੫. ਭਦ੍ਦਿਤ੍ਥਿਵਿਮਾਨਵਣ੍ਣਨਾ

ਨੀਲਾ ਪੀਤਾ ਚ ਕਾਲ਼ਾ ਚਾਤਿ ਭਦ੍ਦਿਤ੍ਥਿਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਚ ਸਮਯੇਨ ਕਿਮਿਲਨਗਰੇ ਰੋਹਕੋ ਨਾਮ ਗਹਪਤਿਪੁਤ੍ਤੋ ਅਹੋਸਿ ਸਦ੍ਧੋ ਪਸਨ੍ਨੋ ਸੀਲਾਚਾਰਸਮ੍ਪਨ੍ਨੋ. ਤਸ੍ਮਿਂਯੇਵ ਚ ਨਗਰੇ ਤੇਨ ਸਮਾਨਮਹਾਭੋਗੇ ਕੁਲੇ ਏਕਾ ਦਾਰਿਕਾ ਅਹੋਸਿ ਸਦ੍ਧਾ ਪਸਨ੍ਨਾ ਪਕਤਿਯਾਪਿ ਭਦ੍ਦਤਾਯ ਭਦ੍ਦਾਤਿ ਨਾਮੇਨ. ਅਥ ਰੋਹਕਸ੍ਸ ਮਾਤਾਪਿਤਰੋ ਤਂ ਕੁਮਾਰਿਂ ਵਾਰੇਤ੍ਵਾ ਤਾਦਿਸੇ ਕਾਲੇ ਤਂ ਆਨੇਤ੍ਵਾ ਆਵਾਹਵਿਵਾਹਂ ਅਕਂਸੁ. ਤੇ ਉਭੋਪਿ ਸਮਗ੍ਗਵਾਸਂ ਵਸਨ੍ਤਿ. ਸਾ ਅਤ੍ਤਨੋ ਆਚਾਰਸਮ੍ਪਤ੍ਤਿਯਾ ‘‘ਭਦ੍ਦਿਤ੍ਥੀ’’ਤਿ ਤਸ੍ਮਿਂ ਨਗਰੇ ਪਾਕਟਾ ਪਞ੍ਞਾਤਾ ਅਹੋਸਿ.

ਤੇਨ ਚ ਸਮਯੇਨ ਦ੍ਵੇ ਅਗ੍ਗਸਾਵਕਾ ਪਞ੍ਚਸਤਪਞ੍ਚਸਤਭਿਕ੍ਖੁਪਰਿਵਾਰਾ ਜਨਪਦਚਾਰਿਕਂ ਚਰਨ੍ਤਾ ਕਿਮਿਲਨਗਰਂ ਪਾਪੁਣਿਂਸੁ. ਰੋਹਕੋ ਤੇਸਂ ਤਤ੍ਥ ਗਤਭਾਵਂ ਞਤ੍ਵਾ ਸੋਮਨਸ੍ਸਜਾਤੋ ਥੇਰੇ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਦੁਤਿਯਦਿਵਸੇ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਪਰਿਵਾਰੇ ਤੇ ਸਨ੍ਤਪ੍ਪੇਤ੍ਵਾ ਸਪੁਤ੍ਤਦਾਰੋ ਤੇਹਿ ਦੇਸਿਤਂ ਧਮ੍ਮਦੇਸਨਂ ਸੁਤ੍ਵਾ ਤੇਸਂ ਓਵਾਦੇ ਪਤਿਟ੍ਠਹਨ੍ਤੋ ਸਰਣਾਨਿ ਗਣ੍ਹਿ, ਪਞ੍ਚ ਸੀਲਾਨਿ ਸਮਾਦਿਯਿ. ਭਰਿਯਾ ਪਨਸ੍ਸ ਅਟ੍ਠਮੀਚਾਤੁਦ੍ਦਸੀਪਨ੍ਨਰਸੀਪਾਟਿਹਾਰਿਯਪਕ੍ਖੇਸੁ ਉਪੋਸਥਂ ਉਪਵਸਿ, ਵਿਸੇਸਤੋ ਸੀਲਾਚਾਰਸਮ੍ਪਨ੍ਨਾ ਅਹੋਸਿ ਦੇਵਤਾਹਿ ਚ ਅਨੁਕਮ੍ਪਿਤਾ. ਤਾਯ ਏਵ ਚ ਦੇਵਤਾਨੁਕਮ੍ਪਾਯ ਅਤ੍ਤਨੋ ਉਪਰਿ ਪਤਿਤਂ ਮਿਚ੍ਛਾਪਵਾਦਂ ਨਿਰਂਕਤ੍ਵਾ ਸੁਵਿਸੁਦ੍ਧਸੀਲਾਚਾਰਤਾਯ ਅਤਿਵਿਯ ਲੋਕੇ ਪਤ੍ਥਟਯਸਾ ਅਹੋਸਿ.

