੮. ਮਲ੍ਲਿਕਾਵਿਮਾਨਵਣ੍ਣਨਾ

ਪੀਤਵਤ੍ਥੇ ਪੀਤਧਜੇਤਿ ਮਲ੍ਲਿਕਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਧਮ੍ਮਚਕ੍ਕਪ੍ਪਵਤ੍ਤਨਮਾਦਿਂ ਕਤ੍ਵਾ ਯਾਵ ਸੁਭਦ੍ਦਪਰਿਬ੍ਬਾਜਕਵਿਨਯਨਾ ਕਤਬੁਦ੍ਧਕਿਚ੍ਚੇ ਕੁਸਿਨਾਰਾਯਂ ਉਪਵਤ੍ਤਨੇ ਮਲ੍ਲਰਾਜੂਨਂ ਸਾਲਵਨੇ ਯਮਕਸਾਲਾਨਮਨ੍ਤਰੇ ਵਿਸਾਖਪੁਣ੍ਣਮਾਯਂ ਪਚ੍ਚੂਸਵੇਲਾਯਂ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੇ ਭਗਵਤਿ ਲੋਕਨਾਥੇ ਦੇਵਮਨੁਸ੍ਸੇਹਿ ਤਸ੍ਸ ਸਰੀਰਪੂਜਾਯ ਕਯਿਰਮਾਨਾਯ ਤਦਾ ਕੁਸਿਨਾਰਾਯਂ ਵਸਮਾਨਾ ਬਨ੍ਧੁਲਮਲ੍ਲਸ੍ਸ ਭਰਿਯਾ ਮਲ੍ਲਰਾਜਪੁਤ੍ਤੀ ਮਲ੍ਲਿਕਾ ਨਾਮ ਉਪਾਸਿਕਾ ਸਦ੍ਧਾ ਪਸਨ੍ਨਾ ਵਿਸਾਖਾਯ ਮਹਾਉਪਾਸਿਕਾਯ ਪਸਾਧਨਸਦਿਸਂ ਅਤ੍ਤਨੋ ਮਹਾਲਤਾਪਸਾਧਨਂ ਗਨ੍ਧੋਦਕੇਨ ਧੋਵਿਤ੍ਵਾ ਦੁਕੂਲਚੁਮ੍ਬਟਕੇਨ ਮਜ੍ਜਿਤ੍ਵਾ ਅਞ੍ਞਞ੍ਚ ਬਹੁਂ ਗਨ੍ਧਮਾਲਾਦਿਂ ਗਹੇਤ੍ਵਾ ਭਗਵਤੋ ਸਰੀਰਂ ਪੂਜੇਸਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨ ਮਲ੍ਲਿਕਾਵਤ੍ਥੁ ਧਮ੍ਮਪਦਵਣ੍ਣਨਾਯਂ ਆਗਤਮੇਵ.

ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ, ਤੇਨ ਪੂਜਾਨੁਭਾਵੇਨ ਅਸ੍ਸਾ ਅਞ੍ਞੇਹਿ ਅਸਾਧਾਰਣਾ ਉਲ਼ਾਰਾ ਦਿਬ੍ਬਸਮ੍ਪਤ੍ਤਿ ਅਹੋਸਿ. ਵਤ੍ਥਾਲਙ੍ਕਾਰਵਿਮਾਨਾਨਿ ਸਤ੍ਤਰਤਨਸਮੁਜ੍ਜਲਾਨਿ ਵਿਸੇਸਤੋ ਸਿਙ੍ਗੀਸੁਵਣ੍ਣੋਭਾਸਾਨਿ ਅਤਿਵਿਯ ਪਭਸ੍ਸਰਾਨਿ ਸਬ੍ਬਾ ਦਿਸਾ ਆਸਿਞ੍ਚਮਾਨਾਵ ਸੁਵਣ੍ਣਰਸਧਾਰਾਪਿਞ੍ਜਰਾ ਕਰੋਨ੍ਤਿ. ਅਥਾਯਸ੍ਮਾ ਨਾਰਦੋ ਦੇਵਚਾਰਿਕਂ ਚਰਨ੍ਤੋ ਤਂ ਦਿਸ੍ਵਾ ਉਪਗਞ੍ਛਿ. ਸਾ ਤਂ ਦਿਸ੍ਵਾ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਸੋ ਤਂ –

੬੫੮. ‘‘ਪੀਤਵਤ੍ਥੇ ਪੀਤਧਜੇ, ਪੀਤਾਲਙ੍ਕਾਰਭੂਸਿਤੇ;

ਪੀਤਨ੍ਤਰਾਹਿ ਵਗ੍ਗੂਹਿ, ਅਪਿਲ਼ਨ੍ਧਾਵ ਸੋਭਸਿ.

