੮. ਅਟ੍ਠਕਨਿਪਾਤੋ

੧. ਮਹਾਕਚ੍ਚਾਯਨਤ੍ਥੇਰਗਾਥਾਵਣ੍ਣਨਾ

ਅਟ੍ਠਕਨਿਪਾਤੇ ਕਮ੍ਮਂ ਬਹੁਕਨ੍ਤਿਆਦਿਕਾ ਆਯਸ੍ਮਤੋ ਮਹਾਕਚ੍ਚਾਯਨਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਗਹਪਤਿਮਹਾਸਾਲਕੁਲੇ ਨਿਬ੍ਬਤ੍ਤਿਤ੍ਵਾ ਵੁਦ੍ਧਿਪ੍ਪਤ੍ਤੋ, ਏਕਦਿਵਸਂ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਸਤ੍ਥਾਰਾ ਸਂਖਿਤ੍ਤੇਨ ਭਾਸਿਤਸ੍ਸ ਵਿਤ੍ਥਾਰੇਨ ਅਤ੍ਥਂ ਵਿਭਜਨ੍ਤਾਨਂ ਅਗ੍ਗਟ੍ਠਾਨੇ ਠਪਿਯਮਾਨਂ ਏਕਂ ਭਿਕ੍ਖੁਂ ਦਿਸ੍ਵਾ, ਸਯਮ੍ਪਿ ਤਂ ਠਾਨਂ ਪਤ੍ਥੇਨ੍ਤੋ ਪਣਿਧਾਨਂ ਕਤ੍ਵਾ, ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ, ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸੁਮੇਧਸ੍ਸ ਭਗਵਤੋ ਕਾਲੇ ਵਿਜ੍ਜਾਧਰੋ ਹੁਤ੍ਵਾ ਆਕਾਸੇਨ ਗਚ੍ਛਨ੍ਤੋ ਸਤ੍ਥਾਰਂ ਹਿਮਵਨ੍ਤਪਬ੍ਬਤੇ ਏਕਸ੍ਮਿਂ ਵਨਸਣ੍ਡੇ ਨਿਸਿਨ੍ਨਂ ਦਿਸ੍ਵਾ ਪਸਨ੍ਨਮਾਨਸੋ ਕਣਿਕਾਰਪੁਪ੍ਫੇਹਿ ਪੂਜਂ ਅਕਾਸਿ.

ਸੋ ਤੇਨ ਪੁਞ੍ਞਕਮ੍ਮੇਨ ਅਪਰਾਪਰਂ ਸੁਗਤੀਸੁਯੇਵ ਪਰਿਵਤ੍ਤੇਨ੍ਤੋ ਕਸ੍ਸਪਦਸਬਲਸ੍ਸ ਕਾਲੇ ਬਾਰਾਣਸਿਯਂ ਕੁਲਘਰੇ ਨਿਬ੍ਬਤ੍ਤਿਤ੍ਵਾ ਪਰਿਨਿਬ੍ਬੁਤੇ ਭਗਵਤਿ ਸੁਵਣ੍ਣਚੇਤਿਯਕਰਣਟ੍ਠਾਨੇ ਸਤਸਹਸ੍ਸਗ੍ਘਨਿਕਾਯ ਸੁਵਣ੍ਣਿਟ੍ਠਕਾਯ ਪੂਜਂ ਕਤ੍ਵਾ, ‘‘ਭਗਵਾ ਮਯ੍ਹਂ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਸਰੀਰਂ ਸੁਵਣ੍ਣਵਣ੍ਣਂ ਹੋਤੂ’’ਤਿ ਪਤ੍ਥਨਂ ਅਕਾਸਿ.

ਤਤੋ ਯਾਵਜੀਵਂ ਕੁਸਲਕਮ੍ਮਂ ਕਤ੍ਵਾ ਏਕਂ ਬੁਦ੍ਧਨ੍ਤਰਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਉਜ੍ਜੇਨਿਯਂ ਰਞ੍ਞੋ ਚਣ੍ਡਪਜ੍ਜੋਤਸ੍ਸ ਪੁਰੋਹਿਤਗੇਹੇ ਨਿਬ੍ਬਤ੍ਤਿ. ਤਸ੍ਸ ਨਾਮਗ੍ਗਹਣਦਿਵਸੇ ਮਾਤਾ ‘‘ਮਯ੍ਹਂ ਪੁਤ੍ਤੋ ਸੁਵਣ੍ਣਵਣ੍ਣੋ, ਅਤ੍ਤਨੋ ਨਾਮਂ ਗਹੇਤ੍ਵਾ ਆਗਤੋ’’ਤਿ ਕਞ੍ਚਨਮਾਣਵੋ ਤ੍ਵੇਵ ਨਾਮਂ ਅਕਾਸਿ. ਸੋ ਵੁਡ੍ਢਿਮਨ੍ਵਾਯ ਤਯੋ ਵੇਦੇ ਉਗ੍ਗਹੇਤ੍ਵਾ ਪਿਤੁ ਅਚ੍ਚਯੇਨ ਪੁਰੋਹਿਤਟ੍ਠਾਨਂ ਲਭਿ. ਸੋ ਗੋਤ੍ਤਵਸੇਨ ਕਚ੍ਚਾਯਨੋਤਿ ਪਞ੍ਞਾਯਿਤ੍ਥ. ਤਂ ਰਾਜਾ ਚਣ੍ਡਪਜ੍ਜੋਤੋ ਬੁਦ੍ਧੁਪ੍ਪਾਦਂ ਸੁਤ੍ਵਾ, ‘‘ਆਚਰਿਯ, ਤ੍ਵਂ ਤਤ੍ਥ ਗਨ੍ਤ੍ਵਾ ਸਤ੍ਥਾਰਂ ਇਧਾਨੇਹੀ’’ਤਿ ਪੇਸੇਸਿ. ਸੋ ਅਤ੍ਤਟ੍ਠਮੋ ਸਤ੍ਥੁ ਸਨ੍ਤਿਕਂ ਉਪਗਤੋ. ਤਸ੍ਸ ਸਤ੍ਥਾ ਧਮ੍ਮਂ ਦੇਸੇਤਿ. ਦੇਸਨਾਪਰਿਯੋਸਾਨੇ ਸੋ ਸਤ੍ਤਹਿ ਜਨੇਹਿ ਸਦ੍ਧਿਂ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤੇ ਪਤਿਟ੍ਠਾਸਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੫੪.੧-੨੭) –

‘‘ਪਦੁਮੁਤ੍ਤਰੋ ਨਾਮ ਜਿਨੋ, ਅਨੇਜੋ ਅਜਿਤਂ ਜਯੋ;

ਸਤਸਹਸ੍ਸੇ ਕਪ੍ਪਾਨਂ, ਇਤੋ ਉਪ੍ਪਜ੍ਜਿ ਨਾਯਕੋ.

‘‘ਵੀਰੋ ਕਮਲਪਤ੍ਤਕ੍ਖੋ, ਸਸਙ੍ਕਵਿਮਲਾਨਨੋ;

ਕਨਕਾਚਲਸਙ੍ਕਾਸੋ, ਰਵਿਦਿਤ੍ਤਿਸਮਪ੍ਪਭੋ.

‘‘ਸਤ੍ਤਨੇਤ੍ਤਮਨੋਹਾਰੀ, ਵਰਲਕ੍ਖਣਭੂਸਿਤੋ;

ਸਬ੍ਬਵਾਕ੍ਯਪਥਾਤੀਤੋ, ਮਨੁਜਾਮਰਸਕ੍ਕਤੋ.

‘‘ਸਮ੍ਬੁਦ੍ਧੋ ਬੋਧਯਂ ਸਤ੍ਤੇ, ਵਾਗੀਸੋ ਮਧੁਰਸ੍ਸਰੋ;

ਕਰੁਣਾਨਿਬਨ੍ਧਸਨ੍ਤਾਨੋ, ਪਰਿਸਾਸੁ ਵਿਸਾਰਦੋ.

‘‘ਦੇਸੇਤਿ ਮਧੁਰਂ ਧਮ੍ਮਂ, ਚਤੁਸਚ੍ਚੂਪਸਂਹਿਤਂ;

ਨਿਮੁਗ੍ਗੇ ਮੋਹਪਙ੍ਕਮ੍ਹਿ, ਸਮੁਦ੍ਧਰਤਿ ਪਾਣਿਨੇ.

‘‘ਤਦਾ ਏਕਚਰੋ ਹੁਤ੍ਵਾ, ਤਾਪਸੋ ਹਿਮਵਾਲਯੋ;

ਨਭਸਾ ਮਾਨੁਸਂ ਲੋਕਂ, ਗਚ੍ਛਨ੍ਤੋ ਜਿਨਮਦ੍ਦਸਂ.

‘‘ਉਪੇਚ੍ਚ ਸਨ੍ਤਿਕਂ ਤਸ੍ਸ, ਅਸ੍ਸੋਸਿਂ ਧਮ੍ਮਦੇਸਨਂ;

ਵਣ੍ਣਯਨ੍ਤਸ੍ਸ ਵੀਰਸ੍ਸ, ਸਾਵਕਸ੍ਸ ਮਹਾਗੁਣਂ.

‘‘ਸਂਖਿਤ੍ਤੇਨ ਮਯਾ ਵੁਤ੍ਤਂ, ਵਿਤ੍ਥਾਰੇਨ ਪਕਾਸਯਂ;

ਪਰਿਸਂ ਮਞ੍ਚ ਤੋਸੇਤਿ, ਯਥਾ ਕਚ੍ਚਾਯਨੋ ਅਯਂ.

‘‘ਨਾਹਂ ਏਵਮਿਧੇਕਚ੍ਚਂ, ਅਞ੍ਞਂ ਪਸ੍ਸਾਮਿ ਸਾਵਕਂ;

ਤਸ੍ਮਾਤਦਗ੍ਗੇ ਏਸਗ੍ਗੋ, ਏਵਂ ਧਾਰੇਥ ਭਿਕ੍ਖਵੋ.

‘‘ਤਦਾਹਂ ਵਿਮ੍ਹਿਤੋ ਹੁਤ੍ਵਾ, ਸੁਤ੍ਵਾ ਵਾਕ੍ਯਂ ਮਨੋਰਮਂ;

ਹਿਮਵਨ੍ਤਂ ਗਮਿਤ੍ਵਾਨ, ਆਹਿਤ੍ਵਾ ਪੁਪ੍ਫਸਞ੍ਚਯਂ.

‘‘ਪੂਜੇਤ੍ਵਾ ਲੋਕਸਰਣਂ, ਤਂ ਠਾਨਮਭਿਪਤ੍ਥਯਿਂ;

ਤਦਾ ਮਮਾਸਯਂ ਞਤ੍ਵਾ, ਬ੍ਯਾਕਾਸਿ ਸ ਰਣਞ੍ਜਹੋ.

‘‘ਪਸ੍ਸਥੇਤਂ ਇਸਿਵਰਂ, ਨਿਦ੍ਧਨ੍ਤਕਨਕਤ੍ਤਚਂ;

ਉਦ੍ਧਗ੍ਗਲੋਮਂ ਪੀਣਂਸਂ, ਅਚਲਂ ਪਞ੍ਜਲਿਂ ਠਿਤਂ.

‘‘ਹਾਸਂ ਸੁਪੁਣ੍ਣਨਯਨਂ, ਬੁਦ੍ਧਵਣ੍ਣਗਤਾਸਯਂ;

ਧਮ੍ਮਜਂ ਉਗ੍ਗਹਦਯਂ, ਅਮਤਾਸਿਤ੍ਤਸਨ੍ਨਿਭਂ.

‘‘ਕਚ੍ਚਾਨਸ੍ਸ ਗੁਣਂ ਸੁਤ੍ਵਾ, ਤਂ ਠਾਨਂ ਪਤ੍ਥਯਂ ਠਿਤੋ;

ਅਨਾਗਤਮ੍ਹਿ ਅਦ੍ਧਾਨੇ, ਗੋਤਮਸ੍ਸ ਮਹਾਮੁਨੇ.

‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਕਚ੍ਚਾਨੋ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ.

