੬. ਸੁਕ੍ਕਾਥੇਰੀਗਾਥਾਵਣ੍ਣਨਾ

ਕਿਂਮੇ ਕਤਾ ਰਾਜਗਹੇਤਿਆਦਿਕਾ ਸੁਕ੍ਕਾਯ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਬਨ੍ਧੁਮਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤਾ ਉਪਾਸਿਕਾਹਿ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧਾ ਪਬ੍ਬਜਿਤ੍ਵਾ ਬਹੁਸ੍ਸੁਤਾ ਧਮ੍ਮਧਰਾ ਪਟਿਭਾਨਵਤੀ ਅਹੋਸਿ. ਸਾ ਤਤ੍ਥ ਬਹੂਨਿ ਵਸ੍ਸਸਹਸ੍ਸਾਨਿ ਬ੍ਰਹ੍ਮਚਰਿਯਂ ਚਰਿਤ੍ਵਾ ਪੁਥੁਜ੍ਜਨਕਾਲਕਿਰਿਯਮੇਵ ਕਤ੍ਵਾ ਤੁਸਿਤੇ ਨਿਬ੍ਬਤ੍ਤਿ. ਤਥਾ ਸਿਖਿਸ੍ਸ ਭਗਵਤੋ, ਵੇਸ੍ਸਭੁਸ੍ਸ ਭਗਵਤੋ ਕਾਲੇਤਿ ਏਵਂ ਤਿਣ੍ਣਂ ਸਮ੍ਮਾਸਮ੍ਬੁਦ੍ਧਾਨਂ ਸਾਸਨੇ ਸੀਲਂ ਰਕ੍ਖਿਤ੍ਵਾ ਬਹੁਸ੍ਸੁਤਾ ਧਮ੍ਮਧਰਾ ਅਹੋਸਿ, ਤਥਾ ਕਕੁਸਨ੍ਧਸ੍ਸ, ਕੋਣਾਗਮਨਸ੍ਸ, ਕਸ੍ਸਪਸ੍ਸ ਚ ਭਗਵਤੋ ਸਾਸਨੇ ਪਬ੍ਬਜਿਤ੍ਵਾ ਵਿਸੁਦ੍ਧਸੀਲਾ ਬਹੁਸ੍ਸੁਤਾ ਧਮ੍ਮਕਥਿਕਾ ਅਹੋਸਿ.

ਏਵਂ ਸਾ ਤਤ੍ਥ ਤਤ੍ਥ ਬਹੁਂ ਪੁਞ੍ਞਂ ਉਪਚਿਨਿਤ੍ਵਾ ਸੁਗਤੀਸੁਯੇਵ ਸਂਸਰਨ੍ਤੀ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹਨਗਰੇ ਗਹਪਤਿਮਹਾਸਾਲਕੁਲੇ ਨਿਬ੍ਬਤ੍ਤਿ, ਸੁਕ੍ਕਾਤਿਸ੍ਸਾ ਨਾਮਂ ਅਹੋਸਿ. ਸਾ ਵਿਞ੍ਞੁਤਂ ਪਤ੍ਤਾ ਸਤ੍ਥੁ ਰਾਜਗਹਪਵੇਸਨੇ ਲਦ੍ਧਪ੍ਪਸਾਦਾ ਉਪਾਸਿਕਾ ਹੁਤ੍ਵਾ ਅਪਰਭਾਗੇ ਧਮ੍ਮਦਿਨ੍ਨਾਯ ਥੇਰਿਯਾ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਸਞ੍ਜਾਤਸਂਵੇਗਾ ਤਸ੍ਸਾ ਏਵ ਸਨ੍ਤਿਕੇ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੀ ਨਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰੀ ੨.੪.੧੧੧-੧੪੨) –

‘‘ਏਕਨਵੁਤਿਤੋ ਕਪ੍ਪੇ, ਵਿਪਸ੍ਸੀ ਨਾਮ ਨਾਯਕੋ;

ਉਪ੍ਪਜ੍ਜਿ ਚਾਰੁਦਸ੍ਸਨੋ, ਸਬ੍ਬਧਮ੍ਮਵਿਪਸ੍ਸਕੋ.

