੫. ਸਰਭਙ੍ਗਤ੍ਥੇਰਗਾਥਾਵਣ੍ਣਨਾ

ਸਰੇ ਹਤ੍ਥੇਹੀਤਿਆਦਿਕਾ ਆਯਸ੍ਮਤੋ ਸਰਭਙ੍ਗਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਅਨਭਿਲਕ੍ਖਿਤੋਤਿਸ੍ਸ ਕੁਲਵਂਸਾਗਤਂ ਨਾਮਂ ਅਹੋਸਿ. ਸੋ ਵਯਪ੍ਪਤ੍ਤੋ ਕਾਮੇ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਸਰਤਿਣਾਨਿ ਸਯਮੇਵ ਭਞ੍ਜਿਤ੍ਵਾ ਪਣ੍ਣਸਾਲਂ ਕਤ੍ਵਾ ਵਸਤਿ. ਤਤੋ ਪਟ੍ਠਾਯ ਸਰਭਙ੍ਗੋਤਿਸ੍ਸ ਸਮਞ੍ਞਾ ਅਹੋਸਿ. ਅਥ ਭਗਵਾ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ਤਸ੍ਸ ਅਰਹਤ੍ਤੂਪਨਿਸ੍ਸਯਂ ਦਿਸ੍ਵਾ, ਤਤ੍ਥ ਗਨ੍ਤ੍ਵਾ, ਧਮ੍ਮਂ ਦੇਸੇਸਿ. ਸੋ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਵਾ ਤਤ੍ਥੇਵ ਵਸਤਿ. ਅਥਸ੍ਸ ਤਾਪਸਕਾਲੇ ਕਤਾ ਪਣ੍ਣਸਾਲਾ ਜਿਣ੍ਣਾ ਪਲੁਗ੍ਗਾ ਅਹੋਸਿ. ਤਂ ਦਿਸ੍ਵਾ ਮਨੁਸ੍ਸਾ ‘‘ਕਿਸ੍ਸ, ਭਨ੍ਤੇ, ਇਮਂ ਕੁਟਿਕਂ ਨ ਪਟਿਸਙ੍ਖਰੋਥਾ’’ਤਿ ਆਹਂਸੁ. ਥੇਰੋ ‘‘ਕੁਟਿਕਾ ਯਥਾ ਤਾਪਸਕਾਲੇ ਕਤਾ, ਇਦਾਨਿ ਤਥਾ ਕਾਤੁਂ ਨ ਸਕ੍ਕਾ’’ਤਿ ਤਂ ਸਬ੍ਬਂ ਪਕਾਸੇਨ੍ਤੋ –

੪੮੭. ‘‘ਸਰੇ ਹਤ੍ਥੇਹਿ ਭਞ੍ਜਿਤ੍ਵਾ, ਕਤ੍ਵਾਨ ਕੁਟਿਮਚ੍ਛਿਸਂ;

ਤੇਨ ਮੇ ਸਰਭਙ੍ਗੋਤਿ, ਨਾਮਂ ਸਮ੍ਮੁਤਿਯਾ ਅਹੁ.

੪੮੮. ‘‘ਨ ਮਯ੍ਹਂ ਕਪ੍ਪਤੇ ਅਜ੍ਜ, ਸਰੇ ਹਤ੍ਥੇਹਿ ਭਞ੍ਜਿਤੁਂ;

ਸਿਕ੍ਖਾਪਦਾ ਨੋ ਪਞ੍ਞਤ੍ਤਾ, ਗੋਤਮੇਨ ਯਸਸ੍ਸਿਨਾ’’ਤਿ. – ਦ੍ਵੇ ਗਾਥਾ ਅਭਾਸਿ;