‘‘ਬਹੁਸ੍ਸੁਤੋ ਮਹਾਞਾਣੀ, ਅਧਿਪ੍ਪਾਯਵਿਦੂ ਮੁਨੇ;

ਪਾਪੁਣਿਸ੍ਸਤਿ ਤਂ ਠਾਨਂ, ਯਥਾਯਂ ਬ੍ਯਾਕਤੋ ਮਯਾ.

‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

‘‘ਦੁਵੇ ਭਵੇ ਸਂਸਰਾਮਿ, ਦੇਵਤ੍ਤੇ ਅਥ ਮਾਨੁਸੇ;

ਅਞ੍ਞਂ ਗਤਿਂ ਨ ਗਚ੍ਛਾਮਿ, ਬੁਦ੍ਧਪੂਜਾਯਿਦਂ ਫਲਂ.

‘‘ਦੁਵੇ ਕੁਲੇ ਪਜਾਯਾਮਿ, ਖਤ੍ਤਿਯੇ ਅਥ ਬ੍ਰਾਹ੍ਮਣੇ;

ਨੀਚੇ ਕੁਲੇ ਨ ਜਾਯਾਮਿ, ਬੁਦ੍ਧਪੂਜਾਯਿਦਂ ਫਲਂ.

‘‘ਪਚ੍ਛਿਮੇ ਚ ਭਵੇ ਦਾਨਿ, ਜਾਤੋ ਉਜ੍ਜੇਨਿਯਂ ਪੁਰੇ;

ਪਜ੍ਜੋਤਸ੍ਸ ਚ ਚਣ੍ਡਸ੍ਸ, ਪੁਰੋਹਿਤਦਿਜਾਧਿਨੋ.

‘‘ਪੁਤ੍ਤੋ ਤਿਰਿਟਿਵਚ੍ਛਸ੍ਸ, ਨਿਪੁਣੋ ਵੇਦਪਾਰਗੂ;

ਮਾਤਾ ਚ ਚਨ੍ਦਿਮਾ ਨਾਮ, ਕਚ੍ਚਾਨੋਹਂ ਵਰਤ੍ਤਚੋ.

‘‘ਵੀਮਂਸਨਤ੍ਥਂ ਬੁਦ੍ਧਸ੍ਸ, ਭੂਮਿਪਾਲੇਨ ਪੇਸਿਤੋ;

ਦਿਸ੍ਵਾ ਮੋਕ੍ਖਪੁਰਦ੍ਵਾਰਂ, ਨਾਯਕਂ ਗੁਣਸਞ੍ਚਯਂ.

‘‘ਸੁਤ੍ਵਾ ਚ ਵਿਮਲਂ ਵਾਕ੍ਯਂ, ਗਤਿਪਙ੍ਕਵਿਸੋਸਨਂ;

ਪਾਪੁਣਿਂ ਅਮਤਂ ਸਨ੍ਤਂ, ਸੇਸੇਹਿ ਸਹ ਸਤ੍ਤਹਿ.

‘‘ਅਧਿਪ੍ਪਾਯਵਿਦੂ ਜਾਤੋ, ਸੁਗਤਸ੍ਸ ਮਹਾਮਤੇ.

ਠਪਿਤੋ ਏਤਦਗ੍ਗੇ ਚ, ਸੁਸਮਿਦ੍ਧਮਨੋਰਥੋ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਥ ਸਤ੍ਥਾ ‘‘ਏਥ, ਭਿਕ੍ਖਵੋ’’ਤਿ ਹਤ੍ਥਂ ਪਸਾਰੇਸਿ. ਤੇ ਤਾਵਦੇਵ ਦ੍ਵਙ੍ਗੁਲਮਤ੍ਤਕੇਸਮਸ੍ਸੁਕਾ ਇਦ੍ਧਿਮਯਪਤ੍ਤਚੀਵਰਧਰਾ ਵਸ੍ਸਸਟ੍ਠਿਕਤ੍ਥੇਰਾ ਵਿਯ ਅਹੇਸੁਂ. ਏਵਂ ਥੇਰੋ ਸਦਤ੍ਥਂ ਨਿਪ੍ਫਾਦੇਤ੍ਵਾ, ‘‘ਭਨ੍ਤੇ, ਰਾਜਾ ਪਜ੍ਜੋਤੋ ਤੁਮ੍ਹਾਕਂ ਪਾਦੇ ਵਨ੍ਦਿਤੁਂ ਧਮ੍ਮਞ੍ਚ ਸੋਤੁਂ ਇਚ੍ਛਤੀ’’ਤਿ ਸਤ੍ਥੁ ਆਰੋਚੇਸਿ. ਸਤ੍ਥਾ, ‘‘ਤ੍ਵਂਯੇਵ, ਭਿਕ੍ਖੁ, ਤਤ੍ਥ ਗਚ੍ਛ, ਤਯਿ ਗਤੇਪਿ ਰਾਜਾ ਪਸੀਦਿਸ੍ਸਤੀ’’ਤਿ ਆਹ. ਥੇਰੋ ਸਤ੍ਥੁ ਆਣਾਯ ਅਤ੍ਤਟ੍ਠਮੋ ਤਤ੍ਥ ਗਨ੍ਤ੍ਵਾ ਰਾਜਾਨਂ ਪਸਾਦੇਤ੍ਵਾ ਅਵਨ੍ਤੀਸੁ ਸਾਸਨਂ ਪਤਿਟ੍ਠਾਪੇਤ੍ਵਾ ਪੁਨ ਸਤ੍ਥੁ ਸਨ੍ਤਿਕਮੇਵ ਗਤੋ. ਸੋ ਏਕਦਿਵਸਂ ਸਮ੍ਬਹੁਲੇ ਭਿਕ੍ਖੂ ਸਮਣਧਮ੍ਮਂ ਪਹਾਯ ਕਮ੍ਮਾਰਾਮੇ ਸਙ੍ਗਣਿਕਾਰਾਮੇ ਰਸਤਣ੍ਹਾਨੁਗਤੇ ਚ ਪਮਾਦਵਿਹਾਰਿਨੋ ਦਿਸ੍ਵਾ ਤੇਸਂ ਓਵਾਦਵਸੇਨ –

੪੯੪. ‘‘ਕਮ੍ਮਂ ਬਹੁਕਂ ਨ ਕਾਰਯੇ, ਪਰਿਵਜ੍ਜੇਯ੍ਯ ਜਨਂ ਨ ਉਯ੍ਯਮੇ;

ਸੋ ਉਸ੍ਸੁਕ੍ਕੋ ਰਸਾਨੁਗਿਦ੍ਧੋ, ਅਤ੍ਥਂ ਰਿਞ੍ਚਤਿ ਯੋ ਸੁਖਾਧਿਵਾਹੋ.

੪੯੫. ‘‘ਪਙ੍ਕੋਤਿ ਹਿ ਨਂ ਅਵੇਦਯੁਂ, ਯਾਯਂ ਵਨ੍ਦਨਪੂਜਨਾ ਕੁਲੇਸੁ;

ਸੁਖੁਮਂ ਸਲ੍ਲਂ ਦੁਰੁਬ੍ਬਹਂ, ਸਕ੍ਕਾਰੋ ਕਾਪੁਰਿਸੇਨ ਦੁਜ੍ਜਹੋ’’ਤਿ. –

ਦ੍ਵੇ ਗਾਥਾ ਅਭਾਸਿ.

ਤਤ੍ਥ ਕਮ੍ਮਂ ਬਹੁਕਂ ਨ ਕਾਰਯੇਤਿ ਨਵਾਵਾਸਕਾਰਾਪਨਾਦਿਂ ਸਮਣਧਮ੍ਮਕਰਣਸ੍ਸ ਪਰਿਬਨ੍ਧਭੂਤਂ ਮਹਨ੍ਤਂ ਨਵਕਮ੍ਮਂ ਨ ਪਟ੍ਠਪੇਯ੍ਯ, ਖੁਦ੍ਦਕਂ ਅਪ੍ਪਸਮਾਰਮ੍ਭਂ ਖਣ੍ਡਫੁਲ੍ਲਪਟਿਸਙ੍ਖਰਣਾਦਿਂ ਸਤ੍ਥੁ ਵਚਨਪਟਿਪੂਜਨਤ੍ਥਂ ਕਾਤਬ੍ਬਮੇਵ. ਪਰਿਵਜ੍ਜੇਯ੍ਯ ਜਨਨ੍ਤਿ ਗਣਸਙ੍ਗਣਿਕਵਸੇਨ ਜਨਂ ਵਿਵਜ੍ਜੇਯ੍ਯ. ਜਨਨ੍ਤਿ ਵਾ ਯਾਦਿਸਂ ਸਂਸੇਵਤੋ ਭਜਤੋ ਪਯਿਰੁਪਾਸਤੋ ਕੁਸਲਾ ਧਮ੍ਮਾ ਪਰਿਹਾਯਨ੍ਤਿ, ਅਕੁਸਲਾ ਧਮ੍ਮਾ ਅਭਿਵਡ੍ਢਨ੍ਤਿ, ਤਾਦਿਸਂ ਅਕਲ੍ਯਾਣਮਿਤ੍ਤਭੂਤਂ ਜਨਂ ਪਰਿਵਜ੍ਜੇਯ੍ਯ. ਨ ਉਯ੍ਯਮੇਤਿ, ਪਚ੍ਚਯੁਪ੍ਪਾਦਨਤ੍ਥਂ ਕੁਲਸਙ੍ਗਣ੍ਹਨਵਸੇਨ ਨ ਵਾਯਮੇਯ੍ਯ, ਯਸ੍ਮਾ ਸੋ ਉਸ੍ਸੁਕ੍ਕੋ ਰਸਾਨੁਗਿਦ੍ਧੋ, ਅਤ੍ਥਂ ਰਿਞ੍ਚਤਿ ਯੋ ਸੁਖਾਧਿਵਾਹੋਤਿ ਯੋ ਰਸਾਨੁਗਿਦ੍ਧੋ ਰਸਤਣ੍ਹਾਵਸਿਕੋ ਭਿਕ੍ਖੁ ਪਚ੍ਚਯੁਪ੍ਪਾਦਨਪਸੁਤੋ, ਸੋ ਕੁਲਸਙ੍ਗਣ੍ਹਨਤ੍ਥਂ ਉਸ੍ਸੁਕ੍ਕੋ, ਤੇਸੁ ਸੁਖਿਤੇਸੁ ਸੁਖਿਤੋ, ਦੁਕ੍ਖਿਤੇਸੁ ਦੁਕ੍ਖਿਤੋ, ਉਪ੍ਪਨ੍ਨੇਸੁ ਕਿਚ੍ਚਕਰਣੀਯੇਸੁ ਅਤ੍ਤਨਾ ਯੋਗਂ ਆਪਜ੍ਜਤਿ, ਯੋ ਸੁਖਾਧਿਵਾਹੋ ਸਮਥਵਿਪਸ੍ਸਨਾਮਗ੍ਗਫਲਨਿਬ੍ਬਾਨਸੁਖਾਵਹੋ ਸੀਲਾਦਿਅਤ੍ਥੋ, ਤਂ ਰਿਞ੍ਚਤਿ ਪਜਹਤਿ ਏਕਂਸੇਨ ਅਤ੍ਤਾਨਂ ਤਤੋ ਵਿਵੇਚੇਤੀਤਿ ਅਤ੍ਥੋ.

