੮. ਸੁਰਾਧਤ੍ਥੇਰਗਾਥਾਵਣ੍ਣਨਾ

ਖੀਣਾ ਹਿ ਮਯ੍ਹਂ ਜਾਤੀਤਿਆਦਿਕਾ ਆਯਸ੍ਮਤੋ ਸੁਰਾਧਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸਤ੍ਥਾਰਂ ਦਿਸ੍ਵਾ ਪਸਨ੍ਨਮਾਨਸੋ ਮਾਤੁਲੁਙ੍ਗਫਲਂ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਅਪਰਾਪਰਂ ਪੁਞ੍ਞਾਨਿ ਕਤ੍ਵਾ ਸੁਗਤੀਸੁਯੇਵ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਅਨਨ੍ਤਰਂ ਵੁਤ੍ਤਸ੍ਸ ਰਾਧਤ੍ਥੇਰਸ੍ਸ ਕਨਿਟ੍ਠੋ ਹੁਤ੍ਵਾ ਨਿਬ੍ਬਤ੍ਤਿ, ਸੁਰਾਧੋਤਿਸ੍ਸ ਨਾਮਂ ਅਹੋਸਿ. ਸੋ ਜੇਟ੍ਠਭਾਤਰਿ ਰਾਧੇ ਪਬ੍ਬਜਿਤੇ ਸਯਮ੍ਪਿ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੨.੫੧.੬੮-੭੨) –

‘‘ਕਣਿਕਾਰਂਵ ਜਲਿਤਂ, ਪੁਣ੍ਣਮਾਯੇਵ ਚਨ੍ਦਿਮਂ;

ਜਲਨ੍ਤਂ ਦੀਪਰੁਕ੍ਖਂਵ, ਅਦ੍ਦਸਂ ਲੋਕਨਾਯਕਂ.

‘‘ਮਾਤੁਲੁਙ੍ਗਫਲਂ ਗਯ੍ਹ, ਅਦਾਸਿਂ ਸਤ੍ਥੁਨੋ ਅਹਂ;

ਦਕ੍ਖਿਣੇਯ੍ਯਸ੍ਸ ਵੀਰਸ੍ਸ, ਪਸਨ੍ਨੋ ਸੇਹਿ ਪਾਣਿਭਿ.

‘‘ਏਕਤਿਂਸੇ ਇਤੋ ਕਪ੍ਪੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

‘‘ਕਿਲੇਸਾ ਝਾਪਿਤਾ ਮਯ੍ਹਂ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

ਅਰਹਤ੍ਤਂ ਪਨ ਪਤ੍ਵਾ ਸਾਸਨਸ੍ਸ ਨਿਯ੍ਯਾਨਿਕਭਾਵਦਸ੍ਸਨਤ੍ਥਂ ਅਞ੍ਞਂ ਬ੍ਯਾਕਰੋਨ੍ਤੋ ‘‘ਖੀਣਾ ਹੀ ਮਯ੍ਹ’’ਨ੍ਤਿਆਦਿਨਾ ਗਾਥਾਦ੍ਵਯਮਾਹ.

੧੩੫-੬. ਤਤ੍ਥ ਖੀਣਾਤਿ ਖਯਂ ਪਰਿਯੋਸਾਨਂ ਗਤਾ. ਜਾਤੀਤਿ ਭਵੋ ਭਵਨਿਬ੍ਬਤ੍ਤਿ ਵਾ. ਵੁਸਿਤਂ ਜਿਨਸਾਸਨਨ੍ਤਿ ਜਿਨਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨਂ ਮਗ੍ਗਬ੍ਰਹ੍ਮਚਰਿਯਂ ਵੁਟ੍ਠਂ ਪਰਿਵੁਟ੍ਠਂ. ਪਹੀਨੋ ਜਾਲਸਙ੍ਖਾਤੋਤਿ ਸਤ੍ਤਸਨ੍ਤਾਨਸ੍ਸ ਓਤ੍ਥਰਣਤੋ ਨਿਸ੍ਸਰਿਤੁਂ ਅਪ੍ਪਦਾਨਤੋ ਚ ‘‘ਜਾਲਸਙ੍ਖਾਤੋ’’ਤਿ ਚ ਲਦ੍ਧਨਾਮਾ ਦਿਟ੍ਠਿ ਅਵਿਜ੍ਜਾ ਚ ਪਹੀਨਾ ਮਗ੍ਗੇਨ ਸਮੁਚ੍ਛਿਨ੍ਨਾ. ਭਵਨੇਤ੍ਤਿ ਸਮੂਹਤਾਤਿ ਕਾਮਭਵਾਦਿਕਸ੍ਸ ਭਵਸ੍ਸ ਨਯਨਤੋ ਪਵਤ੍ਤਨਤੋ ਭਵਨੇਤ੍ਤਿਸਞ੍ਞਿਤਾ ਤਣ੍ਹਾ ਸਮੁਗ੍ਘਾਟਿਤਾ. ਯਸ੍ਸਤ੍ਥਾਯ ਪਬ੍ਬਜਿਤੋਤਿ ਯਸ੍ਸ ਅਤ੍ਥਾਯ ਯਦਤ੍ਥਂ ਅਹਂ ਅਗਾਰਸ੍ਮਾ ਗੇਹਤੋ ਅਨਗਾਰਿਯਂ ਪਬ੍ਬਜ੍ਜਂ ਪਬ੍ਬਜਿਤੋ ਉਪਗਤੋ. ਸੋ ਸਬ੍ਬੇਸਂ ਓਰਮ੍ਭਾਗਿਯੁਦ੍ਧਮ੍ਭਾਗਿਯਪ੍ਪਭੇਦਾਨਂ ਸਂਯੋਜਨਾਨਂ ਬਨ੍ਧਨਾਨਂ ਖਯਭੂਤੋ ਅਤ੍ਥੋ ਨਿਬ੍ਬਾਨਸਙ੍ਖਾਤੋ ਪਰਮਤ੍ਥੋ ਅਰਹਤ੍ਤਸਙ੍ਖਾਤੋ ਸਦਤ੍ਥੋ ਚ ਮਯਾ ਅਨੁਪ੍ਪਤ੍ਤੋ ਅਧਿਗਤੋਤਿ ਅਤ੍ਥੋ.

ਸੁਰਾਧਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.