੭. ਸੇਲਾਥੇਰੀਗਾਥਾਵਣ੍ਣਨਾ

ਨਤ੍ਥਿ ਨਿਸ੍ਸਰਣਂ ਲੋਕੇਤਿਆਦਿਕਾ ਸੇਲਾਯ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤਾ ਮਾਤਾਪਿਤੂਹਿ ਸਮਾਨਜਾਤਿਕਸ੍ਸ ਕੁਲਪੁਤ੍ਤਸ੍ਸ ਦਿਨ੍ਨਾ, ਤੇਨ ਸਦ੍ਧਿਂ ਬਹੂਨਿ ਵਸ੍ਸਸਤਾਨਿ ਸੁਖਸਂਵਾਸਂ ਵਸਿਤ੍ਵਾ ਤਸ੍ਮਿਂ ਕਾਲਙ੍ਕਤੇ ਸਯਮ੍ਪਿ ਅਦ੍ਧਗਤਾ ਵਯੋਅਨੁਪ੍ਪਤ੍ਤਾ ਸਂਵੇਗਜਾਤਾ ਕਿਂਕੁਸਲਗਵੇਸਿਨੀ ਕਾਲੇਨ ਕਾਲਂ ਆਰਾਮੇਨ ਆਰਾਮਂ ਵਿਹਾਰੇਨ ਵਿਹਾਰਂ ਅਨੁਵਿਚਰਤਿ ‘‘ਸਮਣਬ੍ਰਾਹ੍ਮਣਾਨਂ ਸਨ੍ਤਿਕੇ ਧਮ੍ਮਂ ਸੋਸ੍ਸਾਮੀ’’ਤਿ. ਸਾ ਏਕਦਿਵਸਂ ਸਤ੍ਥੁ ਬੋਧਿਰੁਕ੍ਖਂ ਉਪਸਙ੍ਕਮਿਤ੍ਵਾ ‘‘ਯਦਿ ਬੁਦ੍ਧੋ ਭਗਵਾ ਅਸਮੋ ਅਸਮਸਮੋ ਅਪ੍ਪਟਿਪੁਗ੍ਗਲੋ, ਦਸ੍ਸੇਤੁ ਮੇ ਅਯਂ ਬੋਧਿ ਪਾਟਿਹਾਰਿਯ’’ਨ੍ਤਿ ਨਿਸੀਦਿ. ਤਸ੍ਸਾ ਤਥਾ ਚਿਤ੍ਤੁਪ੍ਪਾਦਸਮਨਨ੍ਤਰਮੇਵ ਬੋਧਿ ਪਜ੍ਜਲਿ, ਸਬ੍ਬਸੋਵਣ੍ਣਮਯਾ ਸਾਖਾ ਉਟ੍ਠਹਿਂਸੁ, ਸਬ੍ਬਾ ਦਿਸਾ ਵਿਰੋਚਿਂਸੁ. ਸਾ ਤਂ ਪਾਟਿਹਾਰਿਯਂ ਦਿਸ੍ਵਾ ਪਸਨ੍ਨਮਾਨਸਾ ਗਰੁਚਿਤ੍ਤੀਕਾਰਂ ਉਪਟ੍ਠਪੇਤ੍ਵਾ ਸਿਰਸਿ ਅਞ੍ਜਲਿਂ ਪਗ੍ਗਯ੍ਹ ਸਤ੍ਤਰਤ੍ਤਿਨ੍ਦਿਵਂ ਤਤ੍ਥੇਵ ਨਿਸੀਦਿ. ਸਤ੍ਤਮੇ ਦਿਵਸੇ ਉਲ਼ਾਰਂ ਪੂਜਾਸਕ੍ਕਾਰਂ ਅਕਾਸਿ. ਸਾ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੀ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਆਲ਼ਵੀਰਟ੍ਠੇ ਆਲ਼ਵਿਕਸ੍ਸ ਰਞ੍ਞੋ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ. ਸੇਲਾਤਿਸ੍ਸਾ ਨਾਮਂ ਅਹੋਸਿ. ਆਲ਼ਵਿਕਸ੍ਸ ਪਨ ਰਞ੍ਞੋ ਧੀਤਾਤਿ ਕਤ੍ਵਾ ਆਲ਼ਵਿਕਾਤਿਪਿ ਨਂ ਵੋਹਰਨ੍ਤਿ. ਸਾ ਵਿਞ੍ਞੁਤਂ ਪਤ੍ਤਾ ਸਤ੍ਥਰਿ ਆਲ਼ਵਕਂ ਦਮੇਤ੍ਵਾ ਤਸ੍ਸ ਹਤ੍ਥੇ ਪਤ੍ਤਚੀਵਰਂ ਦਤ੍ਵਾ ਤੇਨ ਸਦ੍ਧਿਂ ਆਲ਼ਵੀਨਗਰਂ ਉਪਗਤੇ ਦਾਰਿਕਾ ਹੁਤ੍ਵਾ ਰਞ੍ਞਾ ਸਦ੍ਧਿਂ ਸਤ੍ਥੁ ਸਨ੍ਤਿਕਂ ਉਪਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧਾ ਉਪਾਸਿਕਾ ਅਹੋਸਿ. ਸਾ ਅਪਰਭਾਗੇ ਸਞ੍ਜਾਤਸਂਵੇਗਾ ਭਿਕ੍ਖੁਨੀਸੁ ਪਬ੍ਬਜਿਤ੍ਵਾ ਕਤਪੁਬ੍ਬਕਿਚ੍ਚਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਸਙ੍ਖਾਰੇ ਸਮ੍ਮਸਨ੍ਤੀ ਉਪਨਿਸ੍ਸਯਸਮ੍ਪਨ੍ਨਤ੍ਤਾ ਪਰਿਪਕ੍ਕਞਾਣਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰੀ ੨.੨.੬੧-੮੫) –