ਏਵਂ ਪਠਮਗਾਥਾਯ ‘‘ਕਮ੍ਮਾਰਾਮਤਂ ਸਙ੍ਗਣਿਕਾਰਾਮਤਂ ਪਚ੍ਚਯਗੇਧਞ੍ਚ ਵਜ੍ਜੇਥਾ’’ਤਿ ਓਵਦਿਤ੍ਵਾ ਇਦਾਨਿ ਸਕ੍ਕਾਰਾਭਿਲਾਸਂ ਗਰਹਨ੍ਤੋ ਦੁਤਿਯਂ ਗਾਥਮਾਹ. ਤਸ੍ਸਤ੍ਥੋ – ਯਾ ਅਯਂ ਭਿਕ੍ਖਾਯ ਉਪਗਤਾਨਂ ਪਬ੍ਬਜਿਤਾਨਂ ਕੁਲੇਸੁ ਗੇਹਵਾਸੀਹਿ ਗੁਣਸਮ੍ਭਾਵਨਾਯ ਕਰੀਯਮਾਨਾ ਵਨ੍ਦਨਾ ਪੂਜਨਾ ਚ, ਯਸ੍ਮਾ ਤਂ ਅਭਾਵਿਤਤ੍ਤਾਨਂ ਓਸੀਦਾਪਨਟ੍ਠੇਨ ਮਲਿਨਭਾਵਕਰਣਟ੍ਠੇਨ ਚ ਪਙ੍ਕੋ ਕਦ੍ਦਮੋਤਿ ਬੁਦ੍ਧਾਦਯੋ ਅਰਿਯਾ ਪਵੇਦਯੁਂ ਅਬ੍ਭਞ੍ਞਂਸੁ ਪਵੇਦੇਸੁਂ ਵਾ, ਯਸ੍ਮਾ ਚ ਅਪਰਿਞ੍ਞਾਤਕ੍ਖਨ੍ਧਾਨਂ ਅਨ੍ਧਪੁਥੁਜ੍ਜਨਾਨਂ ਸਕ੍ਕਾਰਾਭਿਲਾਸਂ ਦੁਵਿਞ੍ਞੇਯ੍ਯਸਭਾਵਤਾਯ ਪੀਲ਼ਾਜਨਨਤੋ ਅਨ੍ਤੋ ਤੁਦਨਤੋ ਦੁਰੁਦ੍ਧਰਣਤੋ ਚ ਸੁਖੁਮਂ ਸਲ੍ਲਂ ਦੁਰੁਬ੍ਬਹਂ ਪਵੇਦਯੁਂ, ਤਤੋ ਏਵ ਸਕ੍ਕਾਰੋ ਕਾਪੁਰਿਸੇਨ ਦੁਜ੍ਜਹੋ ਦੁਪ੍ਪਜਹੇਯ੍ਯੋ ਤਸ੍ਸ ਪਹਾਨਪਟਿਪਤ੍ਤਿਯਾ ਅਪ੍ਪਟਿਪਜ੍ਜਨਤੋ. ਸਕ੍ਕਾਰਾਭਿਲਾਸਪ੍ਪਹਾਨੇਨ ਹਿ ਸਕ੍ਕਾਰੋ ਪਹੀਨੋ ਹੋਤਿ, ਤਸ੍ਮਾ ਤਸ੍ਸ ਪਹਾਨਾਯ ਆਯੋਗੋ ਕਰਣੀਯੋਤਿ ਦਸ੍ਸੇਤਿ –

੪੯੬. ‘‘ਨ ਪਰਸ੍ਸੁਪਨਿਧਾਯ, ਕਮ੍ਮਂ ਮਚ੍ਚਸ੍ਸ ਪਾਪਕਂ;

ਅਤ੍ਤਨਾ ਤਂ ਨ ਸੇਵੇਯ੍ਯ, ਕਮ੍ਮਬਨ੍ਧੂ ਹਿ ਮਾਤਿਯਾ.

੪੯੭. ‘‘ਨ ਪਰੇ ਵਚਨਾ ਚੋਰੋ, ਨ ਪਰੇ ਵਚਨਾ ਮੁਨਿ;

ਅਤ੍ਤਾ ਚ ਨਂ ਯਥਾ ਵੇਦਿ, ਦੇਵਾਪਿ ਨਂ ਤਥਾ ਵਿਦੂ.

੪੯੮. ‘‘ਪਰੇ ਚ ਨ ਵਿਜਾਨਨ੍ਤਿ, ਮਯਮੇਤ੍ਥ ਯਮਾਮਸੇ;

ਯੇ ਚ ਤਤ੍ਥ ਵਿਜਾਨਨ੍ਤਿ, ਤਤੋ ਸਮ੍ਮਨ੍ਤਿ ਮੇਧਗਾ.

੪੯੯. ‘‘ਜੀਵਤੇ ਵਾਪਿ ਸਪ੍ਪਞ੍ਞੋ, ਅਪਿ ਵਿਤ੍ਤਪਰਿਕ੍ਖਯੋ;

ਪਞ੍ਞਾਯ ਚ ਅਲਾਭੇਨ, ਵਿਤ੍ਤਵਾਪਿ ਨ ਜੀਵਤਿ.

੫੦੦. ‘‘ਸਬ੍ਬਂ ਸੁਣਾਤਿ ਸੋਤੇਨ, ਸਬ੍ਬਂ ਪਸ੍ਸਤਿ ਚਕ੍ਖੁਨਾ;

ਨ ਚ ਦਿਟ੍ਠਂ ਸੁਤਂ ਧੀਰੋ, ਸਬ੍ਬਂ ਉਜ੍ਝਿਤੁਮਰਹਤਿ.

੫੦੧. ‘‘ਚਕ੍ਖੁਮਾਸ੍ਸ ਯਥਾ ਅਨ੍ਧੋ, ਸੋਤਵਾ ਬਧਿਰੋ ਯਥਾ;

ਪਞ੍ਞਵਾਸ੍ਸ ਯਥਾ ਮੂਗੋ, ਬਲਵਾ ਦੁਬ੍ਬਲੋਰਿਵ;

ਅਥ ਅਤ੍ਥੇ ਸਮੁਪ੍ਪਨ੍ਨੇ, ਸਯੇਥ ਮਤਸਾਯਿਕ’’ਨ੍ਤਿ. –

ਇਮਾ ਛ ਗਾਥਾ ਰਞ੍ਞੋ ਪਜ੍ਜੋਤਸ੍ਸ ਓਵਾਦਵਸੇਨ ਅਭਾਸਿ. ਸੋ ਕਿਰ ਬ੍ਰਾਹ੍ਮਣੇ ਸਦ੍ਦਹਿਤ੍ਵਾ ਪਸੁਘਾਤਯਞ੍ਞਂ ਕਾਰੇਤਿ, ਕਮ੍ਮਂ ਅਸੋਧੇਤ੍ਵਾਵ ਅਚੋਰੇ ਚੋਰਸਞ੍ਞਾਯ ਦਣ੍ਡੇਸਿ, ਅਟ੍ਟਕਰਣੇ ਚ ਅਸ੍ਸਾਮਿਕੇ ਸਾਮਿਕੇ ਕਰੋਤਿ, ਸਾਮਿਕੇ ਚ ਅਸ੍ਸਾਮਿਕੇ. ਤਤੋ ਨਂ ਥੇਰੋ ਵਿਵੇਚੇਤੁਂ ‘‘ਨ ਪਰਸ੍ਸਾ’’ਤਿਆਦਿਨਾ ਛ ਗਾਥਾ ਅਭਾਸਿ.

ਤਤ੍ਥ ਨ ਪਰਸ੍ਸੁਪਨਿਧਾਯ, ਕਮ੍ਮਂ ਮਚ੍ਚਸ੍ਸ ਪਾਪਕਨ੍ਤਿ ਪਰਸ੍ਸ ਮਚ੍ਚਸ੍ਸ ਸਤ੍ਤਸ੍ਸ ਉਪਨਿਧਾਯ ਉਦ੍ਦਿਸ੍ਸ ਕਾਰਣਂ ਕਤ੍ਵਾ ਪਾਪਕਂ ਵਧਬਨ੍ਧਾਦਿਕਮ੍ਮਂ ਨ ਸੇਵੇਯ੍ਯ, ਪਰੇਨ ਨ ਕਾਰਾਪੇਯ੍ਯਾਤਿ ਅਤ੍ਥੋ. ਅਤ੍ਤਨਾ ਤਂ ਨ ਸੇਵੇਯ੍ਯਾਤਿ ਅਤ੍ਤਨਾਪਿ ਤਂ ਪਾਪਕਂ ਨ ਕਰੇਯ੍ਯ. ਕਸ੍ਮਾ? ਕਮ੍ਮਬਨ੍ਧੂ ਹਿ ਮਾਤਿਯਾ ਇਮੇ ਮਾਤਿਯਾ ਮਚ੍ਚਾ ਕਮ੍ਮਦਾਯਾਦਾ, ਤਸ੍ਮਾ ਅਤ੍ਤਨਾ ਚ ਕਿਞ੍ਚਿ ਪਾਪਕਮ੍ਮਂ ਨ ਕਰੇਯ੍ਯ, ਪਰੇਨਪਿ ਨ ਕਾਰਾਪੇਯ੍ਯਾਤਿ ਅਤ੍ਥੋ.

ਨ ਪਰੇ ਵਚਨਾ ਚੋਰੋਤਿ ਅਤ੍ਤਨਾ ਚੋਰਿਯਂ ਅਕਤ੍ਵਾ ਪਰਵਚਨਾ ਪਰਸ੍ਸ ਵਚਨਮਤ੍ਤੇਨ ਚੋਰੋ ਨਾਮ ਨ ਹੋਤਿ, ਤਥਾ ਨ ਪਰੇ ਵਚਨਾ ਮੁਨਿ ਪਰਸ੍ਸ ਵਚਨਮਤ੍ਤੇਨ ਮੁਨਿ ਸੁਵਿਸੁਦ੍ਧਕਾਯਵਚੀਮਨੋਸਮਾਚਾਰੋ ਨ ਹੋਤਿ. ਏਤ੍ਥ ਹਿ ਪਰੇਤਿ ਵਿਭਤ੍ਤਿਅਲੋਪਂ ਕਤ੍ਵਾ ਨਿਦ੍ਦੇਸੋ. ਕੇਚਿ ਪਨ ‘‘ਪਰੇਸਨ੍ਤਿ ਵਤ੍ਤਬ੍ਬੇ ਪਰੇਤਿ ਸਂ-ਕਾਰਲੋਪਂ ਕਤ੍ਵਾ ਨਿਦ੍ਦਿਟ੍ਠ’’ਨ੍ਤਿ ਵਦਨ੍ਤਿ. ਅਤ੍ਤਾ ਚ ਨਂ ਯਥਾ ਵੇਦੀਤਿ ਨਂ ਸਤ੍ਤਂ ਤਸ੍ਸ ਅਤ੍ਤਾ ਚਿਤ੍ਤਂ ਯਥਾ ‘‘ਅਹਂ ਪਰਿਸੁਦ੍ਧੋ, ਅਪਰਿਸੁਦ੍ਧੋ ਵਾ’’ਤਿ ਯਾਥਾਵਤੋ ਅਵੇਦਿ ਜਾਨਾਤਿ. ਦੇਵਾਪਿ ਨਂ ਤਥਾ ਵਿਦੂਤਿ ਵਿਸੁਦ੍ਧਿਦੇਵਾ, ਉਪਪਤ੍ਤਿਦੇਵਾ ਚ ਤਥਾ ਵਿਦੂ ਵਿਦਨ੍ਤਿ ਜਾਨਨ੍ਤਿ, ਤਸ੍ਮਾ ਸਯਂ ਤਾਦਿਸਾ ਦੇਵਾ ਚ ਪਮਾਣਂ ਸੁਦ੍ਧਾਸੁਦ੍ਧਾਨਂ ਸੁਦ੍ਧਾਸੁਦ੍ਧਭਾਵਜਾਨਨੇ, ਨ ਯੇ ਕੇਚਿ ਇਚ੍ਛਾਦੋਸਪਰੇਤਾ ਸਤ੍ਤਾਤਿ ਅਧਿਪ੍ਪਾਯੋ.