੬੫੯. ‘‘ਕਾ ਕਮ੍ਬੁਕਾਯੂਰਧਰੇ, ਕਞ੍ਚਨਾਵੇਲ਼ਭੂਸਿਤੇ;

ਹੇਮਜਾਲਕਸਞ੍ਛਨ੍ਨੇ, ਨਾਨਾਰਤਨਮਾਲਿਨੀ.

੬੬੦. ‘‘ਸੋਵਣ੍ਣਮਯਾ ਲੋਹਿਤਙ੍ਗਮਯਾ ਚ, ਮੁਤ੍ਤਾਮਯਾ ਵੇਲ਼ੁਰਿਯਮਯਾ ਚ;

ਮਸਾਰਗਲ੍ਲਾ ਸਹਲੋਹਿਤਙ੍ਗਾ, ਪਾਰੇਵਤਕ੍ਖੀਹਿ ਮਣੀਹਿ ਚਿਤ੍ਤਤਾ.

੬੬੧. ‘‘ਕੋਚਿ ਕੋਚਿ ਏਤ੍ਥ ਮਯੂਰਸੁਸ੍ਸਰੋ, ਹਂਸਸ੍ਸਰਞ੍ਞੋ ਕਰਵੀਕਸੁਸ੍ਸਰੋ;

ਤੇਸਂ ਸਰੋ ਸੁਯ੍ਯਤਿ ਵਗ੍ਗੁਰੂਪੋ, ਪਞ੍ਚਙ੍ਗਿਕਂ ਤੂਰਿਯਮਿਵਪ੍ਪਵਾਦਿਤਂ.

੬੬੨. ‘‘ਰਥੋ ਚ ਤੇ ਸੁਭੋ ਵਗ੍ਗੁ, ਨਾਨਾਰਤਨਚਿਤ੍ਤਿਤੋ;

ਨਾਨਾਵਣ੍ਣਾਹਿ ਧਾਤੂਹਿ, ਸੁਵਿਭਤ੍ਤੋਵ ਸੋਭਤਿ.

੬੬੩. ‘‘ਤਸ੍ਮਿਂ ਰਥੇ ਕਞ੍ਚਨਬਿਮ੍ਬਵਣ੍ਣੇ, ਯਾ ਤ੍ਵਂ ਠਿਤਾ ਭਾਸਸਿਮਂ ਪਦੇਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. – ਪੁਚ੍ਛਿ;