‘‘ਨਗਰੇ ਹਂਸਵਤਿਯਾ, ਚਾਰਿਕੀ ਆਸਹਂ ਤਦਾ;

ਆਰਾਮੇਨ ਚ ਆਰਾਮਂ, ਚਰਾਮਿ ਕੁਸਲਤ੍ਥਿਕਾ.

‘‘ਕਾਲ਼ਪਕ੍ਖਮ੍ਹਿ ਦਿਵਸੇ, ਅਦ੍ਦਸਂ ਬੋਧਿਮੁਤ੍ਤਮਂ;

ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਬੋਧਿਮੂਲੇ ਨਿਸੀਦਹਂ.

‘‘ਗਰੁਚਿਤ੍ਤਂ ਉਪਟ੍ਠੇਤ੍ਵਾ, ਸਿਰੇ ਕਤ੍ਵਾਨ ਅਞ੍ਜਲਿਂ;

ਸੋਮਨਸ੍ਸਂ ਪਵੇਦੇਤ੍ਵਾ, ਏਵਂ ਚਿਨ੍ਤੇਸਿ ਤਾਵਦੇ.

‘‘ਯਦਿ ਬੁਦ੍ਧੋ ਅਮਿਤਗੁਣੋ, ਅਸਮਪ੍ਪਟਿਪੁਗ੍ਗਲੋ;

ਦਸ੍ਸੇਤੁ ਪਾਟਿਹੀਰਂ ਮੇ, ਬੋਧਿ ਓਭਾਸਤੁ ਅਯਂ.

‘‘ਸਹ ਆਵਜ੍ਜਿਤੇ ਮਯ੍ਹਂ, ਬੋਧਿ ਪਜ੍ਜਲਿ ਤਾਵਦੇ;

ਸਬ੍ਬਸੋਣ੍ਣਮਯਾ ਆਸਿ, ਦਿਸਾ ਸਬ੍ਬਾ ਵਿਰੋਚਤਿ.

