੧੭. ਤਿਂਸਨਿਪਾਤੋ

੧. ਫੁਸ੍ਸਤ੍ਥੇਰਗਾਥਾਵਣ੍ਣਨਾ

ਤਿਂਸਨਿਪਾਤੇ ਪਾਸਾਦਿਕੇ ਬਹੂ ਦਿਸ੍ਵਾਤਿਆਦਿਕਾ ਆਯਸ੍ਮਤੋ ਫੁਸ੍ਸਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਸ ਮਣ੍ਡਲਿਕਰਞ੍ਞੋ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਫੁਸ੍ਸੋਤਿ ਨਾਮਂ ਅਹੋਸਿ. ਸੋ ਵਿਞ੍ਞੁਤਂ ਪਤ੍ਤੋ ਖਤ੍ਤਿਯਕੁਮਾਰੇਹਿ ਸਿਕ੍ਖਿਤਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਗਤੋ. ਉਪਨਿਸ੍ਸਯਸਮ੍ਪਨ੍ਨਤ੍ਤਾ ਕਾਮੇਸੁ ਅਲਗ੍ਗਚਿਤ੍ਤੋ ਅਞ੍ਞਤਰਸ੍ਸ ਮਹਾਥੇਰਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਚਰਿਯਾਨੁਕੂਲਂ ਕਮ੍ਮਟ੍ਠਾਨਂ ਗਹੇਤ੍ਵਾ ਭਾਵਨਂ ਅਨੁਯੁਞ੍ਜਨ੍ਤੋ ਝਾਨਾਨਿ ਨਿਬ੍ਬਤ੍ਤੇਤ੍ਵਾ ਝਾਨਪਾਦਕਂ ਵਿਪਸ੍ਸਨਂ ਪਟ੍ਠਪੇਤ੍ਵਾ ਨਚਿਰਸ੍ਸੇਵ ਛਲ਼ਭਿਞ੍ਞੋ ਅਹੋਸਿ. ਅਥੇਕਦਿਵਸਂ ਪਣ੍ਡਰਗੋਤ੍ਤੋ ਨਾਮ ਏਕੋ ਤਾਪਸੋ ਤਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਨਿਸਿਨ੍ਨੋ ਸਮ੍ਬਹੁਲੇ ਭਿਕ੍ਖੂ ਸੀਲਾਚਾਰਸਮ੍ਪਨ੍ਨੇ ਸੁਸਂਵੁਤਿਨ੍ਦ੍ਰਿਯੇ ਭਾਵਿਤਕਾਯੇ ਭਾਵਿਤਚਿਤ੍ਤੇ ਦਿਸ੍ਵਾ ਪਸਨ੍ਨਚਿਤ੍ਤੋ ‘‘ਸਾਧੁ ਵਤਾਯਂ ਪਟਿਪਤ੍ਤਿ ਲੋਕੇ ਚਿਰਂ ਤਿਟ੍ਠੇਯ੍ਯਾ’’ਤਿ ਚਿਨ੍ਤੇਤ੍ਵਾ ‘‘ਕਥਂ ਨੁ ਖੋ, ਭਨ੍ਤੇ, ਅਨਾਗਤਮਦ੍ਧਾਨਂ ਭਿਕ੍ਖੂਨਂ ਪਟਿਪਤ੍ਤਿ ਭਵਿਸ੍ਸਤੀ’’ਤਿ ਥੇਰਂ ਪੁਚ੍ਛਿ. ਤਮਤ੍ਥਂ ਦਸ੍ਸੇਨ੍ਤੋ ਸਙ੍ਗੀਤਿਕਾਰਾ –

੯੪੯. ‘‘ਪਾਸਾਦਿਕੇ ਬਹੂ ਦਿਸ੍ਵਾ, ਭਾਵਿਤਤ੍ਤੇ ਸੁਸਂਵੁਤੇ;

ਇਸਿ ਪਣ੍ਡਰਸਗੋਤ੍ਤੋ, ਅਪੁਚ੍ਛਿ ਫੁਸ੍ਸਸਵ੍ਹਯ’’ਨ੍ਤਿ. – ਗਾਥਂ ਆਦਿਤੋ ਠਪੇਸੁਂ;

ਤਤ੍ਥ ਪਾਸਾਦਿਕੇਤਿ ਅਤ੍ਤਨੋ ਪਟਿਪਤ੍ਤਿਯਾ ਪਸਾਦਾਰਹੇ. ਬਹੂਤਿ ਸਮ੍ਬਹੁਲੇ. ਭਾਵਿਤਤ੍ਤੇਤਿ ਸਮਥਵਿਪਸ੍ਸਨਾਭਾਵਨਾਹਿ ਭਾਵਿਤਚਿਤ੍ਤੇ. ਸੁਸਂਵੁਤੇਤਿ ਸੁਟ੍ਠੁ ਸਂਵੁਤਿਨ੍ਦ੍ਰਿਯੇ. ਇਸੀਤਿ ਤਾਪਸੋ. ਪਣ੍ਡਰਸਗੋਤ੍ਤੋਤਿ ਪਣ੍ਡਰਸ੍ਸ ਨਾਮ ਇਸਿਨੋ ਵਂਸੇ ਜਾਤਤ੍ਤਾ ਤੇਨ ਸਮਾਨਗੋਤ੍ਤੋ. ਫੁਸ੍ਸਸਵ੍ਹਯਨ੍ਤਿ ਫੁਸ੍ਸਸਦ੍ਦੇਨ ਅਵ੍ਹਾਤਬ੍ਬਂ, ਫੁਸ੍ਸਨਾਮਕਨ੍ਤਿ ਅਤ੍ਥੋ.

੯੫੦. ‘‘ਕਿਂ ਛਨ੍ਦਾ ਕਿਮਧਿਪ੍ਪਾਯਾ, ਕਿਮਾਕਪ੍ਪਾ ਭਵਿਸ੍ਸਰੇ;

ਅਨਾਗਤਮ੍ਹਿ ਕਾਲਮ੍ਹਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ. –

ਅਯਂ ਤਸ੍ਸ ਇਸਿਨੋ ਪੁਚ੍ਛਾਗਾਥਾ.

ਤਤ੍ਥ ਕਿਂ ਛਨ੍ਦਾਤਿ ਇਮਸ੍ਮਿਂ ਸਾਸਨੇ ਅਨਾਗਤੇ ਭਿਕ੍ਖੂ ਕੀਦਿਸਚ੍ਛਨ੍ਦਾ ਕੀਦਿਸਾਧਿਮੁਤ੍ਤਿਕਾ, ਕਿਂ ਹੀਨਾਧਿਮੁਤ੍ਤਿਕਾ, ਉਦਾਹੁ ਪਣੀਤਾਧਿਮੁਤ੍ਤਿਕਾਤਿ ਅਤ੍ਥੋ. ਕਿਮਧਿਪ੍ਪਾਯਾਤਿ ਕੀਦਿਸਾਧਿਪ੍ਪਾਯਾ ਕੀਦਿਸਜ੍ਝਾਸਯਾ, ਕਿਂ ਸਂਕਿਲੇਸਜ੍ਝਾਸਯਾ, ਉਦਾਹੁ ਵੋਦਾਨਜ੍ਝਾਸਯਾਤਿ ਅਤ੍ਥੋ. ਅਥ ਵਾ ਛਨ੍ਦਾ ਨਾਮ ਕਤ੍ਤੁਕਮ੍ਯਤਾ, ਤਸ੍ਮਾ ਕੀਦਿਸੀ ਤੇਸਂ ਕਤ੍ਤੁਕਮ੍ਯਤਾਤਿ ਅਤ੍ਥੋ. ਅਧਿਪ੍ਪਾਯੋ ਅਜ੍ਝਾਸਯੋਯੇਵ. ਕਿਮਾਕਪ੍ਪਾਤਿ ਕੀਦਿਸਾਕਪ੍ਪਾ. ਆਕਪ੍ਪਾਤਿ ਚ ਵੇਸਗਹਣਾਦਿਵਾਰਿਤ੍ਤਚਾਰਿਤ੍ਤਵਨ੍ਤੋਤਿ ਅਤ੍ਥੋ. ਭਵਿਸ੍ਸਰੇਤਿ ਭਵਿਸ੍ਸਨ੍ਤਿ. ਤਂ ਮੇਤਿ ਤਂ ਅਨਾਗਤੇ ਭਿਕ੍ਖੂਨਂ ਛਨ੍ਦਾਧਿਪ੍ਪਾਯਾਕਪ੍ਪਭੇਦਂ ਪੁਚ੍ਛਿਤੋ ਮਯ੍ਹਂ ਅਕ੍ਖਾਹਿ ਕਥੇਹੀਤਿ ਥੇਰਂ ਅਜ੍ਝੇਸਤਿ. ਤਸ੍ਸ ਥੇਰੋ ਤਮਤ੍ਥਂ ਆਚਿਕ੍ਖਨ੍ਤੋ ਸਕ੍ਕਚ੍ਚਸਵਨੇ ਤਾਵ ਨਿਯੋਜੇਤੁਂ –

੯੫੧. ‘‘ਸੁਣੋਹਿ ਵਚਨਂ ਮਯ੍ਹਂ, ਇਸਿ ਪਣ੍ਡਰਸਵ੍ਹਯ;

ਸਕ੍ਕਚ੍ਚਂ ਉਪਧਾਰੇਹਿ, ਆਚਿਕ੍ਖਿਸ੍ਸਾਮ੍ਯਨਾਗਤ’’ਨ੍ਤਿ. – ਗਾਥਮਾਹ;

ਤਸ੍ਸਤ੍ਥੋ – ਭੋ ਪਣ੍ਡਰਨਾਮ ਇਸਿ, ਯਂ ਤ੍ਵਂ ਮਂ ਪੁਚ੍ਛਸਿ, ਤਂ ਤੇ ਅਨਾਗਤਂ ਆਚਿਕ੍ਖਿਸ੍ਸਾਮਿ, ਆਚਿਕ੍ਖਤੋ ਪਨ ਮਮ ਵਚਨਂ ਸੁਣਾਹਿ ਅਨਾਗਤਤ੍ਥਦੀਪਨਤੋ ਸਂਵੇਗਾਵਹਤੋ ਚ ਸਕ੍ਕਚ੍ਚਂ ਉਪਧਾਰੇਹੀਤਿ.

ਅਥ ਥੇਰੋ ਅਨਾਗਤਂਸਞਾਣੇਨ ਭਿਕ੍ਖੂਨਂ ਭਿਕ੍ਖੁਨੀਨਞ੍ਚ ਭਾਵਿਨਿਂ ਪਵਤ੍ਤਿਂ ਯਥਾਭੂਤਂ ਦਿਸ੍ਵਾ ਤਸ੍ਸ ਆਚਿਕ੍ਖਨ੍ਤੋ –

੯੫੨. ‘‘ਕੋਧਨਾ ਉਪਨਾਹੀ ਚ, ਮਕ੍ਖੀ ਥਮ੍ਭੀ ਸਠਾ ਬਹੂ;

ਇਸ੍ਸੁਕੀ ਨਾਨਾਵਾਦਾ ਚ, ਭਵਿਸ੍ਸਨ੍ਤਿ ਅਨਾਗਤੇ.

੯੫੩. ‘‘ਅਞ੍ਞਾਤਮਾਨਿਨੋ ਧਮ੍ਮੇ, ਗਮ੍ਭੀਰੇ ਤੀਰਗੋਚਰਾ;

ਲਹੁਕਾ ਅਗਰੂ ਧਮ੍ਮੇ, ਅਞ੍ਞਮਞ੍ਞਮਗਾਰਵਾ.

੯੫੪. ‘‘ਬਹੂ ਆਦੀਨਵਾ ਲੋਕੇ, ਉਪ੍ਪਜ੍ਜਿਸ੍ਸਨ੍ਤ੍ਯਨਾਗਤੇ;

ਸੁਦੇਸਿਤਂ ਇਮਂ ਧਮ੍ਮਂ, ਕਿਲੇਸਿਸ੍ਸਨ੍ਤਿ ਦੁਮ੍ਮਤੀ.

੯੫੫. ‘‘ਗੁਣਹੀਨਾਪਿ ਸਙ੍ਘਮ੍ਹਿ, ਵੋਹਰਨ੍ਤਾ ਵਿਸਾਰਦਾ;

ਬਲਵਨ੍ਤੋ ਭਵਿਸ੍ਸਨ੍ਤਿ, ਮੁਖਰਾ ਅਸ੍ਸੁਤਾਵਿਨੋ.

੯੫੬. ‘‘ਗੁਣਵਨ੍ਤੋਪਿ ਸਙ੍ਘਮ੍ਹਿ, ਵੋਹਰਨ੍ਤਾ ਯਥਾਤ੍ਥਤੋ;

ਦੁਬ੍ਬਲਾ ਤੇ ਭਵਿਸ੍ਸਨ੍ਤਿ, ਹਿਰੀਮਨਾ ਅਨਤ੍ਥਿਕਾ.

੯੫੭. ‘‘ਰਜਤਂ ਜਾਤਰੂਪਞ੍ਚ, ਖੇਤ੍ਤਂ ਵਤ੍ਥੁਮਜੇਲ਼ਕਂ.

ਦਾਸਿਦਾਸਞ੍ਚ ਦੁਮ੍ਮੇਧਾ, ਸਾਦਿਯਿਸ੍ਸਨ੍ਤ੍ਯਨਾਗਤੇ.

੯੫੮. ‘‘ਉਜ੍ਝਾਨਸਞ੍ਞਿਨੋ ਬਾਲਾ, ਸੀਲੇਸੁ ਅਸਮਾਹਿਤਾ;

ਉਨ੍ਨਲ਼ਾ ਵਿਚਰਿਸ੍ਸਨ੍ਤਿ, ਕਲਹਾਭਿਰਤਾ ਮਗਾ.

੯੫੯. ‘‘ਉਦ੍ਧਤਾ ਚ ਭਵਿਸ੍ਸਨ੍ਤਿ, ਨੀਲਚੀਵਰਪਾਰੁਤਾ;

ਕੁਹਾ ਥਦ੍ਧਾ ਲਪਾ ਸਿਙ੍ਗੀ, ਚਰਿਸ੍ਸਨ੍ਤ੍ਯਰਿਯਾ ਵਿਯ.

੯੬੦. ‘‘ਤੇਲਸਣ੍ਠੇਹਿ ਕੇਸੇਹਿ, ਚਪਲਾ ਅਞ੍ਜਨਕ੍ਖਿਕਾ;

ਰਥਿਯਾਯ ਗਮਿਸ੍ਸਨ੍ਤਿ, ਦਨ੍ਤਵਣ੍ਣਿਕਪਾਰੁਤਾ.

੯੬੧. ‘‘ਅਜੇਗੁਚ੍ਛਂ ਵਿਮੁਤ੍ਤੇਹਿ, ਸੁਰਤ੍ਤਂ ਅਰਹਦ੍ਧਜਂ;

ਜਿਗੁਚ੍ਛਿਸ੍ਸਨ੍ਤਿ ਕਾਸਾਵਂ, ਓਦਾਤੇਸੁ ਸਮੁਚ੍ਛਿਤਾ.

੯੬੨. ‘‘ਲਾਭਕਾਮਾ ਭਵਿਸ੍ਸਨ੍ਤਿ, ਕੁਸੀਤਾ ਹੀਨਵੀਰਿਯਾ;

ਕਿਚ੍ਛਨ੍ਤਾ ਵਨਪਤ੍ਥਾਨਿ, ਗਾਮਨ੍ਤੇਸੁ ਵਸਿਸ੍ਸਰੇ.

੯੬੩. ‘‘ਯੇ ਯੇ ਲਾਭਂ ਲਭਿਸ੍ਸਨ੍ਤਿ, ਮਿਚ੍ਛਾਜੀਵਰਤਾ ਸਦਾ;

ਤੇ ਤੇਵ ਅਨੁਸਿਕ੍ਖਨ੍ਤਾ, ਭਜਿਸ੍ਸਨ੍ਤਿ ਅਸਂਯਤਾ.

੯੬੪. ‘‘ਯੇ ਯੇ ਅਲਾਭਿਨੋ ਲਾਭਂ, ਨ ਤੇ ਪੁਜ੍ਜਾ ਭਵਿਸ੍ਸਰੇ;

ਸੁਪੇਸਲੇਪਿ ਤੇ ਧੀਰੇ, ਸੇਵਿਸ੍ਸਨ੍ਤਿ ਨ ਤੇ ਤਦਾ.

੯੬੫. ‘‘ਮਿਲਕ੍ਖੁਰਜਨਂ ਰਤ੍ਤਂ, ਗਰਹਨ੍ਤਾ ਸਕਂ ਧਜਂ;

ਤਿਤ੍ਥਿਯਾਨਂ ਧਜਂ ਕੇਚਿ, ਧਾਰਿਸ੍ਸਨ੍ਤ੍ਯਵਦਾਤਕਂ.

੯੬੬. ‘‘ਅਗਾਰਵੋ ਚ ਕਾਸਾਵੇ, ਤਦਾ ਤੇਸਂ ਭਵਿਸ੍ਸਤਿ;

ਪਟਿਸਙ੍ਖਾ ਚ ਕਾਸਾਵੇ, ਭਿਕ੍ਖੂਨਂ ਨ ਭਵਿਸ੍ਸਤਿ.

