੯. ਭਦ੍ਦਾਕੁਣ੍ਡਲਕੇਸਾਥੇਰੀਗਾਥਾਵਣ੍ਣਨਾ

ਲੂਨਕੇਸੀਤਿਆਦਿਕਾ ਭਦ੍ਦਾਯ ਕੁਣ੍ਡਲਕੇਸਾਯ ਥੇਰਿਯਾ ਗਾਥਾ. ਅਯਮ੍ਪਿ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਵਾ ਏਕਦਿਵਸਂ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤੀ ਸਤ੍ਥਾਰਂ ਏਕਂ ਭਿਕ੍ਖੁਨਿਂ ਖਿਪ੍ਪਾਭਿਞ੍ਞਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ, ਅਧਿਕਾਰਕਮ੍ਮਂ ਕਤ੍ਵਾ ਤਂ ਠਾਨਨ੍ਤਰਂ ਪਤ੍ਥੇਤ੍ਵਾ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਕਸ੍ਸਪਬੁਦ੍ਧਕਾਲੇ ਕਿਕਿਸ੍ਸ ਕਾਸਿਰਞ੍ਞੋ ਗੇਹੇ ਸਤ੍ਤਨ੍ਨਂ ਭਗਿਨੀਨਂ ਅਬ੍ਭਨ੍ਤਰਾ ਹੁਤ੍ਵਾ, ਵੀਸਤਿ ਵਸ੍ਸਸਹਸ੍ਸਾਨਿ ਦਸ ਸੀਲਾਨਿ ਸਮਾਦਾਯ ਕੋਮਾਰਿਬ੍ਰਹ੍ਮਚਰਿਯਂ ਚਰਨ੍ਤੀ ਸਙ੍ਘਸ੍ਸ ਵਸਨਪਰਿਵੇਣਂ ਕਾਰੇਤ੍ਵਾ, ਏਕਂ ਬੁਦ੍ਧਨ੍ਤਰਂ ਸੁਗਤੀਸੁਯੇਵ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਸੇਟ੍ਠਿਕੁਲੇ ਨਿਬ੍ਬਤ੍ਤਿ. ਭਦ੍ਦਾਤਿਸ੍ਸਾ ਨਾਮਂ ਅਹੋਸਿ. ਸਾ ਮਹਤਾ ਪਰਿਵਾਰੇਨ ਵਡ੍ਢਮਾਨਾ ਵਯਪ੍ਪਤ੍ਤਾ, ਤਸ੍ਮਿਂਯੇਵ ਨਗਰੇ ਪੁਰੋਹਿਤਸ੍ਸ ਪੁਤ੍ਤਂ ਸਤ੍ਤੁਕਂ ਨਾਮ ਚੋਰਂ ਸਹੋਡ੍ਢਂ ਗਹੇਤ੍ਵਾ ਰਾਜਾਣਾਯ ਨਗਰਗੁਤ੍ਤਿਕੇਨ ਮਾਰੇਤੁਂ ਆਘਾਤਨਂ ਨਿਯ੍ਯਮਾਨਂ, ਸੀਹਪਞ੍ਜਰੇਨ ਓਲੋਕੇਨ੍ਤੀ ਦਿਸ੍ਵਾ ਪਟਿਬਦ੍ਧਚਿਤ੍ਤਾ ਹੁਤ੍ਵਾ ਸਚੇ ਤਂ ਲਭਾਮਿ, ਜੀਵਿਸ੍ਸਾਮਿ; ਨੋ ਚੇ, ਮਰਿਸ੍ਸਾਮੀਤਿ ਸਯਨੇ ਅਧੋਮੁਖੀ ਨਿਪਜ੍ਜਿ.

ਅਥਸ੍ਸਾ ਪਿਤਾ ਤਂ ਪਵਤ੍ਤਿਂ ਸੁਤ੍ਵਾ ਏਕਧੀਤੁਤਾਯ ਬਲਵਸਿਨੇਹੋ ਸਹਸ੍ਸਲਞ੍ਜਂ ਦਤ੍ਵਾ ਉਪਾਯੇਨੇਵ ਚੋਰਂ ਵਿਸ੍ਸਜ੍ਜਾਪੇਤ੍ਵਾ ਗਨ੍ਧੋਦਕੇਨ ਨ੍ਹਾਪੇਤ੍ਵਾ ਸਬ੍ਬਾਭਰਣਪਟਿਮਣ੍ਡਿਤਂ ਕਾਰੇਤ੍ਵਾ ਪਾਸਾਦਂ ਪੇਸੇਸਿ. ਭਦ੍ਦਾਪਿ ਪਰਿਪੁਣ੍ਣਮਨੋਰਥਾ ਅਤਿਰੇਕਾਲਙ੍ਕਾਰੇਨ ਅਲਙ੍ਕਰਿਤ੍ਵਾ ਤਂ ਪਰਿਚਰਤਿ. ਸਤ੍ਤੁਕੋ ਕਤਿਪਾਹਂ ਵੀਤਿਨਾਮੇਤ੍ਵਾ ਤਸ੍ਸਾ ਆਭਰਣੇਸੁ ਉਪ੍ਪਨ੍ਨਲੋਭੋ ਭਦ੍ਦੇ, ਅਹਂ ਨਗਰਗੁਤ੍ਤਿਕੇਨ ਗਹਿਤਮਤ੍ਤੋਵ ਚੋਰਪਪਾਤੇ ਅਧਿਵਤ੍ਥਾਯ ਦੇਵਤਾਯ ‘‘ਸਚਾਹਂ ਜੀਵਿਤਂ ਲਭਾਮਿ, ਤੁਯ੍ਹਂ ਬਲਿਕਮ੍ਮਂ ਉਪਸਂਹਰਿਸ੍ਸਾਮੀ’’ਤਿ ਪਤ੍ਥਨਂ ਆਯਾਚਿਂ, ਤਸ੍ਮਾ ਬਲਿਕਮ੍ਮਂ ਸਜ੍ਜਾਪੇਹੀਤਿ. ਸਾ ‘‘ਤਸ੍ਸ ਮਨਂ ਪੂਰੇਸ੍ਸਾਮੀ’’ਤਿ ਬਲਿਕਮ੍ਮਂ ਸਜ੍ਜਾਪੇਤ੍ਵਾ ਸਬ੍ਬਾਭਰਣਵਿਭੂਸਿਤਾ ਸਾਮਿਕੇਨ ਸਦ੍ਧਿਂ ਏਕਂ ਯਾਨਂ ਅਭਿਰੁਯ੍ਹ ‘‘ਦੇਵਤਾਯ ਬਲਿਕਮ੍ਮਂ ਕਰਿਸ੍ਸਾਮੀ’’ਤਿ ਚੋਰਪਪਾਤਂ ਅਭਿਰੁਹਿਤੁਂ ਆਰਦ੍ਧਾ.

