੫. ਗੁਤ੍ਤਿਲਵਿਮਾਨਵਣ੍ਣਨਾ

ਸਤ੍ਤਤਨ੍ਤਿਂ ਸੁਮਧੁਰਨ੍ਤਿ ਗੁਤ੍ਤਿਲਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਰਾਜਗਹੇ ਵਿਹਰਨ੍ਤੇ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨੇਵ ਦੇਵਚਾਰਿਕਂ ਚਰਨ੍ਤੋ ਤਾਵਤਿਂਸਭਵਨਂ ਗਨ੍ਤ੍ਵਾ ਤਤ੍ਥ ਪਟਿਪਾਟਿਯਾ ਠਿਤੇਸੁ ਛਤ੍ਤਿਂਸਾਯ ਵਿਮਾਨੇਸੁ ਛਤ੍ਤਿਂਸ ਦੇਵਧੀਤਰੋ ਪਚ੍ਚੇਕਂ ਅਚ੍ਛਰਾਸਹਸ੍ਸਪਰਿਵਾਰਾ ਮਹਤਿਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤਿਯੋ ਦਿਸ੍ਵਾ ਤਾਹਿ ਪੁਬ੍ਬੇ ਕਤਕਮ੍ਮਂ ‘‘ਅਭਿਕ੍ਕਨ੍ਤੇਨ ਵਣ੍ਣੇਨਾ’’ਤਿਆਦੀਹਿ ਤੀਹਿ ਗਾਥਾਹਿ ਪਟਿਪਾਟਿਯਾ ਪੁਚ੍ਛਿ. ਤਾਪਿ ਤਸ੍ਸ ਪੁਚ੍ਛਾਨਨ੍ਤਰਂ ‘‘ਵਤ੍ਥੁਤ੍ਤਮਦਾਯਿਕਾ ਨਾਰੀ’’ਤਿਆਦਿਨਾ ਬ੍ਯਾਕਰਿਂਸੁ. ਅਥ ਥੇਰੋ ਤਤੋ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸਿ. ਤਂ ਸੁਤ੍ਵਾ ਭਗਵਾ ‘‘ਮੋਗ੍ਗਲ੍ਲਾਨ, ਤਾ ਦੇਵਤਾ ਨ ਕੇਵਲਂ ਤਯਾ ਏਵ ਪੁਚ੍ਛਿਤਾ ਏਵਂ ਬ੍ਯਾਕਰਿਂਸੁ, ਅਥ ਖੋ ਪੁਬ੍ਬੇ ਮਯਾਪਿ ਪੁਚ੍ਛਿਤਾ ਏਵਮੇਵ ਬ੍ਯਾਕਰਿਂਸੂ’’ਤਿ ਵਤ੍ਵਾ ਥੇਰੇਨ ਯਾਚਿਤੋ ਅਤੀਤਂ ਅਤ੍ਤਨੋ ਗੁਤ੍ਤਿਲਾਚਰਿਯਂ ਕਥੇਸਿ.

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬੋਧਿਸਤ੍ਤੋ ਗਨ੍ਧਬ੍ਬਕੁਲੇ ਨਿਬ੍ਬਤ੍ਤਿਤ੍ਵਾ ਗਨ੍ਧਬ੍ਬਸਿਪ੍ਪੇ ਪਰਿਯੋਦਾਤਸਿਪ੍ਪਤਾਯ ਤਿਮ੍ਬਰੁਨਾਰਦਸਦਿਸੋ ਸਬ੍ਬਦਿਸਾਸੁ ਪਾਕਟੋ ਪਞ੍ਞਾਤਾ ਆਚਰਿਯੋ ਅਹੋਸਿ ਨਾਮੇਨ ਗੁਤ੍ਤਿਲੋ ਨਾਮ. ਸੋ ਅਨ੍ਧੇ ਜਿਣ੍ਣੇ ਮਾਤਾਪਿਤਰੋ ਪੋਸੇਸਿ. ਤਸ੍ਸ ਸਿਪ੍ਪਨਿਪ੍ਫਤ੍ਤਿਂ ਸੁਤ੍ਵਾ ਉਜ੍ਜੇਨਿਵਾਸੀ ਮੁਸਿਲੋ ਨਾਮ ਗਨ੍ਧਬ੍ਬੋ ਉਪਗਨ੍ਤ੍ਵਾ ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤੋ ‘‘ਕਸ੍ਮਾ ਆਗਤੋਸੀ’’ਤਿ ਚ ਵੁਤ੍ਤੇ ‘‘ਤੁਮ੍ਹਾਕਂ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹਿਤੁ’’ਨ੍ਤਿ ਆਹ. ਗੁਤ੍ਤਿਲਾਚਰਿਯੋ ਤਂ ਓਲੋਕੇਤ੍ਵਾ ਲਕ੍ਖਣਕੁਸਲਤਾਯ ‘‘ਅਯਂ ਪੁਰਿਸੋ ਵਿਸਮਜ੍ਝਾਸਯੋ ਕਕ੍ਖਲ਼ੋ ਫਰੁਸੋ ਅਕਤਞ੍ਞੂ ਭਵਿਸ੍ਸਤਿ, ਨ ਸਙ੍ਗਹੇਤਬ੍ਬੋ’’ਤਿ ਸਿਪ੍ਪੁਗ੍ਗਹਣਤ੍ਥਂ ਓਕਾਸਂ ਨਾਕਾਸਿ. ਸੋ ਤਸ੍ਸ ਮਾਤਾਪਿਤਰੋ ਪਯਿਰੁਪਾਸਿਤ੍ਵਾ ਤੇਹਿ ਯਾਚਾਪੇਸਿ. ਗੁਤ੍ਤਿਲਾਚਰਿਯੋ ਮਾਤਾਪਿਤੂਹਿ ਨਿਪ੍ਪੀਲ਼ਿਯਮਾਨੋ ‘‘ਗਰੁਵਚਨਂ ਅਲਙ੍ਘਨੀਯ’’ਨ੍ਤਿ ਤਸ੍ਸ ਸਿਪ੍ਪਂ ਪਟ੍ਠਪੇਤ੍ਵਾ ਵਿਗਤਮਚ੍ਛਰਿਯਤਾਯ ਕਾਰੁਣਿਕਤਾਯ ਚ ਆਚਰਿਯਮੁਟ੍ਠਿਂ ਅਕਤ੍ਵਾ ਅਨਵਸੇਸਤੋ ਸਿਪ੍ਪਂ ਸਿਕ੍ਖਾਪੇਸਿ.

