੬. ਛਕ੍ਕਨਿਪਾਤੋ

੧. ਪਞ੍ਚਸਤਮਤ੍ਤਾਥੇਰੀਗਾਥਾਵਣ੍ਣਨਾ

ਛਕ੍ਕਨਿਪਾਤੇ ਯਸ੍ਸ ਮਗ੍ਗਂ ਨ ਜਾਨਾਸੀਤਿਆਦਿਕਾ ਪਞ੍ਚਸਤਮਤ੍ਤਾਨਂ ਥੇਰੀਨਂ ਗਾਥਾ. ਇਮਾਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤਿਯੋ ਅਨੁਕ੍ਕਮੇਨ ਉਪਚਿਤਵਿਮੋਕ੍ਖਸਮ੍ਭਾਰਾ ਹੁਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਤਤ੍ਥ ਤਤ੍ਥ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤਾ ਮਾਤਾਪਿਤੂਹਿ ਪਤਿਕੁਲਂ ਆਨੀਤਾ ਤਤ੍ਥ ਤਤ੍ਥ ਪੁਤ੍ਤੇ ਲਭਿਤ੍ਵਾ ਘਰਾਵਾਸਂ ਵਸਨ੍ਤਿਯੋ ਸਮਾਨਜਾਤਿਕਸ੍ਸ ਤਾਦਿਸਸ੍ਸ ਕਮ੍ਮਸ੍ਸ ਕਤਤ੍ਤਾ ਸਬ੍ਬਾਵ ਮਤਪੁਤ੍ਤਾ ਹੁਤ੍ਵਾ, ਪੁਤ੍ਤਸੋਕੇਨ ਅਭਿਭੂਤਾ ਪਟਾਚਾਰਾਯ ਥੇਰਿਯਾ ਸਨ੍ਤਿਕਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਨਿਸਿਨ੍ਨਾ ਅਤ੍ਤਨੋ ਸੋਕਕਾਰਣਂ ਆਰੋਚੇਸੁਂ. ਥੇਰੀ ਤਾਸਂ ਸੋਕਂ ਵਿਨੋਦੇਨ੍ਤੀ –

੧੨੭. ‘‘ਯਸ੍ਸ ਮਗ੍ਗਂ ਨ ਜਾਨਾਸਿ, ਆਗਤਸ੍ਸ ਗਤਸ੍ਸ ਵਾ;

ਤਂ ਕੁਤੋ ਚਾਗਤਂ ਸਤ੍ਤਂ, ਮਮ ਪੁਤ੍ਤੋਤਿ ਰੋਦਸਿ.

੧੨੮. ‘‘ਮਗ੍ਗਞ੍ਚ ਖੋਸ੍ਸ ਜਾਨਾਸਿ, ਆਗਤਸ੍ਸ ਗਤਸ੍ਸ ਵਾ;

ਨ ਨਂ ਸਮਨੁਸੋਚੇਸਿ, ਏਵਂਧਮ੍ਮਾ ਹਿ ਪਾਣਿਨੋ.

੧੨੯. ‘‘ਅਯਾਚਿਤੋ ਤਤਾਗਚ੍ਛਿ, ਨਾਨੁਞ੍ਞਾਤੋ ਇਤੋ ਗਤੋ;

ਕੁਤੋਚਿ ਨੂਨ ਆਗਨ੍ਤ੍ਵਾ, ਵਸਿਤ੍ਵਾ ਕਤਿਪਾਹਕਂ;

ਇਤੋਪਿ ਅਞ੍ਞੇਨ ਗਤੋ, ਤਤੋਪਞ੍ਞੇਨ ਗਚ੍ਛਤਿ.

੧੩੦. ‘‘ਪੇਤੋ ਮਨੁਸ੍ਸਰੂਪੇਨ, ਸਂਸਰਨ੍ਤੋ ਗਮਿਸ੍ਸਤਿ;

ਯਥਾਗਤੋ ਤਥਾ ਗਤੋ, ਕਾ ਤਤ੍ਥ ਪਰਿਦੇਵਨਾ’’ਤਿ. –

ਇਮਾਹਿ ਚਤੂਹਿ ਗਾਥਾਹਿ ਧਮ੍ਮਂ ਦੇਸੇਸਿ.

ਤਾ ਤਸ੍ਸਾ ਧਮ੍ਮਂ ਸੁਤ੍ਵਾ ਸਞ੍ਜਾਤਸਂਵੇਗਾ ਥੇਰਿਯਾ ਸਨ੍ਤਿਕੇ ਪਬ੍ਬਜਿਂਸੁ. ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤਿਯੋ ਵਿਮੁਤ੍ਤਿਪਰਿਪਾਚਨੀਯਾਨਂ ਧਮ੍ਮਾਨਂ ਪਰਿਪਾਕਂ ਗਤਤ੍ਤਾ ਨ ਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤੇ ਪਤਿਟ੍ਠਹਿਂਸੁ. ਅਥ ਤਾ ਅਧਿਗਤਾਰਹਤ੍ਤਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਉਦਾਨਵਸੇਨ ‘‘ਯਸ੍ਸ ਮਗ੍ਗਂ ਨ ਜਾਨਾਸੀ’’ਤਿਆਦਿਕਾਹਿ ਓਵਾਦਗਾਥਾਹਿ ਸਦ੍ਧਿਂ –

੧੩੧. ‘‘ਅਬ੍ਬਹੀ ਵਤ ਮੇ ਸਲ੍ਲਂ, ਦੁਦ੍ਦਸਂ ਹਦਯਸ੍ਸਿਤਂ;

ਯਾ ਮੇ ਸੋਕਪਰੇਤਾਯ, ਪੁਤ੍ਤਸੋਕਂ ਬ੍ਯਪਾਨੁਦਿ.

੧੩੨. ‘‘ਸਾਜ੍ਜ ਅਬ੍ਬੂਲ਼੍ਹਸਲ੍ਲਾਹਂ, ਨਿਚ੍ਛਾਤਾ ਪਰਿਨਿਬ੍ਬੁਤਾ;

ਬੁਦ੍ਧਂ ਧਮ੍ਮਞ੍ਚ ਸਙ੍ਘਞ੍ਚ, ਉਪੇਮਿ ਸਰਣਂ ਮੁਨਿ’’ਨ੍ਤਿ. –

ਇਮਾ ਗਾਥਾ ਵਿਸੁਂ ਵਿਸੁਂ ਅਭਾਸਿਂਸੁ.

