੩. ਪਾਰਿਚ੍ਛਤ੍ਤਕਵਗ੍ਗੋ

੧. ਉਲ਼ਾਰਵਿਮਾਨਵਣ੍ਣਨਾ

ਪਾਰਿਚ੍ਛਤ੍ਤਕਵਗ੍ਗੇ ਉਲ਼ਾਰੋ ਤੇ ਯਸੋ ਵਣ੍ਣੋਤਿ ਉਲ਼ਾਰਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਸਮਯੇਨ ਰਾਜਗਹੇ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਉਪਟ੍ਠਾਕਕੁਲੇ ਏਕਾ ਦਾਰਿਕਾ ਦਾਨਜ੍ਝਾਸਯਾ ਦਾਨਸਂਵਿਭਾਗਰਤਾ ਅਹੋਸਿ. ਸਾ ਯਂ ਤਸ੍ਮਿਂ ਗੇਹੇ ਪੁਰੇਭਤ੍ਤਂ ਖਾਦਨੀਯਭੋਜਨੀਯਂ ਉਪ੍ਪਜ੍ਜਤਿ, ਤਤ੍ਥ ਅਤ੍ਤਨਾ ਲਦ੍ਧਪਟਿਵੀਸਤੋ ਉਪਡ੍ਢਂ ਦੇਤਿ, ਉਪਡ੍ਢਂ ਅਤ੍ਤਨਾ ਪਰਿਭੁਞ੍ਜਤਿ, ਅਦਤ੍ਵਾ ਪਨ ਨ ਭੁਞ੍ਜਤਿ, ਦਕ੍ਖਿਣੇਯ੍ਯੇ ਅਪਸ੍ਸਨ੍ਤੀਪਿ ਠਪੇਤ੍ਵਾ ਦਿਟ੍ਠਕਾਲੇ ਦੇਤਿ, ਯਾਚਕਾਨਮ੍ਪਿ ਦੇਤਿਯੇਵ. ਅਥਸ੍ਸਾ ਮਾਤਾ ‘‘ਮਮ ਧੀਤਾ ਦਾਨਜ੍ਝਾਸਯਾ ਦਾਨਸਂਵਿਭਾਗਰਤਾ’’ਤਿ ਹਟ੍ਠਤੁਟ੍ਠਾ ਤਸ੍ਸਾ ਦਿਗੁਣਂ ਭਾਗਂ ਦੇਤਿ. ਦੇਨ੍ਤੀ ਚ ਏਕਸ੍ਮਿਂ ਭਾਗੇ ਤਾਯ ਸਂਵਿਭਾਗੇ ਕਤੇ ਪੁਨ ਅਪਰਂ ਦੇਤਿ, ਸਾ ਤਤੋਪਿ ਸਂਵਿਭਾਗਂ ਕਰੋਤਿਯੇਵ.

ਏਵਂ ਗਚ੍ਛਨ੍ਤੇ ਕਾਲੇ ਤਂ ਵਯਪ੍ਪਤ੍ਤਂ ਮਾਤਾਪਿਤਰੋ ਤਸ੍ਮਿਂਯੇਵ ਨਗਰੇ ਅਞ੍ਞਤਰਸ੍ਮਿਂ ਕੁਲੇ ਕੁਮਾਰਸ੍ਸ ਅਦਂਸੁ. ਤਂ ਪਨ ਕੁਲਂ ਮਿਚ੍ਛਾਦਿਟ੍ਠਿਕਂ ਹੋਤਿ ਅਸ੍ਸਦ੍ਧਂ ਅਪ੍ਪਸਨ੍ਨਂ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਰਾਜਗਹੇ ਸਪਦਾਨਂ ਪਿਣ੍ਡਾਯ ਚਰਮਾਨੋ ਤਸ੍ਸਾ ਦਾਰਿਕਾਯ ਸਸੁਰਸ੍ਸ ਗੇਹਦ੍ਵਾਰੇ ਅਟ੍ਠਾਸਿ. ਤਂ ਦਿਸ੍ਵਾ ਸਾ ਦਾਰਿਕਾ ਪਸਨ੍ਨਚਿਤ੍ਤਾ ‘‘ਪਵਿਸਥ ਭਨ੍ਤੇ’’ਤਿ ਪਵੇਸੇਤ੍ਵਾ ਵਨ੍ਦਿਤ੍ਵਾ ਸਸ੍ਸੁਯਾ ਠਪਿਤਂ ਪੂਵਂ ਤਂ ਅਪਸ੍ਸਨ੍ਤੀ ‘‘ਤਸ੍ਸਾ ਕਥੇਤ੍ਵਾ ਅਨੁਮੋਦਾਪੇਸ੍ਸਾਮੀ’’ਤਿ ਵਿਸ੍ਸਾਸੇਨ ਗਹੇਤ੍ਵਾ ਥੇਰਸ੍ਸ ਅਦਾਸਿ, ਥੇਰੋ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਦਾਰਿਕਾ ‘‘ਤੁਮ੍ਹੇਹਿ ਠਪਿਤਂ ਪੂਵਂ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਅਦਾਸਿ’’ਨ੍ਤਿ ਸਸ੍ਸੁਯਾ ਕਥੇਸਿ. ਸਾ ਤਂ ਸੁਤ੍ਵਾ ‘‘ਕਿਨ੍ਨਾਮਿਦਂ ਪਾਗਬ੍ਭਿਯਂ, ਅਯਂ ਮਮ ਸਨ੍ਤਕਂ ਅਨਾਪੁਚ੍ਛਿਤ੍ਵਾਵ ਸਮਣਸ੍ਸ ਅਦਾਸੀ’’ਤਿ ਤਂ ਕਟਤਟਾਯਮਾਨਾ ਕੋਧਾਭਿਭੂਤਾ ਯੁਤ੍ਤਾਯੁਤ੍ਤਂ ਅਚਿਨ੍ਤੇਨ੍ਤੀ ਪੁਰਤੋ ਠਿਤਂ ਮੁਸਲਖਣ੍ਡਂ ਗਹੇਤ੍ਵਾ ਅਂਸਕੂਟੇ ਪਹਰਿ. ਸਾ ਸੁਖੁਮਾਲਤਾਯ ਪਰਿਕ੍ਖੀਣਾਯੁਕਤਾਯ ਚ ਤੇਨੇਵ ਪਹਾਰੇਨ ਬਲਵਦੁਕ੍ਖਾਭਿਭੂਤਾ ਹੁਤ੍ਵਾ ਕਤਿਪਾਹੇਨੇਵ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ. ਤਸ੍ਸਾ ਸਤਿਪਿ ਅਞ੍ਞਸ੍ਮਿਂ ਸੁਚਰਿਤਕਮ੍ਮੇ ਥੇਰਸ੍ਸ ਕਤਦਾਨਮੇਵ ਸਾਤਿਸਯਂ ਹੁਤ੍ਵਾ ਉਪਟ੍ਠਾਸਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨੇਵ ਗਨ੍ਤ੍ਵਾ –

੨੮੬. ‘‘ਉਲ਼ਾਰੋ ਤੇ ਯਸੋ ਵਣ੍ਣੋ, ਸਬ੍ਬਾ ਓਭਾਸਤੇ ਦਿਸਾ;

ਨਾਰਿਯੋ ਨਚ੍ਚਨ੍ਤਿ ਗਾਯਨ੍ਤਿ, ਦੇਵਪੁਤ੍ਤਾ ਅਲਙ੍ਕਤਾ.

੨੮੭. ‘‘ਮੋਦੇਨ੍ਤਿ ਪਰਿਵਾਰੇਨ੍ਤਿ, ਤਵ ਪੂਜਾਯ ਦੇਵਤੇ;

ਸੋਵਣ੍ਣਾਨਿ ਵਿਮਾਨਾਨਿ, ਤਵਿਮਾਨਿ ਸੁਦਸ੍ਸਨੇ.

੨੮੮. ‘‘ਤੁਵਂਸਿ ਇਸ੍ਸਰਾ ਤੇਸਂ, ਸਬ੍ਬਕਾਮਸਮਿਦ੍ਧਿਨੀ;

ਅਭਿਜਾਤਾ ਮਹਨ੍ਤਾਸਿ, ਦੇਵਕਾਯੇ ਪਮੋਦਸਿ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਤੀਹਿ ਗਾਥਾਹਿ ਪੁਚ੍ਛਿ.

੨੮੬. ਤਤ੍ਥ ਯਸੋਤਿ ਪਰਿਵਾਰੋ. ਵਣ੍ਣੋਤਿ ਵਣ੍ਣਨਿਭਾ ਸਰੀਰੋਭਾਸੋ. ‘‘ਉਲ਼ਾਰੋ’’ਤਿ ਪਨ ਵਿਸੇਸੇਤ੍ਵਾ ਵੁਤ੍ਤਤ੍ਤਾ ਤਸ੍ਸਾ ਦੇਵਤਾਯ ਪਰਿਵਾਰਸਮ੍ਪਤ੍ਤਿ ਚ ਵਣ੍ਣਸਮ੍ਪਤ੍ਤਿ ਚ ਵੁਤ੍ਤਾ ਹੋਤਿ. ਤਾਸੁ ‘‘ਉਲ਼ਾਰੋ ਤੇ ਵਣ੍ਣੋ’’ਤਿ ਸਙ੍ਖੇਪਤੋ ਵੁਤ੍ਤਂ ਵਣ੍ਣਸਮ੍ਪਤ੍ਤਿਂ ਵਿਸਯਵਸੇਨ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਸਬ੍ਬਾ ਓਭਾਸਤੇ ਦਿਸਾ’’ਤਿ ਵਤ੍ਵਾ ‘‘ਉਲ਼ਾਰੋ ਤੇ ਯਸੋ’’ਤਿ ਵੁਤ੍ਤਂ ਪਰਿਵਾਰਸਮ੍ਪਤ੍ਤਿਂ ਵਤ੍ਥੁਵਸੇਨ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਨਾਰਿਯੋ ਨਚ੍ਚਨ੍ਤੀ’’ਤਿਆਦਿ ਵੁਤ੍ਤਂ. ਤਤ੍ਥ ਸਬ੍ਬਾ ਓਭਾਸਤੇ ਦਿਸਾਤਿ ਸਬ੍ਬਾਸੁ ਦਿਸਾਸੁ ਵਿਜ੍ਜੋਤਤੇ, ਸਬ੍ਬਾ ਵਾ ਦਿਸਾ ਓਭਾਸਯਤੇ, ਵਿਜ੍ਜੋਤਯਤੀਤਿ ਅਤ੍ਥੋ. ‘‘ਓਭਾਸਤੇ’’ਤਿ ਪਦਸ੍ਸ ‘‘ਓਭਾਸਨ੍ਤੇ’’ਤਿ ਕੇਚਿ ਵਚਨਵਿਪਲ੍ਲਾਸੇਨ ਅਤ੍ਥਂ ਵਦਨ੍ਤਿ, ਤੇਹਿ ‘‘ਵਣ੍ਣੇਨਾ’’ਤਿ ਵਿਭਤ੍ਤਿ ਵਿਪਰਿਣਾਮੇਤਬ੍ਬਾ. ਵਣ੍ਣੇਨਾਤਿ ਚ ਹੇਤੁਮ੍ਹਿ ਕਰਣਵਚਨਂ, ਵਣ੍ਣੇਨ ਹੇਤੁਭੂਤੇਨਾਤਿ ਅਤ੍ਥੋ. ‘‘ਸਬ੍ਬਾ ਦਿਸਾ’’ਤਿ ਚ ਜਾਤਿਵਸੇਨ ਦਿਸਾਸਾਮਞ੍ਞੇ ਅਪੇਕ੍ਖਿਤੇ ਵਚਨਵਿਪਲ੍ਲਾਸੇਨਪਿ ਪਯੋਜਨਂ ਨਤ੍ਥਿ. ਨਾਰਿਯੋਤਿ ਏਤ੍ਥਾਪਿ ‘‘ਅਲਙ੍ਕਤਾ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਦੇਵਪੁਤ੍ਤਾਤਿ ਏਤ੍ਥ ਚ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ. ਤੇਨ ਨਾਰਿਯੋ ਦੇਵਪੁਤ੍ਤਾ ਚਾਤਿ ਸਮੁਚ੍ਚਯੋ ਵੇਦਿਤਬ੍ਬੋ.

੨੮੭. ਮੋਦੇਨ੍ਤੀਤਿ ਪਮੋਦਯਨ੍ਤਿ. ਪੂਜਾਯਾਤਿ ਪੂਜਨਤ੍ਥਂ ਪੂਜਾਨਿਮਿਤ੍ਤਂ ਵਾ, ਨਚ੍ਚਨ੍ਤਿ ਗਾਯਨ੍ਤੀਤਿ ਯੋਜਨਾ. ਤਵਿਮਾਨੀਤਿ ਤਵ ਇਮਾਨਿ.

