੭. ਸਮ੍ਭੂਤਤ੍ਥੇਰਗਾਥਾਵਣ੍ਣਨਾ

ਯੋ ਦਨ੍ਧਕਾਲੇਤਿਆਦਿਕਾ ਆਯਸ੍ਮਤੋ ਸਮ੍ਭੂਤਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਕਰੋਨ੍ਤੋ ਬੁਦ੍ਧਸੁਞ੍ਞੇ ਲੋਕੇ ਚਨ੍ਦਭਾਗਾਯ ਨਦਿਯਾ ਤੀਰੇ ਕਿਨ੍ਨਰਯੋਨਿਯਂ ਨਿਬ੍ਬਤ੍ਤੋ. ਏਕਦਿਵਸਂ ਅਞ੍ਞਤਰਂ ਪਚ੍ਚੇਕਬੁਦ੍ਧਂ ਦਿਸ੍ਵਾ ਪਸਨ੍ਨਮਾਨਸੋ ਵਨ੍ਦਿਤ੍ਵਾ ਕਤਞ੍ਜਲੀ ਅਜ੍ਜੁਨਪੁਪ੍ਫੇਹਿ ਪੂਜਂ ਅਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਸਮ੍ਭੂਤੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਭਗਵਤੋ ਪਰਿਨਿਬ੍ਬਾਨਸ੍ਸ ਪਚ੍ਛਾ ਧਮ੍ਮਭਣ੍ਡਾਗਾਰਿਕਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਸਮਣਧਮ੍ਮਂ ਕਰੋਨ੍ਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੫੨.੨੮-੩੬) –

‘‘ਚਨ੍ਦਭਾਗਾਨਦੀਤੀਰੇ, ਅਹੋਸਿਂ ਕਿਨ੍ਨਰੋ ਤਦਾ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਸਯਮ੍ਭੁਂ ਅਪਰਾਜਿਤਂ.

‘‘ਪਸਨ੍ਨਚਿਤ੍ਤੋ ਸੁਮਨੋ, ਵੇਦਜਾਤੋ ਕਤਞ੍ਜਲੀ;

ਗਹੇਤ੍ਵਾ ਅਜ੍ਜੁਨਂ ਪੁਪ੍ਫਂ, ਸਯਮ੍ਭੁਂ ਅਭਿਪੂਜਯਿਂ.

‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਕਿਨ੍ਨਰਂ ਦੇਹਂ, ਤਾਵਤਿਂਸਮਗਚ੍ਛਹਂ.

‘‘ਛਤ੍ਤਿਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਮਕਾਰਯਿਂ;

ਦਸਕ੍ਖਤ੍ਤੁਂ ਚਕ੍ਕਵਤ੍ਤੀ, ਮਹਾਰਜ੍ਜਮਕਾਰਯਿਂ.

‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਸੁਖੇਤ੍ਤੇ ਵਪ੍ਪਿਤਂ ਬੀਜਂ, ਸਯਮ੍ਭੁਮ੍ਹਿ ਅਹੋ ਮਮ.

‘‘ਕੁਸਲਂ ਵਿਜ੍ਜਤੇ ਮਯ੍ਹਂ, ਪਬ੍ਬਜਿਂ ਅਨਗਾਰਿਯਂ;

ਪੂਜਾਰਹੋ ਅਹਂ ਅਜ੍ਜ, ਸਕ੍ਯਪੁਤ੍ਤਸ੍ਸ ਸਾਸਨੇ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਵਿਮੁਤ੍ਤਿਸੁਖੇਨ ਵਿਹਰਨ੍ਤੋ ਵਸ੍ਸਸਤਪਰਿਨਿਬ੍ਬੁਤੇ ਭਗਵਤਿ ਵੇਸਾਲਿਕੇਸੁ ਵਜ੍ਜਿਪੁਤ੍ਤਕੇਸੁ ਦਸ ਵਤ੍ਥੂਨਿ ਪਗ੍ਗਯ੍ਹ ਠਿਤੇਸੁ ਕਾਕਣ੍ਡਕਪੁਤ੍ਤੇਨ ਯਸਤ੍ਥੇਰੇਨ ਉਸ੍ਸਾਹਿਤੇਹਿ ਸਤ੍ਤਸਤੇਹਿ ਖੀਣਾਸਵੇਹਿ ਤਂ ਦਿਟ੍ਠਿਂ ਭਿਨ੍ਦਿਤ੍ਵਾ ਸਦ੍ਧਮ੍ਮਂ ਪਗ੍ਗਣ੍ਹਨ੍ਤੇਹਿ ਧਮ੍ਮਵਿਨਯਸਙ੍ਗਹੇ ਕਤੇ ਤੇਸਂ ਵਜ੍ਜਿਪੁਤ੍ਤਕਾਨਂ ਉਦ੍ਧਮ੍ਮਉਬ੍ਬਿਨਯਦੀਪਨੇ ਧਮ੍ਮਸਂਵੇਗੇਨ ਥੇਰੋ –

੨੯੧. ‘‘ਯੋ ਦਨ੍ਧਕਾਲੇ ਤਰਤਿ, ਤਰਣੀਯੇ ਚ ਦਨ੍ਧਯੇ;

ਅਯੋਨਿਸਂਵਿਧਾਨੇਨ, ਬਾਲੋ ਦੁਕ੍ਖਂ ਨਿਗਚ੍ਛਤਿ.

