੧੨. ਚਨ੍ਦਾਥੇਰੀਗਾਥਾਵਣ੍ਣਨਾ

ਦੁਗ੍ਗਤਾਹਂ ਪੁਰੇ ਆਸਿਨ੍ਤਿਆਦਿਕਾ ਚਨ੍ਦਾਯ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ ਅਨੁਕ੍ਕਮੇਨ ਸਮ੍ਭਤਵਿਮੋਕ੍ਖਸਮ੍ਭਾਰਾ ਪਰਿਪਕ੍ਕਞਾਣਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਅਞ੍ਞਤਰਸ੍ਮਿਂ ਬ੍ਰਾਹ੍ਮਣਗਾਮੇ ਅਪਞ੍ਞਾਤਸ੍ਸ ਬ੍ਰਾਹ੍ਮਣਸ੍ਸ ਗੇਹੇ ਪਟਿਸਨ੍ਧਿਂ ਗਣ੍ਹਿ. ਤਸ੍ਸਾ ਨਿਬ੍ਬਤ੍ਤਿਤੋ ਪਟ੍ਠਾਯਂ ਤਂ ਕੁਲਂ ਭੋਗੇਹਿ ਪਰਿਕ੍ਖਯਂ ਗਤਂ. ਸਾ ਅਨੁਕ੍ਕਮੇਨ ਵਿਞ੍ਞੁਤਂ ਪਤ੍ਵਾ ਦੁਕ੍ਖੇਨ ਜੀਵਤਿ. ਅਥ ਤਸ੍ਮਿਂ ਗੇਹੇ ਅਹਿਵਾਤਰੋਗੋ ਉਪ੍ਪਜ੍ਜਿ. ਤੇਨਸ੍ਸਾ ਸਬ੍ਬੇਪਿ ਞਾਤਕਾ ਮਰਣਬ੍ਯਸਨਂ ਪਾਪੁਣਿਂਸੁ. ਸਾ ਞਾਤਿਕ੍ਖਯੇ ਜਾਤੇ ਅਞ੍ਞਤ੍ਥ ਜੀਵਿਤੁਂ ਅਸਕ੍ਕੋਨ੍ਤੀ ਕਪਾਲਹਤ੍ਥਾ ਕੁਲੇ ਕੁਲੇ ਵਿਚਰਿਤ੍ਵਾ ਲਦ੍ਧਲਦ੍ਧੇਨ ਭਿਕ੍ਖਾਹਾਰੇਨ ਯਾਪੇਨ੍ਤੀ ਏਕਦਿਵਸਂ ਪਟਾਚਾਰਾਯ ਥੇਰਿਯਾ ਭਤ੍ਤਵਿਸ੍ਸਗ੍ਗਟ੍ਠਾਨਂ ਅਗਮਾਸਿ. ਭਿਕ੍ਖੁਨਿਯੋ ਤਂ ਦੁਕ੍ਖਿਤਂ ਖੁਦ੍ਦਾਭਿਭੂਤਂ ਦਿਸ੍ਵਾਨ ਸਞ੍ਜਾਤਕਾਰੁਞ੍ਞਾ ਪਿਯਸਮੁਦਾਚਾਰੇਨ ਸਙ੍ਗਹੇਤ੍ਵਾ ਤਤ੍ਥ ਵਿਜ੍ਜਮਾਨੇਨ ਉਪਚਾਰਮਨੋਹਰੇਨ ਆਹਾਰੇਨ ਸਨ੍ਤਪ੍ਪੇਸੁਂ. ਸਾ ਤਾਸਂ ਆਚਾਰਸੀਲੇ ਪਸੀਦਿਤ੍ਵਾ ਥੇਰਿਯਾ ਸਨ੍ਤਿਕਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਤਸ੍ਸਾ ਥੇਰੀ ਧਮ੍ਮਂ ਕਥੇਸਿ. ਸਾ ਤਂ ਧਮ੍ਮਂ ਸੁਤ੍ਵਾ ਸਾਸਨੇ ਅਭਿਪ੍ਪਸਨ੍ਨਾ ਸਂਸਾਰੇ ਚ ਸਞ੍ਜਾਤਸਂਵੇਗਾ ਪਬ੍ਬਜਿ. ਪਬ੍ਬਜਿਤ੍ਵਾ ਚ ਥੇਰਿਯਾ ਓਵਾਦੇ ਠਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਭਾਵਨਂ ਅਨੁਯੁਞ੍ਜਨ੍ਤੀ ਕਤਾਧਿਕਾਰਤਾਯ ਞਾਣਸ੍ਸ ਚ ਪਰਿਪਾਕਂ ਗਤਤ੍ਤਾ ਨ ਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ –

