੭. ਸਕੁਲਾਥੇਰੀਗਾਥਾਵਣ੍ਣਨਾ

ਅਗਾਰਸ੍ਮਿਂ ਵਸਨ੍ਤੀਤਿਆਦਿਕਾ ਸਕੁਲਾਯ ਥੇਰਿਯਾ ਗਾਥਾ. ਅਯਂ ਕਿਰ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਆਨਨ੍ਦਸ੍ਸ ਰਞ੍ਞੋ ਧੀਤਾ ਹੁਤ੍ਵਾ ਨਿਬ੍ਬਤ੍ਤਾ, ਸਤ੍ਥੁ ਵੇਮਾਤਿਕਭਗਿਨੀ ਨਨ੍ਦਾਤਿ ਨਾਮੇਨ. ਸਾ ਵਿਞ੍ਞੁਤਂ ਪਤ੍ਵਾ ਏਕਦਿਵਸਂ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤੀ ਸਤ੍ਥਾਰਾ ਏਕਂ ਭਿਕ੍ਖੁਨਿਂ ਦਿਬ੍ਬਚਕ੍ਖੁਕਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਉਸ੍ਸਾਹਜਾਤਾ ਅਧਿਕਾਰਕਮ੍ਮਂ ਕਤ੍ਵਾ ਸਯਮ੍ਪਿ ਤਂ ਠਾਨਨ੍ਤਰਂ ਪਤ੍ਥੇਨ੍ਤੀ ਪਣਿਧਾਨਮਕਾਸਿ. ਸਾ ਤਤ੍ਥ ਯਾਵਜੀਵਂ ਬਹੁਂ ਉਲ਼ਾਰਂ ਕੁਸਲਕਮ੍ਮਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਅਪਰਾਪਰਂ ਸੁਗਤੀਸੁਯੇਵ ਸਂਸਰਨ੍ਤੀ ਕਸ੍ਸਪਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਪਰਿਬ੍ਬਾਜਕਪਬ੍ਬਜ੍ਜਂ ਪਬ੍ਬਜਿਤ੍ਵਾ ਏਕਚਾਰਿਨੀ ਵਿਚਰਨ੍ਤੀ ਏਕਦਿਵਸਂ ਤੇਲਭਿਕ੍ਖਾਯ ਆਹਿਣ੍ਡਿਤ੍ਵਾ ਤੇਲਂ ਲਭਿਤ੍ਵਾ ਤੇਨ ਤੇਲੇਨ ਸਤ੍ਥੁ ਚੇਤਿਯੇ ਸਬ੍ਬਰਤ੍ਤਿਂ ਦੀਪਪੂਜਂ ਅਕਾਸਿ. ਸਾ ਤਤੋ ਚੁਤਾ ਤਾਵਤਿਂਸੇ ਨਿਬ੍ਬਤ੍ਤਿਤ੍ਵਾ ਸੁਵਿਸੁਦ੍ਧਦਿਬ੍ਬਚਕ੍ਖੁਕਾ ਹੁਤ੍ਵਾ ਏਕਂ ਬੁਦ੍ਧਨ੍ਤਰਂ ਦੇਵੇਸੁਯੇਵ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ. ਸਕੁਲਾਤਿਸ੍ਸਾ ਨਾਮਂ ਅਹੋਸਿ. ਸਾ ਵਿਞ੍ਞੁਤਂ ਪਤ੍ਤਾ ਸਤ੍ਥੁ ਜੇਤਵਨਪਟਿਗ੍ਗਹਣੇ ਪਟਿਲਦ੍ਧਸਦ੍ਧਾ ਉਪਾਸਿਕਾ ਹੁਤ੍ਵਾ ਅਪਰਭਾਗੇ ਅਞ੍ਞਤਰਸ੍ਸ ਖੀਣਾਸਵਤ੍ਥੇਰਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਸਞ੍ਜਾਤਸਂਵੇਗਾ ਪਬ੍ਬਜਿਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਘਟੇਨ੍ਤੀ ਵਾਯਮਨ੍ਤੀ ਨ ਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰੀ ੨.੩.੧੩੧-੧੬੫) –

‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

‘‘ਹਿਤਾਯ ਸਬ੍ਬਸਤ੍ਤਾਨਂ, ਸੁਖਾਯ ਵਦਤਂ ਵਰੋ;

ਅਤ੍ਥਾਯ ਪੁਰਿਸਾਜਞ੍ਞੋ, ਪਟਿਪਨ੍ਨੋ ਸਦੇਵਕੇ.

