੨. ਸਾਰਿਪੁਤ੍ਤਤ੍ਥੇਰਗਾਥਾਵਣ੍ਣਨਾ
ਯਥਾਚਾਰੀ ਯਥਾਸਤੋਤਿਆਦਿਕਾ ਆਯਸ੍ਮਤੋ ਸਾਰਿਪੁਤ੍ਤਤ੍ਥੇਰਸ੍ਸ ਗਾਥਾ. ਤਸ੍ਸ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਚ ਵਤ੍ਥੁ ਏਵਂ ਵੇਦਿਤਬ੍ਬਂ – ਅਤੀਤੇ ਇਤੋ ਸਤਸਹਸ੍ਸਕਪ੍ਪਾਧਿਕੇ ਅਸਙ੍ਖ੍ਯੇਯ੍ਯਮਤ੍ਥਕੇ ਆਯਸ੍ਮਾ ਸਾਰਿਪੁਤ੍ਤੋ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਿ, ਨਾਮੇਨ ਸਰਦਮਾਣਵੋ ਨਾਮ ਅਹੋਸਿ. ਮਹਾਮੋਗ੍ਗਲ੍ਲਾਨੋ ਗਹਪਤਿਮਹਾਸਾਲਕੁਲੇ ਨਿਬ੍ਬਤ੍ਤਿ, ਨਾਮੇਨ ਸਿਰਿਵਡ੍ਢਕੁਟੁਮ੍ਬਿਕੋ ਨਾਮ ਅਹੋਸਿ. ਤੇ ਉਭੋਪਿ ਸਹਪਂਸੁਕੀਲ਼ਕਸਹਾਯਾ ਅਹੇਸੁਂ. ਤੇਸੁ ਸਰਦਮਾਣਵੋ ਪਿਤੁ ਅਚ੍ਚਯੇਨ ਕੁਲਸਨ੍ਤਕਂ ਧਨਂ ਪਟਿਪਜ੍ਜਿਤ੍ਵਾ ਏਕਦਿਵਸਂ ਰਹੋਗਤੋ ਚਿਨ੍ਤੇਸਿ – ‘‘ਇਮੇਸਂ ਸਤ੍ਤਾਨਂ ਮਰਣਂ ਨਾਮ ਏਕਨ੍ਤਿਕਂ, ਤਸ੍ਮਾ ਮਯਾ ਏਕਂ ਪਬ੍ਬਜ੍ਜਂ ਉਪਗਨ੍ਤ੍ਵਾ ਮੋਕ੍ਖਮਗ੍ਗੋ ਗਵੇਸਿਤਬ੍ਬੋ’’ਤਿ ਸਹਾਯਂ ਉਪਸਙ੍ਕਮਿਤ੍ਵਾ, ਸਮ੍ਮ, ਅਹਂ ਪਬ੍ਬਜਿਤੁਕਾਮੋ, ਕਿਂ ਤ੍ਵਂ ਪਬ੍ਬਜਿਤੁਂ ਸਕ੍ਖਿਸ੍ਸਸੀ’’ਤਿ ਵਤ੍ਵਾ ਤੇਨ ‘‘ਨ ਸਕ੍ਖਿਸ੍ਸਾਮੀ’’ਤਿ ਵੁਤ੍ਤੇ ‘‘ਹੋਤੁ ਅਹਮੇਵ ਪਬ੍ਬਜਿਸ੍ਸਾਮੀ’’ਤਿ ਰਤਨਕੋਟ੍ਠਾਗਾਰਾਨਿ ਵਿਵਰਾਪੇਤ੍ਵਾ ਕਪਣਦ੍ਧਿਕਾਦੀਨਂ ਮਹਾਦਾਨਂ ਦਤ੍ਵਾ ਪਬ੍ਬਤਪਾਦਂ ਗਨ੍ਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿ. ਤਸ੍ਸ ਪਬ੍ਬਜ੍ਜਂ ਅਨੁਪਬ੍ਬਜਿਤਾ ਚਤੁਸਤ੍ਤਤਿਸਹਸ੍ਸਮਤ੍ਤਾ ਬ੍ਰਾਹ੍ਮਣਪੁਤ੍ਤਾ ਅਹੇਸੁਂ. ਸੋ ਪਞ੍ਚ ਅਭਿਞ੍ਞਾਯੋ ਅਟ੍ਠ ਚ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਤੇਸਮ੍ਪਿ ਜਟਿਲਾਨਂ ਕਸਿਣਪਰਿਕਮ੍ਮਂ ਆਚਿਕ੍ਖਿ. ਤੇਪਿ ਸਬ੍ਬੇ ਪਞ੍ਚਾਭਿਞ੍ਞਾ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਸੁਂ.
ਤੇਨ ਸਮਯੇਨ ਅਨੋਮਦਸ੍ਸੀ ਨਾਮ ਸਮ੍ਮਾਸਮ੍ਬੁਦ੍ਧੋ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਸਤ੍ਤੇ ਸਂਸਾਰਮਹੋਘਤੋ ਤਾਰੇਤ੍ਵਾ ਏਕਦਿਵਸਂ ‘‘ਸਰਦਤਾਪਸਸ੍ਸ ਚ ਅਨ੍ਤੇਵਾਸਿਕਾਨਞ੍ਚ ਸਙ੍ਗਹਂ ਕਰਿਸ੍ਸਾਮੀ’’ਤਿ ਏਕੋ ਅਦੁਤਿਯੋ ਪਤ੍ਤਚੀਵਰਮਾਦਾਯ ਆਕਾਸੇਨ ਗਨ੍ਤ੍ਵਾ ‘‘ਬੁਦ੍ਧਭਾਵਂ ਮੇ ਜਾਨਾਤੂ’’ਤਿ ਤਾਪਸਸ੍ਸ ਪਸ੍ਸਨ੍ਤਸ੍ਸੇਵ ਆਕਾਸਤੋ ਓਤਰਿਤ੍ਵਾ ਪਥਵਿਯਂ ਪਤਿਟ੍ਠਾਸਿ. ਸਰਦਤਾਪਸੋ ਸਤ੍ਥੁ ਸਰੀਰੇ ਮਹਾਪੁਰਿਸਲਕ੍ਖਣਾਨਿ ਉਪਧਾਰੇਤ੍ਵਾ ‘‘ਸਬ੍ਬਞ੍ਞੁਬੁਦ੍ਧੋਯੇਵਾਯ’’ਨ੍ਤਿ ਨਿਟ੍ਠਂ ਗਨ੍ਤ੍ਵਾ ਪਚ੍ਚੁਗ੍ਗਮਨਂ ਕਤ੍ਵਾ ਆਸਨਂ ਪਞ੍ਞਾਪੇਤ੍ਵਾ ਅਦਾਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ. ਸਰਦਤਾਪਸੋ ਸਤ੍ਥੁ ਸਨ੍ਤਿਕੇ ਏਕਮਨ੍ਤਂ ਨਿਸੀਦਿ.
ਤਸ੍ਮਿਂ ਸਮਯੇ ਤਸ੍ਸ ਅਨ੍ਤੇਵਾਸਿਕਾ ਚਤੁਸਤ੍ਤਤਿਸਹਸ੍ਸਮਤ੍ਤਾ ਜਟਿਲਾ ਪਣੀਤਪਣੀਤਾਨਿ ਓਜਵਨ੍ਤਾਨਿ ਫਲਾਫਲਾਨਿ ਗਹੇਤ੍ਵਾ ਆਗਤਾ ਸਤ੍ਥਾਰਂ ਦਿਸ੍ਵਾ ਸਞ੍ਜਾਤਪ੍ਪਸਾਦਾ ਅਤ੍ਤਨੋ ਆਚਰਿਯਸ੍ਸ ਚ ਸਤ੍ਥੁ ਚ ਨਿਸਿਨ੍ਨਾਕਾਰਂ ਓਲੋਕੇਤ੍ਵਾ, ‘‘ਆਚਰਿਯ, ਮਯਂ ਪੁਬ੍ਬੇ ‘ਤੁਮ੍ਹੇਹਿ ਮਹਨ੍ਤਤਰੋ ਕੋਚਿ ਨਤ੍ਥੀ’ਤਿ ਵਿਚਰਾਮ, ਅਯਂ ਪਨ ਪੁਰਿਸੋ ਤੁਮ੍ਹੇਹਿ ਮਹਨ੍ਤਤਰੋ ਮਞ੍ਞੇ’’ਤਿ ਆਹਂਸੁ. ‘‘ਕਿਂ ਵਦੇਥ, ਤਾਤਾ? ਸਾਸਪੇਨ ਸਦ੍ਧਿਂ ਅਟ੍ਠਸਟ੍ਠਿਯੋਜਨਸਤਸਹਸ੍ਸੁਬ੍ਬੇਧਂ ਸਿਨੇਰੁਂ ਸਮਂ ਕਾਤੁਂ ਇਚ੍ਛਥ? ਸਬ੍ਬਞ੍ਞੁਬੁਦ੍ਧੇਨ ਮਂ ਤੁਲ੍ਯਂ ਮਾ ਕਰਿਤ੍ਥਾ’’ਤਿ. ਅਥ ਤੇ ਤਾਪਸਾ ਆਚਰਿਯਸ੍ਸ ਵਚਨਂ ਸੁਤ੍ਵਾ ‘‘ਯਾਵ ਮਹਾ ਵਤਾਯਂ ਪੁਰਿਸੁਤ੍ਤਮੋ’’ਤਿ ਸਬ੍ਬੇਵ ਪਾਦੇਸੁ ਨਿਪਤਿਤ੍ਵਾ ਸਤ੍ਥਾਰਂ ਵਨ੍ਦਿਂਸੁ.