ਸੋਪਿ ਮੇਧਾਵਿਤਾਯ ਪੁਬ੍ਬੇਕਤਪਰਿਚਯਤਾਯ ਅਕੁਸੀਤਤਾਯ ਚ ਨ ਚਿਰਸ੍ਸੇਵ ਪਰਿਯੋਦਾਤਸਿਪ੍ਪੋ ਹੁਤ੍ਵਾ ਚਿਨ੍ਤੇਸਿ ‘‘ਅਯਂ ਬਾਰਾਣਸੀ ਜਮ੍ਬੁਦੀਪੇ ਅਗ੍ਗਨਗਰਂ, ਯਂਨੂਨਾਹਂ ਇਧ ਸਰਾਜਿਕਾਯ ਪਰਿਸਾਯ ਸਿਪ੍ਪਂ ਦਸ੍ਸੇਯ੍ਯਂ, ਏਵਾਹਂ ਆਚਰਿਯਤੋਪਿ ਜਮ੍ਬੁਦੀਪੇ ਪਾਕਟੋ ਪਞ੍ਞਾਤੋ ਭਵਿਸ੍ਸਾਮੀ’’ਤਿ. ਸੋ ਆਚਰਿਯਸ੍ਸ ਆਰੋਚੇਸਿ ‘‘ਅਹਂ ਰਞ੍ਞੋ ਪੁਰਤੋ ਸਿਪ੍ਪਂ ਦਸ੍ਸੇਤੁਕਾਮੋ, ਰਾਜਾਨਂ ਮਂ ਦਸ੍ਸੇਥਾ’’ਤਿ. ਮਹਾਸਤ੍ਤੋ ‘‘ਅਯਂ ਮਮ ਸਨ੍ਤਿਕੇ ਉਗ੍ਗਹਿਤਸਿਪ੍ਪੋ ਪਤਿਟ੍ਠਂ ਲਭਤੂ’’ਤਿ ਕਰੁਣਾਯਮਾਨੋ ਤਂ ਰਞ੍ਞੋ ਸਨ੍ਤਿਕਂ ਨੇਤ੍ਵਾ ‘‘ਮਹਾਰਾਜ ਇਮਸ੍ਸ ਮੇ ਅਨ੍ਤੇਵਾਸਿਕਸ੍ਸ ਵੀਣਾਯ ਪਗੁਣਤਂ ਪਸ੍ਸਥਾ’’ਤਿ ਆਹ. ਰਾਜਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਤਸ੍ਸ ਵੀਣਾਵਾਦਨਂ ਸੁਤ੍ਵਾ ਪਰਿਤੁਟ੍ਠੋ ਤਂ ਗਨ੍ਤੁਕਾਮਂ ਨਿਵਾਰੇਤ੍ਵਾ ‘‘ਮਮੇਵ ਸਨ੍ਤਿਕੇ ਵਸ, ਆਚਰਿਯਸ੍ਸ ਦਿਨ੍ਨਕੋਟ੍ਠਾਸਤੋ ਉਪਡ੍ਢਂ ਦਸ੍ਸਾਮੀ’’ਤਿ ਆਹ. ਮੁਸਿਲੋ ‘‘ਨਾਹਂ ਆਚਰਿਯਤੋ ਹਾਯਾਮਿ, ਸਮਮੇਵ ਦੇਥਾ’’ਤਿ ਵਤ੍ਵਾ ਰਞ੍ਞਾ ‘‘ਮਾ ਏਵਂ ਭਣਿ, ਆਚਰਿਯੋ ਨਾਮ ਮਹਨ੍ਤੋ, ਉਪਡ੍ਢਮੇਵ ਤੁਯ੍ਹਂ ਦਸ੍ਸਾਮੀ’’ਤਿ ਵੁਤ੍ਤੇ ‘‘ਮਮ ਚ ਆਚਰਿਯਸ੍ਸ ਚ ਸਿਪ੍ਪਂ ਪਸ੍ਸਥਾ’’ਤਿ ਵਤ੍ਵਾ ਰਾਜਗੇਹਤੋ ਨਿਕ੍ਖਮਿਤ੍ਵਾ ‘‘ਇਤੋ ਸਤ੍ਤਮੇ ਦਿਵਸੇ ਮਮ ਚ ਗੁਤ੍ਤਿਲਾਚਰਿਯਸ੍ਸ ਚ ਰਾਜਙ੍ਗਣੇ ਸਿਪ੍ਪਦਸ੍ਸਨਂ ਭਵਿਸ੍ਸਤਿ, ਤਂ ਪਸ੍ਸਿਤੁਕਾਮਾ ਪਸ੍ਸਨ੍ਤੂ’’ਤਿ ਤਤ੍ਥ ਤਤ੍ਥ ਆਹਿਣ੍ਡਨ੍ਤੋ ਉਗ੍ਘੋਸੇਸਿ.

ਮਹਾਸਤ੍ਤੋ ਤਂ ਸੁਤ੍ਵਾ ‘‘ਅਯਂ ਤਰੁਣੋ ਥਾਮਵਾ, ਅਹਂ ਪਨ ਜਿਣ੍ਣੋ ਦੁਬ੍ਬਲੋ, ਯਦਿ ਪਨ ਮੇ ਪਰਾਜਯੋ ਭਵੇਯ੍ਯ, ਮਤਂ ਮੇ ਜੀਵਿਤਾ ਸੇਯ੍ਯਂ, ਤਸ੍ਮਾ ਅਰਞ੍ਞਂ ਪਵਿਸਿਤ੍ਵਾ ਉਬ੍ਬਨ੍ਧਿਤ੍ਵਾ ਮਰਿਸ੍ਸਾਮੀ’’ਤਿ ਅਰਞ੍ਞਂ ਗਤੋ ਮਰਣਭਯਤਜ੍ਜਿਤੋ ਪਟਿਨਿਵਤ੍ਤਿ. ਪੁਨ ਮਰਿਤੁਕਾਮੋ ਹੁਤ੍ਵਾ ਗਨ੍ਤ੍ਵਾ ਪੁਨਪਿ ਮਰਣਭਯੇਨ ਪਟਿਨਿਵਤ੍ਤਿ. ਏਵਂ ਗਮਨਾਗਮਨਂ ਕਰੋਨ੍ਤਸ੍ਸ ਤਂ ਠਾਨਂ ਵਿਗਤਤਿਣਂ ਅਹੋਸਿ. ਅਥ ਦੇਵਰਾਜਾ ਮਹਾਸਤ੍ਤਂ ਉਪਸਙ੍ਕਮਿਤ੍ਵਾ ਦਿਸ੍ਸਮਾਨਰੂਪੋ ਆਕਾਸੇ ਠਤ੍ਵਾ ਏਵਮਾਹ ‘‘ਆਚਰਿਯ, ਕਿਂ ਕਰੋਸੀ’’ਤਿ. ਮਹਾਸਤ੍ਤੋ –

੩੨੭. ‘‘ਸਤ੍ਤਤਨ੍ਤਿਂ ਸੁਮਧੁਰਂ, ਰਾਮਣੇਯ੍ਯਂ ਅਵਾਚਯਿਂ;

ਸੋ ਮਂ ਰਙ੍ਗਮ੍ਹਿ ਅਵ੍ਹੇਤਿ, ਸਰਣਂ ਮੇ ਹੋਹਿ ਕੋਸਿਯਾ’’ਤਿ. –

ਅਤ੍ਤਨੋ ਚਿਤ੍ਤਦੁਕ੍ਖਂ ਪਵੇਦੇਸਿ.