‘‘ਯਸਗ੍ਗਪਤ੍ਤੋ ਸਿਰਿਮਾ, ਕਿਤ੍ਤਿਵਣ੍ਣਗਤੋ ਜਿਨੋ;

ਪੂਜਿਤੋ ਸਬ੍ਬਲੋਕਸ੍ਸ, ਦਿਸਾ ਸਬ੍ਬਾਸੁ ਵਿਸ੍ਸੁਤੋ.

‘‘ਉਤ੍ਤਿਣ੍ਣਵਿਚਿਕਿਚ੍ਛੋ ਸੋ, ਵੀਤਿਵਤ੍ਤਕਥਂਕਥੋ;

ਸਮ੍ਪੁਣ੍ਣਮਨਸਙ੍ਕਪ੍ਪੋ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.

‘‘ਅਨੁਪ੍ਪਨ੍ਨਸ੍ਸ ਮਗ੍ਗਸ੍ਸ, ਉਪ੍ਪਾਦੇਤਾ ਨਰੁਤ੍ਤਮੋ;

ਅਨਕ੍ਖਾਤਞ੍ਚ ਅਕ੍ਖਾਸਿ, ਅਸਞ੍ਜਾਤਞ੍ਚ ਸਞ੍ਜਨੀ.

‘‘ਮਗ੍ਗਞ੍ਞੂ ਚ ਮਗ੍ਗਵਿਦੂ, ਮਗ੍ਗਕ੍ਖਾਯੀ ਨਰਾਸਭੋ;

ਮਗ੍ਗਸ੍ਸ ਕੁਸਲੋ ਸਤ੍ਥਾ, ਸਾਰਥੀਨਂ ਵਰੁਤ੍ਤਮੋ.

‘‘ਮਹਾਕਾਰੁਣਿਕੋ ਸਤ੍ਥਾ, ਧਮ੍ਮਂ ਦੇਸੇਤਿ ਨਾਯਕੋ;

ਨਿਮੁਗ੍ਗੇ ਕਾਮਪਙ੍ਕਮ੍ਹਿ, ਸਮੁਦ੍ਧਰਤਿ ਪਾਣਿਨੇ.

‘‘ਤਦਾਹਂ ਹਂਸਵਤਿਯਂ, ਜਾਤਾ ਖਤ੍ਤਿਯਨਨ੍ਦਨਾ;

ਸੁਰੂਪਾ ਸਧਨਾ ਚਾਪਿ, ਦਯਿਤਾ ਚ ਸਿਰੀਮਤੀ.

‘‘ਆਨਨ੍ਦਸ੍ਸ ਮਹਾਰਞ੍ਞੋ, ਧੀਤਾ ਪਰਮਸੋਭਨਾ;

ਵੇਮਾਤਾ ਭਗਿਨੀ ਚਾਪਿ, ਪਦੁਮੁਤ੍ਤਰਨਾਮਿਨੋ.

‘‘ਰਾਜਕਞ੍ਞਾਹਿ ਸਹਿਤਾ, ਸਬ੍ਬਾਭਰਣਭੂਸਿਤਾ;

ਉਪਾਗਮ੍ਮ ਮਹਾਵੀਰਂ, ਅਸ੍ਸੋਸਿਂ ਧਮ੍ਮਦੇਸਨਂ.