੨੮੮. ਸਬ੍ਬਕਾਮਸਮਿਦ੍ਧਿਨੀਤਿ ਸਬ੍ਬੇਹਿ ਪਞ੍ਚਹਿ ਕਾਮਗੁਣੇਹਿ, ਸਬ੍ਬੇਹਿ ਵਾ ਤਯਾ ਕਾਮਿਤੇਹਿ ਇਚ੍ਛਿਤੇਹਿ ਵਤ੍ਥੂਹਿ ਸਮਿਦ੍ਧਾ. ਅਭਿਜਾਤਾਤਿ ਸੁਜਾਤਾ. ਮਹਨ੍ਤਾਸੀਤਿ ਮਹਤੀ ਮਹਾਨੁਭਾਵਾ ਅਸਿ. ਦੇਵਕਾਯੇ ਪਮੋਦਸੀਤਿ ਇਮਸ੍ਮਿਂ ਦੇਵਨਿਕਾਯੇ ਦਿਬ੍ਬਸਮ੍ਪਤ੍ਤਿਹੇਤੁਕੇਨ ਪਰਮੇਨ ਪਮੋਦਨੇਨ ਪਮੋਦਸਿ.

ਏਵਂ ਥੇਰੇਨ ਪੁਚ੍ਛਿਤਾ ਸਾ ਦੇਵਤਾ ਤਮਤ੍ਥਂ ਵਿਸ੍ਸਜ੍ਜੇਸਿ –

੨੮੯. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ;

ਦੁਸ੍ਸੀਲਕੁਲੇ ਸੁਣਿਸਾ ਅਹੋਸਿਂ, ਅਸ੍ਸਦ੍ਧੇਸੁ ਕਦਰਿਯੇਸੁ ਅਹਂ.

੨੯੦. ‘‘ਸਦ੍ਧਾ ਸੀਲੇਨ ਸਮ੍ਪਨ੍ਨਾ, ਸਂਵਿਭਾਗਰਤਾ ਸਦਾ;

ਪਿਣ੍ਡਾਯ ਚਰਮਾਨਸ੍ਸ, ਅਪੂਵਂ ਤੇ ਅਦਾਸਹਂ.

੨੯੧. ‘‘ਤਦਾਹਂ ਸਸ੍ਸੁਯਾਚਿਕ੍ਖਿਂ, ‘ਸਮਣੋ ਆਗਤੋ ਇਧ;

ਤਸ੍ਸ ਅਦਾਸਹਂ ਪੂਵਂ, ਪਸਨ੍ਨਾ ਸੇਹਿ ਪਾਣਿਭਿ’.

੨੯੨. ‘‘ਇਤਿਸ੍ਸਾ ਸਸ੍ਸੁ ਪਰਿਭਾਸਿ, ਅਵਿਨੀਤਾਸਿ ਤ੍ਵਂ ਵਧੁ;

ਨ ਮਂ ਸਮ੍ਪੁਚ੍ਛਿਤੁਂ ਇਚ੍ਛਿ, ‘ਸਮਣਸ੍ਸ ਦਦਾਮਹਂ’.

੨੯੩. ‘‘ਤਤੋ ਮੇ ਸਸ੍ਸੁ ਕੁਪਿਤਾ, ਪਹਾਸਿ ਮੁਸਲੇਨ ਮਂ;

ਕੂਟਙ੍ਗਚ੍ਛਿ ਅਵਧਿ ਮਂ, ਨਾਸਕ੍ਖਿਂ ਜੀਵਿਤੁਂ ਚਿਰਂ.

੨੯੪. ‘‘ਅਹਂ ਕਾਯਸ੍ਸ ਭੇਦਾ, ਵਿਪ੍ਪਮੁਤ੍ਤਾ ਤਤੋ ਚੁਤਾ;

ਦੇਵਾਨਂ ਤਾਵਤਿਂਸਾਨਂ, ਉਪਪਨ੍ਨਾ ਸਹਬ੍ਯਤਂ.

੨੯੫. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੨੮੯. ਤਤ੍ਥ ਅਸ੍ਸਦ੍ਧੇਸੂਤਿ ਰਤਨਤ੍ਤਯਸਦ੍ਧਾਯ ਕਮ੍ਮਫਲਸਦ੍ਧਾਯ ਚ ਅਭਾਵੇਨ ਅਸ੍ਸਦ੍ਧੇਸੁ, ਥਦ੍ਧਮਚ੍ਛਰਿਯਤਾਯ ਕਦਰਿਯੇਸੁ ਸਸ੍ਸੁਆਦੀਸੁ ਅਹਂ ਸਦ੍ਧਾ ਸੀਲੇਨ ਸਮ੍ਪਨ੍ਨਾ ਅਹੋਸਿਨ੍ਤਿ ਯੋਜਨਾ.

੨੯੦-੧. ਅਪੂਵਨ੍ਤਿ ਕਪਲ੍ਲਪੂਵਂ. ਤੇਤਿ ਨਿਪਾਤਮਤ੍ਤਂ. ਸਸ੍ਸੁਯਾ ਆਚਿਕ੍ਖਿਂ ਗਹਿਤਭਾਵਞਾਪਨਤ੍ਥਞ੍ਚ ਅਨੁਮੋਦਨਤ੍ਥਞ੍ਚਾਤਿ ਅਧਿਪ੍ਪਾਯੋ.

੨੯੨. ਇਤਿਸ੍ਸਾਤਿ ਏਤ੍ਥ ਅਸ੍ਸਾਤਿ ਨਿਪਾਤਮਤ੍ਤਂ. ਸਮਣਸ੍ਸ ਦਦਾਮਹਨ੍ਤਿ ਅਹਂ ਸਮਣਸ੍ਸ ਅਪੂਵਂ ਦਦਾਮੀਤਿ. ਯਸ੍ਮਾ ਨ ਮਂ ਸਮ੍ਪੁਚ੍ਛਿਤੁਂ ਇਚ੍ਛਿ, ਤਸ੍ਮਾ ਤ੍ਵਂ ਵਧੁ ਅਵਿਨੀਤਾਸੀਤਿ ਸਸ੍ਸੁ ਪਰਿਭਾਸੀਤਿ ਯੋਜਨਾ.

੨੯੩. ਪਹਾਸੀਤਿ ਪਹਰਿ. ਕੂਟਙ੍ਗਚ੍ਛਿ ਅਵਧਿ ਮਨ੍ਤਿ ਏਤ੍ਥ ਕੂਟਨ੍ਤਿ ਅਂਸਕੂਟਂ ਵੁਤ੍ਤਂ ਪੁਰਿਮਪਦਲੋਪੇਨ, ਕੂਟਮੇਵ ਅਙ੍ਗਨ੍ਤਿ ਕੂਟਙ੍ਗਂ, ਤਂ ਛਿਨ੍ਦਤੀਤਿ ਕੂਟਙ੍ਗਚ੍ਛਿ. ਏਵਂ ਕੋਧਾਭਿਭੂਤਾ ਹੁਤ੍ਵਾ ਮਂ ਅਵਧਿ, ਮਮ ਅਂਸਕੂਟਂ ਛਿਨ੍ਦਿ, ਤੇਨੇਵ ਉਪਕ੍ਕਮੇਨ ਮਤਤ੍ਤਾ ਮਂ ਮਾਰੇਸੀਤਿ ਅਤ੍ਥੋ. ਤੇਨਾਹ ‘‘ਨਾਸਕ੍ਖਿਂ ਜੀਵਿਤੁਂ ਚਿਰ’’ਨ੍ਤਿ.

੨੯੪. ਵਿਪ੍ਪਮੁਤ੍ਤਾਤਿ ਤਤੋ ਦੁਕ੍ਖਤੋ ਸੁਟ੍ਠੁ ਮੁਤ੍ਤਾ. ਸੇਸਂ ਵੁਤ੍ਤਨਯਮੇਵ.

ਉਲ਼ਾਰਵਿਮਾਨਵਣ੍ਣਨਾ ਨਿਟ੍ਠਿਤਾ.

੨. ਉਚ੍ਛੁਦਾਯਿਕਾਵਿਮਾਨਵਣ੍ਣਨਾ

ਓਭਾਸਯਿਤ੍ਵਾ ਪਥਵਿਂ ਸਦੇਵਕਨ੍ਤਿ ਉਚ੍ਛੁਦਾਯਿਕਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤੀਤਿਆਦਿ ਸਬ੍ਬਂ ਅਨਨ੍ਤਰਵਿਮਾਨੇ ਵੁਤ੍ਤਸਦਿਸਂ. ਅਯਂ ਪਨ ਵਿਸੇਸੋ – ਇਧ ਉਚ੍ਛੁ ਦਿਨ੍ਨਾ, ਸਸ੍ਸੁਯਾ ਚ ਪੀਠਕੇਨ ਪਹਟਾ, ਤਙ੍ਖਣਞ੍ਞੇਵ ਮਤਾ ਤਾਵਤਿਂਸੇਸੁ ਉਪ੍ਪਨ੍ਨਾ, ਤਸ੍ਸਂਯੇਵ ਰਤ੍ਤਿਯਂ ਥੇਰਸ੍ਸ ਉਪਟ੍ਠਾਨਂ ਆਗਤਾ, ਕੇਵਲਕਪ੍ਪਂ ਗਿਜ੍ਝਕੂਟਂ ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਓਭਾਸੇਨ੍ਤੀ ਥੇਰਂ ਵਨ੍ਦਿਤ੍ਵਾ ਪਞ੍ਜਲਿਕਾ ਨਮਸ੍ਸਮਾਨਾ ਏਕਮਨ੍ਤਂ ਅਟ੍ਠਾਸਿ. ਅਥ ਨਂ ਥੇਰੋ –

੨੯੬. ‘‘ਓਭਾਸਯਿਤ੍ਵਾ ਪਥਵਿਂ ਸਦੇਵਕਂ, ਅਤਿਰੋਚਸਿ ਚਨ੍ਦਿਮਸੂਰਿਯਾ ਵਿਯ;

ਸਿਰਿਯਾ ਚ ਵਣ੍ਣੇਨ ਯਸੇਨ ਤੇਜਸਾ, ਬ੍ਰਹ੍ਮਾਵ ਦੇਵੇ ਤਿਦਸੇ ਸਹਿਨ੍ਦਕੇ.

੨੯੭. ‘‘ਪੁਚ੍ਛਾਮਿ ਤਂ ਉਪ੍ਪਲਮਾਲਧਾਰਿਨੀ, ਆਵੇਲ਼ਿਨੀ ਕਞ੍ਚਨਸਨ੍ਨਿਭਤ੍ਤਚੇ;

ਅਲਙ੍ਕਤੇ ਉਤ੍ਤਮਵਤ੍ਥਧਾਰਿਨੀ, ਕਾ ਤ੍ਵਂ ਸੁਭੇ ਦੇਵਤੇ ਵਨ੍ਦਸੇ ਮਮਂ.

੨੯੮. ‘‘ਕਿਂ ਤ੍ਵਂ ਪੁਰੇ ਕਮ੍ਮਮਕਾਸਿ ਅਤ੍ਤਨਾ, ਮਨੁਸ੍ਸਭੂਤਾ ਪੁਰਿਮਾਯ ਜਾਤਿਯਾ;

ਦਾਨਂ ਸੁਚਿਣ੍ਣਂ ਅਥ ਸੀਲਸਂਯਮਂ, ਕੇਨੂਪਪਨ੍ਨਾ ਸੁਗਤਿਂ ਯਸਸ੍ਸਿਨੀ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਇਮਾਹਿ ਗਾਥਾਹਿ ਪੁਚ੍ਛਿ.

