੧੨. ਕੋਸਿਯਤ੍ਥੇਰਗਾਥਾਵਣ੍ਣਨਾ

ਯੋ ਏਵ ਗਰੂਨਨ੍ਤਿਆਦਿਕਾ ਆਯਸ੍ਮਤੋ ਕੋਸਿਯਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸਤ੍ਥਾਰਂ ਦਿਸ੍ਵਾ ਪਸਨ੍ਨਚਿਤ੍ਤੋ ਉਚ੍ਛੁਖਣ੍ਡਿਕਂ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਮਗਧਰਟ੍ਠੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ, ਕੋਸਿਯੋਤਿਸ੍ਸ ਗੋਤ੍ਤਵਸੇਨ ਨਾਮਂ ਅਕਾਸਿ. ਸੋ ਵਿਞ੍ਞੁਤਂ ਪਤ੍ਤੋ ਆਯਸ੍ਮਨ੍ਤਂ ਧਮ੍ਮਸੇਨਾਪਤਿਂ ਅਭਿਣ੍ਹਂ ਉਪਸਙ੍ਕਮਤਿ, ਤਸ੍ਸ ਸਨ੍ਤਿਕੇ ਧਮ੍ਮਂ ਸੁਣਾਤਿ. ਸੋ ਤੇਨ ਸਾਸਨੇ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਕਮ੍ਮਟ੍ਠਾਨਂ ਅਨੁਯੁਞ੍ਜਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੪੪.੪੪-੪੯) –

‘‘ਨਗਰੇ ਬਨ੍ਧੁਮਤਿਯਾ, ਦ੍ਵਾਰਪਾਲੋ ਅਹੋਸਹਂ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਸਬ੍ਬਧਮ੍ਮਾਨ ਪਾਰਗੁਂ.

‘‘ਉਚ੍ਛੁਖਣ੍ਡਿਕਮਾਦਾਯ ਬੁਦ੍ਧਸੇਟ੍ਠਸ੍ਸਦਾਸਹਂ;

ਪਸਨ੍ਨਚਿਤ੍ਤੋ ਸੁਮਨੋ, ਵਿਪਸ੍ਸਿਸ੍ਸ ਮਹੇਸਿਨੋ.

‘‘ਏਕਨਵੁਤਿਤੋ ਕਪ੍ਪੇ, ਯਂ ਉਚ੍ਛੁਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਉਚ੍ਛੁਖਣ੍ਡਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਗਰੁਵਾਸਂ ਸਪ੍ਪੁਰਿਸੂਪਨਿਸ੍ਸਯਞ੍ਚ ਪਸਂਸਨ੍ਤੋ –

੩੭੦. ‘‘ਯੋ ਵੇ ਗਰੂਨਂ ਵਚਨਞ੍ਞੁ ਧੀਰੋ, ਵਸੇ ਚ ਤਮ੍ਹਿ ਜਨਯੇਥ ਪੇਮਂ;

ਸੋ ਭਤ੍ਤਿਮਾ ਨਾਮ ਚ ਹੋਤਿ ਪਣ੍ਡਿਤੋ, ਞਤ੍ਵਾ ਚ ਧਮ੍ਮੇਸੁ ਵਿਸੇਸਿ ਅਸ੍ਸ.

੩੭੧. ‘‘ਯਂ ਆਪਦਾ ਉਪ੍ਪਤਿਤਾ ਉਲ਼ਾਰਾ, ਨਕ੍ਖਮ੍ਭਯਨ੍ਤੇ ਪਟਿਸਙ੍ਖਯਨ੍ਤਂ;

ਸੋ ਥਾਮਵਾ ਨਾਮ ਚ ਹੋਤਿ ਪਣ੍ਡਿਤੋ, ਞਤ੍ਵਾ ਚ ਧਮ੍ਮੇਸੁ ਵਿਸੇਸਿ ਅਸ੍ਸ.

੩੭੨. ‘‘ਯੋ ਵੇ ਸਮੁਦ੍ਦੋਵ ਠਿਤੋ ਅਨੇਜੋ, ਗਮ੍ਭੀਰਪਞ੍ਞੋ ਨਿਪੁਣਤ੍ਥਦਸ੍ਸੀ;

ਅਸਂਹਾਰਿਯੋ ਨਾਮ ਚ ਹੋਤਿ ਪਣ੍ਡਿਤੋ, ਞਤ੍ਵਾ ਚ ਧਮ੍ਮੇਸੁ ਵਿਸੇਸਿ ਅਸ੍ਸ.

