੧੨. ਤਤਿਯਨਾਗਵਿਮਾਨਵਣ੍ਣਨਾ

ਕੋ ਨੁ ਦਿਬ੍ਬੇਨ ਯਾਨੇਨਾਤਿ ਤਤਿਯਨਾਗਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਸਮਯੇਨ ਤਯੋ ਖੀਣਾਸਵਤ੍ਥੇਰਾ ਗਾਮਕਾਵਾਸੇ ਵਸ੍ਸਂ ਉਪਗਚ੍ਛਿਂਸੁ. ਤੇ ਵੁਤ੍ਥਵਸ੍ਸਾ ਪਵਾਰੇਤ੍ਵਾ ‘‘ਭਗਵਨ੍ਤਂ ਵਨ੍ਦਿਸ੍ਸਾਮਾ’’ਤਿ ਰਾਜਗਹਂ ਉਦ੍ਦਿਸ੍ਸ ਗਚ੍ਛਨ੍ਤਾ ਅਨ੍ਤਰਾਮਗ੍ਗੇ ਸਾਯਂ ਅਞ੍ਞਤਰਸ੍ਮਿਂ ਗਾਮਕੇ ਮਿਚ੍ਛਾਦਿਟ੍ਠਿਕਬ੍ਰਾਹ੍ਮਣਸ੍ਸ ਉਚ੍ਛੁਖੇਤ੍ਤਸਮੀਪਂ ਗਨ੍ਤ੍ਵਾ ਉਚ੍ਛੁਪਾਲਂ ਪੁਚ੍ਛਿਂਸੁ ‘‘ਆਵੁਸੋ, ਸਕ੍ਕਾ ਅਜ੍ਜ ਰਾਜਗਹਂ ਪਾਪੁਣਿਤੁ’’ਨ੍ਤਿ. ‘‘ਨ ਸਕ੍ਕਾ, ਭਨ੍ਤੇ, ਇਤੋ ਅਡ੍ਢਯੋਜਨੇ ਰਾਜਗਹਂ, ਇਧੇਵ ਵਸਿਤ੍ਵਾ ਸ੍ਵੇ ਗਚ੍ਛਥਾ’’ਤਿ ਆਹ. ‘‘ਅਤ੍ਥੇਤ੍ਥ ਕੋਚਿ ਵਸਨਯੋਗ੍ਗੋ ਆਵਾਸੋ’’ਤਿ? ‘‘ਨਤ੍ਥਿ, ਭਨ੍ਤੇ, ਅਹਂ ਪਨ ਵੋ ਵਸਨਟ੍ਠਾਨਂ ਜਾਨਿਸ੍ਸਾਮੀ’’ਤਿ. ਥੇਰਾ ਅਧਿਵਾਸੇਸੁਂ.

ਸੋ ਉਚ੍ਛੂਸੁਯੇਵ ਯਥਾਠਿਤੇਸੁ ਸਾਖਾਮਣ੍ਡਪਾਕਾਰੇਨ ਦਣ੍ਡਕਾਨਿ ਬਨ੍ਧਿਤ੍ਵਾ ਉਚ੍ਛੁਪਣ੍ਣੇਹਿ ਛਾਦੇਤ੍ਵਾ ਹੇਟ੍ਠਾ ਪਲਾਲਂ ਅਤ੍ਥਰਿਤ੍ਵਾ ਏਕਸ੍ਸ ਥੇਰਸ੍ਸ ਅਦਾਸਿ, ਦੁਤਿਯਸ੍ਸ ਥੇਰਸ੍ਸ ਤੀਹਿ ਉਚ੍ਛੂਹਿ ਦਣ੍ਡਕਸਙ੍ਖੇਪੇਨ ਬਨ੍ਧਿਤ੍ਵਾ ਤਿਣੇਨ ਛਾਦੇਤ੍ਵਾ ਹੇਟ੍ਠਾ ਚ ਤਿਣਸਨ੍ਥਰਂ ਕਤ੍ਵਾ ਅਦਾਸਿ, ਇਤਰਸ੍ਸ ਅਤ੍ਤਨੋ ਕੁਟਿਯਂ ਦ੍ਵੇ ਤਯੋ ਦਣ੍ਡਕੇ ਸਾਖਾਯੋ ਚ ਨੀਹਰਿਤ੍ਵਾ ਚੀਵਰੇਨ ਪਟਿਚ੍ਛਾਦੇਨ੍ਤੋ ਚੀਵਰਕੁਟਿਂ ਕਤ੍ਵਾ ਅਦਾਸਿ. ਤੇ ਤਤ੍ਥ ਵਸਿਂਸੁ. ਅਥ ਵਿਭਾਤਾਯ ਰਤ੍ਤਿਯਾ ਕਾਲਸ੍ਸੇਵ ਭਤ੍ਤਂ ਪਚਿਤ੍ਵਾ ਦਨ੍ਤਕਟ੍ਠਞ੍ਚ ਮੁਖੋਦਕਞ੍ਚ ਦਤ੍ਵਾ ਸਹ ਉਚ੍ਛੁਰਸੇਨ ਭਤ੍ਤਂ ਅਦਾਸਿ. ਤੇਸਂ ਭੁਞ੍ਜਿਤ੍ਵਾ ਅਨੁਮੋਦਨਂ ਕਤ੍ਵਾ ਗਚ੍ਛਨ੍ਤਾਨਂ ਏਕੇਕਂ ਉਚ੍ਛੁਂ ਅਦਾਸਿ ‘‘ਮਯ੍ਹਂ ਭਾਗੋ ਭਵਿਸ੍ਸਤੀ’’ਤਿ. ਸੋ ਥੋਕਂ ਮਗ੍ਗਂ ਥੇਰੇ ਅਨੁਗਨ੍ਤ੍ਵਾ ਨਿਵਤ੍ਤਨ੍ਤੋ ਅਤ੍ਤਨੋ ਵੇਯ੍ਯਾਵਚ੍ਚਞ੍ਚ ਦਾਨਞ੍ਚ ਆਰਬ੍ਭ ਉਲ਼ਾਰਂ ਪੀਤਿਸੋਮਨਸ੍ਸਂ ਪਟਿਸਂਵੇਦੇਨ੍ਤੋ ਨਿਵਤ੍ਤਿ.