‘‘ਸਤ੍ਤਰਤ੍ਤਿਨ੍ਦਿਵਂ ਤਤ੍ਥ, ਬੋਧਿਮੂਲੇ ਨਿਸੀਦਹਂ;

ਸਤ੍ਤਮੇ ਦਿਵਸੇ ਪਤ੍ਤੇ, ਦੀਪਪੂਜਂ ਅਕਾਸਹਂ.

‘‘ਆਸਨਂ ਪਰਿਵਾਰੇਤ੍ਵਾ, ਪਞ੍ਚਦੀਪਾਨਿ ਪਜ੍ਜਲੁਂ;

ਯਾਵ ਉਦੇਤਿ ਸੂਰਿਯੋ, ਦੀਪਾ ਮੇ ਪਜ੍ਜਲੁਂ ਤਦਾ.

‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਪਞ੍ਚਦੀਪਾਤਿ ਵੁਚ੍ਚਤਿ;

ਸਟ੍ਠਿਯੋਜਨਮੁਬ੍ਬੇਧਂ, ਤਿਂਸਯੋਜਨਵਿਤ੍ਥਤਂ.

‘‘ਅਸਙ੍ਖਿਯਾਨਿ ਦੀਪਾਨਿ, ਪਰਿਵਾਰੇ ਜਲਿਂਸੁ ਮੇ;

ਯਾਵਤਾ ਦੇਵਭਵਨਂ, ਦੀਪਾਲੋਕੇਨ ਜੋਤਤਿ.

‘‘ਪਰਮ੍ਮੁਖਾ ਨਿਸੀਦਿਤ੍ਵਾ, ਯਦਿ ਇਚ੍ਛਾਮਿ ਪਸ੍ਸਿਤੁਂ;

ਉਦ੍ਧਂ ਅਧੋ ਚ ਤਿਰਿਯਂ, ਸਬ੍ਬਂ ਪਸ੍ਸਾਮਿ ਚਕ੍ਖੁਨਾ.

‘‘ਯਾਵਤਾ ਅਭਿਕਙ੍ਖਾਮਿ, ਦਟ੍ਠੁਂ ਸੁਗਤਦੁਗ੍ਗਤੇ;

ਤਤ੍ਥ ਆਵਰਣਂ ਨਤ੍ਥਿ, ਰੁਕ੍ਖੇਸੁ ਪਬ੍ਬਤੇਸੁ ਵਾ.

‘‘ਅਸੀਤਿਦੇਵਰਾਜੂਨਂ, ਮਹੇਸਿਤ੍ਤਮਕਾਰਯਿਂ;

ਸਤਾਨਂ ਚਕ੍ਕਵਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ.

‘‘ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;

ਦੀਪਸਤਸਹਸ੍ਸਾਨਿ, ਪਰਿਵਾਰੇ ਜਲਨ੍ਤਿ ਮੇ.

‘‘ਦੇਵਲੋਕਾ ਚਵਿਤ੍ਵਾਨ, ਉਪ੍ਪਜ੍ਜਿਂ ਮਾਤੁਕੁਚ੍ਛਿਯਂ;

ਮਾਤੁਕੁਚ੍ਛਿਗਤਾ ਸਨ੍ਤੀ, ਅਕ੍ਖਿ ਮੇ ਨ ਨਿਮੀਲਤਿ.

‘‘ਦੀਪਸਤਸਹਸ੍ਸਾਨਿ, ਪੁਞ੍ਞਕਮ੍ਮਸਮਙ੍ਗਿਤਾ;

ਜਲਨ੍ਤਿ ਸੂਤਿਕਾਗੇਹੇ, ਪਞ੍ਚਦੀਪਾਨਿਦਂ ਫਲਂ.

‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਮਾਨਸਂ ਵਿਨਿਵਤ੍ਤਯਿਂ;

ਅਜਰਾਮਤਂ ਸੀਤਿਭਾਵਂ, ਨਿਬ੍ਬਾਨਂ ਫਸ੍ਸਯਿਂ ਅਹਂ.

‘‘ਜਾਤਿਯਾ ਸਤ੍ਤਵਸ੍ਸਾਹਂ, ਅਰਹਤ੍ਤਮਪਾਪੁਣਿਂ;

ਉਪਸਮ੍ਪਾਦਯੀ ਬੁਦ੍ਧੋ, ਗੁਣਮਞ੍ਞਾਯ ਗੋਤਮੋ.

‘‘ਮਣ੍ਡਪੇ ਰੁਕ੍ਖਮੂਲੇ ਵਾ, ਸੁਞ੍ਞਾਗਾਰੇ ਵਸਨ੍ਤਿਯਾ;

ਤਦਾ ਪਜ੍ਜਲਤੇ ਦੀਪਂ, ਪਞ੍ਚਦੀਪਾਨਿਦਂ ਫਲਂ.

‘‘ਦਿਬ੍ਬਚਕ੍ਖੁਵਿਸੁਦ੍ਧਂ ਮੇ, ਸਮਾਧਿਕੁਸਲਾ ਅਹਂ;

ਅਭਿਞ੍ਞਾਪਾਰਮਿਪ੍ਪਤ੍ਤਾ, ਪਞ੍ਚਦੀਪਾਨਿਦਂ ਫਲਂ.

‘‘ਸਬ੍ਬਵੋਸਿਤਵੋਸਾਨਾ, ਕਤਕਿਚ੍ਚਾ ਅਨਾਸਵਾ;

ਪਞ੍ਚਦੀਪਾ ਮਹਾਵੀਰ, ਪਾਦੇ ਵਨ੍ਦਾਮਿ ਚਕ੍ਖੁਮ.

‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਦੀਪਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਞ੍ਚਦੀਪਾਨਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਥੇਰੀ ਸਾਵਤ੍ਥਿਯਂ ਵਿਹਰਨ੍ਤੀ ਏਕਦਿਵਸਂ ਪਚ੍ਛਾਭਤ੍ਤਂ ਸਾਵਤ੍ਥਿਤੋ ਨਿਕ੍ਖਮਿਤ੍ਵਾ ਦਿਵਾਵਿਹਾਰਤ੍ਥਾਯ ਅਨ੍ਧਵਨਂ ਪਵਿਸਿਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ. ਅਥ ਨਂ ਮਾਰੋ ਵਿਵੇਕਤੋ ਵਿਚ੍ਛੇਦੇਤੁਕਾਮੋ ਅਞ੍ਞਾਤਕਰੂਪੇਨ ਉਪਗਨ੍ਤ੍ਵਾ –

੫੭. ‘‘ਨਤ੍ਥਿ ਨਿਸ੍ਸਰਣਂ ਲੋਕੇ, ਕਿਂ ਵਿਵੇਕੇਨ ਕਾਹਸਿ;

ਭੁਞ੍ਜਾਹਿ ਕਾਮਰਤਿਯੋ, ਮਾਹੁ ਪਚ੍ਛਾਨੁਤਾਪਿਨੀ’’ਤਿ. – ਗਾਥਮਾਹ;