‘‘ਤਦਾ ਹਿ ਸੋ ਲੋਕਗਰੁ, ਭਿਕ੍ਖੁਨਿਂ ਦਿਬ੍ਬਚਕ੍ਖੁਕਂ;

ਕਿਤ੍ਤਯਂ ਪਰਿਸਾਮਜ੍ਝੇ, ਅਗ੍ਗਟ੍ਠਾਨੇ ਠਪੇਸਿ ਤਂ.

‘‘ਸੁਣਿਤ੍ਵਾ ਤਮਹਂ ਹਟ੍ਠਾ, ਦਾਨਂ ਦਤ੍ਵਾਨ ਸਤ੍ਥੁਨੋ;

ਪੂਜਿਤ੍ਵਾਨ ਚ ਸਮ੍ਬੁਦ੍ਧਂ, ਦਿਬ੍ਬਚਕ੍ਖੁਂ ਅਪਤ੍ਥਯਿਂ.

‘‘ਤਤੋ ਅਵੋਚ ਮਂ ਸਤ੍ਥਾ, ਨਨ੍ਦੇ ਲਚ੍ਛਸਿ ਪਤ੍ਥਿਤਂ;

ਪਦੀਪਧਮ੍ਮਦਾਨਾਨਂ, ਫਲਮੇਤਂ ਸੁਨਿਚ੍ਛਿਤਂ.

‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

‘‘ਤਸ੍ਸ ਧਮ੍ਮੇਸੁ ਦਾਯਾਦਾ, ਓਰਸਾ ਧਮ੍ਮਨਿਮ੍ਮਿਤਾ;

ਸਕੁਲਾ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਿਕਾ.

‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

‘‘ਪਰਿਬ੍ਬਾਜਕਿਨੀ ਆਸਿਂ, ਤਦਾਹਂ ਏਕਚਾਰਿਨੀ;

ਭਿਕ੍ਖਾਯ ਵਿਚਰਿਤ੍ਵਾਨ, ਅਲਭਿਂ ਤੇਲਮਤ੍ਤਕਂ.

‘‘ਤੇਨ ਦੀਪਂ ਪਦੀਪੇਤ੍ਵਾ, ਉਪਟ੍ਠਿਂ ਸਬ੍ਬਸਂਵਰਿਂ;

ਚੇਤਿਯਂ ਦ੍ਵਿਪਦਗ੍ਗਸ੍ਸ, ਵਿਪ੍ਪਸਨ੍ਨੇਨ ਚੇਤਸਾ.

‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਯਤ੍ਥ ਯਤ੍ਥੂਪਪਜ੍ਜਾਮਿ, ਤਸ੍ਸ ਕਮ੍ਮਸ੍ਸ ਵਾਹਸਾ;

ਪਜ੍ਜਲਨ੍ਤਿ ਮਹਾਦੀਪਾ, ਤਤ੍ਥ ਤਤ੍ਥ ਗਤਾਯ ਮੇ.

‘‘ਤਿਰੋਕੁਟ੍ਟਂ ਤਿਰੋਸੇਲਂ, ਸਮਤਿਗ੍ਗਯ੍ਹ ਪਬ੍ਬਤਂ;

ਪਸ੍ਸਾਮਹਂ ਯਦਿਚ੍ਛਾਮਿ, ਦੀਪਦਾਨਸ੍ਸਿਦਂ ਫਲਂ.

‘‘ਵਿਸੁਦ੍ਧਨਯਨਾ ਹੋਮਿ, ਯਸਸਾ ਚ ਜਲਾਮਹਂ;

ਸਦ੍ਧਾਪਞ੍ਞਾਵਤੀ ਚੇਵ, ਦੀਪਦਾਨਸ੍ਸਿਦਂ ਫਲਂ.

‘‘ਪਚ੍ਛਿਮੇ ਚ ਭਵੇ ਦਾਨਿ, ਜਾਤਾ ਵਿਪ੍ਪਕੁਲੇ ਅਹਂ;

ਪਹੂਤਧਨਧਞ੍ਞਮ੍ਹਿ, ਮੁਦਿਤੇ ਰਾਜਪੂਜਿਤੇ.