ਅਥ ਤੇ ਆਚਰਿਯੋ ਆਹ – ‘‘ਤਾਤਾ, ਸਤ੍ਥੁ ਅਨੁਚ੍ਛਵਿਕੋ ਨੋ ਦੇਯ੍ਯਧਮ੍ਮੋ ਨਤ੍ਥਿ, ਸਤ੍ਥਾ ਚ ਭਿਕ੍ਖਾਚਾਰਵੇਲਾਯ ਇਧਾਗਤੋ, ਹਨ੍ਦ ਮਯਂ ਦੇਯ੍ਯਧਮ੍ਮਂ ਯਥਾਬਲਂ ਦਸ੍ਸਾਮ. ਤੁਮ੍ਹੇਹਿ ਯਂ ਯਂ ਪਣੀਤਂ ਫਲਾਫਲਂ ਆਭਤਂ, ਤਂ ਤਂ ਆਹਰਥਾ’’ਤਿ ਆਹਰਾਪੇਤ੍ਵਾ ਹਤ੍ਥੇ ਧੋਵਿਤ੍ਵਾ ਸਯਂ ਤਥਾਗਤਸ੍ਸ ਪਤ੍ਤੇ ਪਤਿਟ੍ਠਾਪੇਸਿ. ਸਤ੍ਥਾਰਾ ਚ ਫਲਾਫਲੇ ਪਟਿਗ੍ਗਣ੍ਹਿਤਮਤ੍ਤੇ ਦੇਵਤਾ ਦਿਬ੍ਬੋਜਂ ਪਕ੍ਖਿਪਿਂਸੁ. ਤਾਪਸੋ ਉਦਕਮ੍ਪਿ ਸਯਮੇਵ ਪਰਿਸ੍ਸਾਵੇਤ੍ਵਾ ਅਦਾਸਿ. ਤਤੋ ਭੋਜਨਕਿਚ੍ਚਂ ਨਿਟ੍ਠਾਪੇਤ੍ਵਾ ਸਤ੍ਥਰਿ ਨਿਸਿਨ੍ਨੇ ਸਬ੍ਬੇ ਅਨ੍ਤੇਵਾਸਿਕੇ ਪਕ੍ਕੋਸਿਤ੍ਵਾ ਸਤ੍ਥੁ ਸਨ੍ਤਿਕੇ ਸਾਰਣੀਯਂ ਕਥਂ ਕਥੇਨ੍ਤੋ ਨਿਸੀਦਿ. ਸਤ੍ਥਾ ‘‘ਦ੍ਵੇ ਅਗ੍ਗਸਾਵਕਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਆਗਚ੍ਛਨ੍ਤੂ’’ਤਿ ਚਿਨ੍ਤੇਸਿ. ਤੇ ਸਤ੍ਥੁ ਚਿਤ੍ਤਂ ਞਤ੍ਵਾ ਤਾਵਦੇਵ ਸਤਸਹਸ੍ਸਖੀਣਾਸਵਪਰਿਵਾਰਾ ਅਗ੍ਗਸਾਵਕਾ ਆਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਂਸੁ.
ਤਤੋ ਸਰਦਤਾਪਸੋ ਅਨ੍ਤੇਵਾਸਿਕੇ ਆਮਨ੍ਤੇਸਿ – ‘‘ਤਾਤਾ, ਸਤ੍ਥੁ ਭਿਕ੍ਖੁਸਙ੍ਘਸ੍ਸ ਚ ਪੁਪ੍ਫਾਸਨੇਨ ਪੂਜਾ ਕਾਤਬ੍ਬਾ, ਤਸ੍ਮਾ ਪੁਪ੍ਫਾਨਿ ਆਹਰਥਾ’’ਤਿ. ਤੇ ਤਾਵਦੇਵ ਇਦ੍ਧਿਯਾ ਵਣ੍ਣਗਨ੍ਧਸਮ੍ਪਨ੍ਨਾਨਿ ਪੁਪ੍ਫਾਨਿ ਆਹਰਿਤ੍ਵਾ ਬੁਦ੍ਧਸ੍ਸ ਯੋਜਨਪ੍ਪਮਾਣਂ ਪੁਪ੍ਫਾਸਨਂ ਪਞ੍ਞਾਪੇਸੁਂ, ਉਭਿਨ੍ਨਂ ਅਗ੍ਗਸਾਵਕਾਨਂ ਤਿਗਾਵੁਤਂ, ਸੇਸਭਿਕ੍ਖੂਨਂ ਅਡ੍ਢਯੋਜਨਿਕਾਦਿਭੇਦਂ, ਸਙ੍ਘਨਵਕਸ੍ਸ ਉਸਭਮਤ੍ਤਂ ਪਞ੍ਞਾਪੇਸੁਂ. ਏਵਂ ਤੇਸਂ ਪਞ੍ਞਤ੍ਤੇਸੁ ਆਸਨੇਸੁ ਸਰਦਤਾਪਸੋ ਤਥਾਗਤਸ੍ਸ ਪੁਰਤੋ ਅਞ੍ਜਲਿਂ ਪਗ੍ਗਯ੍ਹ ਠਿਤੋ – ‘‘ਭਨ੍ਤੇ, ਮਯ੍ਹਂ ਅਨੁਗ੍ਗਹਤ੍ਥਾਯ ਇਮਂ ਪੁਪ੍ਫਾਸਨਂ ਅਭਿਰੁਹਥਾ’’ਤਿ ਆਹ. ਨਿਸੀਦਿ ਭਗਵਾ ਪੁਪ੍ਫਾਸਨੇ. ਸਤ੍ਥਰਿ ਨਿਸਿਨ੍ਨੇ ਦ੍ਵੇ ਅਗ੍ਗਸਾਵਕਾ ਸੇਸਭਿਕ੍ਖੂ ਚ ਅਤ੍ਤਨੋ ਅਤ੍ਤਨੋ ਪਤ੍ਤਾਸਨੇ ਨਿਸੀਦਿਂਸੁ. ਸਤ੍ਥਾ ‘‘ਤੇਸਂ ਮਹਪ੍ਫਲਂ ਹੋਤੂ’’ਤਿ ਨਿਰੋਧਂ ਸਮਾਪਜ੍ਜਿ. ਸਤ੍ਥੁ ਸਮਾਪਨ੍ਨਭਾਵਂ ਞਤ੍ਵਾ ਦ੍ਵੇ ਅਗ੍ਗਸਾਵਕਾਪਿ ਸੇਸਭਿਕ੍ਖੂਪਿ ਨਿਰੋਧਂ ਸਮਾਪਜ੍ਜਿਂਸੁ. ਤਾਪਸੋ ਸਤ੍ਤਾਹਂ ਨਿਰਨ੍ਤਰਂ ਪੁਪ੍ਫਚ੍ਛਤ੍ਤਂ ਧਾਰੇਨ੍ਤੋ ਅਟ੍ਠਾਸਿ. ਇਤਰੇ ਪਨ ਵਨਮੂਲਫਲਾਫਲਂ ਪਰਿਭੁਞ੍ਜਿਤ੍ਵਾ ਸੇਸਕਾਲੇ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਂਸੁ.
ਸਤ੍ਥਾ ਸਤ੍ਤਾਹਸ੍ਸ ਅਚ੍ਚਯੇਨ ਨਿਰੋਧਤੋ ਵੁਟ੍ਠਾਯ ਅਗ੍ਗਸਾਵਕਂ ਨਿਸਭਤ੍ਥੇਰਂ ਆਮਨ੍ਤੇਸਿ – ‘‘ਤਾਪਸਾਨਂ ਪੁਪ੍ਫਾਸਨਾਨੁਮੋਦਨਂ ਕਰੋਹੀ’’ਤਿ. ਥੇਰੋ ਸਾਵਕਪਾਰਮੀਞਾਣੇ ਠਤ੍ਵਾ ਤੇਸਂ ਪੁਪ੍ਫਾਸਨਾਨੁਮੋਦਨਂ ਅਕਾਸਿ. ਤਸ੍ਸ ਦੇਸਨਾਵਸਾਨੇ ਸਤ੍ਥਾ ਦੁਤਿਯਂ ਅਗ੍ਗਸਾਵਕਂ ਅਨੋਮਤ੍ਥੇਰਂ ਆਮਨ੍ਤੇਸਿ – ‘‘ਤ੍ਵਮ੍ਪਿ ਇਮੇਸਂ ਧਮ੍ਮਂ ਦੇਸੇਹੀ’’ਤਿ. ਸੋਪਿ ਤੇਪਿਟਕਂ ਬੁਦ੍ਧਵਚਨਂ ਸਮ੍ਮਸਿਤ੍ਵਾ ਤੇਸਂ ਧਮ੍ਮਂ ਕਥੇਸਿ. ਦ੍ਵਿਨ੍ਨਮ੍ਪਿ ਦੇਸਨਾਯ ਏਕਸ੍ਸਪਿ ਧਮ੍ਮਾਭਿਸਮਯੋ ਨਾਹੋਸਿ. ਅਥ ਸਤ੍ਥਾ ਬੁਦ੍ਧਵਿਸਯੇ ਠਤ੍ਵਾ ਧਮ੍ਮਦੇਸਨਂ ਆਰਭਿ. ਦੇਸਨਾਵਸਾਨੇ ਠਪੇਤ੍ਵਾ ਸਰਦਤਾਪਸਂ ਅਵਸੇਸਾ ਸਬ੍ਬੇਪਿ ਚਤੁਸਤ੍ਤਤਿਸਹਸ੍ਸਮਤ੍ਤਾ ਜਟਿਲਾ ਅਰਹਤ੍ਤਂ ਪਾਪੁਣਿਂਸੁ. ਸਤ੍ਥਾ ‘‘ਏਥ, ਭਿਕ੍ਖਵੋ’’ਤਿ ਹਤ੍ਥਂ ਪਸਾਰੇਸਿ. ਤੇ ਤਾਵਦੇਵ ਅਨ੍ਤਰਹਿਤਤਾਪਸਵੇਸਾ ਅਟ੍ਠਪਰਿਕ੍ਖਾਰਵਰਧਰਾ ਸਟ੍ਠਿਵਸ੍ਸਿਕਤ੍ਥੇਰਾ ਵਿਯ ਅਹੇਸੁਂ.