ਸਾ ਹਿ ਸਯਂ ਕਿਮਿਲਨਗਰੇ ਠਿਤਾ ਅਤ੍ਤਨੋ ਸਾਮਿਕਸ੍ਸ ਵਣਿਜ੍ਜਾਵਸੇਨ ਤਕ੍ਕਸਿਲਾਯਂ ਵਸਨ੍ਤਸ੍ਸ, ਉਸ੍ਸਵਦਿਵਸੇ ਸਹਾਯੇਹਿ ਉਸ੍ਸਾਹਿਤਸ੍ਸ ਨਕ੍ਖਤ੍ਤਕੀਲ਼ਾਚਿਤ੍ਤੇ ਉਪ੍ਪਨ੍ਨੇ ਘਰਦੇਵਤਾਯ ਅਤ੍ਤਨੋ ਦਿਬ੍ਬਾਨੁਭਾਵੇਨ ਤਂ ਤਤ੍ਥ ਨੇਤ੍ਵਾ ਸਾਮਿਕੇਨ ਸਹ ਯੋਜਿਤਾ ਤੇਨੇਵ ਸਮਾਗਮੇਨ ਪਤਿਟ੍ਠਿਤਗਬ੍ਭਾ ਹੁਤ੍ਵਾ ਦੇਵਤਾਯ ਕਿਮਿਲਨਗਰਂ ਪਟਿਨੀਤਾ, ਅਨੁਕ੍ਕਮੇਨ ਗਬ੍ਭਿਨਿਭਾਵੇ ਪਾਕਟੇ ਜਾਤੇ ਸਸ੍ਸੁਆਦੀਹਿ ‘‘ਅਤਿਚਾਰਿਨੀ’’ਤਿ ਆਸਙ੍ਕਿਤਾ, ਤਾਯ ਏਵ ਦੇਵਤਾਯ ਅਤ੍ਤਨੋ ਆਨੁਭਾਵੇਨ ਗਙ੍ਗਾਮਹੋਘੇ ਕਿਮਿਲਨਗਰਂ ਓਤ੍ਥਰਨ੍ਤੇ ਵਿਯ ਉਪਟ੍ਠਾਪਿਤੇ ਅਤ੍ਤਨੋ ਪਤਿਬ੍ਬਤਾਭਾਵਸਂਸੂਚਕੇਨ ਸਚ੍ਚਾਧਿਟ੍ਠਾਨਪੁਬ੍ਬਕੇਨ ਸਪਥੇਨ ਵਾਤਵੇਗਸਮੁਟ੍ਠਿਤਵੀਚਿਜਾਲਂ ਗਙ੍ਗਾਮਹੋਘਂ ਅਤ੍ਤਨੋ ਉਪਰਿ ਆਪਤਿਤਂ ਆਯਸ੍ਸਞ੍ਚ ਨਿਵਤ੍ਤੇਤ੍ਵਾ, ਸਾਮਿਕੇਨ ਸਮਾਗਤਾਪਿ ਤੇਨ ਪੁਬ੍ਬੇ ਸਸ੍ਸੁਆਦੀਹਿ ਵਿਯ ਆਸਙ੍ਕਿਤਾ ਤਕ੍ਕਸਿਲਾਯਂ ਤੇਨ ਦਿਨ੍ਨਂ ਨਾਮਮੁਦ੍ਦਿਤਂ ਸਞ੍ਞਾਣਞ੍ਚ ਅਪ੍ਪੇਨ੍ਤੀ, ਤਂ ਆਸਙ੍ਕਂ ਨਿਰਂਕਤ੍ਵਾ ਭਤ੍ਤੁਨੋ ਞਾਤਿਜਨਸ੍ਸ ਚ ਮਹਾਜਨਸ੍ਸ ਚ ਸਮ੍ਭਾਵਨੀਯਾ ਜਾਤਾ. ਤੇਨ ਵੁਤ੍ਤਂ ‘‘ਸੁਵਿਸੁਦ੍ਧਸੀਲਾਚਾਰਤਾਯ ਅਤਿਵਿਯ ਲੋਕੇ ਪਤ੍ਥਟਯਸਾ ਅਹੋਸੀ’’ਤਿ.

ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਉਪ੍ਪਨ੍ਨਾ. ਅਥ ਭਗਵਤਿ ਸਾਵਤ੍ਥਿਤੋ ਤਾਵਤਿਂਸਭਵਨਂ ਗਨ੍ਤ੍ਵਾ ਪਾਰਿਚ੍ਛਤ੍ਤਕਮੂਲੇ ਪਣ੍ਡੁਕਮ੍ਬਲਸਿਲਾਯਂ ਨਿਸਿਨ੍ਨੇ, ਦੇਵਪਰਿਸਾਯ ਚ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸਿਨ੍ਨਾਯ ਭਦ੍ਦਿਤ੍ਥੀਪਿ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਅਥ ਭਗਵਾ ਦਸਸਹਸ੍ਸਿਲੋਕਧਾਤੂਸੁ ਸਨ੍ਨਿਪਤਿਤਾਯ ਦੇਵਬ੍ਰਹ੍ਮਪਰਿਸਾਯ ਮਜ੍ਝੇ ਤਾਯ ਦੇਵਤਾਯ ਕਤਪੁਞ੍ਞਕਮ੍ਮਂ ਪੁਚ੍ਛਨ੍ਤੋ –

੨੦੬. ‘‘ਨੀਲਾ ਪੀਤਾ ਚ ਕਾਲ਼ਾ ਚ, ਮਞ੍ਜਿਟ੍ਠਾ ਅਥ ਲੋਹਿਤਾ;

ਉਚ੍ਚਾਵਚਾਨਂ ਵਣ੍ਣਾਨਂ, ਕਿਞ੍ਜਕ੍ਖਪਰਿਵਾਰਿਤਾ.

੨੦੭. ‘‘ਮਨ੍ਦਾਰਵਾਨਂ ਪੁਪ੍ਫਾਨਂ, ਮਾਲਂ ਧਾਰੇਸਿ ਮੁਦ੍ਧਨਿ;

ਨਯਿਮੇ ਅਞ੍ਞੇਸੁ ਕਾਯੇਸ, ਰੁਕ੍ਖਾ ਸਨ੍ਤਿ ਸੁਮੇਧਸੇ.

੨੦੮. ‘‘ਕੇਨ ਕਾਯਂ ਉਪਪਨ੍ਨਾ, ਤਾਵਤਿਂਸਂ ਯਸਸ੍ਸਿਨੀ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. – ਆਹ;