੧੨੨. ‘‘ਦੁਗ੍ਗਤਾਹਂ ਪੁਰੇ ਆਸਿਂ, ਵਿਧਵਾ ਚ ਅਪੁਤ੍ਤਿਕਾ;

ਵਿਨਾ ਮਿਤ੍ਤੇਹਿ ਞਾਤੀਹਿ, ਭਤ੍ਤਚੋਲ਼ਸ੍ਸ ਨਾਧਿਗਂ.

੧੨੩. ‘‘ਪਤ੍ਤਂ ਦਣ੍ਡਞ੍ਚ ਗਣ੍ਹਿਤ੍ਵਾ, ਭਿਕ੍ਖਮਾਨਾ ਕੁਲਾ ਕੁਲਂ;

ਸੀਤੁਣ੍ਹੇਨ ਚ ਡਯ੍ਹਨ੍ਤੀ, ਸਤ੍ਤ ਵਸ੍ਸਾਨਿ ਚਾਰਿਹਂ.

੧੨੪. ‘‘ਭਿਕ੍ਖੁਨਿਂ ਪੁਨ ਦਿਸ੍ਵਾਨ, ਅਨ੍ਨਪਾਨਸ੍ਸ ਲਾਭਿਨਿਂ;

ਉਪਸਙ੍ਕਮ੍ਮਂ ਅਵੋਚਂ, ਪਬ੍ਬਜ੍ਜਂ ਅਨਗਾਰਿਯਂ.

੧੨੫. ‘‘ਸਾ ਚ ਮਂ ਅਨੁਕਮ੍ਪਾਯ, ਪਬ੍ਬਾਜੇਸਿ ਪਟਾਚਾਰਾ;

ਤਤੋ ਮਂ ਓਵਦਿਤ੍ਵਾਨ, ਪਰਮਤ੍ਥੇ ਨਿਯੋਜਯਿ.

੧੨੬. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਅਕਾਸਿਂ ਅਨੁਸਾਸਨਿਂ;

ਅਮੋਘੋ ਅਯ੍ਯਾਯੋਵਾਦੋ, ਤੇਵਿਜ੍ਜਾਮ੍ਹਿ ਅਨਾਸਵਾ’’ਤਿ. –

ਉਦਾਨਵਸੇਨ ਇਮਾ ਗਾਥਾ ਅਭਾਸਿ.