ਤਤ੍ਥ ਯਸ੍ਸ ਮਗ੍ਗਂ ਨ ਜਾਨਾਸਿ, ਆਗਤਸ੍ਸ ਗਤਸ੍ਸ ਵਾਤਿ ਯਸ੍ਸ ਸਤ੍ਤਸ੍ਸ ਇਧ ਆਗਤਸ੍ਸ ਆਗਤਮਗ੍ਗਂ ਵਾ ਇਤੋ ਗਤਸ੍ਸ ਗਤਮਗ੍ਗਂ ਵਾ ਤ੍ਵਂ ਨ ਜਾਨਾਸਿ. ਅਨਨ੍ਤਰਾ ਅਤੀਤਾਨਾਗਤਭਵੂਪਪਤ੍ਤਿਯੋ ਸਨ੍ਧਾਯ ਵਦਤਿ. ਤਂ ਕੁਤੋ ਚਾਗਤਂ ਸਤ੍ਤਨ੍ਤਿ ਤਂ ਏਵਂ ਅਵਿਞ੍ਞਾਤਾਗਤਗਤਮਗ੍ਗਂ ਕੁਤੋਚਿ ਗਤਿਤੋ ਆਗਤਮਗ੍ਗਂ ਆਗਚ੍ਛਨ੍ਤੇਨ ਅਨ੍ਤਰਾਮਗ੍ਗੇ ਸਬ੍ਬੇਨ ਸਬ੍ਬਂ ਅਕਤਪਰਿਚਯਸਮਾਗਤਪੁਰਿਸਸਦਿਸਂ ਸਤ੍ਤਂ ਕੇਵਲਂ ਮਮਤ੍ਤਂ ਉਪ੍ਪਾਦੇਤ੍ਵਾ ਮਮ ਪੁਤ੍ਤੋਤਿ ਕੁਤੋ ਕੇਨ ਕਾਰਣੇਨ ਰੋਦਸਿ. ਅਪ੍ਪਟਿਕਾਰਤੋ ਮਮ ਪੁਤ੍ਤਸ੍ਸ ਚ ਅਕਾਤਬ੍ਬਤੋ ਨ ਏਤ੍ਥ ਰੋਦਨਕਾਰਣਂ ਅਤ੍ਥੀਤਿ ਅਧਿਪ੍ਪਾਯੋ.

ਮਗ੍ਗਞ੍ਚ ਖੋਸ੍ਸ ਜਾਨਾਸੀਤਿ ਅਸ੍ਸ ਤਵ ਪੁਤ੍ਤਾਭਿਮਤਸ੍ਸ ਸਤ੍ਤਸ੍ਸ ਆਗਤਸ੍ਸ ਆਗਤਮਗ੍ਗਞ੍ਚ ਗਤਸ੍ਸ ਗਤਮਗ੍ਗਞ੍ਚ ਅਥ ਜਾਨੇਯ੍ਯਾਸਿ. ਨ ਨਂ ਸਮਨੁਸੋਚੇਸੀਤਿ ਏਵਮ੍ਪਿ ਨਂ ਨ ਸਮਨੁਸੋਚੇਯ੍ਯਾਸਿ. ਕਸ੍ਮਾ? ਏਵਂਧਮ੍ਮਾ ਹਿ ਪਾਣਿਨੋ, ਦਿਟ੍ਠਧਮ੍ਮੇਪਿ ਹਿ ਸਤ੍ਤਾਨਂ ਸਬ੍ਬੇਹਿ ਪਿਯੇਹਿ ਮਨਾਪੇਹਿ ਨਾਨਾਭਾਵਾ ਵਿਨਾਭਾਵਾ ਤਤ੍ਥ ਵਸਵਤ੍ਤਿਤਾਯ ਅਭਾਵਤੋ, ਪਗੇਵ ਅਭਿਸਮ੍ਪਰਾਯਂ.

ਅਯਾਚਿਤੋ ਤਤਾਗਚ੍ਛੀਤਿ ਤਤੋ ਪਰਲੋਕਤੋ ਕੇਨਚਿ ਅਯਾਚਿਤੋ ਇਧ ਆਗਚ੍ਛਿ. ‘‘ਆਗਤੋ’’ਤਿਪਿ ਪਾਲ਼ਿ, ਸੋ ਏਵਤ੍ਥੋ. ਨਾਨੁਞ੍ਞਾਤੋ ਇਤੋ ਗਤੋਤਿ ਇਧਲੋਕਤੋ ਕੇਨਚਿ ਅਨਨੁਞ੍ਞਾਤੋ ਪਰਲੋਕਂ ਗਤੋ. ਕੁਤੋਚੀਤਿ ਨਿਰਯਾਦਿਤੋ ਯਤੋ ਕੁਤੋਚਿ ਗਤਿਤੋ. ਨੂਨਾਤਿ ਪਰਿਸਙ੍ਕਾਯਂ. ਵਸਿਤ੍ਵਾ ਕਤਿਪਾਹਕਨ੍ਤਿ ਕਤਿਪਯਦਿਵਸਮਤ੍ਤਂ ਇਧ ਵਸਿਤ੍ਵਾ. ਇਤੋਪਿ ਅਞ੍ਞੇਨ ਗਤੋਤਿ ਇਤੋਪਿ ਭਵਤੋ ਅਞ੍ਞੇਨ ਗਤੋ, ਇਤੋ ਅਞ੍ਞਮ੍ਪਿ ਭਵਂ ਪਟਿਸਨ੍ਧਿਵਸੇਨ ਉਪਗਤੋ. ਤਤੋਪਞ੍ਞੇਨ ਗਚ੍ਛਤੀਤਿ ਤਤੋਪਿ ਭਵਤੋ ਅਞ੍ਞੇਨ ਗਮਿਸ੍ਸਤਿ, ਅਞ੍ਞਮੇਵ ਭਵਂ ਉਪਗਮਿਸ੍ਸਤਿ.

ਪੇਤੋਤਿ ਅਪੇਤੋ ਤਂ ਤਂ ਭਵਂ ਉਪਪਜ੍ਜਿਤ੍ਵਾ ਤਤੋ ਅਪਗਤੋ. ਮਨੁਸ੍ਸਰੂਪੇਨਾਤਿ ਨਿਦਸ੍ਸਨਮਤ੍ਤਮੇਤਂ, ਮਨੁਸ੍ਸਭਾਵੇਨ ਤਿਰਚ੍ਛਾਨਾਦਿਭਾਵੇਨ ਚਾਤਿ ਅਤ੍ਥੋ. ਸਂਸਰਨ੍ਤੋਤਿ ਅਪਰਾਪਰਂ ਉਪਪਤ੍ਤਿਵਸੇਨ ਸਂਸਰਨ੍ਤੋ. ਯਥਾਗਤੋ ਤਥਾ ਗਤੋਤਿ ਯਥਾ ਅਵਿਞ੍ਞਾਤਗਤਿਤੋ ਚ ਅਨਾਮਨ੍ਤੇਤ੍ਵਾ ਆਗਤੋ ਤਥਾ ਅਵਿਞ੍ਞਾਤਗਤਿਕੋ ਅਨਨੁਞ੍ਞਾਤੋਵ ਗਤੋ. ਕਾ ਤਤ੍ਥ ਪਰਿਦੇਵਨਾਤਿ ਤਤ੍ਥ ਤਾਦਿਸੇ ਅਵਸਵਤ੍ਤਿਨਿ ਯਥਾਕਾਮਾਵਚਰੇ ਕਾ ਨਾਮ ਪਰਿਦੇਵਨਾ, ਕਿਂ ਪਰਿਦੇਵਿਤੇਨ ਪਯੋਜਨਨ੍ਤਿ ਅਤ੍ਥੋ. ਸੇਸਂ ਵੁਤ੍ਤਨਯਮੇਵ.

ਏਤ੍ਥ ਚ ਆਦਿਤੋ ਚਤਸ੍ਸੋ ਗਾਥਾ ਪਟਾਚਾਰਾਯ ਥੇਰਿਯਾ ਤੇਸਂ ਪਞ੍ਚਮਤ੍ਤਾਨਂ ਇਤ੍ਥਿਸਤਾਨਂ ਸੋਕਵਿਨੋਦਨਵਸੇਨ ਵਿਸੁਂ ਵਿਸੁਂ ਭਾਸਿਤਾ. ਤਸ੍ਸਾ ਓਵਾਦੇ ਠਤ੍ਵਾ ਪਬ੍ਬਜਿਤ੍ਵਾ ਅਧਿਗਤਵਿਸੇਸਾਹਿ ਤਾਹਿ ਪਞ੍ਚਸਤਮਤ੍ਤਾਹਿ ਭਿਕ੍ਖੁਨੀਹਿ ਛਪਿ ਗਾਥਾ ਪਚ੍ਚੇਕਂ ਭਾਸਿਤਾਤਿ ਦਟ੍ਠਬ੍ਬਾ.

