੮. ਅਙ੍ਗੁਲਿਮਾਲਤ੍ਥੇਰਗਾਥਾਵਣ੍ਣਨਾ
ਗਚ੍ਛਂ ਵਦੇਸੀਤਿਆਦਿਕਾ ਆਯਸ੍ਮਤੋ ਅਙ੍ਗੁਲਿਮਾਲਤ੍ਥੇਰਸ੍ਸ ਗਾਥਾ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੋਸਲਰਞ੍ਞੋ ਪੁਰੋਹਿਤਸ੍ਸ ਭਗ੍ਗਵਸ੍ਸ ਨਾਮ ਬ੍ਰਾਹ੍ਮਣਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਜਾਤਦਿਵਸੇ ਸਕਲਨਗਰੇ ਆਵੁਧਾਨਿ ਪਜ੍ਜਲਿਂਸੁ, ਰਞ੍ਞੋ ਚ ਮਙ੍ਗਲਾਵੁਧਂ ਸਯਨਪੀਠੇ ਠਪਿਤਂ ਪਜ੍ਜਲਿ, ਤਂ ਦਿਸ੍ਵਾ ਰਾਜਾ ਭੀਤੋ ਸਂਵਿਗ੍ਗੋ ਨਿਦ੍ਦਂ ਨ ਲਭਿ. ਪੁਰੋਹਿਤੋ ਤਾਯਂ ਵੇਲਾਯਂ ਨਕ੍ਖਤ੍ਤਯੋਗਂ ਉਲ੍ਲੋਕੇਨ੍ਤੋ ‘‘ਚੋਰਨਕ੍ਖਤ੍ਤੇਨ ਜਾਤੋ’’ਤਿ ਸਨ੍ਨਿਟ੍ਠਾਨਮਕਾਸਿ. ਸੋ ਵਿਭਾਤਾਯ ਰਤ੍ਤਿਯਾ ਰਞ੍ਞੋ ਸਨ੍ਤਿਕਂ ਗਤੋ ਸੁਖਸੇਯ੍ਯਂ ਪੁਚ੍ਛਿ. ਰਾਜਾ ‘‘ਕੁਤੋ, ਆਚਰਿਯ, ਸੁਖਸੇਯ੍ਯਂ, ਰਤ੍ਤਿਯਂ ਮਯ੍ਹਂ ਮਙ੍ਗਲਾਵੁਧਂ ਪਜ੍ਜਲਿ, ਤਸ੍ਸ ਕੋ ਨੁ ਖੋ ਵਿਪਾਕੋ ਭਵਿਸ੍ਸਤੀ’’ਤਿ? ‘‘ਮਾ ਭਾਯਿ, ਮਹਾਰਾਜ, ਮਯ੍ਹਂ ਘਰੇ ਦਾਰਕੋ ਜਾਤੋ. ਤਸ੍ਸ ਆਨੁਭਾਵੇਨ ਸਕਲਨਗਰੇਪਿ ਆਵੁਧਾਨਿ ਪਜ੍ਜਲਿਂਸੂ’’ਤਿ. ‘‘ਕਿਂ ਭਵਿਸ੍ਸਤਿ, ਆਚਰਿਯਾ’’ਤਿ? ‘‘ਦਾਰਕੋ ਚੋਰੋ ਭਵਿਸ੍ਸਤੀ’’ਤਿ. ‘‘ਕਿਂ ਏਕਚਾਰੀ ਚੋਰੋ, ਉਦਾਹੁ ਗਣਜੇਟ੍ਠਕੋ’’ਤਿ? ‘‘ਏਕਚਾਰਿਕੋ, ਦੇਵ’’. ‘‘ਕਿਂ ਨਂ ਮਾਰੇਮਾ’’ਤਿ? ‘‘ਏਕਚਾਰਿਕੋ ਚੇ, ਪਟਿਜਗ੍ਗਥ ਤਾਵ ਨ’’ਨ੍ਤਿ ਆਹ. ਤਸ੍ਸ ਨਾਮਂ ਕਰੋਨ੍ਤਾ ਯਸ੍ਮਾ ਜਾਯਮਾਨੋ ਰਞ੍ਞੋ ਚਿਤ੍ਤਂ ਵਿਹੇਸੇਨ੍ਤੋ ਜਾਤੋ, ਤਸ੍ਮਾ ਹਿਂਸਕੋਤਿ ਕਤ੍ਵਾ ਪਚ੍ਛਾ ਦਿਟ੍ਠਂ ਅਦਿਟ੍ਠਨ੍ਤਿ ਵਿਯ ਅਹਿਂਸਕੋਤਿ ਵੋਹਰਿਂਸੁ.
ਸੋ ਵਯਪ੍ਪਤ੍ਤੋ ਪੁਬ੍ਬਕਮ੍ਮਬਲੇਨ ਸਤ੍ਤਨ੍ਨਂ ਹਤ੍ਥੀਨਂ ਬਲਂ ਧਾਰੇਤਿ. ਤਸ੍ਸਿਦਂ ਪੁਬ੍ਬਕਮ੍ਮਂ – ਬੁਦ੍ਧਸੁਞ੍ਞੇ ਲੋਕੇ ਕਸ੍ਸਕੋ ਹੁਤ੍ਵਾ ਨਿਬ੍ਬਤ੍ਤੋ ਏਕਂ ਪਚ੍ਚੇਕਬੁਦ੍ਧਂ ਵਸ੍ਸੋਦਕੇਨ ਤਿਨ੍ਤਂ ਅਲ੍ਲਚੀਵਰਂ ਸੀਤਪੀਲ਼ਿਤਂ ਅਤ੍ਤਨੋ ਖੇਤ੍ਤਭੂਮਿਂ ਉਪਗਤਂ ਦਿਸ੍ਵਾ ‘‘ਪੁਞ੍ਞਕ੍ਖੇਤ੍ਤਂ ਮੇ ਉਪਟ੍ਠਿਤ’’ਨ੍ਤਿ ਸੋਮਨਸ੍ਸਜਾਤੋ ਅਗ੍ਗਿਂ ਕਤ੍ਵਾ ਅਦਾਸਿ. ਸੋ ਤਸ੍ਸ ਕਮ੍ਮਸ੍ਸ ਬਲੇਨ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਥਾਮਜਵਬਲਸਮ੍ਪਨ੍ਨੋ ਚ ਹੁਤ੍ਵਾ ਇਮਸ੍ਮਿਂ ਪਚ੍ਛਿਮਤ੍ਤਭਾਵੇ ਸਤ੍ਤਨ੍ਨਂ ਹਤ੍ਥੀਨਂ ਬਲਂ ਧਾਰੇਤਿ. ਸੋ ਤਕ੍ਕਸਿਲਂ ਗਨ੍ਤ੍ਵਾ ਦਿਸਾਪਾਮੋਕ੍ਖਸ੍ਸ ਆਚਰਿਯਸ੍ਸ ਸਨ੍ਤਿਕੇ ਧਮ੍ਮਨ੍ਤੇਵਾਸੀ ਹੁਤ੍ਵਾ ਸਿਪ੍ਪਂ ਉਗ੍ਗਣ੍ਹਤੋ ਆਚਰਿਯਬ੍ਰਾਹ੍ਮਣਂ ਤਸ੍ਸ ਭਰਿਯਞ੍ਚ ਸਕ੍ਕਚ੍ਚਂ ਪਟਿਜਗ੍ਗਤਿ. ਤੇਨਸ੍ਸ ਸਾ ਬ੍ਰਾਹ੍ਮਣੀ ਗੇਹੇ ਲਬ੍ਭਮਾਨੇਨ ਭਤ੍ਤਾਦਿਨਾ ਸਙ੍ਗਹਂ ਕਰੋਤਿ. ਤਂ ਅਸਹਮਾਨਾ ਅਞ੍ਞੇ ਮਾਣਵਾ ਆਚਰਿਯੇਨ ਸਦ੍ਧਿਂ ਭੇਦਂ ਅਕਂਸੁ. ਬ੍ਰਾਹ੍ਮਣੋ ਤੇਸਂ ਵਚਨਂ ਦ੍ਵੇ ਤਯੋ ਵਾਰੇ ਅਸਦ੍ਦਹਨ੍ਤੋ ਹੁਤ੍ਵਾ ਪਚ੍ਛਾ ਸਦ੍ਦਹਿਤ੍ਵਾ ‘‘ਮਹਾਬਲੋ ਮਾਣਵੋ, ਨ ਸਕ੍ਕਾ ਕੇਨਚਿ ਮਾਰਾਪੇਤੁਂ, ਉਪਾਯੇਨ ਨਂ ਮਾਰੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਨਿਟ੍ਠਿਤਸਿਪ੍ਪਂ ਅਤ੍ਤਨੋ ਨਗਰਂ ਗਨ੍ਤੁਂ ਆਪੁਚ੍ਛਨ੍ਤਂ ਮਾਣਵਂ ਆਹ – ‘‘ਤਾਤ ਅਹਿਂਸਕ, ਨਿਟ੍ਠਿਤਸਿਪ੍ਪੇਨ ਨਾਮ ਅਨ੍ਤੇਵਾਸਿਨਾ ਆਚਰਿਯਸ੍ਸ ਗਰੁਦਕ੍ਖਿਣਾ ਦਾਤਬ੍ਬਾ, ਤਂ ਮਯ੍ਹਂ ਦੇਹੀ’’ਤਿ. ‘‘ਸਾਧੁ, ਆਚਰਿਯ, ਕਿਂ ਦਸ੍ਸਾਮੀ’’ਤਿ? ‘‘ਮਨੁਸ੍ਸਾਨਂ ਸਹਸ੍ਸਦਕ੍ਖਿਣਹਤ੍ਥਙ੍ਗਲਿਯੋ ਆਨੇਹੀ’’ਤਿ. ਬ੍ਰਾਹ੍ਮਣਸ੍ਸ ਕਿਰ ਅਯਮਸ੍ਸ ਅਧਿਪ੍ਪਾਯੋ – ਬਹੂਸੁ ਮਾਰਿਯਮਾਨੇਸੁ ਏਕਨ੍ਤਤੋ ਏਕੋ ਨਂ ਮਾਰੇਯ੍ਯਾਤਿ. ਤਂ ਸੁਤ੍ਵਾ ਅਹਿਂਸਕੋ ਅਤ੍ਤਨੋ ਚਿਰਪਰਿਚਿਤਂ ਨਿਕ੍ਕਰੁਣਤਂ ਪੁਰਕ੍ਖਤ੍ਵਾ ਸਨ੍ਨਦ੍ਧਪਞ੍ਚਾਵੁਧੋ ਕੋਸਲਰਞ੍ਞੋ ਵਿਜਿਤੇ ਜਾਲਿਨਂ ਵਨਂ ਪਵਿਸਿਤ੍ਵਾ ਮਹਾਮਗ੍ਗਸਮੀਪੇ ਪਬ੍ਬਤਨ੍ਤਰੇ ਵਸਨ੍ਤੋ ਪਬ੍ਬਤਸਿਖਰੇ ਠਤ੍ਵਾ ਮਗ੍ਗੇਨ ਗਚ੍ਛਨ੍ਤੇ ਮਨੁਸ੍ਸੇ ਓਲੋਕੇਤ੍ਵਾ ਵੇਗੇਨ ਗਨ੍ਤ੍ਵਾ ਅਙ੍ਗੁਲਿਯੋ ਗਹੇਤ੍ਵਾ ਰੁਕ੍ਖਗ੍ਗੇ ਓਲਮ੍ਬੇਸਿ. ਤਾ ਗਿਜ੍ਝਾਪਿ ਕਾਕਾਪਿ ਖਾਦਿਂਸੁ, ਭੂਮਿਯਂ ਨਿਕ੍ਖਿਤ੍ਤਾ ਪੂਤਿਭਾਵਂ ਅਗਮਂਸੁ. ਏਵਂ ਗਣਨਾਯ ਅਪਰਿਪੂਰਮਾਨਾਯ ਲਦ੍ਧਾ ਲਦ੍ਧਾ ਅਙ੍ਗੁਲਿਯੋ ਸੁਤ੍ਤੇਨ ਗਨ੍ਥਿਤ੍ਵਾ ਮਾਲਂ ਕਤ੍ਵਾ ਯਞ੍ਞੋਪਚਿਤਂ ਵਿਯ ਅਂਸੇ ਓਲਮ੍ਬੇਸਿ. ਤਤੋ ਪਟ੍ਠਾਯ ਅਙ੍ਗੁਲਿਮਾਲੋਤ੍ਵੇਵਸ੍ਸ ਸਮਞ੍ਞਾ ਅਹੋਸਿ.
