੩. ਸੀਹਾਥੇਰੀਗਾਥਾਵਣ੍ਣਨਾ

ਅਯੋਨਿਸੋ ਮਨਸਿਕਾਰਾਤਿਆਦਿਕਾ ਸੀਹਾਯ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵੇਸਾਲਿਯਂ ਸੀਹਸੇਨਾਪਤਿਨੋ ਭਗਿਨਿਯਾ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸਾ ‘‘ਮਾਤੁਲਸ੍ਸ ਨਾਮਂ ਕਰੋਮਾ’’ਤਿ ਸੀਹਾਤਿ ਨਾਮਂ ਅਕਂਸੁ. ਸਾ ਵਿਞ੍ਞੁਤਂ ਪਤ੍ਵਾ ਏਕਦਿਵਸਂ ਸਤ੍ਥਾਰਾ ਸੀਹਸ੍ਸ ਸੇਨਾਪਤਿਨੋ ਧਮ੍ਮੇ ਦੇਸਿਯਮਾਨੇ ਤਂ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧਾ ਮਾਤਾਪਿਤਰੋ ਅਨੁਜਾਨਾਪੇਤ੍ਵਾ ਪਬ੍ਬਜਿ. ਪਬ੍ਬਜਿਤ੍ਵਾ ਚ ਵਿਪਸ੍ਸਨਂ ਆਰਭਿਤ੍ਵਾਪਿ ਬਹਿਦ੍ਧਾ ਪੁਥੁਤ੍ਤਾਰਮ੍ਮਣੇ ਵਿਧਾਵਨ੍ਤਂ ਚਿਤ੍ਤਂ ਨਿਵਤ੍ਤੇਤੁਂ ਅਸਕ੍ਕੋਨ੍ਤੀ ਸਤ੍ਤ ਸਂਵਚ੍ਛਰਾਨਿ ਮਿਚ੍ਛਾਵਿਤਕ੍ਕੇਹਿ ਬਾਧੀਯਮਾਨਾ ਚਿਤ੍ਤਸ੍ਸਾਦਂ ਅਲਭਨ੍ਤੀ ‘‘ਕਿਂ ਮੇ ਇਮਿਨਾ ਪਾਪਜੀਵਿਤੇਨ, ਉਬ੍ਬਨ੍ਧਿਤ੍ਵਾ ਮਰਿਸ੍ਸਾਮੀ’’ਤਿ ਪਾਸਂ ਗਹੇਤ੍ਵਾ ਰੁਕ੍ਖਸਾਖਾਯਂ ਲਗ੍ਗਿਤ੍ਵਾ ਤਂ ਅਤ੍ਤਨੋ ਕਣ੍ਠੇ ਪਟਿਮੁਞ੍ਚਨ੍ਤੀ ਪੁਬ੍ਬਾਚਿਣ੍ਣਵਸੇਨ ਵਿਪਸ੍ਸਨਾਯ ਚਿਤ੍ਤਂ ਅਭਿਨੀਹਰਿ, ਅਨ੍ਤਿਮਭਵਿਕਤਾਯ ਪਾਸਸ੍ਸ ਬਨ੍ਧਨਂ ਗੀਵਟ੍ਠਾਨੇ ਅਹੋਸਿ, ਞਾਣਸ੍ਸ ਪਰਿਪਾਕਂ ਗਤਤ੍ਤਾ ਸਾ ਤਾਵਦੇਵ ਵਿਪਸ੍ਸਨਂ ਵਡ੍ਢੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਅਰਹਤ੍ਤਂ ਪਤ੍ਤਸਮਕਾਲਮੇਵ ਚ ਪਾਸਬਨ੍ਧੋ ਗੀਵਤੋ ਮੁਚ੍ਚਿਤ੍ਵਾ ਵਿਨਿਵਤ੍ਤਿ. ਸਾ ਅਰਹਤ੍ਤੇ ਪਤਿਟ੍ਠਿਤਾ ਉਦਾਨਵਸੇਨ –

੭੭. ‘‘ਅਯੋਨਿਸੋ ਮਨਸਿਕਾਰਾ, ਕਾਮਰਾਗੇਨ ਅਟ੍ਟਿਤਾ;

ਅਹੋਸਿਂ ਉਦ੍ਧਤਾ ਪੁਬ੍ਬੇ, ਚਿਤ੍ਤੇ ਅਵਸਵਤ੍ਤਿਨੀ.

