੨. ਚਿਤ੍ਤਲਤਾਵਗ੍ਗੋ

੧. ਦਾਸਿਵਿਮਾਨਵਣ੍ਣਨਾ

ਦੁਤਿਯਵਗ੍ਗੇ ਅਪਿ ਸਕ੍ਕੋਵ ਦੇਵਿਨ੍ਦੋਤਿ ਦਾਸਿਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਜੇਤਵਨੇ ਵਿਹਰਨ੍ਤੇ ਸਾਵਤ੍ਥਿਵਾਸੀ ਅਞ੍ਞਤਰੋ ਉਪਾਸਕੋ ਸਮ੍ਬਹੁਲੇਹਿ ਉਪਾਸਕੇਹਿ ਸਦ੍ਧਿਂ ਸਾਯਨ੍ਹਸਮਯਂ ਵਿਹਾਰਂ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਪਰਿਸਾਯ ਵੁਟ੍ਠਿਤਾਯ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ‘‘ਇਤੋ ਪਟ੍ਠਾਯ ਅਹਂ, ਭਨ੍ਤੇ, ਸਙ੍ਘਸ੍ਸ ਚਤ੍ਤਾਰਿ ਨਿਚ੍ਚਭਤ੍ਤਾਨਿ ਦਸ੍ਸਾਮੀ’’ਤਿ ਆਹ. ਅਥ ਨਂ ਭਗਵਾ ਤਦਨੁਚ੍ਛਵਿਕਂ ਧਮ੍ਮਕਥਂ ਕਥੇਤ੍ਵਾ ਵਿਸ੍ਸਜ੍ਜੇਸਿ. ਸੋ ‘‘ਮਯਾ, ਭਨ੍ਤੇ, ਸਙ੍ਘਸ੍ਸ ਚਤ੍ਤਾਰਿ ਨਿਚ੍ਚਭਤ੍ਤਾਨਿ ਪਞ੍ਞਤ੍ਤਾਨਿ. ਸ੍ਵੇ ਪਟ੍ਠਾਯ ਅਯ੍ਯਾ ਮਮ ਗੇਹਂ ਆਗਚ੍ਛਨ੍ਤੂ’’ਤਿ ਭਤ੍ਤੁਦ੍ਦੇਸਕਸ੍ਸ ਆਰੋਚੇਤ੍ਵਾ ਅਤ੍ਤਨੋ ਗੇਹਂ ਗਨ੍ਤ੍ਵਾ ਦਾਸਿਯਾ ਤਮਤ੍ਥਂ ਆਚਿਕ੍ਖਿਤ੍ਵਾ ‘‘ਤਤ੍ਥ ਤਯਾ ਨਿਚ੍ਚਕਾਲਂ ਅਪ੍ਪਮਤ੍ਤਾਯ ਭਵਿਤਬ੍ਬ’’ਨ੍ਤਿ ਆਹ. ਸਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਪਕਤਿਯਾਵ ਸਾ ਸਦ੍ਧਾਸਮ੍ਪਨ੍ਨਾ ਪੁਞ੍ਞਕਾਮਾ ਸੀਲਵਤੀ, ਤਸ੍ਮਾ ਦਿਵਸੇ ਦਿਵਸੇ ਕਾਲਸ੍ਸੇਵ ਉਟ੍ਠਾਯ ਪਣੀਤਂ ਅਨ੍ਨਪਾਨਂ ਪਟਿਯਾਦੇਤ੍ਵਾ ਭਿਕ੍ਖੂਨਂ ਨਿਸੀਦਨਟ੍ਠਾਨਂ ਸੁਸਮ੍ਮਟ੍ਠਂ ਸੁਪਰਿਭਣ੍ਡਕਂ ਕਤ੍ਵਾ ਆਸਨਾਨਿ ਪਞ੍ਞਾਪੇਤ੍ਵਾ ਭਿਕ੍ਖੂ ਉਪਗਤੇ ਤਤ੍ਥ ਨਿਸੀਦਾਪੇਤ੍ਵਾ ਵਨ੍ਦਿਤ੍ਵਾ ਗਨ੍ਧਪੁਪ੍ਫਧੂਪਦੀਪੇਹਿ ਪੂਜੇਤ੍ਵਾ ਸਕ੍ਕਚ੍ਚਂ ਪਰਿਵਿਸਤਿ.

ਅਥੇਕਦਿਵਸਂ ਭਿਕ੍ਖੂ ਕਤਭਤ੍ਤਕਿਚ੍ਚੇ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਵਮਾਹ ‘‘ਕਥਂ ਨੁ ਖੋ, ਭਨ੍ਤੇ, ਇਤੋ ਜਾਤਿਆਦਿਦੁਕ੍ਖਤੋ ਪਰਿਮੁਤ੍ਤਿ ਹੋਤੀ’’ਤਿ. ਭਿਕ੍ਖੂ ਤਸ੍ਸਾ ਸਰਣਾਨਿ ਚ ਪਞ੍ਚ ਸੀਲਾਨਿ ਚ ਦਤ੍ਵਾ ਕਾਯਸਭਾਵਂ ਪਕਾਸੇਤ੍ਵਾ ਪਟਿਕੂਲਮਨਸਿਕਾਰੇ ਨਿਯੋਜੇਸੁਂ, ਅਪਰੇ ਅਨਿਚ੍ਚਤਾਪਟਿਸਂਯੁਤ੍ਤਂ ਧਮ੍ਮਕਥਂ ਕਥੇਸੁਂ. ਸਾ ਸੋਲ਼ਸ ਵਸ੍ਸਾਨਿ ਸੀਲਂ ਰਕ੍ਖਨ੍ਤੀ ਅਨ੍ਤਰਨ੍ਤਰਾ ਯੋਨਿਸੋ ਮਨਸਿਕਰੋਨ੍ਤੀ ਏਕਦਿਵਸਂ ਧਮ੍ਮਸ੍ਸਵਨਸਪ੍ਪਾਯਂ ਲਭਿਤ੍ਵਾ ਞਾਣਸ੍ਸ ਚ ਪਰਿਪਕ੍ਕਤ੍ਤਾ ਵਿਪਸ੍ਸਨਂ ਵਡ੍ਢੇਤ੍ਵਾ ਸੋਤਾਪਤ੍ਤਿਫਲਂ ਸਚ੍ਛਾਕਾਸਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਸਕ੍ਕਸ੍ਸ ਦੇਵਰਞ੍ਞੋ ਵਲ੍ਲਭਾ ਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿ. ਸਾ ਸਟ੍ਠਿਤੂਰਿਯਸਹਸ੍ਸੇਹਿ ਪਰਿਚਰਿਯਮਾਨਾ ਅਚ੍ਛਰਾਸਤਸਹਸ੍ਸਪਰਿਵੁਤਾ ਮਹਨ੍ਤਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੀ ਪਮੁਦਾ ਮੋਦਮਾਨਾ ਸਪਰਿਵਾਰਾ ਉਯ੍ਯਾਨਾਦੀਸੁ ਵਿਚਰਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨੇਵ ਦਿਸ੍ਵਾ –

੧੫੭. ‘‘ਅਪਿ ਸਕ੍ਕੋਵ ਦੇਵਿਨ੍ਦੋ, ਰਮ੍ਮੇ ਚਿਤ੍ਤਲਤਾਵਨੇ;

ਸਮਨ੍ਤਾ ਅਨੁਪਰਿਯਾਸਿ, ਨਾਰੀਗਣਪੁਰਕ੍ਖਤਾ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੧੫੮. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੫੯. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ,

ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ,

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਪੁਚ੍ਛਿ;

੧੬੦. ‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੬੧. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਦਾਸੀ ਅਹੋਸਿਂ ਪਰਪੇਸ੍ਸਿਯਾ ਕੁਲੇ.

੧੬੨. ‘‘ਉਪਾਸਿਕਾ ਚਕ੍ਖੁਮਤੋ, ਗੋਤਮਸ੍ਸ ਯਸਸ੍ਸਿਨੋ;

ਤਸ੍ਸਾ ਮੇ ਨਿਕ੍ਕਮੋ ਆਸਿ, ਸਾਸਨੇ ਤਸ੍ਸ ਤਾਦਿਨੋ.

੧੬੩. ‘‘ਕਾਮਂ ਭਿਜ੍ਜਤੁਯਂ ਕਾਯੋ, ਨੇਵ ਅਤ੍ਥੇਤ੍ਥ ਸਣ੍ਠਨਂ;

ਸਿਕ੍ਖਾਪਦਾਨਂ ਪਞ੍ਚਨ੍ਨਂ, ਮਗ੍ਗੋ ਸੋਵਤ੍ਥਿਕੋ ਸਿਵੋ.

੧੬੪. ‘‘ਅਕਣ੍ਟਕੋ ਅਗਹਨੋ, ਉਜੁ ਸਬ੍ਭਿ ਪਵੇਦਿਤੋ;

ਨਿਕ੍ਕਮਸ੍ਸ ਫਲਂ ਪਸ੍ਸ, ਯਥਿਦਂ ਪਾਪੁਣਿਤ੍ਥਿਕਾ.

੧੬੫. ‘‘ਆਮਨ੍ਤਨਿਕਾ ਰਞ੍ਞੋਮ੍ਹਿ, ਸਕ੍ਕਸ੍ਸ ਵਸਵਤ੍ਤਿਨੋ;

ਸਟ੍ਠਿ ਤੂਰਿਯਸਹਸ੍ਸਾਨਿ, ਪਟਿਬੋਧਂ ਕਰੋਨ੍ਤਿ ਮੇ.

੧੬੬. ‘‘ਆਲਮ੍ਬੋ ਗਗ੍ਗਰੋ ਭੀਮੋ, ਸਾਧੁਵਾਦੀ ਚ ਸਂਸਯੋ;

ਪੋਕ੍ਖਰੋ ਚ ਸੁਫਸ੍ਸੋ ਚ, ਵੀਣਾਮੋਕ੍ਖਾ ਚ ਨਾਰਿਯੋ.

੧੬੭. ‘‘ਨਨ੍ਦਾ ਚੇਵ ਸੁਨਨ੍ਦਾ ਚ, ਸੋਣਦਿਨ੍ਨਾ ਸੁਚਿਮ੍ਹਿਤਾ;

ਅਲਮ੍ਬੁਸਾ ਮਿਸ੍ਸਕੇਸੀ ਚ, ਪੁਣ੍ਡਰੀਕਾਤਿ ਦਾਰੁਣੀ.