ਤਤ੍ਥ ਸਰੇ ਹਤ੍ਥੇਹਿ ਭਞ੍ਜਿਤ੍ਵਾਤਿ, ਪੁਬ੍ਬੇ ਤਾਪਸਕਾਲੇ ਸਰਤਿਣਾਨਿ ਮਮ ਹਤ੍ਥੇਹਿ ਛਿਨ੍ਦਿਤ੍ਵਾ ਤਿਣਕੁਟਿਂ ਕਤ੍ਵਾ ਅਚ੍ਛਿਸਂ ਵਸਿਂ, ਨਿਸੀਦਿਞ੍ਚੇਵ ਨਿਪਜ੍ਜਿਞ੍ਚ. ਤੇਨਾਤਿ ਕੁਟਿਕਰਣਤ੍ਥਂ ਸਰਾਨਂ ਭਞ੍ਜਨੇਨ. ਸਮ੍ਮੁਤਿਯਾਤਿ ਅਨ੍ਵਤ੍ਥਸਮ੍ਮੁਤਿਯਾ ਸਰਭਙ੍ਗੋਤਿ, ਨਾਮਂ ਅਹੁ ਅਹੋਸਿ.

ਨ ਮਯ੍ਹਂ ਕਪ੍ਪਤੇ ਅਜ੍ਜਾਤਿ ਅਜ੍ਜ ਇਦਾਨਿ ਉਪਸਮ੍ਪਨ੍ਨਸ੍ਸ ਮਯ੍ਹਂ ਸਰੇ ਸਰਤਿਣੇ ਹਤ੍ਥੇਹਿ ਭਞ੍ਜਿਤੁਂ ਨ ਕਪ੍ਪਤੇ ਨ ਵਟ੍ਟਤਿ. ਕਸ੍ਮਾ? ਸਿਕ੍ਖਾਪਦਾ ਨੋ ਪਞ੍ਞਤ੍ਤਾ, ਗੋਤਮੇਨ ਯਸਸ੍ਸਿਨਾਤਿ. ਤੇਨ ਯਂ ਅਮ੍ਹਾਕਂ ਸਤ੍ਥਾਰਾ ਸਿਕ੍ਖਾਪਦਂ ਪਞ੍ਞਤ੍ਤਂ, ਤਂ ਮਯਂ ਜੀਵਿਤਹੇਤੁਨਾਪਿ ਨਾਤਿਕ੍ਕਮਾਮਾਤਿ ਦਸ੍ਸੇਤਿ.

ਏਵਂ ਏਕੇਨ ਪਕਾਰੇਨ ਤਿਣਕੁਟਿਕਾਯ ਅਪਟਿਸਙ੍ਖਰਣੇ ਕਾਰਣਂ ਦਸ੍ਸੇਤ੍ਵਾ ਇਦਾਨਿ ਅਪਰੇਨਪਿ ਪਰਿਯਾਯੇਨ ਨਂ ਦਸ੍ਸੇਨ੍ਤੋ –

੪੮੯. ‘‘ਸਕਲਂ ਸਮਤ੍ਤਂ ਰੋਗਂ, ਸਰਭਙ੍ਗੋ ਨਾਦ੍ਦਸਂ ਪੁਬ੍ਬੇ;

ਸੋਯਂ ਰੋਗੋ ਦਿਟ੍ਠੋ, ਵਚਨਕਰੇਨਾਤਿਦੇਵਸ੍ਸਾ’’ਤਿ. – ਇਮਂ ਗਾਥਮਾਹ;