੨੯੬-੭. ਤਤ੍ਥ ਓਭਾਸਯਿਤ੍ਵਾ ਪਥਵਿਂ ਸਦੇਵਕਨ੍ਤਿ ਚਨ੍ਦਿਮਸੂਰਿਯਰਸ੍ਮਿਸਮ੍ਮਿਸ੍ਸੇਹਿ ਸਿਨੇਰੁਪਸ੍ਸਵਿਨਿਗ੍ਗਤੇਹਿ ਪਭਾਵਿਸਰੇਹਿ ਵਿਜ੍ਜੋਤਯਮਾਨਤਾਯ ਦੇਵੇਨ ਆਕਾਸੇਨ ਸਹਾਤਿ ਸਦੇਵਕਂ ਉਪਗਤਭੂਮਿਭਾਗਭੂਤਂ ਇਮਂ ਪਥਵਿਂ ਵਿਜ੍ਜੋਤੇਤ੍ਵਾ, ਏਕੋਭਾਸਂ ਏਕਪਜ੍ਜੋਤਂ ਕਤ੍ਵਾਤਿ ਅਤ੍ਥੋ. ਓਭਾਸਯਿਤ੍ਵਾ ਪਥਵਿਂ ਚਨ੍ਦਿਮਸੂਰਿਯਾ ਵਿਯਾਤਿ ਯੋਜਨਾ. ਅਤਿਰੋਚਸੀਤਿ ਅਤਿਕ੍ਕਮਿਤ੍ਵਾ ਰੋਚਸਿ. ਤਂ ਪਨ ਅਤਿਰੋਚਨਂ ਕੇਨ ਕਿਂ ਵਿਯ ਕੇਨ ਵਾਤਿ ਆਹ ‘‘ਸਿਰਿਯਾ’’ਤਿਆਦਿ. ਤਤ੍ਥ ਸਿਰਿਯਾਤਿ ਸੋਭਗ੍ਗਾਦਿਸੋਭਾਵਿਸੇਸੇਨ. ਤੇਜਸਾਤਿ ਅਤ੍ਤਨੋ ਆਨੁਭਾਵੇਨ. ਆਵੇਲ਼ਿਨੀਤਿ ਰਤਨਮਯਪੁਪ੍ਫਾਵੇਲ਼ਵਤੀ.

ਏਵਂ ਥੇਰੇਨ ਪੁਚ੍ਛਿਤਾ ਦੇਵਤਾ ਇਮਾਹਿ ਗਾਥਾਹਿ ਵਿਸ੍ਸਜ੍ਜੇਸਿ –

੨੯੯. ‘‘ਇਦਾਨਿ ਭਨ੍ਤੇ ਇਮਮੇਵ ਗਾਮਂ, ਪਿਣ੍ਡਾਯ ਅਮ੍ਹਾਕਂ ਘਰਂ ਉਪਾਗਮਿ;

ਤਤੋ ਤੇ ਉਚ੍ਛੁਸ੍ਸ ਅਦਾਸਿ ਖਣ੍ਡਿਕਂ, ਪਸਨ੍ਨਚਿਤ੍ਤਾ ਅਤੁਲਾਯ ਪੀਤਿਯਾ.

੩੦੦. ‘‘ਸਸ੍ਸੁ ਚ ਪਚ੍ਛਾ ਅਨੁਯੁਞ੍ਜਤੇ ਮਮਂ, ਕਹਂ ਨੁ ਉਚ੍ਛੁਂ ਵਧੁਕੇ ਅਵਾਕਿਰਿ;

ਨ ਛਡ੍ਡਿਤਂ ਨੋ ਪਨ ਖਾਦਿਤਂ ਮਯਾ, ਸਨ੍ਤਸ੍ਸ ਭਿਕ੍ਖੁਸ੍ਸ ਸਯਂ ਅਦਾਸਹਂ.

੩੦੧. ‘‘ਤੁਯ੍ਹਂ ਨ੍ਵਿਦਂ ਇਸ੍ਸਰਿਯਂ ਅਥੋ ਮਮ, ਇਤਿਸ੍ਸਾ ਸਸ੍ਸੁ ਪਰਿਭਾਸਤੇ ਮਮਂ;

ਪੀਠਂ ਗਹੇਤ੍ਵਾ ਪਹਾਰਂ ਅਦਾਸਿ ਮੇ, ਤਤੋ ਚੁਤਾ ਕਾਲਕਤਾਮ੍ਹਿ ਦੇਵਤਾ.

੩੦੨. ‘‘ਤਦੇਵ ਕਮ੍ਮਂ ਕੁਸਲਂ ਕਤਂ ਮਯਾ, ਸੁਖਞ੍ਚ ਕਮ੍ਮਂ ਅਨੁਭੋਮਿ ਅਤ੍ਤਨਾ;

ਦੇਵੇਹਿ ਸਦ੍ਧਿਂ ਪਰਿਚਾਰਯਾਮਹਂ, ਮੋਦਾਮਹਂ ਕਾਮਗੁਣੇਹਿ ਪਞ੍ਚਹਿ.

੩੦੩. ‘‘ਤਦੇਵ ਕਮ੍ਮਂ ਕੁਸਲਂ ਕਤਂ ਮਯਾ, ਸੁਖਞ੍ਚ ਕਮ੍ਮਂ ਅਨੁਭੋਮਿ ਅਤ੍ਤਨਾ;

ਦੇਵਿਨ੍ਦਗੁਤ੍ਤਾ ਤਿਦਸੇਹਿ ਰਕ੍ਖਿਤਾ, ਸਮਪ੍ਪਿਤਾ ਕਾਮਗੁਣੇਹਿ ਪਞ੍ਚਹਿ.

੩੦੪. ‘‘ਏਤਾਦਿਸਂ ਪੁਞ੍ਞਫਲਂ ਅਨਪ੍ਪਕਂ, ਮਹਾਵਿਪਾਕਾ ਮਮ ਉਚ੍ਛੁਦਕ੍ਖਿਣਾ;

ਦੇਵੇਹਿ ਸਦ੍ਧਿਂ ਪਰਿਚਾਰਯਾਮਹਂ, ਮੋਦਾਮਹਂ ਕਾਮਗੁਣੇਹਿ ਪਞ੍ਚਹਿ.

੩੦੫. ‘‘ਏਤਾਦਿਸਂ ਪੁਞ੍ਞਫਲਂ ਅਨਪ੍ਪਕਂ, ਮਹਾਜੁਤਿਕਾ ਮਮ ਉਚ੍ਛੁਦਕ੍ਖਿਣਾ;

ਦੇਵਿਨ੍ਦਗੁਤ੍ਤਾ ਤਿਦਸੇਹਿ ਰਕ੍ਖਿਤਾ, ਸਹਸ੍ਸਨੇਤ੍ਤੋਰਿਵ ਨਨ੍ਦਨੇ ਵਨੇ.

੩੦੬. ‘‘ਤੁਵਞ੍ਚ ਭਨ੍ਤੇ ਅਨੁਕਮ੍ਪਕਂ ਵਿਦੁਂ, ਉਪੇਚ੍ਚ ਵਨ੍ਦਿਂ ਕੁਸਲਞ੍ਚ ਪੁਚ੍ਛਿਸਂ;

ਤਤੋ ਤੇ ਉਚ੍ਛੁਸ੍ਸ ਅਦਾਸਿ ਖਣ੍ਡਿਕਂ, ਪਸਨ੍ਨਚਿਤ੍ਤਾ ਅਤੁਲਾਯ ਪੀਤਿਯਾ’’ਤਿ.

੨੯੯. ਤਤ੍ਥ ਇਦਾਨੀਤਿ ਅਨਨ੍ਤਰਾਤੀਤਦਿਵਸਤ੍ਤਾ ਆਹ, ਅਧੁਨਾਤਿ ਅਤ੍ਥੋ. ਇਮਮੇਵ ਗਾਮਨ੍ਤਿ ਇਮਸ੍ਮਿਂਯੇਵ ਗਾਮੇ, ਰਾਜਗਹਂ ਸਨ੍ਧਾਯ ਵਦਤਿ. ਵੁਤ੍ਤਞ੍ਹਿ ‘‘ਗਾਮੋਪਿ ਨਿਗਮੋਪਿ ਨਗਰਮ੍ਪਿ ‘ਗਾਮੋ’ ਇਚ੍ਚੇਵ ਵੁਚ੍ਚਤੀ’’ਤਿ. ਭੁਮ੍ਮਤ੍ਥੇ ਚੇਤਂ ਉਪਯੋਗਵਚਨਂ. ਉਪਾਗਮੀਤਿ ਉਪਗਤੋ ਅਹੋਸਿ. ਅਤੁਲਾਯਾਤਿ ਅਨੁਪਮਾਯ, ਅਪ੍ਪਮਾਣਾਯ ਵਾ.

੩੦੦. ਅਵਾਕਿਰੀਤਿ ਅਪਨੇਸਿ ਛਡ੍ਡੇਸਿ, ਵਿਨਾਸੇਸਿ ਵਾ. ਸਨ੍ਤਸ੍ਸਾਤਿ ਸਾਧੁਰੂਪਸ੍ਸ ਸਨ੍ਤਕਿਲੇਸਸ੍ਸ ਪਰਿਸ੍ਸਮਮਪ੍ਪਤ੍ਤਸ੍ਸ ਵਾ.

੩੦੧. ਤੁਯ੍ਹਂ ਨੂਤਿ ਨੁ-ਸਦ੍ਦੋ ਅਨਤ੍ਤਮਨਤਾਸੂਚਨੇ ਨਿਪਾਤੋ, ਸੋ ‘‘ਮਮਾ’’ਤਿ ਏਤ੍ਥਾਪਿ ਆਨੇਤ੍ਵਾ ਯੋਜੇਤਬ੍ਬੋ ‘‘ਮਮ ਨੂ’’ਤਿ. ਇਦਂ ਇਸ੍ਸਰਿਯਨ੍ਤਿ ਗੇਹੇ ਆਧਿਪਚ੍ਚਂ ਸਨ੍ਧਾਯਾਹ. ਤਤੋ ਚੁਤਾਤਿ ਤਤੋ ਮਨੁਸ੍ਸਲੋਕਤੋ ਚੁਤਾ. ਯਸ੍ਮਾ ਠਿਤਟ੍ਠਾਨਤੋ ਅਪਗਤਾਪਿ ‘‘ਚੁਤਾ’’ਤਿ ਵੁਚ੍ਚਤਿ, ਤਸ੍ਮਾ ਚੁਤਿਂ ਵਿਸੇਸੇਤੁਂ ‘‘ਕਾਲਕਤਾ’’ਤਿ ਵੁਤ੍ਤਂ. ਕਾਲਕਤਾਪਿ ਚ ਨ ਯਤ੍ਥ ਕਤ੍ਥਚਿ ਨਿਬ੍ਬਤ੍ਤਾ, ਅਪਿਚ ਖੋ ਦੇਵਤ੍ਤਂ ਉਪਗਤਾਤਿ ਦਸ੍ਸੇਨ੍ਤੀ ਆਹ ‘‘ਅਮ੍ਹਿ ਦੇਵਤਾ’’ਤਿ.

੩੦੨. ਤਦੇਵ ਕਮ੍ਮਂ ਕੁਸਲਂ ਕਤਂ ਮਯਾਤਿ ਤਦੇਵ ਉਚ੍ਛੁਖਣ੍ਡਦਾਨਮਤ੍ਤਂ ਕੁਸਲਂ ਕਮ੍ਮਂ ਕਤਂ ਮਯਾ, ਅਞ੍ਞਂ ਨ ਜਾਨਾਮੀਤਿ ਅਤ੍ਥੋ. ਸੁਖਞ੍ਚ ਕਮ੍ਮਨ੍ਤਿ ਸੁਖਞ੍ਚ ਕਮ੍ਮਫਲਂ. ਕਮ੍ਮਫਲਞ੍ਹਿ ਇਧ ‘‘ਕਮ੍ਮ’’ਨ੍ਤਿ ਵੁਤ੍ਤਂ ਉਤ੍ਤਰਪਦਲੋਪੇਨ, ਕਾਰਣੋਪਚਾਰੇਨ ਵਾ ‘‘ਕੁਸਲਾਨਂ, ਭਿਕ੍ਖਵੇ, ਧਮ੍ਮਾਨਂ ਸਮਾਦਾਨਹੇਤੁ ਏਵਮਿਦਂ ਪੁਞ੍ਞਂ ਪਵਡ੍ਢਤਿ (ਦੀ. ਨਿ. ੩.੮੦). ਅਨੁਭੋਮਿ ਸਕਂ ਪੁਞ੍ਞ’’ਨ੍ਤਿ (ਵਿ. ਵ. ੧੩੩) ਚ ਆਦੀਸੁ ਵਿਯ. ਕਮ੍ਮਨ੍ਤਿ ਵਾ ਕਰਣਤ੍ਥੇ ਉਪਯੋਗਵਚਨਂ, ਕਮ੍ਮੇਨਾਤਿ ਅਤ੍ਥੋ. ਕਮ੍ਮੇ ਵਾ ਭਵਂ ਕਮ੍ਮਂ ਯਥਾ ਕਮ੍ਮਨ੍ਤਿ. ਅਥ ਵਾ ਕਾਮੇਤਬ੍ਬਤਾਯ ਕਮ੍ਮਂ. ਤਞ੍ਹਿ ਸੁਖਰਜਨੀਯਭਾਵਤੋ ਕਾਮੂਪਸਂਹਿਤਂ ਕਾਮੇਤਬ੍ਬਨ੍ਤਿ ਕਮਨੀਯਂ. ਅਤ੍ਤਨਾਤਿ ਅਤ੍ਤਨਾ ਏਵ, ਸਯਂਵਸਿਤਾਯ ਸੇਰਿਭਾਵੇਨ ਸਯਮੇਵਾਤਿ ਅਤ੍ਥੋ. ਪਰਿਚਾਰਯਾਮਹਂ ਅਤ੍ਤਾਨਨ੍ਤਿ ਪੁਰਿਮਗਾਥਾਯ ‘‘ਅਤ੍ਤਨਾ’’ਤਿ ਵੁਤ੍ਤਂ ਪਦਂ ਵਿਭਤ੍ਤਿਵਿਪਰਿਣਾਮੇਨ ‘‘ਅਤ੍ਤਾਨ’’ਨ੍ਤਿ ਯੋਜੇਤਬ੍ਬਂ.