‘‘ਅਹਂ ਸਬ੍ਬਙ੍ਗਸਮ੍ਪਨ੍ਨਾ, ਸਬ੍ਬਾਭਰਣਭੂਸਿਤਾ;

ਪੁਰਪ੍ਪਵੇਸੇ ਸੁਗਤਂ, ਵਾਤਪਾਨੇ ਠਿਤਾ ਅਹਂ.

‘‘ਦਿਸ੍ਵਾ ਜਲਨ੍ਤਂ ਯਸਸਾ, ਦੇਵਮਨੁਸ੍ਸਸਕ੍ਕਤਂ;

ਅਨੁਬ੍ਯਞ੍ਜਨਸਮ੍ਪਨ੍ਨਂ, ਲਕ੍ਖਣੇਹਿ ਵਿਭੂਸਿਤਂ.

‘‘ਉਦਗ੍ਗਚਿਤ੍ਤਾ ਸੁਮਨਾ, ਪਬ੍ਬਜ੍ਜਂ ਸਮਰੋਚਯਿਂ;

ਨ ਚਿਰੇਨੇਵ ਕਾਲੇਨ, ਅਰਹਤ੍ਤਮਪਾਪੁਣਿਂ.

‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਪਰਚਿਤ੍ਤਾਨਿ ਜਾਨਾਮਿ, ਸਤ੍ਥੁਸਾਸਨਕਾਰਿਕਾ.

‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਖੇਪੇਤ੍ਵਾ ਆਸਵੇ ਸਬ੍ਬੇ, ਵਿਸੁਦ੍ਧਾਸਿਂ ਸੁਨਿਮ੍ਮਲਾ.

‘‘ਪਰਿਚਿਣ੍ਣੋ ਮਯਾ ਸਤ੍ਥਾ, ਕਤਂ ਬੁਦ੍ਧਸ੍ਸ ਸਾਸਨਂ;

ਓਹਿਤੋ ਗਰੁਕੋ ਭਾਰੋ, ਭਵਨੇਤ੍ਤਿਸਮੂਹਤਾ.

‘‘ਯਸ੍ਸਤ੍ਥਾਯ ਪਬ੍ਬਜਿਤਾ, ਅਗਾਰਸ੍ਮਾਨਗਾਰਿਯਂ;

ਸੋ ਮੇ ਅਤ੍ਥੋ ਅਨੁਪ੍ਪਤ੍ਤੋ, ਸਬ੍ਬਸਂਯੋਜਨਕ੍ਖਯੋ.

‘‘ਤਤੋ ਮਹਾਕਾਰੁਣਿਕੋ, ਏਤਦਗ੍ਗੇ ਠਪੇਸਿ ਮਂ;

ਦਿਬ੍ਬਚਕ੍ਖੁਕਾਨਂ ਅਗ੍ਗਾ, ਸਕੁਲਾਤਿ ਨਰੁਤ੍ਤਮੋ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਕਤਾਧਿਕਾਰਤਾਯ ਦਿਬ੍ਬਚਕ੍ਖੁਞਾਣੇ ਚਿਣ੍ਣਵਸੀ ਅਹੋਸਿ. ਤੇਨ ਨਂ ਸਤ੍ਥਾ ਦਿਬ੍ਬਚਕ੍ਖੁਕਾਨਂ ਭਿਕ੍ਖੁਨੀਨਂ ਅਗ੍ਗਟ੍ਠਾਨੇ ਠਪੇਸਿ. ਸਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਪੀਤਿਸੋਮਨਸ੍ਸਜਾਤਾ ਉਦਾਨਵਸੇਨ –

੯੭. ‘‘ਅਗਾਰਸ੍ਮਿਂ ਵਸਨ੍ਤੀਹਂ, ਧਮ੍ਮਂ ਸੁਤ੍ਵਾਨ ਭਿਕ੍ਖੁਨੋ;

ਅਦ੍ਦਸਂ ਵਿਰਜਂ ਧਮ੍ਮਂ, ਨਿਬ੍ਬਾਨਂ ਪਦਮਚ੍ਚੁਤਂ.

