਈਸਾਮੂਲਂ ਵਦਤਿ. ਲੇਖਾਤਿ ਵੇਲ਼ੁਰਿਯਮਯਾ ਮਾਲਾਕਮ੍ਮਲਤਾਕਮ੍ਮਾਦਿਲੇਖਾ. ਤਾਸਂ ਸੁਵਣ੍ਣਪਟ੍ਟੇਸੁ ਚ ਰਜਤਪਟ੍ਟੇਸੁ ਚ ਦਿਸ੍ਸਮਾਨਤ੍ਤਾ ਵੁਤ੍ਤਂ ‘‘ਸੁਵਣ੍ਣਸ੍ਸ ਚ ਰੂਪਿਯਸ੍ਸ ਚਾ’’ਤਿ. ਸੋਭੇਨ੍ਤੀਤਿ ਰਥਂ ਸੋਭਯਨ੍ਤਿ.

੧੦੦੯. ਸੀਸਨ੍ਤਿ ਰਥਕੁਬ੍ਬਰਸੀਸਂ. ਵੇਲ਼ੁਰਿਯਸ੍ਸ ਨਿਮ੍ਮਿਤਨ੍ਤਿ ਵੇਲ਼ੁਰਿਯੇਨ ਨਿਮ੍ਮਿਤਂ, ਵੇਲ਼ੁਰਿਯਮਣਿਮਯਨ੍ਤਿ ਅਤ੍ਥੋ. ਲੋਹਿਤਕਾਯਾਤਿ ਲੋਹਿਤਕਮਣਿਨਾ, ਯੇਨ ਕੇਨਚਿ ਰਤ੍ਤਮਣਿਨਾ ਵਾ. ਯੁਤ੍ਤਾਤਿ ਯੋਜਿਤਾ, ਅਥ ਵਾ ਯੋਤ੍ਤਾ ਸੁਵਣ੍ਣਸ੍ਸ ਚ ਰੂਪਿਯਸ੍ਸ ਚਾਤਿ ਸੁਵਣ੍ਣਮਯਾ ਚ ਰੂਪਿਯਮਯਾ ਚ ਯੋਤ੍ਤਾ, ਸਙ੍ਖਲਿਕਾਤਿ ਅਤ੍ਥੋ.

੧੦੧੦. ਅਧਿਟ੍ਠਿਤੋਤਿ ਅਤ੍ਤਨੋ ਦੇਵਿਦ੍ਧਿਯਾ ਸਕਲਮਿਦਂ ਠਾਨਂ ਅਭਿਭਵਿਤ੍ਵਾ ਠਿਤੋ. ਸਹਸ੍ਸਵਾਹਨੋਤਿ ਸਹਸ੍ਸਯੁਤ੍ਤਵਾਹਨੋ, ਸਹਸ੍ਸਆਜਾਨੀਯਯੁਤ੍ਤਰਥੋ ਦੇਵਾਨਮਿਨ੍ਦੋ ਯਥਾਤਿ ਅਧਿਪ੍ਪਾਯੋ. ਯਸਵਨ੍ਤਾਤਿ ਆਲਪਨਂ, ਯਸਸ੍ਸੀਤਿ ਅਤ੍ਥੋ. ਕੋਵਿਦਨ੍ਤਿ ਕੁਸਲਞਾਣਵਨ੍ਤਂ, ਰਥਾਰੋਹਨੇ ਵਾ ਛੇਕਂ. ਅਯਂ ਉਲ਼ਾਰੋਤਿ ਅਯਂ ਉਲ਼ਾਰੋ ਮਹਨ੍ਤੋ ਯਸੋਤਿ ਅਧਿਪ੍ਪਾਯੋ.

