੪. ਸੋਪਾਕਤ੍ਥੇਰਗਾਥਾਵਣ੍ਣਨਾ

ਦਿਸ੍ਵਾ ਪਾਸਾਦਛਾਯਾਯਨ੍ਤਿਆਦਿਕਾ ਆਯਸ੍ਮਤੋ ਸੋਪਾਕਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਬ੍ਰਾਹ੍ਮਣਾਨਂ ਵਿਜ੍ਜਾਸਿਪ੍ਪੇਸੁ ਨਿਪ੍ਫਤ੍ਤਿਂ ਗਤੋ ਕਾਮੇਸੁ ਆਦੀਨਵਂ ਦਿਸ੍ਵਾ ਘਰਾਵਾਸਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਏਕਸ੍ਮਿਂ ਪਬ੍ਬਤੇ ਵਿਹਰਤਿ. ਸਤ੍ਥਾ ਆਸਨ੍ਨਮਰਣਂ ਤਂ ਞਤ੍ਵਾ ਤਸ੍ਸ ਸਨ੍ਤਿਕਂ ਅਗਮਾਸਿ. ਸੋ ਭਗਵਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤੋ ਉਲ਼ਾਰਂ ਪੀਤਿਸੋਮਨਸ੍ਸਂ ਪਵੇਦੇਨ੍ਤੋ ਪੁਪ੍ਫਮਯਂ ਆਸਨਂ ਪਞ੍ਞਪੇਤ੍ਵਾ ਅਦਾਸਿ. ਸਤ੍ਥਾ ਤਤ੍ਥ ਨਿਸੀਦਿਤ੍ਵਾ, ਅਨਿਚ੍ਚਤਾਪਟਿਸਂਯੁਤ੍ਤਂ ਧਮ੍ਮਿਂ ਕਥਂ ਕਥੇਤ੍ਵਾ ਤਸ੍ਸ ਪਸ੍ਸਨ੍ਤਸ੍ਸੇਵ ਆਕਾਸੇਨ ਅਗਮਾਸਿ. ਸੋ ਪੁਬ੍ਬੇ ਗਹਿਤਂ ਨਿਚ੍ਚਗ੍ਗਾਹਂ ਪਹਾਯ ਅਨਿਚ੍ਚਸਞ੍ਞਂ ਹਦਯੇ ਠਪੇਤ੍ਵਾ, ਕਾਲਙ੍ਕਤ੍ਵਾ, ਦੇਵਲੋਕੇ ਉਪ੍ਪਜਿਤ੍ਵਾ, ਅਪਰਾਪਰਂ ਦੇਵਮਨੁਸ੍ਸੇਸੁ ਸਂਸਰਨ੍ਤੋ, ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਸੋਪਾਕਯੋਨਿਯਂ ਨਿਬ੍ਬਤ੍ਤਿ. ਸੋ ਜਾਤਿਆਗਤੇਨ ਸੋਪਾਕੋਤਿ ਨਾਮੇਨ ਪਞ੍ਞਾਯਿ. ਕੇਚਿ ਪਨ ‘‘ਵਾਣਿਜਕੁਲੇ ਨਿਬ੍ਬਤ੍ਤੋ, ‘ਸੋਪਾਕੋ’ਤਿ ਪਨ ਨਾਮਮਤ੍ਤ’’ਨ੍ਤਿ ਵਦਨ੍ਤਿ. ਤਂ ਅਪਦਾਨਪਾਲ਼ਿਯਾ ਵਿਰੁਜ੍ਝਤਿ ‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਸੋਪਾਕਯੋਨੁਪਾਗਮਿ’’ਨ੍ਤਿ ਵਚਨਤੋ.