ਪਰੇਤਿ ਪਣ੍ਡਿਤੇ ਠਪੇਤ੍ਵਾ ਤਤੋ ਅਞ੍ਞੇ, ਕੁਸਲਾਕੁਸਲਸਾਵਜ੍ਜਾਨਵਜ੍ਜਂ ਕਮ੍ਮਂ ਕਮ੍ਮਫਲਂ ਕਾਯਸ੍ਸ ਅਸੁਭਤਂ ਸਙ੍ਖਾਰਾਨਂ ਅਨਿਚ੍ਚਤਂ ਅਜਾਨਨ੍ਤਾ ਇਧ ਪਰੇ ਨਾਮ. ਤੇ ਮਯਮੇਤ੍ਥ ਇਮਸ੍ਮਿਂ ਜੀਵਲੋਕੇ ਯਮਾਮ ਉਪਰਮਾਮ, ‘‘ਸਤਤਂ ਸਮਿਤਂ ਮਚ੍ਚੁ ਸਨ੍ਤਿਕਂ ਗਚ੍ਛਾਮਾ’’ਤਿ ਨ ਜਾਨਨ੍ਤਿ. ਯੇ ਚ ਤਤ੍ਥ ਵਿਜਾਨਨ੍ਤੀਤਿ ਯੇ ਚ ਤਤ੍ਥ ਪਣ੍ਡਿਤਾ ‘‘ਮਯਂ ਮਚ੍ਚੁ ਸਮੀਪਂ ਗਚ੍ਛਾਮਾ’’ਤਿ ਵਿਜਾਨਨ੍ਤਿ. ਤਤੋ ਸਮ੍ਮਨ੍ਤਿ ਮੇਧਗਾਤਿ ਏਵਞ੍ਹਿ ਤੇ ਜਾਨਨ੍ਤਾ ਮੇਧਗਾਨਂ ਪਰਵਿਹਿਂਸਨਾਨਂ ਵੂਪਸਮਾਯ ਪਟਿਪਜ੍ਜਨ੍ਤਿ, ਅਤ੍ਤਨਾ ਪਰੇ ਚ ਅਞ੍ਞੇ ਨ ਮੇਧਨ੍ਤਿ ਨ ਬਾਧੇਨ੍ਤੀਤਿ ਅਤ੍ਥੋ. ਤ੍ਵਂ ਪਨ ਜੀਵਿਤਨਿਮਿਤ੍ਤਂ ਅਚੋਰੇ ਚੋਰੇ ਕਰੋਨ੍ਤੋਪਿ ਦਣ੍ਡਨੇਨ ਸਾਮਿਕੇ ਅਸ੍ਸਾਮਿਕੇ ਕਰੋਨ੍ਤੋਪਿ ਧਨਜਾਨਿਯਾ ਬਾਧਸਿ ਪਞ੍ਞਾਵੇਕਲ੍ਲਤੋ. ਤਥਾ ਅਕਰੋਨ੍ਤੋਪਿ ਜੀਵਤੇ ਵਾਪਿ ਸਪ੍ਪਞ੍ਞੋ, ਅਪਿ ਵਿਤ੍ਤਪਰਿਕ੍ਖਯੋ ਪਰਿਕ੍ਖੀਣਧਨੋਪਿ ਸਪ੍ਪਞ੍ਞਜਾਤਿਕੋ ਇਤਰੀਤਰਸਨ੍ਤੋਸੇਨ ਸਨ੍ਤੁਟ੍ਠੋ ਅਨਵਜ੍ਜਾਯ ਜੀਵਿਕਾਯ ਜੀਵਤਿਯੇਵ. ਤਸ੍ਸ ਹਿ ਜੀਵਿਤਂ ਨਾਮ. ਤੇਨਾਹ ਭਗਵਾ – ‘‘ਪਞ੍ਞਾਜੀਵਿਂ ਜੀਵਿਤਮਾਹੁ ਸੇਟ੍ਠ’’ਨ੍ਤਿ (ਸਂ. ਨਿ. ੧.੭੩, ੨੪੬; ਸੁ. ਨਿ. ੧੮੪). ਦੁਮ੍ਮੇਧਪੁਗ੍ਗਲੋ ਪਨ ਪਞ੍ਞਾਯ ਚ ਅਲਾਭੇਨ ਦਿਟ੍ਠਧਮ੍ਮਿਕਂ ਸਮ੍ਪਰਾਯਿਕਞ੍ਚ ਅਤ੍ਥਂ ਵਿਰਾਧੇਨ੍ਤੋ ਵਿਤ੍ਤਵਾਪਿ ਨ ਜੀਵਤਿ ਗਰਹਾਦਿਪਵਤ੍ਤਿਯਾ ਜੀਵਨ੍ਤੋ ਨਾਮ ਨ ਹੋਤਿ, ਅਨੁਪਾਯਞ੍ਞੁਤਾਯ ਯਥਾਧਿਗਤਂ ਧਨਂ ਨਾਸੇਨ੍ਤੋ ਜੀਵਿਤਮ੍ਪਿ ਸਨ੍ਧਾਰੇਤੁਂ ਨ ਸਕ੍ਕੋਤਿਯੇਵ.

ਇਮਾ ਕਿਰ ਚਤਸ੍ਸੋਪਿ ਗਾਥਾ ਥੇਰੋ ਸੁਪਿਨਨ੍ਤੇਨ ਰਞ੍ਞੋ ਕਥੇਸਿ. ਰਾਜਾ ਸੁਪਿਨਂ ਦਿਸ੍ਵਾ ਥੇਰਂ ਨਮਸ੍ਸਨ੍ਤੋਯੇਵ ਪਬੁਜ੍ਝਿਤ੍ਵਾ ਪਭਾਤਾਯ ਰਤ੍ਤਿਯਾ ਥੇਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਅਤ੍ਤਨਾ ਦਿਟ੍ਠਨਿਯਾਮੇਨ ਸੁਪਿਨਂ ਕਥੇਸਿ. ਤਂ ਸੁਤ੍ਵਾ ਥੇਰੋ ਤਾ ਗਾਥਾ ਪਚ੍ਚੁਨੁਭਾਸਿਤ੍ਵਾ ‘‘ਸਬ੍ਬਂ ਸੁਣਾਤੀ’’ਤਿਆਦਿਨਾ ਦ੍ਵੀਹਿ ਗਾਥਾਹਿ ਰਾਜਾਨਂ ਓਵਦਿ. ਤਤ੍ਥ ਸਬ੍ਬਂ ਸੁਣਾਤਿ ਸੋਤੇਨਾਤਿ ਇਧ ਸੋਤਬ੍ਬਂ ਸਦ੍ਦਂ ਆਪਾਥਗਤਂ ਸਬ੍ਬਂ ਸੁਭਾਸਿਤਂ ਦੁਬ੍ਭਾਸਿਤਞ੍ਚ ਅਬਧਿਰੋ ਸੋਤੇਨ ਸੁਣਾਤਿ. ਤਥਾ ਸਬ੍ਬਂ ਰੂਪਂ ਸੁਨ੍ਦਰਂ ਅਸੁਨ੍ਦਰਮ੍ਪਿ ਚਕ੍ਖੁਨਾ ਅਨਨ੍ਧੋ ਪਸ੍ਸਤਿ, ਅਯਮਿਨ੍ਦ੍ਰਿਯਾਨਂ ਸਭਾਵੋ. ਤਤ੍ਥ ਪਨ ਨ ਚ ਦਿਟ੍ਠਂ ਸੁਤਂ ਧੀਰੋ, ਸਬ੍ਬਂ ਉਜ੍ਝਿਤੁਨ੍ਤਿ ਚ ਨਿਦਸ੍ਸਨਮਤ੍ਤਮੇਤਂ. ਯਞ੍ਹਿ ਤਂ ਦਿਟ੍ਠਂ ਸੁਤਂ ਵਾ, ਨ ਤਂ ਸਬ੍ਬਂ ਧੀਰੋ ਸਪ੍ਪਞ੍ਞੋ ਉਜ੍ਝਿਤੁਂ ਪਰਿਚ੍ਚਜਿਤੁਂ ਗਹੇਤੁਂ ਵਾ ਅਰਹਤਿ. ਗੁਣਾਗੁਣਂ ਪਨ ਤਤ੍ਥ ਉਪਪਰਿਕ੍ਖਿਤ੍ਵਾ ਉਜ੍ਝਿਤਬ੍ਬਮੇਵ ਉਜ੍ਝਿਤੁਂ ਗਹੇਤਬ੍ਬਞ੍ਚ ਗਹੇਤੁਂ ਅਰਹਤਿ, ਤਸ੍ਮਾ ਚਕ੍ਖੁਮਾਸ੍ਸ ਯਥਾ ਅਨ੍ਧੋ ਚਕ੍ਖੁਮਾਪਿ ਸਮਾਨੋ ਉਜ੍ਝਿਤਬ੍ਬੇ ਦਿਟ੍ਠੇ ਅਨ੍ਧੋ ਯਥਾ ਅਸ੍ਸ ਅਪਸ੍ਸਨ੍ਤੋ ਵਿਯ ਭਵੇਯ੍ਯ, ਤਥਾ ਉਜ੍ਝਿਤਬ੍ਬੇ ਸੁਤੇ ਸੋਤਵਾਪਿ ਬਧਿਰੋ ਯਥਾ ਅਸ੍ਸ ਅਸੁਣਨ੍ਤੋ ਵਿਯ ਭਵੇਯ੍ਯ. ਪਞ੍ਞਵਾਸ੍ਸ ਯਥਾ ਮੂਗੋਤਿ ਵਿਚਾਰਣਪਞ੍ਞਾਯ ਪਞ੍ਞਵਾ ਵਚਨਕੁਸਲੋਪਿ ਅਵਤ੍ਤਬ੍ਬੇ ਮੂਗੋ ਵਿਯ ਭਵੇਯ੍ਯ. ਬਲਵਾ ਥਾਮਸਮ੍ਪਨ੍ਨੋਪਿ ਅਕਤ੍ਤਬ੍ਬੇ ਦੁਬ੍ਬਲੋਰਿਵ, ਰਕਾਰੋ ਪਦਸਨ੍ਧਿਕਰੋ, ਅਸਮਤ੍ਥੋ ਵਿਯ ਭਵੇਯ੍ਯ. ਅਥ ਅਤ੍ਥੇ ਸਮੁਪ੍ਪਨ੍ਨੇ, ਸਯੇਥ ਮਤਸਾਯਿਕਨ੍ਤਿ ਅਤ੍ਤਨਾ ਕਾਤਬ੍ਬਕਿਚ੍ਚੇ ਉਪ੍ਪਨ੍ਨੇ ਉਪਟ੍ਠਿਤੇ ਮਤਸਾਯਿਕਂ ਸਯੇਥ, ਮਤਸਾਯਿਕਂ ਸਯਿਤ੍ਵਾਪਿ ਤਂ ਕਿਚ੍ਚਂ ਤੀਰੇਤਬ੍ਬਮੇਵ, ਨ ਵਿਰਾਧੇਤਬ੍ਬਂ. ਅਥ ਵਾ ਅਥ ਅਤ੍ਥੇ ਸਮੁਪ੍ਪਨ੍ਨੇਤਿ ਅਤ੍ਤਨਾ ਅਕਰਣੀਯੇ ਅਤ੍ਥੇ ਕਿਚ੍ਚੇ ਉਪ੍ਪਨ੍ਨੇ ਉਪਟ੍ਠਿਤੇ ਮਤਸਾਯਿਕਂ ਸਯੇਥ, ਮਤਸਾਯਿਕਂ ਸਯਿਤ੍ਵਾਪਿ ਤਂ ਨ ਕਾਤਬ੍ਬਮੇਵ. ਨ ਹਿ ਪਣ੍ਡਿਤੋ ਅਯੁਤ੍ਤਂ ਕਾਤੁਮਰਹਤੀਤਿ ਏਵਂ ਥੇਰੇਨ ਓਵਦਿਤੋ ਰਾਜਾ ਅਕਤ੍ਤਬ੍ਬਂ ਪਹਾਯ ਕਾਤਬ੍ਬੇਯੇਵ ਯੁਤ੍ਤਪ੍ਪਯੁਤ੍ਤੋ ਅਹੋਸੀਤਿ.

