੭. ਪੇਸਵਤੀਵਿਮਾਨਵਣ੍ਣਨਾ

ਫਲਿਕਰਜਤਹੇਮਜਾਲਛਨ੍ਨਨ੍ਤਿ ਪੇਸਵਤੀਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਮਗਧੇਸੁ ਨਾਲਕਗਾਮੇ ਏਕਸ੍ਮਿਂ ਗਹਪਤਿਮਹਾਸਾਰਕੁਲੇ ਪੇਸਵਤੀ ਨਾਮ ਕੁਲਸੁਣ੍ਹਾ ਅਹੋਸਿ. ਸਾ ਕਿਰ ਕਸ੍ਸਪਸ੍ਸ ਭਗਵਤੋ ਯੋਜਨਿਕੇ ਕਨਕਥੂਪੇ ਕਯਿਰਮਾਨੇ ਦਾਰਿਕਾ ਹੁਤ੍ਵਾ ਮਾਤਰਾ ਸਦ੍ਧਿਂ ਚੇਤਿਯਟ੍ਠਾਨਂ ਗਨ੍ਤ੍ਵਾ ਮਾਤਰਂ ਪੁਚ੍ਛਿ ‘‘ਕਿਂ ਇਮੇ, ਅਮ੍ਮ, ਕਰੋਨ੍ਤੀ’’ਤਿ? ‘‘ਚੇਤਿਯਂ ਕਾਤੁਂ ਸੁਵਣ੍ਣਿਟ੍ਠਕਾ ਕਰੋਨ੍ਤੀ’’ਤਿ. ਤਂ ਸੁਤ੍ਵਾ ਦਾਰਿਕਾ ਪਸਨ੍ਨਮਾਨਸਾ ਮਾਤਰਂ ਆਹ – ‘‘ਅਮ੍ਮ, ਮਮ ਗੀਵਾਯ ਇਦਂ ਸੋਵਣ੍ਣਮਯਂ ਖੁਦ੍ਦਕਪਿਲ਼ਨ੍ਧਨਂ ਅਤ੍ਥਿ, ਇਮਾਹਂ ਚੇਤਿਯਤ੍ਥਾਯ ਦੇਮੀ’’ਤਿ. ਮਾਤਾ ‘‘ਸਾਧੁ ਦੇਹੀ’’ਤਿ ਵਤ੍ਵਾ ਤਂ ਗੀਵਤੋ ਓਮੁਞ੍ਚਿਤ੍ਵਾ ਸੁਵਣ੍ਣਕਾਰਸ੍ਸ ਹਤ੍ਥੇ ਅਦਾਸਿ ‘‘ਇਦਂ ਇਮਾਯ ਦਾਰਿਕਾਯ ਪਰਿਚ੍ਚਜਿਤਂ, ਇਮਮ੍ਪਿ ਪਕ੍ਖਿਪਿਤ੍ਵਾ ਇਟ੍ਠਕਂ ਕਰੋਹੀ’’ਤਿ. ਸੁਵਣ੍ਣਕਾਰੋ ਤਥਾ ਅਕਾਸਿ. ਸਾ ਦਾਰਿਕਾ ਅਪਰਭਾਗੇ ਕਾਲਂ ਕਤ੍ਵਾ ਤੇਨੇਵ ਪੁਞ੍ਞਕਮ੍ਮੇਨ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਸੁਗਤਿਯਂਯੇਵ ਅਪਰਾਪਰਂ ਸਂਸਰਨ੍ਤੀ ਅਮ੍ਹਾਕਂ ਭਗਵਤੋ ਕਾਲੇ ਨਾਲਕਗਾਮੇ ਨਿਬ੍ਬਤ੍ਤਾ ਅਨੁਕ੍ਕਮੇਨ ਦ੍ਵਾਦਸਵਸ੍ਸਿਕਾ ਜਾਤਾ.

