੧੦. ਪਾਰਿਚ੍ਛਤ੍ਤਕਵਿਮਾਨਵਣ੍ਣਨਾ

ਪਾਰਿਚ੍ਛਤ੍ਤਕੇ ਕੋਵਿਲ਼ਾਰੇਤਿ ਪਾਰਿਚ੍ਛਤ੍ਤਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਸਾਵਤ੍ਥਿਵਾਸੀ ਅਞ੍ਞਤਰੋ ਉਪਾਸਕੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ, ਸ੍ਵਾਤਨਾਯ ਨਿਮਨ੍ਤੇਤ੍ਵਾ, ਅਤ੍ਤਨੋ ਗੇਹਦ੍ਵਾਰੇ ਮਹਨ੍ਤਂ ਮਣ੍ਡਪਂ ਸਜ੍ਜੇਤ੍ਵਾ ਸਾਣਿਪਾਕਾਰਂ ਪਰਿਕ੍ਖਿਪਿਤ੍ਵਾ ਉਪਰਿ ਵਿਤਾਨਂ ਬਨ੍ਧਿਤ੍ਵਾ ਧਜਪਟਾਕਾਦਯੋ ਉਸ੍ਸਾਪੇਤ੍ਵਾ ਨਾਨਾਵਿਰਾਗਵਣ੍ਣਾਨਿ ਵਤ੍ਥਾਨਿ ਗਨ੍ਧਦਾਮਮਾਲਾਦਾਮਾਨਿ ਚ ਓਲਮ੍ਬੇਤ੍ਵਾ ਸਿਤ੍ਤਸਮ੍ਮਟ੍ਠੇ ਪਦੇਸੇ ਆਸਨਾਨਿ ਪਞ੍ਞਾਪੇਤ੍ਵਾ ਭਗਵਤੋ ਕਾਲਂ ਆਰੋਚੇਸਿ. ਅਥ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਦੇਵਵਿਮਾਨਂ ਵਿਯ ਅਲਙ੍ਕਤਪਟਿਯਤ੍ਤਂ ਮਣ੍ਡਪਂ ਪਵਿਸਿਤ੍ਵਾ ਸਹਸ੍ਸਰਂਸੀ ਵਿਯ ਅਣ੍ਣਵਕੁਚ੍ਛਿਂ ਓਭਾਸਯਮਾਨੋ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਉਪਾਸਕੋ ਗਨ੍ਧਪੁਪ੍ਫਧੂਮਦੀਪੇਹਿ ਭਗਵਨ੍ਤਂ ਪੂਜੇਸਿ.

ਤੇਨ ਚ ਸਮਯੇਨ ਅਞ੍ਞਤਰਾ ਕਟ੍ਠਹਾਰਿਕਾ ਇਤ੍ਥੀ ਅਨ੍ਧਵਨੇ ਸੁਪੁਪ੍ਫਿਤਂ ਅਸੋਕਰੁਕ੍ਖਂ ਦਿਸ੍ਵਾ ਸਪਲ੍ਲਵਙ੍ਕੁਰਾਨਿ ਪਿਣ੍ਡੀਕਤਾਨਿ ਬਹੂਨਿ ਅਸੋਕਪੁਪ੍ਫਾਨਿ ਗਹੇਤ੍ਵਾ ਆਗਚ੍ਛਨ੍ਤੀ, ਭਗਵਨ੍ਤਂ ਤਤ੍ਥ ਨਿਸਿਨ੍ਨਂ ਦਿਸ੍ਵਾ ਪਸਨ੍ਨਚਿਤ੍ਤਾ ਆਸਨਸ੍ਸ ਸਮਨ੍ਤਤੋ ਤੇਹਿ ਪੁਪ੍ਫੇਹਿ ਪੁਪ੍ਫਸਨ੍ਥਰਂ ਸਨ੍ਥਰਨ੍ਤੀ, ਭਗਵਤੋ ਪੂਜਂ ਕਤ੍ਵਾ ਵਨ੍ਦਿਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਨਮਸ੍ਸਮਾਨਾ ਅਗਮਾਸਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ, ਅਚ੍ਛਰਾਸਹਸ੍ਸਪਰਿਵਾਰਾ ਯੇਭੁਯ੍ਯੇਨ ਨਨ੍ਦਨਵਨੇ ਨਚ੍ਚਨ੍ਤੀ ਗਾਯਨ੍ਤੀ ਪਾਰਿਚ੍ਛਤ੍ਤਕਮਾਲਾ ਗਨ੍ਥੇਨ੍ਤੀ ਪਮੋਦਮਾਨਾ ਕੀਲ਼ਨ੍ਤੀ ਸੁਖਂ ਅਨੁਭਵਤਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨ ਦੇਵਚਾਰਿਕਂ ਚਰਨ੍ਤੋ ਤਾਵਤਿਂਸਭਵਨਂ ਗਨ੍ਤ੍ਵਾ ਤਂ ਦਿਸ੍ਵਾ ਤਾਯ ਕਤਕਮ੍ਮਂ ਇਮਾਹਿ ਗਾਥਾਹਿ ਪੁਚ੍ਛਿ –

