੮. ਅਭਯਮਾਤੁਥੇਰੀਗਾਥਾਵਣ੍ਣਨਾ

ਉਦ੍ਧਂ ਪਾਦਤਲਾਤਿਆਦਿਕਾ ਅਭਯਮਾਤਾਯ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੀ ਤਿਸ੍ਸਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਵਾ ਏਕਦਿਵਸਂ ਸਤ੍ਥਾਰਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਪਸਨ੍ਨਮਾਨਸਾ ਪਤ੍ਤਂ ਗਹੇਤ੍ਵਾ ਕਟਚ੍ਛੁਮਤ੍ਤਂ ਭਿਕ੍ਖਂ ਅਦਾਸਿ. ਸਾ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੀ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਤਾਦਿਸੇਨ ਕਮ੍ਮਨਿਸ੍ਸਨ੍ਦੇਨ ਉਜ੍ਜੇਨਿਯਂ ਪਦੁਮਵਤੀ ਨਾਮ ਨਗਰਸੋਭਿਣੀ ਅਹੋਸਿ. ਰਾਜਾ ਬਿਮ੍ਬਿਸਾਰੋ ਤਸ੍ਸਾ ਰੂਪਸਮ੍ਪਤ੍ਤਿਆਦਿਕੇ ਗੁਣੇ ਸੁਤ੍ਵਾ ਪੁਰੋਹਿਤਸ੍ਸ ਆਚਿਕ੍ਖਿ – ‘‘ਉਜ੍ਜੇਨਿਯਂ ਕਿਰ ਪਦੁਮਵਤੀ ਨਾਮ ਗਣਿਕਾ ਅਹੋਸਿ, ਤਮਹਂ ਦਟ੍ਠੁਕਾਮੋਮ੍ਹੀ’’ਤਿ. ਪੁਰੋਹਿਤੋ ‘‘ਸਾਧੁ, ਦੇਵਾ’’ਤਿ ਮਨ੍ਤਬਲੇਨ ਕੁਮ੍ਭੀਰਂ ਨਾਮ ਯਕ੍ਖਂ ਆਵਹੇਤ੍ਵਾ ਯਕ੍ਖਾਨੁਭਾਵੇਨ ਰਾਜਾਨਂ ਤਾਵਦੇਵ ਉਜ੍ਜੇਨੀਨਗਰਂ ਨੇਸਿ. ਰਾਜਾ ਤਾਯ ਸਦ੍ਧਿਂ ਏਕਰਤ੍ਤਿਂ ਸਂਵਾਸਂ ਕਪ੍ਪੇਸਿ. ਸਾ ਤੇਨ ਗਬ੍ਭਂ ਗਣ੍ਹਿ. ਰਞ੍ਞੋ ਚ ਆਰੋਚੇਸਿ – ‘‘ਮਮ ਕੁਚ੍ਛਿਯਂ ਗਬ੍ਭੋ ਪਤਿਟ੍ਠਹੀ’’ਤਿ. ਤਂ ਸੁਤ੍ਵਾ ਰਾਜਾ ਨਂ ‘‘ਸਚੇ ਪੁਤ੍ਤੋ ਭਵੇਯ੍ਯ, ਵਡ੍ਢੇਤ੍ਵਾ ਮਮਂ ਦਸ੍ਸੇਹੀ’’ਤਿ ਵਤ੍ਵਾ ਨਾਮਮੁਦ੍ਦਿਕਂ ਦਤ੍ਵਾ ਅਗਮਾਸਿ. ਸਾ ਦਸਮਾਸਚ੍ਚਯੇਨ ਪੁਤ੍ਤਂ ਵਿਜਾਯਿਤ੍ਵਾ ਨਾਮਗ੍ਗਹਣਦਿਵਸੇ ਅਭਯੋਤਿ ਨਾਮਂ ਅਕਾਸਿ. ਪੁਤ੍ਤਞ੍ਚ ਸਤ੍ਤਵਸ੍ਸਿਕਕਾਲੇ ‘‘ਤਵ ਪਿਤਾ ਬਿਮ੍ਬਿਸਾਰਮਹਾਰਾਜਾ’’ਤਿ ਰਞ੍ਞੋ ਸਨ੍ਤਿਕਂ ਪਹਿਣਿ. ਰਾਜਾ ਤਂ ਪੁਤ੍ਤਂ ਪਸ੍ਸਿਤ੍ਵਾ ਪੁਤ੍ਤਸਿਨੇਹਂ ਪਟਿਲਭਿਤ੍ਵਾ ਕੁਮਾਰਕਪਰਿਹਾਰੇਨ ਵਡ੍ਢੇਸਿ. ਤਸ੍ਸ ਸਦ੍ਧਾਪਟਿਲਾਭੋ ਪਬ੍ਬਜ੍ਜਾ ਵਿਸੇਸਾਧਿਗਮੋ ਚ ਹੇਟ੍ਠਾ ਆਗਤੋਯੇਵ. ਤਸ੍ਸ ਮਾਤਾ ਅਪਰਭਾਗੇ ਪੁਤ੍ਤਸ੍ਸ ਅਭਯਤ੍ਥੇਰਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧਾ ਭਿਕ੍ਖੁਨੀਸੁ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੀ ਨਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰੀ ੨.੧.੬੦-੭੦) –

