੮. ਵਸ੍ਸਿਕਤ੍ਥੇਰਗਾਥਾਵਣ੍ਣਨਾ

ਏਕੋਪਿ ਸਦ੍ਧੋ ਮੇਧਾਵੀਤਿ ਆਯਸ੍ਮਤੋ ਵਸ੍ਸਿਕਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਕਰੋਨ੍ਤੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸਤ੍ਥਾਰਂ ਦਿਸ੍ਵਾ ਪਸਨ੍ਨਚਿਤ੍ਤੋ ਪਿਲਕ੍ਖਫਲਾਨਿ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੋਸਲਰਟ੍ਠੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਸ੍ਸਿਕੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਸਤ੍ਥੁ ਯਮਕਪਾਟਿਹਾਰਿਯਂ ਦਿਸ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਸਮਣਧਮ੍ਮਂ ਕਰੋਨ੍ਤੋ ਆਬਾਧਿਕੋ ਅਹੋਸਿ. ਅਥ ਨਂ ਞਾਤਕਾ ਵੇਜ੍ਜਪਰਿਦਿਟ੍ਠੇਨ ਭੇਸਜ੍ਜਵਿਧਿਨਾ ਉਪਟ੍ਠਹਿਤ੍ਵਾ ਅਰੋਗਮਕਂਸੁ. ਸੋ ਤਮ੍ਹਾ ਆਬਾਧਾ ਵੁਟ੍ਠਿਤੋ ਸਂਵੇਗਜਾਤੋ ਭਾਵਨਂ ਉਸ੍ਸੁਕ੍ਕਾਪੇਤ੍ਵਾ ਛਲ਼ਭਿਞ੍ਞੋ ਅਹੋਸਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੪੭.੪੦-੪੪) –

‘‘ਵਨਨ੍ਤਰੇ ਬੁਦ੍ਧਂ ਦਿਸ੍ਵਾ, ਅਤ੍ਥਦਸ੍ਸਿਂ ਮਹਾਯਸਂ;

ਪਸਨ੍ਨਚਿਤ੍ਤੋ ਸੁਮਨੋ, ਪਿਲਕ੍ਖਸ੍ਸ ਫਲਂ ਅਦਾ.

‘‘ਅਟ੍ਠਾਰਸੇ ਕਪ੍ਪਸਤੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਛਲ਼ਭਿਞ੍ਞੋ ਪਨ ਹੁਤ੍ਵਾ ਆਕਾਸੇਨ ਞਾਤਕਾਨਂ ਸਨ੍ਤਿਕੇ ਗਨ੍ਤ੍ਵਾ ਆਕਾਸੇ ਠਿਤੋ ਧਮ੍ਮਂ ਦੇਸੇਤ੍ਵਾ ਤੇ ਸਰਣੇਸੁ ਸੀਲੇਸੁ ਚ ਪਤਿਟ੍ਠਾਪੇਸਿ. ਤੇਸੁ ਕੇਚਿ ਕਾਲਙ੍ਕਤਾ ਸਰਣੇਸੁ ਸੀਲੇਸੁ ਚ ਪਤਿਟ੍ਠਿਤਤ੍ਤਾ ਸਗ੍ਗੇ ਨਿਬ੍ਬਤ੍ਤਿਂਸੁ. ਅਥ ਨਂ ਸਤ੍ਥਾ ਬੁਦ੍ਧੁਪਟ੍ਠਾਨਂ ਉਪਗਤਂ ‘‘ਕਿਂ ਤੇ, ਵਸ੍ਸਿਕ, ਞਾਤੀਨਂ ਆਰੋਗ੍ਯ’’ਨ੍ਤਿ ਪੁਚ੍ਛਿ. ਸੋ ਞਾਤੀਨਂ ਅਤ੍ਤਨਾ ਕਤਂ ਉਪਕਾਰਂ ਸਤ੍ਥੁ ਕਥੇਨ੍ਤੋ –

੨੪੦. ‘‘ਏਕੋਪਿ ਸਦ੍ਧੋ ਮੇਧਾਵੀ, ਅਸ੍ਸਦ੍ਧਾਨੀਧ ਞਾਤਿਨਂ;

ਧਮ੍ਮਟ੍ਠੋ ਸੀਲਸਮ੍ਪਨ੍ਨੋ, ਹੋਤਿ ਅਤ੍ਥਾਯ ਬਨ੍ਧੁਨਂ.

੨੪੧. ‘‘ਨਿਗ੍ਗਯ੍ਹ ਅਨੁਕਮ੍ਪਾਯ, ਚੋਦਿਤਾ ਞਾਤਯੋ ਮਯਾ;

ਞਾਤਿਬਨ੍ਧਵਪੇਮੇਨ, ਕਾਰਂ ਕਤ੍ਵਾਨ ਭਿਕ੍ਖੁਸੁ.

੨੪੨. ‘‘ਤੇ ਅਬ੍ਭਤੀਤਾ ਕਾਲਙ੍ਕਤਾ, ਪਤ੍ਤਾ ਤੇ ਤਿਦਿਵਂ ਸੁਖਂ;

ਭਾਤਰੋ ਮਯ੍ਹਂ ਮਾਤਾ ਚ, ਮੋਦਨ੍ਤਿ ਕਾਮਕਾਮਿਨੋ’’ਤਿ. –

ਤਿਸ੍ਸੋ ਗਾਥਾ ਅਭਾਸਿ.