ਸਰਦਤਾਪਸੋ ਪਨ ‘‘ਅਹੋ ਵਤਾਹਮ੍ਪਿ ਅਯਂ ਨਿਸਭਤ੍ਥੇਰੋ ਵਿਯ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਅਗ੍ਗਸਾਵਕੋ ਭਵੇਯ੍ਯ’’ਨ੍ਤਿ ਸਤ੍ਥੁ ਦੇਸਨਾਕਾਲੇ ਉਪ੍ਪਨ੍ਨਪਰਿਵਿਤਕ੍ਕਤਾਯ ਅਞ੍ਞਵਿਹਿਤੋ ਹੁਤ੍ਵਾ ਮਗ੍ਗਫਲਾਨਿ ਪਟਿਵਿਜ੍ਝਿਤੁਂ ਨਾਸਕ੍ਖਿ. ਅਥ ਤਥਾਗਤਂ ਵਨ੍ਦਿਤ੍ਵਾ ਤਥਾ ਪਣਿਧਾਨਂ ਅਕਾਸਿ. ਸਤ੍ਥਾਪਿਸ੍ਸ ਅਨਨ੍ਤਰਾਯੇਨ ਸਮਿਜ੍ਝਨਭਾਵਂ ਦਿਸ੍ਵਾ – ‘‘ਇਤੋ ਤ੍ਵਂ ਕਪ੍ਪਸਤਸਹਸ੍ਸਾਧਿਕਂ ਏਕਂ ਅਸਙ੍ਖ੍ਯੇਯ੍ਯਂ ਅਤਿਕ੍ਕਮਿਤ੍ਵਾ ਗੋਤਮਸ੍ਸ ਨਾਮ ਸਮ੍ਮਾਸਮ੍ਬੁਦ੍ਧਸ੍ਸ ਅਗ੍ਗਸਾਵਕੋ ਸਾਰਿਪੁਤ੍ਤੋ ਨਾਮ ਭਵਿਸ੍ਸਸੀ’’ਤਿ ਬ੍ਯਾਕਰਿਤ੍ਵਾ ਧਮ੍ਮਕਥਂ ਵਤ੍ਵਾ ਭਿਕ੍ਖੁਸਙ੍ਘਪਰਿਵੁਤੋ ਆਕਾਸਂ ਪਕ੍ਖਨ੍ਦਿ.
ਸਰਦਤਾਪਸੋਪਿ ਸਹਾਯਕਸ੍ਸ ਸਿਰਿਵਡ੍ਢਸ੍ਸ ਸਨ੍ਤਿਕਂ ਗਨ੍ਤ੍ਵਾ, ਸਮ੍ਮ, ਮਯਾ ਅਨੋਮਦਸ੍ਸਿਸ੍ਸ ਭਗਵਤੋ ਪਾਦਮੂਲੇ ਅਨਾਗਤੇ ਉਪ੍ਪਜ੍ਜਨਕਸ੍ਸ ਗੋਤਮਸ੍ਸ ਨਾਮ ਸਮ੍ਮਾਸਮ੍ਬੁਦ੍ਧਸ੍ਸ ਅਗ੍ਗਸਾਵਕਟ੍ਠਾਨਂ ਪਤ੍ਥਿਤਂ, ਤ੍ਵਮ੍ਪਿ ਤਸ੍ਸ ਦੁਤਿਯਸਾਵਕਟ੍ਠਾਨਂ ਪਤ੍ਥੇਹੀਤਿ.
ਸਿਰਿਵਡ੍ਢੋ ਤਂ ਉਪਦੇਸਂ ਸੁਤ੍ਵਾ ਅਤ੍ਤਨੋ ਨਿਵੇਸਨਦ੍ਵਾਰੇ ਅਟ੍ਠਕਰੀਸਮਤ੍ਤਂ ਠਾਨਂ ਸਮਤਲਂ ਕਾਰੇਤ੍ਵਾ ਲਾਜਪਞ੍ਚਮਾਨਿ ਪੁਪ੍ਫਾਨਿ ਵਿਕਿਰਿਤ੍ਵਾ ਨੀਲੁਪ੍ਪਲਚ੍ਛਦਨਂ ਮਣ੍ਡਪਂ ਕਾਰੇਤ੍ਵਾ ਬੁਦ੍ਧਾਸਨਂ ਪਞ੍ਞਾਪੇਤ੍ਵਾ ਭਿਕ੍ਖੂਨਮ੍ਪਿ ਆਸਨਾਨਿ ਪਞ੍ਞਾਪੇਤ੍ਵਾ ਮਹਨ੍ਤਂ ਸਕ੍ਕਾਰਸਮ੍ਮਾਨਂ ਸਜ੍ਜੇਤ੍ਵਾ, ਸਰਦਤਾਪਸੇਨ ਸਤ੍ਥਾਰਂ ਨਿਮਨ੍ਤਾਪੇਤ੍ਵਾ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ, ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਮਹਾਰਹੇਹਿ ਵਤ੍ਥੇਹਿ ਅਚ੍ਛਾਦੇਤ੍ਵਾ, ਦੁਤਿਯਸਾਵਕਭਾਵਾਯ ਪਣਿਧਾਨਂ ਅਕਾਸਿ. ਸਤ੍ਥਾਪਿਸ੍ਸ ਅਨਨ੍ਤਰਾਯੇਨ ਸਮਿਜ੍ਝਨਭਾਵਂ ਦਿਸ੍ਵਾ ਵੁਤ੍ਤਨਯੇਨ ਬ੍ਯਾਕਰਿਤ੍ਵਾ ਭਤ੍ਤਾਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸਿਰਿਵਡ੍ਢੋ ਹਟ੍ਠਪਹਟ੍ਠੋ ਯਾਵਜੀਵਂ ਕੁਸਲਕਮ੍ਮਂ ਕਤ੍ਵਾ ਦੁਤਿਯਚਿਤ੍ਤਵਾਰੇ ਕਾਮਾਵਚਰਦੇਵਲੋਕੇ ਨਿਬ੍ਬਤ੍ਤਿ. ਸਰਦਤਾਪਸੋ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ.
ਤਤੋ ਪਟ੍ਠਾਯ ਨੇਸਂ ਉਭਿਨ੍ਨਮ੍ਪਿ ਅਨ੍ਤਰਾਕਮ੍ਮਂ ਨ ਕਥਿਤਂ. ਅਮ੍ਹਾਕਂ ਪਨ ਭਗਵਤੋ ਉਪ੍ਪਤ੍ਤਿਤੋ ਪੁਰੇਤਰਮੇਵ ਸਰਦਤਾਪਸੋ ਰਾਜਗਹਸ੍ਸ ਅਵਿਦੂਰੇ ਉਪਤਿਸ੍ਸਗਾਮੇ ਰੂਪਸਾਰਿਯਾ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਤਂਦਿਵਸਮੇਵਸ੍ਸ ਸਹਾਯੋਪਿ ਰਾਜਗਹਸ੍ਸੇਵ ਅਵਿਦੂਰੇ ਕੋਲਿਤਗਾਮੇ ਮੋਗ੍ਗਲਿਯਾ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਤਾਨਿ ਕਿਰ ਦ੍ਵੇਪਿ ਕੁਲਾਨਿ ਯਾਵ ਸਤ੍ਤਮਾ ਕੁਲਪਰਿਵਟ੍ਟਾ ਆਬਦ੍ਧਪਟਿਬਦ੍ਧਸਹਾਯਕਾਨੇਵ. ਤੇਸਂ ਦ੍ਵਿਨ੍ਨਂ ਏਕਦਿਵਸਮੇਵ ਗਬ੍ਭਪਰਿਹਾਰਮਦਂਸੁ. ਦਸਮਾਸਚ੍ਚਯੇਨ ਜਾਤਾਨਮ੍ਪਿ ਤੇਸਂ ਛਸਟ੍ਠਿ ਧਾਤਿਯੋ ਉਪਟ੍ਠਾਪੇਸੁਂ, ਨਾਮਗ੍ਗਹਣਦਿਵਸੇ ਰੂਪਸਾਰਿਬ੍ਰਾਹ੍ਮਣਿਯਾ ਪੁਤ੍ਤਸ੍ਸ ਉਪਤਿਸ੍ਸਗਾਮੇ ਜੇਟ੍ਠਕੁਲਸ੍ਸ ਪੁਤ੍ਤਤ੍ਤਾ ਉਪਤਿਸ੍ਸੋਤਿ ਨਾਮਂ ਅਕਂਸੁ. ਇਤਰਸ੍ਸ ਕੋਲਿਤਗਾਮੇ ਜੇਟ੍ਠਕੁਲਸ੍ਸ ਪੁਤ੍ਤਤ੍ਤਾ ਕੋਲਿਤੋਤਿ ਨਾਮਂ ਅਕਂਸੁ. ਤੇ ਉਭੋਪਿ ਮਹਤਾ ਪਰਿਵਾਰੇਨ ਵਡ੍ਢਨ੍ਤਾ ਵੁਦ੍ਧਿਮਨ੍ਵਾਯ ਸਬ੍ਬਸਿਪ੍ਪਾਨਂ ਪਾਰਂ ਅਗਮਂਸੁ.