੬੮੦. ‘‘ਪਾਰਿਚ੍ਛਤ੍ਤਕੇ ਕੋਵਿਲ਼ਾਰੇ, ਰਮਣੀਯੇ ਮਨੋਰਮੇ;

ਦਿਬ੍ਬਮਾਲਂ ਗਨ੍ਥਮਾਨਾ, ਗਾਯਨ੍ਤੀ ਸਮ੍ਪਮੋਦਸਿ.

੬੮੧. ‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਸਦ੍ਦਾ ਨਿਚ੍ਛਰਨ੍ਤਿ, ਸਵਨੀਯਾ ਮਨੋਰਮਾ.

੬੮੨. ‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਗਨ੍ਧਾ ਪਵਾਯਨ੍ਤਿ, ਸੁਚਿਗਨ੍ਧਾ ਮਨੋਰਮਾ.

੬੮੩. ‘‘ਵਿਵਤ੍ਤਮਾਨਾ ਕਾਯੇਨ, ਯਾ ਵੇਣੀਸੁ ਪਿਲ਼ਨ੍ਧਨਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

੬੮੪. ‘‘ਵਟਂਸਕਾ ਵਾਤਧੁਤਾ, ਵਾਤੇਨ ਸਮ੍ਪਕਮ੍ਪਿਤਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

੬੮੫. ‘‘ਯਾਪਿ ਤੇ ਸਿਰਸ੍ਮਿਂ ਮਾਲਾ, ਸੁਚਿਗਨ੍ਧਾ ਮਨੋਰਮਾ;

ਵਾਤਿ ਗਨ੍ਧੋ ਦਿਸਾ ਸਬ੍ਬਾ, ਰੁਕ੍ਖੋ ਮਞ੍ਜੂਸਕੋ ਯਥਾ.