ਏਵਂ ਥੇਰੇਨ ਪੁਟ੍ਠੋ ਦੇਵਪੁਤ੍ਤੋ ਇਮਾਹਿ ਗਾਥਾਹਿ ਬ੍ਯਾਕਾਸਿ –

੧੦੧੧. ‘‘ਸੁਜਾਤੋ ਨਾਮਹਂ ਭਨ੍ਤੇ, ਰਾਜਪੁਤ੍ਤੋ ਪੁਰੇ ਅਹੁਂ;

ਤ੍ਵਞ੍ਚ ਮਂ ਅਨੁਕਮ੍ਪਾਯ, ਸਞ੍ਞਮਸ੍ਮਿਂ ਨਿਵੇਸਯਿ.

੧੦੧੨. ‘‘ਖੀਣਾਯੁਕਞ੍ਚ ਮਂ ਞਤ੍ਵਾ, ਸਰੀਰਂ ਪਾਦਾਸਿ ਸਤ੍ਥੁਨੋ;

ਇਮਂ ਸੁਜਾਤ ਪੂਜੇਹਿ, ਤਂ ਤੇ ਅਤ੍ਥਾਯ ਹੇਹਿਤਿ.

੧੦੧੩. ‘‘ਤਾਹਂ ਗਨ੍ਧੇਹਿ ਮਾਲੇਹਿ, ਪੂਜਯਿਤ੍ਵਾ ਸਮੁਯ੍ਯੁਤੋ;

ਪਹਾਯ ਮਾਨੁਸਂ ਦੇਹਂ, ਉਪਪਨ੍ਨੋਮ੍ਹਿ ਨਨ੍ਦਨਂ.

੧੦੧੪. ‘‘ਨਨ੍ਦਨੇ ਚ ਵਨੇ ਰਮ੍ਮੇ, ਨਾਨਾਦਿਜਗਣਾਯੁਤੇ;

ਰਮਾਮਿ ਨਚ੍ਚਗੀਤੇਹਿ, ਅਚ੍ਛਰਾਹਿ ਪੁਰਕ੍ਖਤੋ’’ਤਿ.

੧੦੧੨-੩. ਤਤ੍ਥ ਸਰੀਰਨ੍ਤੀ ਸਰੀਰਧਾਤੁਂ. ਹੇਹਿਤੀਤਿ ਭਵਿਸ੍ਸਤਿ. ਸਮੁਯ੍ਯੁਤੋਤਿ ਸਮ੍ਮਾ ਉਯ੍ਯੁਤ੍ਤੋ, ਯੁਤ੍ਤਪ੍ਪਯੁਤ੍ਤੋਤਿ ਅਤ੍ਥੋ.

ਏਵਂ ਦੇਵਪੁਤ੍ਤੋ ਥੇਰੇਨ ਪੁਚ੍ਛਿਤਮਤ੍ਥਂ ਕਥੇਤ੍ਵਾ ਥੇਰਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਪਿਤਰਂ ਆਪੁਚ੍ਛਿਤ੍ਵਾ ਰਥਂ ਆਰੁਯ੍ਹ ਦੇਵਲੋਕਮੇਵ ਗਤੋ. ਥੇਰੋਪਿ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਵਿਤ੍ਥਾਰੇਨ ਧਮ੍ਮਕਥਂ ਕਥੇਸਿ. ਸਾ ਧਮ੍ਮਕਥਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸਿ. ਅਥ ਥੇਰੋ ਤਂ ਸਬ੍ਬਂ ਅਤ੍ਤਨਾ ਚ ਤੇਨ ਚ ਕਥਿਤਨਿਯਾਮੇਨੇਵ ਸਙ੍ਗੀਤਿਕਾਲੇ ਧਮ੍ਮਸਙ੍ਗਾਹਕਾਨਂ ਆਰੋਚੇਸਿ, ਤੇ ਚ ਤਂ ਤਥਾ ਸਙ੍ਗਹਂ ਆਰੋਪੇਸੁਨ੍ਤਿ.

ਚੂਲ਼ਰਥਵਿਮਾਨਵਣ੍ਣਨਾ ਨਿਟ੍ਠਿਤਾ.