੧੬੮. ‘‘ਏਣੀਫਸ੍ਸਾ ਸੁਫਸ੍ਸਾ ਚ, ਸੁਭਦ੍ਦਾ ਮੁਦੁਵਾਦਿਨੀ;

ਏਤਾ ਚਞ੍ਞਾ ਚ ਸੇਯ੍ਯਾਸੇ, ਅਚ੍ਛਰਾਨਂ ਪਬੋਧਿਕਾ.

੧੬੯. ‘‘ਤਾ ਮਂ ਕਾਲੇਨੁਪਾਗਨ੍ਤ੍ਵਾ, ਅਭਿਭਾਸਨ੍ਤਿ ਦੇਵਤਾ;

ਹਨ੍ਦ ਨਚ੍ਚਾਮ ਗਾਯਾਮ, ਹਨ੍ਦ ਤਂ ਰਮਯਾਮਸੇ.

੧੭੦. ‘‘ਨਯਿਦਂ ਅਕਤਪੁਞ੍ਞਾਨਂ, ਕਤਪੁਞ੍ਞਾਨਮੇਵਿਦਂ;

ਅਸੋਕਂ ਨਨ੍ਦਨਂ ਰਮ੍ਮਂ, ਤਿਦਸਾਨਂ ਮਹਾਵਨਂ.

੧੭੧. ‘‘ਸੁਖਂ ਅਕਤਪੁਞ੍ਞਾਨਂ, ਇਧ ਨਤ੍ਥਿ ਪਰਤ੍ਥ ਚ;

ਸੁਖਞ੍ਚ ਕਤਪੁਞ੍ਞਾਨਂ, ਇਧ ਚੇਵ ਪਰਤ੍ਥ ਚ.

੧੭੨. ‘‘ਤੇਸਂ ਸਹਬ੍ਯਕਾਮਾਨਂ, ਕਤ੍ਤਬ੍ਬਂ ਕੁਸਲਂ ਬਹੁਂ;

ਕਤਪੁਞ੍ਞਾ ਹਿ ਮੋਦਨ੍ਤਿ, ਸਗ੍ਗੇ ਭੋਗਸਮਙ੍ਗਿਨੋ’’ਤਿ. – ਦੇਵਤਾ ਵਿਸ੍ਸਜ੍ਜੇਸਿ;

੧੫੭. ਤਤ੍ਥ ਅਪਿ ਸਕ੍ਕੋਵ ਦੇਵਿਨ੍ਦੋਤਿ ਅਪਿਸਦ੍ਦੋ ਸਮ੍ਭਾਵਨਾਯਂ, ਇਵਸਦ੍ਦੋ ਇਕਾਰਲੋਪਂ ਕਤ੍ਵਾ ਵੁਤ੍ਤੋ ਉਪਮਾਯਂ, ਤਸ੍ਮਾ ਯਥਾ ਨਾਮ ਸਕ੍ਕੋ ਦੇਵਾਨਮਿਨ੍ਦੋਤਿ ਅਤ੍ਥੋ. ਸਕ੍ਕਸਮਭਾਵੋ ਤਿਸ੍ਸਾ ਦੇਵਤਾਯ ਪਰਿਵਾਰਸਮ੍ਪਤ੍ਤਿਦਸ੍ਸਨਤ੍ਥਂ ਵੁਤ੍ਤੋ. ਕੇਚਿ ‘‘ਅਪੀਤਿ ਨਿਪਾਤਮਤ੍ਤ’’ਨ੍ਤਿ ਵਦਨ੍ਤਿ. ਚਿਤ੍ਤਲਤਾਵਨੇਤਿ ਚਿਤ੍ਤਾਯ ਨਾਮ ਦੇਵਧੀਤਾਯ ਪੁਞ੍ਞਾਨੁਭਾਵੇਨ ਨਿਬ੍ਬਤ੍ਤੇ, ਚਿਤ੍ਤਾਨਂ ਵਾ ਵਿਚਿਤ੍ਤਪੁਪ੍ਫਫਲਾਦਿਵਿਸੇਸਯੁਤ੍ਤਾਨਂ ਸਨ੍ਤਾਨਕਵਲ੍ਲਿਆਦੀਨਂ ਤਤ੍ਥ ਯੇਭੁਯ੍ਯਤਾਯ ਚਿਤ੍ਤਲਤਾਵਨਨ੍ਤਿ ਲਦ੍ਧਨਾਮੇ ਦੇਵੁਯ੍ਯਾਨੇ.

੧੬੧. ਪਰਪੇਸ੍ਸਿਯਾਤਿ ਪਰੇਸਂ ਕੁਲੇ ਤਸ੍ਮਿਂ ਤਸ੍ਮਿਂ ਕਿਚ੍ਚੇ ਪੇਸਨਿਯਾ, ਪਰੇਸਂ ਵੇਯ੍ਯਾਵਚ੍ਚਕਾਰੀਤਿ ਅਤ੍ਥੋ.

੧੬੨. ਤਸ੍ਸਾ ਮੇ ਨਿਕ੍ਕਮੋ ਆਸਿ, ਸਾਸਨੇ ਤਸ੍ਸ ਤਾਦਿਨੋਤਿ ਤਸ੍ਸਾ ਦਾਸਿਯਾਪਿ ਸਮਾਨਾਯ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਤੋ ਬੁਦ੍ਧਸ੍ਸ ਭਗਵਤੋ ਉਪਾਸਿਕਾ ਹੁਤ੍ਵਾ ਸੋਲ਼ਸ ਵਸ੍ਸਾਨਿ ਸੀਲਂ ਰਕ੍ਖਨ੍ਤਿਯਾ ਕਮ੍ਮਟ੍ਠਾਨਞ੍ਚ ਮਨਸਿ ਕਰੋਨ੍ਤਿਯਾ ਮਨਸਿਕਾਰਾਨੁਭਾਵੇਨ ਮੇ ਮਯ੍ਹਂ ਉਪ੍ਪਜ੍ਜਮਾਨੇ ਸਤ੍ਤਤਿਂਸਬੋਧਿਪਕ੍ਖਿਯਧਮ੍ਮਸਙ੍ਖਾਤੇ ਇਟ੍ਠਾਦੀਸੁ ਤਾਦਿਲਕ੍ਖਣਸਮ੍ਪਤ੍ਤਿਯਾ ਤਾਦਿਨੋ ਸਤ੍ਥੁ ਸਾਸਨੇ ਤਪ੍ਪਰਿਯਾਪਨ੍ਨੋਯੇਵ ਸਂਕਿਲੇਸਪਕ੍ਖਤੋ ਨਿਕ੍ਕਮਨੇਨ ‘‘ਨਿਕ੍ਕਮੋ’’ਤਿ ਲਦ੍ਧਨਾਮੋ ਸਮ੍ਮਾਵਾਯਾਮੋ ਆਸਿ ਅਹੋਸਿ ਉਪ੍ਪਜ੍ਜਿ.

੧੬੩-੪. ਤਸ੍ਸ ਪਨ ਨਿਕ੍ਕਮਸ੍ਸ ਪੁਬ੍ਬਭਾਗਸ੍ਸ ਪਵਤ੍ਤਾਕਾਰਂ ਦਸ੍ਸੇਤੁਂ ‘‘ਕਾਮਂ ਭਿਜ੍ਜਤੁਯਂ ਕਾਯੋ, ਨੇਵ ਅਤ੍ਥੇਤ੍ਥ ਸਣ੍ਠਨਨ੍ਤਿ ਵੁਤ੍ਤਂ. ਤਸ੍ਸਤ੍ਥੋ – ਯਦਿਪਿ ਮੇ ਅਯਂ ਕਾਯੋ ਭਿਜ੍ਜਤੁ ਵਿਨਸ੍ਸਤੁ, ਤਤ੍ਥ ਕਿਞ੍ਚਿਮਤ੍ਤਮ੍ਪਿ ਅਪੇਕ੍ਖਂ ਅਕਰੋਨ੍ਤੀ ਏਤ੍ਥ ਏਤਸ੍ਮਿਂ ਕਮ੍ਮਟ੍ਠਾਨਾਨੁਯੋਗੇ ਨੇਵ ਅਤ੍ਥਿ, ਮੇ ਵੀਰਿਯਸ੍ਸ ਸਣ੍ਠਨਂ ਸਿਥਿਲੀਕਰਣਨ੍ਤਿ ਵੀਰਿਯਂ ਸਮੁਤ੍ਤੇਜੇਨ੍ਤੀ ਵਿਪਸ੍ਸਨਂ ਉਸ੍ਸੁਕ੍ਕਾਪੇਸਿਨ੍ਤਿ.

ਇਦਾਨਿ ਤਥਾ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਪਟਿਲਦ੍ਧਗੁਣਂ ਦਸ੍ਸੇਨ੍ਤੀ –

‘‘ਸਿਕ੍ਖਾਪਦਾਨਂ ਪਞ੍ਚਨ੍ਨਂ, ਮਗ੍ਗੋ ਸੋਵਤ੍ਥਿਕੋ ਸਿਵੋ;

ਅਕਣ੍ਟਕੋ ਅਗਹਨੋ, ਉਜੁ ਸਬ੍ਭਿ ਪਵੇਦਿਤੋ;

ਨਿਕ੍ਕਮਸ੍ਸ ਫਲਂ ਪਸ੍ਸ, ਯਥਿਦਂ ਪਾਪੁਣਿਤ੍ਥਿਕਾ’’ਤਿ. – ਆਹ;