ਅਥੇਕਦਿਵਸਂ ਤੇ ਰਾਜਗਹੇ ਗਿਰਗ੍ਗਸਮਜ੍ਜਂ ਪਸ੍ਸਨ੍ਤਾ ਮਹਾਜਨਂ ਸਨ੍ਨਿਪਤਿਤਂ ਦਿਸ੍ਵਾ ਞਾਣਸ੍ਸ ਪਰਿਪਾਕਗਤਤ੍ਤਾ ਯੋਨਿਸੋ ਉਮ੍ਮੁਜ੍ਜਨ੍ਤਾ ‘‘ਸਬ੍ਬੇਪਿਮੇ ਓਰਂ ਵਸ੍ਸਸਤਾਨਂ ਮਚ੍ਚੁਮੁਖੇ ਪਤਿਸ੍ਸਨ੍ਤੀ’’ਤਿ ਸਂਵੇਗਂ ਪਟਿਲਭਿਤ੍ਵਾ ‘‘ਅਮ੍ਹੇਹਿ ਮੋਕ੍ਖਧਮ੍ਮੋ ਪਰਿਯੇਸਿਤਬ੍ਬੋ, ਤਞ੍ਚ ਪਰਿਯੇਸਨ੍ਤੇਹਿ ਏਕਂ ਪਬ੍ਬਜ੍ਜਂ ਲਦ੍ਧੁਂ ਵਟ੍ਟਤੀ’’ਤਿ ਨਿਚ੍ਛਯਂ ਕਤ੍ਵਾ ਪਞ੍ਚਹਿ ਮਾਣਵਕਸਤੇਹਿ ਸਦ੍ਧਿਂ ਸਞ੍ਚਯਸ੍ਸ ਪਰਿਬ੍ਬਾਜਕਸ੍ਸ ਸਨ੍ਤਿਕੇ ਪਬ੍ਬਜਿਂਸੁ. ਤੇਸਂ ਪਬ੍ਬਜਿਤਕਾਲਤੋ ਪਟ੍ਠਾਯ ਸਞ੍ਚਯੋ ਲਾਭਗ੍ਗਯਸਗ੍ਗਪ੍ਪਤ੍ਤੋ ਅਹੋਸਿ. ਤੇ ਕਤਿਪਾਹੇਨੇਵ ਸਬ੍ਬਂ ਸਞ੍ਚਯਸ੍ਸ ਸਮਯਂ ਪਰਿਗ੍ਗਣ੍ਹਿਤ੍ਵਾ ਤਤ੍ਥ ਸਾਰਂ ਅਦਿਸ੍ਵਾ ਤਤੋ ਨਿਕ੍ਖਮਿਤ੍ਵਾ ਤਤ੍ਥ ਤਤ੍ਥ ਤੇ ਤੇ ਪਣ੍ਡਿਤਸਮ੍ਮਤੇ ਸਮਣਬ੍ਰਾਹ੍ਮਣੇ ਪਞ੍ਹਂ ਪੁਚ੍ਛਨ੍ਤਿ, ਤੇ ਤੇਹਿ ਪੁਟ੍ਠਾ ਨੇਵ ਸਮ੍ਪਾਯਨ੍ਤਿ, ਅਞ੍ਞਦਤ੍ਥੁ ਤੇਯੇਵ ਤੇਸਂ ਪਞ੍ਹਂ ਵਿਸ੍ਸਜ੍ਜੇਨ੍ਤਿ. ਏਵਂ ਤੇ ਮੋਕ੍ਖਂ ਪਰਿਯੇਸਨ੍ਤਾ ਕਤਿਕਂ ਅਕਂਸੁ – ‘‘ਅਮ੍ਹੇਸੁ ਯੋ ਪਠਮਂ ਅਮਤਂ ਅਧਿਗਚ੍ਛਤਿ, ਸੋ ਇਤਰਸ੍ਸ ਆਰੋਚੇਤੂ’’ਤਿ.
ਤੇਨ ਚ ਸਮਯੇਨ ਅਮ੍ਹਾਕਂ ਸਤ੍ਥਰਿ ਪਠਮਾਭਿਸਮ੍ਬੋਧਿਂ ਪਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਅਨੁਪੁਬ੍ਬੇਨ ਉਰੁਵੇਲਕਸ੍ਸਪਾਦਿਕੇ ਸਹਸ੍ਸਜਟਿਲੇ ਦਮੇਤ੍ਵਾ ਰਾਜਗਹੇ ਵਿਹਰਨ੍ਤੇ ਏਕਦਿਵਸਂ ਉਪਤਿਸ੍ਸੋ ਪਰਿਬ੍ਬਾਜਕੋ ਪਰਿਬ੍ਬਾਜਕਾਰਾਮਂ ਗਚ੍ਛਨ੍ਤੋ ਆਯਸ੍ਮਨ੍ਤਂ ਅਸ੍ਸਜਿਤ੍ਥੇਰਂ ਰਾਜਗਹੇ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ‘‘ਨ ਮਯਾ ਏਵਰੂਪੋ ਆਕਪ੍ਪਸਮ੍ਪਨ੍ਨੋ ਪਬ੍ਬਜਿਤੋ ਦਿਟ੍ਠਪੁਬ੍ਬੋ, ਸਨ੍ਤਧਮ੍ਮੇਨ ਨਾਮ ਏਤ੍ਥ ਭਵਿਤਬ੍ਬ’’ਨ੍ਤਿ ਸਞ੍ਜਾਤਪ੍ਪਸਾਦੋ ਪਞ੍ਹਂ ਪੁਚ੍ਛਿਤੁਂ ਆਯਸ੍ਮਨ੍ਤਂ ਉਦਿਕ੍ਖਨ੍ਤੋ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਿ. ਥੇਰੋਪਿ ਲਦ੍ਧਪਿਣ੍ਡਪਾਤੋ ਪਰਿਭੁਞ੍ਜਿਤੁਂ ਪਤਿਰੂਪਂ ਓਕਾਸਂ ਗਤੋ. ਪਰਿਬ੍ਬਾਜਕੋ ਅਤ੍ਤਨੋ ਪਰਿਬ੍ਬਾਜਕਪੀਠਂ ਪਞ੍ਞਾਪੇਤ੍ਵਾ ਅਦਾਸਿ. ਭਤ੍ਤਕਿਚ੍ਚਪਰਿਯੋਸਾਨੇ ਚਸ੍ਸ ਅਤ੍ਤਨੋ ਕੁਣ੍ਡਿਕਾਯ ਉਦਕਂ ਅਦਾਸਿ.
