੧੧. ਸਪ੍ਪਕਤ੍ਥੇਰਗਾਥਾਵਣ੍ਣਨਾ

ਯਦਾ ਬਲਾਕਾਤਿਆਦਿਕਾ ਆਯਸ੍ਮਤੋ ਸਪ੍ਪਕਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਇਤੋ ਏਕਤਿਂਸੇ ਕਪ੍ਪੇ ਮਹਾਨੁਭਾਵੋ ਨਾਗਰਾਜਾ ਹੁਤ੍ਵਾ ਨਿਬ੍ਬਤ੍ਤੋ ਸਮ੍ਭਵਸ੍ਸ ਨਾਮ ਪਚ੍ਚੇਕਬੁਦ੍ਧਸ੍ਸ ਅਬ੍ਭੋਕਾਸੇ ਸਮਾਪਤ੍ਤਿਯਾ ਨਿਸਿਨ੍ਨਸ੍ਸ ਮਹਨ੍ਤਂ ਪਦੁਮਂ ਗਹੇਤ੍ਵਾ ਉਪਰਿਮੁਦ੍ਧਨਿ ਧਾਰੇਨ੍ਤੋ ਪੂਜਂ ਅਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਸਪ੍ਪਕੋਤਿ ਲਦ੍ਧਨਾਮੋ ਵਿਞ੍ਞੁਤਂ ਪਤ੍ਤੋ ਭਗਵਤੋ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਕਮ੍ਮਟ੍ਠਾਨਂ ਗਹੇਤ੍ਵਾ ਅਜਕਰਣਿਯਾ ਨਾਮ ਨਦਿਯਾ ਤੀਰੇ ਲੇਣਗਿਰਿਵਿਹਾਰੇ ਵਸਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੫੨.੭੮-੮੩) –

‘‘ਹਿਮਵਨ੍ਤਸ੍ਸਾਵਿਦੂਰੇ, ਰੋਮਸੋ ਨਾਮ ਪਬ੍ਬਤੋ;

ਬੁਦ੍ਧੋਪਿ ਸਮ੍ਭਵੋ ਨਾਮ, ਅਬ੍ਭੋਕਾਸੇ ਵਸੀ ਤਦਾ.

‘‘ਭਵਨਾ ਨਿਕ੍ਖਮਿਤ੍ਵਾਨ, ਪਦੁਮਂ ਧਾਰਯਿਂ ਅਹਂ;

ਏਕਾਹਂ ਧਾਰਯਿਤ੍ਵਾਨ, ਭਵਨਂ ਪੁਨਰਾਗਮਿਂ.

‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਬੁਦ੍ਧਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਸੋ ਅਰਹਤ੍ਤਂ ਪਤ੍ਵਾ ਸਤ੍ਥਾਰਂ ਵਨ੍ਦਿਤੁਂ ਸਾਵਤ੍ਥਿਂ ਆਗਤੋ ਞਾਤੀਹਿ ਉਪਟ੍ਠੀਯਮਾਨੋ ਤਤ੍ਥ ਕਤਿਪਾਹਂ ਵਸਿਤ੍ਵਾ ਧਮ੍ਮਂ ਦੇਸੇਤ੍ਵਾ ਞਾਤਕੇ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਪੇਤ੍ਵਾ ਯਥਾਵੁਤ੍ਤਟ੍ਠਾਨਮੇਵ ਗਨ੍ਤੁਕਾਮੋ ਅਹੋਸਿ. ਤਂ ਞਾਤਕਾ ‘‘ਇਧੇਵ, ਭਨ੍ਤੇ, ਵਸਥ, ਮਯਂ ਪਟਿਜਗ੍ਗਿਸ੍ਸਾਮਾ’’ਤਿ ਯਾਚਿਂਸੁ. ਸੋ ਗਮਨਾਕਾਰਂ ਦਸ੍ਸੇਤ੍ਵਾ ਠਿਤੋ ਅਤ੍ਤਨਾ ਵਸਿਤਟ੍ਠਾਨਕਿਤ੍ਤਨਾਪਦੇਸੇਨ ਵਿਵੇਕਾਭਿਰਤਿਂ ਪਕਾਸੇਨ੍ਤੋ –

੩੦੭. ‘‘ਯਦਾ ਬਲਾਕਾ ਸੁਚਿਪਣ੍ਡਰਚ੍ਛਦਾ, ਕਾਲ਼ਸ੍ਸ ਮੇਘਸ੍ਸ ਭਯੇਨ ਤਜ੍ਜਿਤਾ;

ਪਲੇਹਿਤਿ ਆਲਯਮਾਲਯੇਸਿਨੀ, ਤਦਾ ਨਦੀ ਅਜਕਰਣੀ ਰਮੇਤਿ ਮਂ.

