੩. ਆਨਨ੍ਦਤ੍ਥੇਰਗਾਥਾਵਣ੍ਣਨਾ
ਪਿਸੁਣੇਨ ਚ ਕੋਧਨੇਨਾਤਿਆਦਿਕਾ ਆਯਸ੍ਮਤੋ ਆਨਨ੍ਦਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਸਤ੍ਥੁ ਵੇਮਾਤਿਕਭਾਤਾ ਹੁਤ੍ਵਾ ਨਿਬ੍ਬਤ੍ਤਿ, ਸੁਮਨੋਤਿਸ੍ਸ ਨਾਮਂ ਅਹੋਸਿ. ਪਿਤਾ ਪਨਸ੍ਸ ਆਨਨ੍ਦਰਾਜਾ ਨਾਮ. ਸੋ ਅਤ੍ਤਨੋ ਪੁਤ੍ਤਸ੍ਸ ਸੁਮਨਕੁਮਾਰਸ੍ਸ ਵਯਪ੍ਪਤ੍ਤਸ੍ਸ ਹਂਸਵਤਿਤੋ ਵੀਸਯੋਜਨਸਤੇ ਠਾਨੇ ਭੋਗਨਗਰਂ ਅਦਾਸਿ. ਸੋ ਕਦਾਚਿ ਕਦਾਚਿ ਆਗਨ੍ਤ੍ਵਾ ਅਤ੍ਤਾਨਞ੍ਚ ਪਿਤਰਞ੍ਚ ਪਸ੍ਸਤਿ. ਤਦਾ ਰਾਜਾ ਸਤ੍ਥਾਰਞ੍ਚ ਸਤਸਹਸ੍ਸਪਰਿਮਾਣਂ ਭਿਕ੍ਖੁਸਙ੍ਘਞ੍ਚ ਸਯਮੇਵ ਸਕ੍ਕਚ੍ਚਂ ਉਪਟ੍ਠਹਿ, ਅਞ੍ਞੇਸਂ ਉਪਟ੍ਠਾਤੁਂ ਨ ਦੇਤਿ.
ਤੇਨ ਸਮਯੇਨ ਪਚ੍ਚਨ੍ਤੋ ਕੁਪਿਤੋ ਅਹੋਸਿ. ਕੁਮਾਰੋ ਤਸ੍ਸ ਕੁਪਿਤਭਾਵਂ ਰਞ੍ਞੋ ਅਨਾਰੋਚੇਤ੍ਵਾ ਸਯਮੇਵ ਤਂ ਵੂਪਸਮੇਤਿ. ਤਂ ਸੁਤ੍ਵਾ ਰਾਜਾ ਤੁਟ੍ਠਮਾਨਸੋ ਪੁਤ੍ਤਂ ਪਕ੍ਕੋਸਾਪੇਤ੍ਵਾ ‘‘ਵਰਂ ਤੇ, ਤਾਤ ਦਮ੍ਮਿ, ਵਰਂ ਗਣ੍ਹਾਹੀ’’ਤਿ ਆਹ. ਕੁਮਾਰੋ ‘‘ਸਤ੍ਥਾਰਂ ਭਿਕ੍ਖੁਸਙ੍ਘਞ੍ਚ ਤੇਮਾਸਂ ਉਪਟ੍ਠਹਨ੍ਤੋ ਜੀਵਿਤਂ ਅਵਞ੍ਝਂ ਕਾਤੁਂ ਇਚ੍ਛਾਮੀ’’ਤਿ ਆਹ. ‘‘ਏਤਂ ਨ ਸਕ੍ਕਾ, ਅਞ੍ਞਂ ਵਦੇਹੀ’’ਤਿ. ‘‘ਦੇਵ, ਖਤ੍ਤਿਯਾਨਂ ਦ੍ਵੇਕਥਾ ਨਾਮ ਨਤ੍ਥਿ, ਏਤਦੇਵ ਮੇ ਦੇਹਿ, ਨ ਮਯ੍ਹਂ ਅਞ੍ਞੇਨ ਅਤ੍ਥੋ’’ਤਿ. ‘‘ਸਚੇ ਸਤ੍ਥਾ ਅਨੁਜਾਨਾਤਿ, ਦਿਨ੍ਨਮੇਵਾ’’ਤਿ. ਸੋ ‘‘ਸਤ੍ਥੁ ਚਿਤ੍ਤਂ ਜਾਨਿਸ੍ਸਾਮੀ’’ਤਿ ਵਿਹਾਰਂ ਗਤੋ.
ਤੇਨ ਚ ਸਮਯੇਨ ਭਗਵਾ ਭਤ੍ਤਕਿਚ੍ਚਂ ਨਿਟ੍ਠਾਪੇਤ੍ਵਾ ਗਨ੍ਧਕੁਟਿਂ ਪਵਿਟ੍ਠੋ ਹੋਤਿ. ਸੋ ਭਿਕ੍ਖੂ ਉਪਸਙ੍ਕਮਿਤ੍ਵਾ ‘‘ਅਹਂ, ਭਨ੍ਤੇ, ਭਗਵਨ੍ਤਂ ਦਸ੍ਸਨਾਯ ਆਗਤੋ, ਦਸ੍ਸੇਥ ਮੇ ਭਗਵਨ੍ਤ’’ਨ੍ਤਿ ਆਹ. ਭਿਕ੍ਖੂ ‘‘ਸੁਮਨੋ ਨਾਮ ਥੇਰੋ ਸਤ੍ਥੁ ਉਪਟ੍ਠਾਕੋ, ਤਸ੍ਸ ਸਨ੍ਤਿਕਂ ਗਚ੍ਛਾਹੀ’’ਤਿ ਆਹਂਸੁ. ਸੋ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ‘‘ਸਤ੍ਥਾਰਂ, ਭਨ੍ਤੇ, ਮੇ ਦਸ੍ਸੇਥਾ’’ਤਿ ਆਹ. ਅਥ ਥੇਰੋ ਤਸ੍ਸ ਪਸ੍ਸਨ੍ਤਸ੍ਸੇਵ ਪਥਵਿਯਂ ਨਿਮੁਜ੍ਜਿਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ‘‘ਭਨ੍ਤੇ, ਰਾਜਪੁਤ੍ਤੋ ਤੁਮ੍ਹਾਕਂ ਦਸ੍ਸਨਾਯ ਆਗਤੋ’’ਤਿ ਆਹ. ‘‘ਤੇਨ ਹਿ, ਭਿਕ੍ਖੁ, ਬਹਿ ਆਸਨਂ ਪਞ੍ਞਾਪੇਹੀ’’ਤਿ. ਥੇਰੋ ਪੁਨਪਿ ਤਸ੍ਸ ਪਸ੍ਸਨ੍ਤਸ੍ਸੇਵ ਬੁਦ੍ਧਾਸਨਂ ਗਹੇਤ੍ਵਾ ਅਨ੍ਤੋਗਨ੍ਧਕੁਟਿਯਂ ਨਿਮੁਜ੍ਜਿਤ੍ਵਾ ਬਹਿਪਰਿਵੇਣੇ ਪਾਤੁਭਵਿਤ੍ਵਾ ਗਨ੍ਧਕੁਟਿਪਰਿਵੇਣੇ ਆਸਨਂ ਪਞ੍ਞਾਪੇਸਿ. ਕੁਮਾਰੋ ਤਂ ਦਿਸ੍ਵਾ ‘‘ਮਹਨ੍ਤੋ ਵਤਾਯਂ ਭਿਕ੍ਖੂ’’ਤਿ ਚਿਤ੍ਤਂ ਉਪ੍ਪਾਦੇਸਿ.
ਭਗਵਾਪਿ ਗਨ੍ਧਕੁਟਿਤੋ ਨਿਕ੍ਖਮਿਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਿ. ਰਾਜਪੁਤ੍ਤੋ ਸਤ੍ਥਾਰਂ ਵਨ੍ਦਿਤ੍ਵਾ, ਪਟਿਸਨ੍ਥਾਰਂ ਕਤ੍ਵਾ, ਅਯਂ, ਭਨ੍ਤੇ, ਥੇਰੋ ਤੁਮ੍ਹਾਕਂ ਸਾਸਨੇ ਵਲ੍ਲਭੋ ਮਞ੍ਞੇਤਿ. ‘‘ਆਮ ਕੁਮਾਰ, ਵਲ੍ਲਭੋ’’ਤਿ? ‘‘ਕਿਂ ਕਤ੍ਵਾ, ਭਨ੍ਤੇ, ਏਸ ਵਲ੍ਲਭੋ ਹੋਤੀ’’ਤਿ?‘‘ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ’’ਤਿ. ‘‘ਭਗਵਾ, ਅਹਮ੍ਪਿ ਅਯਂ ਥੇਰੋ ਵਿਯ ਅਨਾਗਤੇ ਬੁਦ੍ਧਸਾਸਨੇ ਵਲ੍ਲਭੋ ਹੋਤੁਕਾਮੋ’’ਤਿ ਸਤ੍ਥਾਹਂ ਖਨ੍ਧਾਵਾਰਭਤ੍ਤਂ ਨਾਮ ਦਤ੍ਵਾਪਿ ਸਤ੍ਤਮੇ ਦਿਵਸੇ, ਭਨ੍ਤੇ, ਮਯਾ ਪਿਤੁ ਸਨ੍ਤਿਕਾ ਤੇਮਾਸਂ ਤੁਮ੍ਹਾਕਂ ਪਟਿਜਗ੍ਗਨਵਰੋ ਲਦ੍ਧੋ, ਤੇਮਾਸਂ ਮੇ ਵਸ੍ਸਾਵਾਸਂ ਅਧਿਵਾਸੇਥਾਤਿ. ਭਗਵਾ, ‘‘ਅਤ੍ਥਿ ਨੁ ਖੋ ਤਤ੍ਥ ਗਤੇਨ ਅਤ੍ਥੋ’’ਤਿ ਓਲੋਕੇਤ੍ਵਾ ‘‘ਅਤ੍ਥੀ’’ਤਿ ਦਿਸ੍ਵਾ ‘‘ਸੁਞ੍ਞਾਗਾਰੇ ਖੋ, ਕੁਮਾਰ, ਤਥਾਗਤਾ ਅਭਿਰਮਨ੍ਤੀ’’ਤਿ ਆਹ. ਕੁਮਾਰੋ ‘‘ਅਞ੍ਞਾਤਂ ਭਗਵਾ, ਅਞ੍ਞਾਤਂ ਸੁਗਤਾ’’ਤਿ ਵਤ੍ਵਾ ‘‘ਅਹਂ, ਭਨ੍ਤੇ, ਪੁਰਿਮਤਰਂ ਗਨ੍ਤ੍ਵਾ ਵਿਹਾਰਂ ਕਾਰੇਮਿ, ਮਯਾ ਪੇਸਿਤੇ ਭਿਕ੍ਖੁਸਤਸਹਸ੍ਸੇਨ ਸਦ੍ਧਿਂ ਆਗਚ੍ਛਥਾ’’ਤਿ ਪਟਿਞ੍ਞਂ ਗਹੇਤ੍ਵਾ ਪਿਤੁ ਸਨ੍ਤਿਕਂ ਗਨ੍ਤ੍ਵਾ ‘‘ਦਿਨ੍ਨਾ ਮੇ, ਦੇਵ, ਭਗਵਤਾ ਪਟਿਞ੍ਞਾ, ਮਯਾ ਪਹਿਤੇ ਭਗਵਨ੍ਤਂ ਪੇਸੇਯ੍ਯਾਥਾ’’ਤਿ ਪਿਤਰਂ ਵਨ੍ਦਿਤ੍ਵਾ, ਨਿਕ੍ਖਮਿਤ੍ਵਾ ਯੋਜਨੇ ਯੋਜਨੇ ਵਿਹਾਰਂ ਕਰੋਨ੍ਤੋ ਵੀਸਯੋਜਨਸਤਂ ਅਦ੍ਧਾਨਂ ਗਤੋ. ਗਨ੍ਤ੍ਵਾ ਚ ਅਤ੍ਤਨੋ ਨਗਰੇ ਵਿਹਾਰਟ੍ਠਾਨਂ ਵਿਚਿਨਨ੍ਤੋ ਸੋਭਨਸ੍ਸ ਨਾਮ ਕੁਟੁਮ੍ਬਿਕਸ੍ਸ ਉਯ੍ਯਾਨਂ ਦਿਸ੍ਵਾ ਸਤਸਹਸ੍ਸੇਨ ਕਿਣਿਤ੍ਵਾ ਸਤਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਵਿਹਾਰਂ ਕਾਰੇਸਿ. ਤਤ੍ਥ ਭਗਵਤੋ ਗਨ੍ਧਕੁਟਿਂ ਸੇਸਭਿਕ੍ਖੂਨਞ੍ਚ ਰਤ੍ਤਿਟ੍ਠਾਨਦਿਵਾਟ੍ਠਾਨਤ੍ਥਾਯ ਕੁਟਿਲੇਣਮਣ੍ਡਪੇ ਕਾਰੇਤ੍ਵਾ ਪਾਕਾਰਪਰਿਕ੍ਖੇਪਂ ਦ੍ਵਾਰਕੋਟ੍ਠਕਞ੍ਚ ਨਿਟ੍ਠਾਪੇਤ੍ਵਾ ਪਿਤੁ ਸਨ੍ਤਿਕਂ ਪੇਸੇਸਿ ‘‘ਨਿਟ੍ਠਿਤਂ ਮਯ੍ਹਂ ਕਿਚ੍ਚਂ, ਸਤ੍ਥਾਰਂ ਪਹਿਣਥਾ’’ਤਿ.
