੧੧. ਸੋਣਕੁਟਿਕਣ੍ਣਤ੍ਥੇਰਗਾਥਾਵਣ੍ਣਨਾ

ਉਪਸਮ੍ਪਦਾ ਚ ਮੇ ਲਦ੍ਧਾਤਿਆਦਿਕਾ ਆਯਸ੍ਮਤੋ ਸੋਣਸ੍ਸ ਕੁਟਿਕਣ੍ਣਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਂ ਕਿਰ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਵਿਭਵਸਮ੍ਪਨ੍ਨੋ ਸੇਟ੍ਠਿ ਹੁਤ੍ਵਾ ਉਲ਼ਾਰਾਯ ਇਸ੍ਸਰਿਯਸਮ੍ਪਤ੍ਤਿਯਾ ਠਿਤੋ ਏਕਦਿਵਸਂ ਸਤ੍ਥਾਰਂ ਸਤਸਹਸ੍ਸਖੀਣਾਸਵਪਰਿਵੁਤਂ ਮਹਤਿਯਾ ਬੁਦ੍ਧਲੀਲ਼ਾਯ ਮਹਨ੍ਤੇਨ ਬੁਦ੍ਧਾਨੁਭਾਵੇਨ ਨਗਰਂ ਪਵਿਸਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਵਨ੍ਦਿਤ੍ਵਾ ਅਞ੍ਜਲਿਂ ਕਤ੍ਵਾ ਅਟ੍ਠਾਸਿ. ਸੋ ਪਚ੍ਛਾਭਤ੍ਤਂ ਉਪਾਸਕੇਹਿ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਭਗਵਤੋ ਸਨ੍ਤਿਕੇ ਧਮ੍ਮਂ ਸੁਣਨ੍ਤੋ ਸਤ੍ਥਾਰਂ ਏਕਂ ਭਿਕ੍ਖੁਂ ਕਲ੍ਯਾਣਵਾਕ੍ਕਰਣਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਯਮ੍ਪਿ ਤਂ ਠਾਨਂ ਪਤ੍ਥੇਤ੍ਵਾ ਮਹਾਦਾਨਂ ਦਤ੍ਵਾ ਪਣਿਧਾਨਂ ਅਕਾਸਿ. ਸਤ੍ਥਾ ਤਸ੍ਸ ਅਨਨ੍ਤਰਾਯਤਂ ਦਿਸ੍ਵਾ ‘‘ਅਨਾਗਤੇ ਗੋਤਮਸ੍ਸ ਨਾਮ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨੇ ਕਲ੍ਯਾਣਵਾਕ੍ਕਰਣਾਨਂ ਅਗ੍ਗੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ.

ਸੋ ਤਤ੍ਥ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਸਾਸਨੇ ਪਬ੍ਬਜਿਤ੍ਵਾ ਵਤ੍ਤਪਟਿਵਤ੍ਤਾਨਿ ਪੂਰੇਨ੍ਤੋ ਏਕਸ੍ਸ ਭਿਕ੍ਖੁਨੋ ਚੀਵਰਂ ਸਿਬ੍ਬਿਤ੍ਵਾ ਅਦਾਸਿ. ਪੁਨ ਬੁਦ੍ਧਸੁਞ੍ਞੇ ਲੋਕੇ ਬਾਰਾਣਸਿਯਂ ਤੁਨ੍ਨਵਾਯੋ ਹੁਤ੍ਵਾ ਏਕਸ੍ਸ ਪਚ੍ਚੇਕਬੁਦ੍ਧਸ੍ਸ ਚੀਵਰਕੋਟਿਂ ਛਿਨ੍ਨਂ ਘਟੇਤ੍ਵਾ ਅਦਾਸਿ. ਏਵਂ ਤਤ੍ਥ ਤਤ੍ਥ ਪੁਞ੍ਞਾਨਿ ਕਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਅਵਨ੍ਤਿਰਟ੍ਠੇ ਕੁਰਰਘਰੇ ਮਹਾਵਿਭਵਸ੍ਸ ਸੇਟ੍ਠਿਨੋ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਸੋਣੋਤਿਸ੍ਸ ਨਾਮਂ ਅਕਂਸੁ. ਕੋਟਿਅਗ੍ਘਨਕਸ੍ਸ ਕਣ੍ਣਪਿਲ਼ਨ੍ਧਨਸ੍ਸ ਧਾਰਣੇਨ ‘‘ਕੋਟਿਕਣ੍ਣੋ’’ਤਿ ਵਤ੍ਤਬ੍ਬੇ ਕੁਟਿਕਣ੍ਣੋਤਿ ਪਞ੍ਞਾਯਿਤ੍ਥ.