ਸਾ ਏਕਦਿਵਸਂ ਮਾਤਰਾ ਪੇਸਿਤਂ ਮੂਲਂ ਗਹੇਤ੍ਵਾ ਤੇਲਤ੍ਥਾਯ ਅਞ੍ਞਤਰਂ ਆਪਣਂ ਅਗਮਾਸਿ. ਤਸ੍ਮਿਞ੍ਚ ਆਪਣੇ ਅਞ੍ਞਤਰੋ ਕੁਟੁਮ੍ਬਿਯਪੁਤ੍ਤੋ ਪਿਤਰਾ ਨਿਦਹਿਤ੍ਵਾ ਠਪਿਤਂ ਬਹੁਂ ਹਿਰਞ੍ਞਸੁਵਣ੍ਣਂ ਮੁਤ੍ਤਾਮਣਿਰਤਨਾਨਿ ਚ ਗਹੇਤੁਂ ਉਦ੍ਧਰਨ੍ਤੋ ਆਪਣਿਕੋ ਕਮ੍ਮਬਲੇਨ ਕਥਲਪਾਸਾਣਸਕ੍ਖਰਰੂਪੇਨ ਉਪਟ੍ਠਹਨ੍ਤਾਨਿ ਦਿਸ੍ਵਾ ਤਤੋ ਏਕਦੇਸਂ ‘‘ਪੁਞ੍ਞਵਨ੍ਤਾਨਂ ਵਸੇਨ ਹਿਰਞ੍ਞਸੁਵਣ੍ਣਾਦਿ ਭਵਿਸ੍ਸਤੀ’’ਤਿ ਵੀਮਂਸਿਤੁਂ ਰਾਸਿਂ ਕਤ੍ਵਾ ਠਪੇਸਿ. ਅਥ ਨਂ ਸਾ ਦਾਰਿਕਾ ਦਿਸ੍ਵਾ ‘‘ਕਸ੍ਮਾ ਆਪਣੇ ਰਤਨਾਨਿ ਏਵਂ ਠਪਿਤਾਨਿ, ਨਨੁ ਨਾਮ ਸਮ੍ਮਦੇਵ ਪਟਿਸਾਮੇਤਬ੍ਬਾਨੀ’’ਤਿ ਆਹ. ਆਪਣਿਕੋ ਤਂ ਸੁਤ੍ਵਾ ‘‘ਮਹਾਪੁਞ੍ਞਾ ਅਯਂ ਦਾਰਿਕਾ, ਇਮਿਸ੍ਸਾ ਵਸੇਨ ਸਬ੍ਬਮਿਦਂ ਹਿਰਞ੍ਞਾਦਿ ਏਵ ਹੁਤ੍ਵਾ ਅਮ੍ਹਾਕਂ ਵਿਨਿਯੋਗਂ ਗਮਿਸ੍ਸਤਿ, ਸਙ੍ਗਣ੍ਹਿਸ੍ਸਾਮਿ ਨ’’ਨ੍ਤਿ ਚਿਨ੍ਤੇਤ੍ਵਾ ਤਸ੍ਸਾ ਮਾਤੁ ਸਨ੍ਤਿਕਂ ਗਨ੍ਤ੍ਵਾ ‘‘ਇਮਂ ਦਾਰਿਕਂ ਮਯ੍ਹਂ ਪੁਤ੍ਤਸ੍ਸਤ੍ਥਾਯ ਦੇਹੀ’’ਤਿ ਵਾਰੇਤ੍ਵਾ ਬਹੁਧਨਂ ਦਤ੍ਵਾ ਆਵਾਹਵਿਵਾਹਂ ਕਤ੍ਵਾ ਤਂ ਅਤ੍ਤਨੋ ਗੇਹਂ ਆਨੇਸਿ. ਅਥਸ੍ਸਾ ਸੀਲਾਚਾਰਂ ਞਤ੍ਵਾ ਭਣ੍ਡਾਗਾਰਂ ਵਿਵਰਿਤ੍ਵਾ ‘‘ਕਿਂ ਏਤ੍ਥ ਪਸ੍ਸਸੀ’’ਤਿ ਵਤ੍ਵਾ ਤਾਯ ‘‘ਹਿਰਞ੍ਞਸੁਵਣ੍ਣਮਣਿਮੇਵ ਰਾਸਿਕਤਂ ਪਸ੍ਸਾਮੀ’’ਤਿ ਵੁਤ੍ਤੇ ‘‘ਏਤਾਨਿ ਅਮ੍ਹਾਕਂ ਕਮ੍ਮਬਲੇਨ ਅਨ੍ਤਰਧਾਯਨ੍ਤਾਨਿ ਤਵ ਪੁਞ੍ਞਵਿਸੇਸੇਨ ਪੁਨ ਵਿਸੇਸਾਨਿ ਜਾਤਾਨਿ, ਤਸ੍ਮਾ ਇਤੋ ਪਟ੍ਠਾਯ ਇਮਸ੍ਮਿਂ ਗੇਹੇ ਸਬ੍ਬਂ ਤ੍ਵਂਯੇਵ ਵਿਚਾਰੇਹਿ, ਤਯਾ ਦਿਨ੍ਨਮੇਵ ਮਯਂ ਪਰਿਭੁਞ੍ਜਿਸ੍ਸਾਮਾ’’ਤਿ ਵਤ੍ਵਾ ਤਤੋ ਪਭੁਤਿ ਤਂ ‘‘ਪੇਸਵਤੀ’’ਤਿ ਵੋਹਰਿਂਸੁ.

ਤੇਨ ਚ ਸਮਯੇਨ ਆਯਸ੍ਮਾ ਧਮ੍ਮਸੇਨਾਪਤਿ ਅਤ੍ਤਨੋ ਆਯੁਸਙ੍ਖਾਰਾਨਂ ਪਰਿਕ੍ਖੀਣਭਾਵਂ ਞਤ੍ਵਾ ‘‘ਮਯ੍ਹਂ ਮਾਤੁਯਾ ਰੂਪਸਾਰਿਬ੍ਰਾਹ੍ਮਣਿਯਾ ਪੋਸਾਵਨਿਕਮੂਲਂ ਦਤ੍ਵਾ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪਰਿਨਿਬ੍ਬਾਨਂ ਅਨੁਜਾਨਾਪੇਤ੍ਵਾ ਸਤ੍ਥੁ ਆਣਾਯ ਮਹਨ੍ਤਂ ਪਾਟਿਹਾਰਿਯਂ ਦਸ੍ਸੇਤ੍ਵਾ ਅਨੇਕੇਹਿ ਥੁਤਿਸਹਸ੍ਸੇਹਿ ਭਗਵਨ੍ਤਂ ਥੋਮੇਤ੍ਵਾ ਯਾਵ ਦਸ੍ਸਨਵਿਸਯਾਤਿਕ੍ਕਮਾ ਅਭਿਮੁਖੋਵ ਅਪਕ੍ਕਮਿਤ੍ਵਾ ਪੁਨ ਵਨ੍ਦਿਤ੍ਵਾ ਭਿਕ੍ਖੁਸਙ੍ਘਪਰਿਵੁਤੋ ਵਿਹਾਰਾ ਨਿਕ੍ਖਮ੍ਮ ਭਿਕ੍ਖੁਸਙ੍ਘਸ੍ਸ ਓਵਾਦਂ ਦਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਸਮਸ੍ਸਾਸੇਤ੍ਵਾ ਚਤਸ੍ਸੋਪਿ ਪਰਿਸਾ ਨਿਵਤ੍ਤੇਤ੍ਵਾ ਅਨੁਕ੍ਕਮੇਨ ਨਾਲਕਗਾਮਂ ਪਤ੍ਵਾ ਮਾਤਰਂ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਤ੍ਵਾ ਪਚ੍ਚੂਸਸਮਯੇ ਜਾਤੋਵਰਕੇ ਪਰਿਨਿਬ੍ਬਾਯਿ. ਪਰਿਨਿਬ੍ਬੁਤਸ੍ਸ ਚਸ੍ਸ ਸਰੀਰਸਕ੍ਕਾਰਕਰਣਵਸੇਨ ਦੇਵਾ ਚੇਵ ਮਨੁਸ੍ਸਾ ਚ ਸਤ੍ਤਾਹਂ ਵੀਤਿਨਾਮੇਸੁਂ, ਅਗਰੁਚਨ੍ਦਨਾਦੀਹਿ ਹਤ੍ਥਸਤੁਬ੍ਬੇਧਂ ਚਿਤਕਮਕਂਸੁ.