੯੮. ‘‘ਸਾਹਂ ਪੁਤ੍ਤਂ ਧੀਤਰਞ੍ਚ, ਧਨਧਞ੍ਞਞ੍ਚ ਛਡ੍ਡਿਯ;

ਕੇਸੇ ਛੇਦਾਪਯਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ.

੯੯. ‘‘ਸਿਕ੍ਖਮਾਨਾ ਅਹਂ ਸਨ੍ਤੀ, ਭਾਵੇਨ੍ਤੀ ਮਗ੍ਗਮਞ੍ਜਸਂ;

ਪਹਾਸਿਂ ਰਾਗਦੋਸਞ੍ਚ, ਤਦੇਕਟ੍ਠੇ ਚ ਆਸਵੇ.

੧੦੦. ‘‘ਭਿਕ੍ਖੁਨੀ ਉਪਸਮ੍ਪਜ੍ਜ, ਪੁਬ੍ਬਜਾਤਿਮਨੁਸ੍ਸਰਿਂ;

ਦਿਬ੍ਬਚਕ੍ਖੁ ਵਿਸੋਧਿਤਂ, ਵਿਮਲਂ ਸਾਧੁਭਾਵਿਤਂ.

੧੦੧. ‘‘ਸਙ੍ਖਾਰੇ ਪਰਤੋ ਦਿਸ੍ਵਾ, ਹੇਤੁਜਾਤੇ ਪਲੋਕਿਤੇ;

ਪਹਾਸਿਂ ਆਸਵੇ ਸਬ੍ਬੇ, ਸੀਤਿਭੂਤਾਮ੍ਹਿ ਨਿਬ੍ਬੁਤਾ’’ਤਿ. –

ਇਮਾ ਗਾਥਾ ਅਭਾਸਿ.

ਤਤ੍ਥ ਅਗਾਰਸ੍ਮਿਂ ਵਸਨ੍ਤੀਹਂ, ਧਮ੍ਮਂ ਸੁਤ੍ਵਾਨ ਭਿਕ੍ਖੁਨੋਤਿ ਅਹਂ ਪੁਬ੍ਬੇ ਅਗਾਰਮਜ੍ਝੇ ਵਸਮਾਨਾ ਅਞ੍ਞਤਰਸ੍ਸ ਭਿਨ੍ਨਕਿਲੇਸਸ੍ਸ ਭਿਕ੍ਖੁਨੋ ਸਨ੍ਤਿਕੇ ਚਤੁਸਚ੍ਚਗਬ੍ਭਂ ਧਮ੍ਮਕਥਂ ਸੁਤ੍ਵਾ. ਅਦ੍ਦਸਂ ਵਿਰਜਂ ਧਮ੍ਮਂ, ਨਿਬ੍ਬਾਨਂ ਪਦਮਚ੍ਚੁਤਨ੍ਤਿ ਰਾਗਰਜਾਦੀਨਂ ਅਭਾਵੇਨ ਵਿਰਜਂ, ਵਾਨਤੋ ਨਿਕ੍ਖਨ੍ਤਤ੍ਤਾ ਨਿਬ੍ਬਾਨਂ, ਚਵਨਾਭਾਵਤੋ ਅਧਿਗਤਾਨਂ ਅਚ੍ਚੁਤਿਹੇਤੁਤਾਯ ਚ ਨਿਬ੍ਬਾਨਂ ਅਚ੍ਚੁਤਂ, ਪਦਨ੍ਤਿ ਚ ਲਦ੍ਧਨਾਮਂ ਅਸਙ੍ਖਤਧਮ੍ਮਂ, ਸਹਸ੍ਸਨਯਪਟਿਮਣ੍ਡਿਤੇਨ ਦਸ੍ਸਨਸਙ੍ਖਾਤੇਨ ਧਮ੍ਮਚਕ੍ਖੁਨਾ ਅਦ੍ਦਸਂ ਪਸ੍ਸਿਂ.