੬੮੬. ‘‘ਘਾਯਸੇ ਤਂ ਸੁਚਿਗਨ੍ਧਂ, ਰੂਪਂ ਪਸ੍ਸਸਿ ਅਮਾਨੁਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੬੮੦. ਤਤ੍ਥ ਪਾਰਿਚ੍ਛਤ੍ਤਕੇ ਕੋਵਿਲ਼ਾਰੇਤਿ ਪਾਰਿਚ੍ਛਤ੍ਤਕਨਾਮਕੇ ਕੋਵਿਲ਼ਾਰਪੁਪ੍ਫੇ ਆਦਾਯ ਦਿਬ੍ਬਮਾਲਂ ਗਨ੍ਥਮਾਨਾਤਿ ਯੋਜਨਾ. ਯਞ੍ਹਿ ਲੋਕਿਯਾ ‘‘ਪਾਰਿਜਾਤ’’ਨ੍ਤਿ ਵਦਨ੍ਤਿ, ਤਂ ਮਾਗਧਭਾਸਾਯ ‘‘ਪਾਰਿਚ੍ਛਤ੍ਤਕ’’ਨ੍ਤਿ ਵੁਚ੍ਚਤਿ. ਕੋਵਿਲ਼ਾਰੋਤਿ ਚ ਕੋਵਿਲ਼ਾਰਜਾਤਿਕੋ, ਸੋ ਚ ਮਨੁਸ੍ਸਲੋਕੇਪਿ ਦੇਵਲੋਕੇਪਿ ਕੋਵਿਲ਼ਾਰੋ, ਤਸ੍ਸਾਪਿ ਜਾਤੀਤਿ ਵਦਨ੍ਤਿ.

੬੮੧. ਤਸ੍ਸਾ ਪਨ ਦੇਵਤਾਯ ਨਚ੍ਚਨਕਾਲੇ ਅਙ੍ਗਭਾਰਵਸੇਨ ਸਰੀਰਤੋ ਚ ਪਿਲ਼ਨ੍ਧਨਤੋ ਚ ਅਤਿਵਿਯ ਮਧੁਰੋ ਸਦ੍ਦੋ ਨਿਚ੍ਛਰਤਿ, ਗਨ੍ਧੋ ਸਦਾ ਸਬ੍ਬਾ ਦਿਸਾਪਿ ਫਰਿਤ੍ਵਾ ਤਿਟ੍ਠਤਿ. ਤੇਨਾਹ ‘‘ਤਸ੍ਸਾ ਤੇ ਨਚ੍ਚਮਾਨਾਯਾ’’ਤਿਆਦਿ. ਤਤ੍ਥ ਸਵਨੀਯਾਤਿ ਸੋਤੁਂ ਯੁਤ੍ਤਾ, ਸਵਨਸ੍ਸ ਵਾ ਹਿਤਾ, ਕਣ੍ਣਸੁਖਾਤਿ ਅਤ੍ਥੋ.

੬੮੩. ਵਿਵਤ੍ਤਮਾਨਾ ਕਾਯੇਨਾਤਿ ਤਵ ਕਾਯੇਨ ਸਰੀਰੇਨ ਪਰਿਵਤ੍ਤਮਾਨੇਨ, ਇਤ੍ਥਮ੍ਭੂਤਲਕ੍ਖਣੇ ਚੇਤਂ ਕਰਣਵਚਨਂ. ਯਾ ਵੇਣੀਸੁ ਪਿਲ਼ਨ੍ਧਨਾਤਿ ਯਾਨਿ ਤੇ ਕੇਸਵੇਣੀਸੁ ਪਿਲ਼ਨ੍ਧਨਾਨਿ, ਵਿਭਤ੍ਤਿਲੋਪੋ ਚੇਤ੍ਥ ਦਟ੍ਠਬ੍ਬੋ, ਲਿਙ੍ਗਵਿਪਲ੍ਲਾਸੋ ਵਾ.

੬੮੪. ਵਟਂਸਕਾਤਿ ਰਤਨਮਯਾ ਕਣ੍ਣਿਕਾ ਵਟਂਸਕਾਤਿ ਅਤ੍ਥੋ. ਵਾਤਧੁਤਾਤਿ ਮਨ੍ਦੇਨ ਮਾਲੁਤੇਨ ਧੂਪਯਮਾਨਾ. ਵਾਤੇਨ ਸਮ੍ਪਕਮ੍ਪਿਤਾਤਿ ਵਾਤੇਨ ਸਮਨ੍ਤਤੋ ਵਿਸੇਸਤੋ ਕਮ੍ਪਿਤਾ ਚਲਿਤਾ. ਅਥ ਵਾ ਵਟਂਸਕਾ ਵਾਤਧੁਤਾ, ਵਾਤੇਨ ਸਮ੍ਪਕਮ੍ਪਿਤਾਤਿ ਅਵਾਤੇਰਿਤਾਪਿ ਵਾਤੇਰਿਤਾਪਿ ਯੇ ਤੇ ਵਟਂਸਕਾ ਕਮ੍ਪਿਤਾ, ਤੇਸਂ ਸੁਯ੍ਯਤਿ ਨਿਗ੍ਘੋਸੋਤਿ ਅਤ੍ਥਯੋਜਨਾ.

