੮. ਵਕ੍ਕਲਿਤ੍ਥੇਰਗਾਥਾਵਣ੍ਣਨਾ

ਵਾਤਰੋਗਾਭਿਨੀਤੋਤਿਆਦਿਕਾ ਆਯਸ੍ਮਤੋ ਵਕ੍ਕਲਿਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਸਤ੍ਥੁ ਸਨ੍ਤਿਕਂ ਗਚ੍ਛਨ੍ਤੇਹਿ ਉਪਾਸਕੇਹਿ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਪਰਿਸਪਰਿਯਨ੍ਤੇ ਠਿਤੋ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਸਦ੍ਧਾਧਿਮੁਤ੍ਤਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਯਮ੍ਪਿ ਤਂ ਠਾਨਂ ਪਤ੍ਥੇਨ੍ਤੋ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ਪਣਿਧਾਨਂ ਅਕਾਸਿ. ਸਤ੍ਥਾ ਤਸ੍ਸ ਅਨਨ੍ਤਰਾਯਤਂ ਦਿਸ੍ਵਾ ਬ੍ਯਾਕਰਿ.

ਸੋਪਿ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਮ੍ਹਾਕਂ ਸਤ੍ਥੁ ਕਾਲੇ ਸਾਵਤ੍ਥਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ, ਵਕ੍ਕਲੀਤਿਸ੍ਸ ਨਾਮਂ ਅਕਂਸੁ. ਸੋ ਵੁਦ੍ਧਿਪ੍ਪਤ੍ਤੋ ਤਯੋ ਵੇਦੇ ਉਗ੍ਗਣ੍ਹਿਤ੍ਵਾ ਬ੍ਰਾਹ੍ਮਣਸਿਪ੍ਪੇਸੁ ਨਿਪ੍ਫਤ੍ਤਿਂ ਗਤੋ ਸਤ੍ਥਾਰਂ ਦਿਸ੍ਵਾ ਰੂਪਕਾਯਸ੍ਸ ਸਮ੍ਪਤ੍ਤਿਦਸ੍ਸਨੇਨ ਅਤਿਤ੍ਤੋ ਸਤ੍ਥਾਰਾ ਸਦ੍ਧਿਂਯੇਵ ਵਿਚਰਤਿ. ‘‘ਅਗਾਰਮਜ੍ਝੇ ਵਸਨ੍ਤੋ ਨਿਚ੍ਚਕਾਲਂ ਸਤ੍ਥਾਰਂ ਦਟ੍ਠੁਂ ਨ ਲਭਿਸ੍ਸਾਮੀ’’ਤਿ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਠਪੇਤ੍ਵਾ ਭੋਜਨਵੇਲਂ ਸਰੀਰਕਿਚ੍ਚਕਾਲਞ੍ਚ ਸੇਸਕਾਲੇ ਯਤ੍ਥ ਠਿਤੇਨ ਸਕ੍ਕਾ ਦਸਬਲਂ ਪਸ੍ਸਿਤੁਂ, ਤਤ੍ਥ ਠਿਤੋ ਅਞ੍ਞਂ ਕਿਚ੍ਚਂ ਪਹਾਯ ਭਗਵਨ੍ਤਂ ਓਲੋਕੇਨ੍ਤੋਵ ਵਿਹਰਤਿ. ਸਤ੍ਥਾ ਤਸ੍ਸ ਞਾਣਪਰਿਪਾਕਂ ਆਗਮੇਨ੍ਤੋ ਬਹੁਕਾਲਂ ਤਸ੍ਮਿਂ ਰੂਪਦਸ੍ਸਨੇਨੇਵ ਵਿਚਰਨ੍ਤੇ ਕਿਞ੍ਚਿ ਅਵਤ੍ਵਾ ਪੁਨੇਕਦਿਵਸਂ ‘‘ਕਿਂ ਤੇ, ਵਕ੍ਕਲਿ, ਇਮਿਨਾ ਪੂਤਿਕਾਯੇਨ ਦਿਟ੍ਠੇਨ? ਯੋ ਖੋ, ਵਕ੍ਕਲਿ, ਧਮ੍ਮਂ ਪਸ੍ਸਤਿ, ਸੋ ਮਂ ਪਸ੍ਸਤਿ. ਯੋ ਮਂ ਪਸ੍ਸਤਿ, ਸੋ ਧਮ੍ਮਂ ਪਸ੍ਸਤਿ. ਧਮ੍ਮਞ੍ਹਿ, ਵਕ੍ਕਲਿ, ਪਸ੍ਸਨ੍ਤੋ ਮਂ ਪਸ੍ਸਤਿ, ਮਂ ਪਸ੍ਸਨ੍ਤੋ ਧਮ੍ਮਂ ਪਸ੍ਸਤੀ’’ਤਿ (ਸਂ. ਨਿ. ੩.੮੭) ਆਹ.