੬੫੮. ਤਤ੍ਥ ਪੀਤਵਤ੍ਥੇਤਿ ਪਰਿਸੁਦ੍ਧਚਾਮੀਕਰਪਭਸ੍ਸਰਤਾਯ ਪੀਤੋਭਾਸਨਿਵਾਸਨੇ. ਪੀਤਧਜੇਤਿ ਵਿਮਾਨਦ੍ਵਾਰੇ ਰਥੇ ਚ ਸਮੁਸ੍ਸਿਤਹੇਮਮਯਵਿਪੁਲਕੇਤੁਭਾਵਤੋ ਪੀਤੋਭਾਸਧਜੇ. ਪੀਤਾਲਙ੍ਕਾਰਭੂਸਿਤੇਤਿ ਪੀਤੋਭਾਸੇਹਿ ਆਭਰਣੇਹਿ ਅਲਙ੍ਕਤੇ. ਸਤਿਪਿ ਅਲਙ੍ਕਾਰਾਨਂ ਨਾਨਾਵਿਧਰਂਸਿਜਾਲਸਮੁਜ੍ਜਲਵਿਵਿਧਰਤਨਵਿਚਿਤ੍ਤਭਾਵੇ ਤਾਦਿਸਸੁਚਰਿਤਵਿਸੇਸਨਿਬ੍ਬਤ੍ਤਤਾਯ ਪਨ ਸੁਪਰਿਸੁਦ੍ਧਚਾਮੀਕਰਮਰੀਚਿਜਾਲਵਿਜ੍ਜੋਤਿਤਤ੍ਤਾ ਵਿਸੇਸਤੋ ਪੀਤਨਿਭਾਸਾਨਿ ਤਸ੍ਸਾ ਆਭਰਣਾਨਿ ਅਹੇਸੁਂ. ਪੀਤਨ੍ਤਰਾਹੀਤਿ ਪੀਤਵਣ੍ਣੇਹਿ ਉਤ੍ਤਰਿਯੇਹਿ. ‘‘ਸਨ੍ਤਰੁਤ੍ਤਰਪਰਮਂ ਤੇਨ ਭਿਕ੍ਖੁਨਾ ਤਤੋ ਚੀਵਰਂ ਸਾਦਿਤਬ੍ਬ’’ਨ੍ਤਿਆਦੀਸੁ (ਪਾਰਾ. ੫੨੩-੫੨੪) ਨਿਵਾਸਨੇ ਅਨ੍ਤਰਸਦ੍ਦੋ ਆਗਤੋ, ਇਧ ਪਨ ‘‘ਅਨ੍ਤਰਸਾਟਕਾ’’ਤਿਆਦੀਸੁ ਵਿਯ ਉਤ੍ਤਰਿਯੇ ਦਟ੍ਠਬ੍ਬੋ. ਅਨ੍ਤਰਾ ਉਤ੍ਤਰਿਯਂ ਉਤ੍ਤਰਾਸਙ੍ਗੋ ਉਪਸਂਬ੍ਯਾਨਨ੍ਤਿ ਪਰਿਯਾਯਸਦ੍ਦਾ ਏਤੇ. ਵਗ੍ਗੂਹੀਤਿ ਸੋਭਨੇਹਿ ਸਣ੍ਹਮਟ੍ਠੇਹਿ. ਅਪਿਲ਼ਨ੍ਧਾਵ ਸੋਭਸੀਤਿ ਤ੍ਵਂ ਇਮੇਹਿ ਅਲਙ੍ਕਾਰੇਹਿ ਅਨਲਙ੍ਕਤਾਪਿ ਅਤ੍ਤਨੋ ਰੂਪਸਮ੍ਪਤ੍ਤਿਯਾਵ ਸੋਭਸਿ. ਤੇ ਪਨ ਅਲਙ੍ਕਾਰਾ ਤਵ ਸਰੀਰਂ ਪਤ੍ਵਾ ਸੋਭਨ੍ਤਿ, ਤਸ੍ਮਾ ਅਨਲਙ੍ਕਤਾਪਿ ਤ੍ਵਂ ਅਲਙ੍ਕਤਸਦਿਸੀਤਿ ਅਧਿਪ੍ਪਾਯੋ.