੨੦੬-੭. ਤਤ੍ਥ ਨੀਲਾ ਪੀਤਾ ਚ ਕਾਲ਼ਾ ਚ, ਮਞ੍ਜਿਟ੍ਠਾ ਅਥ ਲੋਹਿਤਾਤਿ ਏਤ੍ਥ ਚ-ਸਦ੍ਦੋ ਵੁਤ੍ਤਤ੍ਥਸਮੁਚ੍ਚਯੋ, ਸੋ ਨੀਲਾ ਚ ਪੀਤਾ ਚਾਤਿਆਦਿਨਾ ਪਚ੍ਚੇਕਂ ਯੋਜੇਤਬ੍ਬੋ. ਅਥਾਤਿ ਅਞ੍ਞਤ੍ਥੇ ਨਿਪਾਤੋ. ਤੇਨ ਓਦਾਤਾਦਿਕੇ ਅਵੁਤ੍ਤਵਣ੍ਣੇ ਸਙ੍ਗਣ੍ਹਾਤਿ. ਇਤਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ ਵੇਦਿਤਬ੍ਬੋ. ਚ-ਸਦ੍ਦੋ ਵਾ ਅਵੁਤ੍ਤਤ੍ਥਸਮੁਚ੍ਚਯੋ. ਅਥਾਤਿ ਇਤਿ-ਸਦ੍ਦਤ੍ਥੇ ਨਿਪਾਤੋ. ਉਚ੍ਚਾਵਚਾਨਂ ਵਣ੍ਣਾਨਨ੍ਤਿ ਏਤ੍ਥ ਉਚ੍ਚਾਵਚਾਨਨ੍ਤਿ ਵਿਭਤ੍ਤਿਯਾ ਅਲੋਪੋ ਦਟ੍ਠਬ੍ਬੋ, ਉਚ੍ਚਾਵਚਵਣ੍ਣਾਨਂ ਨਾਨਾਵਿਧਵਣ੍ਣਾਨਨ੍ਤਿ ਅਤ੍ਥੋ. ਵਣ੍ਣਾਨਨ੍ਤਿ ਵਾ ਵਣ੍ਣਵਨ੍ਤਾਨਂ. ਕਿਞ੍ਜਕ੍ਖਪਰਿਵਾਰਿਤਾਤਿ ਕਿਞ੍ਜਕ੍ਖੇਹਿ ਪਰਿਵਾਰਿਤਾਨਂ. ਸਾਮਿਅਤ੍ਥੇ ਹਿ ਏਤਂ ਪਚ੍ਚਤ੍ਤਵਚਨਂ. ਇਦਂ ਵੁਤ੍ਤਂ ਹੋਤਿ – ਨੀਲਾ ਚ ਪੀਤਾ ਚ ਕਾਲ਼ਾ ਚ ਮਞ੍ਜਿਟ੍ਠਾ ਚ ਲੋਹਿਤਾ ਚ ਅਥ ਅਞ੍ਞੇ ਓਦਾਤਾਦਯੋ ਚਾਤਿ ਇਮੇਸਂ ਵਸੇਨ ਉਚ੍ਚਾਵਚਵਣ੍ਣਾਨਂ ਤਥਾਭੂਤੇਹਿਯੇਵ ਕਿਞ੍ਜਕ੍ਖੇਹਿ ਕੇਸਰੇਹਿ ਪਰਿਵਾਰਿਤਾਨਂ ਵਿਚਿਤ੍ਤਸਣ੍ਠਾਨਾਦਿਤਾਯ ਵਾ ਉਚ੍ਚਾਵਚਾਨਂ ਯਥਾਵੁਤ੍ਤਵਣ੍ਣਵਨ੍ਤਾਨਂ ਮਨ੍ਦਾਰਵਰੁਕ੍ਖਸਮ੍ਭੂਤਤਾਯ ਮਨ੍ਦਾਰਵਾਨਂ ਪੁਪ੍ਫਾਨਂ ਮਾਲਂ ਤੇਹਿ ਕਤਂ ਮਾਲਾਗੁਣਂ ਤ੍ਵਂ ਦੇਵਤੇ ਅਤ੍ਤਨੋ ਸੀਸੇ ਧਾਰੇਸਿ ਪਿਲ਼ਨ੍ਧਸੀਤਿ.

ਯਤੋ ਰੁਕ੍ਖਤੋ ਤਾਨਿ ਪੁਪ੍ਫਾਨਿ, ਤੇਸਂ ਵਿਸੇਸਵਣ੍ਣਤਾਯ ਅਨਞ੍ਞਸਾਧਾਰਣਤਂ ਦਸ੍ਸੇਤੁਂ ‘‘ਨਯਿਮੇ ਅਞ੍ਞੇਸੁ ਕਾਯੇਸੁ, ਰੁਕ੍ਖਾ ਸਨ੍ਤਿ ਸੁਮੇਧਸੇ’’ਤਿ ਵੁਤ੍ਤਂ. ਤਤ੍ਥ ਇਮੇਤਿ ਯਥਾਵੁਤ੍ਤਵਣ੍ਣਸਣ੍ਠਾਨਾਦਿਯੁਤ੍ਤਾ ਪੁਪ੍ਫਵਨ੍ਤੋ ਰੁਕ੍ਖਾ ਨ ਸਨ੍ਤੀਤਿ ਯੋਜਨਾ. ਕਾਯੇਸੂਤਿ ਦੇਵਨਿਕਾਯੇਸੁ. ਸੁਮੇਧਸੇਤਿ ਸੁਨ੍ਦਰਪਞ੍ਞੇ.

