੯. ਵਿਸਾਲਕ੍ਖਿਵਿਮਾਨਵਣ੍ਣਨਾ

ਕਾ ਨਾਮ ਤ੍ਵਂ ਵਿਸਾਲਕ੍ਖੀਤਿ ਵਿਸਾਲਕ੍ਖਿਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਪਰਿਨਿਬ੍ਬੁਤੇ ਰਞ੍ਞਾ ਅਜਾਤਸਤ੍ਤੁਨਾ ਅਤ੍ਤਨਾ ਪਟਿਲਦ੍ਧਾ ਭਗਵਤਾ ਸਰੀਰਧਾਤੁਯੋ ਗਹੇਤ੍ਵਾ ਰਾਜਗਹੇ ਥੂਪੇ ਚ ਮਹੇ ਚ ਕਤੇ ਰਾਜਗਹਵਾਸਿਨੀ ਏਕਾ ਮਾਲਾਕਾਰਧੀਤਾ ਸੁਨਨ੍ਦਾ ਨਾਮ ਉਪਾਸਿਕਾ ਅਰਿਯਸਾਵਿਕਾ ਸੋਤਾਪਨ੍ਨਾ ਪਿਤੁਂ ਗੇਹਤੋ ਪੇਸਿਤਂ ਬਹੁਂ ਮਾਲਞ੍ਚ ਗਨ੍ਧਞ੍ਚ ਪੇਸੇਤ੍ਵਾ ਦੇਵਸਿਕਂ ਚੇਤਿਯੇ ਪੂਜਂ ਕਾਰੇਸਿ, ਉਪੋਸਥਦਿਵਸੇਸੁ ਪਨ ਸਯਮੇਵ ਗਨ੍ਤ੍ਵਾ ਪੂਜਂ ਅਕਾਸਿ. ਸਾ ਅਪਰਭਾਗੇ ਅਞ੍ਞਤਰੇਨ ਰੋਗੇਨ ਫੁਟ੍ਠਾ ਕਾਲਂ ਕਤ੍ਵਾ ਸਕ੍ਕਸ੍ਸ ਦੇਵਰਞ੍ਞੋ ਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿ. ਅਥੇਕਦਿਵਸਂ ਸਾ ਸਕ੍ਕੇਨ ਦੇਵਾਨਮਿਨ੍ਦੇਨ ਸਹ ਚਿਤ੍ਤਲਤਾਵਨਂ ਪਾਵਿਸਿ. ਤਤ੍ਥ ਚ ਅਞ੍ਞਾਸਂ ਦੇਵਤਾਨਂ ਪਭਾ ਪੁਪ੍ਫਾਦੀਨਂ ਪਭਾਹਿ ਪਟਿਹਤਾ ਹੁਤ੍ਵਾ ਵਿਚਿਤ੍ਤਵਣ੍ਣਾ ਹੋਤਿ, ਸੁਨਨ੍ਦਾਯ ਪਨ ਪਭਾ ਤਾਹਿ ਅਨਭਿਭੂਤਾ ਸਭਾਵੇਨੇਵ ਅਟ੍ਠਾਸਿ. ਤਂ ਦਿਸ੍ਵਾ ਸਕ੍ਕੋ ਦੇਵਰਾਜਾ ਤਾਯ ਕਤਸੁਚਰਿਤਂ ਞਾਤੁਕਾਮੋ ਇਮਾਹਿ ਗਾਥਾਹਿ ਪੁਚ੍ਛਿ –

੬੬੬. ‘‘ਕਾ ਨਾਮ ਤ੍ਵਂ ਵਿਸਾਲਕ੍ਖਿ, ਰਮ੍ਮੇ ਚਿਤ੍ਤਲਤਾਵਨੇ;

ਸਮਨ੍ਤਾ ਅਨੁਪਰਿਯਾਸਿ, ਨਾਰੀਗਣਪੁਰਕ੍ਖਤਾ.

੬੬੭. ‘‘ਯਦਾ ਦੇਵਾ ਤਾਵਤਿਂਸਾ, ਪਵਿਸਨ੍ਤਿ ਇਮਂ ਵਨਂ;

ਸਯੋਗ੍ਗਾ ਸਰਥਾ ਸਬ੍ਬੇ, ਚਿਤ੍ਰਾ ਹੋਨ੍ਤਿ ਇਧਾਗਤਾ.