੩੭੩. ‘‘ਬਹੁਸ੍ਸੁਤੋ ਧਮ੍ਮਧਰੋ ਚ ਹੋਤਿ, ਧਮ੍ਮਸ੍ਸ ਹੋਤਿ ਅਨੁਧਮ੍ਮਚਾਰੀ;

ਸੋ ਤਾਦਿਸੋ ਨਾਮ ਚ ਹੋਤਿ ਪਣ੍ਡਿਤੋ, ਞਤ੍ਵਾ ਚ ਧਮ੍ਮੇਸੁ ਵਿਸੇਸਿ ਅਸ੍ਸ.

੩੭੪. ‘‘ਅਤ੍ਥਞ੍ਚ ਯੋ ਜਾਨਾਤਿ ਭਾਸਿਤਸ੍ਸ,

ਅਤ੍ਥਞ੍ਚ ਞਤ੍ਵਾਨ ਤਥਾ ਕਰੋਤਿ;

ਅਤ੍ਥਨ੍ਤਰੋ ਨਾਮ ਸ ਹੋਤਿ ਪਣ੍ਡਿਤੋ,

ਞਤ੍ਵਾ ਚ ਧਮ੍ਮੇਸੁ ਵਿਸੇਸਿ ਅਸ੍ਸਾ’’ਤਿ. –

ਇਮਾ ਪਞ੍ਚ ਗਾਥਾ ਅਭਾਸਿ.

ਤਤ੍ਥ ਯੋਤਿ ਖਤ੍ਤਿਯਾਦੀਸੁ ਚਤੂਸੁ ਪਰਿਸਾਸੁ ਯੋ ਕੋਚਿ. ਵੇਤਿ ਬ੍ਯਤ੍ਤਂ. ਗਰੂਨਨ੍ਤਿ ਸੀਲਾਦਿਗਰੁਗੁਣਯੁਤ੍ਤਾਨਂ ਪਣ੍ਡਿਤਾਨਂ. ਵਚਨਞ੍ਞੂਤਿ ਤੇਸਂ ਅਨੁਸਾਸਨੀਵਚਨਂ ਜਾਨਨ੍ਤੋ, ਯਥਾਨੁਸਿਟ੍ਠਂ ਪਟਿਪਜ੍ਜਮਾਨੋ ਪਟਿਪਜ੍ਜਿਤ੍ਵਾ ਚ ਤਸ੍ਸ ਫਲਂ ਜਾਨਨ੍ਤੋਤਿ ਅਤ੍ਥੋ. ਧੀਰੋਤਿ ਧਿਤਿਸਮ੍ਪਨ੍ਨੋ. ਵਸੇ ਚ ਤਮ੍ਹਿ ਜਨਯੇਥ ਪੇਮਨ੍ਤਿ ਤਸ੍ਮਿਂ ਗਰੂਨਂ ਵਚਨੇ ਓਵਾਦੇ ਵਸੇਯ੍ਯ ਯਥਾਨੁਸਿਟ੍ਠਂ ਪਟਿਪਜ੍ਜੇਯ੍ਯ, ਪਟਿਪਜ੍ਜਿਤ੍ਵਾ ‘‘ਇਮਿਨਾ ਵਤਾਹਂ ਓਵਾਦੇਨ ਇਮਂ ਜਾਤਿਆਦਿਦੁਕ੍ਖਂ ਵੀਤਿਵਤ੍ਤੋ’’ਤਿ ਤਤ੍ਥ ਜਨਯੇਥ ਪੇਮਂ ਗਾਰਵਂ ਉਪ੍ਪਾਦੇਯ੍ਯ. ਇਦਞ੍ਹਿ ਦ੍ਵਯਂ ‘‘ਗਰੂਨਂ ਵਚਨਞ੍ਞੁ ਧੀਰੋ’’ਤਿ ਪਦਦ੍ਵਯੇਨ ਵੁਤ੍ਤਸ੍ਸੇਵਤ੍ਥਸ੍ਸ ਪਾਕਟਕਰਣਂ. ਸੋਤਿ ਯੋ ਗਰੂਨਂ ਵਚਨਞ੍ਞੂ ਧੀਰੋ, ਸੋ ਯਥਾਨੁਸਿਟ੍ਠਂ ਪਟਿਪਤ੍ਤਿਯਾ ਤਤ੍ਥ ਭਤ੍ਤਿਮਾ ਚ ਨਾਮ ਹੋਤਿ, ਜੀਵਿਤਹੇਤੁਪਿ ਤਸ੍ਸ ਅਨਤਿਕ੍ਕਮਨਤੋ ਪਣ੍ਡਿਤੋ ਚ ਨਾਮ ਹੋਤਿ. ਞਤ੍ਵਾ ਚ ਧਮ੍ਮੇਸੁ ਵਿਸੇਸਿ ਅਸ੍ਸਾਤਿ ਤਥਾ ਪਟਿਪਜ੍ਜਨ੍ਤੋ ਚ ਤਾਯ ਏਵ ਪਟਿਪਤ੍ਤਿਯਾ ਚਤੁਨ੍ਨਂ ਅਰਿਯਸਚ੍ਚਾਨਂ ਜਾਨਨਹੇਤੁ ਲੋਕਿਯਲੋਕੁਤ੍ਤਰਧਮ੍ਮੇਸੁ ਵਿਜ੍ਜਾਤ੍ਤਯਾਦਿਵਸੇਨ ‘‘ਤੇਵਿਜ੍ਜੋ, ਛਲ਼ਭਿਞ੍ਞੋ, ਪਟਿਸਮ੍ਭਿਦਾਪਤ੍ਤੋ’’ਤਿ ਵਿਸੇਸਿ ਵਿਸੇਸਵਾ ਸਿਯਾਤਿ ਅਤ੍ਥੋ.