ਤਤ੍ਥ ਨੀਲਾਤਿ ਇਨ੍ਦਨੀਲਮਹਾਨੀਲਾਦਿਮਣਿਰਤਨਾਨਂ ਵਸੇਨ ਨੀਲੋਭਾਸਾ. ਪੀਤਾਤਿ ਪੁਪ੍ਫਰਾਗਕਕ੍ਕੇਤਨਪੁਲਕਾਦਿਮਣਿਰਤਨਾਨਞ੍ਚੇਵ ਸਿਙ੍ਗੀਸੁਵਣ੍ਣਸ੍ਸ ਚ ਵਸੇਨ ਪੀਤੋਭਾਸਾ. ਕਾਲ਼ਾਤਿ ਅਸ੍ਮਕਉਪਲਕਾਦਿਮਣਿਰਤਨਾਨਂ ਵਸੇਨ ਕਣ੍ਹੋਭਾਸਾ. ਮਞ੍ਜਿਟ੍ਠਾਤਿ ਜੋਤਿਰਸਗੋਮੁਤ੍ਤਕਗੋਮੇਦਕਾਦਿਮਣਿਰਤਨਾਨਂ ਵਸੇਨ ਮਞ੍ਜਿਟ੍ਠੋਭਾਸਾ. ਲੋਹਿਤਾਤਿ ਪਦੁਮਰਾਗਲੋਹਿਤਙ੍ਕਪਵਾਲ਼ਰਤਨਾਦੀਨਂ ਵਸੇਨ ਲੋਹਿਤੋਭਾਸਾ. ਕੇਚਿ ਪਨ ਨੀਲਾਦਿਪਦਾਨਿ ‘‘ਰੁਕ੍ਖਾ’’ਤਿ ਇਮਿਨਾ ‘‘ਨੀਲਾ ਰੁਕ੍ਖਾ’’ਤਿਆਦਿਨਾ ਯੋਜੇਤ੍ਵਾ ਵਦਨ੍ਤਿ. ਰੁਕ੍ਖਾਪਿ ਹਿ ਨੀਲਾਦਿਵਣ੍ਣੇਹਿ ਪੁਪ੍ਫੇਹਿ ਸਞ੍ਛਨ੍ਨਤ੍ਤਾ ਨੀਲਾਦਿਯੋਗਤੋ ਨੀਲਾਦਿਵੋਹਾਰਂ ਲਭਨ੍ਤੀਤਿ ਤੇਹਿ ‘‘ਨੀਲਾ…ਪੇ… ਲੋਹਿਤਾ…ਪੇ… ਨਯਿਮੇ ਅਞ੍ਞੇਸੁ ਕਾਯੇਸੁ ਰੁਕ੍ਖਾ ਸਨ੍ਤਿ ਸੁਮੇਧਸੇਤਿ, ਯਤੋ ਤ੍ਵਂ ਉਚ੍ਚਾਵਚਾਨਂ ਵਣ੍ਣਾਨਂ ਕਿਞ੍ਜਕ੍ਖਪਰਿਵਾਰਿਤਾਨਂ ਮਨ੍ਦਾਰਵਾਨਂ ਪੁਪ੍ਫਾਨਂ ਮਾਲਂ ਧਾਰੇਸੀ’’ਤਿ ਯੋਜਨਾ ਕਾਤਬ੍ਬਾ. ਤਤ੍ਥ ਯਥਾਦਿਟ੍ਠੇ ਵਣ੍ਣਵਿਸੇਸਯੁਤ੍ਤੇ ਪੁਪ੍ਫੇ ਕਿਤ੍ਤੇਤ੍ਵਾ ਤੇਸਂ ਅਸਾਧਾਰਣਭਾਵਦਸ੍ਸਨੇਨ ਰੁਕ੍ਖਾਨਂ ਆਵੇਨਿਕਭਾਵਦਸ੍ਸਨਂ ਪਠਮਨਯੋ, ਰੁਕ੍ਖਾਨਂ ਅਸਾਧਾਰਣਭਾਵਦਸ੍ਸਨੇਨ ਪੁਪ੍ਫਾਨਂ ਆਵੇਨਿਕਭਾਵਦਸ੍ਸਨਂ ਦੁਤਿਯਨਯੋ. ਪਠਮਨਯੇ ਵਣ੍ਣਾਦਯੋ ਸਰੂਪੇਨ ਗਹਿਤਾ, ਦੁਤਿਯਨਯੇ ਨਿਸ੍ਸਯਮੁਖੇਨਾਤਿ ਅਯਮੇਤੇਸਂ ਵਿਸੇਸੋ.

੨੦੮. ਕੇਨਾਤਿ ਕੇਨ ਪੁਞ੍ਞਕਮ੍ਮੇਨ, ਕਾਯਂ ਤਾਵਤਿਂਸਨ੍ਤਿ ਯੋਜਨਾ. ਪੁਚ੍ਛਿਤਾਚਿਕ੍ਖਾਤਿ ਪੁਚ੍ਛਿਤਾ ਤ੍ਵਂ ਆਚਿਕ੍ਖ ਕਥੇਹਿ.