ਤਸ੍ਸ ਚਤੁਮਾਸਜਾਤਸ੍ਸ ਪਿਤਾ ਕਾਲਮਕਾਸਿ, ਚੂਲ਼ਪਿਤਾ ਪੋਸੇਸਿ. ਅਨੁਕ੍ਕਮੇਨ ਸਤ੍ਤਵਸ੍ਸਿਕੋ ਜਾਤੋ. ਏਕਦਿਵਸਂ ਚੂਲ਼ਪਿਤਾ ‘‘ਅਤ੍ਤਨੋ ਪੁਤ੍ਤੇਨ ਕਲਹਂ ਕਰੋਤੀ’’ਤਿ ਕੁਜ੍ਝਿਤ੍ਵਾ, ਤਂ ਸੁਸਾਨਂ ਨੇਤ੍ਵਾ, ਦ੍ਵੇ ਹਤ੍ਥੇ ਰਜ੍ਜੁਯਾ ਏਕਤੋ ਬਨ੍ਧਿਤ੍ਵਾ, ਤਾਯ ਏਵ ਰਜ੍ਜੁਯਾ ਮਤਮਨੁਸ੍ਸਸ੍ਸ ਸਰੀਰੇ ਗਾਲ਼੍ਹਂ ਬਨ੍ਧਿਤ੍ਵਾ ਗਤੋ ‘‘ਸਿਙ੍ਗਾਲਾਦਯੋ ਖਾਦਨ੍ਤੂ’’ਤਿ. ਪਚ੍ਛਿਮਭਵਿਕਤਾਯ ਦਾਰਕਸ੍ਸ ਪੁਞ੍ਞਫਲੇਨ ਸਯਂ ਮਾਰੇਤੁਂ ਨ ਵਿਸਹਿ, ਸਿਙ੍ਗਾਲਾਦਯੋਪਿ ਨ ਅਭਿਭਵਿਂਸੁ. ਦਾਰਕੋ ਅਡ੍ਢਰਤ੍ਤਸਮਯੇ ਏਵਂ ਵਿਪ੍ਪਲਪਤਿ –

‘‘ਕਾ ਗਤਿ ਮੇ ਅਗਤਿਸ੍ਸ, ਕੋ ਵਾ ਬਨ੍ਧੁ ਅਬਨ੍ਧੁਨੋ;

ਸੁਸਾਨਮਜ੍ਝੇ ਬਨ੍ਧਸ੍ਸ, ਕੋ ਮੇ ਅਭਯਦਾਯਕੋ’’ਤਿ.

ਸਤ੍ਥਾ ਤਾਯ ਵੇਲਾਯ ਵੇਨੇਯ੍ਯਬਨ੍ਧਵੇ ਓਲੋਕੇਨ੍ਤੋ ਦਾਰਕਸ੍ਸ ਹਦਯਬ੍ਭਨ੍ਤਰੇ ਪਜ੍ਜਲਨ੍ਤਂ ਅਰਹਤ੍ਤੂਪਨਿਸ੍ਸਯਂ ਦਿਸ੍ਵਾ ਓਭਾਸਂ ਫਰਿਤ੍ਵਾ ਸਤਿਂ ਜਨੇਤ੍ਵਾ ਏਵਮਾਹ –

‘‘ਏਹਿ ਸੋਪਾਕ ਮਾ ਭਾਯਿ, ਓਲੋਕਸ੍ਸੁ ਤਥਾਗਤਂ;

ਅਹਂ ਤਂ ਤਾਰਯਿਸ੍ਸਾਮਿ, ਰਾਹੁਮੁਖੇਵ ਚਨ੍ਦਿਮ’’ਨ੍ਤਿ.

ਦਾਰਕੋ ਬੁਦ੍ਧਾਨੁਭਾਵੇਨ ਛਿਨ੍ਨਬਨ੍ਧਨੋ ਗਾਥਾਪਰਿਯੋਸਾਨੇ ਸੋਤਾਪਨ੍ਨੋ ਹੁਤ੍ਵਾ ਗਨ੍ਧਕੁਟਿਸਮ੍ਮੁਖੇ ਅਟ੍ਠਾਸਿ. ਤਸ੍ਸ ਮਾਤਾ ਪੁਤ੍ਤਂ ਅਪਸ੍ਸਨ੍ਤੀ ਚੂਲ਼ਪਿਤਰਂ ਪੁਚ੍ਛਿਤ੍ਵਾ ਤੇਨਸ੍ਸ ਪਵਤ੍ਤਿਯਾ ਅਕਥਿਤਾਯ ਤਤ੍ਥ ਤਤ੍ਥ ਗਨ੍ਤ੍ਵਾ ਵਿਚਿਨਨ੍ਤੀ ‘‘ਬੁਦ੍ਧਾ ਕਿਰ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਜਾਨਨ੍ਤਿ, ਯਂਨੂਨਾਹਂ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਮਮ ਪੁਤ੍ਤਸ੍ਸ ਪਵਤ੍ਤਿਂ ਜਾਨੇਯ੍ਯ’’ਨ੍ਤਿ ਸਤ੍ਥੁ ਸਨ੍ਤਿਕਂ ਅਗਮਾਸਿ. ਸਤ੍ਥਾ, ਇਦ੍ਧਿਯਾ ਤਂ ਪਟਿਚ੍ਛਾਦੇਤ੍ਵਾ, ‘‘ਭਨ੍ਤੇ, ਮਮ ਪੁਤ੍ਤਂ ਨ ਪਸ੍ਸਾਮਿ, ਅਪਿਚ ਭਗਵਾ ਤਸ੍ਸ ਪਵਤ੍ਤਿਂ ਜਾਨਾਤੀ’’ਤਿ ਤਾਯ ਪੁਟ੍ਠੋ –