ਰਾਜਾ ਭਗਵਨ੍ਤਂ ਭੋਜੇਤ੍ਵਾ ‘‘ਭਗਵਾ ਸੁਮਨਸ੍ਸ ਕਿਚ੍ਚਂ ਨਿਟ੍ਠਿਤਂ, ਤੁਮ੍ਹਾਕਂ ਗਮਨਂ ਪਚ੍ਚਾਸੀਸਤੀ’’ਤਿ ਆਹ. ਭਗਵਾ ਸਤਸਹਸ੍ਸਭਿਕ੍ਖੁਪਰਿਵੁਤੋ ਯੋਜਨੇ ਯੋਜਨੇ ਵਿਹਾਰੇਸੁ ਵਸਮਾਨੋ ਅਗਮਾਸਿ. ਕੁਮਾਰੋ ‘‘ਸਤ੍ਥਾ ਆਗਚ੍ਛਤੀ’’ਤਿ ਸੁਤ੍ਵਾ ਯੋਜਨਂ ਪਚ੍ਚੁਗ੍ਗਨ੍ਤ੍ਵਾ ਗਨ੍ਧਮਾਲਾਦੀਹਿ ਪੂਜਯਮਾਨੋ ਸਤਸਹਸ੍ਸੇਨ ਕੀਤੇ ਸੋਭਨੇ ਨਾਮ ਉਯ੍ਯਾਨੇ ਸਤਸਹਸ੍ਸੇਨ ਕਾਰਿਤਂ ਵਿਹਾਰਂ ਪਵੇਸੇਤ੍ਵਾ –
‘‘ਸਤਸਹਸ੍ਸੇਨ ਮੇ ਕੀਤਂ, ਸਤਸਹਸ੍ਸੇਨ ਮਾਪਿਤਂ;
ਸੋਭਨਂ ਨਾਮ ਉਯ੍ਯਾਨਂ, ਪਟਿਗ੍ਗਣ੍ਹ ਮਹਾਮੁਨੀ’’ਤਿ. –
ਤਂ ਨਿਯ੍ਯਾਦੇਸਿ. ਸੋ ਵਸ੍ਸੂਪਨਾਯਿਕਦਿਵਸੇ ਮਹਾਦਾਨਂ ਪਵਤ੍ਤੇਤ੍ਵਾ ‘‘ਇਮਿਨਾਵ ਨੀਹਾਰੇਨ ਦਾਨਂ ਦਦੇਯ੍ਯਾਥਾ’’ਤਿ ਪੁਤ੍ਤਦਾਰੇ ਅਮਚ੍ਚੇ ਚ ਕਿਚ੍ਚਕਰਣੀਯੇਸੁ ਚ ਨਿਯੋਜੇਤ੍ਵਾ ਸਯਂ ਸੁਮਨਤ੍ਥੇਰਸ੍ਸ ਵਸਨਟ੍ਠਾਨਸਮੀਪੇਯੇਵ ਵਸਨ੍ਤੋ ਤੇਮਾਸਂ ਸਤ੍ਥਾਰਂ ਉਪਟ੍ਠਹਨ੍ਤੋ ਉਪਕਟ੍ਠਾਯ ਪਵਾਰਣਾਯ ਗਾਮਂ ਪਵਿਸਿਤ੍ਵਾ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ ਸਤ੍ਤਮੇ ਦਿਵਸੇ ਸਤ੍ਥੁ ਭਿਕ੍ਖੁਸਤਸਹਸ੍ਸਸ੍ਸ ਚ ਪਾਦਮੂਲੇ ਤਿਚੀਵਰਾਨਿ ਠਪੇਤ੍ਵਾ ਵਨ੍ਦਿਤ੍ਵਾ, ‘‘ਭਨ੍ਤੇ, ਯਦੇਤਂ ਮਯਾ ਸਤ੍ਤਾਹਂ ਖਨ੍ਧਾਵਾਰਦਾਨਤੋ ਪਟ੍ਠਾਯ ਪੁਞ੍ਞਂ ਕਤਂ, ਨ ਤਂ ਸਗ੍ਗਸਮ੍ਪਤ੍ਤਿਆਦੀਨਂ ਅਤ੍ਥਾਯ, ਅਥ ਖੋ ਅਹਂ ਅਯਂ ਸੁਮਨਤ੍ਥੇਰੋ ਵਿਯ ਅਨਾਗਤੇ ਏਕਸ੍ਸ ਬੁਦ੍ਧਸ੍ਸ ਉਪਟ੍ਠਾਕੋ ਭਵੇਯ੍ਯ’’ਨ੍ਤਿ ਪਣਿਧਾਨਂ ਅਕਾਸਿ. ਸਤ੍ਥਾਪਿਸ੍ਸ ਅਨਨ੍ਤਰਾਯਤਂ ਦਿਸ੍ਵਾ ਬ੍ਯਾਕਰਿਤ੍ਵਾ ਪਕ੍ਕਾਮਿ.
ਸੋਪਿ ਤਸ੍ਮਿਂ ਬੁਦ੍ਧੁਪ੍ਪਾਦੇ ਵਸ੍ਸਸਤਸਹਸ੍ਸਂ ਪੁਞ੍ਞਾਨਿ ਕਤ੍ਵਾ ਤਤੋ ਪਰਮ੍ਪਿ ਤਤ੍ਥ ਤਤ੍ਥ ਭਵੇ ਉਲ਼ਾਰਾਨਿ ਪੁਞ੍ਞਕਮ੍ਮਾਨਿ ਉਪਚਿਨਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਕਸ੍ਸਪਸ੍ਸ ਭਗਵਤੋ ਕਾਲੇ ਪਿਣ੍ਡਾਯ ਚਰਤੋ ਏਕਸ੍ਸ ਥੇਰਸ੍ਸ ਪਤ੍ਤਗ੍ਗਹਣਤ੍ਥਂ ਉਤ੍ਤਰਸਾਟਕਂ ਦਤ੍ਵਾ ਪੂਜਂ ਅਕਾਸਿ. ਪੁਨ ਸਗ੍ਗੇ ਨਿਬ੍ਬਤ੍ਤਿਤ੍ਵਾ ਤਤੋ ਚੁਤੋ ਬਾਰਾਣਸਿਰਾਜਾ ਹੁਤ੍ਵਾ ਅਟ੍ਠ ਪਚ੍ਚੇਕਬੁਦ੍ਧੇ ਦਿਸ੍ਵਾ ਤੇ ਭੋਜੇਤ੍ਵਾ ਅਤ੍ਤਨੋ ਮਙ੍ਗਲੁਯ੍ਯਾਨੇ ਅਟ੍ਠ ਪਣ੍ਣਸਾਲਾਯੋ ਕਾਰੇਤ੍ਵਾ ਤੇਸਂ ਨਿਸੀਦਨਤ੍ਥਾਯ ਅਟ੍ਠ ਸਬ੍ਬਰਤਨਮਯਪੀਠੇ ਚੇਵ ਮਣਿਆਧਾਰਕੇ ਚ ਪਟਿਯਾਦੇਤ੍ਵਾ ਦਸਵਸ੍ਸਸਹਸ੍ਸਾਨਿ ਉਪਟ੍ਠਾਨਂ ਅਕਾਸਿ. ਏਤਾਨਿ ਪਾਕਟਟ੍ਠਾਨਾਨਿ.
ਕਪ੍ਪਸਤਸਹਸ੍ਸਂ ਪਨ ਤਤ੍ਥ ਤਤ੍ਥ ਭਵੇ ਪੁਞ੍ਞਾਨਿ ਕਰੋਨ੍ਤੋਵ ਅਮ੍ਹਾਕਂ ਬੋਧਿਸਤ੍ਤੇਨ ਸਦ੍ਧਿਂ ਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਤਤੋ ਚੁਤੋ ਅਮਿਤੋਦਨਸਕ੍ਕਸ੍ਸ ਗੇਹੇ ਨਿਬ੍ਬਤ੍ਤਿ. ਤਸ੍ਸ ਸਬ੍ਬੇ ਞਾਤਕੇ ਆਨਨ੍ਦਿਤੇ ਕਰੋਨ੍ਤੋ ਜਾਤੋਤਿ ਆਨਨ੍ਦੋਤ੍ਵੇਵ ਨਾਮਂ ਅਹੋਸਿ. ਸੋ ਅਨੁਕ੍ਕਮੇਨ ਵਯਪ੍ਪਤ੍ਤੋ ਕਤਾਭਿਨਿਕ੍ਖਮਨੇ ਸਮ੍ਮਾਸਮ੍ਬੋਧਿਂ ਪਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਪਠਮਂ ਕਪਿਲਵਤ੍ਥੁਂ ਗਨ੍ਤ੍ਵਾ ਤਤੋ ਨਿਕ੍ਖਨ੍ਤੇ ਭਗਵਤਿ ਤਸ੍ਸ ਪਰਿਵਾਰਤ੍ਥਂ ਪਬ੍ਬਜਿਤੁਂ ਨਿਕ੍ਖਨ੍ਤੇਹਿ ਭਦ੍ਦਿਯਾਦੀਹਿ ਸਦ੍ਧਿਂ ਨਿਕ੍ਖਮਿਤ੍ਵਾ ਭਗਵਤੋ ਸਨ੍ਤਿਕੇ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਆਯਸ੍ਮਤੋ ਪੁਣ੍ਣਸ੍ਸ ਮਨ੍ਤਾਣਿਪੁਤ੍ਤਸ੍ਸ ਸਨ੍ਤਿਕੇ ਧਮ੍ਮਕਥਂ ਸੁਤ੍ਵਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿ.
ਤੇਨ ਚ ਸਮਯੇਨ ਭਗਵਤੋ ਪਠਮਬੋਧਿਯਂ ਵੀਸਤਿਵਸ੍ਸਾਨਿ ਅਨਿਬਦ੍ਧਉਪਟ੍ਠਾਕਾ ਅਹੇਸੁਂ. ਏਕਦਾ ਨਾਗਸਮਾਲੋ ਪਤ੍ਤਚੀਵਰਂ ਗਹੇਤ੍ਵਾ ਵਿਚਰਿ, ਏਕਦਾ ਨਾਗਿਤੋ, ਏਕਦਾ ਉਪਵਾਨੋ, ਏਕਦਾ ਸੁਨਕ੍ਖਤ੍ਤੋ, ਏਕਦਾ ਚੁਨ੍ਦੋ ਸਮਣੁਦ੍ਦੇਸੋ, ਏਕਦਾ ਸਾਗਤੋ, ਏਕਦਾ ਮੇਘਿਯੋ, ਤੇ ਯੇਭੁਯ੍ਯੇਨ ਸਤ੍ਥੁ ਚਿਤ੍ਤਂ ਨਾਰਾਧਯਿਂਸੁ. ਅਥੇਕਦਿਵਸਂ ਭਗਵਾ ਗਨ੍ਧਕੁਟਿਪਰਿਵੇਣੇ ਪਞ੍ਞਤ੍ਤਵਰਬੁਦ੍ਧਾਸਨੇ ਭਿਕ੍ਖੁਸਙ੍ਘਪਰਿਵੁਤੋ ਨਿਸਿਨ੍ਨੋ ਭਿਕ੍ਖੂ ਆਮਨ੍ਤੇਸਿ – ‘‘ਅਹਂ, ਭਿਕ੍ਖਵੇ, ਇਦਾਨਿਮ੍ਹਿ ਮਹਲ੍ਲਕੋ, ਏਕਚ੍ਚੇ ਭਿਕ੍ਖੂ ‘ਇਮਿਨਾ ਮਗ੍ਗੇਨ ਗਚ੍ਛਾਮਾ’ਤਿ ਵੁਤ੍ਤੇ ਅਞ੍ਞੇਨ ਗਚ੍ਛਨ੍ਤਿ, ਏਕਚ੍ਚੇ ਮਯ੍ਹਂ ਪਤ੍ਤਚੀਵਰਂ ਭੂਮਿਯਂ ਨਿਕ੍ਖਿਪਨ੍ਤਿ, ਮਯ੍ਹਂ ਨਿਬਦ੍ਧੁਪਟ੍ਠਾਕਂ ਭਿਕ੍ਖੁਂ ਜਾਨਾਥਾ’’ਤਿ. ਤਂ ਸੁਤ੍ਵਾ ਭਿਕ੍ਖੂਨਂ ਧਮ੍ਮਸਂਵੇਗੋ ਉਦਪਾਦਿ. ਅਥਾਯਸ੍ਮਾ ਸਾਰਿਪੁਤ੍ਤੋ ਉਟ੍ਠਾਯ ਭਗਵਨ੍ਤਂ ਵਨ੍ਦਿਤ੍ਵਾ – ‘‘ਅਹਂ, ਭਨ੍ਤੇ, ਤੁਮ੍ਹੇ ਉਪਟ੍ਠਹਿਸ੍ਸਾਮੀ’’ਤਿ ਆਹ. ਤਂ ਭਗਵਾ ਪਟਿਕ੍ਖਿਪਿ. ਏਤੇਨੁਪਾਯੇਨ ਮਹਾਮੋਗ੍ਗਲ੍ਲਾਨਂ ਆਦਿਂ ਕਤ੍ਵਾ ਸਬ੍ਬੇ ਮਹਾਸਾਵਕਾ – ‘‘ਅਹਂ ਉਪਟ੍ਠਹਿਸ੍ਸਾਮਿ, ਅਹਂ ਉਪਟ੍ਠਹਿਸ੍ਸਾਮੀ’’ਤਿ ਉਟ੍ਠਹਿਂਸੁ ਠਪੇਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ, ਤੇਪਿ ਭਗਵਾ ਪਟਿਕ੍ਖਿਪਿ. ਸੋ ਪਨ ਤੁਣ੍ਹੀਯੇਵ ਨਿਸੀਦਿ. ਅਥ ਨਂ ਭਿਕ੍ਖੂ ਆਹਂਸੁ – ‘‘ਆਵੁਸੋ, ਤ੍ਵਮ੍ਪਿ ਸਤ੍ਥੁ ਉਪਟ੍ਠਾਕਟ੍ਠਾਨਂ ਯਾਚਾਹੀ’’ਤਿ. ਯਾਚਿਤ੍ਵਾ ਲਦ੍ਧਟ੍ਠਾਨਂ ਨਾਮ ਕੀਦਿਸਂ ਹੋਤਿ, ਸਚੇ ਰੁਚ੍ਚਤਿ, ਸਤ੍ਥਾ ਸਯਮੇਵ ਵਕ੍ਖਤੀਤਿ. ਅਥ ਭਗਵਾ ‘‘ਨ, ਭਿਕ੍ਖਵੇ, ਆਨਨ੍ਦੋ ਅਞ੍ਞੇਹਿ ਉਸ੍ਸਾਹੇਤਬ੍ਬੋ, ਸਯਮੇਵ ਜਾਨਿਤ੍ਵਾ ਮਂ ਉਪਟ੍ਠਹਿਸ੍ਸਤੀ’’ਤਿ ਆਹ. ਤਤੋ ਭਿਕ੍ਖੂ ‘‘ਉਟ੍ਠੇਹਿ, ਆਵੁਸੋ ਆਨਨ੍ਦ, ਸਤ੍ਥਾਰਂ ਉਪਟ੍ਠਾਕਟ੍ਠਾਨਂ ਯਾਚਾਹੀ’’ਤਿ ਆਹਂਸੁ.