੬੫੯. ਕਾ ਕਮ੍ਬੁਕਾਯੂਰਧਰੇਤਿ ਕਾ ਤ੍ਵਂ ਕਤਰਦੇਵਨਿਕਾਯਪਰਿਯਾਪਨ੍ਨਾ ਸੁਵਣ੍ਣਮਯਪਰਿਹਾਰਕਧਰੇ, ਸੁਵਣ੍ਣਮਯਕੇਯੂਰਧਰੇ ਵਾ. ਕਮ੍ਬੁਪਰਿਹਾਰਕਨ੍ਤਿ ਚ ਹਤ੍ਥਾਲਙ੍ਕਾਰਵਿਸੇਸੋ ਵੁਚ੍ਚਤਿ, ਕਾਯੂਰਨ੍ਤਿ ਭੁਜਾਲਙ੍ਕਾਰਵਿਸੇਸੋ. ਅਥ ਵਾ ਕਮ੍ਬੂਤਿ ਸੁਵਣ੍ਣਂ, ਤਸ੍ਮਾ ਕਮ੍ਬੁਕਾਯੂਰਧਰੇ ਸੁਵਣ੍ਣਮਯਬਾਹਾਭਰਣਧਰੇਤਿ ਅਤ੍ਥੋ. ਕਞ੍ਚਨਾਵੇਲ਼ਭੂਸਿਤੇਤਿ ਕਞ੍ਚਨਮਯਾਵੇਲ਼ਪਿਲ਼ਨ੍ਧਨਭੂਸਿਤੇ. ਹੇਮਜਾਲਕਸਞ੍ਛਨ੍ਨੇਤਿ ਰਤਨਪਰਿਸਿਬ੍ਬਿਤੇਨ ਹੇਮਮਯੇਨ ਜਾਲਕੇਨ ਛਾਦਿਤਸਰੀਰੇ. ਨਾਨਾਰਤਨਮਾਲਿਨੀਤਿ ਨਕ੍ਖਤ੍ਤਮਾਲਾਯ ਵਿਯ ਕਾਲ਼ਪਕ੍ਖਰਤ੍ਤਿਯਂ ਸੀਸੇ ਪਟਿਮੁਕ੍ਕਾਹਿ ਵਿਵਿਧਾਹਿ ਰਤਨਾਵਲੀਹਿ ਨਾਨਾਰਤਨਮਾਲਿਨੀ ਕਾ ਤ੍ਵਨ੍ਤਿ ਪੁਚ੍ਛਤਿ.

੬੬੦. ਸੋਵਣ੍ਣਮਯਾਤਿਆਦਿ ਯਾਹਿ ਰਤਨਮਾਲਾਹਿ ਸਾ ਦੇਵਤਾ ਨਾਨਾਰਤਨਮਾਲਿਨੀਤਿ ਵੁਤ੍ਤਾ, ਤਾਸਂ ਦਸ੍ਸਨਂ. ਤਤ੍ਥ ਸੋਵਣ੍ਣਮਯਾਤਿ ਸਿਙ੍ਗੀਸੁਵਣ੍ਣਮਯਾ ਮਾਲਾ. ਲੋਹਿਤਙ੍ਗਮਯਾਤਿ ਪਦੁਮਰਾਗਾਦਿਰਤ੍ਤਮਣਿਮਯਾ. ਮਸਾਰਗਲ੍ਲਾਤਿ ਮਸਾਰਗਲ੍ਲਮਣਿਮਯਾ. ਸਹਲੋਹਿਤਙ੍ਗਾਤਿ ਲੋਹਿਤਙ੍ਗਮਣਿਮਯਾਹਿ ਸਦ੍ਧਿਂ ਕਬਰਮਣਿਮਯਾ ਚੇਵ ਲੋਹਿਤਙ੍ਗਸਙ੍ਖਾਤਰਤ੍ਤਮਣਿਮਯਾ ਚਾਤਿ ਅਤ੍ਥੋ. ਪਾਰੇਵਤਕ੍ਖੀਹਿ ਮਣੀਹਿ ਚਿਤ੍ਤਤਾਤਿ ਪਾਰੇਵਤਕ੍ਖਿਸਦਿਸੇਹਿ ਮਣੀਹਿ ਯਥਾਵੁਤ੍ਤਮਣੀਹਿ ਚ ਸਙ੍ਖਤਚਿਤ੍ਤਭਾਵਾ ਇਮਾ ਤਵ ਕੇਸਹਤ੍ਥੇ ਰਤਨਮਾਲਾਤਿ ਅਧਿਪ੍ਪਾਯੋ.

੬੬੧. ਕੋਚਿ ਕੋਚੀਤਿ ਏਕਚ੍ਚੋ ਏਕਚ੍ਚੋ. ਏਤ੍ਥਾਤਿ ਏਤੇਸੁ ਮਾਲਾਦਾਮੇਸੁ. ਮਯੂਰਸੁਸ੍ਸਰੋਤਿ ਮਯੂਰੋ ਵਿਯ ਸੁਨ੍ਦਰਨਾਦੋ. ਹਂਸਸ੍ਸਰਞ੍ਞੋਤਿ ਹਂਸਸ੍ਸਰੋ ਅਞ੍ਞੋ, ਹਂਸਸਦਿਸਸ੍ਸਰੋ ਅਪਰੋ. ਕਰਵੀਕਸੁਸ੍ਸਰੋਤਿ ਕਰਵੀਕੋ ਵਿਯ ਸੋਭਨਸ੍ਸਰੋ. ਤੇਸਂ ਮਾਲਾਦਾਮਾਨਂ ਯਥਾ ਮਯੂਰਸ੍ਸਰੋ, ਹਂਸਸ੍ਸਰੋ, ਕਰਵੀਕਸ੍ਸਰੋ, ਏਵਂ ਵਗ੍ਗੁਰੂਪੋ ਮਧੁਰਾਕਾਰੋ ਸਰੋ ਸੁਯ੍ਯਤਿ. ਕਿਮਿਵ? ਪਞ੍ਚਙ੍ਗਿਕਂ ਤੂਰਿਯਮਿਵਪ੍ਪਵਾਦਿਤਂ. ਯਥਾ ਕੁਸਲੇਨ ਵਾਦਿਤੇ ਪਞ੍ਚਙ੍ਗਿਕੇ ਤੂਰਿਯੇ, ਏਵਂ ਤੇਸਂ ਸਰੋ ਸੁਯ੍ਯਤਿ, ਵਗ੍ਗੁਰੂਪੋਤਿ ਅਤ੍ਥੋ. ਭੁਮ੍ਮਤ੍ਥੇ ਹਿ ਇਦਂ ਉਪਯੋਗਵਚਨਂ.

੬੬੨. ਨਾਨਾਵਣ੍ਣਾਹਿ ਧਾਤੂਹੀਤਿ ਅਨੇਕਰੂਪਾਹਿ ਅਕ੍ਖਚਕ੍ਕਈਸਾਦਿਅਵਯਵਧਾਤੂਹਿ. ਸੁਵਿਭਤ੍ਤੋਵ ਸੋਭਤੀਤਿ ਅਵਯਵਾਨਂ ਅਞ੍ਞਮਞ੍ਞਂ ਯੁਤ੍ਤਪ੍ਪਮਾਣਤਾਯ ਵਿਭਤ੍ਤਿਵਿਭਾਗਸਮ੍ਪਤ੍ਤਿਯਾ ਚ ਸੁਵਿਭਤ੍ਤੋਵ ਹੁਤ੍ਵਾ ਵਿਰਾਜਤਿ. ਅਥ ਵਾ ਸੁਵਿਭਤ੍ਤੋਵਾਤਿ ਕੇਵਲਂ ਕਮ੍ਮਨਿਬ੍ਬਤ੍ਤੋਪਿ ਸੁਸਿਕ੍ਖਿਤੇਨ ਸਿਪ੍ਪਾਚਰਿਯੇਨ ਵਿਭਤ੍ਤੋਵ ਵਿਰਚਿਤੋ ਵਿਯ ਸੋਭਤੀਤਿ ਅਤ੍ਥੋ.

੬੬੩. ਕਞ੍ਚਨਬਿਮ੍ਬਵਣ੍ਣੇਤਿ ਸਾਤਿਸਯਂ ਪੀਤੋਭਾਸਤਾਯ ਕਞ੍ਚਨਬਿਮ੍ਬਕਸਦਿਸੇ ਤਸ੍ਮਿਂ ਰਥੇ. ਕਞ੍ਚਨਬਿਮ੍ਬਵਣ੍ਣੇਤਿ ਵਾ ਤਸ੍ਸਾ ਦੇਵਤਾਯ ਆਲਪਨਂ, ਗਨ੍ਧੋਦਕੇਨ ਧੋਵਿਤ੍ਵਾ ਜਾਤਿਹਿਙ੍ਗੁਲਕਰਸੇਨ ਮਜ੍ਜਿਤ੍ਵਾ ਦੁਕੂਲਚੁਮ੍ਬਟਕੇਨ ਮਜ੍ਜਿਤਕਞ੍ਚਨਪਟਿਮਾਸਦਿਸੇਤਿ ਅਤ੍ਥੋ. ਭਾਸਸਿਮਂ ਪਦੇਸਨ੍ਤਿ ਇਮਂ ਸਕਲਮ੍ਪਿ ਭੂਮਿਪਦੇਸਂ ਭਾਸਯਸਿ ਵਿਜ੍ਜੋਤਯਸਿ.