ਸਤ੍ਥਰਿ ਏਵਂ ਵਦਨ੍ਤੇਪਿ ਥੇਰੋ ਸਤ੍ਥੁ ਦਸ੍ਸਨਂ ਪਹਾਯ ਅਞ੍ਞਤ੍ਥ ਗਨ੍ਤੁਂ ਨ ਸਕ੍ਕੋਤਿ. ਤਤੋ ਸਤ੍ਥਾ ‘‘ਨਾਯਂ ਭਿਕ੍ਖੁ ਸਂਵੇਗਂ ਅਲਭਿਤ੍ਵਾ ਬੁਜ੍ਝਿਸ੍ਸਤੀ’’ਤਿ ਵਸ੍ਸੂਪਨਾਯਿਕਦਿਵਸੇ ‘‘ਅਪੇਹਿ, ਵਕ੍ਕਲੀ’’ਤਿ ਥੇਰਂ ਪਣਾਮੇਸਿ. ਸੋ ਸਤ੍ਥਾਰਾ ਪਣਾਮਿਤੋ ਸਮ੍ਮੁਖੇ ਠਾਤੁਂ ਅਸਕ੍ਕੋਨ੍ਤੋ ‘‘ਕਿਂ ਮਯ੍ਹਂ ਜੀਵਿਤੇਨ, ਯੋਹਂ ਸਤ੍ਥਾਰਂ ਦਟ੍ਠੁਂ ਨ ਲਭਾਮੀ’’ਤਿ ਗਿਜ੍ਝਕੂਟਪਬ੍ਬਤੇ ਪਪਾਤਟ੍ਠਾਨਂ ਅਭਿਰੁਹਿ. ਸਤ੍ਥਾ ਤਸ੍ਸ ਤਂ ਪਵਤ੍ਤਿਂ ਞਤ੍ਵਾ ‘‘ਅਯਂ ਭਿਕ੍ਖੁ ਮਮ ਸਨ੍ਤਿਕਾ ਅਸ੍ਸਾਸਂ ਅਲਭਨ੍ਤੋ ਮਗ੍ਗਫਲਾਨਂ ਉਪਨਿਸ੍ਸਯਂ ਨਾਸੇਯ੍ਯਾ’’ਤਿ ਅਤ੍ਤਾਨਂ ਦਸ੍ਸੇਤੁਂ ਓਭਾਸਂ ਵਿਸ੍ਸਜ੍ਜੇਨ੍ਤੋ –

‘‘ਪਾਮੋਜ੍ਜਬਹੁਲੋ ਭਿਕ੍ਖੁ, ਪਸਨ੍ਨੋ ਬੁਦ੍ਧਸਾਸਨੇ;

ਅਧਿਗਚ੍ਛੇ ਪਦਂ ਸਨ੍ਤਂ, ਸਙ੍ਖਾਰੂਪਸਮਂ ਸੁਖ’’ਨ੍ਤਿ. (ਧ. ਪ. ੩੮੧) –

ਗਾਥਂ ਵਤ੍ਵਾ ‘‘ਏਹਿ, ਵਕ੍ਕਲੀ’’ਤਿ ਹਤ੍ਥਂ ਪਸਾਰੇਸਿ. ਥੇਰੋ ‘‘ਦਸਬਲੋ ਮੇ ਦਿਟ੍ਠੋ, ‘ਏਹੀ’ਤਿ ਅਵ੍ਹਾਨਮ੍ਪਿ ਲਦ੍ਧ’’ਨ੍ਤਿ ਬਲਵਪੀਤਿਸੋਮਨਸ੍ਸਂ ਉਪ੍ਪਾਦੇਤ੍ਵਾ ‘‘ਕੁਤੋ ਆਗਚ੍ਛਾਮੀ’’ਤਿ ਅਤ੍ਤਨੋ ਗਮਨਭਾਵਂ ਅਜਾਨਿਤ੍ਵਾ ਸਤ੍ਥੁ ਸਮ੍ਮੁਖੇ ਆਕਾਸੇ ਪਕ੍ਖਨ੍ਦਨ੍ਤੋ ਪਠਮਪਾਦੇਨ ਪਬ੍ਬਤੇ ਠਿਤੋਯੇਵ ਸਤ੍ਥਾਰਾ ਵੁਤ੍ਤਗਾਥਂ ਆਵਜ੍ਜੇਨ੍ਤੋ ਆਕਾਸੇਯੇਵ ਪੀਤਿਂ ਵਿਕ੍ਖਮ੍ਭੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣੀਤਿ ਅਙ੍ਗੁਤ੍ਤਰਟ੍ਠਕਥਾਯਂ (ਅ. ਨਿ. ਅਟ੍ਠ. ੧.੧.੨੦੮) ਧਮ੍ਮਪਦਵਣ੍ਣਨਾਯਞ੍ਚ (ਧ. ਪ. ਅਟ੍ਠ. ੨.੩੮੧) ਆਗਤਂ.

