੫. ਉਬ੍ਬਿਰਿਥੇਰੀਗਾਥਾਵਣ੍ਣਨਾ

ਅਮ੍ਮ, ਜੀਵਾਤਿਆਦਿਕਾ ਉਬ੍ਬਿਰਿਯਾ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੀ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤਾ ਏਕਦਿਵਸਂ ਮਾਤਾਪਿਤੂਸੁ ਮਙ੍ਗਲਂ ਅਨੁਭਵਿਤੁਂ ਗੇਹਨ੍ਤਰਗਤੇਸੁ ਅਦੁਤਿਯਾ ਸਯਂ ਗੇਹੇ ਓਹੀਨਾ ਉਪਕਟ੍ਠਾਯ ਵੇਲਾਯ ਭਗਵਤੋ ਸਾਵਕਂ ਏਕਂ ਖੀਣਾਸਵਤ੍ਥੇਰਂ ਗੇਹਦ੍ਵਾਰਸਮੀਪੇਨ ਗਚ੍ਛਨ੍ਤਂ ਦਿਸ੍ਵਾ ਭਿਕ੍ਖਂ ਦਾਤੁਕਾਮਾ, ‘‘ਭਨ੍ਤੇ, ਇਧ ਪਵਿਸਥਾ’’ਤਿ ਵਤ੍ਵਾ ਥੇਰੇ ਗੇਹਂ ਪਵਿਟ੍ਠੇ ਪਞ੍ਚਪਤਿਟ੍ਠਿਤੇਨ ਥੇਰਂ ਵਨ੍ਦਿਤ੍ਵਾ ਗੋਨਕਾਦੀਹਿ ਆਸਨਂ ਪਞ੍ਞਾਪੇਤ੍ਵਾ ਅਦਾਸਿ. ਨਿਸੀਦਿ ਥੇਰੋ ਪਞ੍ਞਤ੍ਤੇ ਆਸਨੇ. ਸਾ ਪਤ੍ਤਂ ਗਹੇਤ੍ਵਾ ਪਿਣ੍ਡਪਾਤਸ੍ਸ ਪੂਰੇਤ੍ਵਾ ਥੇਰਸ੍ਸ ਹਤ੍ਥੇ ਠਪੇਸਿ. ਥੇਰੋ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸਾ ਤੇਨ ਪੁਞ੍ਞਕਮ੍ਮੇਨ ਤਾਵਤਿਂਸੇਸੁ ਨਿਬ੍ਬਤ੍ਤਿਤ੍ਵਾ ਤਤ੍ਥ ਯਾਵਤਾਯੁਕਂ ਉਲ਼ਾਰਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਚੁਤਾ ਸੁਗਤੀਸੁਯੇਵ ਸਂਸਰਨ੍ਤੀ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਗਹਪਤਿਮਹਾਸਾਲਕੁਲੇ ਨਿਬ੍ਬਤ੍ਤਿਤ੍ਵਾ ਉਬ੍ਬਿਰੀਤਿ ਲਦ੍ਧਨਾਮਾ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਅਹੋਸਿ. ਸਾ ਵਯਪ੍ਪਤ੍ਤਕਾਲੇ ਕੋਸਲਰਞ੍ਞਾ ਅਤ੍ਤਨੋ ਗੇਹਂ ਨੀਤਾ, ਕਤਿਪਯਸਂਵਚ੍ਛਰਾਤਿਕ੍ਕਮੇਨ ਏਕਂ ਧੀਤਰਂ ਲਭਿ. ਤਸ੍ਸਾ ਜੀਵਨ੍ਤੀਤਿ ਨਾਮਂ ਅਕਂਸੁ. ਰਾਜਾ ਤਸ੍ਸਾ ਧੀਤਰਂ ਦਿਸ੍ਵਾ ਤੁਟ੍ਠਮਾਨਸੋ ਉਬ੍ਬਿਰਿਯਾ ਅਭਿਸੇਕਂ ਅਦਾਸਿ. ਧੀਤਾ ਪਨਸ੍ਸਾ ਆਧਾਵਿਤ੍ਵਾ ਪਰਿਧਾਵਿਤ੍ਵਾ ਵਿਚਰਣਕਾਲੇ ਕਾਲਮਕਾਸਿ. ਮਾਤਾ ਯਤ੍ਥ ਤਸ੍ਸਾ ਸਰੀਰਨਿਕ੍ਖੇਪੋ ਕਤੋ, ਤਂ ਸੁਸਾਨਂ ਗਨ੍ਤ੍ਵਾ ਦਿਵਸੇ ਦਿਵਸੇ ਪਰਿਦੇਵਤਿ. ਏਕਦਿਵਸਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਥੋਕਂ ਨਿਸੀਦਿਤ੍ਵਾ ਗਤਾ ਅਚਿਰਵਤੀਨਦਿਯਾ ਤੀਰੇ ਠਤ੍ਵਾ ਧੀਤਰਂ ਆਰਬ੍ਭ ਪਰਿਦੇਵਤਿ. ਤਂ ਦਿਸ੍ਵਾ ਸਤ੍ਥਾ ਗਨ੍ਧਕੁਟਿਯਂ ਯਥਾਨਿਸਿਨ੍ਨੋਵ ਅਤ੍ਤਾਨਂ ਦਸ੍ਸੇਤ੍ਵਾ ‘‘ਕਸ੍ਮਾ ਵਿਪ੍ਪਲਪਸੀ’’ਤਿ ਪੁਚ੍ਛਿ. ‘‘ਮਮ ਧੀਤਰਂ ਆਰਬ੍ਭ ਵਿਪ੍ਪਲਪਾਮਿ, ਭਗਵਾ’’ਤਿ. ‘‘ਇਮਸ੍ਮਿਂ ਸੁਸਾਨੇ ਝਾਪਿਤਾ ਤਵ ਧੀਤਰੋ ਚਤੁਰਾਸੀਤਿਸਹਸ੍ਸਮਤ੍ਤਾ, ਤਾਸਂ ਕਤਰ ਸਨ੍ਧਾਯ ਵਿਪ੍ਪਲਪਸੀ’’ਤਿ. ਤਾਸਂ ਤਂ ਤਂ ਆਲ਼ਾਹਨਟ੍ਠਾਨਂ ਦਸ੍ਸੇਤ੍ਵਾ –