ਪੇਸਵਤੀਪਿ ਥੇਰਸ੍ਸ ਪਰਿਨਿਬ੍ਬਾਨਂ ਸੁਤ੍ਵਾ ‘‘ਗਨ੍ਤਾ ਪੂਜੇਸ੍ਸਾਮੀ’’ਤਿ ਸੁਵਣ੍ਣਪੁਪ੍ਫੇਹਿ ਗਨ੍ਧਜਾਤੇਹਿ ਚ ਪੂਰਿਤਾਨਿ ਚਙ੍ਕੋਟਕਾਨਿ ਗਾਹਾਪੇਤ੍ਵਾ ਗਨ੍ਤੁਕਾਮਾ ਸਸੁਰਂ ਆਪੁਚ੍ਛਿਤ੍ਵਾ ਤੇਨ ‘‘ਤ੍ਵਂ ਗਰੁਭਾਰਾ, ਤਤ੍ਥ ਚ ਮਹਾਜਨਸਮ੍ਮਦ੍ਦੋ, ਪੁਪ੍ਫਗਨ੍ਧਾਨਿ ਪੇਸੇਤ੍ਵਾ ਇਧੇਵ ਹੋਹੀ’’ਤਿ ਵੁਤ੍ਤਾਪਿ ਸਦ੍ਧਾਜਾਤਾ ‘‘ਯਦਿਪਿ ਮੇ ਤਤ੍ਥ ਜੀਵਿਤਨ੍ਤਰਾਯੋ ਸਿਯਾ, ਗਨ੍ਤਾਵ ਪੂਜਾਸਕ੍ਕਾਰਂ ਕਰਿਸ੍ਸਾਮੀ’’ਤਿ ਤਂ ਵਚਨਂ ਅਗ੍ਗਹੇਤ੍ਵਾ ਸਪਰਿਵਾਰਾ ਤਤ੍ਥ ਗਨ੍ਤ੍ਵਾ ਗਨ੍ਧਪੁਪ੍ਫਾਦੀਹਿ ਪੂਜੇਤ੍ਵਾ ਕਤਞ੍ਜਲੀ ਅਟ੍ਠਾਸਿ. ਤਸ੍ਮਿਞ੍ਚ ਸਮਯੇ ਥੇਰਂ ਪੂਜੇਤੁਂ ਆਗਤਾਨਂ ਰਾਜਪਰਿਸਾਨਂ ਹਤ੍ਥੀ ਮਤ੍ਤੋ ਹੁਤ੍ਵਾ ਤਂ ਪਦੇਸਂ ਉਪਗਞ੍ਛਿ. ਤਂ ਦਿਸ੍ਵਾ ਮਰਣਭਯਭੀਤੇਸੁ ਮਨੁਸ੍ਸੇਸੁ ਪਲਾਯਨ੍ਤੇਸੁ ਜਨਸਮ੍ਮਦ੍ਦੇਨ ਪਤਿਤਂ ਪੇਸਵਤਿਂ ਮਹਾਜਨੋ ਅਕ੍ਕਮਿਤ੍ਵਾ ਮਾਰੇਸਿ. ਸਾ ਪੂਜਾਸਕ੍ਕਾਰਂ ਕਤ੍ਵਾ ਥੇਰਗਤਾਯ ਸਦ੍ਧਾਯ ਸਮ੍ਪਨ੍ਨਚਿਤ੍ਤਾ ਏਵ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ, ਅਚ੍ਛਰਾਸਹਸ੍ਸਞ੍ਚਸ੍ਸਾ ਪਰਿਵਾਰੋ ਅਹੋਸਿ.

ਸਾ ਤਾਵਦੇਵ ਅਤ੍ਤਨੋ ਦਿਬ੍ਬਸਮ੍ਪਤ੍ਤਿਂ ਓਲੋਕੇਤ੍ਵਾ ‘‘ਕੀਦਿਸੇਨ ਨੁ ਖੋ ਪੁਞ੍ਞੇਨ ਮਯਾ ਏਸਾ ਲਦ੍ਧਾ’’ਤਿ, ਤਸ੍ਸਾ ਹੇਤੁਂ ਉਪਧਾਰੇਨ੍ਤੀ ਥੇਰਂ ਉਦ੍ਦਿਸ੍ਸ ਕਤਂ ਪੂਜਾਸਕ੍ਕਾਰਂ ਦਿਸ੍ਵਾ, ਰਤਨਤ੍ਤਯੇ ਅਭਿਪ੍ਪਸਨ੍ਨਮਾਨਸਾ ਸਤ੍ਥਾਰਂ ਵਨ੍ਦਿਤੁਂ ਅਚ੍ਛਰਾਸਹਸ੍ਸਪਰਿਵੁਤਾ ਸਟ੍ਠਿਸਕਟਭਾਰਾਲਙ੍ਕਾਰਪਟਿਮਣ੍ਡਿਤਤ੍ਤਭਾਵਾ ਸੁਮਹਤਿਯਾ ਦੇਵਿਦ੍ਧਿਯਾ ਚਨ੍ਦੋ ਵਿਯ ਚ ਸੂਰਿਯੋ ਵਿਯ ਚ ਦਸ ਦਿਸਾ ਓਭਾਸਯਮਾਨਾ ਸਹ ਵਿਮਾਨੇਨ ਆਗਨ੍ਤ੍ਵਾ ਵਿਮਾਨਤੋ ਓਰੁਯ੍ਹ ਭਗਵਨ੍ਤਂ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਤੇਨ ਚ ਸਮਯੇਨ ਆਯਸ੍ਮਾ ਵਙ੍ਗੀਸੋ ਭਗਵਤੋ ਸਮੀਪੇ ਨਿਸਿਨ੍ਨੋ ਭਗਵਨ੍ਤਂ ਏਵਮਾਹ ‘‘ਪਟਿਭਾਤਿ ਮਂ ਭਗਵਾ ਇਮਿਸ੍ਸਾ ਦੇਵਤਾਯ ਕਤਕਮ੍ਮਂ ਪੁਚ੍ਛਿਤੁ’’ਨ੍ਤਿ. ‘‘ਪਟਿਭਾਤੁ ਤਂ, ਵਙ੍ਗੀਸਾ’’ਤਿ ਭਗਵਾ ਅਵੋਚ. ਅਥ ਆਯਸ੍ਮਾ ਵਙ੍ਗੀਸੋ ਤਾਯ ਦੇਵਤਾਯ ਕਤਕਮ੍ਮਂ ਪੁਚ੍ਛਿਤੁਕਾਮੋ ਪਠਮਂ ਤਾਵਸ੍ਸਾ ਵਿਮਾਨਂ ਸਂਵਣ੍ਣੇਨ੍ਤੋ ਆਹ –

੬੪੬. ‘‘ਫਲਿਕਰਜਤਹੇਮਜਾਲਛਨ੍ਨਂ, ਵਿਵਿਧਚਿਤ੍ਰਤਲਮਦ੍ਦਸਂ ਸੁਰਮ੍ਮਂ;

ਬ੍ਯਮ੍ਹਂ ਸੁਨਿਮ੍ਮਿਤਂ ਤੋਰਣੂਪਪਨ੍ਨਂ, ਰੁਚਕੁਪਕਿਣ੍ਣਮਿਦਂ ਸੁਭਂ ਵਿਮਾਨਂ.