ਏਵਂ ਭਗਵਤਾ ਪੁਚ੍ਛਿਤਾ ਸਾ ਦੇਵਤਾ ਇਮਾਹਿ ਗਾਥਾਹਿ ਬ੍ਯਾਕਾਸਿ –

੨੦੯. ‘‘ਭਦ੍ਦਿਤ੍ਥਿਕਾਤਿ ਮਂ ਅਞ੍ਞਂਸੁ, ਕਿਮਿਲਾਯਂ ਉਪਾਸਿਕਾ;

ਸਦ੍ਧਾ ਸੀਲੇਨ ਸਮ੍ਪਨ੍ਨਾ, ਸਂਵਿਭਾਗਰਤਾ ਸਦਾ.

੨੧੦. ‘‘ਅਚ੍ਛਾਦਨਞ੍ਚ ਭਤ੍ਤਞ੍ਚ, ਸੇਨਾਸਨਂ ਪਦੀਪਿਯਂ;

ਅਦਾਸਿਂ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ.

੨੧੧. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

੨੧੨. ‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਸਞ੍ਞਮਾ ਸਂਵਿਭਾਗਾ ਚ, ਵਿਮਾਨਂ ਆਵਸਾਮਹਂ.

੨੧੩. ‘‘ਪਾਣਾਤਿਪਾਤਾ ਵਿਰਤਾ, ਮੁਸਾਵਾਦਾ ਚ ਸਞ੍ਞਤਾ;

ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਕਾ.

੨੧੪. ‘‘ਪਞ੍ਚਸਿਕ੍ਖਾਪਦੇ ਰਤਾ, ਅਰਿਯਸਚ੍ਚਾਨ ਕੋਵਿਦਾ;

ਉਪਾਸਿਕਾ ਚਕ੍ਖੁਮਤੋ, ਅਪ੍ਪਮਾਦਵਿਹਾਰਿਨੀ;

ਕਤਾਵਾਸਾ ਕਤਕੁਸਲਾ ਤਤੋ ਚੁਤਾ, ਸਯਂਪਭਾ ਅਨੁਵਿਚਰਾਮਿ ਨਨ੍ਦਨਂ.

੨੧੫. ‘‘ਭਿਕ੍ਖੂ ਚਾਹਂ ਪਰਮਹਿਤਾਨੁਕਮ੍ਪਕੇ, ਅਭੋਜਯਿਂ ਤਪਸ੍ਸਿਯੁਗਂ ਮਹਾਮੁਨਿਂ;

ਕਤਾਵਾਸਾ ਕਤਕੁਸਲਾ ਤਤੋ ਚੁਤਾ, ਸਯਂਪਭਾ ਅਨੁਵਿਚਰਾਮਿ ਨਨ੍ਦਨਂ.

੨੧੬. ‘‘ਅਟ੍ਠਙ੍ਗਿਕਂ ਅਪਰਿਮਿਤਂ ਸੁਖਾਵਹਂ, ਉਪੋਸਥਂ ਸਤਤਮੁਪਾਵਸਿਂ ਅਹਂ;

ਕਤਾਵਾਸਾ ਕਤਕੁਸਲਾ ਤਤੋ ਚੁਤਾ, ਸਯਂਪਭਾ ਅਨੁਵਿਚਰਾਮਿ ਨਨ੍ਦਨ’’ਨ੍ਤਿ.

੨੦੯-੨੧੪. ਤਤ੍ਥ ਭਦ੍ਦਿਤ੍ਥਿਕਾਤਿ ਮਂ ਅਞ੍ਞਂਸੁ, ਕਿਮਿਲਾਯਂ ਉਪਾਸਿਕਾਤਿ ਆਚਾਰਸਮ੍ਪਤ੍ਤਿਯਾ ਸਚ੍ਚਕਿਰਿਯਾਯ ਉਬ੍ਬਤ੍ਤਮਾਨਮਹੋਘਨਿਵਤ੍ਤਨੇਨ ਅਖਣ੍ਡਸੀਲਾਤਿ ਸਞ੍ਜਾਤਨਿਚ੍ਛਯਾ ਭਦ੍ਦਾ ਸੁਨ੍ਦਰਾ ਅਯਂ ਇਤ੍ਥੀ, ਤਸ੍ਮਾ ‘‘ਭਦ੍ਦਿਤ੍ਥਿਕਾ ਉਪਾਸਿਕਾ’’ਤਿ ਚ ਮਂ ਕਿਮਿਲਨਗਰਵਾਸਿਨੋ ਜਾਨਿਂਸੁ. ਸਦ੍ਧਾ ਸੀਲੇਨ ਸਮ੍ਪਨ੍ਨਾਤਿਆਦਿ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ.