੩੦੩-੫. ਦੇਵਿਨ੍ਦਗੁਤ੍ਤਾਤਿ ਦੇਵਿਨ੍ਦੇਨ ਸਕ੍ਕੇਨ ਗੁਤ੍ਤਾ, ਦੇਵਿਨ੍ਦੋ ਵਿਯ ਵਾ ਗੁਤ੍ਤਾ ਮਹਾਪਰਿਵਾਰਤਾਯ. ਸਮਪ੍ਪਿਤਾਤਿ ਸੁਟ੍ਠੁ ਅਪ੍ਪਿਤਾ ਸਮਨ੍ਨਾਗਤਾ. ਮਹਾਵਿਪਾਕਾਤਿ ਵਿਪੁਲਫਲਾ. ਮਹਾਜੁਤਿਕਾਤਿ ਮਹਾਤੇਜਾ, ਮਹਾਨੁਭਾਵਾਤਿ ਅਤ੍ਥੋ.

੩੦੬. ਤੁਵਨ੍ਤਿ ਤਂ. ਅਨੁਕਮ੍ਪਕਨ੍ਤਿ ਕਾਰੁਣਿਕਂ. ਵਿਦੁਨ੍ਤਿ ਸਪ੍ਪਞ੍ਞਂ, ਸਾਵਕਪਾਰਮਿਯਾ ਮਤ੍ਥਕਂ ਪਤ੍ਤਨ੍ਤਿ ਅਤ੍ਥੋ. ਉਪੇਚ੍ਚਾਤਿ ਉਪਗਨ੍ਤ੍ਵਾ. ਵਨ੍ਦਿਨ੍ਤਿ ਪਞ੍ਚਪਤਿਟ੍ਠਿਤੇਨ ਅਭਿਵਾਦਯਿਂ. ਕੁਸਲਞ੍ਚ ਆਰੋਗ੍ਯ ਪੁਚ੍ਛਿਸਂ ਅਪੁਚ੍ਛਿਂ, ਅਤੁਲਾਯ ਪੀਤਿਯਾ ਇਦਞ੍ਚ ਕੁਸਲਂ ਅਨੁਸ੍ਸਰਾਮੀਤਿ ਅਧਿਪ੍ਪਾਯੋ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

ਉਚ੍ਛੁਦਾਯਿਕਾਵਿਮਾਨਵਣ੍ਣਨਾ ਨਿਟ੍ਠਿਤਾ.

੩. ਪਲ੍ਲਙ੍ਕਵਿਮਾਨਵਣ੍ਣਨਾ

ਪਲ੍ਲਙ੍ਕਸੇਟ੍ਠੇ ਮਣਿਸੋਣ੍ਣਚਿਤ੍ਤੇਤਿ ਪਲ੍ਲਙ੍ਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਚ ਸਮਯੇਨ ਸਾਵਤ੍ਥਿਯਂ ਅਞ੍ਞਤਰਸ੍ਸ ਉਪਾਸਕਸ੍ਸ ਧੀਤਾ ਕੁਲਪਦੇਸਾਦਿਨਾ ਸਦਿਸਸ੍ਸ ਤਤ੍ਥੇਵ ਅਞ੍ਞਤਰਸ੍ਸ ਕੁਲਪੁਤ੍ਤਸ੍ਸ ਦਿਨ੍ਨਾ, ਸਾ ਚ ਹੋਤਿ ਅਕ੍ਕੋਧਨਾ ਸੀਲਾਚਾਰਸਮ੍ਪਨ੍ਨਾ ਪਤਿਦੇਵਤਾ ਸਮਾਦਿਨ੍ਨਪਞ੍ਚਸੀਲਾ, ਉਪੋਸਥੇ ਸਕ੍ਕਚ੍ਚਂ ਉਪੋਸਥਸੀਲਾਨਿ ਚ ਰਕ੍ਖਤਿ. ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਉਪ੍ਪਜ੍ਜਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨਤ੍ਥੇਰੋ ਹੇਟ੍ਠਾ ਵੁਤ੍ਤਨਯੇਨੇਵ ਗਨ੍ਤ੍ਵਾ –

੩੦੭. ‘‘ਪਲ੍ਲਙ੍ਕਸੇਟ੍ਠੇ ਮਣਿਸੋਣ੍ਣਚਿਤ੍ਤੇ, ਪੁਪ੍ਫਾਭਿਕਿਣ੍ਣੇ ਸਯਨੇ ਉਲ਼ਾਰੇ;

ਤਤ੍ਥਚ੍ਛਸਿ ਦੇਵਿ ਮਹਾਨੁਭਾਵੇ, ਉਚ੍ਚਾਵਚਾ ਇਦ੍ਧਿ ਵਿਕੁਬ੍ਬਮਾਨਾ.

੩੦੮. ‘‘ਇਮਾ ਚ ਤੇ ਅਚ੍ਛਰਾਯੋ ਸਮਨ੍ਤਤੋ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ;

ਦੇਵਿਦ੍ਧਿਪਤ੍ਤਾਸਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਗਾਥਾਹਿ ਪੁਚ੍ਛਿ.

ਸਾਪਿਸ੍ਸ ਇਮਾਹਿ ਗਾਥਾਹਿ ਬ੍ਯਾਕਾਸਿ –

੩੦੯. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਅਡ੍ਢੇ ਕੁਲੇ ਸੁਣਿਸਾ ਅਹੋਸਿਂ;

ਅਕ੍ਕੋਧਨਾ ਭਤ੍ਤੁ ਵਸਾਨੁਵਤ੍ਤਿਨੀ, ਉਪੋਸਥੇ ਅਪ੍ਪਮਤ੍ਤਾ ਅਹੋਸਿਂ.

੩੧੦. ‘‘ਮਨੁਸ੍ਸਭੂਤਾ ਦਹਰਾ ਅਪਾਪਿਕਾ, ਪਸਨ੍ਨਚਿਤ੍ਤਾ ਪਤਿਮਾਭਿਰਾਧਯਿਂ;

ਦਿਵਾ ਚ ਰਤ੍ਤੋ ਚ ਮਨਾਪਚਾਰਿਨੀ, ਅਹਂ ਪੁਰੇ ਸੀਲਵਤੀ ਅਹੋਸਿਂ.

੩੧੧. ‘‘ਪਾਣਾਤਿਪਾਤਾ ਵਿਰਤਾ ਅਚੋਰਿਕਾ, ਸਂਸੁਦ੍ਧਕਾਯਾ ਸੁਚਿਬ੍ਰਹ੍ਮਚਾਰਿਨੀ;

ਅਮਜ੍ਜਪਾ ਨੋ ਚ ਮੁਸਾ ਅਭਾਣਿਂ, ਸਿਕ੍ਖਾਪਦੇਸੁ ਪਰਿਪੂਰਕਾਰਿਨੀ.

੩੧੨. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਪਸਨ੍ਨਮਾਨਸਾ ਅਹਂ.

੩੧੩. ‘‘ਅਟ੍ਠਙ੍ਗੁਪੇਤਂ ਅਨੁਧਮ੍ਮਚਾਰਿਨੀ, ਉਪੋਸਥਂ ਪੀਤਿਮਨਾ ਉਪਾਵਸਿਂ;

ਇਮਞ੍ਚ ਅਰਿਯਂ ਅਟ੍ਠਙ੍ਗਵਰੇਹੁਪੇਤਂ, ਸਮਾਦਿਯਿਤ੍ਵਾ ਕੁਸਲਂ ਸੁਖੁਦ੍ਰਯਂ;

ਪਤਿਮ੍ਹਿ ਕਲ੍ਯਾਣੀ ਵਸਾਨੁਵਤ੍ਤਿਨੀ, ਅਹੋਸਿਂ ਪੁਬ੍ਬੇ ਸੁਗਤਸ੍ਸ ਸਾਵਿਕਾ.

੩੧੪. ‘‘ਏਤਾਦਿਸਂ ਕੁਸਲਂ ਜੀਵਲੋਕੇ, ਕਮ੍ਮਂ ਕਰਿਤ੍ਵਾਨ ਵਿਸੇਸਭਾਗਿਨੀ;

ਕਾਯਸ੍ਸ ਭੇਦਾ ਅਭਿਸਮ੍ਪਰਾਯਂ, ਦੇਵਿਦ੍ਧਿਪਤ੍ਤਾ ਸੁਗਤਿਮ੍ਹਿ ਆਗਤਾ.

੩੧੫. ‘‘ਵਿਮਾਨਪਾਸਾਦਵਰੇ ਮਨੋਰਮੇ, ਪਰਿਵਾਰਿਤਾ ਅਚ੍ਛਰਾਸਙ੍ਗਣੇਨ;

ਸਯਂਪਭਾ ਦੇਵਗਣਾ ਰਮੇਨ੍ਤਿ ਮਂ, ਦੀਘਾਯੁਕਿਂ ਦੇਵਵਿਮਾਨਮਾਗਤ’’ਨ੍ਤਿ.

੩੦੭. ਤਤ੍ਥ ਪਲ੍ਲਙ੍ਕਸੇਟ੍ਠੇਤਿ ਪਲ੍ਲਙ੍ਕਵਰੇ ਉਤ੍ਤਮਪਲ੍ਲਙ੍ਕੇ. ਤਂਯੇਵਸ੍ਸ ਸੇਟ੍ਠਤਂ ਦਸ੍ਸੇਤੁਂ ‘‘ਮਣਿਸੋਣ੍ਣਚਿਤ੍ਤੇ’’ਤਿ ਵੁਤ੍ਤਂ, ਵਿਵਿਧਰਤਨਰਂਸਿਜਾਲਸਮੁਜ੍ਜਲੇਹਿ ਮਣੀਹਿ ਚੇਵ ਸੁਵਣ੍ਣੇਨ ਚ ਵਿਚਿਤ੍ਤੇ ‘‘ਤਤ੍ਥਾ’’ਤਿ ‘‘ਸਯਨੇ’’ਤਿ ਚ ਵੁਤ੍ਤੇ ਸਯਿਤਬ੍ਬਟ੍ਠਾਨਭੂਤੇ ਪਲ੍ਲਙ੍ਕਸੇਟ੍ਠੇ.

੩੦੮. ਤੇਤਿ ਤੁਯ੍ਹਂ ਸਮਨ੍ਤਤੋ. ‘‘ਪਮੋਦਯਨ੍ਤੀ’’ਤਿ ਪਦਂ ਪਨ ਅਪੇਕ੍ਖਿਤ੍ਵਾ ‘‘ਤ’’ਨ੍ਤਿ ਵਿਭਤ੍ਤਿ ਵਿਪਰਿਣਾਮੇਤਬ੍ਬਾ. ਪਮੋਦਯਨ੍ਤੀਤਿ ਵਾ ਪਮੋਦਨਂ ਕਰੋਨ੍ਤਿ, ਪਮੋਦਨਂ ਤੁਯ੍ਹਂ ਉਪ੍ਪਾਦੇਨ੍ਤੀਤਿ ਅਤ੍ਥੋ.

੩੧੦. ਦਹਰਾ ਅਪਾਪਿਕਾਤਿ ਦਹਰਾਪਿ ਅਪਾਪਿਕਾ. ‘‘ਦਹਰਾਸੁ ਪਾਪਿਕਾ’’ਤਿ ਵਾ ਪਾਠੋ, ਸੋਯੇਵਤ੍ਥੋ. ‘‘ਦਹਰਸ੍ਸਾਪਾਪਿਕਾ’’ਤਿਪਿ ਪਠਨ੍ਤਿ, ਦਹਰਸ੍ਸ ਸਾਮਿਕਸ੍ਸ ਅਪਾਪਿਕਾ, ਸਕ੍ਕਚ੍ਚਂ ਉਪਟ੍ਠਾਨੇਨ ਅਨਤਿਚਰਿਯਾਯ ਚ ਭਦ੍ਦਿਕਾਤਿ ਅਤ੍ਥੋ. ਤੇਨ ਵੁਤ੍ਤਂ ‘‘ਪਸਨ੍ਨਚਿਤ੍ਤਾ’’ਤਿਆਦਿ. ਅਭਿਰਾਧਯਿਨ੍ਤਿ ਆਰਾਧੇਸਿਂ. ਰਤ੍ਤੋਤਿ ਰਤ੍ਤਿਯਂ.