ਸਤ੍ਤੁਕੋ ਚਿਨ੍ਤੇਸਿ – ‘‘ਸਬ੍ਬੇਸੁ ਅਭਿਰੁਹਨ੍ਤੇਸੁ ਇਮਿਸ੍ਸਾ ਆਭਰਣਂ ਗਹੇਤੁਂ ਨ ਸਕ੍ਕਾ’’ਤਿ ਪਰਿਵਾਰਜਨਂ ਤਤ੍ਥੇਵ ਠਪੇਤ੍ਵਾ ਤਮੇਵ ਬਲਿਭਾਜਨਂ ਗਾਹਾਪੇਤ੍ਵਾ ਪਬ੍ਬਤਂ ਅਭਿਰੁਹਨ੍ਤੋ ਤਾਯ ਸਦ੍ਧਿਂ ਪਿਯਕਥਂ ਨ ਕਥੇਸਿ. ਸਾ ਇਙ੍ਗਿਤੇਨੇਵ ਤਸ੍ਸਾਧਿਪ੍ਪਾਯਂ ਅਞ੍ਞਾਸਿ. ਸਤ੍ਤੁਕੋ, ‘‘ਭਦ੍ਦੇ, ਤਵ ਉਤ੍ਤਰਸਾਟਕਂ ਓਮੁਞ੍ਚਿਤ੍ਵਾ ਕਾਯਾਰੂਲ਼੍ਹਪਸਾਧਨਂ ਭਣ੍ਡਿਕਂ ਕਰੋਹੀ’’ਤਿ. ਸਾ, ‘‘ਸਾਮਿ, ਮਯ੍ਹਂ ਕੋ ਅਪਰਾਧੋ’’ਤਿ? ‘‘ਕਿਂ ਨੁ ਮਂ, ਬਾਲੇ,‘ਬਲਿਕਮ੍ਮਤ੍ਥਂ ਆਗਤੋ’ਤਿ ਸਞ੍ਞਂ ਕਰੋਸਿ? ਬਲਿਕਮ੍ਮਾਪਦੇਸੇਨ ਪਨ ਤਵ ਆਭਰਣਂ ਗਹੇਤੁਂ ਆਗਤੋ’’ਤਿ. ‘‘ਕਸ੍ਸ ਪਨ, ਅਯ੍ਯ, ਪਸਾਧਨਂ, ਕਸ੍ਸ ਅਹ’’ਨ੍ਤਿ? ‘‘ਨਾਹਂ ਏਤਂ ਵਿਭਾਗਂ ਜਾਨਾਮੀ’’ਤਿ. ‘‘ਹੋਤੁ, ਅਯ੍ਯ, ਏਕਂ ਪਨ ਮੇ ਅਧਿਪ੍ਪਾਯਂ ਪੂਰੇਹਿ, ਅਲਙ੍ਕਤਨਿਯਾਮੇਨ ਚ ਆਲਿਙ੍ਗਿਤੁਂ ਦੇਹੀ’’ਤਿ. ਸੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਿ. ਸਾ ਤੇਨ ਸਮ੍ਪਟਿਚ੍ਛਿਤਭਾਵਂ ਞਤ੍ਵਾ ਪੁਰਤੋ ਆਲਿਙ੍ਗਿਤ੍ਵਾ ਪਚ੍ਛਤੋ ਆਲਿਙ੍ਗਨ੍ਤੀ ਵਿਯ ਪਬ੍ਬਤਪਪਾਤੇ ਪਾਤੇਸਿ. ਸੋ ਪਤਿਤ੍ਵਾ ਚੁਣ੍ਣਵਿਚੁਣ੍ਣਂ ਅਹੋਸਿ. ਤਾਯ ਕਤਂ ਅਚ੍ਛਰਿਯਂ ਦਿਸ੍ਵਾ ਪਬ੍ਬਤੇ ਅਧਿਵਤ੍ਥਾ ਦੇਵਤਾ ਕੋਸਲ੍ਲਂ ਵਿਭਾਵੇਨ੍ਤੀ ਇਮਾ ਗਾਥਾ ਅਭਾਸਿ –

‘‘ਨ ਹਿ ਸਬ੍ਬੇਸੁ ਠਾਨੇਸੁ, ਪੁਰਿਸੋ ਹੋਤਿ ਪਣ੍ਡਿਤੋ;

ਇਤ੍ਥੀਪਿ ਪਣ੍ਡਿਤਾ ਹੋਤਿ, ਤਤ੍ਥ ਤਤ੍ਥ ਵਿਚਕ੍ਖਣਾ.

‘‘ਨ ਹਿ ਸਬ੍ਬੇਸੁ ਠਾਨੇਸੁ, ਪੁਰਿਸੋ ਹੋਤਿ ਪਣ੍ਡਿਤੋ;

ਇਤ੍ਥੀਪਿ ਪਣ੍ਡਿਤਾ ਹੋਤਿ, ਲਹੁਂ ਅਤ੍ਥਵਿਚਿਨ੍ਤਿਕਾ’’ਤਿ. (ਅਪ. ਥੇਰੀ. ੨.੩.੩੧-੩੨);