੫੧. ‘‘ਅਮ੍ਮ ਜੀਵਾਤਿ ਵਨਮ੍ਹਿ ਕਨ੍ਦਸਿ, ਅਤ੍ਤਾਨਂ ਅਧਿਗਚ੍ਛ ਉਬ੍ਬਿਰਿ;

ਚੁਲ੍ਲਾਸੀਤਿਸਹਸ੍ਸਾਨਿ, ਸਬ੍ਬਾ ਜੀਵਸਨਾਮਿਕਾ;

ਏਤਮ੍ਹਾਲ਼ਾਹਨੇ ਦਡ੍ਢਾ, ਤਾਸਂ ਕਮਨੁਸੋਚਸੀ’’ਤਿ. – ਸਉਪਡ੍ਢਗਾਥਮਾਹ;

ਤਤ੍ਥ, ਅਮ੍ਮ, ਜੀਵਾਤਿ ਮਾਤੁਪਚਾਰਨਾਮੇਨ ਧੀਤੁਯਾ ਆਲਪਨਂ, ਇਦਞ੍ਚਸ੍ਸਾ ਵਿਪ੍ਪਲਪਨਾਕਾਰਦਸ੍ਸਨਂ. ਵਨਮ੍ਹਿ ਕਨ੍ਦਸੀਤਿ ਵਨਮਜ੍ਝੇ ਪਰਿਦੇਵਸਿ. ਅਤ੍ਤਾਨਂ ਅਧਿਗਚ੍ਛ ਉਬ੍ਬਿਰੀਤਿ ਉਬ੍ਬਿਰਿ ਤਵ ਅਤ੍ਤਾਨਮੇਵ ਤਾਵ ਬੁਜ੍ਝਸ੍ਸੁ ਯਾਥਾਵਤੋ ਜਾਨਾਹਿ. ਚੁਲ੍ਲਾਸੀਤਿਸਹਸ੍ਸਾਨੀਤਿ ਚਤੁਰਾਸੀਤਿਸਹਸ੍ਸਾਨਿ. ਸਬ੍ਬਾ ਜੀਵਸਨਾਮਿਕਾਤਿ ਤਾ ਸਬ੍ਬਾਪਿ ਜੀਵਨ੍ਤਿ, ਯਾ ਸਮਾਨਨਾਮਿਕਾ. ਏਤਮ੍ਹਾਲ਼ਾਹਨੇ ਦਡ੍ਢਾਤਿ ਏਤਮ੍ਹਿ ਸੁਸਾਨੇ ਝਾਪਿਤਾ. ਤਾਸਂ ਕਮਨੁਸੋਚਸੀਤਿ ਤਾਸੁ ਜੀਵਨ੍ਤੀਨਾਮਾਸੁ ਚਤੁਰਾਸੀਤਿਸਹਸ੍ਸਮਤ੍ਤਾਸੁ ਕਂ ਸਨ੍ਧਾਯ ਤ੍ਵਂ ਅਨੁਸੋਚਸਿ ਅਨੁਸੋਕਂ ਆਪਜ੍ਜਸੀਤਿ ਏਵਂ ਸਤ੍ਥਾਰਾ ਧਮ੍ਮੇ ਦੇਸਿਤੇ ਦੇਸਨਾਨੁਸਾਰੇਨ ਞਾਣਂ ਪੇਸੇਤ੍ਵਾ ਵਿਪਸ੍ਸਨਂ ਆਰਭਿਤ੍ਵਾ ਸਤ੍ਥੁ ਦੇਸਨਾਵਿਲਾਸੇਨ ਅਤ੍ਤਨੋ ਚ ਹੇਤੁਸਮ੍ਪਤ੍ਤਿਯਾ ਯਥਾਠਾਤਾਵ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਮਗ੍ਗਪਟਿਪਾਟਿਯਾ ਅਗ੍ਗਫਲੇ ਅਰਹਤ੍ਤੇ ਪਤਿਟ੍ਠਾਸਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰੀ ੨.੨.੩੭-੬੦) –

‘‘ਨਗਰੇ ਹਂਸਵਤਿਯਾ, ਅਹੋਸਿਂ ਬਾਲਿਕਾ ਤਦਾ;

ਮਾਤਾ ਚ ਮੇ ਪਿਤਾ ਚੇਵ, ਕਮ੍ਮਨ੍ਤਂ ਅਗਮਂਸੁ ਤੇ.

‘‘ਮਜ੍ਝਨ੍ਹਿਕਮ੍ਹਿ ਸੂਰਿਯੇ, ਅਦ੍ਦਸਂ ਸਮਣਂ ਅਹਂ;

ਵੀਥਿਯਾ ਅਨੁਗਚ੍ਛਨ੍ਤਂ, ਆਸਨਂ ਪਞ੍ਞਪੇਸਹਂ.

‘‘ਗੋਨਕਾਵਿਕਤਿਕਾਹਿ, ਪਞ੍ਞਪੇਤ੍ਵਾ ਮਮਾਸਨਂ;

ਪਸਨ੍ਨਚਿਤ੍ਤਾ ਸੁਮਨਾ, ਇਦਂ ਵਚਨਮਬ੍ਰਵਿਂ.