ਏਵਂ ਤਸ੍ਮਿਂ ਮਨੁਸ੍ਸੇ ਮਾਰੇਨ੍ਤੇ ਮਗ੍ਗੋ ਅਵਲ਼ਞ੍ਜੋ ਅਹੋਸਿ. ਸੋ ਮਗ੍ਗੇ ਮਨੁਸ੍ਸੇ ਅਲਭਨ੍ਤੋ ਗਾਮੂਪਚਾਰਂ ਗਨ੍ਤ੍ਵਾ ਨਿਲੀਯਿਤ੍ਵਾ ਆਗਤਾਗਤੇ ਮਨੁਸ੍ਸੇ ਮਾਰੇਤ੍ਵਾ ਅਙ੍ਗੁਲਿਯੋ ਗਹੇਤ੍ਵਾ ਗਚ੍ਛਤਿ. ਤਂ ਞਤ੍ਵਾ ਮਨੁਸ੍ਸਾ ਗਾਮਤੋ ਅਪਕ੍ਕਮਿਂਸੁ, ਗਾਮਾ ਸੁਞ੍ਞਾ ਅਹੇਸੁਂ, ਤਥਾ ਨਿਗਮਾ ਜਨਪਦਾ ਚ. ਏਵਂ ਤੇਨ ਸੋ ਪਦੇਸੋ ਉਬ੍ਬਾਸਿਤੋ ਅਹੋਸਿ. ਅਙ੍ਗੁਲਿਮਾਲਸ੍ਸ ਚ ਏਕਾਯ ਊਨਾ ਸਹਸ੍ਸਅਙ੍ਗੁਲਿਯੋ ਸਙ੍ਗਹਾ ਅਹੇਸੁਂ. ਅਥ ਮਨੁਸ੍ਸਾ ਤਂ ਚੋਰੁਪਦ੍ਦਵਂ ਕੋਸਲਰਞ੍ਞੋ ਆਰੋਚੇਸੁਂ. ਰਾਜਾ ਪਾਤੋਵ ਨਗਰੇ ਭੇਰਿਂ ਚਰਾਪੇਸਿ, ‘‘ਸੀਘਂ ਅਙ੍ਗੁਲਿਮਾਲਚੋਰਂ ਗਣ੍ਹਾਮ, ਬਲਕਾਯੋ ਆਗਚ੍ਛਤੂ’’ਤਿ. ਤਂ ਸੁਤ੍ਵਾ ਅਙ੍ਗੁਲਿਮਾਲਸ੍ਸ ਮਾਤਾ ਮਨ੍ਤਾਣੀ ਨਾਮ ਬ੍ਰਾਹ੍ਮਣੀ ਤਸ੍ਸ ਪਿਤਰਂ ਆਹ – ‘‘ਪੁਤ੍ਤੋ ਕਿਰ ਤੇ ਚੋਰੋ ਹੁਤ੍ਵਾ ਇਦਞ੍ਚਿਦਞ੍ਚ ਕਰੋਤਿ, ਤਂ ‘ਈਦਿਸਂ ਮਾ ਕਰੀ’ਤਿ ਸਞ੍ਞਾਪੇਤ੍ਵਾ ਆਨੇਹਿ, ਅਞ੍ਞਥਾ ਨਂ ਰਾਜਾ ਘਾਤੇਯ੍ਯਾ’’ਤਿ. ਬ੍ਰਾਹ੍ਮਣੋ ‘‘ਨ ਮਯ੍ਹਂ ਤਾਦਿਸੇਹਿ ਪੁਤ੍ਤੇਹਿ ਅਤ੍ਥੋ, ਰਾਜਾ ਯਂ ਵਾ ਤਂ ਵਾ ਕਰੋਤੂ’’ਤਿ ਆਹ. ਅਥ ਬ੍ਰਾਹ੍ਮਣੀ ਪੁਤ੍ਤਸਿਨੇਹੇਨ ਪਾਥੇਯ੍ਯਂ ਗਹੇਤ੍ਵਾ ‘‘ਮਮ ਪੁਤ੍ਤਂ ਸਞ੍ਞਾਪੇਤ੍ਵਾ ਆਨੇਸ੍ਸਾਮੀ’’ਤਿ ਮਗ੍ਗਂ ਪਟਿਪਜ੍ਜਿ.
ਭਗਵਾ ‘‘ਅਯਂ ‘ਅਙ੍ਗੁਲਿਮਾਲਂ ਆਨੇਸ੍ਸਾਮੀ’ਤਿ ਗਚ੍ਛਤਿ, ਸਚੇ ਸਾ ਗਮਿਸ੍ਸਤਿ, ਅਙ੍ਗੁਲਿਮਾਲੋ ‘ਅਙ੍ਗੁਲਿਸਹਸ੍ਸਂ ਪੂਰੇਸ੍ਸਾਮੀ’ਤਿ ਮਾਤਰਮ੍ਪਿ ਮਾਰੇਸ੍ਸਤਿ. ਸੋ ਚ ਪਚ੍ਛਿਮਭਵਿਕੋ, ਸਚਾਹਂ ਨ ਗਮਿਸ੍ਸਂ, ਮਹਾਜਾਨਿ ਅਭਵਿਸ੍ਸਾ’’ਤਿ ਞਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਸਯਮੇਵ ਪਤ੍ਤਚੀਵਰਂ ਗਹੇਤ੍ਵਾ ਅਙ੍ਗੁਲਿਮਾਲਂ ਉਦ੍ਦਿਸ੍ਸ ਤਿਂਸਯੋਜਨਿਕਂ ਮਗ੍ਗਂ ਪਦਸਾਵ ਪਟਿਪਜ੍ਜਮਾਨੋ ਅਨ੍ਤਰਾਮਗ੍ਗੇ ਗੋਪਾਲਕਾਦੀਹਿ ਵਾਰਿਯਮਾਨੋਪਿ ਜਾਲਿਨਂ ਵਨਂ ਉਪਗਚ੍ਛਿ. ਤਸ੍ਮਿਞ੍ਚ ਖਣੇ ਤਸ੍ਸ ਮਾਤਾ ਤੇਨ ਦਿਟ੍ਠਾ, ਸੋ ਮਾਤਰਂ ਦੂਰਤੋਵ ਦਿਸ੍ਵਾ ‘‘ਮਾਤਰਮ੍ਪਿ ਮਾਰੇਤ੍ਵਾ ਅਜ੍ਜ ਊਨਙ੍ਗੁਲਿਂ ਪੂਰੇਸ੍ਸਾਮੀ’’ਤਿ ਅਸਿਂ ਉਕ੍ਖਿਪਿਤ੍ਵਾ ਉਪਧਾਵਿ. ਤੇਸਂ ਉਭਿਨ੍ਨਂ ਅਨ੍ਤਰੇ ਭਗਵਾ ਅਤ੍ਤਾਨਂ ਦਸ੍ਸੇਸਿ. ਅਙ੍ਗੁਲਿਮਾਲੋ ਭਗਵਨ੍ਤਂ ਦਿਸ੍ਵਾ ‘‘ਕਿਂ ਮੇ ਮਾਤਰਂ ਵਧਿਤ੍ਵਾ ਅਙ੍ਗੁਲਿਯਾ ਗਹਿਤੇਨ? ਜੀਵਤੁ ਮੇ ਮਾਤਾ, ਯਂਨੂਨਾਹਂ ਇਮਂ ਸਮਣਂ ਜੀਵਿਤਾ ਵੋਰੋਪੇਤ੍ਵਾ ਅਙ੍ਗੁਲਿਂ ਗਣ੍ਹੇਯ੍ਯ’’ਨ੍ਤਿ ਉਕ੍ਖਿਤ੍ਤਾਸਿਕੋ ਭਗਵਨ੍ਤਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਿ. ਅਥ ਖੋ ਭਗਵਾ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਸਿ, ਯਥਾ ਪਕਤਿਇਰਿਯਾਪਥੇਨ ਗਚ੍ਛਨ੍ਤਮ੍ਪਿ ਅਤ੍ਤਾਨਂ ਅਙ੍ਗੁਲਿਮਾਲੋ ਸਬ੍ਬਥਾਮੇਨ ਧਾਵਨ੍ਤੋਪਿ ਨ ਸਕ੍ਕੋਤਿ ਸਮ੍ਪਾਪੁਣਿਤੁਂ. ਸੋ ਪਰਿਹੀਨਜਵੋ ਘੁਰੁਘੁਰੁਪਸ੍ਸਾਸੀ ਕਚ੍ਛੇਹਿ ਸੇਦਂ ਮੁਞ੍ਚਨ੍ਤੋ ਪਦਂ ਉਦ੍ਧਰਿਤੁਮ੍ਪਿ ਅਸਕ੍ਕੋਨ੍ਤੋ ਖਾਣੁ ਵਿਯ ਠਿਤੋ ਭਗਵਨ੍ਤਂ ‘‘ਤਿਟ੍ਠ ਤਿਟ੍ਠ, ਸਮਣਾ’’ਤਿ ਆਹ. ਭਗਵਾ ਗਚ੍ਛਨ੍ਤੋਵ ‘‘ਠਿਤੋ ਅਹਂ, ਅਙ੍ਗੁਲਿਮਾਲ, ਤ੍ਵਞ੍ਚ ਤਿਟ੍ਠਾ’’ਤਿ ਆਹ. ਸੋ ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਸਚ੍ਚਵਾਦਿਨੋ, ਅਯਂ ਸਮਣੋ ਗਚ੍ਛਨ੍ਤੋਯੇਵ ‘ਠਿਤੋ ਅਹਂ, ਅਙ੍ਗੁਲਿਮਾਲ, ਤ੍ਵਞ੍ਚ ਤਿਟ੍ਠਾ’ਤਿ ਆਹ, ਅਹਞ੍ਚਮ੍ਹਿ ਠਿਤੋ, ਕੋ ਨੁ ਖੋ ਇਮਸ੍ਸ ਅਧਿਪ੍ਪਾਯੋ, ਪੁਚ੍ਛਿਤ੍ਵਾ ਨਂ ਜਾਨਿਸ੍ਸਾਮੀ’’ਤਿ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –
੮੬੬. ‘‘ਗਚ੍ਛਂ ਵਦੇਸਿ ਸਮਣ ਠਿਤੋਮ੍ਹਿ, ਮਮਞ੍ਚ ਬ੍ਰੂਸਿ ਠਿਤਮਟ੍ਠਿਤੋਤਿ;
ਪੁਚ੍ਛਾਮਿ ਤਂ ਸਮਣ ਏਤਮਤ੍ਥਂ, ਕਥਂ ਠਿਤੋ ਤ੍ਵਂ ਅਹਮਟ੍ਠਿਤੋਮ੍ਹੀ’’ਤਿ.