ਤਸ੍ਸਤ੍ਥੋ – ਇਮਸ੍ਮਿਂ ਲੋਕੇ ਸਬ੍ਬਸਮਯੇਸੁਪਿ ਉਪਪਰਿਕ੍ਖੀਯਮਾਨੇਸੁ ਨਿਸ੍ਸਰਣਂ ਨਿਬ੍ਬਾਨਂ ਨਾਮ ਨਤ੍ਥਿ ਤੇਸਂ ਤੇਸਂ ਸਮਣਬ੍ਰਾਹ੍ਮਣਾਨਂ ਛਨ੍ਦਸੋ ਪਟਿਞ੍ਞਾਯਮਾਨਂ ਵੋਹਾਰਮਤ੍ਤਮੇਵੇਤਂ, ਤਸ੍ਮਾ ਕਿਂ ਵਿਵੇਕੇਨ ਕਾਹਸਿ ਏਵਰੂਪੇ ਸਮ੍ਪਨ੍ਨਪਠਮਵਯੇ ਠਿਤਾ ਇਮਿਨਾ ਕਾਯਵਿਵੇਕੇਨ ਕਿਂ ਕਰਿਸ੍ਸਸਿ? ਅਥ ਖੋ ਭੁਞ੍ਜਾਹਿ ਕਾਮਰਤਿਯੋ ਵਤ੍ਥੁਕਾਮਕਿਲੇਸਕਾਮਸਨ੍ਨਿਸ੍ਸਿਤਾ ਖਿਡ੍ਡਾਰਤਿਯੋ ਪਚ੍ਚਨੁਭੋਹਿ. ਕਸ੍ਮਾ? ਮਾਹੁ ਪਚ੍ਛਾਨੁਤਾਪਿਨੀ ‘‘ਯਦਤ੍ਥਂ ਬ੍ਰਹ੍ਮਚਰਿਯਂ ਚਰਾਮਿ, ਤਦੇਵ ਨਿਬ੍ਬਾਨਂ ਨਤ੍ਥਿ, ਤੇਨੇਵੇਤਂ ਨਾਧਿਗਤਂ, ਕਾਮਭੋਗਾ ਚ ਪਰਿਹੀਨਾ, ਅਨਤ੍ਥੋ ਵਤ ਮਯ੍ਹ’’ਨ੍ਤਿ ਪਚ੍ਛਾ ਵਿਪ੍ਪਟਿਸਾਰਿਨੀ ਮਾ ਅਹੋਸੀਤਿ ਅਧਿਪ੍ਪਾਯੋ.

ਤਂ ਸੁਤ੍ਵਾ ਥੇਰੀ ‘‘ਬਾਲੋ ਵਤਾਯਂ ਮਾਰੋ, ਯੋ ਮਮ ਪਚ੍ਚਕ੍ਖਭੂਤਂ ਨਿਬ੍ਬਾਨਂ ਪਟਿਕ੍ਖਿਪਤਿ. ਕਾਮੇਸੁ ਚ ਮਂ ਪਵਾਰੇਤਿ, ਮਮ ਖੀਣਾਸਵਭਾਵਂ ਨ ਜਾਨਾਤਿ. ਹਨ੍ਦ ਨਂ ਤਂ ਜਾਨਾਪੇਤ੍ਵਾ ਤਜ੍ਜੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ –

੫੮. ‘‘ਸਤ੍ਤਿਸੂਲੂਪਮਾ ਕਾਮਾ, ਖਨ੍ਧਾਸਂ ਅਧਿਕੁਟ੍ਟਨਾ;

ਯਂ ਤ੍ਵਂ ਕਾਮਰਤਿਂ ਬ੍ਰੂਸਿ, ਅਰਤੀ ਦਾਨਿ ਸਾ ਮਮ.

੫੯. ‘‘ਸਬ੍ਬਤ੍ਥ ਵਿਹਤਾ ਨਨ੍ਦੀ, ਤਮੋਕ੍ਖਨ੍ਧੋ ਪਦਾਲਿਤੋ;

ਏਵਂ ਜਾਨਾਹਿ ਪਾਪਿਮ, ਨਿਹਤੋ ਤ੍ਵਮਸਿ ਅਨ੍ਤਕਾ’’ਤਿ. – ਇਮਂ ਗਾਥਾਦ੍ਵਯਮਾਹ;