ਇਧ ਪਨ ਏਵਂ ਵਦਨ੍ਤਿ – ‘‘ਕਿਂ ਤੇ, ਵਕ੍ਕਲੀ’’ਤਿਆਦਿਨਾ ਸਤ੍ਥਾਰਾ ਓਵਦਿਤੋ ਗਿਜ੍ਝਕੂਟੇ ਵਿਹਰਨ੍ਤੋ ਵਿਪਸ੍ਸਨਂ ਪਟ੍ਠਪੇਸਿ, ਤਸ੍ਸ ਸਦ੍ਧਾਯ ਬਲਵਭਾਵਤੋ ਏਵ ਵਿਪਸ੍ਸਨਾ ਵੀਥਿਂ ਨ ਓਤਰਤਿ, ਭਗਵਾ ਤਂ ਞਤ੍ਵਾ ਕਮ੍ਮਟ੍ਠਾਨਂ ਸੋਧੇਤ੍ਵਾ ਅਦਾਸਿ. ਪੁਨ ਵਿਪਸ੍ਸਨਂ ਮਤ੍ਥਕਂ ਪਾਪੇਤੁਂ ਨਾਸਕ੍ਖਿਯੇਵ, ਅਥਸ੍ਸ ਆਹਾਰਵੇਕਲ੍ਲੇਨ ਵਾਤਾਬਾਧੋ ਉਪ੍ਪਜ੍ਜਿ, ਤਂ ਵਾਤਾਬਾਧੇਨ ਪੀਲ਼ਿਯਮਾਨਂ ਞਤ੍ਵਾ ਭਗਵਾ ਤਤ੍ਥ ਗਨ੍ਤ੍ਵਾ ਪੁਚ੍ਛਨ੍ਤੋ –

੩੫੦. ‘‘ਵਾਤਰੋਗਾਭਿਨੀਤੋ ਤ੍ਵਂ, ਵਿਹਰਂ ਕਾਨਨੇ ਵਨੇ;

ਪਵਿਦ੍ਧਗੋਚਰੇ ਲੂਖੇ, ਕਥਂ ਭਿਕ੍ਖੁ ਕਰਿਸ੍ਸਸੀ’’ਤਿ. –

ਆਹ. ਤਂ ਸੁਤ੍ਵਾ ਥੇਰੋ –

੩੫੧. ‘‘ਪੀਤਿਸੁਖੇਨ ਵਿਪੁਲੇਨ, ਫਰਮਾਨੋ ਸਮੁਸ੍ਸਯਂ;

ਲੂਖਮ੍ਪਿ ਅਭਿਸਮ੍ਭੋਨ੍ਤੋ, ਵਿਹਰਿਸ੍ਸਾਮਿ ਕਾਨਨੇ.

੩੫੨. ‘‘ਭਾਵੇਨ੍ਤੋ ਸਤਿਪਟ੍ਠਾਨੇ, ਇਨ੍ਦ੍ਰਿਯਾਨਿ ਬਲਾਨਿ ਚ;

ਬੋਜ੍ਝਙ੍ਗਾਨਿ ਚ ਭਾਵੇਨ੍ਤੋ, ਵਿਹਰਿਸ੍ਸਾਮਿ ਕਾਨਨੇ.

੩੫੩. ‘‘ਆਰਦ੍ਧਵੀਰਿਯੇ ਪਹਿਤਤ੍ਤੇ, ਨਿਚ੍ਚਂ ਦਲ਼੍ਹਪਰਕ੍ਕਮੇ;

ਸਮਗ੍ਗੇ ਸਹਿਤੇ ਦਿਸ੍ਵਾ, ਵਿਹਰਿਸ੍ਸਾਮਿ ਕਾਨਨੇ.

੩੫੪. ‘‘ਅਨੁਸ੍ਸਰਨ੍ਤੋ ਸਮ੍ਬੁਦ੍ਧਂ, ਅਗ੍ਗਂ ਦਨ੍ਤਂ ਸਮਾਹਿਤਂ;

ਅਤਨ੍ਦਿਤੋ ਰਤ੍ਤਿਨ੍ਦਿਵਂ, ਵਿਹਰਿਸ੍ਸਾਮਿ ਕਾਨਨੇ’’ਤਿ. –

ਚਤਸ੍ਸੋ ਗਾਥਾ ਅਭਾਸਿ.