ਤਤ੍ਥ ਸਮਣਾਤਿ ਭਗਵਨ੍ਤਂ ਆਲਪਤਿ. ਮਮਨ੍ਤਿ ਮਂ. ਕਥਨ੍ਤਿ ਕੇਨਾਕਾਰੇਨ. ਅਯਞ੍ਹੇਤ੍ਥ ਅਤ੍ਥੋ – ਸਮਣ, ਤ੍ਵਂ ਗਚ੍ਛਨ੍ਤੋਵ ਸਮਾਨੋ ‘‘ਠਿਤੋਮ੍ਹੀ’’ਤਿ ਵਦੇਸਿ. ਮਮਞ੍ਚ ਠਿਤਂਯੇਵ ‘‘ਅਟ੍ਠਿਤੋ’’ਤਿ ਬ੍ਰੂਸਿ, ਵਦੇਸਿ. ਕਾਰਣੇਨੇਤ੍ਥ ਭਵਿਤਬ੍ਬਂ, ਤਸ੍ਮਾ ਤਂ ਸਮਣਂ ਅਹਂ ਏਵਮਤ੍ਥਂ ਪੁਚ੍ਛਾਮਿ. ਕਥਂ ਕੇਨਾਕਾਰੇਨ ਤ੍ਵਂ ਠਿਤੋ ਅਹੋਸਿ, ਅਹਞ੍ਚ ਅਟ੍ਠਿਤੋਮ੍ਹੀਤਿ. ਏਵਂ ਵੁਤ੍ਤੇ ਭਗਵਾ –
੮੬੭. ‘‘ਠਿਤੋ ਅਹਂ ਅਙ੍ਗੁਲਿਮਾਲ ਸਬ੍ਬਦਾ, ਸਬ੍ਬੇਸੁ ਭੂਤੇਸੁ ਨਿਧਾਯ ਦਣ੍ਡਂ;
ਤੁਵਞ੍ਚ ਪਾਣੇਸੁ ਅਸਞ੍ਞਤੋਸਿ, ਤਸ੍ਮਾ ਠਿਤੋਹਂ ਤੁਵਮਟ੍ਠਿਤੋਸੀ’’ਤਿ. –
ਗਾਥਾਯ ਤਂ ਅਜ੍ਝਭਾਸਿ.
ਤਤ੍ਥ ਠਿਤੋ ਅਹਂ, ਅਙ੍ਗੁਲਿਮਾਲ, ਸਬ੍ਬਦਾ, ਸਬ੍ਬੇਸੁ ਭੂਤੇਸੁ ਨਿਧਾਯ ਦਣ੍ਡਨ੍ਤਿ, ਅਙ੍ਗੁਲਿਮਾਲ, ਅਹਂ ਸਬ੍ਬਦਾ ਸਬ੍ਬਕਾਲੇ ਆਦਿਮਜ੍ਝਪਰਿਯੋਸਾਨੇਸੁ ਤਸਥਾਵਰਭੇਦੇਸੁ ਸਬ੍ਬੇਸੁ ਸਤ੍ਤੇਸੁ ਦਣ੍ਡਂ ਨਿਧਾਯ ਨਿਹਿਤਦਣ੍ਡੋ ਨਿਹਿਤਸਤ੍ਥੋ ਲਜ੍ਜੀ ਦਯਾਪਨ੍ਨੋ, ਤਤੋ ਅਞ੍ਞਥਾ ਅਵਤ੍ਤਨਤੋ ਏਵਰੂਪੇਨੇਵ ਠਿਤੋ. ਤੁਵਞ੍ਚ ਪਾਣੇਸੁ ਅਸਞ੍ਞਤੋਸੀਤਿ ਤ੍ਵਂ ਪਨ ਸਤ੍ਤੇਸੁ ਸਞ੍ਞਮਰਹਿਤੋ ਅਸਿ, ਲੁਦ੍ਦੋ ਲੋਹਿਤਪਾਣਿ ਹਤਪਹਤੇ ਨਿਵਿਟ੍ਠੋ ਅਦਯਾਪਨ੍ਨੋ, ਤਸ੍ਮਾ ਅਸਞ੍ਞਤੋ ਵਿਰਤਿਵਸੇਨ ਅਟ੍ਠਿਤੋ. ਤਤੋ ਏਵ ਤਾਸੁ ਤਾਸੁ ਗਤੀਸੁ ਪਰਿਬ੍ਭਮਨਤੋਪਿ ਤੁਵਂ ਇਦਾਨਿ ਇਰਿਯਾਪਥੇਨ ਠਿਤੋਪਿ ਅਟ੍ਠਿਤੋ ਅਸਿ, ਅਹਂ ਪਨ ਵੁਤ੍ਤਪ੍ਪਕਾਰੇਨ ਠਿਤੋਤਿ. ਤਤੋ ਅਙ੍ਗੁਲਿਮਾਲੋ ਯਥਾਭੁਚ੍ਚਗੁਣਪ੍ਪਭਾਵਿਤਸ੍ਸ ਜਲਤਲੇ ਤੇਲਸ੍ਸ ਵਿਯ ਸਕਲਂ ਲੋਕਂ ਅਭਿਬ੍ਯਾਪੇਤ੍ਵਾ ਠਿਤਸ੍ਸ ਭਗਵਤੋ ਕਿਤ੍ਤਿਸਦ੍ਦਸ੍ਸ ਸੁਤਪੁਬ੍ਬਤ੍ਤਾ ਹੇਤੁਸਮ੍ਪਤ੍ਤਿਯਾ ਞਾਣਸ੍ਸ ਚ ਪਰਿਪਾਕਗਤਤ੍ਤਾ ‘‘ਅਯਂ ਸੋ ਭਗਵਾ’’ਤਿ ਸਞ੍ਜਾਤਪੀਤਿਸੋਮਨਸ੍ਸੋ ‘‘ਮਹਾ ਅਯਂ ਸੀਹਨਾਦੋ, ਮਹਨ੍ਤਂ ਗਜ੍ਜਿਤਂ, ਨਯਿਦਂ ਅਞ੍ਞਸ੍ਸ ਭਵਿਸ੍ਸਤਿ, ਸਮਣਸ੍ਸ ਮਞ੍ਞੇ ਗੋਤਮਸ੍ਸ ਏਤਂ ਗਜ੍ਜਿਤਂ, ਦਿਟ੍ਠੋ ਵਤਮ੍ਹਿ ਮਹੇਸਿਨਾ ਸਮ੍ਮਾਸਮ੍ਬੁਦ੍ਧੇਨ, ਮਯ੍ਹਂ ਸਙ੍ਗਹਕਰਣਤ੍ਥਂ ਭਗਵਾ ਇਧਾਗਤੋ’’ਤਿ ਚਿਨ੍ਤੇਤ੍ਵਾ –
੮੬੮. ‘‘ਚਿਰਸ੍ਸਂ ਵਤ ਮੇ ਮਹਿਤੋ ਮਹੇਸੀ, ਮਹਾਵਨਂ ਸਮਣੋ ਪਚ੍ਚਪਾਦਿ;
ਸੋਹਂ ਚਜਿਸ੍ਸਾਮਿ ਸਹਸ੍ਸਪਾਪਂ, ਸੁਤ੍ਵਾਨ ਗਾਥਂ ਤਵ ਧਮ੍ਮਯੁਤ੍ਤ’’ਨ੍ਤਿ. –
ਇਮਂ ਗਾਥਂ ਅਭਾਸਿ.
