੨. ਵਿਮਲਾਥੇਰੀਗਾਥਾਵਣ੍ਣਨਾ

ਮਤ੍ਤਾ ਵਣ੍ਣੇਨ ਰੂਪੇਨਾਤਿਆਦਿਕਾ ਵਿਮਲਾਯ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵੇਸਾਲਿਯਂ ਅਞ੍ਞਤਰਾਯ ਰੂਪੂਪਜੀਵਿਨਿਯਾ ਇਤ੍ਥਿਯਾ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ. ਵਿਮਲਾਤਿਸ੍ਸਾ ਨਾਮਂ ਅਹੋਸਿ. ਸਾ ਵਯਪ੍ਪਤ੍ਤਾ ਤਥੇਵ ਜੀਵਿਕਂ ਕਪ੍ਪੇਨ੍ਤੀ ਏਕਦਿਵਸਂ ਆਯਸ੍ਮਨ੍ਤਂ ਮਹਾਮੋਗ੍ਗਲ੍ਲਾਨਂ ਵੇਸਾਲਿਯਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਪਟਿਬਦ੍ਧਚਿਤ੍ਤਾ ਹੁਤ੍ਵਾ ਥੇਰਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਥੇਰਂ ਉਦ੍ਦਿਸ੍ਸ ਪਲੋਭਨਕਮ੍ਮਂ ਕਾਤੁਂ ਆਰਭਿ. ‘‘ਤਿਤ੍ਥਿਯੇਹਿ ਉਯ੍ਯੋਜਿਤਾ ਤਥਾ ਅਕਾਸੀ’’ਤਿ ਕੇਚਿ ਵਦਨ੍ਤਿ. ਥੇਰੋ ਤਸ੍ਸਾ ਅਸੁਭਵਿਭਾਵਨਮੁਖੇਨ ਸਨ੍ਤਜ੍ਜਨਂ ਕਤ੍ਵਾ ਓਵਾਦਮਦਾਸਿ. ਤਂ ਹੇਟ੍ਠਾ ਥੇਰਗਾਥਾਯ ਆਗਤਮੇਵ, ਤਥਾ ਪਨ ਥੇਰੇਨ ਓਵਾਦੇ ਦਿਨ੍ਨੇ ਸਾ ਸਂਵੇਗਜਾਤਾ ਹਿਰੋਤ੍ਤਪ੍ਪਂ ਪਚ੍ਚੁਪਟ੍ਠਪੇਤ੍ਵਾ ਸਾਸਨੇ ਪਟਿਲਦ੍ਧਸਦ੍ਧਾ ਉਪਾਸਿਕਾ ਹੁਤ੍ਵਾ ਅਪਰਭਾਗੇ ਭਿਕ੍ਖੁਨੀਸੁ ਪਬ੍ਬਜਿਤ੍ਵਾ ਘਟੇਨ੍ਤੀ ਵਾਯਮਨ੍ਤੀ ਹੇਤੁਸਮ੍ਪਨ੍ਨਤਾਯ ਨ ਚਿਰਸ੍ਸੇਵ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਉਦਾਨਵਸੇਨ –

੭੨. ‘‘ਮਤ੍ਤਾ ਵਣ੍ਣੇਨ ਰੂਪੇਨ, ਸੋਭਗ੍ਗੇਨ ਯਸੇਨ ਚ;

ਯੋਬ੍ਬਨੇਨ ਚੁਪਤ੍ਥਦ੍ਧਾ, ਅਞ੍ਞਾਸਮਤਿਮਞ੍ਞਿਹਂ.

੭੩. ‘‘ਵਿਭੂਸੇਤ੍ਵਾ ਇਮਂ ਕਾਯਂ, ਸੁਚਿਤ੍ਤਂ ਬਾਲਲਾਪਨਂ;

ਅਟ੍ਠਾਸਿਂ ਵੇਸਿਦ੍ਵਾਰਮ੍ਹਿ, ਲੁਦ੍ਦੋ ਪਾਸਮਿਵੋਡ੍ਡਿਯ.

੭੪. ‘‘ਪਿਲ਼ਨ੍ਧਨਂ ਵਿਦਂਸੇਨ੍ਤੀ, ਗੁਯ੍ਹਂ ਪਕਾਸਿਕਂ ਬਹੁਂ;

ਅਕਾਸਿਂ ਵਿਵਿਧਂ ਮਾਯਂ, ਉਜ੍ਝਗ੍ਘਨ੍ਤੀ ਬਹੁਂ ਜਨਂ.

੭੫. ‘‘ਸਾਜ੍ਜ ਪਿਣ੍ਡਂ ਚਰਿਤ੍ਵਾਨ, ਮੁਣ੍ਡਾ ਸਙ੍ਘਾਟਿਪਾਰੁਤਾ;

ਨਿਸਿਨ੍ਨਾ ਰੁਕ੍ਖਮੂਲਮ੍ਹਿ, ਅਵਿਤਕ੍ਕਸ੍ਸ ਲਾਭਿਨੀ.

