੧੦. ਪਠਮਨਾਗਵਿਮਾਨਵਣ੍ਣਨਾ

ਸੁਸੁਕ੍ਕਖਨ੍ਧਂ ਅਭਿਰੁਯ੍ਹ ਨਾਗਨ੍ਤਿ ਨਾਗਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨੇਵ ਦੇਵਚਾਰਿਕਂ ਚਰਨ੍ਤੋ ਤਾਵਤਿਂਸਭਵਨਂ ਉਪਗਤੋ. ਤਤ੍ਥ ਅਦ੍ਦਸ ਅਞ੍ਞਤਰਂ ਦੇਵਪੁਤ੍ਤਂ ਸਬ੍ਬਸੇਤਂ ਮਹਨ੍ਤਂ ਦਿਬ੍ਬਨਾਗਂ ਅਭਿਰੁਯ੍ਹ ਮਹਨ੍ਤੇਨ ਪਰਿਵਾਰੇਨ ਮਹਤਾ ਦਿਬ੍ਬਾਨੁਭਾਵੇਨ ਆਕਾਸੇਨ ਗਚ੍ਛਨ੍ਤਂ, ਸਬ੍ਬਾ ਦਿਸਾ ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਓਭਾਸਯਮਾਨਂ. ਦਿਸ੍ਵਾ ਯੇਨ ਸੋ ਦੇਵਪੁਤ੍ਤੋ ਤੇਨੁਪਸਙ੍ਕਮਿ. ਅਥ ਸੋ ਦੇਵਪੁਤ੍ਤੋ ਤਤੋ ਓਰੁਯ੍ਹ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਅਭਿਵਾਦੇਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਅਥ ਥੇਰੋ –

੯੬੧. ‘‘ਸੁਸੁਕ੍ਕਖਨ੍ਧਂ ਅਭਿਰੁਯ੍ਹ ਨਾਗਂ, ਅਕਾਚਿਨਂ ਦਨ੍ਤਿਂ ਬਲਿਂ ਮਹਾਜਵਂ;

ਅਭਿਰੁਯ੍ਹ ਗਜਵਰਂ ਸੁਕਪ੍ਪਿਤਂ, ਇਧਾਗਮਾ ਵੇਹਾਯਸਂ ਅਨ੍ਤਲਿਕ੍ਖੇ.

੯੬੨. ‘‘ਨਾਗਸ੍ਸ ਦਨ੍ਤੇਸੁ ਦੁਵੇਸੁ ਨਿਮ੍ਮਿਤਾ, ਅਚ੍ਛੋਦਕਾ ਪਦੁਮਿਨਿਯੋ ਸੁਫੁਲ੍ਲਾ;

ਪਦੁਮੇਸੁ ਚ ਤੂਰਿਯਗਣਾ ਪਵਜ੍ਜਰੇ, ਇਮਾ ਚ ਨਚ੍ਚਨ੍ਤਿ ਮਨੋਹਰਾਯੋ.

੯੬੩. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ, ਮਨੁਸ੍ਸਭੂਤੋ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵੋ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਤਸ੍ਸ ਸਮ੍ਪਤ੍ਤਿਕਿਤ੍ਤਨਮੁਖੇਨ ਕਤਕਮ੍ਮਂ ਪੁਚ੍ਛਿ.