ਅਪਿਚ ‘‘ਸਦ੍ਧਾ’’ਤਿ ਇਮਿਨਾ ਸਦ੍ਧਾਧਨਂ, ‘‘ਸਂਵਿਭਾਗਰਤਾ, ਅਚ੍ਛਾਦਨਞ੍ਚ ਭਤ੍ਤਞ੍ਚ, ਸੇਨਾਸਨਂ ਪਦੀਪਿਯਂ. ਅਦਾਸਿਂ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ’’ਤਿ ਇਮਿਨਾ ਚਾਗਧਨਂ, ‘‘ਸੀਲੇਨ ਸਮ੍ਪਨ੍ਨਾ, ਚਤੁਦ੍ਦਸਿਂ ਪਞ੍ਚਦਸਿਂ…ਪੇ… ਪਞ੍ਚਸਿਕ੍ਖਾਪਦੇ ਰਤਾ’’ਤਿ ਇਮਿਨਾ ਸੀਲਧਨਂ ਹਿਰਿਧਨਂ ਓਤ੍ਤਪ੍ਪਧਨਞ੍ਚ, ‘‘ਅਰਿਯਸਚ੍ਚਾਨ ਕੋਵਿਦਾ’’ਤਿ ਇਮਿਨਾ ਸੁਤਧਨਂ ਪਞ੍ਞਾਧਨਞ੍ਚ ਦਸ੍ਸਿਤਨ੍ਤਿ ਸਾ ਅਤ੍ਤਨੋ ਸਤ੍ਤਵਿਧਅਰਿਯਧਨਪਟਿਲਾਭਂ. ‘‘ਉਪਾਸਿਕਾ ਚਕ੍ਖੁਮਤੋ…ਪੇ… ਅਨੁਵਿਚਰਾਮਿ ਨਨ੍ਦਨ’’ਨ੍ਤਿ ਇਮਿਨਾ ਤਸ੍ਸ ਦਿਟ੍ਠਧਮ੍ਮਿਕਂ ਸਮ੍ਪਰਾਯਿਕਞ੍ਚ ਆਨਿਸਂਸਂ ਵਿਭਾਵੇਤਿ. ਤਤ੍ਥ ਕਤਾਵਾਸਾਤਿ ਨਿਪ੍ਫਾਦਿਤਸੁਚਰਿਤਾਵਾਸਾ. ਸੁਚਰਿਤਕਮ੍ਮਞ੍ਹਿ ਤਦਤ੍ਤੇ ਆਯਤਿਞ੍ਚ ਸੁਖਾਵਾਸਹੇਤੁਤਾਯ ‘‘ਸੁਖਵਿਹਾਰਸ੍ਸ ਆਵਾਸੋ’’ਤਿ ਵੁਚ੍ਚਤਿ. ਤੇਨਾਹ ‘‘ਕਤਕੁਸਲਾ’’ਤਿ.