ਤਸ੍ਸਤ੍ਥੋ – ਅਹਂ ਦੇਵਰਾਜ ਮੁਸਿਲਂ ਨਾਮ ਅਨ੍ਤੇਵਾਸਿਕਂ ਸਤ੍ਤਨ੍ਨਂ ਤਨ੍ਤੀਨਂ ਅਤ੍ਥਿਤਾਯ ਛਜ੍ਜਾਦਿਸਤ੍ਤਵਿਧਸਰਦੀਪਨਤੋ ਚ ਸਤ੍ਤਤਨ੍ਤਿਂ, ਤਂ ਵਿਸਯਂ ਕਤ੍ਵਾ ਯਥਾਰਹਂ ਦ੍ਵਾਵੀਸਤਿਯਾ ਸੁਤਿਭੇਦਾਨਂ ਅਹਾਪਨਤੋ ਸੁਟ੍ਠੁ ਮਧੁਰਨ੍ਤਿ ਸੁਮਧੁਰਂ, ਯਥਾਧਿਗਤਾਨਂ ਸਮਪਞ੍ਞਾਸਾਯ ਮੁਚ੍ਛਨਾਨਂ ਪਰਿਬ੍ਯਤ੍ਤਤਾਯ ਸਰਸ੍ਸ ਚ ਵੀਣਾਯ ਚ ਅਞ੍ਞਮਞ੍ਞਸਂਸਨ੍ਦਨੇਨ ਸੁਣਨ੍ਤਾਨਂ ਅਤਿਵਿਯ ਮਨੋਰਮਭਾਵਤੋ ਰਾਮਣੇਯ੍ਯਂ, ਸਰਗਤਾਦਿਵਿਭਾਗਤੋ ਛਜ੍ਜਾਦਿਚਤੁਬ੍ਬਿਧਂ ਗਨ੍ਧਬ੍ਬਂ ਅਹਾਪੇਤ੍ਵਾ ਗਨ੍ਧਬ੍ਬਸਿਪ੍ਪਂ ਅਵਾਚਯਿਨ੍ਤਿ ਵਾਚੇਸਿਂ ਉਗ੍ਗਣ੍ਹਾਪੇਸਿਂ ਸਿਕ੍ਖਾਪੇਸਿਂ. ਸੋ ਮੁਸਿਲੋ ਅਨ੍ਤੇਵਾਸੀ ਸਮਾਨੋ ਮਂ ਅਤ੍ਤਨੋ ਆਚਰਿਯਂ ਰਙ੍ਗਮ੍ਹਿ ਰਙ੍ਗਮਣ੍ਡਲੇ ਅਵ੍ਹੇਤਿ ਸਾਰਮ੍ਭਵਸੇਨ ਅਤ੍ਤਨੋ ਵਿਸੇਸਂ ਦਸ੍ਸੇਤੁਂ ਸਙ੍ਘਟ੍ਟਿਯਤਿ, ‘‘ਏਹਿ ਸਿਪ੍ਪਂ ਦਸ੍ਸੇਹੀ’’ਤਿ ਮਂ ਆਚਿਕ੍ਖਿ, ਤਸ੍ਸ ਮੇ ਤ੍ਵਂ ਕੋਸਿਯ ਦੇਵਰਾਜ ਸਰਣਂ ਅਵਸ੍ਸਯੋ ਹੋਹੀਤਿ.

ਤਂ ਸੁਤ੍ਵਾ ਸਕ੍ਕੋ ਦੇਵਰਾਜਾ ‘‘ਮਾ ਭਾਯਿ ਆਚਰਿਯ, ਅਹਂ ਤੇ ਸਰਣਂ ਪਰਾਯਣ’’ਨ੍ਤਿ ਦਸ੍ਸੇਨ੍ਤੋ –

੩੨੮. ‘‘ਅਹਂ ਤੇ ਸਰਣਂ ਹੋਮਿ, ਅਹਮਾਚਰਿਯਪੂਜਕੋ;

ਨ ਤਂ ਜਯਿਸ੍ਸਤਿ ਸਿਸ੍ਸੋ, ਸਿਸ੍ਸਮਾਚਰਿਯ ਜੇਸ੍ਸਸੀ’’ਤਿ. –

ਆਹ. ਸਕ੍ਕਸ੍ਸ ਕਿਰ ਦੇਵਰਞ੍ਞੋ ਪੁਰਿਮਤ੍ਤਭਾਵੇ ਮਹਾਸਤ੍ਤੋ ਆਚਰਿਯੋ ਅਹੋਸਿ. ਤੇਨਾਹ ‘‘ਅਹਮਾਚਰਿਯਪੂਜਕੋ’’ਤਿ. ਅਹਂ ਆਚਰਿਯਾਨਂ ਪੂਜਕੋ, ਨ ਮੁਸਿਲੋ ਵਿਯ ਯੁਗਗ੍ਗਾਹੀ, ਮਾਦਿਸੇਸੁ ਅਨ੍ਤੇਵਾਸਿਕੇਸੁ ਠਿਤੇਸੁ ਤਾਦਿਸਸ੍ਸ ਆਚਰਿਯਸ੍ਸ ਕਥਂ ਪਰਾਜਯੋ, ਤਸ੍ਮਾ ਨ ਤਂ ਜਯਿਸ੍ਸਤਿ ਸਿਸ੍ਸੋ, ਅਞ੍ਞਦਤ੍ਥੁ ਸਿਸ੍ਸਂ ਮੁਸਿਲਂ ਆਚਰਿਯ ਤ੍ਵਮੇਵ ਜਯਿਸ੍ਸਸਿ, ਸੋ ਪਨ ਪਰਾਜਿਤੋ ਵਿਨਾਸਂ ਪਾਪੁਣਿਸ੍ਸਤੀਤਿ ਅਧਿਪ੍ਪਾਯੋ. ਏਵਞ੍ਚ ਪਨ ਵਤ੍ਵਾ ‘‘ਅਹਂ ਸਤ੍ਤਮੇ ਦਿਵਸੇ ਸਾਕਚ੍ਛਾਮਣ੍ਡਲਂ ਆਗਮਿਸ੍ਸਾਮਿ, ਤੁਮ੍ਹੇ ਵਿਸ੍ਸਤ੍ਥਾ ਵਾਦੇਥਾ’’ਤਿ ਸਮਸ੍ਸਾਸੇਤ੍ਵਾ ਗਤੋ.

ਸਤ੍ਤਮੇ ਪਨ ਦਿਵਸੇ ਰਾਜਾ ਸਪਰਿਵਾਰੋ ਰਾਜਸਭਾਯਂ ਨਿਸੀਦਿ. ਗੁਤ੍ਤਿਲਾਚਰਿਯੋ ਚ ਮੁਸਿਲੋ ਚ ਸਿਪ੍ਪਦਸ੍ਸਨਤ੍ਥਂ ਸਜ੍ਜਾ ਹੁਤ੍ਵਾ ਉਪਸਙ੍ਕਮਿਤ੍ਵਾ ਰਾਜਾਨਂ ਵਨ੍ਦਿਤ੍ਵਾ ਅਤ੍ਤਨੋ ਅਤ੍ਤਨੋ ਲਦ੍ਧਾਸਨੇ ਨਿਸੀਦਿਤ੍ਵਾ ਵੀਣਾ ਵਾਦਯਿਂਸੁ. ਸਕ੍ਕੋ ਆਗਨ੍ਤ੍ਵਾ ਅਨ੍ਤਲਿਕ੍ਖੇ ਅਟ੍ਠਾਸਿ. ਤਂ ਮਹਾਸਤ੍ਤੋਵ ਪਸ੍ਸਤਿ, ਇਤਰੇ ਪਨ ਨ ਪਸ੍ਸਨ੍ਤਿ. ਪਰਿਸਾ ਦ੍ਵਿਨ੍ਨਮ੍ਪਿ ਵਾਦਨੇ ਸਮਚਿਤ੍ਤਾ ਅਹੋਸਿ. ਸਕ੍ਕੋ ਗੁਤ੍ਤਿਲਂ ‘‘ਏਕਂ ਤਨ੍ਤਿਂ ਛਿਨ੍ਦਾ’’ਤਿ ਆਹ. ਛਿਨ੍ਨਾਯਪਿ ਤਨ੍ਤਿਯਾ ਵੀਣਾ ਤਥੇਵ ਮਧੁਰਨਿਗ੍ਘੋਸਾ ਅਹੋਸਿ. ਏਵਂ ‘‘ਦੁਤਿਯਂ, ਤਤਿਯਂ, ਚਤੁਤ੍ਥਂ, ਪਞ੍ਚਮਂ, ਛਟ੍ਠਂ, ਸਤ੍ਤਮਂ ਛਿਨ੍ਦਾ’’ਤਿ ਆਹ, ਤਾਸੁ ਛਿਨ੍ਨਾਸੁਪਿ ਵੀਣਾ ਮਧੁਰਨਿਗ੍ਘੋਸਾਵ ਅਹੋਸਿ. ਤਂ ਦਿਸ੍ਵਾ ਮੁਸਿਲੋ ਪਰਾਜਿਤਭੂਤਰੂਪੋ ਪਤ੍ਤਕ੍ਖਨ੍ਧੋ ਅਹੋਸਿ, ਪਰਿਸਾ ਹਟ੍ਠਤੁਟ੍ਠਾ ਚੇਲੁਕ੍ਖੇਪੇ ਕਰੋਨ੍ਤੀ ਗੁਤ੍ਤਿਲਸ੍ਸ ਸਾਧੁਕਾਰਮਦਾਸਿ. ਰਾਜਾ ਮੁਸਿਲਂ ਸਭਾਯ ਨੀਹਰਾਪੇਸਿ, ਮਹਾਜਨੋ ਲੇਡ੍ਡੁਦਣ੍ਡਾਦੀਹਿ ਪਹਰਨ੍ਤੋ ਮੁਸਿਲਂ ਤਤ੍ਥੇਵ ਜੀਵਿਤਕ੍ਖਯਂ ਪਾਪੇਸਿ.