ਤਤ੍ਥ ਚਿਰਸ੍ਸਂ ਵਤਾਤਿ ਚਿਰਕਾਲੇਨ ਵਤ. ਮੇਤਿ ਮਯ੍ਹਂ ਅਨੁਗ੍ਗਹਤ੍ਥਾਯ. ਮਹਿਤੋਤਿ ਸਦੇਵਕੇਨ ਲੋਕੇਨ ਮਹਤਿਯਾ ਪੂਜਾਯ ਪੂਜਿਤੋ. ਮਹਨ੍ਤੇ ਸੀਲਕ੍ਖਨ੍ਧਾਦਿਗੁਣੇ ਏਸਿ, ਗਵੇਸੀਤਿ ਮਹੇਸੀ. ਮਹਾਵਨਂ ਸਮਣੋ ਪਚ੍ਚਪਾਦੀਤਿ ਇਮਂ ਮਹਾਰਞ੍ਞਂ ਸਮਿਤਸਬ੍ਬਪਾਪੋ ਭਗਵਾ ਪਟਿਪਜ੍ਜਿ. ਸੋਹਂ ਚਜਿਸ੍ਸਾਮਿ ਸਹਸ੍ਸਪਾਪਂ, ਸੁਤ੍ਵਾਨ ਗਾਥਂ ਤਵ ਧਮ੍ਮਯੁਤ੍ਤਨ੍ਤਿ ਸੋਹਂ ਧਮ੍ਮਯੁਤ੍ਤਂ ਧਮ੍ਮੂਪਸਂਹਿਤਂ ਤਵ ਗਾਥਂ ਸੁਣਿਂ. ਸੋਹਂ ਤਂ ਸੁਤ੍ਵਾਨ ‘‘ਚਿਰਸ੍ਸਮ੍ਪਿ ਚਿਰਕਾਲੇਨਪਿ ਸਙ੍ਗਤਂ ਪਰਿਚਿਤਂ ਪਾਪਸਹਸ੍ਸਂ ਪਜਹਿਸ੍ਸ’’ਨ੍ਤਿ ਚਿਨ੍ਤੇਤ੍ਵਾ ਇਦਾਨਿ ਨਂ ਅਞ੍ਞਦਤ੍ਥੁ ਪਰਿਚ੍ਚਜਿਸ੍ਸਾਮੀਤਿ ਅਤ੍ਥੋ. ਏਵਂ ਪਨ ਵਤ੍ਵਾ ਯਥਾ ਪਟਿਪਜ੍ਜਿ, ਯਥਾ ਚ ਭਗਵਤਾ ਅਨੁਗ੍ਗਹਿਤੋ, ਤਂ ਦਸ੍ਸੇਤੁਂ –
੮੬੯. ‘‘ਇਚ੍ਚੇਵ ਚੋਰੋ ਅਸਿਮਾਵੁਧਞ੍ਚ, ਸੋਬ੍ਭੇ ਪਪਾਤੇ ਨਰਕੇ ਅਨ੍ਵਕਾਸਿ;
ਅਵਨ੍ਦਿ ਚੋਰੋ ਸੁਗਤਸ੍ਸ ਪਾਦੇ, ਤਤ੍ਥੇਵ ਪਬ੍ਬਜ੍ਜਮਯਾਚਿ ਬੁਦ੍ਧਂ.
੮੭੦. ‘‘ਬੁਦ੍ਧੋ ਚ ਖੋ ਕਾਰੁਣਿਕੋ ਮਹੇਸਿ, ਯੋ ਸਤ੍ਥਾ ਲੋਕਸ੍ਸ ਸਦੇਵਕਸ੍ਸ;
ਤਮੇਹਿ ਭਿਕ੍ਖੂਤਿ ਤਦਾ ਅਵੋਚ, ਏਸੇਵ ਤਸ੍ਸ ਅਹੁ ਭਿਕ੍ਖੁਭਾਵੋ’’ਤਿ.
ਸਙ੍ਗੀਤਿਕਾਰਾ ਇਮਾ ਦ੍ਵੇ ਗਾਥਾ ਠਪੇਸੁਂ.
ਤਤ੍ਥ ਇਚ੍ਚੇਵਾਤਿ ਇਤਿ ਏਵ ਏਵਂ ਵਤ੍ਵਾ ਅਨਨ੍ਤਰਮੇਵ. ਚੋਰੋਤਿ ਅਙ੍ਗੁਲਿਮਾਲੋ. ਅਸਿਨ੍ਤਿ ਖਗ੍ਗਂ. ਆਵੁਧਨ੍ਤਿ ਸੇਸਾਵੁਧਂ. ਸੋਬ੍ਭੇਤਿ ਸਮਨ੍ਤਤੋ ਛਿਨ੍ਨਤਟੇ. ਪਪਾਤੇਤਿ ਏਕਤੋ ਛਿਨ੍ਨਤਟੇ. ਨਰਕੇਤਿ ਭੂਮਿਯਾ ਫਲਿਤਵਿਵਰੇ. ਇਧ ਪਨ ਤੀਹਿਪਿ ਪਦੇਹਿ ਯਤ੍ਥ ਪਤਿਤਂ ਅਞ੍ਞੇਨ ਗਹੇਤੁਂ ਨ ਸਕ੍ਕਾ, ਤਾਦਿਸਂ ਪਬ੍ਬਤਨ੍ਤਰਮੇਵ ਵਦਤਿ. ਅਨ੍ਵਕਾਸੀਤਿ ਅਨੁ ਅਕਾਸਿ, ਪਞ੍ਚਵਿਧਮ੍ਪਿ ਅਤ੍ਤਨੋ ਆਵੁਧਂ ਅਨੁ ਖਿਪਿ ਛਡ੍ਡੇਸਿ, ਤਾਨਿ ਛਡ੍ਡੇਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ‘‘ਪਬ੍ਬਾਜੇਥ ਮਂ, ਭਨ੍ਤੇ’’ਤਿ ਆਹ. ਤੇਨ ਵੁਤ੍ਤਂ ‘‘ਅਵਨ੍ਦਿ ਚੋਰੋ ਸੁਗਤਸ੍ਸ ਪਾਦੇ, ਤਤ੍ਥੇਵ ਪਬ੍ਬਜ੍ਜਮਯਾਚਿ ਬੁਦ੍ਧ’’ਨ੍ਤਿ. ਏਵਂ ਤੇਨ ਪਬ੍ਬਜ੍ਜਾਯ ਯਾਚਿਤਾਯ ਸਤ੍ਥਾ ਤਸ੍ਸ ਪੁਰਿਮਕਮ੍ਮਂ ਓਲੋਕੇਨ੍ਤੋ ਏਹਿਭਿਕ੍ਖੁਭਾਵਾਯ ਹੇਤੁਸਮ੍ਪਤ੍ਤਿਂ ਦਿਸ੍ਵਾ ਦਕ੍ਖਿਣਹਤ੍ਥਂ ਪਸਾਰੇਤ੍ਵਾ – ‘‘ਏਹਿ, ਭਿਕ੍ਖੁ, ਸ੍ਵਾਖਾਤੋ ਧਮ੍ਮੋ, ਚਰ ਬ੍ਰਹ੍ਮਚਰਿਯਂ, ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ ਆਹ. ਸਾ ਏਵ ਚ ਤਸ੍ਸ ਪਬ੍ਬਜ੍ਜਾ ਉਪਸਮ੍ਪਦਾ ਚ ਅਹੋਸਿ. ਤੇਨਾਹ ‘‘ਤਮੇਹਿ ਭਿਕ੍ਖੂਤਿ ਤਦਾ ਅਵੋਚ, ਏਸੇਵ ਤਸ੍ਸ ਅਹੁ ਭਿਕ੍ਖੁਭਾਵੋ’’ਤਿ.
ਏਵਂ ਥੇਰੋ ਸਤ੍ਥੁ ਸਨ੍ਤਿਕੇ ਏਹਿਭਿਕ੍ਖੁਭਾਵੇਨ ਪਬ੍ਬਜ੍ਜਂ ਉਪਸਮ੍ਪਦਞ੍ਚ ਲਭਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਅਰਹਤ੍ਤਂ ਪਤ੍ਵਾ ਵਿਮੁਤ੍ਤਿਸੁਖਂ ਪਟਿਸਂਵੇਦੇਨ੍ਤੋ ਪੀਤਿਸੋਮਨਸ੍ਸਜਾਤੋ ਉਦਾਨਵਸੇਨ –
੮੭੧. ‘‘ਯੋ ਚ ਪੁਬ੍ਬੇ ਪਮਜ੍ਜਿਤ੍ਵਾ, ਪਚ੍ਛਾ ਸੋ ਨਪ੍ਪਮਜ੍ਜਤਿ;
ਸੋਮਂ ਲੋਕਂ ਪਭਾਸੇਤਿ, ਅਬ੍ਭਾ ਮੁਤ੍ਤੋਵ ਚਨ੍ਦਿਮਾ.
੮੭੨. ‘‘ਯਸ੍ਸ ਪਾਪਂ ਕਤਂ ਕਮ੍ਮਂ, ਕੁਸਲੇਨ ਪਿਧੀਯਤਿ;
ਸੋਮਂ ਲੋਕਂ ਪਭਾਸੇਤਿ, ਅਬ੍ਭਾ ਮੁਤ੍ਤੋਵ ਚਨ੍ਦਿਮਾ.