੭੮. ‘‘ਪਰਿਯੁਟ੍ਠਿਤਾ ਕ੍ਲੇਸੇਹਿ, ਸੁਭਸਞ੍ਞਾਨੁਵਤ੍ਤਿਨੀ;

ਸਮਂ ਚਿਤ੍ਤਸ੍ਸ ਨ ਲਭਿਂ, ਰਾਗਚਿਤ੍ਤਵਸਾਨੁਗਾ.

੭੯. ‘‘ਕਿਸਾ ਪਣ੍ਡੁ ਵਿਵਣ੍ਣਾ ਚ, ਸਤ੍ਤ ਵਸ੍ਸਾਨਿ ਚਾਰਿਹਂ;

ਨਾਹਂ ਦਿਵਾ ਵਾ ਰਤ੍ਤਿਂ ਵਾ, ਸੁਖਂ ਵਿਨ੍ਦਿਂ ਸੁਦੁਕ੍ਖਿਤਾ.

੮੦. ‘‘ਤਤੋ ਰਜ੍ਜੁਂ ਗਹੇਤ੍ਵਾਨ, ਪਾਵਿਸਿਂ ਵਨਮਨ੍ਤਰਂ;

ਵਰਂ ਮੇ ਇਧ ਉਬ੍ਬਨ੍ਧਂ, ਯਞ੍ਚ ਹੀਨਂ ਪੁਨਾਚਰੇ.

੮੧. ‘‘ਦਲ਼੍ਹਪਾਸਂ ਕਰਿਤ੍ਵਾਨ, ਰੁਕ੍ਖਸਾਖਾਯ ਬਨ੍ਧਿਯ;

ਪਕ੍ਖਿਪਿਂ ਪਾਸਂ ਗੀਵਾਯਂ, ਅਥ ਚਿਤ੍ਤਂ ਵਿਮੁਚ੍ਚਿ ਮੇ’’ਤਿ. –

ਇਮਾ ਗਾਥਾ ਅਭਾਸਿ.

ਤਤ੍ਥ ਅਯੋਨਿਸੋ ਮਨਸਿਕਾਰਾਤਿ ਅਨੁਪਾਯਮਨਸਿਕਾਰੇਨ, ਅਸੁਭੇ ਸੁਭਨ੍ਤਿ ਵਿਪਲ੍ਲਾਸਗ੍ਗਾਹੇਨ. ਕਾਮਰਾਗੇਨ ਅਟ੍ਟਿਤਾਤਿ ਕਾਮਗੁਣੇਸੁ ਛਨ੍ਦਰਾਗੇਨ ਪੀਲ਼ਿਤਾ. ਅਹੋਸਿਂ ਉਦ੍ਧਤਾ ਪੁਬ੍ਬੇ, ਚਿਤ੍ਤੇ ਅਵਸਵਤ੍ਤਿਨੀਤਿ ਪੁਬ੍ਬੇ ਮਮ ਚਿਤ੍ਤੇ ਮਯ੍ਹਂ ਵਸੇ ਅਵਤ੍ਤਮਾਨੇ ਉਦ੍ਧਤਾ ਨਾਨਾਰਮ੍ਮਣੇ ਵਿਕ੍ਖਿਤ੍ਤਚਿਤ੍ਤਾ ਅਸਮਾਹਿਤਾ ਅਹੋਸਿਂ.

ਪਰਿਯੁਟ੍ਠਿਤਾ ਕ੍ਲੇਸੇਹਿ, ਸੁਭਸਞ੍ਞਾਨੁਵਤ੍ਤਿਨੀਤਿ ਪਰਿਯੁਟ੍ਠਾਨਪਤ੍ਤੇਹਿ ਕਾਮਰਾਗਾਦਿਕਿਲੇਸੇਹਿ ਅਭਿਭੂਤਾ ਰੂਪਾਦੀਸੁ ਸੁਭਨ੍ਤਿ ਪਵਤ੍ਤਾਯ ਕਾਮਸਞ੍ਞਾਯ ਅਨੁਵਤ੍ਤਨਸੀਲਾ. ਸਮਂ ਚਿਤ੍ਤਸ੍ਸ ਨ ਲਭਿਂ, ਰਾਗਚਿਤ੍ਤਵਸਾਨੁਗਾਤਿ ਕਾਮਰਾਗਸਮ੍ਪਯੁਤ੍ਤਚਿਤ੍ਤਸ੍ਸ ਵਸਂ ਅਨੁਗਚ੍ਛਨ੍ਤੀ ਈਸਕਮ੍ਪਿ ਚਿਤ੍ਤਸ੍ਸ ਸਮਂ ਚੇਤੋਸਮਥਂ ਚਿਤ੍ਤੇਕਗ੍ਗਤਂ ਨ ਲਭਿਂ.