ਏਵਂ ਥੇਰੇਨ ਪੁਚ੍ਛਿਤਾ ਸਾਪਿ ਦੇਵਤਾ ਇਮਾਹਿ ਗਾਥਾਹਿ ਬ੍ਯਾਕਾਸਿ –

੬੬੪. ‘‘ਸੋਵਣ੍ਣਜਾਲਂ ਮਣਿਸੋਣ੍ਣਚਿਤ੍ਤਿਤਂ, ਮੁਤ੍ਤਾਚਿਤਂ ਹੇਮਜਾਲੇਨ ਛਨ੍ਨਂ;

ਪਰਿਨਿਬ੍ਬੁਤੇ ਗੋਤਮੇ ਅਪ੍ਪਮੇਯ੍ਯੇ, ਪਸਨ੍ਨਚਿਤ੍ਤਾ ਅਹਮਾਭਿਰੋਪਯਿਂ.

੬੬੫. ‘‘ਤਾਹਂ ਕਮ੍ਮਂ ਕਰਿਤ੍ਵਾਨ, ਕੁਸਲਂ ਬੁਦ੍ਧਵਣ੍ਣਿਤਂ;

ਅਪੇਤਸੋਕਾ ਸੁਖਿਤਾ, ਸਮ੍ਪਮੋਦਾਮਨਾਮਯਾ’’ਤਿ.

੬੬੪. ਤਤ੍ਥ ਸੋਵਣ੍ਣਜਾਲਨ੍ਤਿ ਸਰੀਰਪ੍ਪਮਾਣੇਨ ਕਤਂ ਸੁਵਣ੍ਣਮਯਂ ਜਾਲਂ. ਮਣਿਸੋਣ੍ਣਚਿਤ੍ਤਿਤਨ੍ਤਿ ਸੀਸਾਦਿਟ੍ਠਾਨੇਸੁ ਸੀਸੂਪਗਗੀਵੂਪਗਾਦਿਆਭਰਣਵਸੇਨ ਨਾਨਾਵਿਧੇਹਿ ਮਣੀਹਿ ਚ ਸੁਵਣ੍ਣੇਨ ਚ ਚਿਤ੍ਤਿਤਂ. ਮੁਤ੍ਤਾਚਿਤਨ੍ਤਿ ਅਨ੍ਤਰਨ੍ਤਰਾ ਆਬਦ੍ਧਾਹਿ ਮੁਤ੍ਤਾਵਲੀਹਿ ਆਚਿਤਂ. ਹੇਮਜਾਲੇਨ ਛਨ੍ਨਨ੍ਤਿ ਹੇਮਮਯੇਨ ਪਭਾਜਾਲੇਨ ਛਨ੍ਨਂ. ਤਞ੍ਹਿ ਨਾਨਾਵਿਧੇਹਿ ਮਣੀਹਿ ਚੇਵ ਸੁਵਣ੍ਣੇਨ ਚ ਚਿਤ੍ਤਿਤਂ ਮੁਤ੍ਤਾਵਲੀਹਿ ਆਚਿਤਮ੍ਪਿ ਸੁਪਰਿਸੁਦ੍ਧਸ੍ਸ ਰਤ੍ਤਸੁਵਣ੍ਣਸ੍ਸੇਵ ਯੇਭੁਯ੍ਯਤਾਯ ਦਿਵਾਕਰਕਿਰਣਸਮ੍ਫਸ੍ਸਤੋ ਅਤਿਵਿਯ ਪਭਸ੍ਸਰੇਨ ਹੇਮਮਯੇਨ ਪਭਾਜਾਲੇਨ ਸਞ੍ਛਾਦਿਤਂ ਏਕੋਭਾਸਂ ਹੁਤ੍ਵਾ ਕਞ੍ਚਨਾਦਾਸਂ ਵਿਯ ਤਿਟ੍ਠਤਿ. ਪਰਿਨਿਬ੍ਬੁਤੇਤਿ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੇ. ਗੋਤਮੇਤਿ ਭਗਵਨ੍ਤਂ ਗੋਤ੍ਤੇਨ ਨਿਦ੍ਦਿਸਤਿ. ਅਪ੍ਪਮੇਯ੍ਯੇਤਿ ਗੁਣਾਨੁਭਾਵਤੋ ਪਮਿਨਿਤੁਂ ਅਸਕ੍ਕੁਣੇਯ੍ਯੇ. ਪਸਨ੍ਨਚਿਤ੍ਤਾਤਿ ਕਮ੍ਮਫਲਵਿਸਯਾਯ ਬੁਦ੍ਧਾਰਮ੍ਮਣਾਯ ਚ ਸਦ੍ਧਾਯ ਪਸਨ੍ਨਮਾਨਸਾ. ਅਭਿਰੋਪਯਿਨ੍ਤਿ ਪੂਜਾਵਸੇਨ ਸਰੀਰੇ ਰੋਪੇਸਿਂ ਪਟਿਮੁਞ੍ਚਿਂ.