‘‘ਤਦਾਹਂ ਬਨ੍ਧੁਮਤਿਯਂ, ਜਾਤਾ ਅਞ੍ਞਤਰੇ ਕੁਲੇ;

ਧਮ੍ਮਂ ਸੁਤ੍ਵਾਨ ਮੁਨਿਨੋ, ਪਬ੍ਬਜਿਂ ਅਨਗਾਰਿਯਂ.

‘‘ਬਹੁਸ੍ਸੁਤਾ ਧਮ੍ਮਧਰਾ, ਪਟਿਭਾਨਵਤੀ ਤਥਾ;

ਵਿਚਿਤ੍ਤਕਥਿਕਾ ਚਾਪਿ, ਜਿਨਸਾਸਨਕਾਰਿਕਾ.

‘‘ਤਦਾ ਧਮ੍ਮਕਥਂ ਕਤ੍ਵਾ, ਹਿਤਾਯ ਜਨਤਂ ਬਹੁਂ;

ਤਤੋ ਚੁਤਾਹਂ ਤੁਸਿਤਂ, ਉਪਪਨ੍ਨਾ ਯਸਸ੍ਸਿਨੀ.

‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਸਿਖੀ ਵਿਯ ਸਿਖੀ ਜਿਨੋ;

ਤਪਨ੍ਤੋ ਯਸਸਾ ਲੋਕੇ, ਉਪ੍ਪਜ੍ਜਿ ਵਦਤਂ ਵਰੋ.

‘‘ਤਦਾਪਿ ਪਬ੍ਬਜਿਤ੍ਵਾਨ, ਬੁਦ੍ਧਸਾਸਨਕੋਵਿਦਾ;

ਜੋਤੇਤ੍ਵਾ ਜਿਨਵਾਕ੍ਯਾਨਿ, ਤਤੋਪਿ ਤਿਦਿਵਂ ਗਤਾ.

‘‘ਏਕਤ੍ਤਿਂਸੇਵ ਕਪ੍ਪਮ੍ਹਿ, ਵੇਸ੍ਸਭੂ ਨਾਮ ਨਾਯਕੋ;

ਉਪ੍ਪਜ੍ਜਿਤ੍ਥ ਮਹਾਞਾਣੀ, ਤਦਾਪਿ ਚ ਤਥੇਵਹਂ.

‘‘ਪਬ੍ਬਜਿਤ੍ਵਾ ਧਮ੍ਮਧਰਾ, ਜੋਤਯਿਂ ਜਿਨਸਾਸਨਂ;

ਗਨ੍ਤ੍ਵਾ ਮਰੁਪੁਰਂ ਰਮ੍ਮਂ, ਅਨੁਭੋਸਿਂ ਮਹਾਸੁਖਂ.

‘‘ਇਮਮ੍ਹਿ ਭਦ੍ਦਕੇ ਕਪ੍ਪੇ, ਕਕੁਸਨ੍ਧੋ ਜਿਨੁਤ੍ਤਮੋ;

ਉਪ੍ਪਜ੍ਜਿ ਨਰਸਰਣੋ, ਤਦਾਪਿ ਚ ਤਥੇਵਹਂ.

‘‘ਪਬ੍ਬਜਿਤ੍ਵਾ ਮੁਨਿਮਤਂ, ਜੋਤਯਿਤ੍ਵਾ ਯਥਾਯੁਕਂ;

ਤਤੋ ਚੁਤਾਹਂ ਤਿਦਿਵਂ, ਅਗਂ ਸਭਵਨਂ ਯਥਾ.

‘‘ਇਮਸ੍ਮਿਂਯੇਵ ਕਪ੍ਪਮ੍ਹਿ, ਕੋਣਾਗਮਨਨਾਯਕੋ;

ਉਪ੍ਪਜ੍ਜਿ ਲੋਕਸਰਣੋ, ਅਰਣੋ ਅਮਤਙ੍ਗਤੋ.

‘‘ਤਦਾਪਿ ਪਬ੍ਬਜਿਤ੍ਵਾਨ, ਸਾਸਨੇ ਤਸ੍ਸ ਤਾਦਿਨੋ;

ਬਹੁਸ੍ਸੁਤਾ ਧਮ੍ਮਧਰਾ, ਜੋਤਯਿਂ ਜਿਨਸਾਸਨਂ.