੯੬੭. ‘‘ਅਭਿਭੂਤਸ੍ਸ ਦੁਕ੍ਖੇਨ, ਸਲ੍ਲਵਿਦ੍ਧਸ੍ਸ ਰੁਪ੍ਪਤੋ;

ਪਟਿਸਙ੍ਖਾ ਮਹਾਘੋਰਾ, ਨਾਗਸ੍ਸਾਸਿ ਅਚਿਨ੍ਤਿਯਾ.

੯੬੮. ‘‘ਛਦ੍ਦਨ੍ਤੋ ਹਿ ਤਦਾ ਦਿਸ੍ਵਾ, ਸੁਰਤ੍ਤਂ ਅਰਹਦ੍ਧਜਂ;

ਤਾਵਦੇਵਭਣੀ ਗਾਥਾ, ਗਜੋ ਅਤ੍ਥੋਪਸਂਹਿਤਾ.

੯੬੯. ‘‘ਅਨਿਕ੍ਕਸਾਵੋ ਕਾਸਾਵਂ, ਯੋ ਵਤ੍ਥਂ ਪਰਿਧਸ੍ਸਤਿ;

ਅਪੇਤੋ ਦਮਸਚ੍ਚੇਨ, ਨ ਸੋ ਕਾਸਾਵਮਰਹਤਿ.

੯੭੦. ‘‘ਯੋ ਚ ਵਨ੍ਤਕਸਾਵਸ੍ਸ, ਸੀਲੇਸੁ ਸੁਸਮਾਹਿਤੋ;

ਉਪੇਤੋ ਦਮਸਚ੍ਚੇਨ, ਸ ਵੇ ਕਾਸਾਵਮਰਹਤਿ.

੯੭੧. ‘‘ਵਿਪਨ੍ਨਸੀਲੋ ਦੁਮ੍ਮੇਧੋ, ਪਾਕਟੋ ਕਾਮਕਾਰਿਯੋ;

ਵਿਬ੍ਭਨ੍ਤਚਿਤ੍ਤੋ ਨਿਸ੍ਸੁਕ੍ਕੋ, ਨ ਸੋ ਕਾਸਾਵਮਰਹਤਿ.

੯੭੨. ‘‘ਯੋ ਚ ਸੀਲੇਨ ਸਮ੍ਪਨ੍ਨੋ, ਵੀਤਰਾਗੋ ਸਮਾਹਿਤੋ;

ਓਦਾਤਮਨਸਙ੍ਕਪ੍ਪੋ, ਸ ਵੇ ਕਾਸਾਵਮਰਹਤਿ.

੯੭੩. ‘‘ਉਦ੍ਧਤੋ ਉਨ੍ਨਲ਼ੋ ਬਾਲੋ, ਸੀਲਂ ਯਸ੍ਸ ਨ ਵਿਜ੍ਜਤਿ;

ਓਦਾਤਕਂ ਅਰਹਤਿ, ਕਾਸਾਵਂ ਕਿਂ ਕਰਿਸ੍ਸਤਿ.

੯੭੪. ‘‘ਭਿਕ੍ਖੂ ਚ ਭਿਕ੍ਖੁਨਿਯੋ ਚ, ਦੁਟ੍ਠਚਿਤ੍ਤਾ ਅਨਾਦਰਾ;

ਤਾਦੀਨਂ ਮੇਤ੍ਤਚਿਤ੍ਤਾਨਂ, ਨਿਗ੍ਗਣ੍ਹਿਸ੍ਸਨ੍ਤ੍ਯਨਾਗਤੇ.

੯੭੫. ‘‘ਸਿਕ੍ਖਾਪੇਨ੍ਤਾਪਿ ਥੇਰੇਹਿ, ਬਾਲਾ ਚੀਵਰਧਾਰਣਂ;

ਨ ਸੁਣਿਸ੍ਸਨ੍ਤਿ ਦੁਮ੍ਮੇਧਾ, ਪਾਕਟਾ ਕਾਮਕਾਰਿਯਾ.

੯੭੬. ‘‘ਤੇ ਤਥਾ ਸਿਕ੍ਖਿਤਾ ਬਾਲਾ, ਅਞ੍ਞਮਞ੍ਞਂ ਅਗਾਰਵਾ;

ਨਾਦਿਯਿਸ੍ਸਨ੍ਤੁਪਜ੍ਝਾਯੇ, ਖਲ਼ੁਙ੍ਕੋ ਵਿਯ ਸਾਰਥਿਂ.

੯੭੭. ‘‘ਏਵਂ ਅਨਾਗਤਦ੍ਧਾਨਂ, ਪਟਿਪਤ੍ਤਿ ਭਵਿਸ੍ਸਤਿ;

ਭਿਕ੍ਖੂਨਂ ਭਿਕ੍ਖੁਨੀਨਞ੍ਚ, ਪਤ੍ਤੇ ਕਾਲਮ੍ਹਿ ਪਚ੍ਛਿਮੇ.

੯੭੮. ‘‘ਪੁਰਾ ਆਗਚ੍ਛਤੇ ਏਤਂ, ਅਨਾਗਤਂ ਮਹਬ੍ਭਯਂ;

ਸੁਬ੍ਬਚਾ ਹੋਥ ਸਖਿਲਾ, ਅਞ੍ਞਮਞ੍ਞਂ ਸਗਾਰਵਾ.

੯੭੯. ‘‘ਮੇਤ੍ਤਚਿਤ੍ਤਾ ਕਾਰੁਣਿਕਾ, ਹੋਥ ਸੀਲੇਸੁ ਸਂਵੁਤਾ;

ਆਰਦ੍ਧਵੀਰਿਯਾ ਪਹਿਤਤ੍ਤਾ, ਨਿਚ੍ਚਂ ਦਲ਼੍ਹਪਰਕ੍ਕਮਾ.

੯੮੦. ‘‘ਪਮਾਦਂ ਭਯਤੋ ਦਿਸ੍ਵਾ, ਅਪ੍ਪਮਾਦਞ੍ਚ ਖੇਮਤੋ;

ਭਾਵੇਥਟ੍ਠਙ੍ਗਿਕਂ ਮਗ੍ਗਂ, ਫੁਸਨ੍ਤਾ ਅਮਤਂ ਪਦ’’ਨ੍ਤਿ. – ਇਮਾ ਗਾਥਾ ਅਭਾਸਿ;

ਤਤ੍ਥ ਕੋਧਨਾਤਿ ਕੁਜ੍ਝਨਸੀਲਾ. ਭਵਿਸ੍ਸਨ੍ਤਿ ਅਨਾਗਤੇਤਿ ਸਮ੍ਬਨ੍ਧੋ. ਕਿਂ ਥੇਰਸ੍ਸ ਕਾਲੇ ਤਥਾ ਨਾਹੇਸੁਨ੍ਤਿ? ਨ ਨਾਹੇਸੁਂ. ਤਦਾ ਪਨ ਕਲ੍ਯਾਣਮਿਤ੍ਤਬਹੁਲਤਾਯ ਓਵਾਦਕੇਸੁ ਵਿਞ੍ਞਾਪਕੇਸੁ ਸਬ੍ਰਹ੍ਮਚਾਰੀਸੁ ਬਹੂਸੁ ਵਿਜ੍ਜਮਾਨੇਸੁ ਕਿਲੇਸੇਸੁ ਬਲਵਨ੍ਤੇਸੁ ਪਟਿਸਙ੍ਖਾਨਬਹੁਲਤਾਯ ਚ ਯੇਭੁਯ੍ਯੇਨ ਭਿਕ੍ਖੂ ਅਕ੍ਕੋਧਨਾ ਅਹੇਸੁਂ, ਆਯਤਿਂ ਤਬ੍ਬਿਪਰਿਯਾਯੇ ਅਤਿਕੋਧਨਾ ਭਵਿਸ੍ਸਨ੍ਤਿ, ਤਸ੍ਮਾ ‘‘ਅਨਾਗਤੇ’’ਤਿ ਵੁਤ੍ਤਂ. ਸੇਸਪਦੇਸੁਪਿ ਏਸੇਵ ਨਯੋ. ਉਪਨਾਹੀਤਿ ਆਘਾਤਵਤ੍ਥੂਸੁ ਆਘਾਤਸ੍ਸ ਉਪਨਯ੍ਹਨਸੀਲਾ ਉਪਨਾਹਸਮ੍ਭਵਤੋ ਵਾ ਉਪਨਾਹੀ. ਤਤ੍ਥ ਪੁਰਿਮਕਾਲਿਕੋ ਬ੍ਯਾਪਾਦੋ ਕੋਧੋ, ਅਪਰਕਾਲਿਕੋ ਉਪਨਾਹੋ. ਸਕਿਂ ਪਵਤ੍ਤੋ ਵਾ ਦੋਸੋ ਕੋਧੋ, ਅਨੇਕਕ੍ਖਤ੍ਤੁਂ ਪਵਤ੍ਤੋ ਉਪਨਾਹੋ. ਪਰੇਸਂ ਵਿਜ੍ਜਮਾਨੇ ਗੁਣੇ ਮਕ੍ਖਨ੍ਤਿ ਪੁਞ੍ਜਨ੍ਤਿ, ਤੇਸਂ ਵਾ ਉਦਕਪੁਞ੍ਜਨਿਯਾ ਵਿਯ ਉਦਕਸ੍ਸ ਮਕ੍ਖੋ ਮਕ੍ਖਨਂ ਪੁਞ੍ਜਨਂ ਏਤੇਸਂ ਅਤ੍ਥੀਤਿ ਮਕ੍ਖੀ. ਅਤਿਮਾਨਲਕ੍ਖਣੋ ਥਮ੍ਭੋ ਏਤੇਸਂ ਅਤ੍ਥੀਤਿ ਥਮ੍ਭੀ. ਸਠਾਤਿ ਅਸਨ੍ਤਗੁਣਵਿਭਾਵਨਲਕ੍ਖਣੇਨ ਸਾਠੇਯ੍ਯੇਨ ਸਮਨ੍ਨਾਗਤਾ. ਇਸ੍ਸੁਕੀਤਿ ਪਰਸਮ੍ਪਤ੍ਤਿਖਿਯ੍ਯਨਲਕ੍ਖਣਾਯ ਇਸ੍ਸਾਯ ਸਮਨ੍ਨਾਗਤਾ. ਨਾਨਾਵਾਦਾਤਿ ਅਞ੍ਞਮਞ੍ਞਂ ਵਿਰੁਦ੍ਧਵਾਦਾ ਵਿਰੁਦ੍ਧਦਿਟ੍ਠਿਕਾ, ਕਲਹਕਾਰਕਾ ਚਾਤਿ ਅਤ੍ਥੋ.

ਅਞ੍ਞਾਤਮਾਨਿਨੋ ਧਮ੍ਮੇ, ਗਮ੍ਭੀਰੇ ਤੀਰਗੋਚਰਾਤਿ ਗਮ੍ਭੀਰੇ ਦੁਰੋਭਾਸੇ ਸਦ੍ਧਮ੍ਮੇ ਅਞ੍ਞਾਤੇ ਏਵ ‘‘ਞਾਤੋਤਿ, ਦਿਟ੍ਠੋ’’ਤਿ ਏਵਂ ਮਾਨਿਨੋ, ਤਤੋ ਏਵ ਤਸ੍ਸ ਓਰਭਾਗੇ ਪਵਤ੍ਤਿਤਾਯ ਓਰਿਮਤੀਰਗੋਚਰਾ. ਲਹੁਕਾਤਿ ਲਹੁਸਭਾਵਾ ਚਪਲਾ. ਅਗਰੂ ਧਮ੍ਮੇਤਿ ਸਦ੍ਧਮ੍ਮੇ ਗਾਰਵਰਹਿਤਾ. ਅਞ੍ਞਮਞ੍ਞਮਗਾਰਵਾਤਿ ਅਞ੍ਞਮਞ੍ਞਸ੍ਮਿਂ ਅਪ੍ਪਤਿਸ੍ਸਾ, ਸਙ੍ਘੇ ਸਬ੍ਰਹ੍ਮਚਾਰੀਸੁ ਚ ਗਰੁਗਾਰਵਵਿਰਹਿਤਾ. ਬਹੂ ਆਦੀਨਵਾਤਿ ਵੁਤ੍ਤਪ੍ਪਕਾਰਾ, ਵਕ੍ਖਮਾਨਾ ਚ ਬਹੂ ਅਨੇਕਦੋਸਾ ਅਨ੍ਤਰਾਯਾ. ਲੋਕੇਤਿ ਸਤ੍ਤਲੋਕੇ. ਉਪ੍ਪਜ੍ਜਿਸ੍ਸਨ੍ਤ੍ਯਨਾਗਤੇਤਿ ਅਨਾਗਤੇ ਪਾਤੁ ਭਵਿਸ੍ਸਨ੍ਤਿ. ਸੁਦੇਸਿਤਂ ਇਮਂ ਧਮ੍ਮਨ੍ਤਿ, ਸਮ੍ਮਾਸਮ੍ਬੁਦ੍ਧੇਨ ਸੁਟ੍ਠੁ ਅਵਿਪਰੀਤਂ ਆਦਿਕਲ੍ਯਾਣਾਦਿਪ੍ਪਕਾਰੇਨ ਦੇਸਿਤਂ ਇਮਂ ਆਗਮਸਦ੍ਧਮ੍ਮਂ. ਕਿਲੇਸਿਸ੍ਸਨ੍ਤੀਤਿ ਕਿਲਿਟ੍ਠਂ ਕਿਲੇਸਦੂਸਿਤਂ ਕਰਿਸ੍ਸਨ੍ਤਿ, ‘‘ਆਪਤ੍ਤਿਂ ‘ਅਨਾਪਤ੍ਤੀ’ਤਿ ਗਰੁਕਾਪਤ੍ਤਿਂ ‘ਲਹੁਕਾਪਤ੍ਤੀ’’’ਤਿਆਦਿਨਾ ਦੁਚ੍ਚਰਿਤਸਂਕਿਲੇਸੇਨ ਅਸਦ੍ਧਮ੍ਮੇਨ ਸਣ੍ਹਸੁਖੁਮਂ ਰੂਪਾਰੂਪਧਮ੍ਮਂ ਪਟਿਕ੍ਖਿਪਿਸ੍ਸਨ੍ਤਿ, ਦਿਟ੍ਠਿਸਂਕਿਲੇਸੇਨ ਉਭਯਤ੍ਰਾਪਿ ਤਣ੍ਹਾਸਂਕਿਲੇਸੇਨ ਸਂਕਿਲੇਸਿਸ੍ਸਨ੍ਤਿ ਮਲਿਨਂ ਕਰਿਸ੍ਸਨ੍ਤਿ. ਦੁਮ੍ਮਤੀਤਿ ਨਿਪ੍ਪਞ੍ਞਾ. ਵੁਤ੍ਤਞ੍ਹੇਤਂ ਭਗਵਤਾ – ‘‘ਭਵਿਸ੍ਸਨ੍ਤਿ, ਭਿਕ੍ਖਵੇ, ਭਿਕ੍ਖੂ ਅਨਾਗਤਮਦ੍ਧਾਨਂ…ਪੇ… ਅਭਿਧਮ੍ਮਕਥਂ ਵੇਦਲ੍ਲਕਥਂ ਕਥੇਨ੍ਤਾ ਕਣ੍ਹਧਮ੍ਮਂ ਓਕ੍ਕਮਮਾਨਾ ਨ ਬੁਜ੍ਝਿਸ੍ਸਨ੍ਤੀ’’ਤਿ (ਅ. ਨਿ. ੫.੭੯).

ਗੁਣਹੀਨਾਤਿ ਸੀਲਾਦਿਗੁਣਵਿਰਹਿਤਾ ਦੁਸ੍ਸੀਲਾ, ਅਲਜ੍ਜਿਨੋ ਚ. ਅਥ ਵਾ ਗੁਣਹੀਨਾਤਿ ਵਿਨਯਵਾਰਿਤ੍ਤਾਦਿਗੁਣੇਨ ਹੀਨਾ ਧਮ੍ਮਵਿਨਯੇ ਅਪ੍ਪਕਤਞ੍ਞੁਨੋ. ਸਙ੍ਘਮ੍ਹੀਤਿ ਸਙ੍ਘਮਜ੍ਝੇ. ਵੋਹਰਨ੍ਤਾਤਿ ਕਥੇਨ੍ਤਾ, ਸਙ੍ਘੇ ਵਿਨਿਚ੍ਛਯਕਥਾਯ ਵਤ੍ਤਮਾਨਾਯ ਯਂਕਿਞ੍ਚਿ ਭਣਨ੍ਤਾ. ਵਿਸਾਰਦਾਤਿ ਨਿਬ੍ਭਯਾ ਪਗਬ੍ਭਾ. ਬਲਵਨ੍ਤੋਤਿ ਪਕ੍ਖਬਲੇਨ ਬਲਵਨ੍ਤੋ. ਮੁਖਰਾਤਿ ਮੁਖਖਰਾ ਖਰਵਾਦਿਨੋ. ਅਸ੍ਸੁਤਾਵਿਨੋਤਿ ਨ ਸੁਤਵਨ੍ਤੋ, ਕੇਵਲਂ ਲਾਭਸਕ੍ਕਾਰਸਿਲੋਕਸਨ੍ਨਿਸ੍ਸਯੇਨ ਗੁਣਧਰਾ ਹੁਤ੍ਵਾ ‘‘ਧਮ੍ਮਂ ‘ਅਧਮ੍ਮੋ’ਤਿ, ਅਧਮ੍ਮਞ੍ਚ ‘ਧਮ੍ਮੋ’ਤਿ, ਵਿਨਯਂ ‘ਅਵਿਨਯੋ’ਤਿ, ਅਵਿਨਯਞ੍ਚ ‘ਵਿਨਯੋ’’’ਤਿ ਏਵਂ ਅਤ੍ਤਨਾ ਯਥਿਚ੍ਛਿਤਮਤ੍ਥਂ ਸਙ੍ਘਮਜ੍ਝੇ ਪਤਿਟ੍ਠਪੇਨ੍ਤਾ ਬਲਵਨ੍ਤੋ ਭਵਿਸ੍ਸਨ੍ਤਿ.