੬੬੮. ‘‘ਤੁਯ੍ਹਞ੍ਚ ਇਧ ਪਤ੍ਤਾਯ, ਉਯ੍ਯਾਨੇ ਵਿਚਰਨ੍ਤਿਯਾ;

ਕਾਯੇ ਨ ਦਿਸ੍ਸਤੀ ਚਿਤ੍ਤਂ, ਕੇਨ ਰੂਪਂ ਤਵੇਦਿਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੬੬੬. ਤਤ੍ਥ ਕਾ ਨਾਮ ਤ੍ਵਨ੍ਤਿ ਪੁਰਿਮਤ੍ਤਭਾਵੇ ਕਾ ਨਾਮ ਕੀਦਿਸੀ ਨਾਮ ਤ੍ਵਂ, ਯਤ੍ਥ ਕਤੇਨ ਸੁਚਰਿਤੇਨ ਅਯਂ ਤੇ ਈਦਿਸੀ ਆਨੁਭਾਵਸਮ੍ਪਤ੍ਤਿ ਅਹੋਸੀਤਿ ਅਧਿਪ੍ਪਾਯੋ. ਵਿਸਾਲਕ੍ਖੀਤਿ ਵਿਪੁਲਲੋਚਨੇ.

੬੬੭. ਯਦਾਤਿ ਯਸ੍ਮਿਂ ਕਾਲੇ. ਇਮਂ ਵਨਨ੍ਤਿ ਇਮਂ ਚਿਤ੍ਤਲਤਾਨਾਮਕਂ ਉਪਵਨਂ. ਚਿਤ੍ਰਾ ਹੋਨ੍ਤੀਤਿ ਇਮਸ੍ਮਿਂ ਚਿਤ੍ਤਲਤਾਵਨੇ ਵਿਚਿਤ੍ਤਪਭਾਸਂਸਗ੍ਗੇਨ ਅਤ੍ਤਨੋ ਸਰੀਰਵਤ੍ਥਾਲਙ੍ਕਾਰਾਦੀਨਂ ਪਕਤਿਓਭਾਸਤੋਪਿ ਵਿਸਿਟ੍ਠਭਾਵਪ੍ਪਤ੍ਤਿਯਾ ਵਿਚਿਤ੍ਰਾਕਾਰਾ ਹੋਨ੍ਤਿ. ਇਧਾਗਤਾਤਿ ਇਧ ਆਗਤਾ ਸਮ੍ਪਤ੍ਤਾ, ਇਧ ਵਾ ਆਗਮਨਹੇਤੁ.

੬੬੮. ਇਧ ਪਤ੍ਤਾਯਾਤਿ ਇਮਂ ਠਾਨਂ ਸਮ੍ਪਤ੍ਤਾਯ ਉਪਗਤਾਯ. ਕੇਨ ਰੂਪਂ ਤਵੇਦਿਸਨ੍ਤਿ ਕੇਨ ਕਾਰਣੇਨ ਤਵ ਰੂਪਂ ਸਰੀਰਂ ਏਦਿਸਂ ਏਵਰੂਪਂ, ਚਿਤ੍ਤਲਤਾਵਨਸ੍ਸ ਪਭਂ ਅਭਿਭਵਨ੍ਤਂ ਤਿਟ੍ਠਤੀਤਿ ਅਧਿਪ੍ਪਾਯੋ.

ਏਵਂ ਸਕ੍ਕੇਨ ਪੁਟ੍ਠਾ ਸਾ ਦੇਵਤਾ ਇਮਾਹਿ ਗਾਥਾਹਿ ਬ੍ਯਾਕਾਸਿ –

੬੬੯. ‘‘ਯੇਨ ਕਮ੍ਮੇਨ ਦੇਵਿਨ੍ਦ, ਰੂਪਂ ਮਯ੍ਹਂ ਗਤੀ ਚ ਮੇ;

ਇਦ੍ਧਿ ਚ ਆਨੁਭਾਵੋ ਚ, ਤਂ ਸੁਣੋਹਿ ਪੁਰਿਨ੍ਦਦ.

੬੭੦. ‘‘ਅਹਂ ਰਾਜਗਹੇ ਰਮ੍ਮੇ, ਸੁਨਨ੍ਦਾ ਨਾਮੁਪਾਸਿਕਾ;

ਸਦ੍ਧਾ ਸੀਲੇਨ ਸਮ੍ਪਨ੍ਨਾ, ਸਂਵਿਭਾਗਰਤਾ ਸਦਾ.

੬੭੧. ‘‘ਅਚ੍ਛਾਦਨਞ੍ਚ ਭਤ੍ਤਞ੍ਚ, ਸੇਨਾਸਨਂ ਪਦੀਪਿਯਂ;

ਅਦਾਸਿਂ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ.