ਏਵਂ ਸੋ ਆਚਰਿਯਵਤ੍ਤਂ ਕਤ੍ਵਾ ਕਤਭਤ੍ਤਕਿਚ੍ਚੇਨ ਥੇਰੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ‘‘ਕੋ ਵਾ ਤੇ ਸਤ੍ਥਾ, ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀ’’ਤਿ ਪੁਚ੍ਛਿ. ਥੇਰੋ ਸਮ੍ਮਾਸਮ੍ਬੁਦ੍ਧਂ ਅਪਦਿਸਿ. ਪੁਨ ਤੇਨ ‘‘ਕਿਂਵਾਦੀ ਪਨਾਯਸ੍ਮਤੋ ਸਤ੍ਥਾ’’ਤਿ ਪੁਟ੍ਠੋ ‘‘ਇਮਸ੍ਸ ਸਾਸਨਸ੍ਸ ਗਮ੍ਭੀਰਤਂ ਦਸ੍ਸੇਸ੍ਸਾਮੀ’’ਤਿ ਅਤ੍ਤਨੋ ਨਵਕਭਾਵਂ ਪਵੇਦੇਤ੍ਵਾ ਸਙ੍ਖੇਪਵਸੇਨ ਚਸ੍ਸ ਸਾਸਨਧਮ੍ਮਂ ਕਥੇਨ੍ਤੋ ‘‘ਯੇ ਧਮ੍ਮਾ ਹੇਤੁਪ੍ਪਭਵਾ’’ਤਿ (ਮਹਾਵ. ੬੦; ਅਪ. ਥੇਰ ੧.੧.੨੮੬; ਪੇਟਕੋ. ੯) ਗਾਥਮਾਹ. ਪਰਿਬ੍ਬਾਜਕੋ ਪਠਮਪਦਦ੍ਵਯਮੇਵ ਸੁਤ੍ਵਾ ਸਹਸ੍ਸਨਯਸਮ੍ਪਨ੍ਨੇ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ, ਇਤਰਂ ਪਦਦ੍ਵਯਂ ਸੋਤਾਪਨ੍ਨਕਾਲੇ ਨਿਟ੍ਠਾਸਿ. ਗਾਥਾਪਰਿਯੋਸਾਨੇ ਪਨ ਸੋਤਾਪਨ੍ਨੋ ਹੁਤ੍ਵਾ ਉਪਰਿ ਵਿਸੇਸੇ ਅਪ੍ਪਵਤ੍ਤੇਨ੍ਤੇ ‘‘ਭਵਿਸ੍ਸਤਿ ਏਤ੍ਥ ਕਾਰਣ’’ਨ੍ਤਿ ਸਲ੍ਲਕ੍ਖੇਤ੍ਵਾ ਥੇਰਂ ਆਹ – ‘‘ਮਾ, ਭਨ੍ਤੇ, ਉਪਰਿ ਧਮ੍ਮਦੇਸਨਂ ਵਡ੍ਢਯਿਤ੍ਥ, ਏਤ੍ਤਕਮੇਵ ਹੋਤੁ, ਕਹਂ ਅਮ੍ਹਾਕਂ ਸਤ੍ਥਾ ਵਸਤੀ’’ਤਿ? ‘‘ਵੇਲ਼ੁਵਨੇ’’ਤਿ. ‘‘ਭਨ੍ਤੇ, ਤੁਮ੍ਹੇ ਪੁਰਤੋ ਗਚ੍ਛਥ, ਅਹਂ ਮਯ੍ਹਂ ਸਹਾਯਕਸ੍ਸ ਕਤਪਟਿਞ੍ਞਂ ਮੋਚੇਤ੍ਵਾ ਤਂ ਗਹੇਤ੍ਵਾ ਆਗਮਿਸ੍ਸਾਮੀ’’ਤਿ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਥੇਰਂ ਉਯ੍ਯੋਜੇਤ੍ਵਾ ਪਰਿਬ੍ਬਾਜਕਾਰਾਮਂ ਅਗਮਾਸਿ.
ਕੋਲਿਤਪਰਿਬ੍ਬਾਜਕੋ ਤਂ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ‘‘ਮੁਖਵਣ੍ਣੋ ਨ ਅਞ੍ਞਦਿਵਸੇਸੁ ਵਿਯ, ਅਦ੍ਧਾਨੇਨ ਅਮਤਂ ਅਧਿਗਤਂ ਭਵਿਸ੍ਸਤੀ’’ਤਿ ਤੇਨੇਵਸ੍ਸ ਵਿਸੇਸਾਧਿਗਮਂ ਸਮ੍ਭਾਵੇਤ੍ਵਾ ਅਮਤਾਧਿਗਮਂ ਪੁਚ੍ਛਿ. ਸੋਪਿਸ੍ਸ ‘‘ਆਮਾਵੁਸੋ, ਅਮਤਂ ਅਧਿਗਤ’’ਨ੍ਤਿ ਪਟਿਜਾਨਿਤ੍ਵਾ ਤਮੇਵ ਗਾਥਂ ਅਭਾਸਿ. ਗਾਥਾਪਰਿਯੋਸਾਨੇ ਕੋਲਿਤੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿਤ੍ਵਾ ਆਹ – ‘‘ਕਹਂ ਨੋ ਸਤ੍ਥਾ’’ਤਿ? ‘‘ਵੇਲ਼ੁਵਨੇ’’ਤਿ. ‘‘ਤੇਨ ਹਿ, ਆਵੁਸੋ, ਆਯਾਮ, ਸਤ੍ਥਾਰਂ ਪਸ੍ਸਿਸ੍ਸਾਮਾ’’ਤਿ. ਉਪਤਿਸ੍ਸੋ ਸਬ੍ਬਕਾਲਮ੍ਪਿ ਆਚਰਿਯਪੂਜਕੋਵ, ਤਸ੍ਮਾ ਸਞ੍ਚਯਸ੍ਸ ਸਨ੍ਤਿਕਂ ਗਨ੍ਤ੍ਵਾ ਸਤ੍ਥੁ ਗੁਣੇ ਪਕਾਸੇਤ੍ਵਾ ਤਮ੍ਪਿ ਸਤ੍ਥੁ ਸਨ੍ਤਿਕਂ ਨੇਤੁਕਾਮੋ ਅਹੋਸਿ. ਸੋ ਲਾਭਾਸਾਪਕਤੋ ਅਨ੍ਤੇਵਾਸਿਕਭਾਵਂ ਅਨਿਚ੍ਛਨ੍ਤੋ ‘‘ਨ ਸਕ੍ਕੋਮਿ ਚਾਟਿ ਹੁਤ੍ਵਾ ਉਦਕਸਿਞ੍ਚਨਂ ਹੋਤੁ’’ਨ੍ਤਿ ਪਟਿਕ੍ਖਿਪਿ. ਤੇ ਅਨੇਕੇਹਿ ਕਾਰਣੇਹਿ ਤਂ ਸਞ੍ਞਾਪੇਤੁਂ ਅਸਕ੍ਕੋਨ੍ਤਾ ਅਤ੍ਤਨੋ ਓਵਾਦੇ ਵਤ੍ਤਮਾਨੇਹਿ ਅਡ੍ਢਤੇਯ੍ਯਸਤੇਹਿ ਅਨ੍ਤੇਵਾਸਿਕੇਹਿ ਸਦ੍ਧਿਂ ਵੇਲ਼ੁਵਨਂ ਅਗਮਂਸੁ. ਸਤ੍ਥਾ ਤੇ ਦੂਰਤੋਵ ਆਗਚ੍ਛਨ੍ਤੇ ਦਿਸ੍ਵਾ ‘‘ਏਤਂ ਮੇ ਸਾਵਕਯੁਗਂ ਭਵਿਸ੍ਸਤਿ ਅਗ੍ਗਂ ਭਦ੍ਦਯੁਗ’’ਨ੍ਤਿ ਵਤ੍ਵਾ ਤੇਸਂ ਪਰਿਸਾਯ ਚਰਿਯਵਸੇਨ ਧਮ੍ਮਂ ਦੇਸੇਤ੍ਵਾ ਅਰਹਤ੍ਤੇ ਪਤਿਟ੍ਠਾਪੇਤ੍ਵਾ ਏਹਿਭਿਕ੍ਖੁਭਾਵੇਨ ਉਪਸਮ੍ਪਦਂ ਅਦਾਸਿ. ਯਥਾ ਤੇਸਂ, ਏਵਂ ਅਗ੍ਗਸਾਵਕਾਨਮ੍ਪਿ ਇਦ੍ਧਿਮਯਪਤ੍ਤਚੀਵਰਂ ਆਗਤਮੇਵ. ਉਪਰਿਮਗ੍ਗਤ੍ਤਯਕਿਚ੍ਚਂ ਪਨ ਨ ਨਿਟ੍ਠਾਤਿ. ਕਸ੍ਮਾ? ਸਾਵਕਪਾਰਮੀਞਾਣਸ੍ਸ ਮਹਨ੍ਤਤਾਯ.
ਤੇਸੁ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਪਬ੍ਬਜਿਤਦਿਵਸਤੋ ਸਤ੍ਤਮੇ ਦਿਵਸੇ ਮਗਧਰਟ੍ਠੇ ਕਲ੍ਲਵਾਲਗਾਮੇ ਸਮਣਧਮ੍ਮਂ ਕਰੋਨ੍ਤੋ ਥਿਨਮਿਦ੍ਧੇ ਓਕ੍ਕਨ੍ਤੇ ਸਤ੍ਥਾਰਾ ਸਂਵੇਜਿਤੋ ਥਿਨਮਿਦ੍ਧਂ ਵਿਨੋਦੇਤ੍ਵਾ ਧਾਤੁਕਮ੍ਮਟ੍ਠਾਨਂ (ਅ. ਨਿ. ੭.੬੧) ਸੁਣਨ੍ਤੋ ਏਵ ਉਪਰਿਮਗ੍ਗਤ੍ਤਯਂ ਅਧਿਗਨ੍ਤ੍ਵਾ ਸਾਵਕਪਾਰਮੀਞਾਣਸ੍ਸ ਮਤ੍ਥਕਂ ਪਾਪੁਣਿ. ਆਯਸ੍ਮਾ ਸਾਰਿਪੁਤ੍ਤੋ ਪਬ੍ਬਜਿਤਦਿਵਸਤੋ ਅਡ੍ਢਮਾਸਂ ਅਤਿਕ੍ਕਮਿਤ੍ਵਾ ਸਤ੍ਥਾਰਾ ਸਦ੍ਧਿਂ ਰਾਜਗਹੇ ਸੂਕਰਖਤਲੇਣੇ ਵਿਹਰਨ੍ਤੋ ਅਤ੍ਤਨੋ ਭਾਗਿਨੇਯ੍ਯਸ੍ਸ ਦੀਘਨਖਪਰਿਬ੍ਬਾਜਕਸ੍ਸ ਵੇਦਨਾਪਰਿਗ੍ਗਹਸੁਤ੍ਤਨ੍ਤੇ (ਮ. ਨਿ. ੨.੨੦੧ ਆਦਯੋ) ਦੇਸਿਯਮਾਨੇ ਦੇਸਨਾਨੁਸਾਰੇਨ ਞਾਣਂ ਪੇਸੇਤ੍ਵਾ ਪਰਸ੍ਸ ਵਡ੍ਢਿਤਂ ਭਤ੍ਤਂ ਭੁਞ੍ਜਨ੍ਤੋ ਵਿਯ ਸਾਵਕਪਾਰਮੀਞਾਣਸ੍ਸ ਮਤ੍ਥਕਂ ਪਾਪੁਣਿ. ਇਤਿ ਦ੍ਵਿਨ੍ਨਮ੍ਪਿ ਅਗ੍ਗਸਾਵਕਾਨਂ ਸਤ੍ਥੁ ਸਮੀਪੇ ਏਵ ਸਾਵਕਪਾਰਮੀਞਾਣਂ ਮਤ੍ਥਕਂ ਪਤ੍ਤਂ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੧.੧੪੧-੩੭੪) –
‘‘ਹਿਮਵਨ੍ਤਸ੍ਸ ਅਵਿਦੂਰੇ, ਲਮ੍ਬਕੋ ਨਾਮ ਪਬ੍ਬਤੋ;
ਅਸ੍ਸਮੋ ਸੁਕਤੋ ਮਯ੍ਹਂ, ਪਣ੍ਣਸਾਲਾ ਸੁਮਾਪਿਤਾ.
