੮. ਸੋਮਾਥੇਰੀਗਾਥਾਵਣ੍ਣਨਾ

ਯਂ ਤਂ ਇਸੀਹਿ ਪਤ੍ਤਬ੍ਬਨ੍ਤਿਆਦਿਕਾ ਸੋਮਾਯ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ ਸਿਖਿਸ੍ਸ ਭਗਵਤੋ ਕਾਲੇ ਖਤ੍ਤਿਯਮਹਾਸਾਲਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਵਾ ਅਰੁਣਰਞ੍ਞੋ ਅਗ੍ਗਮਹੇਸੀ ਅਹੋਸੀਤਿ ਸਬ੍ਬਂ ਅਤੀਤਵਤ੍ਥੁ ਅਭਯਤ੍ਥੇਰਿਯਾ ਵਤ੍ਥੁਸਦਿਸਂ. ਪਚ੍ਚੁਪ੍ਪਨ੍ਨਵਤ੍ਥੁ ਪਨ ਅਯਂ ਥੇਰੀ ਤਤ੍ਥ ਤਤ੍ਥ ਦੇਵਮਨੁਸ੍ਸੇਸੁ ਸਂਸਰਨ੍ਤੀ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਬਿਮ੍ਬਿਸਾਰਸ੍ਸ ਰਞ੍ਞੋ ਪੁਰੋਹਿਤਸ੍ਸ ਧੀਤਾ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸਾ ਸੋਮਾਤਿ ਨਾਮਂ ਅਹੋਸਿ. ਸਾ ਵਿਞ੍ਞੁਤਂ ਪਤ੍ਤਾ ਸਤ੍ਥੁ ਰਾਜਗਹਪਵੇਸਨੇ ਪਟਿਲਦ੍ਧਸਦ੍ਧਾ ਉਪਾਸਿਕਾ ਹੁਤ੍ਵਾ ਅਪਰਭਾਗੇ ਸਞ੍ਜਾਤਸਂਵੇਗਾ ਭਿਕ੍ਖੁਨੀਸੁ ਪਬ੍ਬਜਿਤ੍ਵਾ ਕਤਪੁਬ੍ਬਕਿਚ੍ਚਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੀ ਨ ਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰੀ ੨.੧.੭੧, ੮੦-੯੦) –

‘‘ਨਗਰੇ ਅਰੁਣਵਤਿਯਾ, ਅਰੁਣੋ ਨਾਮ ਖਤ੍ਤਿਯੋ;

ਤਸ੍ਸ ਰਞ੍ਞੋ ਅਹੁਂ ਭਰਿਯਾ, ਵਾਰਿਤਂ ਵਾਰਯਾਮਹਂ.

‘‘ਯਾਵਤਾ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ. –

ਸਬ੍ਬਂ ਅਭਯਤ੍ਥੇਰਿਯਾ ਅਪਦਾਨਸਦਿਸਂ.

ਅਰਹਤ੍ਤਂ ਪਨ ਪਤ੍ਵਾ ਵਿਮੁਤ੍ਤਿਸੁਖੇਨ ਸਾਵਤ੍ਥਿਯਂ ਵਿਹਰਨ੍ਤੀ ਏਕਦਿਵਸਂ ਦਿਵਾਵਿਹਾਰਤ੍ਥਾਯ ਅਨ੍ਧਵਨਂ ਪਵਿਸਿਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ. ਅਥ ਨਂ ਮਾਰੋ ਵਿਵੇਕਤੋ ਵਿਚ੍ਛੇਦੇਤੁਕਾਮੋ ਅਦਿਸ੍ਸਮਾਨੁਰੂਪੋ ਉਪਗਨ੍ਤ੍ਵਾ ਆਕਾਸੇ ਠਤ੍ਵਾ –

੬੦. ‘‘ਯਂ ਤਂ ਇਸੀਹਿ ਪਤ੍ਤਬ੍ਬਂ, ਠਾਨਂ ਦੁਰਭਿਸਮ੍ਭਵਂ;

ਨ ਤਂ ਦ੍ਵਙ੍ਗੁਲਪਞ੍ਞਾਯ, ਸਕ੍ਕਾ ਪਪ੍ਪੋਤੁਮਿਤ੍ਥਿਯਾ’’ਤਿ. – ਇਮਂ ਗਾਥਮਾਹ;