ਯਨ੍ਤਿ ਯਂ ਪੁਗ੍ਗਲਂ ਪਟਿਪਤ੍ਤਿਯਾ ਅਨ੍ਤਰਾਯਕਰਣਤੋ ‘‘ਆਪਦਾ’’ਤਿ ਲਦ੍ਧਵੋਹਾਰਾ ਸੋਤੁਣ੍ਹਖੁਪ੍ਪਿਪਾਸਾਦਿਪਾਕਟਪਰਿਸ੍ਸਯਾ ਚੇਵ ਰਾਗਾਦਿਪਟਿਚ੍ਛਨ੍ਨਪਰਿਸ੍ਸਯਾ ਚ ਉਪ੍ਪਤਿਤਾ ਉਪ੍ਪਨ੍ਨਾ, ਉਲ਼ਾਰਾ ਬਲਵਨ੍ਤੋਪਿ ਨਕ੍ਖਮ੍ਭਯਨ੍ਤੇ ਨ ਕਿਞ੍ਚਿ ਚਾਲੇਨ੍ਤਿ. ਕਸ੍ਮਾ? ਪਟਿਸਙ੍ਖਯਨ੍ਤਨ੍ਤਿ ਪਟਿਸਙ੍ਖਾਯਮਾਨਂ ਪਟਿਸਙ੍ਖਾਨਬਲੇ ਠਿਤਨ੍ਤਿ ਅਤ੍ਥੋ. ਸੋਤਿ ਯੋ ਦਲ਼੍ਹਤਰਾਹਿ ਆਪਦਾਹਿਪਿ ਅਕ੍ਖਮ੍ਭਨੀਯੋ, ਸੋ ਥਾਮਵਾ ਧਿਤਿਮਾ ਦਲ਼੍ਹਪਰਕ੍ਕਮੋ ਨਾਮ ਹੋਤਿ. ਅਨਵਸੇਸਸਂਕਿਲੇਸਪਕ੍ਖਸ੍ਸ ਅਭਿਭਵਨਕਪਞ੍ਞਾਬਲਸਮਙ੍ਗਿਤਾਯ ਪਣ੍ਡਿਤੋ ਚ ਨਾਮ ਹੋਤਿ. ਤਥਾਭੂਤੋ ਚ ਞਤ੍ਵਾ ਚ ਧਮ੍ਮੇਸੁ ਵਿਸੇਸਿ ਅਸ੍ਸਾਤਿ ਤਂ ਵੁਤ੍ਤਤ੍ਥਮੇਵ.