‘‘ਉਤ੍ਤਾਨਕੂਲਾ ਨਦਿਕਾ, ਸੁਪਤਿਤ੍ਥਾ ਮਨੋਰਮਾ;
ਸੁਸੁਦ੍ਧਪੁਲਿਨਾਕਿਣ੍ਣਾ, ਅਵਿਦੂਰੇ ਮਮਸ੍ਸਮਂ.
‘‘ਅਸਕ੍ਖਰਾ ਅਪਬ੍ਭਾਰਾ, ਸਾਦੁ ਅਪ੍ਪਟਿਗਨ੍ਧਿਕਾ;
ਸਨ੍ਦਤੀ ਨਦਿਕਾ ਤਤ੍ਥ, ਸੋਭਯਨ੍ਤਾ ਮਮਸ੍ਸਮਂ.
‘‘ਕੁਮ੍ਭੀਲਾ ਮਕਰਾ ਚੇਤ੍ਥ, ਸੁਸੁਮਾਰਾ ਚ ਕਚ੍ਛਪਾ;
ਚਰਨ੍ਤਿ ਨਦਿਯਾ ਤਤ੍ਥ, ਸੋਭਯਨ੍ਤਾ ਮਮਸ੍ਸਮਂ.
‘‘ਪਾਠੀਨਾ ਪਾਵੁਸਾ ਮਚ੍ਛਾ, ਬਲਜਾ ਮੁਞ੍ਜਰੋਹਿਤਾ;
ਵਗ੍ਗਲ਼ਾ ਪਪਤਾਯਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.
‘‘ਉਭੋ ਕੂਲੇਸੁ ਨਦਿਯਾ, ਪੁਪ੍ਫਿਨੋ ਫਲਿਨੋ ਦੁਮਾ;
ਉਭਤੋ ਅਭਿਲਮ੍ਬਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.
‘‘ਅਮ੍ਬਾ ਸਾਲਾ ਚ ਤਿਲਕਾ, ਪਾਟਲੀ ਸਿਨ੍ਦੁਵਾਰਕਾ;
ਦਿਬ੍ਬਗਨ੍ਧਾ ਸਮ੍ਪਵਨ੍ਤਿ, ਪੁਪ੍ਫਿਤਾ ਮਮ ਅਸ੍ਸਮੇ.
‘‘ਚਮ੍ਮਕਾ ਸਲ਼ਲਾ ਨੀਪਾ, ਨਾਗਪੁਨ੍ਨਾਗਕੇਤਕਾ;
ਦਿਬ੍ਬਗਨ੍ਧਾ ਸਮ੍ਪਵਨ੍ਤਿ, ਪੁਪ੍ਫਿਤਾ ਮਮ ਅਸ੍ਸਮੇ.
‘‘ਅਤਿਮੁਤ੍ਤਾ ਅਸੋਕਾ ਚ, ਭਗਿਨੀਮਾਲਾ ਚ ਪੁਪ੍ਫਿਤਾ;
ਅਙ੍ਕੋਲਾ ਬਿਮ੍ਬਿਜਾਲਾ ਚ, ਪੁਪ੍ਫਿਤਾ ਮਮ ਅਸ੍ਸਮੇ.
‘‘ਕੇਤਕਾ ਕਨ੍ਦਲਿ ਚੇਵ, ਗੋਧੁਕਾ ਤਿਣਸੂਲਿਕਾ;
ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.
‘‘ਕਣਿਕਾਰਾ ਕਣ੍ਣਿਕਾ ਚ, ਅਸਨਾ ਅਜ੍ਜੁਨਾ ਬਹੂ;
ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.
‘‘ਪੁਨ੍ਨਾਗਾ ਗਿਰਿਪੁਨ੍ਨਾਗਾ, ਕੋਵਿਲ਼ਾਰਾ ਚ ਪੁਪ੍ਫਿਤਾ;
ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.
‘‘ਉਦ੍ਦਾਲਕਾ ਚ ਕੁਟਜਾ, ਕਦਮ੍ਬਾ ਵਕੁਲਾ ਬਹੂ;
ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.
‘‘ਆਲ਼ਕਾ ਇਸਿਮੁਗ੍ਗਾ ਚ, ਕਦਲਿਮਾਤੁਲੁਙ੍ਗਿਯੋ;
ਗਨ੍ਧੋਦਕੇਨ ਸਂਵਡ੍ਢਾ, ਫਲਾਨਿ ਧਾਰਯਨ੍ਤਿ ਤੇ.
‘‘ਅਞ੍ਞੇ ਪੁਪ੍ਫਨ੍ਤਿ ਪਦੁਮਾ, ਅਞ੍ਞੇ ਜਾਯਨ੍ਤਿ ਕੇਸਰੀ;
ਅਞ੍ਞੇ ਓਪੁਪ੍ਫਾ ਪਦੁਮਾ, ਪੁਪ੍ਫਿਤਾ ਤਲ਼ਾਕੇ ਤਦਾ.
‘‘ਗਬ੍ਭਂ ਗਣ੍ਹਨ੍ਤਿ ਪਦੁਮਾ, ਨਿਦ੍ਧਾਵਨ੍ਤਿ ਮੁਲ਼ਾਲਿਯੋ;
ਸਿਙ੍ਘਾਟਿਪਤ੍ਤਮਾਕਿਣ੍ਣਾ, ਸੋਭਨ੍ਤਿ ਤਲ਼ਾਕੇ ਤਦਾ.
‘‘ਨਯਿਤਾ ਅਮ੍ਬਗਨ੍ਧੀ ਚ, ਉਤ੍ਤਲੀ ਬਨ੍ਧੁਜੀਵਕਾ;
ਦਿਬ੍ਬਗਨ੍ਧਾ ਸਮ੍ਪਵਨ੍ਤਿ, ਪੁਪ੍ਫਿਤਾ ਤਲ਼ਾਕੇ ਤਦਾ.
‘‘ਪਾਠੀਨਾ ਪਾਵੁਸਾ ਮਚ੍ਛਾ, ਬਲਜਾ ਮੁਞ੍ਜਰੋਹਿਤਾ;
ਸਂਗੁਲਾ ਮਗ੍ਗੁਰਾ ਚੇਵ, ਵਸਨ੍ਤਿ ਤਲ਼ਾਕੇ ਤਦਾ.
‘‘ਕੁਮ੍ਭੀਲਾ ਸੁਸੁਮਾਰਾ ਚ, ਤਨ੍ਤਿਗਾਹਾ ਚ ਰਕ੍ਖਸਾ;
ਓਗੁਹਾ ਅਜਗਰਾ ਚ, ਵਸਨ੍ਤਿ ਤਲ਼ਾਕੇ ਤਦਾ.
‘‘ਪਾਰੇਵਤਾ ਰਵਿਹਂਸਾ, ਚਕ੍ਕਵਾਕਾ ਨਦੀਚਰਾ;
ਕੋਕਿਲਾ ਸੁਕਸਾਲ਼ਿਕਾ, ਉਪਜੀਵਨ੍ਤਿ ਤਂ ਸਰਂ.
‘‘ਕੁਕੁਤ੍ਥਕਾ ਕੁਲ਼ੀਰਕਾ, ਵਨੇ ਪੋਕ੍ਖਰਸਾਤਕਾ;
ਦਿਨ੍ਦਿਭਾ ਸੁਵਪੋਤਾ ਚ, ਉਪਜੀਵਨ੍ਤਿ ਤਂ ਸਰਂ.
‘‘ਹਂਸਾ ਕੋਞ੍ਚਾ ਮਯੂਰਾ ਚ, ਕੋਕਿਲਾ ਤਮ੍ਬਚੂਲ਼ਕਾ;
ਪਮ੍ਪਕਾ ਜੀਵਂਜੀਵਾ ਚ, ਉਪਜੀਵਨ੍ਤਿ ਤਂ ਸਰਂ.