‘‘ਇਮਸ੍ਮਿਂਯੇਵ ਕਪ੍ਪਮ੍ਹਿ, ਕਸ੍ਸਪੋ ਮੁਨਿਮੁਤ੍ਤਮੋ;

ਉਪ੍ਪਜ੍ਜਿ ਲੋਕਸਰਣੋ, ਅਰਣੋ ਮਰਣਨ੍ਤਗੂ.

‘‘ਤਸ੍ਸਾਪਿ ਨਰਵੀਰਸ੍ਸ, ਪਬ੍ਬਜਿਤ੍ਵਾਨ ਸਾਸਨੇ;

ਪਰਿਯਾਪੁਟਸਦ੍ਧਮ੍ਮਾ, ਪਰਿਪੁਚ੍ਛਾ ਵਿਸਾਰਦਾ.

‘‘ਸੁਸੀਲਾ ਲਜ੍ਜਿਨੀ ਚੇਵ, ਤੀਸੁ ਸਿਕ੍ਖਾਸੁ ਕੋਵਿਦਾ;

ਬਹੁਂ ਧਮ੍ਮਕਥਂ ਕਤ੍ਵਾ, ਯਾਵਜੀਵਂ ਮਹਾਮੁਨੇ.

‘‘ਤੇਨ ਕਮ੍ਮਵਿਪਾਕੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਪਚ੍ਛਿਮੇ ਚ ਭਵੇ ਦਾਨਿ, ਗਿਰਿਬ੍ਬਜਪੁਰੁਤ੍ਤਮੇ;

ਜਾਤਾ ਸੇਟ੍ਠਿਕੁਲੇ ਫੀਤੇ, ਮਹਾਰਤਨਸਞ੍ਚਯੇ.

‘‘ਯਦਾ ਭਿਕ੍ਖੁਸਹਸ੍ਸੇਨ, ਪਰਿਵੁਤੋ ਲੋਕਨਾਯਕੋ;

ਉਪਾਗਮਿ ਰਾਜਗਹਂ, ਸਹਸ੍ਸਕ੍ਖੇਨ ਵਣ੍ਣਿਤੋ.

‘‘ਦਨ੍ਤੋ ਦਨ੍ਤੇਹਿ ਸਹ ਪੁਰਾਣਜਟਿਲੇਹਿ, ਵਿਪ੍ਪਮੁਤ੍ਤੋ ਵਿਪ੍ਪਮੁਤ੍ਤੇਹਿ;

ਸਿਙ੍ਗੀਨਿਕ੍ਖਸਵਣ੍ਣੋ, ਰਾਜਗਹਂ ਪਾਵਿਸਿ ਭਗਵਾ.

‘‘ਦਿਸ੍ਵਾ ਬੁਦ੍ਧਾਨੁਭਾਵਂ ਤਂ, ਸੁਤ੍ਵਾਵ ਗੁਣਸਞ੍ਚਯਂ;

ਬੁਦ੍ਧੇ ਚਿਤ੍ਤਂ ਪਸਾਦੇਤ੍ਵਾ, ਪੂਜਯਿਂ ਤਂ ਯਥਾਬਲਂ.

‘‘ਅਪਰੇਨ ਚ ਕਾਲੇਨ, ਧਮ੍ਮਦਿਨ੍ਨਾਯ ਸਨ੍ਤਿਕੇ;

ਅਗਾਰਾ ਨਿਕ੍ਖਮਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ.

‘‘ਕੇਸੇਸੁ ਛਿਜ੍ਜਮਾਨੇਸੁ, ਕਿਲੇਸੇ ਝਾਪਯਿਂ ਅਹਂ;

ਉਗ੍ਗਹਿਂ ਸਾਸਨਂ ਸਬ੍ਬਂ, ਪਬ੍ਬਜਿਤ੍ਵਾ ਚਿਰੇਨਹਂ.

‘‘ਤਤੋ ਧਮ੍ਮਮਦੇਸੇਸਿਂ, ਮਹਾਜਨਸਮਾਗਮੇ;

ਧਮ੍ਮੇ ਦੇਸਿਯਮਾਨਮ੍ਹਿ, ਧਮ੍ਮਾਭਿਸਮਯੋ ਅਹੁ.