੩੧੧. ਅਚੋਰਿਕਾਤਿ ਚੋਰਿਯਰਹਿਤਾ, ਅਦਿਨ੍ਨਾਦਾਨਾ ਪਟਿਵਿਰਤਾਤਿ ਅਤ੍ਥੋ. ‘‘ਵਿਰਤਾ ਚ ਚੋਰਿਯਾ’’ਤਿਪਿ ਪਾਠੋ, ਥੇਯ੍ਯਤੋ ਚ ਵਿਰਤਾਤਿ ਅਤ੍ਥੋ. ਸਂਸੁਦ੍ਧਕਾਯਾਤਿ ਪਰਿਸੁਦ੍ਧਕਾਯਕਮ੍ਮਨ੍ਤਤਾਯ ਸਮ੍ਮਦੇਵ ਸੁਦ੍ਧਕਾਯਾ, ਤਤੋ ਏਵ ਸੁਚਿਬ੍ਰਹ੍ਮਚਾਰਿਨੀ ਸਾਮਿਕਤੋ ਅਞ੍ਞਤ੍ਥ ਅਬ੍ਰਹ੍ਮਚਰਿਯਾਸਮ੍ਭਵਤੋ. ਤਥਾ ਹਿ ਵੁਤ੍ਤਂ –

‘‘ਮਯਞ੍ਚ ਭਰਿਯਾ ਨਾਤਿਕ੍ਕਮਾਮ,

ਅਮ੍ਹੇਪਿ ਭਰਿਯਾ ਨਾਤਿਕ੍ਕਮਨ੍ਤਿ;

ਅਞ੍ਞਤ੍ਰ ਤਾਹਿ ਬ੍ਰਹ੍ਮਚਰਿਯਂ ਚਰਾਮ,

ਤਸ੍ਮਾ ਹਿ ਅਮ੍ਹਂ ਦਹਰਾ ਨਿ ਮਿਯ੍ਯਰੇ’’ਤਿ. (ਜਾ. ੧.੧੦.੯੭);

ਅਥ ਵਾ ਸੁਚਿਬ੍ਰਹ੍ਮਚਾਰਿਨੀਤਿ ਸੁਚਿਨੋ ਸੁਦ੍ਧਸ੍ਸ ਬ੍ਰਹ੍ਮਸ੍ਸ ਸੇਟ੍ਠਸ੍ਸ ਉਪੋਸਥਸੀਲਸ੍ਸ, ਮਗ੍ਗਬ੍ਰਹ੍ਮਚਰਿਯਸ੍ਸ ਵਾ ਅਨੁਰੂਪਸ੍ਸ ਪੁਬ੍ਬਭਾਗਬ੍ਰਹ੍ਮਚਰਿਯਸ੍ਸ ਵਸੇਨ ਸੁਚਿਬ੍ਰਹ੍ਮਚਾਰਿਨੀ.

੩੧੩. ਅਨੁਧਮ੍ਮਚਾਰਿਨੀਤਿ ਅਰਿਯਾਨਂ ਧਮ੍ਮਸ੍ਸ ਅਨੁਧਮ੍ਮਂ ਚਰਣਸੀਲਾ. ਇਮਞ੍ਚ ਅਨਨ੍ਤਰਂ ਵੁਤ੍ਤਂ ਨਿਦ੍ਦੋਸਤਾਯ ਅਰਿਯਂ, ਅਟ੍ਠਙ੍ਗਵਰੇਹਿ ਅਟ੍ਠਹਿ ਉਤ੍ਤਮਙ੍ਗੇਹਿ ਅਰਿਯਤ੍ਤਾ ਏਵ ਵਾ ਅਰਿਯਟ੍ਠਙ੍ਗਵਰੇਹਿ ਉਪੇਤਂ ਆਰੋਗ੍ਯਟ੍ਠੇਨ ਅਨਵਜ੍ਜਟ੍ਠੇਨ ਚ ਕੁਸਲਂ ਸੁਖਵਿਪਾਕਤਾਯ ਸੁਖਾਨਿਸਂਸਤਾਯ ਚ ਸੁਖੁਦ੍ਰਯਂ ਉਪਾਵਸਿਨ੍ਤਿ ਯੋਜਨਾ.

੩੧੪. ਵਿਸੇਸਭਾਗਿਨੀਤਿ ਵਿਸੇਸਸ੍ਸ ਦਿਬ੍ਬਸ੍ਸ ਸਮ੍ਪਤ੍ਤਿਭਵਸ੍ਸ ਭਾਗਿਨੀ. ਸੁਗਤਿਮ੍ਹਿ ਆਗਤਾਤਿ ਸੁਗਤਿਂ ਆਗਤਾ ਉਪਗਤਾ, ਸੁਗਤਿਮ੍ਹਿ ਵਾ ਸੁਗਤਿਯਂ ਦਿਬ੍ਬਸਮ੍ਪਤ੍ਤਿਯਂ ਆਗਤਾ. ‘‘ਸੁਗਤਿਞ੍ਹਿ ਆਗਤਾ’’ਤਿਪਿ ਪਾਠੋ. ਤਤ੍ਥ ਹੀਤਿ ਨਿਪਾਤਮਤ੍ਤਂ, ਹੇਤੁਅਤ੍ਥੋ ਵਾ, ਯਸ੍ਮਾ ਸੁਗਤਿਂ ਆਗਤਾ, ਤਸ੍ਮਾ ਵਿਸੇਸਭਾਗਿਨੀਤਿ ਯੋਜਨਾ.

੩੧੫. ਵਿਮਾਨਪਾਸਾਦਵਰੇਤਿ ਵਿਮਾਨੇਸੁ ਉਤ੍ਤਮਪਾਸਾਦੇ, ਵਿਮਾਨਸਙ੍ਖਾਤੇ ਵਾ ਅਗ੍ਗਪਾਸਾਦੇ, ਵਿਮਾਨੇ ਵਾ ਵਿਗਤਮਾਨੇ ਅਪ੍ਪਮਾਣੇ ਮਹਨ੍ਤੇ ਵਰਪਾਸਾਦੇ ਪਰਿਵਾਰਿਤਾ ਅਚ੍ਛਰਾਸਙ੍ਗਣੇਨ ਸਯਂਪਭਾ ਪਮੋਦਾਮਿ, ‘‘ਅਮ੍ਹੀ’’ਤਿ ਵਾ ਪਦਂ ਆਨੇਤ੍ਵਾ ਯੋਜੇਤਬ੍ਬਂ. ਦੀਘਾਯੁਕਿਨ੍ਤਿ ਹੇਟ੍ਠਿਮੇਹਿ ਦੇਵੇਹਿ ਦੀਘਤਰਾਯੁਕਤਾਯ ਤਤ੍ਰੂਪਪਨ੍ਨੇਹਿ ਅਨਪ੍ਪਾਯੁਕਤਾਯ ਚ ਦੀਘਾਯੁਕਿਂ ਮਂ ਯਥਾਵੁਤ੍ਤਂ ਦੇਵਵਿਮਾਨਮਾਗਤਂ ਉਪਗਤਂ ਦੇਵਗਣਾ ਰਮੇਨ੍ਤੀਤਿ ਯੋਜਨਾ. ਸੇਸਂ ਵੁਤ੍ਤਨਯਮੇਵ.

ਪਲ੍ਲਙ੍ਕਵਿਮਾਨਵਣ੍ਣਨਾ ਨਿਟ੍ਠਿਤਾ.

੪. ਲਤਾਵਿਮਾਨਵਣ੍ਣਨਾ

ਲਤਾ ਚ ਸਜ੍ਜਾ ਪਵਰਾ ਚ ਦੇਵਤਾਤਿ ਲਤਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਚ ਸਮਯੇਨ ਸਾਵਤ੍ਥਿਵਾਸਿਨੋ ਅਞ੍ਞਤਰਸ੍ਸ ਉਪਾਸਕਸ੍ਸ ਧੀਤਾ ਲਤਾ ਨਾਮ ਪਣ੍ਡਿਤਾ ਬ੍ਯਤ੍ਤਾ ਮੇਧਾਵਿਨੀ ਪਤਿਕੁਲਂ ਗਤਾ ਭਤ੍ਤੁ ਸਸ੍ਸੁਸਸੁਰਾਨਞ੍ਚ ਮਨਾਪਚਾਰਿਨੀ ਪਿਯਵਾਦਿਨੀ ਪਰਿਜਨਸ੍ਸ ਸਙ੍ਗਹਕੁਸਲਾ ਗੇਹੇ ਕੁਟੁਮ੍ਬਭਾਰਸ੍ਸ ਨਿਤ੍ਥਰਣਸਮਤ੍ਥਾ ਅਕ੍ਕੋਧਨਾ ਸੀਲਾਚਾਰਸਮ੍ਪਨ੍ਨਾ ਦਾਨਸਂਵਿਭਾਗਰਤਾ ਅਖਣ੍ਡਪਞ੍ਚਸੀਲਾ ਉਪੋਸਥਰਕ੍ਖਣੇ ਚ ਅਪ੍ਪਮਤ੍ਤਾ ਅਹੋਸਿ. ਸਾ ਅਪਰਭਾਗੇ ਕਾਲਂ ਕਤ੍ਵਾ ਵੇਸ੍ਸਵਣਸ੍ਸ ਮਹਾਰਾਜਸ੍ਸ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ ਲਤਾਤ੍ਵੇਵ ਨਾਮੇਨ. ਅਞ੍ਞਾਪਿ ਤਸ੍ਸਾ ਸਜ੍ਜਾ, ਪਵਰਾ, ਅਚ੍ਚਿਮਤੀ, ਸੁਤਾਤਿ ਚਤਸ੍ਸੋ ਭਗਿਨਿਯੋ ਅਹੇਸੁਂ. ਤਾ ਪਞ੍ਚਪਿ ਸਕ੍ਕੇਨ ਦੇਵਰਾਜੇਨ ਆਨੇਤ੍ਵਾ ਨਾਟਕਿਤ੍ਥਿਭਾਵੇਨ ਪਰਿਚਾਰਿਕਟ੍ਠਾਨੇ ਠਪਿਤਾ. ਲਤਾ ਪਨਸ੍ਸ ਨਚ੍ਚਗੀਤਾਦੀਸੁ ਛੇਕਤਾਯ ਇਟ੍ਠਤਰਾ ਅਹੋਸਿ.

ਤਾਸਂ ਏਕਤੋ ਸਮਾਗਨ੍ਤ੍ਵਾ ਸੁਖਨਿਸਜ੍ਜਾਯ ਨਿਸਿਨ੍ਨਾਨਂ ਸਙ੍ਗੀਤਨੇਪੁਞ੍ਞਂ ਪਟਿਚ੍ਚ ਵਿਵਾਦੋ ਉਪ੍ਪਨ੍ਨੋ. ਤਾ ਸਬ੍ਬਾਪਿ ਵੇਸ੍ਸਵਣਸ੍ਸ ਮਹਾਰਾਜਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪੁਚ੍ਛਿਂਸੁ ‘‘ਤਾਤ, ਕਤਮਾ ਅਮ੍ਹਾਕਂ ਨਚ੍ਚਾਦੀਸੁ ਕੁਸਲਾ’’ਤਿ? ਸੋ ਏਵਮਾਹ ‘‘ਗਚ੍ਛਥ ਧੀਤਰੋ ਅਨੋਤਤ੍ਤਦਹਤੀਰੇ ਦੇਵਸਮਾਗਮੇ ਸਙ੍ਗੀਤਂ ਪਵਤ੍ਤੇਥ, ਤਤ੍ਥ ਵੋ ਵਿਸੇਸੋ ਪਾਕਟੋ ਭਵਿਸ੍ਸਤੀ’’ਤਿ. ਤਾ ਤਥਾ ਅਕਂਸੁ. ਤਤ੍ਥ ਦੇਵਪੁਤ੍ਤਾ ਲਤਾਯ ਨਚ੍ਚਮਾਨਾਯ ਅਤ੍ਤਨੋ ਸਭਾਵੇਨ ਠਾਤੁਂ ਨਾਸਕ੍ਖਿਂਸੁ, ਸਞ੍ਜਾਤਪਹਾਸਾ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ਨਿਰਨ੍ਤਰਂ ਸਾਧੁਕਾਰਂ ਦੇਨ੍ਤਾ ਉਕ੍ਕੁਟ੍ਠਿਸਦ੍ਦੇ ਚੇਲੁਕ੍ਖੇਪੇ ਚ ਪਵਤ੍ਤੇਨ੍ਤਾ ਹਿਮਵਨ੍ਤਂ ਕਮ੍ਪਯਮਾਨਾ ਵਿਯ ਮਹਨ੍ਤਂ ਕੋਲਾਹਲਮਕਂਸੁ. ਇਤਰਾਸੁ ਪਨ ਨਚ੍ਚਨ੍ਤੀਸੁ ਸਿਸਿਰਕਾਲੇ ਕੋਕਿਲਾ ਵਿਯ ਤੁਣ੍ਹੀਭੂਤਾ ਨਿਸੀਦਿਂਸੁ. ਏਵਂ ਤਤ੍ਥ ਸਙ੍ਗੀਤੇ ਲਤਾਯ ਵਿਸੇਸੋ ਪਾਕਟੋ ਅਹੋਸਿ.