੩੦੮. ‘‘ਯਦਾ ਬਲਾਕਾ ਸੁਵਿਸੁਦ੍ਧਪਣ੍ਡਰਾ, ਕਾਲ਼ਸ੍ਸ ਮੇਘਸ੍ਸ ਭਯੇਨ ਤਜ੍ਜਿਤਾ;

ਪਰਿਯੇਸਤਿ ਲੇਣਮਲੇਣਦਸ੍ਸਿਨੀ, ਤਦਾ ਨਦੀ ਅਜਕਰਣੀ ਰਮੇਤਿ ਮਂ.

੩੦੯. ‘‘ਕਂ ਨੁ ਤਤ੍ਥ ਨ ਰਮੇਨ੍ਤਿ, ਜਮ੍ਬੁਯੋ ਉਭਤੋ ਤਹਿਂ;

ਸੋਭੇਨ੍ਤੀ ਆਪਗਾਕੂਲਂ, ਮਮ ਲੇਣਸ੍ਸ ਪਚ੍ਛਤੋ.

੩੧੦. ‘‘ਤਾਮਤਮਦਸਙ੍ਘਸੁਪ੍ਪਹੀਨਾ, ਭੇਕਾ ਮਨ੍ਦਵਤੀ ਪਨਾਦਯਨ੍ਤਿ;

ਨਾਜ੍ਜ ਗਿਰਿਨਦੀਹਿ ਵਿਪ੍ਪਵਾਸਸਮਯੋ,

ਖੇਮਾ ਅਜਕਰਣੀ ਸਿਵਾ ਸੁਰਮ੍ਮਾ’’ਤਿ. – ਚਤਸ੍ਸੋ ਗਾਥਾ ਅਭਾਸਿ;

ਤਤ੍ਥ ਯਦਾਤਿ ਯਸ੍ਮਿਂ ਕਾਲੇ. ਬਲਾਕਾਤਿ ਬਲਾਕਾਸਕੁਣਿਕਾ. ਸੁਚਿਪਣ੍ਡਰਚ੍ਛਦਾਤਿ ਸੁਚਿਸੁਦ੍ਧਧਵਲਪਕ੍ਖਾ. ਕਾਲ਼ਸ੍ਸ ਮੇਘਸ੍ਸ ਭਯੇਨ ਤਜ੍ਜਿਤਾਤਿ ਜਲਭਾਰਭਰਿਤਤਾਯ ਕਾਲ਼ਸ੍ਸ ਅਞ੍ਜਨਗਿਰਿਸਨ੍ਨਿਕਾਸਸ੍ਸ ਪਾਵੁਸ੍ਸਕਮੇਘਸ੍ਸ ਗਜ੍ਜਤੋ ਵੁਟ੍ਠਿਭਯੇਨ ਨਿਬ੍ਬਿਜ੍ਜਿਤਾ ਭਿਂਸਾਪਿਤਾ. ਪਲੇਹਿਤੀਤਿ ਗੋਚਰਭੂਮਿਤੋ ਉਪ੍ਪਤਿਤ੍ਵਾ ਗਮਿਸ੍ਸਤਿ. ਆਲਯਨ੍ਤਿ ਨਿਲਯਂ ਅਤ੍ਤਨੋ ਕੁਲਾਵਕਂ. ਆਲਯੇਸਿਨੀਤਿ ਤਤ੍ਥ ਆਲਯਨਂ ਨਿਲੀਯਨਮੇਵ ਇਚ੍ਛਨ੍ਤੀ. ਤਦਾ ਨਦੀ ਅਜਕਰਣੀ ਰਮੇਤਿ ਮਨ੍ਤਿ ਤਸ੍ਮਿਂ ਪਾਵੁਸ੍ਸਕਕਾਲੇ ਅਜਕਰਣੀਨਾਮਿਕਾ ਨਦੀ ਨਵੋਦਕਸ੍ਸ ਪੂਰਾ ਹਾਰਹਾਰਿਨੀ ਕੁਲਙ੍ਕਸਾ ਮਂ ਰਮੇਤਿ ਮਮ ਚਿਤ੍ਤਂ ਆਰਾਧੇਤੀਤਿ ਉਤੁਪਦੇਸਵਿਸੇਸਕਿਤ੍ਤਨਾਪਦੇਸੇਨ ਵਿਵੇਕਾਭਿਰਤਿਂ ਪਕਾਸੇਸਿ.