ਸਮੁਦ੍ਦੋਵ ਠਿਤੋਤਿ ਸਮੁਦ੍ਦੋ ਵਿਯ ਠਿਤਸਭਾਵੋ. ਯਥਾ ਹਿ ਚਤੁਰਾਸੀਤਿਯੋਜਨਸਹਸ੍ਸਗਮ੍ਭੀਰੇ ਸਿਨੇਰੁਪਾਦਸਮੀਪੇ ਮਹਾਸਮੁਦ੍ਦੋ ਅਟ੍ਠਹਿਪਿ ਦਿਸਾਹਿ ਉਟ੍ਠਿਤੇਹਿ ਪਕਤਿਵਾਤੇਹਿ ਅਨਿਞ੍ਜਨਤੋ ਠਿਤੋ ਅਨੇਜੋ ਗਮ੍ਭੀਰੋ ਚ, ਏਵਂ ਕਿਲੇਸਵਾਤੇਹਿ ਤਿਤ੍ਥਿਯਵਾਦਵਾਤੇਹਿ ਚ ਅਕਮ੍ਪਨੀਯਤੋ ਠਿਤੋ ਅਨੇਜੋ. ਗਮ੍ਭੀਰਸ੍ਸ ਅਨੁਪਚਿਤਞਾਣਸਮ੍ਭਾਰੇਹਿ ਅਲਦ੍ਧਗਾਧਸ੍ਸ ਨਿਪੁਣਸ੍ਸ ਸੁਖੁਮਸ੍ਸ ਪਟਿਚ੍ਚਸਮੁਪ੍ਪਾਦਾਦਿਅਤ੍ਥਸ੍ਸ ਪਟਿਵਿਜ੍ਝਨੇਨ ਗਮ੍ਭੀਰਪਞ੍ਞੋ ਨਿਪੁਣਤ੍ਥਦਸ੍ਸੀ. ਅਸਂਹਾਰਿਯੋ ਨਾਮ ਚ ਹੋਤਿ ਪਣ੍ਡਿਤੋ ਸੋ ਤਾਦਿਸੋ ਪੁਗ੍ਗਲੋ ਕਿਲੇਸੇਹਿ ਦੇਵਪੁਤ੍ਤਮਾਰਾਦੀਸੁ ਵਾ ਕੇਨਚਿ ਅਸਂਹਾਰਿਯਤਾਯ ਅਸਂਹਾਰਿਯੋ ਨਾਮ ਹੋਤਿ, ਯਥਾਵੁਤ੍ਤੇਨ ਅਤ੍ਥੇਨ ਪਣ੍ਡਿਤੋ ਚ ਨਾਮ ਹੋਤਿ. ਸੇਸਂ ਵੁਤ੍ਤਨਯਮੇਵ.

ਬਹੁਸ੍ਸੁਤੋਤਿ ਪਰਿਯਤ੍ਤਿਬਾਹੁਸਚ੍ਚਵਸੇਨ ਬਹੁਸ੍ਸੁਤੋ, ਸੁਤ੍ਤਗੇਯ੍ਯਾਦਿ ਬਹੁਂ ਸੁਤਂ ਏਤਸ੍ਸਾਤਿ ਬਹੁਸ੍ਸੁਤੋ. ਤਮੇਵ ਧਮ੍ਮਂ ਸੁਵਣ੍ਣਭਾਜਨੇ ਪਕ੍ਖਿਤ੍ਤਸੀਹਵਸਂ ਵਿਯ ਅਵਿਨਸ੍ਸਨ੍ਤਮੇਵ ਧਾਰੇਤੀਤਿ ਧਮ੍ਮਧਰੋ ਚ ਹੋਤਿ. ਧਮ੍ਮਸ੍ਸ ਹੋਤਿ ਅਨੁਧਮ੍ਮਚਾਰੀਤਿ ਯਥਾਸੁਤਸ੍ਸ ਯਥਾਪਰਿਯਤ੍ਤਸ੍ਸ ਧਮ੍ਮਸ੍ਸ ਅਤ੍ਥਮਞ੍ਞਾਯ ਧਮ੍ਮਮਞ੍ਞਾਯ ਨਵਲੋਕੁਤ੍ਤਰਧਮ੍ਮਸ੍ਸ ਅਨੁਰੂਪਂ ਧਮ੍ਮਂ ਪੁਬ੍ਬਭਾਗਪਟਿਪਦਾਸਙ੍ਖਾਤਂ ਚਤੁਪਾਰਿਸੁਦ੍ਧਿਸੀਲਧੁਤਙ੍ਗਅਸੁਭਕਮ੍ਮਟ੍ਠਾਨਾਦਿਭੇਦਂ ਚਰਤਿ ਪਟਿਪਜ੍ਜਤੀਤਿ ਅਨੁਧਮ੍ਮਚਾਰੀ ਹੋਤਿ, ‘‘ਅਜ੍ਜ ਅਜ੍ਜੇਵਾ’’ਤਿ ਪਟਿਵੇਧਂ ਆਕਙ੍ਖਨ੍ਤੋ ਵਿਚਰਤਿ. ਸੋ ਤਾਦਿਸੋ ਨਾਮ ਚ ਹੋਤਿ ਪਣ੍ਡਿਤੋਤਿ ਯੋ ਪੁਗ੍ਗਲੋ ਯਂ ਗਰੁਂ ਨਿਸ੍ਸਾਯ ਬਹੁਸ੍ਸੁਤੋ ਧਮ੍ਮਧਰੋ ਧਮ੍ਮਸ੍ਸ ਚ ਅਨੁਧਮ੍ਮਚਾਰੀ ਹੋਤਿ. ਸੋ ਚ ਤਾਦਿਸੋ ਤੇਨ ਗਰੁਨਾ ਸਦਿਸੋ ਪਣ੍ਡਿਤੋ ਨਾਮ ਹੋਤਿ ਪਟਿਪਤ੍ਤਿਯਾ ਸਦਿਸਭਾਵਤੋ. ਤਥਾਭੂਤੋ ਪਨ ਸੋ ਞਤ੍ਵਾ ਚ ਧਮ੍ਮੇਸੁ ਵਿਸੇਸਿ ਅਸ੍ਸ, ਤਂ ਵੁਤ੍ਤਤ੍ਥਂਵ.