ਥੇਰੋ ਉਟ੍ਠਹਿਤ੍ਵਾ ‘‘ਸਚੇ ਮੇ, ਭਨ੍ਤੇ, ਭਗਵਾ ਅਤ੍ਤਨਾ ਲਦ੍ਧਂ ਪਣੀਤਚੀਵਰਂ ਨ ਦਸ੍ਸਤਿ, ਪਣੀਤਪਿਣ੍ਡਪਾਤਂ ਨ ਦਸ੍ਸਤਿ, ਏਕਗਨ੍ਧਕੁਟਿਯਂ ਵਸਿਤੁਂ ਨ ਦਸ੍ਸਤਿ, ਨਿਮਨ੍ਤਨਂ ਗਹੇਤ੍ਵਾ ਨ ਗਮਿਸ੍ਸਤਿ, ਏਵਾਹਂ ਭਗਵਨ੍ਤਂ ਉਪਟ੍ਠਹਿਸ੍ਸਾਮੀ’’ਤਿ ਆਹ. ‘‘ਏਤ੍ਤਕੇ ਗੁਣੇ ਲਭਤੋ ਸਤ੍ਥੁ ਉਪਟ੍ਠਾਨੇ ਕੋ ਭਾਰੋ’’ਤਿ ਉਪਵਾਦਮੋਚਨਤ੍ਥਂ ਇਮੇ ਚਤ੍ਤਾਰੋ ਪਟਿਕ੍ਖੇਪਾ ਚ – ‘‘ਸਚੇ, ਭਨ੍ਤੇ, ਭਗਵਾ ਮਯਾ ਗਹਿਤਨਿਮਨ੍ਤਨਂ ਗਮਿਸ੍ਸਤਿ, ਸਚਾਹਂ ਦੇਸਨ੍ਤਰਤੋ ਆਗਤਾਗਤੇ ਤਾਵਦੇਵ ਦਸ੍ਸੇਤੁਂ ਲਚ੍ਛਾਮਿ; ਯਦਾ ਮੇ ਕਙ੍ਖਾ ਉਪ੍ਪਜ੍ਜਤਿ, ਤਾਵਦੇਵ ਭਗਵਨ੍ਤਂ ਉਪਸਙ੍ਕਮਿਤੁਂ ਲਚ੍ਛਾਮਿ, ਸਚੇ ਭਗਵਾ ਪਰਮ੍ਮੁਖਾ ਦੇਸਿਤਂ ਧਮ੍ਮਂ ਪੁਨ ਮਯ੍ਹਂ ਕਥੇਸ੍ਸਤਿ, ਏਵਾਹਂ ਭਗਵਨ੍ਤਂ ਉਪਟ੍ਠਹਿਸ੍ਸਾਮੀ’’ਤਿ ‘‘ਏਤ੍ਤਕਮ੍ਪਿ ਸਤ੍ਥੁ ਸਨ੍ਤਿਕੇ ਅਨੁਗ੍ਗਹਂ ਨ ਲਭਤੀ’’ਤਿ ਉਪਵਾਦਮੋਚਨਤ੍ਥਞ੍ਚੇਵ ਧਮ੍ਮਭਣ੍ਡਾਗਾਰਿਕਭਾਵਪਾਰਮੀਪੂਰਣਤ੍ਥਞ੍ਚ ਇਮਾ ਚਤਸ੍ਸੋ ਆਯਾਚਨਾ ਚਾਤਿ ਅਟ੍ਠ ਵਰੇ ਗਹੇਤ੍ਵਾ ਨਿਬਦ੍ਧੁਪਟ੍ਠਾਕੋ ਅਹੋਸਿ. ਤਸ੍ਸੇਵ ਠਾਨਨ੍ਤਰਸ੍ਸ ਅਤ੍ਥਾਯ ਕਪ੍ਪਸਤਸਹਸ੍ਸਂ ਪੂਰਿਤਾਨਂ ਪਾਰਮੀਨਂ ਫਲਂ ਪਾਪੁਣਿ. ਸੋ ਉਪਟ੍ਠਾਕਟ੍ਠਾਨਂ ਲਦ੍ਧਦਿਵਸਤੋ ਪਟ੍ਠਾਯ ਦਸਬਲਂ ਦੁਵਿਧੇਨ ਉਦਕੇਨ, ਤਿਵਿਧੇਨ ਦਨ੍ਤਕਟ੍ਠੇਨ, ਹਤ੍ਥਪਾਦਪਰਿਕਮ੍ਮੇਨ ਪਿਟ੍ਠਿਪਰਿਕਮ੍ਮੇਨ, ਗਨ੍ਧਕੁਟਿਪਰਿਵੇਣਸਮ੍ਮਜ੍ਜਨੇਨਾਤਿ ਏਵਮਾਦੀਹਿ ਕਿਚ੍ਚੇਹਿ ਉਪਟ੍ਠਹਨ੍ਤੋ ‘‘ਇਮਾਯ ਨਾਮ ਵੇਲਾਯ ਸਤ੍ਥੁ ਇਦਂ ਨਾਮ ਲਦ੍ਧੁਂ ਵਟ੍ਟਤਿ, ਇਦਂ ਨਾਮ ਕਾਤੁਂ ਵਟ੍ਟਤੀ’’ਤਿ ਦਿਵਸਭਾਗਂ ਸਨ੍ਤਿਕਾਵਚਰੋ ਹੁਤ੍ਵਾ, ਰਤ੍ਤਿਭਾਗੇ ਮਹਨ੍ਤਂ ਦਣ੍ਡਦੀਪਿਕਂ ਗਹੇਤ੍ਵਾ ਗਨ੍ਧਕੁਟਿਪਰਿਵੇਣਂ ਨਵ ਵਾਰੇ ਅਨੁਪਰਿਯਾਯਤਿ, ਸਤ੍ਥਰਿ ਪਕ੍ਕੋਸਨ੍ਤੇ ਪਟਿਵਚਨਦਾਨਾਯ ਥਿਨਮਿਦ੍ਧਵਿਨੋਦਨਤ੍ਥਂ.
ਅਥ ਨਂ ਸਤ੍ਥਾ ਜੇਤਵਨੇ ਅਰਿਯਗਣਮਜ੍ਝੇ ਨਿਸਿਨ੍ਨੋ ਅਨੇਕਪਰਿਯਾਯੇਨ ਪਸਂਸਿਤ੍ਵਾ ‘‘ਬਹੁਸ੍ਸੁਤਾਨਂ ਸਤਿਮਨ੍ਤਾਨਂ ਗਤਿਮਨ੍ਤਾਨਂ ਧਿਤਿਮਨ੍ਤਾਨਂ ਉਪਟ੍ਠਾਕਾਨਞ੍ਚ ਭਿਕ੍ਖੂਨਂ ਅਗ੍ਗਟ੍ਠਾਨੇ ਠਪੇਸਿ. ਏਵਂ ਸਤ੍ਥਾਰਾ ਪਞ੍ਚਸੁ ਠਾਨੇਸੁ ਏਤਦਗ੍ਗੇ ਠਪਿਤੋ ਚਤੂਹਿ ਅਚ੍ਛਰਿਯਬ੍ਭੁਤਧਮ੍ਮੇਹਿ ਸਮਨ੍ਨਾਗਤੋ ਸਤ੍ਥੁ ਧਮ੍ਮਕੋਸਾਰਕ੍ਖੋ ਅਯਂ ਮਹਾਥੇਰੋ ਸੇਖੋਵ ਸਮਾਨੋ ਸਤ੍ਥਰਿ ਪਰਿਨਿਬ੍ਬੁਤੇ ਹੇਟ੍ਠਾ ਵੁਤ੍ਤਨਯੇਨ ਭਿਕ੍ਖੂਹਿ ਸਮੁਤ੍ਤੇਜਿਤੋ ਦੇਵਤਾਯ ਚ ਸਂਵੇਜਿਤੋ ‘‘ਸ੍ਵੇਯੇਵ ਚ ਦਾਨਿ ਧਮ੍ਮਸਙ੍ਗੀਤਿ ਕਾਤਬ੍ਬਾ, ਨ ਖੋ ਪਨ ਮੇਤਂ ਪਤਿਰੂਪਂ, ਯ੍ਵਾਯਂ ਸੇਖੋ ਸਕਰਣੀਯੋ ਹੁਤ੍ਵਾ ਅਸੇਖੇਹਿ ਥੇਰੇਹਿ ਸਦ੍ਧਿਂ ਧਮ੍ਮਂ ਸਙ੍ਗਾਯਿਤੁਂ ਸਨ੍ਨਿਪਾਤਂ ਗਨ੍ਤੁ’’ਨ੍ਤਿ ਸਞ੍ਜਾਤੁਸ੍ਸਾਹੋ ਵਿਪਸ੍ਸਨਂ ਪਟ੍ਠਪੇਤ੍ਵਾ ਬਹੁਦੇਵਰਤ੍ਤਿਂ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਚਙ੍ਕਮੇ ਵੀਰਿਯਸਮਤਂ ਅਲਭਿਤ੍ਵਾ ਵਿਹਾਰਂ ਪਵਿਸਿਤ੍ਵਾ ਸਯਨੇ ਨਿਸੀਦਿਤ੍ਵਾ ਸਯਿਤੁਕਾਮੋ ਕਾਯਂ ਆਵਟ੍ਟੇਸਿ. ਅਪ੍ਪਤ੍ਤਞ੍ਚ ਸੀਸਂ ਬਿਮ੍ਬੋਹਨਂ ਪਾਦਾ ਚ ਭੂਮਿਤੋ ਮੁਤ੍ਤਮਤ੍ਤਾ, ਏਤਸ੍ਮਿਂ ਅਨ੍ਤਰੇ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਚ੍ਚਿ ਛਲ਼ਭਿਞ੍ਞੋ ਅਹੋਸਿ. ਤੇਨ ਵੁਤ੍ਤਂ ਅਪਦਾਨੇ (ਅਪ. ਥੇਰ ੧.੧.੬੪੪-੬੬੩) –
‘‘ਆਰਾਮਦ੍ਵਾਰਾ ਨਿਕ੍ਖਮ੍ਮ, ਪਦੁਮੁਤ੍ਤਰੋ ਮਹਾਮੁਨਿ;
ਵਸ੍ਸੇਨ੍ਤੋ ਅਮਤਂ ਵੁਟ੍ਠਿਂ, ਨਿਬ੍ਬਾਪੇਸਿ ਮਹਾਜਨਂ.
‘‘ਸਤਸਹਸ੍ਸਂ ਤੇ ਧੀਰਾ, ਛਲ਼ਭਿਞ੍ਞਾ ਮਹਿਦ੍ਧਿਕਾ;
ਪਰਿਵਾਰੇਨ੍ਤਿ ਸਮ੍ਬੁਦ੍ਧਂ, ਛਾਯਾਵ ਅਨਪਾਯਿਨੀ.
‘‘ਹਤ੍ਥਿਕ੍ਖਨ੍ਧਗਤੋ ਆਸਿਂ, ਸੇਤਚ੍ਛਤ੍ਤਂ ਵਰੁਤ੍ਤਮਂ;
ਸੁਚਾਰੁਰੂਪਂ ਦਿਸ੍ਵਾਨ, ਵਿਤ੍ਤਿ ਮੇ ਉਦਪਜ੍ਜਥ.
‘‘ਓਰੁਯ੍ਹ ਹਤ੍ਥਿਖਨ੍ਧਮ੍ਹਾ, ਉਪਗਚ੍ਛਿਂ ਨਰਾਸਭਂ;
ਰਤਨਾਮਯਛਤ੍ਤਂ ਮੇ, ਬੁਦ੍ਧਸੇਟ੍ਠਸ੍ਸ ਧਾਰਯਿਂ.
‘‘ਮਮ ਸਙ੍ਕਪ੍ਪਮਞ੍ਞਾਯ, ਪਦੁਮੁਤ੍ਤਰੋ ਮਹਾਇਸਿ;
ਤਂ ਕਥਂ ਠਪਯਿਤ੍ਵਾਨ, ਇਮਾ ਗਾਥਾ ਅਭਾਸਥ.
‘‘ਯੋ ਸੋ ਛਤ੍ਤਮਧਾਰੇਸਿ, ਸੋਣ੍ਣਾਲਙ੍ਕਾਰਭੂਸਿਤਂ;
ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣੋਥ ਮਮ ਭਾਸਤੋ.
‘‘ਇਤੋ ਗਨ੍ਤ੍ਵਾ ਅਯਂ ਪੋਸੋ, ਤੁਸਿਤਂ ਆਵਸਿਸ੍ਸਤਿ;
ਅਨੁਭੋਸ੍ਸਤਿ ਸਮ੍ਪਤ੍ਤਿਂ, ਅਚ੍ਛਰਾਹਿ ਪੁਰਕ੍ਖਤੋ.
‘‘ਚਤੁਤਿਂਸਤਿਕ੍ਖਤ੍ਤੁਞ੍ਚ, ਦੇਵਰਜ੍ਜਂ ਕਰਿਸ੍ਸਤਿ;
ਬਲਾਧਿਪੋ ਅਟ੍ਠਸਤਂ, ਵਸੁਧਂ ਆਵਸਿਸ੍ਸਤਿ.
‘‘ਅਟ੍ਠਪਞ੍ਞਾਸਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ;
ਪਦੇਸਰਜ੍ਜਂ ਵਿਪੁਲਂ, ਮਹਿਯਾ ਕਾਰਯਿਸ੍ਸਤਿ.
‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;
ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.
‘‘ਸਕ੍ਯਾਨਂ ਕੁਲਕੇਤੁਸ੍ਸ, ਞਾਤਿਬਨ੍ਧੁ ਭਵਿਸ੍ਸਤਿ;
ਆਨਨ੍ਦੋ ਨਾਮ ਨਾਮੇਨ, ਉਪਟ੍ਠਾਕੋ ਮਹੇਸਿਨੋ.
‘‘ਆਤਾਪੀ ਨਿਪਕੋ ਚਾਪਿ, ਬਾਹੁਸਚ੍ਚੇਸੁ ਕੋਵਿਦੋ;
ਨਿਵਾਤਵੁਤ੍ਤਿ ਅਤ੍ਥਦ੍ਧੋ, ਸਬ੍ਬਪਾਠੀ ਭਵਿਸ੍ਸਤਿ.
‘‘ਪਧਾਨਪਹਿਤਤ੍ਤੋ ਸੋ, ਉਪਸਨ੍ਤੋ ਨਿਰੂਪਧਿ;
ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ.
‘‘ਸਨ੍ਤਿ ਆਰਞ੍ਞਕਾ ਨਾਗਾ, ਕੁਞ੍ਜਰਾ ਸਟ੍ਠਿਹਾਯਨਾ;
ਤਿਧਾਪਭਿਨ੍ਨਾ ਮਾਤਙ੍ਗਾ, ਈਸਾਦਨ੍ਤਾ ਉਰੂਲ਼੍ਹਵਾ.
‘‘ਅਨੇਕਸਤਸਹਸ੍ਸਾ, ਪਣ੍ਡਿਤਾਪਿ ਮਹਿਦ੍ਧਿਕਾ;
ਸਬ੍ਬੇ ਤੇ ਬੁਦ੍ਧਨਾਗਸ੍ਸ, ਨ ਹੋਨ੍ਤੁਪਣਿਧਿਮ੍ਹਿ ਤੇ.
‘‘ਆਦਿਯਾ ਮੇ ਨਮਸ੍ਸਾਮਿ, ਮਜ੍ਝਿਮੇ ਅਥ ਪਚ੍ਛਿਮੇ;
ਪਸਨ੍ਨਚਿਤ੍ਤੋ ਸੁਮਨੋ, ਬੁਦ੍ਧਸੇਟ੍ਠਂ ਉਪਟ੍ਠਹਿਂ.
‘‘ਆਤਾਪੀ ਨਿਪਕੋ ਚਾਪਿ, ਸਮ੍ਪਜਾਨੋ ਪਟਿਸ੍ਸਤੋ;
ਸੋਤਾਪਤ੍ਤਿਫਲਂ ਪਤ੍ਤੋ, ਸੇਖਭੂਮੀਸੁ ਕੋਵਿਦੋ.
‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਕਮ੍ਮਮਭਿਨੀਹਰਿਂ;
ਤਾਹਂ ਭੂਮਿਮਨੁਪ੍ਪਤ੍ਤੋ, ਠਿਤਾ ਸਦ੍ਧਮ੍ਮਮਾਚਲਾ.
‘‘ਸ੍ਵਾਗਤਂ ਵਤ ਮੇ ਆਸਿ…ਪੇ… ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.
ਛਲ਼ਭਿਞ੍ਞੋ ਪਨ ਹੁਤ੍ਵਾ ਸਙ੍ਗੀਤਿਮਣ੍ਡਪਂ ਪਵਿਸਿਤ੍ਵਾ ਧਮ੍ਮਂ ਸਙ੍ਗਾਯਨ੍ਤੋ ਤਤ੍ਥ ਤਤ੍ਥ ਭਿਕ੍ਖੂਨਂ ਓਵਾਦਦਾਨਵਸੇਨ ਅਤ੍ਤਨੋ ਪਟਿਪਤ੍ਤਿਦੀਪਨਾਦਿਵਸੇਨ ਚ ਭਾਸਿਤਗਾਥਾ ਏਕਜ੍ਝਂ ਕਤ੍ਵਾ ਅਨੁਕ੍ਕਮੇਵ ਖੁਦ੍ਦਕਨਿਕਾਯਸਙ੍ਗਾਯਨਕਾਲੇ ਥੇਰਗਾਥਾਸੁ ਸਙ੍ਗੀਤਿਂ ਆਰੋਪੇਨ੍ਤੋ –
੧੦੧੭. ‘‘ਪਿਸੁਣੇਨ ਚ ਕੋਧਨੇਨ ਚ, ਮਚ੍ਛਰਿਨਾ ਚ ਵਿਭੂਤਨਨ੍ਦਿਨਾ;
ਸਖਿਤਂ ਨ ਕਰੇਯ੍ਯ ਪਣ੍ਡਿਤੋ, ਪਾਪੋ ਕਾਪੁਰਿਸੇਨ ਸਙ੍ਗਮੋ.
੧੦੧੮. ‘‘ਸਦ੍ਧੇਨ ਚ ਪੇਸਲੇਨ ਚ, ਪਞ੍ਞਵਤਾ ਬਹੁਸ੍ਸੁਤੇਨ ਚ;
ਸਖਿਤਂ ਕਰੇਯ੍ਯ ਪਣ੍ਡਿਤੋ, ਭਦ੍ਦੋ ਸਪ੍ਪੁਰਿਸੇਨ ਸਙ੍ਗਮੋ.
੧੦੧੯. ‘‘ਪਸ੍ਸ ਚਿਤ੍ਤਕਤਂ ਬਿਮ੍ਬਂ, ਅਰੁਕਾਯਂ ਸਮੁਸ੍ਸਿਤਂ;
ਆਤੁਰਂ ਬਹੁਸਙ੍ਕਪ੍ਪਂ, ਯਸ੍ਸ ਨਤ੍ਥਿ ਧੁਵਂ ਠਿਤਿ.
੧੦੨੦. ‘‘ਪਸ੍ਸ ਚਿਤ੍ਤਕਤਂ ਰੂਪਂ, ਮਣਿਨਾ ਕੁਣ੍ਡਲੇਨ ਚ;
ਅਟ੍ਠਿਤਚੇਨ ਓਨਦ੍ਧਂ, ਸਹ ਵਤ੍ਥੇਹਿ ਸੋਭਤਿ.
੧੦੨੧. ‘‘ਅਲਤ੍ਤਕਕਤਾ ਪਾਦਾ, ਮੁਖਂ ਚੁਣ੍ਣਕਮਕ੍ਖਿਤਂ;
ਅਲਂ ਬਾਲਸ੍ਸ ਮੋਹਾਯ, ਨੋ ਚ ਪਾਰਗਵੇਸਿਨੋ.
੧੦੨੨. ‘‘ਅਟ੍ਠਪਦਕਤਾ ਕੇਸਾ, ਨੇਤ੍ਤਾ ਅਞ੍ਜਨਮਕ੍ਖਿਤਾ;
ਅਲਂ ਬਾਲਸ੍ਸ ਮੋਹਾਯ, ਨੋ ਚ ਪਾਰਗਵੇਸਿਨੋ.
੧੦੨੩. ‘‘ਅਞ੍ਜਨੀਵ ਨਵਾ ਚਿਤ੍ਤਾ, ਪੂਤਿਕਾਯੋ ਅਲਙ੍ਕਤੋ;
ਅਲਂ ਬਾਲਸ੍ਸ ਮੋਹਾਯ, ਨੋ ਚ ਪਾਰਗਵੇਸਿਨੋ.
‘‘ਓਦਹਿ ਮਿਗਵੋ ਪਾਸਂ, ਨਾਸਦਾ ਵਾਗੁਰਂ ਮਿਗੋ;
ਭੁਤ੍ਵਾ ਨਿਵਾਪਂ ਗਚ੍ਛਾਮ, ਕਨ੍ਦਨ੍ਤੇ ਮਿਗਬਨ੍ਧਕੇ.
‘‘ਛਿਨ੍ਨੋ ਪਾਸੋ ਮਿਗਵਸ੍ਸ, ਨਾਸਦਾ ਵਾਗੁਰਂ ਮਿਗੋ;
ਭੁਤ੍ਵਾ ਨਿਵਾਪਂ ਗਚ੍ਛਾਮ, ਸੋਚਨ੍ਤੇ ਮਿਗਲੁਦ੍ਦਕੇ.
੧੦੨੪. ‘‘ਬਹੁਸ੍ਸੁਤੋ ਚਿਤ੍ਤਕਥੀ, ਬੁਦ੍ਧਸ੍ਸ ਪਰਿਚਾਰਕੋ;
ਪਨ੍ਨਭਾਰੋ ਵਿਸਞ੍ਞੁਤ੍ਤੋ, ਸੇਯ੍ਯਂ ਕਪ੍ਪੇਤਿ ਗੋਤਮੋ.
੧੦੨੫. ‘‘ਖੀਣਾਸਵੋ ਵਿਸਞ੍ਞੁਤ੍ਤੋ, ਸਙ੍ਗਾਤੀਤੋ ਸੁਨਿਬ੍ਬੁਤੋ;
ਧਾਰੇਤਿ ਅਨ੍ਤਿਮਂ ਦੇਹਂ, ਜਾਤਿਮਰਣਪਾਰਗੂ.
੧੦੨੬. ‘‘ਯਸ੍ਮਿਂ ਪਤਿਟ੍ਠਿਤਾ ਧਮ੍ਮਾ, ਬੁਦ੍ਧਸ੍ਸਾਦਿਚ੍ਚਬਨ੍ਧੁਨੋ;
ਨਿਬ੍ਬਾਨਗਮਨੇ ਮਗ੍ਗੇ, ਸੋਯਂ ਤਿਟ੍ਠਤਿ ਗੋਤਮੋ.
੧੦੨੭. ‘‘ਦ੍ਵਾਸੀਤਿ ਬੁਦ੍ਧਤੋ ਗਣ੍ਹਿਂ, ਦ੍ਵੇ ਸਹਸ੍ਸਾਨਿ ਭਿਕ੍ਖੁਤੋ;
ਚਤੁਰਾਸੀਤਿਸਹਸ੍ਸਾਨਿ, ਯੇ ਮੇ ਧਮ੍ਮਾ ਪਵਤ੍ਤਿਨੋ.
੧੦੨੮. ‘‘ਅਪ੍ਪਸ੍ਸੁਤਾਯਂ ਪੁਰਿਸੋ, ਬਲਿਬਦ੍ਦੋਵ ਜੀਰਤਿ;
ਮਂਸਾਨਿ ਤਸ੍ਸ ਵਡ੍ਢਨ੍ਤਿ, ਪਞ੍ਞਾ ਤਸ੍ਸ ਨ ਵਡ੍ਢਤਿ.
੧੦੨੯. ‘‘ਬਹੁਸ੍ਸੁਤੋ ਅਪ੍ਪਸ੍ਸੁਤਂ, ਯੋ ਸੁਤੇਨਾਤਿਮਞ੍ਞਤਿ;
ਅਨ੍ਧੋ ਪਦੀਪਧਾਰੋਵ, ਤਥੇਵ ਪਟਿਭਾਤਿ ਮਂ.
੧੦੩੦. ‘‘ਬਹੁਸ੍ਸੁਤਂ ਉਪਾਸੇਯ੍ਯ, ਸੁਤਞ੍ਚ ਨ ਵਿਨਾਸਯੇ;
ਤਂ ਮੂਲਂ ਬ੍ਰਹ੍ਮਚਰਿਯਸ੍ਸ, ਤਸ੍ਮਾ ਧਮ੍ਮਧਰੋ ਸਿਯਾ.
੧੦੩੧. ‘‘ਪੁਬ੍ਬਾਪਰਞ੍ਞੂ ਅਤ੍ਥਞ੍ਞੂ, ਨਿਰੁਤ੍ਤਿਪਦਕੋਵਿਦੋ;
ਸੁਗ੍ਗਹੀਤਞ੍ਚ ਗਣ੍ਹਾਤਿ, ਅਤ੍ਥਞ੍ਚੋਪਪਰਿਕ੍ਖਤਿ.
੧੦੩੨. ‘‘ਖਨ੍ਤ੍ਯਾ ਛਨ੍ਦਿਕਤੋ ਹੋਤਿ, ਉਸ੍ਸਹਿਤ੍ਵਾ ਤੁਲੇਤਿ ਤਂ;
ਸਮਯੇ ਸੋ ਪਦਹਤਿ, ਅਜ੍ਝਤ੍ਤਂ ਸੁਸਮਾਹਿਤੋ.
੧੦੩੩. ‘‘ਬਹੁਸ੍ਸੁਤਂ ਧਮ੍ਮਧਰਂ, ਸਪ੍ਪਞ੍ਞਂ ਬੁਦ੍ਧਸਾਵਕਂ;
ਧਮ੍ਮਵਿਞ੍ਞਾਣਮਾਕਙ੍ਖਂ, ਤਂ ਭਜੇਥ ਤਥਾਵਿਧਂ.
੧੦੩੪. ‘‘ਬਹੁਸ੍ਸੁਤੋ ਧਮ੍ਮਧਰੋ, ਕੋਸਾਰਕ੍ਖੋ ਮਹੇਸਿਨੋ;
ਚਕ੍ਖੁ ਸਬ੍ਬਸ੍ਸ ਲੋਕਸ੍ਸ, ਪੂਜਨੀਯੋ ਬਹੁਸ੍ਸੁਤੋ.
੧੦੩੫. ‘‘ਧਮ੍ਮਾਰਾਮੋ ਧਮ੍ਮਰਤੋ, ਧਮ੍ਮਂ ਅਨੁਵਿਚਿਨ੍ਤਯਂ;
ਧਮ੍ਮਂ ਅਨੁਸ੍ਸਰਂ ਭਿਕ੍ਖੁ, ਸਦ੍ਧਮ੍ਮਾ ਨ ਪਰਿਹਾਯਤਿ.