ਸੋ ਅਨੁਕ੍ਕਮੇਨ ਵਡ੍ਢਿਤ੍ਵਾ ਕੁਟੁਮ੍ਬਂ ਸਣ੍ਠਪੇਨ੍ਤੋ ਆਯਸ੍ਮਨ੍ਤੇ ਮਹਾਕਚ੍ਚਾਨੇ ਕੁਲਘਰਂ ਨਿਸ੍ਸਾਯ ਪਵਤ੍ਤਪਬ੍ਬਤੇ ਵਿਹਰਨ੍ਤੇ ਤਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਯ ਤਂ ਚਤੂਹਿ ਪਚ੍ਚਯੇਹਿ ਉਪਟ੍ਠਹਿ. ਸੋ ਅਪਰਭਾਗੇ ਸਂਸਾਰੇ ਸਞ੍ਜਾਤਸਂਵੇਗੋ ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਕਿਚ੍ਛੇਨ ਕਸਿਰੇਨ ਦਸਵਗ੍ਗਂ ਸਙ੍ਘਂ ਸਨ੍ਨਿਪਾਤੇਤ੍ਵਾ ਉਪਸਮ੍ਪਜ੍ਜਿਤ੍ਵਾ ਕਤਿਪਯਕਾਲਂ ਥੇਰਸ੍ਸ ਸਨ੍ਤਿਕੇ ਵਸਿਤ੍ਵਾ, ਥੇਰਂ ਆਪੁਚ੍ਛਿਤ੍ਵਾ ਸਤ੍ਥਾਰਂ ਵਨ੍ਦਿਤੁਂ ਸਾਵਤ੍ਥਿਂ ਉਪਗਤੋ, ਸਤ੍ਥਾਰਾ ਏਕਗਨ੍ਧਕੁਟਿਯਂ ਵਾਸਂ ਲਭਿਤ੍ਵਾ ਪਚ੍ਚੂਸਸਮਯੇ ਅਜ੍ਝਿਟ੍ਠੋ ਸੋਲ਼ਸਅਟ੍ਠਕਵਗ੍ਗਿਯਾਨਂ ਉਸ੍ਸਾਰਣੇਨ ਸਾਧੁਕਾਰਂ ਦਤ੍ਵਾ ਭਾਸਿਤਾਯ ‘‘ਦਿਸ੍ਵਾ ਆਦੀਨਵਂ ਲੋਕੇ’’ਤਿ (ਉਦਾ. ੪੬; ਮਹਾਵ. ੨੫੮) ਉਦਾਨਗਾਥਾਯ ਪਰਿਯੋਸਾਨੇ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੪੪.੨੬-੩੪) –

‘‘ਪਦੁਮੁਤ੍ਤਰੋ ਨਾਮ ਜਿਨੋ, ਆਹੁਤੀਨਂ ਪਟਿਗ੍ਗਹੋ;

ਵਸੀਸਤਸਹਸ੍ਸੇਹਿ, ਨਗਰਂ ਪਾਵਿਸੀ ਤਦਾ.

‘‘ਨਗਰਂ ਪਵਿਸਨ੍ਤਸ੍ਸ, ਉਪਸਨ੍ਤਸ੍ਸ ਤਾਦਿਨੋ;

ਰਤਨਾਨਿ ਪਜ੍ਜੋਤਿਂਸੁ, ਨਿਗ੍ਘੋਸੋ ਆਸਿ ਤਾਵਦੇ.

