੮. ਸੋਣਾਥੇਰੀਗਾਥਾਵਣ੍ਣਨਾ

ਦਸ ਪੁਤ੍ਤੇ ਵਿਜਾਯਿਤ੍ਵਾਤਿਆਦਿਕਾ ਸੋਣਾਯ ਥੇਰਿਯਾ ਗਾਥਾ. ਅਯਮ੍ਪਿ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਵਾ ਏਕਦਿਵਸਂ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤੀ ਸਤ੍ਥਾਰਂ ਏਕਂ ਭਿਕ੍ਖੁਨਿਂ ਆਰਦ੍ਧਵੀਰਿਯਾਨਂ ਭਿਕ੍ਖੁਨੀਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ, ਅਧਿਕਾਰਕਮ੍ਮਂ ਕਤ੍ਵਾ ਸਯਮ੍ਪਿ ਤਂ ਠਾਨਨ੍ਤਰਂ ਪਤ੍ਥੇਤ੍ਵਾ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ, ਤਤੋ ਚੁਤਾ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤਾ ਪਤਿਕੁਲਂ ਗਤਾ ਦਸ ਪੁਤ੍ਤਧੀਤਰੋ ਲਭਿਤ੍ਵਾ ਬਹੁਪੁਤ੍ਤਿਕਾਤਿ ਪਞ੍ਞਾਯਿਤ੍ਥ. ਸਾ ਸਾਮਿਕੇ ਪਬ੍ਬਜਿਤੇ ਵਯਪ੍ਪਤ੍ਤੇ ਪੁਤ੍ਤਧੀਤਰੋ ਘਰਾਵਾਸੇ ਪਤਿਟ੍ਠਾਪੇਤ੍ਵਾ ਸਬ੍ਬਂ ਧਨਂ ਪੁਤ੍ਤਾਨਂ ਵਿਭਜਿਤ੍ਵਾ ਅਦਾਸਿ, ਨ ਕਿਞ੍ਚਿ ਅਤ੍ਤਨੋ ਠਪੇਸਿ. ਤਂ ਪੁਤ੍ਤਾ ਚ ਧੀਤਰੋ ਚ ਕਤਿਪਾਹਮੇਵ ਉਪਟ੍ਠਹਿਤ੍ਵਾ ਪਰਿਭਵਂ ਅਕਂਸੁ. ਸਾ ‘‘ਕਿਂ ਮਯ੍ਹਂ ਇਮੇਹਿ ਪਰਿਭਵਾਯ ਘਰੇ ਵਸਨ੍ਤਿਯਾ’’ਤਿ ਭਿਕ੍ਖੁਨਿਯੋ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਤਂ ਭਿਕ੍ਖੁਨਿਯੋ ਪਬ੍ਬਾਜੇਸੁਂ. ਸਾ ਲਦ੍ਧੂਪਸਮ੍ਪਦਾ ‘‘ਅਹਂ ਮਹਲ੍ਲਿਕਾਕਾਲੇ ਪਬ੍ਬਜਿਤ੍ਵਾ ਅਪ੍ਪਮਤ੍ਤਾਯ ਭਵਿਤਬ੍ਬ’’ਨ੍ਤਿ ਭਿਕ੍ਖੁਨੀਨਂ ਵਤ੍ਤਪਟਿਵਤ੍ਤਂ ਕਰੋਨ੍ਤੀ ‘‘ਸਬ੍ਬਰਤ੍ਤਿਂ ਸਮਣਧਮ੍ਮਂ ਕਰਿਸ੍ਸਾਮੀ’’ਤਿ ਹੇਟ੍ਠਾਪਾਸਾਦੇ ਏਕਥਮ੍ਭਂ ਹਤ੍ਥੇਨ ਗਹੇਤ੍ਵਾ ਤਂ ਅਵਿਜਹਮਾਨਾ ਸਮਣਧਮ੍ਮਂ ਕਰੋਨ੍ਤੀ ਚਙ੍ਕਮਮਾਨਾਪਿ ‘‘ਅਨ੍ਧਕਾਰੇ ਠਾਨੇ ਰੁਕ੍ਖਾਦੀਸੁ ਯਤ੍ਥ ਕਤ੍ਥਚਿ ਮੇ ਸੀਸਂ ਪਟਿਹਞ੍ਞੇਯ੍ਯਾ’’ਤਿ ਰੁਕ੍ਖਂ ਹਤ੍ਥੇਨ ਗਹੇਤ੍ਵਾ ਤਂ ਅਵਿਜਹਮਾਨਾਵ ਸਮਣਧਮ੍ਮਂ ਕਰੋਤਿ. ਤਤੋ ਪਟ੍ਠਾਯ ਸਾ ਆਰਦ੍ਧਵੀਰਿਯਤਾਯ ਪਾਕਟਾ ਅਹੋਸਿ. ਸਤ੍ਥਾ ਤਸ੍ਸਾ ਞਾਣਪਰਿਪਾਕਂ ਦਿਸ੍ਵਾ ਗਨ੍ਧਕੁਟਿਯਂ ਨਿਸਿਨ੍ਨੋਵ ਓਭਾਸਂ ਫਰਿਤ੍ਵਾ ਸਮ੍ਮੁਖੇ ਨਿਸਿਨ੍ਨੋ ਵਿਯ ਅਤ੍ਤਾਨਂ ਦਸ੍ਸੇਤ੍ਵਾ –