ਗੁਣਵਨ੍ਤੋਤਿ ਸੀਲਾਦਿਗੁਣਸਮ੍ਪਨ੍ਨਾ. ਵੋਹਰਨ੍ਤਾ ਯਥਾਤ੍ਥਤੋਤਿ ਅਤ੍ਥਾਨੁਰੂਪਂ, ਅਵਿਪਰੀਤਤ੍ਥਂ ‘‘ਧਮ੍ਮਂ ‘ਧਮ੍ਮੋ’ਤਿ, ਅਧਮ੍ਮਂ ‘ਅਧਮ੍ਮੋ’ਤਿ, ਵਿਨਯਂ ‘ਵਿਨਯੋ’ਤਿ ਅਵਿਨਯਂ ‘ਅਵਿਨਯੋ’’’ਤਿ ਏਵਂ ਦੀਪੇਨ੍ਤਾ. ਦੁਬ੍ਬਲਾ ਤੇ ਭਵਿਸ੍ਸਨ੍ਤੀਤਿ ਪਰਿਸਾਯਂ ਅਲਜ੍ਜੁਸ੍ਸਨ੍ਨਤਾਯ ਬਲਵਿਰਹਿਤਾ ਤੇ ਭਵਿਸ੍ਸਨ੍ਤਿ, ਤੇਸਂ ਵਚਨਂ ਨ ਤਿਟ੍ਠਿਸ੍ਸਤਿ. ਹਿਰੀਮਨਾ ਅਨਤ੍ਥਿਕਾਤਿ ਹਿਰੀਮਨ੍ਤੋ ਕੇਨਚਿ ਅਨਤ੍ਥਿਕਾ. ਤੇ ਹਿ ਧਮ੍ਮੇਨ ਵਤ੍ਤੁਂ ਸਮਤ੍ਥਾਪਿ ਪਾਪਜਿਗੁਚ੍ਛਤਾਯ ਅਪ੍ਪਕਿਚ੍ਚਤਾਯ ਚ ਕੇਹਿਚਿ ਵਿਰੋਧਂ ਅਕਰੋਨ੍ਤਾ ਅਤ੍ਤਨੋ ਵਾਦਂ ਪਤਿਟ੍ਠਾਪੇਤੁਂ ਨ ਵਾਯਮਨ੍ਤਾ ਦਿਟ੍ਠਾਵਿਕਮ੍ਮਂ ਵਾ ਅਧਿਟ੍ਠਾਨਂ ਵਾ ਅਕਤ੍ਵਾ ਤੁਣ੍ਹੀ ਹੋਨ੍ਤਿ.

ਰਜਤਨ੍ਤਿ ਰੂਪਿਯਂ, ਤੇਨ ਕਹਾਪਣਲੋਹਮਾਸਕਾਦੀਨਮ੍ਪਿ ਸਙ੍ਗਹੋ ਦਟ੍ਠਬ੍ਬੋ. ਜਾਤਰੂਪਨ੍ਤਿ ਸੁਵਣ੍ਣਂ, ਤੇਨ ਮਣਿਮੁਤ੍ਤਾਦੀਨਮ੍ਪਿ ਸਙ੍ਗਹੋ ਦਟ੍ਠਬ੍ਬੋ. ਵਾ-ਸਦ੍ਦੋ ਸਮੁਚ੍ਚਯਤ੍ਥੋ ‘‘ਅਪਦਾ ਵਾ’’ਤਿਆਦੀਸੁ (ਅ. ਨਿ. ੪.੩੪; ੫.੩੨; ਇਤਿਵੁ. ੯੦) ਵਿਯ. ‘‘ਰਜਤਜਾਤਰੂਪਞ੍ਚਾ’’ਤਿ ਵਾ ਪਾਠੋ. ਖੇਤ੍ਤਨ੍ਤਿ ਯਤ੍ਥ ਪੁਬ੍ਬਣ੍ਣਾਪਰਣ੍ਣਂ ਰੁਹਤਿ, ਤਂ ਖੇਤ੍ਤਂ. ਤਦਤ੍ਥਂ ਅਕਤਭੂਮਿਭਾਗੋ ਵਤ੍ਥੁ. ਅਜੇਲ਼ਕਨ੍ਤਿ ਏਲ਼ਕਾ ਨਾਮ ਅਜਾਯੇਵ, ਤੇ ਠਪੇਤ੍ਵਾ ਅਵਸੇਸਾ ਪਸੁਜਾਤੀ ਅਜਾ ਨਾਮ. ਅਜੇਲ਼ਕਗ੍ਗਹਣੇਨੇਵ ਹੇਤ੍ਥ ਗੋਮਹਿਂਸਾਦੀਨਮ੍ਪਿ ਸਙ੍ਗਹੋ ਕਤੋ. ਦਾਸਿਦਾਸਞ੍ਚਾਤਿ ਦਾਸਿਯੋ ਚ ਦਾਸੇ ਚ. ਦੁਮ੍ਮੇਧਾਤਿ ਅਵਿਦ੍ਦਸੁਨੋ, ਕਪ੍ਪਿਯਾਕਪ੍ਪਿਯਂ ਸਾਰੁਪ੍ਪਾਸਾਰੁਪ੍ਪਂ ਅਜਾਨਨ੍ਤਾ ਅਤ੍ਤਨੋ ਅਤ੍ਥਾਯ ਸਾਦਿਯਿਸ੍ਸਨ੍ਤਿ ਸਮ੍ਪਟਿਚ੍ਛਿਸ੍ਸਨ੍ਤਿ.

ਉਜ੍ਝਾਨਸਞ੍ਞਿਨੋਤਿ ਪਰੇ ਹੇਟ੍ਠਤੋ ਕਤ੍ਵਾ ਓਲੋਕਨਚਿਤ੍ਤਾ, ਅਨੁਜ੍ਝਾਯਿਤਬ੍ਬਟ੍ਠਾਨੇਪਿ ਵਾ ਉਜ੍ਝਾਨਸੀਲਾ. ਬਾਲਾਤਿ ਦੁਚ੍ਚਿਨ੍ਤਿਤਚਿਨ੍ਤਨਾਦਿਨਾ ਬਾਲਲਕ੍ਖਣੇਨ ਸਮਨ੍ਨਾਗਤਾ, ਤਤੋ ਏਵ ਸੀਲੇਸੁ ਅਸਮਾਹਿਤਾ ਚਤੁਪਾਰਿਸੁਦ੍ਧਿਸੀਲੇਸੁ ਨ ਸਮਾਹਿਤਚਿਤ੍ਤਾ. ਉਨ੍ਨਲ਼ਾਤਿ, ਸਮੁਸ੍ਸਿਤਤੁਚ੍ਛਮਾਨਾ. ਵਿਚਰਿਸ੍ਸਨ੍ਤੀਤਿ ਮਾਨਦ੍ਧਜਂ ਉਕ੍ਖਿਪਿਤ੍ਵਾ ਵਿਚਰਿਸ੍ਸਨ੍ਤਿ. ਕਲਹਾਭਿਰਤਾ ਮਗਾਤਿ ਸਾਰਮ੍ਭਬਹੁਲਤਾਯ ਕਰਣੁਤ੍ਤਰਿਯਪਸੁਤਾ ਕਲਹੇ ਏਵ ਅਭਿਰਤਾ ਮਗਸਦਿਸਾ ਮਿਗਾ ਵਿਯ ਅਤ੍ਤਹਿਤਾਪੇਕ੍ਖਾ ਘਾਸੇਸਨਾਭਿਰਤਾ ਦੁਬ੍ਬਲਵਿਹੇਸਪਰਾਤਿ ਅਤ੍ਥੋ.

ਉਦ੍ਧਤਾਤਿ ਉਦ੍ਧਚ੍ਚੇਨ ਸਮਨ੍ਨਾਗਤਾ ਚਿਤ੍ਤੇਕਗ੍ਗਤਾਰਹਿਤਾ. ਨੀਲਚੀਵਰਪਾਰੁਤਾਤਿ ਅਕਪ੍ਪਿਯਰਜਨਰਤ੍ਤੇਨ ਨੀਲਵਣ੍ਣੇਨ ਚੀਵਰੇਨ ਪਾਰੁਤਾ, ਤਾਦਿਸਂ ਚੀਵਰਂ ਨਿਵਾਸੇਤ੍ਵਾ ਚੇਵ ਪਾਰੁਪਿਤ੍ਵਾ ਚ ਵਿਚਰਣਕਾ. ਕੁਹਾਤਿ ਸਾਮਨ੍ਤਜਪ੍ਪਨਾਦਿਨਾ ਕੁਹਨਵਤ੍ਥੁਨਾ ਕੁਹਕਾ, ਅਸਨ੍ਤਗੁਣਸਮ੍ਭਾਵਨਿਚ੍ਛਾਯ ਕੋਹਞ੍ਞਂ ਕਤ੍ਵਾ ਪਰੇਸਂ ਵਿਮ੍ਹਾਪਯਾ. ਥਦ੍ਧਾਤਿ ਕੋਧੇਨ ਮਾਨੇਨ ਚ ਥਦ੍ਧਮਾਨਸਾ ਕਕ੍ਖਲ਼ਹਦਯਾ. ਲਪਾਤਿ ਲਪਨਕਾ ਕੁਹਨਵੁਤ੍ਤਿਕਾ, ਪਸਨ੍ਨਮਾਨਸੇਹਿ ਮਨੁਸ੍ਸੇਹਿ ‘‘ਕੇਨ, ਭਨ੍ਤੇ, ਅਯ੍ਯਸ੍ਸ ਅਤ੍ਥੋ’’ਤਿ ਪਚ੍ਚਯਦਾਯਕਾਨਂ ਵਦਾਪਨਕਾ, ਪਯੁਤ੍ਤਵਾਚਾਵਸੇਨ, ਨਿਪ੍ਪੇਸਿਕਤਾਵਸੇਨ ਚ ਪਚ੍ਚਯਤ੍ਥਂ ਲਪਕਾਤਿ ਵਾ ਅਤ੍ਥੋ. ਸਿਙ੍ਗੀਤਿ ‘‘ਤਤ੍ਥ ਕਤਮਂ ਸਿਙ੍ਗਂ? ਯਂ ਸਿਙ੍ਗਂ ਸਿਙ੍ਗਾਰਤਾ ਚਾਤੁਰਤਾ ਚਾਤੁਰਿਯਂ ਪਰਿਕ੍ਖਤਤਾ ਪਾਰਿਕ੍ਖਤਿਯ’’ਨ੍ਤਿ (ਵਿਭ. ੮੫੨) ਏਵਂ ਵੁਤ੍ਤੇਹਿ ਸਿਙ੍ਗਸਦਿਸੇਹਿ ਪਾਕਟਕਿਲੇਸੇਹਿ ਸਮਨ੍ਨਾਗਤਾ, ਸਿਙ੍ਗਾਰਚਰਿਤਾਤਿ ਅਤ੍ਥੋ. ‘‘ਅਰਿਯਾ ਵਿਯਾ’’ਤਿ ਇਦਂ ‘‘ਕੁਹਾ’’ਤਿ ਏਤਸ੍ਸੇਵ ਅਤ੍ਥਦਸ੍ਸਨਂ. ਕੁਹਕਾਨਞ੍ਹਿ ਅਰਿਯਾਨਮਿਵ ਠਿਤਭਾਵਂ ਦਸ੍ਸੇਨ੍ਤੋ ਅਰਿਯਾ ਵਿਯ ਵਿਚਰਨ੍ਤੀਤਿ ਆਹ.

ਤੇਲਸਣ੍ਠੇਹੀਤਿ ਸਿਤ੍ਥਕਤੇਲੇਨ ਵਾ ਉਦਕਤੇਲੇਨ ਵਾ ਓਸਣ੍ਠਿਤੇਹਿ. ਚਪਲਾਤਿ ਕਾਯਮਣ੍ਡਨਪਰਿਕ੍ਖਾਰਮਣ੍ਡਨਾਦਿਨਾ ਚਾਪਲ੍ਲੇਨ ਯੁਤ੍ਤਾ. ਅਞ੍ਜਨਕ੍ਖਿਕਾਤਿ ਅਲਙ੍ਕਾਰਞ੍ਜਨੇਨ ਅਞ੍ਜਿਤਨੇਤ੍ਤਾ. ਰਥਿਯਾਯ ਗਮਿਸ੍ਸਨ੍ਤੀਤਿ ਭਿਕ੍ਖਾਚਰਿਯਾਯ ਕੁਲੂਪਸਙ੍ਕਮਨਾਪਦੇਸੇਹਿ, ਮਹਾਰਚ੍ਛਾਯ ਇਤੋ ਚਿਤੋ ਚ ਪਰਿਬ੍ਭਮਿਸ੍ਸਨ੍ਤਿ. ਦਨ੍ਤਵਣ੍ਣਿਕਪਾਰੁਤਾਤਿ ਦਨ੍ਤਵਣ੍ਣਰਤ੍ਤੇਨ ਚੀਵਰੇਨ ਪਾਰੁਤਸਰੀਰਾ.

ਅਜੇਗੁਚ੍ਛਨ੍ਤਿ ਅਜਿਗੁਚ੍ਛਿਤਬ੍ਬਂ. ਵਿਮੁਤ੍ਤੇਹੀਤਿ ਅਰਿਯੇਹਿ. ਸੁਰਤ੍ਤਨ੍ਤਿ ਕਪ੍ਪਿਯਰਜਨੇਨ ਸੁਟ੍ਠੁ ਰਤ੍ਤਂ, ਅਰਹਨ੍ਤਾਨਂ ਬੁਦ੍ਧਾਦੀਨਂ ਚਿਣ੍ਣਤਾਯ ਅਰਹਦ੍ਧਜਂ ਜਿਗੁਚ੍ਛਿਸ੍ਸਨ੍ਤਿ ਕਾਸਾਵਂ. ਕਸ੍ਮਾ? ਓਦਾਤੇਸੁ ਸਮੁਚ੍ਛਿਤਾ ਗੇਧਂ ਆਪਨ੍ਨਾ. ਦਨ੍ਤਵਣ੍ਣਪਾਰੁਪਨਸ੍ਸ ਹਿ ਇਦਂ ਕਾਰਣਵਚਨਂ. ਤੇ ਹਿ ਸੇਤਕਂ ਸਮ੍ਭਾਵੇਨ੍ਤਾ ‘‘ਸਬ੍ਬੇਨ ਸਬ੍ਬਂ ਸੇਤਕੇ ਗਹਿਤੇ ਲਿਙ੍ਗਪਰਿਚ੍ਚਾਗੋ ਏਵ ਸਿਯਾ’’ਤਿ ਦਨ੍ਤਵਣ੍ਣਂ ਪਾਰੁਪਨ੍ਤਿ.

ਲਾਭਕਾਮਾਤਿ ਲਾਭਗਿਦ੍ਧਾ. ਭਿਕ੍ਖਾਚਰਿਯਾਸੁਪਿ ਕੋਸਜ੍ਜਯੋਗਤੋ ਕੁਸੀਤਾ. ਸਮਣਧਮ੍ਮਂ ਕਾਤੁਂ ਚਿਤ੍ਤਸ੍ਸ ਉਸ੍ਸਾਹਾਭਾਵੇਨ ਹੀਨਵੀਰਿਯਾ. ਕਿਚ੍ਛਨ੍ਤਾਤਿ, ਕਿਲਮਨ੍ਤਾ, ਵਨਪਤ੍ਥੇਸੁ ਵਸਿਤੁਂ ਕਿਚ੍ਛਨ੍ਤਾ ਕਿਲਨ੍ਤਚਿਤ੍ਤਾਤਿ ਅਤ੍ਥੋ. ਗਾਮਨ੍ਤੇਸੂਤਿ ਗਾਮਨ੍ਤਸੇਨਾਸਨੇਸੁ ਗਾਮਸਮੀਪੇਸੁ ਸੇਨਾਸਨੇਸੁ, ਗਾਮਦ੍ਵਾਰੇਸੁ ਵਾ ਸੇਨਾਸਨੇਸੁ. ਵਸਿਸ੍ਸਰੇਤਿ ਵਸਿਸ੍ਸਨ੍ਤਿ.

