੬. ਮੇਤ੍ਤਿਕਾਥੇਰੀਗਾਥਾਵਣ੍ਣਨਾ

ਕਿਞ੍ਚਾਪਿ ਖੋਮ੍ਹਿ ਦੁਕ੍ਖਿਤਾਤਿਆਦਿਕਾ ਮੇਤ੍ਤਿਕਾਯ ਥੇਰਿਯਾ ਗਾਥਾ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰਾ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਪੁਞ੍ਞਂ ਉਪਚਿਨਨ੍ਤੀ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਗਹਪਤਿਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਵਾ ਸਤ੍ਥੁ ਚੇਤਿਯੇ ਰਤਨੇਨ ਪਟਿਮਣ੍ਡਿਤਾਯ ਮੇਖਲਾਯ ਪੂਜਂ ਅਕਾਸਿ. ਸਾ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੀ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਿ. ਸੇਸਂ ਅਨਨ੍ਤਰੇ ਵੁਤ੍ਤਸਦਿਸਂ. ਅਯਂ ਪਨ ਪਟਿਭਾਗਕੂਟਂ ਅਭਿਰੁਹਿਤ੍ਵਾ ਸਮਣਧਮ੍ਮਂ ਕਰੋਨ੍ਤੀ ਵਿਪਸ੍ਸਨਂ ਵਡ੍ਢੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰੀ ੨.੧.੨੦-੨੫) –

‘‘ਸਿਦ੍ਧਤ੍ਥਸ੍ਸ ਭਗਵਤੋ, ਥੂਪਕਾਰਾਪਿਕਾ ਅਹੁਂ;

ਮੇਖਲਿਕਾ ਮਯਾ ਦਿਨ੍ਨਾ, ਨਵਕਮ੍ਮਾਯ ਸਤ੍ਥੁਨੋ.

‘‘ਨਿਟ੍ਠਿਤੇ ਚ ਮਹਾਥੂਪੇ, ਮੇਖਲਂ ਪੁਨਦਾਸਹਂ;

ਲੋਕਨਾਥਸ੍ਸ ਮੁਨਿਨੋ, ਪਸਨ੍ਨਾ ਸੇਹਿ ਪਾਣਿਭਿ.

‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਮੇਖਲਮਦਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਥੂਪਕਾਰਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਉਦਾਨਵਸੇਨ –

੨੯. ‘‘ਕਿਞ੍ਚਾਪਿ ਖੋਮ੍ਹਿ ਦੁਕ੍ਖਿਤਾ, ਦੁਬ੍ਬਲਾ ਗਤਯੋਬ੍ਬਨਾ;

ਦਣ੍ਡਮੋਲੁਬ੍ਭ ਗਚ੍ਛਾਮਿ, ਪਬ੍ਬਤਂ ਅਭਿਰੂਹਿਯ.

੩੦. ‘‘ਨਿਕ੍ਖਿਪਿਤ੍ਵਾਨ ਸਙ੍ਘਾਟਿਂ, ਪਤ੍ਤਕਞ੍ਚ ਨਿਕੁਜ੍ਜਿਯ;

ਨਿਸਿਨ੍ਨਾ ਚਮ੍ਹਿ ਸੇਲਮ੍ਹਿ, ਅਥ ਚਿਤ੍ਤਂ ਵਿਮੁਚ੍ਚਿ ਮੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ. –

ਇਮਾ ਦ੍ਵੇ ਗਾਥਾ ਅਭਾਸਿ.

ਤਤ੍ਥ ਦੁਕ੍ਖਿਤਾਤਿ ਰੋਗਾਭਿਭਵੇਨ ਦੁਕ੍ਖਿਤਾ ਸਞ੍ਜਾਤਦੁਕ੍ਖਾ ਦੁਕ੍ਖਪ੍ਪਤ੍ਤਾ. ਦੁਬ੍ਬਲਾਤਿ ਤਾਯ ਚੇਵ ਦੁਕ੍ਖਪ੍ਪਤ੍ਤਿਯਾ, ਜਰਾਜਿਣ੍ਣਤਾਯ ਚ ਬਲਵਿਰਹਿਤਾ. ਤੇਨਾਹ ‘‘ਗਤਯੋਬ੍ਬਨਾ’’ਤਿ, ਅਦ੍ਧਗਤਾਤਿ ਅਤ੍ਥੋ.

ਅਥ ਚਿਤ੍ਤਂ ਵਿਮੁਚ੍ਚਿ ਮੇਤਿ ਸੇਲਮ੍ਹਿ ਪਾਸਾਣੇ ਨਿਸਿਨ੍ਨਾ ਚਮ੍ਹਿ, ਅਥ ਤਦਨਨ੍ਤਰਂ ਵੀਰਿਯਸਮਤਾਯ ਸਮ੍ਮਦੇਵ ਯੋਜਿਤਤ੍ਤਾ ਮਗ੍ਗਪਟਿਪਾਟਿਯਾ ਸਬ੍ਬੇਹਿਪਿ ਆਸਵੇਹਿ ਮਮ ਚਿਤ੍ਤਂ ਵਿਮੁਚ੍ਚਿ. ਸੇਸਂ ਵੁਤ੍ਤਨਯਮੇਵ.

ਮੇਤ੍ਤਿਕਾਥੇਰੀਗਾਥਾਵਣ੍ਣਨਾ ਨਿਟ੍ਠਿਤਾ.