ਸਕ੍ਕੋ ਦੇਵਾਨਮਿਨ੍ਦੋ ਮਹਾਪੁਰਿਸੇਨ ਸਦ੍ਧਿਂ ਸਮ੍ਮੋਦਨੀਯਂ ਕਤ੍ਵਾ ਦੇਵਲੋਕਮੇਵ ਗਤੋ. ਤਂ ਦੇਵਤਾ ‘‘ਮਹਾਰਾਜ, ਕੁਹਿਂ ਗਤਤ੍ਥਾ’’ਤਿ ਪੁਚ੍ਛਿਤ੍ਵਾ ਤਂ ਪਵਤ੍ਤਿਂ ਸੁਤ੍ਵਾ ‘‘ਮਹਾਰਾਜ, ਮਯਂ ਗੁਤ੍ਤਿਲਾਚਰਿਯਂ ਪਸ੍ਸਿਸ੍ਸਾਮ, ਸਾਧੁ ਨੋ ਤਂ ਇਧਾਨੇਤ੍ਵਾ ਦਸ੍ਸੇਹੀ’’ਤਿ ਆਹਂਸੁ. ਸਕ੍ਕੋ ਦੇਵਾਨਂ ਵਚਨਂ ਸੁਤ੍ਵਾ ਮਾਤਲਿਂ ਆਣਾਪੇਸਿ ‘‘ਗਚ੍ਛ ਵੇਜਯਨ੍ਤਰਥੇਨ ਅਮ੍ਹਾਕਂ ਗੁਤ੍ਤਿਲਾਚਰਿਯਂ ਆਨੇਹਿ, ਦੇਵਤਾ ਤਂ ਦਸ੍ਸਨਕਾਮਾ’’ਤਿ, ਸੋ ਤਥਾ ਅਕਾਸਿ. ਸਕ੍ਕੋ ਮਹਾਸਤ੍ਤੇਨ ਸਦ੍ਧਿਂ ਸਮ੍ਮੋਦਨੀਯਂ ਕਤ੍ਵਾ ਏਵਮਾਹ ‘‘ਆਚਰਿਯ, ਵੀਣਂ ਵਾਦਯ, ਦੇਵਤਾ ਸੋਤੁਕਾਮਾ’’ਤਿ. ‘‘ਮਯਂ ਸਿਪ੍ਪੂਪਜੀਵਿਨੋ, ਵੇਤਨੇਨ ਵਿਨਾ ਸਿਪ੍ਪਂ ਨ ਦਸ੍ਸੇਮਾ’’ਤਿ. ‘‘ਕੀਦਿਸਂ ਪਨ ਵੇਤਨਂ ਇਚ੍ਛਸੀ’’ਤਿ. ‘‘ਨਾਞ੍ਞੇਨ ਮੇ ਵੇਤਨੇਨ ਕਿਚ੍ਚਂ ਅਤ੍ਥਿ, ਇਮਾਸਂ ਪਨ ਦੇਵਤਾਨਂ ਅਤ੍ਤਨਾ ਅਤ੍ਤਨਾ ਪੁਬ੍ਬੇਕਤਕੁਸਲਕਥਨਮੇਵ ਮੇ ਵੇਤਨਂ ਹੋਤੂ’’ਤਿ ਆਹ. ਤਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਂਸੁ. ਅਥ ਮਹਾਸਤ੍ਤੋ ਪਾਟੇਕ੍ਕਂ ਤਾਹਿ ਤਦਾ ਪਟਿਲਦ੍ਧਸਮ੍ਪਤ੍ਤਿਕਿਤ੍ਤਨਮੁਖੇਨ ਤਸ੍ਸਾ ਹੇਤੁਭੂਤਂ ਪੁਰਿਮਤ੍ਤਭਾਵੇ ਕਤਂ ਸੁਚਰਿਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਵਿਯ ਪੁਚ੍ਛਨ੍ਤੋ ‘‘ਅਭਿਕ੍ਕਨ੍ਤੇਨ ਵਣ੍ਣੇਨਾ’’ਤਿਆਦਿਗਾਥਾਹਿ ਪੁਚ੍ਛਿ. ਤਾਪਿ ‘‘ਵਤ੍ਥੁਤ੍ਤਮਦਾਯਿਕਾ ਨਾਰੀ’’ਤਿਆਦਿਨਾ ਯਥਾ ਏਤਰਹਿ ਥੇਰਸ੍ਸ, ਏਵਮੇਵ ਤਸ੍ਸ ਬ੍ਯਾਕਰਿਂਸੁ. ਤੇਨ ਵੁਤ੍ਤਂ ‘‘ਮੋਗ੍ਗਲ੍ਲਾਨ ਤਾ ਦੇਵਤਾ ਨ ਕੇਵਲਂ ਤਯਾ ਏਵ ਪੁਚ੍ਛਿਤਾ ਏਵਂ ਬ੍ਯਾਕਰਿਂਸੁ, ਅਥ ਖੋ ਪੁਬ੍ਬੇ ਮਯਾਪਿ ਪੁਚ੍ਛਿਤਾ ਏਵਮੇਵ ਬ੍ਯਾਕਰਿਂਸੂ’’ਤਿ.