ਪਞ੍ਚਸਤਾ ਪਟਾਚਾਰਾਤਿ ਪਟਾਚਾਰਾਯ ਥੇਰਿਯਾ ਸਨ੍ਤਿਕੇ ਲਦ੍ਧਓਵਾਦਤਾਯ ਪਟਾਚਾਰਾਯ ਵੁਤ੍ਤਂ ਅਵੇਦਿਸੁਨ੍ਤਿ ਕਤ੍ਵਾ ‘‘ਪਟਾਚਾਰਾ’’ਤਿ ਲਦ੍ਧਨਾਮਾ ਪਞ੍ਚਸਤਾ ਭਿਕ੍ਖੁਨਿਯੋ.

ਪਞ੍ਚਸਤਮਤ੍ਤਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.

੨. ਵਾਸੇਟ੍ਠੀਥੇਰੀਗਾਥਾਵਣ੍ਣਨਾ

ਪੁਤ੍ਤਸੋਕੇਨਹਂ ਅਟ੍ਟਾਤਿਆਦਿਕਾ ਵਾਸੇਟ੍ਠਿਯਾ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ ਅਨੁਕ੍ਕਮੇਨ ਸਮ੍ਭਤਵਿਮੋਕ੍ਖਸਮ੍ਭਾਰਾ ਦੇਵਮਨੁਸ੍ਸੇਸੁ ਸਂਸਰਨ੍ਤੀ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵੇਸਾਲਿਯਂ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤਾ ਮਾਤਾਪਿਤੂਹਿ ਸਮਾਨਜਾਤਿਕਸ੍ਸ ਕੁਲਪੁਤ੍ਤਸ੍ਸ ਦਿਨ੍ਨਾ ਪਤਿਕੁਲਂ ਗਨ੍ਤ੍ਵਾ ਤੇਨ ਸਦ੍ਧਿਂ ਸੁਖਸਂਵਾਸਂ ਵਸਨ੍ਤੀ ਏਕਂ ਪੁਤ੍ਤਂ ਲਭਿਤ੍ਵਾ ਤਸ੍ਮਿਂ ਆਧਾਵਿਤ੍ਵਾ ਪਰਿਧਾਵਿਤ੍ਵਾ ਵਿਚਰਣਕਾਲੇ ਕਾਲਂ ਕਤੇ ਪੁਤ੍ਤਸੋਕੇਨ ਅਟ੍ਟਿਤਾ ਉਮ੍ਮਤ੍ਤਿਕਾ ਅਹੋਸਿ. ਸਾ ਞਾਤਕੇਸੁ ਸਾਮਿਕੇ ਚ ਤਿਕਿਚ੍ਛਂ ਕਰੋਨ੍ਤੇਸੁ ਤੇਸਂ ਅਜਾਨਨ੍ਤਾਨਂਯੇਵ ਪਲਾਯਿਤ੍ਵਾ ਯਤੋ ਤਤੋ ਪਰਿਬ੍ਭਮਨ੍ਤੀ ਮਿਥਿਲਾਨਗਰਂ ਸਮ੍ਪਤ੍ਤਾ ਤਤ੍ਥਦ੍ਦਸ ਭਗਵਨ੍ਤਂ ਅਨ੍ਤਰਵੀਥਿਯਂ ਗਚ੍ਛਨ੍ਤਂ ਦਨ੍ਤਂ ਗੁਤ੍ਤਂ ਸਂਯਤਿਨ੍ਦ੍ਰਿਯਂ ਨਾਗਂ. ਦਿਸ੍ਵਾਨ ਸਹ ਦਸ੍ਸਨੇਨ ਬੁਦ੍ਧਾਨੁਭਾਵਤੋ ਅਪਗਤੁਮ੍ਮਾਦਾ ਪਕਤਿਚਿਤ੍ਤਂ ਪਟਿਲਭਿ. ਅਥਸ੍ਸਾ ਸਤ੍ਥਾ ਸਂਖਿਤ੍ਤੇਨ ਧਮ੍ਮਂ ਦੇਸੇਸਿ. ਸਾ ਤਂ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਂਵੇਗਾ ਸਤ੍ਥਾਰਂ ਪਬ੍ਬਜ੍ਜਂ ਯਾਚਿਤ੍ਵਾ ਸਤ੍ਥੁ ਆਣਾਯ ਭਿਕ੍ਖੁਨੀਸੁ ਪਬ੍ਬਜਿਤ੍ਵਾ ਕਤਪੁਬ੍ਬਕਿਚ੍ਚਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਘਟੇਨ੍ਤੀ ਵਾਯਮਨ੍ਤੀ ਪਰਿਪਕ੍ਕਞਾਣਤਾਯ ਨ ਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਉਦਾਨਵਸੇਨ –

੧੩੩. ‘‘ਪੁਤ੍ਤਸੋਕੇਨਹਂ ਅਟ੍ਟਾ, ਖਿਤ੍ਤਚਿਤ੍ਤਾ ਵਿਸਞ੍ਞਿਨੀ;

ਨਗ੍ਗਾ ਪਕਿਣ੍ਣਕੇਸੀ ਚ, ਤੇਨ ਤੇਨ ਵਿਚਾਰਿਹਂ.

੧੩੪. ‘‘ਵੀਥਿਸਙ੍ਕਾਰਕੂਟੇਸੁ, ਸੁਸਾਨੇ ਰਥਿਯਾਸੁ ਚ;

ਅਚਰਿਂ ਤੀਣਿ ਵਸ੍ਸਾਨਿ, ਖੁਪ੍ਪਿਪਾਸਾ ਸਮਪ੍ਪਿਤਾ.

੧੩੫. ‘‘ਅਥਦ੍ਦਸਾਸਿਂ ਸੁਗਤਂ, ਨਗਰਂ ਮਿਥਿਲਂ ਪਤਿ;

ਅਦਨ੍ਤਾਨਂ ਦਮੇਤਾਰਂ, ਸਮ੍ਬੁਦ੍ਧਮਕੁਤੋਭਯਂ.

੧੩੬. ‘‘ਸਚਿਤ੍ਤਂ ਪਟਿਲਦ੍ਧਾਨ, ਵਨ੍ਦਿਤ੍ਵਾਨ ਉਪਾਵਿਸਿਂ;

ਸੋ ਮੇ ਧਮ੍ਮਮਦੇਸੇਸਿ, ਅਨੁਕਮ੍ਪਾਯ ਗੋਤਮੋ.

੧੩੭. ‘‘ਤਸ੍ਸ ਧਮ੍ਮਂ ਸੁਣਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ;

ਯੁਞ੍ਜਨ੍ਤੀ ਸਤ੍ਥੁਵਚਨੇ, ਸਚ੍ਛਾਕਾਸਿਂ ਪਦਂ ਸਿਵਂ.