‘‘ਬੁਦ੍ਧਸ੍ਸ ਆਨੁਭਾਵੇਨ, ਭੇਰੀ ਵਜ੍ਜੁਮਘਟ੍ਟਿਤਾ;

ਸਯਂ ਵੀਣਾ ਪਵਜ੍ਜਨ੍ਤਿ, ਬੁਦ੍ਧਸ੍ਸ ਪਵਿਸਤੋ ਪੁਰਂ.

‘‘ਬੁਦ੍ਧਸੇਟ੍ਠਂ ਨਮਸ੍ਸਾਮਿ, ਪਦੁਮੁਤ੍ਤਰਮਹਾਮੁਨਿਂ;

ਪਾਟਿਹੀਰਞ੍ਚ ਪਸ੍ਸਿਤ੍ਵਾ, ਤਤ੍ਥ ਚਿਤ੍ਤਂ ਪਸਾਦਯਿਂ.

‘‘ਅਹੋ ਬੁਦ੍ਧੋ ਅਹੋ ਧਮ੍ਮੋ, ਅਹੋ ਨੋ ਸਤ੍ਥੁ ਸਮ੍ਪਦਾ;

ਅਚੇਤਨਾਪਿ ਤੂਰਿਯਾ, ਸਯਮੇਵ ਪਵਜ੍ਜਰੇ.

‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਸਞ੍ਞਾਯਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤੇ ਪਨ ਪਤਿਟ੍ਠਿਤੋ ਅਤ੍ਤਨੋ ਉਪਜ੍ਝਾਯੇਨ ਆਚਿਕ੍ਖਿਤਨਿਯਾਮੇਨ ਪਚ੍ਚਨ੍ਤਿਮੇਸੁ ਜਨਪਦੇਸੁ ਵਿਨਯਧਰਪਞ੍ਚਮੇਨ ਗਣੇਨ ਉਪਸਮ੍ਪਦਾ, ਧੁਵਨ੍ਹਾਨਂ, ਚਮ੍ਮਤ੍ਥਰਣਂ, ਗੁਣਙ੍ਗੁਣੂਪਾਹਨਂ, ਚੀਵਰਵਿਪ੍ਪਵਾਸੋਤਿ ਪਞ੍ਚ ਵਰੇ ਯਾਚਿਤ੍ਵਾ ਤੇ ਸਤ੍ਥੁ ਸਨ੍ਤਿਕਾ ਲਭਿਤ੍ਵਾ ਪੁਨਦੇਵ ਅਤ੍ਤਨੋ ਵਸਿਤਟ੍ਠਾਨਂ ਗਨ੍ਤ੍ਵਾ ਉਪਜ੍ਝਾਯਸ੍ਸ ਤਮਤ੍ਥਂ ਆਰੋਚੇਸਿ. ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰੋ ਪਨ ਉਦਾਨਟ੍ਠਕਥਾਯਂ ਆਗਤਨਯੇਨ ਵੇਦਿਤਬ੍ਬੋ. ਅਙ੍ਗੁਤ੍ਤਰਟ੍ਠਕਥਾਯਂ (ਅ. ਨਿ. ਅਟ੍ਠ. ੧.੧.੨੦੬) ਪਨ ‘‘ਉਪਸਮ੍ਪਨ੍ਨੋ ਹੁਤ੍ਵਾ ਅਤ੍ਤਨੋ ਉਪਜ੍ਝਾਯਸ੍ਸ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣੀ’’ਤਿ ਵੁਤ੍ਤਂ.

ਸੋ ਅਪਰਭਾਗੇ ਵਿਮੁਤ੍ਤਿਸੁਖੇਨ ਵਿਹਰਨ੍ਤੋ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਸੋਮਨਸ੍ਸਜਾਤੋ ਉਦਾਨਵਸੇਨ –

੩੬੫. ‘‘ਉਪਸਮ੍ਪਦਾ ਚ ਮੇ ਲਦ੍ਧਾ, ਵਿਮੁਤ੍ਤੋ ਚਮ੍ਹਿ ਅਨਾਸਵੋ;

ਸੋ ਚ ਮੇ ਭਗਵਾ ਦਿਟ੍ਠੋ, ਵਿਹਾਰੇ ਚ ਸਹਾਵਸਿਂ.