ਮਹਾਕਚ੍ਚਾਯਨਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

੨. ਸਿਰਿਮਿਤ੍ਤਤ੍ਥੇਰਗਾਥਾਵਣ੍ਣਨਾ

ਅਕ੍ਕੋਧਨੋਤਿਆਦਿਕਾ ਆਯਸ੍ਮਤੋ ਸਿਰਿਮਿਤ੍ਤਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਮਹਦ੍ਧਨਕੁਟੁਮ੍ਬਿਕਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਸਿਰਿਮਿਤ੍ਤੋਤਿ ਲਦ੍ਧਨਾਮੋ. ਤਸ੍ਸ ਕਿਰ ਮਾਤਾ ਸਿਰਿਗੁਤ੍ਤਸ੍ਸ ਭਗਿਨੀ. ਤਸ੍ਸ ਵਤ੍ਥੁ ਧਮ੍ਮਪਦਵਣ੍ਣਨਾਯਂ (ਧ. ਪ. ਅਟ੍ਠ. ੧.ਗਰਹਦਿਨ੍ਨਵਤ੍ਥੁ) ਆਗਤਮੇਵ. ਸੋ ਸਿਰਿਗੁਤ੍ਤਸ੍ਸ ਭਾਗਿਨੇਯ੍ਯੋ ਸਿਰਿਮਿਤ੍ਤੋ ਵਯਪ੍ਪਤ੍ਤੋ ਸਤ੍ਥੁ ਧਨਪਾਲਦਮਨੇ ਲਦ੍ਧਪ੍ਪਸਾਦੋ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਤੋ. ਏਕਦਿਵਸਂ ਪਾਤਿਮੋਕ੍ਖਂ ਉਦ੍ਦਿਸਿਤੁਂ ਆਸਨਂ ਅਭਿਰੁਹਿਤ੍ਵਾ ਚਿਤ੍ਤਬੀਜਨਿਂ ਗਹੇਤ੍ਵਾ ਨਿਸਿਨ੍ਨੋ ਭਿਕ੍ਖੂਨਂ ਧਮ੍ਮਂ ਕਥੇਸਿ. ਕਥੇਨ੍ਤੋ ਚ ਉਲ਼ਾਰਤਰੇ ਗੁਣੇ ਵਿਭਜਿਤ੍ਵਾ ਦਸ੍ਸੇਨ੍ਤੋ –

੫੦੨. ‘‘ਅਕ੍ਕੋਧਨੋਨੁਪਨਾਹੀ, ਅਮਾਯੋ ਰਿਤ੍ਤਪੇਸੁਣੋ;

ਸ ਵੇ ਤਾਦਿਸਕੋ ਭਿਕ੍ਖੁ, ਏਵਂ ਪੇਚ੍ਚ ਨ ਸੋਚਤਿ.

੫੦੩. ‘‘ਅਕ੍ਕੋਧਨੋਨੁਪਨਾਹੀ, ਅਮਾਯੋ ਰਿਤ੍ਤਪੇਸੁਣੋ;

ਗੁਤ੍ਤਦ੍ਵਾਰੋ ਸਦਾ ਭਿਕ੍ਖੁ, ਏਵਂ ਪੇਚ੍ਚ ਨ ਸੋਚਤਿ.

੫੦੪. ‘‘ਅਕ੍ਕੋਧਨੋਨੁਪਨਾਹੀ, ਅਮਾਯੋ ਰਿਤ੍ਤਪੇਸੁਣੋ;

ਕਲ੍ਯਾਣਸੀਲੋ ਸੋ ਭਿਕ੍ਖੁ, ਏਵਂ ਪੇਚ੍ਚ ਨ ਸੋਚਤਿ.

੫੦੫. ‘‘ਅਕ੍ਕੋਧਨੋਨੁਪਨਾਹੀ, ਅਮਾਯੋ ਰਿਤ੍ਤਪੇਸੁਣੋ;

ਕਲ੍ਯਾਣਮਿਤ੍ਤੋ ਸੋ ਭਿਕ੍ਖੁ, ਏਵਂ ਪੇਚ੍ਚ ਨ ਸੋਚਤਿ.

੫੦੬. ‘‘ਅਕ੍ਕੋਧਨੋਨੁਪਨਾਹੀ, ਅਮਾਯੋ ਰਿਤ੍ਤਪੇਸੁਣੋ;

ਕਲ੍ਯਾਣਪਞ੍ਞੋ ਸੋ ਭਿਕ੍ਖੁ, ਏਵਂ ਪੇਚ੍ਚ ਨ ਸੋਚਤਿ.

੫੦੭. ‘‘ਯਸ੍ਸ ਸਦ੍ਧਾ ਤਥਾਗਤੇ, ਅਚਲਾ ਸੁਪ੍ਪਤਿਟ੍ਠਿਤਾ;

ਸੀਲਞ੍ਚ ਯਸ੍ਸ ਕਲ੍ਯਾਣਂ, ਅਰਿਯਕਨ੍ਤਂ ਪਸਂਸਿਤਂ.

੫੦੮. ‘‘ਸਙ੍ਘੇ ਪਸਾਦੋ ਯਸ੍ਸਤ੍ਥਿ, ਉਜੁਭੂਤਞ੍ਚ ਦਸ੍ਸਨਂ;

ਅਦਲਿਦ੍ਦੋਤਿ ਤਂ ਆਹੁ, ਅਮੋਘਂ ਤਸ੍ਸ ਜੀਵਿਤਂ.

੫੦੯. ‘‘ਤਸ੍ਮਾ ਸਦ੍ਧਞ੍ਚ ਸੀਲਞ੍ਚ, ਪਸਾਦਂ ਧਮ੍ਮਦਸ੍ਸਨਂ;

ਅਨੁਯੁਞ੍ਜੇਥ ਮੇਧਾਵੀ, ਸਰਂ ਬੁਦ੍ਧਾਨ ਸਾਸਨ’’ਨ੍ਤਿ. – ਇਮਾ ਗਾਥਾ ਅਭਾਸਿ;

ਤਤ੍ਥ ਅਕ੍ਕੋਧਨੋਤਿ ਅਕੁਜ੍ਝਨਸੀਲੋ. ਉਪਟ੍ਠਿਤੇ ਹਿ ਕੋਧੁਪ੍ਪਤ੍ਤਿਨਿਮਿਤ੍ਤੇ ਅਧਿਵਾਸਨਖਨ੍ਤਿਯਂ ਠਤ੍ਵਾ ਕੋਪਸ੍ਸ ਅਨੁਪ੍ਪਾਦਕੋ. ਅਨੁਪਨਾਹੀਤਿ ਨ ਉਪਨਾਹਕੋ, ਪਰੇਹਿ ਕਤਂ ਅਪਰਾਧਂ ਪਟਿਚ੍ਚ ‘‘ਅਕ੍ਕੋਚ੍ਛਿ ਮਂ ਅਵਧਿ ਮਂ, ਅਜਿਨਿ ਮਂ ਅਹਾਸਿ ਮੇ’’ਤਿਆਦਿਨਾ (ਧ. ਪ. ੩; ਮਹਾਵ. ੪੬੪; ਮ. ਨਿ. ੩.੨੩੭) ਕੋਧਸ੍ਸ ਅਨੁਪਨਯ੍ਹਨਸੀਲੋ. ਸਨ੍ਤਦੋਸਪਟਿਚ੍ਛਾਦਨਲਕ੍ਖਣਾਯ ਮਾਯਾਯ ਅਭਾਵਤੋ ਅਮਾਯੋ. ਪਿਸੁਣਵਾਚਾਵਿਰਹਿਤਤੋ ਰਿਤ੍ਤਪੇਸੁਣੋ, ਸ ਵੇ ਤਾਦਿਸਕੋ ਭਿਕ੍ਖੂਤਿ ਸੋ ਤਥਾਰੂਪੋ ਤਥਾਜਾਤਿਕੋ ਯਥਾਵੁਤ੍ਤਗੁਣਸਮਨ੍ਨਾਗਤੋ ਭਿਕ੍ਖੁ. ਏਵਂ ਯਥਾਵੁਤ੍ਤਪਟਿਪਤ੍ਤਿਯਾ ਪੇਚ੍ਚ ਪਰਲੋਕੇ ਨ ਸੋਚਤਿ ਸੋਕਨਿਮਿਤ੍ਤਸ੍ਸ ਅਭਾਵਤੋ. ਚਕ੍ਖੁਦ੍ਵਾਰਾਦਯੋ ਕਾਯਦ੍ਵਾਰਾਦਯੋ ਚ ਗੁਤ੍ਤਾ ਪਿਹਿਤਾ ਸਂਵੁਤਾ ਏਤਸ੍ਸਾਤਿ ਗੁਤ੍ਤਦ੍ਵਾਰੋ. ਕਲ੍ਯਾਣਸੀਲੋਤਿ ਸੁਨ੍ਦਰਸੀਲੋ ਸੁਵਿਸੁਦ੍ਧਸੀਲੋ. ਕਲ੍ਯਾਣਮਿਤ੍ਤੋਤਿ –

‘‘ਪਿਯੋ ਗਰੁਭਾਵਨਿਯੋ, ਵਤ੍ਤਾ ਚ ਵਚਨਕ੍ਖਮੋ;

ਗਮ੍ਭੀਰਞ੍ਚ ਕਥਂ ਕਤ੍ਤਾ, ਨੋ ਚਟ੍ਠਾਨੇ ਨਿਯੋਜਯੇ’’ਤਿ. (ਅ. ਨਿ. ੭.੩੭) –

ਏਵਂ ਵਿਭਾਵਿਤਲਕ੍ਖਣੋ ਕਲ੍ਯਾਣਮਿਤ੍ਤੋ ਏਤਸ੍ਸਾਤਿ ਕਲ੍ਯਾਣਮਿਤ੍ਤੋ. ਕਲ੍ਯਾਣਪਞ੍ਞੋਤਿ ਸੁਨ੍ਦਰਪਞ੍ਞੋ. ਯਦਿਪਿ ਪਞ੍ਞਾ ਨਾਮ ਅਸੁਨ੍ਦਰਾ ਨਤ੍ਥਿ, ਨਿਯ੍ਯਾਨਿਕਾਯ ਪਨ ਪਞ੍ਞਾਯ ਵਸੇਨ ਏਵਂ ਵੁਤ੍ਤਂ

ਏਵਮੇਤ੍ਥ ਕੋਧਾਦੀਨਂ ਵਿਕ੍ਖਮ੍ਭਨਵਸੇਨ ਸਮੁਚ੍ਛੇਦਵਸੇਨ ਚ ਅਕ੍ਕੋਧਨਾਦਿਮੁਖੇਨ, ਪੁਗ੍ਗਲਾਧਿਟ੍ਠਾਨਾਯ ਗਾਥਾਯ ਸਮ੍ਮਾਪਟਿਪਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਨਿਪ੍ਫਤ੍ਤਿਤਲੋਕੁਤ੍ਤਰਸਦ੍ਧਾਦਿਕੇ ਉਦ੍ਧਰਿਤ੍ਵਾ ਪੁਗ੍ਗਲਾਧਿਟ੍ਠਾਨਾਯ ਏਵ ਗਾਥਾਯ ਸਮ੍ਮਾਪਟਿਪਤ੍ਤਿਂ ਦਸ੍ਸੇਨ੍ਤੋ ‘‘ਯਸ੍ਸ ਸਦ੍ਧਾ’’ਤਿਆਦਿਮਾਹ. ਤਸ੍ਸਤ੍ਥੋ – ਯਸ੍ਸ ਪੁਗ੍ਗਲਸ੍ਸ ਤਥਾਗਤੇ ਸਮ੍ਮਾਸਮ੍ਬੁਦ੍ਧੇ ‘‘ਇਤਿਪਿ ਸੋ ਭਗਵਾ’’ਤਿਆਦਿਨਯਪ੍ਪਵਤ੍ਤਾ ਮਗ੍ਗੇਨਾਗਤਸਦ੍ਧਾ, ਤਤੋ ਏਵ ਅਚਲਾ ਅਵਿਕਮ੍ਪਾ ਸੁਟ੍ਠੁ ਪਤਿਟ੍ਠਿਤਾ. ‘‘ਅਤ੍ਥੀ’’ਤਿ, ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਅਰਿਯਕਨ੍ਤਨ੍ਤਿ ਅਰਿਯਾਨਂ ਕਨ੍ਤਂ ਪਿਯਾਯਿਤਂ ਭਵਨ੍ਤਰੇਪਿ ਅਵਿਜਹਨਤੋ. ਪਸਂਸਿਤਨ੍ਤਿ ਬੁਦ੍ਧਾਦੀਹਿ ਪਸਟ੍ਠਂ, ਵਣ੍ਣਿਤਂ ਥੋਮਿਤਂ ਅਤ੍ਥੀਤਿ ਯੋਜਨਾ. ਤਂ ਪਨੇਤਂ ਸੀਲਂ ਗਹਟ੍ਠਸੀਲਂ ਪਬ੍ਬਜਿਤਸੀਲਨ੍ਤਿ ਦੁਵਿਧਂ. ਤਤ੍ਥ ਗਹਟ੍ਠਸੀਲਂ ਨਾਮ ਪਞ੍ਚਸਿਕ੍ਖਾਪਦਸੀਲਂ, ਯਂ ਗਹਟ੍ਠੇਨ ਰਕ੍ਖਿਤੁਂ ਸਕ੍ਕਾ. ਪਬ੍ਬਜਿਤਸੀਲਂ ਨਾਮ ਦਸਸਿਕ੍ਖਾਪਦਸੀਲਂ ਉਪਾਦਾਯ ਸਬ੍ਬਂ ਚਤੁਪਾਰਿਸੁਦ੍ਧਿਸੀਲਂ, ਤਯਿਦਂ ਸਬ੍ਬਮ੍ਪਿ ਅਖਣ੍ਡਾਦਿਭਾਵੇਨ ਅਪਰਾਮਟ੍ਠਤਾਯ ‘‘ਕਲ੍ਯਾਣ’’ਨ੍ਤਿ ਵੇਦਿਤਬ੍ਬਂ.