‘‘ਸਨ੍ਤਤ੍ਤਾ ਕੁਥਿਤਾ ਭੂਮਿ, ਸੂਰੋ ਮਜ੍ਝਨ੍ਹਿਕੇ ਠਿਤੋ;

ਮਾਲੁਤਾ ਚ ਨ ਵਾਯਨ੍ਤਿ, ਕਾਲੋ ਚੇਵੇਤ੍ਥ ਮੇਹਿਤਿ.

‘‘ਪਞ੍ਞਤ੍ਤਮਾਸਨਮਿਦਂ, ਤਵਤ੍ਥਾਯ ਮਹਾਮੁਨਿ;

ਅਨੁਕਮ੍ਪਂ ਉਪਾਦਾਯ, ਨਿਸੀਦ ਮਮ ਆਸਨੇ.

‘‘ਨਿਸੀਦਿ ਤਤ੍ਥ ਸਮਣੋ, ਸੁਦਨ੍ਤੋ ਸੁਦ੍ਧਮਾਨਸੋ;

ਤਸ੍ਸ ਪਤ੍ਤਂ ਗਹੇਤ੍ਵਾਨ, ਯਥਾਰਨ੍ਧਂ ਅਦਾਸਹਂ.

‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਤਤ੍ਥ ਮੇ ਸੁਕਤਂ ਬ੍ਯਮ੍ਹਂ, ਆਸਨੇਨ ਸੁਨਿਮ੍ਮਿਤਂ;

ਸਟ੍ਠਿਯੋਜਨਮੁਬ੍ਬੇਧਂ, ਤਿਂਸਯੋਜਨਵਿਤ੍ਥਤਂ.

‘‘ਸੋਣ੍ਣਮਯਾ ਮਣਿਮਯਾ, ਅਥੋਪਿ ਫਲਿਕਾਮਯਾ;

ਲੋਹਿਤਙ੍ਗਮਯਾ ਚੇਵ, ਪਲ੍ਲਙ੍ਕਾ ਵਿਵਿਧਾ ਮਮ.

‘‘ਤੂਲਿਕਾਵਿਕਤਿਕਾਹਿ, ਕਟ੍ਟਿਸ੍ਸਚਿਤ੍ਤਕਾਹਿ ਚ;

ਉਦ੍ਧਏਕਨ੍ਤਲੋਮੀ ਚ, ਪਲ੍ਲਙ੍ਕਾ ਮੇ ਸੁਸਣ੍ਠਿਤਾ.

‘‘ਯਦਾ ਇਚ੍ਛਾਮਿ ਗਮਨਂ, ਹਾਸਖਿਡ੍ਡਸਮਪ੍ਪਿਤਾ;

ਸਹ ਪਲ੍ਲਙ੍ਕਸੇਟ੍ਠੇਨ, ਗਚ੍ਛਾਮਿ ਮਮ ਪਤ੍ਥਿਤਂ.

‘‘ਅਸੀਤਿਦੇਵਰਾਜੂਨਂ, ਮਹੇਸਿਤ੍ਤਮਕਾਰਯਿਂ;

ਸਤ੍ਤਤਿਚਕ੍ਕਵਤ੍ਤੀਨਂ, ਮਹੇਸਿਤ੍ਤਮਕਾਰਯਿਂ.

‘‘ਭਵਾਭਵੇ ਸਂਸਰਨ੍ਤੀ, ਮਹਾਭੋਗਂ ਲਭਾਮਹਂ;

ਭੋਗੇ ਮੇ ਊਨਤਾ ਨਤ੍ਥਿ, ਏਕਾਸਨਸ੍ਸਿਦਂ ਫਲਂ.

‘‘ਦੁਵੇ ਭਵੇ ਸਂਸਰਾਮਿ, ਦੇਵਤ੍ਤੇ ਅਥ ਮਾਨੁਸੇ;

ਅਞ੍ਞੇ ਭਵੇ ਨ ਜਾਨਾਮਿ, ਏਕਾਸਨਸ੍ਸਿਦਂ ਫਲਂ.