੧੦੩੬. ‘‘ਕਾਯਮਚ੍ਛੇਰਗਰੁਨੋ, ਹਿਯ੍ਯਮਾਨੇ ਅਨੁਟ੍ਠਹੇ;
ਸਰੀਰਸੁਖਗਿਦ੍ਧਸ੍ਸ, ਕੁਤੋ ਸਮਣਫਾਸੁਤਾ.
੧੦੩੭. ‘‘ਨ ਪਕ੍ਖਨ੍ਤਿ ਦਿਸਾ ਸਬ੍ਬਾ, ਧਮ੍ਮਾ ਨ ਪਟਿਭਨ੍ਤਿ ਮਂ;
ਗਤੇ ਕਲ੍ਯਾਣਮਿਤ੍ਤਮ੍ਹਿ, ਅਨ੍ਧਕਾਰਂਵ ਖਾਯਤਿ.
੧੦੩੮. ‘‘ਅਬ੍ਭਤੀਤਸਹਾਯਸ੍ਸ, ਅਤੀਤਗਤਸਤ੍ਥੁਨੋ;
ਨਤ੍ਥਿ ਏਤਾਦਿਸਂ ਮਿਤ੍ਤਂ, ਯਥਾ ਕਾਯਗਤਾ ਸਤਿ.
੧੦੩੯. ‘‘ਯੇ ਪੁਰਾਣਾ ਅਤੀਤਾ ਤੇ, ਨਵੇਹਿ ਨ ਸਮੇਤਿ ਮੇ;
ਸ੍ਵਜ੍ਜ ਏਕੋਵ ਝਾਯਾਮਿ, ਵਸ੍ਸੁਪੇਤੋਵ ਪਕ੍ਖਿਮਾ.
੧੦੪੦. ‘‘ਦਸ੍ਸਨਾਯ ਅਭਿਕ੍ਕਨ੍ਤੇ, ਨਾਨਾਵੇਰਜ੍ਜਕੇ ਬਹੂ;
ਮਾ ਵਾਰਯਿਤ੍ਥ ਸੋਤਾਰੋ, ਪਸ੍ਸਨ੍ਤੁ ਸਮਯੋ ਮਮਂ.
੧੦੪੧. ‘‘ਦਸ੍ਸਨਾਯ ਅਭਿਕ੍ਕਨ੍ਤੇ, ਨਾਨਾਵੇਰਜ੍ਜਕੇ ਪੁਥੁ;
ਕਰੋਤਿ ਸਤ੍ਥਾ ਓਕਾਸਂ, ਨ ਨਿਵਾਰੇਤਿ ਚਕ੍ਖੁਮਾ.
੧੦੪੨. ‘‘ਪਣ੍ਣਵੀਸਤਿ ਵਸ੍ਸਾਨਿ, ਸੇਖਭੂਤਸ੍ਸ ਮੇ ਸਤੋ;
ਨ ਕਾਮਸਞ੍ਞਾ ਉਪ੍ਪਜ੍ਜਿ, ਪਸ੍ਸ ਧਮ੍ਮਸੁਧਮ੍ਮਤਂ.
੧੦੪੩. ‘‘ਪਣ੍ਣਵੀਸਤਿ ਵਸ੍ਸਾਨਿ, ਸੇਖਭੂਤਸ੍ਸ ਮੇ ਸਤੋ;
ਨ ਦੋਸਸਞ੍ਞਾ ਉਪ੍ਪਜ੍ਜਿ, ਪਸ੍ਸ ਧਮ੍ਮਸੁਧਮ੍ਮਤਂ.
੧੦੪੪. ‘‘ਪਣ੍ਣਵੀਸਤਿ ਵਸ੍ਸਾਨਿ, ਭਗਵਨ੍ਤਂ ਉਪਟ੍ਠਹਿਂ;
ਮੇਤ੍ਤੇਨ ਕਾਯਕਮ੍ਮੇਨ, ਛਾਯਾਵ ਅਨਪਾਯਿਨੀ.
੧੦੪੫. ‘‘ਪਣ੍ਣਵੀਸਤਿ ਵਸ੍ਸਾਨਿ, ਭਗਵਨ੍ਤਂ ਉਪਟ੍ਠਹਿਂ;
ਮੇਤ੍ਤੇਨ ਵਚੀਕਮ੍ਮੇਨ, ਛਾਯਾਵ ਅਨਪਾਯਿਨੀ.
੧੦੪੬. ‘‘ਪਣ੍ਣਵੀਸਤਿ ਵਸ੍ਸਾਨਿ, ਭਗਵਨ੍ਤਂ ਉਪਟ੍ਠਹਿਂ;
ਮੇਤ੍ਤੇਨ ਮਨੋਕਮ੍ਮੇਨ, ਛਾਯਾਵ ਅਨਪਾਯਿਨੀ.
੧੦੪੭. ‘‘ਬੁਦ੍ਧਸ੍ਸ ਚਙ੍ਕਮਨ੍ਤਸ੍ਸ, ਪਿਟ੍ਠਿਤੋ ਅਨੁਚਙ੍ਕਮਿਂ;
ਧਮ੍ਮੇ ਦੇਸਿਯਮਾਨਮ੍ਹਿ, ਞਾਣਂ ਮੇ ਉਦਪਜ੍ਜਥ.
੧੦੪੮. ‘‘ਅਹਂ ਸਕਰਣੀਯੋਮ੍ਹਿ, ਸੇਖੋ ਅਪ੍ਪਤ੍ਤਮਾਨਸੋ;
ਸਤ੍ਥੁ ਚ ਪਰਿਨਿਬ੍ਬਾਨਂ, ਯੋ ਅਮ੍ਹਂ ਅਨੁਕਮ੍ਪਕੋ.
੧੦੪੯. ‘‘ਤਦਾਸਿ ਯਂ ਭਿਂਸਨਕਂ, ਤਦਾਸਿ ਲੋਮਹਂਸਨਂ;
ਸਬ੍ਬਕਾਰਵਰੂਪੇਤੇ, ਸਮ੍ਬੁਦ੍ਧੇ ਪਰਿਨਿਬ੍ਬੁਤੇ.
੧੦੫੦. ‘‘ਬਹੁਸ੍ਸੁਤੋ ਧਮ੍ਮਧਰੋ, ਕੋਸਾਰਕ੍ਖੋ ਮਹੇਸਿਨੋ;
ਚਕ੍ਖੁ ਸਬ੍ਬਸ੍ਸ ਲੋਕਸ੍ਸ, ਆਨਨ੍ਦੋ ਪਰਿਨਿਬ੍ਬੁਤੋ.
੧੦੫੧. ‘‘ਬਹੁਸ੍ਸੁਤੋ ਧਮ੍ਮਧਰੋ, ਕੋਸਾਰਕ੍ਖੋ ਮਹੇਸਿਨੋ;
ਚਕ੍ਖੁ ਸਬ੍ਬਸ੍ਸ ਲੋਕਸ੍ਸ, ਅਨ੍ਧਕਾਰੇ ਤਮੋਨੁਦੋ.
੧੦੫੨. ‘‘ਗਤਿਮਨ੍ਤੋ ਸਤਿਮਨ੍ਤੋ, ਧਿਤਿਮਨ੍ਤੋ ਚ ਯੋ ਇਸਿ;
ਸਦ੍ਧਮ੍ਮਧਾਰਕੋ ਥੇਰੋ, ਆਨਨ੍ਦੋ ਰਤਨਾਕਰੋ.
੧੦੫੩. ‘‘ਪਰਿਚਿਣ੍ਣੋ ਮਯਾ ਸਤ੍ਥਾ, ਕਤਂ ਬੁਦ੍ਧਸ੍ਸ ਸਾਸਨਂ;
ਓਹਿਤੋ ਗਰੁਕੋ ਭਾਰੋ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ. –
ਇਮਾ ਗਾਥਾ ਅਭਾਸਿ.
ਤਤ੍ਥ ਪਿਸੁਣੇਨ ਚਾਤਿ ਆਦਿਤੋ ਦ੍ਵੇ ਗਾਥਾ ਛਬ੍ਬਗ੍ਗਿਯੇ ਭਿਕ੍ਖੂ ਦੇਵਦਤ੍ਤਪਕ੍ਖਿਯੇਹਿ ਭਿਕ੍ਖੂਹਿ ਸਦ੍ਧਿਂ ਸਂਸਗ੍ਗਂ ਕਰੋਨ੍ਤੇ ਦਿਸ੍ਵਾ ਤੇਸਂ ਓਵਾਦਦਾਨਵਸੇਨ ਵੁਤ੍ਤਾ. ਤਤ੍ਥ ਪਿਸੁਣੇਨਾਤਿ ਪਿਸੁਣਾਯ ਵਾਚਾਯ. ਤਾਯ ਹਿ ਯੁਤ੍ਤੋ ਪੁਗ੍ਗਲੋ ‘‘ਪਿਸੁਣੋ’’ਤਿ ਵੁਤ੍ਤੋ ਯਥਾ ਨੀਲਗੁਣਯੁਤ੍ਤੋ ਪਟੋ ਨੀਲੋਤਿ. ਕੋਧਨੇਨਾਤਿ ਕੁਜ੍ਝਨਸੀਲੇਨ. ਅਤ੍ਤਸਮ੍ਪਤ੍ਤਿਨਿਗੂਹਣਲਕ੍ਖਣਸ੍ਸ ਮਚ੍ਛੇਰਸ੍ਸ ਸਮ੍ਭਵਤੋ ਮਚ੍ਛਰਿਨਾ. ਵਿਭੂਤਨਨ੍ਦਿਨਾਤਿ ਸਤ੍ਤਾਨਂ ਵਿਭੂਤਂ ਵਿਭਵਨਂ ਵਿਨਾਸਂ ਇਚ੍ਛਨ੍ਤੇਨ, ਵਿਭੂਤਂ ਵਾ ਵਿਸੁਂ ਭਾਵੋ ਭੇਦੋ, ਤਂ ਨਨ੍ਦਨੇਨ, ਸਬ੍ਬਮੇਤਂ ਦੇਵਦਤ੍ਤਪਕ੍ਖਿਯੇਵ ਸਨ੍ਧਾਯ ਵੁਤ੍ਤਂ. ਤੇ ਹਿ ਪਞ੍ਚਵਤ੍ਥੁਦੀਪਨਾਯ ਬਹੂ ਜਨੇ ਸਮ੍ਮਾਪਟਿਪਨ੍ਨੇ ਭਿਨ੍ਦਨ੍ਤਾ ਸਤ੍ਥਰਿ ਬਹਿਦ੍ਧਤਾਯ ਥਦ੍ਧਮਚ੍ਛਰਿਯਾਦਿਮਚ੍ਛਰਿਯਪਕਤਾ ਮਹਾਜਨਸ੍ਸ ਮਹਤੋ ਅਨਤ੍ਥਾਯ ਪਟਿਪਜ੍ਜਿਂਸੁ. ਸਖਿਤਨ੍ਤਿ ਸਹਾਯਭਾਵਂ ਸਂਸਗ੍ਗਂ ਨ ਕਰੇਯ੍ਯ, ਕਿਂਕਾਰਣਾ? ਪਾਪੋ ਕਾਪੁਰਿਸੇਨ ਸਙ੍ਗਮੋ ਕਾਪੁਰਿਸੇਨ ਪਾਪਪੁਗ੍ਗਲੇਨ ਸਮਾਗਮੋ ਨਿਹੀਨੋ ਲਾਮਕੋ. ਯੇ ਹਿਸ੍ਸ ਦਿਟ੍ਠਾਨੁਗਤਿਂ ਆਪਜ੍ਜਨ੍ਤਿ. ਤੇਸਂ ਦੁਚਿਨ੍ਤਿਤਾਦਿਭੇਦਂ ਬਾਲਲਕ੍ਖਣਮੇਵ ਆਵਹਤਿ, ਪਗੇਵ ਵਚਨਕਰਸ੍ਸ. ਤੇਨਾਹ ਭਗਵਾ – ‘‘ਯਾਨਿ ਕਾਨਿਚਿ, ਭਿਕ੍ਖਵੇ, ਭਯਾਨਿ ਉਪ੍ਪਜ੍ਜਨ੍ਤਿ, ਸਬ੍ਬਾਨਿ ਤਾਨਿ ਬਾਲਤੋ ਉਪ੍ਪਜ੍ਜਨ੍ਤਿ, ਨੋ ਪਣ੍ਡਿਤਤੋ’’ਤਿਆਦਿ (ਅ. ਨਿ. ੩.੧).
ਯੇਨ ਪਨ ਸਂਸਗ੍ਗੋ ਕਾਤਬ੍ਬੋ, ਤਂ ਦਸ੍ਸੇਤੁਂ ‘‘ਸਦ੍ਧੇਨ ਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਸਦ੍ਧੇਨਾਤਿ ਕਮ੍ਮਕਮ੍ਮਫਲਸਦ੍ਧਾਯ ਚੇਵ, ਰਤਨਤ੍ਤਯਸਦ੍ਧਾਯ ਚ ਸਮਨ੍ਨਾਗਤੇਨ. ਪੇਸਲੇਨਾਤਿ ਪਿਯਸੀਲੇਨ ਸੀਲਸਮ੍ਪਨ੍ਨੇਨ. ਪਞ੍ਞਵਤਾਤਿ ਉਦਯਤ੍ਥਗਾਮਿਨਿਯਾ ਨਿਬ੍ਬੇਧਿਕਾਯ ਪਞ੍ਞਾਯ ਵਸੇਨ ਪਞ੍ਞਾਸਮ੍ਪਨ੍ਨੇਨ. ਬਹੁਸ੍ਸੁਤੇਨਾਤਿ ਪਰਿਯਤ੍ਤਿਪਟਿਵੇਧਬਾਹੁਸਚ੍ਚਾਨਂ ਪਾਰਿਪੂਰਿਯਾ ਬਹੁਸ੍ਸੁਤੇਨ. ਭਦ੍ਦੋਤਿ ਤੇਨ ਤਾਦਿਸੇਨ ਸਾਧੁਨਾ ਸਙ੍ਗਮੋ ਭਦ੍ਦੋ ਸੁਨ੍ਦਰੋ ਕਲ੍ਯਾਣੋ ਦਿਟ੍ਠਧਮ੍ਮਿਕਾਦਿਭੇਦਂ ਅਤ੍ਥਂ ਆਵਹਤੀਤਿ ਅਧਿਪ੍ਪਾਯੋ.