‘‘ਪਿਣ੍ਡਚਾਰਂ ਚਰਨ੍ਤਸ੍ਸ, ਤਿਸ੍ਸਨਾਮਸ੍ਸ ਸਤ੍ਥੁਨੋ;

ਕਟਚ੍ਛੁਭਿਕ੍ਖਂ ਪਗ੍ਗਯ੍ਹ, ਬੁਦ੍ਧਸੇਟ੍ਠਸ੍ਸਦਾਸਹਂ.

‘‘ਪਟਿਗ੍ਗਹੇਤ੍ਵਾ ਸਮ੍ਬੁਦ੍ਧੋ, ਤਿਸ੍ਸੋ ਲੋਕਗ੍ਗਨਾਯਕੋ;

ਵੀਥਿਯਾ ਸਣ੍ਠਿਤੋ ਸਤ੍ਥਾ, ਅਕਾ ਮੇ ਅਨੁਮੋਦਨਂ.

‘‘ਕਟਚ੍ਛੁਭਿਕ੍ਖਂ ਦਤ੍ਵਾਨ, ਤਾਵਤਿਂਸਂ ਗਮਿਸ੍ਸਸਿ;

ਛਤ੍ਤਿਂਸਦੇਵਰਾਜੂਨਂ, ਮਹੇਸਿਤ੍ਤਂ ਕਰਿਸ੍ਸਸਿ.

‘‘ਪਞ੍ਞਾਸਂ ਚਕ੍ਕਵਤ੍ਤੀਨਂ, ਮਹੇਸਿਤ੍ਤਂ ਕਰਿਸ੍ਸਸਿ;

ਮਨਸਾ ਪਤ੍ਥਿਤਂ ਸਬ੍ਬਂ, ਪਟਿਲਚ੍ਛਸਿ ਸਬ੍ਬਦਾ.

‘‘ਸਮ੍ਪਤ੍ਤਿਂ ਅਨੁਭੋਤ੍ਵਾਨ, ਪਬ੍ਬਜਿਸ੍ਸਸਿ ਕਿਞ੍ਚਨਾ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਸਿਨਾਸਵਾ.

‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਤਿਸ੍ਸੋ ਲੋਕਗ੍ਗਨਾਯਕੋ;

ਨਭਂ ਅਬ੍ਭੁਗ੍ਗਮੀ ਵੀਰੋ, ਹਂਸਰਾਜਾਵ ਅਮ੍ਬਰੇ.

‘‘ਸੁਦਿਨ੍ਨਂ ਮੇ ਦਾਨਵਰਂ, ਸੁਯਿਟ੍ਠਾ ਯਾਗਸਮ੍ਪਦਾ;

ਕਟਚ੍ਛੁਭਿਕ੍ਖਂ ਦਤ੍ਵਾਨ, ਪਤ੍ਤਾਹਂ ਅਚਲਂ ਪਦਂ.

‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਭਿਕ੍ਖਾਦਾਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਤ੍ਤਨੋ ਪੁਤ੍ਤੇਨ ਅਭਯਤ੍ਥੇਰੇਨ ਧਮ੍ਮਂ ਕਥੇਨ੍ਤੇਨ ਓਵਾਦਵਸੇਨ ਯਾ ਗਾਥਾ ਭਾਸਿਤਾ, ਉਦਾਨਵਸੇਨ ਸਯਮ੍ਪਿ ਤਾ ਏਵ ਪਚ੍ਚੁਦਾਹਰਨ੍ਤੀ –

੩੩. ‘‘ਉਦ੍ਧਂ ਪਾਦਤਲਾ ਅਮ੍ਮ, ਅਧੋ ਵੇ ਕੇਸਮਤ੍ਥਕਾ;

ਪਚ੍ਚਵੇਕ੍ਖਸ੍ਸੁਮਂ ਕਾਯਂ, ਅਸੁਚਿਂ ਪੂਤਿਗਨ੍ਧਿਕਂ.