‘‘ਦੁਵੇ ਕੁਲੇ ਪਜਾਯਾਮਿ, ਖਤ੍ਤਿਯੇ ਚਾਪਿ ਬ੍ਰਾਹ੍ਮਣੇ;

ਉਚ੍ਚਾਕੁਲੀਨਾ ਸਬ੍ਬਤ੍ਥ, ਏਕਾਸਨਸ੍ਸਿਦਂ ਫਲਂ.

‘‘ਦੋਮਨਸ੍ਸਂ ਨ ਜਾਨਾਮਿ, ਚਿਤ੍ਤਸਨ੍ਤਾਪਨਂ ਮਮ;

ਵੇਵਣ੍ਣਿਯਂ ਨ ਜਾਨਾਮਿ, ਏਕਾਸਨਸ੍ਸਿਦਂ ਫਲਂ.

‘‘ਧਾਤਿਯੋ ਮਂ ਉਪਟ੍ਠਨ੍ਤਿ, ਖੁਜ੍ਜਾ ਚੇਲਾਪਿਕਾ ਬਹੂ;

ਅਙ੍ਕੇਨ ਅਙ੍ਕਂ ਗਚ੍ਛਾਮਿ, ਏਕਾਸਨਸ੍ਸਿਦਂ ਫਲਂ.

‘‘ਅਞ੍ਞਾ ਨ੍ਹਾਪੇਨ੍ਤਿ ਭੋਜੇਨ੍ਤਿ, ਅਞ੍ਞਾ ਰਮੇਨ੍ਤਿ ਮਂ ਸਦਾ;

ਅਞ੍ਞਾ ਗਨ੍ਧਂ ਵਿਲਿਮ੍ਪਨ੍ਤਿ, ਏਕਾਸਨਸ੍ਸਿਦਂ ਫਲਂ.

‘‘ਮਣ੍ਡਪੇ ਰੁਕ੍ਖਮੂਲੇ ਵਾ, ਸੁਞ੍ਞਾਗਾਰੇ ਵਸਨ੍ਤਿਯਾ;

ਮਮ ਸਙ੍ਕਪ੍ਪਮਞ੍ਞਾਯ, ਪਲ੍ਲਙ੍ਕੋ ਉਪਤਿਟ੍ਠਤਿ.

‘‘ਅਯਂ ਪਚ੍ਛਿਮਕੋ ਮਯ੍ਹਂ, ਚਰਿਮੋ ਵਤ੍ਤਤੇ ਭਵੋ;

ਅਜ੍ਜਾਪਿ ਰਜ੍ਜਂ ਛਡ੍ਡੇਤ੍ਵਾ, ਪਬ੍ਬਜਿਂ ਅਨਗਾਰਿਯਂ.

‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਏਕਾਸਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤੇ ਪਨ ਪਤਿਟ੍ਠਾਯ ਅਤ੍ਤਨਾ ਅਧਿਗਤਵਿਸੇਸਂ ਪਕਾਸੇਨ੍ਤੀ –

੫੨. ‘‘ਅਬ੍ਬਹੀ ਤਵ ਮੇ ਸਲ੍ਲਂ, ਦੁਦ੍ਦਸਂ ਹਦਯਸ੍ਸਿਤਂ;

ਯਂ ਮੇ ਸੋਕਪਰੇਤਾਯ, ਧੀਤੁਸੋਕਂ ਬ੍ਯਪਾਨੁਦਿ.

੫੩. ‘‘ਸਾਜ੍ਜ ਅਬ੍ਬੂਲ਼੍ਹਸਲ੍ਲਾਹਂ, ਨਿਚ੍ਛਾਤਾ ਪਰਿਨਿਬ੍ਬੁਤਾ;

ਬੁਦ੍ਧਂ ਧਮ੍ਮਞ੍ਚ ਸਙ੍ਘਞ੍ਚ, ਉਪੇਮਿ ਸਰਣਂ ਮੁਨਿ’’ਨ੍ਤਿ. –

ਇਮਾ ਦ੍ਵੇ ਗਾਥਾ ਅਭਾਸਿ.