ਖੇਤ੍ਤਸਾਮਿਕੋ ਪਨ ਗਚ੍ਛਨ੍ਤਾਨਂ ਭਿਕ੍ਖੂਨਂ ਪਟਿਪਥੇਨ ਆਗਚ੍ਛਨ੍ਤੋ ਭਿਕ੍ਖੂ ਪੁਚ੍ਛਿ ‘‘ਕੁਤੋ ਵੋ ਉਚ੍ਛੁ ਲਦ੍ਧਾ’’ਤਿ? ‘‘ਉਚ੍ਛੁਪਾਲਕੇਨ ਦਿਨ੍ਨਾ’’ਤਿ. ਤਂ ਸੁਤ੍ਵਾ ਬ੍ਰਾਹ੍ਮਣੋ ਕੁਪਿਤੋ ਅਨਤ੍ਤਮਨੋ ਤਟਤਟਾਯਮਾਨੋ ਕੋਧਾਭਿਭੂਤੋ ਤਸ੍ਸ ਪਿਟ੍ਠਿਤੋ ਉਪਧਾਵਿਤ੍ਵਾ ਮੁਗ੍ਗਰੇਨ ਤਂ ਪਹਰਨ੍ਤੋ ਏਕਪ੍ਪਹਾਰੇਨੇਵ ਜੀਵਿਤਾ ਵੋਰੋਪੇਸਿ. ਸੋ ਅਤ੍ਤਨਾ ਕਤਪੁਞ੍ਞਕਮ੍ਮਮੇਵ ਅਨੁਸ੍ਸਰਨ੍ਤੋ ਕਾਲਂ ਕਤ੍ਵਾ ਸੁਧਮ੍ਮਾਦੇਵਸਭਾਯਂ ਨਿਬ੍ਬਤ੍ਤਿ. ਤਸ੍ਸ ਪੁਞ੍ਞਾਨੁਭਾਵੇਨ ਸਬ੍ਬਸੇਤੋ ਮਹਨ੍ਤੋ ਦਿਬ੍ਬਵਰਵਾਰਣੋ ਨਿਬ੍ਬਤ੍ਤਿ.