‘‘ਕੋਸਿਕਾ ਪੋਟ੍ਠਸੀਸਾ ਚ, ਕੁਰਰਾ ਸੇਨਕਾ ਬਹੂ;
ਮਹਾਕਾਲ਼ਾ ਚ ਸਕੁਣਾ, ਉਪਜੀਵਨ੍ਤਿ ਤਂ ਸਰਂ.
‘‘ਪਸਦਾ ਚ ਵਰਾਹਾ ਚ, ਚਮਰਾ ਗਣ੍ਡਕਾ ਬਹੂ;
ਰੋਹਿਚ੍ਚਾ ਸੁਕਪੋਤਾ ਚ, ਉਪਜੀਵਨ੍ਤਿ ਤਂ ਸਰਂ.
‘‘ਸੀਹਬ੍ਯਗ੍ਘਾ ਚ ਦੀਪੀ ਚ, ਅਚ੍ਛਕੋਕਤਰਚ੍ਛਕਾ;
ਤਿਧਾ ਪਭਿਨ੍ਨਮਾਤਙ੍ਗਾ, ਉਪਜੀਵਨ੍ਤਿ ਤਂ ਸਰਂ.
‘‘ਕਿਨ੍ਨਰਾ ਵਾਨਰਾ ਚੇਵ, ਅਥੋਪਿ ਵਨਕਮ੍ਮਿਕਾ;
ਚੇਤਾ ਚ ਲੁਦ੍ਦਕਾ ਚੇਵ, ਉਪਜੀਵਨ੍ਤਿ ਤਂ ਸਰਂ.
‘‘ਤਿਨ੍ਦੁਕਾਨਿ ਪਿਯਾਲਾਨਿ, ਮਧੁਕੇ ਕਾਸੁਮਾਰਿਯੋ;
ਧੁਵਂ ਫਲਾਨਿ ਧਾਰੇਨ੍ਤਿ, ਅਵਿਦੂਰੇ ਮਮਸ੍ਸਮਂ.
‘‘ਕੋਸਮ੍ਬਾ ਸਲ਼ਲਾ ਨਿਮ੍ਬਾ, ਸਾਦੁਫਲਸਮਾਯੁਤਾ;
ਧੁਵਂ ਫਲਾਨਿ ਧਾਰੇਨ੍ਤਿ, ਅਵਿਦੂਰੇ ਮਮਸ੍ਸਮਂ.
‘‘ਹਰੀਤਕਾ ਆਮਲਕਾ, ਅਮ੍ਬਜਮ੍ਬੁਵਿਭੀਤਕਾ;
ਕੋਲਾ ਭਲ੍ਲਾਤਕਾ ਬਿਲ੍ਲਾ, ਫਲਾਨਿ ਧਾਰਯਨ੍ਤਿ ਤੇ.
‘‘ਆਲੁਵਾ ਚ ਕਲ਼ਮ੍ਬਾ ਚ, ਬਿਲ਼ਾਲੀਤਕ੍ਕਲ਼ਾਨਿ ਚ;
ਜੀਵਕਾ ਸੁਤਕਾ ਚੇਵ, ਬਹੁਕਾ ਮਮ ਅਸ੍ਸਮੇ.
‘‘ਅਸ੍ਸਮਸ੍ਸਾਵਿਦੂਰਮ੍ਹਿ, ਤਲ਼ਾਕਾਸੁਂ ਸੁਨਿਮ੍ਮਿਤਾ;
ਅਚ੍ਛੋਦਕਾ ਸੀਤਜਲਾ, ਸੁਪਤਿਤ੍ਥਾ ਮਨੋਰਮਾ.
‘‘ਪਦੁਮੁਪ੍ਪਲਸਞ੍ਛਨ੍ਨਾ, ਪੁਣ੍ਡਰੀਕਸਮਾਯੁਤਾ;
ਮਨ੍ਦਾਲਕੇਹਿ ਸਞ੍ਛਨ੍ਨਾ, ਦਿਬ੍ਬਗਨ੍ਧੋਪਵਾਯਤਿ.
‘‘ਏਵਂ ਸਬ੍ਬਙ੍ਗਸਮ੍ਪਨ੍ਨੇ, ਪੁਪ੍ਫਿਤੇ ਫਲਿਤੇ ਵਨੇ;
ਸੁਕਤੇ ਅਸ੍ਸਮੇ ਰਮ੍ਮੇ, ਵਿਹਰਾਮਿ ਅਹਂ ਤਦਾ.
‘‘ਸੀਲਵਾ ਵਤਸਮ੍ਪਨ੍ਨੋ, ਝਾਯੀ ਝਾਨਰਤੋ ਸਦਾ;
ਪਞ੍ਚਾਭਿਞ੍ਞਾਬਲਪ੍ਪਤ੍ਤੋ, ਸੁਰੁਚਿ ਨਾਮ ਤਾਪਸੋ.
‘‘ਚਤੁਵੀਸਸਹਸ੍ਸਾਨਿ, ਸਿਸ੍ਸਾ ਮਯ੍ਹਂ ਉਪਟ੍ਠਹੁਂ;
ਸਬ੍ਬੇ ਮਂ ਬ੍ਰਾਹ੍ਮਣਾ ਏਤੇ, ਜਾਤਿਮਨ੍ਤੋ ਯਸਸ੍ਸਿਨੋ.
‘‘ਲਕ੍ਖਣੇ ਇਤਿਹਾਸੇ ਚ, ਸਨਿਘਣ੍ਡੁਸਕੇਟੁਭੇ;
ਪਦਕਾ ਵੇਯ੍ਯਾਕਰਣਾ, ਸਧਮ੍ਮੇ ਪਾਰਮਿਂ ਗਤਾ.
‘‘ਉਪ੍ਪਾਤੇਸੁ ਨਿਮਿਤ੍ਤੇਸੁ, ਲਕ੍ਖਣੇਸੁ ਚ ਕੋਵਿਦਾ;
ਪਥਬ੍ਯਾ ਭੂਮਨ੍ਤਲਿਕ੍ਖੇ, ਮਮ ਸਿਸ੍ਸਾ ਸੁਸਿਕ੍ਖਿਤਾ.
‘‘ਅਪ੍ਪਿਚ੍ਛਾ ਨਿਪਕਾ ਏਤੇ, ਅਪ੍ਪਾਹਾਰਾ ਅਲੋਲੁਪਾ;
ਲਾਭਾਲਾਭੇਨ ਸਨ੍ਤੁਟ੍ਠਾ, ਪਰਿਵਾਰੇਨ੍ਤਿ ਮਂ ਸਦਾ.
‘‘ਝਾਯੀ ਝਾਨਰਤਾ ਧੀਰਾ, ਸਨ੍ਤਚਿਤ੍ਤਾ ਸਮਾਹਿਤਾ;
ਆਕਿਞ੍ਚਞ੍ਞਂ ਪਤ੍ਥਯਨ੍ਤਾ, ਪਰਿਵਾਰੇਨ੍ਤਿ ਮਂ ਸਦਾ.
‘‘ਅਭਿਞ੍ਞਾਪਾਰਮਿਪ੍ਪਤ੍ਤਾ, ਪੇਤ੍ਤਿਕੇ ਗੋਚਰੇ ਰਤਾ;
ਅਨ੍ਤਲਿਕ੍ਖਚਰਾ ਧੀਰਾ, ਪਰਿਵਾਰੇਨ੍ਤਿ ਮਂ ਸਦਾ.
‘‘ਸਂਵੁਤਾ ਛਸੁ ਦ੍ਵਾਰੇਸੁ, ਅਨੇਜਾ ਰਕ੍ਖਿਤਿਨ੍ਦ੍ਰਿਯਾ;
ਅਸਂਸਟ੍ਠਾ ਚ ਤੇ ਧੀਰਾ, ਮਮ ਸਿਸ੍ਸਾ ਦੁਰਾਸਦਾ.
‘‘ਪਲ੍ਲਙ੍ਕੇਨ ਨਿਸਜ੍ਜਾਯ, ਠਾਨਚਙ੍ਕਮਨੇਨ ਚ;
ਵੀਤਿਨਾਮੇਨ੍ਤਿ ਤੇ ਰਤ੍ਤਿਂ, ਮਮ ਸਿਸ੍ਸਾ ਦੁਰਾਸਦਾ.
‘‘ਰਜ੍ਜਨੀਯੇ ਨ ਰਜ੍ਜਨ੍ਤਿ, ਦੁਸ੍ਸਨੀਯੇ ਨ ਦੁਸ੍ਸਰੇ;
ਮੋਹਨੀਯੇ ਨ ਮੁਯ੍ਹਨ੍ਤਿ, ਮਮ ਸਿਸ੍ਸਾ ਦੁਰਾਸਦਾ.
‘‘ਇਦ੍ਧਿਂ ਵੀਮਂਸਮਾਨਾ ਤੇ, ਵਤ੍ਤਨ੍ਤਿ ਨਿਚ੍ਚਕਾਲਿਕਂ;
ਪਥਵਿਂ ਤੇ ਪਕਮ੍ਪੇਨ੍ਤਿ, ਸਾਰਬ੍ਭੇਨ ਦੁਰਾਸਦਾ.
‘‘ਕੀਲ਼ਮਾਨਾ ਚ ਤੇ ਸਿਸ੍ਸਾ, ਕੀਲ਼ਨ੍ਤਿ ਝਾਨਕੀਲ਼ਿਤਂ.