੬੪੭. ‘‘ਭਾਤਿ ਚ ਦਸ ਦਿਸਾ ਨਭੇਵ ਸੁਰਿਯੋ, ਸਰਦੇ ਤਮੋਨੁਦੋ ਸਹਸ੍ਸਰਂਸੀ;

ਤਥਾ ਤਪਤਿ ਮਿਦਂ ਤਵ ਵਿਮਾਨਂ, ਜਲਮਿਵ ਧੂਮਸਿਖੋ ਨਿਸੇ ਨਭਗ੍ਗੇ.

੬੪੮. ‘‘ਮੁਸਤੀਵ ਨਯਨਂ ਸਤੇਰਤਾਵ, ਆਕਾਸੇ ਠਪਿਤਮਿਦਂ ਮਨੁਞ੍ਞਂ;

ਵੀਣਾਮੁਰਜਸਮ੍ਮਤਾਲ਼ਘੁਟ੍ਠਂ, ਇਦ੍ਧਂ ਇਨ੍ਦਪੁਰਂ ਯਥਾ ਤਵੇਦਂ.

੬੪੯. ‘‘ਪਦੁਮਕੁਮੁਦੁਪ੍ਪਲਕੁਵਲਯਂ, ਯੋਧਿਕਬਨ੍ਧੁਕਨੋਜਕਾ ਚ ਸਨ੍ਤਿ;

ਸਾਲਕੁਸੁਮਿਤਪੁਪ੍ਫਿਤਾ ਅਸੋਕਾ, ਵਿਵਿਧਦੁਮਗ੍ਗਸੁਗਨ੍ਧਸੇਵਿਤਮਿਦਂ.

੬੫੦. ‘‘ਸਲ਼ਲਲਬੁਜਭੁਜਕਸਂਯੁਤ੍ਤਾ, ਕੁਸਕਸੁਫੁਲ੍ਲਿਤਲਤਾਵਲਮ੍ਬਿਨੀਹਿ;

ਮਣਿਜਾਲਸਦਿਸਾ ਯਸਸ੍ਸਿਨੀ, ਰਮ੍ਮਾ ਪੋਕ੍ਖਰਣੀ ਉਪਟ੍ਠਿਤਾ ਤੇ.

੬੫੧. ‘‘ਉਦਕਰੁਹਾ ਚ ਯੇਤ੍ਥਿ ਪੁਪ੍ਫਜਾਤਾ, ਥਲਜਾ ਯੇ ਚ ਸਨ੍ਤਿ ਰੁਕ੍ਖਜਾਤਾ;

ਮਾਨੁਸਕਾਮਾਨੁਸ੍ਸਕਾ ਚ ਦਿਬ੍ਬਾ, ਸਬ੍ਬੇ ਤੁਯ੍ਹਂ ਨਿਵੇਸਨਮ੍ਹਿ ਜਾਤਾ.

੬੫੨. ‘‘ਕਿਸ੍ਸ ਸਂਯਮਦਮਸ੍ਸਯਂ ਵਿਪਾਕੋ, ਕੇਨਾਸਿ ਕਮ੍ਮਫਲੇਨਿਧੂਪਪਨ੍ਨਾ;

ਯਥਾ ਚ ਤੇ ਅਧਿਗਤਮਿਦਂ ਵਿਮਾਨਂ, ਤਦਨੁਪਦਂ ਅਵਚਾਸਿਲ਼ਾਰਪਮ੍ਹੇ’’ਤਿ.

੬੪੬. ਤਤ੍ਥ ਫਲਿਕਰਜਤਹੇਮਜਾਲਛਨ੍ਨਨ੍ਤਿ ਫਲਿਕਮਣੀਹਿ ਰਜਤਹੇਮਜਾਲੇਹਿ ਚ ਛਾਦਿਤਂ, ਫਲਿਕਮਣਿਮਯਾਹਿ ਭਿਤ੍ਤੀਹਿ ਰਜਤਹੇਮਮਯੇਹਿ ਜਾਲੇਹਿ ਚ ਸਮਨ੍ਤਤੋ ਹੇਟ੍ਠਾ ਚ ਉਪਰਿ ਚ ਛਾਦਿਤਂ, ਵਿਵਿਧਵਣ੍ਣਾਨਂ ਵਿਚਿਤ੍ਤਸਨ੍ਨਿਵੇਸਾਨਞ੍ਚ ਤਲਾਨਂ ਭੂਮੀਨਂ ਵਸੇਨ ਵਿਵਿਧਚਿਤ੍ਰਤਲਂ ਅਦ੍ਦਸਂ ਪਸ੍ਸਿਂ. ਸੁਰਮ੍ਮਨ੍ਤਿ ਸੁਟ੍ਠੁ ਰਮਣੀਯਂ. ਵਿਹਰਿਤੁਕਾਮਾ ਵਸਨ੍ਤਿ ਏਤ੍ਥਾਤਿ ਬ੍ਯਮ੍ਹਂ, ਭਵਨਂ. ਤੋਰਣੂਪਪਨ੍ਨਨ੍ਤਿ ਵਿਵਿਧਮਾਲਾਕਮ੍ਮਾਦਿਵਿਚਿਤ੍ਤੇਨ ਸਤ੍ਤਰਤਨਮਯੇਨ ਤੋਰਣੇਨ ਉਪੇਤਂ. ਤੋਰਣਨ੍ਤਿ ਵਾ ਦ੍ਵਾਰਕੋਟ੍ਠਕਪਾਸਾਦਸ੍ਸ ਨਾਮਂ, ਤੇਨ ਚ ਅਨੇਕਭੂਮਕੇਨ ਵਿਚਿਤ੍ਤਾਕਾਰੇਨ ਤਂ ਵਿਮਾਨਂ ਉਪੇਤਂ. ਰੁਚਕੁਪਤਿਣ੍ਣਨ੍ਤਿ ਸੁਵਣ੍ਣਵਾਲਿਕਾਹਿ ਓਕਿਣ੍ਣਙ੍ਗਣਂ. ਵਾਲਿਕਸਦਿਸਾ ਹਿ ਸੁਵਣ੍ਣਖਣ੍ਡਾ ਰੁਚਾ ਨਾਮ, ਰੁਚਮੇਵ ਰੁਚਕਨ੍ਤਿ ਵੁਤ੍ਤਂ. ਸੁਭਨ੍ਤਿ ਸੋਭਤਿ, ਸੁਟ੍ਠੁ ਭਾਤੀਤਿ ਵਾ ਸੁਭਂ. ਵਿਮਾਨਨ੍ਤਿ ਵਿਸਿਟ੍ਠਮਾਨਂ, ਪਮਾਣਤੋ ਮਹਨ੍ਤਨ੍ਤਿ ਅਤ੍ਥੋ.

