੧੧. ਦੁਤਿਯਨਾਗਵਿਮਾਨਵਣ੍ਣਨਾ

ਮਹਨ੍ਤਂ ਨਾਗਂ ਅਭਿਰੁਯ੍ਹਾਤਿ ਦੁਤਿਯਨਾਗਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ. ਤੇਨ ਸਮਯੇਨ ਰਾਜਗਹੇ ਅਞ੍ਞਤਰੋ ਉਪਾਸਕੋ ਸਦ੍ਧੋ ਪਸਨ੍ਨੋ ਪਞ੍ਚਸੁ ਸੀਲੇਸੁ ਪਤਿਟ੍ਠਿਤੋ ਉਪੋਸਥਦਿਵਸੇਸੁ ਉਪੋਸਥਸੀਲਂ ਸਮਾਦਿਯਿਤ੍ਵਾ ਪੁਰੇਭਤ੍ਤਂ ਅਤ੍ਤਨੋ ਵਿਭਵਾਨੁਰੂਪਂ ਭਿਕ੍ਖੂਨਂ ਦਾਨਾਨਿ ਦਤ੍ਵਾ ਸਯਂ ਭੁਞ੍ਜਿਤ੍ਵਾ ਸੁਦ੍ਧਵਤ੍ਥਨਿਵਤ੍ਥੋ ਸੁਦ੍ਧੁਤ੍ਤਰਾਸਙ੍ਗੋ ਪਚ੍ਛਾਭਤ੍ਤਂ ਯੇਭੁਯ੍ਯੇਨ ਅਟ੍ਠ ਪਾਨਾਨਿ ਗਾਹਾਪੇਤ੍ਵਾ ਵਿਹਾਰਂ ਗਨ੍ਤ੍ਵਾ ਭਿਕ੍ਖੁਸਙ੍ਘਸ੍ਸ ਨਿਯ੍ਯਾਦੇਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਣਾਤਿ. ਏਵਂ ਸੋ ਸਕ੍ਕਚ੍ਚਂ ਦਾਨਮਯਂ ਸੀਲਮਯਞ੍ਚ ਬਹੁਂ ਸੁਚਰਿਤਂ ਉਪਚਿਨਿਤ੍ਵਾ ਇਤੋ ਚੁਤੋ ਤਾਵਤਿਂਸੇਸੁ ਉਪ੍ਪਜ੍ਜਿ. ਤਸ੍ਸ ਪੁਞ੍ਞਾਨੁਭਾਵੇਨ ਸਬ੍ਬਸੇਤੋ ਮਹਨ੍ਤੋ ਦਿਬ੍ਬੋ ਹਤ੍ਥਿਨਾਗੋ ਪਾਤੁਰਹੋਸਿ. ਸੋ ਤਂ ਅਭਿਰੁਯ੍ਹ ਮਹਨ੍ਤੇਨ ਪਰਿਵਾਰੇਨ ਮਹਨ੍ਤੇਨ ਦਿਬ੍ਬਾਨੁਭਾਵੇਨ ਕਾਲੇਨ ਕਾਲਂ ਉਯ੍ਯਾਨਕੀਲ਼ਂ ਗਚ੍ਛਤਿ.

ਅਥੇਕਦਿਵਸਂ ਕਤਞ੍ਞੁਤਾਯ ਚੋਦਿਯਮਾਨੋ ਅਡ੍ਢਰਤ੍ਤਿਸਮਯੇ ਤਂ ਦਿਬ੍ਬਨਾਗਂ ਅਭਿਰੁਯ੍ਹ ਮਹਤਾ ਪਰਿਵਾਰੇਨ ‘‘ਭਗਵਨ੍ਤਂ ਵਨ੍ਦਿਸ੍ਸਾਮੀ’’ਤਿ ਦੇਵਲੋਕਤੋ ਆਗਨ੍ਤ੍ਵਾ ਕੇਵਲਕਪ੍ਪਂ ਵੇਲ਼ੁਵਨਂ ਓਭਾਸੇਤ੍ਵਾ ਹਤ੍ਥਿਕ੍ਖਨ੍ਧਤੋ ਓਰੁਯ੍ਹ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਅਭਿਵਾਦੇਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਏਕਮਨ੍ਤਂ ਅਟ੍ਠਾਸਿ. ਤਂ ਭਗਵਤੋ ਸਮੀਪੇ ਠਿਤੋ ਆਯਸ੍ਮਾ ਵਙ੍ਗੀਸੋ ਭਗਵਤੋ ਅਨੁਞ੍ਞਾਯ ਇਮਾਹਿ ਗਾਥਾਹਿ ਪੁਚ੍ਛਿ –

੯੬੮. ‘‘ਮਹਨ੍ਤਂ ਨਾਗਂ ਅਭਿਰੁਯ੍ਹ, ਸਬ੍ਬਸੇਤਂ ਗਜੁਤ੍ਤਮਂ;

ਵਨਾ ਵਨਂ ਅਨੁਪਰਿਯਾਸਿ, ਨਾਰੀਗਣਪੁਰਕ੍ਖਤੋ;

ਓਭਾਸੇਨ੍ਤੋ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੯੬੯. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

ਤਤ੍ਥਾ ਪੁਚ੍ਛਿਤੋ ਸੋਪਿ ਤਸ੍ਸ ਗਾਥਾਹਿ ਏਵ ਬ੍ਯਾਕਾਸਿ.

੯੭੧. ‘‘ਸੋ ਦੇਵਪੁਤ੍ਤੋ ਅਤ੍ਤਮਨੋ, ਵਙ੍ਗੀਸੇਨੇਵ ਪੁਚ੍ਛਿਤੋ;

ਪਞ੍ਹਂ ਪੁਟ੍ਠੋ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੯੭੨. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤੋ, ਉਪਾਸਕੋ ਚਕ੍ਖੁਮਤੋ ਅਹੋਸਿਂ;

ਪਾਣਾਤਿਪਾਤਾ ਵਿਰਤੋ ਅਹੋਸਿਂ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਿਸ੍ਸਂ.

੯੭੩. ‘‘ਅਮਜ੍ਜਪੋ ਨੋ ਚ ਮੁਸਾ ਅਭਾਣਿਂ, ਸਕੇਨ ਦਾਰੇਨ ਚ ਤੁਟ੍ਠੋ ਅਹੋਸਿਂ;

ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤੋ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.

੯੭੪. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਤਤ੍ਥ ਅਪੁਬ੍ਬਂ ਨਤ੍ਥਿ, ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

ਦੁਤਿਯਨਾਗਵਿਮਾਨਵਣ੍ਣਨਾ ਨਿਟ੍ਠਿਤਾ.