‘‘ਨੇਕਪਾਣਸਹਸ੍ਸਾਨਂ, ਤਂ ਵਿਦਿਤ੍ਵਾਤਿਵਿਮ੍ਹਿਤੋ;

ਅਭਿਪ੍ਪਸਨ੍ਨੋ ਮੇ ਯਕ੍ਖੋ, ਭਮਿਤ੍ਵਾਨ ਗਿਰਿਬ੍ਬਜਂ.

‘‘ਕਿਂਮੇ ਕਤਾ ਰਾਜਗਹੇ ਮਨੁਸ੍ਸਾ, ਮਧੁਂ ਪੀਤਾਵ ਅਚ੍ਛਰੇ;

ਯੇ ਸੁਕ੍ਕਂ ਨ ਉਪਾਸਨ੍ਤਿ, ਦੇਸੇਨ੍ਤਿਂ ਅਮਤਂ ਪਦਂ.

‘‘ਤਞ੍ਚ ਅਪ੍ਪਟਿਵਾਨੀਯਂ, ਅਸੇਚਨਕਮੋਜਵਂ;

ਪਿਵਨ੍ਤਿ ਮਞ੍ਞੇ ਸਪ੍ਪਞ੍ਞਾ, ਵਲਾਹਕਮਿਵਦ੍ਧਗੂ.

‘‘ਇਦ੍ਧੀਸੁ ਚ ਵਸੀ ਹੋਮਿ, ਦਿਬ੍ਬਾਯ ਸੋਤਧਾਤੁਯਾ;

ਚੇਤੋਪਰਿਯਞਾਣਸ੍ਸ, ਵਸੀ ਹੋਮਿ ਮਹਾਮੁਨੇ.

‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਸਬ੍ਬਾਸਵਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

‘‘ਅਤ੍ਥਧਮ੍ਮਨਿਰੁਤ੍ਤੀਸੁ, ਪਟਿਭਾਨੇ ਤਥੇਵ ਚ;

ਞਾਣਂ ਮਮ ਮਹਾਵੀਰ, ਉਪ੍ਪਨ੍ਨਂ ਤਵ ਸਨ੍ਤਿਕੇ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਪਞ੍ਚਸਤਭਿਕ੍ਖੁਨਿਪਰਿਵਾਰਾ ਮਹਾਧਮ੍ਮਕਥਿਕਾ ਅਹੋਸਿ. ਸਾ ਏਕਦਿਵਸਂ ਰਾਜਗਹੇ ਪਿਣ੍ਡਾਯ ਚਰਿਤ੍ਵਾ ਕਤਭਤ੍ਤਕਿਚ੍ਚਾ ਭਿਕ੍ਖੁਨੁਪਸ੍ਸਯਂ ਪਵਿਸਿਤ੍ਵਾ ਸਨ੍ਨਿਸਿਨ੍ਨਾਯ ਮਹਤਿਯਾ ਪਰਿਸਾਯ ਮਧੁਭਣ੍ਡਂ ਪੀਲ਼ੇਤ੍ਵਾ ਸੁਮਧੁਰਂ ਪਾਯੇਨ੍ਤੀ ਵਿਯ ਅਮਤੇਨ ਅਭਿਸਿਞ੍ਚਨ੍ਤੀ ਵਿਯ ਧਮ੍ਮਂ ਦੇਸੇਤਿ. ਪਰਿਸਾ ਚਸ੍ਸਾ ਧਮ੍ਮਕਥਂ ਓਹਿਤਸੋਤਾ ਅਵਿਕ੍ਖਿਤ੍ਤਚਿਤ੍ਤਾ ਸਕ੍ਕਚ੍ਚਂ ਸੁਣਾਤਿ. ਤਸ੍ਮਿਂ ਖਣੇ ਥੇਰਿਯਾ ਚਙ੍ਕਮਨਕੋਟਿਯਂ ਰੁਕ੍ਖੇ ਅਧਿਵਤ੍ਥਾ ਦੇਵਤਾ ਧਮ੍ਮਦੇਸਨਾਯ ਪਸਨ੍ਨਾ ਰਾਜਗਹਂ ਪਵਿਸਿਤ੍ਵਾ ਰਥਿਯਾਯ ਰਥਿਯਂ ਸਿਙ੍ਘਾਟਕੇਨ ਸਿਙ੍ਘਾਟਕਂ ਵਿਚਰਿਤ੍ਵਾ ਤਸ੍ਸਾ ਗੁਣਂ ਵਿਭਾਵੇਨ੍ਤੀ –