ਉਚ੍ਛੁਪਾਲਕਸ੍ਸ ਮਰਣਂ ਸੁਤ੍ਵਾ ਤਸ੍ਸ ਮਾਤਾਪਿਤਰੋ ਚੇਵ ਞਾਤਿਮਿਤ੍ਤਾ ਚ ਅਸ੍ਸੁਮੁਖਾ ਰੋਦਮਾਨਾ ਤਂ ਠਾਨਂ ਅਗਮਂਸੁ, ਸਬ੍ਬੇ ਚ ਗਾਮਵਾਸਿਨੋ ਸਨ੍ਨਿਪਤਿਂਸੁ. ਤਤ੍ਰਸ੍ਸ ਮਾਤਾਪਿਤਰੋ ਸਰੀਰਕਿਚ੍ਚਂ ਕਾਤੁਂ ਆਰਭਿਂਸੁ. ਤਸ੍ਮਿਂ ਖਣੇ ਸੋ ਦੇਵਪੁਤ੍ਤੋ ਤਂ ਦਿਬ੍ਬਹਤ੍ਥਿਂ ਅਭਿਰੁਹਿਤ੍ਵਾ ਸਬ੍ਬਤਾਲ਼ਾਵਚਰਪਰਿਵੁਤੋ ਪਞ੍ਚਙ੍ਗਿਕੇਨ ਤੂਰਿਯੇਨ ਪਵਜ੍ਜਮਾਨੇਨ ਮਹਨ੍ਤੇਨ ਪਰਿਵਾਰੇਨ ਮਹਤਿਯਾ ਦੇਵਿਦ੍ਧਿਯਾ ਦੇਵਲੋਕਤੋ ਆਗਨ੍ਤ੍ਵਾ ਤਾਯ ਪਰਿਸਾਯ ਦਿਸ੍ਸਮਾਨਰੂਪੋ ਆਕਾਸੇ ਅਟ੍ਠਾਸਿ. ਅਥ ਨਂ ਤਤ੍ਥ ਪਣ੍ਡਿਤਜਾਤਿਕੋ ਪੁਰਿਸੋ ਇਮਾਹਿ ਗਾਥਾਹਿ ਤੇਨ ਕਤਪੁਞ੍ਞਕਮ੍ਮਂ ਪੁਚ੍ਛਿ –

੯੭੬. ‘‘ਕੋ ਨੁ ਦਿਬ੍ਬੇਨ ਯਾਨੇਨ, ਸਬ੍ਬਸੇਤੇਨ ਹਤ੍ਥਿਨਾ;

ਤੂਰਿਯਤਾਲ਼ਿਤਨਿਗ੍ਘੋਸੋ, ਅਨ੍ਤਲਿਕ੍ਖੇ ਮਹੀਯਤਿ.

੯੭੭. ‘‘ਦੇਵਤਾ ਨੁਸਿ ਗਨ੍ਧਬ੍ਬੋ, ਅਦੁ ਸਕ੍ਕੋ ਪੁਰਿਨ੍ਦਦੋ;

ਅਜਾਨਨ੍ਤਾ ਤਂ ਪੁਚ੍ਛਾਮ, ਕਥਂ ਜਾਨੇਮੁ ਤਂ ਮਯ’’ਨ੍ਤਿ.

ਸੋਪਿਸ੍ਸ ਇਮਾਹਿ ਗਾਥਾਹਿ ਏਤਮਤ੍ਥਂ ਬ੍ਯਾਕਾਸਿ –

੯੭੮. ‘‘ਨਾਮ੍ਹਿ ਦੇਵੋ ਨ ਗਨ੍ਧਬ੍ਬੋ, ਨਾਪਿ ਸਕ੍ਕੋ ਪੁਰਿਨ੍ਦਦੋ;

ਸੁਧਮ੍ਮਾ ਨਾਮ ਯੇ ਦੇਵਾ, ਤੇਸਂ ਅਞ੍ਞਤਰੋ ਅਹ’’ਨ੍ਤਿ.

੯੭੯. ‘‘ਪੁਚ੍ਛਾਮ ਦੇਵਂ ਸੁਧਮ੍ਮਂ, ਪੁਥੁਂ ਕਤ੍ਵਾਨ ਅਞ੍ਜਲਿਂ;

ਕਿਂ ਕਤ੍ਵਾ ਮਾਨੁਸੇ ਕਮ੍ਮਂ, ਸੁਧਮ੍ਮਂ ਉਪਪਜ੍ਜਤੀ’’ਤਿ – ਪੁਨਪਿ ਪੁਚ੍ਛਿ;

੯੮੦. ‘‘ਉਚ੍ਛਾਗਾਰਂ ਤਿਣਾਗਾਰਂ, ਵਤ੍ਥਾਗਾਰਞ੍ਚ ਯੋ ਦਦੇ;

ਤਿਣ੍ਣਂ ਅਞ੍ਞਤਰਂ ਦਤ੍ਵਾ, ਸੁਧਮ੍ਮਂ ਉਪਪਜ੍ਜਤੀ’’ਤਿ. – ਪੁਨਪਿ ਬ੍ਯਾਕਾਸਿ;