੬੭੨. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

੬੭੩. ‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਸਞ੍ਞਮਾ ਸਂਵਿਭਾਗਾ ਚ, ਵਿਮਾਨਂ ਆਵਸਾਮਹਂ.

੬੭੪. ‘‘ਪਾਣਾਤਿਪਾਤਾ ਵਿਰਤਾ, ਮੁਸਾਵਾਦਾ ਚ ਸਞ੍ਞਤਾ;

ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਕਾ.

੬੭੫. ‘‘ਪਞ੍ਚਸਿਕ੍ਖਾਪਦੇ ਰਤਾ, ਅਰਿਯਸਚ੍ਚਾਨ ਕੋਵਿਦਾ;

ਉਪਾਸਿਕਾ ਚਕ੍ਖੁਮਤੋ, ਗੋਤਮਸ੍ਸ ਯਸਸ੍ਸਿਨੋ.

੬੭੬. ‘‘ਤਸ੍ਸਾ ਮੇ ਞਾਤਿਕੁਲਾ ਦਾਸੀ, ਸਦਾ ਮਾਲਾਭਿਹਾਰਤਿ;

ਤਾਹਂ ਭਗਵਤੋ ਥੂਪੇ, ਸਬ੍ਬਮੇਵਾਭਿਰੋਪਯਿਂ.

੬੭੭. ‘‘ਉਪੋਸਥੇ ਚਹਂ ਗਨ੍ਤ੍ਵਾ, ਮਾਲਾਗਨ੍ਧਵਿਲੇਪਨਂ;

ਥੂਪਸ੍ਮਿਂ ਅਭਿਰੋਪੇਸਿਂ, ਪਸਨ੍ਨਾ ਸੇਹਿ ਪਾਣਿਭਿ.

੬੭੮. ‘‘ਤੇਨ ਕਮ੍ਮੇਨ ਦੇਵਿਨ੍ਦ, ਰੂਪਂ ਮਯ੍ਹਂ ਗਤੀ ਚ ਮੇ;

ਇਦ੍ਧਿ ਚ ਆਨੁਭਾਵੋ ਚ, ਯਂ ਮਾਲਂ ਅਭਿਰੋਪਯਿਂ.

੬੭੯. ‘‘ਯਞ੍ਚ ਸੀਲਵਤੀ ਆਸਿਂ, ਨ ਤਂ ਤਾਵ ਵਿਪਚ੍ਚਤਿ;

ਆਸਾ ਚ ਪਨ ਮੇ ਦੇਵਿਨ੍ਦ, ਸਕਦਾਗਾਮਿਨੀ ਸਿਯ’’ਨ੍ਤਿ.

੬੬੯. ਤਤ੍ਥ ਗਤੀਤਿ ਅਯਂ ਦੇਵਗਤਿ, ਨਿਬ੍ਬਤ੍ਤਿ ਵਾ. ਇਦ੍ਧੀਤਿ ਅਯਂ ਦੇਵਿਦ੍ਧਿ, ਅਧਿਪ੍ਪਾਯਸਮਿਜ੍ਝਨਂ ਵਾ. ਆਨੁਭਾਵੋਤਿ ਪਭਾਵੋ. ਪੁਰਿਨ੍ਦਦਾਤਿ ਸਕ੍ਕਂ ਆਲਪਤਿ. ਸੋ ਹਿ ਪੁਰੇ ਦਾਨਂ ਅਦਾਸੀਤਿ ‘‘ਪੁਰਿਨ੍ਦਦੋ’’ਤਿ ਵੁਚ੍ਚਤਿ.

੬੭੬. ਞਾਤਿਕੁਲਾਤਿ ਪਿਤੁ ਗੇਹਂ ਸਨ੍ਧਾਯ ਵਦਤਿ. ਸਦਾ ਮਾਲਾਭਿਹਾਰਤੀਤਿ ਸਦਾ ਸਬ੍ਬਕਾਲਂ ਦਿਵਸੇ ਦਿਵਸੇ ਞਾਤਿਕੁਲਤੋ ਦਾਸਿਯਾ ਪੁਪ੍ਫਂ ਮਯ੍ਹਂ ਅਭਿਹਰੀਯਤਿ. ਸਬ੍ਬਮੇਵਾਭਿਰੋਪਯਿਨ੍ਤਿ ਮਯ੍ਹਂ ਪਿਲ਼ਨ੍ਧਨਤ੍ਥਾਯ ਪਿਤੁਗੇਹਤੋ ਆਹਟਂ ਮਾਲਂ ਅਞ੍ਞਞ੍ਚ ਗਨ੍ਧਾਦਿਂ ਸਬ੍ਬਮੇਵ ਅਤ੍ਤਨਾ ਅਪਰਿਭੁਞ੍ਜਿਤ੍ਵਾ ਭਗਵਤੋ ਥੂਪੇ ਪੂਜਨਵਸੇਨ ਅਭਿਰੋਪਯਿਂ ਪੂਜਂ ਕਾਰੇਸਿਂ.