੬੬੫. ਤਾਹਨ੍ਤਿ ਤਂ ਅਹਂ. ਕੁਸਲਨ੍ਤਿ ਕੁਚ੍ਛਿਤਸਲਨਾਦਿਅਤ੍ਥੇਨ ਕੁਸਲਂ. ਬੁਦ੍ਧਵਣ੍ਣਿਤਨ੍ਤਿ ‘‘ਯਾਵਤਾ, ਭਿਕ੍ਖਵੇ, ਸਤ੍ਤਾ ਅਪਦਾ ਵਾ ਦ੍ਵਿਪਦਾ ਵਾ’’ਤਿਆਦਿਨਾ (ਸਂ. ਨਿ. ੫.੧੩੯; ਅ. ਨਿ. ੪.੩੪) ਸਮ੍ਮਾਸਮ੍ਬੁਦ੍ਧੇਨ ਪਸਤ੍ਥਂ. ਅਪੇਤਸੋਕਾਤਿ ਸੋਕਹੇਤੂਨਂ ਭੋਗਬ੍ਯਸਨਾਦੀਨਂ ਅਭਾਵੇਨ ਅਪਗਤਸੋਕਾ. ਤੇਨ ਚਿਤ੍ਤਦੁਕ੍ਖਾਭਾਵਮਾਹ. ਸੁਖਿਤਾਤਿ ਸਞ੍ਜਾਤਸੁਖਾ ਸੁਖਪ੍ਪਤ੍ਤਾ. ਏਤੇਨ ਸਰੀਰਦੁਕ੍ਖਾਭਾਵਂ ਵਦਤਿ. ਚਿਤ੍ਤਦੁਕ੍ਖਾਭਾਵੇਨ ਚਸ੍ਸਾ ਪਮੋਦਾਪਤ੍ਤਿ, ਸਰੀਰਦੁਕ੍ਖਾਭਾਵੇਨ ਅਰੋਗਤਾ. ਤੇਨਾਹ ‘‘ਸਮ੍ਪਮੋਦਾਮਨਾਮਯਾ’’ਤਿ. ਸੇਸਂ ਵੁਤ੍ਤਨਯਮੇਵ. ਅਯਞ੍ਚ ਅਤ੍ਥੋ ਤਦਾ ਅਤ੍ਤਨਾ ਦੇਵਤਾਯ ਚ ਕਥਿਤਨਿਯਾਮੇਨੇਵ ਸਙ੍ਗੀਤਿਕਾਲੇ ਆਯਸ੍ਮਤਾ ਨਾਰਦੇਨ ਧਮ੍ਮਸਙ੍ਗਾਹਕਾਨਂ ਆਰੋਚਿਤੋ, ਤੇ ਚ ਤਂ ਤਥੇਵ ਸਙ੍ਗਹਂ ਆਰੋਪਯਿਂਸੂਤਿ.

ਮਲ੍ਲਿਕਾਵਿਮਾਨਵਣ੍ਣਨਾ ਨਿਟ੍ਠਿਤਾ.