ਤਤ੍ਰਾਯਂ ਸਙ੍ਖੇਪਤ੍ਥੋ – ਯੋ ਨਿਚ੍ਚਸੀਲਵਸੇਨ ਸਮਾਦਿਨ੍ਨਾਨਂ ਪਞ੍ਚਨ੍ਨਂ ਸਿਕ੍ਖਾਪਦਾਨਂ ਸਿਕ੍ਖਾਕੋਟ੍ਠਾਸਾਨਂ ਉਪਨਿਸ੍ਸਯਭਾਵੇਨ ਲਦ੍ਧਤ੍ਤਾ ਤੇਸਂ ਪਰਿਪੂਰਿਤਤ੍ਤਾ ਚ ਸਿਕ੍ਖਾਪਦਾਨਂ ਪਞ੍ਚਨ੍ਨਂ ਸਮ੍ਬਨ੍ਧੀਭੂਤੋ, ਯਸ੍ਮਿਂ ਸਨ੍ਤਾਨੇ ਉਪ੍ਪਨ੍ਨੋ, ਤਸ੍ਸ ਸਬ੍ਬਾਕਾਰੇਨ ਸੋਤ੍ਥਿਭਾਵਸਮ੍ਪਾਦਨਤੋ ਸੁਨ੍ਦਰਤ੍ਥਭਾਵਤੋ ਚ ਸੋਵਤ੍ਥਿਕੋ ਸੋਤ੍ਥਿਕੋ, ਸਂਕਿਲੇਸਧਮ੍ਮੇਹਿ ਅਨੁਪਦ੍ਦੁਤਤ੍ਤਾ ਖੇਮਪ੍ਪਤ੍ਤਿਹੇਤੁਤਾਯ ਚ ਸਿਵੋ, ਰਾਗਕਣ੍ਟਕਾਦੀਨਂ ਅਭਾਵੇਨ ਅਕਣ੍ਟਕੋ, ਕਿਲੇਸਦਿਟ੍ਠਿਦੁਚ੍ਚਰਿਤਗਹਨਸਮੁਚ੍ਛੇਦਨਤੋ ਅਗਹਨੋ, ਸਬ੍ਬਜਿਮ੍ਹਵਙ੍ਕਕੁਟਿਲਭਾਵਾਪਗਮਹੇਤੁਤਾਯ ਉਜੁ, ਬੁਦ੍ਧਾਦੀਹਿ ਸਪ੍ਪੁਰਿਸੇਹਿ ਪਕਾਸਿਤਤ੍ਤਾ ਸਬ੍ਭਿ ਪਵੇਦਿਤੋ ਅਰਿਯਮਗ੍ਗੋ, ਤਂ ਯਥਾ ਯੇਨ ਉਪਾਯਭੂਤੇਨ ਇਤ੍ਥਿਕਾ ਦ੍ਵਙ੍ਗੁਲਬਹਲਬੁਦ੍ਧਿਕਾਪਿ ਸਮਾਨਾ ਪਾਪੁਣਿਂ, ਤਸ੍ਸ ਨਿਕ੍ਕਮਸ੍ਸ ਯਥਾਵੁਤ੍ਤਵੀਰਿਯਸ੍ਸ ਇਦਂ ਫਲਂ ਪਸ੍ਸਾਤਿ ਸਕ੍ਕਂ ਆਲਪਤਿ.

੧੬੫. ਆਮਨ੍ਤਨਿਕਾ ਰਞ੍ਞੋਮ੍ਹਿ, ਸਕ੍ਕਸ੍ਸ ਵਸਵਤ੍ਤਿਨੋਤਿ ਸਯਂਵਸੀਭਾਵੇਨ ਵਤ੍ਤਨਤੋ, ਦ੍ਵੀਸੁ ਦੇਵਲੋਕੇਸੁ ਅਤ੍ਤਨੋ ਵਸਂ ਇਸ੍ਸਰਿਯਂ ਵਤ੍ਤੇਤੀਤਿ ਵਾ ਵਸਵਤ੍ਤੀ, ਤਸ੍ਸ ਵਸਵਤ੍ਤਿਨੋ ਸਕ੍ਕਸ੍ਸ ਦੇਵਰਞ੍ਞੋ ਆਮਨ੍ਤਨਿਕਾ ਆਲਾਪਸਲ੍ਲਾਪਯੋਗ੍ਗਾ, ਕੀਲ਼ਨਕਾਲੇ ਵਾ ਤੇਨ ਆਮਨ੍ਤੇਤਬ੍ਬਾ ਅਮ੍ਹਿ, ਨਿਕ੍ਕਮਸ੍ਸ ਵੀਰਿਯਸ੍ਸ ਫਲਂ ਪਸ੍ਸਾਤਿ ਯੋਜਨਾ. ਆਤਤਵਿਤਤਾਦਿਭੇਦੇਨ ਪਞ੍ਚ ਤੂਰਿਯਙ੍ਗਾਨਿ ਦ੍ਵਾਦਸਹਿ ਪਾਣਿਭਾਗੇਹਿ ਏਕਤੋ ਪਵਜ੍ਜਮਾਨਾਨਿ ਸਟ੍ਠਿ ਹੋਨ੍ਤਿ, ਤਾਨਿ ਪਨ ਸਹਸ੍ਸਮਤ੍ਤਾਨਿ ਪਯਿਰੁਪਾਸਨਵਸੇਨ ਉਪਟ੍ਠਿਤਾਨਿ ਸਨ੍ਧਾਯਾਹ ‘‘ਸਟ੍ਠਿ ਤੂਰਿਯਸਹਸ੍ਸਾਨਿ, ਪਟਿਬੋਧਂ ਕਰੋਨ੍ਤਿ ਮੇ’’ਤਿ. ਤਤ੍ਥ ਪਟਿਬੋਧਨ੍ਤਿ ਪੀਤਿਸੋਮਨਸ੍ਸਾਨਂ ਪਬੋਧਨਂ.

੧੬੬-੮. ਆਲਮ੍ਬੋਤਿਆਦਿ ਤੂਰਿਯਵਾਦਕਾਨਂ ਦੇਵਪੁਤ੍ਤਾਨਂ ਏਕਦੇਸਤੋ ਨਾਮਗ੍ਗਹਣਨ੍ਤਿ ਵਦਨ੍ਤਿ, ਤੂਰਿਯਾਨਂ ਪਨੇਤਂ ਨਾਮਗ੍ਗਹਣਂ. ਵੀਣਾਮੋਕ੍ਖਾਦਿਕਾ ਦੇਵਧੀਤਾ. ਸੁਚਿਮ੍ਹਿਤਾਤਿ ਸੁਦ੍ਧਮਿਹਿਤਾ, ਨਾਮਮੇਵ ਵਾ ਏਤਂ. ਮੁਦੁਵਾਦਿਨੀਤਿ ਮੁਦੁਨਾਵ ਵਦਤੀਤਿ ਮੁਦੁਵਾਦਿਨੀ, ਮੁਦੁਕਂ ਅਤਿਵਿਯ ਵਾਦਨਸੀਲਾ, ਨਾਮਮੇਵ ਵਾ. ਸੇਯ੍ਯਾਸੇਤਿ ਸੇਯ੍ਯਤਰਾ. ਅਚ੍ਛਰਾਨਨ੍ਤਿ ਅਚ੍ਛਰਾਸੁ ਸਙ੍ਗੀਤੇ ਪਾਸਂਸਤਰਾ. ਪਬੋਧਿਕਾਤਿ ਪਬੋਧਨਕਰਾ.

੧੬੯. ਕਾਲੇਨਾਤਿ ਯੁਤ੍ਤਪ੍ਪਤ੍ਤਕਾਲੇਨ. ਅਭਿਭਾਸਨ੍ਤੀਤਿ ਅਭਿਮੁਖਾ, ਅਭਿਰਤਾ ਵਾ ਹੁਤ੍ਵਾ ਭਾਸਨ੍ਤਿ. ਯਥਾ ਚ ਭਾਸਨ੍ਤਿ, ਤਂ ਦਸ੍ਸੇਤੁਂ ‘‘ਹਨ੍ਦ ਨਚ੍ਚਾਮ ਗਾਯਾਮ, ਹਨ੍ਦ ਤਂ ਰਮਯਾਮਸੇ’’ਤਿ ਵੁਤ੍ਤਂ.

੧੭੦. ਇਦਨ੍ਤਿ ਇਦਂ ਮਯਾ ਲਦ੍ਧਟ੍ਠਾਨਂ. ਅਸੋਕਨ੍ਤਿ ਇਟ੍ਠਕਨ੍ਤਪਿਯਮਨਾਪਾਨਂਯੇਵ ਰੂਪਾਦੀਨਂ ਸਮ੍ਭਵਤੋ ਵਿਸੋਕਂ. ਤਤੋ ਏਵ ਸਬ੍ਬਕਾਲਂ ਪਮੋਦਸਂਵਦ੍ਧਨਤੋ ਨਨ੍ਦਨਂ. ਤਿਦਸਾਨਂ ਮਹਾਵਨਨ੍ਤਿ ਤਾਵਤਿਂਸਦੇਵਾਨਂ ਮਹਨ੍ਤਂ ਮਹਨੀਯਞ੍ਚ ਉਯ੍ਯਾਨਂ.

੧੭੧. ਏਵਰੂਪਾ ਦਿਬ੍ਬਸਮ੍ਪਤ੍ਤਿ ਨਾਮ ਪੁਞ੍ਞਕਮ੍ਮਵਸੇਨੇਵਾਤਿ ਓਦਿਸ੍ਸਕਨਯੇਨ ਵਤ੍ਵਾ ਪਨੁ ਅਨੋਦਿਸ੍ਸਕਨਯੇਨ ਦਸ੍ਸੇਨ੍ਤੀ ‘‘ਸੁਖਂ ਅਕਤਪੁਞ੍ਞਾਨ’’ਨ੍ਤਿ ਗਾਥਮਾਹ.

੧੭੨. ਪੁਨ ਅਤ੍ਤਨਾ ਲਦ੍ਧਸ੍ਸ ਦਿਬ੍ਬਟ੍ਠਾਨਸ੍ਸ ਪਰੇਹਿ ਸਾਧਾਰਣਕਾਮਤਾਵਸੇਨ ਧਮ੍ਮਂ ਕਥੇਨ੍ਤੀ ‘‘ਤੇਸਂ ਸਹਬ੍ਯਕਾਮਾਨ’’ਨ੍ਤਿ ਓਸਾਨਗਾਥਮਾਹ. ਤੇਸਨ੍ਤਿ ਤਾਵਤਿਂਸਦੇਵਾਨਂ. ਸਹਬ੍ਯਕਾਮਾਨਨ੍ਤਿ ਸਹਭਾਵਂ ਇਚ੍ਛਨ੍ਤੇਹਿ, ਕਤ੍ਤੁਅਤ੍ਥੇ ਹਿ ਇਦਂ ਸਾਮਿਵਚਨਂ. ਸਹ ਵਾਤਿ ਪਵਤ੍ਤਤੀਤਿ ਸਹਵੋ, ਤਸ੍ਸ ਭਾਵੋ ਸਹਬ੍ਯਂ ਯਥਾ ਵੀਰਸ੍ਸ ਭਾਵੋ ਵੀਰਿਯਨ੍ਤਿ.

ਏਵਂ ਥੇਰੋ ਦੇਵਤਾਯ ਅਤ੍ਤਨੋ ਪੁਞ੍ਞਕਮ੍ਮੇ ਆਵਿਕਤੇ ਤਸ੍ਸਾ ਸਪਰਿਵਾਰਾਯ ਧਮ੍ਮਂ ਦੇਸੇਤ੍ਵਾ ਦੇਵਲੋਕਤੋ ਆਗਨ੍ਤ੍ਵਾ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਸਦੇਵਕਸ੍ਸ ਲੋਕਸ੍ਸ ਸਾਤ੍ਥਿਕਾ ਅਹੋਸੀਤਿ.

