੧੧. ਤਿਂਸਮਤ੍ਤਾਥੇਰੀਗਾਥਾਵਣ੍ਣਨਾ

ਮੁਸਲਾਨਿ ਗਹੇਤ੍ਵਾਨਾਤਿਆਦਿਕਾ ਤਿਂਸਮਤ੍ਤਾਨਂ ਥੇਰੀਨਂ ਗਾਥਾ. ਤਾਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤਿਯੋ ਅਨੁਕ੍ਕਮੇਨ ਉਪਚਿਤਵਿਮੋਕ੍ਖਸਮ੍ਭਾਰਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਕਕਮ੍ਮਸਞ੍ਚੋਦਿਤਾ ਤਤ੍ਥ ਤਤ੍ਥ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਵਾ ਪਟਾਚਾਰਾਯ ਥੇਰਿਯਾ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧਾ ਪਬ੍ਬਜਿਤ੍ਵਾ ਪਰਿਸੁਦ੍ਧਸੀਲਾ ਵਤ੍ਤਪਟਿਵਤ੍ਤਂ ਪਰਿਪੂਰੇਨ੍ਤਿਯੋ ਵਿਹਰਨ੍ਤਿ. ਅਥੇਕਦਿਵਸਂ ਪਟਾਚਾਰਾਥੇਰੀ ਤਾਸਂ ਓਵਾਦਂ ਦੇਨ੍ਤੀ –

੧੧੭. ‘‘ਮੁਸਲਾਨਿ ਗਹੇਤ੍ਵਾਨ, ਧਞ੍ਞਂ ਕੋਟ੍ਟੇਨ੍ਤਿ ਮਾਣਵਾ;

ਪੁਤ੍ਤਦਾਰਾਨਿ ਪੋਸੇਨ੍ਤਾ, ਧਨਂ ਵਿਨ੍ਦਨ੍ਤਿ ਮਾਣਵਾ.

੧੧੮. ‘‘ਕਰੋਥ ਬੁਦ੍ਧਸਾਸਨਂ, ਯਂ ਕਤ੍ਵਾ ਨਾਨੁਤਪ੍ਪਤਿ;

ਖਿਪ੍ਪਂ ਪਾਦਾਨਿ ਧੋਵਿਤ੍ਵਾ, ਏਕਮਨ੍ਤੇ ਨਿਸੀਦਥ;

ਚੇਤੋਸਮਥਮਨੁਯੁਤ੍ਤਾ, ਕਰੋਥ ਬੁਦ੍ਧਸਾਸਨ’’ਨ੍ਤਿ. – ਇਮਾ ਦ੍ਵੇ ਗਾਥਾ ਅਭਾਸਿ;

