੯. ਗੋਤਮਤ੍ਥੇਰਗਾਥਾਵਣ੍ਣਨਾ

ਸੁਖਂ ਸੁਪਨ੍ਤੀਤਿ ਆਯਸ੍ਮਤੋ ਗੋਤਮਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਪੁਞ੍ਞਂ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਆਮੋਦਫਲਮਦਾਸਿ. ਤੇਨ ਪੁਞ੍ਞਕਮ੍ਮੇਨ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਅਪਰਾਪਰਂ ਪੁਞ੍ਞਾਨਿ ਕਤ੍ਵਾ ਸੁਗਤੀਸੁਯੇਵ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਗੋਤਮੋਤਿ ਲਦ੍ਧਨਾਮੋ ਸਤ੍ਤਵਸ੍ਸਿਕਕਾਲੇ ਉਪਨਯਨਂ ਕਤ੍ਵਾ ਰਤਨਭਿਕ੍ਖਂ ਚਰਿਤ੍ਵਾ ਸਹਸ੍ਸਂ ਲਭਿਤ੍ਵਾ ਤਂ ਤਾਦਿਸੇ ਠਾਨੇ ਠਪੇਤ੍ਵਾ ਵਤਂ ਚਰਨ੍ਤੋ ਸੋਲ਼ਸਸਤ੍ਤਰਸਵਸ੍ਸੁਦ੍ਦੇਸਿਕਕਾਲੇ ਅਕਲ੍ਯਾਣਮਿਤ੍ਤੇਹਿ ਕਾਮੇਸੁ ਪਰਿਨੀਯਮਾਨੋ ਏਕਿਸ੍ਸਾ ਰੂਪੂਪਜੀਵਿਨਿਯਾ ਤਂ ਸਹਸ੍ਸਭਣ੍ਡਿਕਂ ਦਤ੍ਵਾ ਬ੍ਰਹ੍ਮਚਰਿਯਵਿਨਾਸਂ ਪਤ੍ਵਾ ਤਾਯ ਚਸ੍ਸ ਬ੍ਰਹ੍ਮਚਾਰਿਰੂਪਂ ਦਿਸ੍ਵਾ ਵਿਰਤ੍ਤਾਕਾਰੇ ਦਸ੍ਸਿਤੇ ਏਕਰਤ੍ਤਿਵਾਸੇਨੇਵ ਨਿਬ੍ਬਿਨ੍ਨਰੂਪੋ ਅਤ੍ਤਨੋ ਬ੍ਰਹ੍ਮਚਰਿਯਨਿਵਾਸਂ ਧਨਜਾਨਿਞ੍ਚ ਸਰਿਤ੍ਵਾ ‘‘ਅਯੁਤ੍ਤਂ ਮਯਾ ਕਤ’’ਨ੍ਤਿ ਵਿਪ੍ਪਟਿਸਾਰੀ ਅਹੋਸਿ. ਸਤ੍ਥਾ ਤਸ੍ਸ ਹੇਤੁਸਮ੍ਪਤ੍ਤਿਂ ਚਿਤ੍ਤਾਚਾਰਞ੍ਚ ਞਤ੍ਵਾ ਤਸ੍ਸ ਆਸਨ੍ਨਟ੍ਠਾਨੇ ਅਤ੍ਤਾਨਂ ਦਸ੍ਸੇਸਿ. ਸੋ ਸਤ੍ਥਾਰਂ ਦਿਸ੍ਵਾ ਪਸਨ੍ਨਮਾਨਸੋ ਉਪਸਙ੍ਕਮਿ, ਤਸ੍ਸ ਭਗਵਾ ਧਮ੍ਮਂ ਦੇਸੇਸਿ. ਸੋ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਨ੍ਤੋ ਖੁਰਗ੍ਗੇਯੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੫੧.੮੦-੮੪) –

‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਆਹੁਤੀਨਂ ਪਟਿਗ੍ਗਹਂ;

ਰਥਿਯਂ ਪਟਿਪਜ੍ਜਨ੍ਤਂ, ਆਮੋਦਮਦਦਿਂ ਫਲਂ.