ਦਾਸਿਵਿਮਾਨਵਣ੍ਣਨਾ ਨਿਟ੍ਠਿਤਾ.

੨. ਲਖੁਮਾਵਿਮਾਨਵਣ੍ਣਨਾ

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਲਖੁਮਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਬਾਰਾਣਸਿਯਂ ਵਿਹਰਨ੍ਤੇ ਕੇਵਟ੍ਟਦ੍ਵਾਰਂ ਨਾਮ ਬਾਰਾਣਸਿਨਗਰਸ੍ਸ ਏਕਂ ਦ੍ਵਾਰਂ, ਤਸ੍ਸ ਅਵਿਦੂਰੇ ਨਿਵਿਟ੍ਠਗਾਮੋਪਿ ‘‘ਕੇਵਟ੍ਟਦ੍ਵਾਰ’’ਨ੍ਤ੍ਵੇਵ ਪਞ੍ਞਾਯਿਤ੍ਥ. ਤਤ੍ਥ ਲਖੁਮਾ ਨਾਮ ਏਕਾ ਇਤ੍ਥੀ ਸਦ੍ਧਾ ਪਸਨ੍ਨਾ ਬੁਦ੍ਧਿਸਮ੍ਪਨ੍ਨਾ ਤੇਨ ਦ੍ਵਾਰੇਨ ਪਵਿਸਨ੍ਤੇ ਭਿਕ੍ਖੂ ਦਿਸ੍ਵਾ ਵਨ੍ਦਿਤ੍ਵਾ ਅਤ੍ਤਨੋ ਗੇਹਂ ਨੇਤ੍ਵਾ ਕਟਚ੍ਛੁਭਿਕ੍ਖਂ ਦਤ੍ਵਾ ਤੇਨੇਵ ਪਰਿਚਯੇਨ ਸਦ੍ਧਾਯ ਵਡ੍ਢਮਾਨਾਯ ਆਸਨਸਾਲਂ ਕਾਰੇਤ੍ਵਾ ਤਤ੍ਥ ਪਵਿਟ੍ਠਾਨਂ ਭਿਕ੍ਖੂਨਂ ਆਸਨਂ ਉਪਨੇਤਿ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਪੇਤਿ. ਯਞ੍ਚ ਓਦਨਕੁਮ੍ਮਾਸਡਾਕਾਦਿ ਅਤ੍ਤਨੋ ਗੇਹੇ ਵਿਜ੍ਜਤਿ, ਤਂ ਭਿਕ੍ਖੂਨਂ ਦੇਤਿ. ਸਾ ਭਿਕ੍ਖੂਨਂ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਯ ਸਮਾਹਿਤਾ ਹੁਤ੍ਵਾ ਵਿਪਸ੍ਸਨਾਕਮ੍ਮਟ੍ਠਾਨਂ ਉਗ੍ਗਹੇਤ੍ਵਾ ਵਿਪਸ੍ਸਨਂ ਉਸ੍ਸੁਕ੍ਕਾਪੇਨ੍ਤੀ ਉਪਨਿਸ੍ਸਯਸਮ੍ਪਨ੍ਨਤਾਯ ਨ ਚਿਰਸ੍ਸੇਵ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਮਹਤਿ ਵਿਮਾਨੇ ਨਿਬ੍ਬਤ੍ਤਿ, ਅਚ੍ਛਰਾਸਹਸ੍ਸਞ੍ਚਸ੍ਸਾ ਪਰਿਵਾਰੋ ਅਹੋਸਿ. ਸਾ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੀ ਪਮੋਦਮਾਨਾ ਵਿਚਰਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋ ‘‘ਅਭਿਕ੍ਕਨ੍ਤੇਨ ਵਣ੍ਣੇਨਾ’’ਤਿਆਦਿਗਾਥਾਹਿ ਪੁਚ੍ਛੀਤਿ ਸਬ੍ਬਂ ਵੁਤ੍ਤਨਯਮੇਵ. ਤੇਨ ਵੁਤ੍ਤਂ –

੧੭੩. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੧੭੪. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੭੫. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੭੬. ‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੭੭. ‘‘ਕੇਵਟ੍ਟਦ੍ਵਾਰਾ ਨਿਕ੍ਖਮ੍ਮ, ਅਹੁ ਮਯ੍ਹਂ ਨਿਵੇਸਨਂ;

ਤਤ੍ਥ ਸਞ੍ਚਰਮਾਨਾਨਂ, ਸਾਵਕਾਨਂ ਮਹੇਸਿਨਂ.

੧੭੮. ‘‘ਓਦਨਂ ਕੁਮ੍ਮਾਸਂ ਡਾਕਂ, ਲੋਣਸੋਵੀਰਕਞ੍ਚਹਂ;

ਅਦਾਸਿਂ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ.

੧੭੯. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

੧੮੦. ‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਸਞ੍ਞਮਾ ਸਂਵਿਭਾਗਾ ਚ, ਵਿਮਾਨਂ ਆਵਸਾਮਹਂ.

੧੮੧. ‘‘ਪਾਣਾਤਿਪਾਤਾ ਵਿਰਤਾ, ਮੁਸਾਵਾਦਾ ਚ ਸਞ੍ਞਤਾ;

ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਕਾ.

੧੮੨. ‘‘ਪਞ੍ਚਸਿਕ੍ਖਾਪਦੇ ਰਤਾ, ਅਰਿਯਸਚ੍ਚਾਨ ਕੋਵਿਦਾ;

ਉਪਾਸਿਕਾ ਚਕ੍ਖੁਮਤੋ, ਗੋਤਮਸ੍ਸ ਯਸਸ੍ਸਿਨੋ.

੧੮੩. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਮਮ ਚ, ਭਨ੍ਤੇ, ਵਚਨੇਨ ਭਗਵਤੋ ਪਾਦੇ ਸਿਰਸਾ ਵਨ੍ਦੇਯ੍ਯਾਸਿ ‘‘ਲਖੁਮਾ ਨਾਮ, ਭਨ੍ਤੇ, ਉਪਾਸਿਕਾ ਭਗਵਤੋ ਪਾਦੇ ਸਿਰਸਾ ਵਨ੍ਦਤੀ’’ਤਿ. ਅਨਚ੍ਛਰਿਯਂ ਖੋ ਪਨੇਤਂ, ਭਨ੍ਤੇ, ਯਂ ਮਂ ਭਗਵਾ ਅਞ੍ਞਤਰਸ੍ਮਿਂ ਸਾਮਞ੍ਞਫਲੇ ਬ੍ਯਾਕਰੇਯ੍ਯ. ਤਂ ਭਗਵਾ ਸਕਦਾਗਾਮਿਫਲੇ ਬ੍ਯਾਕਾਸੀਤਿ.

੧੭੭. ਤਤ੍ਥ ਕੇਵਟ੍ਟਦ੍ਵਾਰਾ ਨਿਕ੍ਖਮ੍ਮਾਤਿ ਕੇਵਟ੍ਟਦ੍ਵਾਰਤੋ ਨਿਕ੍ਖਮਨਟ੍ਠਾਨੇ.

੧੭੮. ਡਾਕਨ੍ਤਿ ਤਣ੍ਡੁਲੇਯ੍ਯਕਾਦਿਸਾਕਬ੍ਯਞ੍ਜਨਂ. ਲੋਣਸੋਵੀਰਕਨ੍ਤਿ ਧਞ੍ਞਰਸਾਦੀਹਿ ਬਹੂਹਿ ਸਮ੍ਭਾਰੇਹਿ ਸਮ੍ਪਾਦੇਤਬ੍ਬਂ ਏਕਂ ਪਾਨਕਂ. ‘‘ਆਚਾਮਕਞ੍ਜਿਕਲੋਣੂਦਕ’’ਨ੍ਤਿਪਿ ਵਦਨ੍ਤਿ.

ਪੁਚ੍ਛਾਵਿਸ੍ਸਜ੍ਜਨਾਵਸਾਨੇ ਸਾ ਥੇਰਸ੍ਸ ਧਮ੍ਮਦੇਸਨਾਯ ਸਕਦਾਗਾਮਿਫਲਂ ਪਾਪੁਣਿ. ਸੇਸਂ ਉਤ੍ਤਰਾਵਿਧਾਨੇ ਵੁਤ੍ਤਨਯਾਨੁਸਾਰੇਨ ਏਵ ਵੇਦਿਤਬ੍ਬਂ.

ਲਖੁਮਾਵਿਮਾਨਵਣ੍ਣਨਾ ਨਿਟ੍ਠਿਤਾ.

੩. ਆਚਾਮਦਾਯਿਕਾਵਿਮਾਨਵਣ੍ਣਨਾ

ਪਿਣ੍ਡਾਯ ਤੇ ਚਰਨ੍ਤਸ੍ਸਾਤਿ ਆਚਾਮਦਾਯਿਕਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਰਾਜਗਹੇ ਅਞ੍ਞਤਰਂ ਕੁਲਂ ਅਹਿਵਾਤਰੋਗੇਨ ਉਪਦ੍ਦੁਤਂ ਅਹੋਸਿ. ਤਤ੍ਥ ਸਬ੍ਬੇ ਜਨਾ ਮਤਾ ਠਪੇਤ੍ਵਾ ਏਕਂ ਇਤ੍ਥਿਂ. ਸਾ ਗੇਹਂ ਗੇਹਗਤਞ੍ਚ ਸਬ੍ਬਂ ਧਨਧਞ੍ਞਂ ਛਡ੍ਡੇਤ੍ਵਾ ਮਰਣਭਯਭੀਤਾ ਭਿਤ੍ਤਿਛਿਦ੍ਦੇਨ ਪਲਾਤਾ ਅਨਾਥਾ ਹੁਤ੍ਵਾ ਪਰਗੇਹਂ ਗਨ੍ਤ੍ਵਾ ਤਸ੍ਸ ਪਿਟ੍ਠਿਪਸ੍ਸੇ ਵਸਤਿ. ਤਸ੍ਮਿਂ ਗੇਹੇ ਮਨੁਸ੍ਸਾ ਕਰੁਣਾਯਨ੍ਤਾ ਉਕ੍ਖਲਿਆਦੀਸੁ ਅਵਸਿਟ੍ਠਂ ਯਾਗੁਭਤ੍ਤਆਚਾਮਾਦਿਂ ਤਸ੍ਸਾ ਦੇਨ੍ਤਿ. ਸਾ ਤਂ ਭੁਞ੍ਜਿਤ੍ਵਾ ਜੀਵਿਕਂ ਕਪ੍ਪੇਤਿ.