੧੩੮. ‘‘ਸਬ੍ਬੇ ਸੋਕਾ ਸਮੁਚ੍ਛਿਨ੍ਨਾ, ਪਹੀਨਾ ਏਤਦਨ੍ਤਿਕਾ;

ਪਰਿਞ੍ਞਾਤਾ ਹਿ ਮੇ ਵਤ੍ਥੂ, ਯਤੋ ਸੋਕਾਨ ਸਮ੍ਭਵੋ’’ਤਿ. –

ਇਮਾ ਗਾਥਾ ਅਭਾਸਿ.

ਤਤ੍ਥ ਅਟ੍ਟਾਤਿ ਅਟ੍ਟਿਤਾ. ਅਯਮੇਵ ਵਾ ਪਾਠੋ, ਅਟ੍ਟਿਤਾ ਪੀਲ਼ਿਤਾਤਿ ਅਤ੍ਥੋ. ਖਿਤ੍ਤਚਿਤ੍ਤਾਤਿ ਸੋਕੁਮ੍ਮਾਦੇਨ ਖਿਤ੍ਤਹਦਯਾ. ਤਤੋ ਏਵ ਪਕਤਿਸਞ੍ਞਾਯ ਵਿਗਮੇਨ ਵਿਸਞ੍ਞਿਨੀ. ਹਿਰੋਤ੍ਤਪ੍ਪਾਭਾਵਤੋ ਅਪਗਤਵਤ੍ਥਤਾਯ ਨਗ੍ਗਾ. ਵਿਧੁਤਕੇਸਤਾਯ ਪਕਿਣ੍ਣਕੇਸੀ. ਤੇਨ ਤੇਨਾਤਿ ਗਾਮੇਨ ਗਾਮਂ ਨਗਰੇਨ ਨਗਰਂ ਵੀਥਿਯਾ ਵੀਥਿਂ ਵਿਚਰਿਂ ਅਹਂ.

ਅਥਾਤਿ ਪਚ੍ਛਾ ਉਮ੍ਮਾਦਸਂਵਤ੍ਤਨਿਯਸ੍ਸ ਕਮ੍ਮਸ੍ਸ ਪਰਿਕ੍ਖਯੇ. ਸੁਗਤਨ੍ਤਿ ਸੋਭਨਗਮਨਤ੍ਤਾ ਸੁਨ੍ਦਰਂ ਠਾਨਂ ਗਤਤ੍ਤਾ ਸਮ੍ਮਾ ਗਦਤ੍ਤਾ ਸਮ੍ਮਾ ਚ ਗਤਤ੍ਤਾ ਸੁਗਤਂ ਭਗਵਨ੍ਤਂ. ਮਿਥਿਲਂ ਪਤੀਤਿ ਮਿਥਿਲਾਭਿਮੁਖਂ, ਮਿਥਿਲਾਨਗਰਾਭਿਮੁਖਂ ਗਚ੍ਛਨ੍ਤਨ੍ਤਿ ਅਤ੍ਥੋ.

ਸਚਿਤ੍ਤਂ ਪਟਿਲਦ੍ਧਾਨਾਤਿ ਬੁਦ੍ਧਾਨੁਭਾਵੇਨ ਉਮ੍ਮਾਦਂ ਪਹਾਯ ਅਤ੍ਤਨੋ ਪਕਤਿਚਿਤ੍ਤਂ ਪਟਿਲਭਿਤ੍ਵਾ.

ਯੁਞ੍ਜਨ੍ਤੀ ਸਤ੍ਥੁਵਚਨੇਤਿ ਸਤ੍ਥੁ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨੇ ਯੋਗਂ ਕਰੋਨ੍ਤੀ ਭਾਵਨਂ ਅਨੁਯੁਞ੍ਜਨ੍ਤੀ. ਸਚ੍ਛਾਕਾਸਿਂ ਪਦਂ ਸਿਵਨ੍ਤਿ ਸਿਵਂ ਖੇਮਂ ਚਤੂਹਿ ਯੋਗੇਹਿ ਅਨੁਪਦ੍ਦੁਤਂ ਨਿਬ੍ਬਾਨਂ ਪਦਂ ਸਚ੍ਛਿਅਕਾਸਿਂ.

ਏਤਦਨ੍ਤਿਕਾਤਿ ਏਤਂ ਇਦਾਨਿ ਮਯਾ ਅਧਿਗਤਂ ਅਰਹਤ੍ਤਂ ਅਨ੍ਤੋ ਪਰਿਯੋਸਾਨਂ ਏਤੇਸਨ੍ਤਿ ਏਤਦਨ੍ਤਿਕਾ, ਸੋਕਾ. ਨ ਦਾਨਿ ਤੇਸਂ ਸਮ੍ਭਵੋ ਅਤ੍ਥੀਤਿ ਅਤ੍ਥੋ. ਯਤੋ ਸੋਕਾਨ ਸਮ੍ਭਵੋਤਿ ਯਤੋ ਅਨ੍ਤੋਨਿਜ੍ਝਾਨਲਕ੍ਖਣਾਨਂ ਸੋਕਾਨਂ ਸਮ੍ਭਵੋ, ਤੇਸਂ ਸੋਕਾਨਂ ਪਞ੍ਚੁਪਾਦਾਨਕ੍ਖਨ੍ਧਸਙ੍ਖਾਤਾ ਵਤ੍ਥੂ ਅਧਿਟ੍ਠਾਨਾਨਿ ਞਾਤਤੀਰਣਪਹਾਨਪਰਿਞ੍ਞਾਹਿ ਪਰਿਞ੍ਞਾਤਾ. ਤਸ੍ਮਾ ਸੋਕਾ ਏਤਦਨ੍ਤਿਕਾਤਿ ਯੋਜਨਾ.

ਵਾਸੇਟ੍ਠੀਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.