੨੯੨. ‘‘ਤਸ੍ਸਤ੍ਥਾ ਪਰਿਹਾਯਨ੍ਤਿ, ਕਾਲ਼ਪਕ੍ਖੇਵ ਚਨ੍ਦਿਮਾ;

ਆਯਸਕ੍ਯਞ੍ਚ ਪਪ੍ਪੋਤਿ, ਮਿਤ੍ਤੇਹਿ ਚ ਵਿਰੁਜ੍ਝਤਿ.

੨੯੩. ‘‘ਯੋ ਦਨ੍ਧਕਾਲੇ ਦਨ੍ਧੇਤਿ, ਤਰਣੀਯੇ ਚ ਤਾਰਯੇ;

ਯੋਨਿਸੋ ਸਂਵਿਧਾਨੇਨ, ਸੁਖਂ ਪਪ੍ਪੋਤਿ ਪਣ੍ਡਿਤੋ.

੨੯੪. ‘‘ਤਸ੍ਸਤ੍ਥਾ ਪਰਿਪੂਰੇਨ੍ਤਿ, ਸੁਕ੍ਕਪਕ੍ਖੇਵ ਚਨ੍ਦਿਮਾ;

ਯਸੋ ਕਿਤ੍ਤਿਞ੍ਚ ਪਪ੍ਪੋਤਿ, ਮਿਤ੍ਤੇਹਿ ਨ ਵਿਰੁਜ੍ਝਤੀ’’ਤਿ. –

ਇਮਾ ਗਾਥਾ ਭਣਨ੍ਤੋ ਅਞ੍ਞਂ ਬ੍ਯਾਕਾਸਿ.

ਤਤ੍ਥ ਯੋ ਦਨ੍ਧਕਾਲੇ ਤਰਤੀਤਿ ਕਿਸ੍ਮਿਞ੍ਚਿ ਕਤ੍ਤਬ੍ਬਵਤ੍ਥੁਸ੍ਮਿਂ – ‘‘ਕਪ੍ਪਤਿ ਨੁ ਖੋ, ਨ ਨੁ ਖੋ ਕਪ੍ਪਤੀ’’ਤਿ ਵਿਨਯਕੁਕ੍ਕੁਚ੍ਚੇ ਉਪ੍ਪਨ੍ਨੇ ਯਾਵ ਵਿਯਤ੍ਤਂ ਵਿਨਯਧਰਂ ਪੁਚ੍ਛਿਤ੍ਵਾ ਤਂ ਕੁਕ੍ਕੁਚ੍ਚਂ ਨ ਵਿਨੋਦੇਤਿ, ਤਾਵ ਦਨ੍ਧਕਾਲੇ ਤਸ੍ਸ ਕਿਚ੍ਚਸ੍ਸ ਦਨ੍ਧਾਯਿਤਬ੍ਬਸਮਯੇ ਤਰਤਿ ਮਦ੍ਦਿਤ੍ਵਾ ਵੀਤਿਕ੍ਕਮਂ ਕਰੋਤਿ. ਤਰਣੀਯੇ ਚ ਦਨ੍ਧਯੇਤਿ ਗਹਟ੍ਠਸ੍ਸ ਤਾਵ ਸਰਣਗਮਨਸੀਲਸਮਾਦਾਨਾਦਿਕੇ, ਪਬ੍ਬਜਿਤਸ੍ਸ ਵਤ੍ਤਪਟਿਵਤ੍ਤਕਰਣਾਦਿਕੇ ਸਮਥਵਿਪਸ੍ਸਨਾਨੁਯੋਗੇ ਚ ਤਰਿਤਬ੍ਬੇ ਸਮ੍ਪਤ੍ਤੇ ਸੀਘਂ ਤਂ ਕਿਚ੍ਚਂ ਅਨਨੁਯੁਞ੍ਜਿਤ੍ਵਾ – ‘‘ਆਗਮਨਮਾਸੇ ਪਕ੍ਖੇ ਵਾ ਕਰਿਸ੍ਸਾਮੀ’’ਤਿ ਦਨ੍ਧਾਯੇਯ੍ਯ, ਤਂ ਕਿਚ੍ਚਂ ਅਕਰੋਨ੍ਤੋਵ ਕਾਲਂ ਵੀਤਿਨਾਮੇਯ੍ਯ. ਅਯੋਨਿਸਂਵਿਧਾਨੇਨਾਤਿ ਏਵਂ ਦਨ੍ਧਾਯਿਤਬ੍ਬੇ ਤਰਨ੍ਤੋ ਤਰਿਤਬ੍ਬੇ ਚ ਦਨ੍ਧਾਯਨ੍ਤੋ ਅਨੁਪਾਯਸਂਵਿਧਾਨੇਨ ਉਪਾਯਸਂਵਿਧਾਨਾਭਾਵੇਨ ਬਾਲੋ, ਮਨ੍ਦਬੁਦ੍ਧਿਕੋ ਪੁਗ੍ਗਲੋ, ਸਮ੍ਪਤਿ ਆਯਤਿਞ੍ਚ ਦੁਕ੍ਖਂ ਅਨਤ੍ਥਂ ਪਾਪੁਣਾਤਿ.