‘‘ਏਕਨਵੁਤਿਤੋ ਕਪ੍ਪੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਝਾਨਸੁਖੇਨ ਫਲਸੁਖੇਨ ਵੀਤਿਨਾਮੇਨ੍ਤਂ ਏਕੋ ਗਿਹਿਸਹਾਯੋ ਉਪਗਨ੍ਤ੍ਵਾ, ‘‘ਆਵੁਸੋ, ਤਯਾ ਰਤਨਭਿਕ੍ਖਾਯ ਲਦ੍ਧਂ ਪਬ੍ਬਜਨ੍ਤੋ ਕਿਂ ਅਕਾਸੀ’’ਤਿ ਪੁਚ੍ਛਿ. ਤਂ ਸੁਤ੍ਵਾ ਥੇਰੋ ‘‘ਇਦਂ ਨਾਮ ਕਤ’’ਨ੍ਤਿ ਅਨਾਚਿਕ੍ਖਿਤ੍ਵਾ ਮਾਤੁਗਾਮੇ ਦੋਸਂ ਪਕਾਸੇਤ੍ਵਾ ਅਤ੍ਤਨੋ ਵੀਤਰਾਗਭਾਵੇਨ ਅਞ੍ਞਂ ਬ੍ਯਾਕਰੋਨ੍ਤੋ ‘‘ਸੁਖਂ ਸੁਪਨ੍ਤੀ’’ਤਿਆਦਿਨਾ ਗਾਥਾਦ੍ਵਯਮਾਹ.

੧੩੭. ਤਤ੍ਥ ਸੁਖਂ ਸੁਪਨ੍ਤਿ ਮੁਨਯੋ, ਯੇ ਇਤ੍ਥੀਸੁ ਨ ਬਜ੍ਝਰੇਤਿ ਯੇ ਇਤ੍ਥੀਸੁ ਵਿਸਯਭੂਤਾਸੁ ਨਿਮਿਤ੍ਤਭੂਤਾਸੁ ਵਾ ਰਾਗਬਨ੍ਧਨੇਨ ਨ ਬਜ੍ਝਨ੍ਤਿ, ਤੇ ਮੁਨਯੋ ਤਪਸ੍ਸਿਨੋ ਸਂਯਤਿਨ੍ਦ੍ਰਿਯਾ ਸੁਖਂ ਸੁਪਨ੍ਤਿ ਸੁਖਂ ਵਿਹਰਨ੍ਤਿ, ਨਤ੍ਥਿ ਤੇਸਂ ਦੁਕ੍ਖਨ੍ਤਿ ਅਧਿਪ੍ਪਾਯੋ. ‘‘ਸੁਪਨ੍ਤੀ’’ਤਿ ਹਿ ਨਿਦਸ੍ਸਨਮਤ੍ਤਮੇਤਂ. ਸਦਾ ਵੇ ਰਕ੍ਖਿਤਬ੍ਬਾਸੂਤਿ ਏਕਂਸੇਨ ਸਬ੍ਬਕਾਲਂ ਰਕ੍ਖਿਤਬ੍ਬਾਸੁ. ਇਤ੍ਥਿਯੋ ਹਿ ਸਤ੍ਤਭੂਮਿਕੇ ਨਿਪ੍ਪੁਰਿਸੇ ਪਾਸਾਦੇ ਉਪਰਿਭੂਮਿਯਂ ਵਸਾਪੇਤ੍ਵਾਪਿ, ਕੁਚ੍ਛਿਯਂ ਪਕ੍ਖਿਪਿਤ੍ਵਾਪਿ ਨ ਸਕ੍ਕਾ ਰਕ੍ਖਿਤੁਂ, ਤਸ੍ਮਾ ਤਾ ਕਿਟ੍ਠਾਦਿਗਾਵਿਯੋ ਵਿਯ ਸਬ੍ਬਕਾਲਂ ਰਕ੍ਖਣੀਯਾ ਹੋਨ੍ਤਿ. ਬਹੁਚਿਤ੍ਤਤਾਯ ਵਾ ਸਾਮਿਕੇਨ ਵਤ੍ਥਾਲਙ੍ਕਾਰਾਨੁਪ੍ਪਦਾਨਾਦਿਨਾ ਚਿਤ੍ਤਞ੍ਞਥਤ੍ਤਤੋ ਸਬ੍ਬਕਾਲਂ ਰਕ੍ਖਿਤਬ੍ਬਾ. ਸਰੀਰਸਭਾਵਂ ਵਾ ਮਾਲਾਗਨ੍ਧਾਦੀਹਿ ਪਟਿਚ੍ਛਾਦਨਵਸੇਨ ਰਕ੍ਖਿਤਬ੍ਬਚਿਤ੍ਤਤਾਯ ਰਕ੍ਖਿਤਬ੍ਬਾਤਿ. ਯਾਸੁ ਸਚ੍ਚਂ ਸੁਦੁਲ੍ਲਭਨ੍ਤਿ ਯਾਸੁ ਸਚ੍ਚਵਚਨਂ ਲਦ੍ਧੁਂ ਨ ਸਕ੍ਕਾ, ਇਤ੍ਥਿਯੋ ਹਿ ਅਗ੍ਗਿਮ੍ਪਿ ਪਵਿਸਨ੍ਤਿ, ਵਿਸਮ੍ਪਿ ਖਾਦਨ੍ਤਿ, ਸਤ੍ਥਮ੍ਪਿ ਆਹਰਨ੍ਤਿ, ਉਬ੍ਬਨ੍ਧਿਤ੍ਵਾਪਿ ਕਾਲਂ ਕਰੋਨ੍ਤਿ, ਨ ਪਨ ਸਚ੍ਚੇ ਠਾਤੁਂ ਸਕ੍ਕੋਨ੍ਤਿ. ਤਸ੍ਮਾ ਏਵਰੂਪਾ ਇਤ੍ਥਿਯੋ ਵਜ੍ਜੇਤ੍ਵਾ ਠਿਤਾ ਮੁਨਯੋ ਸੁਖਿਤਾ ਵਤਾਤਿ ਦਸ੍ਸੇਤਿ.