ਤਤ੍ਥ ਸਕਲਨ੍ਤਿ ਸਬ੍ਬਂ. ਸਮਤ੍ਤਨ੍ਤਿ ਸਮ੍ਪੁਣ੍ਣਂ, ਸਬ੍ਬਭਾਗਤੋ ਅਨਵਸੇਸਨ੍ਤਿ ਅਤ੍ਥੋ. ਰੋਗਨ੍ਤਿ ਦੁਕ੍ਖਦੁਕ੍ਖਤਾਦਿਵਸੇਨ ਰੁਜਨਟ੍ਠੇਨ ਰੋਗਭੂਤਂ ਉਪਾਦਾਨਕ੍ਖਨ੍ਧਪਞ੍ਚਕਂ ਸਨ੍ਧਾਯ ਵਦਤਿ. ਨਾਦ੍ਦਸਂ ਪੁਬ੍ਬੇਤਿ ਸਤ੍ਥੁ ਓਵਾਦਪਟਿਲਾਭਤੋ ਪੁਬ੍ਬੇ ਨ ਅਦ੍ਦਕ੍ਖਿਂ. ਸੋਯਂ ਰੋਗੋ ਦਿਟ੍ਠੋ, ਵਚਨਕਰੇਨਾਤਿਦੇਵਸ੍ਸਾਤਿ ਸਮ੍ਮੁਤਿਦੇਵਾ ਉਪਪਤ੍ਤਿਦੇਵਾ ਵਿਸੁਦ੍ਧਿਦੇਵਾਤਿ ਸਬ੍ਬੇਪਿ ਦੇਵੇ ਅਤ੍ਤਨੋ ਸੀਲਾਦਿਗੁਣੇਹਿ ਅਤਿਕ੍ਕਮਿਤ੍ਵਾ ਠਿਤਤ੍ਤਾ ਅਤਿਦੇਵਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਓਵਾਦਪਟਿਕਰੇਨ ਸਰਭਙ੍ਗੇਨ ਸੋ ਅਯਂ ਖਨ੍ਧਪਞ੍ਚਕਸਙ੍ਖਾਤੋ ਰੋਗੋ ਵਿਪਸ੍ਸਨਾਪਞ੍ਞਾਸਹਿਤਾਯ ਮਗ੍ਗਪਞ੍ਞਾਯ ਪਞ੍ਚਕ੍ਖਨ੍ਧਤੋ ਦਿਟ੍ਠੋ, ਪਰਿਞ੍ਞਾਤੋਤਿ ਅਤ੍ਥੋ. ਏਤੇਨ ਏਵਂ ਅਤ੍ਤਭਾਵਕੁਟਿਕਾਯਮ੍ਪਿ ਅਨਪੇਕ੍ਖੋ ਬਾਹਿਰਂ ਤਿਣਕੁਟਿਕਂ ਕਥਂ ਪਟਿਸਙ੍ਖਰਿਸ੍ਸਤੀਤਿ ਦਸ੍ਸੇਤਿ.

ਇਦਾਨਿ ਯਂ ਮਗ੍ਗਂ ਪਟਿਪਜ੍ਜਨ੍ਤੇਨ ਮਯਾ ਅਯਂ ਅਤ੍ਤਭਾਵਰੋਗੋ ਯਾਥਾਵਤੋ ਦਿਟ੍ਠੋ, ਸ੍ਵਾਯਂ ਮਗ੍ਗੋ ਸਬ੍ਬਬੁਦ੍ਧਸਾਧਾਰਣੋ. ਯੇਨ ਨੇਸਂ ਓਵਾਦਧਮ੍ਮੋਪਿ ਮਜ੍ਝੇ ਭਿਨ੍ਨਸੁਵਣ੍ਣਸਦਿਸੋ ਯਤ੍ਥਾਹਂ ਪਤਿਟ੍ਠਾਯ ਦੁਕ੍ਖਕ੍ਖਯਂ ਪਤ੍ਤੋਤਿ ਏਵਂ ਅਤ੍ਤਨੋ ਅਰਹਤ੍ਤਪਟਿਪਤ੍ਤਿਂ ਬ੍ਯਾਕਰੋਨ੍ਤੋ –

੪੯੦. ‘‘ਯੇਨੇਵ ਮਗ੍ਗੇਨ ਗਤੋ ਵਿਪਸ੍ਸੀ, ਯੇਨੇਵ ਮਗ੍ਗੇਨ ਸਿਖੀ ਚ ਵੇਸ੍ਸਭੂ;

ਕਕੁਸਨ੍ਧਕੋਣਾਗਮਨੋ ਚ ਕਸ੍ਸਪੋ, ਤੇਨਞ੍ਜਸੇਨ ਅਗਮਾਸਿ ਗੋਤਮੋ.