੬੪੭. ਭਾਤੀਤਿ ਜੋਤਤਿ ਉਜ੍ਜਲਤਿ. ਨਭੇਵ ਸੁਰਿਯੋਤਿ ਆਕਾਸੇ ਆਦਿਚ੍ਚੋ ਵਿਯ. ਸਰਦੇਤਿ ਸਰਦਸਮਯੇ. ਤਮੋਨੁਦੋਤਿ ਅਨ੍ਧਕਾਰਵਿਦ੍ਧਂਸਨੋ. ਤਥਾ ਤਪਤਿ ਮਿਦਨ੍ਤਿ ਯਥਾ ਸਰਦਕਾਲੇ ਸਹਸ੍ਸਰਂਸੀ ਸੂਰਿਯੋ, ਤਥਾ ਤਪਤਿ ਦਿਬ੍ਬਤਿ ਇਦਂ ਤਵ ਵਿਮਾਨਂ, ਮ-ਕਾਰੋ ਪਦਸਨ੍ਧਿਕਰੋ. ਜਲਮਿਵ ਧੂਮਸਿਖੋਤਿ ਜਲਨ੍ਤੋ ਅਗ੍ਗਿ ਵਿਯ. ਅਗ੍ਗਿ ਹਿ ਤਸ੍ਸ ਅਗ੍ਗਤੋ ਧੂਮੋ ਪਞ੍ਞਾਯਤੀਤਿ ‘‘ਧੂਮਸਿਖੋ ਧੂਮਕੇਤੂ’’ਤਿ ਚ ਵੁਚ੍ਚਤਿ. ਨਿਸੇਤਿ ਨਿਸਤਿ, ਰਤ੍ਤਿਯਨ੍ਤਿ ਅਤ੍ਥੋ. ਨਭਗ੍ਗੇਤਿ ਨਭਕੋਟ੍ਠਾਸੇ, ਆਕਾਸਪਦੇਸੇਤਿ ਵੁਤ੍ਤਂ ਹੋਤਿ. ‘‘ਨਗਗ੍ਗੇ’’ਤਿ ਵਾ ਪਾਠੋ, ਪਬ੍ਬਤਸਿਖਰੇਤਿ ਅਤ੍ਥੋ. ਇਦਂ ਤਵ ਵਿਮਾਨਨ੍ਤਿ ਯੋਜਨਾ.

੬੪੮. ਮੁਸਤੀਵ ਨਯਨਨ੍ਤਿ ਅਤਿਵਿਯ ਅਤ੍ਤਨੋ ਪਭਸ੍ਸਰਤਾਯ ਪਟਿਹਨਨ੍ਤਂ ਦਸ੍ਸਨਕਿਚ੍ਚਂ ਕਾਤੁਂ ਅਦੇਨ੍ਤਂ ਓਲੋਕੇਨ੍ਤਾਨਂ ਚਕ੍ਖੁਂ ਮੁਸਤਿ ਵਿਯ. ਤੇਨਾਹ ‘‘ਸਤੇਰਤਾਵਾ’’ਤਿ, ਵਿਜ੍ਜੁਲਤਾ ਵਿਯਾਤਿ ਅਤ੍ਥੋ. ਵੀਣਾਮੁਰਜਸਮ੍ਮਤਾਲ਼ਘੁਟ੍ਠਨ੍ਤਿ ਮਹਤੀਆਦਿਵੀਣਾਨਂ ਭੇਰਿਆਦਿਪਟਹਾਨਂ ਹਤ੍ਥਤਾਲ਼ਕਂਸਤਾਲ਼ਾਨਞ੍ਚ ਸਦ੍ਦੇਹਿ ਘੋਸਿਤਂ ਏਕਨਿਨ੍ਨਾਦਂ. ਇਦ੍ਧਨ੍ਤਿ ਦੇਵਪੁਤ੍ਤੇਹਿ ਦੇਵਧੀਤਾਹਿ ਦਿਬ੍ਬਸਮ੍ਪਤ੍ਤਿਯਾ ਚ ਸਮਿਦ੍ਧਂ. ਇਨ੍ਦਪੁਰਂ ਯਥਾਤਿ ਸੁਦਸ੍ਸਨਨਗਰਂ ਵਿਯ.