੯੬੧. ਤਤ੍ਥ ਸੁਸੁਕ੍ਕਖਨ੍ਧਨ੍ਤਿ ਸੁਟ੍ਠੁ ਸੇਤਖਨ੍ਧਂ. ਕਿਞ੍ਚਾਪਿ ਤਸ੍ਸ ਨਾਗਸ੍ਸ ਚਤ੍ਤਾਰੋ ਪਾਦਾ, ਵਤ੍ਥਿਕੋਸਂ, ਮੁਖਪ੍ਪਦੇਸੋ, ਉਭੋ ਕਣ੍ਣਾ, ਵਾਲਧੀਤਿ ਏਤ੍ਤਕਂ ਮੁਞ੍ਚਿਤ੍ਵਾ ਸਬ੍ਬੋ ਕਾਯੋ ਸੇਤੋਵ, ਖਨ੍ਧਪ੍ਪਦੇਸਸ੍ਸ ਪਨ ਸਾਤਿਸਯਂ ਧਵਲਤਰਤਾਯ ਵੁਤ੍ਤਂ ‘‘ਸੁਸੁਕ੍ਕਖਨ੍ਧ’’ਨ੍ਤਿ. ਨਾਗਨ੍ਤਿ ਦਿਬ੍ਬਂ ਹਤ੍ਥਿਨਾਗਂ. ਅਕਾਚਿਨਨ੍ਤਿ ਨਿਦ੍ਦੋਸਂ, ਸਬਲਲਵਙ੍ਕਤਿਲਕਾਦਿਛਵਿਦੋਸਵਿਰਹਿਤਨ੍ਤਿ ਅਤ੍ਥੋ. ‘‘ਆਜਾਨੀਯ’’ਨ੍ਤਿਪਿ ਪਾਲ਼ਿ, ਆਜਾਨੀਯਲਕ੍ਖਣੂਪੇਤਨ੍ਤਿ ਅਤ੍ਥੋ. ਦਨ੍ਤਿਨ੍ਤਿ ਵਿਪੁਲਰੁਚਿਰਦਨ੍ਤਵਨ੍ਤਂ. ਬਲਿਨ੍ਤਿ ਬਲਵਨ੍ਤਂ ਮਹਾਬਲਂ. ਮਹਾਜਵਨ੍ਤਿ ਅਤਿਜਵਂ ਸੀਘਗਾਮਿਂ. ਪੁਨ ਅਭਿਰੁਯ੍ਹਾਤਿ ਏਤ੍ਥ ਅਨੁਨਾਸਿਕਲੋਪੋ ਦਟ੍ਠਬ੍ਬੋ, ਅਭਿਰੁਯ੍ਹਂ ਆਰੋਹਨੀਯਨ੍ਤਿ ਵੁਤ੍ਤਂ ਹੋਤਿ. ਸੇਸਂ ਵੁਤ੍ਤਨਯਮੇਵ.

ਏਵਂ ਪਨ ਥੇਰੇਨ ਪੁਟ੍ਠੋ ਦੇਵਪੁਤ੍ਤੋ ਅਤ੍ਤਨਾ ਕਤਕਮ੍ਮਂ ਕਥੇਨ੍ਤੋ –

੯੬੫. ‘‘ਅਟ੍ਠੇਵ ਮੁਤ੍ਤਪੁਪ੍ਫਾਨਿ, ਕਸ੍ਸਪਸ੍ਸ ਮਹੇਸਿਨੋ;

ਥੂਪਸ੍ਮਿਂ ਅਭਿਰੋਪੇਸਿਂ, ਪਸਨ੍ਨੋ ਸੇਹਿ ਪਾਣਿਭਿ.

੯੬੬. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. – ਇਮਾਹਿ ਗਾਥਾਹਿ ਬ੍ਯਾਕਾਸਿ;

ਤਸ੍ਸਤ੍ਥੋ – ਅਹਂ ਪੁਬ੍ਬੇ ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਯੋਜਨਿਕੇ ਕਨਕਥੂਪੇ ਵਣ੍ਟਤੋ ਮੁਚ੍ਚਿਤ੍ਵਾ ਗਚ੍ਛਮੂਲੇ ਪਤਿਤਾਨਿ ਅਟ੍ਠ ਮੁਤ੍ਤਪੁਪ੍ਫਾਨਿ ਲਭਿਤ੍ਵਾ ਤਾਨਿ ਗਹੇਤ੍ਵਾ ਪੂਜਨਵਸੇਨ ਪਸਨ੍ਨਚਿਤ੍ਤੋ ਹੁਤ੍ਵਾ ਅਭਿਰੋਪੇਸਿਂ ਪੂਜੇਸਿਂ.