ਤਾ ਕਿਰ ਇਤ੍ਥਿਯੋ ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਮਨੁਸ੍ਸਤ੍ਤਭਾਵੇ ਠਿਤਾ ਤਂ ਤਂ ਪੁਞ੍ਞਂ ਅਕਂਸੁ. ਤਤ੍ਥ ਏਕਾ ਇਤ੍ਥੀ ਵਤ੍ਥਂ ਅਦਾਸਿ, ਏਕਾ ਸੁਮਨਮਾਲਂ, ਏਕਾ ਗਨ੍ਧਂ, ਏਕਾ ਉਲ਼ਾਰਾਨਿ ਫਲਾਨਿ, ਏਕਾ ਉਚ੍ਛੁਰਸਂ, ਏਕਾ ਭਗਵਤੋ ਚੇਤਿਯੇ ਗਨ੍ਧਪਞ੍ਚਙ੍ਗੁਲਿਕਂ ਅਦਾਸਿ, ਏਕਾ ਉਪੋਸਥਂ ਉਪਵਸਿ, ਏਕਾ ਉਪਕਟ੍ਠਾਯ ਵੇਲਾਯ ਨਾਵਾਯ ਭੁਞ੍ਜਨ੍ਤਸ੍ਸ ਭਿਕ੍ਖੁਨੋ ਉਦਕਂ ਅਦਾਸਿ, ਏਕਾ ਕੋਧਨਾਨਂ ਸਸ੍ਸੁਸਸੁਰਾਨਂ ਅਕ੍ਕੋਧਨਾ ਉਪਟ੍ਠਾਨਂ ਅਕਾਸਿ, ਏਕਾ ਦਾਸੀ ਹੁਤ੍ਵਾ ਅਤਨ੍ਦਿਤਾਚਾਰਾ ਅਹੋਸਿ, ਏਕੋ ਪਿਣ੍ਡਚਾਰਿਕਸ੍ਸ ਭਿਕ੍ਖੁਨੋ ਖੀਰਭਤ੍ਤਂ ਅਦਾਸਿ, ਏਕਾ ਫਾਣਿਤਂ ਅਦਾਸਿ, ਏਕਾ ਉਚ੍ਛੁਖਣ੍ਡਂ ਅਦਾਸਿ, ਏਕਾ ਤਿਮ੍ਬਰੁਸਕਂ ਅਦਾਸਿ, ਏਕਾ ਕਕ੍ਕਾਰਿਕਂ ਅਦਾਸਿ, ਏਕਾ ਏਲ਼ਾਲੁਕਂ ਅਦਾਸਿ, ਏਕਾ ਵਲ੍ਲਿਫਲਂ ਅਦਾਸਿ, ਏਕਾ ਫਾਰੁਸਕਂ ਅਦਾਸਿ, ਏਕਾ ਅਙ੍ਗਾਰਕਪਲ੍ਲਂ ਅਦਾਸਿ, ਏਕਾ ਸਾਕਮੁਟ੍ਠਿਂ ਅਦਾਸਿ, ਏਕਾ ਪੁਪ੍ਫਕਮੁਟ੍ਠਿਂ ਅਦਾਸਿ, ਏਕਾ ਮੂਲਕਲਾਪਂ ਅਦਾਸਿ, ਏਕਾ ਨਿਮ੍ਬਮੁਟ੍ਠਿਂ ਅਦਾਸਿ, ਏਕਾ ਕਞ੍ਜਿਕਂ ਅਦਾਸਿ, ਏਕਾ ਤਿਲਪਿਞ੍ਞਾਕਂ ਅਦਾਸਿ, ਏਕਾ ਕਾਯਬਨ੍ਧਨਂ ਅਦਾਸਿ, ਏਕਾ ਅਂਸਬਦ੍ਧਕਂ ਅਦਾਸਿ, ਏਕਾ ਆਯੋਗਪਟ੍ਟਂ ਅਦਾਸਿ, ਏਕਾ ਵਿਧੂਪਨਂ, ਏਕਾ ਤਾਲਵਣ੍ਟਂ, ਏਕਾ ਮੋਰਹਤ੍ਥਂ, ਏਕਾ ਛਤ੍ਤਂ, ਏਕਾ ਉਪਾਹਨਂ, ਏਕਾ ਪੂਵਂ, ਏਕਾ ਮੋਦਕਂ, ਏਕਾ ਸਕ੍ਖਲਿਕਂ ਅਦਾਸਿ. ਤਾ ਏਕੇਕਾ ਅਚ੍ਛਰਾਸਹਸ੍ਸਪਰਿਵਾਰਾ ਪਹਤਿਯਾ ਦੇਵਿਦ੍ਧਿਯਾ ਵਿਰਾਜਮਾਨਾ ਤਾਵਤਿਂਸਭਵਨੇ ਸਕ੍ਕਸ੍ਸ ਦੇਵਰਾਜਸ੍ਸ ਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਾ ਗੁਤ੍ਤਿਲਾਚਰਿਯੇਨ ਪੁਚ੍ਛਿਤਾ ‘‘ਵਤ੍ਥੁਤ੍ਤਮਦਾਯਿਕਾ ਨਾਰੀ’’ਤਿਆਦਿਨਾ ਅਤ੍ਤਨਾ ਅਤ੍ਤਨਾ ਕਤਕੁਸਲਂ ਪਟਿਪਾਟਿਯਾ ਬ੍ਯਾਕਰਿਂਸੁ.

੩੨੯. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੩੩੦. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੩੩੧. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੩੩੨. ‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੩੩੩. ‘‘ਵਤ੍ਥੁਤ੍ਤਮਦਾਯਿਕਾ ਨਾਰੀ, ਪਵਰਾ ਹੋਤਿ ਨਰੇਸੁ ਨਾਰੀਸੁ;

ਏਵਂ ਪਿਯਰੂਪਦਾਯਿਕਾ ਮਨਾਪਂ, ਦਿਬ੍ਬਂ ਸਾ ਲਭਤੇ ਉਪੇਚ੍ਚ ਠਾਨਂ.

੩੩੪. ‘‘ਤਸ੍ਸਾ ਮੇ ਪਸ੍ਸ ਵਿਮਾਨਂ, ਅਚ੍ਛਰਾ ਕਾਮਵਣ੍ਣਿਨੀਹਮਸ੍ਮਿ;

ਅਚ੍ਛਰਾਸਹਸ੍ਸਸ੍ਸਾਹਂ, ਪਵਰਾ ਪਸ੍ਸ ਪੁਞ੍ਞਾਨਂ ਵਿਪਾਕਂ.

੩੩੫. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੩੩੬. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

(ਯਥਾ ਚ ਏਤ੍ਥ, ਏਵਂ ਉਪਰਿ ਸਬ੍ਬਵਿਮਾਨੇਸੁ ਵਿਤ੍ਥਾਰੇਤਬ੍ਬਂ.)

੩੪੧. ‘‘ਪੁਪ੍ਫੁਤ੍ਤਮਦਾਯਿਕਾ ਨਾਰੀ, ਪਵਰਾ ਹੋਤਿ ਨਰੇਸੁ ਨਾਰੀਸੁ…ਪੇ….

੩੪੯. ‘‘ਗਨ੍ਧੁਤ੍ਤਮਦਾਯਿਕਾ ਨਾਰੀ, ਪਵਰਾ ਹੋਤਿ ਨਰੇਸੁ ਨਾਰੀਸੁ…ਪੇ….

੩੫੭. ‘‘ਫਲੁਤ੍ਤਮਦਾਯਿਕਾ ਨਾਰੀ…ਪੇ….

੩੬੫. ‘‘ਰਸੁਤ੍ਤਮਦਾਯਿਕਾ ਨਾਰੀ…ਪੇ….

੩੭੩. ‘‘ਗਨ੍ਧਪਞ੍ਚਙ੍ਗੁਲਿਕਂ ਅਹਮਦਾਸਿਂ,ਕਸ੍ਸਪਸ੍ਸ ਭਗਵਤੋ ਥੂਪਮ੍ਹਿ…ਪੇ….

੩੮੧. ‘‘ਭਿਕ੍ਖੂ ਚ ਅਹਂ ਭਿਕ੍ਖੁਨਿਯੋ ਚ, ਅਦ੍ਦਸਾਸਿਂ ਪਨ੍ਥਪਟਿਪਨ੍ਨੇ;

ਤੇਸਾਹਂ ਧਮ੍ਮਂ ਸੁਤ੍ਵਾਨ, ਏਕੂਪੋਸਥਂ ਉਪਵਸਿਸ੍ਸਂ.