੫੪. ‘‘ਕਿਂਮੇ ਕਤਾ ਰਾਜਗਹੇ ਮਨੁਸ੍ਸਾ, ਮਧੁਂ ਪੀਤਾਵ ਅਚ੍ਛਰੇ;

ਯੇ ਸੁਕ੍ਕਂ ਨ ਉਪਾਸਨ੍ਤਿ, ਦੇਸੇਨ੍ਤਿਂ ਬੁਦ੍ਧਸਾਸਨਂ.

੫੫. ‘‘ਤਞ੍ਚ ਅਪ੍ਪਟਿਵਾਨੀਯਂ, ਅਸੇਚਨਕਮੋਜਵਂ;

ਪਿਵਨ੍ਤਿ ਮਞ੍ਞੇ ਸਪ੍ਪਞ੍ਞਾ, ਵਲਾਹਕਮਿਵਦ੍ਧਗੂ’’ਤਿ. –

ਇਮਾ ਦ੍ਵੇ ਗਾਥਾ ਅਭਾਸਿ.

ਤਤ੍ਥ ਕਿਂਮੇ ਕਤਾ ਰਾਜਗਹੇ ਮਨੁਸ੍ਸਾਤਿ ਇਮੇ ਰਾਜਗਹੇ ਮਨੁਸ੍ਸਾ ਕਿਂ ਕਤਾ, ਕਿਸ੍ਮਿਂ ਨਾਮ ਕਿਚ੍ਚੇ ਬ੍ਯਾਵਟਾ. ਮਧੁਂ ਪੀਤਾਵ ਅਚ੍ਛਰੇਤਿ ਯਥਾ ਭਣ੍ਡਮਧੁਂ ਗਹੇਤ੍ਵਾ ਮਧੁਂ ਪੀਤਵਨ੍ਤੋ ਵਿਸਞ੍ਞਿਨੋ ਹੁਤ੍ਵਾ ਸੀਸਂ ਉਕ੍ਖਿਪਿਤੁਂ ਨ ਸਕ੍ਕੋਨ੍ਤਿ, ਏਵਂ ਇਮੇਪਿ ਧਮ੍ਮਸਞ੍ਞਾਯ ਵਿਸਞ੍ਞਿਨੋ ਹੁਤ੍ਵਾ ਮਞ੍ਞੇ ਸੀਸਂ ਉਕ੍ਖਿਪਿਤੁਂ ਨ ਸਕ੍ਕੋਨ੍ਤਿ, ਕੇਵਲਂ ਅਚ੍ਛਨ੍ਤਿਯੇਵਾਤਿ ਅਤ੍ਥੋ. ਯੇ ਸੁਕ੍ਕਂ ਨ ਉਪਾਸਨ੍ਤਿ, ਦੇਸੇਨ੍ਤਿਂ ਬੁਦ੍ਧਸਾਸਨਨ੍ਤਿ ਬੁਦ੍ਧਸ੍ਸ ਭਗਵਤੋ ਸਾਸਨਂ ਯਾਥਾਵਤੋ ਦੇਸੇਨ੍ਤਿਂ ਪਕਾਸੇਨ੍ਤਿਂ ਸੁਕ੍ਕਂ ਥੇਰਿਂ ਯੇ ਨ ਉਪਾਸਨ੍ਤਿ ਨ ਪਯਿਰੁਪਾਸਨ੍ਤਿ. ਤੇ ਇਮੇ ਰਾਜਗਹੇ ਮਨੁਸ੍ਸਾ ਕਿਂ ਕਤਾਤਿ ਯੋਜਨਾ.