ਕਿਸਾ ਪਣ੍ਡੁ ਵਿਵਣ੍ਣਾ ਚਾਤਿ ਏਵਂ ਉਕ੍ਕਣ੍ਠਿਤਭਾਵੇਨ ਕਿਸਾ ਧਮਨਿਸਨ੍ਥਤਗਤ੍ਤਾ ਉਪ੍ਪਣ੍ਡੁਪ੍ਪਣ੍ਡੁਕਜਾਤਾ ਤਤੋ ਏਵ ਵਿਵਣ੍ਣਾ ਵਿਗਤਛਵਿਵਣ੍ਣਾ ਚ ਹੁਤ੍ਵਾ. ਸਤ੍ਤ ਵਸ੍ਸਾਨੀਤਿ ਸਤ੍ਤ ਸਂਵਚ੍ਛਰਾਨਿ. ਚਾਰਿਹਨ੍ਤਿ ਚਰਿਂ ਅਹਂ. ਨਾਹਂ ਦਿਵਾ ਵਾ ਰਤ੍ਤਿਂ ਵਾ, ਸੁਖਂ ਵਿਨ੍ਦਿਂ ਸੁਦੁਕ੍ਖਿਤਾਤਿ ਏਵਮਹਂ ਸਤ੍ਤਸੁ ਸਂਵਚ੍ਛਰੇਸੁ ਕਿਲੇਸਦੁਕ੍ਖੇਨ ਦੁਕ੍ਖਿਤਾ ਏਕਦਾਪਿ ਦਿਵਾ ਵਾ ਰਤ੍ਤਿਂ ਵਾ ਸਮਣਸੁਖਂ ਨ ਪਟਿਲਭਿਂ.

ਤਤੋਤਿ ਕਿਲੇਸਪਰਿਯੁਟ੍ਠਾਨੇਨ ਸਮਣਸੁਖਾਲਾਭਭਾਵਤੋ. ਰਜ੍ਜੁਂ ਗਹੇਤ੍ਵਾਨ ਪਾਵਿਸਿਂ, ਵਨਮਨ੍ਤਰਨ੍ਤਿ ਪਾਸਰਜ੍ਜੁਂ ਆਦਾਯ ਵਨਨ੍ਤਰਂ ਪਾਵਿਸਿਂ. ਕਿਮਤ੍ਥਂ ਪਾਵਿਸੀਤਿ ਚੇ ਆਹ – ‘‘ਵਰਂ ਮੇ ਇਧ ਉਬ੍ਬਨ੍ਧਂ, ਯਞ੍ਚ ਹੀਨਂ ਪੁਨਾਚਰੇ’’ਤਿ ਯਦਹਂ ਸਮਣਧਮ੍ਮਂ ਕਾਤੁਂ ਅਸਕ੍ਕੋਨ੍ਤੀ ਹੀਨਂ ਗਿਹਿਭਾਵਂ ਪੁਨ ਆਚਰੇ ਆਚਰੇਯ੍ਯਂ ਅਨੁਤਿਟ੍ਠੇਯ੍ਯਂ, ਤਤੋ ਸਤਗੁਣੇਨ ਸਹਸ੍ਸਗੁਣੇਨ ਇਮਸ੍ਮਿਂ ਵਨਨ੍ਤਰੇ ਉਬ੍ਬਨ੍ਧਂ ਬਨ੍ਧਿਤ੍ਵਾ ਮਰਣਂ ਮੇ ਵਰਂ ਸੇਟ੍ਠਨ੍ਤਿ ਅਤ੍ਥੋ. ਅਥ ਚਿਤ੍ਤਂ ਵਿਮੁਚ੍ਚਿ ਮੇਤਿ ਯਦਾ ਰੁਕ੍ਖਸਾਖਾਯ ਬਨ੍ਧਪਾਸਂ ਗੀਵਾਯਂ ਪਕ੍ਖਿਪਿ, ਅਥ ਤਦਨਨ੍ਤਰਮੇਵ ਵੁਟ੍ਠਾਨਗਾਮਿਨਿਵਿਪਸ੍ਸਨਾਮਗ੍ਗੇਨ ਘਟਿਤਤ੍ਤਾ ਮਗ੍ਗਪਟਿਪਾਟਿਯਾ ਸਬ੍ਬਾਸਵੇਹਿ ਮਮ ਚਿਤ੍ਤਂ ਵਿਮੁਚ੍ਚਿ ਵਿਮੁਤ੍ਤਂ ਅਹੋਸੀਤਿ.

ਸੀਹਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.