ਤਤ੍ਥ ਵਾਤਰੋਗਾਭਿਨੀਤੋਤਿ ਵਾਤਾਬਾਧੇਨ ਅਸੇਰਿਭਾਵਂ ਉਪਨੀਤੋ, ਵਾਤਬ੍ਯਾਧਿਨਾ ਅਭਿਭੂਤੋ. ਤ੍ਵਨ੍ਤਿ ਥੇਰਂ ਆਲਪਤਿ. ਵਿਹਰਨ੍ਤਿ ਤੇਨ ਇਰਿਯਾਪਥਵਿਹਾਰੇਨ ਵਿਹਰਨ੍ਤੋ. ਕਾਨਨੇ ਵਨੇਤਿ ਕਾਨਨਭੂਤੇ ਵਨੇ, ਮਹਾਅਰਞ੍ਞੇਤਿ ਅਤ੍ਥੋ. ਪਵਿਦ੍ਧਗੋਚਰੇਤਿ ਵਿਸ੍ਸਟ੍ਠਗੋਚਰੇ ਦੁਲ੍ਲਭਪਚ੍ਚਯੇ. ਵਾਤਰੋਗਸ੍ਸ ਸਪ੍ਪਾਯਾਨਂ ਸਪ੍ਪਿਆਦਿਭੇਸਜ੍ਜਾਨਂ ਅਭਾਵੇਨ ਫਰੁਸਭੂਮਿਭਾਗਤਾਯ ਚ ਲੂਖੇ ਲੂਖਟ੍ਠਾਨੇ. ਕਥਂ ਭਿਕ੍ਖੁ ਕਰਿਸ੍ਸਸੀਤਿ ਭਿਕ੍ਖੁ ਤ੍ਵਂ ਕਥਂ ਵਿਹਰਿਸ੍ਸਸੀਤਿ ਭਗਵਾ ਪੁਚ੍ਛਿ.

ਤਂ ਸੁਤ੍ਵਾ ਥੇਰੋ ਨਿਰਾਮਿਸਪੀਤਿਸੋਮਨਸ੍ਸਾਦਿਨਾ ਅਤ੍ਤਨੋ ਸੁਖਵਿਹਾਰਂ ਪਕਾਸੇਨ੍ਤੋ ‘‘ਪੀਤਿਸੁਖੇਨਾ’’ਤਿਆਦਿਮਾਹ. ਤਤ੍ਥ ਪੀਤਿਸੁਖੇਨਾਤਿ ਉਬ੍ਬੇਗਲਕ੍ਖਣਾਯ ਫਰਣਲਕ੍ਖਣਾਯ ਚ ਪੀਤਿਯਾ ਤਂਸਮ੍ਪਯੁਤ੍ਤਸੁਖੇਨ ਚ. ਤੇਨਾਹ ‘‘ਵਿਪੁਲੇਨਾ’’ਤਿ ਉਲ਼ਾਰੇਨਾਤਿ ਅਤ੍ਥੋ. ਫਰਮਾਨੋ ਸਮੁਸ੍ਸਯਨ੍ਤਿ ਯਥਾਵੁਤ੍ਤਪੀਤਿਸੁਖਸਮੁਟ੍ਠਿਤੇਹਿ ਪਣੀਤੇਹਿ ਰੂਪੇਹਿ ਸਕਲਂ ਕਾਯਂ ਫਰਾਪੇਨ੍ਤੋ ਨਿਰਨ੍ਤਰਂ ਫੁਟਂ ਕਰੋਨ੍ਤੋ. ਲੂਖਮ੍ਪਿ ਅਭਿਸਮ੍ਭੋਨ੍ਤੋਤਿ ਅਰਞ੍ਞਾਵਾਸਜਨਿਤਂ ਸਲ੍ਲੇਖਵੁਤ੍ਤਿਹੇਤੁਕਂ ਦੁਸ੍ਸਹਮ੍ਪਿ ਪਚ੍ਚਯਲੂਖਂ ਅਭਿਭਵਨ੍ਤੋ ਅਧਿਵਾਸੇਨ੍ਤੋ. ਵਿਹਰਿਸ੍ਸਾਮਿ ਕਾਨਨੇਤਿ ਝਾਨਸੁਖੇਨ ਵਿਪਸ੍ਸਨਾਸੁਖੇਨ ਚ ਅਰਞ੍ਞਾਯਤਨੇ ਵਿਹਰਿਸ੍ਸਾਮੀਤਿ ਅਤ੍ਥੋ. ਤੇਨਾਹ – ‘‘ਸੁਖਞ੍ਚ ਕਾਯੇਨ ਪਟਿਸਂਵੇਦੇਸਿ’’ਨ੍ਤਿ (ਪਾਰਾ. ੧੧).