‘‘ਨ ਸਨ੍ਤਿ ਪੁਤ੍ਤਾ ਤਾਣਾਯ, ਨ ਪਿਤਾ ਨਾਪਿ ਬਨ੍ਧਵਾ;

ਅਨ੍ਤਕੇਨਾਧਿਪਨ੍ਨਸ੍ਸ, ਨਤ੍ਥਿ ਞਾਤੀਸੁ ਤਾਣਤਾ’’ਤਿ. (ਧ. ਪ. ੨੮੮) –

ਧਮ੍ਮਂ ਕਥੇਸਿ. ਤਂ ਸੁਤ੍ਵਾ ਸਾ ਸੋਤਾਪਨ੍ਨਾ ਅਹੋਸਿ. ਦਾਰਕੋ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੨.੧੧੨-੧੨੩) –

‘‘ਪਬ੍ਭਾਰਂ ਸੋਧਯਨ੍ਤਸ੍ਸ, ਵਿਪਿਨੇ ਪਬ੍ਬਤੁਤ੍ਤਮੇ;

ਸਿਦ੍ਧਤ੍ਥੋ ਨਾਮ ਭਗਵਾ, ਆਗਚ੍ਛਿ ਮਮ ਸਨ੍ਤਿਕਂ.

‘‘ਬੁਦ੍ਧਂ ਉਪਗਤਂ ਦਿਸ੍ਵਾ, ਲੋਕਜੇਟ੍ਠਸ੍ਸ ਤਾਦਿਨੋ;

ਸਨ੍ਥਰਂ ਸਨ੍ਥਰਿਤ੍ਵਾਨ, ਪੁਪ੍ਫਾਸਨਮਦਾਸਹਂ.

‘‘ਪੁਪ੍ਫਾਸਨੇ ਨਿਸੀਦਿਤ੍ਵਾ, ਸਿਦ੍ਧਤ੍ਥੋ ਲੋਕਨਾਯਕੋ;

ਮਮਞ੍ਚ ਗਤਿਮਞ੍ਞਾਯ, ਅਨਿਚ੍ਚਤਮੁਦਾਹਰਿ.

‘‘ਅਨਿਚ੍ਚਾ ਵਤ ਸਙ੍ਖਾਰਾ, ਉਪ੍ਪਾਦਵਯਧਮ੍ਮਿਨੋ;

ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ, ਤੇਸਂ ਵੂਪਸਮੋ ਸੁਖੋ.

‘‘ਇਦਂ ਵਤ੍ਵਾਨ ਸਬ੍ਬਞ੍ਞੂ, ਲੋਕਜੇਟ੍ਠੋ ਨਰਾਸਭੋ;

ਨਭਂ ਅਬ੍ਭੁਗ੍ਗਮੀ ਵੀਰੋ, ਹਂਸਰਾਜਾਵ ਅਮ੍ਬਰੇ.

‘‘ਸਕਂ ਦਿਟ੍ਠਿਂ ਜਹਿਤ੍ਵਾਨ, ਭਾਵਯਾਨਿਚ੍ਚਸਞ੍ਞਹਂ;

ਏਕਾਹਂ ਭਾਵਯਿਤ੍ਵਾਨ, ਤਤ੍ਥ ਕਾਲਂ ਕਤੋ ਅਹਂ.

‘‘ਦ੍ਵੇ ਸਮ੍ਪਤ੍ਤੀ ਅਨੁਭੋਤ੍ਵਾ, ਸੁਕ੍ਕਮੂਲੇਨ ਚੋਦਿਤੋ;

ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਸਪਾਕਯੋਨੁਪਾਗਮਿਂ.