ਸਙ੍ਘੇ ਪਸਾਦੋ ਯਸ੍ਸਤ੍ਥੀਤਿ ‘‘ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’’ਤਿਆਦਿਨਾ ਅਰਿਯਸਙ੍ਘੇ ਪਸਾਦੋ ਸਦ੍ਧਾ ਯਸ੍ਸ ਪੁਗ੍ਗਲਸ੍ਸ ਅਤ੍ਥਿ ਅਚਲੋ ਸੁਪ੍ਪਤਿਟ੍ਠਿਤੋਤਿ ਆਨੇਤ੍ਵਾ ਯੋਜੇਤਬ੍ਬਂ. ਉਜੁਭੂਤਞ੍ਚ ਦਸ੍ਸਨਨ੍ਤਿ ਦਿਟ੍ਠਿਵਙ੍ਕਾਭਾਵਤੋ ਕਿਲੇਸਵਙ੍ਕਾਭਾਵਤੋ ਚ ਉਜੁਭੂਤਂ. ਅਕੁਟਿਲਂ ਅਜਿਮ੍ਹਂ ਕਮ੍ਮਸ੍ਸਕਤਾਦਸ੍ਸਨਞ੍ਚੇਵ ਸਪ੍ਪਚ੍ਚਯਨਾਮਰੂਪਦਸ੍ਸਨਞ੍ਚਾਤਿ ਦੁਵਿਧਮ੍ਪਿ ਦਸ੍ਸਨਂ ਯਸ੍ਸ ਅਤ੍ਥਿ ਅਚਲਂ ਸੁਪ੍ਪਤਿਟ੍ਠਿਤਨ੍ਤਿ ਯੋਜਨਾ. ਅਦਲਿਦ੍ਦੋਤਿ ਤਂ ਆਹੁ ਸਦ੍ਧਾਧਨਂ, ਸੀਲਧਨਂ, ਸੁਤਧਨਂ, ਚਾਗਧਨਂ, ਪਞ੍ਞਾਧਨਨ੍ਤਿ ਇਮੇਸਂ ਸੁਵਿਸੁਦ੍ਧਾਨਂ ਧਨਾਨਂ ਅਤ੍ਥਿਤਾਯ ‘‘ਅਦਲਿਦ੍ਦੋ’’ਤਿ ਤਂ ਤਾਦਿਸਂ ਪੁਗ੍ਗਲਂ ਬੁਦ੍ਧਾਦਯੋ ਅਰਿਯਾ ਆਹੁ. ਅਮੋਘਂ ਤਸ੍ਸ ਜੀਵਿਤਂ ਤਸ੍ਸ ਤਥਾਰੂਪਸ੍ਸ ਜੀਵਿਤਂ ਦਿਟ੍ਠਧਮ੍ਮਿਕਾਦਿਅਤ੍ਥਾਧਿਗਮੇਨ ਅਮੋਘਂ ਅਵਞ੍ਝਂ ਸਫਲਮੇਵਾਤਿ ਆਹੂਤਿ ਅਤ੍ਥੋ.

ਤਸ੍ਮਾਤਿ, ਯਸ੍ਮਾ ਯਥਾਵੁਤ੍ਤਸਦ੍ਧਾਦਿਗੁਣਸਮਨ੍ਨਾਗਤੋ ਪੁਗ੍ਗਲੋ ‘‘ਅਦਲਿਦ੍ਦੋ ਅਮੋਘਜੀਵਿਤੋ’’ਤਿ ਵੁਚ੍ਚਤਿ, ਤਸ੍ਮਾ ਅਹਮ੍ਪਿ ਤਥਾਰੂਪੋ ਭਵੇਯ੍ਯਨ੍ਤਿ. ਸਦ੍ਧਞ੍ਚ…ਪੇ… ਸਾਸਨਨ੍ਤਿ ‘‘ਸਬ੍ਬਪਾਪਸ੍ਸ ਅਕਰਣ’’ਨ੍ਤਿਆਦਿਨਾ (ਧ. ਪ. ੧੮੩; ਦੀ. ਨਿ. ੨.੯੦) ਵੁਤ੍ਤਂ ਬੁਦ੍ਧਾਨਂ ਸਾਸਨਂ ਅਨੁਸ੍ਸਰਨ੍ਤੋ ਕੁਲਪੁਤ੍ਤੋ ਵੁਤ੍ਤਪ੍ਪਭੇਦਂ ਸਦ੍ਧਞ੍ਚੇਵ ਸੀਲਞ੍ਚ ਧਮ੍ਮਦਸ੍ਸਨਹੇਤੁਕਂ ਧਮ੍ਮੇ ਸੁਨਿਚ੍ਛਯਾ ਵਿਮੋਕ੍ਖਭੂਤਂ ਪਸਾਦਞ੍ਚ ਅਨੁਯੁਞ੍ਜੇਯ੍ਯ ਵਡ੍ਢੇਯ੍ਯਾਤਿ.

ਏਵਂ ਥੇਰੋ ਭਿਕ੍ਖੂਨਂ ਧਮ੍ਮਦੇਸਨਾਮੁਖੇਨ ਅਤ੍ਤਨਿ ਵਿਜ੍ਜਮਾਨੇ ਗੁਣੇ ਪਕਾਸੇਨ੍ਤੋ ਅਞ੍ਞਂ ਬ੍ਯਾਕਾਸਿ.

ਸਿਰਿਮਿਤ੍ਤਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

੩. ਮਹਾਪਨ੍ਥਕਤ੍ਥੇਰਗਾਥਾਵਣ੍ਣਨਾ

ਯਦਾ ਪਠਮਮਦ੍ਦਕ੍ਖਿਨ੍ਤਿਆਦਿਕਾ ਆਯਸ੍ਮਤੋ ਮਹਾਪਨ੍ਥਕਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਂ ਕਿਰ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਵਿਭਵਸਮ੍ਪਨ੍ਨੋ ਕੁਟੁਮ੍ਬਿਯੋ ਹੁਤ੍ਵਾ ਏਕਦਿਵਸਂ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਸਞ੍ਞਾਵਿਵਟ੍ਟਕੁਸਲਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਯਮ੍ਪਿ ਤਂ ਠਾਨਨ੍ਤਰਂ ਪਤ੍ਥੇਨ੍ਤੋ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ, ‘‘ਭਨ੍ਤੇ, ਯਂ ਭਿਕ੍ਖੁਂ ਤੁਮ੍ਹੇ ਇਤੋ ਸਤ੍ਤਦਿਵਸਮਤ੍ਥਕੇ – ‘ਸਞ੍ਞਾਵਿਵਟ੍ਟਕੁਸਲਾਨਂ ਅਯਂ ਮਮ ਸਾਸਨੇ ਅਗ੍ਗੋ’ਤਿ ਏਤਦਗ੍ਗੇ ਠਪਯਿਤ੍ਥ, ਅਹਮ੍ਪਿ ਇਮਸ੍ਸ ਅਧਿਕਾਰਕਮ੍ਮਸ੍ਸ ਬਲੇਨ ਸੋ ਭਿਕ੍ਖੁ ਵਿਯ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਸਾਸਨੇ ਅਗ੍ਗੋ ਭਵੇਯ੍ਯ’’ਨ੍ਤਿ ਪਤ੍ਥਨਂ ਅਕਾਸਿ. ਕਨਿਟ੍ਠਭਾਤਾ ਪਨਸ੍ਸ ਤਥੇਵ ਭਗਵਤਿ ਅਧਿਕਾਰਕਮ੍ਮਂ ਕਤ੍ਵਾ ਮਨੋਮਯਸ੍ਸ ਕਾਯਸ੍ਸਾਭਿਨਿਮ੍ਮਾਨਂ ਚੇਤੋਵਿਵਟ੍ਟਕੋਸਲ੍ਲਨ੍ਤਿ ਦ੍ਵਿਨ੍ਨਂ ਅਙ੍ਗਾਨਂ ਵਸੇਨ ਵੁਤ੍ਤਨਯੇਨੇਵ ਪਣਿਧਾਨਂ ਅਕਾਸਿ. ਭਗਵਾ ਦ੍ਵਿਨ੍ਨਮ੍ਪਿ ਪਤ੍ਥਨਂ ਅਨਨ੍ਤਰਾਯੇਨ ਸਮਿਜ੍ਝਨਭਾਵਂ ਦਿਸ੍ਵਾ ‘‘ਅਨਾਗਤੇ ਕਪ੍ਪਸਤਸਹਸ੍ਸਮਤ੍ਥਕੇ ਗੋਤਮਸ੍ਸ ਨਾਮ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨੇ ਤੁਮ੍ਹਾਕਂ ਪਤ੍ਥਨਾ ਸਮਿਜ੍ਝਿਸ੍ਸਤੀ’’ਤਿ ਬ੍ਯਾਕਾਸਿ.

ਤੇ ਉਭੋਪਿ ਜਨਾ ਤਤ੍ਥ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਂਸੁ. ਤਤ੍ਥ ਮਹਾਪਨ੍ਥਕਸ੍ਸ ਅਨ੍ਤਰਾਕਤਂ ਕਲ੍ਯਾਣਧਮ੍ਮਂ ਨ ਕਥੀਯਤਿ. ਚੂਲ਼ਪਨ੍ਥਕੋ ਪਨ ਕਸ੍ਸਪਸ੍ਸ ਭਗਵਤੋ ਸਾਸਨੇ ਪਬ੍ਬਜਿਤ੍ਵਾ ਵੀਸਤਿ ਵਸ੍ਸਸਹਸ੍ਸਾਨਿ ਓਦਾਤਕਸਿਣਕਮ੍ਮਂ ਕਤ੍ਵਾ ਦੇਵਪੁਰੇ ਨਿਬ੍ਬਤ੍ਤਿ. ਅਪਦਾਨੇ ਪਨ ‘‘ਚੂਲ਼ਪਨ੍ਥਕੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਤਾਪਸੋ ਹੁਤ੍ਵਾ ਹਿਮਵਨ੍ਤੇ ਵਸਨ੍ਤੋ ਤਤ੍ਥ ਭਗਵਨ੍ਤਂ ਦਿਸ੍ਵਾ ਪੁਪ੍ਫਚ੍ਛਤ੍ਤੇਨ ਪੂਜਂ ਅਕਾਸੀ’’ਤਿ ਆਗਤਂ. ਤੇਸਂ ਦੇਵਮਨੁਸ੍ਸੇਸੁ ਸਂਸਰਨ੍ਤਾਨਂਯੇਵ ਕਪ੍ਪਸਤਸਹਸ੍ਸਂ ਅਤਿਕ੍ਕਨ੍ਤਂ. ਅਥ ਅਮ੍ਹਾਕਂ ਸਤ੍ਥਾ ਅਭਿਸਮ੍ਬੋਧਿਂ ਪਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਰਾਜਗਹਂ ਉਪਨਿਸ੍ਸਾਯ ਵੇਲ਼ੁਵਨੇ ਮਹਾਵਿਹਾਰੇ ਵਿਹਰਤਿ.