ਤੇਨ ਚ ਸਮਯੇਨ ਆਯਸ੍ਮਾ ਮਹਾਕਸ੍ਸਪੋ ਸਤ੍ਤਾਹਂ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਿਤੋ ‘‘ਕਂ ਨੁ ਖੋ ਅਹਂ ਅਜ੍ਜ ਆਹਾਰਪਟਿਗ੍ਗਹਣੇਨ ਅਨੁਗ੍ਗਹੇਸ੍ਸਾਮਿ, ਦੁਗ੍ਗਤਿਤੋ ਚ ਦੁਕ੍ਖਤੋ ਚ ਮੋਚੇਸ੍ਸਾਮੀ’’ਤਿ ਚਿਨ੍ਤੇਨ੍ਤੋ ਤਂ ਇਤ੍ਥਿਂ ਆਸਨ੍ਨਮਰਣਂ ਨਿਰਯਸਂਵਤ੍ਤਨਿਕਞ੍ਚਸ੍ਸਾ ਕਮ੍ਮਂ ਕਤੋਕਾਸਂ ਦਿਸ੍ਵਾ ‘‘ਅਯਂ ਮਯਿ ਗਤੇ ਅਤ੍ਤਨਾ ਲਦ੍ਧਂ ਆਚਾਮਂ ਦਸ੍ਸਤਿ, ਤੇਨੇਵ ਨਿਮ੍ਮਾਨਰਤਿਦੇਵਲੋਕੇ ਉਪ੍ਪਜ੍ਜਿਸ੍ਸਤਿ, ਏਵਂ ਨਿਰਯੂਪਪਤ੍ਤਿਤੋ ਮੋਚੇਤ੍ਵਾ ਹਨ੍ਦਾਹਂ ਇਮਿਸ੍ਸਾ ਸਗ੍ਗਸਮ੍ਪਤ੍ਤਿਂ ਨਿਪ੍ਫਾਦੇਸ੍ਸਾਮੀ’’ਤਿ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਂ ਆਦਾਯ ਤਸ੍ਸਾ ਨਿਵੇਸਨਟ੍ਠਾਨਾਭਿਮੁਖੋ ਗਚ੍ਛਤਿ. ਅਥ ਸਕ੍ਕੋ ਦੇਵਾਨਮਿਨ੍ਦੋ ਅਞ੍ਞਾਤਕਵੇਸੇਨ ਅਨੇਕਰਸਂ ਅਨੇਕਸੂਪਬ੍ਯਞ੍ਜਨਂ ਦਿਬ੍ਬਾਹਾਰਂ ਉਪਨੇਸਿ. ਤਂ ਞਤ੍ਵਾ ਥੇਰੋ ‘‘ਕੋਸਿਯ, ਤ੍ਵਂ ਕਤਕੁਸਲੋ, ਕਸ੍ਮਾ ਏਵਂ ਕਰੋਸਿ, ਮਾ ਦੁਗ੍ਗਤਾਨਂ ਕਪਣਾਨਂ ਸਮ੍ਪਤ੍ਤਿਂ ਵਿਲੁਮ੍ਪੀ’’ਤਿ ਪਟਿਕ੍ਖਿਪਿਤ੍ਵਾ ਤਸ੍ਸਾ ਇਤ੍ਥਿਯਾ ਪੁਰਤੋ ਅਟ੍ਠਾਸਿ.

ਸਾ ਥੇਰਂ ਦਿਸ੍ਵਾ ‘‘ਅਯਂ ਮਹਾਨੁਭਾਵੋ ਥੇਰੋ, ਇਮਸ੍ਸ ਦਾਤਬ੍ਬਯੁਤ੍ਤਕਂ ਖਾਦਨੀਯਂ ਵਾ ਭੋਜਨੀਯਂ ਵਾ ਇਧ ਨਤ੍ਥਿ, ਇਦਞ੍ਚ ਕਿਲਿਟ੍ਠਭਾਜਨਗਤਂ ਤਿਣਚੁਣ੍ਣਰਜਾਨੁਕਿਣ੍ਣਂ ਅਲੋਣਂ ਸੀਤਲਂ ਅਪ੍ਪਰਸਂ ਆਚਾਮਕਞ੍ਜਿਯਮਤ੍ਤਂ ਏਦਿਸਸ੍ਸ ਦਾਤੁਂ ਨ ਉਸ੍ਸਹਾਮੀ’’ਤਿ ਚਿਨ੍ਤੇਤ੍ਵਾ ‘‘ਅਤਿਚ੍ਛਥਾ’’ਤਿ ਆਹ. ਥੇਰੋ ਏਕਪਦਨਿਕ੍ਖੇਪਮਤ੍ਤਂ ਅਪਸਕ੍ਕਿਤ੍ਵਾ ਅਟ੍ਠਾਸਿ. ਗੇਹਵਾਸਿਨੋ ਮਨੁਸ੍ਸਾ ਭਿਕ੍ਖਂ ਉਪਨੇਸੁਂ, ਥੇਰੋ ਨ ਸਮ੍ਪਟਿਚ੍ਛਤਿ. ਸਾ ਦੁਗ੍ਗਤਿਤ੍ਥੀ ‘‘ਮਮੇਵ ਅਨੁਗ੍ਗਹਤ੍ਥਾਯ ਇਧਾਗਤੋ, ਮਮ ਸਨ੍ਤਕਮੇਵ ਪਟਿਗ੍ਗਹੇਤੁਕਾਮੋ’’ਤਿ ਞਤ੍ਵਾ ਪਸਨ੍ਨਮਾਨਸਾ ਆਦਰਜਾਤਾ ਤਂ ਆਚਾਮਂ ਥੇਰਸ੍ਸ ਪਤ੍ਤੇ ਆਕਿਰਿ. ਥੇਰੋ ਤਸ੍ਸਾ ਪਸਾਦਸਂਵਦ੍ਧਨਤ੍ਥਂ ਭੁਞ੍ਜਨਾਕਾਰਂ ਦਸ੍ਸੇਸਿ, ਮਨੁਸ੍ਸਾ ਆਸਨਂ ਪਞ੍ਞਾਪੇਸੁਂ. ਥੇਰੋ ਤਤ੍ਥ ਨਿਸੀਦਿਤ੍ਵਾ ਤਂ ਆਚਾਮਂ ਭੁਞ੍ਜਿਤ੍ਵਾ ਪਿਵਿਤ੍ਵਾ ਓਨੀਤਪਤ੍ਤਪਾਣੀ ਅਨੁਮੋਦਨਂ ਕਤ੍ਵਾ ਤਂ ਦੁਗ੍ਗਤਿਤ੍ਥਿਂ ‘‘ਤ੍ਵਂ ਇਤੋ ਤਤਿਯੇ ਅਤ੍ਤਭਾਵੇ ਮਮ ਮਾਤਾ ਅਹੋਸੀ’’ਤਿ ਵਤ੍ਵਾ ਗਤੋ. ਸਾ ਤੇਨ ਥੇਰੇ ਅਤਿਪਸਾਦਞ੍ਚ ਉਪ੍ਪਾਦੇਤ੍ਵਾ ਤਸ੍ਸਾ ਰਤ੍ਤਿਯਾ ਪਠਮਯਾਮੇ ਕਾਲਂ ਕਤ੍ਵਾ ਨਿਮ੍ਮਾਨਰਤੀਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਿ. ਅਥ ਸਕ੍ਕੋ ਦੇਵਰਾਜਾ ਤਸ੍ਸਾ ਕਾਲਕਤਭਾਵਂ ਞਤ੍ਵਾ ‘‘ਕਤ੍ਥ ਨੁ ਖੋ ਉਪ੍ਪਨ੍ਨਾ’’ਤਿ ਆਵਜ੍ਜੇਨ੍ਤੋ ਤਾਵਤਿਂਸੇਸੁ ਅਦਿਸ੍ਵਾ ਰਤ੍ਤਿਯਾ ਮਜ੍ਝਿਮਯਾਮੇ ਆਯਸ੍ਮਨ੍ਤਂ ਮਹਾਕਸ੍ਸਪਂ ਉਪਸਙ੍ਕਮਿਤ੍ਵਾ ਤਸ੍ਸਾ ਨਿਬ੍ਬਤ੍ਤਟ੍ਠਾਨਂ ਪੁਚ੍ਛਨ੍ਤੋ –

੧੮੫. ‘‘ਪਿਣ੍ਡਾਯ ਤੇ ਚਰਨ੍ਤਸ੍ਸ, ਤੁਣ੍ਹੀਭੂਤਸ੍ਸ ਤਿਟ੍ਠਤੋ;

ਦਲਿਦ੍ਦਾ ਕਪਣਾ ਨਾਰੀ, ਪਰਾਗਾਰਂ ਅਪਸ੍ਸਿਤਾ.

੧੮੬. ‘‘ਯਾ ਤੇ ਅਦਾਸਿ ਆਚਾਮਂ, ਪਸਨ੍ਨਾ ਸੇਹਿ ਪਾਣਿਭਿ;

ਸਾ ਹਿਤ੍ਵਾ ਮਾਨੁਸਂ ਦੇਹਂ, ਕਂ ਨੁ ਸਾ ਦਿਸਤਂ ਗਤਾ’’ਤਿ. –

ਦ੍ਵੇ ਗਾਥਾ ਅਭਾਸਿ.

੧੮੫. ਤਤ੍ਥ ਪਿਣ੍ਡਾਯਾਤਿ ਪਿਣ੍ਡਪਾਤਤ੍ਥਾਯ. ਤੁਣ੍ਹੀਭੂਤਸ੍ਸ ਤਿਟ੍ਠਤੋਤਿ ਇਦਂ ਪਿਣ੍ਡਾਯ ਚਰਣਾਕਾਰਦਸ੍ਸਨਂ, ਉਦ੍ਦਿਸ੍ਸ ਤਿਟ੍ਠਤੋਤਿ ਅਤ੍ਥੋ. ਦਲਿਦ੍ਦਾਤਿ ਦੁਗ੍ਗਤਾ. ਕਪਣਾਤਿ ਵਰਾਕੀ. ‘‘ਦਲਿਦ੍ਦਾ’’ਤਿ ਇਮਿਨਾ ਤਸ੍ਸਾ ਭੋਗਪਾਰਿਜੁਞ੍ਞਂ ਦਸ੍ਸੇਤਿ, ‘‘ਕਪਣਾ’’ਤਿ ਇਮਿਨਾ ਞਾਤਿਪਾਰਿਜੁਞ੍ਞਂ. ਪਰਾਗਾਰਂ ਅਪਸ੍ਸਿਤਾਤਿ ਪਰਗੇਹਂ ਨਿਸ੍ਸਿਤਾ, ਪਰੇਸਂ ਘਰੇ ਬਹਿਪਿਟ੍ਠਿਛਦਨਂ ਨਿਸ੍ਸਾਯ ਵਸਨ੍ਤੀ.