੪੯੧. ‘‘ਵੀਤਤਣ੍ਹਾ ਅਨਾਦਾਨਾ, ਸਤ੍ਤ ਬੁਦ੍ਧਾ ਖਯੋਗਧਾ;

ਯੇਹਾਯਂ ਦੇਸਿਤੋ ਧਮ੍ਮੋ, ਧਮ੍ਮਭੂਤੇਹਿ ਤਾਦਿਭਿ.

੪੯੨. ‘‘ਚਤ੍ਤਾਰਿ ਅਰਿਯਸਚ੍ਚਾਨਿ, ਅਨੁਕਮ੍ਪਾਯ ਪਾਣਿਨਂ;

ਦੁਕ੍ਖਂ ਸਮੁਦਯੋ ਮਗ੍ਗੋ, ਨਿਰੋਧੋ ਦੁਕ੍ਖਸਙ੍ਖਯੋ.

੪੯੩. ‘‘ਯਸ੍ਮਿਂ ਨਿਵਤ੍ਤਤੇ ਦੁਕ੍ਖਂ, ਸਂਸਾਰਸ੍ਮਿਂ ਅਨਨ੍ਤਕਂ;

ਭੇਦਾ ਇਮਸ੍ਸ ਕਾਯਸ੍ਸ, ਜੀਵਿਤਸ੍ਸ ਚ ਸਙ੍ਖਯਾ;

ਅਞ੍ਞੋ ਪੁਨਬ੍ਭਵੋ ਨਤ੍ਥਿ, ਸੁਵਿਮੁਤ੍ਤੋਮ੍ਹਿ ਸਬ੍ਬਧੀ’’ਤਿ. –

ਇਮਾ ਗਾਥਾ ਅਭਾਸਿ –

ਤਤ੍ਥ ਯੇਨੇਵ ਮਗ੍ਗੇਨਾਤਿ ਯੇਨੇਵ ਸਪੁਬ੍ਬਭਾਗੇਨ ਅਰਿਯੇਨ ਅਟ੍ਠਙ੍ਗਿਕੇਨ ਮਗ੍ਗੇਨ. ਗਤੋਤਿ ਪਟਿਪਨ੍ਨੋ ਨਿਬ੍ਬਾਨਂ ਅਧਿਗਤੋ. ਵਿਪਸ੍ਸੀਤਿ ਵਿਪਸ੍ਸੀ ਸਮ੍ਮਾਸਮ੍ਬੁਦ੍ਧੋ. ਕਕੁਸਨ੍ਧਾਤਿ ਅਵਿਭਤ੍ਤਿਕੋ ਨਿਦ੍ਦੇਸੋ. ‘‘ਕਕੁਸਨ੍ਧਕੋਣਾਗਮਨਾ’’ਤਿਪਿ ਪਾਠੋ. ਤੇਨਞ੍ਜਸੇਨਾਤਿ ਤੇਨੇਵ ਅਞ੍ਜਸੇਨ ਅਰਿਯਮਗ੍ਗੇਨ.