੯੭੬. ਤਤ੍ਥ ਤੂਰਿਯਤਾਲ਼ਿਤਨਿਗ੍ਘੋਸੋਤਿ ਤਾਲ਼ਿਤਪਞ੍ਚਙ੍ਗਿਤਦਿਬ੍ਬਤੂਰਿਯਨਿਗ੍ਘੋਸੋ ਅਤ੍ਤਾਨਂ ਉਦ੍ਦਿਸ੍ਸ ਪਵਜ੍ਜਮਾਨਦਿਬ੍ਬਤੂਰਿਯਸਦ੍ਦੋ. ਅਨ੍ਤਲਿਕ੍ਖੇ ਮਹੀਯਤੀਤਿ ਆਕਾਸੇ ਠਤ੍ਵਾ ਆਕਾਸਟ੍ਠੇਨੇਵ ਮਹਤਾ ਪਰਿਵਾਰੇਨ ਪੂਜੀਯਤਿ.

੯੭੭. ਦੇਵਤਾ ਨੁਸੀਤਿ ਦੇਵਤਾ ਨੁ ਅਸਿ, ਕਿਂ ਨੁ ਤ੍ਵਂ ਦੇਵੋਸੀਤਿ ਅਤ੍ਥੋ. ਗਨ੍ਧਬ੍ਬੋਤਿ ਗਨ੍ਧਬ੍ਬਕਾਯਿਕਦੇਵੋ ਅਸੀਤਿ ਅਤ੍ਥੋ. ਅਦੁ ਸਕ੍ਕੋ ਪੁਰਿਨ੍ਦਦੋਤਿ ਉਦਾਹੁ ਪੁਰੇ ਦਦਾਤੀਤਿ ‘‘ਪੁਰਿਨ੍ਦਦੋ’’ਤਿ ਵਿਸ੍ਸੁਤੋ ਸਕ੍ਕੋ ਨੁਸਿ, ਅਥ ਸਕ੍ਕੋ ਦੇਵਰਾਜਾ ਅਸੀਤਿ ਅਤ੍ਥੋ. ਏਤ੍ਥ ਚ ਸਤਿਪਿ ਸਕ੍ਕਗਨ੍ਧਬ੍ਬਾਨਂ ਦੇਵਭਾਵੇ ਤੇਸਂ ਵਿਸੁਂ ਗਹਿਤਤ੍ਤਾ ਗੋਬਲਿਬਦ੍ਧਞਾਯੇਨ ਤਦਞ੍ਞਦੇਵਵਾਚਕੋ ਦੇਵਸਦ੍ਦੋ ਦਟ੍ਠਬ੍ਬੋ.

੯੭੮. ਅਥ ਦੇਵਪੁਤ੍ਤੋ ‘‘ਵਿਸ੍ਸਜ੍ਜਨਂ ਨਾਮ ਪੁਚ੍ਛਾਸਭਾਗੇਨ ਹੋਤੀ’’ਤਿ ਤੇਹਿ ਪੁਚ੍ਛਿਤਂ ਦੇਵਗਨ੍ਧਬ੍ਬਸਕ੍ਕਭਾਵਂ ਪਟਿਕ੍ਖਿਪਿਤ੍ਵਾ ਅਤ੍ਤਾਨਂ ਆਚਿਕ੍ਖਨ੍ਤੋ ‘‘ਨਮ੍ਹਿ ਦੇਵੋ ਨ ਗਨ੍ਧਬ੍ਬੋ’’ਤਿਆਦਿਮਾਹ. ਤਤ੍ਥ ਨਮ੍ਹਿ ਦੇਵੋਤਿ ਤਯਾ ਆਸਙ੍ਕਿਤੋ ਯੋ ਕੋਚਿ ਦੇਵੋ ਨ ਹੋਮਿ ਨ ਗਨ੍ਧਬ੍ਬੋ ਨ ਸਕ੍ਕੋ, ਅਪਿਚ ਖੋ ਸੁਧਮ੍ਮਾ ਨਾਮ ਯੇ ਦੇਵਾ, ਤੇਸਂ ਅਞ੍ਞਤਰੋ ਅਹਂ, ਸੁਧਮ੍ਮਾ ਦੇਵਤਾ ਨਾਮ ਤਾਵਤਿਂਸਦੇਵਨਿਕਾਯਸ੍ਸੇਵ ਅਞ੍ਞਤਰਦੇਵਨਿਕਾਯੋ. ਸੋ ਕਿਰ ਉਚ੍ਛੁਪਾਲੋ ਤੇਸਂ ਦੇਵਾਨਂ ਸਮ੍ਪਤ੍ਤਿਂ ਸੁਤ੍ਵਾ ਪਗੇਵ ਤਤ੍ਥ ਚਿਤ੍ਤਂ ਪਣਿਧਾਯ ਠਿਤੋਤਿ ਕੇਚਿ ਵਦਨ੍ਤਿ.