ਤਤੋ ਭਦ੍ਦਾ ਚਿਨ੍ਤੇਸਿ – ‘‘ਨ ਸਕ੍ਕਾ ਮਯਾ ਇਮਿਨਾ ਨਿਯਾਮੇਨ ਗੇਹਂ ਗਨ੍ਤੁਂ, ਇਤੋਵ ਗਨ੍ਤ੍ਵਾ ਏਕਂ ਪਬ੍ਬਜ੍ਜਂ ਪਬ੍ਬਜਿਸ੍ਸਾਮੀ’’ਤਿ ਨਿਗਣ੍ਠਾਰਾਮਂ ਗਨ੍ਤ੍ਵਾ ਨਿਗਣ੍ਠੇ ਪਬ੍ਬਜ੍ਜਂ ਯਾਚਿ. ਅਥ ਨਂ ਤੇ ਆਹਂਸੁ – ‘‘ਕੇਨ ਨਿਯਾਮੇਨ ਪਬ੍ਬਜ੍ਜਾ ਹੋਤੂ’’ਤਿ? ‘‘ਯਂ ਤੁਮ੍ਹਾਕਂ ਪਬ੍ਬਜ੍ਜਾਯ ਉਤ੍ਤਮਂ, ਤਦੇਵ ਕਰੋਥਾ’’ਤਿ. ਤੇ ‘‘ਸਾਧੂ’’ਤਿ ਤਸ੍ਸਾ ਤਾਲਟ੍ਠਿਨਾ ਕੇਸੇ ਲੁਞ੍ਚਿਤ੍ਵਾ ਪਬ੍ਬਾਜੇਸੁਂ. ਪੁਨ ਕੇਸਾ ਵਡ੍ਢਨ੍ਤਾ ਕੁਣ੍ਡਲਾਵਟ੍ਟਾ ਹੁਤ੍ਵਾ ਵਡ੍ਢੇਸੁਂ. ਤਤੋ ਪਟ੍ਠਾਯ ਸਾ ਕੁਣ੍ਡਲਕੇਸਾਤਿ ਨਾਮ ਜਾਤਾ. ਸਾ ਤਤ੍ਥ ਉਗ੍ਗਹੇਤਬ੍ਬਂ ਸਮਯਂ ਵਾਦਮਗ੍ਗਞ੍ਚ ਉਗ੍ਗਹੇਤ੍ਵਾ ‘‘ਏਤ੍ਤਕਂ ਨਾਮ ਇਮੇ ਜਾਨਨ੍ਤਿ, ਇਤੋ ਉਤ੍ਤਰਿ ਵਿਸੇਸੋ ਨਤ੍ਥੀ’’ਤਿ ਞਤ੍ਵਾ ਤਤੋ ਅਪਕ੍ਕਮਿਤ੍ਵਾ ਯਤ੍ਥ ਯਤ੍ਥ ਪਣ੍ਡਿਤਾ ਅਤ੍ਥਿ, ਤਤ੍ਥ ਤਤ੍ਥ ਗਨ੍ਤ੍ਵਾ ਤੇਸਂ ਜਾਨਨਸਿਪ੍ਪਂ ਉਗ੍ਗਹੇਤ੍ਵਾ ਅਤ੍ਤਨਾ ਸਦ੍ਧਿਂ ਕਥੇਤੁਂ ਸਮਤ੍ਥਂ ਅਦਿਸ੍ਵਾ ਯਂ ਯਂ ਗਾਮਂ ਵਾ ਨਿਗਮਂ ਵਾ ਪਵਿਸਤਿ, ਤਸ੍ਸ ਦ੍ਵਾਰੇ ਵਾਲੁਕਾਰਾਸਿਂ ਕਤ੍ਵਾ ਤਤ੍ਥ ਜਮ੍ਬੁਸਾਖਂ ਠਪੇਤ੍ਵਾ ‘‘ਯੋ ਮਮ ਵਾਦਂ ਆਰੋਪੇਤੁਂ ਸਕ੍ਕੋਤਿ, ਸੋ ਇਮਂ ਸਾਖਂ ਮਦ੍ਦਤੂ’’ਤਿ ਸਮੀਪੇ ਠਿਤਦਾਰਕਾਨਂ ਸਞ੍ਞਂ ਦਤ੍ਵਾ ਵਸਨਟ੍ਠਾਨਂ ਗਚ੍ਛਤਿ. ਸਤ੍ਤਾਹਮ੍ਪਿ ਜਮ੍ਬੁਸਾਖਾਯ ਤਥੇਵ ਠਿਤਾਯ ਤਂ ਗਹੇਤ੍ਵਾ ਪਕ੍ਕਮਤਿ.

ਤੇਨ ਚ ਸਮਯੇਨ ਅਮ੍ਹਾਕਂ ਭਗਵਾ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਅਨੁਪੁਬ੍ਬੇਨ ਸਾਵਤ੍ਥਿਂ ਉਪਨਿਸ੍ਸਾਯ ਜੇਤਵਨੇ ਵਿਹਰਤਿ. ਕੁਣ੍ਡਲਕੇਸਾਪਿ ਵੁਤ੍ਤਨਯੇਨ ਗਾਮਨਿਗਮਰਾਜਧਾਨੀਸੁ ਵਿਚਰਨ੍ਤੀ ਸਾਵਤ੍ਥਿਂ ਪਤ੍ਵਾ ਨਗਰਦ੍ਵਾਰੇ ਵਾਲੁਕਾਰਾਸਿਮ੍ਹਿ ਜਮ੍ਬੁਸਾਖਂ ਠਪੇਤ੍ਵਾ ਦਾਰਕਾਨਂ ਸਞ੍ਞਂ ਦਤ੍ਵਾ ਸਾਵਤ੍ਥਿਂ ਪਾਵਿਸਿ.