੬੪੯. ਪਦੁਮਾਨਿ ਚ ਕੁਮੁਦਾਨਿ ਚ ਉਪ੍ਪਲਾਨਿ ਚ ਕੁਵਲਯਾਨਿ ਚ ਪਦੁਮਕੁਮੁਦੁਪ੍ਪਲਕੁਵਲਯਨ੍ਤਿ ਏਕਤ੍ਤਵਸੇਨ ਵੁਤ੍ਤਂ. ਅਤ੍ਥੀਤਿ ਵਚਨਂ ਪਰਿਣਾਮੇਤ੍ਵਾ ਯੋਜੇਤਬ੍ਬਂ. ਤਤ੍ਥ ਪਦੁਮਗ੍ਗਹਣੇਨ ਪੁਣ੍ਡਰੀਕਮ੍ਪਿ ਗਹਿਤਂ, ਕੁਮੁਦਗ੍ਗਹਣੇਨ ਸੇਤਰਤ੍ਤਭੇਦਾਨਿ ਸਬ੍ਬਾਨਿ ਕੁਮੁਦਾਨਿ, ਉਪ੍ਪਲਗ੍ਗਹਣੇਨ ਰਤ੍ਤਉਪ੍ਪਲਂ ਸਬ੍ਬਾ ਵਾ ਉਪ੍ਪਲਜਾਤਿ, ਕੁਵਲਯਗ੍ਗਹਣੇਨ ਨੀਲੁਪ੍ਪਲਮੇਵ ਗਹਿਤਨ੍ਤਿ ਵੇਦਿਤਬ੍ਬਂ. ਯੋਧਿਕਬਨ੍ਧੁਕਨੋਜਕਾ ਚ ਸਨ੍ਤੀਤਿ ਚ-ਕਾਰੋ ਨਿਪਾਤਮਤ੍ਤਂ, ਯੋਧਿਕਬਨ੍ਧੁਜੀਵਕਅਨੋਜਕਰੁਕ੍ਖਾ ਚ ਸਨ੍ਤੀਤਿ ਅਤ੍ਥੋ. ਕੇਚਿ ‘‘ਅਨੋਜਕਾਪਿ ਸਨ੍ਤੀ’’ਤਿ ਪਾਠਂ ਵਤ੍ਵਾ ‘‘ਅਨੋਜਕਾਪੀਤਿ ਵੁਤ੍ਤਂ ਹੋਤੀ’’ਤਿ ਅਤ੍ਥਂ ਵਦਨ੍ਤਿ. ਸਾਲਕੁਸੁਮਿਤਪੁਪ੍ਫਿਤਾ ਅਸੋਕਾਤਿ ਸਾਲਾ ਕੁਸੁਮਿਤਾ ਪੁਪ੍ਫਿਤਾ ਅਸੋਕਾਤਿ ਯੋਜੇਤਬ੍ਬਂ. ਵਿਵਿਧਦੁਮਗ੍ਗਸੁਗਨ੍ਧਸੇਵਿਤਮਿਦਨ੍ਤਿ ਨਾਨਾਵਿਧਾਨਂ ਉਤ੍ਤਮਰੁਕ੍ਖਾਨਂ ਸੋਭਨੇਹਿ ਗਨ੍ਧੇਹਿ ਸੇਵਿਤਂ ਪਰਿਭਾਵਿਤਂ ਇਦਂ ਤੇ ਵਿਮਾਨਨ੍ਤਿ ਅਤ੍ਥੋ.

੬੫੦. ਸਲ਼ਲਲਬੁਜਭੁਜਕਸਂਯੁਤ੍ਤਾਤਿ ਤੀਰੇ ਠਿਤੇਹਿ ਸਲ਼ਲੇਹਿ ਲਬੁਜੇਹਿ ਭੁਜਕਰੁਕ੍ਖੇਹਿ ਚ ਸਹਿਤਾ. ਭੁਜਕੋ ਨਾਮ ਏਕੋ ਸੁਗਨ੍ਧਰੁਕ੍ਖੋ ਦੇਵਲੋਕੇ ਚ ਗਨ੍ਧਮਾਦਨੇ ਚ ਅਤ੍ਥਿ, ਅਞ੍ਞਤ੍ਥ ਨਤ੍ਥੀਤਿ ਵਦਨ੍ਤਿ. ਕੁਸਕਸੁਫੁਲ੍ਲਿਤਲਤਾਵਲਮ੍ਬਿਨੀਹੀਤਿ ਕੁਸਕੇਹਿ ਤਾਲਨਾਲ਼ਿਕੇਰਾਦੀਹਿ ਤਿਣਜਾਤੀਹਿ ਓਲਮ੍ਬਮਾਨਾਹਿ ਸਨ੍ਤਾਨਕਵਲ੍ਲਿਆਦੀਹਿ ਸੁਟ੍ਠੁ ਕੁਸੁਮਿਤਲਤਾਹਿ ਚ ਸਂਯੁਤ੍ਤਾਤਿ ਯੋਜਨਾ. ਮਣਿਜਾਲਸਦਿਸਾਤਿ ਮਣਿਜਾਲਸਦਿਸਜਲਾ. ‘‘ਮਣਿਜਲਸਦਿਸਾ’’ਤਿਪਿ ਪਾਲ਼ਿ, ਮਣਿਸਦਿਸਜਲਾਤਿ ਅਤ੍ਥੋ. ਯਸਸ੍ਸਿਨੀਤਿ ਦੇਵਤਾਯ ਆਲਪਨਂ. ਉਪਟ੍ਠਿਤਾ ਤੇਤਿ ਯਥਾਵੁਤ੍ਤਗੁਣਾ ਰਮਣੀਯਾ ਪੋਕ੍ਖਰਣੀ ਤਵ ਵਿਮਾਨਸਮੀਪੇ ਠਿਤਾ.

੬੫੧. ਉਦਕਰੁਹਾਤਿ ਯਥਾਵੁਤ੍ਤੇ ਪਦੁਮਾਦਿਕੇ ਸਨ੍ਧਾਯ ਵਦਤਿ. ਯੇਤ੍ਥੀਤਿ ਯੇ ਅਤ੍ਥਿ. ਥਲਜਾਤਿ ਯੋਧਿਕਾਦਿਕਾ. ਯੇ ਚ ਸਨ੍ਤੀਤਿ ਯੇ ਅਞ੍ਞੇਪਿ ਰੁਕ੍ਖਜਾਤਾ ਪੁਪ੍ਫੂਪਗਾ ਚ ਫਲੂਪਗਾ ਚ, ਤੇਪਿ ਤਵ ਵਿਮਾਨਸਮੀਪੇ ਸਨ੍ਤਿਯੇਵ.