੩੮੨. ‘‘ਤਸ੍ਸਾ ਮੇ ਪਸ੍ਸ ਵਿਮਾਨਂ…ਪੇ….

੩੮੯. ‘‘ਉਦਕੇ ਠਿਤਾ ਉਦਕਮਦਾਸਿਂ, ਭਿਕ੍ਖੁਨੋ ਚਿਤ੍ਤੇਨ ਵਿਪ੍ਪਸਨ੍ਨੇਨ…ਪੇ….

੩੯੭. ‘‘ਸਸ੍ਸੁਞ੍ਚਾਹਂ ਸਸੁਰਞ੍ਚ, ਚਣ੍ਡਿਕੇ ਕੋਧਨੇ ਚ ਫਰੁਸੇ ਚ;

ਅਨੁਸੂਯਿਕਾ ਉਪਟ੍ਠਾਸਿਂ, ਅਪ੍ਪਮਤ੍ਤਾ ਸਕੇਨ ਸੀਲੇਨ…ਪੇ….

੪੦੫. ‘‘ਪਰਕਮ੍ਮਕਰੀ ਆਸਿਂ, ਅਤ੍ਥੇਨਾਤਨ੍ਦਿਤਾ ਦਾਸੀ;

ਅਕ੍ਕੋਧਨਾਨਤਿਮਾਨਿਨੀ, ਸਂਵਿਭਾਗਿਨੀ ਕਕਸ੍ਸ ਭਾਗਸ੍ਸ…ਪੇ….

੪੧੩. ‘‘ਖੀਰੋਦਨਂ ਅਹਮਦਾਸਿਂ, ਭਿਕ੍ਖੁਨੋ ਪਿਣ੍ਡਾਯ ਚਰਨ੍ਤਸ੍ਸ;

ਏਵਂ ਕਰਿਤ੍ਵਾ ਕਮ੍ਮਂ, ਸੁਗਤਿਂ ਉਪਪਜ੍ਜ ਮੋਦਾਮਿ…ਪੇ….

੪੨੧. ‘‘ਫਾਣਿਤਂ ਅਹਮਦਾਸਿਂ…ਪੇ….

੪੨੯. ‘‘ਉਚ੍ਛੁਖਣ੍ਡਿਕਂ ਅਹਮਦਾਸਿਂ…ਪੇ….

੪੩੭. ‘‘ਤਿਮ੍ਬਰੁਸਕਂ ਅਹਮਦਾਸਿਂ…ਪੇ….

੪੪੫. ‘‘ਕਕ੍ਕਾਰਿਕਂ ਅਹਮਦਾਸਿਂ…ਪੇ….

੪੫੩. ‘‘ਏਲ਼ਾਲੁਕਂ ਅਹਮਦਾਸਿਂ…ਪੇ….

੪੬੧. ‘‘ਵਲ੍ਲਿਫਲਂ ਅਹਮਦਾਸਿਂ…ਪੇ….

੪੬੯. ‘‘ਫਾਰੁਸਕਂ ਅਹਮਦਾਸਿਂ…ਪੇ….

੪੭੭. ‘‘ਹਤ੍ਥਪ੍ਪਤਾਪਕਂ ਅਹਮਦਾਸਿਂ…ਪੇ….

੪੮੫. ‘‘ਸਾਕਮੁਟ੍ਠਿਂ ਅਹਮਦਾਸਿਂ…ਪੇ….

੪੯੩. ‘‘ਪੁਪ੍ਫਕਮੁਟ੍ਠਿਂ ਅਹਮਦਾਸਿਂ…ਪੇ….

੫੦੧. ‘‘ਮੂਲਕਂ ਅਹਮਦਾਸਿਂ…ਪੇ….

੫੦੯. ‘‘ਨਿਮ੍ਬਮੁਟ੍ਠਿਂ ਅਹਮਦਾਸਿਂ…ਪੇ….

੫੧੭. ‘‘ਅਮ੍ਬਕਞ੍ਜਿਕਂ ਅਹਮਦਾਸਿਂ…ਪੇ….

੫੨੫. ‘‘ਦੋਣਿਨਿਮ੍ਮਜ੍ਜਨਿਂ ਅਹਮਦਾਸਿਂ…ਪੇ….

੫੩੩. ‘‘ਕਾਯਬਨ੍ਧਨਂ ਅਹਮਦਾਸਿਂ…ਪੇ….

੫੪੧. ‘‘ਅਂਸਬਦ੍ਧਕਂ ਅਹਮਦਾਸਿਂ…ਪੇ….

੫੪੯. ‘‘ਆਯੋਗਪਟ੍ਟਂ ਅਹਮਦਾਸਿਂ…ਪੇ….

੫੫੭. ‘‘ਵਿਧੂਪਨਂ ਅਹਮਦਾਸਿਂ…ਪੇ….

੫੬੫. ‘‘ਤਾਲਵਣ੍ਟਂ ਅਹਮਦਾਸਿਂ…ਪੇ….

੫੭੩. ‘‘ਮੋਰਹਤ੍ਥਂ ਅਹਮਦਾਸਿਂ…ਪੇ….

੫੮੧. ‘‘ਛਤ੍ਤਂ ਅਹਮਦਾਸਿਂ…ਪੇ….

੫੮੯. ‘‘ਉਪਾਹਨਂ ਅਹਮਦਾਸਿਂ…ਪੇ….

੫੯੭. ‘‘ਪੂਵਂ ਅਹਮਦਾਸਿਂ…ਪੇ….

੬੦੫. ‘‘ਮੋਦਕਂ ਅਹਮਦਾਸਿਂ…ਪੇ….

੬੧੩. ‘‘ਸਕ੍ਖਲਿਕਂ ਅਹਮਦਾਸਿਂ, ਭਿਕ੍ਖੁਨੋ ਪਿਣ੍ਡਾਯ ਚਰਨ੍ਤਸ੍ਸ…ਪੇ….

੬੧੪. ‘‘ਤਸ੍ਸਾ ਮੇ ਪਸ੍ਸ ਵਿਮਾਨਂ, ਅਚ੍ਛਰਾ ਕਾਮਵਣ੍ਣਿਨੀਹਮਸ੍ਮਿਂ;

ਅਚ੍ਛਰਾਸਹਸ੍ਸਸ੍ਸਾਹਂ, ਪਵਰਾ ਪਸ੍ਸ ਪੁਞ੍ਞਾਨਂ ਵਿਪਾਕਂ.

੬੧੫. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਏਵਂ ਮਹਾਸਤ੍ਤੋ ਤਾਹਿ ਦੇਵਤਾਹਿ ਕਤਸੁਚਰਿਤੇ ਬ੍ਯਾਕਤੇ ਤੁਟ੍ਠਮਾਨਸੋ ਸਮ੍ਮੋਦਨਂ ਕਰੋਨ੍ਤੋ ਅਤ੍ਤਨੋ ਚ ਸੁਚਰਿਤਚਰਣੇ ਯੁਤ੍ਤਪਯੁਤ੍ਤਤਂ ਵਿਵਟ੍ਟਜ੍ਝਾਸਯਤਞ੍ਚ ਪਵੇਦੇਨ੍ਤੋ ਆਹ –

੬੧੭. ‘‘ਸ੍ਵਾਗਤਂ ਵਤ ਮੇ ਅਜ੍ਜ, ਸੁਪ੍ਪਭਾਤਂ ਸੁਹੁਟ੍ਠਿਤਂ;

ਯਂ ਅਦ੍ਦਸਾਮਿ ਦੇਵਤਾਯੋ, ਅਚ੍ਛਰਾ ਕਾਮਵਣ੍ਣਿਨਿਯੋ.