ਪਸ੍ਸ ਚਿਤ੍ਤਕਤਨ੍ਤਿਆਦਿਕਾ ਸਤ੍ਤ ਗਾਥਾ ਅਤ੍ਤਨੋ ਰੂਪਸਮ੍ਪਤ੍ਤਿਂ ਦਿਸ੍ਵਾ ਕਾਮਸਞ੍ਞਂ ਉਪ੍ਪਾਦੇਨ੍ਤਿਯਾ ਉਤ੍ਤਰਾਯ ਨਾਮ ਉਪਾਸਿਕਾਯ ਕਾਯਵਿਚ੍ਛਨ੍ਦਜਨਨਤ੍ਥਂ ਭਾਸਿਤਾ. ‘‘ਅਮ੍ਬਪਾਲਿਂ ਗਣਿਕਂ ਦਿਸ੍ਵਾ ਵਿਕ੍ਖਿਤ੍ਤਚਿਤ੍ਤਾਨਂ ਓਵਾਦਦਾਨਤ੍ਥ’’ਨ੍ਤਿਪਿ ਵਦਨ੍ਤਿ. ਤਾ ਹੇਟ੍ਠਾ ਵੁਤ੍ਤਤ੍ਥਾ ਏਵ.
ਬਹੁਸ੍ਸੁਤੋ ਚਿਤ੍ਤਕਥੀਤਿਆਦਿਕਾ ਦ੍ਵੇ ਗਾਥਾ ਥੇਰੇਨ ਅਰਹਤ੍ਤਂ ਪਤ੍ਵਾ ਉਦਾਨਵਸੇਨ ਭਾਸਿਤਾ. ਤਤ੍ਥ ਪਰਿਚਾਰਕੋਤਿ ਉਪਟ੍ਠਾਕੋ. ਸੇਯ੍ਯਂ ਕਪ੍ਪੇਤੀਤਿ ਅਰਹਤ੍ਤਪ੍ਪਤ੍ਤਿਸਮਨਨ੍ਤਰਂ ਸਯਿਤਤ੍ਤਾ ਵੁਤ੍ਤਂ. ਥੇਰੋ ਹਿ ਬਹੁਦੇਵ ਰਤ੍ਤਿਂ ਚਙ੍ਕਮੇਨ ਵੀਤਿਨਾਮੇਤ੍ਵਾ ਸਰੀਰਂ ਉਤੁਂ ਗਾਹਾਪੇਤੁਂ ਓਵਰਕਂ ਪਵਿਸਿਤ੍ਵਾ ਸਯਿਤੁਂ ਮਞ੍ਚਕੇ ਨਿਸਿਨ੍ਨੋ ਪਾਦਾ ਚ ਭੂਮਿਤੋ ਮੁਤ੍ਤਾ, ਅਪ੍ਪਤ੍ਤਞ੍ਚ ਸੀਸਂ ਬਿਮ੍ਬੋਹਨਂ, ਏਤ੍ਥਨ੍ਤਰੇ ਅਰਹਤ੍ਤਂ ਪਤ੍ਵਾ ਸਯਿ.
ਖੀਣਾਸਵੋਤਿ ਪਰਿਕ੍ਖੀਣਚਤੁਰਾਸਵੋ, ਤਤੋ ਏਵ ਚਤੂਹਿਪਿ ਯੋਗੇਹਿ ਵਿਸਂਯੁਤ੍ਤੋ, ਰਾਗਸਙ੍ਗਾਦੀਨਂ ਅਤਿਕ੍ਕਨ੍ਤਤ੍ਤਾ ਸਙ੍ਗਾਤੀਤੋ, ਸਬ੍ਬਸੋ ਕਿਲੇਸਪਰਿਲ਼ਾਹਸ੍ਸ ਵੂਪਸਨ੍ਤਤ੍ਤਾ ਸੁਨਿਬ੍ਬੁਤੋ ਸੀਤਿਭੂਤੋਤਿ ਅਤ੍ਥੋ.
ਯਸ੍ਮਿਂ ਪਤਿਟ੍ਠਿਤਾ ਧਮ੍ਮਾਤਿ ਥੇਰਂ ਉਦ੍ਦਿਸ੍ਸ ਖੀਣਾਸਵਮਹਾਬ੍ਰਹ੍ਮੁਨਾ ਭਾਸਿਤਾ ਗਾਥਾ. ਉਪਟ੍ਠਿਤਾਯ ਹਿ ਧਮ੍ਮਸਙ੍ਗੀਤਿਯਾ ਥੇਰਂ ਉਦ੍ਦਿਸ੍ਸ ਯੇਹਿ ਭਿਕ੍ਖੂਹਿ ‘‘ਏਕੋ ਭਿਕ੍ਖੁ ਵਿਸ੍ਸਗਨ੍ਧਂ ਵਾਯਤੀ’’ਤਿ ਵੁਤ੍ਤਂ. ਅਥ ਥੇਰੋ ਅਧਿਗਤੇ ਅਰਹਤ੍ਤੇ ਸਤ੍ਤਪਣ੍ਣਿਗੁਹਾਦ੍ਵਾਰਂ ਸਙ੍ਘਸ੍ਸ ਸਾਮਗ੍ਗੀਦਾਨਤ੍ਥਂ ਆਗਤੋ, ਤਸ੍ਸ ਖੀਣਾਸਵਭਾਵਪ੍ਪਕਾਸਨੇਨ ਸੁਦ੍ਧਾਵਾਸਮਹਾਬ੍ਰਹ੍ਮਾ. ਤੇ ਭਿਕ੍ਖੂ ਲਜ੍ਜਾਪੇਨ੍ਤੋ ‘‘ਯਸ੍ਮਿਂ ਪਤਿਟ੍ਠਿਤਾ ਧਮ੍ਮਾ’’ਤਿ ਗਾਥਮਾਹ. ਤਸ੍ਸਤ੍ਥੋ – ਬੁਦ੍ਧਸ੍ਸ ਭਗਵਤੋ ਧਮ੍ਮਾ ਤੇਨੇਵ ਅਧਿਗਤਾ ਪਵੇਦਿਤਾ ਚ ਪਟਿਵੇਧਪਰਿਯਤ੍ਤਿਧਮ੍ਮਾ. ਯਸ੍ਮਿਂ ਪੁਰਿਸਵਿਸੇਸੇ ਪਤਿਟ੍ਠਿਤਾ, ਸੋਯਂ ਗੋਤ੍ਤਤੋ ਗੋਤਮੋ ਧਮ੍ਮਭਣ੍ਡਾਗਾਰਿਕੋ ਸਉਪਾਦਿਸੇਸਨਿਬ੍ਬਾਨਸ੍ਸ ਅਧਿਗਤਤ੍ਤਾ ਇਦਾਨਿ ਅਨੁਪਾਦਿਸੇਸਨਿਬ੍ਬਾਨਗਮਨੇ ਮਗ੍ਗੇ ਪਤਿਟ੍ਠਹਿ, ਤਸ੍ਸ ਏਕਂਸਭਾਗੀਤਿ.
ਅਥੇਕਦਿਵਸਂ ਗੋਪਕਮੋਗ੍ਗਲ੍ਲਾਨੋ ਨਾਮ ਬ੍ਰਾਹ੍ਮਣੋ ਥੇਰਂ ਪੁਚ੍ਛਿ – ‘‘ਤ੍ਵਂ ਬਹੁਸ੍ਸੁਤੋਤਿ ਬੁਦ੍ਧਸ੍ਸ ਸਾਸਨੇ ਪਾਕਟੋ, ਕਿਤ੍ਤਕਾ ਧਮ੍ਮਾ ਤੇ ਸਤ੍ਥਾਰਾ ਭਾਸਿਤਾ, ਤਯਾ ਧਾਰਿਤਾ’’ਤਿ? ਤਸ੍ਸ ਥੇਰੋ ਪਟਿਵਚਨਂ ਦੇਨ੍ਤੋ ‘‘ਦ੍ਵਾਸੀਤੀ’’ਤਿ ਗਾਥਮਾਹ. ਤਤ੍ਥ ਦ੍ਵਾਸੀਤਿ ਸਹਸ੍ਸਾਨੀਤਿ ਯੋਜਨਾ, ਬੁਦ੍ਧਤੋ ਗਣ੍ਹਿਨ੍ਤਿ ਸਮ੍ਮਾਸਮ੍ਬੁਦ੍ਧਤੋ ਉਗ੍ਗਣ੍ਹਿਂ ਦ੍ਵਿਸਹਸ੍ਸਾਧਿਕਾਨਿ ਅਸੀਤਿਧਮ੍ਮਕ੍ਖਨ੍ਧਸਹਸ੍ਸਾਨਿ ਸਤ੍ਥੁ ਸਨ੍ਤਿਕਾ ਅਧਿਗਣ੍ਹਿਨ੍ਤਿ ਅਤ੍ਥੋ. ਦ੍ਵੇ ਸਹਸ੍ਸਾਨਿ ਭਿਕ੍ਖੁਤੋਤਿ ਦ੍ਵੇ ਧਮ੍ਮਕ੍ਖਨ੍ਧਸਹਸ੍ਸਾਨਿ ਭਿਕ੍ਖੁਤੋ ਗਣ੍ਹਿਂ, ਧਮ੍ਮਸੇਨਾਪਤਿਆਦੀਨਂ ਭਿਕ੍ਖੂਨਂ ਸਨ੍ਤਿਕਾ ਅਧਿਗਚ੍ਛਿਂ. ਚਤੁਰਾਸੀਤਿਸਹਸ੍ਸਾਨੀਤਿ ਤਦੁਭਯਂ ਸਮੋਧਾਨੇਤ੍ਵਾ ਚਤੁਸਹਸ੍ਸਾਧਿਕਾਨਿ ਅਸੀਤਿਸਹਸ੍ਸਾਨਿ. ਯੇ ਮੇ ਧਮ੍ਮਾ ਪਵਤ੍ਤਿਨੋਤਿ ਯੇ ਯਥਾਵੁਤ੍ਤਪਰਿਮਾਣਾ ਧਮ੍ਮਕ੍ਖਨ੍ਧਾ ਮਯ੍ਹਂ ਪਗੁਣਾ ਵਾਚੁਗ੍ਗਤਾ ਜਿਵ੍ਹਗ੍ਗੇ ਪਰਿਵਤ੍ਤਨ੍ਤੀਤਿ.
ਅਥੇਕਦਾ ਥੇਰੋ ਸਾਸਨੇ ਪਬ੍ਬਜਿਤ੍ਵਾ ਵਿਪਸ੍ਸਨਾਧੁਰੇਪਿ ਗਨ੍ਥਧੁਰੇਪਿ ਅਨਨੁਯੁਤ੍ਤਂ ਏਕਂ ਪੁਗ੍ਗਲਂ ਦਿਸ੍ਵਾ ਬਾਹੁਸਚ੍ਚਾਭਾਵੇ ਆਦੀਨਵਂ ਪਕਾਸੇਨ੍ਤੋ ‘‘ਅਪ੍ਪਸ੍ਸੁਤਾਯ’’ਨ੍ਤਿ ਗਾਥਮਾਹ. ਤਤ੍ਥ ਅਪ੍ਪਸ੍ਸੁਤਾਯਨ੍ਤਿ ਏਕਸ੍ਸ ਦ੍ਵਿਨ੍ਨਂ ਵਾ ਪਣ੍ਣਾਸਾਨਂ, ਅਥ ਵਾ ਪਨ ਵਗ੍ਗਾਨਂ ਅਨ੍ਤਮਸੋ ਏਕਸ੍ਸ ਦ੍ਵਿਨ੍ਨਂ ਵਾ ਸੁਤ੍ਤਨ੍ਤਾਨਮ੍ਪਿ ਉਗ੍ਗਹਿਤਾਨਂ ਅਭਾਵੇਨ ਅਪ੍ਪਸ੍ਸੁਤੋ ਅਯਂ, ਕਮ੍ਮਟ੍ਠਾਨਂ ਪਨ ਉਗ੍ਗਹੇਤ੍ਵਾ ਅਨੁਯੁਞ੍ਜਨ੍ਤੋ ਬਹੁਸ੍ਸੁਤੋਵ. ਬਲਿਬਦ੍ਦੋਵ ਜੀਰਤੀਤਿ ਯਥਾ ਬਲਿਬਦ੍ਦੋ ਜੀਰਮਾਨੋ ਵਡ੍ਢਮਾਨੋ ਨੇਵ ਮਾਤੁ ਨ ਪਿਤੁ, ਨ ਸੇਸਞਾਤਕਾਨਂ ਅਤ੍ਥਾਯ ਵਡ੍ਢਤਿ, ਅਥ ਖੋ ਨਿਰਤ੍ਥਕਮੇਵ ਜੀਰਤਿ; ਏਵਮੇਵਂ ਅਯਮ੍ਪਿ ਨ ਉਪਜ੍ਝਾਯਵਤ੍ਤਂ ਕਰੋਤਿ, ਨ ਆਚਰਿਯਵਤ੍ਤਂ, ਨ ਆਗਨ੍ਤੁਕਵਤ੍ਤਾਦੀਨਿ, ਨ ਭਾਵਨਂ ਅਨੁਯੁਞ੍ਜਤਿ, ਨਿਰਤ੍ਥਕਮੇਵ ਜੀਰਤਿ. ਮਂਸਾਨਿ ਤਸ੍ਸ ਵਡ੍ਢਨ੍ਤੀਤਿ ਯਥਾ ਬਲਿਬਦ੍ਦਸ੍ਸ ‘‘ਕਸਨਭਾਰਵਹਨਾਦੀਸੁ ਅਸਮਤ੍ਥੋ ਏਸੋ’’ਤਿ ਅਰਞ੍ਞੇ ਵਿਸ੍ਸਟ੍ਠਸ੍ਸ ਯਥਾ ਤਥਾ ਵਿਚਰਨ੍ਤਸ੍ਸ ਖਾਦਨ੍ਤਸ੍ਸ ਪਿਵਨ੍ਤਸ੍ਸ ਮਂਸਾਨਿ ਤਸ੍ਸ ਵਡ੍ਢਨ੍ਤਿ; ਏਵਮੇਵਂ ਇਮਸ੍ਸਾਪਿ ਉਪਜ੍ਝਾਯਾਦੀਹਿ ਵਿਸ੍ਸਟ੍ਠਸ੍ਸ ਸਙ੍ਘਂ ਨਿਸ੍ਸਾਯ ਚਤ੍ਤਾਰੋ ਪਚ੍ਚਯੇ ਲਭਿਤ੍ਵਾ ਉਦ੍ਧਂਵਿਰੇਚਨਾਦੀਨਿ ਕਤ੍ਵਾ ਕਾਯਂ ਪੋਸੇਨ੍ਤਸ੍ਸ ਮਂਸਾਨਿ ਵਡ੍ਢਨ੍ਤਿ ਥੂਲਸਰੀਰੋ ਹੁਤ੍ਵਾ ਵਿਚਰਤਿ. ਪਞ੍ਞਾਤਿ ਲੋਕਿਯਲੋਕੁਤ੍ਤਰਾ ਪਨਸ੍ਸ ਪਞ੍ਞਾ ਏਕਙ੍ਗੁਲਿਮਤ੍ਤਾਪਿ ਨ ਵਡ੍ਢਤਿ, ਅਰਞ੍ਞੇ ਗਚ੍ਛਲਤਾਦੀਨਿ ਵਿਯ ਅਸ੍ਸ ਛਦ੍ਵਾਰਾਨਿ ਨਿਸ੍ਸਾਯ ਤਣ੍ਹਾ ਚੇਵ ਨਵਵਿਧਮਾਨੋ ਚ ਵਡ੍ਢਤੀਤਿ ਅਧਿਪ੍ਪਾਯੋ.