ਤਸ੍ਸਤ੍ਥੋ – ਸੀਲਕ੍ਖਨ੍ਧਾਦੀਨਂ ਏਸਨਟ੍ਠੇਨ ‘‘ਇਸੀ’’ਤਿ ਲਦ੍ਧਨਾਮੇਹਿ ਬੁਦ੍ਧਾਦੀਹਿ ਮਹਾਪਞ੍ਞੇਹਿ ਪਤ੍ਤਬ੍ਬਂ, ਤਂ ਅਞ੍ਞੇਹਿ ਪਨ ਦੁਰਭਿਸਮ੍ਭਵਂ ਦੁਨ੍ਨਿਪ੍ਫਾਦਨੀਯਂ. ਯਂ ਤਂ ਅਰਹਤ੍ਤਸਙ੍ਖਾਤਂ ਪਰਮਸ੍ਸਾਸਟ੍ਠਾਨਂ, ਨ ਤਂ ਦ੍ਵਙ੍ਗੁਲਪਞ੍ਞਾਯ ਨਿਹੀਨਪਞ੍ਞਾਯ ਇਤ੍ਥਿਯਾ ਪਾਪੁਣਿਤੁਂ ਸਕ੍ਕਾ. ਇਤ੍ਥਿਯੋ ਹਿ ਸਤ੍ਤਟ੍ਠਵਸ੍ਸਕਾਲਤੋ ਪਟ੍ਠਾਯ ਸਬ੍ਬਕਾਲਂ ਓਦਨਂ ਪਚਨ੍ਤਿਯੋ ਪਕ੍ਕੁਥਿਤੇ ਉਦਕੇ ਤਣ੍ਡੁਲੇ ਪਕ੍ਖਿਪਿਤ੍ਵਾ ‘‘ਏਤ੍ਤਾਵਤਾ ਓਦਨਂ ਪਕ੍ਕ’’ਨ੍ਤਿ ਨ ਜਾਨਨ੍ਤਿ, ਪਕ੍ਕੁਥਿਯਮਾਨੇ ਪਨ ਤਣ੍ਡੁਲੇ ਦਬ੍ਬਿਯਾ ਉਦ੍ਧਰਿਤ੍ਵਾ ਦ੍ਵੀਹਿ ਅਙ੍ਗੁਲੀਹਿ ਪੀਲ਼ੇਤ੍ਵਾ ਜਾਨਨ੍ਤਿ, ਤਸ੍ਮਾ ਦ੍ਵਙ੍ਗੁਲਿਪਞ੍ਞਾਯਾਤਿ ਵੁਤ੍ਤਾ.

ਤਂ ਸੁਤ੍ਵਾ ਥੇਰੀ ਮਾਰਂ ਅਪਸਾਦੇਨ੍ਤੀ –

੬੧. ‘‘ਇਤ੍ਥਿਭਾਵੋ ਨੋ ਕਿਂ ਕਯਿਰਾ, ਚਿਤ੍ਤਮ੍ਹਿ ਸੁਸਮਾਹਿਤੇ;

ਞਾਣਮ੍ਹਿ ਵਤ੍ਤਮਾਨਮ੍ਹਿ, ਸਮ੍ਮਾ ਧਮ੍ਮਂ ਵਿਪਸ੍ਸਤੋ.

੬੨. ‘‘ਸਬ੍ਬਤ੍ਥ ਵਿਹਤਾ ਨਨ੍ਦੀ, ਤਮੋਕ੍ਖਨ੍ਧੋ ਪਦਾਲਿਤੋ;

ਏਵਂ ਜਾਨਾਹਿ ਪਾਪਿਮ, ਨਿਹਤੋ ਤ੍ਵਮਸਿ ਅਨ੍ਤਕਾ’’ਤਿ. –

ਇਤਰਾ ਦ੍ਵੇ ਗਾਥਾ ਅਭਾਸਿ.

ਤਤ੍ਥ ਇਤ੍ਥਿਭਾਵੋ ਨੋ ਕਿਂ ਕਯਿਰਾਤਿ ਮਾਤੁਗਾਮਭਾਵੋ ਅਮ੍ਹਾਕਂ ਕਿਂ ਕਰੇਯ੍ਯ, ਅਰਹਤ੍ਤਪ੍ਪਤ੍ਤਿਯਾ ਕੀਦਿਸਂ ਵਿਬਨ੍ਧਂ ਉਪ੍ਪਾਦੇਯ੍ਯ. ਚਿਤ੍ਤਮ੍ਹਿ ਸੁਸਮਾਹਿਤੇਤਿ ਚਿਤ੍ਤੇ ਅਗ੍ਗਮਗ੍ਗਸਮਾਧਿਨਾ ਸੁਟ੍ਠੁ ਸਮਾਹਿਤੇ. ਞਾਣਮ੍ਹਿ ਵਤ੍ਤਮਾਨਮ੍ਹੀਤਿ ਤਤੋ ਅਰਹਤ੍ਤਮਗ੍ਗਞਾਣੇ ਪਵਤ੍ਤਮਾਨੇ. ਸਮ੍ਮਾ ਧਮ੍ਮਂ ਵਿਪਸ੍ਸਤੋਤਿ ਚਤੁਸਚ੍ਚਧਮ੍ਮਂ ਪਰਿਞ੍ਞਾਦਿਵਿਧਿਨਾ ਸਮ੍ਮਦੇਵ ਪਸ੍ਸਤੋ. ਅਯਞ੍ਹੇਤ੍ਥ ਸਙ੍ਖੇਪੋ – ਪਾਪਿਮ, ਇਤ੍ਥੀ ਵਾ ਹੋਤੁ ਪੁਰਿਸੋ ਵਾ, ਅਗ੍ਗਮਗ੍ਗੇ ਅਧਿਗਤੇ ਅਰਹਤ੍ਤਂ ਹਤ੍ਥਗਤਮੇਵਾਤਿ.

ਇਦਾਨਿ ਤਸ੍ਸ ਅਤ੍ਤਨਾ ਅਧਿਗਤਭਾਵਂ ਉਜੁਕਮੇਵ ਦਸ੍ਸੇਨ੍ਤੀ ‘‘ਸਬ੍ਬਤ੍ਥ ਵਿਹਤਾ ਨਨ੍ਦੀ’’ਤਿ ਗਾਥਮਾਹ. ਸਾ ਵੁਤ੍ਤਤ੍ਥਾਯੇਵ.

ਸੋਮਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.

ਤਿਕਨਿਪਾਤਵਣ੍ਣਨਾ ਨਿਟ੍ਠਿਤਾ.