ਤਤ੍ਥਾਯਂ ਸਙ੍ਖੇਪਤ੍ਥੋ – ਇਮੇ ਸਤ੍ਤਾ ਜੀਵਿਤਹੇਤੁ ਮੁਸਲਾਨਿ ਗਹੇਤ੍ਵਾ ਪਰੇਸਂ ਧਞ੍ਞਂ ਕੋਟ੍ਟੇਨ੍ਤਿ, ਉਦੁਕ੍ਖਲਕਮ੍ਮਂ ਕਰੋਨ੍ਤਿ. ਅਞ੍ਞਮ੍ਪਿ ਏਦਿਸਂ ਨਿਹੀਨਕਮ੍ਮਂ ਕਤ੍ਵਾ ਪੁਤ੍ਤਦਾਰਂ ਪੋਸੇਨ੍ਤਾ ਯਥਾਰਹਂ ਧਨਮ੍ਪਿ ਸਂਹਰਨ੍ਤਿ. ਤਂ ਪਨ ਨੇਸਂ ਕਮ੍ਮਂ ਨਿਹੀਨਂ ਗਮ੍ਮਂ ਪੋਥੁਜ੍ਜਨਿਕਂ ਦੁਕ੍ਖਂ ਅਨਤ੍ਥਸਞ੍ਹਿਤਞ੍ਚ. ਤਸ੍ਮਾ ਏਦਿਸਂ ਸਂਕਿਲੇਸਿਕਪਪਞ੍ਚਂ ਵਜ੍ਜੇਤ੍ਵਾ ਕਰੋਥ ਬੁਦ੍ਧਸਾਸਨਂ ਸਿਕ੍ਖਤ੍ਤਯਸਙ੍ਖਾਤਂ ਸਮ੍ਮਾਸਮ੍ਬੁਦ੍ਧਸਾਸਨਂ ਕਰੋਥ ਸਮ੍ਪਾਦੇਥ ਅਤ੍ਤਨੋ ਸਨ੍ਤਾਨੇ ਨਿਬ੍ਬਤ੍ਤੇਥ. ਤਤ੍ਥ ਕਾਰਣਮਾਹ – ‘‘ਯਂ ਕਤ੍ਵਾ ਨਾਨੁਤਪ੍ਪਤੀ’’ਤਿ, ਯਸ੍ਸ ਕਰਣਹੇਤੁ ਏਤਰਹਿ ਆਯਤਿਞ੍ਚ ਅਨੁਤਾਪਂ ਨਾਪਜ੍ਜਤਿ. ਇਦਾਨਿ ਤਸ੍ਸ ਕਰਣੇ ਪੁਬ੍ਬਕਿਚ੍ਚਂ ਅਨੁਯੋਗਵਿਧਿਞ੍ਚ ਦਸ੍ਸੇਤੁਂ, ‘‘ਖਿਪ੍ਪਂ ਪਾਦਾਨਿ ਧੋਵਿਤ੍ਵਾ’’ਤਿਆਦਿ ਵੁਤ੍ਤਂ. ਤਤ੍ਥ ਯਸ੍ਮਾ ਅਧੋਵਿਤਪਾਦਸ੍ਸ ਅਵਿਕ੍ਖਾਲਿਤਮੁਖਸ੍ਸ ਚ ਨਿਸਜ੍ਜਸੁਖਂ ਉਤੁਸਪ੍ਪਾਯਲਾਭੋ ਚ ਨ ਹੋਤਿ, ਪਾਦੇ ਪਨ ਧੋਵਿਤ੍ਵਾ ਮੁਖਞ੍ਚ ਵਿਕ੍ਖਾਲੇਤ੍ਵਾ ਏਕਮਨ੍ਤੇ ਨਿਸਿਨ੍ਨਸ੍ਸ ਤਦੁਭਯਂ ਲਭਤਿ, ਤਸ੍ਮਾ ਖਿਪ੍ਪਂ ਇਮਂ ਯਥਾਲਦ੍ਧਂ ਖਣਂ ਅਵਿਰਾਧੇਨ੍ਤਿਯੋ ਪਾਦਾਨਿ ਅਤ੍ਤਨੋ ਪਾਦੇ ਧੋਵਿਤ੍ਵਾ ਏਕਮਨ੍ਤੇ ਵਿਵਿਤ੍ਤੇ ਓਕਾਸੇ ਨਿਸੀਦਥ ਨਿਸਜ੍ਜਥ. ਅਟ੍ਠਤਿਂਸਾਯ ਆਰਮ੍ਮਣੇਸੁ ਯਤ੍ਥ ਕਤ੍ਥਚਿ ਚਿਤ੍ਤਰੁਚਿਕੇ ਆਰਮ੍ਮਣੇ ਅਤ੍ਤਨੋ ਚਿਤ੍ਤਂ ਉਪਨਿਬਨ੍ਧਿਤ੍ਵਾ ਚੇਤੋਸਮਥਮਨੁਯੁਤ੍ਤਾ ਸਮਾਹਿਤੇਨ ਚਿਤ੍ਤੇਨ ਚਤੁਸਚ੍ਚਕਮ੍ਮਟ੍ਠਾਨਭਾਵਨਾਵਸੇਨ ਬੁਦ੍ਧਸ੍ਸ ਭਗਵਤੋ ਸਾਸਨਂ ਓਵਾਦਂ ਅਨੁਸਿਟ੍ਠਿਂ ਕਰੋਥ ਸਮ੍ਪਾਦੇਥਾਤਿ.

ਅਥ ਤਾ ਭਿਕ੍ਖੁਨਿਯੋ ਤਸ੍ਸਾ ਥੇਰਿਯਾ ਓਵਾਦੇ ਠਤ੍ਵਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਭਾਵਨਾਯ ਕਮ੍ਮਂ ਕਰੋਨ੍ਤਿਯੋ ਞਾਣਸ੍ਸ ਪਰਿਪਾਕਂ ਗਤਤ੍ਤਾ ਹੇਤੁਸਮ੍ਪਨ੍ਨਤਾਯ ਚ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਓਵਾਦਗਾਥਾਹਿ ਸਦ੍ਧਿਂ –

੧੧੯. ‘‘ਤਸ੍ਸਾ ਤਾ ਵਚਨਂ ਸੁਤ੍ਵਾ, ਪਟਾਚਾਰਾਯ ਸਾਸਨਂ;

ਪਾਦੇ ਪਕ੍ਖਾਲਯਿਤ੍ਵਾਨ, ਏਕਮਨ੍ਤਂ ਉਪਾਵਿਸੁਂ;

ਚੇਤੋਸਮਥਮਨੁਯੁਤ੍ਤਾ, ਅਕਂਸੁ ਬੁਦ੍ਧਸਾਸਨਂ.

੧੨੦. ‘‘ਰਤ੍ਤਿਯਾ ਪੁਰਿਮੇ ਯਾਮੇ, ਪੁਬ੍ਬਜਾਤਿਮਨੁਸ੍ਸਰੁਂ;

ਰਤ੍ਤਿਯਾ ਮਜ੍ਝਿਮੇ ਯਾਮੇ, ਦਿਬ੍ਬਚਕ੍ਖੁਂ ਵਿਸੋਧਯੁਂ;

ਰਤ੍ਤਿਯਾ ਪਚ੍ਛਿਮੇ ਯਾਮੇ, ਤਮੋਖਨ੍ਧਂ ਪਦਾਲਯੁਂ.