ਤੇਨ ਚ ਸਮਯੇਨ ਰਾਜਗਹੇ ਧਨਸੇਟ੍ਠਿਸ੍ਸ ਧੀਤਾ ਅਤ੍ਤਨੋ ਦਾਸੇਨ ਸਦ੍ਧਿਂ ਸਨ੍ਥਵਂ ਕਤ੍ਵਾ ਞਾਤਕੇਹਿ ਭੀਤਾ ਹਤ੍ਥਸਾਰਂ ਗਹੇਤ੍ਵਾ ਤੇਨ ਸਦ੍ਧਿਂ ਪਲਾਯਿਤ੍ਵਾ ਅਞ੍ਞਤ੍ਥ ਵਸਨ੍ਤੀ ਤਂ ਪਟਿਚ੍ਚ ਗਬ੍ਭਂ ਲਭਿਤ੍ਵਾ ਪਰਿਪਕ੍ਕਗਬ੍ਭਾ ‘‘ਞਾਤਿਘਰਂ ਗਨ੍ਤ੍ਵਾ ਵਿਜਾਯਿਸ੍ਸਾਮੀ’’ਤਿ ਗਚ੍ਛਨ੍ਤੀ ਅਨ੍ਤਰਾਮਗ੍ਗੇਯੇਵ ਪੁਤ੍ਤਂ ਵਿਜਾਯਿਤ੍ਵਾ ਸਾਮਿਨਾ ਨਿਵਤ੍ਤਿਤਾ ਪੁਬ੍ਬੇ ਵਸਿਤਟ੍ਠਾਨੇ ਵਸਨ੍ਤੀ ਪੁਤ੍ਤਸ੍ਸ ਪਨ੍ਥੇ ਜਾਤਤ੍ਤਾ ਪਨ੍ਥਕੋਤਿ, ਨਾਮਂ ਅਕਾਸਿ. ਤਸ੍ਮਿਂ ਆਧਾਵਿਤ੍ਵਾ ਵਿਧਾਵਿਤ੍ਵਾ ਵਿਚਰਣਕਾਲੇ ਤਮੇਵ ਪਟਿਚ੍ਚ ਦੁਤਿਯਂ ਗਬ੍ਭਂ ਪਟਿਲਭਿਤ੍ਵਾ ਪਰਿਪਕ੍ਕਗਬ੍ਭਾ ਪੁਬ੍ਬੇ ਵੁਤ੍ਤਨਯੇਨੇਵ ਅਨ੍ਤਰਾਮਗ੍ਗੇ ਪੁਤ੍ਤਂ ਵਿਜਾਯਿਤ੍ਵਾ ਸਾਮਿਨਾ ਨਿਵਤ੍ਤਿਤਾ ਜੇਟ੍ਠਪੁਤ੍ਤਸ੍ਸ ਮਹਾਪਨ੍ਥਕੋਤਿ ਕਨਿਟ੍ਠਸ੍ਸ ਚੂਲ਼ਪਨ੍ਥਕੋਤਿ ਨਾਮਂ ਕਤ੍ਵਾ ਯਥਾਵਸਿਤਟ੍ਠਾਨੇਯੇਵ ਵਸਨ੍ਤੀ ਅਨੁਕ੍ਕਮੇਨ ਦਾਰਕੇਸੁ ਵਡ੍ਢਨ੍ਤੇਸੁ ਤੇਹਿ, ‘‘ਅਮ੍ਮ, ਅਯ੍ਯਕਕੁਲਂ ਨੋ ਦਸ੍ਸੇਹੀ’’ਤਿ ਨਿਬੁਨ੍ਧਿਯਮਾਨਾ ਦਾਰਕੇ ਮਾਤਾਪਿਤੂਨਂ ਸਨ੍ਤਿਕਂ ਪੇਸੇਸਿ. ਤਤੋ ਪਟ੍ਠਾਯ ਦਾਰਕਾ ਧਨਸੇਟ੍ਠਿਨੋ ਗੇਹੇ ਵਡ੍ਢਨ੍ਤਿ. ਤੇਸੁ ਚੂਲ਼ਪਨ੍ਥਕੋ ਅਤਿਦਹਰੋ. ਮਹਾਪਨ੍ਥਕੋ ਪਨ ਅਯ੍ਯਕੇਨ ਸਦ੍ਧਿਂ ਭਗਵਤੋ ਸਨ੍ਤਿਕਂ ਗਤੋ ਸਤ੍ਥਾਰਂ ਦਿਸ੍ਵਾ ਸਹ ਦਸ੍ਸਨੇਨ ਪਟਿਲਦ੍ਧਸਦ੍ਧੋ ਧਮ੍ਮਂ ਸੁਤ੍ਵਾ ਉਪਨਿਸ੍ਸਯਸਮ੍ਪਨ੍ਨਤਾਯ ਪਬ੍ਬਜਿਤੁਕਾਮੋ ਹੁਤ੍ਵਾ ਪਿਤਾਮਹਂ ਆਪੁਚ੍ਛਿ. ਸੋ ਸਤ੍ਥੁ ਤਮਤ੍ਥਂ ਆਰੋਚੇਤ੍ਵਾ ਤਂ ਪਬ੍ਬਾਜੇਸਿ. ਸੋ ਪਬ੍ਬਜਿਤ੍ਵਾ ਬਹੁਂ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਪਰਿਪੁਣ੍ਣਵਸ੍ਸੋ ਉਪਸਮ੍ਪਜ੍ਜਿਤ੍ਵਾ ਯੋਨਿਸੋਮਨਸਿਕਾਰੇ ਕਮ੍ਮਂ ਕਰੋਨ੍ਤੋ ਵਿਸੇਸਤੋ ਚਤੁਨ੍ਨਂ ਅਰੂਪਜ੍ਝਾਨਾਨਂ ਲਾਭੀ ਹੁਤ੍ਵਾ ਤਤੋ ਵੁਟ੍ਠਾਯ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਹਤ੍ਤਂ ਪਾਪੁਣਿ. ਇਤਿ ਸੋ ਸਞ੍ਞਾਵਿਵਟ੍ਟਕੁਸਲਾਨਂ ਅਗ੍ਗੋ ਜਾਤੋ. ਸੋ ਝਾਨਸੁਖੇਨ ਫਲਸੁਖੇਨ ਵੀਤਿਨਾਮੇਨ੍ਤੋ ਏਕਦਿਵਸਂ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਅਧਿਗਤਸਮ੍ਪਤ੍ਤਿਂ ਪਟਿਚ੍ਚ ਸਞ੍ਜਾਤਸੋਮਨਸ੍ਸੋ ਸੀਹਨਾਦਂ ਨਦਨ੍ਤੋ –

੫੧੦. ‘‘ਯਦਾ ਪਠਮਮਦ੍ਦਕ੍ਖਿਂ, ਸਤ੍ਥਾਰਮਕੁਤੋਭਯਂ;

ਤਤੋ ਮੇ ਅਹੁ ਸਂਵੇਗੋ, ਪਸ੍ਸਿਤ੍ਵਾ ਪੁਰਿਸੁਤ੍ਤਮਂ.

੫੧੧. ‘‘ਸਿਰਿਂ ਹਤ੍ਥੇਹਿ ਪਾਦੇਹਿ, ਯੋ ਪਣਾਮੇਯ੍ਯ ਆਗਤਂ;

ਏਤਾਦਿਸਂ ਸੋ ਸਤ੍ਥਾਰਂ, ਆਰਾਧੇਤ੍ਵਾ ਵਿਰਾਧਯੇ.

੫੧੨. ‘‘ਤਦਾਹਂ ਪੁਤ੍ਤਦਾਰਞ੍ਚ, ਧਨਧਞ੍ਞਞ੍ਚ ਛਡ੍ਡਯਿਂ;

ਕੇਸਮਸ੍ਸੂਨਿ ਛੇਦੇਤ੍ਵਾ, ਪਬ੍ਬਜਿਂ ਅਨਗਾਰਿਯਂ.

੫੧੩. ‘‘ਸਿਕ੍ਖਾਸਾਜੀਵਸਮ੍ਪਨ੍ਨੋ, ਇਨ੍ਦ੍ਰਿਯੇਸੁ ਸੁਸਂਵੁਤੋ;

ਨਮਸ੍ਸਮਾਨੋ ਸਮ੍ਬੁਦ੍ਧਂ, ਵਿਹਾਸਿਂ ਅਪਰਾਜਿਤੋ.

੫੧੪. ‘‘ਤਤੋ ਮੇ ਪਣਿਧੀ ਆਸਿ, ਚੇਤਸੋ ਅਭਿਪਤ੍ਥਿਤੋ;

ਨ ਨਿਸੀਦੇ ਮੁਹੁਤ੍ਤਮ੍ਪਿ, ਤਣ੍ਹਾਸਲ੍ਲੇ ਅਨੂਹਤੇ.

੫੧੫. ‘‘ਤਸ੍ਸ ਮੇਵਂ ਵਿਹਰਤੋ, ਪਸ੍ਸ ਵੀਰਿਯਪਰਕ੍ਕਮਂ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੫੧੬. ‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਅਰਹਾ ਦਕ੍ਖਿਣੇਯ੍ਯੋਮ੍ਹਿ, ਵਿਪ੍ਪਮੁਤ੍ਤੋ ਨਿਰੂਪਧਿ.

੫੧੭. ‘‘ਤਤੋ ਰਤ੍ਯਾਵਿਵਸਾਨੇ, ਸੂਰਿਯੁਗ੍ਗਮਨਂ ਪਤਿ;

ਸਬ੍ਬਂ ਤਣ੍ਹਂ ਵਿਸੋਸੇਤ੍ਵਾ, ਪਲ੍ਲਙ੍ਕੇਨ ਉਪਾਵਿਸਿ’’ਨ੍ਤਿ. – ਇਮਾ ਗਾਥਾ ਅਭਾਸਿ;