ਅਥ ਤਾਸਂ ਦੇਵਧੀਤਾਨਂ ਸੁਤਾਯ ਦੇਵਧੀਤਾਯ ਏਤਦਹੋਸਿ ‘‘ਕਿਂ ਨੁ ਖੋ ਕਮ੍ਮਂ ਕਤ੍ਵਾ ਅਯਂ ਲਤਾ ਅਮ੍ਹੇ ਅਭਿਭੁਯ੍ਯ ਤਿਟ੍ਠਤਿ ਵਣ੍ਣੇਨ ਚੇਵ ਯਸਸਾ ਚ, ਯਂਨੂਨਾਹਂ ਲਤਾਯ ਕਤਕਮ੍ਮਂ ਪੁਚ੍ਛੇਯ੍ਯ’’ਨ੍ਤਿ. ਸਾ ਤਂ ਪੁਚ੍ਛਿ. ਇਤਰਾਪਿ ਤਸ੍ਸਾ ਏਤਮਤ੍ਥਂ ਵਿਸ੍ਸਜ੍ਜੇਸਿ. ਤਯਿਦਂ ਸਬ੍ਬਂ ਵੇਸ੍ਸਵਣਮਹਾਰਾਜਾ ਦੇਵਚਾਰਿਕਵਸੇਨ ਉਪਗਤਸ੍ਸ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਆਚਿਕ੍ਖਿ. ਥੇਰੋ ਤਮਤ੍ਥਂ ਪੁਚ੍ਛਾਯ ਮੂਲਕਾਰਣਤੋ ਪਟ੍ਠਾਯ ਭਗਵਤੋ ਆਰੋਚੇਨ੍ਤੋ –

੩੧੬. ‘‘ਲਤਾ ਚ ਸਜ੍ਜਾ ਪਵਰਾ ਚ ਦੇਵਤਾ, ਅਚ੍ਚਿਮਤੀ ਰਾਜਵਰਸ੍ਸ ਸਿਰੀਮਤੋ;

ਸੁਤਾ ਚ ਰਞ੍ਞੋ ਵੇਸ੍ਸਵਣਸ੍ਸ ਧੀਤਾ, ਰਾਜੀਮਤੀ ਧਮ੍ਮਗੁਣੇਹਿ ਸੋਭਥ.

੩੧੭. ‘‘ਪਞ੍ਚੇਤ੍ਥ ਨਾਰਿਯੋ ਆਗਮਂਸੁ ਨ੍ਹਾਯਿਤੁਂ, ਸੀਤੋਦਕਂ ਉਪ੍ਪਲਿਨਿਂ ਸਿਵਂ ਨਦਿਂ;

ਤਾ ਤਤ੍ਥ ਨ੍ਹਾਯਿਤ੍ਵਾ ਰਮੇਤ੍ਵਾ ਦੇਵਤਾ, ਨਚ੍ਚਿਤ੍ਵਾ ਗਾਯਿਤ੍ਵਾ ਸੁਤਾ ਲਤਂ ਬ੍ਰਵਿ.

੩੧੮. ‘‘ਪੁਚ੍ਛਾਮਿ ਤਂ ਉਪ੍ਪਲਮਾਲਧਾਰਿਨਿ, ਆਵੇਲ਼ਿਨਿ ਕਞ੍ਚਨਸਨ੍ਨਿਭਤ੍ਤਚੇ;

ਤਿਮਿਰਤਮ੍ਬਕ੍ਖਿ ਨਭੇਵ ਸੋਭਨੇ, ਦੀਘਾਯੁਕੀ ਕੇਨ ਕਤੋ ਯਸੋ ਤਵ.

੩੧੯. ‘‘ਕੇਨਾਸਿ ਭਦ੍ਦੇ ਪਤਿਨੋ ਪਿਯਤਰਾ, ਵਿਸਿਟ੍ਠਕਲ੍ਯਾਣਿਤਰਸ੍ਸੁ ਰੂਪਤੋ;

ਪਦਕ੍ਖਿਣਾ ਨਚ੍ਚਨਗੀਤਵਾਦਿਤੇ, ਆਚਿਕ੍ਖ ਨੋ ਤ੍ਵਂ ਨਰਨਾਰਿਪੁਚ੍ਛਿਤਾ’’ਤਿ. –

ਸੁਤਾਯ ਪੁਚ੍ਛਾ.

੩੨੦. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਉਲ਼ਾਰਭੋਗੇ ਕੁਲੇ ਸੁਣਿਸਾ ਅਹੋਸਿਂ;

ਅਕ੍ਕੋਧਨਾ ਭਤ੍ਤੁ ਵਸਾਨੁਵਤ੍ਤਿਨੀ, ਉਪੋਸਥੇ ਅਪ੍ਪਮਤ੍ਤਾ ਅਹੋਸਿਂ.

੩੨੧. ‘‘ਮਨੁਸ੍ਸਭੂਤਾ ਦਹਰਾ ਅਪਾਪਿਕਾ, ਪਸਨ੍ਨਚਿਤ੍ਤਾ ਪਤਿਮਾਭਿਰਾਧਯਿਂ;

ਸਦੇਵਰਂ ਸਸ੍ਸਸੁਰਂ ਸਦਾਸਕਂ, ਅਭਿਰਾਧਯਿਂ ਤਮ੍ਹਿ ਕਤੋ ਯਸੋ ਮਮ.

੩੨੨. ‘‘ਸਾਹਂ ਤੇਨ ਕੁਸਲੇਨ ਕਮ੍ਮੁਨਾ, ਚਤੁਬ੍ਭਿ ਠਾਨੇਹਿ ਵਿਸੇਸਮਜ੍ਝਗਾ;

ਆਯੁਞ੍ਚ ਵਣ੍ਣਞ੍ਚ ਸੁਖਂ ਬਲਞ੍ਚ, ਖਿਡ੍ਡਾਰਤਿਂ ਪਚ੍ਚਨੁਭੋਮਨਪ੍ਪਕਂ.

੩੨੩. ‘‘ਸੁਤਂ ਨੁ ਤਂ ਭਾਸਤਿ ਯਂ ਅਯਂ ਲਤਾ, ਯਂ ਨੋ ਅਪੁਚ੍ਛਿਮ੍ਹ ਅਕਿਤ੍ਤਯੀ ਨੋ;

ਪਤਿਨੋ ਕਿਰਮ੍ਹਾਕਂ ਵਿਸਿਟ੍ਠ ਨਾਰੀਨਂ, ਗਤੀ ਚ ਤਾਸਂ ਪਵਰਾ ਚ ਦੇਵਤਾ.

੩੨੪. ‘‘ਪਤੀਸੁ ਧਮ੍ਮਂ ਪਚਰਾਮ ਸਬ੍ਬਾ, ਪਤਿਬ੍ਬਤਾ ਯਤ੍ਥ ਭਵਨ੍ਤਿ ਇਤ੍ਥਿਯੋ;

ਪਤੀਸੁ ਧਮ੍ਮਂ ਪਚਰਿਤ੍ਵਾ ਸਬ੍ਬਾ, ਲਚ੍ਛਾਮਸੇ ਭਾਸਤਿ ਯਂ ਅਯਂ ਲਤਾ.

੩੨੫. ‘‘ਸੀਹੋ ਯਥਾ ਪਬ੍ਬਤਸਾਨੁਗੋਚਰੋ, ਮਹਿਨ੍ਧਰਂ ਪਬ੍ਬਤਮਾਵਸਿਤ੍ਵਾ;

ਪਸਯ੍ਹ ਹਨ੍ਤ੍ਵਾ ਇਤਰੇ ਚਤੁਪ੍ਪਦੇ, ਖੁਦ੍ਦੇ ਮਿਗੇ ਖਾਦਤਿ ਮਂਸਭੋਜਨੋ.

੩੨੬. ‘‘ਤਥੇਵ ਸਦ੍ਧਾ ਇਧ ਅਰਿਯਸਾਵਿਕਾ, ਭਤ੍ਤਾਰਂ ਨਿਸ੍ਸਾਯ ਪਤਿਂ ਅਨੁਬ੍ਬਤਾ;

ਕੋਧਂ ਵਧਿਤ੍ਵਾ ਅਭਿਭੁਯ੍ਯ ਮਚ੍ਛਰਂ, ਸਗ੍ਗਮ੍ਹਿ ਸਾ ਮੋਦਤਿ ਧਮ੍ਮਚਾਰਿਨੀ’’ਤਿ. –

ਲਤਾਯ ਵਿਸ੍ਸਜ੍ਜਨਨ੍ਤਿ ਆਹ.

੩੧੬. ਤਤ੍ਥ ਲਤਾ ਚ ਸਜ੍ਜਾ ਪਵਰਾ ਅਚ੍ਚਿਮਤੀ ਸੁਤਾਤਿ ਤਾਸਂ ਨਾਮਂ. ਚ-ਸਦ੍ਦੋ ਸਮੁਚ੍ਚਯਤ੍ਥੋ. ਰਾਜਵਰਸ੍ਸਾਤਿ ਚਤੁਨ੍ਨਂ ਮਹਾਰਾਜਾਨਂ ਵਰਸ੍ਸ ਸੇਟ੍ਠਸ੍ਸ ਦੇਵਰਾਜਸ੍ਸ. ਸਕ੍ਕਸ੍ਸ ਪਰਿਚਾਰਿਕਾਤਿ ਅਧਿਪ੍ਪਾਯੋ. ਰਞ੍ਞੋਤਿ ਮਹਾਰਾਜਸ੍ਸ. ਤੇਨਾਹ ‘‘ਵੇਸ੍ਸਵਣਸ੍ਸ ਧੀਤਾ’’ਤਿ, ਇਦਂ ਪਚ੍ਚੇਕਂ ਯੋਜੇਤਬ੍ਬਂ, ਵਚਨਵਿਪਲ੍ਲਾਸੋ ਵਾ, ਧੀਤਰੋਤਿ ਅਤ੍ਥੋ. ਰਾਜਤਿ ਵਿਜ੍ਜੋਤਤੀਤਿ ਰਾਜੀ, ਰਾਜੀਤਿ ਮਤਾ ਪਞ੍ਞਾਤਾ ਰਾਜੀਮਤੀ, ਇਦਂ ਤਾਸਂ ਸਬ੍ਬਾਸਂ ਵਿਸੇਸਨਂ. ਨਾਮਮੇਵ ਏਤਂ ਏਕਿਸ੍ਸਾ ਦੇਵਤਾਯਾਤਿ ਕੇਚਿ, ਤੇਸਂ ਮਤੇਨ ‘‘ਪਵਰਾ’’ਤਿ ਸਬ੍ਬਾਸਂ ਵਿਸੇਸਨਮੇਵ. ਧਮ੍ਮਗੁਣੇਹੀਤਿ ਧਮ੍ਮਿਯੇਹਿ ਧਮ੍ਮਤੋ ਅਨਪੇਤੇਹਿ ਗੁਣੇਹਿ, ਯਥਾਭੁਚ੍ਚਗੁਣੇਹੀਤਿ ਅਤ੍ਥੋ. ਸੋਭਥਾਤਿ ਵਿਰੋਚਥ.