੩੬੬. ‘‘ਬਹੁਦੇਵ ਰਤ੍ਤਿਂ ਭਗਵਾ, ਅਬ੍ਭੋਕਾਸੇਤਿਨਾਮਯਿ;

ਵਿਹਾਰਕੁਸਲੋ ਸਤ੍ਥਾ, ਵਿਹਾਰਂ ਪਾਵਿਸੀ ਤਦਾ.

੩੬੭. ‘‘ਸਨ੍ਥਰਿਤ੍ਵਾਨ ਸਙ੍ਘਾਟਿਂ, ਸੇਯ੍ਯਂ ਕਪ੍ਪੇਸਿ ਗੋਤਮੋ;

ਸੀਹੋ ਸੇਲਗੁਹਾਯਂਵ, ਪਹੀਨਭਯਭੇਰਵੋ.

੩੬੮. ‘‘ਤਤੋ ਕਲ੍ਯਾਣਵਾਕ੍ਕਰਣੋ, ਸਮ੍ਮਾਸਮ੍ਬੁਦ੍ਧਸਾਵਕੋ;

ਸੋਣੋ ਅਭਾਸਿ ਸਦ੍ਧਮ੍ਮਂ, ਬੁਦ੍ਧਸੇਟ੍ਠਸ੍ਸ ਸਮ੍ਮੁਖਾ.

੩੬੯. ‘‘ਪਞ੍ਚਕ੍ਖਨ੍ਧੇ ਪਰਿਞ੍ਞਾਯ, ਭਾਵਯਿਤ੍ਵਾਨ ਅਞ੍ਜਸਂ;

ਪਪ੍ਪੁਯ੍ਯ ਪਰਮਂ ਸਨ੍ਤਿਂ, ਪਰਿਨਿਬ੍ਬਿਸ੍ਸਤ੍ਯਨਾਸਵੋ’’ਤਿ. –

ਇਮਾ ਪਞ੍ਚ ਗਾਥਾ ਅਭਾਸਿ.

ਤਤ੍ਥ ਉਪਸਮ੍ਪਦਾ ਚ ਮੇ ਲਦ੍ਧਾਤਿ ਯਾ ਸਾ ਕਿਚ੍ਛੇਨ ਦਸਵਗ੍ਗਂ ਭਿਕ੍ਖੁਸਙ੍ਘਂ ਸਨ੍ਨਿਪਾਤੇਤ੍ਵਾ ਅਤ੍ਤਨਾ ਲਦ੍ਧਾ ਉਪਸਮ੍ਪਦਾ. ਯਾ ਚ ਪਨ ਵਰਦਾਨਵਸੇਨ ਸਬ੍ਬਪਚ੍ਚਨ੍ਤਿਮੇਸੁ ਜਨਪਦੇਸੁ ਵਿਨਯਧਰਪਞ੍ਚਮੇਨ ਗਣੇਨ ਸਤ੍ਥਾਰਾ ਅਨੁਞ੍ਞਾਤਾ ਉਪਸਮ੍ਪਦਾ, ਤਦੁਭਯਂ ਸਨ੍ਧਾਯਾਹ. ਚ-ਸਦ੍ਦੋ ਸਮੁਚ੍ਚਯਤ੍ਥੋ, ਤੇਨ ਇਤਰੇਪਿ ਸਤ੍ਥੁ ਸਨ੍ਤਿਕਾ ਲਦ੍ਧਵਰੇ ਸਙ੍ਗਣ੍ਹਾਤਿ. ਵਿਮੁਤ੍ਤੋ ਚਮ੍ਹਿ ਅਨਾਸਵੋਤਿ ਅਗ੍ਗਮਗ੍ਗੇਨ ਸਕਲਕਿਲੇਸਵਤ੍ਥੁਵਿਮੁਤ੍ਤਿਯਾ ਵਿਮੁਤ੍ਤੋ ਚ ਅਮ੍ਹਿ. ਤਤੋ ਏਵ ਕਾਮਾਸਵਾਦੀਹਿ ਅਨਾਸਵੋ ਅਮ੍ਹੀਤਿ ਯੋਜਨਾ. ਸੋ ਚ ਮੇ ਭਗਵਾ ਦਿਟ੍ਠੋਤਿ ਯਦਤ੍ਥਂ ਅਹਂ ਅਵਨ੍ਤਿਰਟ੍ਠਤੋ ਸਾਵਤ੍ਥਿਂ ਗਤੋ, ਸੋ ਚ ਭਗਵਾ ਮਯਾ ਅਦਿਟ੍ਠਪੁਬ੍ਬੋ ਦਿਟ੍ਠੋ. ਵਿਹਾਰੇ ਚ ਸਹਾਵਸਿਨ੍ਤਿ ਨ ਕੇਵਲਂ ਤਸ੍ਸ ਭਗਵਤੋ ਦਸ੍ਸਨਮੇਵ ਮਯਾ ਲਦ੍ਧਂ, ਅਥ ਖੋ ਵਿਹਾਰੇ ਸਤ੍ਥੁ ਗਨ੍ਧਕੁਟਿਯਂ ਸਤ੍ਥਾਰਾ ਕਾਰਣਂ ਸਲ੍ਲਕ੍ਖੇਤ੍ਵਾ ਵਾਸੇਨ੍ਤੇਨ ਸਹ ਅਵਸਿਂ. ‘‘ਵਿਹਾਰੇਤਿ ਵਿਹਾਰਸਮੀਪੇ’’ਤਿ ਕੇਚਿ.

