੬. ਸੇਨਕਤ੍ਥੇਰਗਾਥਾਵਣ੍ਣਨਾ

ਸ੍ਵਾਗਤਂ ਵਤਾਤਿਆਦਿਕਾ ਆਯਸ੍ਮਤੋ ਸੇਨਕਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸਤ੍ਥਾਰਂ ਦਿਸ੍ਵਾ ਪਸਨ੍ਨਮਾਨਸੋ ਮੋਰਹਤ੍ਥੇਨ ਭਗਵਨ੍ਤਂ ਪੂਜੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਉਰੁਵੇਲਕਸ੍ਸਪਤ੍ਥੇਰਸ੍ਸ ਭਗਿਨਿਯਾ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ, ਸੇਨਕੋਤਿਸ੍ਸ ਨਾਮਂ ਅਹੋਸਿ. ਸੋ ਵਯਪ੍ਪਤ੍ਤੋ ਬ੍ਰਾਹ੍ਮਣਾਨਂ ਵਿਜ੍ਜਾਸਿਪ੍ਪੇਸੁ ਨਿਪ੍ਫਤ੍ਤਿਂ ਗਤੋ ਘਰਾਵਾਸਂ ਵਸਤਿ. ਤੇਨ ਚ ਸਮਯੇਨ ਮਹਾਜਨੋ ਸਂਵਚ੍ਛਰੇ ਸਂਵਚ੍ਛਰੇ ਫਗ੍ਗੁਨਮਾਸੇ ਉਤ੍ਤਰਫਗ੍ਗੁਨਨਕ੍ਖਤ੍ਤੇ ਉਸ੍ਸਵਂ ਅਨੁਭਵਨ੍ਤੋ ਗਯਾਯਂ ਤਿਤ੍ਥਾਭਿਸੇਕਂ ਕਰੋਤਿ. ਤੇਨ ਤਂ ਉਸ੍ਸਵਂ ‘‘ਗਯਾਫਗ੍ਗੂ’’ਤਿ ਵਦਨ੍ਤਿ. ਅਥ ਭਗਵਾ ਤਾਦਿਸੇ ਉਸ੍ਸਵਦਿਵਸੇ ਵੇਨੇਯ੍ਯਾਨੁਕਮ੍ਪਾਯ ਗਯਾਤਿਤ੍ਥਸਮੀਪੇ ਵਿਹਰਤਿ, ਮਹਾਜਨੋਪਿ ਤਿਤ੍ਥਾਭਿਸੇਕਾਧਿਪ੍ਪਾਯੇਨ ਤਤੋ ਤਤੋ ਤਂ ਠਾਨਂ ਉਪਗਚ੍ਛਤਿ. ਤਸ੍ਮਿਂ ਖਣੇ ਸੇਨਕੋਪਿ ਤਿਤ੍ਥਾਭਿਸੇਕਤ੍ਥਂ ਤਂ ਠਾਨਂ ਉਪਗਤੋ ਸਤ੍ਥਾਰਂ ਧਮ੍ਮਂ ਦੇਸੇਨ੍ਤਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੪੬.੯-੧੬) –

‘‘ਮੋਰਹਤ੍ਥਂ ਗਹੇਤ੍ਵਾਨ, ਉਪੇਸਿਂ ਲੋਕਨਾਯਕਂ;

ਪਸਨ੍ਨਚਿਤ੍ਤੋ ਸੁਮਨੋ, ਮੋਰਹਤ੍ਥਮਦਾਸਹਂ.

‘‘ਇਮਿਨਾ ਮੋਰਹਤ੍ਥੇਨ, ਚੇਤਨਾਪਣਿਧੀਹਿ ਚ;

ਨਿਬ੍ਬਾਯਿਂਸੁ ਤਯੋ ਅਗ੍ਗੀ, ਲਭਾਮਿ ਵਿਪੁਲਂ ਸੁਖਂ.

‘‘ਅਹੋ ਬੁਦ੍ਧੋ ਅਹੋ ਧਮ੍ਮੋ, ਅਹੋ ਨੋ ਸਤ੍ਥੁਸਮ੍ਪਦਾ;

ਦਤ੍ਵਾਨਹਂ ਮੋਰਹਤ੍ਥਂ, ਲਭਾਮਿ ਵਿਪੁਲਂ ਸੁਖਂ.