੬੮੫. ਵਾਤਿ ਗਨ੍ਧੋ ਦਿਸਾ ਸਬ੍ਬਾਤਿ ਤਸ੍ਸਾ ਤੇ ਸਿਰਸ੍ਮਿਂ ਦਿਬ੍ਬਮਾਲਾਯ ਗਨ੍ਧੋ ਵਾਯਤਿ ਸਬ੍ਬਾ ਦਿਸਾ. ਯਥਾ ਕਿਂ? ਰੁਕ੍ਖੋ ਮਞ੍ਜੂਸਕੋ ਯਥਾਤਿ, ਯਥਾ ਨਾਮ ਮਞ੍ਜੂਸਕੋ ਰੁਕ੍ਖੋ ਸੁਪੁਪ੍ਫਿਤੋ ਅਤ੍ਤਨੋ ਗਨ੍ਧੇਨ ਬਹੂਨਿ ਯੋਜਨਾਨਿ ਫਰਮਾਨੋ ਸਬ੍ਬਾ ਦਿਸਾ ਵਾਯਤਿ, ਏਵਂ ਤਵ ਸਿਰਸ੍ਮਿਂ ਪਿਲ਼ਨ੍ਧਨਮਾਲਾਯ ਗਨ੍ਧੋਤਿ ਅਤ੍ਥੋ. ਸੋ ਕਿਰ ਰੁਕ੍ਖੋ ਗਨ੍ਧਮਾਦਨੇ ਪਚ੍ਚੇਕਬੁਦ੍ਧਾਨਂ ਉਪੋਸਥਕਰਣਮਣ੍ਡਲਮਾਲ਼ਕਮਜ੍ਝੇ ਤਿਟ੍ਠਤਿ. ਯਤ੍ਤਕਾਨਿ ਦੇਵਲੋਕੇ ਚ ਮਨੁਸ੍ਸਲੋਕੇ ਚ ਸੁਰਭਿਕੁਸੁਮਾਨਿ, ਤਾਨਿ ਤਸ੍ਸ ਸਾਖਗ੍ਗੇਸੁ ਨਿਬ੍ਬਤ੍ਤਨ੍ਤਿ. ਤੇਨ ਸੋ ਅਤਿਵਿਯ ਸੁਗਨ੍ਧੋ ਹੋਤਿ. ਏਵਂ ਤਾਯ ਦੇਵਤਾਯ ਪਿਲ਼ਨ੍ਧਨਮਾਲਾਯ ਗਨ੍ਧੋਤਿ. ਤੇਨ ਵੁਤ੍ਤਂ ‘‘ਰੁਕ੍ਖੋ ਮਞ੍ਜੂਸਕੋ ਯਥਾ’’ਤਿ.

੬੮੬. ਯਦਿਪਿ ਤਸ੍ਸ ਸਗ੍ਗਸ੍ਸ ਛਫਸ੍ਸਾਯਤਨਿਕਭਾਵਤੋ ਸਬ੍ਬਾਨਿਪਿ ਤਤ੍ਥ ਆਰਮ੍ਮਣਾਨਿ ਪਿਯਰੂਪਾਨਿਯੇਵ, ਗਨ੍ਧਰੂਪਾਨਂ ਪਨ ਸਵਿਸੇਸਾਨਂ ਤਸ੍ਸਾ ਦੇਵਤਾਯ ਲਾਭਿਭਾਵਤੋ ‘‘ਘਾਯਸੇ ਤਂ ਸੁਚਿਗਨ੍ਧਂ, ਰੂਪਂ ਪਸ੍ਸਸਿ ਅਮਾਨੁਸ’’ਨ੍ਤਿ ਵੁਤ੍ਤਂ.