੭੬. ‘‘ਸਬ੍ਬੇ ਯੋਗਾ ਸਮੁਚ੍ਛਿਨ੍ਨਾ, ਯੇ ਦਿਬ੍ਬਾ ਯੇ ਚ ਮਾਨੁਸਾ;

ਖੇਪੇਤ੍ਵਾ ਆਸਵੇ ਸਬ੍ਬੇ, ਸੀਤਿਭੂਤਾਮ੍ਹਿ ਨਿਬ੍ਬੁਤਾ’’ਤਿ. –

ਇਮਾ ਗਾਥਾ ਅਭਾਸਿ.

ਤਤ੍ਥ ਮਤ੍ਤਾ ਵਣ੍ਣੇਨ ਰੂਪੇਨਾਤਿ ਗੁਣਵਣ੍ਣੇਨ ਚੇਵ ਰੂਪਸਮ੍ਪਤ੍ਤਿਯਾ ਚ. ਸੋਭਗ੍ਗੇਨਾਤਿ ਸੁਭਗਭਾਵੇਨ. ਯਸੇਨਾਤਿ ਪਰਿਵਾਰਸਮ੍ਪਤ੍ਤਿਯਾ. ਮਤ੍ਤਾ ਵਣ੍ਣਮਦਰੂਪਮਦਸੋਭਗ੍ਗਮਦਪਰਿਵਾਰਮਦਵਸੇਨ ਮਦਂ ਆਪਨ੍ਨਾਤਿ ਅਤ੍ਥੋ. ਯੋਬ੍ਬਨੇਨ ਚੁਪਤ੍ਥਦ੍ਧਾਤਿ ਯੋਬ੍ਬਨਮਦੇਨ ਉਪਰੂਪਰਿ ਥਦ੍ਧਾ ਯੋਬ੍ਬਨਨਿਮਿਤ੍ਤੇਨ ਅਹਙ੍ਕਾਰੇਨ ਉਪਤ੍ਥਦ੍ਧਚਿਤ੍ਤਾ ਅਨੁਪਸਨ੍ਤਮਾਨਸਾ. ਅਞ੍ਞਾਸਮਤਿਮਞ੍ਞਿਹਨ੍ਤਿ ਅਞ੍ਞਾ ਇਤ੍ਥਿਯੋ ਅਤ੍ਤਨੋ ਵਣ੍ਣਾਦਿਗੁਣੇਹਿ ਸਬ੍ਬਥਾਪਿ ਅਤਿਕ੍ਕਮਿਤ੍ਵਾ ਮਞ੍ਞਿਂ ਅਹਂ. ਅਞ੍ਞਾਸਂ ਵਾ ਇਤ੍ਥੀਨਂ ਵਣ੍ਣਾਦਿਗੁਣੇ ਅਤਿਮਞ੍ਞਿਂ ਅਤਿਕ੍ਕਮਿਤ੍ਵਾ ਅਮਞ੍ਞਿਂ ਅਵਮਾਨਂ ਅਕਾਸਿਂ.

ਵਿਭੂਸਿਤ੍ਵਾ ਇਮਂ ਕਾਯਂ, ਸੁਚਿਤ੍ਤਂ ਬਾਲਲਾਪਨਨ੍ਤਿ ਇਮਂ ਨਾਨਾਵਿਧਅਸੁਚਿਭਰਿਤਂ ਜੇਗੁਚ੍ਛਂ ਅਹਂ ਮਮਾਤਿ ਬਾਲਾਨਂ ਲਾਪਨਤੋ ਵਾਚਨਤੋ ਬਾਲਲਾਪਨਂ ਮਮ ਕਾਯਂ ਛਵਿਰਾਗਕਰਣਕੇਸਟ੍ਠਪਨਾਦਿਨਾ ਸੁਚਿਤ੍ਤਂ ਵਤ੍ਥਾਭਰਣੇਹਿ ਵਿਭੂਸਿਤ੍ਵਾ ਸੁਮਣ੍ਡਿਤਪਸਾਦਿਤਂ ਕਤ੍ਵਾ. ਅਟ੍ਠਾਸਿਂ ਵੇਸਿਦ੍ਵਾਰਮ੍ਹਿ, ਲੁਦ੍ਦੋ ਪਾਸਮਿਵੋਡ੍ਡਿਯਾਤਿ ਮਿਗਲੁਦ੍ਦੋ ਵਿਯ ਮਿਗਾਨਂ ਬਨ੍ਧਨਤ੍ਥਾਯ ਦਣ੍ਡਵਾਕੁਰਾਦਿਮਿਗਪਾਸਂ, ਮਾਰਸ੍ਸ ਪਾਸਭੂਤਂ ਯਥਾਵੁਤ੍ਤਂ ਮਮ ਕਾਯਂ ਵੇਸਿਦ੍ਵਾਰਮ੍ਹਿ ਵੇਸਿਯਾ ਘਰਦ੍ਵਾਰੇ ਓਡ੍ਡਿਯਿਤ੍ਵਾ ਅਟ੍ਠਾਸਿਂ.