ਅਨਾਦਾਨਾਤਿ ਅਨੁਪਾਦਾਨਾ ਅਪ੍ਪਟਿਸਨ੍ਧਿਕਾ ਵਾ. ਖਯੋਗਧਾਤਿ ਨਿਬ੍ਬਾਨੋਗਧਾ ਨਿਬ੍ਬਾਨਪਤਿਟ੍ਠਾ. ਯੇਹਾਯਂ ਦੇਸਿਤੋ ਧਮ੍ਮੋਤਿ ਯੇਹਿ ਸਤ੍ਤਹਿ ਸਮ੍ਮਾਸਮ੍ਬੁਦ੍ਧੇਹਿ ਅਯਂ ਸਾਸਨਧਮ੍ਮੋ ਦੇਸਿਤੋ ਪਵੇਦਿਤੋ. ਧਮ੍ਮਭੂਤੇਹੀਤਿ ਧਮ੍ਮਕਾਯਤਾਯ ਧਮ੍ਮਸਭਾਵੇਹਿ, ਨਵਲੋਕੁਤ੍ਤਰਧਮ੍ਮਤੋ ਵਾ ਭੂਤੇਹਿ ਜਾਤੇਹਿ, ਧਮ੍ਮਂ ਵਾ ਪਤ੍ਤੇਹਿ. ਤਾਦਿਭੀਤਿ, ਇਟ੍ਠਾਦੀਸੁ ਤਾਦਿਭਾਵਪ੍ਪਤ੍ਤੇਹਿ.