ਅਥਾਯਸ੍ਮਾ ਧਮ੍ਮਸੇਨਾਪਤਿ ਏਕਕੋਵ ਨਗਰਂ ਪਵਿਸਨ੍ਤੋ ਤਂ ਸਾਖਂ ਦਿਸ੍ਵਾ ਤਂ ਦਮੇਤੁਕਾਮੋ ਦਾਰਕੇ ਪੁਚ੍ਛਿ – ‘‘ਕਸ੍ਮਾਯਂ ਸਾਖਾ ਏਵਂ ਠਪਿਤਾ’’ਤਿ? ਦਾਰਕਾ ਤਮਤ੍ਥਂ ਆਰੋਚੇਸੁਂ. ਥੇਰੋ ‘‘ਯਦਿ ਏਵਂ ਇਮਂ ਸਾਖਂ ਮਦ੍ਦਥਾ’’ਤਿ ਆਹ. ਦਾਰਕਾ ਤਂ ਮਦ੍ਦਿਂਸੁ. ਕੁਣ੍ਡਲਕੇਸਾ ਕਤਭਤ੍ਤਕਿਚ੍ਚਾ ਨਗਰਤੋ ਨਿਕ੍ਖਮਨ੍ਤੀ ਤਂ ਸਾਖਂ ਮਦ੍ਦਿਤਂ ਦਿਸ੍ਵਾ ‘‘ਕੇਨਿਦਂ ਮਦ੍ਦਿਤ’’ਨ੍ਤਿ ਪੁਚ੍ਛਿਤ੍ਵਾ ਥੇਰੇਨ ਮਦ੍ਦਾਪਿਤਭਾਵਂ ਞਤ੍ਵਾ ‘‘ਅਪਕ੍ਖਿਕੋ ਵਾਦੋ ਨ ਸੋਭਤੀ’’ਤਿ ਸਾਵਤ੍ਥਿਂ ਪਵਿਸਿਤ੍ਵਾ ਵੀਥਿਤੋ ਵੀਥਿਂ ਵਿਚਰਨ੍ਤੀ ‘‘ਪਸ੍ਸੇਯ੍ਯਾਥ ਸਮਣੇਹਿ ਸਕ੍ਯਪੁਤ੍ਤਿਯੇਹਿ ਸਦ੍ਧਿਂ ਮਯ੍ਹਂ ਵਾਦ’’ਨ੍ਤਿ ਉਗ੍ਘੋਸੇਤ੍ਵਾ ਮਹਾਜਨਪਰਿਵੁਤਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸਿਨ੍ਨਂ ਧਮ੍ਮਸੇਨਾਪਤਿਂ ਉਪਸਙ੍ਕਮਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਏਕਮਨ੍ਤਂ ਠਿਤਾ ‘‘ਕਿਂ ਤੁਮ੍ਹੇਹਿ ਮਮ ਜਮ੍ਬੁਸਾਖਾ ਮਦ੍ਦਾਪਿਤਾ’’ਤਿ ਪੁਚ੍ਛਿ. ‘‘ਆਮ, ਮਯਾ ਮਦ੍ਦਾਪਿਤਾ’’ਤਿ. ‘‘ਏਵਂ ਸਨ੍ਤੇ ਤੁਮ੍ਹੇਹਿ ਸਦ੍ਧਿਂ ਮਯ੍ਹਂ ਵਾਦੋ ਹੋਤੂ’’ਤਿ. ‘‘ਹੋਤੁ, ਭਦ੍ਦੇ’’ਤਿ. ‘‘ਕਸ੍ਸ ਪੁਚ੍ਛਾ, ਕਸ੍ਸ ਵਿਸ੍ਸਜ੍ਜਨਾ’’ਤਿ? ‘‘ਪੁਚ੍ਛਾ ਨਾਮ ਅਮ੍ਹਾਕਂ ਪਤ੍ਤਾ, ਤ੍ਵਂ ਯਂ ਅਤ੍ਤਨੋ ਜਾਨਨਕਂ ਪੁਚ੍ਛਾ’’ਤਿ. ਸਾ ਸਬ੍ਬਮੇਵ ਅਤ੍ਤਨੋ ਜਾਨਨਕਂ ਵਾਦਂ ਪੁਚ੍ਛਿ. ਥੇਰੋ ਤਂ ਸਬ੍ਬਂ ਵਿਸ੍ਸਜ੍ਜੇਸਿ. ਸਾ ਉਪਰਿ ਪੁਚ੍ਛਿਤਬ੍ਬਂ ਅਜਾਨਨ੍ਤੀ ਤੁਣ੍ਹੀ ਅਹੋਸਿ. ਅਥ ਨਂ ਥੇਰੋ ਆਹ – ‘‘ਤਯਾ ਬਹੁਂ ਪੁਚ੍ਛਿਤਂ, ਮਯਮ੍ਪਿ ਤਂ ਏਕਂ ਪਞ੍ਹਂ ਪੁਚ੍ਛਾਮਾ’’ਤਿ. ‘‘ਪੁਚ੍ਛਥ, ਭਨ੍ਤੇ’’ਤਿ. ਥੇਰੋ ‘‘ਏਕਂ ਨਾਮ ਕਿ’’ਨ੍ਤਿ ਇਮਂ ਪਞ੍ਹਂ ਪੁਚ੍ਛਿ. ਕੁਣ੍ਡਲਕੇਸਾ ਨੇਵ ਅਨ੍ਤਂ ਨ ਕੋਟਿਂ ਪਸ੍ਸਨ੍ਤੀ ਅਨ੍ਧਕਾਰਂ ਪਵਿਟ੍ਠਾ ਵਿਯ ਹੁਤ੍ਵਾ ‘‘ਨ ਜਾਨਾਮਿ, ਭਨ੍ਤੇ’’ਤਿ ਆਹ. ‘‘ਤ੍ਵਂ ਏਤ੍ਤਕਮ੍ਪਿ ਅਜਾਨਨ੍ਤੀ ਅਞ੍ਞਂ ਕਿਂ ਜਾਨਿਸ੍ਸਸੀ’’ਤਿ ਵਤ੍ਵਾ ਧਮ੍ਮਂ ਦੇਸੇਸਿ. ਸਾ ਥੇਰਸ੍ਸ ਪਾਦੇਸੁ ਪਤਿਤ੍ਵਾ, ‘‘ਭਨ੍ਤੇ, ਤੁਮ੍ਹੇ ਸਰਣਂ ਗਚ੍ਛਾਮੀ’’ਤਿ ਆਹ. ‘‘ਮਾ ਮਂ ਤ੍ਵਂ, ਭਦ੍ਦੇ, ਸਰਣਂ ਗਚ੍ਛ, ਸਦੇਵਕੇ ਲੋਕੇ ਅਗ੍ਗਪੁਗ੍ਗਲਂ ਭਗਵਨ੍ਤਮੇਵ ਸਰਣਂ ਗਚ੍ਛਾ’’ਤਿ. ‘‘ਏਵਂ ਕਰਿਸ੍ਸਾਮਿ, ਭਨ੍ਤੇ’’ਤਿ ਸਾ ਸਾਯਨ੍ਹਸਮਯੇ ਧਮ੍ਮਦੇਸਨਾਵੇਲਾਯਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਸਤ੍ਥਾ ਤਸ੍ਸਾ ਞਾਣਪਰਿਪਾਕਂ ਞਤ੍ਵਾ –

‘‘ਸਹਸ੍ਸਮਪਿ ਚੇ ਗਾਥਾ, ਅਨਤ੍ਥਪਦਸਂਹਿਤਾ;

ਏਕਂ ਗਾਥਾਪਦਂ ਸੇਯ੍ਯੋ, ਯਂ ਸੁਤ੍ਵਾ ਸੁਪਸਮ੍ਮਤੀ’’ਤਿ. –

ਇਮਂ ਗਾਥਮਾਹ. ਗਾਥਾਪਰਿਯੋਸਾਨੇ ਯਥਾਠਿਤਾਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰੀ ੨.੩.੧-੫੪) –

‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

‘‘ਤਦਾਹਂ ਹਂਸਵਤਿਯਂ, ਜਾਤਾ ਸੇਟ੍ਠਿਕੁਲੇ ਅਹੁਂ;

ਨਾਨਾਰਤਨਪਜ੍ਜੋਤੇ, ਮਹਾਸੁਖਸਮਪ੍ਪਿਤਾ.

‘‘ਉਪੇਤ੍ਵਾ ਤਂ ਮਹਾਵੀਰਂ, ਅਸ੍ਸੋਸਿਂ ਧਮ੍ਮਦੇਸਨਂ;

ਤਤੋ ਜਾਤਪ੍ਪਸਾਦਾਹਂ, ਉਪੇਸਿਂ ਸਰਣਂ ਜਿਨਂ.

‘‘ਤਦਾ ਮਹਾਕਾਰੁਣਿਕੋ, ਪਦੁਮੁਤ੍ਤਰਨਾਮਕੋ;

ਖਿਪ੍ਪਾਭਿਞ੍ਞਾਨਮਗ੍ਗਨ੍ਤਿ, ਠਪੇਸਿ ਭਿਕ੍ਖੁਨਿਂ ਸੁਭਂ.

‘‘ਤਂ ਸੁਤ੍ਵਾ ਮੁਦਿਤਾ ਹੁਤ੍ਵਾ, ਦਾਨਂ ਦਤ੍ਵਾ ਮਹੇਸਿਨੋ;

ਨਿਪਚ੍ਚ ਸਿਰਸਾ ਪਾਦੇ, ਤਂ ਠਾਨਮਭਿਪਤ੍ਥਯਿਂ.

‘‘ਅਨੁਮੋਦਿ ਮਹਾਵੀਰੋ, ਭਦ੍ਦੇ ਯਂ ਤੇਭਿਪਤ੍ਥਿਤਂ;

ਸਮਿਜ੍ਝਿਸ੍ਸਤਿ ਤਂ ਸਬ੍ਬਂ, ਸੁਖਿਨੀ ਹੋਹਿ ਨਿਬ੍ਬੁਤਾ.

‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

‘‘ਤਸ੍ਸ ਧਮ੍ਮੇਸੁ ਦਾਯਾਦਾ, ਓਰਸਾ ਧਮ੍ਮਨਿਮ੍ਮਿਤਾ;

ਭਦ੍ਦਾਕੁਣ੍ਡਲਕੇਸਾਤਿ, ਹੇਸ੍ਸਤਿ ਸਤ੍ਥੁ ਸਾਵਿਕਾ.

‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਤਤੋ ਚੁਤਾ ਯਾਮਮਗਂ, ਤਤੋਹਂ ਤੁਸਿਤਂ ਗਤਾ;

ਤਤੋ ਚ ਨਿਮ੍ਮਾਨਰਤਿਂ, ਵਸਵਤ੍ਤਿਪੁਰਂ ਤਤੋ.

‘‘ਯਤ੍ਥ ਯਤ੍ਥੂਪਪਜ੍ਜਾਮਿ, ਤਸ੍ਸ ਕਮ੍ਮਸ੍ਸ ਵਾਹਸਾ;

ਤਤ੍ਥ ਤਤ੍ਥੇਵ ਰਾਜੂਨਂ, ਮਹੇਸਿਤ੍ਤਮਕਾਰਯਿਂ.

‘‘ਤਤੋ ਚੁਤਾ ਮਨੁਸ੍ਸੇਸੁ, ਰਾਜੂਨਂ ਚਕ੍ਕਵਤ੍ਤਿਨਂ;

ਮਣ੍ਡਲੀਨਞ੍ਚ ਰਾਜੂਨਂ, ਮਹੇਸਿਤ੍ਤਮਕਾਰਯਿਂ.

‘‘ਸਮ੍ਪਤ੍ਤਿਂ ਅਨੁਭੋਤ੍ਵਾਨ, ਦੇਵੇਸੁ ਮਾਨੁਸੇਸੁ ਚ;

ਸਬ੍ਬਤ੍ਥ ਸੁਖਿਤਾ ਹੁਤ੍ਵਾ, ਨੇਕਕਪ੍ਪੇਸੁ ਸਂਸਰਿਂ.

‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

‘‘ਉਪਟ੍ਠਾਕੋ ਮਹੇਸਿਸ੍ਸ, ਤਦਾ ਆਸਿ ਨਰਿਸ੍ਸਰੋ;

ਕਾਸਿਰਾਜਾ ਕਿਕੀ ਨਾਮ, ਬਾਰਾਣਸਿਪੁਰੁਤ੍ਤਮੇ.

‘‘ਤਸ੍ਸ ਧੀਤਾ ਚਤੁਤ੍ਥਾਸਿਂ, ਭਿਕ੍ਖੁਦਾਯੀਤਿ ਵਿਸ੍ਸੁਤਾ;

ਧਮ੍ਮਂ ਸੁਤ੍ਵਾ ਜਿਨਗ੍ਗਸ੍ਸ, ਪਬ੍ਬਜ੍ਜਂ ਸਮਰੋਚਯਿਂ.

‘‘ਅਨੁਜਾਨਿ ਨ ਨੋ ਤਾਤੋ, ਅਗਾਰੇਵ ਤਦਾ ਮਯਂ;

ਵੀਸਵਸ੍ਸਸਹਸ੍ਸਾਨਿ, ਵਿਚਰਿਮ੍ਹ ਅਤਨ੍ਦਿਤਾ.

‘‘ਕੋਮਾਰਿਬ੍ਰਹ੍ਮਚਰਿਯਂ, ਰਾਜਕਞ੍ਞਾ ਸੁਖੇਧਿਤਾ;

ਬੁਦ੍ਧੋਪਟ੍ਠਾਨਨਿਰਤਾ, ਮੁਦਿਤਾ ਸਤ੍ਤ ਧੀਤਰੋ.

‘‘ਸਮਣੀ ਸਮਣਗੁਤ੍ਤਾ ਚ, ਭਿਕ੍ਖੁਨੀ ਭਿਕ੍ਖੁਦਾਯਿਕਾ;

ਧਮ੍ਮਾ ਚੇਵ ਸੁਧਮ੍ਮਾ ਚ, ਸਤ੍ਤਮੀ ਸਙ੍ਘਦਾਯਿਕਾ.

‘‘ਖੇਮਾ ਉਪ੍ਪਲਵਣ੍ਣਾ ਚ, ਪਟਾਚਾਰਾ ਅਹਂ ਤਦਾ;

ਕਿਸਾਗੋਤਮੀ ਧਮ੍ਮਦਿਨ੍ਨਾ, ਵਿਸਾਖਾ ਹੋਤਿ ਸਤ੍ਤਮੀ.

‘‘ਤੇਹਿ ਕਮ੍ਮੇਹਿ ਸੁਕਤੇਹਿ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਪਚ੍ਛਿਮੇ ਚ ਭਵੇ ਦਾਨਿ, ਗਿਰਿਬ੍ਬਜਪੁਰੁਤ੍ਤਮੇ;

ਜਾਤਾ ਸੇਟ੍ਠਿਕੁਲੇ ਫੀਤੇ, ਯਦਾਹਂ ਯੋਬ੍ਬਨੇ ਠਿਤਾ.

‘‘ਚੋਰਂ ਵਧਤ੍ਥਂ ਨੀਯਨ੍ਤਂ, ਦਿਸ੍ਵਾ ਰਤ੍ਤਾ ਤਹਿਂ ਅਹਂ;

ਪਿਤਾ ਮੇ ਤਂ ਸਹਸ੍ਸੇਨ, ਮੋਚਯਿਤ੍ਵਾ ਵਧਾ ਤਤੋ.

‘‘ਅਦਾਸਿ ਤਸ੍ਸ ਮਂ ਤਾਤੋ, ਵਿਦਿਤ੍ਵਾਨ ਮਨਂ ਮਮ;

ਤਸ੍ਸਾਹਮਾਸਿਂ ਵਿਸਟ੍ਠਾ, ਅਤੀਵ ਦਯਿਤਾ ਹਿਤਾ.

‘‘ਸੋ ਮੇ ਭੂਸਨਲੋਭੇਨ, ਬਲਿਮਜ੍ਝਾਸਯੋ ਦਿਸੋ;

ਚੋਰਪ੍ਪਪਾਤਂ ਨੇਤ੍ਵਾਨ, ਪਬ੍ਬਤਂ ਚੇਤਯੀ ਵਧਂ.

‘‘ਤਦਾਹਂ ਪਣਮਿਤ੍ਵਾਨ, ਸਤ੍ਤੁਕਂ ਸੁਕਤਞ੍ਜਲੀ;

ਰਕ੍ਖਨ੍ਤੀ ਅਤ੍ਤਨੋ ਪਾਣਂ, ਇਦਂ ਵਚਨਮਬ੍ਰਵਿਂ.

‘‘ਇਦਂ ਸੁਵਣ੍ਣਕੇਯੂਰਂ, ਮੁਤ੍ਤਾ ਵੇਲ਼ੁਰਿਯਾ ਬਹੂ;

ਸਬ੍ਬਂ ਹਰਸ੍ਸੁ ਭਦ੍ਦਨ੍ਤੇ, ਮਞ੍ਚ ਦਾਸੀਤਿ ਸਾਵਯ.