‘‘ਯੋ ਚ ਵਸ੍ਸਸਤਂ ਜੀਵੇ, ਅਪਸ੍ਸਂ ਧਮ੍ਮਮੁਤ੍ਤਮਂ;

ਏਕਾਹਂ ਜੀਵਿਤਂ ਸੇਯ੍ਯੋ, ਪਸ੍ਸਤੋ ਧਮ੍ਮਮੁਤ੍ਤਮ’’ਨ੍ਤਿ. (ਧ. ਪ. ੧੧੫) –

ਗਾਥਂ ਅਭਾਸਿ. ਸਾ ਗਾਥਾਪਰਿਯੋਸਾਨੇ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰੀ ੨.੩.੨੨੦-੨੪੩) –

‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

‘‘ਤਦਾ ਸੇਟ੍ਠਿਕੁਲੇ ਜਾਤਾ, ਸੁਖਿਤਾ ਪੂਜਿਤਾ ਪਿਯਾ;

ਉਪੇਤ੍ਵਾ ਤਂ ਮੁਨਿਵਰਂ, ਅਸ੍ਸੋਸਿਂ ਮਧੁਰਂ ਵਚਂ.

‘‘ਆਰਦ੍ਧਵੀਰਿਯਾਨਗ੍ਗਂ, ਵਣ੍ਣੇਸਿ ਭਿਕ੍ਖੁਨਿਂ ਜਿਨੋ;

ਤਂ ਸੁਤ੍ਵਾ ਮੁਦਿਤਾ ਹੁਤ੍ਵਾ, ਕਾਰਂ ਕਤ੍ਵਾਨ ਸਤ੍ਥੁਨੋ.

‘‘ਅਭਿਵਾਦਿਯ ਸਮ੍ਬੁਦ੍ਧਂ, ਠਾਨਂ ਤਂ ਪਤ੍ਥਯਿਂ ਤਦਾ;

ਅਨੁਮੋਦਿ ਮਹਾਵੀਰੋ, ਸਿਜ੍ਝਤਂ ਪਣਿਧੀ ਤਵ.

‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

‘‘ਤਸ੍ਸ ਧਮ੍ਮੇਸੁ ਦਾਯਾਦਾ, ਓਰਸਾ ਧਮ੍ਮਨਿਮ੍ਮਿਤਾ;

ਸੋਣਾਤਿ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਿਕਾ.

‘‘ਤਂ ਸੁਤ੍ਵਾ ਮੁਦਿਤਾ ਹੁਤ੍ਵਾ, ਯਾਵਜੀਵਂ ਤਦਾ ਜਿਨਂ;

ਮੇਤ੍ਤਚਿਤ੍ਤਾ ਪਰਿਚਰਿਂ, ਪਚ੍ਚਯੇਹਿ ਵਿਨਾਯਕਂ.

‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਪਚ੍ਛਿਮੇ ਚ ਭਵੇ ਦਾਨਿ, ਜਾਤਾ ਸੇਟ੍ਠਿਕੁਲੇ ਅਹਂ;

ਸਾਵਤ੍ਥਿਯਂ ਪੁਰਵਰੇ, ਇਦ੍ਧੇ ਫੀਤੇ ਮਹਦ੍ਧਨੇ.