ਤਸ੍ਸਤ੍ਥਾ ਪਰਿਹਾਯਨ੍ਤੀਤਿ ਤਸ੍ਸ ਤਥਾਰੂਪਸ੍ਸ ਪੁਗ੍ਗਲਸ੍ਸ ਦਿਟ੍ਠਧਮ੍ਮਿਕਾਦਿਭੇਦਾ ਅਤ੍ਥਾ ਕਾਲ਼ਪਕ੍ਖੇ ਚਨ੍ਦਿਮਾ ਵਿਯ, ਪਰਿਹਾਯਨ੍ਤਿ ਦਿਵਸੇ ਦਿਵਸੇ ਪਰਿਕ੍ਖਯਂ ਪਰਿਯਾਦਾਨਂ ਗਚ੍ਛਨ੍ਤਿ. ‘‘ਅਸੁਕੋ ਪੁਗ੍ਗਲੋ ਅਸ੍ਸਦ੍ਧੋ ਅਪ੍ਪਸਨ੍ਨੋ ਕੁਸੀਤੋ ਹੀਨਵੀਰਿਯੋ’’ਤਿਆਦਿਨਾ. ਆਯਸਕ੍ਯਂ ਵਿਞ੍ਞੂਹਿ ਗਰਹਿਤਬ੍ਬਤਂ ਪਪ੍ਪੋਤਿ ਪਾਪੁਣਾਤਿ. ਮਿਤ੍ਤੇਹਿ ਚ ਵਿਰੁਜ੍ਝਤੀਤਿ ‘‘ਏਵਂ ਪਟਿਪਜ੍ਜ, ਮਾ ਏਵਂ ਪਟਿਪਜ੍ਜਾ’’ਤਿ ਓਵਾਦਦਾਯਕੇਹਿ ਕਲ੍ਯਾਣਮਿਤ੍ਤੇਹਿ ‘‘ਅਵਚਨੀਯਾ ਮਯ’’ਨ੍ਤਿ ਓਵਾਦਸ੍ਸ ਅਨਾਦਾਨੇਨੇਵ ਵਿਰੁਦ੍ਧੋ ਨਾਮ ਹੋਤਿ.

ਸੇਸਗਾਥਾਦ੍ਵਯਸ੍ਸ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ. ਕੇਚਿ ਪਨੇਤ੍ਥ – ‘‘ਤਰਤਿ ਦਨ੍ਧਯੇ’’ਤਿਪਦਾਨਂ ਅਤ੍ਥਭਾਵੇਨ ਭਾਵਨਾਚਿਤ੍ਤਸ੍ਸ ਪਗ੍ਗਹਨਿਗ੍ਗਹੇ ਉਦ੍ਧਰਨ੍ਤਿ. ਤਂ ਪਚ੍ਛਿਮਗਾਥਾਸੁ ਯੁਜ੍ਜਤਿ. ਪੁਰਿਮਾ ਹਿ ਦ੍ਵੇ ਗਾਥਾ ਪਬ੍ਬਜਿਤਕਾਲਤੋ ਪਟ੍ਠਾਯ ਚਰਿਤਬ੍ਬਂ ਸਮਣਧਮ੍ਮਂ ਅਕਤ੍ਵਾ ਕੁਕ੍ਕੁਚ੍ਚਪਕਤਤਾਯ ਦਸ ਵਤ੍ਥੂਨਿ ਦੀਪੇਤ੍ਵਾ ਸਙ੍ਘੇਨ ਨਿਕ੍ਕਡ੍ਢਿਤੇ ਵਜ੍ਜਿਪੁਤ੍ਤਕੇ ਸਨ੍ਧਾਯ ਥੇਰੇਨ ਵੁਤ੍ਤਾ. ਪਚ੍ਛਿਮਾ ਪਨ ਅਤ੍ਤਸਦਿਸੇ ਸਮ੍ਮਾ ਪਟਿਪਨ੍ਨੇ ਸਕਤ੍ਥਂ ਨਿਪ੍ਫਾਦੇਤ੍ਵਾ ਠਿਤੇਤਿ.

ਸਮ੍ਭੂਤਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.