ਬਹੁਸ੍ਸੁਤੋਤਿ ਗਾਥਾ ਅਤ੍ਤਨੋ ਬਾਹੁਸਚ੍ਚਂ ਨਿਸ੍ਸਾਯ ਅਞ੍ਞਂ ਅਤਿਮਞ੍ਞਨ੍ਤਂ ਏਕਂ ਭਿਕ੍ਖੁਂ ਉਦ੍ਦਿਸ੍ਸ ਵੁਤ੍ਤਾ. ਤਤ੍ਥ ਸੁਤੇਨਾਤਿ ਸੁਤਹੇਤੁ ਅਤ੍ਤਨੋ ਬਾਹੁਸਚ੍ਚਨਿਮਿਤ੍ਤਂ. ਅਤਿਮਞ੍ਞਤੀਤਿ ਅਤਿਕ੍ਕਮਿਤ੍ਵਾ ਮਞ੍ਞਤਿ ਅਤ੍ਤਾਨਂ ਉਕ੍ਕਂਸੇਨ੍ਤੋ ਪਰਂ ਪਰਿਭਵਤਿ. ਤਥੇਵਾਤਿ ਯਥਾ ਅਨ੍ਧੋ ਅਨ੍ਧਕਾਰੇ ਤੇਲਪਜ੍ਜੋਤਂ ਧਾਰੇਨ੍ਤੋ ਆਲੋਕਦਾਨੇਨ ਪਰੇਸਂਯੇਵ ਅਤ੍ਥਾਵਹੋ, ਨ ਅਤ੍ਤਨੋ, ਤਥੇਵ ਪਰਿਯਤ੍ਤਿਬਾਹੁਸਚ੍ਚੇਨ ਸੁਤਵਾ ਪੁਗ੍ਗਲੋ ਸੁਤੇਨ ਅਨੁਪਪਨ੍ਨੋ ਅਤ੍ਤਨੋ ਅਤ੍ਥਂ ਅਪਰਿਪੂਰੇਨ੍ਤੋ ਅਨ੍ਧੋ ਞਾਣਾਲੋਕਦਾਨੇਨ ਪਰੇਸਂਯੇਵ ਅਤ੍ਥਾਵਹੋ, ਨ ਅਤ੍ਤਨੋ, ਦੀਪਧਾਰੋ ਅਨ੍ਧੋ ਵਿਯ ਮਯ੍ਹਂ ਉਪਟ੍ਠਾਤੀਤਿ.
ਇਦਾਨਿ ਬਾਹੁਸਚ੍ਚੇ ਆਨਿਸਂਸਂ ਦਸ੍ਸੇਨ੍ਤੋ ‘‘ਬਹੁਸ੍ਸੁਤ’’ਨ੍ਤਿ ਗਾਥਮਾਹ. ਤਤ੍ਥ ਉਪਾਸੇਯ੍ਯਾਤਿ ਪਯਿਰੁਪਾਸੇਯ੍ਯ. ਸੁਤਞ੍ਚ ਨ ਵਿਨਾਸਯੇਤਿ ਬਹੁਸ੍ਸੁਤਂ ਪਯਿਰੁਪਾਸਿਤ੍ਵਾ ਲਦ੍ਧਂ ਸੁਤਞ੍ਚ ਨ ਵਿਨਾਸੇਯ੍ਯ, ਨ ਸੁਸ੍ਸੇਯ੍ਯ ਧਾਰਣਪਰਿਚਯਪਰਿਪੁਚ੍ਛਾਮਨਸਿਕਾਰੇਹਿ ਵਡ੍ਢੇਯ੍ਯ. ਤਂ ਮੂਲਂ ਬ੍ਰਹ੍ਮਚਰਿਯਸ੍ਸਾਤਿ ਯਸ੍ਮਾ ਬਹੁਸ੍ਸੁਤਂ ਪਯਿਰੁਪਾਸਿਤ੍ਵਾ ਲਦ੍ਧਂ ਤਂ ਸੁਤਂ ਪਰਿਯਤ੍ਤਿਬਾਹੁਸਚ੍ਚਂ ਮਗ੍ਗਬ੍ਰਹ੍ਮਚਰਿਯਸ੍ਸ ਮੂਲਂ ਪਧਾਨਕਾਰਣਂ. ਤਸ੍ਮਾ ਧਮ੍ਮਧਰੋ ਸਿਯਾ ਵਿਮੁਤ੍ਤਾਯਤਨਸੀਸੇ ਠਤ੍ਵਾ ਯਥਾਸੁਤਸ੍ਸ ਧਮ੍ਮਸ੍ਸ ਧਾਰਣੇ ਪਠਮਂ ਪਰਿਯਤ੍ਤਿਧਮ੍ਮਧਰੋ ਭਵੇਯ੍ਯ.
ਇਦਾਨਿ ਪਰਿਯਤ੍ਤਿਬਾਹੁਸਚ੍ਚੇਨ ਸਾਧੇਤਬ੍ਬਮਤ੍ਥਂ ਦਸ੍ਸੇਤੁਂ ‘‘ਪੁਬ੍ਬਾਪਰਞ੍ਞੂ’’ਤਿਆਦਿ ਵੁਤ੍ਤਂ. ਤਤ੍ਥ ਪੁਬ੍ਬਞ੍ਚ ਅਪਰਞ੍ਚ ਜਾਨਾਤੀਤਿ ਪੁਬ੍ਬਾਪਰਞ੍ਞੂ. ਏਕਿਸ੍ਸਾ ਹਿ ਗਾਥਾਯ ਪੁਬ੍ਬਭਾਗੇ ਅਪਞ੍ਞਾਯਮਾਨੇਪਿ ਪੁਬ੍ਬਭਾਗੇ ਵਾ ਪਞ੍ਞਾਯਮਾਨੇ ਅਪਰਭਾਗੇ ਅਪਞ੍ਞਾਯਮਾਨੇਪਿ ‘‘ਇਮਸ੍ਸ ਅਪਰਭਾਗਸ੍ਸ ਇਮਿਨਾ ਪੁਬ੍ਬਭਾਗੇਨ, ਇਮਸ੍ਸ ਵਾ ਪੁਬ੍ਬਭਾਗਸ੍ਸ ਇਮਿਨਾ ਅਪਰਭਾਗੇਨ ਭਵਿਤਬ੍ਬ’’ਨ੍ਤਿ ਜਾਨਨ੍ਤੋ ਪੁਬ੍ਬਾਪਰਞ੍ਞੂ ਨਾਮ. ਅਤ੍ਤਤ੍ਥਾਦਿਭੇਦਂ ਤਸ੍ਸ ਤਸ੍ਸ ਭਾਸਿਤਸ੍ਸ ਅਤ੍ਥਂ ਜਾਨਾਤੀਤਿ ਅਤ੍ਥਞ੍ਞੂ. ਨਿਰੁਤ੍ਤਿਪਦਕੋਵਿਦੋਤਿ ਨਿਰੁਤ੍ਤਿਯਂ ਸੇਸਪਦੇਸੁਪਿ ਚਾਤਿ ਚਤੂਸੁਪਿ ਪਟਿਸਮ੍ਭਿਦਾਸੁ ਛੇਕੋ. ਸੁਗ੍ਗਹੀਤਞ੍ਚ ਗਣ੍ਹਾਤੀਤਿ ਤੇਨੇਵ ਕੋਵਿਦਭਾਵੇਨ ਅਤ੍ਥਤੋ ਬ੍ਯਞ੍ਜਨਤੋ ਚ ਧਮ੍ਮਂ ਸੁਗਹਿਤਮੇਵ ਕਤ੍ਵਾ ਗਣ੍ਹਾਤਿ. ਅਤ੍ਥਞ੍ਚੋਪਪਰਿਕ੍ਖਤੀਤਿ ਯਥਾਸੁਤਸ੍ਸ ਯਥਾਪਰਿਯਤ੍ਤਸ੍ਸ ਧਮ੍ਮਸ੍ਸ ਅਤ੍ਥਂ ਉਪਪਰਿਕ੍ਖਤਿ ‘‘ਇਤਿ ਸੀਲਂ, ਇਤਿ ਸਮਾਧਿ, ਇਤਿ ਪਞ੍ਞਾ, ਇਮੇ ਰੂਪਾਰੂਪਧਮ੍ਮਾ’’ਤਿ ਮਨਸਾ ਅਨੁਪੇਕ੍ਖਤਿ.
ਖਨ੍ਤ੍ਯਾ ਛਨ੍ਦਿਕਤੋ ਹੋਤੀਤਿ ਤੇਸੁ ਮਨਸਾ ਅਨੁਪੇਕ੍ਖਿਤੇਸੁ ਧਮ੍ਮੇਸੁ ਦਿਟ੍ਠਿਨਿਜ੍ਝਾਨਕ੍ਖਨ੍ਤਿਯਾ ਨਿਜ੍ਝਾਨਂ ਖਮਾਪੇਤ੍ਵਾ ਰੂਪਪਰਿਗ੍ਗਹਾਦਿਮੁਖੇਨ ਵਿਪਸ੍ਸਨਾਭਿਨਿਵੇਸੇ ਛਨ੍ਦਿਕਤੋ ਛਨ੍ਦਜਾਤੋ ਹੋਤਿ. ਤਥਾਭੂਤੋ ਚ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਉਸ੍ਸਹਿਤ੍ਵਾ ਤੁਲੇਤਿ ਤਂਤਂਪਚ੍ਚਯਨਾਮਰੂਪਦਸ੍ਸਨਵਸੇਨ ਉਸ੍ਸਾਹਂ ਕਤ੍ਵਾ ਤਤੋ ਪਰਂ ਤਿਲਕ੍ਖਣਂ ਆਰੋਪੇਤ੍ਵਾ ਤੁਲੇਤਿ ‘‘ਅਨਿਚ੍ਚ’’ਨ੍ਤਿਪਿ, ‘‘ਦੁਕ੍ਖ’’ਨ੍ਤਿਪਿ, ‘‘ਅਨਤ੍ਤਾ’’ਤਿਪਿ ਤਂ ਨਾਮਰੂਪਂ ਤੀਰੇਤਿ ਵਿਪਸ੍ਸਤਿ. ਸਮਯੇ ਸੋ ਪਦਹਤਿ, ਅਜ੍ਝਤ੍ਤਂ ਸੁਸਮਾਹਿਤੋਤਿ ਸੋ ਏਵਂ ਪਸ੍ਸਨ੍ਤੋ ਪਗ੍ਗਹੇਤਬ੍ਬਾਦਿਸਮਯੇ ਚਿਤ੍ਤਸ੍ਸ ਪਗ੍ਗਣ੍ਹਨਾਦਿਨਾ ਪਦਹਤਿ, ਪਦਹਨ੍ਤੋ ਚ ਅਜ੍ਝਤ੍ਤਂ ਗੋਚਰਜ੍ਝਤ੍ਤੇ ਵਿਪਸ੍ਸਨਾਸਮਾਧਿਨਾ ਮਗ੍ਗਸਮਾਧਿਨਾ ਚ ਸੁਟ੍ਠੁ ਸਮਾਹਿਤੋ ਭਵੇਯ੍ਯ, ਅਸਮਾਧਾਨਹੇਤੁਭੂਤੇ ਕਿਲੇਸੇ ਪਜਹੇਯ੍ਯ. ਸ੍ਵਾਯਂ ਗੁਣੋ ਸਬ੍ਬੋਪਿ ਯਸ੍ਮਾ ਬਹੁਸ੍ਸੁਤਂ ਧਮ੍ਮਧਰਂ ਸਪ੍ਪਞ੍ਞਂ ਬੁਦ੍ਧਸਾਵਕਂ ਪਯਿਰੁਪਾਸਨ੍ਤਸ੍ਸ ਹੋਤਿ, ਤਸ੍ਮਾ ਅਸਙ੍ਖਤਂ ਧਮ੍ਮਂ ਆਰਬ੍ਭ ਦੁਕ੍ਖਾਦੀਸੁ ਪਰਿਞ੍ਞਾਦਿਵਿਸਿਟ੍ਠਕਿਚ੍ਚਤਾਯ ਧਮ੍ਮਵਿਞ੍ਞਾਣਸਙ੍ਖਾਤਂ ਧਮ੍ਮਞਾਣਂ ਆਕਙ੍ਖਨ੍ਤੋ ਤਥਾਵਿਧਂ ਵੁਤ੍ਤਪ੍ਪਕਾਰਂ ਕਲ੍ਯਾਣਮਿਤ੍ਤਂ ਭਜੇਥ, ਸੇਵੇਯ੍ਯ ਪਯਿਰੁਪਾਸੇਯ੍ਯਾਤਿ ਅਤ੍ਥੋ.