‘‘ਯਦਾ ਚ ਯੋਬ੍ਬਨਪ੍ਪਤ੍ਤਾ, ਗਨ੍ਤ੍ਵਾ ਪਤਿਕੁਲਂ ਅਹਂ;

ਦਸ ਪੁਤ੍ਤਾਨਿ ਅਜਨਿਂ, ਸੁਰੂਪਾਨਿ ਵਿਸੇਸਤੋ.

‘‘ਸੁਖੇਧਿਤਾ ਚ ਤੇ ਸਬ੍ਬੇ, ਜਨਨੇਤ੍ਤਮਨੋਹਰਾ;

ਅਮਿਤ੍ਤਾਨਮ੍ਪਿ ਰੁਚਿਤਾ, ਮਮ ਪਗੇਵ ਤੇ ਸਿਯਾ.

‘‘ਤਤੋ ਮਯ੍ਹਂ ਅਕਾਮਾਯ, ਦਸਪੁਤ੍ਤਪੁਰਕ੍ਖਤੋ;

ਪਬ੍ਬਜਿਤ੍ਥ ਸ ਮੇ ਭਤ੍ਤਾ, ਦੇਵਦੇਵਸ੍ਸ ਸਾਸਨੇ.

‘‘ਤਦੇਕਿਕਾ ਵਿਚਿਨ੍ਤੇਸਿਂ, ਜੀਵਿਤੇਨਾਲਮਤ੍ਥੁ ਮੇ;

ਚਤ੍ਤਾਯ ਪਤਿਪੁਤ੍ਤੇਹਿ, ਵੁਡ੍ਢਾਯ ਚ ਵਰਾਕਿਯਾ.

‘‘ਅਹਮ੍ਪਿ ਤਤ੍ਥ ਗਚ੍ਛਿਸ੍ਸਂ, ਸਮ੍ਪਤ੍ਤੋ ਯਤ੍ਥ ਮੇ ਪਤਿ;

ਏਵਾਹਂ ਚਿਨ੍ਤਯਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ.

‘‘ਤਤੋ ਚ ਮਂ ਭਿਕ੍ਖੁਨਿਯੋ, ਏਕਂ ਭਿਕ੍ਖੁਨੁਪਸ੍ਸਯੇ;

ਵਿਹਾਯ ਗਚ੍ਛੁਮੋਵਾਦਂ, ਤਾਪੇਹਿ ਉਦਕਂ ਇਤਿ.

‘‘ਤਦਾ ਉਦਕਮਾਹਿਤ੍ਵਾ, ਓਕਿਰਿਤ੍ਵਾਨ ਕੁਮ੍ਭਿਯਾ;

ਚੁਲ੍ਲੇ ਠਪੇਤ੍ਵਾ ਆਸੀਨਾ, ਤਤੋ ਚਿਤ੍ਤਂ ਸਮਾਦਹਿਂ.

‘‘ਖਨ੍ਧੇ ਅਨਿਚ੍ਚਤੋ ਦਿਸ੍ਵਾ, ਦੁਕ੍ਖਤੋ ਚ ਅਨਤ੍ਤਤੋ;

ਖੇਪੇਤ੍ਵਾ ਆਸਵੇ ਸਬ੍ਬੇ, ਅਰਹਤ੍ਤਮਪਾਪੁਣਿਂ.

‘‘ਤਦਾਗਨ੍ਤ੍ਵਾ ਭਿਕ੍ਖੁਨਿਯੋ, ਉਣ੍ਹੋਦਕਮਪੁਚ੍ਛਿਸੁਂ;

ਤੇਜੋਧਾਤੁਮਧਿਟ੍ਠਾਯ, ਖਿਪ੍ਪਂ ਸਨ੍ਤਾਪਯਿਂ ਜਲਂ.

‘‘ਵਿਮ੍ਹਿਤਾ ਤਾ ਜਿਨਵਰਂ, ਏਤਮਤ੍ਥਮਸਾਵਯੁਂ;

ਤਂ ਸੁਤ੍ਵਾ ਮੁਦਿਤੋ ਨਾਥੋ, ਇਮਂ ਗਾਥਂ ਅਭਾਸਥ.

‘‘ਯੋ ਚ ਵਸ੍ਸਸਤਂ ਜੀਵੇ, ਕੁਸੀਤੋ ਹੀਨਵੀਰਿਯੋ;

ਏਕਾਹਂ ਜੀਵਿਤਂ ਸੇਯ੍ਯੋ, ਵੀਰਿਯਮਾਰਭਤੋ ਦਲ਼੍ਹਂ.