੧੩੮. ਇਦਾਨਿ ਯਸ੍ਸ ਅਪ੍ਪਹੀਨਤ੍ਤਾ ਏਵਰੂਪਾਸੁ ਇਤ੍ਥੀਸੁਪਿ ਬਜ੍ਝਨ੍ਤਿ, ਤਸ੍ਸ ਕਾਮਸ੍ਸ ਅਤ੍ਤਨੋ ਸੁਪ੍ਪਹੀਨਤਂ ਅਚ੍ਚਨ੍ਤਨਿਟ੍ਠਿਤਤਞ੍ਚ ਦਸ੍ਸੇਨ੍ਤੋ ਦੁਤਿਯਂ ਗਾਥਮਾਹ. ਵਧਂ ਚਰਿਮ੍ਹ ਤੇ ਕਾਮਾਤਿ ਅਮ੍ਭੋ ਕਾਮ, ਤਵ ਵਧਂ ਅਚ੍ਚਨ੍ਤਸਮੁਚ੍ਛੇਦਂ ਅਰਿਯਮਗ੍ਗੇਨ ਚਰਿਮ੍ਹ, ‘‘ਵਧਂ ਚਰਿਮ੍ਹਸੇ’’ਤਿਪਿ ਪਾਠੋ, ਵਧਾਯ ਪਹਾਨਾਯ ਮਗ੍ਗਬ੍ਰਹ੍ਮਚਰਿਯਂ ਅਚਰਿਮ੍ਹਾਤਿ ਅਤ੍ਥੋ. ਅਨਣਾ ਦਾਨਿ ਤੇ ਮਯਨ੍ਤਿ ਇਦਾਨਿ ਅਗ੍ਗਮਗ੍ਗਪਤ੍ਤਿਤੋ ਪਟ੍ਠਾਯ ਇਣਭਾਵਕਰਾਯ ਪਹੀਨਤ੍ਤਾ ਕਾਮ ਤੇ ਅਨਣਾ ਮਯਂ, ਨ ਤੁਯ੍ਹਂ ਇਣਂ ਧਾਰੇਮ. ਅਵੀਤਰਾਗੋ ਹਿ ਰਾਗਸ੍ਸ ਵਸੇ ਵਤ੍ਤਨਤੋ ਤਸ੍ਸ ਇਣਂ ਧਾਰੇਨ੍ਤੋ ਵਿਯ ਹੋਤਿ, ਵੀਤਰਾਗੋ ਪਨ ਤਂ ਅਤਿਕ੍ਕਮਿਤ੍ਵਾ ਪਰਮੇਨ ਚਿਤ੍ਤਿਸ੍ਸਰਿਯੇਨ ਸਮਨ੍ਨਾਗਤੋ. ਅਨਣਤ੍ਤਾ ਏਵ ਗਚ੍ਛਾਮ ਦਾਨਿ ਨਿਬ੍ਬਾਨਂ, ਯਤ੍ਥ ਗਨ੍ਤ੍ਵਾ ਨ ਸੋਚਤਿ ਯਸ੍ਮਿਂ ਨਿਬ੍ਬਾਨੇ ਗਮਨਹੇਤੁ ਸਬ੍ਬਸੋ ਸੋਕਹੇਤੂਨਂ ਅਭਾਵਤੋ ਨ ਸੋਚਤਿ, ਤਂ ਅਨੁਪਾਦਿਸੇਸਨਿਬ੍ਬਾਨਮੇਵ ਇਦਾਨਿ ਗਚ੍ਛਾਮ ਅਨੁਪਾਪੁਣਾਮਾਤਿ ਅਤ੍ਥੋ.

ਗੋਤਮਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.