‘‘ਓਰੋਪਯਸ੍ਸੁ ਕਲ੍ਯਾਣੀ, ਮਾ ਬਾਲ਼੍ਹਂ ਪਰਿਦੇਵਸਿ;

ਨ ਚਾਹਂ ਅਭਿਜਾਨਾਮਿ, ਅਹਨ੍ਤ੍ਵਾ ਧਨਮਾਭਤਂ.

‘‘ਯਤੋ ਸਰਾਮਿ ਅਤ੍ਤਾਨਂ, ਯਤੋ ਪਤ੍ਤੋਸ੍ਮਿ ਵਿਞ੍ਞੁਤਂ;

ਨ ਚਾਹਂ ਅਭਿਜਾਨਾਮਿ, ਅਞ੍ਞਂ ਪਿਯਤਰਂ ਤਯਾ.

‘‘ਏਹਿ ਤਂ ਉਪਗੂਹਿਸ੍ਸਂ, ਕਤ੍ਵਾਨ ਤਂ ਪਦਕ੍ਖਿਣਂ;

ਨ ਚ ਦਾਨਿ ਪੁਨੋ ਅਤ੍ਥਿ, ਮਮ ਤੁਯ੍ਹਞ੍ਚ ਸਙ੍ਗਮੋ.

‘‘ਨ ਹਿ ਸਬ੍ਬੇਸੁ ਠਾਨੇਸੁ, ਪੁਰਿਸੋ ਹੋਤਿ ਪਣ੍ਡਿਤੋ;

ਇਤ੍ਥੀਪਿ ਪਣ੍ਡਿਤਾ ਹੋਤਿ, ਤਤ੍ਥ ਤਤ੍ਥ ਵਿਚਕ੍ਖਣਾ.

‘‘ਨ ਹਿ ਸਬ੍ਬੇਸੁ ਠਾਨੇਸੁ, ਪੁਰਿਸੋ ਹੋਤਿ ਪਣ੍ਡਿਤੋ;

ਇਤ੍ਥੀਪਿ ਪਣ੍ਡਿਤਾ ਹੋਤਿ, ਲਹੁਂ ਅਤ੍ਥਵਿਚਿਨ੍ਤਿਕਾ.

‘‘ਲਹੁਞ੍ਚ ਵਤ ਖਿਪ੍ਪਞ੍ਚ, ਨਿਕਟ੍ਠੇ ਸਮਚੇਤਯਿਂ;

ਮਿਗਂ ਉਣ੍ਣਾ ਯਥਾ ਏਵਂ, ਤਦਾਹਂ ਸਤ੍ਤੁਕਂ ਵਧਿਂ.

‘‘ਯੋ ਚ ਉਪ੍ਪਤਿਤਂ ਅਤ੍ਥਂ, ਨ ਖਿਪ੍ਪਮਨੁਬੁਜ੍ਝਤਿ;

ਸੋ ਹਞ੍ਞਤੇ ਮਨ੍ਦਮਤਿ, ਚੋਰੋਵ ਗਿਰਿਗਬ੍ਭਰੇ.

‘‘ਯੋ ਚ ਉਪ੍ਪਤਿਤਂ ਅਤ੍ਥਂ, ਖਿਪ੍ਪਮੇਵ ਨਿਬੋਧਤਿ;

ਮੁਚ੍ਚਤੇ ਸਤ੍ਤੁਸਮ੍ਬਾਧਾ, ਤਦਾਹਂ ਸਤ੍ਤੁਕਾ ਯਥਾ.

‘‘ਤਦਾਹਂ ਪਾਤਯਿਤ੍ਵਾਨ, ਗਿਰਿਦੁਗ੍ਗਮ੍ਹਿ ਸਤ੍ਤੁਕਂ;

ਸਨ੍ਤਿਕਂ ਸੇਤਵਤ੍ਥਾਨਂ, ਉਪੇਤ੍ਵਾ ਪਬ੍ਬਜਿਂ ਅਹਂ.

‘‘ਸਣ੍ਡਾਸੇਨ ਚ ਕੇਸੇ ਮੇ, ਲੁਞ੍ਚਿਤ੍ਵਾ ਸਬ੍ਬਸੋ ਤਦਾ;

ਪਬ੍ਬਜਿਤ੍ਵਾਨ ਸਮਯਂ, ਆਚਿਕ੍ਖਿਂਸੁ ਨਿਰਨ੍ਤਰਂ.

‘‘ਤਤੋ ਤਂ ਉਗ੍ਗਹੇਤ੍ਵਾਹਂ, ਨਿਸੀਦਿਤ੍ਵਾਨ ਏਕਿਕਾ;

ਸਮਯਂ ਤਂ ਵਿਚਿਨ੍ਤੇਸਿਂ, ਸੁਵਾਨੋ ਮਾਨੁਸਂ ਕਰਂ.

‘‘ਛਿਨ੍ਨਂ ਗਯ੍ਹ ਸਮੀਪੇ ਮੇ, ਪਾਤਯਿਤ੍ਵਾ ਅਪਕ੍ਕਮਿ;

ਦਿਸ੍ਵਾ ਨਿਮਿਤ੍ਤਮਲਭਿਂ, ਹਤ੍ਥਂ ਤਂ ਪੁਲ਼ਵਾਕੁਲਂ.

‘‘ਤਤੋ ਉਟ੍ਠਾਯ ਸਂਵਿਗ੍ਗਾ, ਅਪੁਚ੍ਛਿਂ ਸਹਧਮ੍ਮਿਕੇ;

ਤੇ ਅਵੋਚੁਂ ਵਿਜਾਨਨ੍ਤਿ, ਤਂ ਅਤ੍ਥਂ ਸਕ੍ਯਭਿਕ੍ਖਵੋ.

‘‘ਸਾਹਂ ਤਮਤ੍ਥਂ ਪੁਚ੍ਛਿਸ੍ਸਂ, ਉਪੇਤ੍ਵਾ ਬੁਦ੍ਧਸਾਵਕੇ;

ਤੇ ਮਮਾਦਾਯ ਗਚ੍ਛਿਂਸੁ, ਬੁਦ੍ਧਸੇਟ੍ਠਸ੍ਸ ਸਨ੍ਤਿਕਂ.

‘‘ਸੋ ਮੇ ਧਮ੍ਮਮਦੇਸੇਸਿ, ਖਨ੍ਧਾਯਤਨਧਾਤੁਯੋ;

ਅਸੁਭਾਨਿਚ੍ਚਦੁਕ੍ਖਾਤਿ, ਅਨਤ੍ਤਾਤਿ ਚ ਨਾਯਕੋ.

‘‘ਤਸ੍ਸ ਧਮ੍ਮਂ ਸੁਣਿਤ੍ਵਾਹਂ, ਧਮ੍ਮਚਕ੍ਖੁਂ ਵਿਸੋਧਯਿਂ;

ਤਤੋ ਵਿਞ੍ਞਾਤਸਦ੍ਧਮ੍ਮਾ, ਪਬ੍ਬਜ੍ਜਂ ਉਪਸਮ੍ਪਦਂ.