੬੧੮. ‘‘ਇਮਾਸਾਹਂ ਧਮ੍ਮਂ ਸੁਤ੍ਵਾ, ਕਾਹਾਮਿ ਕੁਸਲਂ ਬਹੁਂ;

ਦਾਨੇਨ ਸਮਚਰਿਯਾਯ, ਸਞ੍ਞਮੇਨ ਦਮੇਨ ਚ;

ਸ੍ਵਾਹਂ ਤਤ੍ਥ ਗਮਿਸ੍ਸਾਮਿ, ਯਤ੍ਥ ਗਨ੍ਤ੍ਵਾ ਨ ਸੋਚਰੇ’’ਤਿ.

੩੩੩. ਤਤ੍ਥ ਵਤ੍ਥੁਤ੍ਤਮਦਾਯਿਕਾਤਿ ਵਤ੍ਥਾਨਂ ਉਤ੍ਤਮਂ ਸੇਟ੍ਠਂ, ਵਤ੍ਥੇਸੁ ਵਾ ਬਹੂਸੁ ਉਚ੍ਚਿਨਿਤ੍ਵਾ ਗਹਿਤਂ ਉਕ੍ਕਂਸਗਤਂ ਪਵਰਂ ਕੋਟਿਭੂਤਂ ਵਤ੍ਥਂ ਵਤ੍ਥੁਤ੍ਤਮਂ, ਤਸ੍ਸ ਦਾਯਿਕਾ. ‘‘ਪੁਪ੍ਫੁਤ੍ਤਮਦਾਯਿਕਾ’’ਤਿਆਦੀਸੁਪਿ ਏਸੇਵ ਨਯੋ. ਪਿਯਰੂਪਦਾਯਿਕਾਤਿ ਪਿਯਸਭਾਵਸ੍ਸ ਪਿਯਜਾਤਿਕਸ੍ਸ ਚ ਵਤ੍ਥੁਨੋ ਦਾਯਿਕਾ. ਮਨਾਪਨ੍ਤਿ ਮਨਵਡ੍ਢਨਕਂ. ਦਿਬ੍ਬਨ੍ਤਿ ਦਿਵਿ ਭਵਤ੍ਤਾ ਦਿਬ੍ਬਂ. ਉਪੇਚ੍ਚਾਤਿ ਉਪਗਨ੍ਤ੍ਵਾ ਚੇਤੇਤ੍ਵਾ, ‘‘ਏਦਿਸਂ ਲਭੇਯ੍ਯ’’ਨ੍ਤਿ ਪਕਪ੍ਪੇਤ੍ਵਾਤਿ ਅਤ੍ਥੋ. ਠਾਨਨ੍ਤਿ ਵਿਮਾਨਾਦਿਕਂ ਠਾਨਂ, ਇਸ੍ਸਰਿਯਂ ਵਾ. ‘‘ਮਨਾਪਾ’’ਤਿਪਿ ਪਾਠੋ, ਅਞ੍ਞੇਸਂ ਮਨਵਡ੍ਢਨਕਾ ਹੁਤ੍ਵਾਤਿ ਅਤ੍ਥੋ.

੩੩੪. ਪਸ੍ਸ ਪੁਞ੍ਞਾਨਂ ਵਿਪਾਕਨ੍ਤਿ ਵਤ੍ਥੁਤ੍ਤਮਦਾਨਸ੍ਸ ਨਾਮ ਇਦਮੀਦਿਸਂ ਫਲਂ ਪਸ੍ਸਾਤਿ ਅਤ੍ਤਨਾ ਲਦ੍ਧਸਮ੍ਪਤ੍ਤਿਂ ਸਮ੍ਭਾਵੇਨ੍ਤੀ ਵਦਤਿ.

੩੪੧. ਪੁਪ੍ਫੁਤ੍ਤਮਦਾਯਿਕਾਤਿ ਰਤਨਤ੍ਤਯਪੂਜਾਵਸੇਨ ਪੁਪ੍ਫੁਤ੍ਤਮਦਾਯਿਕਾ, ਤਥਾ ਗਨ੍ਧੁਤ੍ਤਮਦਾਯਿਕਾਤਿ ਦਟ੍ਠਬ੍ਬਾ. ਤਤ੍ਥ ਪੁਪ੍ਫੁਤ੍ਤਮਂ ਸੁਮਨਪੁਪ੍ਫਾਦਿ, ਗਨ੍ਧੁਤ੍ਤਮਂ ਚਨ੍ਦਨਗਨ੍ਧਾਦਿ, ਫਲੁਤ੍ਤਮਂ ਪਨਸਫਲਾਦਿ, ਰਸੁਤ੍ਤਮਂ ਗੋਰਸਸਪ੍ਪਿਆਦਿ ਵੇਦਿਤਬ੍ਬਂ.

੩੭੩. ਗਨ੍ਧਪਞ੍ਚਙ੍ਗੁਲਿਕਨ੍ਤਿ ਗਨ੍ਧੇਨ ਪਞ੍ਚਙ੍ਗੁਲਿਕਦਾਨਂ. ਕਸ੍ਸਪਸ੍ਸ ਭਗਵਤੋ ਥੂਪਮ੍ਹੀਤਿ ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਯੋਜਨਿਕੇ ਕਨਕਥੂਪੇ.

੩੮੧. ਪਨ੍ਥਪਟਿਪਨ੍ਨੇਤਿ ਮਗ੍ਗਂ ਗਚ੍ਛਨ੍ਤੇ. ਏਕੂਪੋਸਥਨ੍ਤਿ ਏਕਦਿਵਸਂ ਉਪੋਸਥਵਾਸਂ.

੩੮੯. ਉਦਕਮਦਾਸਿਨ੍ਤਿ ਮੁਖਵਿਕ੍ਖਾਲਨਤ੍ਥਂ ਪਿਵਨਤ੍ਥਞ੍ਚ ਉਦਕਂ ਪਾਨੀਯਂ ਅਦਾਸਿਂ.

੩੯੭. ਚਣ੍ਡਿਕੇਤਿ ਚਣ੍ਡੇ. ਅਨੁਸੂਯਿਕਾਤਿ ਉਸੂਯਾ ਰਹਿਤਾ.

੪੦੫. ਪਰਕਮ੍ਮਕਰੀਤਿ ਪਰੇਸਂ ਵੇਯ੍ਯਾਵਚ੍ਚਕਾਰਿਨੀ. ਅਤ੍ਥੇਨਾਤਿ ਅਤ੍ਥਕਿਚ੍ਚੇਨ. ਸਂਵਿਭਾਗਿਨੀ ਸਕਸ੍ਸ ਭਾਗਸ੍ਸਾਤਿ ਅਤ੍ਥਿਕਾਨਂ ਅਤ੍ਤਨਾ ਪਟਿਲਦ੍ਧਭਾਗਸ੍ਸ ਸਂਵਿਭਜਨਸੀਲਾ.

੪੧੩. ਖੀਰੋਦਨਨ੍ਤਿ ਖੀਰਸਮ੍ਮਿਸ੍ਸਂ ਓਦਨਂ, ਖੀਰੇਨ ਸਦ੍ਧਿਂ ਓਦਨਂ ਵਾ.