ਅਥ ਦੇਵਤਾ ਦ੍ਵੀਹਿ ਗਾਥਾਹਿ ਬ੍ਯਾਕਾਸਿ –

੬੮੭. ‘‘ਪਭਸ੍ਸਰਂ ਅਚ੍ਚਿਮਨ੍ਤਂ, ਵਣ੍ਣਗਨ੍ਧੇਨ ਸਂਯੁਤਂ;

ਅਸੋਕਪੁਪ੍ਫਮਾਲਾਹਂ, ਬੁਦ੍ਧਸ੍ਸ ਉਪਨਾਮਯਿਂ.

੬੮੮. ‘‘ਤਾਹਂ ਕਮ੍ਮਂ ਕਰਿਤ੍ਵਾਨ, ਕੁਸਲਂ ਬੁਦ੍ਧਵਣ੍ਣਿਤਂ;

ਅਪੇਤਸੋਕਾ ਸੁਖਿਤਾ, ਸਮ੍ਪਮੋਦਾਮਨਾਮਯਾ’’ਤਿ.

੬੮੭. ਤਤ੍ਥ ਸੁਧੋਤਪਵਾਲ਼ਸਙ੍ਘਾਤਸਨ੍ਨਿਭਸ੍ਸ ਕਿਞ੍ਜਕ੍ਖਕੇਸਰਸਮੁਦਾਯੇਨ ਭਾਣੁਰਂਸਿਜਾਲਸ੍ਸ ਵਿਯ ਅਸੋਕਪੁਪ੍ਫੁਤ੍ਤਮਸ੍ਸ ਤਦਾ ਉਪਟ੍ਠਿਤਤਂ ਸਨ੍ਧਾਯਾਹ ‘‘ਪਭਸ੍ਸਰਂ ਅਚ੍ਚਿਮਨ੍ਤ’’ਨ੍ਤਿ. ਸੇਸਂ ਵੁਤ੍ਤਨਯਮੇਵ.

ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤਾਯ ਦੇਵਤਾਯ ਅਤ੍ਤਨੋ ਸੁਚਰਿਤਕਮ੍ਮੇ ਕਥਿਤੇ ਸਪਰਿਵਾਰਾਯ ਤਸ੍ਸਾ ਧਮ੍ਮਂ ਦੇਸੇਤ੍ਵਾ ਤਤੋ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਤਂ ਪਵਤ੍ਤਿਂ ਕਥੇਸਿ. ਭਗਵਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਮਹਾਜਨਸ੍ਸ ਧਮ੍ਮਂ ਦੇਸੇਸਿ, ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਪਾਰਿਚ੍ਛਤ੍ਤਕਵਿਮਾਨਵਣ੍ਣਨਾ ਨਿਟ੍ਠਿਤਾ.

ਇਤਿ ਪਰਮਤ੍ਥਦੀਪਨਿਯਾ ਖੁਦ੍ਦਕ-ਅਟ੍ਠਕਥਾਯ ਵਿਮਾਨਵਤ੍ਥੁਸ੍ਮਿਂ

ਦਸਵਤ੍ਥੁਪਟਿਮਣ੍ਡਿਤਸ੍ਸ ਤਤਿਯਸ੍ਸ ਪਾਰਿਚ੍ਛਤ੍ਤਕਵਗ੍ਗਸ੍ਸ

ਅਤ੍ਥਵਣ੍ਣਨਾ ਨਿਟ੍ਠਿਤਾ.