‘‘ਤਿਯਗ੍ਗੀ ਨਿਬ੍ਬੁਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਸਬ੍ਬਾਸਵਾ ਪਰਿਕ੍ਖੀਣਾ, ਨਤ੍ਥਿ ਦਾਨਿ ਪੁਨਬ੍ਭਵੋ.

‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਮੋਰਹਤ੍ਥਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਸਞ੍ਜਾਤਸੋਮਨਸ੍ਸੋ ਉਦਾਨਵਸੇਨ –

੨੮੭. ‘‘ਸ੍ਵਾਗਤਂ ਵਤ ਮੇ ਆਸਿ, ਗਯਾਯਂ ਗਯਫਗ੍ਗੁਯਾ;

ਯਂ ਅਦ੍ਦਸਾਸਿਂ ਸਮ੍ਬੁਦ੍ਧਂ, ਦੇਸੇਨ੍ਤਂ ਧਮ੍ਮਮੁਤ੍ਤਮਂ.

੨੮੮. ‘‘ਮਹਪ੍ਪਭਂ ਗਣਾਚਰਿਯਂ, ਅਗ੍ਗਪਤ੍ਤਂ ਵਿਨਾਯਕਂ;

ਸਦੇਵਕਸ੍ਸ ਲੋਕਸ੍ਸ, ਜਿਨਂ ਅਤੁਲਦਸ੍ਸਨਂ.

੨੮੯. ‘‘ਮਹਾਨਾਗਂ ਮਹਾਵੀਰਂ, ਮਹਾਜੁਤਿਮਨਾਸਵਂ;

ਸਬ੍ਬਾਸਵਪਰਿਕ੍ਖੀਣਂ, ਸਤ੍ਥਾਰਮਕੁਤੋਭਯਂ.

੨੯੦. ‘‘ਚਿਰਸਙ੍ਕਿਲਿਟ੍ਠਂ ਵਤ ਮਂ, ਦਿਟ੍ਠਿਸਨ੍ਦਾਨਬਨ੍ਧਿਤਂ;

ਵਿਮੋਚਯਿ ਸੋ ਭਗਵਾ, ਸਬ੍ਬਗਨ੍ਥੇਹਿ ਸੇਨਕ’’ਨ੍ਤਿ. –

ਚਤਸ੍ਸੋ ਗਾਥਾ ਅਭਾਸਿ.

ਤਤ੍ਥ ਸ੍ਵਾਗਤਂ ਵਤ ਮੇ ਆਸੀਤਿ ਮਯਾ ਸੁਟ੍ਠੁ ਆਗਤਂ ਵਤ ਆਸਿ. ਮਮ ਵਾ ਸੁਨ੍ਦਰਂ ਵਤ ਆਗਮਨਂ ਆਸਿ. ਗਯਾਯਨ੍ਤਿ ਗਯਾਤਿਤ੍ਥਸਮੀਪੇ. ਗਯਫਗ੍ਗੁਯਾਤਿ ‘‘ਗਯਾਫਗ੍ਗੂ’’ਤਿ ਲਦ੍ਧਵੋਹਾਰੇ ਫਗ੍ਗੁਨਮਾਸਸ੍ਸ ਉਤ੍ਤਰਫਗ੍ਗੁਨੀਨਕ੍ਖਤ੍ਤੇ. ‘‘ਯ’’ਨ੍ਤਿਆਦਿ ਸ੍ਵਾਗਤਭਾਵਸ੍ਸ ਕਾਰਣਦਸ੍ਸਨਂ. ਤਤ੍ਥ ਯਨ੍ਤਿ ਯਸ੍ਮਾ. ਅਦ੍ਦਸਾਸਿਨ੍ਤਿ ਅਦ੍ਦਕ੍ਖਿਂ. ਸਮ੍ਬੁਦ੍ਧਨ੍ਤਿ ਸਮ੍ਮਾ ਸਾਮਂ ਸਬ੍ਬਧਮ੍ਮਾਨਂ ਬੁਦ੍ਧਤ੍ਤਾ ਸਮ੍ਬੁਦ੍ਧਂ. ਦੇਸੇਨ੍ਤਂ ਧਮ੍ਮਮੁਤ੍ਤਮਨ੍ਤਿ ਉਤ੍ਤਮਂ ਅਗ੍ਗਂ ਸਬ੍ਬਸੇਟ੍ਠਂ ਏਕਨ੍ਤਨਿਯ੍ਯਾਨਿਕਂ ਧਮ੍ਮਂ ਵੇਨੇਯ੍ਯਜ੍ਝਾਸਯਾਨੁਰੂਪਂ ਭਾਸਨ੍ਤਂ.