੮੭੩. ‘‘ਯੋ ਹਵੇ ਦਹਰੋ ਭਿਕ੍ਖੁ, ਯੁਞ੍ਜਤਿ ਬੁਦ੍ਧਸਾਸਨੇ;
ਸੋਮਂ ਲੋਕਂ ਪਭਾਸੇਤਿ, ਅਬ੍ਭਾ ਮੁਤ੍ਤੋਵ ਚਨ੍ਦਿਮਾ’’ਤਿ. – ਗਾਥਤ੍ਤਯਂ ਅਭਾਸਿ;
ਤਸ੍ਸਤ੍ਥੋ – ਯੋ ਪੁਗ੍ਗਲੋ ਗਹਟ੍ਠੋ ਵਾ ਪਬ੍ਬਜਿਤੋ ਵਾ ਕਲ੍ਯਾਣਮਿਤ੍ਤਸਂਸਗ੍ਗਤੋ ਪੁਬ੍ਬੇ ਪਾਪਮਿਤ੍ਤਸਂਸਗ੍ਗੇਨ ਵਾ ਅਤ੍ਤਨੋ ਵਾ ਪਟਿਸਙ੍ਖਾਨਾਭਾਵੇਨ ਪਮਜ੍ਜਿਤ੍ਵਾ ਸਮ੍ਮਾਪਟਿਪਤ੍ਤਿਯਂ ਪਮਾਦਂ ਆਪਜ੍ਜਿਤ੍ਵਾ, ਪਚ੍ਛਾ ਕਲ੍ਯਾਣਮਿਤ੍ਤਸਂਸਗ੍ਗੇਨ ਯੋਨਿਸੋ ਉਮ੍ਮੁਜ੍ਜਨ੍ਤੋ ਨਪ੍ਪਮਜ੍ਜਤਿ, ਸਮ੍ਮਾ ਪਟਿਪਜ੍ਜਤਿ, ਸਮਥਵਿਪਸ੍ਸਨਂ ਅਨੁਯੁਞ੍ਜਨ੍ਤੋ ਤਿਸ੍ਸੋ ਵਿਜ੍ਜਾ ਛ ਅਭਿਞ੍ਞਾ ਪਾਪੁਣਾਤਿ, ਸੋ ਅਬ੍ਭਾਦੀਹਿ ਮੁਤ੍ਤੋ ਚਨ੍ਦੋ ਵਿਯ ਓਕਾਸਲੋਕਂ ਅਤ੍ਤਨਾ ਅਧਿਗਤਾਹਿ ਵਿਜ੍ਜਾਭਿਞ੍ਞਾਹਿ ਇਮਂ ਖਨ੍ਧਾਦਿਲੋਕਂ ਓਭਾਸੇਤੀਤਿ.
ਯਸ੍ਸ ਪੁਗ੍ਗਲਸ੍ਸ ਕਤਂ ਉਪਚਿਤਂ ਪਾਪਕਮ੍ਮਂ ਕਮ੍ਮਕ੍ਖਯਕਰੇਨ ਲੋਕੁਤ੍ਤਰਕੁਸਲੇਨ ਅਵਿਪਾਕਾਰਹਭਾਵਸ੍ਸ ਆਹਰਿਤਤ੍ਤਾ ਵਿਪਾਕੁਪ੍ਪਾਦਨੇ ਦ੍ਵਾਰਪਿਧਾਨੇਨ ਪਿਧੀਯਤਿ ਥਕੀਯਤਿ. ਸੇਸਂ ਵੁਤ੍ਤਨਯਮੇਵ.
ਦਹਰੋਤਿ ਤਰੁਣੋ, ਤੇਨਸ੍ਸ ਯੋਗਕ੍ਖਮਸਰੀਰਤਂ ਦਸ੍ਸੇਤਿ. ਸੋ ਹਿ ਉਪ੍ਪਨ੍ਨਂ ਵਾਤਾਤਪਪਰਿਸ੍ਸਯਂ ਅਭਿਭਵਿਤ੍ਵਾ ਯੋਗਂ ਕਾਤੁਂ ਸਕ੍ਕੋਤਿ. ਯੁਞ੍ਜਤਿ ਬੁਦ੍ਧਸਾਸਨੇ ਸਿਕ੍ਖਤ੍ਤਯੇ ਯੁਤ੍ਤਪ੍ਪਯੁਤ੍ਤੋ ਹੋਤਿ, ਸਕ੍ਕਚ੍ਚਂ ਸਮ੍ਪਾਦੇਤੀਤਿ ਅਤ੍ਥੋ.
ਏਵਂ ਪੀਤਿਸੋਮਨਸ੍ਸਜਾਤੋ ਵਿਮੁਤ੍ਤਿਸੁਖੇਨ ਵਿਹਰਨ੍ਤੋ ਯਦਾ ਨਗਰਂ ਪਿਣ੍ਡਾਯ ਪਵਿਸਤਿ, ਤਦਾ ਅਞ੍ਞੇਨਪਿ ਖਿਤ੍ਤੋ ਲੇਡ੍ਡੁ ਥੇਰਸ੍ਸ ਕਾਯੇ ਨਿਪਤਤਿ, ਅਞ੍ਞੇਨਪਿ ਖਿਤ੍ਤੋ ਦਣ੍ਡੋ ਤਸ੍ਸੇਵ ਕਾਯੇ ਨਿਪਤਤਿ. ਸੋ ਭਿਨ੍ਨੇਨ ਪਤ੍ਤੇਨ ਵਿਹਾਰਂ ਪਵਿਸਿਤ੍ਵਾ ਸਤ੍ਥੁ ਸਨ੍ਤਿਕਂ ਗਚ੍ਛਤਿ. ਸਤ੍ਥਾ ਤਂ ਓਵਦਤਿ ‘‘ਅਧਿਵਾਸੇਹਿ, ਤ੍ਵਂ ਬ੍ਰਾਹ੍ਮਣ, ਅਧਿਵਾਸੇਹਿ, ਤ੍ਵਂ ਬ੍ਰਾਹ੍ਮਣ, ਯਸ੍ਸ ਖੋ, ਤ੍ਵਂ ਬ੍ਰਾਹ੍ਮਣ, ਕਮ੍ਮਸ੍ਸ ਵਿਪਾਕੇਨ ਬਹੂਨਿ ਵਸ੍ਸਸਹਸ੍ਸਾਨਿ ਨਿਰਯੇ ਪਚ੍ਚੇਯ੍ਯਾਸਿ, ਤਸ੍ਸ, ਤ੍ਵਂ ਬ੍ਰਾਹ੍ਮਣ, ਕਮ੍ਮਸ੍ਸ ਵਿਪਾਕਂ ਦਿਟ੍ਠੇਵ ਧਮ੍ਮੇ ਪਟਿਸਂਵੇਦੇਸੀ’’ਤਿ. ਅਥ ਥੇਰੋ ਅਨੋਧਿਸੋ ਸਬ੍ਬਸਤ੍ਤੇਸੁ ਮੇਤ੍ਤਚਿਤ੍ਤਂ ਉਪਟ੍ਠਪੇਤ੍ਵਾ –
੮੭੪. ‘‘ਦਿਸਾਪਿ ਮੇ ਧਮ੍ਮਕਥਂ ਸੁਣਨ੍ਤੁ, ਦਿਸਾਪਿ ਮੇ ਯੁਞ੍ਜਨ੍ਤੁ ਬੁਦ੍ਧਸਾਸਨੇ;
ਦਿਸਾਪਿ ਮੇ ਤੇ ਮਨੁਜੇ ਭਜਨ੍ਤੁ, ਯੇ ਧਮ੍ਮਮੇਵਾਦਪਯਨ੍ਤਿ ਸਨ੍ਤੋ.
੮੭੫. ‘‘ਦਿਸਾ ਹਿ ਮੇ ਖਨ੍ਤਿਵਾਦਾਨਂ, ਅਵਿਰੋਧਪ੍ਪਸਂਸਿਨਂ;
ਸੁਣਨ੍ਤੁ ਧਮ੍ਮਂ ਕਾਲੇਨ, ਤਞ੍ਚ ਅਨੁਵਿਧੀਯਨ੍ਤੁ.
੮੭੬. ‘‘ਨ ਹਿ ਜਾਤੁ ਸੋ ਮਮਂ ਹਿਂਸੇ, ਅਞ੍ਞਂ ਵਾ ਪਨ ਕਞ੍ਚਿ ਨਂ;
ਪਪ੍ਪੁਯ੍ਯ ਪਰਮਂ ਸਨ੍ਤਿਂ, ਰਕ੍ਖੇਯ੍ਯ ਤਸਥਾਵਰੇ.
੮੭੭. ‘‘ਉਦਕਞ੍ਹਿ ਨਯਨ੍ਤਿ ਨੇਤ੍ਤਿਕਾ, ਉਸੁਕਾਰਾ ਦਮਯਨ੍ਤਿ ਤੇਜਨਂ;
ਦਾਰੁਂ ਦਮਯਨ੍ਤਿ ਤਚ੍ਛਕਾ, ਅਤ੍ਤਾਨਂ ਦਮਯਨ੍ਤਿ ਪਣ੍ਡਿਤਾ.
੮੭੮. ‘‘ਦਣ੍ਡੇਨੇਕੇ ਦਮਯਨ੍ਤਿ, ਅਙ੍ਕੁਸੇਭਿ ਕਸਾਹਿ ਚ;
ਅਦਣ੍ਡੇਨ ਅਸਤ੍ਥੇਨ, ਅਹਂ ਦਨ੍ਤੋਮ੍ਹਿ ਤਾਦਿਨਾ.
੮੭੯. ‘‘ਅਹਿਂਸਕੋਤਿ ਮੇ ਨਾਮਂ, ਹਿਂਸਕਸ੍ਸ ਪੁਰੇ ਸਤੋ;
ਅਜ੍ਜਾਹਂ ਸਚ੍ਚਨਾਮੋਮ੍ਹਿ, ਨ ਨਂ ਹਿਂਸਾਮਿ ਕਞ੍ਚਿ ਨਂ.
੮੮੦. ‘‘ਚੋਰੋ ਅਹਂ ਪੁਰੇ ਆਸਿਂ, ਅਙ੍ਗੁਲਿਮਾਲੋਤਿ ਵਿਸ੍ਸੁਤੋ;
ਵੁਯ੍ਹਮਾਨੋ ਮਹੋਘੇਨ, ਬੁਦ੍ਧਂ ਸਰਣਮਾਗਮਂ.
੮੮੧. ‘‘ਲੋਹਿਤਪਾਣਿ ਪੁਰੇ ਆਸਿਂ, ਅਙ੍ਗੁਲਿਮਾਲੋਤਿ ਵਿਸ੍ਸੁਤੋ;
ਸਰਣਗਮਨਂ ਪਸ੍ਸ, ਭਵਨੇਤ੍ਤਿ ਸਮੂਹਤਾ.
੮੮੨. ‘‘ਤਾਦਿਸਂ ਕਮ੍ਮਂ ਕਤ੍ਵਾਨ, ਬਹੁਂ ਦੁਗ੍ਗਤਿਗਾਮਿਨਂ;
ਫੁਟ੍ਠੋ ਕਮ੍ਮਵਿਪਾਕੇਨ, ਅਨਣੋ ਭੁਞ੍ਜਾਮਿ ਭੋਜਨਂ.