ਤਤ੍ਥਾਯਂ ਪਠਮਗਾਥਾਯ ਅਤ੍ਥੋ – ਯੋ ਕਮ੍ਮਫਲਸਦ੍ਧਾਯ ਚ ਰਤਨਤ੍ਤਯਸਦ੍ਧਾਯ ਚ ਵਸੇਨ ਸਦ੍ਧੋ, ਤਤੋ ਏਵ ਕਮ੍ਮਸ੍ਸਕਤਞਾਣਾਦਿਯੋਗਤੋ ਮੇਧਾਵੀ, ਸਤ੍ਥੁ ਓਵਾਦਧਮ੍ਮੇ ਨਵਲੋਕੁਤ੍ਤਰਧਮ੍ਮੇ ਚ ਠਿਤਤ੍ਤਾ ਧਮ੍ਮਟ੍ਠੋ, ਆਚਾਰਸੀਲਸ੍ਸ ਮਗ੍ਗਸੀਲਸ੍ਸ ਫਲਸੀਲਸ੍ਸ ਚ ਵਸੇਨ ਸੀਲਸਮ੍ਪਨ੍ਨੋ, ਸੋ ਏਕੋਪਿ ਯਥਾਵੁਤ੍ਤਾਯ ਸਦ੍ਧਾਯ ਅਭਾਵੇਨ ਅਸ੍ਸਦ੍ਧਾਨਂ ਇਧ ਇਮਸ੍ਮਿਂ ਲੋਕੇ ‘‘ਅਮ੍ਹਾਕਂ ਇਮੇ’’ਤਿ ਞਾਤਬ੍ਬਟ੍ਠੇਨ ਞਾਤੀਨਂ, ਤਥਾ ਪੇਮਬਨ੍ਧਨੇਨ ਬਨ੍ਧਨਟ੍ਠੇਨ ‘‘ਬਨ੍ਧੂ’’ਤਿ ਚ ਲਦ੍ਧਨਾਮਾਨਂ ਬਨ੍ਧਵਾਨਂ ਅਤ੍ਥਾਯ ਹਿਤਾਯ ਹੋਤੀਤਿ.

ਏਵਂ ਸਾਧਾਰਣਤੋ ਵੁਤ੍ਤਮਤ੍ਥਂ ਅਤ੍ਤੂਪਨਾਯਿਕਂ ਕਤ੍ਵਾ ਦਸ੍ਸੇਤੁਂ ‘‘ਨਿਗ੍ਗਯ੍ਹਾ’’ਤਿਆਦਿਨਾ ਇਤਰਗਾਥਾ ਵੁਤ੍ਤਾ. ਤਤ੍ਥ ਨਿਗ੍ਗਯ੍ਹ ਅਨੁਕਮ੍ਪਾਯ, ਚੋਦਿਤਾ ਞਾਤਯੋ ਮਯਾਤਿ ਇਦਾਨਿਪਿ ਦੁਗ੍ਗਤਾ ਕੁਸਲਂ ਅਕਤ੍ਵਾ ਆਯਤਿਂ ਪਰਿਕ੍ਕਿਲੇਸਂ ਪੁਨ ਮਾਨੁਭਵਿਤ੍ਥਾਤਿ ਨਿਗ੍ਗਹੇਤ੍ਵਾ ਞਾਤਯੋ ਮਯਾ ਓਵਦਿਤਾ. ਞਾਤਿਬਨ੍ਧਵਪੇਮੇਨ ‘‘ਅਮ੍ਹਾਕਂ ਅਯਂ ਬਨ੍ਧਵੋ’’ਤਿ ਏਵਂ ਪਵਤ੍ਤੇਨ ਪੇਮੇਨ ਮਮ ਓਵਾਦਂ ਅਤਿਕ੍ਕਮਿਤੁਂ ਅਸਕ੍ਕੋਨ੍ਤਾ ਕਾਰਂ ਕਤ੍ਵਾਨ ਭਿਕ੍ਖੂਸੁ ਪਸਨ੍ਨਚਿਤ੍ਤਾ ਹੁਤ੍ਵਾ ਚੀਵਰਾਦਿਪਚ੍ਚਯਦਾਨੇਨ ਚੇਵ ਉਪਟ੍ਠਾਨੇਨ ਚ ਭਿਕ੍ਖੂਸੁ ਸਕ੍ਕਾਰਸਮ੍ਮਾਨਂ ਕਤ੍ਵਾ ਤੇ ਅਬ੍ਭਤੀਤਾ ਕਾਲਙ੍ਕਤਾ ਹੁਤ੍ਵਾ ਇਮਂ ਲੋਕਂ ਅਤਿਕ੍ਕਨ੍ਤਾ. ਪੁਨ ਤੇਤਿ ਨਿਪਾਤਮਤ੍ਤਂ. ਤਿਦਿਵਂ ਸੁਖਨ੍ਤਿ ਦੇਵਲੋਕਪਰਿਯਾਪਨ੍ਨਸੁਖਂ, ਸੁਖਂ ਵਾ ਇਟ੍ਠਂ ਤਿਦਿਵਂ ਅਧਿਗਤਾ. ‘‘ਕੇ ਪਨ ਤੇ’’ਤਿ ਆਹ. ‘‘ਭਾਤਰੋ ਮਯ੍ਹਂ ਮਾਤਾ ਚ, ਮੋਦਨ੍ਤਿ ਕਾਮਕਾਮਿਨੋ’’ਤਿ. ਅਤ੍ਤਨਾ ਯਥਾਕਾਮਿਤਵਤ੍ਥੁਕਾਮਸਮਙ੍ਗਿਨੋ ਹੁਤ੍ਵਾ ਅਭਿਰਮਨ੍ਤੀਤਿ ਅਤ੍ਥੋ.

ਵਸ੍ਸਿਕਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.