੧੮੬. ਕਂ ਨੁ ਸਾ ਦਿਸਤਂ ਗਤਾਤਿ ਛਸੁ ਕਾਮਦੇਵਲੋਕੇਸੁ ਉਪ੍ਪਜ੍ਜਨਵਸੇਨ ਕਂ ਨਾਮ ਦਿਸਂ ਗਤਾ. ਇਤਿ ਸਕ੍ਕੋ ‘‘ਥੇਰੇਨ ਤਥਾ ਕਤਾਨੁਗ੍ਗਹਾ ਉਲ਼ਾਰਾਯ ਦਿਬ੍ਬਸਮ੍ਪਤ੍ਤਿਯਾ ਭਾਗਿਨੀ, ਨ ਚ ਦਿਸ੍ਸਤੀ’’ਤਿ ਹੇਟ੍ਠਾ ਦ੍ਵੀਸੁ ਦੇਵਲੋਕੇਸੁ ਅਪਸ੍ਸਨ੍ਤੋ ਸਂਸਯਾਪਨ੍ਨੋ ਪੁਚ੍ਛਤਿ.

ਅਥਸ੍ਸ ਥੇਰੋ –

੧੮੭. ‘‘ਪਿਣ੍ਡਾਯ ਮੇ ਚਰਨ੍ਤਸ੍ਸ, ਤੁਣ੍ਹੀਭੂਤਸ੍ਸ ਤਿਟ੍ਠਤੋ;

ਦਲਿਦ੍ਦਾ ਕਪਣਾ ਨਾਰੀ, ਪਰਾਗਾਰਂ ਅਪਸ੍ਸਿਤਾ.

੧੮੮. ‘‘ਯਾ ਮੇ ਅਦਾਸਿ ਆਚਾਮਂ, ਪਸਨ੍ਨਾ ਸੇਹਿ ਪਾਣਿਭਿ;

ਸਾ ਹਿਤ੍ਵਾ ਮਾਨੁਸਂ ਦੇਹਂ, ਵਿਪ੍ਪਮੁਤ੍ਤਾ ਇਤੋ ਚੁਤਾ.

੧੮੯. ‘‘ਨਿਮ੍ਮਾਨਰਤਿਨੋ ਨਾਮ, ਸਨ੍ਤਿ ਦੇਵਾ ਮਹਿਦ੍ਧਿਕਾ;

ਤਤ੍ਥ ਸਾ ਸੁਖਿਤਾ ਨਾਰੀ, ਮੋਦਤਾਚਾਮਦਾਯਿਕਾ’’ਤਿ. –

ਪੁਚ੍ਛਿਤਨਿਯਾਮੇਨੇਵ ਪਟਿਵਚਨਂ ਦੇਨ੍ਤੋ ਤਸ੍ਸਾ ਨਿਬ੍ਬਤ੍ਤਟ੍ਠਾਨਂ ਕਥੇਸਿ.

੧੮੮. ਤਤ੍ਥ ਵਿਪ੍ਪਮੁਤ੍ਤਾਤਿ ਤਤੋ ਮਨੁਸ੍ਸਦੋਭਗ੍ਗਿਯਤੋ ਪਰਮਕਾਰੁਞ੍ਞਵੁਤ੍ਤਿਤੋ ਵਿਪ੍ਪਮੁਤ੍ਤਾ ਅਪਗਤਾ.

੧੮੯. ਮੋਦਤਾਚਾਮਦਾਯਿਕਾਤਿ ਆਚਾਮਮਤ੍ਤਦਾਯਿਕਾ, ਸਾਪਿ ਨਾਮ ਪਞ੍ਚਮੇ ਕਾਮਸਗ੍ਗੇ ਦਿਬ੍ਬਸਮ੍ਪਤ੍ਤਿਯਾ ਮੋਦਤਿ, ਪਸ੍ਸ ਤਾਵ ਖੇਤ੍ਤਸਮ੍ਪਤ੍ਤਿਫਲਨ੍ਤਿ ਦਸ੍ਸੇਤਿ.

ਪੁਨ ਸਕ੍ਕੋ ਤਸ੍ਸਾ ਦਾਨਸ੍ਸ ਮਹਪ੍ਫਲਤਂ ਮਹਾਨਿਸਂਸਤਞ੍ਚ ਸੁਤ੍ਵਾ ਤਂ ਥੋਮੇਨ੍ਤੋ –

੧੯੦. ‘‘ਅਹੋ ਦਾਨਂ ਵਰਾਕਿਯਾ, ਕਸ੍ਸਪੇ ਸੁਪ੍ਪਤਿਟ੍ਠਿਤਂ;

ਪਰਾਭਤੇਨ ਦਾਨੇਨ, ਇਜ੍ਝਿਤ੍ਥ ਵਤ ਦਕ੍ਖਿਣਾ.

੧੯੧. ‘‘ਯਾ ਮਹੇਸਿਤ੍ਤਂ ਕਾਰੇਯ੍ਯ, ਚਕ੍ਕਵਤ੍ਤਿਸ੍ਸ ਰਾਜਿਨੋ;

ਨਾਰੀ ਸਬ੍ਬਙ੍ਗਕਲ੍ਯਾਣੀ, ਭਤ੍ਤੁ ਚਾਨੋਮਦਸ੍ਸਿਕਾ;

ਏਤਸ੍ਸਾਚਾਮਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿਂ.

੧੯੨. ‘‘ਸੁਤਂ ਨਿਕ੍ਖਾ ਸਤਂ ਅਸ੍ਸਾ, ਸਤਂ ਅਸ੍ਸਤਰੀਰਥਾ;

ਸਤਂ ਕਞ੍ਞਾਸਹਸ੍ਸਾਨਿ, ਆਮੁਤ੍ਤਮਣਿਕੁਣ੍ਡਲਾ;

ਏਤਸ੍ਸਾਚਾਮਦਾਨਸ੍ਸ, ਕਲਂ ਨਾਗ੍ਘਨ੍ਤਿ ਸੋਲ਼ਸਿਂ.

੧੯੩. ‘‘ਸਤਂ ਹੇਮਵਤਾ ਨਾਗਾ, ਈਸਾਦਨ੍ਤਾ ਉਰੂਲ਼੍ਹਵਾ;

ਸੁਵਣ੍ਣਕਚ੍ਛਾ ਮਿਤਙ੍ਗਾ, ਹੇਮਕਪ੍ਪਨਵਾਸਸਾ;

ਏਤਸ੍ਸਾਚਾਮਦਾਨਸ੍ਸ, ਕਲਂ ਨਾਗਚ੍ਛਨ੍ਤਿ ਸੋਲ਼ਸਿਂ.

੧੯੪. ‘‘ਚਤੁਨ੍ਨਮਪਿ ਦੀਪਾਨਂ, ਇਸ੍ਸਰਂ ਯੋਧ ਕਾਰਯੇ;

ਏਤਸ੍ਸਾਚਾਮਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿ’’ਨ੍ਤਿ. – ਆਹ;

੧੯੦. ਤਤ੍ਥ ਅਹੋਤਿ ਅਚ੍ਛਰਿਯਤ੍ਥੇ ਨਿਪਾਤੋ. ਵਰਾਕਿਯਾਤਿ ਕਪਣਿਯਾ. ਪਰਾਭਤੇਨਾਤਿ ਪਰਤੋ ਆਨੀਤੇਨ, ਪਰੇਸਂ ਘਰਤੋ ਉਚ੍ਛਾਚਰਿਯਾਯ ਲਦ੍ਧੇਨਾਤਿ ਅਤ੍ਥੋ. ਦਾਨੇਨਾਤਿ ਦਾਤਬ੍ਬੇਨ ਆਚਾਮਮਤ੍ਤੇਨ ਦੇਯ੍ਯਧਮ੍ਮੇਨ. ਇਜ੍ਝਿਤ੍ਥ ਵਤ ਦਕ੍ਖਿਣਾਤਿ ਦਕ੍ਖਿਣਾ ਦਾਨਂ ਅਹੋ ਨਿਪ੍ਫਜ੍ਜਿਤ੍ਥ, ਅਹੋ ਮਹਪ੍ਫਲਾ ਮਹਾਜੁਤਿਕਾ ਮਹਾਵਿਪ੍ਫਾਰਾ ਅਹੁਵਤ੍ਥਾਤਿ ਅਤ੍ਥੋ.

੧੯੧. ਇਦਾਨਿ ‘‘ਇਤ੍ਥਿਰਤਨਾਦੀਨਿਪਿ ਤਸ੍ਸ ਦਾਨਸ੍ਸ ਸਤਭਾਗਮ੍ਪਿ ਸਹਸ੍ਸਭਾਗਮ੍ਪਿ ਨ ਉਪੇਨ੍ਤੀ’’ਤਿ ਦਸ੍ਸੇਤੁਂ ‘‘ਯਾ ਮਹੇਸਿਤ੍ਤਂ ਕਾਰੇਯ੍ਯਾ’’ਤਿਆਦਿ ਵੁਤ੍ਤਂ. ਤਤ੍ਥ ਸਬ੍ਬਙ੍ਗਕਲ੍ਯਾਣੀਤਿ ‘‘ਨਾਤਿਦੀਘਾ ਨਾਤਿਰਸ੍ਸਾ ਨਾਤਿਕਿਸਾ ਨਾਤਿਥੂਲਾ ਨਾਤਿਕਾਲ਼ੀ ਨਾਚ੍ਚੋਦਾਤਾ ਅਤਿਕ੍ਕਨ੍ਤਾ ਮਾਨੁਸਵਣ੍ਣਂ ਅਪ੍ਪਤ੍ਤਾ ਦਿਬ੍ਬਵਣ੍ਣ’’ਨ੍ਤਿ ਏਵਂ ਵੁਤ੍ਤੇਹਿ ਸਬ੍ਬੇਹਿ ਅਙ੍ਗੇਹਿ ਕਾਰਣੇਹਿ, ਸਬ੍ਬੇਹਿ ਵਾ ਅਙ੍ਗਪਚ੍ਚਙ੍ਗੇਹਿ ਕਲ੍ਯਾਣੀ ਸੋਭਨਾ ਸੁਨ੍ਦਰਾ. ਭਤ੍ਤੁ ਚਾਨੋਮਦਸ੍ਸਿਕਾਤਿ ਸਾਮਿਕਸ੍ਸ ਅਲਾਮਕਦਸ੍ਸਨਾ ਸਾਤਿਸਯਂ ਦਸ੍ਸਨੀਯਾ ਪਾਸਾਦਿਕਾ. ਏਤਸ੍ਸਾਚਾਮਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿਨ੍ਤਿ ਏਤਸ੍ਸ ਏਤਾਯ ਦਿਨ੍ਨਸ੍ਸ ਆਚਾਮਦਾਨਸ੍ਸ ਫਲਂ ਸੋਲ਼ਸਭਾਗਂ ਕਤ੍ਵਾ ਤਤੋ ਏਕਂ ਭਾਗਂ ਪੁਨ ਸੋਲ਼ਸਭਾਗਂ ਕਤ੍ਵਾ ਗਹਿਤਭਾਗਸਙ੍ਖਾਤਂ ਸੋਲ਼ਸਿਂ ਕਲਂ ਚਕ੍ਕਵਤ੍ਤਿਰਞ੍ਞੋ ਇਤ੍ਥਿਰਤਨਭਾਵੋਪਿ ਨਾਗ੍ਘਤਿ ਨਾਨੁਭੋਤਿ ਨ ਪਾਪੁਣਾਤਿ. ‘‘ਸੁਵਣ੍ਣਸ੍ਸ ਪਞ੍ਚਦਸਧਰਣਂ ਨਿਕ੍ਖ’’ਨ੍ਤਿ ਵਦਨ੍ਤਿ, ‘‘ਸਤਧਰਣ’’ਨ੍ਤਿ ਅਪਰੇ.