੯੭੯. ਪੁਥੁਨ੍ਤਿ ਮਹਨ੍ਤਂ, ਪਰਿਪੁਣ੍ਣਂ ਕਤ੍ਵਾਤਿ ਅਤ੍ਥੋ. ਸਕ੍ਕਚ੍ਚਕਿਰਿਯਾਦੀਪਨਤ੍ਥਞ੍ਹੇਤਂ ਵੁਤ੍ਤਂ.

੯੮੦. ਸੁਧਮ੍ਮਾਦੇਵਯਾਨਂ ਪੁਟ੍ਠੋ ਦੇਵਪੁਤ੍ਤੋ ਕਕਣ੍ਟਕਨਿਮਿਤ੍ਤਂ ਵਦਨ੍ਤੋ ਵਿਯ ਦਿਟ੍ਠਮਤ੍ਤਮੇਵ ਗਹੇਤ੍ਵਾ ਅਤ੍ਤਨਾ ਕਤਪੁਞ੍ਞਂ ਆਚਿਕ੍ਖਨ੍ਤੋ ‘‘ਉਚ੍ਛਾਗਾਰ’’ਨ੍ਤਿ ਗਾਥਮਾਹ. ਤਤ੍ਥ ਤਿਣ੍ਣਂ ਅਞ੍ਞਤਰਂ ਦਤ੍ਵਾਤਿ ਯਦਿਪਿ ਮਯਾ ਤੀਣਿ ਅਗਾਰਾਨਿ ਦਿਨ੍ਨਾਨਿ, ਤੀਸੁ ਪਨ ਅਞ੍ਞਤਰੇਨਾਤਿ ਅਯਮਤ੍ਥੋਪਿ ਸਿਜ੍ਝਤੀਤਿ ਨਯਗ੍ਗਾਹੇਨ ਦੇਵਪੁਤ੍ਤੋ ਏਵਮਾਹ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਏਵਂ ਸੋ ਤੇਨ ਪੁਚ੍ਛਿ ਤਮਤ੍ਥਂ ਵਿਸ੍ਸਜ੍ਜੇਤ੍ਵਾ ਰਤਨਤ੍ਤਯਗੁਣਂ ਪਕਾਸੇਨ੍ਤੋ ਮਾਤਾਪਿਤੂਹਿ ਸਦ੍ਧਿਂ ਸਮ੍ਮੋਦਨਂ ਕਤ੍ਵਾ ਦੇਵਲੋਕਮੇਵ ਗਤੋ. ਮਨੁਸ੍ਸਾ ਦੇਵਪੁਤ੍ਤਸ੍ਸ ਵਚਨਂ ਸੁਤ੍ਵਾ ਭਗਵਤਿ ਭਿਕ੍ਖੁਸਙ੍ਘੇ ਚ ਸਞ੍ਜਾਤਪਸਾਦਬਹੁਮਾਨਾ ਬਹੁਂ ਦਾਨੂਪਕਰਣਂ ਸਜ੍ਜੇਤ੍ਵਾ ਸਕਟਾਨਂ ਪੂਰੇਤ੍ਵਾ ਵੇਲ਼ੁਵਨਂ ਗਨ੍ਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਸਤ੍ਥੁ ਤਂ ਪਵਤ੍ਤਿਂ ਆਰੋਚਯਿਂਸੁ. ਸਤ੍ਥਾ ਤਂ ਪੁਚ੍ਛਾਵਿਸ੍ਸਜ੍ਜਨਂ ਤਥੇਵ ਵਤ੍ਵਾ ਤਮੇਵ ਅਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਵਿਤ੍ਥਾਰੇਨ ਧਮ੍ਮਂ ਦੇਸੇਤ੍ਵਾ ਤੇ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਪੇਸਿ. ਤੇ ਚ ਪਤਿਟ੍ਠਿਤਸਦ੍ਧਾ ਭਗਵਨ੍ਤਂ ਵਨ੍ਦਿਤ੍ਵਾ ਅਤ੍ਤਨੋ ਗਾਮਂ ਉਪਗਨ੍ਤ੍ਵਾ ਉਚ੍ਛੁਪਾਲਸ੍ਸ ਮਤਟ੍ਠਾਨੇ ਵਿਹਾਰਂ ਕਾਰਯਿਂਸੂਤਿ.

ਤਤਿਯਨਾਗਵਿਮਾਨਵਣ੍ਣਨਾ ਨਿਟ੍ਠਿਤਾ.