ਅਤ੍ਥਞ੍ਚ ਯੋ ਜਾਨਾਤਿ ਭਾਸਿਤਸ੍ਸਾਤਿ ਯੋ ਪੁਗ੍ਗਲੋ ਸਮ੍ਮਾਸਮ੍ਬੁਦ੍ਧੇਨ ਭਾਸਿਤਸ੍ਸ ਪਰਿਯਤ੍ਤਿਧਮ੍ਮਸ੍ਸ ਅਤ੍ਥਂ ਜਾਨਾਤਿ. ਜਾਨਨ੍ਤੋ ਪਨ ‘‘ਇਧ ਸੀਲਂ ਵੁਤ੍ਤਂ, ਇਧ ਸਮਾਧਿ, ਇਧ ਪਞ੍ਞਾ’’ਤਿ ਤਤ੍ਥ ਤਤ੍ਥ ਯਥਾਵੁਤ੍ਤਂ ਅਤ੍ਥਞ੍ਚ ਞਤ੍ਵਾਨ ਤਥਾ ਕਰੋਤਿ ਯਥਾ ਸਤ੍ਥਾਰਾ ਅਨੁਸਿਟ੍ਠਂ, ਤਥਾ ਪਟਿਪਜ੍ਜਤਿ. ਅਤ੍ਥਨ੍ਤਰੋ ਨਾਮ ਸ ਹੋਤਿ ਪਣ੍ਡਿਤੋਤਿ ਸੋ ਏਵਰੂਪੋ ਪੁਗ੍ਗਲੋ ਅਤ੍ਥਨ੍ਤਰੋ ਅਤ੍ਥਕਾਰਣਾ ਸੀਲਾਦਿਅਤ੍ਥਜਾਨਨਮਤ੍ਤਮੇਵ ਉਪਨਿਸ੍ਸਯਂ ਕਤ੍ਵਾ ਪਣ੍ਡਿਤੋ ਹੋਤਿ. ਸੇਸਂ ਵੁਤ੍ਤਨਯਮੇਵ.

ਏਤ੍ਥ ਚ ਪਠਮਗਾਥਾਯ ‘‘ਯੋ ਵੇ ਗਰੂਨ’’ਨ੍ਤਿਆਦਿਨਾ ਸਦ੍ਧੂਪਨਿਸ੍ਸਯੋ ਵਿਸੇਸਭਾਵੋ ਵੁਤ੍ਤੋ, ਦੁਤਿਯਗਾਥਾਯ ‘‘ਯਂ ਆਪਦਾ’’ਤਿ ਆਦਿਨਾ ਵੀਰਿਯੂਪਨਿਸ੍ਸਯੋ, ਤਤਿਯਗਾਥਾਯ ‘‘ਯੋ ਵੇ ਸਮੁਦ੍ਦੋਵ ਠਿਤੋ’’ਤਿਆਦਿਨਾ ਸਮਾਧੂਪਨਿਸ੍ਸਯੋ, ਚਤੁਤ੍ਥਗਾਥਾਯ ‘‘ਬਹੁਸ੍ਸੁਤੋ’’ਤਿਆਦਿਨਾ ਸਤੂਪਨਿਸ੍ਸਯੋ, ਪਞ੍ਚਮਗਾਥਾਯ ‘‘ਅਤ੍ਥਞ੍ਚ ਯੋ ਜਾਨਾਤੀ’’ਤਿਆਦਿਨਾ ਪਞ੍ਞੂਪਨਿਸ੍ਸਯੋ ਵਿਸੇਸਭਾਵੋ ਵੁਤ੍ਤੋਤਿ ਵੇਦਿਤਬ੍ਬੋ.

ਕੋਸਿਯਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

ਪਞ੍ਚਕਨਿਪਾਤਵਣ੍ਣਨਾ ਨਿਟ੍ਠਿਤਾ.