੧੨੧. ‘‘ਉਟ੍ਠਾਯ ਪਾਦੇ ਵਨ੍ਦਿਂਸੁ, ਕਤਾ ਤੇ ਅਨੁਸਾਸਨੀ;

ਇਨ੍ਦਂਵ ਦੇਵਾ ਤਿਦਸਾ, ਸਙ੍ਗਾਮੇ ਅਪਰਾਜਿਤਂ;

ਪੁਰਕ੍ਖਤ੍ਵਾ ਵਿਹਸ੍ਸਾਮ, ਤੇਵਿਜ੍ਜਾਮ੍ਹ ਅਨਾਸਵਾ’’ਤਿ. –

ਇਮਾ ਗਾਥਾ ਅਭਾਸਿਂਸੁ.

ਤਤ੍ਥ ਤਸ੍ਸਾ ਤਾ ਵਚਨਂ ਸੁਤ੍ਵਾ, ਪਟਾਚਾਰਾਯ ਸਾਸਨਨ੍ਤਿ ਤਸ੍ਸਾ ਪਟਾਚਾਰਾਯ ਥੇਰਿਯਾ ਕਿਲੇਸਪਟਿਸਤ੍ਤੁਸਾਸਨਟ੍ਠੇਨ ਸਾਸਨਭੂਤਂ ਓਵਾਦਵਚਨਂ, ਤਾ ਤਿਂਸਮਤ੍ਤਾ ਭਿਕ੍ਖੁਨਿਯੋ ਸੁਤ੍ਵਾ ਪਟਿਸ੍ਸੁਤ੍ਵਾ ਸਿਰਸਾ ਸਮ੍ਪਟਿਚ੍ਛਿਤ੍ਵਾ.

ਉਟ੍ਠਾਯ ਪਾਦੇ ਵਨ੍ਦਿਂਸੁ, ਕਤਾ ਤੇ ਅਨੁਸਾਸਨੀਤਿ ਯਥਾਸਮ੍ਪਟਿਚ੍ਛਿਤਂ ਤਸ੍ਸਾ ਸਾਸਨਂ ਅਟ੍ਠਿਂ ਕਤ੍ਵਾ ਮਨਸਿ ਕਤ੍ਵਾ ਯਥਾਫਾਸੁਕਟ੍ਠਾਨੇ ਨਿਸੀਦਿਤ੍ਵਾ ਭਾਵੇਨ੍ਤਿਯੋ ਭਾਵਨਂ ਮਤ੍ਥਕਂ ਪਾਪੇਤ੍ਵਾ ਅਤ੍ਤਨਾ ਅਧਿਗਤਵਿਸੇਸਂ ਆਰੋਚੇਤੁਂ ਨਿਸਿਨ੍ਨਾਸਨਤੋ ਉਟ੍ਠਾਯ ਤਸ੍ਸਾ ਸਨ੍ਤਿਕਂ ਗਨ੍ਤ੍ਵਾ ‘‘ਮਹਾਥੇਰਿ ਤਵਾਨੁਸਾਸਨੀ ਯਥਾਨੁਸਿਟ੍ਠਂ ਅਮ੍ਹੇਹਿ ਕਤਾ’’ਤਿ ਵਤ੍ਵਾ ਤਸ੍ਸਾ ਪਾਦੇ ਪਞ੍ਚਪਤਿਟ੍ਠਿਤੇਨ ਵਨ੍ਦਿਂਸੁ. ਇਨ੍ਦਂਵ ਦੇਵਾ ਤਿਦਸਾ, ਸਙ੍ਗਾਮੇ ਅਪਰਾਜਿਤਨ੍ਤਿ ਦੇਵਾਸੁਰਸਙ੍ਗਾਮੇ ਅਪਰਾਜਿਤਂ ਵਿਜਿਤਾਵਿਂ ਇਨ੍ਦਂ ਤਾਵਤਿਂਸਾ ਦੇਵਾ ਵਿਯ ਮਹਾਥੇਰਿ, ਮਯਂ ਤਂ ਪੁਰਕ੍ਖਤ੍ਵਾ ਵਿਹਰਿਸ੍ਸਾਮ ਅਞ੍ਞਸ੍ਸ ਕਤ੍ਤਬ੍ਬਸ੍ਸ ਅਭਾਵਤੋ. ਤਸ੍ਮਾ ‘‘ਤੇਵਿਜ੍ਜਾਮ੍ਹ ਅਨਾਸਵਾ’’ਤਿ ਅਤ੍ਤਨੋ ਕਤਞ੍ਞੁਭਾਵਂ ਪਵੇਦੇਨ੍ਤੀ ਇਦਮੇਵ ਤਾਸਂ ਅਞ੍ਞਾਬ੍ਯਾਕਰਣਂ ਅਹੋਸਿ. ਯਂ ਪਨੇਤ੍ਥ ਅਤ੍ਥਤੋ ਅਵਿਭਤ੍ਤਂ, ਤਂ ਹੇਟ੍ਠਾ ਵੁਤ੍ਤਨਯਮੇਵ.

ਤਿਂਸਮਤ੍ਤਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.