‘‘ਆਯਾਚਿਤੋ ਤਦਾ ਆਹ, ਏਹਿ ਭਦ੍ਦੇਤਿ ਨਾਯਕੋ;

ਤਦਾਹਂ ਉਪਸਮ੍ਪਨ੍ਨਾ, ਪਰਿਤ੍ਤਂ ਤੋਯਮਦ੍ਦਸਂ.

‘‘ਪਾਦਪਕ੍ਖਾਲਨੇਨਾਹਂ, ਞਤ੍ਵਾ ਸਉਦਯਬ੍ਬਯਂ;

ਤਥਾ ਸਬ੍ਬੇਪਿ ਸਙ੍ਖਾਰੇ, ਈਦਿਸਂ ਚਿਨ੍ਤਯਿਂ ਤਦਾ.

‘‘ਤਤੋ ਚਿਤ੍ਤਂ ਵਿਮੁਚ੍ਚਿ ਮੇ, ਅਨੁਪਾਦਾਯ ਸਬ੍ਬਸੋ;

ਖਿਪ੍ਪਾਭਿਞ੍ਞਾਨਮਗ੍ਗਂ ਮੇ, ਤਦਾ ਪਞ੍ਞਾਪਯੀ ਜਿਨੋ.

‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਪਰਚਿਤ੍ਤਾਨਿ ਜਾਨਾਮਿ, ਸਤ੍ਥੁਸਾਸਨਕਾਰਿਕਾ.

‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਖੇਪੇਤ੍ਵਾ ਆਸਵੇ ਸਬ੍ਬੇ, ਵਿਸੁਦ੍ਧਾਸਿਂ ਸੁਨਿਮ੍ਮਲਾ.

‘‘ਪਰਿਚਿਣ੍ਣੋ ਮਯਾ ਸਤ੍ਥਾ, ਕਤਂ ਬੁਦ੍ਧਸ੍ਸ ਸਾਸਨਂ;

ਓਹਿਤੋ ਗਰੁਕੋ ਭਾਰੋ, ਭਵਨੇਤ੍ਤਿ ਸਮੂਹਤਾ.

‘‘ਯਸ੍ਸਤ੍ਥਾਯ ਪਬ੍ਬਜਿਤਾ, ਅਗਾਰਸ੍ਮਾਨਗਾਰਿਯਂ;

ਸੋ ਮੇ ਅਤ੍ਥੋ ਅਨੁਪ੍ਪਤ੍ਤੋ, ਸਬ੍ਬਸਂਯੋਜਨਕ੍ਖਯੋ.

‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;

ਞਾਣਂ ਮੇ ਵਿਮਲਂ ਸੁਦ੍ਧਂ, ਬੁਦ੍ਧਸੇਟ੍ਠਸ੍ਸ ਸਾਸਨੇ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਤਾਵਦੇਵ ਪਬ੍ਬਜ੍ਜਂ ਯਾਚਿ. ਸਤ੍ਥਾ ਤਸ੍ਸਾ ਪਬ੍ਬਜ੍ਜਂ ਅਨੁਜਾਨਿ. ਸਾ ਭਿਕ੍ਖੁਨੁਪਸ੍ਸਯਂ ਗਨ੍ਤ੍ਵਾਨ ਪਬ੍ਬਜਿਤ੍ਵਾ ਫਲਸੁਖੇਨ ਨਿਬ੍ਬਾਨਸੁਖੇਨ ਚ ਵੀਤਿਨਾਮੇਨ੍ਤੀ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਉਦਾਨਵਸੇਨ –

੧੦੭. ‘‘ਲੂਨਕੇਸੀ ਪਙ੍ਕਧਰੀ, ਏਕਸਾਟੀ ਪੁਰੇ ਚਰਿਂ;

ਅਵਜ੍ਜੇ ਵਜ੍ਜਮਤਿਨੀ, ਵਜ੍ਜੇ ਚਾਵਜ੍ਜਦਸ੍ਸਿਨੀ.

੧੦੮. ‘‘ਦਿਵਾਵਿਹਾਰਾ ਨਿਕ੍ਖਮ੍ਮ, ਗਿਜ੍ਝਕੂਟਮ੍ਹਿ ਪਬ੍ਬਤੇ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਭਿਕ੍ਖੁਸਙ੍ਘਪੁਰਕ੍ਖਤਂ.

੧੦੯. ‘‘ਨਿਹਚ੍ਚ ਜਾਣੁਂ ਵਨ੍ਦਿਤ੍ਵਾ, ਸਮ੍ਮੁਖਾ ਅਞ੍ਜਲਿਂ ਅਕਂ;

ਏਹਿ ਭਦ੍ਦੇਤਿ ਮਂ ਅਵਚ, ਸਾ ਮੇ ਆਸੂਪਸਮ੍ਪਦਾ.

੧੧੦. ‘‘ਚਿਣ੍ਣਾ ਅਙ੍ਗਾ ਚ ਮਗਧਾ, ਵਜ੍ਜੀ ਕਾਸੀ ਚ ਕੋਸਲਾ;

ਅਨਕਾ ਪਣ੍ਣਾਸ ਵਸ੍ਸਾਨਿ, ਰਟ੍ਠਪਿਣ੍ਡਂ ਅਭੁਞ੍ਜਹਂ.

੧੧੧. ‘‘ਪੁਞ੍ਞਂ ਵਤ ਪਸਵਿ ਬਹੁਂ, ਸਪ੍ਪਞ੍ਞੋ ਵਤਾਯਂ ਉਪਾਸਕੋ;

ਯੋ ਭਦ੍ਦਾਯ ਚੀਵਰਂ ਅਦਾਸਿ, ਵਿਪ੍ਪਮੁਤ੍ਤਾਯ ਸਬ੍ਬਗਨ੍ਥੇਹੀ’’ਤਿ. –

ਇਮਾ ਗਾਥਾ ਅਭਾਸਿ.

ਤਤ੍ਥ ਲੂਨਕੇਸੀਤਿ ਲੂਨਾ ਲੁਞ੍ਚਿਤਾ ਕੇਸਾ ਮਯ੍ਹਨ੍ਤਿ ਲੂਨਕੇਸੀ, ਨਿਗਣ੍ਠੇਸੁ ਪਬ੍ਬਜ੍ਜਾਯ ਤਾਲਟ੍ਠਿਨਾ ਲੁਞ੍ਚਿਤਕੇਸਾ, ਤਂ ਸਨ੍ਧਾਯ ਵਦਤਿ. ਪਙ੍ਕਧਰੀਤਿ ਦਨ੍ਤਕਟ੍ਠਸ੍ਸ ਅਖਾਦਨੇਨ ਦਨ੍ਤੇਸੁ ਮਲਪਙ੍ਕਧਾਰਣਤੋ ਪਙ੍ਕਧਰੀ. ਏਕਸਾਟੀਤਿ ਨਿਗਣ੍ਠਚਾਰਿਤ੍ਤਵਸੇਨ ਏਕਸਾਟਿਕਾ. ਪੁਰੇ ਚਰਿਨ੍ਤਿ ਪੁਬ੍ਬੇ ਨਿਗਣ੍ਠੀ ਹੁਤ੍ਵਾ ਏਵਂ ਵਿਚਰਿਂ. ਅਵਜ੍ਜੇ ਵਜ੍ਜਮਤਿਨੀਤਿ ਨ੍ਹਾਨੁਚ੍ਛਾਦਨਦਨ੍ਤਕਟ੍ਠਖਾਦਨਾਦਿਕੇ ਅਨਵਜ੍ਜੇ ਸਾਵਜ੍ਜਸਞ੍ਞੀ. ਵਜ੍ਜੇ ਚਾਵਜ੍ਜਦਸ੍ਸਿਨੀਤਿ ਮਾਨਮਕ੍ਖਪਲਾਸਵਿਪਲ੍ਲਾਸਾਦਿਕੇ ਸਾਵਜ੍ਜੇ ਅਨਵਜ੍ਜਦਿਟ੍ਠੀ.