‘‘ਅਗਾਰਾ ਅਭਿਨਿਕ੍ਖਮ੍ਮ, ਪਬ੍ਬਜਿਂ ਅਨਗਾਰਿਯਂ;

ਜਾਤਿਯਾ ਸਤ੍ਤਵਸ੍ਸੋਹਂ, ਅਰਹਤ੍ਤਮਪਾਪੁਣਿਂ.

‘‘ਆਰਦ੍ਧਵੀਰਿਯੋ ਪਹਿਤਤ੍ਤੋ, ਸੀਲੇਸੁ ਸੁਸਮਾਹਿਤੋ;

ਤੋਸੇਤ੍ਵਾਨ ਮਹਾਨਾਗਂ, ਅਲਤ੍ਥਂ ਉਪਸਮ੍ਪਦਂ.

‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਦਾਨਸ੍ਸਿਦਂ ਫਲਂ.

‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਸਞ੍ਞਂ ਭਾਵਯਿਂ ਤਦਾ;

ਤਂ ਸਞ੍ਞਂ ਭਾਵਯਨ੍ਤਸ੍ਸ, ਪਤ੍ਤੋ ਮੇ ਆਸਵਕ੍ਖਯੋ.

‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਥ ਭਗਵਾ ਇਦ੍ਧਿਂ ਪਟਿਸਂਹਰਿ. ਸਾਪਿ ਪੁਤ੍ਤਂ ਦਿਸ੍ਵਾ ਹਟ੍ਠਤੁਟ੍ਠੋ ਤਸ੍ਸ ਖੀਣਾਸਵਭਾਵਂ ਸੁਤ੍ਵਾ ਪਬ੍ਬਾਜੇਤ੍ਵਾ ਗਤਾ. ਸੋ ਸਤ੍ਥਾਰਂ ਗਨ੍ਧਕੁਟਿਚ੍ਛਾਯਾਯਂ ਚਙ੍ਕਮਨ੍ਤਂ ਉਪਸਙ੍ਕਮਿਤ੍ਵਾ, ਵਨ੍ਦਿਤ੍ਵਾ ਅਨੁਚਙ੍ਕਮਿ. ਤਸ੍ਸ ਭਗਵਾ ਉਪਸਮ੍ਪਦਂ ਅਨੁਜਾਨਿਤੁਕਾਮੋ ‘‘ਏਕਂ ਨਾਮ ਕਿ’’ਨ੍ਤਿਆਦਿਨਾ ਦਸ ਪਞ੍ਹੇ ਪੁਚ੍ਛਿ. ਸੋਪਿ ਸਤ੍ਥੁ ਅਧਿਪ੍ਪਾਯਂ ਗਣ੍ਹਨ੍ਤੋ ਸਬ੍ਬਞ੍ਞੁਤਞ੍ਞਾਣੇਨ ਸਂਸਨ੍ਦੇਨ੍ਤੋ ‘‘ਸਬ੍ਬੇ ਸਤ੍ਤਾ ਆਹਾਰਟ੍ਠਿਤਿਕਾ’’ਤਿਆਦਿਨਾ (ਖੁ. ਪਾ. ੪.੧) ਤੇ ਪਞ੍ਹੇ ਵਿਸ੍ਸਜ੍ਜੇਸਿ. ਤੇਨੇਵ ਤੇ ਕੁਮਾਰਪਞ੍ਹਾ ਨਾਮ ਜਾਤਾ. ਸਤ੍ਥਾ ਤਸ੍ਸ ਪਞ੍ਹਬ੍ਯਾਕਰਣੇਨ ਆਰਾਧਿਤਚਿਤ੍ਤੋ ਉਪਸਮ੍ਪਦਂ ਅਨੁਜਾਨਿ. ਤੇਨ ਸਾ ਪਞ੍ਹਬ੍ਯਾਕਰਣੂਪਸਮ੍ਪਦਾ ਨਾਮ ਜਾਤਾ. ਤਸ੍ਸਿਮਂ ਅਤ੍ਤਨੋ ਪਵਤ੍ਤਿਂ ਪਕਾਸੇਤ੍ਵਾ ਥੇਰੋ ਅਞ੍ਞਂ ਬ੍ਯਾਕਰੋਨ੍ਤੋ –

੪੮੦. ‘‘ਦਿਸ੍ਵਾ ਪਾਸਾਦਛਾਯਾਯਂ, ਚਙ੍ਕਮਨ੍ਤਂ ਨਰੁਤ੍ਤਮਂ;

ਤਤ੍ਥ ਨਂ ਉਪਸਙ੍ਕਮ੍ਮ, ਵਨ੍ਦਿਸ੍ਸਂ ਪੁਰਿਸੁਤ੍ਤਮਂ.