੩੪. ‘‘ਏਵਂ ਵਿਹਰਮਾਨਾਯ, ਸਬ੍ਬੋ ਰਾਗੋ ਸਮੂਹਤੋ;

ਪਰਿਲ਼ਾਹੋ ਸਮੁਚ੍ਛਿਨ੍ਨੋ, ਸੀਤਿਭੂਤਾਮ੍ਹਿ ਨਿਬ੍ਬੁਤਾ’’ਤਿ. – ਆਹ;

ਤਤ੍ਥ ਪਠਮਗਾਥਾਯ ਤਾਵ ਅਯਂ ਸਙ੍ਖੇਪਤ੍ਥੋ – ਅਮ੍ਮ ਪਦੁਮਵਤਿ, ਪਾਦਤਲਤੋ ਉਦ੍ਧਂ ਕੇਸਮਤ੍ਥਕਤੋ ਅਧੋ ਨਾਨਪ੍ਪਕਾਰਅਸੁਚਿਪੂਰਿਤਾਯ ਅਸੁਚਿਂ ਸਬ੍ਬਕਾਲਂ ਪੂਤਿਗਨ੍ਧਵਾਯਨਤੋ ਪੂਤਿਗਨ੍ਧਿਕਂ, ਇਮਂ ਕੁਚ੍ਛਿਤਾਨਂ ਆਯਤਨਤਾਯ ਕਾਯਂ ਸਰੀਰਂ ਞਾਣਚਕ੍ਖੁਨਾ ਪਚ੍ਚਵੇਕ੍ਖਸ੍ਸੂਤਿ. ਅਯਞ੍ਹਿ ਤਸ੍ਸਾ ਪੁਤ੍ਤੇਨ ਓਵਾਦਦਾਨਵਸੇਨ ਭਾਸਿਤਾ ਗਾਥਾ.

ਸਾ ਤਂ ਸੁਤ੍ਵਾ ਅਰਹਤ੍ਤਂ ਪਤ੍ਵਾ ਉਦਾਨੇਨ੍ਤੀ ਆਚਰਿਯਪੂਜਾਵਸੇਨ ਤਮੇਵ ਗਾਥਂ ਪਠਮਂ ਵਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਕਥੇਨ੍ਤੀ ‘‘ਏਵਂ ਵਿਹਰਮਾਨਾਯਾ’’ਤਿ ਦੁਤਿਯਂ ਗਾਥਮਾਹ.

ਤਤ੍ਥ ਏਵਂ ਵਿਹਰਮਾਨਾਯਾਤਿ ਏਵਂ ਮਮ ਪੁਤ੍ਤੇਨ ਅਭਯਤ੍ਥੇਰੇਨ ‘‘ਉਦ੍ਧਂ ਪਾਦਤਲਾ’’ਤਿਆਦਿਨਾ ਦਿਨ੍ਨੇ ਓਵਾਦੇ ਠਤ੍ਵਾ ਸਬ੍ਬਕਾਯਂ ਅਸੁਭਤੋ ਦਿਸ੍ਵਾ ਏਕਗ੍ਗਚਿਤ੍ਤਾ ਤਤ੍ਥ ਭੂਤੁਪਾਦਾਯਭੇਦੇ ਰੂਪਧਮ੍ਮੇ ਤਪ੍ਪਟਿਬਦ੍ਧੇ ਵੇਦਨਾਦਿਕੇ ਅਰੂਪਧਮ੍ਮੇ ਪਰਿਗ੍ਗਹੇਤ੍ਵਾ ਤਤ੍ਥ ਤਿਲਕ੍ਖਣਂ ਆਰੋਪੇਤ੍ਵਾ ਅਨਿਚ੍ਚਾਨੁਪਸ੍ਸਨਾਦਿਵਸੇਨ ਵਿਹਰਮਾਨਾਯ. ਸਬ੍ਬੋ ਰਾਗੋ ਸਮੂਹਤੋਤਿ ਵੁਟ੍ਠਾਨਗਾਮਿਨਿਵਿਪਸ੍ਸਨਾਯ ਮਗ੍ਗੇਨ ਘਟਿਤਾਯ ਮਗ੍ਗਪਟਿਪਾਟਿਯਾ ਅਗ੍ਗਮਗ੍ਗੇਨ ਸਬ੍ਬੋ ਰਾਗੋ ਮਯਾ ਸਮੂਹਤੋ ਸਮੁਗ੍ਘਾਟਿਤੋ. ਪਰਿਲ਼ਾਹੋ ਸਮੁਚ੍ਛਿਨ੍ਨੋਤਿ ਤਤੋ ਏਵ ਸਬ੍ਬੋ ਕਿਲੇਸਪਰਿਲ਼ਾਹੋ ਸਮ੍ਮਦੇਵ ਉਚ੍ਛਿਨ੍ਨੋ, ਤਸ੍ਸ ਚ ਸਮੁਚ੍ਛਿਨ੍ਨਤ੍ਤਾ ਏਵ ਸੀਤਿਭੂਤਾ ਸਉਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਨਿਬ੍ਬੁਤਾ ਅਮ੍ਹੀਤਿ.

ਅਭਯਮਾਤੁਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.