ਤੇ ਤੇਵ ਅਨੁਸਿਕ੍ਖਨ੍ਤਾਤਿ ਯੇ ਯੇ ਮਿਚ੍ਛਾਜੀਵਪ੍ਪਯੋਗੇਨ ਲਦ੍ਧਲਾਭਾ, ਤੇ ਤੇ ਏਵ ਪੁਗ੍ਗਲੇ ਅਨੁਸਿਕ੍ਖਨ੍ਤਾ ਭਮਿਸ੍ਸਨ੍ਤਿ. ਭਮਿਸ੍ਸਨ੍ਤੀਤਿ ਸਯਮ੍ਪਿ ਤੇ ਵਿਯ ਮਿਚ੍ਛਾਜੀਵੇਨ ਲਾਭਂ ਉਪ੍ਪਾਦੇਤੁਂ ਰਾਜਕੁਲਾਦੀਨਿ ਸੇਵਨ੍ਤਾ ਪਰਿਬ੍ਭਮਿਸ੍ਸਨ੍ਤਿ. ‘‘ਭਜਿਸ੍ਸਨ੍ਤੀ’’ਤਿ ਵਾ ਪਾਠੋ, ਸੇਵਿਸ੍ਸਨ੍ਤੀਤਿ ਅਤ੍ਥੋ. ਅਸਂਯਤਾਤਿ ਸੀਲਸਂਯਮਰਹਿਤਾ.

ਯੇ ਯੇ ਅਲਾਭਿਨੋ ਲਾਭਨ੍ਤਿ ਯੇ ਯੇ ਭਿਕ੍ਖੂ ਮਿਚ੍ਛਾਜੀਵਪਰਿਵਜ੍ਜਨੇਨ ਅਪ੍ਪਪੁਞ੍ਞਤਾਯ ਚ ਲਾਭਸ੍ਸ ਪਚ੍ਚਯਸ੍ਸ ਨ ਲਾਭਿਨੋ, ਤੇ ਪੁਜ੍ਜਾ ਪੂਜਨੀਯਾ ਪਾਸਂਸਾ ਤਦਾ ਅਨਾਗਤੇ ਕਾਲੇ ਨ ਭਵਿਸ੍ਸਨ੍ਤਿ. ਸੁਪੇਸਲੇਪਿ ਤੇ ਧੀਰੇਤਿ ਧਿਤਿਸਮ੍ਪਨ੍ਨਤਾਯ ਧੀਰੇ ਸੁਟ੍ਠੁ ਪੇਸਲੇਪਿ ਤੇ ਭਿਕ੍ਖੂ ਨ ਸੇਵਿਸ੍ਸਨ੍ਤਿ, ਤਦਾ ਅਨਾਗਤੇ ਤੇ ਲਾਭਿਨੋ ਲਾਭਕਾਮਾਵ ਭਿਕ੍ਖੂਤਿ ਅਤ੍ਥੋ.

ਮਿਲਕ੍ਖੁਰਜਨਂ ਰਤ੍ਤਨ੍ਤਿ ਕਾਲਕਚ੍ਛਕਰਜਨੇਨ ਰਤ੍ਤਂ. ਸਮਾਸਪਦਞ੍ਹੇਤਂ, ਗਾਥਾਸੁਖਤ੍ਥਂ ਸਾਨੁਨਾਸਿਕਨਿਦ੍ਦੇਸੋ. ਗਰਹਨ੍ਤਾ ਸਕਂ ਧਜਨ੍ਤਿ ਅਤ੍ਤਨੋ ਧਜਭੂਤਂ ਕਾਸਾਵਂ ਜਿਗੁਚ੍ਛਨ੍ਤਾ. ਸਾਸਨੇ ਪਬ੍ਬਜਿਤਾਨਞ੍ਹਿ ਕਾਸਾਵੋ ਧਜੋ ਨਾਮ. ਤਿਤ੍ਥਿਯਾਨਂ ਧਜਂ ਕੇਚੀਤਿ ਕੇਚਿ ਸਕ੍ਯਪੁਤ੍ਤਿਯਭਾਵਂ ਪਟਿਜਾਨਨ੍ਤਾ ਏਵ ਤਿਤ੍ਥਿਯਾਨਂ ਸੇਤਵਤ੍ਥਿਕਾਨਂ ਧਜਭੂਤਂ ਅਵਦਾਤਕਂ ਸੇਤਵਤ੍ਥਂ ਧਾਰੇਸ੍ਸਨ੍ਤਿ.

ਅਗਾਰਵੋ ਚ ਕਾਸਾਵੇਤਿ ਅਰਹਦ੍ਧਜਭੂਤੇ ਕਾਸਾਵੇ ਅਗਾਰਵੋ ਅਬਹੁਮਾਨਂ ਤਦਾ ਅਨਾਗਤੇ ਤੇਸਂ ਭਵਿਸ੍ਸਤਿ. ਪਟਿਸਙ੍ਖਾ ਚ ਕਾਸਾਵੇਤਿ ‘‘ਪਟਿਸਙ੍ਖਾ ਯੋਨਿਸੋ ਚੀਵਰਂ ਪਟਿਸੇਵਾਮੀ’’ਤਿਆਦਿਨਾ (ਮ. ਨਿ. ੧.੨੩; ਅ. ਨਿ. ੬.੫੮) ਨਯੇਨ ਪਚ੍ਚਵੇਕ੍ਖਣਮਤ੍ਤਮ੍ਪਿ ਕਾਸਾਵਪਰਿਭੋਗੇ ਨ ਭਵਿਸ੍ਸਤਿ.

ਕਾਸਾਵਂ ਧਾਰੇਨ੍ਤੇਨ ਕਾਸਾਵਂ ਬਹੁਮਾਨੇਨ ‘‘ਦੁਚ੍ਚਰਿਤਤੋ ਓਰਮਿਤਬ੍ਬ’’ਨ੍ਤਿ ਕਾਸਾਵਸ੍ਸ ਗਰੁਕਾਤਬ੍ਬਭਾਵੇ ਛਦ੍ਦਨ੍ਤਜਾਤਕਮੁਦਾਹਰਨ੍ਤੋ ‘‘ਅਭਿਭੂਤਸ੍ਸ ਦੁਕ੍ਖੇਨਾ’’ਤਿਆਦਿਮਾਹ. ਤਤ੍ਥ ਸਲ੍ਲਵਿਦ੍ਧਸ੍ਸਾਤਿ ਪੁਥੁਨਾ ਸਵਿਸੇਨ ਸਲ੍ਲੇਨ ਵਿਦ੍ਧਸ੍ਸ, ਤਤੋ ਏਵ ਮਹਤਾ ਦੁਕ੍ਖੇਨ ਅਭਿਭੂਤਸ੍ਸ. ਰੁਪ੍ਪਤੋਤਿ ਸਰੀਰਵਿਕਾਰਂ ਆਪਜ੍ਜਤੋ. ਮਹਾਘੋਰਾਤਿ ਸਰੀਰਜੀਵਿਤੇਸੁ ਨਿਰਪੇਕ੍ਖਤਾਯ ਭਿਮ੍ਮਾ ਗਰੁਤਰਾ ਪਟਿਸਙ੍ਖਾ ਅਞ੍ਞੇਹਿ ਅਚਿਨ੍ਤਿਯਾ ਚਿਨ੍ਤਾਮਤ੍ਤੇਨ ਪਵਤ੍ਤੇਤੁਂ ਅਸਕ੍ਕੁਣੇਯ੍ਯਾ ਛਦ੍ਦਨ੍ਤਮਹਾਨਾਗਸ੍ਸਆਸਿ, ਅਹੋਸਿ. ਛਦ੍ਦਨ੍ਤਨਾਗਰਾਜਕਾਲੇ ਹਿ ਬੋਧਿਸਤ੍ਤੋ ਸੋਣੁਤ੍ਤਰੇਨ ਨਾਮ ਨੇਸਾਦੇਨ ਪਟਿਚ੍ਛਨ੍ਨਟ੍ਠਾਨੇ ਠਤ੍ਵਾ ਵਿਸਪੀਤੇਨ ਸਲ੍ਲੇਨ ਵਿਦ੍ਧੋ ਮਹਤਾ ਦੁਕ੍ਖੇਨ ਅਭਿਭੂਤੋ ਤਂ ਗਹੇਤ੍ਵਾ ਪਰਿਦਹਿਤਂ ਕਾਸਾਵਂ ਦਿਸ੍ਵਾ ‘‘ਅਯਂ ਅਰਿਯਦ੍ਧਜੇਨ ਪਟਿਚ੍ਛਨ੍ਨੋ, ਨ ਮਯਾ ਹਿਂਸਿਤਬ੍ਬੋ’’ਤਿ ਤਤ੍ਥ ਮੇਤ੍ਤਚਿਤ੍ਤਮੇਵ ਪਚ੍ਚੁਪਟ੍ਠਪੇਤ੍ਵਾ ਉਪਰਿਧਮ੍ਮਂ ਦੇਸੇਸਿ. ਯਥਾਹ –

‘‘ਸਮਪ੍ਪਿਤੋ ਪੁਥੁਸਲ੍ਲੇਨ ਨਾਗੋ,

ਅਦੁਟ੍ਠਚਿਤ੍ਤੋ ਲੁਦ੍ਦਕਮਜ੍ਝਭਾਸਿ;

ਕਿਮਤ੍ਥਯਂ ਕਿਸ੍ਸ ਵਾ ਸਮ੍ਮ ਹੇਤੁ,

ਮਮਂ ਵਧੀ ਕਸ੍ਸ ਵਾਯਂ ਪਯੋਗੋ’’ਤਿਆਦਿ. (ਜਾ. ੧.੧੬.੧੨੪);

ਇਮਮਤ੍ਥਂ ਦਸ੍ਸੇਨ੍ਤੋ ਥੇਰੋ ‘‘ਛਦ੍ਦਨ੍ਤੋ ਹੀ’’ਤਿਆਦਿਮਾਹ. ਤਤ੍ਥ ਸੁਰਤ੍ਤਂ ਅਰਹਦ੍ਧਜਨ੍ਤਿ ਸੋਣੁਤ੍ਤਰੇਨ ਪਰਿਦਹਿਤਕਾਸਾਵਂ ਸਨ੍ਧਾਯਾਹ. ਅਭਣੀਤਿ ਅਭਾਸਿ. ਗਾਥਾਤਿ ਗਾਥਾਯੋ. ਗਜੋਤਿ ਛਦ੍ਦਨ੍ਤੋ ਨਾਗਰਾਜਾ. ਅਤ੍ਥੋਪਸਂਹਿਤਾਤਿ ਅਤ੍ਥਸਨ੍ਨਿਸ੍ਸਿਤਾ ਹਿਤਾ, ਹਿਤਯੁਤ੍ਤਾਤਿ ਅਤ੍ਥੋ.

ਛਦ੍ਦਨ੍ਤਨਾਗਰਾਜੇਨ ਵੁਤ੍ਤਗਾਥਾਸੁ ਅਨਿਕ੍ਕਸਾਵੋਤਿ ਰਾਗਾਦੀਹਿ ਕਸਾਵੇਹਿ ਕਸਾਵੋ, ਪਰਿਦਹਿਸ੍ਸਤੀਤਿ ਨਿਵਾਸਨਪਾਰੁਪਨਅਤ੍ਥਰਣਵਸੇਨ ਪਰਿਭੁਞ੍ਜਿਸ੍ਸਤਿ. ‘‘ਪਰਿਧਸ੍ਸਤੀ’’ਤਿ ਵਾ ਪਾਠੋ. ਅਪੇਤੋ ਦਮਸਚ੍ਚੇਨਾਤਿ ਇਨ੍ਦ੍ਰਿਯਦਮੇਨ ਚੇਵ ਪਰਮਤ੍ਥਸਚ੍ਚਪਕ੍ਖਿਕੇਨ ਵਚੀਸਚ੍ਚੇਨ ਚ ਅਪੇਤੋ, ਵਿਯੁਤ੍ਤੋ ਪਰਿਚ੍ਚਤ੍ਤੋਤਿ ਅਤ੍ਥੋ. ਨ ਸੋਤਿ ਸੋ ਏਵਰੂਪੋ ਪੁਗ੍ਗਲੋ ਕਾਸਾਵਂ ਪਰਿਦਹਿਤੁਂ ਨਾਰਹਤਿ.

ਵਨ੍ਤਕਸਾਵਸ੍ਸਾਤਿ ਚਤੂਹਿ ਮਗ੍ਗੇਹਿ ਵਨ੍ਤਕਸਾਵੋ ਛਡ੍ਡਿਤਕਸਾਵੋ ਪਹੀਨਕਸਾਵੋ ਅਸ੍ਸ ਭਵੇਯ੍ਯਾਤਿ ਅਤ੍ਥੋ. ਸੀਲੇਸੂਤਿ ਚਤੁਪਾਰਿਸੁਦ੍ਧਿਸੀਲੇਸੁ. ਸੁਸਮਾਹਿਤੋਤਿ ਸੁਟ੍ਠੁ ਸਮਾਹਿਤੋ. ਉਪੇਤੋਤਿ ਇਨ੍ਦ੍ਰਿਯਦਮੇਨ ਚੇਵ ਵੁਤ੍ਤਪ੍ਪਕਾਰੇਨ ਸਚ੍ਚੇਨ ਚ ਉਪਗਤੋ ਸਮਨ੍ਨਾਗਤੋ. ਸ ਵੇਤਿ ਸੋ ਏਵਰੂਪੋ ਪੁਗ੍ਗਲੋ ਤਂ ਗਨ੍ਧਕਾਸਾਵਵਤ੍ਥਂ ਏਕਨ੍ਤੇਨ ਅਰਹਤੀਤਿ ਅਤ੍ਥੋ.

ਵਿਪਨ੍ਨਸੀਲੋਤਿ ਭਿਨ੍ਨਸੀਲੋ. ਦੁਮ੍ਮੇਧੋਤਿ ਨਿਪ੍ਪਞ੍ਞੋ ਸੀਲਵਿਸੋਧਨਪਞ੍ਞਾਯ ਵਿਰਹਿਤੋ. ਪਾਕਟੋਤਿ ‘‘ਦੁਸ੍ਸੀਲੋ ਅਯ’’ਨ੍ਤਿ ਪਾਕਟੋ ਪਕਾਸੋ, ਵਿਕ੍ਖਿਤ੍ਤਿਨ੍ਦ੍ਰਿਯਤਾਯ ਵਾ ਪਾਕਟੋ ਪਾਕਟਿਨ੍ਦ੍ਰਿਯੋਤਿ ਅਤ੍ਥੋ. ਕਾਮਕਾਰਿਯੋਤਿ ਭਿਨ੍ਨਸਂਵਰਤਾਯ ਯਥਿਚ੍ਛਿਤਕਾਰਕੋ, ਕਾਮਸ੍ਸ ਵਾ ਮਾਰਸ੍ਸ ਯਥਾਕਾਮਕਰਣੀਯੋ. ਵਿਬ੍ਭਨ੍ਤਚਿਤ੍ਤੋਤਿ ਰੂਪਾਦੀਸੁ ਵਿਸਯੇਸੁ ਵਿਕ੍ਖਿਤ੍ਤਚਿਤ੍ਤੋ. ਨਿਸ੍ਸੁਕ੍ਕੋਤਿ ਅਸੁਕ੍ਕੋ ਸੁਕ੍ਕਧਮ੍ਮਰਹਿਤੋ ਹਿਰੋਤ੍ਤਪ੍ਪਵਿਵਜ੍ਜਿਤੋ, ਕੁਸਲਧਮ੍ਮਸਮ੍ਪਾਦਨਉਸ੍ਸੁਕ੍ਕਰਹਿਤੋ ਵਾ.

ਵੀਤਰਾਗੋਤਿ ਵਿਗਤਚ੍ਛਨ੍ਦਰਾਗੋ. ਓਦਾਤਮਨਸਙ੍ਕਪ੍ਪੋਤਿ ਸੁਵਿਸੁਦ੍ਧਮਨੋਵਿਤਕ੍ਕੋ, ਅਨਾਵਿਲਸਙ੍ਕਪ੍ਪੋ ਵਾ.

ਕਾਸਾਵਂ ਕਿਂ ਕਰਿਸ੍ਸਤੀਤਿ ਯਸ੍ਸ ਸੀਲਂ ਨਤ੍ਥਿ, ਤਸ੍ਸ ਕਾਸਾਵਂ ਕਿਂ ਨਾਮ ਪਯੋਜਨਂ ਸਾਧੇਸ੍ਸਤਿ, ਚਿਤ੍ਤਕਤਸਦਿਸਂ ਤਸ੍ਸ ਪਬ੍ਬਜਿਤਲਿਙ੍ਗਨ੍ਤਿ ਅਤ੍ਥੋ.