ਬਹੁਦੇਵ ਰਤ੍ਤਿਨ੍ਤਿ ਪਠਮਂ ਯਾਮਂ ਭਿਕ੍ਖੂਨਂ ਧਮ੍ਮਦੇਸਨਾਵਸੇਨ ਕਮ੍ਮਟ੍ਠਾਨਸੋਧਨਵਸੇਨ ਚ, ਮਜ੍ਝਿਮਂ ਯਾਮਂ ਦੇਵਾਨਂ ਬ੍ਰਹ੍ਮੂਨਞ੍ਚ ਕਙ੍ਖਚ੍ਛੇਦਨਵਸੇਨ ਭਗਵਾ ਬਹੁਦੇਵ ਰਤ੍ਤਿਂ ਅਬ੍ਭੋਕਾਸੇ ਅਤਿਨਾਮਯਿ ਵੀਤਿਨਾਮੇਸਿ. ਵਿਹਾਰਕੁਸਲੋਤਿ ਦਿਬ੍ਬਬ੍ਰਹ੍ਮਆਨੇਞ੍ਜਅਰਿਯਵਿਹਾਰੇਸੁ ਕੁਸਲੋ. ਵਿਹਾਰਂ ਪਾਵਿਸੀਤਿ ਅਤਿਵੇਲਂ ਨਿਸਜ੍ਜਚਙ੍ਕਮੇਹਿ ਉਪ੍ਪਨ੍ਨਪਰਿਸ੍ਸਮਵਿਨੋਦਨਤ੍ਥਂ ਗਨ੍ਧਕੁਟਿਂ ਪਾਵਿਸਿ.

ਸਨ੍ਥਰਿਤ੍ਵਾਨ ਸਙ੍ਘਾਟਿਂ, ਸੇਯ੍ਯਂ ਕਪ੍ਪੇਸੀਤਿ ਚਤੁਗ੍ਗੁਣਂ ਸਙ੍ਘਾਟਿਂ ਪਞ੍ਞਾਪੇਤ੍ਵਾ ਸੀਹਸੇਯ੍ਯਂ ਕਪ੍ਪੇਸਿ. ਤੇਨਾਹ ‘‘ਗੋਤਮੋ ਸੀਹੋ ਸੇਲਗੁਹਾਯਂਵ ਪਹੀਨਭਯਭੇਰਵੋ’’ਤਿ. ਤਤ੍ਥ ਗੋਤਮੋਤਿ ਭਗਵਨ੍ਤਂ ਗੋਤ੍ਤੇਨ ਕਿਤ੍ਤੇਤਿ. ਸੀਹੋ ਸੇਲਗੁਹਾਯਂਵਾਤਿ ਸੇਲਸ੍ਸ ਪਬ੍ਬਤਸ੍ਸ ਗੁਹਾਯਂ. ਯਥਾ ਸੀਹੋ ਮਿਗਰਾਜਾ ਤੇਜੁਸ੍ਸਦਤਾਯ ਪਹੀਨਭਯਭੇਰਵੋ ਦਕ੍ਖਿਣੇਨ ਪਸ੍ਸੇਨ ਪਾਦੇ ਪਾਦਂ ਅਚ੍ਚਾਧਾਯ ਸੇਯ੍ਯਂ ਕਪ੍ਪੇਸਿ, ਏਵਂ ਚਿਤ੍ਤੁਤ੍ਰਾਸਲੋਮਹਂਸਨਛਮ੍ਭਿਤਤ੍ਤਹੇਤੂਨਂ ਕਿਲੇਸਾਨਂ ਸਮੁਚ੍ਛਿਨ੍ਨਤ੍ਤਾ ਪਹੀਨਭਯਭੇਰਵੋ ਗੋਤਮੋ ਭਗਵਾ ਸੇਯ੍ਯਂ ਕਪ੍ਪੇਸੀਤਿ ਅਤ੍ਥੋ.