੮੮੩. ‘‘ਪਮਾਦਮਨੁਯੁਞ੍ਜਨ੍ਤਿ, ਬਾਲਾ ਦੁਮ੍ਮੇਧਿਨੋ ਜਨਾ;
ਅਪ੍ਪਮਾਦਞ੍ਚ ਮੇਧਾਵੀ, ਧਨਂ ਸੇਟ੍ਠਂਵ ਰਕ੍ਖਤਿ.
੮੮੪. ‘‘ਮਾ ਪਮਾਦਮਨੁਯੁਞ੍ਜੇਥ, ਮਾ ਕਾਮਰਤਿਸਨ੍ਥਵਂ;
ਅਪ੍ਪਮਤ੍ਤੋ ਹਿ ਝਾਯਨ੍ਤੋ, ਪਪ੍ਪੋਤਿ ਪਰਮਂ ਸੁਖਂ.
੮੮੫. ‘‘ਸ੍ਵਾਗਤਂ ਨਾਪਗਤਂ, ਨੇਤਂ ਦੁਮ੍ਮਨ੍ਤਿਤਂ ਮਮ;
ਸਵਿਭਤ੍ਤੇਸੁ ਧਮ੍ਮੇਸੁ, ਯਂ ਸੇਟ੍ਠਂ ਤਦੁਪਾਗਮਂ.
੮੮੬. ‘‘ਸ੍ਵਾਗਤਂ ਨਾਪਗਤਂ, ਨੇਤਂ ਦੁਮ੍ਮਨ੍ਤਿਤਂ ਮਮ;
ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.
੮੮੭. ‘‘ਅਰਞ੍ਞੇ ਰੁਕ੍ਖਮੂਲੇ ਵਾ, ਪਬ੍ਬਤੇਸੁ ਗੁਹਾਸੁ ਵਾ;
ਤਤ੍ਥ ਤਤ੍ਥੇਵ ਅਟ੍ਠਾਸਿਂ, ਉਬ੍ਬਿਗ੍ਗਮਨਸੋ ਤਦਾ.
੮੮੮. ‘‘ਸੁਖਂ ਸਯਾਮਿ ਠਾਯਾਮਿ, ਸੁਖਂ ਕਪ੍ਪੇਮਿ ਜੀਵਿਤਂ;
ਅਹਤ੍ਥਪਾਸੋ ਮਾਰਸ੍ਸ, ਅਹੋ ਸਤ੍ਥਾਨੁਕਮ੍ਪਿਤੋ.
੮੮੯. ‘‘ਬ੍ਰਹ੍ਮਜਚ੍ਚੋ ਪੁਰੇ ਆਸਿਂ, ਉਦਿਚ੍ਚੋ ਉਭਤੋ ਅਹੁ.
ਸੋਜ੍ਜ ਪੁਤ੍ਤੋ ਸੁਗਤਸ੍ਸ, ਧਮ੍ਮਰਾਜਸ੍ਸ ਸਤ੍ਥੁਨੋ.
੮੯੦. ‘‘ਵੀਤਤਣ੍ਹੋ ਅਨਾਦਾਨੋ, ਗੁਤ੍ਤਦ੍ਵਾਰੋ ਸੁਸਂਵੁਤੋ;
ਅਘਮੂਲਂ ਵਧਿਤ੍ਵਾਨ, ਪਤ੍ਤੋ ਮੇ ਆਸਵਕ੍ਖਯੋ.
੮੯੧. ‘‘ਪਰਿਚਿਣ੍ਣੋ ਮਯਾ ਸਤ੍ਥਾ, ਕਤਂ ਬੁਦ੍ਧਸ੍ਸ ਸਾਸਨਂ;
ਓਹਿਤੋ ਗਰੁਕੋ ਭਾਰੋ, ਭਵਨੇਤ੍ਤਿ ਸਮੂਹਤਾ’’ਤਿ. – ਇਮਾ ਗਾਥਾ ਅਭਾਸਿ;
ਤਤ੍ਥ ਦਿਸਾਪੀਤਿ ਮਯ੍ਹਂ ਦਿਸਾਪਿ ਅਮਿਤ੍ਤਾ ਪਚ੍ਚਤ੍ਥਿਕਾਪਿ ਯੇ ਮਂ ਏਵਂ ਉਪਵਦਨ੍ਤਿ ‘‘ਯਥਾ ਮਯਂ ਅਙ੍ਗੁਲਿਮਾਲਸ੍ਸ ਵਸੇਨ ਞਾਤਿਵਿਯੋਗਦੁਕ੍ਖਪਰੇਤਾ ਦੁਕ੍ਖਂ ਪਾਪੁਣਾਮ, ਏਵਂ ਅਙ੍ਗੁਲਿਮਾਲੋਪਿ ਦੁਕ੍ਖਂ ਪਾਪੁਣਾਤੂ’’ਤਿ. ਮੇ ਧਮ੍ਮਕਥਂ ਸੁਣਨ੍ਤੂਤਿ ਮਯਾ ਸਤ੍ਥੁ ਸਨ੍ਤਿਕੇ ਸੁਤਂ ਚਤੁਸਚ੍ਚਧਮ੍ਮਪਟਿਸਂਯੁਤ੍ਤਂ ਕਥਂ ਸੁਣਨ੍ਤੁ. ਯੁਞ੍ਜਨ੍ਤੂਤਿ ਸੁਤ੍ਵਾ ਚ ਤਦਤ੍ਥਾਯ ਪਟਿਪਜ੍ਜਨ੍ਤੁ. ਤੇ ਮਨੁਜੇ ਭਜਨ੍ਤੂਤਿ ਤਾਦਿਸੇ ਸਪ੍ਪੁਰਿਸੇ ਕਲ੍ਯਾਣਮਿਤ੍ਤੇ ਭਜਨ੍ਤੁ ਸੇਵਨ੍ਤੁ. ਯੇ ਧਮ੍ਮਮੇਵਾਦਪਯਨ੍ਤਿ ਸਨ੍ਤੋਤਿ ਯੇ ਸਪ੍ਪੁਰਿਸਾ ਕੁਸਲਧਮ੍ਮਮੇਵ, ਉਤ੍ਤਰਿਮਨੁਸ੍ਸਧਮ੍ਮਮੇਵ, ਨਿਬ੍ਬਤ੍ਤਿਤਲੋਕੁਤ੍ਤਰਧਮ੍ਮਮੇਵ ਚ ਆਦਪੇਨ੍ਤਿ ਸਮਾਦਪੇਨ੍ਤਿ ਗਣ੍ਹਾਪੇਨ੍ਤਿ.
ਖਨ੍ਤਿਵਾਦਾਨਨ੍ਤਿ ਅਧਿਵਾਸਨਖਨ੍ਤਿਮੇਵ ਵਦਨ੍ਤਾਨਂ ਤਤੋ ਏਵ ਅਵਿਰੋਧਪ੍ਪਸਂਸਿਨਨ੍ਤਿ ਕੇਨਚਿ ਅਵਿਰੋਧਭੂਤਾਯ ਮੇਤ੍ਤਾਯ ਏਵ ਪਸਂਸਨਸੀਲਾਨਂ. ਸੁਣਨ੍ਤੁ ਧਮ੍ਮਂ ਕਾਲੇਨਾਤਿ ਯੁਤ੍ਤਪ੍ਪਯੁਤ੍ਤਕਾਲੇ ਤੇਸਂ ਸਨ੍ਤਿਕੇ ਧਮ੍ਮਂ ਸੁਣਨ੍ਤੁ. ਤਞ੍ਚ ਅਨੁਵਿਧੀਯਨ੍ਤੂਤਿ ਤਞ੍ਚ ਯਥਾਸੁਤਂ ਧਮ੍ਮਂ ਸਮ੍ਮਦੇਵ ਉਗ੍ਗਹਿਤ੍ਵਾ ਅਨੁਕਰੋਨ੍ਤੁ ਧਮ੍ਮਾਨੁਧਮ੍ਮਂ ਪਟਿਪਜ੍ਜਨ੍ਤੂਤਿ ਅਤ੍ਥੋ.
ਨ ਹਿ ਜਾਤੁ ਸੋ ਮਮਂ ਹਿਂਸੇਤਿ ਸੋ ਮਯ੍ਹਂ ਦਿਸੋ ਪਚ੍ਚਤ੍ਥਿਕੋ ਜਾਤੁ, ਏਕਂਸੇਨੇਵ ਮਂ ਨ ਹਿਂਸੇ, ਨ ਬਾਧੇਯ੍ਯ. ਅਞ੍ਞਂ ਵਾ ਪਨ ਕਞ੍ਚਿ ਨਨ੍ਤਿ ਨ ਕੇਵਲਂ ਮਂਯੇਵ, ਅਞ੍ਞਂ ਵਾਪਿ ਕਞ੍ਚਿ ਸਤ੍ਤਂ ਨ ਹਿਂਸੇਯ੍ਯ, ਪਪ੍ਪੁਯ੍ਯ ਪਰਮਂ ਸਨ੍ਤਿਨ੍ਤਿ, ਪਰਮਂ ਉਤ੍ਤਮਂ ਸਨ੍ਤਿਂ ਨਿਬ੍ਬਾਨਂ ਪਾਪੁਣੇਯ੍ਯ, ਪਾਪੁਣਿਤ੍ਵਾ ਚ ਰਕ੍ਖੇਯ੍ਯ ਤਸਥਾਵਰੇਤਿ ਸਬ੍ਬੇ ਚ ਸਤ੍ਤੇ ਪਰਮਾਯ ਰਕ੍ਖਾਯ ਰਕ੍ਖੇਯ੍ਯ, ਸਿਸ੍ਸਂ ਪੁਤ੍ਤਂ ਵਿਯ ਪਰਿਪਾਲੇਯ੍ਯਾਤਿ ਅਤ੍ਥੋ.