‘‘ਯਤੋ ਯਤੋ ਸਮ੍ਮਸਤਿ, ਖਨ੍ਧਾਨਂ ਉਦਯਬ੍ਬਯਂ;

ਲਭਤੀ ਪੀਤਿਪਾਮੋਜ੍ਜਂ, ਅਮਤਂ ਤਂ ਵਿਜਾਨਤ’’ਨ੍ਤਿ ਚ. (ਧ. ਪ. ੩੭੪);

ਭਾਵੇਨ੍ਤੋ ਸਤਿਪਟ੍ਠਾਨੇਤਿ ਮਗ੍ਗਪਰਿਯਾਪਨ੍ਨੇ ਕਾਯਾਨੁਪਸ੍ਸਨਾਦਿਕੇ ਚਤ੍ਤਾਰੋ ਸਤਿਪਟ੍ਠਾਨੇ ਉਪ੍ਪਾਦੇਨ੍ਤੋ ਵਡ੍ਢੇਨ੍ਤੋ ਚ. ਇਨ੍ਦ੍ਰਿਯਾਨੀਤਿ ਮਗ੍ਗਪਰਿਯਾਪਨ੍ਨਾਨਿ ਏਵ ਸਦ੍ਧਾਦੀਨਿ ਪਞ੍ਚਿਨ੍ਦ੍ਰਿਯਾਨਿ. ਬਲਾਨੀਤਿ ਤਥਾ ਸਦ੍ਧਾਦੀਨਿ ਪਞ੍ਚ ਬਲਾਨਿ. ਬੋਜ੍ਝਙ੍ਗਾਨੀਤਿ ਤਥਾ ਸਤਿਸਮ੍ਬੋਜ੍ਝਙ੍ਗਾਦੀਨਿ ਸਤ੍ਤ ਬੋਜ੍ਝਙ੍ਗਾਨਿ. ਚ-ਸਦ੍ਦੇਨ ਸਮ੍ਮਪ੍ਪਧਾਨਇਦ੍ਧਿਪਾਦਮਗ੍ਗਙ੍ਗਾਨਿ ਸਙ੍ਗਣ੍ਹਾਤਿ. ਤਦਵਿਨਾਭਾਵਤੋ ਹਿ ਤਗ੍ਗਹਣੇਨੇਵ ਤੇਸਂ ਗਹਣਂ ਹੋਤਿ. ਵਿਹਰਿਸ੍ਸਾਮੀਤਿ ਯਥਾਵੁਤ੍ਤੇ ਬੋਧਿਪਕ੍ਖਿਯਧਮ੍ਮੇ ਭਾਵੇਨ੍ਤੋ ਮਗ੍ਗਸੁਖੇਨ ਤਦਧਿਗਮਸਿਦ੍ਧੇਨ ਫਲਸੁਖੇਨ ਨਿਬ੍ਬਾਨਸੁਖੇਨ ਚ ਵਿਹਰਿਸ੍ਸਾਮਿ.

ਆਰਦ੍ਧਵੀਰਿਯੇਤਿ ਚਤੁਬ੍ਬਿਧਸਮ੍ਮਪ੍ਪਧਾਨਵਸੇਨ ਪਗ੍ਗਹਿਤਵੀਰਿਯੇ. ਪਹਿਤਤ੍ਤੇਤਿ ਨਿਬ੍ਬਾਨਂ ਪਤਿਪੇਸਿਤਚਿਤ੍ਤੇ. ਨਿਚ੍ਚਂ ਦਲ਼੍ਹਪਰਕ੍ਕਮੇਤਿ ਸਬ੍ਬਕਾਲਂ ਅਸਿਥਿਲਵੀਰਿਯੇ. ਅਵਿਵਾਦਵਸੇਨ ਕਾਯਸਾਮਗ੍ਗਿਦਾਨਵਸੇਨ ਚ ਸਮਗ੍ਗੇ. ਦਿਟ੍ਠਿਸੀਲਸਾਮਞ੍ਞੇਨ ਸਹਿਤੇ ਸਬ੍ਰਹ੍ਮਚਾਰੀ ਦਿਸ੍ਵਾ. ਏਤੇਨ ਕਲ੍ਯਾਣਮਿਤ੍ਤਸਮ੍ਪਤ੍ਤਿਂ ਦਸ੍ਸੇਤਿ.

ਅਨੁਸ੍ਸਰਨ੍ਤੋ ਸਮ੍ਬੁਦ੍ਧਨ੍ਤਿ ਸਮ੍ਮਾ ਸਾਮਂ ਸਬ੍ਬਧਮ੍ਮਾਨਂ ਬੁਦ੍ਧਤ੍ਤਾ ਸਮ੍ਮਾਸਮ੍ਬੁਦ੍ਧਂ ਸਬ੍ਬਸਤ੍ਤੁਤ੍ਤਮਤਾਯ, ਅਗ੍ਗਂ ਉਤ੍ਤਮੇਨ ਦਮਥੇਨ ਦਨ੍ਤਂ, ਅਨੁਤ੍ਤਰਸਮਾਧਿਨਾ ਸਮਾਹਿਤਂ ਅਤਨ੍ਦਿਤੋ ਅਨਲਸੋ ਹੁਤ੍ਵਾ, ਰਤ੍ਤਿਨ੍ਦਿਵਂ ਸਬ੍ਬਕਾਲਂ ‘‘ਇਤਿਪਿ ਸੋ ਭਗਵਾ ਅਰਹ’’ਨ੍ਤਿਆਦਿਨਾ ਅਨੁਸ੍ਸਰਨ੍ਤੋ ਵਿਹਰਿਸ੍ਸਾਮਿ. ਏਤੇਨ ਬੁਦ੍ਧਾਨੁਸ੍ਸਤਿਭਾਵਨਾਯ ਯੁਤ੍ਤਾਕਾਰਦਸ੍ਸਨੇਨ ਸਬ੍ਬਤ੍ਥ ਕਮ੍ਮਟ੍ਠਾਨਾਨੁਯੋਗਮਾਹ, ਪੁਰਿਮੇਨ ਪਾਰਿਹਾਰਿਯਕਮ੍ਮਟ੍ਠਾਨਾਨੁਯੋਗਂ.