੩. ਖੇਮਾਥੇਰੀਗਾਥਾਵਣ੍ਣਨਾ

ਦਹਰਾ ਤ੍ਵਂ ਰੂਪਵਤੀਤਿਆਦਿਕਾ ਖੇਮਾਯ ਥੇਰਿਯਾ ਗਾਥਾ. ਅਯਂ ਕਿਰ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਪਰਾਧੀਨਵੁਤ੍ਤਿਕਾ ਪਰੇਸਂ ਦਾਸੀ ਅਹੋਸਿ. ਸਾ ਪਰੇਸਂ ਵੇਯ੍ਯਾਵਚ੍ਚਕਰਣੇਨ ਜੀਵਿਕਂ ਕਪ੍ਪੇਨ੍ਤੀ ਏਕਦਿਵਸਂ ਪਦੁਮੁਤ੍ਤਰਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਅਗ੍ਗਸਾਵਕਂ ਸੁਜਾਤਤ੍ਥੇਰਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਤਯੋ ਮੋਦਕੇ ਦਤ੍ਵਾ ਤਂਦਿਵਸਮੇਵ ਅਤ੍ਤਨੋ ਕੇਸੇ ਵਿਸ੍ਸਜ੍ਜੇਤ੍ਵਾ ਥੇਰਸ੍ਸ ਦਾਨਂ ਦਤ੍ਵਾ ‘‘ਅਨਾਗਤੇ ਮਹਾਪਞ੍ਞਾ ਬੁਦ੍ਧਸ੍ਸ ਸਾਵਿਕਾ ਭਵੇਯ੍ਯ’’ਨ੍ਤਿ ਪਤ੍ਥਨਂ ਕਤ੍ਵਾ ਯਾਵਜੀਵਂ ਕੁਸਲਕਮ੍ਮੇ ਅਪ੍ਪਮਤ੍ਤਾ ਹੁਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੀ ਅਨੁਕ੍ਕਮੇਨ ਛਕਾਮਸਗ੍ਗੇ, ਤੇਸਂ ਤੇਸਂ ਦੇਵਰਾਜੂਨਂ ਮਹੇਸਿਭਾਵੇਨ ਉਪਪਨ੍ਨਾ, ਮਨੁਸ੍ਸਲੋਕੇਪਿ ਅਨੇਕਵਾਰਂ ਚਕ੍ਕਵਤ੍ਤੀਨਂ ਮਣ੍ਡਲਰਾਜੂਨਞ੍ਚ ਮਹੇਸਿਭਾਵਂ ਉਪਗਤਾ ਮਹਾਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਮਨੁਸ੍ਸਲੋਕੇ ਉਪ੍ਪਜ੍ਜਿਤ੍ਵਾ ਵਿਞ੍ਞੁਤਂ ਪਤ੍ਵਾ, ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਂਵੇਗਾ ਪਬ੍ਬਜਿਤ੍ਵਾ ਦਸਵਸ੍ਸਸਹਸ੍ਸਾਨਿ ਬ੍ਰਹ੍ਮਚਰਿਯਂ ਚਰਨ੍ਤੀ ਬਹੁਸ੍ਸੁਤਾ ਧਮ੍ਮਕਥਿਕਾ ਹੁਤ੍ਵਾ ਬਹੁਜਨਸ੍ਸ ਧਮ੍ਮਕਥਨਾਦਿਨਾ ਪਞ੍ਞਾਸਂਵਤ੍ਤਨਿਯਕਮ੍ਮਂ ਕਤ੍ਵਾ ਤਤੋ ਚਵਿਤ੍ਵਾ ਸੁਗਤੀਸੁਯੇਵ ਸਂਸਰਨ੍ਤੀ ਇਮਸ੍ਮਿਂ ਕਪ੍ਪੇ ਭਗਵਤੋ ਚ ਕਕੁਸਨ੍ਧਸ੍ਸ ਭਗਵਤੋ ਚ ਕੋਣਾਗਮਨਸ੍ਸ ਕਾਲੇ ਵਿਭਵਸਮ੍ਪਨ੍ਨੇ ਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਵਾ ਮਹਨ੍ਤਂ ਸਙ੍ਘਾਰਾਮਂ ਕਾਰੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਨਿਯ੍ਯਾਦੇਸਿ.

ਭਗਵਤੋ ਪਨ ਕਸ੍ਸਪਦਸਬਲਸ੍ਸ ਕਾਲੇ ਕਿਕਿਸ੍ਸ ਕਾਸਿਰਞ੍ਞੋ ਸਬ੍ਬਜੇਟ੍ਠਿਕਾ ਸਮਣੀ ਨਾਮ ਧੀਤਾ ਹੁਤ੍ਵਾ, ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਂਵੇਗਾ ਅਗਾਰੇਯੇਵ ਠਿਤਾ, ਵੀਸਤਿ ਵਸ੍ਸਸਹਸ੍ਸਾਨਿ ਕੋਮਾਰਿਬ੍ਰਹ੍ਮਚਰਿਯਂ ਚਰਨ੍ਤੀ ਸਮਣਗੁਤ੍ਤਾਦੀਹਿ ਅਤ੍ਤਨੋ ਭਗਿਨੀਹਿ ਸਦ੍ਧਿਂ ਰਮਣੀਯਂ ਪਰਿਵੇਣਂ ਕਾਰੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਨਿਯ੍ਯਾਦੇਸਿ. ਏਵਮੇਵ ਤਤ੍ਥ ਤਤ੍ਥ ਭਵੇ ਆਯਤਨਗਤਂ ਉਲ਼ਾਰਂ ਪੁਞ੍ਞਕਮ੍ਮਂ ਕਤ੍ਵਾ ਸੁਗਤੀਸੁਯੇਵ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਮਦ੍ਦਰਟ੍ਠੇ ਸਾਕਲਨਗਰੇ ਰਾਜਕੁਲੇ ਨਿਬ੍ਬਤ੍ਤਿ. ਖੇਮਾਤਿਸ੍ਸਾ ਨਾਮਂ ਅਹੋਸਿ, ਸੁਵਣ੍ਣਵਣ੍ਣਾ ਕਞ੍ਚਨਸਨ੍ਨਿਭਤ੍ਤਚਾ. ਸਾ ਵਯਪ੍ਪਤ੍ਤਾ ਬਿਮ੍ਬਿਸਾਰਰਞ੍ਞੋ ਗੇਹਂ ਗਤਾ. ਸਤ੍ਥਰਿ ਵੇਲ਼ੁਵਨੇ ਵਿਹਰਨ੍ਤੇ ਰੂਪਮਤ੍ਤਾ ਹੁਤ੍ਵਾ ‘‘ਰੂਪੇ ਦੋਸਂ ਦਸ੍ਸੇਤੀ’’ਤਿ ਸਤ੍ਥੁ ਦਸ੍ਸਨਾਯ ਨ ਗਚ੍ਛਤਿ.