ਪਿਲ਼ਨ੍ਧਨਂ ਵਿਦਂਸੇਨ੍ਤੀ, ਗੁਯ੍ਹਂ ਪਕਾਸਿਕਂ ਬਹੁਨ੍ਤਿ ਊਰੁਜਘਨਥਨਦਸ੍ਸਨਾਦਿਕਂ ਗੁਯ੍ਹਞ੍ਚੇਵ ਪਾਦਜਾਣੁਸਿਰਾਦਿਕਂ ਪਕਾਸਞ੍ਚਾਤਿ ਗੁਯ੍ਹਂ ਪਕਾਸਿਕਞ੍ਚ ਬਹੁਂ ਨਾਨਪ੍ਪਕਾਰਂ ਪਿਲ਼ਨ੍ਧਨਂ ਆਭਰਣਂ ਦਸ੍ਸੇਨ੍ਤੀ. ਅਕਾਸਿਂ ਵਿਵਿਧਂ ਮਾਯਂ, ਉਜ੍ਝਗ੍ਘਨ੍ਤੀ ਬਹੁਂ ਜਨਨ੍ਤਿ ਯੋਬ੍ਬਨਮਦਮਤ੍ਤਂ ਬਹੁਂ ਬਾਲਜਨਂ ਵਿਪ੍ਪਲਮ੍ਭੇਤੁਂ ਹਸਨ੍ਤੀ ਗਨ੍ਧਮਾਲਾਵਤ੍ਥਾਭਰਣਾਦੀਹਿ ਸਰੀਰਸਭਾਵਪਟਿਚ੍ਛਾਦਨੇਨ ਹਸਵਿਲਾਸਭਾਵਾਦੀਹਿ ਤੇਹਿ ਚ ਵਿਵਿਧਂ ਨਾਨਪ੍ਪਕਾਰਂ ਵਞ੍ਚਨਂ ਅਕਾਸਿਂ.

ਸਾਜ੍ਜ ਪਿਣ੍ਡਂ ਚਰਿਤ੍ਵਾਨ…ਪੇ… ਅਵਿਤਕ੍ਕਸ੍ਸ ਲਾਭਿਨੀਤਿ ਸਾ ਅਹਂ ਏਵਂ ਪਮਾਦਵਿਹਾਰਿਨੀ ਸਮਾਨਾ ਅਜ੍ਜ ਇਦਾਨਿ ਅਯ੍ਯਸ੍ਸ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਓਵਾਦੇ ਠਤ੍ਵਾ ਸਾਸਨੇ ਪਬ੍ਬਜਿਤ੍ਵਾ ਮੁਣ੍ਡਾ ਸਙ੍ਘਾਟਿਪਾਰੁਤਾ ਹੁਤ੍ਵਾ ਪਿਣ੍ਡਂ ਚਰਿਤ੍ਵਾਨ ਭਿਕ੍ਖਾਹਾਰਂ ਭੁਞ੍ਜਿਤ੍ਵਾ ਨਿਸਿਨ੍ਨਾ ਰੁਕ੍ਖਮੂਲਮ੍ਹਿ ਰੁਕ੍ਖਮੂਲੇ ਵਿਵਿਤ੍ਤਾਸਨੇ ਨਿਸਿਨ੍ਨਾ ਦੁਤਿਯਜ੍ਝਾਨਪਾਦਕਸ੍ਸ ਅਗ੍ਗਫਲਸ੍ਸ ਅਧਿਗਮੇਨ ਅਵਿਤਕ੍ਕਸ੍ਸ ਲਾਭਿਨੀ ਅਮ੍ਹੀਤਿ ਯੋਜਨਾ.

ਸਬ੍ਬੇ ਯੋਗਾਤਿ ਕਾਮਯੋਗਾਦਯੋ ਚਤ੍ਤਾਰੋਪਿ ਯੋਗਾ. ਸਮੁਚ੍ਛਿਨ੍ਨਾਤਿ ਪਠਮਮਗ੍ਗਾਦਿਨਾ ਯਥਾਰਹਂ ਸਮ੍ਮਦੇਵ ਉਚ੍ਛਿਨ੍ਨਾ ਪਹੀਨਾ. ਸੇਸਂ ਵੁਤ੍ਤਨਯਮੇਵ.

ਵਿਮਲਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.