‘‘ਚਤ੍ਤਾਰਿ ਅਰਿਯਸਚ੍ਚਾਨੀ’’ਤਿਆਦਿਨਾ ਤੇਹਿ ਦੇਸਿਤਂ ਧਮ੍ਮਂ ਦਸ੍ਸੇਤਿ. ਤਤ੍ਥ ਚਤ੍ਤਾਰੀਤਿ ਗਣਨਪਰਿਚ੍ਛੇਦੋ. ਅਰਿਯਸਚ੍ਚਾਨੀਤਿ ਪਰਿਚ੍ਛਿਨ੍ਨਧਮ੍ਮਦਸ੍ਸਨਂ. ਵਚਨਤ੍ਥਤੋ ਪਨ ਅਰਿਯਾਨਿ ਚ ਅਵਿਤਥਟ੍ਠੇਨ ਸਚ੍ਚਾਨਿ ਚਾਤਿ ਅਰਿਯਸਚ੍ਚਾਨਿ, ਅਰਿਯਸ੍ਸ ਵਾ ਭਗਵਤੋ ਸਚ੍ਚਾਨਿ ਤੇਨ ਦੇਸਿਤਤ੍ਤਾ, ਅਰਿਯਭਾਵਕਰਾਨਿ ਵਾ ਸਚ੍ਚਾਨੀਤਿ ਅਰਿਯਸਚ੍ਚਾਨਿ. ਕੁਚ੍ਛਿਤਭਾਵਤੋ ਤੁਚ੍ਛਭਾਵਤੋ ਚ ਦੁਕ੍ਖਂ, ਉਪਾਦਾਨਕ੍ਖਨ੍ਧਪਞ੍ਚਕਂ. ਤਂ ਦੁਕ੍ਖਂ ਸਮੁਦੇਤਿ ਏਤਸ੍ਮਾਤਿ ਸਮੁਦਯੋ, ਤਣ੍ਹਾ. ਕਿਲੇਸੇ ਮਾਰੇਨ੍ਤੋ ਗਚ੍ਛਤਿ, ਨਿਬ੍ਬਾਨਤ੍ਥਿਕੇਹਿ ਮਗ੍ਗੀਯਤੀਤਿ ਵਾ ਮਗ੍ਗੋ, ਸਮ੍ਮਾਦਿਟ੍ਠਿਆਦਯੋ ਅਟ੍ਠ ਧਮ੍ਮਾ. ਸਂਸਾਰਚਾਰਕਸਙ੍ਖਾਤੋ ਨਤ੍ਥਿ ਏਤ੍ਥ ਰੋਧੋ, ਏਤਸ੍ਮਿਂ ਵਾ ਅਧਿਗਤੇ ਪੁਗ੍ਗਲਸ੍ਸ ਰੋਧਾਭਾਵੋ ਹੋਤਿ, ਨਿਰੁਜ੍ਝਤਿ ਦੁਕ੍ਖਮੇਤ੍ਥਾਤਿ ਵਾ ਨਿਰੋਧੋ, ਨਿਬ੍ਬਾਨਂ. ਤੇਨਾਹ ‘‘ਦੁਕ੍ਖਸਙ੍ਖਯੋ’’ਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਵਿਸੁਦ੍ਧਿਮਗ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਯਸ੍ਮਿਨ੍ਤਿ ਯਸ੍ਮਿਂ ਨਿਰੋਧੇ ਨਿਬ੍ਬਾਨੇ ਅਧਿਗਤੇ. ਨਿਵਤ੍ਤਤੇਤਿ ਅਰਿਯਮਗ੍ਗਭਾਵਨਾਯ ਸਤਿ ਅਨਨ੍ਤਕਂ ਅਪਰਿਯਨ੍ਤਂ ਇਮਸ੍ਮਿਂ ਸਂਸਾਰੇ ਜਾਤਿਆਦਿਦੁਕ੍ਖਂ ਨ ਪਵਤ੍ਤਤਿ ਉਚ੍ਛਿਜ੍ਜਤਿ, ਸੋ ਨਿਰੋਧੋਤਿ ਅਯਂ ਧਮ੍ਮਭੂਤੇਹਿ ਸਮ੍ਮਾਸਮ੍ਬੁਦ੍ਧੇਹਿ ਦੇਸਿਤੋ ਧਮ੍ਮੋਤਿ ਯੋਜਨਾ. ‘‘ਭੇਦਾ’’ਤਿਆਦਿਨਾ ‘‘ਰੋਗੋ ਦਿਟ੍ਠੋ’’ਤਿ ਦੁਕ੍ਖਪਰਿਞ੍ਞਾਯ ਸੂਚਿਤਂ ਅਤ੍ਤਨੋ ਅਰਹਤ੍ਤਪ੍ਪਤ੍ਤਿਂ ਸਰੂਪਤੋ ਦਸ੍ਸੇਤਿ. ‘‘ਯਸ੍ਮਿਂ ਨਿਬ੍ਬਤ੍ਤਤੇ ਦੁਕ੍ਖ’’ਨ੍ਤਿ ਪਨ ਪਾਠੇ ਸਕਲਗਾਥਾਯ ਤਤ੍ਥਾਯਂ ਯੋਜਨਾ – ਯਸ੍ਮਿਂ ਖਨ੍ਧਾਦਿਪਟਿਪਾਟਿਸਞ੍ਞਿਤੇ ਸਂਸਾਰੇ ਇਦਂ ਅਨਨ੍ਤਕਂ ਜਾਤਿਆਦਿਦੁਕ੍ਖਂ ਨਿਬ੍ਬਤ੍ਤਂ, ਸੋ ਇਤੋ ਦੁਕ੍ਖਪ੍ਪਤ੍ਤਿਤੋ ਅਞ੍ਞੋ ਪੁਨਪ੍ਪੁਨਂ ਭਵਨਭਾਵਤੋ ਪੁਨਬ੍ਭਵੋ. ਇਮਸ੍ਸ ਜੀਵਿਤਿਨ੍ਦ੍ਰਿਯਸ੍ਸ ਸਙ੍ਖਯਾ ਕਾਯਸਙ੍ਖਾਤਸ੍ਸ ਖਨ੍ਧਪਞ੍ਚਕਸ੍ਸ ਭੇਦਾ ਵਿਨਾਸਾ ਉਦ੍ਧਂ ਨਤ੍ਥਿ, ਤਸ੍ਮਾ ਸਬ੍ਬਧਿ ਸਬ੍ਬੇਹਿ ਕਿਲੇਸੇਹਿ ਸਬ੍ਬੇਹਿ ਭਵੇਹਿ ਸੁਟ੍ਠੁ ਵਿਮੁਤ੍ਤੋ ਵਿਸਂਯੁਤ੍ਤੋ ਅਮ੍ਹੀਤਿ.

ਸਰਭਙ੍ਗਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

ਸਤ੍ਤਕਨਿਪਾਤਵਣ੍ਣਨਾ ਨਿਟ੍ਠਿਤਾ.