ਮਹਪ੍ਪਭਨ੍ਤਿ ਮਹਤਿਯਾ ਸਰੀਰਪ੍ਪਭਾਯ ਞਾਣਪ੍ਪਭਾਯ ਚ ਸਮਨ੍ਨਾਗਤਂ. ਗਣਾਚਰਿਯਨ੍ਤਿ ਭਿਕ੍ਖੁਪਰਿਸਾਦੀਨਂ ਗਣਾਨਂ ਉਤ੍ਤਮੇਨ ਦਮਥੇਨ ਆਚਾਰਸਿਕ੍ਖਾਪਨੇਨ ਗਣਾਚਰਿਯਂ. ਅਗ੍ਗਭੂਤਾਨਂ ਸੀਲਾਦੀਨਂ ਗੁਣਾਨਂ ਅਧਿਗਮੇਨ ਅਗ੍ਗਪ੍ਪਤ੍ਤਂ. ਦੇਵਮਨੁਸ੍ਸਾਦੀਨਂ ਪਰਮੇਨ ਵਿਨਯੇਨ ਵਿਨਯਨਤੋ, ਸਯਂ ਨਾਯਕਰਹਿਤਤ੍ਤਾ ਚ ਵਿਨਾਯਕਂ. ਕੇਨਚਿ ਅਨਭਿਭੂਤੋ ਹੁਤ੍ਵਾ ਸਕਲਂ ਲੋਕਂ ਅਭਿਭਵਿਤ੍ਵਾ ਠਿਤਤ੍ਤਾ, ਪਞ੍ਚਨ੍ਨਮ੍ਪਿ ਮਾਰਾਨਂ ਜਿਤਤ੍ਤਾ ਚ ਸਦੇਵਕਸ੍ਸ ਲੋਕਸ੍ਸ ਜਿਨਂ ਸਦੇਵਕੇ ਲੋਕੇ ਅਗ੍ਗਜਿਨਂ, ਬਾਤ੍ਤਿਂਸਵਰਮਹਾਪੁਰਿਸਲਕ੍ਖਣਅਸੀਤਿਅਨੁਬ੍ਯਞ੍ਜਨਾਦਿਪਟਿਮਣ੍ਡਿਤਰੂਪਕਾਯਤਾਯ ਦਸਬਲਚਤੁਵੇਸਾਰਜ੍ਜਾਦਿਗੁਣਪਟਿਮਣ੍ਡਿਤਧਮ੍ਮਕਾਯਤਾਯ ਚ ਸਦੇਵਕੇਨ ਲੋਕੇਨ ਅਪਰਿਮੇਯ੍ਯਦਸ੍ਸਨਤਾਯ ਅਸਦਿਸਦਸ੍ਸਨਤਾਯ ਚ ਅਤੁਲਦਸ੍ਸਨਂ.