‘‘ਆਰਾਧਿਤੋ ਮਹਾਵੀਰੋ, ਮਯਾ ਸੁਪ੍ਪਟਿਪਤ੍ਤਿਯਾ;

ਆਰਦ੍ਧਵੀਰਿਯਾਨਗ੍ਗਂ, ਮਮਾਹ ਸ ਮਹਾਮੁਨਿ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਥ ਨਂ ਭਗਵਾ ਭਿਕ੍ਖੁਨਿਯੋ ਪਟਿਪਾਟਿਯਾ ਠਾਨਨ੍ਤਰੇ ਠਪੇਨ੍ਤੋ ਆਰਦ੍ਧਵੀਰਿਯਾਨਂ ਅਗ੍ਗਟ੍ਠਾਨੇ ਠਪੇਸਿ. ਸਾ ਏਕਦਿਵਸਂ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਉਦਾਨਵਸੇਨ –

੧੦੨. ‘‘ਦਸ ਪੁਤ੍ਤੇ ਵਿਜਾਯਿਤ੍ਵਾ, ਅਸ੍ਮਿਂ ਰੂਪਸਮੁਸ੍ਸਯੇ;

ਤਤੋਹਂ ਦੁਬ੍ਬਲਾ ਜਿਣ੍ਣਾ, ਭਿਕ੍ਖੁਨਿਂ ਉਪਸਙ੍ਕਮਿਂ.

੧੦੩. ‘‘ਸਾ ਮੇ ਧਮ੍ਮਮਦੇਸੇਸਿ, ਖਨ੍ਧਾਯਤਨਧਾਤੁਯੋ;

ਤਸ੍ਸਾ ਧਮ੍ਮਂ ਸੁਣਿਤ੍ਵਾਨ, ਕੇਸੇ ਛੇਤ੍ਵਾਨ ਪਬ੍ਬਜਿਂ.

੧੦੪. ‘‘ਤਸ੍ਸਾ ਮੇ ਸਿਕ੍ਖਮਾਨਾਯ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਪੁਬ੍ਬੇਨਿਵਾਸਂ ਜਾਨਾਮਿ, ਯਤ੍ਥ ਮੇ ਵੁਸਿਤਂ ਪੁਰੇ.

੧੦੫. ‘‘ਅਨਿਮਿਤ੍ਤਞ੍ਚ ਭਾਵੇਮਿ, ਏਕਗ੍ਗਾ ਸੁਸਮਾਹਿਤਾ;

ਅਨਨ੍ਤਰਾਵਿਮੋਕ੍ਖਾਸਿਂ, ਅਨੁਪਾਦਾਯ ਨਿਬ੍ਬੁਤਾ.

੧੦੬. ‘‘ਪਞ੍ਚਕ੍ਖਨ੍ਧਾ ਪਰਿਞ੍ਞਾਤਾ, ਤਿਟ੍ਠਨ੍ਤਿ ਛਿਨ੍ਨਮੂਲਕਾ;

ਧਿ ਤਵਤ੍ਥੁ ਜਰੇ ਜਮ੍ਮੇ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ. – ਇਮਾ ਗਾਥਾ ਅਭਾਸਿ;