ਏਵਂ ਪਨ ਵਤ੍ਵਾ ਥੇਰੋ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੫੪.੨੮-੬੫) –

‘‘ਇਤੋ ਸਤਸਹਸ੍ਸਮ੍ਹਿ, ਕਪ੍ਪੇ ਉਪ੍ਪਜ੍ਜਿ ਨਾਯਕੋ;

ਅਨੋਮਨਾਮੋ ਅਮਿਤੋ, ਨਾਮੇਨ ਪਦੁਮੁਤ੍ਤਰੋ.

‘‘ਪਦੁਮਾਕਾਰਵਦਨੋ, ਪਦੁਮਾਮਲਸੁਚ੍ਛਵੀ;

ਲੋਕੇਨਾਨੁਪਲਿਤ੍ਤੋਵ, ਤੋਯੇਨ ਪਦੁਮਂ ਯਥਾ.

‘‘ਵੀਰੋ ਪਦੁਮਪਤ੍ਤਕ੍ਖੋ, ਕਨ੍ਤੋ ਚ ਪਦੁਮਂ ਯਥਾ;

ਪਦੁਮੁਤ੍ਤਰਗਨ੍ਧੋਵ, ਤਸ੍ਮਾ ਸੋ ਪਦੁਮੁਤ੍ਤਰੋ.

‘‘ਲੋਕਜੇਟ੍ਠੋ ਚ ਨਿਮ੍ਮਾਨੋ, ਅਨ੍ਧਾਨਂ ਨਯਨੂਪਮੋ;

ਸਨ੍ਤਵੇਸੋ ਗੁਣਨਿਧਿ, ਕਰੁਣਾਮਤਿਸਾਗਰੋ.

‘‘ਸ ਕਦਾਚਿ ਮਹਾਵੀਰੋ, ਬ੍ਰਹ੍ਮਾਸੁਰਸੁਰਚ੍ਚਿਤੋ;

ਸਦੇਵਮਨੁਜਾਕਿਣ੍ਣੇ, ਜਨਮਜ੍ਝੇ ਜਿਨੁਤ੍ਤਮੋ.

‘‘ਵਦਨੇਨ ਸੁਗਨ੍ਧੇਨ, ਮਧੁਰੇਨ ਰੁਤੇਨ ਚ;

ਰਞ੍ਜਯਂ ਪਰਿਸਂ ਸਬ੍ਬਂ, ਸਨ੍ਥਵੀ ਸਾਵਕਂ ਸਕਂ.

‘‘ਸਦ੍ਧਾਧਿਮੁਤ੍ਤੋ ਸੁਮਤਿ, ਮਮ ਦਸ੍ਸਨਲਾਲਸੋ;

ਨਤ੍ਥਿ ਏਤਾਦਿਸੋ ਅਞ੍ਞੋ, ਯਥਾਯਂ ਭਿਕ੍ਖੁ ਵਕ੍ਕਲਿ.

‘‘ਤਦਾਹਂ ਹਂਸਵਤਿਯਂ, ਨਗਰੇ ਬ੍ਰਾਹ੍ਮਣਤ੍ਰਜੋ;

ਹੁਤ੍ਵਾ ਸੁਤ੍ਵਾ ਚ ਤਂ ਵਾਕ੍ਯਂ, ਤਂ ਠਾਨਮਭਿਰੋਚਯਿਂ.

‘‘ਸਸਾਵਕਂ ਤਂ ਵਿਮਲਂ, ਨਿਮਨ੍ਤੇਤ੍ਵਾ ਤਥਾਗਤਂ;

ਸਤ੍ਤਾਹਂ ਭੋਜਯਿਤ੍ਵਾਨ, ਦੁਸ੍ਸੇਹਚ੍ਛਾਦਯਿਂ ਤਦਾ.