੪੩੭. ਤਿਮ੍ਬਰੁਸਕਨ੍ਤਿ ਤਿਣ੍ਡੁਕਫਲਂ. ਤਿਪੁਸਸਦਿਸਾ ਏਕਾ ਵਲ੍ਲਿਜਾਤਿ ਤਿਮ੍ਬਰੁਸਂ, ਤਸ੍ਸ ਫਲਂ ਤਿਮ੍ਬਰੁਸਕਨ੍ਤਿ ਵਦਨ੍ਤਿ.

੪੪੫. ਕਕ੍ਕਾਰਿਕਨ੍ਤਿ ਖੁਦ੍ਦਕੇਲ਼ਾਲੁਕਂ, ਤਿਪੁਸਨ੍ਤਿ ਚ ਵਦਨ੍ਤਿ.

੪੭੭. ਹਤ੍ਥਪ੍ਪਤਾਪਕਨ੍ਤਿ ਮਨ੍ਦਾਮੁਖਿਂ.

੫੧੭. ਅਮ੍ਬਕਞ੍ਜਿਕਨ੍ਤਿ ਅਮ੍ਬਿਲਕਞ੍ਜਿਕਂ.

੫੨੫. ਦੋਣਿਨਿਮ੍ਮਜ੍ਜਨਿਨ੍ਤਿ ਸਤੇਲਂ ਤਿਲਪਿਞ੍ਞਾਕਂ.

੫੫੭. ਵਿਧੂਪਨਨ੍ਤਿ ਚਤੁਰਸ੍ਸਬੀਜਨਿਂ.

੫੬੫. ਤਾਲਵਣ੍ਟਨ੍ਤਿ ਤਾਲਪਤ੍ਤੇਹਿ ਕਤਮਣ੍ਡਲਬੀਜਨਿਂ.

੫੭੩. ਮੋਰਹਤ੍ਥਨ੍ਤਿ ਮਯੂਰਪਿਞ੍ਛੇ ਹਿ ਕਤਂ ਮਕਸਬੀਜਨਿਂ.

੬੧੭. ਸ੍ਵਾਗਤਂ ਵਤ ਮੇਤਿ ਮਯ੍ਹਂ ਇਧਾਗਮਨਂ ਸੋਭਨਂ ਵਤ ਅਹੋ ਸੁਨ੍ਦਰਂ. ਅਜ੍ਜ ਸੁਪ੍ਪਭਾਤਂ ਸੁਹੁਟ੍ਠਿਤਨ੍ਤਿ ਅਜ੍ਜ ਮਯ੍ਹਂ ਰਤ੍ਤਿਯਾ ਸੁਟ੍ਠੁ ਪਭਾਤਂ ਸਮ੍ਮਦੇਵ ਵਿਭਾਯਨਂ ਜਾਤਂ, ਸਯਨਤੋ ਉਟ੍ਠਾਨਮ੍ਪਿ ਸੁਹੁਟ੍ਠਿਤਂ ਸੁਟ੍ਠੁ ਉਟ੍ਠਿਤਂ. ਕਿਂ ਕਾਰਣਾਤਿ ਆਹ ‘‘ਯਂ ਅਦ੍ਦਸਾਮਿ ਦੇਵਤਾਯੋ’’ਤਿਆਦਿ.

੬੧੮. ਧਮ੍ਮਂ ਸੁਤ੍ਵਾਤਿ ਕਮ੍ਮਫਲਸ੍ਸ ਪਚ੍ਚਕ੍ਖਕਰਣਵਸੇਨ ਤੁਮ੍ਹੇਹਿ ਕਤਂ ਕੁਸਲਂ ਧਮ੍ਮਂ ਸੁਤ੍ਵਾ. ਕਾਹਾਮੀਤਿ ਕਰਿਸ੍ਸਾਮਿ. ਸਮਚਰਿਯਾਯਾਤਿ ਕਾਯਸਮਾਚਾਰਿਕਸ੍ਸ ਸੁਚਰਿਤਸ੍ਸ ਚਰਣੇਨ. ਸਞ੍ਞਮੇਨਾਤਿ ਸੀਲਸਂਵਰੇਨ. ਦਮੇਨਾਤਿ ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਦਮੇਨ. ਇਦਾਨਿ ਤਸ੍ਸ ਕੁਸਲਸ੍ਸ ਅਤ੍ਤਨੋ ਲੋਕਸ੍ਸ ਚ ਵਿਵਟ੍ਟੂਪਨਿਸ੍ਸਯਤਂ ਦਸ੍ਸੇਤੁਂ ‘‘ਸ੍ਵਾਹਂ ਤਤ੍ਥ ਗਮਿਸ੍ਸਾਮਿ, ਯਤ੍ਥ ਗਨ੍ਤ੍ਵਾ ਨ ਸੋਚਰੇ’’ਤਿ ਵੁਤ੍ਤਂ.

ਏਵਮਯਂ ਯਦਿਪਿ ਵਤ੍ਥੁਤ੍ਤਮਦਾਯਿਕਾਵਿਮਾਨਾਦਿਵਸੇਨ ਛਤ੍ਤਿਂਸਵਿਮਾਨਸਙ੍ਗਹਾ ਦੇਸਨਾ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਵਿਯ ਗੁਤ੍ਤਿਲਾਚਰਿਯਸ੍ਸਾਪਿ ਵਿਭਾਵਨਵਸੇਨ ਪਵਤ੍ਤਾਤਿ ‘‘ਗੁਤ੍ਤਿਲਵਿਮਾਨ’’ਨ੍ਤ੍ਵੇਵ ਸਙ੍ਗਹਂ ਆਰੁਲ਼੍ਹਾ, ਵਿਮਾਨਾਨਿ ਪਨ ਇਤ੍ਥਿਪਟਿਬਦ੍ਧਾਨੀਤਿ ਇਤ੍ਥਿਵਿਮਾਨੇਯੇਵ ਸਙ੍ਗਹਿਤਾਨਿ. ਤਾ ਪਨ ਇਤ੍ਥਿਯੋ ਕਸ੍ਸਪਸ੍ਸ ਦਸਬਲਸ੍ਸ ਕਾਲੇ ਯਥਾਵੁਤ੍ਤਧਮ੍ਮਚਰਣੇ ਅਪਰਾਪਰੁਪ੍ਪਨ੍ਨਚੇਤਨਾਵਸੇਨ ਦੁਤਿਯਤ੍ਤਭਾਵਤੋ ਪਟ੍ਠਾਯ ਏਕਂ ਬੁਦ੍ਧਨ੍ਤਰਂ ਦੇਵਲੋਕੇ ਏਵ ਸਂਸਰਨ੍ਤਿਯੋ ਅਮ੍ਹਾਕਮ੍ਪਿ ਭਗਵਤੋ ਕਾਲੇ ਤਾਵਤਿਂਸਭਵਨੇਯੇਵ ਨਿਬ੍ਬਤ੍ਤਾ, ਆਯਸ੍ਮਤਾ ਮਹਾਮੋਗ੍ਗਲ੍ਲਾਨੇਨ ਪੁਚ੍ਛਿਤਾ ਕਮ੍ਮਸਰਿਕ੍ਖਤਾਯ ਗੁਤ੍ਤਿਲਾਚਰਿਯੇਨ ਪੁਚ੍ਛਿਤਕਾਲੇ ਵਿਯ ਬ੍ਯਾਕਰਿਂਸੂਤਿ ਦਟ੍ਠਬ੍ਬਾ.

ਗੁਤ੍ਤਿਲਵਿਮਾਨਵਣ੍ਣਨਾ ਨਿਟ੍ਠਿਤਾ.