ਅਤੀਤੇ ਕਿਰ ਕਸ੍ਸਪਸਮ੍ਮਾਸਮ੍ਬੁਦ੍ਧੇ ਪਰਿਨਿਬ੍ਬੁਤੇ ਯੋਜਨਿਕੇ ਕਨਕਥੂਪੇ ਚ ਕਾਰਿਤੇ ਸਪਰਿਵਾਰੋ ਕਿਕੀ ਕਾਸਿਰਾਜਾ ਚ ਨਾਗਰਾ ਚ ਨੇਗਮਾ ਚ ਜਾਨਪਦਾ ਚ ਦਿਵਸੇ ਦਿਵਸੇ ਪੁਪ੍ਫਪੂਜਂ ਕਰੋਨ੍ਤਿ. ਤੇਸੁ ਤਥਾ ਕਰੋਨ੍ਤੇਸੁ ਪੁਪ੍ਫਾਨਿ ਮਹਗ੍ਘਾਨਿ ਦੁਲ੍ਲਭਾਨਿ ਚ ਅਹੇਸੁਂ. ਅਥੇਕੋ ਉਪਾਸਕੋ ਮਾਲਾਕਾਰਵੀਥਿਯਂ ਵਿਚਰਿਤ੍ਵਾ ਏਕਮੇਕੇਨ ਕਹਾਪਣੇਨ ਏਕਮੇਕਮ੍ਪਿ ਪੁਪ੍ਫਂ ਅਲਭਨ੍ਤੋ ਅਟ੍ਠ ਕਹਾਪਣਾਨਿ ਗਹੇਤ੍ਵਾ ਪੁਪ੍ਫਾਰਾਮਂ ਗਨ੍ਤ੍ਵਾ ਮਾਲਾਕਾਰਂ ਆਹ ‘‘ਇਮੇਹਿ ਅਟ੍ਠਹਿ ਕਹਾਪਣੇਹਿ ਅਟ੍ਠ ਪੁਪ੍ਫਾਨਿ ਦੇਹੀ’’ਤਿ. ‘‘ਨਤ੍ਥਯ੍ਯੋ ਪੁਪ੍ਫਾਨਿ, ਸਮ੍ਮਦੇਵ ਉਪਧਾਰੇਤ੍ਵਾ ਓਚਿਨਿਤ੍ਵਾ ਦਿਨ੍ਨਾਨੀ’’ਤਿ. ‘‘ਅਹਂ ਓਲੋਕੇਤ੍ਵਾ ਗਣ੍ਹਾਮੀ’’ਤਿ. ‘‘ਯਦਿ ਏਵਂ, ਆਰਾਮਂ ਪਵਿਸਿਤ੍ਵਾ ਗਵੇਸਾਹੀ’’ਤਿ. ਸੋ ਪਵਿਸਿਤ੍ਵਾ ਗਵੇਸਨ੍ਤੋ ਪਤਿਤਾਨਿ ਅਟ੍ਠ ਪੁਪ੍ਫਾਨਿ ਲਭਿਤ੍ਵਾ ਮਾਲਾਕਾਰਂ ਆਹ ‘‘ਗਣ੍ਹ, ਤਾਤ, ਕਹਾਪਣਾਨੀ’’ਤਿ. ‘‘ਤਵ ਪੁਞ੍ਞੇਨ ਲਦ੍ਧਾਨਿ, ਨਾਹਂ ਕਹਾਪਣਾਨਿ ਗਣ੍ਹਾਮੀ’’ਤਿ ਆਹ. ਇਤਰੋ ‘‘ਨਾਹਂ ਮੁਧਾ ਪੁਪ੍ਫਾਨਿ ਗਹੇਤ੍ਵਾ ਭਗਵਤੋ ਪੂਜਂ ਕਰਿਸ੍ਸਾਮੀ’’ਤਿ ਕਹਾਪਣਾਨਿ ਤਸ੍ਸ ਪੁਰਤੋ ਠਪੇਤ੍ਵਾ ਪੁਪ੍ਫਾਨਿ ਗਹੇਤ੍ਵਾ ਚੇਤਿਯਙ੍ਗਣਂ ਗਨ੍ਤ੍ਵਾ ਪਸਨ੍ਨਚਿਤ੍ਤੋ ਪੂਜਂ ਅਕਾਸਿ. ਸੋ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਉਪ੍ਪਜ੍ਜਿਤ੍ਵਾ ਤਤ੍ਥ ਯਾਵਤਾਯੁਕਂ ਠਤ੍ਵਾ ਪੁਨਪਿ ਦੇਵਲੋਕੇ, ਪੁਨਪਿ ਦੇਵਲੋਕੇਤਿ ਏਵਂ ਅਪਰਾਪਰਂ ਦੇਵੇਸੁਯੇਵ ਸਂਸਰਨ੍ਤੋ ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨ ਇਮਸ੍ਮਿਮ੍ਪਿ ਬੁਦ੍ਧੁਪ੍ਪਾਦੇ ਤਾਵਤਿਂਸੇਸੁਯੇਵ ਉਪ੍ਪਜ੍ਜਿ. ਤਂ ਸਨ੍ਧਾਯ ਹੇਟ੍ਠਾ ਵੁਤ੍ਤਂ ‘‘ਤਤ੍ਥ ਅਦ੍ਦਸ ਅਞ੍ਞਤਰਂ ਦੇਵਪੁਤ੍ਤ’’ਨ੍ਤਿਆਦਿ.

ਤਂ ਪਨੇਤਂ ਪਵਤ੍ਤਿਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਨਾਗਵਿਮਾਨਵਣ੍ਣਨਾ ਨਿਟ੍ਠਿਤਾ.