ਤਤ੍ਥ ਰੂਪਸਮੁਸ੍ਸਯੇਤਿ ਰੂਪਸਙ੍ਖਾਤੇ ਸਮੁਸ੍ਸਯੇ. ਅਯਞ੍ਹਿ ਰੂਪਸਦ੍ਦੋ ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿਆਦੀਸੁ (ਸਂ. ਨਿ. ੪.੬੦) ਰੂਪਾਯਤਨੇ ਆਗਤੋ. ‘‘ਯਂਕਿਞ੍ਚਿ ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨ’’ਨ੍ਤਿਆਦੀਸੁ (ਅ. ਨਿ. ੪.੧੮੧) ਰੂਪਕ੍ਖਨ੍ਧੇ. ‘‘ਪਿਯਰੂਪੇ ਸਾਤਰੂਪੇ ਰਜ੍ਜਤੀ’’ਤਿਆਦੀਸੁ (ਮ. ਨਿ. ੧.੪੦੯) ਸਭਾਵੇ. ‘‘ਬਹਿਦ੍ਧਾ ਰੂਪਾਨਿ ਪਸ੍ਸਤੀ’’ਤਿਆਦੀਸੁ (ਦੀ. ਨਿ. ੩.੩੩੮; ਅ. ਨਿ. ੧.੪੨੭-੪੩੪) ਕਸਿਣਾਯਤਨੇ. ‘‘ਰੂਪੀ ਰੂਪਾਨਿ ਪਸ੍ਸਤੀ’’ਤਿਆਦੀਸੁ (ਦੀ. ਨਿ. ੩.੩੩੯; ਅ. ਨਿ. ੧.੪੩੫-੪੪੨) ਰੂਪਝਾਨੇ. ‘‘ਅਟ੍ਠਿਞ੍ਚ ਪਟਿਚ੍ਚ ਨ੍ਹਾਰੁਞ੍ਚ ਪਟਿਚ੍ਚ ਮਂਸਞ੍ਚ ਪਟਿਚ੍ਚ ਚਮ੍ਮਞ੍ਚ ਪਟਿਚ੍ਚ ਆਕਾਸੋ ਪਰਿਵਾਰਿਤੋ ਰੂਪਨ੍ਤ੍ਵੇਵ ਸਙ੍ਖਂ ਗਚ੍ਛਤੀ’’ਤਿਆਦੀਸੁ (ਮ. ਨਿ. ੧.੩੦੬) ਰੂਪਕਾਯੇ. ਇਧਾਪਿ ਰੂਪਕਾਯੇਵ ਦਟ੍ਠਬ੍ਬੋ. ਸਮੁਸ੍ਸਯਸਦ੍ਦੋਪਿ ਅਟ੍ਠੀਨਂ ਸਰੀਰਸ੍ਸ ਪਰਿਯਾਯੋ. ‘‘ਸਤਨ੍ਤਿ ਸਮੁਸ੍ਸਯਾ’’ਤਿਆਦੀਸੁ ਅਟ੍ਠਿਸਰੀਰਪਰਿਯਾਯੇ. ‘‘ਆਤੁਰਂ ਅਸੁਚਿਂ ਪੂਤਿਂ, ਪਸ੍ਸ ਨਨ੍ਦੇ ਸਮੁਸ੍ਸਯ’’ਨ੍ਤਿਆਦੀਸੁ (ਥੇਰਗਾ. ੧੯) ਸਰੀਰੇ. ਇਧਾਪਿ ਸਰੀਰੇ ਏਵ ਦਟ੍ਠਬ੍ਬੋ. ਤੇਨ ਵੁਤ੍ਤਂ – ‘‘ਰੂਪਸਮੁਸ੍ਸਯੇ’’ਤਿ, ਰੂਪਸਙ੍ਖਾਤੇ ਸਮੁਸ੍ਸਯੇ ਸਰੀਰੇਤਿ ਅਤ੍ਥੋ. ਠਤ੍ਵਾਤਿ ਵਚਨਸੇਸੋ. ਅਸ੍ਮਿਂ ਰੂਪਸਮੁਸ੍ਸਯੇਤਿ ਹਿ ਇਮਸ੍ਮਿਂ ਰੂਪਸਮੁਸ੍ਸਯੇ ਠਤ੍ਵਾ ਇਮਂ ਰੂਪਕਾਯਂ ਨਿਸ੍ਸਾਯ ਦਸ ਪੁਤ੍ਤੇ ਵਿਜਾਯਿਤ੍ਵਾਤਿ ਯੋਜਨਾ. ਤਤੋਤਿ ਤਸ੍ਮਾ ਦਸਪੁਤ੍ਤਵਿਜਾਯਨਹੇਤੁ. ਸਾ ਹਿ ਪਠਮਵਯਂ ਅਤਿਕ੍ਕਮਿਤ੍ਵਾ ਪੁਤ੍ਤਕੇ ਵਿਜਾਯਨ੍ਤੀ ਅਨੁਕ੍ਕਮੇਨ ਦੁਬ੍ਬਲਸਰੀਰਾ ਜਰਾਜਿਣ੍ਣਾ ਚ ਅਹੋਸਿ. ਤੇਨ ਵੁਤ੍ਤਂ ‘‘ਤਤੋਹਂ ਦੁਬ੍ਬਲਾ ਜਿਣ੍ਣਾ’’ਤਿ.

ਤਸ੍ਸਾਤਿ ਤਤੋ, ਤਸ੍ਸਾਤਿ ਵਾ ਤਸ੍ਸਾ ਸਨ੍ਤਿਕੇ. ਪੁਨ ਤਸ੍ਸਾਤਿ ਕਰਣੇ ਸਾਮਿਵਚਨਂ, ਤਾਯਾਤਿ ਅਤ੍ਥੋ. ਸਿਕ੍ਖਮਾਨਾਯਾਤਿ ਤਿਸ੍ਸੋਪਿ ਸਿਕ੍ਖਾ ਸਿਕ੍ਖਮਾਨਾ.

