੧੨. ਉਤ੍ਤਰਪਾਲਤ੍ਥੇਰਗਾਥਾਵਣ੍ਣਨਾ

ਪਣ੍ਡਿਤਂ ਵਤ ਮਂ ਸਨ੍ਤਨ੍ਤਿ ਆਯਸ੍ਮਤੋ ਉਤ੍ਤਰਪਾਲਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਗਮਨਮਗ੍ਗੇ ਸੇਤੁਂ ਕਾਰਾਪੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਉਤ੍ਤਰਪਾਲੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਯਮਕਪਾਟਿਹਾਰਿਯਂ ਦਿਸ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਸਮਣਧਮ੍ਮਂ ਕਰੋਤਿ. ਤਸ੍ਸ ਏਕਦਿਵਸਂ ਅਯੋਨਿਸੋਮਨਸਿਕਾਰਵਸੇਨ ਅਨੁਭੂਤਾਰਮ੍ਮਣਂ ਅਨੁਸ੍ਸਰਨ੍ਤਸ੍ਸ ਕਾਮਰਾਗੋ ਉਪ੍ਪਜ੍ਜਿ. ਸੋ ਤਾਵਦੇਵ ਸਹੋਡ੍ਢਂ ਚੋਰਂ ਗਣ੍ਹਨ੍ਤੋ ਵਿਯ ਅਤ੍ਤਨੋ ਚਿਤ੍ਤਂ ਨਿਗ੍ਗਹੇਤ੍ਵਾ ਸਂਵੇਗਜਾਤੋ ਪਟਿਪਕ੍ਖਮਨਸਿਕਾਰੇਨ ਕਿਲੇਸੇ ਵਿਕ੍ਖਮ੍ਭੇਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਭਾਵਨਂ ਉਸ੍ਸੁਕ੍ਕਾਪੇਤ੍ਵਾ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੪੭.੧੬-੨੦) –

‘‘ਵਿਪਸ੍ਸਿਨੋ ਭਗਵਤੋ, ਚਙ੍ਕਮਨ੍ਤਸ੍ਸ ਸਮ੍ਮੁਖਾ;

ਪਸਨ੍ਨਚਿਤ੍ਤੋ ਸੁਮਨੋ, ਸੇਤੁਂ ਕਾਰਾਪਯਿਂ ਅਹਂ.

‘‘ਏਕਨਵੁਤਿਤੋ ਕਪ੍ਪੇ, ਯਂ ਸੇਤੁਂ ਕਾਰਯਿਂ ਅਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਸੇਤੁਦਾਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਚ੍ਚਵੇਕ੍ਖਿਤ੍ਵਾ ਸੀਹਨਾਦਂ ਨਦਨ੍ਤੋ –

੨੫੨. ‘‘ਪਣ੍ਡਿਤਂ ਵਤ ਮਂ ਸਨ੍ਤਂ, ਅਲਮਤ੍ਥਵਿਚਿਨ੍ਤਕਂ;

ਪਞ੍ਚ ਕਾਮਗੁਣਾ ਲੋਕੇ, ਸਮ੍ਮੋਹਾ ਪਾਤਯਿਂਸੁ ਮਂ.

੨੫੩. ‘‘ਪਕ੍ਖਨ੍ਦੋ ਮਾਰਵਿਸਯੇ, ਦਲ਼੍ਹਸਲ੍ਲਸਮਪ੍ਪਿਤੋ;

ਅਸਕ੍ਖਿਂ ਮਚ੍ਚੁਰਾਜਸ੍ਸ, ਅਹਂ ਪਾਸਾ ਪਮੁਚ੍ਚਿਤੁਂ.

੨੫੪. ‘‘ਸਬ੍ਬੇ ਕਾਮਾ ਪਹੀਨਾ ਮੇ, ਭਵਾ ਸਬ੍ਬੇ ਪਦਾਲਿਤਾ;

ਵਿਕ੍ਖੀਣੋ ਜਾਤਿਸਂਸਾਰੋ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ. –

ਤਿਸ੍ਸੋ ਗਾਥਾ ਅਭਾਸਿ.

ਤਤ੍ਥ ਪਣ੍ਡਿਤਂ ਵਤ ਮਂ ਸਨ੍ਤਨ੍ਤਿ ਸੁਤਚਿਨ੍ਤਾਮਯਾਯ ਪਞ੍ਞਾਯ ਵਸੇਨ ਪਞ੍ਞਾਸਮ੍ਪਨ੍ਨਮ੍ਪਿ ਨਾਮ ਮਂ ਸਮਾਨਂ. ਅਲਮਤ੍ਥਵਿਚਿਨ੍ਤਕਨ੍ਤਿ ਅਤ੍ਤਨੋ ਚ ਪਰੇਸਞ੍ਚ ਅਤ੍ਥਂ ਹਿਤਂ ਵਿਚਿਨ੍ਤੇਤੁਂ ਸਮਤ੍ਥਂ, ਅਲਂ ਵਾ ਪਰਿਯਤ੍ਤਂ ਅਤ੍ਥਸ੍ਸ ਵਿਚਿਨ੍ਤਕਂ, ਕਿਲੇਸਵਿਦ੍ਧਂਸਨਸਮਤ੍ਥਂ ਅਤ੍ਥਦਸ੍ਸਿਨਂ ਵਾ, ਸਬ੍ਬਮੇਤਂ ਅਤ੍ਤਨੋ ਅਨ੍ਤਿਮਭਵਿਕਤਾਯ ਥੇਰੋ ਵਦਤਿ. ਪਞ੍ਚ ਕਾਮਗੁਣਾਤਿ ਰੂਪਾਦਯੋ ਪਞ੍ਚ ਕਾਮਕੋਟ੍ਠਾਸਾ. ਲੋਕੇਤਿ ਤੇਸਂ ਪਵਤ੍ਤਿਟ੍ਠਾਨਦਸ੍ਸਨਂ. ਸਮ੍ਮੋਹਾਤਿ ਸਮ੍ਮੋਹਨਿਮਿਤ੍ਤਂ ਅਯੋਨਿਸੋਮਨਸਿਕਾਰਹੇਤੁ. ਸਮ੍ਮੋਹਾਤਿ ਵਾ ਸਮ੍ਮੋਹਨਾ ਸਮ੍ਮੋਹਕਰਾ. ਪਾਤਯਿਂਸੂਤਿ ਧੀਰਭਾਵਤੋ ਪਾਤੇਸੁਂ, ਲੋਕਤੋ ਵਾ ਉਤ੍ਤਰਿਤੁਕਾਮਂ ਮਂ ਲੋਕੇ ਪਾਤਯਿਂਸੂਤਿ ਅਤ੍ਥੋ.