ਰਾਜਾ ਮਨੁਸ੍ਸੇਹਿ ਵੇਲ਼ੁਵਨਸ੍ਸ ਵਣ੍ਣੇ ਪਕਾਸਾਪੇਤ੍ਵਾ ਦੇਵਿਯਾ ਵਿਹਾਰਦਸ੍ਸਨਾਯ ਚਿਤ੍ਤਂ ਉਪ੍ਪਾਦੇਸਿ. ਅਥ ਦੇਵੀ ‘‘ਵਿਹਾਰਂ ਪਸ੍ਸਿਸ੍ਸਾਮੀ’’ਤਿ ਰਾਜਾਨਂ ਪਟਿਪੁਚ੍ਛਿ. ਰਾਜਾ ‘‘ਵਿਹਾਰਂ ਗਨ੍ਤ੍ਵਾ ਸਤ੍ਥਾਰਂ ਅਦਿਸ੍ਵਾ ਆਗਨ੍ਤੁਂ ਨ ਲਭਿਸ੍ਸਸੀ’’ਤਿ ਵਤ੍ਵਾ ਪੁਰਿਸਾਨਂ ਸਞ੍ਞਂ ਅਦਾਸਿ – ‘‘ਬਲਕ੍ਕਾਰੇਨਪਿ ਦੇਵਿਂ ਦਸਬਲਂ ਦਸ੍ਸੇਥਾ’’ਤਿ. ਦੇਵੀ ਵਿਹਾਰਂ ਗਨ੍ਤ੍ਵਾ ਦਿਵਸਭਾਗਂ ਖੇਪੇਤ੍ਵਾ ਨਿਵਤ੍ਤੇਨ੍ਤੀ ਸਤ੍ਥਾਰਂ ਅਦਿਸ੍ਵਾਵ ਗਨ੍ਤੁਂ ਆਰਦ੍ਧਾ. ਅਥ ਨਂ ਰਾਜਪੁਰਿਸਾ ਅਨਿਚ੍ਛਨ੍ਤਿਮ੍ਪਿ ਸਤ੍ਥੁ ਸਨ੍ਤਿਕਂ ਨਯਿਂਸੁ. ਸਤ੍ਥਾ ਤਂ ਆਗਚ੍ਛਨ੍ਤਿਂ ਦਿਸ੍ਵਾ ਇਦ੍ਧਿਯਾ ਦੇਵਚ੍ਛਰਾਸਦਿਸਂ ਇਤ੍ਥਿਂ ਨਿਮ੍ਮਿਨਿਤ੍ਵਾ ਤਾਲਪਣ੍ਣਂ ਗਹੇਤ੍ਵਾ ਬੀਜਯਮਾਨਂ ਅਕਾਸਿ. ਖੇਮਾ ਦੇਵੀ ਤਂ ਦਿਸ੍ਵਾ ਚਿਨ੍ਤੇਸਿ – ‘‘ਏਵਰੂਪਾ ਨਾਮ ਦੇਵਚ੍ਛਰਪਟਿਭਾਗਾ ਇਤ੍ਥਿਯੋ ਭਗਵਤੋ ਅਵਿਦੂਰੇ ਤਿਟ੍ਠਨ੍ਤਿ, ਅਹਂ ਏਤਾਸਂ ਪਰਿਚਾਰਿਕਤਾਯਪਿ ਨਪ੍ਪਹੋਮਿ, ਮਨਮ੍ਪਿ ਨਿਕ੍ਕਾਰਣਾ ਪਾਪਚਿਤ੍ਤਸ੍ਸ ਵਸੇਨ ਨਟ੍ਠਾ’’ਤਿ ਨਿਮਿਤ੍ਤਂ ਗਹੇਤ੍ਵਾ ਤਮੇਵ ਇਤ੍ਥਿਂ ਓਲੋਕਯਮਾਨਾ ਅਟ੍ਠਾਸਿ. ਅਥਸ੍ਸਾ ਪਸ੍ਸਨ੍ਤਿਯਾਵ ਸਤ੍ਥੁ ਅਧਿਟ੍ਠਾਨਬਲੇਨ ਸਾ ਇਤ੍ਥੀ ਪਠਮਵਯਂ ਅਤਿਕ੍ਕਮ੍ਮ ਮਜ੍ਝਿਮਵਯਮ੍ਪਿ ਅਤਿਕ੍ਕਮ੍ਮ ਪਚ੍ਛਿਮਵਯਂ ਪਤ੍ਵਾ ਖਣ੍ਡਦਨ੍ਤਾ ਪਲਿਤਕੇਸਾ ਵਲਿਤ੍ਤਚਾ ਹੁਤ੍ਵਾ ਸਦ੍ਧਿਂ ਤਾਲਪਣ੍ਣੇਨ ਪਰਿਵਤ੍ਤਿਤ੍ਵਾ ਪਤਿ. ਤਤੋ ਖੇਮਾ ਕਤਾਧਿਕਾਰਤ੍ਤਾ ਏਵਂ ਚਿਨ੍ਤੇਸਿ – ‘‘ਏਵਂਵਿਧਮ੍ਪਿ ਸਰੀਰਂ ਈਦਿਸਂ ਵਿਪਤ੍ਤਿਂ ਪਾਪੁਣਿ, ਮਯ੍ਹਮ੍ਪਿ ਸਰੀਰਂ ਏਵਂਗਤਿਕਮੇਵ ਭਵਿਸ੍ਸਤੀ’’ਤਿ. ਅਥਸ੍ਸਾ ਚਿਤ੍ਤਾਚਾਰਂ ਞਤ੍ਵਾ ਸਤ੍ਥਾ –

‘‘ਯੇ ਰਾਗਰਤ੍ਤਾਨੁਪਤਨ੍ਤਿ ਸੋਤਂ, ਸਯਂ ਕਤਂ ਮਕ੍ਕਟਕੋਵ ਜਾਲਂ;

ਏਤਮ੍ਪਿ ਛੇਤ੍ਵਾਨ ਪਰਿਬ੍ਬਜਨ੍ਤਿ, ਅਨਪੇਕ੍ਖਿਨੋ ਕਾਮਸੁਖਂ ਪਹਾਯਾ’’ਤਿ. –

ਗਾਥਮਾਹ. ਸਾ ਗਾਥਾਪਰਿਯੋਸਾਨੇ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣੀਤਿ ਅਟ੍ਠਕਥਾਸੁ ਆਗਤਂ. ਅਪਦਾਨੇ ਪਨ ‘‘ਇਮਂ ਗਾਥਂ ਸੁਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਿਤਾ ਰਾਜਾਨਂ ਅਨੁਜਾਨਾਪੇਤ੍ਵਾ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣੀ’’ਤਿ ਆਗਤਂ. ਤਤ੍ਥਾਯਂ ਅਪਦਾਨਪਾਲ਼ਿ (ਅਪ. ਥੇਰੀ ੨.੨.੨੮੯-੩੮੩) –

‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮੇਸੁ ਚਕ੍ਖੁਮਾ;

ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ.

‘‘ਤਦਾਹਂ ਹਂਸਵਤਿਯਂ, ਜਾਤਾ ਸੇਟ੍ਠਿਕੁਲੇ ਅਹੁਂ;

ਨਾਨਾਰਤਨਪਜ੍ਜੋਤੇ, ਮਹਾਸੁਖਸਮਪ੍ਪਿਤਾ.

‘‘ਉਪੇਤ੍ਵਾ ਤਂ ਮਹਾਵੀਰਂ, ਅਸ੍ਸੋਸਿਂ ਧਮ੍ਮਦੇਸਨਂ;

ਤਤੋ ਜਾਤਪ੍ਪਸਾਦਾਹਂ, ਉਪੇਮਿ ਸਰਣਂ ਜਿਨਂ.

‘‘ਮਾਤਰਂ ਪਿਤਰਂ ਚਾਹਂ, ਆਯਾਚਿਤ੍ਵਾ ਵਿਨਾਯਕਂ;

ਨਿਮਨ੍ਤਯਿਤ੍ਵਾ ਸਤ੍ਤਾਹਂ, ਭੋਜਯਿਂ ਸਹਸਾਵਕਂ.

‘‘ਅਤਿਕ੍ਕਨ੍ਤੇ ਚ ਸਤ੍ਤਾਹੇ, ਮਹਾਪਞ੍ਞਾਨਮੁਤ੍ਤਮਂ;

ਭਿਕ੍ਖੁਨਿਂ ਏਤਦਗ੍ਗਮ੍ਹਿ, ਠਪੇਸਿ ਨਰਸਾਰਥਿ.

‘‘ਤਂ ਸੁਤ੍ਵਾ ਮੁਦਿਤਾ ਹੁਤ੍ਵਾ, ਪੁਨੋ ਤਸ੍ਸ ਮਹੇਸਿਨੋ;

ਕਾਰਂ ਕਤ੍ਵਾਨ ਤਂ ਠਾਨਂ, ਪਣਿਪਚ੍ਚ ਪਣੀਦਹਿਂ.

‘‘ਤਤੋ ਮਮ ਜਿਨੋ ਆਹ, ਸਿਜ੍ਝਤਂ ਪਣਿਧੀ ਤਵ;

ਸਸਙ੍ਘੇ ਮੇ ਕਤਂ ਕਾਰਂ, ਅਪ੍ਪਮੇਯ੍ਯਫਲਂ ਤਯਾ.

‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

‘‘ਤਸ੍ਸ ਧਮ੍ਮੇਸੁ ਦਾਯਾਦਾ, ਓਰਸਾ ਧਮ੍ਮਨਿਮ੍ਮਿਤਾ;

ਏਤਦਗ੍ਗਮਨੁਪ੍ਪਤ੍ਤਾ, ਖੇਮਾ ਨਾਮ ਭਵਿਸ੍ਸਤਿ.

‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸੂਪਗਾ ਅਹਂ.

‘‘ਤਤੋ ਚੁਤਾ ਯਾਮਮਗਂ, ਤਤੋਹਂ ਤੁਸਿਤਂ ਗਤਾ;

ਤਤੋ ਚ ਨਿਮ੍ਮਾਨਰਤਿਂ, ਵਸਵਤ੍ਤਿਪੁਰਂ ਤਤੋ.

‘‘ਯਤ੍ਥ ਯਤ੍ਥੂਪਪਜ੍ਜਾਮਿ, ਤਸ੍ਸ ਕਮ੍ਮਸ੍ਸ ਵਾਹਸਾ;

ਤਤ੍ਥ ਤਤ੍ਥੇਵ ਰਾਜੂਨਂ, ਮਹੇਸਿਤ੍ਤਮਕਾਰਯਿਂ.

‘‘ਤਤੋ ਚੁਤਾ ਮਨੁਸ੍ਸਤ੍ਤੇ, ਰਾਜੂਨਂ ਚਕ੍ਕਵਤ੍ਤਿਨਂ;

ਮਣ੍ਡਲੀਨਞ੍ਚ ਰਾਜੂਨਂ, ਮਹੇਸਿਤ੍ਤਮਕਾਰਯਿਂ.

‘‘ਸਮ੍ਪਤ੍ਤਿਂ ਅਨੁਭੋਤ੍ਵਾਨ, ਦੇਵੇਸੁ ਮਨੁਜੇਸੁ ਚ;

ਸਬ੍ਬਤ੍ਥ ਸੁਖਿਤਾ ਹੁਤ੍ਵਾ, ਨੇਕਕਪ੍ਪੇਸੁ ਸਂਸਰਿਂ.

‘‘ਏਕਨਵੁਤਿਤੋ ਕਪ੍ਪੇ, ਵਿਪਸ੍ਸੀ ਲੋਕਨਾਯਕੋ;

ਉਪ੍ਪਜ੍ਜਿ ਚਾਰੁਦਸ੍ਸਨੋ, ਸਬ੍ਬਧਮ੍ਮਵਿਪਸ੍ਸਕੋ.

‘‘ਤਮਹਂ ਲੋਕਨਾਯਕਂ, ਉਪੇਤ੍ਵਾ ਨਰਸਾਰਥਿਂ;

ਧਮ੍ਮਂ ਭਣਿਤਂ ਸੁਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ.

‘‘ਦਸਵਸ੍ਸਸਹਸ੍ਸਾਨਿ, ਤਸ੍ਸ ਵੀਰਸ੍ਸ ਸਾਸਨੇ;

ਬ੍ਰਹ੍ਮਚਰਿਯਂ ਚਰਿਤ੍ਵਾਨ, ਯੁਤ੍ਤਯੋਗਾ ਬਹੁਸ੍ਸੁਤਾ.

‘‘ਪਚ੍ਚਯਾਕਾਰਕੁਸਲਾ, ਚਤੁਸਚ੍ਚਵਿਸਾਰਦਾ;

ਨਿਪੁਣਾ ਚਿਤ੍ਤਕਥਿਕਾ, ਸਤ੍ਥੁਸਾਸਨਕਾਰਿਕਾ.

‘‘ਤਤੋ ਚੁਤਾਹਂ ਤੁਸਿਤਂ, ਉਪਪਨ੍ਨਾ ਯਸਸ੍ਸਿਨੀ;

ਅਭਿਭੋਮਿ ਤਹਿਂ ਅਞ੍ਞੇ, ਬ੍ਰਹ੍ਮਚਾਰੀਫਲੇਨਹਂ.

‘‘ਯਤ੍ਥ ਯਤ੍ਥੂਪਪਨ੍ਨਾਹਂ, ਮਹਾਭੋਗਾ ਮਹਦ੍ਧਨਾ;

ਮੇਧਾਵਿਨੀ ਸੀਲਵਤੀ, ਵਿਨੀਤਪਰਿਸਾਪਿ ਚ.

‘‘ਭਵਾਮਿ ਤੇਨ ਕਮ੍ਮੇਨ, ਯੋਗੇਨ ਜਿਨਸਾਸਨੇ;

ਸਬ੍ਬਾ ਸਮ੍ਪਤ੍ਤਿਯੋ ਮਯ੍ਹਂ, ਸੁਲਭਾ ਮਨਸੋ ਪਿਯਾ.

‘‘ਯੋਪਿ ਮੇ ਭਵਤੇ ਭਤ੍ਤਾ, ਯਤ੍ਥ ਯਤ੍ਥ ਗਤਾਯਪਿ;

ਵਿਮਾਨੇਤਿ ਨ ਮਂ ਕੋਚਿ, ਪਟਿਪਤ੍ਤਿਬਲੇਨ ਮੇ.

‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਨਾਮੇਨ ਕੋਣਾਗਮਨੋ, ਉਪ੍ਪਜ੍ਜਿ ਵਦਤਂ ਵਰੋ.

‘‘ਤਦਾ ਹਿ ਬਾਰਾਣਸਿਯਂ, ਸੁਸਮਿਦ੍ਧਕੁਲਪ੍ਪਜਾ;

ਧਨਞ੍ਜਾਨੀ ਸੁਮੇਧਾ ਚ, ਅਹਮ੍ਪਿ ਚ ਤਯੋ ਜਨਾ.

‘‘ਸਙ੍ਘਾਰਾਮਮਦਾਸਿਮ੍ਹ, ਦਾਨਸਹਾਯਿਕਾ ਪੁਰੇ;

ਸਙ੍ਘਸ੍ਸ ਚ ਵਿਹਾਰਮ੍ਪਿ, ਉਦ੍ਦਿਸ੍ਸ ਕਾਰਿਕਾ ਮਯਂ.

‘‘ਤਤੋ ਚੁਤਾ ਮਯਂ ਸਬ੍ਬਾ, ਤਾਵਤਿਂਸੂਪਗਾ ਅਹੁਂ;

ਯਸਸਾ ਅਗ੍ਗਤਂ ਪਤ੍ਤਾ, ਮਨੁਸ੍ਸੇਸੁ ਤਥੇਵ ਚ.

‘‘ਇਮਸ੍ਮਿਂਯੇਵ ਕਪ੍ਪਮ੍ਹਿ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

‘‘ਉਪਟ੍ਠਾਕੋ ਮਹੇਸਿਸ੍ਸ, ਤਦਾ ਆਸਿ ਨਰਿਸ੍ਸਰੋ;

ਕਾਸਿਰਾਜਾ ਕਿਕੀ ਨਾਮ, ਬਾਰਾਣਸਿਪੁਰੁਤ੍ਤਮੇ.

‘‘ਤਸ੍ਸਾਸਿਂ ਜੇਟ੍ਠਿਕਾ ਧੀਤਾ, ਸਮਣੀ ਇਤਿ ਵਿਸ੍ਸੁਤਾ;

ਧਮ੍ਮਂ ਸੁਤ੍ਵਾ ਜਿਨਗ੍ਗਸ੍ਸ, ਪਬ੍ਬਜ੍ਜਂ ਸਮਰੋਚਯਿਂ.