ਦੁਟ੍ਠਚਿਤ੍ਤਾਤਿ ਰਾਗਾਦਿਦੋਸੇਹਿ ਦੂਸਿਤਚਿਤ੍ਤਾ. ਅਨਾਦਰਾਤਿ ਸਤ੍ਥਰਿ ਧਮ੍ਮੇ ਅਞ੍ਞਮਞ੍ਞਞ੍ਚ ਆਦਰਰਹਿਤਾ ਅਗਾਰਵਾ. ਤਾਦੀਨਂ ਮੇਤ੍ਤਚਿਤ੍ਤਾਨਨ੍ਤਿ ਮੇਤ੍ਤਾਭਾਵਨਾਯ ਸਮ੍ਪਯੁਤ੍ਤਹਦਯੇ ਤੇਨੇਵ ਅਰਹਤ੍ਤਾਧਿਗਮੇਨ ਇਟ੍ਠਾਦੀਸੁ ਤਾਦਿਭਾਵਪ੍ਪਤ੍ਤੇ ਉਲ਼ਾਰਗੁਣੇ. ਉਪਯੋਗਤ੍ਥੇ ਹਿ ਇਦਂ ਸਾਮਿਵਚਨਂ. ਨਿਗ੍ਗਣ੍ਹਿਸ੍ਸਨ੍ਤੀਤਿ ‘‘ਸੀਲਾਦਿਸਮ੍ਪਨ੍ਨੇ ਦਿਸ੍ਵਾ ਤੇ ਸਮ੍ਭਾਵੇਨ੍ਤਾ ਵਿਪਨ੍ਨਸੀਲੇ ਅਮ੍ਹੇ ਨ ਬਹੁਂ ਮਞ੍ਞਿਸ੍ਸਨ੍ਤੀ’’ਤਿ ਅਤ੍ਤਨਿ ਅਗਾਰਵਭਯੇਨ ਯਥਾ ਤੇ ਉਬ੍ਬਾਲ਼੍ਹਾ ਪਕ੍ਕਮਿਸ੍ਸਨ੍ਤਿ, ਤਥਾ ਬਾਧਿਸ੍ਸਨ੍ਤੀਤਿ ਅਤ੍ਥੋ.

ਸਿਕ੍ਖਾਪੇਨ੍ਤਾਪੀਤਿ ਸਿਕ੍ਖਾਪਿਯਮਾਨਾਪਿ. ਕਮ੍ਮਤ੍ਥੇ ਹਿ ਅਯਂ ਕਤ੍ਤੁਨਿਦ੍ਦੇਸੋ. ਥੇਰੇਹੀਤਿ ਅਤ੍ਤਨੋ ਆਚਰਿਯੁਪਜ੍ਝਾਯੇਹਿ. ਚੀਵਰਧਾਰਣਨ੍ਤਿ ਇਦਂ ਸਮਣਪਟਿਪਤ੍ਤਿਯਾ ਨਿਦਸ੍ਸਨਮਤ੍ਤਂ, ਤਸ੍ਮਾ ‘‘ਏਵਂ ਤੇ ਅਭਿਕ੍ਕਮਿਤਬ੍ਬਂ, ਏਵਂ ਤੇ ਪਟਿਕ੍ਕਮਿਤਬ੍ਬ’’ਨ੍ਤਿਆਦਿਨਾ (ਅ. ਨਿ. ੪.੧੨੨) ਸਿਕ੍ਖਾਪਿਯਮਾਨਾਪੀਤਿ ਅਤ੍ਥੋ. ਨ ਸੁਣਿਸ੍ਸਨ੍ਤੀਤਿ ਓਵਾਦਂ ਨ ਗਣ੍ਹਿਸ੍ਸਨ੍ਤਿ.

ਤੇ ਤਥਾ ਸਿਕ੍ਖਿਤਾ ਬਾਲਾਤਿ ਤੇ ਅਨ੍ਧਬਾਲਾ ਆਚਰਿਯੁਪਜ੍ਝਾਯੇਹਿ ਸਿਕ੍ਖਾਪਿਯਮਾਨਾਪਿ ਅਨਾਦਰਤਾਯ ਅਸਿਕ੍ਖਿਤਾਤਿ. ਨਾਦਿਯਿਸ੍ਸਨ੍ਤੁਪਜ੍ਝਾਯੇਤਿ ਉਪਜ੍ਝਾਯੇ ਆਚਰਿਯੇ ਚ ਆਦਰਂ ਨ ਕਰੋਨ੍ਤਿ, ਤੇਸਂ ਅਨੁਸਾਸਨਿਯਂ ਨ ਤਿਟ੍ਠਨ੍ਤਿ. ਯਥਾ ਕਿਂ? ਖਲ਼ੁਙ੍ਕੋ ਵਿਯ ਸਾਰਥਿਂ ਯਥਾ ਖਲ਼ੁਙ੍ਕੋ ਦੁਟ੍ਠਸ੍ਸੋ ਅਸ੍ਸਦਮਕਂ ਨਾਦਿਯਤਿ ਨ ਤਸ੍ਸ ਉਪਦੇਸੇ ਤਿਟ੍ਠਤਿ, ਏਵਂ ਤੇਪਿ ਉਪਜ੍ਝਾਯਾਚਰਿਯੇ ਨ ਭਾਯਨ੍ਤਿ ਨ ਸਾਰਜ੍ਜਨ੍ਤੀਤਿ ਅਤ੍ਥੋ.

‘‘ਏਵ’’ਨ੍ਤਿਆਦਿ ਵੁਤ੍ਤਸ੍ਸੇਵਤ੍ਥਸ੍ਸ ਨਿਗਮਨਂ. ਤਤ੍ਥ ਏਵਨ੍ਤਿ ਵੁਤ੍ਤਪ੍ਪਕਾਰੇਨ. ਅਨਾਗਤਦ੍ਧਾਨਨ੍ਤਿ ਅਨਾਗਤਮਦ੍ਧਾਨਂ, ਅਨਾਗਤੇ ਕਾਲੇਤਿ ਅਤ੍ਥੋ. ਤਂਯੇਵ ਸਰੂਪਤੋ ਦਸ੍ਸੇਨ੍ਤੋ ‘‘ਪਤ੍ਤੇ ਕਾਲਮ੍ਹਿ ਪਚ੍ਛਿਮੇ’’ਤਿ ਆਹ. ਤਤ੍ਥ ਕਤਮੋ ਪਚ੍ਛਿਮਕਾਲੋ? ‘‘ਤਤਿਯਸਙ੍ਗੀਤਿਤੋ ਪਟ੍ਠਾਯ ਪਚ੍ਛਿਮਕਾਲੋ’’ਤਿ ਕੇਚਿ, ਤਂ ਏਕੇ ਨਾਨੁਜਾਨਨ੍ਤਿ. ਸਾਸਨਸ੍ਸ ਹਿ ਪਞ੍ਚਯੁਗਾਨਿ ਵਿਮੁਤ੍ਤਿਯੁਗਂ, ਸਮਾਧਿਯੁਗਂ, ਸੀਲਯੁਗਂ, ਸੁਤਯੁਗਂ, ਦਾਨਯੁਗਨ੍ਤਿ. ਤੇਸੁ ਪਠਮਂ ਵਿਮੁਤ੍ਤਿਯੁਗਂ, ਤਸ੍ਮਿਂ ਅਨ੍ਤਰਹਿਤੇ ਸਮਾਧਿਯੁਗਂ ਵਤ੍ਤਤਿ, ਤਸ੍ਮਿਮ੍ਪਿ ਅਨ੍ਤਰਹਿਤੇ ਸੀਲਯੁਗਂ ਵਤ੍ਤਤਿ, ਤਸ੍ਮਿਮ੍ਪਿ ਅਨ੍ਤਰਹਿਤੇ ਸੁਤਯੁਗਂ ਵਤ੍ਤਤੇਵ. ਅਪਰਿਸੁਦ੍ਧਸੀਲੋ ਹਿ ਏਕਦੇਸੇਨ ਪਰਿਯਤ੍ਤਿਬਾਹੁਸਚ੍ਚਂ ਪਗ੍ਗਯ੍ਹ ਤਿਟ੍ਠਤਿ ਲਾਭਾਦਿਕਾਮਤਾਯ. ਯਦਾ ਪਨ ਮਾਤਿਕਾਪਰਿਯੋਸਾਨਾ ਪਰਿਯਤ੍ਤਿ ਸਬ੍ਬਸੋ ਅਨ੍ਤਰਧਾਯਤਿ, ਤਤੋ ਪਟ੍ਠਾਯ ਲਿਙ੍ਗਮਤ੍ਤਮੇਵ ਅਵਸਿਸ੍ਸਤਿ, ਤਦਾ ਯਥਾ ਤਥਾ ਧਨਂ ਸਂਹਰਿਤ੍ਵਾ ਦਾਨਮੁਖੇਨ ਵਿਸ੍ਸਜ੍ਜੇਨ੍ਤਿ, ਸਾ ਕਿਰ ਨੇਸਂ ਚਰਿਮਾ ਸਮ੍ਮਾਪਟਿਪਤ੍ਤਿ. ਤਤ੍ਥ ਸੁਤਯੁਗਤੋ ਪਟ੍ਠਾਯ ਪਚ੍ਛਿਮਕਾਲੋ, ‘‘ਸੀਲਯੁਗਤੋ ਪਟ੍ਠਾਯਾ’’ਤਿ ਅਪਰੇ.

ਏਵਂ ਥੇਰੋ ਪਚ੍ਛਿਮੇ ਕਾਲੇ ਉਪ੍ਪਜ੍ਜਨਕਂ ਮਹਾਭਯਂ ਦਸ੍ਸੇਤ੍ਵਾ ਪੁਨ ਤਤ੍ਥ ਸਨ੍ਨਿਪਤਿਤਭਿਕ੍ਖੂਨਂ ਓਵਾਦਂ ਦਦਨ੍ਤੋ ‘‘ਪੁਰਾ ਆਗਚ੍ਛਤੇ’’ਤਿਆਦਿਨਾ ਤਿਸ੍ਸੋ ਗਾਥਾ ਅਭਾਸਿ. ਤਤ੍ਥ ਪੁਰਾ ਆਗਚ੍ਛਤੇ ਏਤਨ੍ਤਿ ਏਤਂ ਮਯਾ ਤੁਮ੍ਹਾਕਂ ਵੁਤ੍ਤਂ ਪਟਿਪਤ੍ਤਿਅਨ੍ਤਰਾਯਕਰਂ ਅਨਾਗਤਂ ਮਹਾਭਯਂ ਆਗਚ੍ਛਤਿ ਪੁਰਾ, ਯਾਵ ਆਗਮਿਸ੍ਸਤਿ, ਤਾਵਦੇਵਾਤਿ ਅਤ੍ਥੋ. ਸੁਬ੍ਬਚਾਤਿ ਵਚਨਕ੍ਖਮਾ ਸੋਵਚਸ੍ਸਕਾਰਕੇਹਿ ਧਮ੍ਮੇਹਿ ਸਮਨ੍ਨਾਗਤਾ, ਗਰੂਨਂ ਅਨੁਸਾਸਨਿਯੋ ਪਦਕ੍ਖਿਣਗ੍ਗਾਹਿਨੋ ਹੋਥਾਤਿ ਅਤ੍ਥੋ. ਸਖਿਲਾਤਿ ਮੁਦੁਹਦਯਾ.

ਮੇਤ੍ਤਚਿਤ੍ਤਾਤਿ ਸਬ੍ਬਸਤ੍ਤੇਸੁ ਹਿਤੂਪਸਂਹਾਰਲਕ੍ਖਣਾਯ ਮੇਤ੍ਤਾਯ ਸਮ੍ਪਯੁਤ੍ਤਚਿਤ੍ਤਾ. ਕਾਰੁਣਿਕਾਤਿ ਕਰੁਣਾਯ ਨਿਯੁਤ੍ਤਾ ਪਰੇਸਂ ਦੁਕ੍ਖਾਪਨਯਨਾਕਾਰਵੁਤ੍ਤਿਯਾ ਕਰੁਣਾਯ ਸਮਨ੍ਨਾਗਤਾ. ਆਰਦ੍ਧਵੀਰਿਯਾਤਿ ਅਕੁਸਲਾਨਂ ਪਹਾਨਾਯ ਕੁਸਲਾਨਂ ਉਪਸਮ੍ਪਦਾਯ ਪਗ੍ਗਹਿਤਵੀਰਿਯਾ. ਪਹਿਤਤ੍ਤਾਤਿ ਨਿਬ੍ਬਾਨਂ ਪਟਿਪੇਸਿਤਚਿਤ੍ਤਾ. ਨਿਚ੍ਚਨ੍ਤਿ ਸਬ੍ਬਕਾਲਂ. ਦਲ਼੍ਹਪਰਕ੍ਕਮਾਤਿ ਥਿਰਵੀਰਿਯਾ.

ਪਮਾਦਨ੍ਤਿ ਪਮਜ੍ਜਨਂ, ਕੁਸਲਾਨਂ ਧਮ੍ਮਾਨਂ ਅਨਨੁਟ੍ਠਾਨਂ, ਅਕੁਸਲੇਸੁ ਚ ਧਮ੍ਮੇਸੁ ਚਿਤ੍ਤਵੋਸ੍ਸਗ੍ਗੋ. ਵੁਤ੍ਤਞ੍ਹਿ –

‘‘ਤਤ੍ਥ ਕਤਮੋ ਪਮਾਦੋ? ਕਾਯਦੁਚ੍ਚਰਿਤੇ ਵਾ ਵਚੀਦੁਚ੍ਚਰਿਤੇ ਵਾ ਮਨੋਦੁਚ੍ਚਰਿਤੇ ਵਾ ਪਞ੍ਚਸੁ ਵਾ ਕਾਮਗੁਣੇਸੁ ਚਿਤ੍ਤਸ੍ਸ ਵੋਸ੍ਸਗ੍ਗੋ ਵੋਸ੍ਸਗ੍ਗਾਨੁਪ੍ਪਦਾਨਂ, ਕੁਸਲਾਨਂ ਧਮ੍ਮਾਨਂ ਭਾਵਨਾਯ ਅਸਕ੍ਕਚ੍ਚਕਿਰਿਯਤਾ’’ਤਿਆਦਿ (ਵਿਭ. ੯੩੦).

ਅਪ੍ਪਮਾਦਨ੍ਤਿ ਅਪ੍ਪਮਜ੍ਜਨਂ, ਸੋ ਪਮਾਦਸ੍ਸ ਪਟਿਪਕ੍ਖਤੋ ਵੇਦਿਤਬ੍ਬੋ. ਅਤ੍ਥਤੋ ਹਿ ਅਪ੍ਪਮਾਦੋ ਨਾਮ ਸਤਿਯਾ ਅਵਿਪ੍ਪਵਾਸੋ, ਉਪਟ੍ਠਿਤਾਯ ਸਤਿਯਾ ਏਵ ਚੇਤਂ ਨਾਮਂ. ਅਯਞ੍ਹੇਤ੍ਥ ਅਤ੍ਥੋ – ਯਸ੍ਮਾ ਪਮਾਦਮੂਲਕਾ ਸਬ੍ਬੇ ਅਨਤ੍ਥਾ, ਅਪ੍ਪਮਾਦਮੂਲਕਾ ਚ ਸਬ੍ਬੇ ਅਤ੍ਥਾ, ਤਸ੍ਮਾ ਪਮਾਦਂ ਭਯਤੋ ਉਪਦ੍ਦਵਤੋ ਦਿਸ੍ਵਾ ਅਪ੍ਪਮਾਦਞ੍ਚ ਖੇਮਤੋ ਅਨੁਪਦ੍ਦਵਤੋ ਦਿਸ੍ਵਾ ਅਪ੍ਪਮਾਦਪਟਿਪਤ੍ਤਿਯਾ ਸਿਖਾਭੂਤਂ ਸੀਲਾਦਿਕ੍ਖਨ੍ਧਤ੍ਤਯਸਙ੍ਗਹਂ ਸਮ੍ਮਾਦਿਟ੍ਠਿਆਦੀਨਂ ਅਟ੍ਠਨ੍ਨਂ ਅਙ੍ਗਾਨਂ ਵਸੇਨ ਅਟ੍ਠਙ੍ਗਿਕਂ ਅਰਿਯਮਗ੍ਗਂ ਭਾਵੇਥ, ਅਮਤਂ ਨਿਬ੍ਬਾਨਂ ਫੁਸਨ੍ਤਾ ਸਚ੍ਛਿਕਰੋਨ੍ਤਾ ਅਤ੍ਤਨੋ ਸਨ੍ਤਾਨੇ ਉਪ੍ਪਾਦੇਥ, ਦਸ੍ਸਨਮਗ੍ਗਮਤ੍ਤੇ ਅਟ੍ਠਤ੍ਵਾ ਉਪਰਿ ਤਿਣ੍ਣਂ ਮਗ੍ਗਾਨਂ ਉਪ੍ਪਾਦਨਵਸੇਨ ਵਡ੍ਢੇਥ, ਏਵਂ ਵੋ ਅਪ੍ਪਮਾਦਭਾਵਨਾ ਸਿਖਾਪਤ੍ਤਾ ਭਵਿਸ੍ਸਤੀਤਿ.

ਏਵਂ ਥੇਰੋ ਸਮ੍ਪਤ੍ਤਪਰਿਸਂ ਓਵਦਤਿ. ਇਮਾ ਏਵ ਚਿਮਸ੍ਸ ਥੇਰਸ੍ਸ ਅਞ੍ਞਾਬ੍ਯਾਕਰਣਗਾਥਾ ਅਹੇਸੁਨ੍ਤਿ.

ਫੁਸ੍ਸਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.