੬੭੭-੮. ਉਪੋਸਥੇ ਚਹਂ ਗਨ੍ਤ੍ਵਾਤਿ ਉਪੋਸਥਦਿਵਸੇ ਅਹਮੇਵ ਥੂਪਟ੍ਠਾਨਂ ਗਨ੍ਤ੍ਵਾ. ਯਂ ਮਾਲਂ ਅਭਿਰੋਪਯਿਨ੍ਤਿ ਯਂ ਤਦਾ ਭਗਵਤੋ ਥੂਪੇ ਮਾਲਾਗਨ੍ਧਾਭਿਰੋਪਨਂ ਕਤਂ, ਤੇਨ ਕਮ੍ਮੇਨਾਤਿ ਯੋਜਨਾ.

੬੭੯. ਨ ਤਂ ਤਾਵ ਵਿਪਚ੍ਚਤੀਤਿ ਯਂ ਸੀਲਵਤੀ ਆਸਿਂ, ਤਂ ਸੀਲਰਕ੍ਖਣਂ ਤਂ ਰਕ੍ਖਿਤਂ ਸੀਲਂ ਪੂਜਾਮਯਪੁਞ੍ਞਸ੍ਸ ਬਲਵਭਾਵੇਨ ਅਲਦ੍ਧੋਕਾਸਂ ਨ ਤਾਵ ਵਿਪਚ੍ਚਤਿ, ਨ ਵਿਪਚ੍ਚਿਤੁਂ ਆਰਦ੍ਧਂ, ਅਪਰਸ੍ਮਿਂਯੇਵ ਅਤ੍ਤਭਾਵੇ ਤਸ੍ਸ ਵਿਪਾਕੋਤਿ ਅਤ੍ਥੋ. ਆਸਾ ਚ ਪਨ ਮੇ ਦੇਵਿਨ੍ਦ, ਸਕਦਾਗਾਮਿਨੀ ਸਿਯਨ੍ਤਿ ‘‘ਕਥਂ ਨੁ ਖੋ ਅਹਂ ਸਕਦਾਗਾਮਿਨੀ ਭਵੇਯ੍ਯ’’ਨ੍ਤਿ ਪਤ੍ਥਨਾ ਚ ਮੇ ਦੇਵਿਨ੍ਦ, ਅਰਿਯਧਮ੍ਮਵਿਸਯਾਵ, ਨ ਭਵਵਿਸੇਸਵਿਸਯਾ. ਸਾ ਪਨ ਸਪ੍ਪਿਮਣ੍ਡਂ ਇਚ੍ਛਤੋ ਦਧਿਤੋ ਪਚਿਤਂ ਵਿਯ ਅਨਿਪ੍ਫਾਦਿਨੀਤਿ ਦਸ੍ਸੇਤਿ. ਸੇਸਂ ਵੁਤ੍ਤਨਯਮੇਵ.

ਇਮਂ ਪਨ ਅਤ੍ਥਂ ਸਕ੍ਕੋ ਦੇਵਾਨਮਿਨ੍ਦੋ ਅਤ੍ਤਨਾ ਚ ਤਾਯ ਦੇਵਧੀਤਾਯ ਚ ਵੁਤ੍ਤਨਿਯਾਮੇਨੇਵ ਆਯਸ੍ਮਤੋ ਵਙ੍ਗੀਸਤ੍ਥੇਰਸ੍ਸ ਆਰੋਚੇਸਿ. ਆਯਸ੍ਮਾ ਵਙ੍ਗੀਸੋ ਸਙ੍ਗੀਤਿਕਾਲੇ ਧਮ੍ਮਸਙ੍ਗਾਹਕਾਨਂ ਮਹਾਥੇਰਾਨਂ ਆਰੋਚੇਸਿ, ਤੇ ਚ ਤਂ ਤਥੇਵ ਸਙ੍ਗੀਤਿਂ ਆਰੋਪਯਿਂਸੂਤਿ.

ਵਿਸਾਲਕ੍ਖਿਵਿਮਾਨਵਣ੍ਣਨਾ ਨਿਟ੍ਠਿਤਾ.