ਅਨਨ੍ਤਰਾਵਿਮੋਕ੍ਖਾਸਿਨ੍ਤਿ ਅਗ੍ਗਮਗ੍ਗਸ੍ਸ ਅਨਨ੍ਤਰਾ ਉਪ੍ਪਨ੍ਨਵਿਮੋਕ੍ਖਾ ਆਸਿਂ. ਰੂਪੀ ਰੂਪਾਨਿ ਪਸ੍ਸਤੀਤਿਆਦਯੋ ਹਿ ਅਟ੍ਠਪਿ ਵਿਮੋਕ੍ਖਾ ਅਨਨ੍ਤਰਵਿਮੋਕ੍ਖਾ ਨਾਮ ਨ ਹੋਨ੍ਤਿ. ਮਗ੍ਗਾਨਨ੍ਤਰਂ ਅਨੁਪ੍ਪਤ੍ਤਾ ਹਿ ਫਲਵਿਮੋਕ੍ਖਾ ਫਲਸਮਾਪਤ੍ਤਿਕਾਲੇ ਪਵਤ੍ਤਮਾਨਾਪਿ ਪਠਮਮਗ੍ਗਾਨਨ੍ਤਰਮੇਵ ਸਮੁਪ੍ਪਤ੍ਤਿਤੋ ਤਂ ਉਪਾਦਾਯ ਅਨਨ੍ਤਰਵਿਮੋਕ੍ਖਾ ਨਾਮ, ਯਥਾ ਮਗ੍ਗਸਮਾਧਿ ਆਨਨ੍ਤਰਿਕਸਮਾਧੀਤਿ ਵੁਚ੍ਚਤਿ. ਅਨੁਪਾਦਾਯ ਨਿਬ੍ਬੁਤਾਤਿ ਰੂਪਾਦੀਸੁ ਕਿਞ੍ਚਿਪਿ ਅਗ੍ਗਹੇਤ੍ਵਾ ਕਿਲੇਸਪਰਿਨਿਬ੍ਬਾਨੇਨ ਨਿਬ੍ਬੁਤਾ ਆਸਿਂ.

ਏਵਂ ਵਿਜ੍ਜਾਤ੍ਤਯਂ ਵਿਭਾਵੇਤ੍ਵਾ ਅਰਹਤ੍ਤਫਲੇਨ ਕੂਟਂ ਗਣ੍ਹਨ੍ਤੀ ਉਦਾਨੇਤ੍ਵਾ, ਇਦਾਨਿ ਜਰਾਯ ਚਿਰਕਾਲਂ ਉਪਦ੍ਦੁਤਸਰੀਰਂ ਵਿਗਰਹਨ੍ਤੀ ਸਹ ਵਤ੍ਥੁਨਾ ਤਸ੍ਸ ਸਮਤਿਕ੍ਕਨ੍ਤਭਾਵਂ ਵਿਭਾਵੇਤੁਂ ‘‘ਪਞ੍ਚਕ੍ਖਨ੍ਧਾ ਪਰਿਞ੍ਞਾਤਾ’’ਤਿ ਓਸਾਨਗਾਥਮਾਹ. ਤਤ੍ਥ ਧਿ ਤਵਤ੍ਥੁ ਜਰੇ ਜਮ੍ਮੇਤਿ ਅਙ੍ਗਾਨਂ ਸਿਥਿਲਭਾਵਕਰਣਾਦਿਨਾ ਜਰੇ ਜਮ੍ਮੇ ਲਾਮਕੇ ਹੀਨੇ ਤਵ ਤੁਯ੍ਹਂ ਧਿ ਅਤ੍ਥੁ ਧਿਕਾਰੋ ਹੋਤੁ. ਨਤ੍ਥਿ ਦਾਨਿ ਪੁਨਬ੍ਭਵੋਤਿ ਤਸ੍ਮਾ ਤ੍ਵਂ ਮਯਾ ਅਤਿਕ੍ਕਨ੍ਤਾ ਅਭਿਭੂਤਾਸੀਤਿ ਅਧਿਪ੍ਪਾਯੋ.

ਸੋਣਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.