੧. ਅਞ੍ਞਤਰਾਥੇਰੀਗਾਥਾਵਣ੍ਣਨਾ

ਪਞ੍ਚਕਨਿਪਾਤੇ ਪਣ੍ਣਵੀਸਤਿ ਵਸ੍ਸਾਨੀਤਿਆਦਿਕਾ ਅਞ੍ਞਤਰਾਯ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਦੇਵਦਹਨਗਰੇ ਮਹਾਪਜਾਪਤਿਗੋਤਮਿਯਾ ਧਾਤੀ ਹੁਤ੍ਵਾ ਵਡ੍ਢੇਸਿ. ਨਾਮਗੋਤ੍ਤਤੋ ਪਨ ਅਪਞ੍ਞਾਤਾ ਅਹੋਸਿ. ਸਾ ਮਹਾਪਜਾਪਤਿਗੋਤਮਿਯਾ ਪਬ੍ਬਜਿਤਕਾਲੇ ਸਯਮ੍ਪਿ ਪਬ੍ਬਜਿਤ੍ਵਾ ਪਞ੍ਚਵੀਸਤਿ ਸਂਵਚ੍ਛਰਾਨਿ ਕਾਮਰਾਗੇਨ ਉਪਦ੍ਦੁਤਾ ਅਚ੍ਛਰਾਸਙ੍ਘਾਤਮਤ੍ਤਮ੍ਪਿ ਕਾਲਂ ਚਿਤ੍ਤੇਕਗ੍ਗਤਂ ਅਲਭਨ੍ਤੀ ਬਾਹਾ ਪਗ੍ਗਯ੍ਹ ਕਨ੍ਦਮਾਨਾ ਧਮ੍ਮਦਿਨ੍ਨਾਥੇਰਿਯਾ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਕਾਮੇਹਿ ਵਿਨਿਵਤ੍ਤਿਤਮਾਨਸਾ ਕਮ੍ਮਟ੍ਠਾਨਂ ਗਹੇਤ੍ਵਾ ਭਾਵਨਮਨੁਯਞ੍ਜਨ੍ਤੀ ਨ ਚਿਰਸ੍ਸੇਵ ਛਲ਼ਭਿਞ੍ਞਾ ਹੁਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਉਦਾਨਵਸੇਨ –

੬੭. ‘‘ਪਣ੍ਣਵੀਸਤਿ ਵਸ੍ਸਾਨਿ, ਯਤੋ ਪਬ੍ਬਜਿਤਾ ਅਹਂ;

ਨਾਚ੍ਛਰਾਸਙ੍ਘਾਤਮਤ੍ਤਮ੍ਪਿ, ਚਿਤ੍ਤਸ੍ਸੂਪਸਮਜ੍ਝਗਂ.

੬੮. ‘‘ਅਲਦ੍ਧਾ ਚੇਤਸੋ ਸਨ੍ਤਿਂ, ਕਾਮਰਾਗੇਨਵਸ੍ਸੁਤਾ;

ਬਾਹਾ ਪਗ੍ਗਯ੍ਹ ਕਨ੍ਦਨ੍ਤੀ, ਵਿਹਾਰਂ ਪਾਵਿਸਿਂ ਅਹਂ.

੬੯. ‘‘ਸਾ ਭਿਕ੍ਖੁਨਿਂ ਉਪਾਗਚ੍ਛਿਂ, ਯਾ ਮੇ ਸਦ੍ਧਾਯਿਕਾ ਅਹੁ;

ਸਾ ਮੇ ਧਮ੍ਮਮਦੇਸੇਸਿ, ਖਨ੍ਧਾਯਤਨਧਾਤੁਯੋ.

੭੦. ‘‘ਤਸ੍ਸਾ ਧਮ੍ਮਂ ਸੁਣਿਤ੍ਵਾਨ, ਏਕਮਨ੍ਤੇ ਉਪਾਵਿਸਿਂ;

ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ.

੭੧. ‘‘ਚੇਤੋਪਰਿਚ੍ਚਞਾਣਞ੍ਚ, ਸੋਤਧਾਤੁ ਵਿਸੋਧਿਤਾ;

ਇਦ੍ਧੀਪਿ ਮੇ ਸਚ੍ਛਿਕਤਾ, ਪਤ੍ਤੋ ਮੇ ਆਸਵਕ੍ਖਯੋ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ. –

ਇਮਾ ਗਾਥਾ ਅਭਾਸਿ.

ਤਤ੍ਥ ਨਾਚ੍ਛਰਾਸਙ੍ਘਾਤਮਤ੍ਤਮ੍ਪੀਤਿ ਅਚ੍ਛਰਾਘਟਿਤਮਤ੍ਤਮ੍ਪਿ ਖਣਂ ਅਙ੍ਗੁਲਿਫੋਟਨਮਤ੍ਤਮ੍ਪਿ ਕਾਲਨ੍ਤਿ ਅਤ੍ਥੋ. ਚਿਤ੍ਤਸ੍ਸੂਪਸਮਜ੍ਝਗਨ੍ਤਿ ਚਿਤ੍ਤਸ੍ਸ ਉਪਸਮਂ ਚਿਤ੍ਤੇਕਗ੍ਗਂ ਨ ਅਜ੍ਝਗਨ੍ਤਿ ਯੋਜਨਾ, ਨ ਪਟਿਲਭਿਨ੍ਤਿ ਅਤ੍ਥੋ.

ਕਾਮਰਾਗੇਨਵਸ੍ਸੁਤਾਤਿ ਕਾਮਗੁਣਸਙ੍ਖਾਤੇਸੁ ਵਤ੍ਥੁਕਾਮੇਸੁ ਦਲ਼੍ਹਤਰਾਭਿਨਿਵੇਸਿਤਾਯ ਬਹਲੇਨ ਛਨ੍ਦਰਾਗੇਨ ਤਿਨ੍ਤਚਿਤ੍ਤਾ.

ਭਿਕ੍ਖੁਨਿਨ੍ਤਿ ਧਮ੍ਮਦਿਨ੍ਨਤ੍ਥੇਰਿਂ ਸਨ੍ਧਾਯ ਵਦਤਿ.

ਚੇਤੋਪਰਿਚ੍ਚਞਾਣਞ੍ਚਾਤਿ ਚੇਤੋਪਰਿਯਞਾਣਞ੍ਚ ਵਿਸੋਧਿਤਨ੍ਤਿ ਸਮ੍ਬਨ੍ਧੋ, ਅਧਿਗਤਨ੍ਤਿ ਅਤ੍ਥੋ. ਸੇਸਂ ਵੁਤ੍ਤਨਯਮੇਵ.

ਅਞ੍ਞਤਰਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.