੬੫੨. ਕਿਸ੍ਸ ਸਂਯਮਦਮਸ੍ਸਯਂ ਵਿਪਾਕੋਤਿ ਕਾਯਸਂਯਮਾਦੀਸੁ ਕੀਦਿਸਸ੍ਸ ਸਂਯਮਸ੍ਸ, ਇਨ੍ਦ੍ਰਿਯਦਮਨਾਦੀਸੁ ਕੀਦਿਸਸ੍ਸ ਦਮਸ੍ਸ ਅਯਂ ਵਿਪਾਕੋ. ਕੇਨਾਸੀਤਿ ਅਞ੍ਞਮੇਵ ਉਪਪਤ੍ਤਿਨਿਬ੍ਬਤ੍ਤਕਂ, ਅਞ੍ਞਂ ਉਪਭੋਗਸੁਖਨਿਬ੍ਬਤ੍ਤਕਂ ਹੋਤੀਤਿ ‘‘ਕੇਨਾਸਿ ਕਮ੍ਮਫਲੇਨਿਧੂਪਪਨ੍ਨਾ’’ਤਿ ਵਤ੍ਵਾ ਪੁਨ ‘‘ਯਥਾ ਚ ਤੇ ਅਧਿਗਤਮਿਦਂ ਵਿਮਾਨ’’ਨ੍ਤਿ ਆਹ. ਤਤ੍ਥ ਕਮ੍ਮਫਲੇਨਾਤਿ ਕਮ੍ਮਫਲੇਨ ਵਿਪਚ੍ਚਿਤੁਂ ਆਰਦ੍ਧੇਨਾਤਿ ਵਚਨਸੇਸੋ, ਇਤ੍ਥਮ੍ਭੂਤਲਕ੍ਖਣੇ ਚੇਤਂ ਕਰਣਵਚਨਂ. ਤਦਨੁਪਦਂ ਅਵਚਾਸੀਤਿ ਤਂ ਕਮ੍ਮਂ ਮਯਾ ਵੁਤ੍ਤਪਦਸ੍ਸ ਅਨੁਪਦਂ ਅਨੁਰੂਪਪਦਂ ਕਤ੍ਵਾ ਕਥੇਯ੍ਯਾਸਿ. ਅਲ਼ਾਰਪਮ੍ਹੇਤਿ ਬਹਲਸਂਹਤਪਖੁਮੇ, ਗੋਪਖੁਮੇਤਿ ਅਧਿਪ੍ਪਾਯੋ.

ਅਥ ਦੇਵਤਾ ਆਹ –

੬੫੩. ‘‘ਯਥਾ ਚ ਮੇ ਅਧਿਗਤਮਿਦਂ ਵਿਮਾਨਂ, ਕੋਞ੍ਚਮਯੂਰਚਕੋਰ ਸਙ੍ਘਚਰਿਤਂ;

ਦਿਬ੍ਯਪਿਲਵਹਂਸਰਾਜਚਿਣ੍ਣਂ, ਦਿਜਕਾਰਣ੍ਡਵਕੋਕਿਲਾਭਿਨਦਿਤਂ.

੬੫੪. ‘‘ਨਾਨਾਸਨ੍ਤਾਨਕਪੁਪ੍ਫਰੁਕ੍ਖਵਿਵਿਧਾ, ਪਾਟਲਿਜਮ੍ਬੁਅਸੋਕਰੁਕ੍ਖਵਨ੍ਤਂ;

ਯਥਾ ਚ ਮੇ ਅਧਿਗਤਮਿਦਂ ਵਿਮਾਨਂ, ਤਂ ਤੇ ਪਵੇਦਯਾਮਿ ਸੁਣੋਹਿ ਭਨ੍ਤੇ.

੬੫੫. ‘‘ਮਗਧਵਰਪੁਰਤ੍ਥਿਮੇਨ, ਨਾਲਕਗਾਮੋ ਨਾਮ ਅਤ੍ਥਿ ਭਨ੍ਤੇ;

ਤਤ੍ਥ ਅਹੋਸਿਂ ਪੁਰੇ ਸੁਣਿਸਾ, ਪੇਸਵਤੀਤਿ ਤਤ੍ਥ ਜਾਨਿਂਸੁ ਮਮਂ.

੬੫੬. ‘‘ਸਾਹਮਪਚਿਤਤ੍ਥਧਮ੍ਮਕੁਸਲਂ, ਦੇਵਮਨੁਸ੍ਸਪੂਜਿਤਂ ਮਹਨ੍ਤਂ;

ਉਪਤਿਸ੍ਸਂ ਨਿਬ੍ਬੁਤਮਪ੍ਪਮੇਯ੍ਯਂ, ਮੁਦਿਤਮਨਾ ਕੁਸੁਮੇਹਿ ਅਬ੍ਭੁਕਿਰਿਂ.

੬੫੭. ‘‘ਪਰਮਗਤਿਗਤਞ੍ਚ ਪੂਜਯਿਤ੍ਵਾ, ਅਨ੍ਤਿਮਦੇਹਧਰਂ ਇਸਿਂ ਉਲ਼ਾਰਂ;

ਪਹਾਯ ਮਾਨੁਸਕਂ ਸਮੁਸ੍ਸਯਂ, ਤਿਦਸਗਤਾ ਇਧ ਮਾਵਸਾਮਿ ਠਾਨ’’ਨ੍ਤਿ.

੬੫੩. ਤਤ੍ਥ ਕੋਞ੍ਚਮਯੂਰਚਕੋਰਸਙ੍ਘਚਰਿਤਨ੍ਤਿ ਸਾਰਸਸਿਖਣ੍ਡਿਕੁਮ੍ਭਕਾਰਕੁਕ੍ਕੁਟਗਣੇਹਿ ਤਤ੍ਥ ਤਤ੍ਥ ਵਿਚਰਿਤਂ. ਦਿਬ੍ਯਪਿਲਵਹਂਸਰਾਜਚਿਣ੍ਣਨ੍ਤਿ ਉਦਕੇ ਪਿਲਵਿਤ੍ਵਾ ਵਿਚਰਣਤੋ ‘‘ਪਿਲਵਾ’’ਤਿ ਲਦ੍ਧਨਾਮੇਹਿ ਉਦਕਸਕੁਣੇਹਿ ਹਂਸਰਾਜੇਹਿ ਚ ਤਹਿਂ ਤਹਿਂ ਵਿਚਰਿਤਂ. ਦਿਜਕਾਰਣ੍ਡਵਕੋਕਿਲਾਭਿਨਦਿਤਨ੍ਤਿ ਕਾਰਣ੍ਡਵੇਹਿ ਕਾਦਮ੍ਬੇਹਿ ਕੋਕਿਲੇਹਿ ਅਞ੍ਞੇਹਿ ਚ ਦਿਜੇਹਿ ਅਭਿਨਾਦਿਤਂ.