ਏਵਂ ਬਹੁਪਕਾਰਤਾਯ ਤਸ੍ਸ ਪੂਜਨੀਯਕਂ ਦਸ੍ਸੇਨ੍ਤੋ ‘‘ਬਹੁਸ੍ਸੁਤੋ’’ਤਿ ਗਾਥਮਾਹ. ਤਸ੍ਸਤ੍ਥੋ – ਸੁਤ੍ਤਗੇਯ੍ਯਾਦਿ ਬਹੁ ਸੁਤਂ ਏਤਸ੍ਸਾਤਿ ਬਹੁਸ੍ਸੁਤੋ. ਤਮੇਵ ਦੇਸਨਾਧਮ੍ਮਂ ਸੁਵਣ੍ਣਭਾਜਨੇ ਪਕ੍ਖਿਤ੍ਤਸੀਹਵਸਾ ਵਿਯ ਅਵਿਨਸ੍ਸਨ੍ਤਂ ਧਾਰੇਤੀਤਿ ਧਮ੍ਮਧਰੋ. ਤਤੋ ਏਵ ਮਹੇਸਿਨੋ ਭਗਵਤੋ ਧਮ੍ਮਕੋਸਂ ਧਮ੍ਮਰਤਨਂ ਆਰਕ੍ਖਤੀਤਿ ਕੋਸਾਰਕ੍ਖੋ. ਯਸ੍ਮਾ ਸਦੇਵਕਸ੍ਸ ਲੋਕਸ੍ਸ ਸਮਦਸ੍ਸਨੇਨ ਚਕ੍ਖੁਭੂਤੋ, ਤਸ੍ਮਾ ਚਕ੍ਖੁ ਸਬ੍ਬਸ੍ਸ ਲੋਕਸ੍ਸ ਪੂਜਨੀਯੋ ਮਾਨਨੀਯੋਤਿ, ਬਹੁਸ੍ਸੁਤਭਾਵੇਨ ਬਹੁਜਨਸ੍ਸ ਪੂਜਨੀਯਭਾਵਦਸ੍ਸਨਤ੍ਥਂ ਨਿਗਮਨਵਸੇਨ ਪੁਨਪਿ ‘‘ਬਹੁਸ੍ਸੁਤੋ’’ਤਿ ਵੁਤ੍ਤਂ.
ਏਵਰੂਪਂ ਕਲ੍ਯਾਣਮਿਤ੍ਤਂ ਲਭਿਤ੍ਵਾਪਿ ਕਾਰਕਸ੍ਸੇਵ ਅਪਰਿਹਾਨਿ, ਨ ਅਕਾਰਕਸ੍ਸਾਤਿ ਦਸ੍ਸੇਨ੍ਤੋ ‘‘ਧਮ੍ਮਾਰਾਮੋ’’ਤਿ ਗਾਥਮਾਹ. ਤਤ੍ਥ ਨਿਵਾਸਨਟ੍ਠੇਨ ਸਮਥਵਿਪਸ੍ਸਨਾਧਮ੍ਮੋ ਆਰਾਮੋ, ਤਸ੍ਮਿਂ ਏਵ ਧਮ੍ਮੇ ਰਤੋ ਅਭਿਰਤੋਤਿ ਧਮ੍ਮਰਤੋ, ਤਸ੍ਸੇਵ ਧਮ੍ਮਸ੍ਸ ਪੁਨਪ੍ਪੁਨਂ ਵਿਚਿਨ੍ਤਨੇਨ ਧਮ੍ਮਂ ਅਨੁਵਿਚਿਨ੍ਤਯਂ ਧਮ੍ਮਂ ਆਵਜ੍ਜੇਨ੍ਤੋ ਮਨਸਿ ਕਰੋਤੀਤਿ ਅਤ੍ਥੋ. ਅਨੁਸ੍ਸਰਨ੍ਤਿ ਤਮੇਵ ਧਮ੍ਮਂ ਅਨੁਸ੍ਸਰਨ੍ਤੋ. ਸਦ੍ਧਮ੍ਮਾਤਿ ਏਵਰੂਪੋ ਭਿਕ੍ਖੁ ਸਤ੍ਤਤਿਂਸਪਭੇਦਾ ਬੋਧਿਪਕ੍ਖਿਯਧਮ੍ਮਾ ਨਵਵਿਧਲੋਕੁਤ੍ਤਰਧਮ੍ਮਾ ਚ ਨ ਪਰਿਹਾਯਤਿ, ਨ ਕਦਾਚਿ ਤਸ੍ਸ ਤਤੋ ਪਰਿਹਾਨਿ ਹੋਤੀਤਿ ਅਤ੍ਥੋ.
ਅਥੇਕਦਿਵਸਂ ਕਾਯੇ ਅਵੀਤਰਾਗਂ ਕੁਸੀਤਂ ਹੀਨਵੀਰਿਯਂ ਕੋਸਲ੍ਲਾਯਾ ਤਿ ਨਾਮਂ ਭਿਕ੍ਖੁਂ ਸਂਵੇਜੇਨ੍ਤੋ ‘‘ਕਾਯਮਚ੍ਛੇਰਗਰੁਨੋ’’ਤਿ ਗਾਥਮਾਹ. ਤਤ੍ਥ ਕਾਯਮਚ੍ਛੇਰਗਰੁਨੋਤਿ ‘‘ਕਾਯਦਲ਼੍ਹੀਬਹੁਲਸ੍ਸ ਕਾਯੇ ਮਮਤ੍ਤਸ੍ਸ ਆਚਰਿਯੁਪਜ੍ਝਾਯਾਨਮ੍ਪਿ ਕਾਯੇਨ ਕਤ੍ਤਬ੍ਬਂ ਕਿਞ੍ਚਿ ਅਕਤ੍ਵਾ ਵਿਚਰਨ੍ਤਸ੍ਸ. ਹਿਯ੍ਯਮਾਨੇਤਿ ਅਤ੍ਤਨੋ ਕਾਯੇ ਜੀਵਿਤੇ ਚ ਖਣੇ ਖਣੇ ਪਰਿਹਿਯ੍ਯਮਾਨੇ. ਅਨੁਟ੍ਠਹੇਤਿ ਸੀਲਾਦੀਨਂ ਪਰਿਪੂਰਣਵਸੇਨ ਉਟ੍ਠਾਨਵੀਰਿਯਂ ਨ ਕਰੇਯ੍ਯ. ਸਰੀਰਸੁਖਗਿਦ੍ਧਸ੍ਸਾਤਿ ਅਤ੍ਤਨੋ ਸਰੀਰਸ੍ਸ ਸੁਖਾਪਨੇਨੇਵ ਗੇਧਂ ਆਪਨ੍ਨਸ੍ਸ. ਕੁਤੋ ਸਮਣਫਾਸੁਤਾਤਿ ਏਵਰੂਪਸ੍ਸ ਪੁਗ੍ਗਲਸ੍ਸ ਸਾਮਞ੍ਞਵਸੇਨ ਕੁਤੋ ਸੁਖਵਿਹਾਰੋ, ਫਾਸੁਵਿਹਾਰੋ ਨ ਤਸ੍ਸ ਵਿਜ੍ਜਤੀਤਿ ਅਤ੍ਥੋ.
ਨ ਪਕ੍ਖਨ੍ਤੀਤਿਆਦਿਕਾ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਧਮ੍ਮਸੇਨਾਪਤਿਨੋ ਪਰਿਨਿਬ੍ਬੁਤਭਾਵਂ ਸੁਤ੍ਵਾ ਥੇਰੇਨ ਭਾਸਿਤਾ. ਤਤ੍ਥ ਨ ਪਕ੍ਖਨ੍ਤਿ ਦਿਸਾ ਸਬ੍ਬਾਤਿ ਪੁਰਤ੍ਥਿਮਾਦਿਭੇਦਾ ਸਬ੍ਬਾ ਦਿਸਾ ਨ ਪਕ੍ਖਯਨ੍ਤਿ, ਦਿਸਾਮੂਲ਼੍ਹੋਤਿ ਅਤ੍ਥੋ. ਧਮ੍ਮਾ ਨ ਪਟਿਭਨ੍ਤਿ ਮਨ੍ਤਿ ਪੁਬ੍ਬੇ ਸੁਟ੍ਠੁ ਪਗੁਣਾਪਿ ਪਰਿਯਤ੍ਤਿਧਮ੍ਮਾ ਇਦਾਨਿ ਸਕ੍ਕਚ੍ਚਂ ਸਮਨ੍ਨਾਹਰਿਯਮਾਨਾਪਿ ਮਯ੍ਹਂ ਨ ਉਪਟ੍ਠਹਨ੍ਤਿ. ਗਤੇ ਕਲ੍ਯਾਣਮਿਤ੍ਤਮ੍ਹੀਤਿ ਸਦੇਵਕਸ੍ਸ ਲੋਕਸ੍ਸ ਕਲ੍ਯਾਣਮਿਤ੍ਤਭੂਤੇ ਧਮ੍ਮਸੇਨਾਪਤਿਮ੍ਹਿ ਅਨੁਪਾਦਿਸੇਸਨਿਬ੍ਬਾਨਂ ਗਤੇ. ਅਨ੍ਧਕਾਰਂਵ ਖਾਯਤੀਤਿ ਸਬ੍ਬੋਪਾਯਂ ਲੋਕੋ ਅਨ੍ਧਕਾਰੋ ਵਿਯ ਉਪਟ੍ਠਾਤਿ.
ਅਬ੍ਭਤੀਤਸਹਾਯਸ੍ਸਾਤਿ ਅਪਗਤਸਹਾਯਸ੍ਸ, ਕਲ੍ਯਾਣਮਿਤ੍ਤਰਹਿਤਸ੍ਸਾਤਿ ਅਤ੍ਥੋ. ਅਤੀਤਗਤਸਤ੍ਥੁਨੋਤਿ ਆਯਸ੍ਮਤੋ ਅਤੀਤੋ ਹੁਤ੍ਵਾ ਨਿਬ੍ਬਾਨਗਤਸਤ੍ਥੁਕਸ੍ਸ, ਸਤ੍ਥਰਿ ਪਰਿਨਿਬ੍ਬੁਤੇਤਿ ਅਤ੍ਥੋ. ਯਥਾ ਕਾਯਗਤਾ ਸਤੀਤਿ ਕਾਯਗਤਾਸਤਿਭਾਵਨਾ ਤਕ੍ਕਰਸ੍ਸ ਯਥਾ ਏਕਨ੍ਤਹਿਤਾਵਹਾ, ਏਵਂ ਏਤਾਦਿਸਂ ਅਨਾਥਸ੍ਸ ਪੁਗ੍ਗਲਸ੍ਸ ਏਕਨ੍ਤਹਿਤਾਵਹਂ ਅਞ੍ਞਂ ਮਿਤ੍ਤਂ ਨਾਮ ਨਤ੍ਥਿ, ਸਨਾਥਸ੍ਸ ਅਞ੍ਞਾਪਿ ਭਾਵਨਾ ਹਿਤਾਵਹਾ ਏਵਾਤਿ ਅਧਿਪ੍ਪਾਯੋ.
ਪੁਰਾਣਾਤਿ ਪੋਰਾਣਾ, ਸਾਰਿਪੁਤ੍ਤਾਦਿਕੇ ਕਲ੍ਯਾਣਮਿਤ੍ਤੇ ਸਨ੍ਧਾਯ ਵਦਤਿ. ਨਵੇਹੀਤਿ ਨਵਕੇਹਿ. ਨ ਸਮੇਤਿ ਮੇਤਿ ਮਯ੍ਹਂ ਚਿਤ੍ਤਂ ਨ ਸਮਾਗਚ੍ਛਤਿ, ਨ ਤੇ ਮਮ ਚਿਤ੍ਤਂ ਆਰਾਧੇਨ੍ਤੀਤਿ ਅਤ੍ਥੋ. ਸ੍ਵਜ੍ਜ ਏਕੋਵ ਝਾਯਾਮੀਤਿ ਸੋਹਂ ਅਜ੍ਜ ਵੁਡ੍ਢਤਰੇਹਿ ਵਿਰਹਿਤੋ ਏਕੋਵ ਹੁਤ੍ਵਾ ਝਾਯਾਮਿ ਝਾਨਪਸੁਤੋ ਹੋਮਿ. ਵਸ੍ਸੁਪੇਤੋਤਿ ਵਸ੍ਸਕਾਲੇ ਕੁਲਾਵਕਂ ਉਪੇਤੋ ਪਕ੍ਖੀ ਵਿਯ. ‘‘ਵਾਸੁਪੇਤੋ’’ਤਿਪਿ ਪਾਲ਼ਿ, ਵਾਸਂ ਉਪਗਤੋਤਿ ਅਤ੍ਥੋ.
ਦਸ੍ਸਨਾਯ ਅਭਿਕ੍ਕਨ੍ਤੇਤਿ ਗਾਥਾ ਸਤ੍ਥਾਰਾ ਭਾਸਿਤਾ. ਤਸ੍ਸਤ੍ਥੋ – ਮਮ ਦਸ੍ਸਨਾਯ ਅਭਿਕ੍ਕਨ੍ਤੇ ਨਾਨਾਵਿਧਵਿਦੇਸਪਵਾਸਿਕਬਹੁਜਨੇ, ਆਨਨ੍ਦ, ਮਮ ਉਪਸਙ੍ਕਮਨਂ ਮਾ ਵਾਰੇਸਿ. ਕਸ੍ਮਾ? ਤੇ ਸੋਤਾਰੋ ਧਮ੍ਮਸ੍ਸ, ਮਮਂ ਪਸ੍ਸਨ੍ਤੁ, ਅਯਮੇਵ ਦਸ੍ਸਨਾਯ ਸਮਯੋਤਿ.