ਗਤਿਬਲਪਰਕ੍ਕਮਾਦਿਸਮ੍ਪਤ੍ਤਿਯਾ ਮਹਾਨਾਗਸਦਿਸਤ੍ਤਾ, ਨਾਗੇਸੁਪਿ ਖੀਣਾਸਵੇਸੁ ਮਹਾਨੁਭਾਵਤਾਯ ਚ ਮਹਾਨਾਗਂ. ਮਾਰਸੇਨਾਵਿਮਥਨਤੋ ਮਹਾਵਿਕ੍ਕਨ੍ਤਤਾਯ ਚ ਮਹਾਵੀਰਂ. ਮਹਾਜੁਤਿਨ੍ਤਿ ਮਹਾਪਤਾਪਂ ਮਹਾਤੇਜਨ੍ਤਿ ਅਤ੍ਥੋ. ਨਤ੍ਥਿ ਏਤਸ੍ਸ ਚਤ੍ਤਾਰੋਪਿ ਆਸਵਾਤਿ ਅਨਾਸਵਂ. ਸਬ੍ਬੇ ਆਸਵਾ ਸਵਾਸਨਾ ਪਰਿਕ੍ਖੀਣਾ ਏਤਸ੍ਸਾਤਿ ਸਬ੍ਬਾਸਵਪਰਿਕ੍ਖੀਣਂ. ਕਾਮਂ ਸਾਵਕਬੁਦ੍ਧਾ ਪਚ੍ਚੇਕਬੁਦ੍ਧਾ ਚ ਖੀਣਾਸਵਾਵ, ਸਬ੍ਬਞ੍ਞੁਬੁਦ੍ਧਾ ਏਵ ਪਨ ਸਵਾਸਨੇ ਆਸਵੇ ਖੇਪੇਨ੍ਤੀਤਿ ਦਸ੍ਸਨਤ੍ਥਂ ‘‘ਅਨਾਸਵ’’ਨ੍ਤਿ ਵਤ੍ਵਾ ਪੁਨ ‘‘ਸਬ੍ਬਾਸਵਪਰਿਕ੍ਖੀਣ’’ਨ੍ਤਿ ਵੁਤ੍ਤਂ. ਤੇਨ ਵੁਤ੍ਤਂ – ‘‘ਸਬ੍ਬੇ ਆਸਵਾ ਸਵਾਸਨਾ ਪਰਿਕ੍ਖੀਣਾ ਏਤਸ੍ਸਾਤਿ ਸਬ੍ਬਾਸਵਪਰਿਕ੍ਖੀਣ’’ਨ੍ਤਿ. ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥੇਹਿ ਯਥਾਰਹਂ ਵੇਨੇਯ੍ਯਾਨਂ ਅਨੁਸਾਸਨਤੋ ਸਤ੍ਥਾਰਂ, ਚਤੁਵੇਸਾਰਜ੍ਜਵਿਸਾਰਦਤਾਯ ਕੁਤੋਚਿਪਿ ਭਯਾਭਾਵਤੋ ਅਕੁਤੋਭਯਂ, ਏਵਰੂਪਂ ਸਮ੍ਮਾਸਮ੍ਬੁਦ੍ਧਂ ਯਂ ਯਸ੍ਮਾ ਅਦ੍ਦਸਾਸਿਂ, ਤਸ੍ਮਾ ਸ੍ਵਾਗਤਂ ਵਤ ਮੇ ਆਸੀਤਿ ਯੋਜਨਾ.

ਇਦਾਨਿ ਸਤ੍ਥੁ ਦਸ੍ਸਨੇਨ ਅਤ੍ਤਨਾ ਲਦ੍ਧਗੁਣਂ ਦਸ੍ਸੇਨ੍ਤੋ ਚਤੁਤ੍ਥਂ ਗਾਥਮਾਹ. ਤਸ੍ਸਤ੍ਥੋ – ਕਞ੍ਜਿਯਪੁਣ੍ਣਲਾਬੁ ਵਿਯ ਤਕ੍ਕਭਰਿਤਚਾਟਿ ਵਿਯ ਵਸਾਪੀਤਪਿਲੋਤਿਕਾ ਵਿਯ ਚ ਸਂਕਿਲੇਸਵਤ੍ਥੂਹਿ ਅਨਮਤਗ੍ਗੇ ਸਂਸਾਰੇ ਚਿਰਕਾਲਂ ਸਂਕਿਲਿਟ੍ਠਂ. ਗਦ੍ਦੁਲਬਨ੍ਧਿਤਂ ਵਿਯ ਥਮ੍ਭੇ ਸਾਰਮੇਯਂ ਸਕ੍ਕਾਯਥਮ੍ਭੇ ਦਿਟ੍ਠਿਸਨ੍ਦਾਨੇਨ, ਦਿਟ੍ਠਿਬਨ੍ਧਨੇਨ ਬਨ੍ਧਿਤਂ ਬਦ੍ਧਂ, ਤਤੋ ਵਿਮੋਚੇਨ੍ਤੋ ਚ ਅਭਿਜ੍ਝਾਦੀਹਿ ਸਬ੍ਬਗਨ੍ਥੇ ਹਿ ਮਂ ਸੇਨਕਂ ਅਰਿਯਮਗ੍ਗਹਤ੍ਥੇਨ, ਵਿਮੋਚਯਿ ਵਤ ਸੋ ਭਗਵਾ ਮਯ੍ਹਂ ਸਤ੍ਥਾਤਿ ਭਗਵਤਿ ਅਭਿਪ੍ਪਸਾਦਂ ਪਵੇਦੇਤਿ.

ਸੇਨਕਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.