ਏਵਂ ਥੇਰੋ ਇਮਾਹਿ ਗਾਥਾਹਿ ਪਰੇ ਪਾਪਤੋ ਪਰਿਮੋਚੇਨ੍ਤੋ ਪਰਿਤ੍ਤਕਿਰਿਯਂ ਨਾਮ ਕਤ੍ਵਾ ਅਤ੍ਤਨੋ ਪਟਿਪਤ੍ਤਿਂ ਪਕਾਸੇਨ੍ਤੋ ‘‘ਉਦਕਂ ਹੀ’’ਤਿ ਗਾਥਮਾਹ. ਤਤ੍ਥ ਪਥਵਿਯਾ ਥਲਟ੍ਠਾਨਂ ਖਣਿਤ੍ਵਾ ਨਿਨ੍ਨਟ੍ਠਾਨਂ ਪੂਰੇਤ੍ਵਾ ਮਾਤਿਕਂ ਵਾ ਕਤ੍ਵਾ ਰੁਕ੍ਖਦੋਣਿਂ ਵਾ ਠਪੇਤ੍ਵਾ ਅਤ੍ਤਨਾ ਇਚ੍ਛਿਕਿਚ੍ਛਿਤਟ੍ਠਾਨਂ ਉਦਕਂ ਨੇਨ੍ਤੀਤਿ ਨੇਤ੍ਤਿਕਾ, ਉਦਕਹਾਰਿਨੋ. ਤੇਜਨਨ੍ਤਿ ਕਣ੍ਡਂ. ਇਦਂ ਵੁਤ੍ਤਂ ਹੋਤਿ – ਨੇਤ੍ਤਿਕਾ ਅਤ੍ਤਨੋ ਰੁਚਿਯਾ ਉਦਕਂ ਨਯਨ੍ਤਿ, ਉਸੁਕਾਰਾਪਿ ਤਾਪੇਤ੍ਵਾ ਵਙ੍ਕਾਭਾਵਂ ਹਰਨ੍ਤਾ ਤੇਜਨਂ ਉਸੁਂ ਦਮਯਨ੍ਤਿ, ਉਜੁਕਂ ਕਰੋਨ੍ਤਿ, ਤਚ੍ਛਕਾਪਿ ਨੇਮਿਆਦੀਨਂ ਅਤ੍ਥਾਯ ਤਚ੍ਛਨ੍ਤਾ ਦਾਰੁਂ ਦਮਯਨ੍ਤਿ ਅਤ੍ਤਨੋ ਰੁਚਿਯਾ ਉਜੁਂ ਵਾ ਵਙ੍ਕਂ ਵਾ ਕਰੋਨ੍ਤਿ. ਏਵਂ ਏਤ੍ਤਕਂ ਆਰਮ੍ਮਣਂ ਕਤ੍ਵਾ ਪਣ੍ਡਿਤਾ ਸਪ੍ਪਞ੍ਞਾ ਅਰਿਯਮਗ੍ਗਂ ਉਪ੍ਪਾਦੇਨ੍ਤਾ ਅਤ੍ਤਾਨਂ ਦਮੇਨ੍ਤਿ, ਅਰਹਤ੍ਤਪ੍ਪਤ੍ਤਾ ਪਨ ਏਕਨ੍ਤਦਨ੍ਤਾ ਨਾਮ ਹੋਨ੍ਤੀਤਿ.
ਇਦਾਨਿ ਪੁਰਿਸਦਮ੍ਮਸਾਰਥਿਨਾ ਸਤ੍ਥਾਰਾ ਅਤ੍ਤਨੋ ਦਮਿਤਾਕਾਰਂ ਕਤਞ੍ਞੁਤਞ੍ਚ ਪਕਾਸੇਨ੍ਤੋ ‘‘ਦਣ੍ਡੇਨੇਕੇ’’ਤਿਆਦਿਕਾ ਪਞ੍ਚ ਗਾਥਾ ਅਭਾਸਿ. ਤਤ੍ਥ ਦਣ੍ਡੇਨੇਕੇ ਦਮਯਨ੍ਤੀਤਿ ਰਾਜਰਾਜਮਹਾਮਤ੍ਤਾਦਯੋ ਦਣ੍ਡੇਨ, ਹਤ੍ਥਿਅਸ੍ਸਾਦਿਨਾ ਬਲਕਾਯੇਨ ਚ ਪਚ੍ਚਤ੍ਥਿਕਾਦਿਕੇ ਦਮੇਨ੍ਤਿ, ਗੋਪਾਲਾਦਯੋ ਚ ਗਾਵਾਦਿਕੇ ਦਣ੍ਡੇਨ ਯਟ੍ਠਿਯਾ ਦਮੇਨ੍ਤਿ. ਹਤ੍ਥਾਚਰਿਯਾ ਹਤ੍ਥਿਂ ਅਙ੍ਕੁਸੇਹਿ, ਅਸ੍ਸਾਚਰਿਯਾ ਅਸ੍ਸੇ ਕਸਾਹਿ ਚ ਦਮੇਨ੍ਤਿ. ਅਦਣ੍ਡੇਨ ਅਸਤ੍ਥੇਨ, ਅਹਂ ਦਨ੍ਤੋਮ੍ਹਿ ਤਾਦਿਨਾਤਿ ਅਹਂ ਪਨ ਇਟ੍ਠਾਦੀਸੁ ਤਾਦਿਭਾਵਪ੍ਪਤ੍ਤੇਨ ਸਮ੍ਮਾਸਮ੍ਬੁਦ੍ਧੇਨ ਵਿਨਾ ਏਵ ਦਣ੍ਡੇਨ, ਵਿਨਾ ਸਤ੍ਥੇਨ, ਨਿਹਿਤਦਣ੍ਡਨਿਹਿਤਸਤ੍ਥਭਾਵੇਨ ਦਨ੍ਤੋ ਦਮਿਤੋ ਨਿਬ੍ਬਿਸੇਵਨੋ ਗਤੋ ਅਮ੍ਹਿ.
ਅਹਿਂਸਕੋਤਿ ਮੇ ਨਾਮਂ, ਹਿਂਸਕਸ੍ਸ ਪੁਰੇ ਸਤੋਤਿ ਸਤ੍ਥਾਰਾ ਸਮਾਗਮਤੋ ਪੁਬ੍ਬੇ ਹਿਂਸਕਸ੍ਸ ਮੇ ਸਮਾਨਸ੍ਸ ਅਹਿਂਸਕੋਤਿ ਨਾਮਮਤ੍ਤਂ ਅਹੋਸਿ. ਅਜ੍ਜਾਹਨ੍ਤਿ ਇਦਾਨਿ ਪਨਾਹਂ ‘‘ਅਹਿਂਸਕੋ’’ਤਿ ਸਚ੍ਚਨਾਮੋ ਅਵਿਤਥਨਾਮੋ ਅਮ੍ਹਿ. ਤਸ੍ਮਾ ਨ ਨਂ ਹਿਂਸਾਮਿ ਕਞ੍ਚਿਪਿ ਸਤ੍ਤਂ ਨ ਹਿਂਸਾਮਿ ਨ ਬਾਧੇਮਿ, ਨਨ੍ਤਿ ਨਿਪਾਤਮਤ੍ਤਂ.
ਵਿਸ੍ਸੁਤੋਤਿ ‘‘ਪਾਣਾਤਿਪਾਤੀ ਲੁਦ੍ਦੋ ਲੋਹਿਤਪਾਣੀ’’ਤਿਆਦਿਨਾ ਪਞ੍ਞਾਤੋ. ਮਹੋਘੇਨਾਤਿ ਕਾਮੋਘਾਦਿਨਾ ਮਹਤਾ ਓਘੇਨ, ਤਸ੍ਸ ਓਘਸ੍ਸ ਵਿਚ੍ਛੇਦਕਰਂ ਬੁਦ੍ਧਂ ਸਰਣਂ ਬੁਦ੍ਧਸਙ੍ਖਾਤਂ ਸਰਣਂ ਅਗਮਂ ਉਪਗਚ੍ਛਿਂ.
ਲੋਹਿਤਪਾਣੀਤਿ ਪਾਣਮਤਿਪਾਤਨੇਨ ਪਰੇਸਂ ਲੋਹਿਤੇਨ ਰੁਹਿਰੇਨ ਮਕ੍ਖਿਤਪਾਣਿ. ਸਰਣਗਮਨਂ ਪਸ੍ਸਾਤਿ ਮਹਪ੍ਫਲਂ ਮਮ ਸਰਣਗਮਨਂ ਪਸ੍ਸਾਤਿ ਅਤ੍ਤਾਨਮੇਵਾਲਪਤਿ.
ਤਾਦਿਸਂ ਕਮ੍ਮਨ੍ਤਿ ਅਨੇਕਸਤਪੁਰਿਸਵਧਂ ਦਾਰੁਣਂ ਤਥਾਰੂਪਂ ਪਾਪਕਮ੍ਮਂ. ਫੁਟ੍ਠੋ ਕਮ੍ਮਵਿਪਾਕੇਨਾਤਿ ਪੁਬ੍ਬੇ ਕਤਸ੍ਸ ਪਾਪਕਮ੍ਮਸ੍ਸ ਵਿਪਾਕੇਨ ਫੁਟ੍ਠੋ, ਸਬ੍ਬਸੋ ਪਹੀਨਕਮ੍ਮੋ ਵਿਪਾਕਮਤ੍ਤਂ ਪਚ੍ਚਨੁਭੋਨ੍ਤੋ. ਅਥ ਵਾ ਫੁਟ੍ਠੋ ਕਮ੍ਮਵਿਪਾਕੇਨਾਤਿ ਉਪਨਿਸ੍ਸਯਭੂਤਸ੍ਸ ਕੁਸਲਕਮ੍ਮਸ੍ਸ ਫਲਭੂਤੇਨ ਲੋਕੁਤ੍ਤਰਮਗ੍ਗੇਨ, ਲੋਕੁਤ੍ਤਰਕਮ੍ਮਸ੍ਸੇਵ ਵਾ ਫਲੇਨ ਵਿਮੁਤ੍ਤਿਸੁਖੇਨ ਫੁਟ੍ਠੋ. ਸਬ੍ਬਸੋ ਕਿਲੇਸਾਨਂ ਖੀਣਤ੍ਤਾ ਅਨਣੋ ਭੁਞ੍ਜਾਮਿ ਭੋਜਨਂ, ਭੋਜਨਾਪਦੇਸੇਨ ਚਤ੍ਤਾਰੋਪਿ ਪਚ੍ਚਯੇ ਵਦਤਿ.