ਜਮ੍ਬੁਤੋ ਫਲਮਾਨੇਨ੍ਤਿ, ਮਮ ਸਿਸ੍ਸਾ ਦੁਰਾਸਦਾ.
‘‘ਅਞ੍ਞੇ ਗਚ੍ਛਨ੍ਤਿ ਗੋਯਾਨਂ, ਅਞ੍ਞੇ ਪੁਬ੍ਬਵਿਦੇਹਕਂ;
ਅਞ੍ਞੇ ਚ ਉਤ੍ਤਰਕੁਰੁਂ, ਏਸਨਾਯ ਦੁਰਾਸਦਾ.
‘‘ਪੁਰਤੋ ਪੇਸੇਨ੍ਤਿ ਖਾਰਿਂ, ਪਚ੍ਛਤੋ ਚ ਵਜਨ੍ਤਿ ਤੇ;
ਚਤੁਵੀਸਸਹਸ੍ਸੇਹਿ, ਛਾਦਿਤਂ ਹੋਤਿ ਅਮ੍ਬਰਂ.
‘‘ਅਗ੍ਗਿਪਾਕੀ ਅਨਗ੍ਗੀ ਚ, ਦਨ੍ਤੋਦੁਕ੍ਖਲਿਕਾਪਿ ਚ;
ਅਸ੍ਮੇਨ ਕੋਟ੍ਟਿਤਾ ਕੇਚਿ, ਪਵਤ੍ਤਫਲਭੋਜਨਾ.
‘‘ਉਦਕੋਰੋਹਣਾ ਕੇਚਿ, ਸਾਯਂ ਪਾਤੋ ਸੁਚੀਰਤਾ;
ਤੋਯਾਭਿਸੇਚਨਕਰਾ, ਮਮ ਸਿਸ੍ਸਾ ਦੁਰਾਸਦਾ.
‘‘ਪਰੂਲ਼੍ਹਕਚ੍ਛਨਖਲੋਮਾ, ਪਙ੍ਕਦਨ੍ਤਾ ਰਜਸ੍ਸਿਰਾ;
ਗਨ੍ਧਿਤਾ ਸੀਲਗਨ੍ਧੇਨ, ਮਮ ਸਿਸ੍ਸਾ ਦੁਰਾਸਦਾ.
‘‘ਪਾਤੋਵ ਸਨ੍ਨਿਪਤਿਤ੍ਵਾ, ਜਟਿਲਾ ਉਗ੍ਗਤਾਪਨਾ;
ਲਾਭਾਲਾਭਂ ਪਕਿਤ੍ਤੇਤ੍ਵਾ, ਗਚ੍ਛਨ੍ਤਿ ਅਮ੍ਬਰੇ ਤਦਾ.
‘‘ਏਤੇਸਂ ਪਕ੍ਕਮਨ੍ਤਾਨਂ, ਮਹਾਸਦ੍ਦੋ ਪਵਤ੍ਤਤਿ;
ਅਜਿਨਚਮ੍ਮਸਦ੍ਦੇਨ, ਮੁਦਿਤਾ ਹੋਨ੍ਤਿ ਦੇਵਤਾ.
‘‘ਦਿਸੋਦਿਸਂ ਪਕ੍ਕਮਨ੍ਤਿ, ਅਨ੍ਤਲਿਕ੍ਖਚਰਾ ਇਸੀ;
ਸਕੇ ਬਲੇਨੁਪਤ੍ਥਦ੍ਧਾ, ਤੇ ਗਚ੍ਛਨ੍ਤਿ ਯਦਿਚ੍ਛਕਂ.
‘‘ਪਥਵੀਕਮ੍ਪਕਾ ਏਤੇ, ਸਬ੍ਬੇਵ ਨਭਚਾਰਿਨੋ;
ਉਗ੍ਗਤੇਜਾ ਦੁਪ੍ਪਸਹਾ, ਸਾਗਰੋਵ ਅਖੋਭਿਯਾ.
‘‘ਠਾਨਚਙ੍ਕਮਿਨੋ ਕੇਚਿ, ਕੇਚਿ ਨੇਸਜ੍ਜਿਕਾ ਇਸੀ;
ਪਵਤ੍ਤਭੋਜਨਾ ਕੇਚਿ, ਮਮ ਸਿਸ੍ਸਾ ਦੁਰਾਸਦਾ.
‘‘ਮੇਤ੍ਤਾਵਿਹਾਰਿਨੋ ਏਤੇ, ਹਿਤੇਸੀ ਸਬ੍ਬਪਾਣਿਨਂ;
ਅਨਤ੍ਤੁਕ੍ਕਂਸਕਾ ਸਬ੍ਬੇ, ਨ ਤੇ ਵਮ੍ਭੇਨ੍ਤਿ ਕਸ੍ਸਚਿ.
‘‘ਸੀਹਰਾਜਾਵਸਮ੍ਭੀਤਾ, ਗਜਰਾਜਾਵ ਥਾਮਵਾ;
ਦੁਰਾਸਦਾ ਬ੍ਯਗ੍ਘਾਰਿਵ, ਆਗਚ੍ਛਨ੍ਤਿ ਮਮਨ੍ਤਿਕੇ.
‘‘ਵਿਜ੍ਜਾਧਰਾ ਦੇਵਤਾ ਚ, ਨਾਗਗਨ੍ਧਬ੍ਬਰਕ੍ਖਸਾ;
ਕੁਮ੍ਭਣ੍ਡਾ ਦਾਨਵਾ ਗਰੁਲ਼ਾ, ਉਪਜੀਵਨ੍ਤਿ ਤਂ ਸਰਂ.
‘‘ਤੇ ਜਟਾਖਾਰਿਭਰਿਤਾ, ਅਜਿਨੁਤ੍ਤਰਵਾਸਨਾ;
ਅਨ੍ਤਲਿਕ੍ਖਚਰਾ ਸਬ੍ਬੇ, ਉਪਜੀਵਨ੍ਤਿ ਤਂ ਸਰਂ.
‘‘ਸਦਾਨੁਚ੍ਛਵਿਕਾ ਏਤੇ, ਅਞ੍ਞਮਞ੍ਞਂ ਸਗਾਰਵਾ;
ਚਤੁਬ੍ਬੀਸਸਹਸ੍ਸਾਨਂ, ਖਿਪਿਤਸਦ੍ਦੋ ਨ ਵਿਜ੍ਜਤਿ.
‘‘ਪਾਦੇ ਪਾਦਂ ਨਿਕ੍ਖਿਪਨ੍ਤਾ, ਅਪ੍ਪਸਦ੍ਦਾ ਸੁਸਂਵੁਤਾ;
ਉਪਸਙ੍ਕਮ੍ਮ ਸਬ੍ਬੇਵ, ਸਿਰਸਾ ਵਨ੍ਦਰੇ ਮਮਂ.
‘‘ਤੇਹਿ ਸਿਸ੍ਸੇਹਿ ਪਰਿਵੁਤੋ, ਸਨ੍ਤੇਹਿ ਚ ਤਪਸ੍ਸਿਭਿ;
ਵਸਾਮਿ ਅਸ੍ਸਮੇ ਤਤ੍ਥ, ਝਾਯੀ ਝਾਨਰਤੋ ਅਹਂ.
‘‘ਇਸੀਨਂ ਸੀਲਗਨ੍ਧੇਨ, ਪੁਪ੍ਫਗਨ੍ਧੇਨ ਚੂਭਯਂ;
ਫਲੀਨਂ ਫਲਗਨ੍ਧੇਨ, ਗਨ੍ਧਿਤੋ ਹੋਤਿ ਅਸ੍ਸਮੋ.
‘‘ਰਤ੍ਤਿਨ੍ਦਿਵਂ ਨ ਜਾਨਾਮਿ, ਅਰਤਿ ਮੇ ਨ ਵਿਜ੍ਜਤਿ;
ਸਕੇ ਸਿਸ੍ਸੇ ਓਵਦਨ੍ਤੋ, ਭਿਯ੍ਯੋ ਹਾਸਂ ਲਭਾਮਹਂ.
‘‘ਪੁਪ੍ਫਾਨਂ ਪੁਪ੍ਫਮਾਨਾਨਂ, ਫਲਾਨਞ੍ਚ ਵਿਪਚ੍ਚਤਂ;
ਦਿਬ੍ਬਗਨ੍ਧਾ ਪਵਾਯਨ੍ਤਿ, ਸੋਭਯਨ੍ਤਾ ਮਮਸ੍ਸਮਂ.
‘‘ਸਮਾਧਿਮ੍ਹਾ ਵੁਟ੍ਠਹਿਤ੍ਵਾ, ਅਤਾਪੀ ਨਿਪਕੋ ਅਹਂ;
ਖਾਰਿਭਾਰਂ ਗਹੇਤ੍ਵਾਨ, ਵਨਂ ਅਜ੍ਝੋਗਹਿਂ ਅਹਂ.
‘‘ਉਪ੍ਪਾਤੇ ਸੁਪਿਨੇ ਚਾਪਿ, ਲਕ੍ਖਣੇਸੁ ਸੁਸਿਕ੍ਖਿਤੋ;
ਪਵਤ੍ਤਮਾਨਂ ਮਨ੍ਤਪਦਂ, ਧਾਰਯਾਮਿ ਅਹਂ ਤਦਾ.