੨. ਸਾਰਿਪੁਤ੍ਤਤ੍ਥੇਰਗਾਥਾਵਣ੍ਣਨਾ

ਯਥਾਚਾਰੀ ਯਥਾਸਤੋਤਿਆਦਿਕਾ ਆਯਸ੍ਮਤੋ ਸਾਰਿਪੁਤ੍ਤਤ੍ਥੇਰਸ੍ਸ ਗਾਥਾ. ਤਸ੍ਸ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਚ ਵਤ੍ਥੁ ਏਵਂ ਵੇਦਿਤਬ੍ਬਂ – ਅਤੀਤੇ ਇਤੋ ਸਤਸਹਸ੍ਸਕਪ੍ਪਾਧਿਕੇ ਅਸਙ੍ਖ੍ਯੇਯ੍ਯਮਤ੍ਥਕੇ ਆਯਸ੍ਮਾ ਸਾਰਿਪੁਤ੍ਤੋ ਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਿ, ਨਾਮੇਨ ਸਰਦਮਾਣਵੋ ਨਾਮ ਅਹੋਸਿ. ਮਹਾਮੋਗ੍ਗਲ੍ਲਾਨੋ ਗਹਪਤਿਮਹਾਸਾਲਕੁਲੇ ਨਿਬ੍ਬਤ੍ਤਿ, ਨਾਮੇਨ ਸਿਰਿਵਡ੍ਢਕੁਟੁਮ੍ਬਿਕੋ ਨਾਮ ਅਹੋਸਿ. ਤੇ ਉਭੋਪਿ ਸਹਪਂਸੁਕੀਲ਼ਕਸਹਾਯਾ ਅਹੇਸੁਂ. ਤੇਸੁ ਸਰਦਮਾਣਵੋ ਪਿਤੁ ਅਚ੍ਚਯੇਨ ਕੁਲਸਨ੍ਤਕਂ ਧਨਂ ਪਟਿਪਜ੍ਜਿਤ੍ਵਾ ਏਕਦਿਵਸਂ ਰਹੋਗਤੋ ਚਿਨ੍ਤੇਸਿ – ‘‘ਇਮੇਸਂ ਸਤ੍ਤਾਨਂ ਮਰਣਂ ਨਾਮ ਏਕਨ੍ਤਿਕਂ, ਤਸ੍ਮਾ ਮਯਾ ਏਕਂ ਪਬ੍ਬਜ੍ਜਂ ਉਪਗਨ੍ਤ੍ਵਾ ਮੋਕ੍ਖਮਗ੍ਗੋ ਗਵੇਸਿਤਬ੍ਬੋ’’ਤਿ ਸਹਾਯਂ ਉਪਸਙ੍ਕਮਿਤ੍ਵਾ, ਸਮ੍ਮ, ਅਹਂ ਪਬ੍ਬਜਿਤੁਕਾਮੋ, ਕਿਂ ਤ੍ਵਂ ਪਬ੍ਬਜਿਤੁਂ ਸਕ੍ਖਿਸ੍ਸਸੀ’’ਤਿ ਵਤ੍ਵਾ ਤੇਨ ‘‘ਨ ਸਕ੍ਖਿਸ੍ਸਾਮੀ’’ਤਿ ਵੁਤ੍ਤੇ ‘‘ਹੋਤੁ ਅਹਮੇਵ ਪਬ੍ਬਜਿਸ੍ਸਾਮੀ’’ਤਿ ਰਤਨਕੋਟ੍ਠਾਗਾਰਾਨਿ ਵਿਵਰਾਪੇਤ੍ਵਾ ਕਪਣਦ੍ਧਿਕਾਦੀਨਂ ਮਹਾਦਾਨਂ ਦਤ੍ਵਾ ਪਬ੍ਬਤਪਾਦਂ ਗਨ੍ਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿ. ਤਸ੍ਸ ਪਬ੍ਬਜ੍ਜਂ ਅਨੁਪਬ੍ਬਜਿਤਾ ਚਤੁਸਤ੍ਤਤਿਸਹਸ੍ਸਮਤ੍ਤਾ ਬ੍ਰਾਹ੍ਮਣਪੁਤ੍ਤਾ ਅਹੇਸੁਂ. ਸੋ ਪਞ੍ਚ ਅਭਿਞ੍ਞਾਯੋ ਅਟ੍ਠ ਚ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਤੇਸਮ੍ਪਿ ਜਟਿਲਾਨਂ ਕਸਿਣਪਰਿਕਮ੍ਮਂ ਆਚਿਕ੍ਖਿ. ਤੇਪਿ ਸਬ੍ਬੇ ਪਞ੍ਚਾਭਿਞ੍ਞਾ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਸੁਂ.

ਤੇਨ ਸਮਯੇਨ ਅਨੋਮਦਸ੍ਸੀ ਨਾਮ ਸਮ੍ਮਾਸਮ੍ਬੁਦ੍ਧੋ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਸਤ੍ਤੇ ਸਂਸਾਰਮਹੋਘਤੋ ਤਾਰੇਤ੍ਵਾ ਏਕਦਿਵਸਂ ‘‘ਸਰਦਤਾਪਸਸ੍ਸ ਚ ਅਨ੍ਤੇਵਾਸਿਕਾਨਞ੍ਚ ਸਙ੍ਗਹਂ ਕਰਿਸ੍ਸਾਮੀ’’ਤਿ ਏਕੋ ਅਦੁਤਿਯੋ ਪਤ੍ਤਚੀਵਰਮਾਦਾਯ ਆਕਾਸੇਨ ਗਨ੍ਤ੍ਵਾ ‘‘ਬੁਦ੍ਧਭਾਵਂ ਮੇ ਜਾਨਾਤੂ’’ਤਿ ਤਾਪਸਸ੍ਸ ਪਸ੍ਸਨ੍ਤਸ੍ਸੇਵ ਆਕਾਸਤੋ ਓਤਰਿਤ੍ਵਾ ਪਥਵਿਯਂ ਪਤਿਟ੍ਠਾਸਿ. ਸਰਦਤਾਪਸੋ ਸਤ੍ਥੁ ਸਰੀਰੇ ਮਹਾਪੁਰਿਸਲਕ੍ਖਣਾਨਿ ਉਪਧਾਰੇਤ੍ਵਾ ‘‘ਸਬ੍ਬਞ੍ਞੁਬੁਦ੍ਧੋਯੇਵਾਯ’’ਨ੍ਤਿ ਨਿਟ੍ਠਂ ਗਨ੍ਤ੍ਵਾ ਪਚ੍ਚੁਗ੍ਗਮਨਂ ਕਤ੍ਵਾ ਆਸਨਂ ਪਞ੍ਞਾਪੇਤ੍ਵਾ ਅਦਾਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ. ਸਰਦਤਾਪਸੋ ਸਤ੍ਥੁ ਸਨ੍ਤਿਕੇ ਏਕਮਨ੍ਤਂ ਨਿਸੀਦਿ.

ਤਸ੍ਮਿਂ ਸਮਯੇ ਤਸ੍ਸ ਅਨ੍ਤੇਵਾਸਿਕਾ ਚਤੁਸਤ੍ਤਤਿਸਹਸ੍ਸਮਤ੍ਤਾ ਜਟਿਲਾ ਪਣੀਤਪਣੀਤਾਨਿ ਓਜਵਨ੍ਤਾਨਿ ਫਲਾਫਲਾਨਿ ਗਹੇਤ੍ਵਾ ਆਗਤਾ ਸਤ੍ਥਾਰਂ ਦਿਸ੍ਵਾ ਸਞ੍ਜਾਤਪ੍ਪਸਾਦਾ ਅਤ੍ਤਨੋ ਆਚਰਿਯਸ੍ਸ ਚ ਸਤ੍ਥੁ ਚ ਨਿਸਿਨ੍ਨਾਕਾਰਂ ਓਲੋਕੇਤ੍ਵਾ, ‘‘ਆਚਰਿਯ, ਮਯਂ ਪੁਬ੍ਬੇ ‘ਤੁਮ੍ਹੇਹਿ ਮਹਨ੍ਤਤਰੋ ਕੋਚਿ ਨਤ੍ਥੀ’ਤਿ ਵਿਚਰਾਮ, ਅਯਂ ਪਨ ਪੁਰਿਸੋ ਤੁਮ੍ਹੇਹਿ ਮਹਨ੍ਤਤਰੋ ਮਞ੍ਞੇ’’ਤਿ ਆਹਂਸੁ. ‘‘ਕਿਂ ਵਦੇਥ, ਤਾਤਾ? ਸਾਸਪੇਨ ਸਦ੍ਧਿਂ ਅਟ੍ਠਸਟ੍ਠਿਯੋਜਨਸਤਸਹਸ੍ਸੁਬ੍ਬੇਧਂ ਸਿਨੇਰੁਂ ਸਮਂ ਕਾਤੁਂ ਇਚ੍ਛਥ? ਸਬ੍ਬਞ੍ਞੁਬੁਦ੍ਧੇਨ ਮਂ ਤੁਲ੍ਯਂ ਮਾ ਕਰਿਤ੍ਥਾ’’ਤਿ. ਅਥ ਤੇ ਤਾਪਸਾ ਆਚਰਿਯਸ੍ਸ ਵਚਨਂ ਸੁਤ੍ਵਾ ‘‘ਯਾਵ ਮਹਾ ਵਤਾਯਂ ਪੁਰਿਸੁਤ੍ਤਮੋ’’ਤਿ ਸਬ੍ਬੇਵ ਪਾਦੇਸੁ ਨਿਪਤਿਤ੍ਵਾ ਸਤ੍ਥਾਰਂ ਵਨ੍ਦਿਂਸੁ.

ਅਥ ਤੇ ਆਚਰਿਯੋ ਆਹ – ‘‘ਤਾਤਾ, ਸਤ੍ਥੁ ਅਨੁਚ੍ਛਵਿਕੋ ਨੋ ਦੇਯ੍ਯਧਮ੍ਮੋ ਨਤ੍ਥਿ, ਸਤ੍ਥਾ ਚ ਭਿਕ੍ਖਾਚਾਰਵੇਲਾਯ ਇਧਾਗਤੋ, ਹਨ੍ਦ ਮਯਂ ਦੇਯ੍ਯਧਮ੍ਮਂ ਯਥਾਬਲਂ ਦਸ੍ਸਾਮ. ਤੁਮ੍ਹੇਹਿ ਯਂ ਯਂ ਪਣੀਤਂ ਫਲਾਫਲਂ ਆਭਤਂ, ਤਂ ਤਂ ਆਹਰਥਾ’’ਤਿ ਆਹਰਾਪੇਤ੍ਵਾ ਹਤ੍ਥੇ ਧੋਵਿਤ੍ਵਾ ਸਯਂ ਤਥਾਗਤਸ੍ਸ ਪਤ੍ਤੇ ਪਤਿਟ੍ਠਾਪੇਸਿ. ਸਤ੍ਥਾਰਾ ਚ ਫਲਾਫਲੇ ਪਟਿਗ੍ਗਣ੍ਹਿਤਮਤ੍ਤੇ ਦੇਵਤਾ ਦਿਬ੍ਬੋਜਂ ਪਕ੍ਖਿਪਿਂਸੁ. ਤਾਪਸੋ ਉਦਕਮ੍ਪਿ ਸਯਮੇਵ ਪਰਿਸ੍ਸਾਵੇਤ੍ਵਾ ਅਦਾਸਿ. ਤਤੋ ਭੋਜਨਕਿਚ੍ਚਂ ਨਿਟ੍ਠਾਪੇਤ੍ਵਾ ਸਤ੍ਥਰਿ ਨਿਸਿਨ੍ਨੇ ਸਬ੍ਬੇ ਅਨ੍ਤੇਵਾਸਿਕੇ ਪਕ੍ਕੋਸਿਤ੍ਵਾ ਸਤ੍ਥੁ ਸਨ੍ਤਿਕੇ ਸਾਰਣੀਯਂ ਕਥਂ ਕਥੇਨ੍ਤੋ ਨਿਸੀਦਿ. ਸਤ੍ਥਾ ‘‘ਦ੍ਵੇ ਅਗ੍ਗਸਾਵਕਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਆਗਚ੍ਛਨ੍ਤੂ’’ਤਿ ਚਿਨ੍ਤੇਸਿ. ਤੇ ਸਤ੍ਥੁ ਚਿਤ੍ਤਂ ਞਤ੍ਵਾ ਤਾਵਦੇਵ ਸਤਸਹਸ੍ਸਖੀਣਾਸਵਪਰਿਵਾਰਾ ਅਗ੍ਗਸਾਵਕਾ ਆਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਂਸੁ.

ਤਤੋ ਸਰਦਤਾਪਸੋ ਅਨ੍ਤੇਵਾਸਿਕੇ ਆਮਨ੍ਤੇਸਿ – ‘‘ਤਾਤਾ, ਸਤ੍ਥੁ ਭਿਕ੍ਖੁਸਙ੍ਘਸ੍ਸ ਚ ਪੁਪ੍ਫਾਸਨੇਨ ਪੂਜਾ ਕਾਤਬ੍ਬਾ, ਤਸ੍ਮਾ ਪੁਪ੍ਫਾਨਿ ਆਹਰਥਾ’’ਤਿ. ਤੇ ਤਾਵਦੇਵ ਇਦ੍ਧਿਯਾ ਵਣ੍ਣਗਨ੍ਧਸਮ੍ਪਨ੍ਨਾਨਿ ਪੁਪ੍ਫਾਨਿ ਆਹਰਿਤ੍ਵਾ ਬੁਦ੍ਧਸ੍ਸ ਯੋਜਨਪ੍ਪਮਾਣਂ ਪੁਪ੍ਫਾਸਨਂ ਪਞ੍ਞਾਪੇਸੁਂ, ਉਭਿਨ੍ਨਂ ਅਗ੍ਗਸਾਵਕਾਨਂ ਤਿਗਾਵੁਤਂ, ਸੇਸਭਿਕ੍ਖੂਨਂ ਅਡ੍ਢਯੋਜਨਿਕਾਦਿਭੇਦਂ, ਸਙ੍ਘਨਵਕਸ੍ਸ ਉਸਭਮਤ੍ਤਂ ਪਞ੍ਞਾਪੇਸੁਂ. ਏਵਂ ਤੇਸਂ ਪਞ੍ਞਤ੍ਤੇਸੁ ਆਸਨੇਸੁ ਸਰਦਤਾਪਸੋ ਤਥਾਗਤਸ੍ਸ ਪੁਰਤੋ ਅਞ੍ਜਲਿਂ ਪਗ੍ਗਯ੍ਹ ਠਿਤੋ – ‘‘ਭਨ੍ਤੇ, ਮਯ੍ਹਂ ਅਨੁਗ੍ਗਹਤ੍ਥਾਯ ਇਮਂ ਪੁਪ੍ਫਾਸਨਂ ਅਭਿਰੁਹਥਾ’’ਤਿ ਆਹ. ਨਿਸੀਦਿ ਭਗਵਾ ਪੁਪ੍ਫਾਸਨੇ. ਸਤ੍ਥਰਿ ਨਿਸਿਨ੍ਨੇ ਦ੍ਵੇ ਅਗ੍ਗਸਾਵਕਾ ਸੇਸਭਿਕ੍ਖੂ ਚ ਅਤ੍ਤਨੋ ਅਤ੍ਤਨੋ ਪਤ੍ਤਾਸਨੇ ਨਿਸੀਦਿਂਸੁ. ਸਤ੍ਥਾ ‘‘ਤੇਸਂ ਮਹਪ੍ਫਲਂ ਹੋਤੂ’’ਤਿ ਨਿਰੋਧਂ ਸਮਾਪਜ੍ਜਿ. ਸਤ੍ਥੁ ਸਮਾਪਨ੍ਨਭਾਵਂ ਞਤ੍ਵਾ ਦ੍ਵੇ ਅਗ੍ਗਸਾਵਕਾਪਿ ਸੇਸਭਿਕ੍ਖੂਪਿ ਨਿਰੋਧਂ ਸਮਾਪਜ੍ਜਿਂਸੁ. ਤਾਪਸੋ ਸਤ੍ਤਾਹਂ ਨਿਰਨ੍ਤਰਂ ਪੁਪ੍ਫਚ੍ਛਤ੍ਤਂ ਧਾਰੇਨ੍ਤੋ ਅਟ੍ਠਾਸਿ. ਇਤਰੇ ਪਨ ਵਨਮੂਲਫਲਾਫਲਂ ਪਰਿਭੁਞ੍ਜਿਤ੍ਵਾ ਸੇਸਕਾਲੇ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਂਸੁ.