੩੧੭. ਪਞ੍ਚੇਤ੍ਥ ਨਾਰਿਯੋਤਿ ਪਞ੍ਚ ਯਥਾਵੁਤ੍ਤਨਾਮਾ ਦੇਵਧੀਤਰੋ ਏਤ੍ਥ ਇਮਸ੍ਮਿਂ ਹਿਮਵਨ੍ਤਪਦੇਸੇ. ਸੀਤੋਦਕਂ ਉਪ੍ਪਲਿਨਿਂ ਸਿਵਂ ਨਦਿਨ੍ਤਿ ਅਨੋਤਤ੍ਤਦਹਤੋ ਨਿਕ੍ਖਨ੍ਤਨਦਿਮੁਖਂ ਸਨ੍ਧਾਯ ਵਦਤਿ. ਨਚ੍ਚਿਤ੍ਵਾ ਗਾਯਿਤ੍ਵਾਤਿ ਪਿਤੁ ਵੇਸ੍ਸਵਣਸ੍ਸ ਆਣਾਯ ਦੇਵਸਮਾਗਮੇ ਤਾਹਿ ਕਤਸ੍ਸ ਨਚ੍ਚਗੀਤਸ੍ਸ ਵਸੇਨ ਵੁਤ੍ਤਂ. ਸੁਤਾ ਲਤਂ ਬ੍ਰਵੀਤਿ ਸੁਤਾ ਦੇਵਧੀਤਾ ਲਤਂ ਅਤ੍ਤਨੋ ਭਗਿਨਿਂ ਕਥੇਸਿ. ‘‘ਸੁਤਾ ਲਤਂ ਬ੍ਰਵੁ’’ਨ੍ਤਿਪਿ ਪਠਨ੍ਤਿ, ਸੁਤਾ ਧੀਤਰੋ ਵੇਸ੍ਸਵਣਸ੍ਸ ਮਹਾਰਾਜਸ੍ਸ ਲਤਂ ਕਥੇਸੁਨ੍ਤਿ ਅਤ੍ਥੋ.

੩੧੮. ਤਿਮਿਰਤਮ੍ਬਕ੍ਖੀਤਿ ਨਿਚੁਲਕੇਸਰਭਾਸਸਦਿਸੇਹਿ ਤਮ੍ਬਰਾਜੀਹਿ ਸਮਨ੍ਨਾਗਤਕ੍ਖਿ. ਨਭੇਵ ਸੋਭਨੇਤਿ ਨਭਂ ਵਿਯ ਸੋਭਮਾਨੇ, ਸਰਦਸਮਯੇ ਅਬ੍ਭਮਹਿਕਾਦਿਉਪਕ੍ਕਿਲੇਸਵਿਮੁਤ੍ਤਂ ਨਭਂ ਵਿਯ ਸੁਵਿਸੁਦ੍ਧਙ੍ਗਪਚ੍ਚਙ੍ਗਤਾਯ ਵਿਰਾਜਮਾਨੇਤਿ ਅਤ੍ਥੋ. ਅਥ ਵਾ ਨਭੇਵਾਤਿ ਨਭੇ ਏਵ, ਸਮੁਚ੍ਚਯਤ੍ਥੋ ਏਵ-ਸਦ੍ਦੋ, ਆਕਾਸਟ੍ਠਵਿਮਾਨੇਸੁ ਹਿਮਵਨ੍ਤਯੁਗਨ੍ਧਰਾਦਿਭੂਮਿਪਟਿਬਦ੍ਧਟ੍ਠਾਨੇਸੁ ਚਾਤਿ ਸਬ੍ਬਤ੍ਥੇਵ ਸੋਭਮਾਨੇਤਿ ਅਤ੍ਥੋ. ਕੇਨ ਕਤੋਤਿ ਕੇਨ ਕੀਦਿਸੇਨ ਪੁਞ੍ਞੇਨ ਨਿਬ੍ਬਤ੍ਤਿਤੋ. ਯਸੋਤਿ ਪਰਿਵਾਰਸਮ੍ਪਤ੍ਤਿ ਕਿਤ੍ਤਿਸਦ੍ਦੋ ਚ. ਕਿਤ੍ਤਿਸਦ੍ਦਗ੍ਗਹਣੇਨ ਚ ਕਿਤ੍ਤਿਸਦ੍ਦਹੇਤੁਭੂਤਾ ਗੁਣਾ ਗਯ੍ਹਨ੍ਤਿ.

੩੧੯. ਪਤਿਨੋ ਪਿਯਤਰਾਤਿ ਸਾਮਿਨੋ ਪਿਯਤਰਾ ਸਾਮਿਵਲ੍ਲਭਾ. ਤੇਨਸ੍ਸਾ ਸੁਭਗਤਂ ਦਸ੍ਸੇਤਿ. ਵਿਸਿਟ੍ਠਕਲ੍ਯਾਣਿਤਰਸ੍ਸੂ ਰੂਪਤੋਤਿ ਰੂਪਸਮ੍ਪਤ੍ਤਿਯਾ ਵਿਸਿਟ੍ਠਾ ਉਤ੍ਤਮਾ ਕਲ੍ਯਾਣਿਤਰਾ ਸੁਨ੍ਦਰਤਰਾ, ਅਸ੍ਸੂਤਿ ਨਿਪਾਤਮਤ੍ਤਂ. ‘‘ਵਿਸਿਟ੍ਠਕਲ੍ਯਾਣਿਤਰਾਸਿ ਰੂਪਤੋ’’ਤਿ ਚ ਪਠਨ੍ਤਿ. ਪਦਕ੍ਖਿਣਾਤਿ ਪਕਾਰੇਹਿ, ਵਿਸੇਸੇਨ ਵਾ ਦਕ੍ਖਿਣਾ ਕੁਸਲਾ. ਨਚ੍ਚਨਗੀਤਵਾਦਿਤੇਤਿ ਏਤ੍ਥ ਨਚ੍ਚਨਾਤਿ ਵਿਭਤ੍ਤਿਲੋਪੋ ਕਤੋ, ਨਚ੍ਚੇ ਚ ਗੀਤੇ ਚ ਵਾਦਿਤੇ ਚਾਤਿ ਅਤ੍ਥੋ. ਨਰਨਾਰਿਪੁਚ੍ਛਿਤਾਤਿ ਦੇਵਪੁਤ੍ਤੇਹਿ ਦੇਵਧੀਤਾਹਿ ਚ ‘‘ਕਹਂ ਲਤਾ, ਕਿਂ ਕਰੋਤਿ ਲਤਾ’’ਤਿ ਰੂਪਦਸ੍ਸਨਤ੍ਥਞ੍ਚੇਵ ਸਿਪ੍ਪਦਸ੍ਸਨਤ੍ਥਞ੍ਚ ਪੁਚ੍ਛਿਤਾ.

੩੨੧. ਨਿਚ੍ਚਂ ਕਾਯੇਨ ਅਸਂਸਟ੍ਠਤਾਯ ਦੇਵੋ ਵਿਯ ਰਮੇਤਿ, ਦੁਤਿਯੋ ਵਰੋਤਿ ਵਾ ਦੇਵਰੋ, ਭਤ੍ਤੁ ਕਨਿਟ੍ਠਭਾਤਾ, ਸਹ ਦੇਵਰੇਨਾਤਿ ਸਦੇਵਰਂ. ਸਸ੍ਸੁ ਚ ਸਸੁਰੋ ਚ ਸਸੁਰਾ, ਸਹ ਸਸੁਰੇਹੀਤਿ ਸਸ੍ਸਸੁਰਂ. ਸਹ ਦਾਸੇਹਿ ਦਾਸੀਹਿ ਚਾਤਿ ਸਦਾਸਕਂ ਪਤਿਮਾਭਿਰਾਧਯਿਨ੍ਤਿ ਸਮ੍ਬਨ੍ਧੋ. ਤਮ੍ਹਿ ਕਤੋਤਿ ਤਮ੍ਹਿ ਕੁਲੇ, ਕਾਲੇ ਵਾ ਸੁਣਿਸਾਕਾਲੇ ਕਤੋ ਯਸੋ ਤਨ੍ਨਿਬ੍ਬਤ੍ਤਕਪੁਞ੍ਞਸ੍ਸ ਨਿਬ੍ਬਤ੍ਤਨੇਨਾਤਿ ਅਧਿਪ੍ਪਾਯੋ. ਮਮਾਤਿ ਇਦਂ ‘‘ਕਤੋ’’ਤਿ ਪਦਂ ਅਪੇਕ੍ਖਿਤ੍ਵਾ ‘‘ਮਯਾ’’ਤਿ ਪਰਿਣਾਮੇਤਬ੍ਬਂ.

੩੨੨. ਚਤੁਬ੍ਭਿ ਠਾਨੇਹੀਤਿ ਚਤੂਹਿ ਕਾਰਣੇਹਿ, ਚਤੂਸੁ ਵਾ ਠਾਨੇਸੁ ਨਿਮਿਤ੍ਤਭੂਤੇਸੁ. ਵਿਸੇਸਮਜ੍ਝਗਾਤਿ ਅਞ੍ਞਾਹਿ ਅਤਿਸਯਂ ਅਧਿਗਤਾ. ਆਯੁਞ੍ਚ ਵਣ੍ਣਞ੍ਚ ਸੁਖਂ ਬਲਞ੍ਚਾਤਿ ‘‘ਚਤੂਹਿ ਠਾਨੇਹੀ’’ਤਿ ਵੁਤ੍ਤਾਨਂ ਸਰੂਪਤੋ ਦਸ੍ਸਨਂ. ਆਯੁਆਦਯੋ ਏਵ ਹਿਸ੍ਸਾ ਅਞ੍ਞਾਹਿ ਵਿਸਿਟ੍ਠਸਭਾਵਤਾਯ ਵਿਸੇਸਾ ਤਸ੍ਸਾ ਤਥਾ ਸਮ੍ਭਾਵਨਾਵਸੇਨ ਗਹੇਤਬ੍ਬਤਾਯ ਹੇਤੁਭਾਵਤੋ ‘‘ਠਾਨ’’ਨ੍ਤਿ ਚ ਵੁਤ੍ਤਂ. ਵਿਸੇਸਮਜ੍ਝਗਾ. ਕੀਦਿਸਂ? ਆਯੁਞ੍ਚ ਵਣ੍ਣਞ੍ਚ ਸੁਖਞ੍ਚ ਬਲਞ੍ਚਾਤਿ ਯੋਜਨਾ.

੩੨੩. ਸੁਤਂ ਨੁ ਤਂ ਭਾਸਤਿ ਯਂ ਅਯਂ ਲਤਾਤਿ ਅਯਂ ਲਤਾ ਅਮ੍ਹਾਕਂ ਜੇਟ੍ਠਭਗਿਨੀ ਯਂ ਭਾਸਤਿ, ਤਂ ਤੁਮ੍ਹੇਹਿ ਸੁਤਂ ਨੁ ਕਿਂ ਅਸੁਤ’’ਨ੍ਤਿ ਇਤਰਾ ਤਿਸ੍ਸੋ ਭਗਿਨਿਯੋ ਪੁਚ੍ਛਤਿ. ਯਂ ਨੋਤਿ ਯਂ ਅਮ੍ਹਾਕਂ ਸਂਸਯਿਤਂ. ਨੋਤਿ ਨਿਪਾਤਮਤ੍ਤਂ, ਪੁਨ ਨੋਤਿ ਅਮ੍ਹਾਕਂ, ਅਵਧਾਰਣੇ ਵਾ ‘‘ਨ ਨੋ ਸਮਂ ਅਤ੍ਥੀ’’ਤਿਆਦੀਸੁ (ਖੁ. ਪਾ. ੬.੩; ਸੁ. ਨਿ. ੨੨੬) ਵਿਯ, ਤੇਨ ਅਕਿਤ੍ਤਯਿਯੇਵ, ਅਵਿਪਰੀਤਂ ਬ੍ਯਾਕਾਸਿਯੇਵਾਤਿ ਅਤ੍ਥੋ. ਪਤਿਨੋ ਕਿਰਮ੍ਹਾਕਂ ਵਿਸਿਟ੍ਠ ਨਾਰੀਨਂ, ਗਤੀ ਚ ਤਾਸਂ ਪਵਰਾ ਚ ਦੇਵਤਾਤਿ ਅਨਤ੍ਥਤੋ ਪਾਲਨਤੋ ਪਤਿਨੋ ਸਾਮਿਕਾ ਨਾ ਅਮ੍ਹਾਕਂ ਨਾਰੀਨਂ ਇਤ੍ਥੀਨਂ ਵਿਸਿਟ੍ਠਾ ਗਤਿ ਚ ਤਾਸਂ ਪਟਿਸਰਣਞ੍ਚ, ਤਾਸਂ ਮਾਤੁਗਾਮਾਨਂ ਸਰਣਤੋ ਪਵਰਾ ਉਤ੍ਤਮਾ ਦੇਵਤਾ ਚ ਸਮ੍ਮਦੇਵ ਆਰਾਧਿਤਾ ਸਮ੍ਪਤਿ ਆਯਤਿਞ੍ਚ ਹਿਤਸੁਖਾਵਹਾਤਿ ਅਤ੍ਥੋ.