੪੮੧. ‘‘ਏਕਂਸਂ ਚੀਵਰਂ ਕਤ੍ਵਾ, ਸਂਹਰਿਤ੍ਵਾਨ ਪਾਣਯੋ;

ਅਨੁਚਙ੍ਕਮਿਸ੍ਸਂ ਵਿਰਜਂ, ਸਬ੍ਬਸਤ੍ਤਾਨਮੁਤ੍ਤਮਂ.

੪੮੨. ‘‘ਤਤੋ ਪਞ੍ਹੇ ਅਪੁਚ੍ਛਿ ਮਂ, ਪਞ੍ਹਾਨਂ ਕੋਵਿਦੋ ਵਿਦੂ;

ਅਚ੍ਛਮ੍ਭੀ ਚ ਅਭੀਤੋ ਚ, ਬ੍ਯਾਕਾਸਿਂ ਸਤ੍ਥੁਨੋ ਅਹਂ.

੪੮੩. ‘‘ਵਿਸ੍ਸਜ੍ਜਿਤੇਸੁ ਪਞ੍ਹੇਸੁ, ਅਨੁਮੋਦਿ ਤਥਾਗਤੋ;

ਭਿਕ੍ਖੁਸਙ੍ਘਂ ਵਿਲੋਕੇਤ੍ਵਾ, ਇਮਮਤ੍ਥਂ ਅਭਾਸਥ.

੪੮੪. ‘‘‘ਲਾਭਾ ਅਙ੍ਗਾਨਂ ਮਗਧਾਨਂ, ਯੇਸਾਯਂ ਪਰਿਭੁਞ੍ਜਤਿ;

ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ;

ਪਚ੍ਚੁਟ੍ਠਾਨਞ੍ਚ ਸਾਮੀਚਿਂ, ਤੇਸਂ ਲਾਭਾ’ਤਿ ਚਾਬ੍ਰਵਿ.

੪੮੫. ‘‘‘ਅਜ੍ਜਦਗ੍ਗੇ ਮਂ ਸੋਪਾਕ, ਦਸ੍ਸਨਾਯੋਪਸਙ੍ਕਮ;

ਏਸਾ ਚੇਵ ਤੇ ਸੋਪਾਕ, ਭਵਤੁ ਉਪਸਮ੍ਪਦਾ’’’.

੪੮੬. ‘‘ਜਾਤਿਯਾ ਸਤ੍ਤਵਸ੍ਸੇਨ, ਲਦ੍ਧਾਨ ਉਪਸਮ੍ਪਦਂ;

ਧਾਰੇਮਿ ਅਨ੍ਤਿਮਂ ਦੇਹਂ, ਅਹੋ ਧਮ੍ਮਸੁਧਮ੍ਮਤਾ’’ਤਿ. – ਇਮਾ ਗਾਥਾ ਅਭਾਸਿ;

ਤਤ੍ਥ ਪਾਸਾਦਛਾਯਾਯਨ੍ਤਿ ਗਨ੍ਧਕੁਟਿਚ੍ਛਾਯਾਯਂ. ਵਨ੍ਦਿਸ੍ਸਨ੍ਤਿ, ਅਭਿਵਨ੍ਦਿਂ.

ਸਂਹਰਿਤ੍ਵਾਨ ਪਾਣਯੋਤਿ ਉਭੋ ਹਤ੍ਥੇ ਕਮਲਮਕੁਲ਼ਾਕਾਰੇਨ ਸਙ੍ਗਤੇ ਕਤ੍ਵਾ, ਅਞ੍ਜਲਿਂ ਪਗ੍ਗਹੇਤ੍ਵਾਤਿ ਅਤ੍ਥੋ. ਅਨੁਚਙ੍ਕਮਿਸ੍ਸਨ੍ਤਿ ਚਙ੍ਕਮਨ੍ਤਸ੍ਸ ਸਤ੍ਥੁਨੋ ਅਨੁਪਚ੍ਛਤੋ ਅਨੁਗਮਨਵਸੇਨ ਚਙ੍ਕਮਿਂ. ਵਿਰਜਨ੍ਤਿ ਵਿਗਤਰਾਗਾਦਿਰਜਂ.