‘‘ਨਿਪਚ੍ਚ ਸਿਰਸਾ ਤਸ੍ਸ, ਅਨਨ੍ਤਗੁਣਸਾਗਰੇ;

ਨਿਮੁਗ੍ਗੋ ਪੀਤਿਸਮ੍ਪੁਣ੍ਣੋ, ਇਦਂ ਵਚਨਮਬ੍ਰਵਿਂ.

‘‘ਯੋ ਸੋ ਤਯਾ ਸਨ੍ਥਵਿਤੋ, ਇਤੋ ਸਤ੍ਤਮਕੇ ਮੁਨਿ;

ਭਿਕ੍ਖੁ ਸਦ੍ਧਾਵਤਂ ਅਗ੍ਗੋ, ਤਾਦਿਸੋ ਹੋਮਹਂ ਮੁਨੇ.

‘‘ਏਵਂ ਵੁਤ੍ਤੇ ਮਹਾਵੀਰੋ, ਅਨਾਵਰਣਦਸ੍ਸਨੋ;

ਇਮਂ ਵਾਕ੍ਯਂ ਉਦੀਰੇਸਿ, ਪਰਿਸਾਯ ਮਹਾਮੁਨਿ.

‘‘ਪਸ੍ਸਥੇਤਂ ਮਾਣਵਕਂ, ਪੀਤਮਟ੍ਠਨਿਵਾਸਨਂ;

ਹੇਮਯਞ੍ਞੋਪਚਿਤਙ੍ਗਂ, ਜਨਨੇਤ੍ਤਮਨੋਹਰਂ.

‘‘ਏਸੋ ਅਨਾਗਤਦ੍ਧਾਨੇ, ਗੋਤਮਸ੍ਸ ਮਹੇਸਿਨੋ;

ਅਗ੍ਗੋ ਸਦ੍ਧਾਧਿਮੁਤ੍ਤਾਨਂ, ਸਾਵਕੋਯਂ ਭਵਿਸ੍ਸਤਿ.

‘‘ਦੇਵਭੂਤੋ ਮਨੁਸ੍ਸੋ ਵਾ, ਸਬ੍ਬਸਨ੍ਤਾਪਵਜ੍ਜਿਤੋ;

ਸਬ੍ਬਭੋਗਪਰਿਬ੍ਯੂਲ਼੍ਹੋ, ਸੁਖਿਤੋ ਸਂਸਰਿਸ੍ਸਤਿ.

‘‘ਸਤਸਹਸ੍ਸਿਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਵਕ੍ਕਲਿ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ.

‘‘ਤੇਨ ਕਮ੍ਮਵਿਸੇਸੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਸਬ੍ਬਤ੍ਥ ਸੁਖਿਤੋ ਹੁਤ੍ਵਾ, ਸਂਸਰਨ੍ਤੋ ਭਵਾਭਵੇ;

ਸਾਵਤ੍ਥਿਯਂ ਪੁਰੇ ਜਾਤੋ, ਕੁਲੇ ਅਞ੍ਞਤਰੇ ਅਹਂ.

‘‘ਨੋਨੀਤਸੁਖੁਮਾਲਂ ਮਂ, ਜਾਤਪਲ੍ਲਵਕੋਮਲਂ;

ਮਨ੍ਦਂ ਉਤ੍ਤਾਨਸਯਨਂ, ਪਿਸਾਚਭਯਤਜ੍ਜਿਤਾ.

‘‘ਪਾਦਮੂਲੇ ਮਹੇਸਿਸ੍ਸ, ਸਾਯੇਸੁਂ ਦੀਨਮਾਨਸਾ;

ਇਮਂ ਦਦਾਮ ਤੇ ਨਾਥ, ਸਰਣਂ ਹੋਹਿ ਨਾਯਕ.

‘‘ਤਦਾ ਪਟਿਗ੍ਗਹਿ ਸੋ ਮਂ, ਭੀਤਾਨਂ ਸਰਣੋ ਮੁਨਿ;

ਜਾਲਿਨਾ ਚਕ੍ਕਙ੍ਕਿਤੇਨ, ਮੁਦੁਕੋਮਲਪਾਣਿਨਾ.

‘‘ਤਦਾ ਪਭੁਤਿ ਤੇਨਾਹਂ, ਅਰਕ੍ਖੇਯ੍ਯੇਨ ਰਕ੍ਖਿਤੋ;

ਸਬ੍ਬਵੇਰਵਿਨਿਮੁਤ੍ਤੋ, ਸੁਖੇਨ ਪਰਿਵੁਦ੍ਧਿਤੋ.

‘‘ਸੁਗਤੇਨ ਵਿਨਾ ਭੂਤੋ, ਉਕ੍ਕਣ੍ਠਾਮਿ ਮੁਹੁਤ੍ਤਕਂ;

ਜਾਤਿਯਾ ਸਤ੍ਤਵਸ੍ਸੋਹਂ, ਪਬ੍ਬਜਿਂ ਅਨਗਾਰਿਯਂ.