ਇਦਾਨਿ ਪੁਬ੍ਬੇ ਅਤ੍ਤਨੋ ਪਮਾਦਵਿਹਾਰਂ ਗਰਹਾਮੁਖੇਨ ਪਚ੍ਛਾ ਅਪ੍ਪਮਾਦਪਟਿਪਤ੍ਤਿਂ ਪਸਂਸਨ੍ਤੋ ਤਤ੍ਥ ਚ ਪਰੇਸਂ ਉਸ੍ਸਾਹਂ ਜਨੇਨ੍ਤੋ ‘‘ਪਮਾਦਮਨੁਯੁਞ੍ਜਨ੍ਤੀ’’ਤਿਆਦਿਕਾ ਗਾਥਾ ਅਭਾਸਿ. ਤਤ੍ਥ ਬਾਲਾਤਿ ਬਾਲ੍ਯੇਨ ਸਮਨ੍ਨਾਗਤਾ ਇਧਲੋਕਪਰਲੋਕਤ੍ਥਂ ਅਜਾਨਨ੍ਤਾ. ਦੁਮ੍ਮੇਧਿਨੋਤਿ ਨਿਪ੍ਪਞ੍ਞਾ, ਤੇ ਪਮਾਦੇ ਆਦੀਨਵਂ ਅਪਸ੍ਸਨ੍ਤਾ ਪਮਾਦਂ ਅਨੁਯੁਞ੍ਜਨ੍ਤਿ ਪਵਤ੍ਤੇਨ੍ਤਿ, ਪਮਾਦੇਨੇਵ ਕਾਲਂ ਵੀਤਿਨਾਮੇਨ੍ਤਿ. ਮੇਧਾਵੀਤਿ ਧਮ੍ਮੋਜਪਞ੍ਞਾਯ ਸਮਨ੍ਨਾਗਤੋ ਪਨ ਪਣ੍ਡਿਤੋ ਕੁਲਵਂਸਾਗਤਂ ਸੇਟ੍ਠਂ ਉਤ੍ਤਮਂ ਸਤ੍ਤਰਤਨਧਨਂ ਵਿਯ ਅਪ੍ਪਮਾਦਂ ਰਕ੍ਖਤਿ. ਯਥਾ ਹਿ ‘‘ਉਤ੍ਤਮਂ ਧਨਂ ਨਿਸ੍ਸਾਯ ਭੋਗਸਮ੍ਪਤ੍ਤਿਂ ਪਾਪੁਣਿਸ੍ਸਾਮ, ਪੁਤ੍ਤਦਾਰਂ ਪੋਸੇਸ੍ਸਾਮ, ਸੁਗਤਿਮਗ੍ਗਂ ਸੋਧੇਸ੍ਸਾਮਾ’’ਤਿ ਧਨੇ ਆਨਿਸਂਸਂ ਪਸ੍ਸਨ੍ਤਾ ਧਨਂ ਰਕ੍ਖਨ੍ਤਿ; ਏਵਂ ਪਣ੍ਡਿਤੋਪਿ ‘‘ਅਪ੍ਪਮਾਦਂ ਨਿਸ੍ਸਾਯ ਪਠਮਜ੍ਝਾਨਾਦੀਨਿ ਪਟਿਲਭਿਸ੍ਸਾਮਿ, ਮਗ੍ਗਫਲਾਨਿ ਪਾਪੁਣਿਸ੍ਸਾਮਿ, ਤਿਸ੍ਸੋ ਵਿਜ੍ਜਾ ਛ ਅਭਿਞ੍ਞਾ ਸਮ੍ਪਾਦੇਸ੍ਸਾਮੀ’’ਤਿ ਅਪ੍ਪਮਾਦੇ ਆਨਿਸਂਸਂ ਪਸ੍ਸਨ੍ਤੋ ਧਨਂ ਸੇਟ੍ਠਂਵ ਅਪ੍ਪਮਾਦਂ ਰਕ੍ਖਤੀਤਿ ਅਤ੍ਥੋ.
ਮਾ ਪਮਾਦਨ੍ਤਿ ਪਮਾਦਂ ਮਾ ਅਨੁਯੁਞ੍ਜੇਥ ਪਮਾਦੇਨ ਕਾਲਂ ਮਾ ਵੀਤਿਨਾਮਯਿਤ੍ਥ. ਕਾਮਰਤਿਸਨ੍ਥਵਨ੍ਤਿ ਵਤ੍ਥੁਕਾਮੇਸੁ, ਕਿਲੇਸਕਾਮੇਸੁ ਚ ਰਤਿਸਙ੍ਖਾਤਂ ਤਣ੍ਹਾਸਨ੍ਥਵਮ੍ਪਿ ਮਾ ਅਨੁਯੁਞ੍ਜੇਥ ਮਾ ਵਿਨ੍ਦਿਤ੍ਥ ਮਾ ਪਟਿਲਭਿਤ੍ਥ. ਅਪ੍ਪਮਤ੍ਤੋ ਹੀਤਿ ਉਪਟ੍ਠਿਤਸਤਿਤਾਯ ਅਪ੍ਪਮਤ੍ਤੋ ਪੁਗ੍ਗਲੋ ਝਾਯਨ੍ਤੋ ਝਾਯਨਪ੍ਪਸੁਤੋ ਪਰਮਂ ਉਤ੍ਤਮਂ ਨਿਬ੍ਬਾਨਸੁਖਂ ਪਾਪੁਣਾਤਿ.
ਸ੍ਵਾਗਤਂ ਨਾਪਗਤਨ੍ਤਿ ਯਂ ਤਦਾ ਮਮ ਸਤ੍ਥੁ ਸਨ੍ਤਿਕੇ ਆਗਤਂ ਆਗਮਨਂ, ਸਤ੍ਥੁ ਵਾ ਤਸ੍ਮਿਂ ਮਹਾਵਨੇ ਆਗਮਨਂ, ਤਂ ਸ੍ਵਾਗਤਂ ਸ੍ਵਾਗਮਨਂ ਨਾਪਗਤਂ, ਅਤ੍ਥਤੋ ਅਪੇਤਂ ਵਿਗਤਂ ਨ ਹੋਤਿ. ਨੇਤਂ ਦੁਮ੍ਮਨ੍ਤਿਤਂ ਮਮਾਤਿ ਯਂ ਤਦਾ ਮਯਾ ‘‘ਸਤ੍ਥੁ ਸਨ੍ਤਿਕੇ ਪਬ੍ਬਜਿਸ੍ਸਾਮੀ’’ਤਿ ਮਨ੍ਤਿਤਂ, ਇਦਮ੍ਪਿ ਮਮ ਨ ਦੁਮ੍ਮਨ੍ਤਿਤਂ, ਸੁਮਨ੍ਤਿਤਮੇਵ. ਕਸ੍ਮਾ? ਸਵਿਭਤ੍ਤੇਸੁ ਧਮ੍ਮੇਸੂਤਿ ਸਾਵਜ੍ਜਾਨਵਜ੍ਜਾਦਿਵਸੇਨ ਪਕਾਰਤੋ ਵਿਭਤ੍ਤੇਸੁ ਧਮ੍ਮੇਸੁ ਯਂ ਸੇਟ੍ਠਂ ਉਤ੍ਤਮਂ ਪਵਰਂ ਨਿਬ੍ਬਾਨਂ. ਤਦੁਪਾਗਮਂ ਤਦੇਵ ਉਪਗਚ੍ਛਿਨ੍ਤਿ ਅਤ੍ਥੋ.
‘‘ਤਦਾ ਪੁਥੁਜ੍ਜਨਕਾਲੇ ਪਯੋਗਾਸਯਵਿਪਨ੍ਨਤਾਯ ਅਰਞ੍ਞਾਦੀਸੁ ਦੁਕ੍ਖਂ ਵਿਹਾਸਿਂ, ਇਦਾਨਿ ਪਯੋਗਾਸਯਸਮ੍ਪਨ੍ਨਤਾਯ ਤਤ੍ਥ ਸੁਖਂ ਵਿਹਰਾਮੀ’’ਤਿ ਸੁਖਵਿਹਾਰਭਾਵਞ੍ਚੇਵ ‘‘ਪੁਬ੍ਬੇ ਜਾਤਿਮਤ੍ਤੇਨ ਬ੍ਰਾਹ੍ਮਣੋ, ਇਦਾਨਿ ਸਤ੍ਥੁ ਓਰਸਪੁਤ੍ਤਤਾਯ ਬ੍ਰਾਹ੍ਮਣੋ’’ਤਿ ਪਰਮਤ੍ਥਬ੍ਰਾਹ੍ਮਣਭਾਵਞ੍ਚ ਦਸ੍ਸੇਨ੍ਤੋ ‘‘ਅਰਞ੍ਞੇ’’ਤਿਆਦਿਮਾਹ. ਤਤ੍ਥ ਸੁਖਂ ਸਯਾਮੀਤਿ ਸਯਨ੍ਤੋਪਿ ਸੁਖਂ ਸੁਖੇਨ ਨਿਦੁਕ੍ਖੇਨ ਚਿਤ੍ਤੁਤ੍ਰਾਸਾਦੀਨਂ ਅਭਾਵੇਨ ਚੇਤੋਦੁਕ੍ਖਰਹਿਤੋ ਸਯਾਮਿ. ਠਾਯਾਮੀਤਿ ਠਾਮਿ. ਅਹਤ੍ਥਪਾਸੋ ਮਾਰਸ੍ਸਾਤਿ ਕਿਲੇਸਮਾਰਾਦੀਨਂ ਅਗੋਚਰੋ. ਅਹੋ ਸਤ੍ਥਾਨੁਕਮ੍ਪਿਤੋਤਿ ਸਤ੍ਥਾਰਾਨੁਕਮ੍ਪਿਤੋ ਅਹੋ.
ਬ੍ਰਹ੍ਮਜਚ੍ਚੋਤਿ ਬ੍ਰਾਹ੍ਮਣਜਾਤਿਕੋ. ਉਦਿਚ੍ਚੋ ਉਭਤੋਤਿ ਮਾਤਿਤੋ ਚ ਪਿਤਿਤੋ ਚ ਉਭਤੋ ਉਦਿਤੋ ਸਂਸੁਦ੍ਧਗਹਣਿਕੋ. ਸੇਸਂ ਤਤ੍ਥ ਤਤ੍ਥ ਵੁਤ੍ਤਨਯਮੇਵ.
ਅਙ੍ਗੁਲਿਮਾਲਤ੍ਥੇਰਗਾਥਾਵਣ੍ਣਨਾ ਨਿਟ੍ਠਿਤਾ.