ਤਤੋਤਿ ਪਚ੍ਛਾ, ਸੀਹਸੇਯ੍ਯਂ ਕਪ੍ਪੇਤ੍ਵਾ ਤਤੋ ਵੁਟ੍ਠਹਿਤ੍ਵਾ ‘‘ਪਟਿਭਾਤੁ ਤਂ ਭਿਕ੍ਖੁ ਧਮ੍ਮੋ ਭਾਸਿਤੁ’’ਨ੍ਤਿ (ਉਦਾ. ੪੬) ਸਤ੍ਥਾਰਾ ਅਜ੍ਝੇਸਿਤੋਤਿ ਅਤ੍ਥੋ. ਕਲ੍ਯਾਣਵਾਕ੍ਕਰਣੋਤਿ ਸੁਨ੍ਦਰਵਚੀਕਰਣੋ, ਲਕ੍ਖਣਸਮ੍ਪਨ੍ਨਵਚਨਕ੍ਕਮੋਤਿ ਅਤ੍ਥੋ. ਸੋਣੋ ਅਭਾਸਿ ਸਦ੍ਧਮ੍ਮਨ੍ਤਿ ਸੋਲ਼ਸ ਅਟ੍ਠਕਵਗ੍ਗਿਯਸੁਤ੍ਤਾਨਿ ਸੋਣੋ ਕੁਟਿਕਣ੍ਣੋ, ਬੁਦ੍ਧਸੇਟ੍ਠਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਸਮ੍ਮੁਖਾ, ਪਚ੍ਚਕ੍ਖਤੋ ਅਭਾਸੀਤਿ ਥੇਰੋ ਅਤ੍ਤਾਨਮੇਵ ਪਰਂ ਵਿਯ ਅਵੋਚ.

ਪਞ੍ਚਕ੍ਖਨ੍ਧੇ ਪਰਿਞ੍ਞਾਯਾਤਿ ਪਞ੍ਚੁਪਾਦਾਨਕ੍ਖਨ੍ਧੇ ਤੀਹਿਪਿ ਪਰਿਞ੍ਞਾਹਿ ਪਰਿਜਾਨਿਤ੍ਵਾ ਤੇ ਪਰਿਜਾਨਨ੍ਤੋਯੇਵ, ਅਞ੍ਜਸਂ ਅਰਿਯਂ ਅਟ੍ਠਙ੍ਗਿਕਂ ਮਗ੍ਗਂ ਭਾਵਯਿਤ੍ਵਾ, ਪਰਮਂ ਸਨ੍ਤਿਂ ਨਿਬ੍ਬਾਨਂ ਪਪ੍ਪੁਯ੍ਯ ਪਾਪੁਣਿਤ੍ਵਾ ਠਿਤੋ ਅਨਾਸਵੋ. ਤਤੋ ਏਵ ਇਦਾਨਿ ਪਰਿਨਿਬ੍ਬਿਸ੍ਸਤਿ ਅਨੁਪਾਦਿਸੇਸਨਿਬ੍ਬਾਨਵਸੇਨ ਨਿਬ੍ਬਾਯਿਸ੍ਸਤੀਤਿ.

ਸੋਣਕੁਟਿਕਣ੍ਣਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.