ਤਤ੍ਥ ਦੁਗ੍ਗਤਾਤਿ ਦਲਿਦ੍ਦਾ. ਪੁਰੇਤਿ ਪਬ੍ਬਜਿਤਤੋ ਪੁਬ੍ਬੇ. ਪਬ੍ਬਜਿਤਕਾਲਤੋ ਪਟ੍ਠਾਯ ਹਿ ਇਧ ਪੁਗ੍ਗਲੋ ਭੋਗੇਹਿ ਅਡ੍ਢੋ ਵਾ ਦਲਿਦ੍ਦੋ ਵਾਤਿ ਨ ਵਤ੍ਤਬ੍ਬੋ. ਗੁਣੇਹਿ ਪਨ ਅਯਂ ਥੇਰੀ ਅਡ੍ਢਾਯੇਵ. ਤੇਨਾਹ ‘‘ਦੁਗ੍ਗਤਾਹਂ ਪੁਰੇ ਆਸਿ’’ਨ੍ਤਿ. ਵਿਧਵਾਤਿ ਧਵੋ ਵੁਚ੍ਚਤਿ ਸਾਮਿਕੋ, ਤਦਭਾਵਾ ਵਿਧਵਾ, ਮਤਪਤਿਕਾਤਿ ਅਤ੍ਥੋ. ਅਪੁਤ੍ਤਿਕਾਤਿ ਪੁਤ੍ਤਰਹਿਤਾ. ਵਿਨਾ ਮਿਤ੍ਤੇਹੀਤਿ ਮਿਤ੍ਤੇਹਿ ਬਨ੍ਧਵੇਹਿ ਚ ਪਰਿਹੀਨਾ ਰਹਿਤਾ. ਭਤ੍ਤਚੋਲ਼ਸ੍ਸ ਨਾਧਿਗਨ੍ਤਿ ਭਤ੍ਤਸ੍ਸ ਚੋਲ਼ਸ੍ਸ ਚ ਪਾਰਿਪੂਰਿਂ ਨਾਧਿਗਚ੍ਛਿਂ, ਕੇਵਲਂ ਪਨ ਭਿਕ੍ਖਾਪਿਣ੍ਡਸ੍ਸ ਪਿਲੋਤਿਕਾਖਣ੍ਡਸ੍ਸ ਚ ਵਸੇਨ ਘਾਸਚ੍ਛਾਦਨਮਤ੍ਤਮੇਵ ਅਲਤ੍ਥਨ੍ਤਿ ਅਧਿਪ੍ਪਾਯੋ. ਤੇਨਾਹ ‘‘ਪਤ੍ਤਂ ਦਣ੍ਡਞ੍ਚ ਗਣ੍ਹਿਤ੍ਵਾ’’ਤਿਆਦਿ.

ਤਤ੍ਥ ਪਤ੍ਤਨ੍ਤਿ ਮਤ੍ਤਿਕਾਭਾਜਨਂ. ਦਣ੍ਡਨ੍ਤਿ ਗੋਣਸੁਨਖਾਦਿਪਰਿਹਰਣਦਣ੍ਡਕਂ. ਕੁਲਾ ਕੁਲਨ੍ਤਿ ਕੁਲਤੋ ਕੁਲਂ. ਸੀਤੁਣ੍ਹੇਨ ਚ ਡਯ੍ਹਨ੍ਤੀਤਿ ਵਸਨਗੇਹਾਭਾਵਤੋ ਸੀਤੇਨ ਚ ਉਣ੍ਹੇਨ ਚ ਪੀਲ਼ਿਯਮਾਨਾ.

ਭਿਕ੍ਖੁਨਿਨ੍ਤਿ ਪਟਾਚਾਰਾਥੇਰਿਂ ਸਨ੍ਧਾਯ ਵਦਤਿ. ਪੁਨਾਤਿ ਪਚ੍ਛਾ, ਸਤ੍ਤਸਂਵਚ੍ਛਰਤੋ ਅਪਰਭਾਗੇ.

ਪਰਮਤ੍ਥੇਤਿ ਪਰਮੇ ਉਤ੍ਤਮੇ ਅਤ੍ਥੇ, ਨਿਬ੍ਬਾਨਗਾਮਿਨਿਯਾ ਪਟਿਪਦਾਯ ਨਿਬ੍ਬਾਨੇ ਚ. ਨਿਯੋਜਯੀਤਿ ਕਮ੍ਮਟ੍ਠਾਨਂ ਆਚਿਕ੍ਖਨ੍ਤੀ ਨਿਯੋਜੇਸਿ. ਸੇਸਂ ਵੁਤ੍ਤਨਯਮੇਵ.

ਚਨ੍ਦਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.

ਪਞ੍ਚਕਨਿਪਾਤਵਣ੍ਣਨਾ ਨਿਟ੍ਠਿਤਾ.