ਦਿਵਾਵਿਹਾਰਾ ਨਿਕ੍ਖਮ੍ਮਾਤਿ ਅਤ੍ਤਨੋ ਦਿਵਾਵਿਹਾਰਟ੍ਠਾਨਤੋ ਨਿਕ੍ਖਮਿਤ੍ਵਾ. ਅਯਮ੍ਪਿ ਠਿਤਮਜ੍ਝਨ੍ਹਿਕਵੇਲਾਯਂ ਥੇਰੇਨ ਸਮਾਗਤਾ ਤਸ੍ਸ ਪਞ੍ਹਸ੍ਸ ਵਿਸ੍ਸਜ੍ਜਨੇਨ ਧਮ੍ਮਦੇਸਨਾਯ ਚ ਨਿਹਤਮਾਨਦਬ੍ਬਾ ਪਸਨ੍ਨਮਾਨਸਾ ਹੁਤ੍ਵਾ ਸਤ੍ਥੁ ਸਨ੍ਤਿਕਂ ਉਪਸਙ੍ਕਮਿਤੁਕਾਮਾਵ ਅਤ੍ਤਨੋ ਵਸਨਟ੍ਠਾਨਂ ਗਨ੍ਤ੍ਵਾ ਦਿਵਾਟ੍ਠਾਨੇ ਨਿਸੀਦਿਤ੍ਵਾ ਸਾਯਨ੍ਹਸਮਯੇ ਸਤ੍ਥੁ ਸਨ੍ਤਿਕਂ ਉਪਸਙ੍ਕਮਿਤ੍ਵਾ.

ਨਿਹਚ੍ਚ ਜਾਣੁਂ ਵਨ੍ਦਿਤ੍ਵਾਤਿ ਜਾਣੁਦ੍ਵਯਂ ਪਥਵਿਯਂ ਨਿਹਨ੍ਤ੍ਵਾ ਪਤਿਟ੍ਠਪੇਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ. ਸਮ੍ਮੁਖਾ ਅਞ੍ਜਲਿਂ ਅਕਨ੍ਤਿ ਸਤ੍ਥੁ ਸਮ੍ਮੁਖਾ ਦਸਨਖਸਮੋਧਾਨਸਮੁਜ੍ਜਲਂ ਅਞ੍ਜਲਿਂ ਅਕਾਸਿਂ. ਏਹਿ, ਭਦ੍ਦੇਤਿ ਮਂ ਅਵਚ, ਸਾ ਮੇ ਆਸੂਪਸਮ੍ਪਦਾਤਿ ਯਂ ਮਂ ਭਗਵਾ ਅਰਹਤ੍ਤਂ ਪਤ੍ਵਾ ਪਬ੍ਬਜ੍ਜਞ੍ਚ ਉਪਸਮ੍ਪਦਞ੍ਚ ਯਾਚਿਤ੍ਵਾ ਠਿਤਂ ‘‘ਏਹਿ, ਭਦ੍ਦੇ, ਭਿਕ੍ਖੁਨੁਪਸ੍ਸਯਂ ਗਨ੍ਤ੍ਵਾ ਭਿਕ੍ਖੁਨੀਨਂ ਸਨ੍ਤਿਕੇ ਪਬ੍ਬਜ ਉਪਸਮ੍ਪਜ੍ਜਸ੍ਸੂ’’ਤਿ ਅਵਚ ਆਣਾਪੇਸਿ. ਸਾ ਸਤ੍ਥੁ ਆਣਾ ਮਯ੍ਹਂ ਉਪਸਮ੍ਪਦਾਯ ਕਾਰਣਤ੍ਤਾ ਉਪਸਮ੍ਪਦਾ ਆਸਿ ਅਹੋਸਿ.

ਚਿਣ੍ਣਾਤਿਆਦਿਕਾ ਦ੍ਵੇ ਗਾਥਾ ਅਞ੍ਞਾਬ੍ਯਾਕਰਣਗਾਥਾ. ਤਤ੍ਥ ਚਿਣ੍ਣਾ ਅਙ੍ਗਾ ਚ ਮਗਧਾਤਿ ਯੇ ਇਮੇ ਅਙ੍ਗਾ ਚ ਮਗਧਾ ਚ ਵਜ੍ਜੀ ਚ ਕਾਸੀ ਚ ਕੋਸਲਾ ਚ ਜਨਪਦਾ ਪੁਬ੍ਬੇ ਸਾਣਾਯ ਮਯਾ ਰਟ੍ਠਪਿਣ੍ਡਂ ਭੁਞ੍ਜਨ੍ਤਿਯਾ ਚਿਣ੍ਣਾ ਚਰਿਤਾ, ਤੇਸੁਯੇਵ ਸਤ੍ਥਾਰਾ ਸਮਾਗਮਤੋ ਪਟ੍ਠਾਯ ਅਨਣਾ ਨਿਦ੍ਦੋਸਾ ਅਪਗਤਕਿਲੇਸਾ ਹੁਤ੍ਵਾ ਪਞ੍ਞਾਸ ਸਂਵਚ੍ਛਰਾਨਿ ਰਟ੍ਠਪਿਣ੍ਡਂ ਅਭੁਞ੍ਜਿਂ ਅਹਂ.

ਯੇਨ ਅਭਿਪ੍ਪਸਨ੍ਨਮਾਨਸੇਨ ਉਪਾਸਕੇਨ ਅਤ੍ਤਨੋ ਚੀਵਰਂ ਦਿਨ੍ਨਂ, ਤਸ੍ਸ ਪੁਞ੍ਞਵਿਸੇਸਕਿਤ੍ਤਨਮੁਖੇਨ ਅਞ੍ਞਂ ਬ੍ਯਾਕਰੋਨ੍ਤੀ ‘‘ਪੁਞ੍ਞਂ ਵਤ ਪਸਵੀ ਬਹੁ’’ਨ੍ਤਿ ਓਸਾਨਗਾਥਮਾਹ. ਸਾ ਸੁਵਿਞ੍ਞੇਯ੍ਯਾਵ.

ਭਦ੍ਦਾਕੁਣ੍ਡਲਕੇਸਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.