ਪਕ੍ਖਨ੍ਦੋਤਿ ਅਨੁਪਵਿਟ੍ਠੋ. ਮਾਰਵਿਸਯੇਤਿ ਕਿਲੇਸਵਿਸਯੇ ਕਿਲੇਸਮਾਰਸ੍ਸ ਪਵਤ੍ਤਿਟ੍ਠਾਨੇ, ਤਸ੍ਸ ਵਸਂ ਗਤੋਤਿ ਅਧਿਪ੍ਪਾਯੋ. ਦੇਵਪੁਤ੍ਤਮਾਰਸ੍ਸ ਵਾ ਇਸ੍ਸਰਿਯਟ੍ਠਾਨੇ ਤਂ ਅਨੁਪਵਿਸਿਤ੍ਵਾ ਠਿਤੋ. ਦਲ਼੍ਹਸਲ੍ਲਸਮਪ੍ਪਿਤੋਤਿ ਦਲ਼੍ਹਂ ਥਿਰਂ, ਦਲ਼੍ਹੇਨ ਵਾ ਸਲ੍ਲੇਨ ਸਮਪ੍ਪਿਤੋ, ਰਾਗਸਲ੍ਲੇਨ ਹਦਯਂ ਆਹਚ੍ਚ ਵਿਦ੍ਧੋ. ਅਸਕ੍ਖਿਂ ਮਚ੍ਚੁਰਾਜਸ੍ਸ, ਅਹਂ ਪਾਸਾ ਪਮੁਚ੍ਚਿਤੁਨ੍ਤਿ ਅਗ੍ਗਮਗ੍ਗਸਣ੍ਡਾਸੇਨ ਰਾਗਾਦਿਸਲ੍ਲਂ ਅਨਵਸੇਸਤੋ ਉਦ੍ਧਰਨ੍ਤੋਯੇਵ ਰਾਗਬਨ੍ਧਨਸਙ੍ਖਾਤਾ ਮਚ੍ਚੁਰਾਜਸ੍ਸ ਪਾਸਾ ਅਹਂ ਪਰਿਮੁਚ੍ਚਿਤੁਂ ਅਸਕ੍ਖਿਂ, ਤਤੋ ਅਤ੍ਤਾਨਂ ਪਮੋਚੇਸਿਂ.

ਤਤੋ ਏਵ ਚ ਸਬ੍ਬੇ ਕਾਮਾ ਪਹੀਨਾ ਮੇ, ਭਵਾ ਸਬ੍ਬੇ ਪਦਾਲਿਤਾਤਿ ਵਤ੍ਥਾਰਮ੍ਮਣਾਦਿਭੇਦੇਨ ਅਨੇਕਭੇਦਭਿਨ੍ਨਾ ਸਬ੍ਬੇ ਕਿਲੇਸਕਾਮਾ ਅਰਿਯਮਗ੍ਗੇਨ ਸਮੁਚ੍ਛੇਦਵਸੇਨ ਮਯਾ ਪਹੀਨਾ. ਕਿਲੇਸਕਾਮੇਸੁ ਹਿ ਪਹੀਨੇਸੁ ਵਤ੍ਥੁਕਾਮਾਪਿ ਪਹੀਨਾ ਏਵ ਹੋਨ੍ਤਿ. ਤਥਾ ਕਾਮਭਵਕਮ੍ਮਭਵਾਦਯੋ ਭਵਾ ਸਬ੍ਬੇ ਮਗ੍ਗਞਾਣਾਸਿਨਾ ਪਦਾਲਿਤਾ ਵਿਦ੍ਧਂਸਿਤਾ. ਕਮ੍ਮਭਵੇਸੁ ਹਿ ਪਦਾਲਿਤੇਸੁ ਉਪਪਤ੍ਤਿਭਵਾ ਪਦਾਲਿਤਾ ਏਵ ਹੋਨ੍ਤਿ. ਏਵਂ ਕਮ੍ਮਭਵਾਨਂ ਪਦਾਲਿਤਤ੍ਤਾ ਏਵ ਵਿਕ੍ਖੀਣੋ ਜਾਤਿਸਂਸਾਰੋ, ਨਤ੍ਥਿ ਦਾਨਿ ਪੁਨਬ੍ਭਵੋਤਿ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਇਦਮੇਵ ਚ ਥੇਰਸ੍ਸ ਅਞ੍ਞਾਬ੍ਯਾਕਰਣਂ ਅਹੋਸਿ.

ਉਤ੍ਤਰਪਾਲਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.