੧੯੩. ਹੇਮਵਤਾਤਿ ਹਿਮਵਤਿ ਜਾਤਾ, ਹੇਮਵਤਜਾਤਿਕਾ ਵਾ. ਤੇ ਹਿ ਮਹਨ੍ਤਾ ਥਾਮਜਵਸਮ੍ਪਨ੍ਨਾ ਚ ਹੋਨ੍ਤਿ. ਈਸਾਦਨ੍ਤਾਤਿ ਰਥੀਸਾਸਦਿਸਦਨ੍ਤਾ, ਥੋਕਂਯੇਵ ਅਵਨਤਦਨ੍ਤਾਤਿ ਅਤ੍ਥੋ. ਤੇਨ ਵਿਸਾਲਕਦਾਠੀਭਾਵਂ ਨਿਵਾਰੇਤਿ. ਉਰੂਲ਼੍ਹਵਾਤਿ ਥਾਮਜਵਪਰਕ੍ਕਮੇਹਿ ਬ੍ਰੂਹਨ੍ਤੋ, ਮਹਨ੍ਤਂ ਯੁਦ੍ਧਕਿਚ੍ਚਂ ਵਹਿਤੁਂ ਸਮਤ੍ਥਾਤਿ ਅਤ੍ਥੋ. ਸੁਵਣ੍ਣਕਚ੍ਛਾਤਿ ਹੇਮਮਯਗੀਵੇਯ੍ਯਕਪਟਿਮੁਕ੍ਕਾ. ਕਚ੍ਛਸੀਸੇਨ ਹਿ ਸਬ੍ਬਂ ਹਤ੍ਥਿਯੋਗ੍ਗਂ ਵਦਤਿ. ਹੇਮਕਪ੍ਪਨਵਾਸਸਾਤਿ ਸੁਵਣ੍ਣਖਚਿਤਗਜਤ੍ਥਰਣਕਙ੍ਕਨਾਦਿਹਤ੍ਥਾਲਙ੍ਕਾਰਸਮ੍ਪਨ੍ਨਾ.

੧੯੪. ਚਤੁਨ੍ਨਮਪਿ ਦੀਪਾਨਂ ਇਸ੍ਸਰਨ੍ਤਿ ਦ੍ਵਿਸਹਸ੍ਸਪਰਿਤ੍ਤਦੀਪਪਰਿਵਾਰਾਨਂ ਜਮ੍ਬੁਦੀਪਾਦੀਨਂ ਚਤੁਨ੍ਨਂ ਮਹਾਦੀਪਾਨਂ ਇਸ੍ਸਰਿਯਂ. ਤੇਨ ਸਤ੍ਤਰਤਨਸਮੁਜ੍ਜਲਂ ਸਕਲਂ ਚਕ੍ਕਵਤ੍ਤਿਸਿਰਿਂ ਵਦਤਿ. ਯਂ ਪਨੇਤ੍ਥ, ਤਂ ਹੇਟ੍ਠਾ ਵੁਤ੍ਤਨਯਮੇਵ.

ਇਧ ਸਕ੍ਕੇਨ ਦੇਵਰਾਜੇਨ ਅਤ੍ਤਨਾ ਚ ਵੁਤ੍ਤਂ ਸਬ੍ਬਂ ਆਯਸ੍ਮਾ ਮਹਾਕਸ੍ਸਪਤ੍ਥੇਰੋ ਭਗਵਤੋ ਆਰੋਚੇਸਿ. ਭਗਵਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਆਚਾਮਦਾਯਿਕਾਵਿਮਾਨਵਣ੍ਣਨਾ ਨਿਟ੍ਠਿਤਾ.

੪. ਚਣ੍ਡਾਲਿਵਿਮਾਨਵਣ੍ਣਨਾ

ਚਣ੍ਡਾਲਿ ਵਨ੍ਦ ਪਾਦਾਨੀਤਿ ਚਣ੍ਡਾਲਿਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਨ੍ਤੋ ਪਚ੍ਚੂਸਵੇਲਾਯਂ ਬੁਦ੍ਧਾਚਿਣ੍ਣਂ ਮਹਾਕਰੁਣਾਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਉਟ੍ਠਾਯ ਲੋਕਂ ਓਲੋਕੇਨ੍ਤੋ ਅਦ੍ਦਸ ਤਸ੍ਮਿਂਯੇਵ ਨਗਰੇ ਚਣ੍ਡਾਲਾਵਸਥੇ ਵਸਨ੍ਤਿਂ ਏਕਂ ਮਹਲ੍ਲਿਕਂ ਚਣ੍ਡਾਲਿਂ ਖੀਣਾਯੁਕਂ, ਨਿਰਯਸਂਵਤ੍ਤਨਿਕਞ੍ਚਸ੍ਸਾ ਕਮ੍ਮਂ ਉਪਟ੍ਠਿਤਂ. ਸੋ ਮਹਾਕਰੁਣਾਯ ਸਮੁਸ੍ਸਾਹਿਤਮਾਨਸੋ ‘‘ਸਗ੍ਗਸਂਵਤ੍ਤਨਿਕਂ ਕਮ੍ਮਂ ਕਾਰੇਤ੍ਵਾ ਤੇਨਸ੍ਸਾ ਨਿਰਯੂਪਪਤ੍ਤਿਂ ਨਿਸੇਧੇਤ੍ਵਾ ਸਗ੍ਗੇ ਪਤਿਟ੍ਠਾਪੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਰਾਜਗਹਂ ਪਿਣ੍ਡਾਯ ਪਵਿਸਤਿ. ਤੇਨ ਚ ਸਮਯੇਨ ਸਾ ਚਣ੍ਡਾਲੀ ਦਣ੍ਡਂ ਓਲੁਬ੍ਭ ਨਗਰਤੋ ਨਿਕ੍ਖਮਨ੍ਤੀ ਭਗਵਨ੍ਤਂ ਆਗਚ੍ਛਨ੍ਤਂ ਦਿਸ੍ਵਾ ਅਭਿਮੁਖੀ ਹੁਤ੍ਵਾ ਅਟ੍ਠਾਸਿ. ਭਗਵਾਪਿ ਤਸ੍ਸਾ ਗਮਨਂ ਨਿਵਾਰੇਨ੍ਤੋ ਵਿਯ ਪੁਰਤੋ ਅਟ੍ਠਾਸਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਸਤ੍ਥੁ ਚਿਤ੍ਤਂ ਞਤ੍ਵਾ ਤਸ੍ਸਾ ਚ ਆਯੁਪਰਿਕ੍ਖਯਂ ਭਗਵਤੋ ਵਨ੍ਦਨਾਯ ਤਂ ਨਿਯੋਜੇਨ੍ਤੋ –

੧੯੫. ‘‘ਚਣ੍ਡਾਲਿ ਵਨ੍ਦ ਪਾਦਾਨਿ, ਗੋਤਮਸ੍ਸ ਯਸਸ੍ਸਿਨੋ;

ਤਮੇਵ ਅਨੁਕਮ੍ਪਾਯ, ਅਟ੍ਠਾਸਿ ਇਸਿਸਤ੍ਤਮੋ.

੧੯੬. ‘‘ਅਭਿਪ੍ਪਸਾਦੇਹਿ ਮਨਂ, ਅਰਹਨ੍ਤਮ੍ਹਿ ਤਾਦਿਨਿ;

ਖਿਪ੍ਪਂ ਪਞ੍ਜਲਿਕਾ ਵਨ੍ਦ, ਪਰਿਤ੍ਤਂ ਤਵ ਜੀਵਿਤ’’ਨ੍ਤਿ. – ਗਾਥਾਦ੍ਵਯਮਾਹ;

੧੯੫. ਤਤ੍ਥ ਚਣ੍ਡਾਲੀਤਿ ਜਾਤਿਆਗਤੇਨ ਨਾਮੇਨ ਤਂ ਆਲਪਤਿ. ਵਨ੍ਦਾਤਿ ਅਭਿਵਾਦਯ. ਪਾਦਾਨੀਤਿ ਸਦੇਵਕਸ੍ਸ ਲੋਕਸ੍ਸ ਸਰਣਾਨਿ ਚਰਣਾਨਿ. ਤਮੇਵ ਅਨੁਕਮ੍ਪਾਯਾਤਿ ਤਮੇਵ ਅਨੁਗ੍ਗਣ੍ਹਨਤ੍ਥਂ, ਅਪਾਯੂਪਪਤ੍ਤਿਤੋ ਨਿਸੇਧੇਤ੍ਵਾ ਸਗ੍ਗੇ ਨਿਬ੍ਬਤ੍ਤਾਪਨਤ੍ਥਨ੍ਤਿ ਅਧਿਪ੍ਪਾਯੋ. ਅਟ੍ਠਾਸੀਤਿ ਨਗਰਮ੍ਪਿ ਅਪਵਿਸਿਤ੍ਵਾ ਠਿਤੋ. ਇਸਿਸਤ੍ਤਮੋਤਿ ਲੋਕਿਯਸੇਕ੍ਖਾਸੇਕ੍ਖਪਚ੍ਚੇਕਬੁਦ੍ਧਇਸੀਹਿ ਉਤ੍ਤਮੋ ਉਕ੍ਕਟ੍ਠਤਮੋ, ਅਥ ਵਾ ਬੁਦ੍ਧਇਸੀਨਂ ਵਿਪਸ੍ਸਿਆਦੀਨਂ ਸਤ੍ਤਮੋਤਿ ਇਸਿਸਤ੍ਤਮੋ.