ਤਤ੍ਥ ਸਤ੍ਤਿਸੂਲੂਪਮਾ ਕਾਮਾਤਿ ਕਾਮਾ ਨਾਮ ਯੇਨ ਅਧਿਟ੍ਠਿਤਾ, ਤਸ੍ਸ ਸਤ੍ਤਸ੍ਸ ਵਿਨਿਵਿਜ੍ਝਨਤੋ ਨਿਸਿਤਸਤ੍ਤਿ ਵਿਯ ਸੂਲਂ ਵਿਯ ਚ ਦਟ੍ਠਬ੍ਬਾ. ਖਨ੍ਧਾਤਿ ਉਪਾਦਾਨਕ੍ਖਨ੍ਧਾ. ਆਸਨ੍ਤਿ ਤੇਸਂ. ਅਧਿਕੁਟ੍ਟਨਾਤਿ ਛਿਨ੍ਦਨਾਧਿਟ੍ਠਾਨਾ, ਅਚ੍ਚਾਦਾਨਟ੍ਠਾਨਨ੍ਤਿ ਅਤ੍ਥੋ. ਯਤੋ ਖਨ੍ਧੇ ਅਚ੍ਚਾਦਾਯ ਸਤ੍ਤਾ ਕਾਮੇਹਿ ਛੇਜ੍ਜਭੇਜ੍ਜਂ ਪਾਪੁਣਨ੍ਤਿ. ਯਂ ਤ੍ਵਂ ਕਾਮਰਤਿਂ ਬ੍ਰੂਸਿ, ਅਰਤਿ ਦਾਨਿ ਸਾ ਮਮਾਤਿ, ਪਾਪਿਮ, ਤ੍ਵਂ ਯਂ ਕਾਮਰਤਿਂ ਰਮਿਤਬ੍ਬਂ ਸੇਵਿਤਬ੍ਬਂ ਕਤ੍ਵਾ ਵਦਸਿ, ਸਾ ਦਾਨਿ ਮਮ ਨਿਰਤਿਜਾਤਿਕਤ੍ਤਾ ਮੀਲ਼੍ਹਸਦਿਸਾ, ਨ ਤਾਯ ਮਮ ਕੋਚਿ ਅਤ੍ਥੋ ਅਤ੍ਥੀਤਿ.

ਤਤ੍ਥ ਕਾਰਣਮਾਹ ‘‘ਸਬ੍ਬਤ੍ਥ ਵਿਹਤਾ ਨਨ੍ਦੀ’’ਤਿਆਦਿਨਾ. ਤਤ੍ਥ ਏਵਂ ਜਾਨਾਹੀਤਿ ‘‘ਸਬ੍ਬਸੋ ਪਹੀਨਤਣ੍ਹਾਵਿਜ੍ਜਾ’’ਤਿ ਮਂ ਜਾਨਾਹਿ, ਤਤੋ ਏਵ ਬਲਵਿਧਮਨਵਿਸਯਾਤਿਕ੍ਕਮਨੇਹਿ ਅਨ੍ਤਕ ਲਾਮਕਾਚਾਰ, ਮਾਰ, ਤ੍ਵਂ ਮਯਾ ਨਿਹਤੋ ਬਾਧਿਤੋ ਅਸਿ, ਨ ਪਨਾਹਂ ਤਯਾ ਬਾਧਿਤਬ੍ਬਾਤਿ ਅਤ੍ਥੋ.

ਏਵਂ ਥੇਰਿਯਾ ਮਾਰੋ ਸਨ੍ਤਜ੍ਜਿਤੋ ਤਤ੍ਥੇਵਨ੍ਤਰਧਾਯਿ. ਥੇਰੀਪਿ ਫਲਸਮਾਪਤ੍ਤਿਸੁਖੇਨ ਅਨ੍ਧਵਨੇ ਦਿਵਸਭਾਗਂ ਵੀਤਿਨਾਮੇਤ੍ਵਾ ਸਾਯਨ੍ਹੇ ਵਸਨਟ੍ਠਾਨਮੇਵ ਗਤਾ.

ਸੇਲਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.