ਸਤ੍ਥਾ ਸਤ੍ਤਾਹਸ੍ਸ ਅਚ੍ਚਯੇਨ ਨਿਰੋਧਤੋ ਵੁਟ੍ਠਾਯ ਅਗ੍ਗਸਾਵਕਂ ਨਿਸਭਤ੍ਥੇਰਂ ਆਮਨ੍ਤੇਸਿ – ‘‘ਤਾਪਸਾਨਂ ਪੁਪ੍ਫਾਸਨਾਨੁਮੋਦਨਂ ਕਰੋਹੀ’’ਤਿ. ਥੇਰੋ ਸਾਵਕਪਾਰਮੀਞਾਣੇ ਠਤ੍ਵਾ ਤੇਸਂ ਪੁਪ੍ਫਾਸਨਾਨੁਮੋਦਨਂ ਅਕਾਸਿ. ਤਸ੍ਸ ਦੇਸਨਾਵਸਾਨੇ ਸਤ੍ਥਾ ਦੁਤਿਯਂ ਅਗ੍ਗਸਾਵਕਂ ਅਨੋਮਤ੍ਥੇਰਂ ਆਮਨ੍ਤੇਸਿ – ‘‘ਤ੍ਵਮ੍ਪਿ ਇਮੇਸਂ ਧਮ੍ਮਂ ਦੇਸੇਹੀ’’ਤਿ. ਸੋਪਿ ਤੇਪਿਟਕਂ ਬੁਦ੍ਧਵਚਨਂ ਸਮ੍ਮਸਿਤ੍ਵਾ ਤੇਸਂ ਧਮ੍ਮਂ ਕਥੇਸਿ. ਦ੍ਵਿਨ੍ਨਮ੍ਪਿ ਦੇਸਨਾਯ ਏਕਸ੍ਸਪਿ ਧਮ੍ਮਾਭਿਸਮਯੋ ਨਾਹੋਸਿ. ਅਥ ਸਤ੍ਥਾ ਬੁਦ੍ਧਵਿਸਯੇ ਠਤ੍ਵਾ ਧਮ੍ਮਦੇਸਨਂ ਆਰਭਿ. ਦੇਸਨਾਵਸਾਨੇ ਠਪੇਤ੍ਵਾ ਸਰਦਤਾਪਸਂ ਅਵਸੇਸਾ ਸਬ੍ਬੇਪਿ ਚਤੁਸਤ੍ਤਤਿਸਹਸ੍ਸਮਤ੍ਤਾ ਜਟਿਲਾ ਅਰਹਤ੍ਤਂ ਪਾਪੁਣਿਂਸੁ. ਸਤ੍ਥਾ ‘‘ਏਥ, ਭਿਕ੍ਖਵੋ’’ਤਿ ਹਤ੍ਥਂ ਪਸਾਰੇਸਿ. ਤੇ ਤਾਵਦੇਵ ਅਨ੍ਤਰਹਿਤਤਾਪਸਵੇਸਾ ਅਟ੍ਠਪਰਿਕ੍ਖਾਰਵਰਧਰਾ ਸਟ੍ਠਿਵਸ੍ਸਿਕਤ੍ਥੇਰਾ ਵਿਯ ਅਹੇਸੁਂ.

ਸਰਦਤਾਪਸੋ ਪਨ ‘‘ਅਹੋ ਵਤਾਹਮ੍ਪਿ ਅਯਂ ਨਿਸਭਤ੍ਥੇਰੋ ਵਿਯ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਅਗ੍ਗਸਾਵਕੋ ਭਵੇਯ੍ਯ’’ਨ੍ਤਿ ਸਤ੍ਥੁ ਦੇਸਨਾਕਾਲੇ ਉਪ੍ਪਨ੍ਨਪਰਿਵਿਤਕ੍ਕਤਾਯ ਅਞ੍ਞਵਿਹਿਤੋ ਹੁਤ੍ਵਾ ਮਗ੍ਗਫਲਾਨਿ ਪਟਿਵਿਜ੍ਝਿਤੁਂ ਨਾਸਕ੍ਖਿ. ਅਥ ਤਥਾਗਤਂ ਵਨ੍ਦਿਤ੍ਵਾ ਤਥਾ ਪਣਿਧਾਨਂ ਅਕਾਸਿ. ਸਤ੍ਥਾਪਿਸ੍ਸ ਅਨਨ੍ਤਰਾਯੇਨ ਸਮਿਜ੍ਝਨਭਾਵਂ ਦਿਸ੍ਵਾ – ‘‘ਇਤੋ ਤ੍ਵਂ ਕਪ੍ਪਸਤਸਹਸ੍ਸਾਧਿਕਂ ਏਕਂ ਅਸਙ੍ਖ੍ਯੇਯ੍ਯਂ ਅਤਿਕ੍ਕਮਿਤ੍ਵਾ ਗੋਤਮਸ੍ਸ ਨਾਮ ਸਮ੍ਮਾਸਮ੍ਬੁਦ੍ਧਸ੍ਸ ਅਗ੍ਗਸਾਵਕੋ ਸਾਰਿਪੁਤ੍ਤੋ ਨਾਮ ਭਵਿਸ੍ਸਸੀ’’ਤਿ ਬ੍ਯਾਕਰਿਤ੍ਵਾ ਧਮ੍ਮਕਥਂ ਵਤ੍ਵਾ ਭਿਕ੍ਖੁਸਙ੍ਘਪਰਿਵੁਤੋ ਆਕਾਸਂ ਪਕ੍ਖਨ੍ਦਿ.

ਸਰਦਤਾਪਸੋਪਿ ਸਹਾਯਕਸ੍ਸ ਸਿਰਿਵਡ੍ਢਸ੍ਸ ਸਨ੍ਤਿਕਂ ਗਨ੍ਤ੍ਵਾ, ਸਮ੍ਮ, ਮਯਾ ਅਨੋਮਦਸ੍ਸਿਸ੍ਸ ਭਗਵਤੋ ਪਾਦਮੂਲੇ ਅਨਾਗਤੇ ਉਪ੍ਪਜ੍ਜਨਕਸ੍ਸ ਗੋਤਮਸ੍ਸ ਨਾਮ ਸਮ੍ਮਾਸਮ੍ਬੁਦ੍ਧਸ੍ਸ ਅਗ੍ਗਸਾਵਕਟ੍ਠਾਨਂ ਪਤ੍ਥਿਤਂ, ਤ੍ਵਮ੍ਪਿ ਤਸ੍ਸ ਦੁਤਿਯਸਾਵਕਟ੍ਠਾਨਂ ਪਤ੍ਥੇਹੀਤਿ.

ਸਿਰਿਵਡ੍ਢੋ ਤਂ ਉਪਦੇਸਂ ਸੁਤ੍ਵਾ ਅਤ੍ਤਨੋ ਨਿਵੇਸਨਦ੍ਵਾਰੇ ਅਟ੍ਠਕਰੀਸਮਤ੍ਤਂ ਠਾਨਂ ਸਮਤਲਂ ਕਾਰੇਤ੍ਵਾ ਲਾਜਪਞ੍ਚਮਾਨਿ ਪੁਪ੍ਫਾਨਿ ਵਿਕਿਰਿਤ੍ਵਾ ਨੀਲੁਪ੍ਪਲਚ੍ਛਦਨਂ ਮਣ੍ਡਪਂ ਕਾਰੇਤ੍ਵਾ ਬੁਦ੍ਧਾਸਨਂ ਪਞ੍ਞਾਪੇਤ੍ਵਾ ਭਿਕ੍ਖੂਨਮ੍ਪਿ ਆਸਨਾਨਿ ਪਞ੍ਞਾਪੇਤ੍ਵਾ ਮਹਨ੍ਤਂ ਸਕ੍ਕਾਰਸਮ੍ਮਾਨਂ ਸਜ੍ਜੇਤ੍ਵਾ, ਸਰਦਤਾਪਸੇਨ ਸਤ੍ਥਾਰਂ ਨਿਮਨ੍ਤਾਪੇਤ੍ਵਾ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ, ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਮਹਾਰਹੇਹਿ ਵਤ੍ਥੇਹਿ ਅਚ੍ਛਾਦੇਤ੍ਵਾ, ਦੁਤਿਯਸਾਵਕਭਾਵਾਯ ਪਣਿਧਾਨਂ ਅਕਾਸਿ. ਸਤ੍ਥਾਪਿਸ੍ਸ ਅਨਨ੍ਤਰਾਯੇਨ ਸਮਿਜ੍ਝਨਭਾਵਂ ਦਿਸ੍ਵਾ ਵੁਤ੍ਤਨਯੇਨ ਬ੍ਯਾਕਰਿਤ੍ਵਾ ਭਤ੍ਤਾਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸਿਰਿਵਡ੍ਢੋ ਹਟ੍ਠਪਹਟ੍ਠੋ ਯਾਵਜੀਵਂ ਕੁਸਲਕਮ੍ਮਂ ਕਤ੍ਵਾ ਦੁਤਿਯਚਿਤ੍ਤਵਾਰੇ ਕਾਮਾਵਚਰਦੇਵਲੋਕੇ ਨਿਬ੍ਬਤ੍ਤਿ. ਸਰਦਤਾਪਸੋ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਭਾਵੇਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ.

ਤਤੋ ਪਟ੍ਠਾਯ ਨੇਸਂ ਉਭਿਨ੍ਨਮ੍ਪਿ ਅਨ੍ਤਰਾਕਮ੍ਮਂ ਨ ਕਥਿਤਂ. ਅਮ੍ਹਾਕਂ ਪਨ ਭਗਵਤੋ ਉਪ੍ਪਤ੍ਤਿਤੋ ਪੁਰੇਤਰਮੇਵ ਸਰਦਤਾਪਸੋ ਰਾਜਗਹਸ੍ਸ ਅਵਿਦੂਰੇ ਉਪਤਿਸ੍ਸਗਾਮੇ ਰੂਪਸਾਰਿਯਾ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਤਂਦਿਵਸਮੇਵਸ੍ਸ ਸਹਾਯੋਪਿ ਰਾਜਗਹਸ੍ਸੇਵ ਅਵਿਦੂਰੇ ਕੋਲਿਤਗਾਮੇ ਮੋਗ੍ਗਲਿਯਾ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਤਾਨਿ ਕਿਰ ਦ੍ਵੇਪਿ ਕੁਲਾਨਿ ਯਾਵ ਸਤ੍ਤਮਾ ਕੁਲਪਰਿਵਟ੍ਟਾ ਆਬਦ੍ਧਪਟਿਬਦ੍ਧਸਹਾਯਕਾਨੇਵ. ਤੇਸਂ ਦ੍ਵਿਨ੍ਨਂ ਏਕਦਿਵਸਮੇਵ ਗਬ੍ਭਪਰਿਹਾਰਮਦਂਸੁ. ਦਸਮਾਸਚ੍ਚਯੇਨ ਜਾਤਾਨਮ੍ਪਿ ਤੇਸਂ ਛਸਟ੍ਠਿ ਧਾਤਿਯੋ ਉਪਟ੍ਠਾਪੇਸੁਂ, ਨਾਮਗ੍ਗਹਣਦਿਵਸੇ ਰੂਪਸਾਰਿਬ੍ਰਾਹ੍ਮਣਿਯਾ ਪੁਤ੍ਤਸ੍ਸ ਉਪਤਿਸ੍ਸਗਾਮੇ ਜੇਟ੍ਠਕੁਲਸ੍ਸ ਪੁਤ੍ਤਤ੍ਤਾ ਉਪਤਿਸ੍ਸੋਤਿ ਨਾਮਂ ਅਕਂਸੁ. ਇਤਰਸ੍ਸ ਕੋਲਿਤਗਾਮੇ ਜੇਟ੍ਠਕੁਲਸ੍ਸ ਪੁਤ੍ਤਤ੍ਤਾ ਕੋਲਿਤੋਤਿ ਨਾਮਂ ਅਕਂਸੁ. ਤੇ ਉਭੋਪਿ ਮਹਤਾ ਪਰਿਵਾਰੇਨ ਵਡ੍ਢਨ੍ਤਾ ਵੁਦ੍ਧਿਮਨ੍ਵਾਯ ਸਬ੍ਬਸਿਪ੍ਪਾਨਂ ਪਾਰਂ ਅਗਮਂਸੁ.

ਅਥੇਕਦਿਵਸਂ ਤੇ ਰਾਜਗਹੇ ਗਿਰਗ੍ਗਸਮਜ੍ਜਂ ਪਸ੍ਸਨ੍ਤਾ ਮਹਾਜਨਂ ਸਨ੍ਨਿਪਤਿਤਂ ਦਿਸ੍ਵਾ ਞਾਣਸ੍ਸ ਪਰਿਪਾਕਗਤਤ੍ਤਾ ਯੋਨਿਸੋ ਉਮ੍ਮੁਜ੍ਜਨ੍ਤਾ ‘‘ਸਬ੍ਬੇਪਿਮੇ ਓਰਂ ਵਸ੍ਸਸਤਾਨਂ ਮਚ੍ਚੁਮੁਖੇ ਪਤਿਸ੍ਸਨ੍ਤੀ’’ਤਿ ਸਂਵੇਗਂ ਪਟਿਲਭਿਤ੍ਵਾ ‘‘ਅਮ੍ਹੇਹਿ ਮੋਕ੍ਖਧਮ੍ਮੋ ਪਰਿਯੇਸਿਤਬ੍ਬੋ, ਤਞ੍ਚ ਪਰਿਯੇਸਨ੍ਤੇਹਿ ਏਕਂ ਪਬ੍ਬਜ੍ਜਂ ਲਦ੍ਧੁਂ ਵਟ੍ਟਤੀ’’ਤਿ ਨਿਚ੍ਛਯਂ ਕਤ੍ਵਾ ਪਞ੍ਚਹਿ ਮਾਣਵਕਸਤੇਹਿ ਸਦ੍ਧਿਂ ਸਞ੍ਚਯਸ੍ਸ ਪਰਿਬ੍ਬਾਜਕਸ੍ਸ ਸਨ੍ਤਿਕੇ ਪਬ੍ਬਜਿਂਸੁ. ਤੇਸਂ ਪਬ੍ਬਜਿਤਕਾਲਤੋ ਪਟ੍ਠਾਯ ਸਞ੍ਚਯੋ ਲਾਭਗ੍ਗਯਸਗ੍ਗਪ੍ਪਤ੍ਤੋ ਅਹੋਸਿ. ਤੇ ਕਤਿਪਾਹੇਨੇਵ ਸਬ੍ਬਂ ਸਞ੍ਚਯਸ੍ਸ ਸਮਯਂ ਪਰਿਗ੍ਗਣ੍ਹਿਤ੍ਵਾ ਤਤ੍ਥ ਸਾਰਂ ਅਦਿਸ੍ਵਾ ਤਤੋ ਨਿਕ੍ਖਮਿਤ੍ਵਾ ਤਤ੍ਥ ਤਤ੍ਥ ਤੇ ਤੇ ਪਣ੍ਡਿਤਸਮ੍ਮਤੇ ਸਮਣਬ੍ਰਾਹ੍ਮਣੇ ਪਞ੍ਹਂ ਪੁਚ੍ਛਨ੍ਤਿ, ਤੇ ਤੇਹਿ ਪੁਟ੍ਠਾ ਨੇਵ ਸਮ੍ਪਾਯਨ੍ਤਿ, ਅਞ੍ਞਦਤ੍ਥੁ ਤੇਯੇਵ ਤੇਸਂ ਪਞ੍ਹਂ ਵਿਸ੍ਸਜ੍ਜੇਨ੍ਤਿ. ਏਵਂ ਤੇ ਮੋਕ੍ਖਂ ਪਰਿਯੇਸਨ੍ਤਾ ਕਤਿਕਂ ਅਕਂਸੁ – ‘‘ਅਮ੍ਹੇਸੁ ਯੋ ਪਠਮਂ ਅਮਤਂ ਅਧਿਗਚ੍ਛਤਿ, ਸੋ ਇਤਰਸ੍ਸ ਆਰੋਚੇਤੂ’’ਤਿ.

ਤੇਨ ਚ ਸਮਯੇਨ ਅਮ੍ਹਾਕਂ ਸਤ੍ਥਰਿ ਪਠਮਾਭਿਸਮ੍ਬੋਧਿਂ ਪਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਅਨੁਪੁਬ੍ਬੇਨ ਉਰੁਵੇਲਕਸ੍ਸਪਾਦਿਕੇ ਸਹਸ੍ਸਜਟਿਲੇ ਦਮੇਤ੍ਵਾ ਰਾਜਗਹੇ ਵਿਹਰਨ੍ਤੇ ਏਕਦਿਵਸਂ ਉਪਤਿਸ੍ਸੋ ਪਰਿਬ੍ਬਾਜਕੋ ਪਰਿਬ੍ਬਾਜਕਾਰਾਮਂ ਗਚ੍ਛਨ੍ਤੋ ਆਯਸ੍ਮਨ੍ਤਂ ਅਸ੍ਸਜਿਤ੍ਥੇਰਂ ਰਾਜਗਹੇ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ‘‘ਨ ਮਯਾ ਏਵਰੂਪੋ ਆਕਪ੍ਪਸਮ੍ਪਨ੍ਨੋ ਪਬ੍ਬਜਿਤੋ ਦਿਟ੍ਠਪੁਬ੍ਬੋ, ਸਨ੍ਤਧਮ੍ਮੇਨ ਨਾਮ ਏਤ੍ਥ ਭਵਿਤਬ੍ਬ’’ਨ੍ਤਿ ਸਞ੍ਜਾਤਪ੍ਪਸਾਦੋ ਪਞ੍ਹਂ ਪੁਚ੍ਛਿਤੁਂ ਆਯਸ੍ਮਨ੍ਤਂ ਉਦਿਕ੍ਖਨ੍ਤੋ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਿ. ਥੇਰੋਪਿ ਲਦ੍ਧਪਿਣ੍ਡਪਾਤੋ ਪਰਿਭੁਞ੍ਜਿਤੁਂ ਪਤਿਰੂਪਂ ਓਕਾਸਂ ਗਤੋ. ਪਰਿਬ੍ਬਾਜਕੋ ਅਤ੍ਤਨੋ ਪਰਿਬ੍ਬਾਜਕਪੀਠਂ ਪਞ੍ਞਾਪੇਤ੍ਵਾ ਅਦਾਸਿ. ਭਤ੍ਤਕਿਚ੍ਚਪਰਿਯੋਸਾਨੇ ਚਸ੍ਸ ਅਤ੍ਤਨੋ ਕੁਣ੍ਡਿਕਾਯ ਉਦਕਂ ਅਦਾਸਿ.