ਤਤ੍ਥ ਅਬ੍ਬਹੀ ਵਤ ਮੇ ਸਲ੍ਲਂ, ਦੁਦ੍ਦਸਂ ਹਦਯਸ੍ਸਿਤਨ੍ਤਿ ਅਨੁਪਚਿਤਕੁਸਲਸਮ੍ਭਾਰੇਹਿ ਯਾਥਾਵਤੋ ਦੁਦ੍ਦਸਂ ਮਮ ਚਿਤ੍ਤਸਨ੍ਨਿਸ੍ਸਿਤਂ ਪੀਲ਼ਾਜਨਨਤੋ ਦੁਨ੍ਨੀਹਰਣਤੋ ਅਨ੍ਤੋ ਤੁਦਨਤੋ ਚ ‘‘ਸਲ੍ਲ’’ਨ੍ਤਿ ਲਦ੍ਧਨਾਮਂ ਸੋਕਂ ਤਣ੍ਹਞ੍ਚ ਅਬ੍ਬਹੀ ਵਤ ਨੀਹਰਿ ਵਤ. ਯਂ ਮੇ ਸੋਕਪਰੇਤਾਯਾਤਿ ਯਸ੍ਮਾ ਸੋਕੇਨ ਅਭਿਭੂਤਾਯ ਮਯ੍ਹਂ ਧੀਤੁਸੋਕਂ ਬ੍ਯਪਾਨੁਦਿ ਅਨਵਸੇਸਤੋ ਨੀਹਰਿ, ਤਸ੍ਮਾ ਅਬ੍ਬਹੀ ਵਤ ਮੇ ਸਲ੍ਲਨ੍ਤਿ ਯੋਜਨਾ.

ਸਾਜ੍ਜ ਅਬ੍ਬੂਲ਼੍ਹਸਲ੍ਲਾਹਨ੍ਤਿ ਸਾ ਅਹਂ ਅਜ੍ਜ ਸਬ੍ਬਸੋ ਉਦ੍ਧਟਤਣ੍ਹਾਸਲ੍ਲਾ ਤਤੋ ਏਵ ਨਿਚ੍ਛਾਤਾ ਪਰਿਨਿਬ੍ਬੁਤਾ. ਮੁਨਿਨ੍ਤਿ ਸਬ੍ਬਞ੍ਞੁਬੁਦ੍ਧਂ ਤਦੁਪਦੇਸਿਤਮਗ੍ਗਫਲਨਿਬ੍ਬਾਨਪਭੇਦਂ ਨਵਵਿਧਲੋਕੁਤ੍ਤਰਧਮ੍ਮਞ੍ਚ, ਤਤ੍ਥ ਪਤਿਟ੍ਠਿਤਂ ਅਟ੍ਠਅਰਿਯਪੁਗ੍ਗਲਸਮੂਹਸਙ੍ਖਾਤਂ ਸਙ੍ਘਞ੍ਚ, ਅਨੁਤ੍ਤਰੇਹਿ ਤੇਹਿ ਯੋਜਨਤੋ ਸਕਲਵਟ੍ਟਦੁਕ੍ਖਵਿਨਾਸਨਤੋ ਚ ਸਰਣਂ ਤਾਣਂ ਲੇਣਂ ਪਰਾਯਣਨ੍ਤਿ, ਉਪੇਮਿ ਉਪਗਚ੍ਛਾਮਿ ਬੁਜ੍ਝਾਮਿ ਸੇਵਾਮਿ ਚਾਤਿ ਅਤ੍ਥੋ.

ਉਬ੍ਬਿਰਿਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.