ਤਞ੍ਚ ਅਪ੍ਪਟਿਵਾਨੀਯਨ੍ਤਿ ਤਞ੍ਚ ਪਨ ਧਮ੍ਮਂ ਅਨਿਵਤ੍ਤਿਤਭਾਵਾਵਹਂ ਨਿਯ੍ਯਾਨਿਕਂ, ਅਭਿਕ੍ਕਨ੍ਤਤਾਯ ਵਾ ਯਥਾ ਸੋਤੁਜਨਸਵਨਮਨੋਹਰਭਾਵੇਨ ਅਨਪਨੀਯਂ, ਅਸੇਚਨਕਂ ਅਨਾਸਿਤ੍ਤਕਂ ਪਕਤਿਯਾਵ ਮਹਾਰਸਂ ਤਤੋ ਏਵ ਓਜਵਨ੍ਤਂ. ‘‘ਓਸਧ’’ਨ੍ਤਿਪਿ ਪਾਲ਼ਿ. ਵਟ੍ਟਦੁਕ੍ਖਬ੍ਯਾਧਿਤਿਕਿਚ੍ਛਾਯ ਓਸਧਭੂਤਂ. ਪਿਵਨ੍ਤਿ ਮਞ੍ਞੇ ਸਪ੍ਪਞ੍ਞਾ, ਵਲਾਹਕਮਿਵਦ੍ਧਗੂਤਿ ਵਲਾਹਕਨ੍ਤਰਤੋ ਨਿਕ੍ਖਨ੍ਤਂ ਉਦਕਂ ਨਿਰੁਦਕਕਨ੍ਤਾਰੇ ਪਥਗਾ ਵਿਯ ਤਂ ਧਮ੍ਮਂ ਸਪ੍ਪਞ੍ਞਾ ਪਣ੍ਡਿਤਪੁਰਿਸਾ ਪਿਵਨ੍ਤਿ ਮਞ੍ਞੇ ਪਿਵਨ੍ਤਾ ਵਿਯ ਸੁਣਨ੍ਤਿ.

ਮਨੁਸ੍ਸਾ ਤਂ ਸੁਤ੍ਵਾ ਪਸਨ੍ਨਮਾਨਸਾ ਥੇਰਿਯਾ ਸਨ੍ਤਿਕਂ ਉਪਸਙ੍ਕਮਿਤ੍ਵਾ ਸਕ੍ਕਚ੍ਚਂ ਧਮ੍ਮਂ ਸੁਣਿਂਸੁ. ਅਪਰਭਾਗੇ ਥੇਰਿਯਾ ਆਯੁਪਰਿਯੋਸਾਨੇ ਪਰਿਨਿਬ੍ਬਾਨਕਾਲੇ ਸਾਸਨਸ੍ਸ ਨਿਯ੍ਯਾਨਿਕਭਾਵਵਿਭਾਵਨਤ੍ਥਂ ਅਞ੍ਞਂ ਬ੍ਯਾਕਰੋਨ੍ਤੀ –

੫੬. ‘‘ਸੁਕ੍ਕਾ ਸੁਕ੍ਕੇਹਿ ਧਮ੍ਮੇਹਿ, ਵੀਤਰਾਗਾ ਸਮਾਹਿਤਾ;

ਧਾਰੇਤਿ ਅਨ੍ਤਿਮਂ ਦੇਹਂ, ਜੇਤ੍ਵਾ ਮਾਰਂ ਸਵਾਹਨ’’ਨ੍ਤਿ. – ਇਮਂ ਗਾਥਂ ਅਭਾਸਿ;

ਤਤ੍ਥ ਸੁਕ੍ਕਾਤਿ ਸੁਕ੍ਕਾਥੇਰੀ ਅਤ੍ਤਾਨਮੇਵ ਪਰਂ ਵਿਯ ਦਸ੍ਸੇਤਿ. ਸੁਕ੍ਕੇਹਿ ਧਮ੍ਮੇਹੀਤਿ ਸੁਪਰਿਸੁਦ੍ਧੇਹਿ ਲੋਕੁਤ੍ਤਰਧਮ੍ਮੇਹਿ. ਵੀਤਰਾਗਾ ਸਮਾਹਿਤਾਤਿ ਅਗ੍ਗਮਗ੍ਗੇਨ ਸਬ੍ਬਸੋ ਵੀਤਰਾਗਾ ਅਰਹਤ੍ਤਫਲਸਮਾਧਿਨਾ ਸਮਾਹਿਤਾ. ਸੇਸਂ ਵੁਤ੍ਤਨਯਮੇਵ.

ਸੁਕ੍ਕਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.