੬੫੪. ਨਾਨਾਸਨ੍ਤਾਨਕਪੁਪ੍ਫਰੁਕ੍ਖਵਿਵਿਧਾਤਿ ਨਾਨਾਵਿਧਸਾਖਾਪਸਾਖਵਨ੍ਤਾ ਨਾਨਾਪੁਪ੍ਫਰੁਕ੍ਖਾ ਨਾਨਾਸਨ੍ਤਾਨਕਪੁਪ੍ਫਰੁਕ੍ਖਾ, ਤੇਹਿ ਵਿਵਿਧਂ ਚਿਤ੍ਤਾਕਾਰਂ ਵਿਚਿਤ੍ਤਸਨ੍ਨਿਵੇਸਂ ਨਾਨਾਸਨ੍ਤਾਨਕਪੁਪ੍ਫਰੁਕ੍ਖਵਿਵਿਧਾ. ‘‘ਵਿਵਿਧ’’ਨ੍ਤਿ ਹਿ ਵਤ੍ਤਬ੍ਬੇ ‘‘ਵਿਵਿਧਾ’’ਤਿ ਵੁਤ੍ਤਂ. ਸਨ੍ਤਾਨਕਾਤਿ ਹਿ ਕਾਮਵਲ੍ਲਿਯੋ, ਨਾਨਾਵਿਧਪੁਪ੍ਫਰੁਕ੍ਖਾ ਚ ਵਿਵਿਧਾ ਏਤ੍ਥ ਸਨ੍ਤਿ, ਤੇਹਿ ਵਾ ਵਿਵਿਧਨ੍ਤਿ ਨਾਨਾਸਨ੍ਤਾਨਕਪੁਪ੍ਫਰੁਕ੍ਖਵਿਵਿਧਾ. ‘‘ਨਾਨਾਸਨ੍ਤਾਨਕਪੁਪ੍ਫਰੁਕ੍ਖਵਿਵਿਧਂ, ਪਾਟਲਿਜਮ੍ਬੁਅਸੋਕਰੁਕ੍ਖਵਨ੍ਤ’’ਨ੍ਤਿ ਚ ਕੇਚਿ ਪਠਨ੍ਤਿ. ਤੇਹਿ ‘‘ਪੁਪ੍ਫਰੁਕ੍ਖਾ ਸਨ੍ਤੀ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ‘‘ਪੁਪ੍ਫਰੁਕ੍ਖਾ’’ਤਿ ਵਾ ਅਵਿਭਤ੍ਤਿਕਨਿਦ੍ਦੇਸੋ, ਪੁਪ੍ਫਰਕ੍ਖਨ੍ਤਿ ਵੁਤ੍ਤਂ ਹੋਤਿ.

੬੫੫. ਮਗਧਵਰਪੁਰਤ੍ਥਿਮੇਨਾਤਿ ਮਗਧਵਰੇ ਪੁਰਤ੍ਥਿਮੇਨ, ਅਭਿਸਮ੍ਬੋਧਿਟ੍ਠਾਨਤਾਯ ਉਤ੍ਤਮੇ ਮਗਧਰਟ੍ਠੇ ਪੁਰਤ੍ਥਿਮਦਿਸਾਯ. ਤਤ੍ਥ ਅਹੋਸਿਂ ਪੁਰੇ ਸੁਣਿਸਾਤਿ ਪੁਬ੍ਬੇ ਅਹਂ ਤਸ੍ਮਿਂ ਨਾਲਕਗਾਮੇ ਏਕਸ੍ਮਿਂ ਗਹਪਤਿਕੁਲੇ ਸੁਣਿਸਾ ਸੁਣ੍ਹਾ ਅਹੋਸਿਂ.

੬੫੬. ਸਾਤਿ ਸਯਂ. ਅਤ੍ਥੇ ਚ ਧਮ੍ਮੇ ਚ ਕੁਸਲੋਤਿ ਅਤ੍ਥਧਮ੍ਮਕੁਸਲੋ, ਭਗਵਾ. ਅਪਚਿਤੋ ਅਤ੍ਥਧਮ੍ਮਕੁਸਲੋ ਏਤੇਨਾਤਿ ਅਪਚਿਤਤ੍ਥਧਮ੍ਮਕੁਸਲੋ, ਧਮ੍ਮਸੇਨਾਪਤਿ, ਤਂ. ਅਪਚਿਤਂ ਵਾ ਅਪਚਯੋ, ਨਿਬ੍ਬਾਨਂ, ਤਸ੍ਮਿਂ ਅਵਸਿਟ੍ਠਅਤ੍ਥਧਮ੍ਮੇ ਚ ਕੁਸਲਂ, ਅਪਚਿਤੇ ਵਾ ਪੂਜਨੀਯੇ ਅਤ੍ਥੇ ਧਮ੍ਮੇ ਨਿਰੋਧੇ ਮਗ੍ਗੇ ਚ ਕੁਸਲਂ. ਮਹਨ੍ਤੇਹਿ ਉਲ਼ਾਰੇਹਿ ਸੀਲਕ੍ਖਨ੍ਧਾਦੀਹਿ ਸਮਨ੍ਨਾਗਤਤ੍ਤਾ ਮਹਨ੍ਤਂ. ਕੁਸੁਮੇਹੀਤਿ ਰਤਨਮਯੇਹਿ ਇਤਰੇਹਿ ਚ ਕੁਸੁਮੇਹਿ.

੬੫੭. ਪਰਮਗਤਿਗਤਨ੍ਤਿ ਅਨੁਪਾਦਿਸੇਸਨਿਬ੍ਬਾਨਂ ਪਤ੍ਤਂ. ਸਮੁਸ੍ਸਯਨ੍ਤਿ ਸਰੀਰਂ. ਤਿਦਸਗਤਾਤਿ ਤਿਦਸਭਵਨਂ ਗਤਾ, ਤਾਵਤਿਂਸਂ ਦੇਵਨਿਕਾਯਂ ਉਪਪਨ੍ਨਾ. ਇਧਾਤਿ ਇਮਸ੍ਮਿਂ ਦੇਵਲੋਕੇ. ਆਵਸਾਮਿ ਠਾਨਨ੍ਤਿ ਇਮਂ ਵਿਮਾਨਂ ਅਧਿਵਸਾਮਿ. ਸੇਸਂ ਵੁਤ੍ਤਨਯਮੇਵ.

ਏਵਂ ਆਯਸ੍ਮਤਾ ਵਙ੍ਗੀਸੇਨ ਦੇਵਤਾਯ ਚ ਕਥਿਤਕਥਾਮਗ੍ਗਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਭਗਵਾ ਸਮ੍ਪਤ੍ਤਪਰਿਸਾਯ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਪੇਸਵਤੀਵਿਮਾਨਵਣ੍ਣਨਾ ਨਿਟ੍ਠਿਤਾ.