ਤਤ੍ਥ ਯਦਾਤਿ ਯਸ੍ਮਿਂ ਕਾਲੇ. ਪਠਮਨ੍ਤਿ ਆਦਿਤੋ. ਅਦ੍ਦਕ੍ਖਿਨ੍ਤਿ ਪਸ੍ਸਿਂ, ਸਤ੍ਥਾਰਨ੍ਤਿ, ਭਗਵਨ੍ਤਂ. ਅਕੁਤੋਭਯਨ੍ਤਿ ਨਿਬ੍ਭਯਂ. ਅਯਞ੍ਹੇਤ੍ਥ ਅਤ੍ਥੋ – ਸਬ੍ਬੇਸਂ ਭਯਹੇਤੂਨਂ ਬੋਧਿਮੂਲੇਯੇਵ ਪਹੀਨਤ੍ਤਾ ਕੁਤੋਚਿਪਿ ਭਯਾਭਾਵਤੋ ਅਕੁਤੋਭਯਂ ਨਿਬ੍ਭਯਂ, ਚਤੁਵੇਸਾਰਜ੍ਜਵਿਸਾਰਦਂ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥੇਹਿ ਵੇਨੇਯ੍ਯਾਨਂ ਯਥਾਰਹਮਨੁਸਾਸਨਤੋ ਸਤ੍ਥਾਰਂ ਸਮ੍ਮਾਸਮ੍ਬੁਦ੍ਧਂ ਮਯ੍ਹਂ ਪਿਤਾਮਹੇਨ ਸਦ੍ਧਿਂ ਗਨ੍ਤ੍ਵਾ ਯਾਯ ਵੇਲਾਯ ਸਬ੍ਬਪਠਮਂ ਪਸ੍ਸਿਂ, ਤਂ ਪੁਰਿਸੁਤ੍ਤਮਂ ਸਦੇਵਕੇ ਲੋਕੇ ਅਗ੍ਗਪੁਗ੍ਗਲਂ ਪਸ੍ਸਿਤ੍ਵਾ ਤਤੋ ਦਸ੍ਸਨਹੇਤੁ ਤਤੋ ਦਸ੍ਸਨਤੋ ਪਚ੍ਛਾ ‘‘ਏਤ੍ਤਕਂ ਕਾਲਂ ਸਤ੍ਥਾਰਂ ਦਟ੍ਠੁਂ ਧਮ੍ਮਞ੍ਚ ਸੋਤੁਂ ਨਾਲਤ੍ਥ’’ਨ੍ਤਿ ਮਯ੍ਹਂ ਸਂਵੇਗੋ ਅਹੁ ਸਹੋਤ੍ਤਪ੍ਪਂ ਞਾਣਂ ਉਪ੍ਪਜ੍ਜਿ. ਉਪ੍ਪਨ੍ਨਸਂਵੇਗੋ ਪਨਾਹਂ ਏਵਂ ਚਿਨ੍ਤੇਸਿਨ੍ਤਿ ਦਸ੍ਸੇਤਿ ਸਿਰਿਂ ਹਤ੍ਥੇਹੀਤਿ ਗਾਥਾਯ. ਤਸ੍ਸਤ੍ਥੋ – ਯੋ ਵਿਭਵਤ੍ਥਿਕੋ ਪੁਰਿਸੋ ‘‘ਉਪਟ੍ਠਾਯਿਕੋ ਹੁਤ੍ਵਾ ਤਵ ਸਨ੍ਤਿਕੇ ਵਸਿਸ੍ਸਾਮੀ’’ਤਿ ਸਵਿਗ੍ਗਹਂ ਸਿਰਿਂ ਸਯਨੇ ਉਪਗਤਂ ਹਤ੍ਥੇਹਿ ਚ ਪਾਦੇਹਿ ਚ ਕੋਟ੍ਟੇਨ੍ਤੋ ਪਣਾਮੇਯ੍ਯ ਨੀਹਰੇਯ੍ਯ, ਸੋ ਤਥਾਰੂਪੋ ਅਲਕ੍ਖਿਕਪੁਰਿਸੋ ਏਤਾਦਿਸਂ ਸਤ੍ਥਾਰਂ ਸਮ੍ਮਾਸਮ੍ਬੁਦ੍ਧਂ ਆਰਾਧੇਤ੍ਵਾ ਇਮਸ੍ਮਿਂ ਨਵਮੇ ਖਣੇ ਪਟਿਲਭਿਤ੍ਵਾ ਵਿਰਾਧਯੇ ਤਸ੍ਸ ਓਵਾਦਾਕਰਣੇਨ ਤਂ ਵਿਰਜ੍ਝੇਯ੍ਯ, ਅਹਂ ਪਨੇਵਂ ਨ ਕਰੋਮੀਤਿ ਅਧਿਪ੍ਪਾਯੋ. ਤੇਨਾਹ ‘‘ਤਦਾਹਂ…ਪੇ… ਅਨਗਾਰਿਯ’’ਨ੍ਤਿ. ਤਤ੍ਥ ਛਡ੍ਡਯਿਨ੍ਤਿ, ਪਜਹਿਂ. ‘‘ਛਡ੍ਡਿਯ’’ਨ੍ਤਿਪਿ ਪਾਠੋ. ਨਨੁ ਅਯਂ ਥੇਰੋ ਦਾਰਪਰਿਗ੍ਗਹਂ ਅਕਤ੍ਵਾਵ ਪਬ੍ਬਜਿਤੋ, ਸੋ ਕਸ੍ਮਾ ‘‘ਪੁਤ੍ਤਦਾਰਞ੍ਚ ਛਡ੍ਡਯਿ’’ਨ੍ਤਿ ਅਵੋਚਾਤਿ? ਯਥਾ ਨਾਮ ਪੁਰਿਸੋ ਅਨਿਬ੍ਬਤ੍ਤਫਲਮੇਵ ਰੁਕ੍ਖਂ ਛਿਨ੍ਦਨ੍ਤੋ ਅਚ੍ਛਿਨ੍ਨੇ ਤਤੋ ਲਦ੍ਧਫਲੇਹਿ ਪਰਿਹੀਨੋ ਨਾਮ ਹੋਤਿ. ਏਵਂਸਮ੍ਪਦਮਿਦਂ ਦਟ੍ਠਬ੍ਬਂ.

ਸਿਕ੍ਖਾਸਾਜੀਵਸਮਾਪਨ੍ਨੋਤਿ ਯਾ ਅਧਿਸੀਲਸਿਕ੍ਖਾ, ਤਾਯ ਚ, ਯਤ੍ਥ ਭਿਕ੍ਖੂ ਸਹ ਜੀਵਨ੍ਤਿ, ਏਕਜੀਵਿਕਾ ਸਭਾਗਵੁਤ੍ਤਿਨੋ ਹੋਨ੍ਤਿ, ਤੇਨ ਭਗਵਤਾ ਪਞ੍ਞਤ੍ਤਸਿਕ੍ਖਾਪਦਸਙ੍ਖਾਤੇਨ ਸਾਜੀਵੇਨ ਚ ਸਮਨ੍ਨਾਗਤੋ ਸਿਕ੍ਖਨਭਾਵੇਨ ਸਮਙ੍ਗੀਭੂਤੋ, ਸਿਕ੍ਖਂ ਪਰਿਪੂਰੇਨ੍ਤੋ ਸਾਜੀਵਞ੍ਚ ਅਵੀਤਿਕ੍ਕਮਨ੍ਤੋ ਹੁਤ੍ਵਾ ਤਦੁਭਯਂ ਸਮ੍ਪਾਦੇਨ੍ਤੋਤਿ ਅਤ੍ਥੋ. ਤੇਨ ਸੁਵਿਸੁਦ੍ਧੇ ਪਾਤਿਮੋਕ੍ਖੇ ਸੀਲੇ ਪਤਿਟ੍ਠਿਤਭਾਵਂ ਦਸ੍ਸੇਤਿ. ਇਨ੍ਦ੍ਰਿਯੇਸੁ ਸੁਸਂਵੁਤੋਤਿ ਮਨਚ੍ਛਟ੍ਠੇਸੁ ਇਨ੍ਦ੍ਰਿਯੇਸੁ ਸੁਟ੍ਠੁ ਸਂਵੁਤੋ. ਰੂਪਾਦਿਵਿਸਯੇਸੁ ਉਪ੍ਪਜ੍ਜਨਕਾਨਂ ਅਭਿਜ੍ਝਾਦੀਨਂ ਪਵਤ੍ਤਿਨਿਵਾਰਣਵਸੇਨ ਸਤਿਕਵਾਟੇਨ ਸੁਪਿਹਿਤਚਕ੍ਖਾਦਿਦ੍ਵਾਰੋਤਿ ਅਤ੍ਥੋ. ਏਵਂ ਪਾਤਿਮੋਕ੍ਖਸਂਵਰਇਨ੍ਦ੍ਰਿਯਸਂਵਰਸੀਲਸਮ੍ਪਤ੍ਤਿਦਸ੍ਸਨੇਨ ਇਤਰਸੀਲਮ੍ਪਿ ਅਤ੍ਥਤੋ ਦਸ੍ਸਿਤਮੇਵ ਹੋਤੀਤਿ ਥੇਰੋ ਅਤ੍ਤਨੋ ਚਤੁਪਾਰਿਸੁਦ੍ਧਿਸੀਲਸਮ੍ਪਦਂ ਦਸ੍ਸੇਤ੍ਵਾ ‘‘ਨਮਸ੍ਸਮਾਨੋ ਸਮ੍ਬੁਦ੍ਧ’’ਨ੍ਤਿ ਇਮਿਨਾ ਬੁਦ੍ਧਾਨੁਸ੍ਸਤਿਭਾਵਨਾਨੁਯੋਗਮਾਹ. ਵਿਹਾਸਿਂ ਅਪਰਾਜਿਤੋਤਿ ਕਿਲੇਸਮਾਰਾਦੀਹਿ ਅਪਰਾਜਿਤੋ ਏਵ ਹੁਤ੍ਵਾ ਵਿਹਰਿਂ, ਯਾਵ ਅਰਹਤ੍ਤਪ੍ਪਤ੍ਤਿ, ਤਾਵ ਤੇਹਿ ਅਨਭਿਭੂਤੋ, ਅਞ੍ਞਦਤ੍ਥੁ ਤੇ ਅਭਿਭਵਨ੍ਤੋ ਏਵ ਵਿਹਾਸਿਨ੍ਤਿ ਅਤ੍ਥੋ.

ਤਤੋਤਿ ਤਸ੍ਮਾ, ਯਸ੍ਮਾ ਸੁਵਿਸੁਦ੍ਧਸੀਲੋ ਸਤ੍ਥਰਿ ਅਭਿਪ੍ਪਸਨ੍ਨੋ ਕਿਲੇਸਾਭਿਭਵਨਪਟਿਪਤ੍ਤਿਯਞ੍ਚ ਠਿਤੋ, ਤਸ੍ਮਾ. ਪਣਿਧੀਤਿ ਪਣਿਧਾਨਂ. ਤਤੋ ਵਾ ਚਿਤ੍ਤਾਭਿਨੀਹਾਰੋ. ਆਸੀਤਿ ਅਹੋਸਿ. ਚੇਤਸੋ ਅਭਿਪਤ੍ਥਿਤੋਤਿ, ਮਮ ਚਿਤ੍ਤੇਨ ਇਚ੍ਛਿਤੋ. ਕੀਦਿਸੋ ਪਨ ਸੋਤਿ ਆਹ ‘‘ਨ ਨਿਸੀਦੇ ਮੁਹੁਤ੍ਤਮ੍ਪਿ, ਤਣ੍ਹਾਸਲ੍ਲੇ ਅਨੂਹਤੇ’’ਤਿ. ‘‘ਅਗ੍ਗਮਗ੍ਗਸਣ੍ਡਾਸੇਨ ਮਮ ਹਦਯਤੋ ਤਣ੍ਹਾਸਲ੍ਲੇ ਅਨੁਦ੍ਧਟੇ ਮੁਹੁਤ੍ਤਮ੍ਪਿ ਨ ਨਿਸੀਦੇ, ਨਿਸਜ੍ਜਂ ਨ ਕਪ੍ਪੇਯ੍ਯ’’ਨ੍ਤਿ ਏਵਂ ਮੇ ਚਿਤ੍ਤਾਭਿਨੀਹਾਰੋ ਅਹੋਸੀਤਿ ਅਤ੍ਥੋ.

ਏਵਂ ਪਨ ਚਿਤ੍ਤਂ ਅਧਿਟ੍ਠਾਯ ਭਾਵਨਂ ਭਾਵਯਿਤ੍ਵਾ ਠਾਨਚਙ੍ਕਮੇਹੇਵ ਰਤ੍ਤਿਂ ਵੀਤਿਨਾਮੇਨ੍ਤੋ ਅਰੂਪਸਮਾਪਤ੍ਤਿਤੋ ਵੁਟ੍ਠਾਯ ਝਾਨਙ੍ਗਮੁਖੇਨ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਸਚ੍ਛਾਕਾਸਿ. ਤੇਨ ਵੁਤ੍ਤਂ ‘‘ਤਸ੍ਸ ਮੇ’’ਤਿਆਦਿ. ਨਿਰੂਪਧੀਤਿ ਕਿਲੇਸੁਪਧਿਆਦੀਨਂ ਅਭਾਵੇਨ ਨਿਰੁਪਧਿ. ਰਤ੍ਯਾਵਿਵਸਾਨੇਤਿ ਰਤ੍ਤਿਭਾਗਸ੍ਸ ਵਿਗਮਨੇ ਵਿਭਾਤਾਯ ਰਤ੍ਤਿਯਾ. ਸੂਰਿਯੁਗ੍ਗਮਨਂ ਪਤੀਤਿ ਸੂਰਿਯੁਗ੍ਗਮਨਂ ਲਕ੍ਖਣਂ ਕਤ੍ਵਾ. ਸਬ੍ਬਂ ਤਣ੍ਹਨ੍ਤਿ ਕਾਮਤਣ੍ਹਾਦਿਭੇਦਂ ਸਬ੍ਬਂ ਤਣ੍ਹਾਸੋਤਂ ਅਗ੍ਗਮਗ੍ਗੇਨ ਵਿਸੋਸੇਤ੍ਵਾ ਸੁਕ੍ਖਾਪੇਤ੍ਵਾ ‘‘ਤਣ੍ਹਾਸਲ੍ਲੇ ਅਨੂਹਤੇ ਨ ਨਿਸੀਦੇ’’ਤਿ, ਪਟਿਞ੍ਞਾਯ ਮੋਚਿਤਤ੍ਤਾ. ਪਲ੍ਲਙ੍ਕੇਨ ਉਪਾਵਿਸਿਨ੍ਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸੀਦਿਨ੍ਤਿ. ਸੇਸਂ ਉਤ੍ਤਾਨਤ੍ਥਮੇਵ.

ਮਹਾਪਨ੍ਥਕਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

ਅਟ੍ਠਕਨਿਪਾਤਵਣ੍ਣਨਾ ਨਿਟ੍ਠਿਤਾ.