‘‘ਅਨੁਜਾਨਿ ਨ ਨੋ ਤਾਤੋ, ਅਗਾਰੇਵ ਤਦਾ ਮਯਂ;

ਵੀਸਵਸ੍ਸਸਹਸ੍ਸਾਨਿ, ਵਿਚਰਿਮ੍ਹ ਅਤਨ੍ਦਿਤਾ.

‘‘ਕੋਮਾਰਿਬ੍ਰਹ੍ਮਚਰਿਯਂ, ਰਾਜਕਞ੍ਞਾ ਸੁਖੇਧਿਤਾ;

ਬੁਦ੍ਧੋਪਟ੍ਠਾਨਨਿਰਤਾ, ਮੁਦਿਤਾ ਸਤ੍ਤ ਧੀਤਰੋ.

‘‘ਸਮਣੀ ਸਮਣਗੁਤ੍ਤਾ ਚ, ਭਿਕ੍ਖੁਨੀ ਭਿਕ੍ਖੁਦਾਯਿਕਾ;

ਧਮ੍ਮਾ ਚੇਵ ਸੁਧਮ੍ਮਾ ਚ, ਸਤ੍ਤਮੀ ਸਙ੍ਘਦਾਯਿਕਾ.

‘‘ਅਹਂ ਉਪ੍ਪਲਵਣ੍ਣਾ ਚ, ਪਟਾਚਾਰਾ ਚ ਕੁਣ੍ਡਲਾ;

ਕਿਸਾਗੋਤਮੀ ਧਮ੍ਮਦਿਨ੍ਨਾ, ਵਿਸਾਖਾ ਹੋਤਿ ਸਤ੍ਤਮੀ.

‘‘ਕਦਾਚਿ ਸੋ ਨਰਾਦਿਚ੍ਚੋ, ਧਮ੍ਮਂ ਦੇਸੇਸਿ ਅਬ੍ਭੁਤਂ;

ਮਹਾਨਿਦਾਨਸੁਤ੍ਤਨ੍ਤਂ, ਸੁਤ੍ਵਾ ਤਂ ਪਰਿਯਾਪੁਣਿਂ.

‘‘ਤੇਹਿ ਕਮ੍ਮੇਹਿ ਸੁਕਤੇਹਿ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਪਚ੍ਛਿਮੇ ਚ ਭਵੇ ਦਾਨਿ, ਸਾਕਲਾਯ ਪੁਰੁਤ੍ਤਮੇ;

ਰਞ੍ਞੋ ਮਦ੍ਦਸ੍ਸ ਧੀਤਾਮ੍ਹਿ, ਮਨਾਪਾ ਦਯਿਤਾ ਪਿਯਾ.

‘‘ਸਹ ਮੇ ਜਾਤਮਤ੍ਤਮ੍ਹਿ, ਖੇਮਂ ਤਮ੍ਹਿ ਪੁਰੇ ਅਹੁ;

ਤਤੋ ਖੇਮਾਤਿ ਨਾਮਂ ਮੇ, ਗੁਣਤੋ ਉਪਪਜ੍ਜਥ.

‘‘ਯਦਾਹਂ ਯੋਬ੍ਬਨਂ ਪਤ੍ਤਾ, ਰੂਪਲਾਵਞ੍ਞਭੂਸਿਤਾ;

ਤਦਾ ਅਦਾਸਿ ਮਂ ਤਾਤੋ, ਬਿਮ੍ਬਿਸਾਰਸ੍ਸ ਰਾਜਿਨੋ.

‘‘ਤਸ੍ਸਾਹਂ ਸੁਪ੍ਪਿਯਾ ਆਸਿਂ, ਰੂਪਕੇਲਾਯਨੇ ਰਤਾ;

ਰੂਪਾਨਂ ਦੋਸਵਾਦੀਤਿ, ਨ ਉਪੇਸਿਂ ਮਹਾਦਯਂ.

‘‘ਬਿਮ੍ਬਿਸਾਰੋ ਤਦਾ ਰਾਜਾ, ਮਮਾਨੁਗ੍ਗਹਬੁਦ੍ਧਿਯਾ;

ਵਣ੍ਣਯਿਤ੍ਵਾ ਵੇਲ਼ੁਵਨਂ, ਗਾਯਕੇ ਗਾਪਯੀ ਮਮਂ.

‘‘ਰਮ੍ਮਂ ਵੇਲ਼ੁਵਨਂ ਯੇਨ, ਨ ਦਿਟ੍ਠਂ ਸੁਗਤਾਲਯਂ;

ਨ ਤੇਨ ਨਨ੍ਦਨਂ ਦਿਟ੍ਠਂ, ਇਤਿ ਮਞ੍ਞਾਮਸੇ ਮਯਂ.

‘‘ਯੇਨ ਵੇਲ਼ੁਵਨਂ ਦਿਟ੍ਠਂ, ਨਰਨਨ੍ਦਨਨਨ੍ਦਨਂ;

ਸੁਦਿਟ੍ਠਂ ਨਨ੍ਦਨਂ ਤੇਨ, ਅਮਰਿਨ੍ਦਸੁਨਨ੍ਦਨਂ.

‘‘ਵਿਹਾਯ ਨਨ੍ਦਨਂ ਦੇਵਾ, ਓਤਰਿਤ੍ਵਾ ਮਹੀਤਲਂ;

ਰਮ੍ਮਂ ਵੇਲ਼ੁਵਨਂ ਦਿਸ੍ਵਾ, ਨ ਤਪ੍ਪਨ੍ਤਿ ਸੁਵਿਮ੍ਹਿਤਾ.

‘‘ਰਾਜਪੁਞ੍ਞੇਨ ਨਿਬ੍ਬਤ੍ਤਂ, ਬੁਦ੍ਧਪੁਞ੍ਞੇਨ ਭੂਸਿਤਂ;

ਕੋ ਵਤ੍ਤਾ ਤਸ੍ਸ ਨਿਸ੍ਸੇਸਂ, ਵਨਸ੍ਸ ਗੁਣਸਞ੍ਚਯਂ.

‘‘ਤਂ ਸੁਤ੍ਵਾ ਵਨਸਮਿਦ੍ਧਂ, ਮਮ ਸੋਤਮਨੋਹਰਂ;

ਦਟ੍ਠੁਕਾਮਾ ਤਮੁਯ੍ਯਾਨਂ, ਰਞ੍ਞੋ ਆਰੋਚਯਿਂ ਤਦਾ.

‘‘ਮਹਤਾ ਪਰਿਵਾਰੇਨ, ਤਦਾ ਚ ਸੋ ਮਹੀਪਤਿ;

ਮਂ ਪੇਸੇਸਿ ਤਮੁਯ੍ਯਾਨਂ, ਦਸ੍ਸਨਾਯ ਸਮੁਸ੍ਸੁਕਂ.

‘‘ਗਚ੍ਛ ਪਸ੍ਸ ਮਹਾਭੋਗੇ, ਵਨਂ ਨੇਤ੍ਤਰਸਾਯਨਂ;

ਯਂ ਸਦਾ ਭਾਤਿ ਸਿਰਿਯਾ, ਸੁਗਤਾਭਾਨੁਰਞ੍ਜਿਤਂ.

‘‘ਯਦਾ ਚ ਪਿਣ੍ਡਾਯ ਮੁਨਿ, ਗਿਰਿਬ੍ਬਜਪੁਰੁਤ੍ਤਮਂ;

ਪਵਿਟ੍ਠੋਹਂ ਤਦਾਯੇਵ, ਵਨਂ ਦਟ੍ਠੁਮੁਪਾਗਮਿਂ.