‘‘ਸਬ੍ਬਪਾਰਮਿਸਮ੍ਭੂਤਂ, ਨੀਲਕ੍ਖਿਨਯਨਂ ਵਰਂ;

ਰੂਪਂ ਸਬ੍ਬਸੁਭਾਕਿਣ੍ਣਂ, ਅਤਿਤ੍ਤੋ ਵਿਹਰਾਮਹਂ.

‘‘ਬੁਦ੍ਧਰੂਪਰਤਿਂ ਞਤ੍ਵਾ, ਤਦਾ ਓਵਦਿ ਮਂ ਜਿਨੋ;

ਅਲਂ ਵਕ੍ਕਲਿ ਕਿਂ ਰੂਪੇ, ਰਮਸੇ ਬਾਲਨਨ੍ਦਿਤੇ.

‘‘ਯੋ ਹਿ ਪਸ੍ਸਤਿ ਸਦ੍ਧਮ੍ਮਂ, ਸੋ ਮਂ ਪਸ੍ਸਤਿ ਪਣ੍ਡਿਤੋ;

ਅਪਸ੍ਸਮਾਨੋ ਸਦ੍ਧਮ੍ਮਂ, ਮਂ ਪਸ੍ਸਮ੍ਪਿ ਨ ਪਸ੍ਸਤਿ.

‘‘ਅਨਨ੍ਤਾਦੀਨਵੋ ਕਾਯੋ, ਵਿਸਰੁਕ੍ਖਸਮੂਪਮੋ;

ਆਵਾਸੋ ਸਬ੍ਬਰੋਗਾਨਂ, ਪੁਞ੍ਜੋ ਦੁਕ੍ਖਸ੍ਸ ਕੇਵਲੋ.

‘‘ਨਿਬ੍ਬਿਨ੍ਦਿਯ ਤਤੋ ਰੂਪੇ, ਖਨ੍ਧਾਨਂ ਉਦਯਬ੍ਬਯਂ;

ਪਸ੍ਸ ਉਪਕ੍ਕਿਲੇਸਾਨਂ, ਸੁਖੇਨਨ੍ਤਂ ਗਮਿਸ੍ਸਸਿ.

‘‘ਏਵਂ ਤੇਨਾਨੁਸਿਟ੍ਠੋਹਂ, ਨਾਯਕੇਨ ਹਿਤੇਸਿਨਾ;

ਗਿਜ੍ਝਕੂਟਂ ਸਮਾਰੁਯ੍ਹ, ਝਾਯਾਮਿ ਗਿਰਿਕਨ੍ਦਰੇ.

‘‘ਠਿਤੋ ਪਬ੍ਬਤਪਾਦਮ੍ਹਿ, ਅਸ੍ਸਾਸਯਿ ਮਹਾਮੁਨਿ;

ਵਕ੍ਕਲੀਤਿ ਜਿਨੋ ਵਾਚਂ, ਤਂ ਸੁਤ੍ਵਾ ਮੁਦਿਤੋ ਅਹਂ.

‘‘ਪਕ੍ਖਨ੍ਦਿਂ ਸੇਲਪਬ੍ਭਾਰੇ, ਅਨੇਕਸਤਪੋਰਿਸੇ;

ਤਦਾ ਬੁਦ੍ਧਾਨੁਭਾਵੇਨ, ਸੁਖੇਨੇਵ ਮਹਿਂ ਗਤੋ.

‘‘ਪੁਨੋਪਿ ਧਮ੍ਮਂ ਦੇਸੇਤਿ, ਖਨ੍ਧਾਨਂ ਉਦਯਬ੍ਬਯਂ;

ਤਮਹਂ ਧਮ੍ਮਮਞ੍ਞਾਯ, ਅਰਹਤ੍ਤਮਪਾਪੁਣਿਂ.

‘‘ਸੁਮਹਾਪਰਿਸਮਜ੍ਝੇ, ਤਦਾ ਮਂ ਚਰਣਨ੍ਤਗੋ;

ਅਗ੍ਗਂ ਸਦ੍ਧਾਧਿਮੁਤ੍ਤਾਨਂ, ਪਞ੍ਞਪੇਸਿ ਮਹਾਮਤਿ.

‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਞ੍ਞਂ ਬ੍ਯਾਕਰੋਨ੍ਤੋਪਿ ਥੇਰੋ ਇਮਾ ਏਵ ਗਾਥਾ ਅਭਾਸਿ. ਅਥ ਨਂ ਸਤ੍ਥਾ ਭਿਕ੍ਖੁਸਙ੍ਘਮਜ੍ਝੇ ਨਿਸਿਨ੍ਨੋ ਸਦ੍ਧਾਧਿਮੁਤ੍ਤਾਨਂ ਅਗ੍ਗਟ੍ਠਾਨੇ ਠਪੇਸੀਤਿ.

ਵਕ੍ਕਲਿਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.