ਸੁਵਿਸੁਦ੍ਧਪਣ੍ਡਰਾਤਿ ਸੁਟ੍ਠੁ ਵਿਸੁਦ੍ਧਪਣ੍ਡਰਵਣ੍ਣਾ, ਅਸਮ੍ਮਿਸ੍ਸਵਣ੍ਣਾ ਸਬ੍ਬਸੇਤਾਤਿ ਅਤ੍ਥੋ. ਪਰਿਯੇਸਤੀਤਿ ਮਗ੍ਗਤਿ. ਲੇਣਨ੍ਤਿ ਵਸਨਟ੍ਠਾਨਂ. ਅਲੇਣਦਸ੍ਸਿਨੀਤਿ ਵਸਨਟ੍ਠਾਨਂ ਅਪਸ੍ਸਨ੍ਤੀ. ਪੁਬ੍ਬੇ ਨਿਬਦ੍ਧਵਸਨਟ੍ਠਾਨਸ੍ਸ ਅਭਾਵੇਨ ਅਲੇਣਦਸ੍ਸਿਨੀ, ਇਦਾਨਿ ਪਾਵੁਸ੍ਸਕਕਾਲੇ ਮੇਘਗਜ੍ਜਿਤੇਨ ਆਹਿਤਗਬ੍ਭਾ ਪਰਿਯੇਸਤਿ ਲੇਣਨ੍ਤਿ ਨਿਬਦ੍ਧਵਸਨਟ੍ਠਾਨਂ ਕੁਲਾਵਕਂ ਕਰੋਤੀਤਿ ਅਤ੍ਥੋ.

ਕਂ ਨੁ ਤਤ੍ਥ…ਪੇ… ਪਚ੍ਛਤੋਤਿ ਮਮ ਵਸਨਕਮਹਾਲੇਣਸ੍ਸ ਪਚ੍ਛਤੋ ਪਚ੍ਛਾਭਾਗੇ ਆਪਗਾਕੂਲਂ ਅਜਕਰਣੀਨਦਿਯਾ ਉਭਤੋਤੀਰਂ ਤਹਿਂ ਤਹਿਂ ਇਤੋ ਚਿਤੋ ਚ ਸੋਭੇਨ੍ਤਿਯੋ ਨਿਚ੍ਚਕਾਲਂ ਫਲਭਾਰਨਮਿਤਸਾਖਾ ਸਿਨਿਦ੍ਧਪਣ੍ਣਚ੍ਛਾਯਾ ਜਮ੍ਬੁਯੋ ਤਤ੍ਥ ਤਸ੍ਮਿਂ ਠਾਨੇ ਕਂ ਨਾਮ ਸਤ੍ਤਂ ਨ ਰਮੇਨ੍ਤਿ ਨੁ, ਸਬ੍ਬਂ ਰਮੇਨ੍ਤਿਯੇਵ.

ਤਾਮਤਮਦਸਙ੍ਘਸੁਪ੍ਪਹੀਨਾਤਿ ਅਮਤਂ ਵੁਚ੍ਚਤਿ ਅਗਦਂ, ਤੇਨ ਮਜ੍ਜਨ੍ਤੀਤਿ ਅਮਤਮਦਾ, ਸਪ੍ਪਾ, ਤੇਸਂ ਸਙ੍ਘੋ ਅਮਤਮਦਸਙ੍ਘੋ, ਤਤੋ ਸੁਟ੍ਠੁ ਪਹੀਨਾ ਅਪਗਤਾ. ਭੇਕਾ ਮਣ੍ਡੂਕਿਯੋ, ਮਨ੍ਦਵਤੀ ਸਰਵਤਿਯੋ, ਪਨਾਦਯਨ੍ਤਿ ਤਂ ਠਾਨਂ ਮਧੁਰੇਨ ਵਸ੍ਸਿਤੇਨ ਨਿਨ੍ਨਾਦਯਨ੍ਤਿ. ਨਾਜ੍ਜ ਗਿਰਿਨਦੀਹਿ ਵਿਪ੍ਪਵਾਸਸਮਯੋਤਿ ਅਜ੍ਜ ਏਤਰਹਿ ਅਞ੍ਞਾਹਿਪਿ ਪਬ੍ਬਤੇਯ੍ਯਾਹਿ ਨਦੀਹਿ ਵਿਪ੍ਪਵਾਸਸਮਯੋ ਨ ਹੋਤਿ, ਵਿਸੇਸਤੋ ਪਨ ਵਾਲ਼ਮਚ੍ਛਸੁਸੁਮਾਰਾਦਿਵਿਰਹਿਤਤੋ ਖੇਮਾ ਅਜਕਰਣੀ ਨਦੀ. ਸੁਨ੍ਦਰਤਲਤਿਤ੍ਥਪੁਲਿਨਸਮ੍ਪਤ੍ਤਿਯਾ ਸਿਵਾ. ਸੁਟ੍ਠੁ ਰਮ੍ਮਾ ਰਮਣੀਯਾ, ਤਸ੍ਮਾ ਤਤ੍ਥੇਵ ਮੇ ਮਨੋ ਰਮਤੀਤਿ ਅਧਿਪ੍ਪਾਯੋ.

ਏਵਂ ਪਨ ਵਤ੍ਵਾ ਞਾਤਕੇ ਵਿਸ੍ਸਜ੍ਜੇਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਗਤੋ. ਸੁਞ੍ਞਾਗਾਰਾਭਿਰਤਿਦੀਪਨੇਨ ਇਦਮੇਵ ਚ ਥੇਰਸ੍ਸ ਅਞ੍ਞਾਬ੍ਯਾਕਰਣਂ ਅਹੋਸੀਤਿ.

ਸਪ੍ਪਕਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.