ਸਾਹਨ੍ਤਿ ਸਾ ਅਹਂ ਵੁਤ੍ਤਪ੍ਪਕਾਰੇਨ ਸੋਤਾਪਨ੍ਨਾ ਹੋਮਿ.

ਸਿਕ੍ਖਮਾਨਾ ਅਹਂ ਸਨ੍ਤੀਤਿ ਅਹਂ ਸਿਕ੍ਖਮਾਨਾਵ ਸਮਾਨਾ ਪਬ੍ਬਜਿਤ੍ਵਾ ਵਸ੍ਸੇ ਅਪਰਿਪੁਣ੍ਣੇ ਏਵ. ਭਾਵੇਨ੍ਤੀ ਮਗ੍ਗਮਞ੍ਜਸਨ੍ਤਿ ਮਜ੍ਝਿਮਪਟਿਪਤ੍ਤਿਭਾਵਤੋ ਅਞ੍ਜਸਂ ਉਪਰਿਮਗ੍ਗਂ ਉਪ੍ਪਾਦੇਨ੍ਤੀ. ਤਦੇਕਟ੍ਠੇ ਚ ਆਸਵੇਤਿ ਰਾਗਦੋਸੇਹਿ ਸਹਜੇਕਟ੍ਠੇ ਪਹਾਨੇਕਟ੍ਠੇ ਚ ਤਤਿਯਮਗ੍ਗਵਜ੍ਝੇ ਆਸਵੇ ਪਹਾਸਿਂ ਸਮੁਚ੍ਛਿਨ੍ਦਿਂ.

ਭਿਕ੍ਖੁਨੀ ਉਪਸਮ੍ਪਜ੍ਜਾਤਿ ਵਸ੍ਸੇ ਪਰਿਪੁਣ੍ਣੇ ਉਪਸਮ੍ਪਜ੍ਜਿਤ੍ਵਾ ਭਿਕ੍ਖੁਨੀ ਹੁਤ੍ਵਾ. ਵਿਮਲਨ੍ਤਿ ਅਵਿਜ੍ਜਾਦੀਹਿ ਉਪਕ੍ਕਿਲੇਸੇਹਿ ਵਿਮੁਤ੍ਤਤਾਯ ਵਿਗਤਮਲਂ, ਸਾਧੁ ਸਕ੍ਕਚ੍ਚ ਸਮ੍ਮਦੇਵ ਭਾਵਿਤਂ, ਸਾਧੂਹਿ ਵਾ ਬੁਦ੍ਧਾਦੀਹਿ ਭਾਵਿਤਂ ਉਪ੍ਪਾਦਿਤਂ ਦਿਬ੍ਬਚਕ੍ਖੁ ਵਿਸੋਧਿਤਨ੍ਤਿ ਸਮ੍ਬਨ੍ਧੋ.

ਸਙ੍ਖਾਰੇਤਿ ਤੇਭੂਮਕਸਙ੍ਖਾਰੇ. ਪਰਤੋਤਿ ਅਨਤ੍ਤਤੋ. ਹੇਤੁਜਾਤੇਤਿ ਪਚ੍ਚਯੁਪ੍ਪਨ੍ਨੇ. ਪਲੋਕਿਤੇਤਿ ਪਲੁਜ੍ਜਨਸਭਾਵੇ ਪਭਙ੍ਗੁਨੇ ਪਞ੍ਞਾਚਕ੍ਖੁਨਾ ਦਿਸ੍ਵਾ. ਪਹਾਸਿਂ ਆਸਵੇ ਸਬ੍ਬੇਤਿ ਅਗ੍ਗਮਗ੍ਗੇਨ ਅਵਸਿਟ੍ਠੇ ਸਬ੍ਬੇਪਿ ਆਸਵੇ ਪਜਹਿਂ, ਖੇਪੇਸਿਨ੍ਤਿ ਅਤ੍ਥੋ. ਸੇਸਂ ਵੁਤ੍ਤਨਯਮੇਵ.

ਸਕੁਲਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.