ਪਞ੍ਹੇਤਿ ਕੁਮਾਰਪਞ੍ਹੇ. ਵਿਦੂਤਿ ਵੇਦਿਤਬ੍ਬਂ ਵਿਦਿਤਵਾ, ਸਬ੍ਬਞ੍ਞੂਤਿ ਅਤ੍ਥੋ. ‘‘ਸਤ੍ਥਾ ਮਂ ਪੁਚ੍ਛਤੀ’’ਤਿ ਉਪ੍ਪਜ੍ਜਨਕਸ੍ਸ ਛਮ੍ਭਿਤਤ੍ਤਸ੍ਸ ਭਯਸ੍ਸ ਚ ਸੇਤੁਘਾਤੇਨ ਪਹੀਨਤ੍ਤਾ ਅਚ੍ਛਮ੍ਭੀ ਚ ਅਭੀਤੋ ਚ ਬ੍ਯਾਕਾਸਿ.

ਯੇਸਾਯਨ੍ਤਿ ਯੇਸਂ ਅਙ੍ਗਮਗਧਾਨਂ ਅਯਂ ਸੋਪਾਕੋ. ਪਚ੍ਚਯਨ੍ਤਿ ਗਿਲਾਨਪਚ੍ਚਯਂ. ਸਾਮੀਚਿਨ੍ਤਿ ਮਗ੍ਗਦਾਨਬੀਜਨਾਦਿਸਾਮੀਚਿਕਿਰਿਯਂ.

ਅਜ੍ਜਦਗ੍ਗੇਤਿ ਦ-ਕਾਰੋ ਪਦਸਨ੍ਧਿਕਰੋ, ਅਜ੍ਜ ਅਗ੍ਗੇ ਆਦਿਂ ਕਤ੍ਵਾ, ਅਜ੍ਜ ਪਟ੍ਠਾਯ. ‘‘ਅਜ੍ਜਤਗ੍ਗੇ’’ਤਿਪਿ ਪਾਲ਼ਿ, ਅਜ੍ਜਤਂ ਆਦਿਂ ਕਤ੍ਵਾਤਿ ਅਤ੍ਥੋ. ਦਸ੍ਸਨਾਯੋਪਸਙ੍ਕਮਾਤਿ ‘‘ਹੀਨਜਚ੍ਚੋ, ਵਯਸਾ ਤਰੁਣਤਰੋ’’ਤਿ ਵਾ ਅਚਿਨ੍ਤੇਤ੍ਵਾ ਦਸ੍ਸਨਾਯ ਮਂ ਉਪਸਙ੍ਕਮ. ਏਸਾ ਚੇਵਾਤਿ ਯਾ ਤਸ੍ਸ ਮਮ ਸਬ੍ਬਞ੍ਞੁਤਞ੍ਞਾਣੇਨ ਸਦ੍ਧਿਂ ਸਂਸਨ੍ਦੇਤ੍ਵਾ ਕਤਾ ਪਞ੍ਹਵਿਸ੍ਸਜ੍ਜਨਾ. ਏਸਾਯੇਵ ਤੇ ਭਵਤੁ ਉਪਸਮ੍ਪਦਾ ਇਤਿ ਚ ਅਬ੍ਰਵੀਤਿ ਯੋਜਨਾ. ‘‘ਲਦ੍ਧਾ ਮੇ ਉਪਸਮ੍ਪਦਾ’’ਤਿਪਿ ਪਾਲ਼ਿ. ਯੇ ਪਨ ‘‘ਲਦ੍ਧਾਨ ਉਪਸਮ੍ਪਦ’’ਨ੍ਤਿਪਿ ਪਠਨ੍ਤਿ, ਤੇਸਂ ਸਤ੍ਤਵਸ੍ਸੇਨਾਤਿ ਸਤ੍ਤਮੇਨ ਵਸ੍ਸੇਨਾਤਿ ਅਤ੍ਥੋ, ਸਤ੍ਤਵਸ੍ਸੇਨ ਵਾ ਹੁਤ੍ਵਾਤਿ ਵਚਨਸੇਸੋ. ਯਂ ਪਨੇਤ੍ਥ ਅਵੁਤ੍ਤਂ, ਤਂ ਸੁਵਿਞ੍ਞੇਯ੍ਯਮੇਵ.

ਸੋਪਾਕਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.