੨੧੫. ਪੁਬ੍ਬੇ ਅਨਾਮਸਿਤਖੇਤ੍ਤਵਿਸੇਸਂ ਅਤ੍ਤਨੋ ਦਾਨਮਯਂ ਪੁਞ੍ਞਂ ਵਤ੍ਵਾ ਇਦਾਨਿ ਤਸ੍ਸ ਆਯਤਨਗਤਤਂ ਦਸ੍ਸੇਤੁਂ ‘‘ਭਿਕ੍ਖੂ ਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਭਿਕ੍ਖੂਤਿ ਅਨਵਸੇਸਭਿਨ੍ਨਕਿਲੇਸਤਾਯ ਭਿਕ੍ਖੂ. ਪਰਮਹਿਤਾਨੁਕਮ੍ਪਕੇਤਿ ਪਰਮਂ ਅਤਿਵਿਯ ਦਿਟ੍ਠਧਮ੍ਮਿਕਾਦਿਨਾ ਹਿਤੇਨ ਅਨੁਗ੍ਗਾਹਕੇ. ਅਭੋਜਯਿਨ੍ਤਿ ਪਣੀਤੇਨ ਭੋਜਨੇਨ ਭੋਜੇਸਿਂ. ਤਪਸ੍ਸਿਯੁਗਨ੍ਤਿ ਉਤ੍ਤਮੇਨ ਤਪਸਾ ਸਬ੍ਬਕਿਲੇਸਮਲਂ ਤਾਪੇਤ੍ਵਾ ਸਮੁਚ੍ਛਿਨ੍ਦਿਤ੍ਵਾ ਠਿਤਤ੍ਤਾ ਤਪਸ੍ਸਿਭੂਤਂ ਯੁਗਂ. ਮਹਾਮੁਨਿਨ੍ਤਿ ਤਤੋ ਏਵ ਮਹਾਇਸਿਭੂਤਂ, ਮਹਤੋ ਵਾ ਅਤ੍ਤਨੋ ਵਿਸਯਸ੍ਸ ਮਹਨ੍ਤੇਨੇਵ ਞਾਣੇਨ ਮੁਨਨਤੋ ਪਰਿਚ੍ਛਿਨ੍ਦਨਤੋ ਮਹਾਮੁਨਿਂ. ਸਬ੍ਬਮੇਤਂ ਦ੍ਵੇ ਅਗ੍ਗਸਾਵਕੇ ਸਨ੍ਧਾਯ ਵਦਤਿ.

੨੧੬. ਅਪਰਿਮਿਤਂ ਸੁਖਾਵਹਨ੍ਤਿ ਅਨੁਨਾਸਿਕਲੋਪਂ ਅਕਤ੍ਵਾ ਵੁਤ੍ਤਂ. ‘‘ਯਾਵਞ੍ਚਿਦਂ, ਭਿਕ੍ਖਵੇ, ਨ ਸੁਕਰਂ ਅਕ੍ਖਾਨੇਨ ਪਾਪੁਣਿਤੁਂ ਯਾਵ ਸੁਖਾ ਸਗ੍ਗਾ’’ਤਿ (ਮ. ਨਿ. ੩.੨੫੫) ਵਚਨਤੋ ਭਗਵਤੋਪਿ ਵਚਨਪਥਾਤੀਤਪਰਿਮਾਣਰਹਿਤਸੁਖਨਿਬ੍ਬਤ੍ਤਕਂ ਅਤ੍ਤਨੋ ਵਾ ਆਨੁਭਾਵੇਨ ਅਪਰਿਮਿਤਸੁਖਾਵਹਂ ਸੁਖਸ੍ਸ ਆਵਹਨਕਂ. ਸਤਤਨ੍ਤਿ ਸਬ੍ਬਕਾਲਂ. ਤਂ ਤਂ ਉਪੋਸਥਰਕ੍ਖਣਦਿਵਸਂ ਅਹਾਪੇਤ੍ਵਾ, ਤਂ ਤਂ ਵਾ ਉਪੋਸਥਰਕ੍ਖਣਦਿਵਸਂ ਅਖਣ੍ਡਂ ਕਤ੍ਵਾ ਪਰਿਪੁਣ੍ਣਂ ਕਤ੍ਵਾ ਸਤਤਂ ਵਾ ਸਬ੍ਬਕਾਲਂ ਸੁਖਾਵਹਨ੍ਤਿ ਯੋਜਨਾ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

ਅਥ ਭਗਵਾ ਮਾਤੁਦੇਵਪੁਤ੍ਤਪ੍ਪਮੁਖਾਨਂ ਦਸਸਹਸ੍ਸਿਲੋਕਧਾਤੁਵਾਸੀਨਂ ਦੇਵਬ੍ਰਹ੍ਮਸਙ੍ਘਾਨਂ ਤਯੋ ਮਾਸੇ ਅਭਿਧਮ੍ਮਪਿਟਕਂ ਦੇਸੇਤ੍ਵਾ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਦ੍ਦਿਤ੍ਥਿਵਿਮਾਨਂ ਭਿਕ੍ਖੂਨਂ ਦੇਸੇਸਿ. ਸਾ ਦੇਸਨਾ ਸਮ੍ਪਤ੍ਤਪਰਿਸਾਯ ਸਾਤ੍ਥਿਕਾ ਅਹੋਸੀਤਿ.

ਭਦ੍ਦਿਤ੍ਥਿਵਿਮਾਨਵਣ੍ਣਨਾ ਨਿਟ੍ਠਿਤਾ.