ਏਵਂ ਸੋ ਆਚਰਿਯਵਤ੍ਤਂ ਕਤ੍ਵਾ ਕਤਭਤ੍ਤਕਿਚ੍ਚੇਨ ਥੇਰੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ‘‘ਕੋ ਵਾ ਤੇ ਸਤ੍ਥਾ, ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀ’’ਤਿ ਪੁਚ੍ਛਿ. ਥੇਰੋ ਸਮ੍ਮਾਸਮ੍ਬੁਦ੍ਧਂ ਅਪਦਿਸਿ. ਪੁਨ ਤੇਨ ‘‘ਕਿਂਵਾਦੀ ਪਨਾਯਸ੍ਮਤੋ ਸਤ੍ਥਾ’’ਤਿ ਪੁਟ੍ਠੋ ‘‘ਇਮਸ੍ਸ ਸਾਸਨਸ੍ਸ ਗਮ੍ਭੀਰਤਂ ਦਸ੍ਸੇਸ੍ਸਾਮੀ’’ਤਿ ਅਤ੍ਤਨੋ ਨਵਕਭਾਵਂ ਪਵੇਦੇਤ੍ਵਾ ਸਙ੍ਖੇਪਵਸੇਨ ਚਸ੍ਸ ਸਾਸਨਧਮ੍ਮਂ ਕਥੇਨ੍ਤੋ ‘‘ਯੇ ਧਮ੍ਮਾ ਹੇਤੁਪ੍ਪਭਵਾ’’ਤਿ (ਮਹਾਵ. ੬੦; ਅਪ. ਥੇਰ ੧.੧.੨੮੬; ਪੇਟਕੋ. ੯) ਗਾਥਮਾਹ. ਪਰਿਬ੍ਬਾਜਕੋ ਪਠਮਪਦਦ੍ਵਯਮੇਵ ਸੁਤ੍ਵਾ ਸਹਸ੍ਸਨਯਸਮ੍ਪਨ੍ਨੇ ਸੋਤਾਪਤ੍ਤਿਫਲੇ ਪਤਿਟ੍ਠਾਸਿ, ਇਤਰਂ ਪਦਦ੍ਵਯਂ ਸੋਤਾਪਨ੍ਨਕਾਲੇ ਨਿਟ੍ਠਾਸਿ. ਗਾਥਾਪਰਿਯੋਸਾਨੇ ਪਨ ਸੋਤਾਪਨ੍ਨੋ ਹੁਤ੍ਵਾ ਉਪਰਿ ਵਿਸੇਸੇ ਅਪ੍ਪਵਤ੍ਤੇਨ੍ਤੇ ‘‘ਭਵਿਸ੍ਸਤਿ ਏਤ੍ਥ ਕਾਰਣ’’ਨ੍ਤਿ ਸਲ੍ਲਕ੍ਖੇਤ੍ਵਾ ਥੇਰਂ ਆਹ – ‘‘ਮਾ, ਭਨ੍ਤੇ, ਉਪਰਿ ਧਮ੍ਮਦੇਸਨਂ ਵਡ੍ਢਯਿਤ੍ਥ, ਏਤ੍ਤਕਮੇਵ ਹੋਤੁ, ਕਹਂ ਅਮ੍ਹਾਕਂ ਸਤ੍ਥਾ ਵਸਤੀ’’ਤਿ? ‘‘ਵੇਲ਼ੁਵਨੇ’’ਤਿ. ‘‘ਭਨ੍ਤੇ, ਤੁਮ੍ਹੇ ਪੁਰਤੋ ਗਚ੍ਛਥ, ਅਹਂ ਮਯ੍ਹਂ ਸਹਾਯਕਸ੍ਸ ਕਤਪਟਿਞ੍ਞਂ ਮੋਚੇਤ੍ਵਾ ਤਂ ਗਹੇਤ੍ਵਾ ਆਗਮਿਸ੍ਸਾਮੀ’’ਤਿ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਥੇਰਂ ਉਯ੍ਯੋਜੇਤ੍ਵਾ ਪਰਿਬ੍ਬਾਜਕਾਰਾਮਂ ਅਗਮਾਸਿ.

ਕੋਲਿਤਪਰਿਬ੍ਬਾਜਕੋ ਤਂ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ‘‘ਮੁਖਵਣ੍ਣੋ ਨ ਅਞ੍ਞਦਿਵਸੇਸੁ ਵਿਯ, ਅਦ੍ਧਾਨੇਨ ਅਮਤਂ ਅਧਿਗਤਂ ਭਵਿਸ੍ਸਤੀ’’ਤਿ ਤੇਨੇਵਸ੍ਸ ਵਿਸੇਸਾਧਿਗਮਂ ਸਮ੍ਭਾਵੇਤ੍ਵਾ ਅਮਤਾਧਿਗਮਂ ਪੁਚ੍ਛਿ. ਸੋਪਿਸ੍ਸ ‘‘ਆਮਾਵੁਸੋ, ਅਮਤਂ ਅਧਿਗਤ’’ਨ੍ਤਿ ਪਟਿਜਾਨਿਤ੍ਵਾ ਤਮੇਵ ਗਾਥਂ ਅਭਾਸਿ. ਗਾਥਾਪਰਿਯੋਸਾਨੇ ਕੋਲਿਤੋ ਸੋਤਾਪਤ੍ਤਿਫਲੇ ਪਤਿਟ੍ਠਹਿਤ੍ਵਾ ਆਹ – ‘‘ਕਹਂ ਨੋ ਸਤ੍ਥਾ’’ਤਿ? ‘‘ਵੇਲ਼ੁਵਨੇ’’ਤਿ. ‘‘ਤੇਨ ਹਿ, ਆਵੁਸੋ, ਆਯਾਮ, ਸਤ੍ਥਾਰਂ ਪਸ੍ਸਿਸ੍ਸਾਮਾ’’ਤਿ. ਉਪਤਿਸ੍ਸੋ ਸਬ੍ਬਕਾਲਮ੍ਪਿ ਆਚਰਿਯਪੂਜਕੋਵ, ਤਸ੍ਮਾ ਸਞ੍ਚਯਸ੍ਸ ਸਨ੍ਤਿਕਂ ਗਨ੍ਤ੍ਵਾ ਸਤ੍ਥੁ ਗੁਣੇ ਪਕਾਸੇਤ੍ਵਾ ਤਮ੍ਪਿ ਸਤ੍ਥੁ ਸਨ੍ਤਿਕਂ ਨੇਤੁਕਾਮੋ ਅਹੋਸਿ. ਸੋ ਲਾਭਾਸਾਪਕਤੋ ਅਨ੍ਤੇਵਾਸਿਕਭਾਵਂ ਅਨਿਚ੍ਛਨ੍ਤੋ ‘‘ਨ ਸਕ੍ਕੋਮਿ ਚਾਟਿ ਹੁਤ੍ਵਾ ਉਦਕਸਿਞ੍ਚਨਂ ਹੋਤੁ’’ਨ੍ਤਿ ਪਟਿਕ੍ਖਿਪਿ. ਤੇ ਅਨੇਕੇਹਿ ਕਾਰਣੇਹਿ ਤਂ ਸਞ੍ਞਾਪੇਤੁਂ ਅਸਕ੍ਕੋਨ੍ਤਾ ਅਤ੍ਤਨੋ ਓਵਾਦੇ ਵਤ੍ਤਮਾਨੇਹਿ ਅਡ੍ਢਤੇਯ੍ਯਸਤੇਹਿ ਅਨ੍ਤੇਵਾਸਿਕੇਹਿ ਸਦ੍ਧਿਂ ਵੇਲ਼ੁਵਨਂ ਅਗਮਂਸੁ. ਸਤ੍ਥਾ ਤੇ ਦੂਰਤੋਵ ਆਗਚ੍ਛਨ੍ਤੇ ਦਿਸ੍ਵਾ ‘‘ਏਤਂ ਮੇ ਸਾਵਕਯੁਗਂ ਭਵਿਸ੍ਸਤਿ ਅਗ੍ਗਂ ਭਦ੍ਦਯੁਗ’’ਨ੍ਤਿ ਵਤ੍ਵਾ ਤੇਸਂ ਪਰਿਸਾਯ ਚਰਿਯਵਸੇਨ ਧਮ੍ਮਂ ਦੇਸੇਤ੍ਵਾ ਅਰਹਤ੍ਤੇ ਪਤਿਟ੍ਠਾਪੇਤ੍ਵਾ ਏਹਿਭਿਕ੍ਖੁਭਾਵੇਨ ਉਪਸਮ੍ਪਦਂ ਅਦਾਸਿ. ਯਥਾ ਤੇਸਂ, ਏਵਂ ਅਗ੍ਗਸਾਵਕਾਨਮ੍ਪਿ ਇਦ੍ਧਿਮਯਪਤ੍ਤਚੀਵਰਂ ਆਗਤਮੇਵ. ਉਪਰਿਮਗ੍ਗਤ੍ਤਯਕਿਚ੍ਚਂ ਪਨ ਨ ਨਿਟ੍ਠਾਤਿ. ਕਸ੍ਮਾ? ਸਾਵਕਪਾਰਮੀਞਾਣਸ੍ਸ ਮਹਨ੍ਤਤਾਯ.

ਤੇਸੁ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਪਬ੍ਬਜਿਤਦਿਵਸਤੋ ਸਤ੍ਤਮੇ ਦਿਵਸੇ ਮਗਧਰਟ੍ਠੇ ਕਲ੍ਲਵਾਲਗਾਮੇ ਸਮਣਧਮ੍ਮਂ ਕਰੋਨ੍ਤੋ ਥਿਨਮਿਦ੍ਧੇ ਓਕ੍ਕਨ੍ਤੇ ਸਤ੍ਥਾਰਾ ਸਂਵੇਜਿਤੋ ਥਿਨਮਿਦ੍ਧਂ ਵਿਨੋਦੇਤ੍ਵਾ ਧਾਤੁਕਮ੍ਮਟ੍ਠਾਨਂ (ਅ. ਨਿ. ੭.੬੧) ਸੁਣਨ੍ਤੋ ਏਵ ਉਪਰਿਮਗ੍ਗਤ੍ਤਯਂ ਅਧਿਗਨ੍ਤ੍ਵਾ ਸਾਵਕਪਾਰਮੀਞਾਣਸ੍ਸ ਮਤ੍ਥਕਂ ਪਾਪੁਣਿ. ਆਯਸ੍ਮਾ ਸਾਰਿਪੁਤ੍ਤੋ ਪਬ੍ਬਜਿਤਦਿਵਸਤੋ ਅਡ੍ਢਮਾਸਂ ਅਤਿਕ੍ਕਮਿਤ੍ਵਾ ਸਤ੍ਥਾਰਾ ਸਦ੍ਧਿਂ ਰਾਜਗਹੇ ਸੂਕਰਖਤਲੇਣੇ ਵਿਹਰਨ੍ਤੋ ਅਤ੍ਤਨੋ ਭਾਗਿਨੇਯ੍ਯਸ੍ਸ ਦੀਘਨਖਪਰਿਬ੍ਬਾਜਕਸ੍ਸ ਵੇਦਨਾਪਰਿਗ੍ਗਹਸੁਤ੍ਤਨ੍ਤੇ (ਮ. ਨਿ. ੨.੨੦੧ ਆਦਯੋ) ਦੇਸਿਯਮਾਨੇ ਦੇਸਨਾਨੁਸਾਰੇਨ ਞਾਣਂ ਪੇਸੇਤ੍ਵਾ ਪਰਸ੍ਸ ਵਡ੍ਢਿਤਂ ਭਤ੍ਤਂ ਭੁਞ੍ਜਨ੍ਤੋ ਵਿਯ ਸਾਵਕਪਾਰਮੀਞਾਣਸ੍ਸ ਮਤ੍ਥਕਂ ਪਾਪੁਣਿ. ਇਤਿ ਦ੍ਵਿਨ੍ਨਮ੍ਪਿ ਅਗ੍ਗਸਾਵਕਾਨਂ ਸਤ੍ਥੁ ਸਮੀਪੇ ਏਵ ਸਾਵਕਪਾਰਮੀਞਾਣਂ ਮਤ੍ਥਕਂ ਪਤ੍ਤਂ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੧.੧੪੧-੩੭੪) –

‘‘ਹਿਮਵਨ੍ਤਸ੍ਸ ਅਵਿਦੂਰੇ, ਲਮ੍ਬਕੋ ਨਾਮ ਪਬ੍ਬਤੋ;

ਅਸ੍ਸਮੋ ਸੁਕਤੋ ਮਯ੍ਹਂ, ਪਣ੍ਣਸਾਲਾ ਸੁਮਾਪਿਤਾ.

‘‘ਉਤ੍ਤਾਨਕੂਲਾ ਨਦਿਕਾ, ਸੁਪਤਿਤ੍ਥਾ ਮਨੋਰਮਾ;

ਸੁਸੁਦ੍ਧਪੁਲਿਨਾਕਿਣ੍ਣਾ, ਅਵਿਦੂਰੇ ਮਮਸ੍ਸਮਂ.

‘‘ਅਸਕ੍ਖਰਾ ਅਪਬ੍ਭਾਰਾ, ਸਾਦੁ ਅਪ੍ਪਟਿਗਨ੍ਧਿਕਾ;

ਸਨ੍ਦਤੀ ਨਦਿਕਾ ਤਤ੍ਥ, ਸੋਭਯਨ੍ਤਾ ਮਮਸ੍ਸਮਂ.

‘‘ਕੁਮ੍ਭੀਲਾ ਮਕਰਾ ਚੇਤ੍ਥ, ਸੁਸੁਮਾਰਾ ਚ ਕਚ੍ਛਪਾ;

ਚਰਨ੍ਤਿ ਨਦਿਯਾ ਤਤ੍ਥ, ਸੋਭਯਨ੍ਤਾ ਮਮਸ੍ਸਮਂ.

‘‘ਪਾਠੀਨਾ ਪਾਵੁਸਾ ਮਚ੍ਛਾ, ਬਲਜਾ ਮੁਞ੍ਜਰੋਹਿਤਾ;

ਵਗ੍ਗਲ਼ਾ ਪਪਤਾਯਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.

‘‘ਉਭੋ ਕੂਲੇਸੁ ਨਦਿਯਾ, ਪੁਪ੍ਫਿਨੋ ਫਲਿਨੋ ਦੁਮਾ;

ਉਭਤੋ ਅਭਿਲਮ੍ਬਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.

‘‘ਅਮ੍ਬਾ ਸਾਲਾ ਚ ਤਿਲਕਾ, ਪਾਟਲੀ ਸਿਨ੍ਦੁਵਾਰਕਾ;

ਦਿਬ੍ਬਗਨ੍ਧਾ ਸਮ੍ਪਵਨ੍ਤਿ, ਪੁਪ੍ਫਿਤਾ ਮਮ ਅਸ੍ਸਮੇ.

‘‘ਚਮ੍ਮਕਾ ਸਲ਼ਲਾ ਨੀਪਾ, ਨਾਗਪੁਨ੍ਨਾਗਕੇਤਕਾ;

ਦਿਬ੍ਬਗਨ੍ਧਾ ਸਮ੍ਪਵਨ੍ਤਿ, ਪੁਪ੍ਫਿਤਾ ਮਮ ਅਸ੍ਸਮੇ.

‘‘ਅਤਿਮੁਤ੍ਤਾ ਅਸੋਕਾ ਚ, ਭਗਿਨੀਮਾਲਾ ਚ ਪੁਪ੍ਫਿਤਾ;

ਅਙ੍ਕੋਲਾ ਬਿਮ੍ਬਿਜਾਲਾ ਚ, ਪੁਪ੍ਫਿਤਾ ਮਮ ਅਸ੍ਸਮੇ.

‘‘ਕੇਤਕਾ ਕਨ੍ਦਲਿ ਚੇਵ, ਗੋਧੁਕਾ ਤਿਣਸੂਲਿਕਾ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.

‘‘ਕਣਿਕਾਰਾ ਕਣ੍ਣਿਕਾ ਚ, ਅਸਨਾ ਅਜ੍ਜੁਨਾ ਬਹੂ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.

‘‘ਪੁਨ੍ਨਾਗਾ ਗਿਰਿਪੁਨ੍ਨਾਗਾ, ਕੋਵਿਲ਼ਾਰਾ ਚ ਪੁਪ੍ਫਿਤਾ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.

‘‘ਉਦ੍ਦਾਲਕਾ ਚ ਕੁਟਜਾ, ਕਦਮ੍ਬਾ ਵਕੁਲਾ ਬਹੂ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.