੩੨੪. ਪਤੀਸੁ ਧਮ੍ਮਂ ਪਚਰਾਮ ਸਬ੍ਬਾਤਿ ਸਬ੍ਬਾਵ ਮਯਂ ਪਤੀਸੁ ਅਤ੍ਤਨੋ ਸਾਮਿਕੇਸੁ ਪੁਬ੍ਬੁਟ੍ਠਾਨਾਦਿਕਂ ਚਰਿਤਬ੍ਬਧਮ੍ਮਂ ਪਚਰਾਮ. ਯਤ੍ਥਾਤਿ ਯਂ ਨਿਮਿਤ੍ਤਂ, ਯਸ੍ਮਿਂ ਵਾ ਪਤੀਸੁ ਚਰਿਤਬ੍ਬਧਮ੍ਮੇ ਚਰਿਯਮਾਨੇ ਇਤ੍ਥਿਯੋ ਪਤਿਬ੍ਬਤਾ ਨਾਮ ਭਵਨ੍ਤਿ. ਲਚ੍ਛਾਮਸੇ ਭਾਸਤਿ ਯਂ ਅਯਂ ਲਤਾਤਿ ਅਯਂ ਲਤਾ ਯਂ ਸਮ੍ਪਤ੍ਤਿਂ ਏਤਰਹਿ ਲਭਤੀਤਿ ਭਾਸਤਿ, ਤਂ ਸਮ੍ਪਤ੍ਤਿਂ ਪਤੀਸੁ ਧਮ੍ਮਂ ਪਚਰਿਤ੍ਵਾਤਿ ਲਭਿਸ੍ਸਾਮ.

੩੨੫. ਪਬ੍ਬਤਸਾਨੁਗੋਚਰੋਤਿ ਪਬ੍ਬਤਵਨਸਣ੍ਡਚਾਰੀ. ਮਹਿਨ੍ਧਰਂ ਪਬ੍ਬਤਮਾਵਸਿਤ੍ਵਾਤਿ ਮਹਿਂ ਧਾਰੇਤੀਤਿ ਮਹਿਨ੍ਧਰਨਾਮਕਂ ਪਬ੍ਬਤਂ ਅਚਲਂ ਆਵਸਿਤ੍ਵਾ ਅਧਿਵਸਿਤ੍ਵਾ, ਤਤ੍ਥ ਵਸਨ੍ਤੋਤਿ ਅਤ੍ਥੋ. ‘‘ਆਵਸਿਤ੍ਵਾ’’ਤਿ ਹਿ ਪਦਂ ਅਪੇਕ੍ਖਿਤ੍ਵਾ ਭੁਮ੍ਮਤ੍ਥੇ ਚੇਤਂ ਉਪਯੋਗਵਚਨਂ. ਪਸਯ੍ਹਾਤਿ ਅਭਿਭਵਿਤ੍ਵਾ. ਖੁਦ੍ਦੇਤਿ ਬਲਵਸੇਨਨਿਹੀਨੇ ਪਮਾਣਤੋ ਪਨ ਮਹਨ੍ਤੇ ਹਤ੍ਥਿਆਦਿਕੇਪਿ ਮਿਗੇ ਸੋ ਹਨ੍ਤਿਯੇਵ.

੩੨੬. ਤਥੇਵਾਤਿ ਗਾਥਾਯ ਅਯਂ ਉਪਮਾਸਂਸਨ੍ਦਨੇਨ ਸਦ੍ਧਿਂ ਅਤ੍ਥਯੋਜਨਾ – ਯਥਾ ਸੀਹੋ ਅਤ੍ਤਨੋ ਨਿਵਾਸਗੋਚਰਟ੍ਠਾਨਭੂਤਂ ਪਬ੍ਬਤਂ ਨਿਸ੍ਸਾਯ ਵਸਨ੍ਤੋ ਅਤ੍ਤਨੋ ਯਥਿਚ੍ਛਿਤਮਤ੍ਥਂ ਸਾਧੇਤਿ, ਏਵਮੇਵ ਸਾ ਸਦ੍ਧਾ ਪਸਨ੍ਨਾ ਅਰਿਯਸਾਵਿਕਾ ਘਾਸਚ੍ਛਾਦਨਾਦੀਹਿ ਭਰਣਤੋ ਪੋਸਨਤੋ ਭਤ੍ਤਾਰਂ ਪਤਿਂ ਸਾਮਿਕਂ ਨਿਸ੍ਸਾਯ ਵਸਨ੍ਤੀ ਸਬ੍ਬਤ੍ਥਾਪਿ ਪਤਿਅਨੁਕੂਲਤਾਸਙ੍ਖਾਤੇਨ ਵਤੇਨ ਤਂ ਅਨੁਬ੍ਬਤਾ ਪਰਿਜਨਾਦੀਸੁ ਉਪ੍ਪਜ੍ਜਨਕਂ ਕੋਧਂ ਵਧਿਤ੍ਵਾ ਪਜਹਿਤ੍ਵਾ ਪਰਿਗ੍ਗਹਵਤ੍ਥੂਸੁ ਉਪ੍ਪਜ੍ਜਨਕਂ ਮਚ੍ਛੇਰਂ ਅਭਿਭੁਯ੍ਯ ਅਭਿਭਵਿਤ੍ਵਾ ਅਨੁਪ੍ਪਾਦੇਤ੍ਵਾ ਪਤਿਬ੍ਬਤਾਧਮ੍ਮਸ੍ਸ ਚ ਉਪਾਸਿਕਾਧਮ੍ਮਸ੍ਸ ਚ ਸਮ੍ਮਦੇਵ ਚਰਣਤੋ ਧਮ੍ਮਚਾਰਿਨੀ ਸਾ ਸਗ੍ਗਮ੍ਹਿ ਦੇਵਲੋਕੇ ਮੋਦਤਿ, ਪਮੋਦਂ ਆਪਜ੍ਜਤੀਤਿ. ਸੇਸਂ ਵੁਤ੍ਤਨਯਮੇਵ.

ਲਤਾਵਿਮਾਨਵਣ੍ਣਨਾ ਨਿਟ੍ਠਿਤਾ.

੫. ਗੁਤ੍ਤਿਲਵਿਮਾਨਵਣ੍ਣਨਾ

ਸਤ੍ਤਤਨ੍ਤਿਂ ਸੁਮਧੁਰਨ੍ਤਿ ਗੁਤ੍ਤਿਲਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਰਾਜਗਹੇ ਵਿਹਰਨ੍ਤੇ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨੇਵ ਦੇਵਚਾਰਿਕਂ ਚਰਨ੍ਤੋ ਤਾਵਤਿਂਸਭਵਨਂ ਗਨ੍ਤ੍ਵਾ ਤਤ੍ਥ ਪਟਿਪਾਟਿਯਾ ਠਿਤੇਸੁ ਛਤ੍ਤਿਂਸਾਯ ਵਿਮਾਨੇਸੁ ਛਤ੍ਤਿਂਸ ਦੇਵਧੀਤਰੋ ਪਚ੍ਚੇਕਂ ਅਚ੍ਛਰਾਸਹਸ੍ਸਪਰਿਵਾਰਾ ਮਹਤਿਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤਿਯੋ ਦਿਸ੍ਵਾ ਤਾਹਿ ਪੁਬ੍ਬੇ ਕਤਕਮ੍ਮਂ ‘‘ਅਭਿਕ੍ਕਨ੍ਤੇਨ ਵਣ੍ਣੇਨਾ’’ਤਿਆਦੀਹਿ ਤੀਹਿ ਗਾਥਾਹਿ ਪਟਿਪਾਟਿਯਾ ਪੁਚ੍ਛਿ. ਤਾਪਿ ਤਸ੍ਸ ਪੁਚ੍ਛਾਨਨ੍ਤਰਂ ‘‘ਵਤ੍ਥੁਤ੍ਤਮਦਾਯਿਕਾ ਨਾਰੀ’’ਤਿਆਦਿਨਾ ਬ੍ਯਾਕਰਿਂਸੁ. ਅਥ ਥੇਰੋ ਤਤੋ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸਿ. ਤਂ ਸੁਤ੍ਵਾ ਭਗਵਾ ‘‘ਮੋਗ੍ਗਲ੍ਲਾਨ, ਤਾ ਦੇਵਤਾ ਨ ਕੇਵਲਂ ਤਯਾ ਏਵ ਪੁਚ੍ਛਿਤਾ ਏਵਂ ਬ੍ਯਾਕਰਿਂਸੁ, ਅਥ ਖੋ ਪੁਬ੍ਬੇ ਮਯਾਪਿ ਪੁਚ੍ਛਿਤਾ ਏਵਮੇਵ ਬ੍ਯਾਕਰਿਂਸੂ’’ਤਿ ਵਤ੍ਵਾ ਥੇਰੇਨ ਯਾਚਿਤੋ ਅਤੀਤਂ ਅਤ੍ਤਨੋ ਗੁਤ੍ਤਿਲਾਚਰਿਯਂ ਕਥੇਸਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਗਨ੍ਧਬ੍ਬਕੁਲੇ ਨਿਬ੍ਬਤ੍ਤਿਤ੍ਵਾ ਗਨ੍ਧਬ੍ਬਸਿਪ੍ਪੇ ਪਰਿਯੋਦਾਤਸਿਪ੍ਪਤਾਯ ਤਿਮ੍ਬਰੁਨਾਰਦਸਦਿਸੋ ਸਬ੍ਬਦਿਸਾਸੁ ਪਾਕਟੋ ਪਞ੍ਞਾਤਾ ਆਚਰਿਯੋ ਅਹੋਸਿ ਨਾਮੇਨ ਗੁਤ੍ਤਿਲੋ ਨਾਮ. ਸੋ ਅਨ੍ਧੇ ਜਿਣ੍ਣੇ ਮਾਤਾਪਿਤਰੋ ਪੋਸੇਸਿ. ਤਸ੍ਸ ਸਿਪ੍ਪਨਿਪ੍ਫਤ੍ਤਿਂ ਸੁਤ੍ਵਾ ਉਜ੍ਜੇਨਿਵਾਸੀ ਮੁਸਿਲੋ ਨਾਮ ਗਨ੍ਧਬ੍ਬੋ ਉਪਗਨ੍ਤ੍ਵਾ ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤੋ ‘‘ਕਸ੍ਮਾ ਆਗਤੋਸੀ’’ਤਿ ਚ ਵੁਤ੍ਤੇ ‘‘ਤੁਮ੍ਹਾਕਂ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹਿਤੁ’’ਨ੍ਤਿ ਆਹ. ਗੁਤ੍ਤਿਲਾਚਰਿਯੋ ਤਂ ਓਲੋਕੇਤ੍ਵਾ ਲਕ੍ਖਣਕੁਸਲਤਾਯ ‘‘ਅਯਂ ਪੁਰਿਸੋ ਵਿਸਮਜ੍ਝਾਸਯੋ ਕਕ੍ਖਲ਼ੋ ਫਰੁਸੋ ਅਕਤਞ੍ਞੂ ਭਵਿਸ੍ਸਤਿ, ਨ ਸਙ੍ਗਹੇਤਬ੍ਬੋ’’ਤਿ ਸਿਪ੍ਪੁਗ੍ਗਹਣਤ੍ਥਂ ਓਕਾਸਂ ਨਾਕਾਸਿ. ਸੋ ਤਸ੍ਸ ਮਾਤਾਪਿਤਰੋ ਪਯਿਰੁਪਾਸਿਤ੍ਵਾ ਤੇਹਿ ਯਾਚਾਪੇਸਿ. ਗੁਤ੍ਤਿਲਾਚਰਿਯੋ ਮਾਤਾਪਿਤੂਹਿ ਨਿਪ੍ਪੀਲ਼ਿਯਮਾਨੋ ‘‘ਗਰੁਵਚਨਂ ਅਲਙ੍ਘਨੀਯ’’ਨ੍ਤਿ ਤਸ੍ਸ ਸਿਪ੍ਪਂ ਪਟ੍ਠਪੇਤ੍ਵਾ ਵਿਗਤਮਚ੍ਛਰਿਯਤਾਯ ਕਾਰੁਣਿਕਤਾਯ ਚ ਆਚਰਿਯਮੁਟ੍ਠਿਂ ਅਕਤ੍ਵਾ ਅਨਵਸੇਸਤੋ ਸਿਪ੍ਪਂ ਸਿਕ੍ਖਾਪੇਸਿ.