੧੯੬. ਅਭਿਪ੍ਪਸਾਦੇਹਿ ਮਨਨ੍ਤਿ ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ’’ਤਿ ਤਵ ਚਿਤ੍ਤਂ ਪਸਾਦੇਹਿ. ਅਰਹਨ੍ਤਮ੍ਹਿ ਤਾਦਿਨੀਤਿ ਆਰਕਤ੍ਤਾ ਕਿਲੇਸਾਨਂ, ਤੇਸਂਯੇਵ ਅਰੀਨਂ ਹਤਤ੍ਤਾ, ਸਂਸਾਰਚਕ੍ਕਸ੍ਸ ਅਰਾਨਂ ਹਤਤ੍ਤਾ, ਪਚ੍ਚਯਾਨਂ ਅਰਹਤ੍ਤਾ, ਪਾਪਕਰਣੇ ਰਹਾਭਾਵਾ ਚ ਅਰਹਨ੍ਤੇ, ਇਟ੍ਠਾਦੀਸੁ ਤਾਦਿਭਾਵਪ੍ਪਤ੍ਤਿਯਾ ਤਾਦਿਮ੍ਹਿ. ਖਿਪ੍ਪਂ ਪਞ੍ਜਲਿਕਾ ਵਨ੍ਦਾਤਿ ਸੀਘਂਯੇਵ ਪਗ੍ਗਹਿਤਅਞ੍ਜਲਿਕਾ ਹੁਤ੍ਵਾ ਵਨ੍ਦਸ੍ਸੁ. ਕਸ੍ਮਾਤਿ ਚੇ? ਪਰਿਤ੍ਤਂ ਤਵ ਜੀਵਿਤਨ੍ਤਿ, ਇਦਾਨੇਵ ਭਿਜ੍ਜਨਸਭਾਵਤ੍ਤਾ ਪਰਿਤ੍ਤਂ ਅਤਿਇਤ੍ਤਰਂ.

ਇਤਿ ਥੇਰੋ ਗਾਥਾਦ੍ਵਯੇਨ ਭਗਵਤੋ ਗੁਣੇ ਪਕਿਤ੍ਤੇਨ੍ਤੋ ਅਤ੍ਤਨੋ ਆਨੁਭਾਵੇ ਠਤ੍ਵਾ ਤਸ੍ਸਾ ਚ ਖੀਣਾਯੁਕਤਾਵਿਭਾਵਨੇਨ ਸਂਵੇਜੇਨ੍ਤੋ ਸਤ੍ਥੁ ਵਨ੍ਦਨਾਯ ਨਿਯੋਜੇਸਿ. ਸਾ ਚ ਤਂ ਸੁਤ੍ਵਾ ਸਂਵੇਗਜਾਤਾ ਸਤ੍ਥਰਿ ਪਸਨ੍ਨਮਾਨਸਾਵ ਹੁਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਅਞ੍ਜਲਿਂ ਕਤ੍ਵਾ ਨਮਸ੍ਸਮਾਨਾ ਬੁਦ੍ਧਗਤਾਯ ਪੀਤਿਯਾ ਏਕਗ੍ਗਚਿਤ੍ਤਾ ਹੁਤ੍ਵਾ ਅਟ੍ਠਾਸਿ. ਭਗਵਾ ‘‘ਅਲਮੇਤ੍ਤਕਮੇਤਿਸ੍ਸਾ ਸਗ੍ਗੂਪਪਤ੍ਤਿਯਾ’’ਤਿ ਨਗਰਂ ਪਾਵਿਸਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਨਂ ਏਕਾ ਭਨ੍ਤਾ ਗਾਵੀ ਤਰੁਣਵਚ੍ਛਾ ਤਤੋ ਏਵ ਅਭਿਧਾਵਨ੍ਤੀ ਸਿਙ੍ਗੇਨ ਪਹਰਿਤ੍ਵਾ ਜੀਵਿਤਾ ਵੋਰੋਪੇਸਿ. ਤਂ ਸਬ੍ਬਂ ਦਸ੍ਸੇਤੁਂ ਸਙ੍ਗੀਤਿਕਾਰਾ –

੧੯੭. ‘‘ਚੋਦਿਤਾ ਭਾਵਿਤਤ੍ਤੇਨ, ਸਰੀਰਨ੍ਤਿਮਧਾਰਿਨਾ;

ਚਣ੍ਡਾਲੀ ਵਨ੍ਦਿ ਪਾਦਾਨਿ, ਗੋਤਮਸ੍ਸ ਯਸਸ੍ਸਿਨੋ.

੧੯੮. ‘‘ਤਮੇਨਂ ਅਵਧੀ ਗਾਵੀ, ਚਣ੍ਡਾਲਿਂ ਪਞ੍ਜਲਿਂ ਠਿਤਂ;

ਨਮਸ੍ਸਮਾਨਂ ਸਮ੍ਬੁਦ੍ਧਂ, ਅਨ੍ਧਕਾਰੇ ਪਭਙ੍ਕਰ’’ਨ੍ਤਿ. – ਗਾਥਾਦ੍ਵਯਮਾਹਂਸੁ;

੧੯੮. ਤਤ੍ਥ ਪਞ੍ਜਲਿਂ ਠਿਤਂ ਨਮਸ੍ਸਮਾਨਂ ਸਮ੍ਬੁਦ੍ਧਨ੍ਤਿ ਗਤੇਪਿ ਭਗਵਤਿ ਬੁਦ੍ਧਾਰਮ੍ਮਣਾਯ ਪੀਤਿਯਾ ਸਮਾਹਿਤਾ ਹੁਤ੍ਵਾ ਸਮ੍ਮੁਖਾ ਵਿਯ ਅਞ੍ਜਲਿਂ ਪਗ੍ਗਯ੍ਹ ਨਮਸ੍ਸਮਾਨਂ ਠਿਤਂ. ਅਨ੍ਧਕਾਰੇਤਿ ਅਵਿਜ੍ਜਨ੍ਧਕਾਰੇਨ ਸਕਲੇਨ ਕਿਲੇਸਨ੍ਧਕਾਰੇਨ ਚ ਅਨ੍ਧਕਾਰੇ ਲੋਕੇ. ਪਭਙ੍ਕਰਨ੍ਤਿ ਞਾਣੋਭਾਸਕਰਂ.

ਸਾ ਚ ਤਤੋ ਚੁਤਾ ਤਾਵਤਿਂਸੇਸੁ ਨਿਬ੍ਬਤ੍ਤਿ, ਅਚ੍ਛਰਾਨਂ ਸਤਸਹਸ੍ਸਂ ਚਸ੍ਸਾ ਪਰਿਵਾਰੋ ਅਹੋਸਿ. ਤਦਹੇਵ ਚ ਸਾ ਸਹ ਵਿਮਾਨੇਨ ਆਗਨ੍ਤ੍ਵਾ ਵਿਮਾਨਤੋ ਓਤਰਿਤ੍ਵਾ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਉਪਸਙ੍ਕਮਿਤ੍ਵਾ ਵਨ੍ਦਿ. ਤਮਤ੍ਥਂ ਦਸ੍ਸੇਤੁਂ –

੧੯੯. ‘‘ਖੀਣਾਸਵਂ ਵਿਗਤਰਜਂ ਅਨੇਜਂ, ਏਕਂ ਅਰਞ੍ਞਮ੍ਹਿ ਰਹੋ ਨਿਸਿਨ੍ਨਂ;

ਦੇਵਿਦ੍ਧਿਪਤ੍ਤਾ ਉਪਸਙ੍ਕਮਿਤ੍ਵਾ, ਵਨ੍ਦਾਮਿ ਤਂ ਵੀਰ ਮਹਾਨੁਭਾਵ’’ਨ੍ਤਿ. –

ਦੇਵਤਾ ਆਹ. ਤਂ ਥੇਰੋ ਪੁਚ੍ਛਿ –

੨੦੦. ‘‘ਸੁਵਣ੍ਣਵਣ੍ਣਾ ਜਲਿਤਾ ਮਹਾਯਸਾ, ਵਿਮਾਨਮੋਰੁਯ੍ਹ ਅਨੇਕਚਿਤ੍ਤਾ;

ਪਰਿਵਾਰਿਤਾ ਅਚ੍ਛਰਾਸਙ੍ਗਣੇਨ, ਕਾ ਤ੍ਵਂ ਸੁਭੇ ਦੇਵਤੇ ਵਨ੍ਦਸੇ ਮਮ’’ਨ੍ਤਿ.

੨੦੦. ਤਤ੍ਥ ਜਲਿਤਾਤਿ ਅਤ੍ਤਨੋ ਸਰੀਰਪ੍ਪਭਾਯ ਵਤ੍ਥਾਭਰਣਾਦੀਨਂ ਓਭਾਸੇਨ ਚ ਜਲਨ੍ਤੀ ਜੋਤੇਨ੍ਤੀ. ਮਹਾਯਸਾਤਿ ਮਹਾਪਰਿਵਾਰਾ. ਵਿਮਾਨਮੋਰੁਯ੍ਹਾਤਿ ਵਿਮਾਨਤੋ ਓਰੁਯ੍ਹ. ਅਨੇਕਚਿਤ੍ਤਾਤਿ ਅਨੇਕਵਿਧਚਿਤ੍ਤਤਾਯੁਤ੍ਤਾ. ਸੁਭੇਤਿ ਸੁਭਗੁਣੇ. ਮਮਨ੍ਤਿ ਮਂ.

ਏਵਂ ਥੇਰੇਨ ਪੁਚ੍ਛਿਤਾ ਪੁਨ ਸਾ –

੨੦੧. ‘‘ਅਹਂ ਭਦ੍ਦਨ੍ਤੇ ਚਣ੍ਡਾਲੀ, ਤਯਾ ਵੀਰੇਨ ਪੇਸਿਤਾ;

ਵਨ੍ਦਿਂ ਅਰਹਤੋ ਪਾਦੇ, ਗੋਤਮਸ੍ਸ ਯਸਸ੍ਸਿਨੋ.

੨੦੨. ‘‘ਸਾਹਂ ਵਨ੍ਦਿਤ੍ਵਾ ਪਾਦਾਨਿ, ਚੁਤਾ ਚਣ੍ਡਾਲਯੋਨਿਯਾ;

ਵਿਮਾਨਂ ਸਬ੍ਬਤੋ ਭਦ੍ਦਂ, ਉਪਪਨ੍ਨਮ੍ਹਿ ਨਨ੍ਦਨੇ.